<a href="https://kyzylorda-news.kz/">Kyzylorda-news.kz</a> &nbsp;Жаңа оқу жылы қарсаңында Қазақстан Халық партиясының Қызылорда облыстық филиалы «Мектепке жол» республикалық акциясына үн қосып, әлеуметтік жағынан аз қамтылған және көпбалалы отбасылардың балаларына көмек көрсетуді дәстүрге айналдырған.Биылда бұл дәстүр жалғасын тапты. ҚХП облыстық филиалының төрағасы Қайрат Ерназаровтың демеушілігімен Талсуат ауылдық округі мен Ақжарма ауылына қарасты Талдыарал елді мекенінде «Мектепке жол» акция аясында оқушыларға оқу құралдары мен мектепке қажетті жабдықтар табысталып, балалар мен ата-аналар қуанышқа бөленді.Бұл игі шара – жас ұрпақтың болашағына жасалған қамқорлық пен қоғамдағы әлеуметтік жауапкершіліктің айқын көрінісі.

Қазақстан Халық партиясы Қызылорда облыстық филиалы «Мектепке жол» акциясын өткізді

<a href="https://kyzylorda-news.kz/">Kyzylorda-news.kz</a>&nbsp; Өткен жылу беру маусымында Қызылорда облысының тұрғын үй секторларында 120 өрт <a href="https://kaz.inform.kz/news/kizilordada-500-ge-zhuik-uyge-tegn-datchik-ornatiladi-3992f0/">оқиғасы болды</a>. Бұл алдыңғы жылғыдан 24,1%-ға көп.Облыстық төтенше жағдайлар департаментінің мәліметінше, тілсіз жау сектор иелерін 15,5 млн теңгеге жуық шығынға батырған.&nbsp;<blockquote>– 4 адам қаза тауып, 3 адам жарақат алды. Табиғи газдан 3 адам уланып қайтыс болса, 5 адам жарақат алды. Көмірқышқыл газынан улану жағдайлары тіркелген жоқ. Мұндай келеңсіз оқиғалар тұрғындардың қауіпсіздік шараларына салғырт қарауынан, яғни тұрмыстық пештің техникалық жағдайын қадағаламауынан, балаларды қараусыз қалдыруынан көбейіп тұр, – деді департаменттің мемлекеттік өрт бақылау басқармасының бастығы Асхат Оразбеков.</blockquote>Құтқарушылар жаңа жылу маусымы алдында профилактикалық іс-шаралар қарқынын күшейтті.&nbsp;<blockquote>– Одан бөлек, облыстық жұмыспен қамтуды үйлестіру және әлеуметтік бағдарламар басқармасы тұрмысы төмен, көпбалалы, жалғысбасты ана және мүгедек жандар тұратын 6 825 отбасының тізімін ұсынды. Осы отбасылардың қауіпсіздігін қамтамасыз ету мақсатында 2024 жылы жергілікті бюджет қаражаты есебінен табиғи газды анықтайтын 484 датчик сатып алынды. Алдағы жылу беру маусымында сол құрылғыларды орнатамыз, – деді Асхат Оразбеков.</blockquote>Фото: Тасбөгет кенті әкімдігі

Қызылордада 500-ге жуық үйге тегін датчик орнатылады

<a href="https://kyzylorda-news.kz/">Kyzylorda-news.kz</a>&nbsp; Бүгінде Қазалы ауданы орталығынан шалғай орналасқан Сарбұлақ, Шилі, Шәкен және Шитүбек елді мекендерін таза ауыз сумен қамту жұмыстары жүргізілуде.Бүгін аудан әкімінің міндетін атқарушы Жалғас Сүйеубаев Қарақұм беткейдегі Шәкен және Шилі елді мекендеріне арнайы барып, ауыз су құрылысы жұмыстарының сапасын бақылады. Сондай құрылыс жұмыстарын жүргізіп жатқан мердігерлермен кездесіп, жұмыстың ең алдымен сапасына аса мән беріп, белгіленген мерзімде аяқтауды тапсырды.Қазіргі таңда Шәкен ауылында 8,7 шақырым ауыз су желісі жүргізіліп, 31 темір бетон құдығы орнатылды. 76 үйге сервистік желісі жүргізіліп, 1 дана скважина бұрғыланды. Сонымен қатар абаттандыру жұмыстары жүруде. Ал, Шилі елді мекенінде бүгінде 3,2 шақырым ауыз су желісі жүргізіліп, 24 темір бетон құдығы орнатылды. Сондай-ақ 30 үйге сервистік желісі жүргізіліп, скважина бұрғылау жұмыстары жүруде.Шәкен ауылын ауыз сумен қамту құрылыс жұмыстарымен «Дәнекер КС» жауапкершлігі шектеулі серіктестігі, ал Шилі елді мекеніндегі жұмыстарымен «Намыс – Құрылыс» ЖШС мекемесі айналысуда. Екі елді мекендегі де құрылыс жұмыстары биылғы жылдың қыркүйек айының соңына дейін толық аяқталып, елді мекен халқына сапалы ауыз суды пайдалануға беру жоспарланып отыр.Айта кетейік, Мемлекет басшысының 2025 жылы Қазақстан халқын 100 пайыз таза ауыз сумен қамту туралы тапсырмасына сәйкес елді мекендердегі ауыз су құрылысы жұмыстары аяқталғаннан кейін аудан халқын таза ауыз сумен қамту көрсеткіші 100 пайызды құрайтын болады.

