<a href="https://kyzylorda-news.kz/">Kyzylorda-news.kz</a> Жақында ардагерлер кеңесінің мәжіліс залында қоғамдық кеңестің кезекті отырысы өтті. Арал&nbsp;аудандық қоғамдық кеңестің төрағасы А.Жоланов төрағалық еткен отырысқа қоғамдық кеңес мүшелері, Жіңішкеқұм, Қарақұм, Аққұм ауылдық округтерінің әкімдері, Арал ауданы әкімі аппаратының цифрлық технологиялар және мемлекеттік қызметтердің мониторингі бөлімінің бас маманы Балпаш Елдос Арғынбайұлы, бұқаралық ақпарат құралдары қызметкерлері, сонымен қатар Қазақстан Республикасының Мемлекеттік қызмет істері агенттігінің Қызылорда облысы бойынша департаментінің мемлекттік қызметтер басқармасының бас маманы Тілепбаева Динара Нұрланқызы бейне байланыс арқылы қатысты.Қоғамдық кеңестің күн тәртібінде «Жіңішкеқұм ауылдық округі әкімінің аппараты» коммуналдық мемлекеттік мекемесі арқылы көрсетілетін мемлекеттік қызметтер туралы, «Қарақұм ауылдық округі әкімінің аппараты» коммуналдық мемлекеттік мекемесі арқылы көрсетілетін мемлекеттік қызметтер туралы және «Аққұм ауылдық округі әкімінің аппараты» коммуналдық мемлекеттік мекемесі арқылы көрсетілетін мемлекеттік қызметтер туралы мәселелер қаралды.Күн тәртібіндегі бірінші мәселе бойынша Жіңішкеқұм ауылдық округінің әкімі Әлішев Мұқансерік Қуандықұлы хабарлама жасап, мемлекеттiк көрсетiлетiн қызметтердi алу бойынша олардың орындалу мерзiмiн, сапасын ұдайы бақылауда ұстау қажеттігі, кеңес отырысында айтылған ұсыныстарды алдағы уакытта қадағалап, орындалуын қамтамасыз етy туралы, ауылдық oкpyгтe салынып жатқан мектеп құрылысын бақылауда ұстау керектігі туралы, мемлекеттiк қызмет керсетyдiң жыл қорытындысымен қорытындысы бойынша коғамдык кеңеске атқарылған жұмыстары жөнiнде мәлiмет уақытылы беруді және ауылдық округке жүргiзiлетiн ауыз су мәселесін күн тәртiбiнен түсiрмей бақылау туралы шешім қабылданды.&nbsp;Екінші мәселе бойынша «Қарақұм ауылдық округі әкімі аппараты арқылы көрсетілетін мемлекеттік қызметтер туралы» хабарламаны Қарақұм ауылдық округінің әкімі Бозғұл Мұхтар Жүгінісұлы жасады және кеңесте мекеме тарапынан жасалып жатқан жұмыстарды жүйелі түрде жалғастыру, ауыл тұрғындарының өзекті мәселелерін ұдайы назарда ұстап, уақытылы шешу және атқарылып жатқан жұмыстарды қоғамдық кеңестің сұранысына сәйкес мәліметтер жіберіп отыру туралы шешім қабылдады.Күн тәртібіндегі соңғы мәселе бойынша «Аққұм ауылдық округі әкімі аппараты арқылы көрсетілетін мемлекеттік қызметтер туралы» Аққұм ауылдық округінің әкімі Жандаулетов Нұрбек Сәуренұлы хабарлама жасады. Аққұм ауылдық округi әкiмi аппараты коммуналдық мемлекеттік мeкeмeci тарапынан жасалып жатырған жұмыстарды жүйелi түрде жалғастыру, ауылдық округке жүргiзiлiп жатқан құрылыс жұмыстарын бақылауда ұстау, сонымен қатар ауылдық округ әкiмi аппараты арқылы алдағы уақытта атқарылып жатырған жұмыстар тyралы сұранысқа сәйкес аудандық қоғамдық кеңеске ұдайы мәлiмет жолдап отыру туралы шешім шығарды.Жиын қорытындысында алдағы уақытта барлық жұмыстың жоспарға сай орындалуын қадағалау тиісті өкілдерге жүктелді.

Қоғамдық кеңестің кезекті отырысы өтті

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаев «Мерейлі отбасы» Ұлттық байқауын жыл сайын ұйымдастыруды қолға алып келеді. Ол өз сөзінде «Бұл отбасы институтының және отбасы құндылықтарын дәріптеуге, ұлтымыздың әлеуетін арттыруға орасан зор үлес қосып келе жатқан бірегей жоба. Жыл сайын өткізілетін байқау шаңырағы шаттықа бөленіп, берекелі бірлік пен татулыққа ұйыған өнегелі отбасылар күллі елге танытады. Мұндай үлгілі әулеттер елімізде аз емес, өте көп. Халқымыз қай заманда отбасы дәстүрін берік ұстанып, қадірлей білген. «Үлкенге құрмет, кішіге ізет» біздің қанымызға сіңген қасиет. Әрбір азаматтың &nbsp;адамгершілік болмысын қалыптасуына отбасындағы ахуал айрықша әсер етеді» деген болатын. Осы ретте байқаудың биылғы жылғы аудандық кезеңіне қатысушы жас отбасы Байтұрғановтар отбасын әңгімеге арқау етпекпіз.Отбасы мемлекеттің мызғымас іргетасын қалыптастыратын жалғыз күретамыр. Себебі болашақтың жарқын болуы ең бірінші отбасындағы тәлім-тәрбиеге байланысты. Байтұрғановтар отбасы жас та болса өздерін өнегелі әке, үлгілі ана, зерек бала ретінде аудан көлемінде таныта білген жандар.&nbsp;– Әрбір адам баласы үшін отбасы ең басты байлық. Қоғамның тыныштығы мен берекелі болуы да отбасына байланысты. Еліміздегі үлгілі отбасыларды насихаттап, олардың өнегелі өмір жолын жастарға үлгі ету мақсатында жыл сайын дәстүрлі түрде ұйымдастырылып жүрген «Мерейлі отбасы» байқауы ел мерейін өсіріп келеді. Осы ретте байқаудың аудандық кезеңіне мен де көпбалалы, жас отбасы ретінде қатысып көруді шештім, – дейді отағасы Қорғанбек Байтұрғанов. &nbsp;Қорғанбек жары Жазира Әбдірақимовамен шаңырақ көтергеніме 13 жыл болған. Осы жылдар ішінде олар елге өз мамандықтары бойынша қызмет ете жүріп, демографиялық тұрғыдан дамуға үлес қосты. Қазірде бұл отбасы 4 баланың ата-анасы. Сәтін салса бесінші перзентін бауырына алатын күн де жақын. Жастайынан ел арасында жақсы қасиеттерімен танылған бұл жандар қызмет бабында да елге елеулі еңбек етіп келеді. Қорғанбек спорт саласында жетістік биігінен көріне білгендігінің арқасында жуырда Арал аудандық «Спорт клуб» КММ-нің басшысы қызметіне тағайындалды. Ал жары Жазира «Сартай» бөбекжай-бақшасында тәрбиеші болып, ұрпақ тәрбиелеу ісімен айналысып келеді. Балалары оқу озаты болумен қатар спортты жанына серік етіп, республикалық байқауларда жүлдегер болып жүр.– Қызым Набатқан волейболдан аудандық қыздар құрамасының мүшесі. Ал Нұризат әйелдер арасында еркін күрестен облыс чемпионы. Республикалық додаларға қатысып, жүлдемен оралып жүр. Кіші қызым Айзере мен ұлым Аңсар да алғыр болып өсіп келеді. Олардың болашағынан зор үміт күтемін. Және ел үшін еңбек етер азамат болулары үшін әке ретінде бар күш жігерімді саламын. Себебі болашақ ұрпақ үшін бар тәрбие отбасынан басталады. Қазақта «Ұяда не көрсең, ұшқанда соны ілесің» деген жақсы сөз бар. Біз де балаларымызға үлгі тұтар ата-ана болуды басты мақсат етеміз.Ортамыздағы қартымыз Жұмагүл анамызды сыйлап, алақанда аялауды перзенттік борышымызға балаймыз, – дейді отағасы.Бұл байқау бізге жас отбасылардың ел дамуына елеулі үлес қосып жатқандығын дәлелдей түспек. «Отан отбасынан басталады» десек, осындай жас отбасылар ұлттың ұлылығын ұлықтап, елдің мәртебесін биіктете түспек.

