<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде италиялық жазушы, эколог, халықаралық ерікті, Орталық Азияның экологиялық және әлеуметтік-экономикалық даму мәселелері жөніндегі кеңесші Роберто Болтри экология мамандығының студенттерімен кездесті.Басқосуды Инженерлік-технологиялық институтының директоры Бахытбек Абжалелов ашып, Роберто Болтридің Арал теңізінің экологиялық мәселелерін зерттеуге және Орталық Азияның тарихи-мәдени мұрасын халықаралық деңгейде танытуға қосып жүрген үлесін атап өтті.Кездесу барысында Роберто Болтри Арал өңіріне арналған жаңа халықаралық экологиялық жобаны жүзеге асыру жоспары туралы айтып, университет ғалымдары мен студенттерінің ұсыныстарын тыңдауға және бірлесіп жұмыс істеуге дайын екенін жеткізді. Сондай-ақ Қазақстанмен көпжылдық байланысына тоқталып, Арал теңізінің экологиялық жағдайына әлем назарын аударудың маңызын айтты.«Электр энергетикасы, техносфералық қауіпсіздік және экология» білім беру бағдарламасының аға оқытушысы Светлана Кужамбердиева университеттегі экологиялық бастамалар, экоклубтың қызметі және осы бағытта қол жеткізілген жетістіктер жөнінде баяндады.Іс-шара соңында студенттер қонаққа өздерін қызықтырған сұрақтарын қойып, Арал теңізін қалпына келтіру мен өңірдің экологиялық ахуалын жақсартуға қатысты ұсыныстарын ортаға салды.&nbsp;

Италиялық эколог студенттермен кездесті

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің студенті Жібек Жайсаңбай дзюдодан Ақтау қаласында өткен Азия кубогында жүлделі орынға ие болып, университет мерейін асқақтатты.63 келі салмақ дәрежесінде белдескен спортшы халықаралық жарыста жоғары спорттық шеберлігін, табандылығы мен жеңіске деген жігерін танытып, күміс жүлдені иеленді. Бұл нәтиже — спортшының жүйелі дайындығының, қажырлы еңбегі мен мақсатқа деген ұмтылысының жемісі.Азия кубогы — спортшылардың кәсіби деңгейін шыңдап, халықаралық аренада тәжірибе жинақтауына мүмкіндік беретін маңызды жарыстардың бірі. Осындай бәсекеде үздіктер қатарынан көріну Жібек Жайсаңбайдың алдағы додаларда бұдан да жоғары нәтижелерге қол жеткізуіне жол ашады.Университет ұжымы Жібек Жайсаңбайды айтулы жеңісімен құттықтап, алдағы жарыстарда сәттілік, толағай табыс және жаңа белестерді бағындыруына тілектестік білдіреді.

Университет студенті – Азия кубогының күміс жүлдегері

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің 1-курс студенті Сұңқар Қаныбек каратэ-додан әлем чемпионы атанды.Польшаның Бельско-Бяла қаласында жасөспірімдер мен жастар арасында өткен әлем чемпионатында 76 келіге дейінгі салмақ дәрежесінде кумитэ бойынша сынға түсті. Финалдық кездесуде Шотландия өкілі Каллен Бродиді 4:0 есебімен жеңіп, әлем чемпионы атанды.Бұл жеңіс – қазақстандық спорттың үлкен жетістігі. Университет ұжымы Сұңқар Қаныбекті жеңісімен құттықтап, алдағы жарыстарда сәттілік тіледі.

Қорқыт ата университетінің студенті – каратэ-додан әлем чемпионы!

