<a href="https://kyzylorda-news.kz/">Kyzylorda-news.kz</a> Қызылқұм ауылдық округінің әлеуметтік, ауылдың экономикалық дамуы және басқа да, мәселелері ауыл әкімі Оңталап Мүсілімнің жіті назарында. Мұнда 1207 адамнан құралған 216 отбасы негізінен мал шараушылығын жанына жақын тұтуда. Округ бойынша мал басы 1384 ірі қара, 3495 қой, 2680 ешкі, 785 жылқы және 128 түйені құрап отыр.Ветеринариялық пункт қызметкерлері тарапынан жоспарланған диагностикалық зерттеулер мен профилактикалық іс-шаралар тұрақты түрде жүргізіліп жатыр. Қазіргі кезде тұрғындар жеке мал шаруашылығынан бөлек, ауыл маңындағы су айдындарынан балық аулаумен шұғылданады.Қазалы ауданының «Кәукей» ауылы – ырыс пен берекесі келісті мекен. Округте №225 орта мектебі және № 146 негізгі мектебі, №27 "Бөбек" бөбекжай-балабақшасы, ауылдық дәрігерлік амбулатория, клуб, кітапхана, ауа райын зерттеу станциясы, почта байланыс бөлімшесі, ветеринариялық пункт, су бекеті жұмыс жасайды. Ауыл халқы кәсіпкерлікті де шыр айналдыруда. Оның ішінде, 3 шаруа қожалығы, 1 ауыл шаруашылығы кооперативі, 5 дүкен бар. Сонымен бірге, 8 жеке автобус аудан орталығына жолаушы тасымалдайды.Округ аумағында Жанқожа батыр атындағы шекара заставасы орналасқан. Кәукей ауылынан 170 шақырым жерде ұлт батыры Жанқожа бабаның қорымы бар. Бұрынғы өткен заманда осы аумақта әулие Қарабура, Бағыберген би, емші Жұбаныш Игісінұлы, сынықшы Омар секілді аты аңызға айналған адамдар өмір сүрген.Қызылқұм ауылдық округі әкімінің айтуынша, жыл басынан бері тұрмысы төмен және аз қамтылған 3 отбасыға мемлекеттік атаулы көмек тағайындалды. Ақылы қоғамдық жұмыспен 33 адам қамтамасыз етілді. Тұрақты жұмысқа 2 адам орналасса, 9 адам уақытша кәсіппен айналысуда. "Жасыл ел" бағдарламасы бойынша 18 жас мерзімдік жұмысқа қабылданды.<blockquote>– Жыл сайын мекеме-кәсіпорындар ұжымы, кәсіпкерлердің, жеке азаматтардың, сондай-ақ ауылда туып-өсіп, қазіргі кезде ауылымыздан тыс жерде өмір сүріп жатқан азаматтардың демеушілігімен қайырымдылық шаралары ұйымдастырылып жүр.</blockquote>Биыл 8 наурыз – Халықаралық әйелдер күні мерекесіне орай, 31 анаға 1985 жылғы туылған түлектердің демеушілігімен сый-сияпат көрсетілді. Сондай-ақ, 1997 жылғы туған қыз-жігіттердің демеуші болуымен ауылымыздағы 5 тыл ардагеріне сыйлықтар тарту етілді, – дейді Оңталап Мүсілім.Сонымен қатар, ауыл түлектерінің күшімен Орталық саябаққа "Ауылым – алтын бесігім" Кәукей белгісі және субұрқақ салынды. Аз қамтылған отбасыларға 1 маусым – балалар күніне орай 3 велосипед табысталды. Мектепке жол акциясы бойынша 5 балаға оқу құралдары мен мектеп формалары алып берілді.Жеке кәсіпкер Кемал Талғат ауыл тұрғыны, зейнеткер апаға азық-түлік алып берді. Демеушілердің көмегімен 3 отбасыға қыстық мал азығы түсіріліп берілді. Екі отбасыға қатты отыннан көмек берілді.Округ бойынша жолаушы тасымалдау саласында тұрғындарға 8 автобус қызмет көрсетеді. Кәукей – Әйтеке би кенті бағыты бойынша күніне 2 рет, Кәукей – Ажар бағытына аптасына 2 рет жолаушылар автобусы қатынап тұр. Сонымен қатар өткен жылдан бастап такси қызметімен айналысатын 4 кәсіпкер тұрғындарға қызмет етуде. "Кәукей-Бозкөл" автомобиль жолының жөндеу жұмыстары да реттелуде.Биыл округте 70 кәсіпкерлік субъектісі ресми тіркелді. Оның ішінде, 1 ауыл шаруашылығы кооперативі, 3 шаруа қожалығы, 3 жауапкершілігі шектеулі серіктестік, 63 жеке кәсіпкер бар.Екі жыл бұрын басталған 2021-2025 жылдарға арналған кәсіпкерлікті дамыту жөніндегі ұлттық жоба іске асырылуда. Игілікті жоба халықты жұмыспен қамтуды арттыру мақсатында шағын бизнесті дамыту, экономика салаларын әртараптандырудың драйвері – орта бизнеске сүйену, кәсіпкерлік субъектілері үшін тең жағдайлар – бәсекелестік кешенді дамытуға мұрындық болмақ. Осы ретте, ауыл тұрғындарының "Бастау Бизнес" жобасы шеңберінде оқуға қатысуын, жеке ісін ашуға, қысқа мерзім кәсіптік оқудан өтуіне, ауылда жаңа кәсіпкерлік субъектілерін құру бағытында тұрақты жұмыс атқарылады. Жалпы, 6 адам "Бастау Бизнес" жобасы шеңберінде оқуға қатысып, сертификаттарын алды.Көркейту-көгалдандыру жұмыстарына аудандық бюджеттен қомақты қаржы бөлініп отыр. Бұл қаржыға ауыл ішін көгалдандыру үшін аяқсу жіберіліп, жаңадан ағаш көшеттері егілді. Санитариялық тазалау жұмыстары жүргізілді. Сонымен қатар, ауыл ішін қоқыстан тазартуға да, бөлек ақша аударылды. Қоқыстар бей-берекетсіз шашылмас үшін арнайы қатты қалдықтарды бөлек жинайтын тағы да қосымша контейнерлер сатып алынды. Сондай-ақ, өткен жылы салынған "Орталық саябақ" ішіне ауыл түлектерінің ұйымдастыруымен субұрқақ салынды.Округте мекемелер мен жекелеген тұрғын үйлер CDMA жүйесі арқылы телефон пайдаланып отыр. Округ орталығы "Актив", "Билайн" және "Алтел/Теле2" ұялы байланыс желілерімен қамтамасыз етілген. Почта байланыс бөлімшесі газет-журнал, зейнетақы төлемдерін таратумен бірге әртүрлі төлемақылар қабылдайды. Сонымен бірге, почта салымдарын жеткізуді қамтамасыз етеді.Бүгінде №27 "Бөбек" бөбекжай-балабақшасында 50 бала тәрбиеленуде. "Қызылқұм" дәрігерлік амбулаториясында 1 дәрігер, 1 фельдшер, 7 мейіркеш тұрғындардың денсаулығына жауапты. Ажар ауылы тұрғындары үшін фельдшер бекітілген. "Жедел жәрдем" көлігімен қамтамасыз етілген. Емханада 7 төсектік күндізгі бөлім бар. Ай сайынғы балаларды егу жұмысы бекітілген кестеге сәйкес жүргізілуде. Ересектер арасында диспансерлік есепте 213 адам тұрады. Есепте тұрған науқастар босатылған тегін дәрімен қамтамасыз етіліп келеді. Бір жасқа дейінгі нәрестелер көрсеткішіне қарай тегін сүт тағаммен қамтылуда.1981 жылы салынған Ауылдық клуб үйі апаттық жағдайда тұрғандықтан 2019 жылдан бастап, ауылдық кітапханамен бірге бұрынғы ауылдық аурухананың бос тұрған ғимаратына уақытша орналасқан болатын. Аталған ғимарат тиісті талапқа сай болмағандықтан клуб үйінің қалыпты жұмыс жасауына өз қиындығын келтіріп келеді. Дегенмен, жоспардан таймай, әртүрлі іс-шара өткізілді. Мұндағы бес үйірмеге 60 оқушы қатысады.Наурыз айында жаңа клуб үйінің құрылысы басталды. Келесі жылы мамыр айында пайдалануға беріледі деп күтілуде. Құрылыс жұмыстарына ауылдағы жұмыссыз азаматтар да тартылуда. Қазіргі таңда құрылыста 4 азамат тер төгуде. Алдағы уақытта жаңа клубта мәдени-ағарту жұмыстары жандана түседі.Округ орталығы – Кәукей ауылы "Арал – Сарыбұлақ" топтық су құбырына қосылған, ауыл ішіндегі барлық үйге колонкалар тартылған. Ауылдағы әр отбасы өз үйіндегі колонка арқылы ауыз су пайдалануда. Ауыз суды тарату бекетінде 5 адам тұрақты судың тоқтаусыз берілуін қадағалайды.<blockquote>– Округ тұрғындары 1 подстанция, 6 трансформатор арқылы ауыл ішілік электр желісі арқылы тұрақты электр жарығымен қамтамасыз етілген. Алайда, электр трансформаторлары ескі, кейбір көшелерде әсіресе кешкі мезгілге қарай электр жарығы әлсіреп кетеді. Бұл жөнінде тиісті мекемелерге сұраныстар жіберіліп қойған, – дейді ауыл әкімі.</blockquote>Оңталап Мүсілім мемлекеттік бағдарламаларды жүзеге асыру, шағын кәсіпкерлікті дамыту арқылы жұмыссыздықтың деңгейін төмендету мақсатында нақты іс-шаралар қабылдауды қолға алмақ. Шағын кәсіпкерлікті дамытуға жағдай да жасау ойда бар. Кәукей ауылының 2 көшесіне орташа жөндеу жұмыстарын жүргізуді де діттеп отыр. Электр желісі трансформаторларын жаңартылса, нұр үстіне нұр болады деуде. Ауылдық округте балық шаруашылығын дамытуды жоспарлауда. Қызылқұм ауылдық округінің әкімі қамыс өңдеу шаруашылығы да, соңғы уақытта сұранысқа ие екендігін алға тартып, оны дамытуды көздеуде екен. Біздің тараптан, талапшыл ауыл әкіміне игі бастамаларға сәттілік тілеуден басқа шара жоқ.