Қазалы: Елді мекендерді ауыз сумен қамту жұмыстары қарқынды жүргізілуде

<a href="https://kyzylorda-news.kz/">Kyzylorda-news.kz</a>&nbsp; Қазақстандық педагогтердің цифрлық құзыреттілігін арттыруға бағытталған оқыту басталды, деп хабарлайды Оқу-ағарту министрлігінің баспасөз <a href="https://kaz.inform.kz/news/pedagogterge-arnalgan-tegn-zhasandi-intellekt-kursi-ske-kosildi-5a05aa/">қызметі.</a>Жаңа оқу жылы қарсаңында мұғалімдердің кәсіби даярлығын заманауи талаптарға сай жетілдіру мақсатында ҚР Оқу-ағарту министрлігіне қарасты «Өрлеу» біліктілікті арттыру ұлттық орталығы ЮНЕСКО-мен бірлесіп жаңа бағдарламаны іске қосты.Бағдарлама халықаралық тәжірибе негізінде әзірленіп, қазақстандық оқу жүйесіне бейімделген.Оқыту барысында педагогтер:• жасанды интеллект құралдарын тиімді әрі этикалық тұрғыдан дұрыс қолдануды;• промпт жазу әдістерін;• сабақ жоспарлау тәсілдерін;• тестілер мен оқу материалдарын әзірлеуді;• иллюстрациялар жасауды;• оқу мазмұнын жетілдіру және оқушылардың қызығушылығын арттыру жолдарын меңгереді.—&nbsp;Бағдарлама жасанды интеллектіні педагогтің орнын алмастырушы емес, кәсіби қызметін жеңілдететін сенімді құрал ретінде қолдануға бағытталған. Ол&nbsp;мұғалімге шығармашылыққа көбірек уақыт бөлуге мүмкіндік береді. «Өрлеу» біліктілікті арттыру ұлттық орталығы ұйымдастырған бұл оқуға мұғалімдер&nbsp;https://reg.orleu.edu.kz сайты арқылы тіркеліп, LMS платформасында тегін қатыса алады,&nbsp;— делінген хабарламада.Бір аптаның ішінде 100 мыңға жуық адам қатысып, соның жартысына жуығы сертификат алды.Бұдан бұрын педагогтерге құрметсіздік танытқандар жауапкершілікке тартылатыны анықталды.Фото: Оқу-ағарту министрлігі

Педагогтерге арналған тегін жасанды интеллект курсы іске қосылды  

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласы әкімдігінің қоғамдық даму бөлімінің мемлекеттік әлеуметтік тапсырысына сәйкес сыбайлас жемқорлыққа қарсы мәдениетті қалыптастыру мақсатында ұйымдастырылған "Үздік бейнеролик" байқауының жеңімпаздары мен жүлдегерлері анықталды. Байқауға қала тұрғындары қатысты.Байқаудың мақсаты қала тұрғындары арасында сыбайлас жемқорлыққа қарсы дүниетанымды қалыптастыру, ақпараттық-коммуникациялық құзыреттілікті арттыру арқылы жеке тұлғаның, қоғамның және мемлекеттің қауіпсіздігін қамтамасыз ету.Байқау Қызылорда қаласының аумағында ашық түрде өткізілді. Байқауға сыбайлас жемқорлықты қабылдамау және адалдық принциптерін нығайтуға ықпал ететін мәдениеттерді белгілейтін алты бейнеролик қабылданып, комиссия шешімімен үш бейнеролик жүлделі орындарды иеленді. І орынды Іскендір Нұрислам Жандосұлы, ІІ орын Тұрсынбай Нұрымжан Үсенбайұлы, ІІІ орын Төребай Тұрсынбай Төлеуұлы иеленді.

