<a href="https://kyzylorda-news.kz/">Kyzylorda-news.kz</a>. Нұр-Сұлтан қаласында теннистен ересектер арасында өткен Қазақстан Республикасының чемпионатында қызылордалық Ерасыл Ерділда қола жүлдені иеленді.
Жасөспірімдер арасында өнер көрсетіп жүрген Ерасыл өзінен 4-5 жас үлкен спортшылармен кездесіп, ІІІ орынға ие болды. Жарыстарға қатысу үшін оған Қазақстан теннис федерациясының 2 мың доллар гранты берілді.
Бұл оның ересектер арасындағы Қазақстан чемпионатындағы алғашқы жүлдесі. Ерасыл Ерділда Қазақстанның әр өңірінен 74 спортшы қатысқан сайыстың ең жас спортшысы болды.
<blockquote>
 «Қазақстан чемпионатына жоғары деңгейде дайындалдым. Ұзақ үзілістен кейінгі бірінші алған жүлдем болды. Сол үшін де сайыс тартысты өтті деп ойлаймын. Бес кездесудің төртеуінде жеңіске жеттім. Финалда 21 жастағы шымкенттік Достанбек Ташбулатовтан ұтылып, үшінші орынға ие болдым. Соған қарамастан, қола жүлдені иеленгеніме қуаныштымын. Бұл – менің ересектер арасындағы Қазақстан чемпионатындағы алғашқы жүлдем», – дейді Ерасыл Ерділда.
</blockquote>

Қызылордалық теннисші Ерасыл Ерділда грант иегері атанды

<a href="https://kyzylorda-news.kz/">Kyzylorda-news.kz</a>. Қызылорда гарнизонында 2021 жылғы мерзімді әскери қызметке шақыру науқанының басталуына орай, сыбайлас жемқорлықтың алдын алу мақсатында Қызылорда облысының қорғаныс істері жөніндегі департаменті, басқармасы мен бөлімдерінің жеке құрамының қатысуымен әдістемелік-нұсқаулық жиын өтті.
Қазақстан Республикасының Қарулы Күштерінде «Армияда қылмысқа орын жоқ» бағдарламасының жоспарына сәйкес «Әскерге шақыру – сыбайлас жемқорлықсыз» тақырыбымен өткен нұсқаулық жиында санитарлық-эпидемиологиялық талаптар мен нормалар толық ескерілді.
Өңірімізде азаматтарды мерзімді әскери қызметке шақыру 2021 жылдың 5 ақпанындағы Қазақстан Республикасының Президенті Қасым-Жомарт Тоқаевтың Жарлығына сәйкес ұйымдастырылуда.
Іс-шараның басты мақсаты – мерзімді әскери қызметке шақыру барысындағы сыбайлас жемқорлықтың алдын алу және оған жол бермеу.
<blockquote>
 «Сыбайлас жемқорлықты болдырмау мақсатында Қызылорда облысының қорғаныс істері жөніндегі департаментінде, басқармасында және бөлімшелерінде көптеген жұмыстар атқарылып жатыр. Елімізді қорғау саласында адал істер атқарсақ еліміздегі сыбайлас жемқорлықты болдырмауға өз үлесімізді қосқанымыз болады. «Қарулы Күштері – Адалдық Алаңы» жобасы аясында әрбір қызметші аянбай еңбек етуі тиіс», – деді Қызылорда облысының қорғаныс істері жөніндегі департаментінің бастығы полковник Айдын Сағынбеков.
</blockquote>
Қызылорда облысының қорғаныс істері жөніндегі департаментінде басшылық құжаттарға сәйкес азаматтарды мерзімді әскери қызметке шақыруды ұйымдастыру және өткізу жұмысының жоспары жасалды. Шақыру жұмыстарын сапалы ұйымдастыру және жүргізу мақсатында облыстық, аудандық (қалалық) шақыру комиссиясы жанынан құрылған медициналық комиссия мүшелерімен нұсқаулық-әдістемелік жұмыстар жүргізілді.
<img src="https://kyzylorda-news.kz/wp-content/uploads/2021/03/img_20210305_195008_374-scaled.jpg" alt="" />

