<a href="https://kyzylorda-news.kz/">Kyzylorda-news.kz.</a>&nbsp;Қызылордалық кәсіпкер Жасұлан Әбілов 2019 жылдан бастап сұйық травертин өнімдер өндірісін қолға алып, қала және аудан тұрғындарының сұранысын қанағаттандыруда.
Кәсіпкер 2021 жылы «Микробизнес Қызылорда» өңірлік инвестициялық орталығы» арқылы 2 пайыздық несиелендіру бойынша 10 млн. теңге қаражатқа ие болды. Жасұлан Әбілов бұл қаражатқа цехты кеңейтуді жоспарлап отыр.
<blockquote>
 «Сұйық травертин өнімін өндіру үшін белгілі бір дағдылар қажет. Сондықтан мамандарды Алматы қаласы мен Қырғызстан еліне тәжірибе жинақтауға жібереміз,» – дейді кәсіпкер.
</blockquote>
Цехта тапсырыс берушінің сұранысына сәйкес сұйық травертин көмегімен текстураның әр түрлі түрлері дайындалады. Сәндік ерекшеліктерінің арқасында интерьерге түрлі көрініс беруге болады.
Айта кетейік, бүгінде кәсіпкерлік нысанда 6 адам жұмыспен қамтылған.
<img src="https://kyzylorda-news.kz/wp-content/uploads/2021/11/252343503_2953951088204963_5484755373717325613_n.jpg" alt="" />
<img src="https://kyzylorda-news.kz/wp-content/uploads/2021/11/252318859_2953951008204971_8391196822819993841_n.jpg" alt="" />