"Үздік бейнеролик" байқауының жеңімпаздары марапатталды

<a href="https://kyzylorda-news.kz/">Kyzylorda-news.kz</a>&nbsp; Өңірлерден келген делегация мүшелері Қызылорда қаласындағы бірқатар әлеуметтік, мәдени және инфрақұрылымдық нысандардың жұмысымен танысты.Алдымен қонақтар қайта жаңғыртудан өткен Тәуелсіздік даңғылы арқылы өтіп, «Отбасы орталығы», «Жаңа Достық үйі», «Қызылорда Арена» спорт кешенінің құрылыс барысымен, «Өнер орталығы» ғимаратының сыртқы келбетімен танысты. Бұдан соң делегация «Сыр жұлдыздары» шығармашылық-инновациялық академиясының жұмысын көріп, ондағы жасөспірімдердің өнерін дамытуға бағытталған жобаларға жоғары баға берді.Келесі аялдама - «Анаға тағзым» орталығы болды. Мұнда делегация мүшелері ұлттық құндылықтарды дәріптейтін және ананы құрметтеуге үндейтін орталық қызметімен танысты. Сондай-ақ қайта жаңғыртудан өткен қалалық мәдени-демалыс паркінде болып, тұрғындардың бос уақытын тиімді өткізуге арналған жаңа мүмкіндіктерді тамашалады.Бұдан әрі қонақтар жаңа жылу электр орталығының құрылыс алаңына барып, энергетикалық инфрақұрылымды жетілдіруге бағытталған жобамен танысты. Аймақтың энергетикалық қауіпсіздігін қамтамасыз етуге арналған бұл нысан делегация тарапынан ерекше назарға алынды.Сол жағалауда орналасқан 11 мың орындық жаңа стадион да делегаттардың басты аялдамаларының бірі болды. Мұнда спорт инфрақұрылымының дамуымен танысып, аталған нысанның жастар спорты мен бұқаралық спортты дамытудағы маңызына тоқталды.Одан кейін делегация облыстық тарихи-өлкетану музейінде болып, Сыр өңірінің бай тарихы мен мәдени мұраларына қанықты. Жолай «Қан орталығы», жаңа Физика-математика мектеп-интернаты, «Жаңа автовокзал», «Шағын өнеркәсіптік аймақ», жаңа көпқабатты тұрғын үйлер, «Оқушылар сарайы» және Үстел теннисі орталығының құрылысымен сырттай танысып өтті.Сапар соңында делегаттар «Қорқыт Ата» халықаралық әуежайының жаңа терминалына аялдап, өңірдің көлік-логистикалық әлеуетін арттыруға арналған жобамен танысты. Жолай «Музыкалық колледж», қайта жаңғыртылып жатқан «Президент паркі» және «Rixos Qyzylorda» қонақ үйінің құрылыс нысандарын көрді.Өңірлерден келген қонақтар Сыр еліндегі даму қарқынын жоғары бағалап, жүзеге асырылып жатқан жобалардың аймақ тұрғындарына игілігін тигізетініне сенім білдірді.

Өңір делегаттары Қызылорда қаласындағы ірі нысандармен танысты

<a href="https://kyzylorda-news.kz/">Kyzylorda-news.kz</a> Орталық коммуникациялар қызметінде өткен брифингте ІІМ Әкімшілік полиция комитетінің төрағасы Қайсар Сұлтанбаев мектептерде балаларға жол қозғалысы ережесін үйрететін міндетті пән енгізуді ұсынды. Бұл туралы <a href="https://stan.kz/ishki-ister-ministrligi-mektepterde-zhol-kozgalisi-erez-422610/">Stan.kz</a> ақпарат агенттігі хабарлайды.Спикердің айтуынша, полицейлер жол-көлік оқиғасынан қайтыс болған балалар туралы деректерді басқа елдердің деректерімен салыстырған.Бұдан бөлек кәмелетке толмағандарға жол қауіпсіздігі дағдыларын үйретуге бағытталған пәндерді оқыту тәжірибесі ескерілген.&nbsp;Қорытындысы&nbsp;көңіл көншітпеген: Қазақстанда балаларға&nbsp;жол жүру ережелері аз оқытылатын&nbsp;болып шыққан.<blockquote>"Ішкі істер министрлігі балалардың өміріне қатысты болғандықтан&nbsp;жол қозғалысы ережесі сабақтарын мектеп бағдарламаларына жеке міндетті пән ретінде енгізуді ұсынып отыр. Мұндай сабақтар арқылы жолдарда заңға бағыну тәртібі&nbsp;нормаларын сіңіруге болады, бұл олардың өсіп, өздері жүргізушісі болған кезде жол қауіпсіздігіне оң ықпал етеді", –&nbsp;дейді Қайсар Сұлтанбаев.</blockquote>