Мерейі үстем жас отбасы

<a href="https://kyzylorda-news.kz/">Kyzylorda-news.kz</a>&nbsp;Қазағымыздың салт-дәстүрі мен әдет-ғұрпы ұлтымызды сақтау, оны одан әрі жалғастыру үшін маңызды болса, заманауи технология, ғылыми прогресс мемлекет дамуы үшін аса қажетті дүние саналады. Сол айтпақшы, елдің экономикалық тұрғыда алға жылжуы мен өркендеуінде ғалымдар мен білікті мамандардың айтарлықтай орны бар десек, мұндай игі іске біздің жерлестеріміз де үлес қосып жүр. Олардың қатарында ауданымыздың тумасы, Қазақстан Республикасы «Атом саласының еңбек сіңірген қызметкері» Марат Ниетбаевтың есімі де құрметпен аталады.Қазақта «Тектіден текті туады, тектілік тұқым қуады» деген өнегелі сөз бар. Марат ағамыз да текті ұрпақтың өкілі. Оның әкесі Әбен Ниетбайұлы ұстаздықтан бастап, ел басқару ісіне дейін араласқан белді азамат болған. Ауданда комсомол комитетінің ІІ хатшысы кезінде жастардың қоғам өміріне араласуына, белсенділік танытуына атсалысқан. Өкінішке орай, шолақ белсенділердің жаласынан 1937 жылы «Халық жауы» атанып, 10 жылға абақтыға қамалады. Халық жауларына арналған түрмеде ол ақын Тұрмағамбет Ізтілеуов, Әбзәли Егізбаевтармен бірге отырады. «Аққа құдай жақ» демекші, одан ақталып шыққан соң ел қорғау мақсатында Ұлы Отан соғысына аттанып кете барады. Майданда барлаушы болған ол фашистермен жан алысып, жан беріседі. Неміс басқыншыларын тұтқындағаны және қанды ұрыстағы қайталанбас ерлігі үшін «Қызыл Жұлдыз», ІІ дәрежелі «Ұлы Отан соғысы» ордендерімен марапатталады. Соғыстан кейінгі жылдары да халық шаруашылығын қайта қалпына келтіруге үлес қосып, бірнеше ауылға төраға болады. Одан бөлек, аудандық тұтынушылар одағына қарасты кооператив басшысы қызметтерін де елдің ықыласына бөлене жүріп атқарады.Міне осындай арда азаматтың ұрпағы Марат Әбенұлы 1956 жылы қазіргі Ақтөбе ауылында сол уақытта ұжшар төрағасы болған Әбен әкеміз бен жас ұрпақты біліммен сусындатқан алғашқы ұстаздардың бірі, ұлағатты жан Рабиға Тебенованың жанұясында дүниеге келеді. Кейінірек отбасы жұмыс бабымен Жосалы кентіне қоныс аударса, бала Марат та осында ер жетіп, 1973 жылы No27 орта мектепті бітіріп шығады. Онжылдықты ойдағыдай аяқтаған ол алғашқы еңбек жолын «Казсель-хозтехника» аудандық бірлестігінде газ-электр дәнекерлеушісі болып бастайды. Адамға қай кезде де қанат бітіретін арманы ғой. Жұмыс істеп жүрсе де, оның көкейінде тек қана «оқысам, білім алсам» деген арман болған еді. Сол арманы оны алға жетеледі. Еңбектің адал дәмін татқан жас жігітті арман-мақсаты Қазақ политехникалық институтының «Металлургия» факультетінің студенті атандырды.«Инженер-металлург» мамандығын меңгерген жас жоғары оқу орны тарапынан жолдамамен Шымкент қорғасын зауытына жіберіліп, онда ол №1 балқыту цехына 5-разрядты балқытушы етіп жұмысқа қабылданды. Мұнан соң оның қызметі біртіндеп өсіп, оған үлкен жауапкершілік жүктеледі. Атап айтқанда, балқыту цехының ауысымды басқаратын шебері, цехтың аға шебері, цех бастығының орынбасары, бастығы қызметтерін абыроймен істейді. Алған білімі мен жиған тәжірибесінің арқасында осы зауыттың бас металлургы, өндіріс бөлімінің бастығы, зауыт директоры секілді сындарлы жолдан өтеді. 1992 жылы зауыт акционерлік қоғам болып қайта құрылғанда бас директорлық қызметке тағайындалады. Бес жылдан соң Степногорск қаласындағы «Целинный Тау-кен химиялық комбинатының» басқарушысы, 1998 жылы «Қазатомөнеркәсіп» жүйесіндегі Тау-кен департаментінің директоры, 2004 жылы жаңадан құрылған Тау-кен компаниясының бас инженері, 2006 жылы «Қазатомөнеркәсіп» Ұлттық Атом компаниясының Тау-кен еншілес кәсіпорнының бас директоры лауазымдарында болады. Ал 2011-де «Uranium One Lnc» атты канадалық компанияның өндіріс жөніндегі вице-президенті, 2018-де «Қазатомөнеркәсіп» ҰАК акционерлік қоғамының өндіріс жөніндегі бас директорлығына шақыртулар алады. 2019 жылы ағамыз жасына байланысты зейнет демалысына шығады.Әрбір адамның болашағына өскен ортасы, ата-анасы және білім берген ұстаздары әсер ететіні анық. Біздің кейіпкеріміздің де жастайынан алған тәлім- тәрбиесінің келешегіне жарқын жол салғаны анық.– Ата-анамыз зиялы адамдар болды. Әкеміз ел басқарса, анамыз білім саласында ұстаздық етті. Осындай кісілердің берген тәрбиесімен өмірден өз орнымызды тауып, бір-бір мамандық иесі атандық. Олар отбасы мен Отанға, білім мен еңбекке құрметпен қарауды, кішіге көмектесіп, үлкенді сыйлауды үйретті. Қандай биікті бағындырсақ та қарапайым, әдепті, сабырлы болуды санамызға сіңіріп өсірді. Ата-анамыздың ауыл халқы мен туған-туыс алдындағы абырой-беделі біз үшін маңызды болатын. Сол себепті де оларды ұятқа қалдырмауға тырысып, атымызды жақсы жағынан шығаруға барымызды салып бақтық. Балалық шағым Жосалыда өтті. Сол кезден-ақ доспен адал болуға, көршіге көмектесуге бейім болдық. Тіпті кейбірімен қазірге дейін етене араласамын. Жастық шақтағы бойға сіңген жақсы қасиеттен болар, бүгінде өз перзенттерім де азамат болып ер жетіп, сенімімізден шығып келеді. Өзімді бақытты адаммын деп есептеймін. Студенттік кезде де жолым болды. Мәскеу, Ленинград қалалары мен бұрынғы Кеңес Одағындағы басқа да озық ғылыми- өндірістік ортадан шыққан мықты деген академик-профессорлардан сабақ алдым. Бұл менің білім биігіне ұмтылуыма, жылдам шешім қабылдап үйренуіме өмір мектебі болды. Маған көбіне-көп журналистер тарапынан жауапкершілігі аса қиын да күрделі атом саласын не себепті таңдадыңыз деп сұрап жатады. Жауап берейін. 1980-1997 жылдар аралығында Шымкент қорғасын зауытында цехтың 5-разрядты балқытушы лауазымынан бастап осы ірі кәсіпорынның бас директоры лауазымына дейін өсіп шықтым. Онда алған мол тәжірибем мен металлургия саласындағы білімімнің арқасында мені 1997 жылы Қазақстанның атом саласының негізін қалаушы және «Қазатомөнеркәсіп» Ұлттық атом компаниясының тұңғыш президенті Бағдат Мұхаметұлы Шаяхметов атом саласына жұмыс істеуге шақырды. Өзіңіз білетіндей, атом өнеркәсібі уран сияқты металдар тобының элементіне негізделген. Уран атомдарын ыдыратып, энергия алуға болады. Энергия өндірісі – еліміздің атом өнеркәсібінің түпкі мақсатын білдіреді. Ол кезде еліміз уран өндіруші мемлекеттердің алғашқы ондығына да кірмеген-ді. Алайда, атом өнеркәсібі қызметкерлерінің, оның ішінде өз мамандарының күш-жігерімен біз, 2008 жылы уран өндірісі бойынша әлемде бірінші орынға шықтық. Бұл факт – бәріміз мақтан тұтатын ең маңызды әрі сүйекті жетістігіміз, – дейді Марат Әбенұлы.Әркімнің өмірде өз жолы бар. Оның дара ету де әркімнің өз қолындағы іс. Осы ретте ғалым ағамыз адамның жетістікке жетуі оның ұстанатын сенім қағидасы көп байланысты дегенді айтады.<blockquote>– Айналамдағы адамдардың маған деген сенімі, сондай-ақ менің оларға деген сенімім маңызды болды. Сенім дегеніміз – бұл адамда ерте жастан қалыптасатын қасиет. Бала шақта ата-анамыз бен туыстарымыздың отбасы аясындағы сенімін ақтауға қалыптассақ, мектеп пен университетте ұстаздарымыз бен қатар-құрбымыздың арасында жылы қарым-қатынас орнатуға дағдыланамыз. Ал жұмыс барысында басшылық пен әріптестер ортасындағы сенім де маңызды саналады. Бір сөзбен айтқанда, қай тұрғыда да қарым-қатынас өмірімізге әсерін тигізіп жатады. Қарамағыңызда жұмыс істейтін қызметкерлеріңіздің де, жоғарыдағы басшылықтың да сізге деген сенімі, сіздің оларға деген сеніміңіз – бұл ұйымның басшысы ретінде табысты еңбек етіп, жемісті жұмыс істеудің кепілі. Сондықтан да сенім қағидасы – менің өмірдегі басты ұстанымым болып қала береді. Тағы қоса кетерім, кез келген жағдайда (ол қуаныш бола ма, әлде басқалай жағдай ма) адам баласы басқаларды қолдауға дайын болуы керек. Мен қазір лайықты демалыста болғаныма қарамастан, жылдар бойы жиналған кәсіби және өмірлік тәжірибемді отбасыммен, туыстармен, достармен бөліскім келіп тұрады. Себебі, жақсы іс қашан да игілікті қайтарымын береді, – дейді жерлесіміз марқая сөйлеп.</blockquote>Қай лауазымды да абыроймен алып жүрген Марат Әбенұлы бүгінде «ЮрАзия Энерджи Холдинг Лтд» компаниясының қазақстандық филиал басшысының кеңесшісі қызметін атқарып отыр. Атом саласының білікті маманы ғылыми қызметінде бірқатар патенттелген әдістеме мен өнертабыстар шығарып, жаңалық енгізген. Осындай еңбектің арқасында ол техника ғылымдарының кандидаты дәрежесіне жеткен.Сала саңлағының металлургия, атом, сондай- ақ ғылым жолындағы ұзақ жылғы ізденісті еңбегі мемлекет тарапынан ескерусіз емес. Ол «Парасат», «Құрмет» ордендерінің, «Қазақстан Республикасының Тәуелсіздігіне 20 жыл», «Астанаға 20 жыл», «Қазақстан Республикасының Конституциясына 20 жыл» медальдарының иегері. Өлшеусіз еңбегіне қарай Қазақстан Республикасы «Атом саласының еңбек сіңірген қызметкері» төсбелгісін иеленсе, Түркістан облысына қарасты «Созақ ауданының құрметті азаматы» атағы берілген.Марат Әбенұлы қызметінде жанашыр дос, сенімді әріптес әрі серіктес бола білсе, отбасында адал жар, асқар тау әке, 9 немеренің қамқор атасы. Зайыбы Зәмзәгүл Құрайышқызымен бірге ұл-қыз өсіріп, олардан ұрпақ сүйіп отырған салиқалы жандар.