<a href="https://kyzylorda-news.kz/">Kyzylorda-news.kz</a> Өткен аптада Қазалы ауданында көрнекті әдебиеттанушы ғалым, филология ғылымдарының докторы, профессор, Қазақстанның еңбек сіңірген қайраткері, Қазақстан Жазушылар одағы мен Қазақстан Журналистер одағының мүшесі, «Құрмет» және «Парасат» ордендерінің иегері, Қазалы ауданының Құрметті азаматы Бағдат Кәрібозұлының 70 жас мерейтойына арналған «Туған жер түлеткен тұлға: Ғалым. Жазушы. Қайраткер» атты ғылыми-танымдық конференция өтті.Роза Бағланова атындағы аудандық мәдениет орталығында ұйымдастырылған тағылымды шараға қоғам және ғылым қайраткерлері, ғалымдар, зиялы қауым өкілдері, қаламгерлер, Бағдат Кәрібозұлының әріптестері, шәкірттері мен жерлестері қатысты.Конференцияны аудан әкімі Алмасбек Есмаханов жүргізіп, алдымен Бағдат Кәрібозұлы мен жиналған қауымды айтулы мерейтоймен құттықтады. Туған жердің абыройын асқақтатып, ғылым мен ұлттық руханияттың дамуына өлшеусіз үлес қосып жүрген тұлғалардың еңбегін ұлықтаудың маңызына тоқталды.<blockquote>– Қазалы – талай дарынды түлетіп, елдің рухани және мәдени өміріне өзіндік үлесін қосқан тұлғаларды дүниеге әкелген қасиетті мекен. Осындай киелі топырақтан түлеп шығып, білім мен ғылымның биігіне көтерілген, саналы ғұмырын қазақ әдебиетінің дамуына, ұлттық мұрамызды зерттеп-зерделеуге арнаған Бағдат Кәрібозұлының мерейлі 70 жасқа толуы – ауданымыз үшін үлкен қуаныш әрі зор мәртебе. Бағдат Кәрібозұлы – ғылымдағы терең ізденісімен, ұстаздық жолдағы өнегесімен, ел руханиятына сіңірген еңбегімен танылған көрнекті тұлға. Оның Сыр өңірінің әдеби мұрасын зерттеуге, ұлттық құндылықтарымызды дәріптеуге және жас ұрпаққа білім мен тәрбие беруге қосқан үлесі айрықша. Ғалымның өмір жолы мен еңбегі кейінгі буынға үлгі болып, туған жерге қызмет етудің жарқын көрінісіне айналып отыр, – деді аудан әкімі Алмасбек Әбілқасымұлы.</blockquote>Ғылыми-танымдық конференцияның негізгі баяндамасын Қорқыт ата атындағы Қызылорда университетінің профессоры, филология ғылымдарының кандидаты, «Парасат» орденінің иегері Ұлжан Жанбершиева жасап, «Сыр топырағы түлеткен талант» тақырыбында баяндама ұсынды. Келесі кезекте Қорқыт ата атындағы Қызылорда университетінің профессоры, философия ғылымдарының докторы, Қазалы ауданының Құрметті азаматы Баймырза Қожамберлиев «Ғалым Бағдат Кәрібозұлының қайраткерлік қырлары» тақырыбында баяндама жасады. Сондай-ақ қоғам қайраткері, Қызылорда қаласы мен Сырдария ауданының Құрметті азаматы, «Құрмет» орденінің иегері Әріп Хожбанов сөз сөйлеп, мерейтой иесімен арадағы сыйластық пен жылдар бойы қалыптасқан достық туралы естеліктерімен бөлісті.<img src="https://knadmin.beoblood.kz/uploads/Ba_dat_K_rbozov_6f0552dcc7.jpg" alt="Бағдат Кәрбозов.jpg">Бұдан кейін ҚР Журналистер одағының мүшесі, ҚР Ақпарат саласының үздігі, аудандық мәслихаттың сегізінші шақырылымының төрағасы Ғазиз Әліш те сөз сөйлеп, ғалымның елге сіңірген еңбегіне, тұлғалық болмысы мен өнегелі өмір жолына тоқталды.Конференция барысында ғалымның ғылыми ізденістері, қазақ әдебиетін зерттеуге қосқан үлесі, Сыр бойының ақын-жырауларының шығармаларын зерделеу бағытындағы еңбектері және шәкірт тәрбиелеудегі қызметі жан-жақты сөз болды.Қатысушылар Бағдат Кәрібозұлының еңбектері ұлттық әдеби мұраны терең түсінуге, туған өлкенің рухани қазынасын кеңінен танытуға мүмкіндік беретінін атап өтті.Бағдат Кәрібозұлы 1956 жылы 18 мамырда Қазалы ауданының Құмжиек ауылында дүниеге келген. Білімге құштар жас Қызылорда педагогикалық институтында қазақ тілі мен әдебиеті мамандығын үздік тәмамдап, студенттік кезеңнің өзінде зеректігімен, ізденімпаздығымен ерекшеленген. 1978–1979 жылдары Лениндік стипендия иегері атануы оның білімге деген ынтасы мен ғылымға бейімділігін айқын көрсетті. Оның көпжылдық ғылыми-педагогикалық қызметі Қорқыт ата атындағы Қызылорда университетімен тығыз байланысты. Еңбек жолында оқытушыдан бастап доцент, профессор, факультет деканы, проректор және ғылыми құрылымдардың басшысы секілді жауапты қызметтер атқарды. Ғылым мен білім саласындағы жемісті еңбегі арқылы көптеген шәкірт тәрбиелеп, олардың кәсіби қалыптасуына бағыт-бағдар берді. Ғалым 300-ден астам ғылыми және ғылыми-публицистикалық мақала, 10 монография және бірқатар әдеби-публицистикалық еңбектер жазған. Сонымен бірге профессордың басшылығымен жүзеге асқан 200 томдық «Сырдария кітапханасы» сериясы – Сыр өңірінің әдеби мұрасын жинақтау, жүйелеу және келешек ұрпаққа жеткізу жолындағы маңызды ғылыми-мәдени жобалардың бірі. Оның жетекшілігімен «Менің Отаным – Қазақстан» сериясы аясында «Сырдария», «Қазалы», «Қызылорда», «Жаңақорған» және «Отан үшін от кешкендер» атты кітаптар жарық көрді.Конференция отырысында аудан әкімі &nbsp;Бағдат Кәрібозұлына иығына шапан жауып, мерейтойына орай арнайы сый-сияпат табыстады. Ғалымның жары Салтанат Хасеноваға да құрмет көрсетіліп, орамал мен камзол жабылып, гүл шоқтары ұсынылды. Сондай-ақ мерейтой иесіне автокөліктің кілті табысталды.Жиында техника ғылымдарының докторы, профессор, «Парасат» орденінің иегері Серікбай Қошқаровтың авторлығымен жарық көрген «Ғалым ерлігі» атты кітаптың тұсаукесер рәсімі өтті. Кітапта Бағдат Кәрібозұлының өмір жолы, ғылымдағы ізденістері, азаматтық болмысы мен ел руханиятына қосқан үлгісі арқау болған.Конференция соңында мерейтой иесі Бағдат Кәрібозұлы сөз сөйлеп, мерейтойына орай құрмет көрсеткен аудан басшылығына, ұйымдастырушыларға, әріптестеріне, шәкірттеріне және барша қатысушыларға ризашылығын білдірді.&nbsp;<img src="https://knadmin.beoblood.kz/uploads/Ba_dat_K_rbozov_2_1879e9f46e.jpg" alt="Бағдат Кәрбозов 2.jpg">