Қазақстанда мектептерде жаңа міндетті пән енгізу ұсынылды

<a href="https://kyzylorda-news.kz/">Kyzylorda-news.kz</a> «AMANAT» партиясы жанындағы Партиялық балықау Комитетінің Павлодар облысында көшпелі отырысы өтті.&nbsp;Партияның «Халықпен бірге!» сайлауалды бағдарламасының өңірдегі орындалуы талқыланған жиынға «Zoom» платформасы арқылы барлық өңірлер қосылды. &nbsp;Сыр өңірінен партияның облыстық филиалының атқарушы хатшы Ләйлә Төрешова, партиялық бақылау комиссиясының төрағасы Нұркен Бақытбекұлы жауапты басқарма басшылары қатысты.&nbsp;Бүгінгі таңда Қызылорда облысы бойынша «AMANAT» партиясының сайлауалды бағдарламасын жүзеге асыру бойынша Жол картасына мониторинг ұйымдастырылған. Облыс бойынша ұсынылған есепті талдау бойынша 2025 жылы 110 тармақтың 20 орындалды, 87 орындалуда.Атап айтқанда, Қармақшы ауданының ІІІ-Интернационал және Дүр Оңғар ауылдарында спорт кешенінің құрылыстары аяқталып, нысандар пайдалануға берілді. «Жер аманаты» жобасы бойынша биылға жоспарланған 60,0 мың гектардың бүгінге 33,4 мың гектар (жылдық жоспардың 55,6%) қайтарылды. «Ауыл аманаты» жобасы бойынша 2,5 млрд. теңгеге 376 жоба несиелендірілді.&nbsp;«Келешек мектептері» ұлттық жобасы аясында 3300 орындық 7 мектеп пайдалануға берілді. 2 елді мекен газбен қамтамасыз етіліп, 3,7 мың адам көгілдір отын игілігін көре бастады. Халық игілігіне бағытталған жұмыстар жоспарға сай жүзеге асуда.<img src="https://knadmin.beoblood.kz/uploads/Amanat_partiyaly_otyrys_2_ab4981720f.jpg" alt="Аманат партиялық отырыс 2.jpg">

«AMANAT»: Партиялық бақылау комитетінің көшпелі отырысы өтті

<a href="https://kyzylorda-news.kz/">Kyzylorda-news.kz</a> Қасым-Жомарт Тоқаев пен ІІ Абдалла бен әл-Хусейн Astana Hub халықаралық кластерін аралау барысында еліміздің ІТ және жасанды интеллект саласындағы жетістіктерімен танысты.Astana Hub – Орталық Азиядағы ең ірі инновациялық кластер. Онда 1700-ден аса ІТ-компания шоғырланған. Былтыр тартылған жалпы инвестиция көлемі 700 миллион доллардан, ал ІТ қызметінің экспорты 650 миллион доллардан асты.Astana Hub базасында жыл сайын он мың азаматты қамтитын Tech Orda, TUMO және Tomorrow School білім беру, сондай-ақ Google for Startups серіктесімен бірге акселерация бағдарламалары іске асырылуда.Цифрлық даму, инновациялар және аэроғарыш өнеркәсібі министрі Жаслан Мәдиев мәртебелі меймандарға биыл күзде Астанада ашылуы жоспарланып отырған Alem.AI Халықаралық жасанды интеллект орталығының тұжырымдамасын көрсетті.Қазақстан Президенті мен Иордания Короліне әлемдік нарыққа шыққан отандық компаниялардың әзірлемелері таныстырылды. Олардың қатарында epsilon3.ai (мемлекеттік секторға АІ-шешімдер әзірлейтін зертхана), Qalan (Қазақстанда және шет елде 1 миллионнан аса оқушы пайдаланатын математика пәнінен білім беру платформасы), inDrive (жолаушы және жүк тасымалы, жеткізу қызметін ұсынатын жаһандық платформа), KazDream (ұлттық қауіпсіздік, шекаралық бақылау және киберқорғау салаларында жұмыс істейтін еліміздегі ірі ІТ-компания) секілді жобалар бар.

