<a href="https://kyzylorda-news.kz/">Kyzylorda-news.kz</a>. Қызылордалық «Қайсар» футбол клубының бас бапкері Владимир Никитенко алдағы жоспарларымен бөлісті.
Бас бапкер Владимир Никитенко Қызылордаға келе сала білек сыбана жұмысқа кіріскенін айтты.
<blockquote>
 «Ресми алғашқы ойыным «Тұранмен» өтті. Допты бағамдап, бірнеше шабуыл ұйымдастырғанымызбен матчта гол соғу мүмкіндігі бұйырмады. Тактикалық және теориялық жаттығуларды үзбей «Каспийге» дайындалдық. Соның арқасында қарсыласымыздан үш ұпай еншіледік. Қазір командадағы барлық ойыншылардың қарым қабілетін байқау үстіндемін. Негізгі мақсатым – біріншілікте ұпай мөлшерін көбейтіп, турнирлік кестеде жағдайымызды жақсарту. Егер біріншілікте жағдайымыз жақсы болса, Қазақстан кубогында табысты ойын көрсетуге болады. Клубқа трансферлік банның қойылғаны жасырын емес. Бірақ клуб қызметкерлері шектеуді алып тастау үшін жұмыс істеп жатыр. Әрине мәселе шешімін тапса, жаңа ойыншылар қосылуы бек мүмкін. Командадағы жағдай, атмосфера барлығы жақсы. Көмекшілеріммен бірге «Қайсарды» алға жетелеуге атсалысамын, – деді бас бапкер Владимир Никитенко.
</blockquote>

Владимир Никитенко: «Қайсарды» алға жетелеуге атсалысамын

<a href="https://kyzylorda-news.kz/">Kyzylorda-news.kz</a>. Қызылорда облысында жұмыссыздық деңгейі 4,9% деңгейінде тұрақтануда.
Мемлекеттік бағдарламаларды іске асырудың арқасында жыл басынан бері 12 мыңнан астам жаңа жұмыс орны құрылды. Оның ішінде 3348-і тұрақты жұмыс орындары.
Айта кетейік, жыл басынан бері жұмыспен қамту орталықтары арқылы 468 мүгедек жұмыспен қамтылды, оның 57-сі тұрақты жұмыс орындарына орналастырылды.
Бизнес проблемалары жұмыссыздыққа және табыстың төмендеуіне әкелетінін ескере отырып, шағын орта бизнесті дамыту мақсатында облыстың 2023 жылға дейінгі Экономикалық даму картасын іске асыру жалғасуда. Бағдарлама аясында бизнеске 4600-ден астам тұрақты жұмыс орнын құруға мүмкіндік беретін жалпы құны 271 млрд. теңге болатын 400 жоба ұсынылды. 7 млрд. теңге құрайтын 89 жоба 2020 жылы іске асырылды, 1047 жұмыс орны құрылды. Бүгінде 13 млрд. теңгеден астам сомаға тағы 96 жобаны іске асыру бойынша жұмыс жүргізілуде, бұл шамамен 900 жұмыс орнын құруға мүмкіндік береді.

Қызылордада жұмыссыздық деңгейі 4,9 пайызды құрайды

<a href="https://kyzylorda-news.kz/">Kyzylorda-news.kz</a>. Дүниежүзілік денсаулық сақтау ұйымының (ДДСҰ) төтенше жағдайлар бөлімінің техникалық тобының жетекшісі Мария Ван Керкхов Үндістанның коронавирус штаммына қарсы барлық вакциналардың тиімділігі туралы айтты, деп хабарлайды&nbsp;<a href="https://stan.kz/">Stan.kz</a>.
<blockquote>
 «Дельта нұсқасын қоса алғанда, алаңдаушылық тудыратын барлық нұсқаларға қатысты вакциналар аурудың ауыр түрлеріне және өлімге қарсы тиімді болып қала береді», – деген ол бұл фактіні өте жақсы белгі деп атады.
</blockquote>
ДДҰ өкілі вакцинаның екі дозасы да қорғаудың толық деңгейін қамтамасыз ететінін атап өтті. Сондықтан ол препараттың алғашқы инъекциясын алғандардың барлығына вакцинация процедурасын аяқтауға кеңес берді.
Сонымен қатар, Ван Керкховен&nbsp;вирустың жаңа нұсқасы өлімге әкелетіні туралы дәлелдер жоқ екенін атап өтті. Оның айтуынша, ұйымда түпкілікті қорытынды жасау үшін мәліметтер жеткіліксіз.