Әскерге шақыру – сыбайлас жемқорлықсыз жүзеге асады

<a href="https://kyzylorda-news.kz/">Kyzylorda-news.kz</a>. Биыл Қазалы ауданының 3 ауылына газ тартылады. Бұл туралы Өңірлік коммуникациялар қызметінің ақпарат алаңында өткен брифингте Қазалы ауданының әкімі Мұрат Ергешбаев мәлімдеді.
Қазалы ауданында өткен жылы «Жол картасы» бағдарламасы аясында 42 жоба іске асырылды. Нәтижесінде 150 орындық ауылдық клуб салынып, 1 ауылға газ тартылды. Одан бөлек, Бекарыстан би ауылында тұрғын үйлердің ауыз суы сервистік желіге қосылып, 10 көше асфальтталып, жарықтандырылды.Бүгінде Ғани Мұратбаев ауылына табиғи газ жеткізіліп, Қазалы қаласын газдандыру жұмыстары басталып кетті.
<blockquote>
 «Аудан орталығы – Әйтеке би кентінен бөлек Қазалы қаласы мен елді мекендерді де газдандыру мәселесі күнтәртібінен түскен жоқ. Енді аудан орталығына жақын елді мекендерді де газдандыруды жалғастырамыз. Жалаңтөс батыр, Қашақбай Пірімов және Басықара ауылдарын газдандыру үшін 22,6 млн. теңге бөліп, жобасын әзірлеп жатырмыз. Амандық болса, тиісті қаржылары бөлінсе, маусым-шілде айларында құрылыс жұмыстарын бастап кетеміз», – деді Қазалы ауданының әкімі Мұрат Ергешбаев.
</blockquote>
Аудандағы ауылдарды байланыстыратын жолдар жөнделеді
Биыл Кәукей ауылына баратын автомобиль жолының құрылыс жұмыстары бітіп, халық игілігіне беріледі. Сондай-ақ, Әйтеке би кентінен 5 көше, Қазалы қаласынан 10 көшені асфальтталады.
<blockquote>
 «Аудан, ауыл арасындағы жолдар мен елді мекендегі көшелердің жағдайы едәуір дұрысталып келеді. Мәселен өткен жылы аудандық маңызы бар 60 шақырым және елді мекендердегі 70 көше жөнделді. Бұған қоса, 2020 жылдың желтоқсан айында қала мен кенттің екі аралығындағы жолды кеңейту жұмыстары басталды. Ал биыл «Қарлаң» көпірінен Қожабақыға және Қазалы қаласы мен «Әлсейіт» көпіріне дейінгі жолдардың да жұмысы аяқталады. Амандық болса, шалғайдағы ауыл тұрғындары асфальт жолмен жүретін күн де алыс емес. Басықара мен Абай елді мекенінің аралығындағы 20 км жолды жөндеу жұмыстарын жалғастыруға облыстық бюджеттен 306 млн. теңге қаржы қаралды», – деді Мұрат Нәлқожаұлы.
</blockquote>
«Ауыл – ел бесігі» жобасы аясында Әйтеке би кентінен 18 көшені асфальтталады. Қазір аудандағы автомобиль жолдарының қанағаттанарлық көрсеткіші 75,6 пайызды құрайды. Жыл соңына дейін 85,2 пайызға жеткізу көзделіп отыр.
Ауданнан шығатын өнімдер шетелге экспортталуда
Өткен жылы 3,5 мың тонна күріш ТМД елдері мен Польшаға экспортталды. Ал балық өнімдері Ресей, Дания, Германия, Грузия, Қытайға жөнелтілді. Ал 129 тонна қамыс Германияға экспортталды.
<blockquote>
 «Ауданның экспорттық әлеуетін көтеру бағытындағы жұмыстарды жалғастыра береміз. Әсіресе, ауылшаруашылығын әртараптандыруға көңіл бөлеміз. Біз өткен жылы 17675 гектар жерге ауылшаруашылығы дақылын ектік. Диқандарымыз егілген 6337 гектар күріштің әр гектарынан 41 центнерден өнім жинап, ел қамбасына 25 мың тоннадан астам астық құйды», – деді аудан әкімі.
</blockquote>
Айта кетейік, өткен жылы Қазалы ауданы ауылшаруашылығы өнімдерін өңдеу бойынша «Үздік аудан» атанды.
Ауданда 27 кәсіпкерлік нысан ашылды
Өткен жылы 27 кәсіпкерлік нысан пайдалануға берілді. Мәселен ауданда алғаш рет сыйымдылығы 500 тонна болатын көкөніс пен жеміс-жидек сақтау қоймасы ашылды. Сондай-ақ, сауда үйлері, көлік жуу кешені, жанар-жағар май бекеттері, жылы жай және мейрамхана салынды. Ал биыл жаңадан 25 нысан бой көтереді.
<blockquote>
 «Ауданда жылдан-жылға шағын және орта бизнес өкілдерінің саны артуда. Өткен жылы 1289 кәсіпкер тіркелді. Сондай-ақ, өз кәсібін дөңгелетем деген 1250 адамға мемлекеттік бағдарламалар арқылы 3 млрд теңге көлімінде қайтарымсыз грант және несие берілді. Жұмыссыздық мәселесінің алдын алу мақсатында «Жол картасы» бағдарламасы арқылы бірқатар жобалар дайындалып, қолдау тапты. Нәтижесінде 933 тұрғынды уақытша жұмыспен қамтамасыз еттік. Сондай-ақ, «Еңбек» бағдарламасы арқылы 928 тұрғын 555 мың теңгеден қайтарымсыз грант алды. Бұл өз кезегінде жұмыссыз азаматтардың кәсіппен айналысып, өз-өзін жұмыспен қамтуға септігін тигізді», – деді Мұрат Ергешбаев.
</blockquote>
Сонымен қатар өткен жылы 1500-ден астам жаңа жұмыс орны ашылды.
Шалғай ауылдардағы электр бағаналары жаңартылады
Биыл Қазалыда аудан орталығынан шалғай жатқан Кәукей мен Бозкөл ауылының аралығындағы электр бағаналары жаңартылады. Бұл үшін облыстық бюджеттен 82 млн теңге қаржы бөлінді.
Сондай-ақ, бүгінде аудандағы ауыз су тапшылығы мәселесін шешу үшін Байқожа су құбырын қайта жаңғырту жобасы дайындалуда. Нәтижесінде Әйтеке би кенті мен Байқожа елді мекені аралығында 63 шақырым магистральдық желі тартылатын болады.