Қызылордалық кәсіпкер сұйық травертин өнімдерін өндіруде

<a href="https://kyzylorda-news.kz/">Kyzylorda-news.kz.</a> «Білімді ұлт» ұлттық жобасының аясында 5000 мектептің материалдық- техникалық базасы жаңартылып, қауіпсіздік шаралары күшейтіледі. Ал шалғайдағы шағын мектептерге қаладағы әлеуетті мектептер әдістемелік көмек беріп, «тәлімгер» болады. Бұл туралы ҚР Білім және ғылым министрлігі Мектепке дейінгі және орта білім комитеті төрағасының орынбасары Сапура Төлекова айтты, деп хабарлайды <a href="https://lenta.inform.kz/kz/ulttyk-zhoba-shalgaydagy-mektepterge-kaladagy-aleuetti-mektepter-talimger-bolady_a3856668">ҚазАқпарат</a>.
Жоба аясында мектепке дейінгі тәрбиенің мемлекеттік стандартын өзгерту көзделген. Министрлік өкілі осы жоспардың қала іске асатынын баяндады.
<blockquote>
 «Мемлекет басшысының тапсырмасы бойынша барлық мектепке дейінгі ұйымда бала дамуының жаңа моделі енгізіледі. «Ойын арқылы оқыту» қағидаты негізінде мемлекеттік стандарт өзгертілетін болады. Бұрынғы стандартта негізінен мектептердегі академиялық білім қамтылған. Яғни балабақшадан бастап пәндер оқытылатын. Енді жаңа стандарт бойынша балабақшада қалыптасатын дағдылардың бәрі ойын арқылы сіңіріледі. Мектепке дейінгі тәрбие дегеннің өзі балабақша мен мектепалды даярлығы деп бөлінеді. Сол мектепалды даярлықта ғана оқыту ұйымдастырылады. Оның өзі бағаланбайтын ойын түрінде жүреді», – дейді комитет төрағасының орынбасары.
</blockquote>
«Білімді ұлт» ұлттық жобасының аясында қала мен ауыл мектептерінің арасындағы сапа айырмашылығын қысқарту мақсат етіліп отыр.
<blockquote>
 «Ол үшін ең әуелі қалалар мен аудан орталықтарындағы әлеуеті мықты мектептер ауылдағы қандай да бір кедергісі бар мектептерге тәлімгер болып бекітіледі. Бұл негізі 2019 жылдан басталған болатын. Бірақ саны аз еді. Яғни мектептер арасында әдістемелік сүйемелдеу жанданады. Тәлімгер мектептер мен түрлі кедергісі бар мектептердің саны кейін нақтыланады. 2019 жылдан бері 50-дей мектеп осындай әдістемелік сүйемелдеуге тартылған», – деді Сапура Төлекова.
</blockquote>
Министрлік Ұлттық жоба аясында мектептердің әлеуетіне жеке-жеке талдау жүргізбекші. Сол үшін халықаралық PISA стандарттарын пайдалану жоспарланып отыр.
<blockquote>
 «Келесі жылы халықаралық PISA сараптамасы бойынша салыстырмалы талдаулар жүргізіледі. Осы жолы Қазақстан мектептерінде алғаш рет «Мектепке арналған PISA» деген жоба іске асады. Қазіргі PISA талдауларында жалпы Қазақстан бойынша көрсеткіштер анықталса, мұнда әр мектептің мүмкіндігі мен әлеуеті, проблемасы мен кемшілігі айқын көрінеді. Бірінші жылы пилоттық негізде 200 мектеп алынып тұр. Кейін бірте-бірте 1000 мектепке барады. Бұл да мектептердің проблемасын жеке-жеке талдап, шешімін табуға септігін тигізеді», – деді сарапшы.
</blockquote>
Сондай-ақ ол 2024 жылы 12 жылдық білім беру жүйесіне көшу жоспарланғанын еске салды.
<blockquote>
 «Оның аясында оқу бағдарламасы толығымен өзгереді. Бұл жерде білім мазмұнын қолданбалы форматқа ауыстыруға басымдық беріледі. Қазір бізде алған білімді қолданып үйрену деген мәселе кенже қалыңқырап тұр. Сондықтан 12 жылдық жүйе аясында функционалдық құзыреттілікке бағытталған білім мазмұны енгізіледі. Демек қазіргі жаттанды ереже, жаттанды формула сияқты нәрселерден сәл алшақтаймыз. Мысалы, математикадан «аудан» ұғымы оқытылса, әр оқушы үйінің еденін кафельдеу үшін қанша материал алатынын есептейді. Осы сияқты барлық пәндерді нақты өмірмен байланыстырып оқыту, пәнаралық байланысты тереңдету алға шығады. Қазіргі STEM бағыты сияқты бірнеше пәннің интеграциясы бойынша оқушылар өзіне қажетті жоба жасауға бейімделеді», – деді ведомство өкілі.
</blockquote>
Оның айтуынша, 12 жылдық білім жүйесіне көшу жергілікті бюджеттер есебінен іске асады. Ал «Мектепке арналған PISA» жобасы бойынша 200 мектепте талдау жүргізуге 213 млн теңге бөлінген.
Ұлттық жобаның тағы бір жаңашылдығы қосымша білім беруге мемлекеттік тапсырыс беру бастамасымен байланысты. Маманның сөзінше, бұл да жергілікті бюджеттен қаралады.
<blockquote>
 «Яғни жерігілкті бюджеттің мүмкіндігіне қарай бөлінеді. Қосымша білімге мемлекеттік тапсырыс аясында тегін үйірмелермен қамту биыл да іске асып жатыр. Тек оқушылар сарайы мен музыка мектептері ғана емес, түрлі дамыту орталықтары, жекеменшік би үйірмелері де конкурс арқылы тапсырысқа ие болып, орындай алады. Бұл не үшін керек? Бала робот техникасы бойынша үйірмеге қатысқысы келді дейік. Бірақ оны үйрететін мемлекеттік орталық қаланың екінші шетінде болуы мүмкін. Осындай балалар мемлекеттік тапсырыс арқылы үйіне жақын жердегі жекеменшік орталықтағы үйірмеге тегін қатыса алады. Мысалы спорттық үйірмелер бойынша айтсақ, 2020 жылы оқушылар 87 пайыз қамтылған. 2025 жылы бұл көрсеткіш 100 пайыз болуы керек», – деді Сапура Төлекова.
</blockquote>
Бесжылдық жоба шеңберінде мектептерді қауіпсіз әрі жайлы етудің нақты өлшемдері енгізілмек.
<blockquote>
 «Бұл іс екі негізгі бағыт бойынша қарастырылып отыр. Ауылдар мен шағын қалалардағы мектептердің ішінде 5000 мектепті жаңғырту қолға алынған. Оның ішіне күзетшімен, бақылау камераларымен қамту сияқты қауіпсіздік шаралары кіреді. Сондай-ақ, күрделі жөндеуден өткізіліп, заманауи пән кабинеттерімен жабдықталады. Интернетпен қамтамасыз етіп, асханаларын жаңа үлгіде жабдықтау, кітапханаларын жаңарту да бар.
 Бұл мақсатқа 2021 жылы 133 млн теңге қарастырылған. Жалпылап айтсақ, апатты және үш ауысымды мектептердің санын азайту, жаңадан ашылатын мектептерді кадрмен қамтамасыз ету, қауіпсіздік шаралары мен матералдық-техникалық базаны жаңартуға 2021-2025 жылдары 3,6 млрд теңге бөлінбек», – дейді Мектепке дейінгі және орта білім комитеті төрағасының орынбасары.
</blockquote>
Ұлттық жоба аясында ел арасында «ПМПК» деп қысқартылып айтылатын ерекше білім беру қажеттілігі бар балаларды психологиялық-педагогикалық қолдауды қамтамасыз ету үшін норматив жеңілдетілмек.
<blockquote>
 «Бұрын 60 мың балаға бір комиссия деп қарастырылса, Ұлттық жоба аясында соны 50 мың балаға 1 комиссия деп жаңарту көзделіп отыр. Яғни аймақтарда жаңа комиссиялар құрылады деген сөз. Бұл кезектерді азайтады. Қазір ерекше білім беруге мұқтаж балалардың ұзақ уақыт кезек күтуі жиілеп барады. Бұл соның алдын алу үшін жасалып отыр», – деді Сапура Төлекова.
</blockquote>