Шаруасы шалқыған шалғайдағы ауыл

<a href="https://kyzylorda-news.kz/">Kyzylorda-news.kz</a> Арал теңізі құриды деген ғылыми болжам бар: шындық па, дақпырт па? Қазіргі Арал теңізінің экологиялық проблемалары осы жүйедегі бүгінгі таңда әлі шешімі табылмаған күрделі мәселелердің бірі болып отыр. Бұрынғы теңіздің астауын сақтап келген қысым бірте-бірте азайып, енді теңіз түбінің көтерілу процессі бастау алды. Демек бұл процесс негізінен екі бағытта яғни, онтүстіктен солтүстікке, шығыстан батысқа қарап бет ала бастады. Осыған орай кейбір ғалымдарының есептеулері бойынша Арал теңізі түбінің бүгінгі көтерілу жылдамдығы жылына 5-7 мм, ал жарты ғасырдан кейін 50-70 сантиметрге жетеді екен. Сөйтіп, жергілікті тұрғындардың тіршілік етулері жыл өткен сайын, оларды айтарлықтай қусырып, қиындатып барады. Сонымен бірге бұл аймақта жылына 15 рет катты дауыл соғып, тұзды шаңды жүздеген шақырымға таратады. Яғни, майда тұз аралас шаң атмосфераның ағынымен сонау Қиыр Шығыстағы Амур өзенінің бассейніне жөне АҚШ-тың Онтүстік Штаттарына дейін жетіп тұрғанын дәлелдейтін деректер өз алдына. Міне, соған қарағанда бұл құбылыс келешекте жақсы үміт күттірмейтін сияқты. Өйткені қазіргі Арал апатын, оның айналасында жан-жаққа етек ала жайылып бара жатқан сор шаңдақты, бұрқыраған шөл даланы көргенде Африкадағы әлемге әйгілі Сахара шөлі көзге еріксіз елестейді. Ол аймақ та кезінде егінді, малды, гүлденген өлке болған. Бірақ, кезінде сол жерді мекендеген халық табиғаттың заңымен санаспай, шаруашылықты қалай болса солай жүргізудің нәтижесінде ұланғайыр кең жер елсіз, сусыз шөлге айналған көрінеді.Ал, біз болсақ, сол кайғылы тәжірибені кайталауға бірте-бірте жакындап келеміз. Міне, осыған орай теңізді сумен толтырмағанмен оның кепкен ұлтанындағы құм, тұз, шаңды ұшырмаудың тезірек бір амалын жасаған жөн. Өкінішке орай, осы уақытқа дейін теңіз астының қүпия ағыстары мен иірімдерін ғана зерттеген ғылым үшін жер асты суларының өзара карым-қатынас ағыс иірімдері әлі жұмбақ.Елбасы Н. Назарбаевтың ұсынысымен Орталық Азия Елбасыларының 1993 жылдың каңтарында Ташкентте қабылдаған шешімі бойынша 1993 жылғы 26 наурызда Қызылорда қаласында өткен Арал теңізі мәселелері жөніндегі 1-конференциада жасалған келісім. Ол «Арал теңізі және Арал аймағы мөселелерін, экологиялық сауыктыруды, аймақтың әлеуметтік-экономикалық дамушы қамтамасыз етуді бірлесіп шешетін ортақ шаралар туралы келісім деп аталды. Оған бірнеше елдердің басшылары қол қойды. Келісімнің арнайы баптарында Арал теңізі бассейніндегі экологиялық дағдарысқа байланысты негізгі мәселелер нақтылы қаралды. Апаттың алдын алуға, қоршаған ортаны сауықтыруға және Арал аймағының, әлеуметтік-экономикалық дамуын қамтамасыз ететін, денсаулық сақтау, тұрмыстық қажеттіктерді өтейтін істерге тікелей назар аударылды. Келісімді орындаудың алғашқы шарты есебінде Халықаралық Арал қоры, Арал теңізі мәселелері жөніндегі мемлекетаралық Кеңес құрылды, олардың ұйымдық мәселелері шешілді. БҰҰ-ның Бас Хатшысына Орталық Азия Елбасыларының атынан үндеу-хат жолданды. Онда Аралды сақтап қалуға, Арал аймағының келелі мәселелерін шешуге арналған шараларға дүниежүзілік қауымдастықтың назары аударылды. Арал мәселелерімен айналысатын Орталық Азия елдері (Қазақстан, Өзбекстан, Қырғызстан, Түрікменстан) Елбасылары Кеңесінің атқарушы органы. 1993 ж. 26 наурызда Қызылорда қаласында құрылған (қ. Арал теңізі мәселелері жөніндегі келісім). Кеңеске Орталық Азияның әр республикасы үкімет басшыларының орынбасарлары бастаған 5 кісі және бақылаушы ретінде Ресей Федерациясының өкілдері енді. Мемлекетаралық Кеңесті әр жылда Орталық Азия елдері кезекпен басқаратын болып шешілді. Алғашқы кезек Өзбекстан Республикасына берілді. Кеңес өзінің атқарушы комитетін, су мәселелері жөніндегі, әлеуметтік-экономикалық, ғылыми-техникалық және экологиялық даму жөніндегі комиссияларын бекітті. «Сырдария» және «Әмудария» бассейндік су шығыны басқармаларын Кеңестің су мәселелері жөніндегі комиссиясы басқаратын болды. Кеңес өз жұмысын Халықаралық Арап қорымен және Дүниежүзілік банкпен бірлесе отырып жүргізді.Арал aпaтынан зардап шеккен елдер басшыларының іс-қимылдарына көмектесуге бағытталған алғашқы халықаралық келісім 1990 жылдың 24-26 қаңтарында БҰҰ-ның қоршаған орта бағдарламасының (ЮНЕП) ұсынысымен жасалды. Бұл халықаралық құжат «Арал теңізін сақтауға арналған нақтылы іске дайындықка қатысу» деп аталды. 1990 жылғы 11-12 қарашада Хаттамаға қол қойылып, келісім заңды түрде бекітілді. Келісім бойынша оқымыстылар мен мамандардың қатысуымен «Диагностикалық құжат» жасалды. Бұл үлкен ғылыми-тәжірибелік зерттеу Арал апаты кеселінің бетін ашып берді, нақтылы іске бағдарлама жасауға себін тигізді. «Диагностикалық құжат» 1992 ж. 4 тамызда ЮНЕП-тің басқаруымен Женева қаласында бекітілді. Келесі сатыда Дүниежүзілік Банк пен ЮНЕП, ПРООН, ЮНЕСКО, т.б. мекемелер қосыла отырып, Орталық Азия елдерінің мемлекетаралық кеңесінің және Халықаралық Арал қорының басшылығымен «Арал теңізі мәселелеріне нақтылы көмек Бағдарламасын» іске қосты. Бұл тарапта 7 бағдарлама, 18 жоба жасалып, ауқымды жұмыс қолға алынды.Қазақстанның бастамасымен Арал теңізін қалпына келтірудің екі түрлі нұсқасы ұсынылдыБірінші нұсқа – екі деңгейлі теңіз құру. Кіші Аралдан бөлек Арал орналасқан Солтүстік жағалауда мұхит деңгейінен 42 метр жоғары көкжиектегі Сарышығанақты 46 метр биіктікпен қалпына келтіру жоспарланған. Бұны жасау үшін шығанақ пен Кіші Аралдың қалған бөлігін бөгетпен бөліп, Сырдария өзенінен солтүстікке қарай 45 шақырым қашықтықта жетекші арна жасау қажет. Жоба жүзеге асқан кезде Кіші Арал екі су айдынының сарқырамасына айналады және теңіздің тұздылығы әртүрлі болады.Екінші нұсқа – Көкарал бөгетін 46 метрге дейін ұлғайту. Осыдан кейін теңіздің реттелу қажеттілігі жоғалады және бөгетте шлюз тұрғызудың да қажеті болмайды. Кіші Арал суға толып, өзінің арнасына оралғанда теңізде кеме қатынасы жанданады. Бүгінде осы ғасырлық жобаның жемісін жағалау жұрты әлі де көріп келеді.&nbsp;А.Тоқсанбаева