Балқытушыдан бас директорлыққа дейін

<a href="https://kyzylorda-news.kz/">Kyzylorda-news.kz</a> «Еліміздің барлық елді мекенінде таза су қолжетімді болуға тиіс». Бұл – Мемлекет басшысы Қ.Тоқаевтың тапсырмасы. Мемлекет басшысы «Халық бірлігі және жүйелі реформалар – ел өркендеуінің берік негізі» атты Жолдауында 5 жылдың ішінде қалалар мен ауылдарды 100 пайыз сумен қамтамасыз етуге пәрмен бергенді. Мұнан біз Ел Президентінің халықты таза ауызсумен қамту мәселесіне ерекше көңіл бөлгендігін көреміз. Өйткені ауыз судың сапасы ел тұғындарының денсаулығына тікелей әсер етеді. Жалпы елімізде халықты таза әрі сапалы ауызсумен қамтамасыз ету мақсатында 2002-2010 жылдарға арналған «Ауызсу» бағдарламасы, одан соң 2011-2020 жылдарға арналған «Ақбұлақ» бағдарламасы жүзеге асырылды. Ал 2021 жылдан бастап бұл мәселе «Қуатты өңірлер – ел дамуының драйвері» ұлттық жобасының аясында шешімін тауып келеді. Халықты таза ауызсумен қамтуға бағытталған жобалардың жүзеге асырылу барысы облыста да жіті бақылауда.Нақ осы мәселе түнеукүні Үкімет отырысының күн тәртібінде қаралды. Онда қалалар мен ауылдарды сумен жабдықтау мәселесі талқыланған-ды. Су ресурстары және ирригация министрі Нұржан Нұржігітовтің баяндамасына сәйкес, бірқатар өңірде, оның ішінде Қызылорда облысында барлық қалалық елді мекендер сапалы ауызсумен толық қамтылған. Ал ауылдық елді мекендердің 98,4 пайызы орталықтандырылған ауызсу жүйесіне қосылған.Үкімет отырысынан кейінгі арнайы мәжілісте облыс әкімі Нұрлыбек Нәлібаев осы мәселе бойынша жауапты басшыларға бірқатар тапсырма берді.– Мемлекет басшысы Қасым-Жомарт Кемелұлы 2021 жылғы «Халық бірлігі және жүйелі реформалар – ел өркендеуінің берік негізі» атты Жолдауында бес жыл ішінде халықты 100 пайыз таза ауызсумен қамтамасыз етуді тапсырып, «Бұл – Үкіметтің алдында тұрған басты міндет» деп атап өтті. Тұрғындарға тұрақты, сапалы ауызсу жеткізу ең өзекті және маңызды мәселелердің бірі болып қала береді. Қазір облыста орталықтандырылған ауызсу жүйесіне қосылмаған 26 елді мекен бар. Мемлекет басшысының тапсырмасына сәйкес, 2025 жылдың соңына дейін оларды сапалы ауыз сумен қамтамасыз етуіміз қажет», – деді аймақ басшысы.Мәлім болғандай, облыстық энергетика және тұрғын үй-коммуналдық шаруашылық басқармасының басшысы Медет Усаин 4 қала, 230 ауылдық елді мекеннің 204- і орталықтандырылған ауызсу жүйесіне қосылыпты. Биыл тағы 13 жобаны жүзеге асыруға 5,3 млрд теңге қаржы қаралған екен.Тиісінше келелі жиында қалған елді мекендерді таза ауызсумен қамту, ҚР Су ресурстары және ирригация министрлігі арқылы жүзеге асырылған жобаларды мерзімінде аяқтау мәселелері пысықталды. Нұрлыбек Машбекұлы көптеген ауызсу ұңғымасы мен су жинау, тарату жүйелерінің тозғанын тілге тиек етіп, оларды ағымдағы жөндеуден өткізуді, күтіп-ұстау жұмыстарын тұрақты ұйымдастыруды тапсырды.Мизам шуағын төгетін жаз айларында ауызсудың көп жетіспеушілігі байқалып жатады. Мұны жасыруға болмас. Оның бірден-бір себебі жазда ауызсуды аяқсуға пайдаланудың салдарынан болады. Осы тұста шежірелі өлкедегі ахуалға да кідіріс жасасақ.Шиелі ауданындағы ауызсудың жағдайын осыдан 2 ай бұрын «Жиделі топтық су құбыры» өндірістік бөлімшесінің басшысы Асылбек Сәрсембаев брифингте мәлім қылған-ды. Брифинг барысында күз-қыс айларында күніне 3500-4000 текше метр су жеткілікті, ал жаз айларында 6500-7000 текше метр су жеткіліксіз екенін тілге тиек етті. Алдағы уақытта Сүттіқұдықтан келетін екінші магистраль құбырының құрылысы аяқталса, аталған мәселе оң шешімін тауып, тұрғындарды жаз айларында да үздіксіз 24 сағат бойы ауызсумен қамтамасыз етуге мүмкіндік болатынын да бүкпесіз жеткізді.– Шиелі ауданы бойынша 27 насос станциясы, 23 дана су қыспақты мұнарасы, 148,35 шақырым бас су құбырлары, 363,4 шақырым ішкі су тарату желілері халыққа ауызсу тарату қызметін көрсетеді. Ауызсу жеткізуші қызметін атқаратын «Жиделі топтық су құбыры» өндірістік бөлімшесі Сүттіқұдық елді мекеніне қарасты Бас саға арқылы ауызсуды өндіріп, Жаңақорған кенті мен Жаңақорған ауданының 6 елді мекеніне, сонымен қатар Шиелі кенті мен ауданның 22 елді мекеніне су жеткізіп отыр. Қазіргі таңда «Шиелі ауданының оқшау сумен жабдықтау жүйелерін пайдаланушы» өндірістік бөлімшесі 7 елді мекенді ауызсумен қамтамасыз етеді. Атап айтсақ, Бірлестік, М.Шоқай, 1 Мамыр, Майлытоғай, Тартоғай, Ботабай, Сұлутөбе, Бұланбай бауы бойынша барлық тұтынушылар саны – 7975, 1354 абонент ауызсу тұтынады, – деді Асылбек Сәрсембаев.Жоспарлы түрде көктемгі – сәуір айында, күзгі – қыркүйек айында Шиелі аудандық СЭС қызметкерлерімен бірлесе отырып, барлық ішкі су тарату желілеріне, магистральді су құбырына, су мұнараларына және су қоймаларына жуып-шаю, залалсыздандыру жұмыстары қарастырылмақ. Бүгінде тұтынушыларды 24 сағат үздіксіз сапалы ауызсумен қамтамасыз ету мақсатында Қодаманов, Бидайкөл, Н.Бекежанов, Байсын, Ы.Жақаев, №21 Бекет, Жансейіт, Ортақшыл, Досбол би, Ә.Тәжібаев, Бәйгеқұм, Балаби, Алмалы елді мекендерінде, яғни 13 ауылда 8 ай бойы «Байпасная линия» арқылы ауызсу берілуде.Әлгі жиында сала басшысы Асылбек Шағдарұлы «Су тіршілік көзі, өмірдің қуаты», «Судың да сұрауы бар» екенін тұрғындар назарына сала отырып, ауызсуды барынша үнемді пайдалануға, ауызсу төлемін уақытылы төлеуге шақырған-ды.– Ауызсуды үнемді пайдаланып, әр айдың 25-жұлдызына дейін төлем жасауды ұмытпаған жөн екенін естеріңізге саламыз. Жалпы мекемеде Шиелі кенті мен елді мекендерді аралайтын 23 инспекторбақылаушылар көше аралап, ауызсу ақысын жинауда, ғимаратта арнайы төлем кассасы жұмыс істейді. Апаттық жағдай орын алған жағдайда, тәулік бойы диспетчерлік қызметке 4-19-99 байланыс телефоны арқылы хабарласуға болады, – деді сала басшысы.

Шиелі ауданының 39 елді мекенінде ауыз су мәселесі толық шешілген

<a href="https://kyzylorda-news.kz/">Kyzylorda-news.kz</a> Париж Олимпиадасына боксшылардан не күте аламыз? Жуырда Парижде өтетін Олимпиада ойындарында ел намысын қорғауға 7 боксшы аттанады. Токио олимпиадасындағы қателіктерді қайталамас үшін боксшыларымыз тынбай еңбек етуде. Парижде өтетін байрақты бәсекеде еліміздің атынан М.Сабырхан, С.Бибосынов, М.Базарбаев, А.Шымбергенов, А.Оралбай, Н.Оралбай, Қ.Қоңқабаев сынды боксшылар өнер көрсетпек.Бұл жолы өткен олимпиадағы кеткен қателіктерді қайталамау маңызды. Әрине, бұл олимпиаданың фавориттері Өзбекстан ұлттық құрамасы. Б.Жалолов, Х.Дусматов сынды өзбек ұлтының былғары қолғап шеберлері біздің боксшыларға үлкен сынақ екені белгілі.Десекте, Мырзағали Айтжанов бастаған батырларымыз өзбек жауынгерлерінен артық болмаса, кем емес дер едім.Көптеген спорт шеберлері, жанкүйерлері елімізден Парижде өтетін сыннан 2 алтын жүлде күтіп отыр.Өз кезегінде құрама капитаны А.Шымбергенов, «қазақтың Майвезері» атанған М.Сабырхан мен С.Бибосыновтардан алтын жүлде күту орынды.Былтыр Ташкентте өткен Әлем чемпионатында 4 боксшымыз топ жарып, алтын жүлдеге ие болған болатын. Сол 4 әлем чемпионың үшеуі келе жатқан олимпиада ойындарына баратыны мәлім болды. Бұл дегеніміз ұлттық құрама ішінде үлкен бәсекелестік бар екенін дәлелдейді. Бұл Париждегі сында жауынгерлеріміз елімізді бүкіл әлемге мойындатады деген үміттеміз.&nbsp;Иә, 2024 жылғы олимпиада ойындарына санаулы айлар қалды. Еліміздің былғары қолғап шеберлеріне үлкен сенім арттық.Ендігі кезекте сол боксшыларымыз жауапкершілікті сезініп, қарсыластарынан сескенбей, елімізге чемпион болып оралып, үмітті ақтаса екен. Бұл турнирдың фавориттерінің бірі Қазақстан ұлттық құрамасына бірге жанкүйер болайық!

Париж Олимпиадасы: боксшылар бабында ма?