ДДCҰ үнділік коронавирус штаммына қарсы барлық вакциналардың тиімділігін бағалады

<a href="https://kyzylorda-news.kz/">Kyzylorda-news.kz</a>. «Алтын белгi» иегерлерінің нәтижесі тағы бір рет тексеріледі. Бұл туралы Алматы қалалық білім беру басқармасының басшысы Ляззат Жылқыбаева мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
Басқарма басшысы қашықтан оқыту кезінде үздік оқушылардың көбейгенін мойындап отыр.
<blockquote>
 «Иә, «Алтын белгi» иегерлерінің саны өсіп отыр. Бірақ ондай жағдай Алматыда ғана емес, жалпы Қазақстан бойынша байқалып отыр. Мәселен, былтыр Алматы қаласында мектепті үздік бітірген 528 оқушы болса, биыл 624 бала алтын медаль иегері атанып отыр. Алайда бір нәрсені ескеру керек, 2020 жылы түлектердің жалпы саны 7 мың адам болса, биыл 11 мың оқушы мектепті тәмамдап отыр. Проценттік арасалмақта қарасақ, керісінше, үздіктердің саны төмендеп отыр. Дегенмен, бір қала үшін 624 «Алтын белгi» тым көп», – дейді Жылқыбаева.
</blockquote>
Оның айтуынша, қазіргі кезде бақылау шаралары қолға алынып отыр. “Алтын белгi” алған оқушылардың барлық жұмысы қайта тексеріледі.
<blockquote>
 «Бұдан бөлек, біз мектеп директорларының қатысуымен кеңес өткізіп, сол жерде әрбір медальді беру мәселесін пысықтаймыз. Талдау жасаймыз», – деп атап көрсетті басқарма басшысы.
</blockquote>
Оның сөзіне қарағанда, әзірше “Алтын белгi” иегерінің ҰБТ-да шекті ұпайды алмауы тіркелген жоқ. Барлығы өз дәрежесін растады.
<blockquote>
 «Білім басқармасы ұлттық бірыңғай тестілеу аяқталғаннан кейін 30 маусымда «Алтын белгi» иегерлерінің нәтижесін тағы бір рет тексеріп шығады», – деді Жылқыбаева.
</blockquote>

«Алтын белгі» иегерлері қайта тексеріледі

<a href="https://kyzylorda-news.kz/">Kyzylorda-news.kz</a>. Қызылорда қаласы әкімінің өкімімен Жаңабергенов Парасат Болатұлы қалалық ішкі саясат бөлімінің басшысы қызметіне тағайындалды.
Парасат Болатұлы 1987 жылы дүниеге келген.
2009 жылы «Болашақ» университетін «Қазақ тілі және әдебиеті» мамандығы бойынша бітірген.
Еңбек жолын 2009 жылы қалалық мәдениет және тілдерді дамыту бөлімінің жетекші маманы ретінде бастаған.
2010-2012 жылдары №101 орта мектептің мұғалімі;
2013-2019 жылдары облыс әкімі аппаратының ұйымдастыру-инспекторлық жұмыс және аймақтық даму, қала әкімі аппаратының ұйымдастыру-инспекторлық бөлімдерінің инспекторы, бас маманы, бас инспекторы;
2019 жылдан осы уақытқа дейін қалалық білім бөлімі басшысының орынбасары қызметін атқарды.