Қарт Аралдың бүгіні мен ертеңі

<a href="https://kyzylorda-news.kz/">Kyzylorda-news.kz</a> Бүгінде Шиелі ауданында кәсіпкерлік саласы кеңейіп келеді. Шағын және орта бизнесті дамыту үшін үкіметтен көрсетілетін қолдау көп. Жеңілдетілген несиелер алып, кәсібін жандандырып жүргендер де жетерлік. Олардың арасында ірілі-ұсақты дәстүрлі емес кәсіпкерлікпен айналысып келе жатқан жандардың ұмтылысы ауданның әр азаматының еңбектен енжар еместігінің куәсі іспетті. Демек, біздің өңірде кәсіпкерлікті дамыту жолында жасалынып жатқан жұмыстар аз емес.&nbsp;Кейіпкеріміз тігіншілік өнерін жанына серік еткен - Сәуле Кенжеева. Ол бүгінде шағын кәсібін қолға алып, ешкімнің қолдауынсыз өз еңбегінің арқасында бала-шағасын асырап, «Сәуле» тігін ательесін ашып, өз жұмысын дөңгелетіп отыр. Ателье халыққа қажетті киім үлгілерімен қатар, тұрмысқа қажетті барлық бұйымдарды тігеді. Ынтамағы мен бірлігі жарасқан ұжымда Рая Ысқақ, Ким Нарика, Әсем Омарова, Қалампыр Адиловалар қызмет көрсетіп, қолдан жасаған туындыларына ел сүйсініп, өз игіліктеріне пайдаланып, ыстық лебіздерін білдіріп жүр. Мектеп бітірген соң Алматы қаласындағы технологиялық университетінде білім алып, кейіннен Түркістан қаласындағы Қ.А.Яссауи атындағы қазақ-түрік университетінде кәсіптік оқытушы мамандығы бойынша бітірген. Балалық шақтағы қызығушылығын үлкен кәсіпке айналдырып, инженер-технолог мамандығын меңгеріп, тігіншілік өнерімен нанын тауып, тіршілігіне жаратады. Алғаш еңбек жолын «Көкшоқы» кентіндегі (бұрынғы РУ-6) «Сырдария» тігін фабрикасынан бастады. Кішкентайынан әжесінің қасында жүріп, қыр-сырын меңгеріп, жанына серік етті. Бүгінде балалық шақтағы қызығушылығын, үлкен кәсіпке айналдырып отыр. «Бизнестің жол картасы 2020» бизнесті қолдау мен дамытудың бірыңғай бағдарламасы аясында 3 млн. теңге алып, кәсібін кеңейтуді мақсат етіп отыр. Жаңатұрмыс ауылынан тігін шеберханасын ашып, мемлекет тарапынан қолдауға ие болып, отбасына берген үлкен мүмкіндік екенін жасырып қала алмады. Иә, қол жайып қарап отырмай, іске кіріскен жанның еңбегі еш кетпейтінінің тағы бір дәлелі осы. Бүгінде шағын кәсіп ашушыларға мемлекет тарапынан қолдау ерекше. Жолдауда айтылғандай, шағын және орта бизнесті дамыту тенденциясын қолдау мақсатында облыс басшысының бастамасымен «Кәсіпкерлікті қолдау жылы» болып белгіленген болатын. Осы саланы одан әрі жан-жақты дамыту үшін 2020 жылға дейін жалғасын таба бермек.&nbsp;– Ауданда кәсіппен айналысамын, өзіме де, өзгеге де пайдамды тигіземін деуші азаматтарға жол ашық. Өзінің мүмкіндігі мен қарым-қабілетіне сенсе болғаны. Ерінбей ізденсе арнайы тегін оқытатын кәсіпкерлік мектептері де жұмыс жасап тұр. Тігіншілік шеберханасын ашып, үйретем дегендерге ақыл кеңесімді айтып, білгеніммен бөлісудемін. Сондықтан болар, тігін тігуден ешқашан шаршаған емеспін, қайта одан күш-қуат аламын, – дейді кәсіпкер.«Бақыттың кілті еңбекте» дегендей, шынайы еңбектің ырысы мен несібесі мол. Күні бойы тапжылмай отырып, он саусағы майысқан тігінші шеберлердің келістіріп тіккен киімдеріне құрметпен қарап, еңбегін бағалауға болады. Тігінші еңбек нарығында ерекше танымал, сұранысқа ие мамандық. Одан бөлек заманның талабына сай талғаммен киіну табысқа бастайтын алғы шарттардың бірі. Тігін тігу өнері – махаббат пен сұлулыққа деген құштарлықтан туындаса керек. Сұлудың мүсінін айшықтайтын киімнің өз қолыңнан шыққаны жарасымды болары анық. Әсіресе, бүгінгі күні бәріміз сәнді әрі талғаммен киінгіміз келеді. Бұл мамандық үлкен жауаптылық пен төзімділікті талап етеді. Тігіншілік – қол мен қиялдың еңбегі. &nbsp;Осылайша, тұрмысының күрмеуін кәсібі арқылы келістіріп, шаруасын шырайландырып отырған жан Сәуле Кенжееваның жайымен қанықтық. Бүгінде сүйікті жар, 3 баланың анасы бола отырып, қалауын тауып, қарды емес ісін алға бастырып отырған осындай отбасылар көбейсе, экономика өсіп, отандық бизнестің дамуына оң ықпал етеді. Сонымен қатар, кәсіпкерлік саласының одан әрі дами түсуіне айтарлықтай үлес тигізеді.&nbsp;Жалпы, «Жұмыспен қамту 2020 жол картасы» бағдарламасының негізгі мақсаты – жұмыспен тұрақты және нәтижелі қамтуға жәрдемдесу арқылы халықтың табысын арттыру. Мақсатқа қол жеткізу үшін бірнеше міндет жүктеліп отыр. Яғни, өз бетінше жұмыспен айналысушыларды, жұмыссыздарды және табысы аз адамдарды жұмыспен нәтижелі қамту. Сондықтан, қазіргі таңда азаматтарға «уақытысында оқып, диплом ала алмадым, жұмыс жоқ» деп қайғырудың жөні жоқ. Бағдарлама арқылы бүгіннен бастап білім алып, кәсіпке бет бұруға әлі де кеш емес.