<a href="https://kyzylorda-news.kz/">Kyzylorda-news.kz</a> Кеңестік кезеңнің қылышынан қан тамып тұрған тұста елдегі бай-бағыландар мен шаруа адамдардың күйі тайып, қуғынға ұшырағанын тарих айғақтайды. Сондай нәубет жылдардың мехнатын тартқандар Арал маңында да аз болмаған. Күні кеше ел-жұрты есіне алған, қойнауы құт Сазды өңірінен атына мешіт ашылған Байдәулетұлы Жұбай да сол советтік сергелдеңді көзімен көрген, зардабын сезген жан еді. Саздыда 1883 жылы дүниеге келіп, осы өңірде өмір кешкен қарапайым еңбек адамын бүгінде жұртшылық құрығына құт қонған, адал еңбегімен абыройға бөленген атақты жылқышы ретінде таниды. Өткен аптада сол бір киелі өңірдің төрінде үлкен ауқымда ас беру рәсімі өтті. Сазды төрінен Жұбай ата мешіті жаңадан ашылып, баба ұрпақтары арнайылап ат шаптырып, алыс-жақыннан келген ағайынның ақ жарма тілегі мен батасын алды.&nbsp;Саздыдағы ауқымды шараға аудан әкімі А.Оңғарбаев бастаған бір топ зиялы қауым өкілдері барып, мерейлі сәттің куәсі болып, жаңадан ашылған мешіттің лентасын қию рәсіміне қатысты. Мұнан соң мәртебелі меймандар Сазды төріндегі дүбірлі думанның куәсі болды. Дәстүрге сай&nbsp;14-15 маусым күндері аралығында аудан әкімдігінің ұйымдастыруымен, Сазды ауылында ұлттық спорт түрлерінен (гір спорты, қол күрес, қой көтеру, теңге ілу, аударыспақ) жарыстар ұйымдастырылып, жарысқа жалпы саны 80-нен астам спортшы қатысып, жүлдеге тігілген құнды сыйлықтарды олжалады.&nbsp;Айталық гір тасын көтеру спортынан аралдық Бексұлтан, қол күрсінен қазалылық Әділет, қой көтеруден қазалылық Ілияс, теңге ілуден Ырғыздан келген Берік есімді азаматтар жүлделі І орын тұғырынан көрінді. Сондай-ақ ауданда алғаш өткізілген аударыспақ жарысынан 75 келі салмаққа дейінгі жарыста ырғыздық Берік қарсылас шыдатпаса, 75 келі салмақтан жоғары дәрежедегі жігіттер арасындағы аударыспақта Ырғыздан келген Әділжан есімді азамат І орын еншіледі. Ұлттық спорттың бұл түрінен жүлдеге ілігіп, қанжыға майлаған жігіттер өзара 2 және 3 орындарды бөлісті. Мұнан соң қазақтың делебесін қоздырар ұлттық ат бәйгелері ұйымдастырылды. Қазақы тай, Арғымақ тай, құнан, тоқ және аламан бәйгелері өтіп, бұл додада жалпы саны 182 ат жарыс жолына шықты. Бәйгенің басты жарысы аламанда Жамбылдан келген «Сарарқа» атты сәйгүлік мәреге бірінші келді. Осылайша бәйгенің бас жүлдесіне тігілген «Нива» автокөлігі Жамбылға бұйырды.&nbsp;Жарыс жеңімпаздары мен жүлдегерлеріне асты ұйымдастырушы Елеусізұлы Қожабай ұрпақтарының атынан ақшалай сыйлықтар мен бағалы дүниелер табысталды. Бірнеше күнге созылған Сазды төріндегі торқалы той үлкен ауқымдағы гала концертпен түйінделді.&nbsp;

Саздыда ауқымды шара ұйымдастырылды

<a href="https://kyzylorda-news.kz/">Kyzylorda-news.kz</a> &nbsp;Айтыскер ақын, коуч-психолог Айнұр Тұрсынбаева немересі Әлемнің бір жасын жасап, тұсауын кесті. Бұл туралы <a href="https://stan.kz/brilliant-zhaugan-toy-aynyr-tyrsinbaeva-nemeresinin-bir-401901/">Stan.kz</a> ақпарат агенттігі хабарлайды.Айтыс сахнасының жұлдызы Ыстамбұл қаласынан ұшып келіп, Алматыда өнердегі дос-жаранның басын қосты.<blockquote>“Әлемнің тұсауын әлемге қазақты танытқан адам кесуі керек деп ойладық. Біреуі –&nbsp;менің туған ағам, біреуі –&nbsp;туған бауырым. Туған ағам –&nbsp;Қыдырәлі Болманов, қазақтың өнері үшін бүкіл өмірін арнаған қазақтың азаматы. Қаншама қазақ баспаналы болсын деп қазақ үшін түн ұйқысын төрт бөлген Дәулет Мұқаев арнайы Астанадан келіп тұр", –&nbsp;деді той иесі.</blockquote>Желі қолданушылары түрлі пікір жазып, қуанышқа ортақтасып жатыр.<blockquote>“Тойға шақырылмасақ та, тойда отырғандай болып отырмыз”, "Немереңіздің алғашқы қадамы құтты болсын! Сол қадамымен биік шыңдармен асу белестерді бағындырсын. Әлемге аты шыққан Әлем болсын. Әлемнің қасында айдай жарқыраған әжесі болсын", "Жаңа жасы құтты, берекелі жас болсын, Алла деніне саулық берсін, ғұмырлы қылсын! Бақытты балалық шақ тілеймін, ата анасы аман болсын! Аллахым артынан іні-қарындастарын берсін", “Бриллиант пен бренд жауған той болыпты”, “Алтын комплекті Қайрат Нұртастың мамасы ұтып алған”, – деп жазып жатыр оқырман қауым.</blockquote>Фото:&nbsp;https://www.instagram.com/aidyn_nury/

"Бриллиант жауған той": Айнұр Тұрсынбаева немересінің бір жасын дүркіретіп атап өтті