Қалалық ішкі саясат бөлімінің басшысы тағайындалды

<a href="https://kyzylorda-news.kz/">Kyzylorda-news.kz</a>. Қазақстан «сары аймақта» орналасқан. Бұл туралы ҚР денсаулық сақтау министрі Алексей Цой ҚР премьер-министрі Асқар Маминнің төрағалығымен өткен Үкімет отырысында мәлімдеді.
А.Цой хабарлағандай, әлемде КВИ-дің 179 млн-нан астам жағдайы тіркелген, тәулігіне 275 мыңнан астам жағдай тіркелуде. 3,8 млн-нан астам адам қайтыс болды, өлім көрсеткіші 2,1% құрады.
<blockquote>
 «Қазақстанда 22 маусымдағы жағдай бойынша КВИ+ нәтижесімен 410 523 науқас және КВИ- 56 546 жағдай тіркелген. Қазақстан Республикасы «сары аймақта» орналасқан. Нұр-Сұлтан қаласы әлі де «қызыл аймақта» тұр. Қалған өңірлер «сары» және «жасыл аймақтарда» орналасқан», – деді денсаулық сақтау министрі.
</blockquote>
Соңғы аптада коронавирус инфекциясымен сырқаттанушылықтың 4% өсуі байқалады және бұл алдыңғы аптамен салыстырғанда Нұр-Сұлтан қаласында тіркелген жағдайлар санының 40% артуымен байланысты. Республика бойынша 22 маусымдағы жағдай бойынша инфекциялық төсек орындар 25%, реанимациялық төсек-орындар 21% толы. Аурудың жоғары деңгейі байқалған 7 өңірде инфекциялық және реанимациялық төсектердің жүктелуінің қысқаруы байқалады.
Соңғы айда КВИ+ және КВИ- тіркелген жағдайларының саны тәулік ішінде 2 267-ден 943 жағдайға дейін немесе 2,4 есеге азайды, стационарлық емдеудегі науқастардың саны 2 есеге, амбулаториялық емдеудегілер саны 1,4 есеге азайды.
<blockquote>
 «КВИ науқастарынан алынған оң зертханалық үлгілердің ПТР-скринингінің нәтижелері бойынша Нұр-Сұлтан қаласында «Дельта» штамына («үнді» штамына) тән мутация ықтималдығы анықталды. «Дельта» коронавирус штамы жоғары жұқпалы және анықталған штамдарға қарағанда 60% жұқпалырақ, 7 күнге дейін қысқа инкубациялық кезеңмен сипатталады. Соңғы зерттеулер көрсеткендей, «үнді» коронавирус штамы ауруханаға жатқызу және өлім жағдайларының жоғары ықтималдығымен байланысты. Сонымен қатар жаңа клиникалық белгілер пайда болды, буындар мен іштің қатты ауыруы, ішек көріністері, есту қабілетінің жоғалуы. Дүниежүзілік денсаулық сақтау ұйымының деректері бойынша «Дельта штамы» SARS-CoV-2 әлемнің 74 елінде анықталды», – деп атап өтті А.Цой. &nbsp;
</blockquote>
«Үнді» штамына тән жұқпалығы, ауырлығы мен клиникасы бойынша қолда бар деректерді ескере отырып, өңірлер дәрілік заттардың, ӨЖЖ-жабдықтары үшін шығыс материалдарының, жеке қорғаныш құралдарының, резервтік төсек қорының жеткілікті қорын, сондай-ақ жедел жәрдем қызметі мен мобильді бригадалардың КВИ бар пациенттерге медициналық көмек көрсетуге дайындығын қамтамасыз ету қажет.
Сондай-ақ денсаулық сақтау министрі елімізде халықты вакцинациялау жалғасып жатқанын айтты. Вакцинаның шамамен 4,5 млн дозасы пайдаланылды, оның ішінде бірінші компонентті 2 809 449 адам алды, бұл вакцина алуға тиісті халықтың 28,4%-ін құрайды. Екінші компонентпен 1 715 750 адам қамтылды.
Бүгінгі таңда егу пункттерінде вакцина дозаларының жеткілікті қоры бар: бірінші компоненттің 1,1 млн дозасы және екінші компоненттің 1,4 млн дозасы бар. Кесте бойынша жеткізу жалғасуда. 1 компонентпен орташа республикалық көрсеткіштен төмен вакцинамен қамту Маңғыстау, Қостанай, Павлодар, Батыс Қазақстан, Ақтөбе және Ақмола, Қарағанды, Жамбыл, Алматы облыстарында байқалады.
<blockquote>
 «Республика аумағында үнді штамының белгіленген айналымын ескере отырып, өңірлерде тұрақты эпидахуалды сақтау үшін жергілікті атқарушы органдар вакциналау қарқынын ұлғайтып, халық арасында жедел вакцина алу қажеттілігі және негізгі алдын алу шараларын сақтау туралы ақпараттық-түсіндіру жұмыстарын күшейтуі қажет: маска тағу режимі, әлеуметтік ақашықтықты сақтау керек», – деді министр А.Цой.
</blockquote>
<a href="https://24.kz/kz/zha-aly-tar/o-am/item/481771-so-y-aptada-koronavirus-zh-tyru-k-rsetkishi-4-sken">Хабар 24</a>