Тігіншілік – қол мен қиялдың еңбегі

<a href="https://kyzylorda-news.kz/">Kyzylorda-news.kz</a> Президент Қасым-Жомарт Тоқаев «Жастарға жан-жақты қолдау көрсету мемлекетіміздің міндеттерінің бірі» деп атап өтіп, жастарға ұдайы қолдау көрсетілетіндігін тілге тиек еткен болатын. Бүгінде егемен елдің қозғаушы күшіне айналған жастар қоғамның қай саласында болмасын белсенділігімен көзге түсіп, елдің ертеңі жолында жастық жігерін аямауда. 12 тамыз – Халықаралық Жастар күніне орай Арал аудандық «AILAQ» жастар ресурстық орталығының жұмысына тоқталатын боламыз.&nbsp;Аудан халқының 24,8 пайызын жастар құрайды. Яғни, 14 пен 35 жас аралығындағы 25473 жас бар.&nbsp;Ауданымызда орта арнаулы оқу орындарында&nbsp;303&nbsp;студент жастар білім алуда. Ал мектептерде 14-18 жас аралығындағы &nbsp;5192 оқушы оқиды. &nbsp;Аудан жастарының қоғам өмірімен араласып, олардың жан-жақты дамуына қолдау көрсетіп отырған аудандық&nbsp;«AILAQ»&nbsp;жастар ресурстық орталығы мекемесі бар.&nbsp;Орталықта 23 адам еңбек етеді. Басшысы Ақтілек Есеевтің айтуынша, штат бірлігіне сай бөлінген қызметкерлер жастарға қызмет көрсетеді. Сондай-ақ, аудан орталығында ғана емес кент және ауылдық округтерде &nbsp;жастар ісі жөніндегі 22 &nbsp;маман еңбек етуде.&nbsp;– Қазіргі күні жастар арасындағы жұмыссыздықты азайту бірінші кезекте тұрған мәселе. Әрине, кәсіп ашуға ынталы жастар көп. Бұл бізді қуантады. Мемлекет тарапынан да жастарға жасалып жатқан қолдауларды аралдық жастар да сезінуде. Десе де,&nbsp;жыл басынан бергі 6 айдың мәліметі бойынша жұмыспен қамту орталығына 1846 адам жұмыссыз ретінде тіркеліпті. Оның ішінде 679 жастар екен.&nbsp;Тиісінше, жастар тәжірибесіне 98 жас, ал қоғамдық жұмыс орындарына 183 жас жіберілдіп отыр, – деді орталық басшысы Ақтілек Есеев.«AILAQ» жастар ресурстық орталығы жыл басынан бері түрлі бағыттағы шаралар ұйымдастырып келеді. Өз мәселесімен келген 1075 жасқа кеңес берген. Жыл көлемінде орталық 12 бағыт бойынша жоба әзірлеп, жоба бойынша тұрақты жұмыстар жүргізіліп келеді. Атап айтар болсақ, «Жас маман» жобасы бойынша, «Дін және жастар» жобасы шеңберінде кездесулер, &nbsp;«Еріктілер мектебі» жобасы бойынша мәдени-көпшілік шара, «Жастар қоғам назарында» жобасы аясында рейд жұмыстары, «Мен спортты таңдаймын» жобасы бойынша спорттық шара және «Жас кеңесші» жобасы аясында &nbsp;«Ашық есік» акциясы ұйымдастырылған.– Сондай-ақ, жастардың бос уақытын тиімді пайдалану мақсатында «AILAQ ACOUSTIC» жобасы өз жалғасын тауып, Арал қаласында 3 мәрте өткізілді.Сонымен қатар, аталған жоба ауданға қарасты Сексеуіл және Жақсықылыш кенттерімен бірқатар ауылдық округтерде өткізу жоспарланып отыр. Жоба жастардың шығармашылығын дамытуға бағытталған. Жалпы біздің орталық мамандары аудан жастарының өз тұлғасын қалыптастырып, жан-жақты дамуына жағдай жасау мақсатында тынбай еңбектенуде. Әрбір жастың мәселесі бізді бей-жай қалдырмайды, – дейді мекеме басшысы.&nbsp;Сонымен қатар жаз маусымында жастарды жұмысқа орналастыру жұмыстары бойынша «Жасыл Ел» еңбек жасағының маусымдық жұмысы өз жалғасын тауып, аталған жобаға аудан бойынша 153 жас қамтылған.«Мен жастарға сенемін». Бұл сөзді Алаш арысы Мағжан Жұмабаев жырына қосқан еді. Расында кемел келешектің тұтқасын ұстайтын жастар. Бүгінде Жаңа Қазақстанның жастары жақсылық жолында аянбай еңбек етіп, елдің дамуына үлес қосып жүр. Бұл біздің болашағымыздың жарқын боларының кепілі десек те болатын шығар. Ең бастысы ел дамуын еселейтін ерік-жігері мол жастар аман болсын!&nbsp;Н.Маратқызы