<a href="https://kyzylorda-news.kz/">Kyzylorda-news.kz</a> Ел Президенті Қасым-Жомарт Тоқаев: «Бүгінде армиямыз әлемдік стандартқа сай жабдықталған. Сонымен қатар жаңа жаһандық сын-қатерлер Қарулы Күштеріміздің жауынгерлік қабілетін арттыру үшін оңтайлы шешімдер іздеуді талап етеді. Жеке құрам жүйелі түрде жауынгерлік дайындықты пысықтайды, ауқымды оқу-жаттығулар өткізіледі. Болашақ офицерлерді даярлаудың заманауи жүйесі құрылды» деген болатын.&nbsp;Расында ел шетіне жау тисе ең алдымен мемлекеттің сақадай сай әскері болуы керектігі айтпаса да түсінікті. Осы тұста болашағын темірдей тәртіпті талап ететін әсери саламен байланыстырған жерлесіміз Иманжүсіп Асылбекұлы туралы сөз қозғағым келеді. Себебі ол жуырда ғана Президент Қасым-Жомарт Тоқаевтың қолынан әскери шен алып қайтты.&nbsp;Иманжүсіп Асылбекұлы Жақсықылыш кентінде 2003 жылы өмірге келген. Әкесі Асылбек пен анасы Іңкәрдің 5 баласының ішіндегі 3 қыздан соң дүниеге келген ер баласы. Мектепті үздік оқыған ол бала кезінен-ақ әскери салаға биімділігін танытты. Оқушы кезінде «қозғалыстың жас инспекторы» жарысына қатыса жүріп, ол болашақ мамандығын таңдап қойған болатын. Мұнымен қоса, Иманжүсіп спортты да жанына серік еткен азамат. Төртінші сыныптан бастап еркін күреспен айналыса бастаған. «Спорт шеберіне» кондидат.&nbsp;Иманжүсіп Асылбекұлы әскери саланы бар жан-тәнімен қалағаны соншалық, ол мектеп бітіргенге дейін 2 жыл сайын әскери дайындық шеберліктерінен өтіп тұрған. 11 сынып оқып жүргенде Президент Қасым-Жомарт Тоқаевтың бастамасымен Қарағанды қаласында өткен «Айбын» әскери-спорттық жарысқа Қызылорда облысы атынан қатысып, жүлделі 2-орынды еншілеп қайтқан. Баласының жетістік жолы туралы анасы Іңкәр Айдынқызы:– Мектеп бітірген соң өзінің жүрек қалауымен Алматы қаласындағы Сағадат Нұрмағанбетов атындағы Әскери құрлық институтына оқуға түсті. Әрине бұл кез келген адамға бұйыра бермейтін бақ. Төрт жыл бойы әскери саланың мызғымас тәртібіне мойынсұнып биыл қызыл дипломмен бітірді. &nbsp;Ата-ана үшін баланың жетістігі зор мәртебе ғой. Ел қорғау саласын таңдағанда ана ретінде уайымдағаным рас. Бірақ баламның жүрегінде бүр жарған отансүйгіштік қасиетті көргенде, үйде отырып тақым қысқанды жөн көрдім. Иманжүсіптің табиғаты да әскери салаға бейімделгендей. Сыралғы, томаға тұйық, әрі бірбеткей мінезді болып өсті, – дейді.Жуырда еліміздегі маңызды мемлекеттік мерекелердің бірі Рәміздер күнінде Елорда төрінде өткен салатантты шарада Пезидент Қасым-Жомарт Тоқаев әскери институтты тәмамдаған бірқатар жас сарбаздарға әскери шен табыстаған болатын. Солардың қатарында Иманжүсіп Асылбекұлы да бар. Оның мерейлі сәтіне әкесі Асылбек арнайы қатысып қайтқан көрінеді.&nbsp;Бұл тарихи сәт Иманжүсіптің жарқын болашағының бастауы болса керек. Шараға қонақ болған Халық қаһарманы Бақытжан Ертаев әскери саладағы өзінің өмір жолынан сыр шертіп, өнегесін айта отырып, Иманжүсіпке ақ батасын беріпті.&nbsp;– Мен үшін бұл жүрек толқытатын ерекше сәт болды. Перзиденттің қолынан әскери шен ала отырып, мен еліме, жеріме адал қызмет етуге ант бердім. Мемлекет басшысы мейірімге толы жылы жүзімен күлімдей қарап, ақ тілегін арнады. Сол сәтте өзімді әлемдегі ең бақытты адамдай сезіндім. Арманы орындалған адам, расында шексіз қуанышқа бөленеді екен. Ендігі мақсатым – әрі қарай оқуымды жалғастырып, әскери академияға түсу, – дейді Иманжүсіп.Иманжүсіп Асылбекұлы осы салтанатты шарада Қазақстан Республикасының Қорғаныс министрлігінің арнайы құттықтау хатымен мадақталғанын да айта кетуіміз керек.&nbsp;Президентпен жүздесіп, оның қолынан алу кез келген адамның арманы. Осы арманға Иманжүсіп өзі ғана қол жетізіп қоймай әкесі Асылбектің де мәртебесін биіктетіп, осындай бақытқа кенелуге мүмкіндік ашып берді. «Болам деген баланың, бетін қақпа белін бу» деген тәмсілді ұстанған ата-анасы да оның ел мүддесін көздеген азамат болатындығына кәміл сеніп, қолдау көрсетіп келеді. Және сол үміттері де ақталып жатыр.