Қазалыда Бағдат Кәрібозұлының 70 жас мерейтойына орай ғылыми-танымдық конференция өтті

ҚР Премьер-министрінің бірінші орынбасары Нұрлыбек Нәлібаев Үкімет басшысының тапсырмасымен Қызылорда облысына жұмыс сапарымен келіп, облыс әкімі Мұрат Ергешбаевпен бірге өңірдегі жол инфрақұрылымы жобаларының жүзеге асырылу барысымен танысты.<img src="https://knadmin.beoblood.kz/uploads/Whats_App_Image_2026_10_19_at_21_23_58_fd206ec95d.jpeg" alt="жол құрылыс акимат">Мемлекет басшысы тамыз айында телекөпір арқылы «Қызылорда-Сексеуіл», «Ұлғайсын-Сексеуіл» және «Бейнеу-Сексеуіл» автокөлік жолдарының құрылысын бастап беріп, тоғыз жолдың торабында тұрған еліміздің өсіп-өркендеуіне серпін беретін маңызды бағыттардыңстратегиялық мәні айрықша екенін айтқан болатын.Алдымен Қызылорда қаласының айналма автомобиль жолын қайта жаңғырту барысы таныстырылды. Бас мердігер «Қыран» серіктестігіқазіргі уақытта жол негізін төсеу, асфальтбетон қабаттарын салу және темірбетон су өткізу құбырларын орнату жұмыстарын жүргізуде. Жобаға 46,4 млрд теңге бөлінген, 2029 жылы пайдалануға беру жоспарланған.<img src="https://knadmin.beoblood.kz/uploads/Whats_App_Image_2026_10_19_at_21_23_58_1_f2fe6ecb79.jpeg" alt="жол құрылыс акимат">Ал «Қызылорда – Сексеуіл» автомобиль жолының учаскесін қайта жаңғыртуға 242,3 млрд теңге қарастырылған. «Integra Construction KZ» ЖШС құрылысқа 131 жұмысшы мен 82 техниканы жұмылдырған. Қазіргі уақытта жол бойында топырақтың құнарлы қабаты алынып, жер төсемі төселуде.Сонымен қатар жобалық шешімдер әзірленіп, инженерлік-геодезиялық зерттеулер атқарылуда.«Бейнеу – Сексеуіл» автомобиль жолын қайта жаңғыртудың ағымдағы жағдайы да назардан тыс қалмады. Жалпы &nbsp;182,2 шақырым жолға 191,5 млрд теңге бөлінген. Құрылыс учаскелерінде 112 жұмысшы, 90 техника топырақ қабатын алу, төсеу жұмыстарына кіріскен. Нысан 4 учаскеге бөлінген.<img src="https://knadmin.beoblood.kz/uploads/Whats_App_Image_2026_10_19_at_21_24_00_1_d612765afc.jpeg" alt="жол құрылыс акимат">Топографиялық-геодезиялық зерттеулер, топырақ карьерлерін барлау жұмыстары аяқталған. Қазіргі уақытта топырақ үлгілеріне зертханалық талдау жасалып, трассаның, жол қозғалысы қауіпсіздігі нысандарының жобалық құжаттамасы әзірленуде. «Ұлғайсын – Сексеуіл» автомобиль жолын қайта жаңғыртуға 752,5 млрд теңге қарастырылған.Жоба аясында жұмыспен қамтылған 452 адамқұрылыс учаскелерінде еңбек етуде.Аталған жобалардың басты ерекшелігі – құрылыс кезінде көліктер бұрынғы жолмен жүреді. Жаңа жол толық салынып біткен соң көлік қозғалысы соған ауыстырылып, қолданыстағы жол қайта жаңғыртылады. Осылайша нысандар кезең-кезеңімен пайдалануға беріледі.<img src="https://knadmin.beoblood.kz/uploads/Whats_App_Image_2026_10_19_at_21_23_59_1_0c52e349c5.jpeg" alt="жол құрылыс акимат"><blockquote>«Мемлекет басшымыз Қасым-Жомарт Кемелұлы жаңа бағдарлар еліміздің транзиттік әлеуеті мен логистикалық мүмкіндіктерін еселеп арттыратынын атап өтті. Жол сапасына қатысты айтылған өткір сыннан &nbsp;нәтиже шығару керек. Сондықтан бірінші кезекте жұмыстың сапасына жете мән беру қажет. Сапалы, барлық талапқа сай жол ұзақ уақыт пайдалануға жарайды. Бұл стратегиялық маңызы зор нысандар Президентіміздің, Үкімет басшысының бақылауында», – деді Нұрлыбек Машбекұлы.&nbsp;</blockquote>Жолдар толық салынып біткен соң жүк тасымалы артып, ел экономикасын өркендетуге, туризмді дамытуға тың серпін береді, халықтың әл-ауқатын арттыруға септігін тигізеді. Басты мақсат –елімізді Еуропа мен Азияны жалғастыратын жетекші логистикалық желінің біріне айналдыру.&nbsp; &nbsp;