Қазалының 3 ауылына газ тартылады

<a href="https://kyzylorda-news.kz/">Kyzylorda-news.kz</a>. Облыс әкімі Гүлшара Әбдіқалықованың төрағалығымен құқық бұзушылық профилактикасы жөніндегі ведомствоаралық комиссияның отырысы өткізілді. Жиынға құқық қорғау және арнайы орган басшылары, салалық басқарма басшылары және онлайн селекторлық режимде қала, аудан әкімдері қатысты.
Отырыста 2 мәселе қаралды. Алғашқы мәселе Қызылорда облысы аумағында жол қауіпсіздігін қамтамасыз ету шараларына арналды. Жиында Қызылорда облысы Полиция департаменті бастығының бірінші орынбасары Шамшидин Амитов өңірдегі жол көлік ережелерін бұзу деректеріне тоқталып, жол қауіпсіздігін сақтау бағытында атқарылған кешенді жұмыстарды баяндады.
Өткен 2020 жылы аймақта жол ережелерін бұзудың 122 мыңнан астам деректері тіркелген, оның 65 мыңнан астамы жол апатына тікелей әсер ететін өрескел құқық бұзушылықтар. Жол қауіпсіздігін сақтау бағытында құқық бұзушылықты автоматты түрде тіркейтін қала орталығында 13 «Арқан» стационарлы жылдамдық өлшегіш құралы іске қосылған. Нәтижесінде, 6 ай ішінде 31920 жылдамдықты асыру дерегі тіркеліп, 296 млн. теңге айыппұл салынып, оның 251 миллионы өндірілген.
Шамшидин Амитов облыс әкімдігінің бастамасымен 7 стационарлы жылдамдық өлшегіш құралдарын орнату жұмыстары басталғанын атап өтіп, бұл бастаманың жол қауіпсіздігін қамтамасыз етуде тиімділігі жоғары екенін назарға салды. Сондай-ақ, профилактикалық жұмыстар нәтижесінде өткен жылы облыста жол-көлік оқиғалары 13 пайызға, қайтыс болу деректері 35 пайызға, дене жарақатын алу 14 пайызға төмендеген.
Отырыста Қызылорда облысының жолаушылар көлігі және автомобиль жолдары басқармасының басшысы Мұрат Тілеумбетов жергілікті маңызы бар автомобиль жолдарында жол көлік оқиғаларының алдын алу және жол жүрісі қауіпсіздігін сақтауға арналған өңірлік іс-шара жоспары әзірленгенін баяндады. Бұл ретте басқарма тарапы жол көлік оқиғаларының жиілеу себебіне анализ жасаған. Яғни талдау көрсеткендей, жол көлік оқиғаларының басым бөлігі қарсы бағытқа шығу, маневр ережесін бұзу, жылдамдық асыру, арнайы белгіленген жаяу жүргіншілер жолынан өту ережесін бұзу және арақашықтықты сақтамау салдарынан орын алады.
Облыс әкімі Гүлшара Әбдіқалықова жол көлік оқиғаларына қатысты жауапты сала басшыларына бірқатар тапсырмалар жүктеді. Атап айтқанда, Полиция департаментіне жол көлік оқиғалары өсім алған өңірлерге талдау жасап, кешенді іс-шаралар жоспары бекітуді, авариялық қауіпті учаскелерді анықтап, оларды жетілдіру бойынша тиімді ұсыныстар енгізуді тапсырды. Ал, Жолаушылар көлігі және автомобиль жолдары басқармасының басшысына қала, аудан әкімдіктерімен бірлесіп, автомобиль жолдарына жақын орналасқан ауылдық елді мекен тұрғындарына жеке малдарды ретсіз шығуын болдырмау бағытында шаралар қабылдауды және жолаушыларды тасымалдау қызметімен айналысатын тұлғаларға түсіндірме жұмыстары ұйымдастыруды, елді мекендердің көшелеріндегі жол жүрісін реттейтін белгілерді қалпына келтіру жұмыстарын жандандыруды назарға салды.