Президенттің қолынан шен алған сарбаз

<a href="https://kyzylorda-news.kz/">Kyzylorda-news.kz</a>&nbsp; Қармақшы ауданына қарасты Ақай ауылындағы №23 «Балдырған» бөбекжай-бақшасы 2015 жылы ашылып, жұмысын бастады. Ол типтік жобада «Балапан» бағдарламасы аясында қызметін жалғастыруда. Екі қабаттан тұратын әсем ғимарат 280 орындыққа арналған. Қазір мұнда 1,6-6 жас аралығында жас ерекшелігіне сәйкес 9 топта 172 бала тәрбиеленуде. Бөбекжай заман талабына сай құрал-жабдықпен қамтылған. Арнайы спорт, ән-әуез залдары және әдіскер, психолог, логопед, басқа да кабинеттері бар.Мекеменің басты ерекшелігі – 2021 жылдан бастап балабақшада арнайы аутизм спектрі бар балаларға Аутизм кабинеті ашылып, мамандармен қамтамасыз етіліп отыр. Онда балалардың жас ерекшелігіне қарай түрлі жиһаз орналастырылған. Білім мекемесінде бүгінде 41 педагог маман жұмыс жасаса, оның ішінде әдіскер, логопед, психолог, музыка, би, дене шынықтыру жетекшісі, ұйымдастырушы педагог, ассистент маман, сондай-ақ тәрбиешілер абыройлы еңбек етуде. Атап айтқанда, педагогтардың 32-сі жоғары білімді болса, 5-еуі арнаулы орта білімі барлар. Қалған 5 тәрбиеші де «Мектепке дейінгі тәрбиелеу және оқыту» мамандығын бітірсе, ұжымда жастарға жол көрсетіп жүрген 15 тәжірибелі педагог-модератор жұмыс істеуде. Ауызбірлігі мол тәрбие ошағына Гүлмира Орынбаева басшылық етеді.<blockquote>– Балабақшаның оқу-тәрбие жұмысындағы негізгі мақсаты – бүлдіршінді жан-жақты дамыту, денсаулығын нығайту және мектептегі оқу ісіне дайындау болып табылады. Қазақстан Республикасы Білім және ғылым министрінің 2022 жылғы 3 тамыздағы No348 бұйрығымен бекітілген стандарт бойынша мектепке дейінгі тәрбие мен оқытудың мемлекеттік жалпыға міндетті стандартына сүйене отырып жұмыстар жүргізудеміз. Бүлдіршіндердің жас ерекшелігіне қарай үйірмелер ұйымдастырылған. «Балдырған» би, шахмат, робототехника үйірмелері, одан бөлек дарынды балалармен жеке дара жұмыстар атқарылуда. Ұжымның тынымсыз еңбегінің арқасында көптеген жетістікке жетіп отырмыз. Атап өтетін болсақ, балаларымыз әр жыл сайын ауыл, аудан, облыс және республика көлемінде өтетін байқаулардан жүлделі орындар иеленіп келеді. Бөбекжай-бақшамыз ашылғалы бері жылдық жоспарға сай ұйымдастырылған іс-әрекеттер, тәрбие қызметтері, әрбір мерекеге орай ертеңгіліктер мен түрлі іс-шара жоғары деңгейде жүргізіліп және ол әлеуметтік желіде жүктеліп отырады. Сонымен қатар балабақшада облыстық, аудандық, аймақтық семинарлар да өтіп отырады. Балабақшаның материалдық-техникалық базасы жақсы жабдықталған. Бізде бала білімі мен интеллектісінің дамуына ықпал ететін интерактивті, мультимедиялық тақталар, теледидар, компьютер, ноутбук, моноблоктар бар екенін екшеп айтып кетуімізге болады. Жаңа инновациялық технологияларға сиқырлы қалам құрылғылары мен робототехника құрал-жабдықтарымен де жабдықталғанын айта кетсем, артық емес, – дейді білікті басшы.</blockquote>Бір ескерерлігі – балабақшада ROBOTICS STEM (робототехника) кабинеті жабдықталған. Күнделікті оқу қызметтеріне Флипчарт, Интеллектум ойын құралдары, Воскобович, Монтоссори, Триз, Тәй-тәй, Ойын технологиялары ұтымды пайдаланылуда. Педагог тек өз саласының терең білгірі ғана емес, бұған қоса тарихи танымдық, педагогикалық-психологиялық сауаттылығы мен саяси-экономикалық жағынан білімді және ақпараттық сауаты да болуы керек. Ол заман талабына сай білім беруде жаңалыққа жаны құмар, шығармашылықпен жұмыс істеп, оқу мен тәрбие ісін қатар алып жүретін, оқытудың қазіргі жаңа технологиясын шебер меңгерген парасат иесі болғанда ғана білігі мен білімі жоғары, жетекші тұлға ретінде ұлағатты саналады. Міне осы дағдыларды толық меңгеру үшін іс-тәжірибемен бірге әртүрлі тақырыпта білімін жетілдіріп отыруды педагогикалық ұжым естен шығармайды.«Бөбекжайда балалар 4 мезгіл тамақтанады. Ас мәзірінің құрамында ет, балық, жұмыртқа сияқты калориясы жоғары тағамдар бар. Бала денсаулығына, оның өсіп, дамуына қажетті дәрумендерге бай қызылша, сәбіз, қырыққабат секілді көкөністерден түрлі салаттар жасалып беріледі» дейді мұндағы аспаз мамандар.Жалпы балабақшаның жетістігін тізбелей кетер болсақ, 2015 жыл қорытындысымен Ақай ауылдық округі әкімінің «Жыл мекеме басшысы» номинациясына бөбекжай-бақша меңгерушісі Гүлмира Орынбаева лайық деп танылған. 2017 жылы ауыл әкімінің алғыс хатымен марапатталса, осы жылы «Ұйымдастырылған оқу қызметін жаңаша ұйымдастырудың әдістері мен тәсілдері» тақырыбындағы облыстық семинарды жоғары деңгейде ұйымдастырғаны үшін облыстық білім басқармасы облыстық оқу орталығының арнайы сертификатын иеленген. Аталған тақырыпта аудандағы әріптестерімен озық тәжірибесін бөлісіп, семинарда шығармашылық ізденіс танытқаны үшін де аудандық білім бөлімінің мадақтамасына ие болғаны – ұжымның толымды жетістігінің жемісі десек болады. Одан бөлек ІІ республикалық мектепке дейінгі тәрбие мен оқыту жүйесі педагогтарының «Бала деп соққан жүректер» атты үздік қызметкерлер Слетіне бөбекжай-бақша меңгерушісі Гүлмира Орынбайқызы қатысып, сертификат, диплом және халықаралық білім беруді дамыту академиясы атынан төсбелгі және кубокпен марапатталады.