Стратегиялық маңызы бар жол құрылысы жобаларын жүзеге асыру барысымен танысты 

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университеті мен Қызылорда облысы бойынша Сот сараптамалары институтының ұйымдастыруымен «Сот медицинасы және құқық: заманауи сараптамалық практика мен құқықтық үрдістердің интеграциясы» атты халықаралық ғылыми-практикалық конференция өтті.Ғылыми жиын сот медицинасы мен құқық салаларының өзара байланысын нығайтуға, сот сараптамасының заманауи мәселелерін талқылауға және халықаралық тәжірибе алмасуға арналды. Конференция сот медицинасы саласының ардагері, «Алтын дәрігер» төсбелгісінің иегері Қамбар Сексеновтің 70 жылдық мерейтойына орай ұйымдастырылды.Конференцияның ашылуында университеттің Басқарма мүшесі – академиялық мәселелер жөніндегі проректор Дана Абдрашева құттықтау сөз сөйлеп, жиынның маңыздылығына тоқталды. Ол сот сараптамасы саласындағы ғылыми жетістіктерді талқылау, озық тәжірибелермен бөлісу және болашақ мамандардың кәсіби даярлығын жетілдіру бағытындағы мұндай кездесулердің мәнін атап өтті.Жиында Қызылорда облысы бойынша Сот сараптамалары институтының директоры Ержан Примбетов, Жүсіп Баласағұн атындағы Қырғыз ұлттық университетінің профессоры, заң ғылымдарының докторы Бактыбек Батырбаев және АҚШ-тың Батыс Иллинойс университетінің профессоры Владимир Сергеевнин баяндама жасады. Сонымен қатар Молдова Республикасы Әділет министрлігі Сот сараптамасы жөніндегі ұлттық орталығының өкілдері Ольга Катарага мен Пётр Петкович онлайн форматта өз баяндамаларын ұсынды.Конференция барысында ДНҚ-тестінің құқық қорғау қызметі мен сот-медициналық сараптамада қолданылуы, сот-медициналық сарапшы қорытындысының дәлелдемелік маңызы, бас-ми жарақаттарының құқықтық шешімдер қабылдауға ықпалы, сот сараптамаларын тағайындау және жүргізу үдерістерін автоматтандыру, сондай-ақ сот медицинасының қылмыстық-құқықтық қызметтегі рөлі талқыланды.Іс-шараға университеттің профессор-оқытушылар құрамы, білім алушылар және бұқаралық ақпарат құралдарының өкілдері қатысты.Халықаралық конференция сот медицинасы мен құқық саласындағы өзекті мәселелерді талқылауға, ғылыми байланыстарды дамытуға және тәжірибе алмасуға мүмкіндік берді. Сонымен қатар жиын Қамбар Сексеновтің көпжылдық еңбегін ұлықтап, сала мамандарының кәсіби сабақтастығын нығайтуға бағытталды.<img src="https://knadmin.beoblood.kz/uploads/Universitet_d_rishana_2_f3b09d5c84.jpeg" alt="Университет дәрісхана 2.jpeg">