Қазақстанда соңғы аптада коронавирус жұқтыру көрсеткіші 4% өскен

<a href="https://kyzylorda-news.kz/">Kyzylorda-news.kz</a>. Оқиға 19 маусым күні қала орталығында орын алған. Белгісіз біреу дүкеннің терезесін сындырып, сейфтен ақша жымқырған. Жәбірленушіге 500 мыңнан астам теңге залал келтірген.
Жүргізілген жедел-іздестіру жұмыстарының нәтижесінде тәртіп сақшылары ізін суытпай күдіктіні анықтады. Ол облыс орталығының тұрғыны болып шықты. Қазіргі таңда күдікті уақытша ұстау изоляторына қамалды.
<blockquote>
 «Аталған дерек бойынша Қазақстан Республикасы Қылмыстық кодексінің 188-баптың 3-бөлігінің 3-тармағына сәйкес (Тұрғын, қызметтiк немесе өндiрiстiк үй-жайға, қоймаға заңсыз кiрумен жасалған ұрлық) сотқа дейінгі тергеп-тексеру амалдары жүргізілуде. Оқиғаның мән-жайы анықталуда», – делінген полиция департаментінің хабарламасында.
</blockquote>

Қызылордада дүкеннен 500 мың теңге ұрлаған тұрғын ұсталды

<a href="https://kyzylorda-news.kz/">Kyzylorda-news.kz</a>. Ақпарат және қоғамдық даму министрі Аида Балаева волонтерлікті дамытудың 2021-2023 жылдарға арналған жол картасы аясында қандай шаралар көзделіп отырғанын айтты.
Айтуынша, жол картасы аясында аясында бірқатар бағыт айқындалды.
<blockquote>
 “Атап айтқанда, бірінші – заңнамалық деңгейде өзгерістер енгізу. Оның аясында оқуға тапсыру мен жұмысқа орналасу кезінде жеңілдіктер қарастыру, волонтерлердің құқығы мен міндеттерін кеңейту, еріктілердің ең төменгі жас шегін белгілеу және корпоративтік волонтерлік нормалары сияқты жаңашылдықтар қарастырылған. Жария талқылаудан өткен соң заң жобасы 1 шілдеге дейін үкімет қарауына енгізіледі”, – деді Балаева үкімет отырысында.
</blockquote>
Сондай-ақ волонтерлік қызметті қолдау стандарты әзірленіп, оның негізінде мемлекеттік органдарға осы бағыт бойынша тиісті бағыт-бағдар беріледі.
Министрдің айтуынша, екінші – волонтерлік инфрақұрылым. Қазіргі таңда волонтерлер құрған республикалық және 17 өңірлік фронт-кеңсе өз жұмысын жалғастырып жатыр.
Үшінші – волонтерлік жобалар мен бастамаларды іске асыру. Жол картасы аясында жалпы сомасы 528,3 миллион теңгеге 40-тан астам жобаны іске асыру көзделген.
<blockquote>
 “Ақпарат министрлігі тарапынан 13 волонтерлік жобаға 438,6 миллион теңге бөлініп отыр. Оның аясында жануарларға жанашырлықты көздейтін “Бірге аяла”, аға ұрпақты волонтерлік қызметке шақыратын “Күміс” волонтерлік жобалары, сонымен қатар басқа да өзекті тақырыптар бойынша 130-дан астам шағын гранттар қарастырылған”, – деді министр.
</blockquote>
Балаева волонтерлік қызметті дамытуда, ең алдымен, мемлекеттік органдардың тұрақты қолдауы аса қажет.
<blockquote>
 “Алайда өкінішке қарай биыл өңірлерде қаржыландыру былтырғы жылмен салыстырғанда 4 есе төмендегені байқалады. Былтыр бұл мақсатқа 338,6 миллион теңге бөлінсе, биыл тек қана 89 миллион теңге қарастырылған”, – деді ол.
</blockquote>
<a href="http://%D0%92%D0%BE%D0%BB%D0%BE%D0%BD%D1%82%D0%B5%D1%80%D0%BB%D0%B5%D1%80%D0%B4%D1%96%20%D2%9B%D0%B0%D0%BD%D0%B4%D0%B0%D0%B9%20%D3%A9%D0%B7%D0%B3%D0%B5%D1%80%D1%96%D1%81%D1%82%D0%B5%D1%80%20%D0%BA%D2%AF%D1%82%D1%96%D0%BF%20%D1%82%D2%B1%D1%80%20%20%D3%98%D1%80%D1%96%20%D2%9B%D0%B0%D1%80%D0%B0%D0%B9%20%D0%BE%D2%9B%D1%83:%20https//sputnik.kz/society/20210622/17404777/qazaqstan-volonterler.html">Sputnik Қазақстан</a>