Жастармен жарқын болашақ

<a href="https://kyzylorda-news.kz/">Kyzylorda-news.kz</a> Екі мың бесінші &nbsp;жылы Сырдария өзенінде &nbsp;су мол болып, арнасынан тасу қаупі өршіп тұрған еді. Сол жылғы қыс аязды, суық болып дария мен каналдар да қалың мұз қатты. Ақпан айының аяғында күн күрт жылынып, көктем басталмай дария мұзы еріп, су таси бастады.Шиелі ауданын су басу қаупі туралы төтенше жағдайлар қызметкерлері дабыл қағып, дария мен каналдар бойына күзеттер қойылды. Дария деңгейінен көтеріліп бара жатқан суды сағат сайын хабарлап тұрды. Сол деңгейді ұстап тұру үшін, Шиелі каналының сағасы да толық ашылды. Шиелі мен Төңкерісті жалғайтын көпірдің &nbsp;жоғарғы жағының екі бетіндегі екі жүз метрдей жерлерінің дамбасы аласарып қалған болатын. Сол каналдың аласа қабырғаларын менің ұжымым «Қаптағай-К» ЖШС техникалары ғана көтеріп шықты. Ауылдың жартысы бөлініп, жекешеленген бес-алты ұжымнан бірде-бір техника қатыспады. Өйткені, олардың меншігіндегі булдозерлер мен пагрузчик тракторлары істен шығып, жүрмей тұрған болатын.&nbsp;Айтбай Жақыпов айдаған ДТ-75 бульдозері мен Айтман Ыбрайов айдаған малютка погрузчик және бір «Зил» машинасы «Белорус» тракторларымен &nbsp;топырақ тасып, каналдың екі жақ бетінің осал тұстарын көтеріп күшейтіп алдық.&nbsp;Айтман тракторын көпірдің ортаңғы бөлігінің шетіне тақап, көлденең қойды да, өтіп жатқан мұздардың үлкендерін шөмішімен ұрып сындыра бастады. Сол уақыттарда судың ағысы жылдам күшейді. Бағаналы бері сықырлап өтіп жатқан мұздың даусы да өзгеріп, біріне-бірі соғып, &nbsp;күтірлеген дыбысы зорая түсті. Көпірдің екі жақ шетінен өтіп үлгере алмаған сең кептеліп, каналдың көпір астындағы арнасы тарыла бастады. Ұзамай аз уақытта көпірдің Айтман тұрған ортаңғы бөлігі ғана қалды. &nbsp;Айтман итеріп, сындырып өткізіп жібермесе, ол бітеліп қалар еді.<img src="https://knadmin.beoblood.kz/uploads/Picture144_0df05585f7.jpg" alt="Picture144.jpg">Көпір алдындағы су деңгейі лезде бір метрдей көтеріліп кетті. Каналдың екі жақ жағалауындағы қамыс пен жыңғыл, шеңгелдер жапырылып мұз астында қалды. Бұдан әрі тағы көтерілсе, сойқан болары анық. Су деңгейінен жарты метрдей ғана биік тұрған (дамба) каналдың қабырғасы ұстап тұр. Айтманның өзінде де, тракторында да дамыл жоқ. Мұздармен соққылап алысуда. Сол арада тұрған барлық адамдар құдайдан Айтман мен тракторының амандығын тілеп жалбарынуда. &nbsp;Осы кезде Төменарықтың канал сағасына қада, қамыс, сабан басып жіберген көлігім мен адамдарым келді.&nbsp;– Шиелі каналының төменгі жағынан сең буып, дарияны байлап, &nbsp;Төменарықтағы тоғаннан &nbsp;қопарыла құлады. Маңайдағы бес-алты үйді су басып, он-он бес үйлер түгел судың астында қалды. Тасыған топан су Шиелі каналына құйылып, бізбен жарыса ағып, осы жаққа да келіп қалды,– деді бойларын үрей билеген олар.«Аудан әкімі Ерлан Мұстафаев пен облыс басшысы Икрам Адырбеков сол жерде екен. Ауданның тасқынға байланысты жәрдемге барған адам көп, бәрі қолдарынан келгенін істеп жатыр. Осы жағдайдан соң дереу ауылға қайттық. Келіп тұрғанымыз осы!»– деді апатты көріп қайтқан жігіттер. Қасымда тұрған ауыл әкімі Ораз &nbsp;&nbsp;Садықов:– Маған ауылды тез арада көшір – деген бұйрық келді. Елді көшіруге алты автобус пен &nbsp;камаз жіберіпті. Ауылда төтенше жағдайлар қызметкерлері мен ішкі істер бөлімінің адамдары мені күтіп тұр – деді де көпір үстіндегі жиналған адамдарды қайтуға шақырып жағдайды баяндады. &nbsp;Көпірдің үстінде Айтман мен «Белорус» тракторын жүргізуші Тұрлан Маңғұлов үшеуміз қалдық.&nbsp;Канал арнасымен өтіп жатқан дүлей, апат, сойқанымен, жалғыз алысып жатқан Айтманның тракторы басқару тетіктерін жоғарыға, төменге, екі жағына басып, көтеріп, дамыл таппай қимылдатты. Екі көзі, бүкіл тұла бойымен көпір астынан өтіп жатқан апатқа қарай ұмтыла түсіп, бірінің үстіне бірі шығып, қопарылған қалың мұздарды ұрғылауда. «Баласы атқа мініп көкпар шапқанда, үйдегі ата-анасы тақымын қысып отырады» деген рас екен. Мен Айтманға қарап, өзімнің тақымымды ғана емес, жан дүниеммен жанашыр болып &nbsp;отырғанымды сезіндім. Біраздан соң барып байқадым. Мені дірілдетіп тұрған, аяғымның астындағы көпірдің қозғалысы &nbsp;екен. Иә, Аллаһым көпірді шыдата гөр. Айтман мен тракторын аман қыла гөр, – деп іштей жалбарынамын. Күн батуға айналды, айнала кеугім тарта бастады. Әрлі-берлі көпірден адамдар мен машиналар жүк артып, аттылы, жаяу адамдар малдарын айдап, қасымыздан өте бастады.Жаман айтпай жақсы жоқ, канал екі жағына жығылса, бірінші біздің ауыл, содан соң темір жолдың бергі беті мен Нартай ауылы түгел топан судың астында қалады.– Садағаң боп кетейін, бауырым Айтман. Саған Алла қуат берсін – деп құдайға жалбарыну ғана қолымнан келері. Тұрлан екеуміз көпір үстінде теңселіп жүрміз.Оның тракторының мұзды ұрып жатқан ұзын мойнын көтеріп түсірген сайын, көпір жақтауы бетонына соғып сарт-сарт етеді. Соққан сайын мойнының бір жері сынып кетер ме екен деп, не болмаса қозғалтқыш күші &nbsp;&nbsp;істен шығама деп қорқамын. Менің басым тола үрей мен уайым. Бір менің тілегім не болушы еді. Осы сәтте бүкіл Шиелі халқы тілек тілеп жатыр. Көптің тілегі көл. Шамасы екі сағаттай өткенде каналдың көтерілген деңгейі түсе бастады. Соны көріп көңілімізді дендеп, сол кезде ғана ауыл жаққа көз салдық. Ауыл жақ түгел қараңғылықта, бұрын күнде самаладай боп жанып тұратын электр жарықтары сөнген. Сонда ғана ауылды түгел көшіріп алып кеткенін білдім. Біртүрлі жүрегім ауырсынып, күрсіндім. Бірте-бірте соғылысқан сеңнің &nbsp;даусы кеміп, мұз көшкіні де жұқара бастады. &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; &nbsp;Көпірден сәл әрірек жерде арық бар, соның қақпағын ашсам, деңгейді қалыпты ұстауға оның да көмегі болар деп ойладым. Осы уақытта трактор үстіндегі Айтман түсіп келіп:– Құдай сақтады, ел аман қалды – деді маңдай терін сүртіп. Құдай елді сен арқылы сақтады, саған мың да бір рахмет. Алла сыйласын сені – дедім ризашылығымды жаудырып. Шаршадың ғой, аздап демал. Сонан соң арықтың қақпағын ашайық. Одан аққан су ештеңені бүлдірмейді. Пайдасы болмаса, зияны тие қоймас – дедім. Соны ести салысымен: – жүріңдер соны ашып біржола демалармыз, – деді тракторына мініп. Бортты қақпақты ашып келе жатқанымызда көпірдің үстіне тағы тоқтап көз жүгіртсек, каналдың беті тазарыпты. Ал, енді қайтайық дегеніміз сол еді, бір жеңіл көлік келіп тоқтады. Серік Жұмаділдаев пен Бауыржан Көпеев екен, түсіп жағдай сұрады.&nbsp;Біз тазалап болдық – деп кеткенбіз. &nbsp;Дария байланып, тоғаннан асып жығылған сең түнде тағы келіпті. &nbsp;Топан сумен келген мұзбен Айтман таң атқанша алысыпты. Тағы тасқын келерін білмеппіз.Ертеңіне &nbsp;су деңгейін бақыламақ болып, көпірге барсақ, мұз көпірдің үстіне шыға бастапты. Біз тағы сәл кешіксек, канал жығылады екен.&nbsp;Табиғаттың тылсым күшінен орын алған мұзды ұрғылап, көпірден өтуіне мүмкіндік туғыздық. Каналдың бетіне дейін көтеріліп, енді болмаса төбесінен асуға айналған су төмен қарай құлай, мұздары домалай, ағыла жөнелді. Көтеріліп бара жатқан деңгей тоқтады-ау, әйтеуір. Ағып келіп жатқан мұз көшкіні сирей бастады. Жанар майымның таусылар уақыты болып қалғанын Тұрсынбекке ескерттім. Ол Шиеліге майға кетті. Сол кездерде канал деңгейі түсіп, ағып келе жатқанын байқадық. Тракторымды ол жерден алып, көпір астының басқа тығылған көздерін ашып, тазалап болғанымда, таң атуға &nbsp;таяп қалды. Осылайша каналды, ел жұртты аман алып қалдық – деді. Айтман қай марапатқа болса да лайық болатын. Ертеңіне аудан басшыларынан жағдайымызды сұраған адам болмады. Кейіннен дария бойындағы апат пен күрестің сұмдық болғанын естіп, оның жанында біздің көпір басындағы күрес салыстыруға келмейтінін білдім. Теміржолдың тау жақ бетін, яғни, &nbsp;Ш.Қодаманов ауылын аман алып қалған – Айтман еді.Айтман – 1972 жылы Түркістан аудандық советінің депутаты, 1982 жылы Шиелі аудандық советінің депутаты болып сайланған халықтың қалаулысы болды.&nbsp;