Университеттің бас оқу ғимаратында «Сот медицинасы» дәрісханасы ашылды

ҚР Премьер-министрінің бірінші орынбасары Нұрлыбек Нәлібаев Үкімет басшысының тапсырмасымен Қызылорда облысына жұмыс сапарымен келіп, облыс әкімі Мұрат Ергешбаевпен бірге әлеуметтік, инфрақұрылымдық нысандардың құрылыс барысымен танысты.<img src="https://knadmin.beoblood.kz/uploads/nalibaev_hod_stroitelsva_2_9c18f08edc.jpeg" alt="налибаев ход строительсва.jpeg">Бүгінде қалада бірнеше медициналық мекеменің жаңа ғимараты салынып жатыр. Соның бірі – онкологиялық бөлімшесі бар 300 төсектік көпбейінді аурухана. Ауысымына 100 келушіге арналған емханасы бар медициналық кешенқұрылысына республикалық бюджеттен, жұмысты аяқтау үшін Инфрақұрылымдық даму қорынан қаржы бөлінген. Ғимараттың жалпы ауданы 48 мың шаршы метрге жуық. Он блоктан тұрады:қабылдау, реанимация, химиотерапия, операциялық және радиология бөлімдерімен қатар, емхана, пансионат, физиотерапия және басқа да бөлімшелер орналасады.<img src="https://knadmin.beoblood.kz/uploads/nalibaev_hod_stroitelsva_5_69e091a433.jpeg" alt="налибаев ход строительсва.jpeg">Қазір іші әрленіп, инженерлік желілері тартылып, абаттандыру және көгалдандыру жұмыстары атқарылуда. Құрылыстың 85 пайызы біткен. Премьер-министрдің бірінші орынбасары 400 келушіге арналған №5 емхананың құрылысын да көріп шықты. Жалпы ауданы 8 937 шаршы метр болатын медициналық нысанды салуға 9,8 млрд теңге бөлінген. Қазір жұмыстың 65 пайызы орындалған. Ішкі әрлеу, терезе орнату және инженерлік желілер тарту жұмыстары қарқын алған. Желтоқсанның 25-іне дейін медициналық жабдықтар жеткізіліп орнатылады да, жыл соңындапайдалануға беріледі.<img src="https://knadmin.beoblood.kz/uploads/nalibaev_hod_stroitelsva_1_c8911d4ebb.jpeg" alt="налибаев ход строительсва.jpeg">200 төсектік перинаталдық орталықтың құрылыс алаңы қоршалып, жер қазу, іргетас құю және арматура тоқу жұмыстары жүргізілуде. Жобаға 52,8 млрд теңге бөлінген, үш қабатты, 39,1 мың шаршы метр ғимарат 10 блоктан тұрады. Зертханалық және тамақтану бөлімдері де қарастырылған. Нысанды 2028 жылғы наурызда пайдалануға беру жоспарланған.<img src="https://knadmin.beoblood.kz/uploads/nalibaev_hod_stroitelsva_4_eb54e70120.jpeg" alt="налибаев ход строительсва.jpeg">Бүгінде «Қызылорда Арена» спорт кешенінде жұмыстың 90 пайызы орындалған. Кешен 2 552 көрерменге арналған, 3-4 қабатты блоктардан тұрады. Мұнда олимпиадалық стандарттарға сай бассейн, футзал, баскетбол және волейбол алаңдары, сондай-ақ 300 орындық конференц-зал бар. Осы кезде ішкі әрлеу, дизайнерлік безендіру, қасбетін қаптау, аумақты абаттандыру және көгалдандыру жұмыстары жүргізілуде.<img src="https://knadmin.beoblood.kz/uploads/nalibaev_hod_stroitelsva_6_d3eb47a12b.jpeg" alt="налибаев ход строительсва.jpeg">Сырдария өзені арқылы өтетін жаяу жүргіншілер көпірін «Alem Qurylys AQ» серіктестігі қолға алған. Құрылысқа 12,9 млрд теңге қарастырылған. Ұзындығы 319,4 метр, ені әр учаскеде 6 метрден 12 метрге дейін жетеді. Жаяу жүргіншілерге де, велосипедшілерге де қолайлы жағдай жасалады.<img src="https://knadmin.beoblood.kz/uploads/nalibaev_hod_stroitelsva_3_38ee0341cf.jpeg" alt="налибаев ход строительсва.jpeg">

Үкімет басшысының бірінші орынбасары Қызылордадағы құрылыс нысандарын аралады 

<a href="https://kyzylorda-news.kz/">Kyzylorda-news.kz</a> Өткен аптада Достық үйінде Еңбек күні мен Әлеуметтік қорғау жүйесі қызметкерлерінің күніне арналған салтанатты іс-шара өтті.Іс-шараны облыс әкімінің бірінші орынбасары Жаналинов Данияр Еренғалиұлы құттықтау сөзімен ашып, еңбек адамдары мен әлеуметтік қорғау жүйесі қызметкерлеріне Қызылорда облысының әкімі М.Н. Ергешбаевтың «Алғыс хатымен» және ақшалай сертификатымен марапаттады.«Үздік еңбек әулеті» номинациясы бойынша:<ul><li style="text-align:justify;">«Алтын» жүлде иегері - Абдрахмановтар әулеті. Қазалы ауданының теміржолшылар династиясы. Әулеттің жалпы еңбек өтілі – 869 жылды құрады.</li><li style="text-align:justify;">«Күміс» жүлде иегері – Башеновтер әулеті. Қармақшы ауданының гидротехниктер династиясы. Әулеттің жалпы еңбек өтілі 128 жыл.«Қола» жүлде иегері – Бимахановтар әулеті. Жалағаш ауданының электриктер династиясы. Әулеттің жалпы еңбек өтілі – 82 жыл.</li></ul>«Жұмыс істейтін жастардың үздік тәлімгері» номинациясы бойынша:<ul><li style="text-align:justify;">«Алтын» жүлде иегері - «Қамыстыбас балық питомнигі» республикалық коммуналдық кәсіпорынның бригадирі Байбосынов Қылышбек Шарапұлы.</li><li style="text-align:justify;">«Күміс» жүлде иегері - «Шаған жер» жауапкершілігі шектеулі серіктестігінің дәнекерлеушісі Баекешов Қарасай Санатбайұлы;</li><li style="text-align:justify;">«Қола» жүлде иегері - «Қызылорда тазалығы» коммуналдық мемлекеттік мекемесінің сектор меңгерушісі Жұмабекова Гүлзинат Мүсірепханқызы.</li></ul>«Өндірістің үздік жас маманы» номинациясы бойынша:<ul><li style="text-align:justify;">«Алтын» жүлде иегері - «Байкен – U» жауапкершілігі шектеулі серіктестігінің аппаратшы - гидрометаллургы Сейітхан Дінмұхамбет Маратұлы;</li><li style="text-align:justify;">«Күміс» жүлде иегері - «ҚазСуШар» республикалық мемлекеттік кәсіпорынның «СырдарияСуШар» өндірістік учаскесінің техник – гидротехнигі Шайзада Айдана Шайзадақызы;</li><li style="text-align:justify;">«Қола» жүлде иегері - Қармақшы аудандық ветеринариялық стансиясының ветеринарлық дәрігері Бахытов Меңдулла Елубайұлы.</li></ul>Іс-шара барасында облыстық кәсіподақтар орталығы тарапынан 10 қарапайым қызметкерге шипажайға жолдама табысталып, Әлеуметтік қорғау жүйесінің бірқатар қызметкерлері облыстық және ведомствалық медальдармен, Қазақстан Республикасы Еңбек және халықты әлеуметтік қорғау министрі мен облыс әкімінің «Алғыс хаттарымен» марапатталды.«Үздік еңбек әулетінің» «Алтын» жеңімпаз иегері «Еңбек күніне» орай 26 қыркүйек күні Қазақстан Республикасы Премьер-Министрі О.А. Бектеновтің қатысуымен Астана қаласындағы Президент орталығында «Еңбек – Ел мұраты» республикалық форумына қатысып, аталған номинация бойынша республикалық деңгейде 1 орынға иелік етіп, &nbsp;сыйлықтармен марапатталды.Абдрахмановтар әулеті 4 ұрпақ бойы (ата, әке бала, немере) еліміздің экономикасының «күре тамыры» болып саналатын Теміржол саласында қызмет етуде.Әулеттің еңбектері еленіп, өз уақытында «Ленин», «Қызыл жұлдыз», «Еңбек даңқы» ордендерімен және Темір жол саласындағы социалистік жарыстың үздігі», «Социалистік жарыстың жеңімпазы» секілді наградалармен марапатталған. Іс-шара соңы мерекелік концертке ұласты.