Волонтерлерді өзгерістер күтіп тұр

<a href="https://kyzylorda-news.kz/">Kyzylorda-news.kz</a>.&nbsp; Ауруды ерте кезеңде анықтау – оның дамуына жол бермейді. Соның ішінде онкологиялық ісіктерді ерте анықтау арқылы адам өмірін сақтап қалуға да болады. Скринингтік зерттеулер скрининг түріне байланысты ТМККК және МӘМС бойынша жүргізіледі. Әлеуметтік медициналық сақтандыру қоры скринингтердің қалай жүргізілетінін және олардан кім өтуі керегін айтты.
&nbsp;Скринингтік зерттеулер дегеніміз не?
Скринингтік зерттеулер – бұл ауруларды ерте кезеңінде &nbsp;анықтау үшін денсаулығына шағымдары жоқ адамдардың медициналық тексерілуі.
Скринингтер қоғамдық денсаулықты сақтауға бағытталған. &nbsp;Оларды өту әр азаматтың &nbsp;міндеті. «Халық денсаулығы және денсаулық сақтау жүйесі туралы» ҚР Кодексіне сәйкес, жұмыс берушілер өз қызметкерлерінің скринингтен өтуі үшін барлық жағдайды жасауға, оның ішінде адам асықпай тексерілуден &nbsp;өтуі үшін жұмыстан босатуға міндетті.
Скринингтен өту үшін пациенттің МӘМС жүйесінде сақтандырылған мәртебесі болуы қажет.
Скринингтік зерттеулерден кімдер өтуі керек?
Скринингтерді тексерулерде қарастырылған белгілі бір жас тобына кіретіндер өтеді. Мысалы, жатыр мойны обырын скринингтен 30-70 жас аралығындағы әйелдер 4 жылда 1 рет өтеді.
Егер осы жылы науқас скринингтен өту үшін тізімге енгізілсе, учаскелік медбике оны скринингке шақырады және тексеруге қалай дайындалу керектігін айтады.
Скринингке жататын ауруы бойынша «Д» есепте тұрған адамдарға тексеру жүргізілмейді.
Скринингтер&nbsp;&nbsp; түрлері, оларды қашан және кімдер тапсыру керек?
<ul>
<li>МІНЕЗ-ҚҰЛЫҚ ҚАУІП ФАКТОРЛАРЫН ЕРТЕ АНЫҚТАУҒА БАҒЫТТАЛҒАН</li>
</ul>
Мақсатты топ: 30-70 жас аралығындағы ерлер мен әйелдер. Тексеру артериялық гипертонияны, жүректің ишемиялық ауруын, қант диабетін, глаукоманы, онкопатологияны ерте анықтауға жүргізіледі.
Өту мерзімі: 4 жылда 1 рет.
<ul>
<li>АРТЕРИЯЛЫҚ ГИПЕРТОНИЯНЫ, ЖҮРЕКТІҢ ИШЕМИЯЛЫҚ АУРУЫ МЕН ҚАНТ ДИАБЕТІН ЕРТЕ АНЫҚТАУҒА АРНАЛҒАН</li>
</ul>
Нысаналы топ: артериялық гипертониямен, жүректің ишемиялық ауруымен &nbsp;және қант диабетімен динамикалық &nbsp;бақылауда тұрмайтын 40-70 жастағы ерлер мен әйелдер.
Өту мерзімі: 2 жылда 1 рет
<ul>
<li>ГЛАУКОМАНЫ ЕРТЕ АНЫҚТАУҒА АРНАЛҒАН</li>
</ul>
Мақсатты топ: глаукомамен динамикалық бақылауда тұрмайтын 40-70 жастағы ерлер мен әйелдер.
Өту мерзімі: 2 жылда 1 рет
<ul>
<li>ЖАТЫР МОЙНЫ ОБЫРЫН ЕРТЕ АНЫҚТАУҒА АРНАЛҒАН</li>
</ul>
Мақсатты топ: жатыр мойнының қатерлі ісіктерімен динамикалық бақылауда тұрмайтын 30-70 жастағы әйелдер.
Өту мерзімі: 4 жылда 1 рет
<ul>
<li>СҮТ БЕЗІ ОБЫРЫН ЕРТЕ АНЫҚТАУҒА АРНАЛҒАН</li>
</ul>
Мақсатты топ: сүт безінің қатерлі ісіктерімен динамикалық бақылауда тұрмайтын 40-70 жастағы әйелдер.
Өту мерзімі: 2 жылда 1 рет
<ul>
<li>КОЛОРЕКТАЛЬДЫ ОБЫРДЫ ЕРТЕ АНЫҚТАУҒА АРНАЛҒАН&nbsp;</li>
</ul>
Нысаналы топ: тоқ ішектің қатерсіз және қатерлі ісіктерімен динамикалық бақылауда &nbsp;тұрмайтын 50-70 жастағы ерлер мен әйелдер.
Өту мерзімі: 2 жылда 1 рет
<ul>