Отырыста қаралған екінші мәселе – «Әйелдерді зорлық-зомбылықтан қорғау, отбасы тұрмыстық қарым-қатынастағы құқық бұзушылықтардың алдын алу шараларына бағытталды. Полиция департаменті бастығының бірінші орынбасары Шамшидин Амитов пен облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова баяндама жасап, атқарылған жұмыстар шеңберінде есеп берді.
Комиссия отырысында Шамшидин Амитов 2020 жылы отбасы-тұрмыстық қатынастар аясында әйелдер құқығына қарсы әрекет жасаған 663 азамат әкімшілік жауапкершілікке тартылғанын атап өтті. Сондай-ақ, аймақта полицияның сенім телефонына, әйелдерге қатысты проблемалық мәселелер жөнінде 110 рет қоңырау түсіп, зардап шеккен әйелдерге құқықтық, психологиялық көмек көрсетіліп, қауіпсіздігін қамтамасыз ету мақсатында 51 азаматша дағдарыс орталықтарына орналасты. Кешенді жұмыстар нәтижесінде әйелдерге қарсы жасалған қылмыстар 40 пайызға, оның ішінде отбасы тұрмыстық жағдайда жасалған қылмыстар 15 пайызға төмендеген.
Жиында басқарма басшысы Гаухар Қалмақова тұрмыстық зорлық-зомбылық құрбандарына әлеуметтік қызметтер көрсету бағытында атқарылған жұмыстарды тізбеледі. Мәселен, өткен жылы дағдарыс орталығы арқылы 98 отбасына және ағымдағы жылдың екі айында 26 отбасыға 8 бағыт бойынша арнаулы әлеуметтік қызметтер көрсетілген. Тұрмыстық зорлық-зомбылық жағдайындағы әйелдерді оңалту жұмыстарының нәтижесімен 2020 жылы 82 отбасы, биыл 8 отбасы әлеуметке оңалып, өз отбасыларына қайта оралды.
Отырысты қорытындылаған облыс әкімі жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақоваға тұрмыстық зорлық-зомбылық құрбандарына арналған дағдарыс орталығының қызметін жетілдіру үшін ұсыныстар беруді, экономика және бюджеттік жоспарлау басқармасымен бірлесіп, дағдарыс орталығының қуаттылығын ұлғайту үшін қосымша қаржы бөлу мәселелерін пысықтауды тапсырды.
Сондай-ақ, зардап шегіп, дағдарыс орталығынан бейімделіп шыққан әйелдер мен олардың отбасы жағдайына тұрақты түрде мониторинг жүргізуді, қолдауды қажет ететін отбасылардан шыққан, оның ішінде елді мекендерде тұратын балаларды қосымша білімге, спорт секцияларға және үйірмелерге барынша тартуды міндеттеді. Ал, полиция департаментіне отбасылық зорлық-зомбылықтағы агрессорлармен нүктелі профилактикалық жұмыстар жүргізуді, облыс бойынша жиілеп келетін зорлық фактілерінің себептеріне талдау жасап, оларды болдырмайтын оңтайлы әдістерді тұжырымдап, ұсыныстар беруді тапсырды.
<img src="https://kyzylorda-news.kz/wp-content/uploads/2021/03/161249464_3198036123632768_1655708233479724615_o.jpg" alt="" />