Шиелі: Айтманның адал еңбегі

Жаңарған білім ордасы

<a href="https://kyzylorda-news.kz/">Kyzylorda-news.kz</a> «26 маусым – Халықаралық нашақорлыққа қарсы күрес күніне» орайластырылған айлық шеңберінде, сондай – ақ облыс тұрғындары арасында есірткіге қарсы насихат жүргізу және полицейлердің имиджін көтеру мақсатында Қызылорда облысы ПД Есірткі қылмысына қарсы іс-қимыл басқармасы тарапынан тілшілер арасында «Есірткісіз болашақ!» тақырыбында байқау ұйымдастырылды.Байқаудың мақсаты – нашақорлық пен есірткі қылмысының өзекті мәселелеріне қоғам назарын аудару, мемлекеттік саясаттың маңызды бағыттары және нашақорлық саласындағы маңызды іс-шаралар туралы халықты хабардар ету, есірткі қылмысының өзекті мәселелері бойынша материалдар жариялайтын журналистерді қолдау.Жарысқа қатысушылар техниканың заманауи жетістіктерін қолданып, өз ойларын нақты фактілермен нығайта отырып, айқын және дәлелді жеткізе алды. Тілшілер нашақорлық пен есірткі қылмысы проблемасын жариялай отырып, халықты, өскелең ұрпақты есірткісіз өмір туралы хабардар етуге өз үлестерін қосты.Байқауға қатысушылар номинациялар бойынша бөлінді, барлық қатысушыларға дипломдар мен естелік сыйлықтар табысталды. Үздік деп танылған Кенжеғұлова Мөлдір Сабыржанқызы – «Kyzylorda-news.kz.» ақпарат агенттігінің тілшісі, Сейіл Айдана Сайдуллақызы – «Ақмешіт апталығы» ақпарат агенттігінің шеф редакторы, Жарманова Айжан Сандибеккызы – «Kyzylorda-news.kz.» ақпарат агенттігінің тілшісі, Оралбай Аружан Маратқызы – «Ақмешіт жастары» газетінің сайт редакторы, Бекбан Шынар Алтынбекқызы – «Syrboyi.kz» ақпараттық агенттігінің шеф-редакторы «Полиция алтын қаламы» номинациясының жеңімпазы атанды.