Қазақстан Президенті мен Иордания Королі Astana Hub кластеріне барды

<a href="https://kyzylorda-news.kz/">Kyzylorda-news.kz</a> Ақмола облысы Щучинск қаласында «Азаматтарға арналған үкімет» мемлекеттік корпорациясының қызметкерлері арасында ХҚКО-лардың 20 жылдығына арналған республикалық спартакиада өтті.&nbsp;Бұл жарыс облыстар мен республикалық маңызы бар қалаларда өткен аймақтық сайыстардың қорытынды кезеңі ретінде ұйымдастырылды.Финалдық кезеңге Астана, Алматы, Шымкент қалаларынан және Абай, Ақмола, Жетісу, Солтүстік Қазақстан, Түркістан, Ақтөбе облыстарынан командалар қатысып, жоғары дайындық деңгейін, ұйымшылдық пен жеңіске деген ұмтылысты көрсетті.Спартакиаданың бағдарламасына мини-футбол, волейбол, үстел теннисі, шахмат және арқан тарту жарыстары кірді. Іс-шараның басты мақсаты – корпоративтік мәдениетті нығайту, салауатты өмір салтын насихаттау және мемлекеттік корпорацияның филиалдары мен бөлімшелері арасындағы өзара байланыс пен командалық рухты арттыру болды.Финалдық жарыстардың қорытындысы бойынша бірінші орынды Шымкент қаласының командасы, екінші орынды Түркістан облысы, ал үшінші орынды Алматы қаласының командасы иеленді.Маңыздысы, республикалық спартакиада Халыққа қызмет көрсету орталықтарының құрылғанына 20 жыл толуымен сәйкес келіп, демеушілердің қолдауымен ұйымдастырылды. Бұл іс-шара «Азаматтарға арналған үкімет» мемлекеттік корпорациясы қызметкерлерінің ынтымақтастығын арттырып, корпоративтік құндылықтарын дамытуға ықпал етіп келеді.

«Азаматтарға арналған үкімет» мемлекеттік  корпорациясының қызметкерлері арасында республикалық спартакиада өтті

<a href="https://kyzylorda-news.kz/">Kyzylorda-news.kz</a> 2025 жылғы күзгі мерзімді әскери қызметке шақыру жұмыстарын сапалы және уақытылы ұйымдастыру мақсатында аудан әкімдігінде тиісті сала өкілдерінің қатысуымен жиналыс өтті.Жиналысқа аудан әкімінің орынбасары Самат Қыдырбекұлы төрағалық етті. Мәжіліс барысында аудандық қорғаныс істері жөніндегі бөлімінің басшысы Жандос Бекмұрзаев ағымдағы жылдың көктемгі шақыру науқанының қорытындысы және алдағы күзгі шақыру жұмыстарының жоспарлары туралы баяндама жасап, бірқатар өзекті мәселелерге тоқталды. Атап айтқанда, шақырылушыларды аудандық медициналық комиссиядан уақытылы өткізу, жастар арасында түсіндіру жұмыстарын кеңейту мәселелер көтерілді.&nbsp;Аталған шара бойынша Самат Қыдырбекұлы барлық жауапты тұлғаларға күзгі шақыру жұмыстарын жоғары деңгейде ұйымдастырып, жастармен жүйелі жұмыс жүргізуді және әскери міндеттілікке салғырт қарауға жол бермеуді тапсырды.Айта кетейік, қазіргі уақытта шақыру процесі толығымен цифрланған. Азаматтарға шақыру туралы хабарламалар қағаз түрімен қатар SMS-хабарлама және eGov.kz порталындағы жеке кабинет арқылы жолданады. Сонымен қатар, әскери қызметке шақырылған азаматтарға бірқатар әлеуметтік жеңілдіктер қарастырылған. ҰБТ нәтижесіне қарамастан ақылы негізде ЖОО-ға түсу, колледж квоталарына қатысу, «Сарбаз 2.0» жүйесі арқылы грант алу мүмкіндігі және әскери кафедраға конкурстан тыс қабылдана алады. Әскери қызметке кейінге қалдырудан бас тартқан студенттер білім грантынан айырылмай, академиялық демалыс арқылы оқуын жалғастыра алады.Қармақшы аудандық қорғаныс істер бөлімі әскерге шақыруды елемеген азаматтарға ҚР Әкімшілік құқық бұзушылық баптары сәйкес 647, 648, 493-баптары аясында әкімшілік жауапкершілік қарастырылғанын ескертеді.