Қызылордада жол-көлік оқиғалары 13 %  төмендеген

<a href="https://kyzylorda-news.kz/">Kyzylorda-news.kz</a>. Жаңақорғанда қойшылардың қар астында шамамен 50-ге жуық малы қалып қойды. Бұл туралы Өңірлік коммуникациялар қызметінің ақпарат алаңында өткен брифингте облыстық ТЖД бастығының міндетін атқарушы Руслан Қайрақбаев мәлімдеді.
<blockquote>
 «Тау беткейінде орналасқан Сүттіқұдық, Қосүйенкі , Қыраш ауылдық округтеріндегі шаруа қожалықтарына тексеріс жұмыстары жүргізілді. Жаңақорған ауданының азаматтық қорғау гарнизонынан 6 қызметкер, 1 техника, ал аудан әкімдігінен 8 қызметкер , 4 техника жұмылдырылды. Нәтижесінде 5383 уақ мал болғандығы анықталды. Алайда бұл нақты сан емес. Бүгінде комиссия құрылды. Алдағы уақытта қосымша ақпарат беретін боламыз», – деді Руслан Сламбекұлы.
 «Үстіміздегі жылдың 12,13, наурыз аралығында ауа райы күрт құбылып, 246 шақырымды құрайтын Қызылорда-Түркістан автожолы екі мәрте жабылды. Шиелі, Жаңақорған ауданында 11 техника жұмылдырып, тазалау жұмыстары жүргізілуде. Көлік қозғалысына кедергі жоқ. Апаттық жағдай орын алмады», – деді «ҚАЗАВТОЖОЛ» ҰҚ»АҚ Қызылорда облыстық филиалының бөлім басшысы Нұрлыбек Үсенов.
</blockquote>

Жаңақорғанда қалың қардан 50 уақ мал қырылды

<a href="https://kyzylorda-news.kz/">Kyzylorda-news.kz</a>. Ағымдағы жылдың 11 наурыз күні сағат 11.30 шамасында ұялы телефоннан Арал аудандық №3 өрт сөндіру бөліміне қоңырау шалынып, «Ғимаратта бомба бар» деген хабарлама түскен.
Қоңырау шалушының даусынан оның жасөспірім екені белгілі болып, ононимді хабарламашының ұялы байланыс нөмірі анықталған. Қазір аталған дерек бойынша іс қозғалып, тексеру жұмыстары жүргізілуде.
<blockquote>
 «Оқиға орын ала салысымен терроризмге қарсы іс-қимыл саласы бойынша жедел іздестіру шаралары жүргізілді. Нәтижесінде «жалған терроризм» туралы хабар түсіруші Арал қаласының тұрғыны, 2012 жылы туған, 3-ші сынып оқушысы екені анықталды. Жалпы мұндай қылмыстар ҚР Қылмыстық кодексінің 273-бабында қарастырылған. Яғни, жалған ақпарат таратқан адам 6 жылға дейін бас бостандығынан айырылып және тексеріс жұмыстарына тартылған мемлекеттік органдардың материалдық шығынын өтеуі мүмкін», – деді облыстық полиция департаментінің экстремизмге қарсы іс-қимыл басқармасының орынбасары Қуаныш Оразов.
 «Жалпы «жалған терроризм» туралы хабарлама тарату қылмыстың ауыр түріне жатады. Сондай-ақ, заңға сәйкес, кәмелетке толмағандармен жасалған қылмыс үшін оның ата-анасы жауапкершілікке тартылады. Біреулерге мұндай әрекеттер баланың ойыны, еш зияны жоқ әрекет болып көрінуі мүмкін. Бірақ түскен ақпаратты ойын деп есептеп, тиісті шаралар атқарылмай қалса, оның соңы адам шығына, басқа да материалдық залалдарға әкеліп соғуы мүмкін. Әрі жалған ақпарат таратушыны табу үшін де құзырлы органдар белгілі бір материалдық-техникалық, қаражатты және жұмыс уақытын шығындауға мәжбүр болады», – деді облыстық жұмылдыру дайындығы басқармасының басшысы Усаин Медет.
</blockquote>
Айта кетейік, аталмыш қылмыстардың алдын алу мақсатында баспа беттерінде, әлеуметтік желіде, білім беру мекемелерінде және қалалық «Автобус паркі» мекемесінің автобустарында «жалған терроризм» үшін заң алдындағы жауапкершілік туралы жадынамалар орналастырылған. Бұл жұмыстар жыл бойы жалғасын табады.
Еске сала кетейік, облыста мұндай жалған ақпарат беру бұған дейін соңғы рет үш жыл бұрын тіркелген.