«Есірткісіз болашақ!» байқауы мәресіне жетті

<a href="https://kyzylorda-news.kz/">Kyzylorda-news.kz</a> Мектеп – бүлдіршіндерді білім нұрымен сусындататын киелі шаңырақ ретінде есептелсе, ұстаз – оның жүрегі іспетті. Қамшының сабындай ғана қысқа ғұмырын шәкірт тәрбиелеуге арнап, ол үшін аянбай еңбек еткен жандар қаншама. Өкінішке орай, тарих толқыны оларды бізден алыстатып, ұмыт қалдыра береді. Сол себепті, білім беру жолында тер төгіп, талай қиыншылықты жеңе біліп, Шиеліге қарасты Балаби ауылындағы №50 Абай атындағы мектептің негізін қалаған Пахретдин Аширов жайында сөз өрбітпекпіз.Шиелі кентінің тұрғыны, сексеннің сеңгірінен асқан Мұхтар қажы Шәймерденұлының анасы Бибіхадиша Үмбетқызынан естіген естелігіне сүйенсек, Пахретдин Әбілқасымұлы 1919 жылы Балаби ауылында дүниеге келген. Ерте есейіп, ақыл тоқтатқан бозбала 1937 жылы, яғни 18 жасында туған ауылынан мектеп қабырғасын қалайды. Ол кезде ауыл мектебі 7 жылдық болатын. Сондай-ақ, осы тұста Пахретдин комсомол комитетінің секретары қызметін қоса атқарған екен.Аталмыш мектептің құрылыс жұмыстары жүргізіліп жатқанда, екінші жабуға ағаштар жетіспей қалады. Ал, қол ұшын беруін өтініп, райкомның есігін қаққанда, басшысы «Ағаш жоқ емес бар, «Оқшы ата» мешітін бұзып, ағашын алыңдар», – деп мектептің құрылысын тез арада бітіруді тапсырыпты. Әрине, «Бисмилла» дегенді қырып, &nbsp;жүрегінде «Құдай жоқ» деп АТЕИЗМ оты жанып тұрған шақта мешіт кімге керек дейсіз?&nbsp;Бірақ, «Бір Алла» деген қазақ халқы құдайын қалай ұмытсын. Басшыдан мешіт бұзу туралы тапсырма алған Пахретдиннің салы суға кетеді. Аса қамқор, ерекше мейірімділігімен қатар Алланың «Қаһар» деген сипаты да бар ғой. Алланың үйін бұзу кімге оңай тисін? Бір апта тамағынан ас өтпей, ұйқысыздықпен таң атырып, өзін қоярға жер таппайды. Ақыры қой сойып, садақа ретінде етін көршілеріне таратады. Өзін-өзі жұбатып, сабырға шақырады. Басшылықтың бұйрығына бағынып, мешіттің ағаштарын мектеп құрылысына пайдаланбақшы болып шешкен ол, құрал-жабдықтарын жинақтап, өгіз арбаға салып, мешітке барады. Дегенмен, бір кірпішін қозғауға дәті бармаған иманды жігіт барған ізімен кері қайтады. Осы жағдай бір апта қайталанады. Жетінші күн дегенде жеңгесі Бибіхадишаға «Мешітті бұзуға бүгін барамыз. Қазан алыңыз. Ет жіліктейтін тақтай, дастархан, ас беретін ыдыс-аяқты дайындап қойдым. Мал сойып, құран оқимыз», – дейді.&nbsp;Мал сойып, ас беріп болған соң жас ұстаз бір сағатқа жуық құран оқып, Алладан кешірім сұрап отырады. Көзі көргендердің айтуынша, жанарынан аққан жас, иектен суша төгілген көрінеді. Ал, мешітті бұзар алдында &nbsp;жеңешесіне «Ыдыс-аяғыңызды жуып тазалай беріңіз. Ағаш бұзуға араласпаңдар. Әй, қарақтарым, жеткіншектерім, сендер келешегімсіңдер. Алла алдында сендердің күнәларың жоқ. Не көрсем де, өзім көрейін. Тек сендер аман болыңдар», – деп барғандарды тоқтатады. Тағы бір сағатқа жуық құран оқып, Бесін намазын өтейді.Мешіттен шыққан ағаштарды арбаға тиеп, ауылға бет алып бара жатқанда жолда кезіккен бала арбаға міңгеспекші болады. Сонда жеткіншекті тоқтатқан Пахретдин: «Балам, бұл киелі ағаштар. Отыруға болмайды», – деп баланы ниетінен қайтарған екен.&nbsp;Басынан осынша қиын тауқыметті өткерген ұстаз, 1939 жылы Фин соғысына кеңсе хатшысы (писарь) ретінде қабылданады. Пахретдинның бұл сапары Ұлы Отан соғысымен жалғасады. «Соңғы хаты 1942 жылы қаңтар айында келді. Содан бері хабар-ошарсыз кеткендердің қатарында», – дейді жиені Дайырбек Ережепов.&nbsp;Иә, бүгінгі күні еліміз тыныш, жұртымыз аман. Мемлекеттің қолдауымен зәулім мектеп ғимараттары салынуда. Бүгінгі өскелең ұрпақ, Пахретдиннің қиыншылықпен өткен өмірі ғибрат болады деген ойдамыз. Кім біледі? Мүмкін бүгінгі бейбіт өмір кейіпкеріміз сынды имандылардың дұғасы болар?

Шиелі: Бала бидегі білім ошағының іргесі қалай қаланды?

<a href="https://kyzylorda-news.kz/">Kyzylorda-news.kz</a> &nbsp; Танымал әнші Төреғали Төреәлі “Қазақстан полициясы күні" мерекесімен ерекше&nbsp;құттықтады. Бұл туралы <a href="https://stan.kz/magan-tiise-bermesin-toregali-toreali-ishki-ister-minis-402235/">Stan.kz</a> ақпарат агенттігі хабарлайды.Ол тәртіп сақшыларына арналған су жаңа әнінің тұсауын кесіп, көрерменге ұсынды.<blockquote>“Құрметті, ішкі істер органдарының ардагерлері, тәртіп сақшылары, ішкі істер органдарының қызметкерлері!&nbsp;Сіздерді кәсіби мерекелеріңізбен құттықтаймын. Қоғамдық тәртіпті қалыптастыру, ел тыныштығын қорғау жолындағы қажырлы еңбектеріңізге сәттілік тілейміз!Әрдайым анттарыңызға адал болып, ел қорғаны деген атаққа абыройлы қызмет ете беріңіздер! Еліміз тыныш, халқымыз аман, бауырымыз бүтін, бірлігіміз бекем, тәуелсіздігіміз тұғырлы болсын!”, – деп жазды өнер иесі.</blockquote>Сонымен қатар мерекеге орай ұйымдастырылған кеште эстрада жұлдызы өнер көрсетіп, үндеу жасады. Өйткені жиынға&nbsp;Ішкі істер министрі Ержан Сәденов те қатысқан еді.<blockquote> “Мені танып тұрсыздар ма? Мен де сіздерді жақсы көріп, біліп тұрмын. Құрметті Ержан аға, сізбен осындай керемет жерде көрісіп тұрғаныма қуаныштымын. Маған тиісе бермесін, мына кісілерге айтып қойсаңыз. Еліміз аман, жұртымыз тыныш болсын!” – деп әзілдеді әнші.</blockquote>Фото:&nbsp;https://www.instagram.com/toregalitoreali

"Маған тиісе бермесін": Төреғали Төреәлі Ішкі істер министріне ескерту жасады

<a href="https://kyzylorda-news.kz/">Kyzylorda-news.kz</a> &nbsp;Танымал әнші Балжан Бидаш тұрмыста болған жылдарында қатты күйзеліске түскенін жасырмады. Бұл туралы&nbsp;<a href="https://stan.kz/kozim-kormey-kaldi-balzhan-bidash-tyrmista-bolgan-kezdegi-kiin-satti-esine-aldi-402211/">Stan.kz&nbsp;</a>ақпарат агенттігі хабарлайды.&nbsp;“Достар, шыны керек осы сұрақтардан шаршап кеттім. Бүгін нүктесін қояйықшы. Кім болсын үйленіп жатқанда «ажырасып кетемін» деп ойламайды. «Соңына дейін сол жанмен бірге бақытты боламын» деп ойлайды. Тағдыр емес. Қарым-қатынасымыз тоқтау керек уакытында тоқтады. Ажырасу кімге болсын оңайға соқпайды. Депрессияда болғанда көзің көрмей қалады ғой. Үй, дала қараңғы көрінеді. Маған да моральды тұрғыда оңай болған жоқ. Психолог жағаламадым. Тек депрессияда жүріп, уақыт өткізіп алмас үшін болашағыма жоспар құрдым. Жұмысымды қайта қолға алдым. Табыс табуға кірістім. Аяқтан тұру үшін кәсіп тренингтерге бардым. Сол кезде бір кәсіп-жаттықтырушы ақыл-кеңестерімен алға жылжуға шабыттандырған болатын. Ол кісі оқиды ма жоқ па білмеймін, сол кісіге алғыс айтқым келеді… Осындай кезде жақындардың, жаныңда дұрыс кеңес беретін, жол көрсететін, қолдау көрсететін адамдар болуы маңызды өз қалпыңа келгенше», – деп жазды әнші.&nbsp;Сонымен қатар эстрада жұлдызы қиын кезеңнен қалай шыққанын айтып берді.&nbsp;<blockquote>“Ажырасқан соң өмір бітіп қалмайды. Ол адамды кезіктірмей тұрып, қалай өмір сүрдіңіз. Солай өмір сүре бересің. Бірақ одан да жақсы өмір сүресің. Өзіңді жақсы көрмей тұрып, бүкіл өміріңді, өзіңді біреуге беріп тастағанда өзімді жоғалттым дей беріңіз. Өмірде&nbsp;барлығынан шаршағанда ақылды, табысты, еңбекқор адамдардың өмірін тыңдадым және оқыдым. Одан кейін спортпен айналыстым. Осылардың барлығын жасағаннан кейін, жеңіл өтіп кетті”, – дейді эстрада жұлдызы.&nbsp;</blockquote>Сурет: https://www.instagram.com/bidash_official/