<li>В ЖӘНЕ С ВИРУСТЫҚ ГЕПАТИТТЕРІН ЕРТЕ АНЫҚТАУҒА АРНАЛҒАН</li>
</ul>
Зерттеудің бұл түрі келесі тәуекел топтары арасында жүргізіледі.
1. Медицина қызметкерлері:
– Қанды қайта өңдеуге қатысатын инвазивтік емшаралар жүргізетін; гемодиализбен айналысатын қан қызметі ұйымдары; &nbsp;
– хирургиялық, стоматологиялық, гинекологиялық, акушерлік, гематологиялық бейіндер, сондай-ақ диагностика мен емдеудің инвазиялық әдістерін жүргізетін; – клиникалық, иммунологиялық, вирусологиялық, бактериологиялық, паразитологиялық зертханалар;
2. Жоспарлы және шұғыл операцияларға түсетін тұлғалар;
3. Гемодиализ, гематология, онкология, транспланттау, жүрек-тамыр және өкпе хирургиясы орталықтары мен бөлімшелерінің пациенттері;
4. Гемотрансфузия, ағзаларды (ағзалардың бөліктерін), тіндерді, жыныстық, феталдық, дің жасушаларын және биологиялық материалдарды транспланттау мен ауыстырып салуды алатын пациенттер
5. Жүкті әйелдер
6. Өмір салтының ерекшеліктеріне байланысты АИТВ-инфекциясын жұқтыру қаупі жоғары халықтың негізгі топтарындағы адамдар
В және С вирустық гепатиттерін ерте анықтауға скринингтік зерттеулерден қауіп топтарының өкілдері 6 айда 1 реттен жиі өтпеуі тиіс.
Скринингтік зерттеулерді кім жүргізеді?
Скринингтерді тіркелген жері бойынша емханалар жүргізеді.
Ауылдық жерлерде тұратын пациенттер үшін олардың медициналық ұйымдарынан басқа (медициналық пункттер, фельдшерлік-акушерлік пункттер, амбулаториялар, емханалар және аудандық ауруханалар) жылжымалы медициналық кешендер мен медициналық поездар скринингтер жүргізеді.
Скринингтік зерттеулерді жүргізу кезеңдері
Скринингтік зерттеулер жүргізу мыналарды қамтиды: дайындық кезеңі, қарап-тексеру және (немесе) зерттеу кезеңі, қорытынды кезең.
Дайындық кезеңін емханада медбике жүзеге асырады және мыналарды қамтиды:
– скринингтік зерттеулерден өту қажет азаматтардың тізімін жасау;
– бұл азаматтарды скринингтік зерттеулерден өту қажеттілігі мен шарттары туралы хабардар ету;
– халықты скринингтік тексеруге шақыру;
– халықтың скринингтен уақтылы өтуін бақылау.
Содан кейін тексеру кезеңі жүргізіледі – бұл учаскелік дәрігердің, бейінді мамандардың, медбикелердің қабылдауы, сондай-ақ скринингтік зерттеу түріне байланысты зертханалық және диагностикалық зерттеулер.
Қорытынды кезең толық тексеруді және анықталған патологиясы бар адамдарды динамикалық бақылауға қоюды қамтиды. Скринингтердің нәтижелері медициналық ақпараттық жүйеге енгізіледі, ал пациент толық тексеру және бақылау бойынша ұсынымдар алады.
Қарап-тексеру барысында анықталған созылмалы аурулары бар адамдар есепке қойылады және динамикалық бақылауда болады. Жіті аурулар анықталған кезде тексеру жүргізіледі, толық сауыққанға дейін пациенттің денсаулық жағдайын кейіннен бағалау арқылы емдеу тағайындалады.
Скринингтік зерттеулер денсаулықты сақтау үшін өте маңызды, өйткені олар аурудың дамуын уақтылы анықтауға және алдын алуға мүмкіндік береді. Әлеуметтік медициналық сақтандыру қоры азаматтарды осы мүмкіндікті өткізіп алмай, емхананың шақыруы бойынша скринингтен өтуге шақырады.