Қызылордада жалған ақпарат берген жасөспірім жазаланады

<a href="https://kyzylorda-news.kz/">Kyzylorda-news.kz</a>. Облыс әкімі Гүлшара Әбдіқалықованың төрағалығымен сыбайлас жемқорлыққа қарсы іс-қимыл мәселелері жөніндегі облыстық комиссия отырысы өтті. Күн тәртібінде үш мәселе қаралды.
Атап айтсақ, денсаулық сақтау саласында сыбайлас жемқорлыққа қарсы іс-қимылды жүргізу, 2020 жылдың қорытындысы бойынша және 2021 жылға жоспарланған қоғамда сыбайлас жемқорлыққа қарсы мәдениетті қалыптастыру бағытындағы шаралар және «Transparency Kazakhstan» қоғамдық қорының 2020 жылы Қазақстандағы сыбайлас жемқорлық жай-күйіне жүргізілген зерттеу жұмыстарының нәтижесі туралы сөз болды.
Бірінші мәселе бойынша облыстық денсаулық сақтау басқармасының басшысы Сәбит Пазылов баяндама жасады.
Аймақ басшысы жемқорлық тәуекелдерін азайтуға, қоғамның денсаулық сақтау қызметіне сенімін арттыруға бағытталған ұйымдастырушылық шаралар қабылдауды қатаң тапсырды. Бұл бағытта денсаулық сақтау инфрақұрылымын одан әрі жаңғырту, медициналық қызмет пен дәрі-дәрмектердің сапасын жақсарту және олардың халыққа қол жетімді болуы бақылауға алу бойынша тапсырма берді.
Күн тәртібіндегі екінші және үшінші мәселе бойынша сыбайлас жемқорлыққа қарсы іс-қимыл агенттігінің облыс бойынша департаментінің басқарма басшысы Ғалия Әлімқұлова баяндады.
Облыс әкімі Гүлшара Әбдіқалықова қоғамда сыбайлас жемқорлыққа қарсы мәдениетті қалыптастыру бағытында ішкі талдау жұмыстарын тұрақты негізде жүргізіп, анықталған осал тұстарды заңнамалық тұрғыда жетілдіру үшін уәкілетті органдарға ұсыныстар беруді, бағынысты лауазымды тұлғалардың «Adal komek», «Antikor live» жобаларына қатысу белсенділігін арттыруды, әкімдіктерге бағынысты бөлімдерде, кент және ауылдық округ әкімі аппараттарында «Мемлекеттік басқарудың сервистік моделін» енгізу жолдарын қарастыруды және «Ақмешіт-адалдық алаңы» жобалық кеңсесімен бірлесіп, 2020 жылы тиісті заң актілеріне енгізілген реформалардың ерекшеліктерін ұжым қызметшілеріне түсіндіруді жүктеді. Сондай-ақ, қала, аудан әкімдіктеріне және мүдделі басқармаларға квазимемлекеттік секторда комплаенс қызметін үйлестіру бойынша түсіндірме жұмыстарын жүргізіп, «Ақмешіт – адалдық алаңы» жобалық кеңсесімен атқарылатын жұмыстардың жоспарын бекіту қажет екенін айтты.
Жиын соңында облыс әкімі «Transparency Kazakhstan» 2020 жылдың қорытындысына сәйкес сыбайлас жемқорлық деңгейін зерттеу нәтижелерінің көрсеткіштеріне қатысты бірқатар тапсырма берді.
<blockquote>
 «Transparency Kazakhstan» ұйымының жүргізген зерттеу нәтижесі бойынша талдау жасалсын, көрсетілген тәуекелдерге назар аударылсын, оларды жою бағытында шаралар қабылдансын. Бағынысты қызметкерлердің ішкі тәртібі бақылауға алынсын, әсіресе қызмет көрсетуші мамандар мен құрылым басшыларының кәсіби деңгейін жетілдіру керек. Заңда белгіленбеген артық әкімшілік рәсімдер мен бюрократиялық процестердің болдырмауын қамтамасыз ету маңызды», – деді облыс әкімі Гүлшара Әбдіқалықова.
</blockquote>

Сыбайлас жемқорлыққа қарсы іс-қимыл мәселелері жөніндегі облыстық комиссия отырысы өтті

<a href="https://kyzylorda-news.kz/">Kyzylorda-news.kz</a>.&nbsp; Қазақстанда өткен тәулікте 954 адамданан коронавирус індеті ПТР тест арқылы анықталды. Бұл туралы &nbsp;<a href="http://www.coronavirus2020.kz/">www.coronavirus2020.kz</a>&nbsp;хабарлайды.
Аймақтар бойынша:
Нұр-Сұлтан қаласы – 127,
Алматы қаласы – 297,
Шымкент қаласы – 17,
Ақмола облысы – 63,
Ақтөбе облысы – 9,
Алматы облысы – 99,
Атырау облысы – 48,
Шығыс Қазақстан облысы – 18,
Жамбыл облысы – 19,
Батыс Қазақстан облысы – 51,
Қарағанды облысы – 92,
Қостанай облысы – 47,
Қызылорда облысы – 1,
Маңғыстау облысы – 2,
Павлодар облысы – 43,
Солтүстік Қазақстан облысы – 12,
Түркістан облысы – 9.
Жалпы ел бойынша ауырғандар саны 225685.