 Балжан Бидаш: «Маған да оңай болған жоқ»

<a href="https://kyzylorda-news.kz/">Kyzylorda-news.kz</a> “ҚХП” Қызылорда облыстық филиалы мен “Жас журналистер одағы” бірлесіп, Қазақстан Халық партиясының 20 жылдығына орай «Дара тұлға» акциясы аясында қоғам қайраткері, өлкетанушы, белгілі қаламгер Сағат Жүсіптің 80 жасқа толуына орай іс-шара өткізді.«С.Жүсіп зерттеулеріндегі нәубет-зобалаң мәселесі (1920-1930 жж.)» атты ғылыми-танымдық конференцияға қоғам қайраткері, өлкетанушы Жүсіп Сағат Есмаханұлы, Қызылорда облысының қоғамдық даму басқармасы басшысының орынбасары, тарих ғылымдарының кандидаты Ибраев Уәлихан Серікұлы, Қорқыт Ата атындағы Қызылорда университетінің профессоры, география ғылымдарының кандидаты Омаров Қали Әбдіұлы, Қорқыт Ата атындағы Қызылорда университетінің қауымдастырылған профессоры, тарих ғылымдарының кандидаты Оразбақов Айтжан Жұмабайұлы, Қорқыт Ата атындағы Қызылорда университетінің аға оқытушысы, тарих ғылымдарының Магистрі Ахметбек Бақытжан Мүкарамұлы, «Жас журналистер одағы» ұйымының төрағасы Баймаханов Самат Түлкібайұлы, партия белсенділері, қала тұрғындары қатысты.Конференция барысында «Қазақ жерінде болған ашаршылық тақырыбындағы Ресей мен Қазақстан тарих мамандары арасындағы тартыстық пікірлер хақында», «Нәубет-зобалаң тарихынан кейбір деректер», «1930 жылдардың басындағы Арал концлагері: жаңа деректер мен дәйектер», «1930 жылғы Сыр бойындағы көтерілістер: себептері мен салдары» атты баяндамадар оқылып, ұсыныс-пікірлер тыңдалып, құттықтаулар айтылды.Іс-шара сонында мерей той иесіне «Қазақстан Халық партиясы» Қызылорда облыстық филиалының төрағасы Қайрат Ерназаровтың құттықтау хаты табысталып, сый-сияпат көрсетілді.

«Дара тұлға» акциясы өтті

<a href="https://kyzylorda-news.kz/">Kyzylorda-news.kz</a> Жуырда елімізде орын алған табиғи апат кім-кімге де оңайға соқпағаны анық. Бұл мұқым қазақ елінің мұңы. Батыс өңірінде болған оқыс оқиғаға Сыр құтқарушылары да өз жәрдемін көрсетті. 80 күннен аса іс-сапарда болған құтқарушылар мотопомпалар арқылы 589 мың метр куб суды тартып, 27 мың дана қаппен дамбыларға нығайту жұмыстарын жүргізді. Сондай-ақ, олар 1 395 адам мен 78 үй жануарларын, 1 487 төрт түлікті қауіпсіз жерге көшірген. Осы ретте халқымыздың қауіпсіздігі үшін аянбай еңбек еткен біршама азаматқа Мемлекет басшысы “Ерлігі үшін” медалін табыстады. Оның ішінде Сыр елінің құтқарушысы Еркін Әмірханов та бар.Бүгін құтқарушылар Өңірлік коммуникациялар қызметінің ақпарат алаңына келіп, су тасқыны кезінде болған сындарлы сәттегі сезімдерімен бөлісті.<blockquote>– Елімізде орын алған су тасқынының салдарын жою және алдын алу жұмыстарына Қызылорда облысының құтқарушылары Қостанай, Ақтөбе, Орал және Атырау өңірлеріне кезек күттірмейтін және авариялық-құтқару жұмыстарына жұмылдырылды. Департамент тарапынан барлығы 102 жеке құрам, 12 бірлік техника, 30 бірлік мотопомпа, 8 жүзу құралы жіберілді. Алғашқы эшалон 26 наурыз күні Қостанай облысының Амангелді және Қарасу аудандарындағы Тобыл, Торғай, Қарасу, Ойыл өзендерінің арнасынан тасып, өңірге төндірген су тасқынының зардаптарын жойып, кезек күттірмейтін авариялық құтқару жұмыстарын жүргізуге шықты. Ал, екінші эшалон 1 сәуірде Ақтөбе облысы Әйтеке би ауданы Әйке ауылының аумағындағы Әйке көлі арнасынан тасыған тасқын судың қоршауында қалған халыққа көмектесуге аттанды. Келесі құтқарушылар тобы 11 сәуір күні Батыс Қазақстан облысы аумағындағы Жайық және Шаған өзендері арнасынан тасып Орал қаласына жақын орналасқан саяжайларды толық тасқын су басқан аймақтардағы азаматтардың мал мүлкі мен құнды заттарын эвакуациялау жұмыстарына аттанды. Осылайша, 80 күннен аса өзге өңірдегі тұрғындардың қауіпсіздігін қамтамасыз еткен Сыр елінің құтқарушылары абыроймен отбасына оралды,- деді облыстық ТЖД бастығының орынбасары Жасұлан&nbsp; Түйменов.</blockquote>Облыстық ТЖД “Жедел құтқару жасағы” РММ бөлімшесінің бас құтқарушысы Еркін Әмірханов ел Президентінің “Ерлігі үшін” медалімен марапатталды.<blockquote>– Үш айға жуық уақыт су тасқынанан зардап шеккен Батыс өңіріндегі ағайынға көмектесу мақсатында 102 жеке құрам аттандық. 18 сәуір күні Қызылорда облысынан аттанған барлыұ құтқару топтары біріктіріліп, Атырау облысына аттандық. Ол жерде біз үйлерін су басқан азаматтар мен олардың құнды мүліктерін, төрт түліктері мен үй жануарларын қауіпсіз жерге көшірдік. Сонымен қатар, өзен жағалауларындағы бөгеттерді қаптармен құмға толтырып бекіту жұмыстарын жүргіздік. Осы орайда атқарылған еңбегіміз елеусіз қалмай, ел Президентінің “Ерлігі үшін” медалімен марапатталдым. Жауапты сәтте жүктелген міндетті толығымен орындап, топан су басқан аймаққа адал қызмет еткенімді мақтан етемін,- деді Облыстық ТЖД “Жедел құтқару жасағы” РММ бөлімшесінің бас құтқарушысы Еркін Әмірханов.</blockquote>Фото: Қызылорда облысының Өңірлік коммуникациялар қызметі

Қазақстан және Қызылорда облысының жаңалықтары