Скринингтен не үшін өтеді және ол қалай жүргізіледі?

<a href="https://kyzylorda-news.kz/">Kyzylorda-news.kz</a>. 21 маусымнан бастап Қызылорда қалалық Полиция басқармасының қызметкерлері «Отбасындағы зорлық-зомбылыққа жол жоқ» акциясын жүргізуде.
Акцияның басты мақсаты халықты тұрмыстық зорлық-зомбылықтың алдын алу және жолын кесу, ана мен баланы қорғау, отбасының қоғамдағы рөлін нығайту бойынша қабылданып жатқан іс-шаралармен таныстыру.
Осыған байланысты қалалық ПБ жергілікті полиция қызметі бөлімінің әйелдерді зорлық-зомбылықтан қорғау жөніндегі топ қызметкерлерін, учаскелік инспекторларды, ювеналдық полиция бөлімінің қызметкерлерін тарта отырып, бірлескен рейдтер ұйымдастырылады.
22 маусымда әйелдерді зорлық-зомбылықтан қорғау тобының қызметкерлері түсіндірме жұмыстарын жүргізу мақсатында Қызылорда қаласы Полиция басқармасында сағат 08:30-дан 18:30-ға дейін «Ашық есік күнін» өткізетінін хабарлаймыз. Акция ағымдағы жылдың 30 маусымына дейін жалғасады.
<img src="https://kyzylorda-news.kz/wp-content/uploads/2021/06/204520444_902080017009102_5669496506595585650_n.jpg" alt="" />
<img src="https://kyzylorda-news.kz/wp-content/uploads/2021/06/203655681_902080020342435_645264146579355328_n.jpg" alt="" />