Коронавирус: Өткен тәуліктегі мәліметтер жарияланды

<a href="https://kyzylorda-news.kz/">Kyzylorda-news.kz</a>. Қазақстан территориясының басым бөлігінде әлі де жауын-шашынсыз ауа райы сақталады, деп хабарлайды Қазгидромет.
Тек оңтүстікте және шығыста атмосфералық фронттардың өтуіне байланысты тұрақсыз ауа райы сақталады, кей жерлерде жаңбыр мен қар жауады.
Кей жерлерде тұман түсіп, жел күшейеді, шығыста жаяу бұрқасын соғады.
Жамбыл облысында, күндіз Түркістан, Атырау, Батыс Қазақстан облыстарының кей жерлерінде тұман түседі, күшті жел тұрады.
Маңғыстау облысында, күндіз Солтүстік Қазақстан облысының кей жерлерінде жел екпіні қатты болады.
Ақмола, Алматы, Қызылорда, Ақтөбе, Қостанай, Шығыс Қазақстан, Павлодар облыстарының кей жерлерінде тұман түседі.
Түнде Шығыс Қазақстан облысының кей жерлерінде боран соғады.

16 наурызда ауа райы қандай болады?

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова Мемлекет және қоғам қайраткері, Қызылорда облысының құрметті азаматы Алмагүл Божановамен кездесіп, мерейлі 75 жасымен құттықтап, ілтипат танытты.
Жиында аймақ басшысы мемлекет дамуы жолында табанды еңбек еткен Алмагүл Божанқызының Сыр өңірін өркендету ісінде айрықша қолтаңбасы бар екенін атап өтті.
<blockquote>
 «Ел ісіне, мемлекет жұмысына ерте араласқан Алмагүл Божанқызының атына қандай мақтау айтсақ та жарасымды. Ол биліктің биік баспалдақтарынан абыройлы өтіп, Тәуелсіздік жылдарында еліміздің әлеуметтік-экономикалық дамуына бар ынта-жігерімен қызмет етті. 
 Шын мәнінде, Алмагүл Божанқызының Сырдария ауданына басшылық жасаған жылдар Тәуелсіздіктің алғашқы қиын кезеңдеріне тұспа-тұс келген өте күрделі уақыт болатын. Бұл ретте, Алмагүл Божанқызының туған жеріндегі еңбегі елеусіз қалмай, Сырдария ауданы сол жылдары облыста үздіктер қатарынан көрінді, экономикалық көрсеткіштер бойынша көш бастады. Сіздің ізгілікке толы жарқын ғұмырыңыз кейінгі жастарға өнеге болатындай ғибратты жол. Мерейтойыңыз тағы да құтты болсын»,-деді облыс әкімі Гүлшара Әбдіқалықова.
</blockquote>
Басқосуда өңір басшысы мемлекеттік қызметте абырой биігінен көрініп, халықтың сүйіспеншілігіне бөленген Алмагүл Божанқызына ҚР Парламенті Сенатының төрағасы Мәулен Сағатханұлы Әшімбаевтың құттықтау хаты мен облыстың ең жоғарғы наградасы – Қызылорда облысының құрмет грамотасын табыстап, қазақы дәстүрмен қамзол кигізіп, құрмет білдірді.
Мерейтой иесіне арналған жиында замандастары, ардагер Қорғанбек Қайруллаев пен облыстық әйелдер кеңесінің төрайымы Райкүл Байназарова сөз алып, Алмагүл Божанованың ел мүддесі жолындағы еңбегіне тоқталып, жылы естеліктермен бөлісті. Өз кезегінде Алмагүл Божанова аймақ басшысына, өтпелі кезеңде ел игілігіне қызмет еткен жанашыр азаматтарға алғысын жеткізді.
Алмагүл Божанова 1946 жылы, Тереңөзек кентінде дүниеге келген. Алғашқы қызметін Шаған ауылында балабақша меңгерушілігінен бастаған. Комсомол және партия комитеттерінде жауапты қызметтер атқарды. Тереңөзек ауданы әкімі қызметінде халықтың әлеуметтік жағдайын жақсартуға, орта және шағын бизнесті дамытуға, ауыл шаруашылығы саласын көтеруге баса назар аударды.
Облыстық мәслихат хатшысы қызметінде де ерекше қарым-қабілетін көрсетіп, атқарушы органдармен бірге аймақтың даму жолында еселі еңбек етті.
«Nur Otan» партиясы облыстық филиалы төрағасының орынбасары болған уақытта да билік пен халық арасында ашық диалог орнатып, саяси ұйымның рөлін күшейтуге бар күш-жігерін жұмсады. Қазіргі таңда қоғамдық бағытта игі істер атқарып келеді.
<img src="https://kyzylorda-news.kz/wp-content/uploads/2021/03/160987207_3197759916993722_1889542679110700935_o.jpg" alt="" />
<img src="https://kyzylorda-news.kz/wp-content/uploads/2021/03/160771856_3197761623660218_4509748424792107278_o.jpg" alt="" />