Білім ошағының тағы бір басты мақсаты – тәуелсіз мемлекетіміздің кішкентай мүшелерін өнерлі етіп шығару. Өңіріміздегі «Бозторғай» шығармашылық байқауы мектеп жасына дейінгі балалардың шығармашылығын шыңдап, мәдениетін қалыптастыруға бағытталған кең көлемді байқау десек, өз қатарымен аталған байқауда сынға түсіп, додада жеңіске жету – бүлдіршіндердің алға қойған мұратының бірі. Үнемі «Тек қана, алға!» ұранын ұстанатын балабақша бүлдіршіндері 2016 жылдан бастап республикалық «Бозторғай» балалар шығармашылық байқауының тұрақты қатысушылары болып келеді. Осындай до- дада өнерлі балалар аймақтық, аудандық іріктеулерден бас жүлде иеленіп, облыстық деңгейдегі байқаулардан да жүлделі орыннан көрініп жүргенінен – тәрбие ұжымының біліктілігін аңғару қиын емес. ЭКСПО – 2017 халықаралық көрмесінің елімізде алғаш рет ұйымдастырылуы тіпті балабақша жасындағы балалардың да танымдық қабілетінің деңгейін байқауға, баланың жалпы дамуын бақылауға, оны одан әрі дамытуға септігін тигізгені рас. Осы мақсатты жүзеге асыруда «Мектеп жасына дейінгі балалардың зерттеушілік әрекетінің ең үздік экологиялық жобасы» көрмесінде «Ең үздік экологиялық жоба» номинациясы «Балдырғанның» бүлдіршіндеріне бұйырып, дипломмен мадақталды. Еліміздегі «Болашаққа бағдар: рухани жаңғыру» бағдарламасы аясында және Қызылорда қаласының мерейтойына орай ауылдық округ атынан үздік өнер көрсеткені үшін абырой биігінен көрінсе, Тіл мерекесіне арналған халықаралық «Қазақ тілі» қоғамдық бірлестігі Байқоңыр филиалы бойынша төрайымының қатысуымен өткізілген «Тілді сүю – тал бесіктен» атты ауқымды іс-шарада да белсенділік танытып, көптің қошеметіне бөленді. Сонымен қоса 2019 жылы облыстық мектепке дейінгі білім беру ұйымдарының арасында өткізілген фестивальде балабақшаның педагогы Айжан Алмағанбетова «Үздік флипчарт сабақ» номинациясымен марапатталады. 2019 жыл балабақша үшін тіпті де жемісті жыл болғандай. Елордада өткен халықаралық «Таңғы шұғыла» байқауына 3-5 жас аралығындағы балабақша бүлдіршіндері қатысып, би жанры мен сән үлгісінен үздіктер қатарынан танылып, Гран-при, кубок жеңіп алып, Түркия елінде өнер көрсетуге жолдама иеленді. Ұлы ақын Абай Құнанбайұлының 175 жылдық мерейтойына орай өткен «Аймақты әнмен тербетіп, ән салдырған мамандар» атты мекемеаралық байқауда бөбекжай-бақша қызметкерлері өзара ұйымшылдықпен қатысып, бас жүлде және ауылдық округ әкімінің кубок иегері атанды. Қазақы дәстүрді ұлықтап, дәріптеу – бала жастан басталса керек. Осы тұрғыда ұлттық мәдениетімізді насихаттап, дәстүрімізді дәріптеуде бөбекжай меңгерушісі Наурыз мерекесінде ұлттық көрме жәрмеңкесінде «Национальный акцент» номинациясымен Байқоңыр қаласының әкімі К.Бусыгиннің дипломына ие болса, ұжым «Дарын» республикалық ғылыми-практикалық орталығының, 1 маусым – «Балаларды қорғау» күніне арналған Қазақстан Республикасы Білім және ғылым министрлігінің алғыс хаттарын иеленген. 2020 жылы балабақша тәрбиешісі Айгүл Бәйтерекованың жетекшілігімен «Тәуелсіздік тұғырым» атты республикалық байқауға қатысқан бүлдіршіндер Рамазан Бәйденов пен Альбина Зинелабдинова І дәрежелі орынға көтерілді. Өткен жылы Қазақстан Республикасы Президентінің «Байқоңыр» кешеніндегі арнаулы өкілінің қызметін қамтамасыз ету басқармасы басшысының орынбасарынан алғыс хат алса, республикалық «Тәуелсіз Қазақстан – менің елім» атты балалар мен ересектер арасындағы байқауда «Би жанры» номинациясы бойынша «Балдырған» би тобы І орынды жеңіп алды. Және осы байқаудың «Ансамбль және оркестр» аталымы бойынша «Балдырған» ансамблі бас жүлдені қанжығасына байлады. Биыл «Заманауи дәстүрлі емес сурет салу техникасы» тәжірибесінен шебер сынып республикалық байқауының аудандық кезеңінде бас жүлдеге ие болса, облыстық сырттай кезеңінде, республикалық байқауында да І орынды бағындырып отырғандары қуантады. Жақында «Балдәурен» республикалық балалар мен жасөспірімдер сайты ұйымдастырған шығармашылық ән байқауында да І орынды жеңіп алып, сенімді ақтады. Маусымда «Жазғы сауықтыру-шынықтыру жұмыстарын ұйымдастыру ерекшеліктері» тақырыбында облыстық семинар көрсетіп, облыстық Оқу орталығының арнайы сертификатына ие болған жайлары бар.<blockquote>– Бала – біздің болашағымыз. Яғни бала қандай болса, келешегіміз де сондай болады деген сөз. Сол себепті де баланың жақсы ортада өсіп-тәрбие алуына, болашағының жарқын болуына алдымен біздер жауаптымыз. Оның бойына бүгіннен бастап себілген адамгершілік, тәрбие дәні есейгенде оған көмекке келіп, тәуелсіз еліміздің өркендеуіне септігін тигізеді. Сондықтан да тәрбиелі, білімді, зейінді бала тәрбиелеу ісі – ешқашан күн тәртібінен түспейтін мәселе. Балабақша ұжымы балалардың қабілетін жан-жақты дамытуда барлық уақытта абыроймен белсенділікте жұмыс істей беретін болады, – дейді өз ісінің шебері Гүлмира Орынбаева сөзін қорыта келе.</blockquote>