Қызылордада «Отбасындағы зорлық-зомбылыққа жол жоқ» акциясы жүргізілуде

<a href="https://kyzylorda-news.kz/">Kyzylorda-news.kz</a>. Қызылорда облысында жыл басынан бері 53019 адамға мемлекеттік әлеуметтік көмек төленді. Мұнан өзге, қаржылай көмек алушылардың қатарындағы еңбекке жарамды 1024 адам тұрақты жұмысқа орналастырылды. Бұл туралы Өңірлік коммуникациялар қызметінің ақпарат алаңында өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Мейрамбек Әбдікәрімов мәлімдеді.
<blockquote>
 «Өңірде 29 мыңнан астам көп балалы отбасы бар. Мемлекет тарапынан көп балалы аналардың беделін арттыру, мүгедектігі бар жандарды және аз қамтылған отбасыларды қолдау мақсатында жәрдемақылар мен төлемдер жүйесі қарастырылған. Яғни, жыл басынан бюджеттен 56 840 аз қамтамасыз етілген азаматқа 1638,2 млн. теңге көлемінде әлеуметтік көмек төленді», – деді Мейрамбек Жақсылықұлы.
</blockquote>
Сонымен қатар, жеке кәсіпкерлер көмекке мұқтаж 6 564 адамға қаржылай қолдау көрсеткен. Бұған қоса, 7 отбасы тұрғын-үймен қамтамасыз етілген.

Қызылордада 53019 адамға мемлекеттік әлеуметтік көмек көрсетілді

<a href="https://kyzylorda-news.kz/">Kyzylorda-news.kz</a>. Қызылорда облысы тұрғындарының 31,5 пайызы коронавирус инфекциясына қарсы екпе салдырды. Мәселен, бірінші компонентін 120 675 адам , ал екіншісін 66 603 тұрғын қабылдады. Бұл туралы Өңірлік коммуникациялар қызметінің ақпарат алаңында өткен брифингте облыстық денсаулық сақтау басқармасының басшысы Сәбит Пазилов мәлімдеді.
Бүгінде облыс бойынша 19 медициналық мекемеде індетке қарсы егу жұмыстары жүргізілуде.
<blockquote>
 «Қазіргі таңда індетті ауыздықтар бір ғана жол бар. Ол – вакцинация. Бізге алып-қашпа сөздерге еруді қойып, ұжымдық иммунитет қалыптастыруға сергектік таныту маңызды. Өзіміздің және отбасымыздың, айналамыздың қауіпсіздігін сақтаудың жауапкершілігін жіті сезінуіміз керек», – деді Сәбит Бексейітұлы.
</blockquote>
Қазіргі уақытта «Спутник V», «QazVac» және «Hayat-Vax», «Корона Вак» вакциналары қолданыста. Екпенің жеткілікті қоры барлық медицина ұйымдарында жасақталған. Егу маусымы басталғалы облысқа вакциналардың 1-компонентінен – 165 560 дозасы, 2-компонентінен 87 300 доза екпе жеткізілген. Қазіргі таңда екпенің 1-компонентінен 46 736, 2-компонентінен 21 121 доза қалды.
<blockquote>
 «Аймақта жыл басынан бері 167 мониторингтік топ 10 мыңға жуық нысанды тексерді. Нәтижесінде 325 карантин талаптарын бұзушылық анықталып, айыппұл салынды. Қазіргі таңда бірқатар шетелде және бізбен көршілес елдерде коронавирус инфекциясы қайта бас көтеруде. Ғалымдар әлемде вирус жұқтырғандардың күрт өсуіне коронавирустың Үндістанда табылған жаңа штамы да себеп болуы мүмкін деген болжам айтып отыр. Ресейде коронавирус инфекциясын жұқтыру жағдайы күн санап артуда. Санкт-Петербургте инфекция жұқтыру оқиғалары санының өскені соншалық, инфекциялық ауруханалардағы палаталар санының тапшылығы байқалуда. Ауруханадағы инфекциялық бөлімде орындар жетіспегендіктен, науқастастар еденге жатқызылуда. Бұл жағдай бізде қайталанбас үшін орай әр адам өз денсаулығы мен жақындарының өміріне аса сақтықпен, жауапкершілікпен қарауды сұраймыз», – деді облыстың Бас мемлекеттік санитариялық дәрігері Динара Жаңабергенова.
</blockquote>

Қазақстан және Қызылорда облысының жаңалықтары