Гүлшара Әбдіқалықова Алмагүл Божанованы мерейлі 75 жасымен құттықтады

<a href="https://kyzylorda-news.kz/">Kyzylorda-news.kz</a>. Қызылордада «Дарын» мемлекеттік жастар сыйлығының иегері Күнсұлу Түрікпеннің <a href="https://matinder.kz/song/kunsulu-turikpen/men-suysem-suyemin">«Мен сүйсем сүйемін»</a> атты әніне түсірілген бейнебаянның тұсаукесер-таныстырылымы өтті.
Аталған шара Жастар ресурстық орталығының бастамасымен, облыстық мәслихат депутаты, «Сыр үміті» жастар қауымдастығының төрағасы Мағжан Ералиев пен кәсіпкер Гүлсара Шәкетованың қолдауымен ұйымдастырылды.
Бейнебаянның тұсаукесеріне дейін баспасөз мәслихаты өткізіліп, оған «Жастар ресурстық орталығының» директоры Азамат Мүкеев, жырау Күнсұлу Түрікпен және кәсіби клипмейкер режиссер Нұрмұхамед Думанғазин қатысты.
<blockquote>
 «Өнерлі жастардың шығармашылығын қолдауға септігін тигізіп кел жатқан Қызылорда облыстық Жастар ресурстық орталығы мен облыстық мәлихат депутаты Мағжан Ералиевке өз атымнан айтар алғысым шексіз. Мен бұған дейін де үнемі айтып келемін, менің негізгі бағытым – дәстүрлі ән өнері. Осы бағытты халыққа насихаттап, оны жеткізіп келемін. Шығармашылықтың адамы ретінде жан-жақты болуды қалаймын. Эстрада бұл қосымша алып жүретін өнерім», – деді Күнсұлу Түрікпен.
</blockquote>
Тұсаукесер-таныстырылым кезінде тың туындыны Күнсұлу Түрікпен халық алдында жанды дауыста шырқады.
<img src="https://kyzylorda-news.kz/wp-content/uploads/2021/03/b782ca3a-003e-4c0c-8d85-e5107db09f1f-1.jpg" alt="" />

Тұсаукесер: Күнсұлу Түрікпен «Мен сүйсем сүйемін» әніне  бейнебаян түсірді

<a href="https://kyzylorda-news.kz/">Kyzylorda-news.kz</a>.&nbsp; 17-19 наурыз күндері “Евразия” спорт кешенінде самбодан жасөспірімдер арасында Қазақстан Республикасының чемпионаты өтеді.
Тәуелсіздіктің 30 жылдығына арналған спорттық шараны ҚР Спорт және дене шынықтыру істері комитеті, Қызылорда облысының дене шынықтыру және спорт басқармасы, облыстық самбо федерациясы ұйымдастыруда.
Дүбірлі бәсекеде Нұр-Сұлтан, Алматы, Шымкент қалаларынан және барлық облыстардан 2003-2004 жылдары туылған ұлдар мен қыздар 18 салмақ дәрежесінде шеберлік байқасады.
Жарыс қорытындысында Әлем, Азия чемпионаттарына қатысатын Қазақстан құрамасы жасақталады.
Жарысқа бас төрешілік қызметті атыраулық Ербол Төлеген атқарады. 
Ел чемпионаты 17 наурыз күні сағат 10.00-де басталады, 17.00-де салтанатты ашылуы өтеді. Залда санитарлық-эпидемиологиялық талаптар толығымен сақталады.

Қазақстан және Қызылорда облысының жаңалықтары