Күзгі әскери шақыру науқанына дайындық барысы қаралды

<a href="https://kyzylorda-news.kz/">Kyzylorda-news.kz</a> Қасым-Жомарт Тоқаев пен II Абдалла бен әл-Хусейн келіссөзді екі елдің ресми делегация мүшелерінің қатысуымен жалғастырды.Мемлекет басшысы Қазақстанның Иорданиямен өзара тиімді ынтымақтастықты дамытуға ерекше мән беретінін жеткізді.<blockquote>– Екіжақты қарым-қатынасты дамытуға деген шынайы ниетіңізді жоғары бағалаймыз. Сіздің салиқалы әрі сарабдал көшбасшылығыңызды, сондай-ақ аймақтағы және әлемдегі бейбітшілік пен тұрақтылықты қамтамасыз етудегі ерекше рөліңізді атап өткім келеді. Сіздің күш-жігеріңіздің арқасында Иордания Таяу Шығыстағы тұрақтылық мекеніне айналды. Диалог пен ықпалдастықты басты бағдар ретінде ұстануыңыздың нәтижесінде Корольдіктің халықаралық аренадағы абырой-беделі артты. Биыл ақпан айында Қазақстан Президенті ретінде Иордания Хашимит Корольдігіне жасаған бірінші ресми сапарымды ерекше ықыласпен еске аламын. Бүгінгі сапар екіжақты қатынастарға тың серпін беріп, ынтымақтастығымыздың жаңа кезеңіне жол ашатынына сенімдімін, – деді Президент.</blockquote>Қасым-Жомарт Тоқаевтың айтуынша, Қазақстан мен Иорданияны саяси және экономикалық тұрғыдағы ортақ мүдде ғана емес, дін, толеранттылық дәстүрі және өзара құрмет секілді ғасырлар бойғы құндылықтар біріктіреді. Екі ел әлемге сан алуан мәдениет пен конфессиядағы халықтардың тату-тәтті өмір сүріп, адамзат дамуына үлес қоса алатынын көрсетті.Король ІІ Абдалла қос мемлекеттің достығын жоғары бағалайтынын атап өтті.<blockquote>– Бүгінгі сапар түрлі саладағы ынтымақтастықты нығайтуға және екіжақты байланыстарды тереңдетуге тараптардың мүдделі екенін растайды. Бұған дейінгі келіссөздер қорытындысы бойынша бірқатар маңызды келісім мен меморандумға қол қойылды. Бүгінгі уағдаластықтар, сондай-ақ оны табысты іске асыру елдеріміздің арасындағы серіктестікті кеңейтуге берік негіз қалайтынына сенімдімін, – деді Иордания Королі.</blockquote>Қасым-Жомарт Тоқаев Аммандағы кездесу барысында тараптар тауар айналымын 500 миллион долларға дейін ұлғайтуға уағдаласқанын еске салды. Қазақстан Иордания нарығына жалпы құны 250 миллион доллар болатын 60 өнім түрін экспорттауға дайын.Президент «Қазатомөнеркәсіп» ұлттық компаниясы мен Иордания уран өндіруші компаниясының (JUMCO) атом өнеркәсібін дамыту саласындағы ынтымақтастығына қолдау білдірді.Президент Иордания делегациясына еліміздің халықаралық көлік-логистика желісін кеңейту бастамалары туралы мәлімет беріп, Орталық Азия мен Таяу Шығыс арасында интермодальді жүк тасымалын бірлесе өркендету мүмкіндіктерін қарастыруды ұсынды. Бұдан бөлек, ауыл шаруашылығы, туризм, цифрландыру салаларындағы ықпалдастықтың әлеуеті зор.Өз кезегінде Иордания тарапы медицина, фармацевтика, халал индустриясы және қорғаныс өнеркәсібі бағытындағы тәжірибесімен бөлісуге ниетті. Сонымен қатар Royal Jordanian әуе компаниясы келесі жылы Амман мен Алматы арасында тікелей әуе рейсін ашуды жоспарлап отырғанын жеткізді. Бұл қадам екі елдің азаматтары мен іскерлік ортасының байланыстарын жандандырады.Бұдан бөлек, тараптар мәдени-гуманитарлық ынтымақтастықты кеңейтуге, соның ішінде бірлескен ғылыми-зерттеу жобаларын жүргізіп, университеттер арасында серіктестік орнатуға қызығушылық танытты.Фото: Ақорда

Қазақстан және Қызылорда облысының жаңалықтары