Еңбек күні және әлеуметтік қорғау жүйесі қызметкерлері күніне арналған салтанатты іс-шара өтті

Сырдария ауданының әкімі Берік Сәрменбаев «Қызылорда крахмал-сірне зауытының» ЖШС-нің бас директоры Вилиян Халиковпен бірге, зауыттың &nbsp; бірнеше кезеңнен тұратын жобасы аясында бірінші кезекте кептіру қондырғысы мен қабылдау қоймасының жұмысымен танысты.«Шаған Жер» ЖШС басшысы Жеңісбек Сыздықов жаңадан қолға алынған жүгері дақылын өсірудегі жұмыстар барысын атап, жиналған дақылдардың көлемі мен алдағы жоспарымен бөлісті.Қазіргі таңда аудан аумағында ауыл шаруашылығы дақылдарын әртараптандыру бағытында жүгері өсіру жұмыстары қолға алынған. Биыл «Шаған Жер» шаруа қожалығы тарапынан 300 гектар жерге жүгері дақылы егілді.Сапалы өнім алу және оны сақтауға дайындау мақсатында жиналған жүгерінің ылғалдылығы арнайы аппараттың көмегімен тексерілуде. Бұл жұмыстар өнімнің сапасын анықтап, оны әрі қарай өңдеу мен сақтауға дайындауда маңызды рөл атқарады.Аудан әкімі ауыл шаруашылығы саласындағы жаңа бағыттарды дамыту, егін шаруашылығында заманауи тәсілдерді қолдану және өнімділікті арттырудың маңыздылығын атап өтті.<img src="https://knadmin.beoblood.kz/uploads/FB_IMG_1792302642394_5027251c41.jpg" alt="FB_IMG_1792302642394.jpg">