Бүлдіршіндерге шаттық сыйлайтын балабақша

<a href="https://kyzylorda-news.kz/">Kyzylorda-news.kz</a> Әлемнің көптеген елінде отбасылық құндылықтарды насихаттау, отбасы және ата-ана институтын нығайту үшін аталып өтетін «Әкелер күні» өткен жылы елімізде ресми мереке ретінде маусымның үшінші жексенбісіне белгіленген.Осы мерекеге орай Шиелі аудандық ардагерлер үйінде кеше Шиелі ауданының қоғамдық даму бөлімінің мемлекеттік әлеуметтік тапсырысы шеңберінде «Қызылорда облысының жастар Одақтары» қоғамдық бірлестігінің ұйымдастыруымен «Жергілікті әйелдер кеңестері жұмысын дамыту және отбасы мен неке құндылықтарын насихаттау бағытында шараларды ұйымдастыру қызметі» әлеуметтік жобасы аясында отбасылық құндылықтарды насихаттау, әкелерді құрметтеу мақсатында «Әке – әркімнің сүйенер тіреуі» атты ардагерлер және жас әкелердің қатысуымен дөңгелек үстел болды.Шараны Шиелі ауданы әкімінің орынбасары Болатбек Ысмағұлов жүргізіп отырды.Жиында Шиелі аудандық білім бөлімі басшысының міндетін атқарушы Марат Ақпанбетов қоғамдағы әкелердің рөлі мен әке мен бала арасындағы байланыс, әкелер институтының қоғамдағы орны жайында баяндама жасады.Әкеден баланың алатын тәлім-тәрбиесін басқа ештеңе де ауыстыра алмайды. Осы тұрғыда әр ұлттың бала тәрбиесіндегі құндылықтары жайында ақсақалдар, жастар өкілдері өз ойларын ортаға салды.Жиын соңы, бар жүкті жотасымен көтеріп, аманатын абыроймен атқарған «Әкелер күні, құтты болсын!» деген жақсы көңіл-күйде аяқталып, тренингке ұласты.

Шиеліде әкелер күніне арналған дөңгелек үстел өтті

<a href="https://kyzylorda-news.kz/">Kyzylorda-news.kz</a> Германияда&nbsp;із-түссіз&nbsp;жоғалып кеткен қазақстандық&nbsp;Айгүл Сайлыбаеваның денесі&nbsp;табылды. Бұл туралы&nbsp;<a href="https://stan.kz/germaniyada-zhogalip-ketken-kazakstandik-ayeldin-denesi-401884/">Stan.kz</a>&nbsp;ақпарат агенттігі хабарлайды.Бұған дейін бұрынғы судья Айгүл Сайлыбаеваның Германияда із-түссіз жоғалып кеткені туралы хабарлаған едік. Ол&nbsp;Бенсхайм қаласында күйеуі, қызы және енесімен бірге тұрған. 4 маусым күні таңертең Сайлыбаева қызын балабақшаға алып кеткен. Содан бері оны ешкім көрмеген.Жексенбі күні оның денесі қала шетіндегі Эрлаче карьерінен табылды. Мәйіт полиэтилен пакетте болған. Әйел өлтірілмес бұрын зорлық-зомбылыққа ұшыраған. Қазір Сайлыбаеваның өлімін 35 тергеуші тексеріп жатыр. Әйелдің үйіне тінту жүргізілді.«Германия қылмыстық полициясының Қазақстан Республикасының Франкфурттағы бас консулдығына берген ақпаратына сәйкес, 16 маусымда Бенсхайм қаласының маңында әйелдің мәйіті табылды. Криминалистер сот-медициналық сараптама жүргізуде. Өз кезегінде, полицияның ауызша алдын ала берген ақпаратына сәйкес, сыртқы белгілері бойынша мәйіт Қазақстан азаматы Айгүл Сайлыбаева деп танылды. Қазіргі уақытта марқұмның туыстары Германияда және оларға барлық қажетті консулдық-құқықтық көмек көрсетілуде. Бұл іс туралы өзге ақпарат тергеу мүдделері үшін жарияланбайды”, –&nbsp;делінген&nbsp;сыртқы істер министрлігінің хабарламасында.Сайлыбаевамен бір уақытта оның 49 жастағы қайын енесі Наталья Донцова да жоғалып кеткен. Ол 4 маусым күні немересін балабақшадан алып, үйіне әкелгеннен кейін жоғалып кеткен.&nbsp;Баланың өзі аман, қазір туыстарының қамқорлығына берілген.&nbsp;Қазір Наталья Донцованы іздестіру&nbsp;жалғасуда.Сурет:kazinform.kz

Германияда жоғалып кеткен қазақстандық судьяның денесі табылды

<a href="https://kyzylorda-news.kz/">Kyzylorda-news.kz</a> Салауатты өмір салты мен дұрыс тамақтануды айтпағанда, &nbsp;саулықта өмір сүруіміздің кепілі бола алатыны ол – деннің саулығы және тазалық.&nbsp; Ал дені сау ұрпақ – қоғам байлығы.Туған жерді сүю – оның дәстүрі мен әдебіне көну. Елінің тау-тасын қадірлеп, әр мекенін мақтан ету, бұл – патриотизмнің алдыңғы көрінісі. Табиғатының сұлулығын қалаған&nbsp; Отансүйер, оның ластанбауын&nbsp; да ерікті түрде қалайтыны һақ. Көріп, біліп жүрміз. Ауданда тазалыққа, көгалдандыруға бағытталған жұмыстар тұрақты түрде жүргізіліп келеді. Бұл қатарда еңбексүйгіш, патриот жастарымыздың да елеулі еңбегі жатыр. Туған қаласына қамқорлықпен қарап, тазалығы үшін тартынбайтын жастар қатарластарына үлгі, көпке үлгілі болып келеді.&nbsp;Шынында қазақта ер бала азаматтығын дәлелдеу үшін&nbsp; үштік&nbsp; кезеңнен тұратын салтымыз бар. Онда, алдымен, үй тұрғызуды, екіншіден, өз баласын аяққа тұрғызуды, үшіншіден, «бір тал кессең, он тал ек!» деп ағаш отырғызуды &nbsp;міндеттеген. Міне, жастайынан осы міндеттің бірін орындауға машықтанған&nbsp;Арал қаласы, Сексеуіл және Жақсықылыш кенттерінде «Жасыл ел» еңбек жасағы жұмыс жасап келеді.

Қазақстан және Қызылорда облысының жаңалықтары