Жүгері дақылын өсіру жұмыстары қолға алынуда

Жаңақорған ауданында еңбек және тыл ардагері Машбек Сапарбайұлы Нәлібаевтың 100 жылдығына арналған «Еңбекпен өрілген ғұмыр» атты танымдық конференция өтті.&nbsp; Оған облыс әкімі Мұрат Ергешбаев, ҚР Құрылтай депутаттары Серік Қожаниязов, Нұркен Бақытбекұлы, Мағжан Ералиев, Қазақстан Халық кеңесінің мүшесі Мұрат Әбенов, мемлекет және қоғам қайраткері Мархабат Жайымбетов, зиялы қауым өкілдері мен ел ағалары қатысты.Жиынға қатысушылар алдымен «Машбек ата мұрасы», «Еңбекпен өрілген өмір» атты архив және фотоқұжаттар көрмесін тамашалады. Көрмеге ардақты азаматтың өмір және еңбек жолынан, ел игілігіне арналған қызметінен сыр шертетін құнды деректер қойылған.Конференцияны облыс әкімінің кеңесшісі Руслан Рүстемов жүргізді.Облыс әкімі Мұрат Ергешбаев ҚР Премьер-министрі Олжас Бектеновтің, ҚР Құрылтай төрағасы Айбек Дәдебайдың, Қазақстан Халық Кеңесінің төрағасы Ерлан Қошановтың құттықтау хаттарын көпшілікке оқып берді. Сонымен қатар конференцияға еліміздің өңірлерінің және Астана, Алматы, Шымкент қалаларының әкімдері құттықтау жолдады. Сондай-ақ аймақ басшысы еңбек ардагерінің өнегелі өмір жолы мен елге сіңірген еңбегі кейінгі ұрпаққа әрдайым үлгі болатынын атап өтті.<img src="https://knadmin.beoblood.kz/uploads/FB_IMG_1792301084211_788ed000b5.jpg" alt="FB_IMG_1792301084211.jpg">«Сыр өңірі – елдік пен ерліктің, парасат пен ұлағаттың киелі бесігі. Тарихқа бай, қасиетті Қорасан ата топырағында 1926 жылы дүниеге келген Машбек Сапарбайұлының балалық шағы мен есею жылдары – ұлт тарихымен тамырласқан өнегелі ғұмырдың шынайы шежіресі. Оның бойындағы қайсарлық пен еңбекқорлық сынды асыл қасиеттері өмір мектебінде шыңдалды. Маңдай тердің қадірін біліп, қарапайым еңбек адамының абыройын әрқашан биік ұстады. Осындай асыл қасиеттері ел ардақтаған беделді тұлғаға айналдырды. Машбек Сапарбайұлының азаматтық болмысы мен биік тұлғасы елдің рухани өміріне сіңірген &nbsp;еңбегінен де анық көрінеді. Ол ауыл-аймақтың ауызбіршілігін нығайтуға ерекше мән берді. Ел ішіндегі береке-бірлікті, ағайынның ынтымағын бәрінен де жоғары қойды. Өскелең ұрпақты білім-ғылымға, адамгершілікке тәрбиелеу мақсатында асарлатып мектеп, ағайынға бас болып өз қаражатына мешіт салдырды. Еліміздің өркендеуіне сіңірген 65 жылға жуық мазмұнды еңбегі лайықты бағасын алып, «Құрмет белгісі» орденімен және «Еңбектегі ерлігі үшін» медалімен марапатталды.&nbsp; Перзенттерінің бойына білім мен еңбекқорлықты, туған жерге деген шексіз құрметті сіңірді. Бес ұл, үш қызды тәрбиелеп, ұядан ұшырған Машбек Сапарбайұлының ұрпақтары бүгінде әке сенімін ақтап, еліміздің дамуына үлес қосуда. Бердібек Машбекұлы мен Нұрлыбек Машбекұлы мемлекет және қоғам қайраткері дәрежесіне көтеріліп, абыз тұлғаның есімін биікке өрлетті.&nbsp; Машбек Сапарбайұлының елге сіңірген еңбегі, кейінгі ұрпаққа қалдырған өшпес тағылымы адал еңбек пен ұлттық рухтың жарқын үлгісі болып қала бермек», – деді Мұрат Нәлқожаұлы.Конференцияда Қорқыт ата атындағы Қызылорда университетінің басқарма төрағасы – ректор Наурызбай Байқадамов, ел ағалары Бекмырза Еламанов, Бақыт Нұртазаев, Нәжмадин Мұсабаев, Мемлекеттік сыйлықтың лауреаты, академик, жазушы Құлбек Ергөбек сөз сөйледі.Мемлекеттік басқару саласының ардагері Серқожа Ыдырысов шаруашылық төрағасы болып сайланған жылдарын еске түсірді.«Шаруашылыққа басшылыққа келген күннен бастап ауыл қарияларының алдынан өтіп, ақыл-кеңесіне жүгініп, ақ батасын арқа тұттым. Мұндайда әсіресе, көргені көп, елге жанашыр болмысымен енді ғана қазығын тігіп, еңсесін тіктеуге ұмтылған қауымның тіршілігіне тірек бола білген Машбек қарияның да кеңестеріне көп жүгінетін едім. Ол кісі сүйегі еңбекпен қатайған, қара жердің қасиетін тал бойынан өткізген, тәжірибеден көрген-түйгені мол шежіре көкірек, шынайы тәжірибенің иесі еді. Сол кісілердің ақылы, шаруашылықтың сан қырлы саласында, қысқа жіп күрмеуге келмей жатқан шақта &nbsp;сөзбен болсын демеп, қуаттандырып отыруы менің де еңбекке деген құштарлығымды арттырып, нені болсын маңдай тер, қажырлы қайратпен жеңе алатыныма сенімімді арттырды» – деді С.Ыдырысов.Конференция еңбек және тыл ардагерінің 100 жылдығына арналған «Өмір көшіндегі өнеге» атты кітаптың тұсаукесер рәсіміне ұласты. Кітапта кейіпкердің өмір жолы, ел игілігіне сіңірген еңбегі мен азаматтық болмысы баяндалған. Балалық шағы ашаршылық пен соғыс жылдарының ауыртпалығына тұспа-тұс келген тұлғаның ғұмыры – тұтас бір дәуірдің шежіресі. Кітап авторлары – «Тұран» сыйлығының иегері, журналист, ақын Дүйсенбек Аяшұлы және «Құрмет» орденінің иегері, филолог Руслан Рүстемұлы.Тұсаукесер рәсімінде мемлекет және қоғам қайраткері Мұрат Бақтиярұлы, ақын, қаламгер, «Алаш» сыйлығының лауреаты Шәһизада Әбдікәрімов және Қазақстан Республикасының еңбек сіңірген қайраткері Жолтай Жұмат сөз сөйледі.<img src="https://knadmin.beoblood.kz/uploads/FB_IMG_1792301102654_b180ec2dce.jpg" alt="FB_IMG_1792301102654.jpg">

«Еңбекпен өрілген ғұмыр» атты конференция өтті

Жаңақорған ауданында еңбек және тыл ардагері, «Құрмет белгісі» орденінің иегері Машбек Сапарбайұлы Нәлібаевтың туғанына 100 жыл толуына орай қазақ күресінен жастар арасындағы республикалық турнир басталды.Ашылу салтанатына облыс әкімі Мұрат Ергешбаев, Құрылтай депутаттары Серік Қожаниязов, Нұркен Бақытбекұлы, Мағжан Ералиев, Қазақстан Халық Кеңесінің мүшесі Мұрат Әбенов, мемлекет және қоғам қайраткері Мархабат Жайымбетов, зиялы қауым өкілдері мен ел ағалары қатысты.Аймақ басшысы дәстүрге айналған турнирдің барша қатысушыларына сәттілік тіледі.«Еңбек және тыл ардагері Машбек Сапарбайұлы – саналы ғұмырын адал еңбекке арнап, Отанға қызмет етуді азаматтық парызы санаған абыз тұлға. Оның өмір жолы – табандылық пен қарапайымдылықтың, еңбекқорлық пен шынайы отансүйгіштіктің жарқын үлгісі. Мемлекеттің нығаюы мен елдің өркендеуі – әр кезеңде маңдай терімен қызмет еткен осындай біртуар азаматтардың қажырлы еңбегінің жемісі. Жас балуандарымыз болашақта биік белестерді бағындырып, қазақ күресінің абыройын асқақтатып, ел мерейін үстем етеді деп сенемін. Осы орайда, Сыр спортының серпінді дамуына ерекше үлес қосып жүрген Машбек Сапарбайұлының ұрпақтарына барша Сыр жұртшылығының, жеке Өзімнің атымнан шынайы алғысымды білдіремін. Мемлекет басшысы Қасым-Жомарт Кемелұлы: «Қазақстан – спорт державасы болуға тиіс. Сол үшін біз маңызды спорт нысандарын салып жатырмыз. Халықтың спортқа деген қызығушылығын арттыру – біздің ортақ міндетіміз» &nbsp;деген болатын.&nbsp; Сыр өңірінде Президентіміздің, Үкіметтің ерекше қолдауымен 11 мың орындық орталық стадион, Теннис, Инклюзивті спорт орталықтары және 24 жаңа спорт нысаны пайдалануға беріліп, бүгінде ел игілігін көруде.&nbsp; Қазір облыс орталығында «Қызылорда Арена» көпбейінді спорт кешені салынып жатыр. Осы бағыттағы жүйелі жұмыс нәтижесінде аймағымызда 377 мыңнан астам адам бұқаралық спортпен шұғылданады», – деді Мұрат Нәлқожаұлы.Сондай-ақ ашылу салтанатында Мархабат Жайымбетов, облыстық ардагерлер кеңесінің төрағасы Серік Дүйсенбаев, Машбек ата ұрпақтары атынан Пазылбек Нәлібаев сөз сөйледі.Айта кетейік, 2005 жылдан бері ұйымдастырылып келе жатқан Машбек Сапарбайұлын еске алуға арналған турнирге қатысушылар саны жылдан-жылға артуда. Биыл 21-ші мәрте жалауын көтерген дүбірлі додада еліміздің әр аймағынан және аудандардан келген 250-ге жуық спортшы бақ сынауда.&nbsp;<img src="https://knadmin.beoblood.kz/uploads/FB_IMG_1792300763329_0e8bfacc06.jpg" alt="FB_IMG_1792300763329.jpg">

Машбек Нәлібаевтың 100 жылдығына арналған қазақ күресінен республикалық турнир басталды

Қазалы ауданы әкімі аппаратының басшысы Ринад Тілептің төрағалығымен «Құжаттардың бірыңғай электрондық архиві» ақпараттық жүйесін (Е-архив АЖ) пайдаланушыларға арналған орталықтандырылған онлайн оқыту жұмыстары жүргізілді.Оқытуға аудан әкімдігіне қарасты дербес бөлімдердің, кент, қала және ауылдық округтер әкімдері аппараттарының, сондай-ақ аудандық мәслихат аппаратының ведомстволық архивтерге жауапты мамандары қатысты.Оқыту барысында жүйені баптау және базалық анықтамалықтармен жұмыс істеу, ұйымдарда құжаттарды қалыптастыру, сараптау және бекіту, құжаттарды архивтер арасында беру, өтініш берушілерге қызмет көрсету, қажетті құжаттарды іздеу және есептілік қалыптастыру мәселелері қамтылды.Оқытудың мақсаты – мамандардың кәсіби біліктілігін арттыру, электрондық құжат айналымын жетілдіру және архивтік құжаттармен жұмыс істеу тиімділігін арттыру.<img src="https://knadmin.beoblood.kz/uploads/FB_IMG_1792207970463_09316c8a9d.jpg" alt="FB_IMG_1792207970463.jpg">

Қазақстан және Қызылорда облысының жаңалықтары