Шалғайдағы мектептерге қаладағы әлеуетті мектептер «тәлімгер» болады

<a href="https://kyzylorda-news.kz/">Kyzylorda-news.kz.</a>&nbsp; Шөлді аймақта орналасқан Қызылорда облысы жері аумағының 90%-ын сексеуілді орманды алқаптар құрайды. Бір түп сексеуіл төрт тонна құмды тоқтата алады.
Арал теңізінің құрғаған ұлтанының жалпы көлемі​ 4,5 млн. га құрайды, оның ішінде 2,2 млн. га Қазақстан аумағында орналасқан. Осы аумақтағы мемлекеттік орман қоры 768,7 мың га құрайды.
Теңізінің тартылуынан жыл сайын ауаға 75 млн. тонна тұз бен топырақ ұшып экологиялық апат тудыруда.​ Осыған сәйкес бүгінгі күні​ ​ құм мен топырақты тоқтатудың бірден бір жолы теңіздің құрғаған ұлтанында галофиттік өсімдіктерді,​ оның ішінде сексеуіл мен сарысазан өсіру екенін көрсетті.
Мемлекет Басшысының Арал теңізінің құрғаған ұлтанында алдағы 5 жыл ішінде 1,1 млн. га сексеуіл екпелерін ұлғайту жөнінде шаралар кешенін қабылдау туралы тапсырмасына сәйкес ағымдағы жылдың күз айында теңіздің құрғаған ұлтанында 100 мың га сексеуіл егу жұмыстары жоспарлануда.
Осыған байланысты, басқармаға қарасты орман шаруашылығы мекемелері сексеуіл тұқымдарын жинау жұмыстарын жүргізуде.

Биыл теңіздің құрғаған ұлтанында 100 мың га сексеуіл егу жоспарлануда

<a href="https://kyzylorda-news.kz/">Kyzylorda-news.kz.</a>&nbsp; Облыс әкімдігінің ұйымдастыруымен Достық үйінде Халықаралық «Қазақ тілі» қоғамы» қоғамдық бірлестігі облыстық филиалының есеп беру-сайлау конференциясы өтті.
Конференцияға облыс әкімінің орынбасары Серік Ахмет арнайы қатысты. &nbsp;
<img src="https://kyzylorda-news.kz/wp-content/uploads/2021/11/b4a145d1-c029-41b1-a556-8c61e850863f.jpg" alt="" />
Шараның мақсаты өңірде мемлекеттік тілдің мәртебесін арттыру бағытында қоғамның атқарған жұмыстары туралы есеп бере отырып, алдағы міндеттерді нақтылау және облыстық филиалдың басқарма мен алқа мүшелерін және төрағасын, тексеру комиссиясының құрамын, &nbsp;қоғамның кезекті VI құрылтайына делегаттар сайлау.
Мемлекет басшысының тапсырмасына орай Халықаралық «Қазақ тілі» қоғамы» қоғамдық ұйымының жұмысын жандандыру мақсатында қоғамның кезекті 6 Құрылтайы 2021 жылғы 26 қарашада Түркістан қаласында өтеді. Осыған сәйкес ұйымның қалалық, аудандық филиалдарында, бастауыш ұйымдарда жиындар болды. &nbsp;&nbsp;
Конференцияда облыстық филиалдың төрағасы Сәдуақас Аңсат есепті баяндама жасады. 7 аудан мен 2 қалалық филиалдағы 796 бастауыш ұйым 38973 адамды мүше етіп біріктіріп отыр. 2012 жылдан бері қоғамдық ұйымның жұмысы жолға қойылған, жылына 2 реттен мәжілісін өткізетін басқарма мен алқа атқарылған істерді сараптап, жұмыс жоспарын белгілейді, төрағалардың есебін тыңдайды. Осы уақытта 3 республикалық конференция өтті, әр ауданда 2 жылда 1 рет облыстық семинар-кеңес өтуде.
Қызылорда қаласында және аудан орталықтарында «Тіл сақшысы» рейді үздіксіз жүріп отырды, түрлі меншіктегі мекеме, қызмет көрсету орындарындағы маңдайшадағы жазудан бастап сыртқы жарнамадағы заңбұзушылық пен қателіктерді анықтап, ескерту жасалуда.
Облыстық филиалдың басылымы республикалық «Тіл сақшысы» газеті 2013 жылдан бастап шығуда, өз оқырманын тапқан газеттің таралымы 12000 данадан асты. Ондағы таңдаулы мақалалар «Тіл сақшысы» – Намыс қамшысы» жинағына топтасып, жылына екі кітап шығарылады. Сондай-ақ «М.Әуезов шығармалары – қазақтың қоғамдық өмірінің энциклопедиясы» конференциясы, «Қызылорда облыстық, «Қазақ тілі» қоғамының 2011-2013 жылдары өткізген іс-шарасы», «Мемлекеттік тілдің қазіргі жайы және оның қолданыс аясын арттырудағы міндеттері», «Журналист әдебі» брошюралары шығарылды.
Бұдан соң қоғамның тексеру комиссиясының төрайымы Қ.Әбділәзизованың есебі тыңдалып,&nbsp;облыстық филиалдың жаңа басқармасының, алқасының, тексеру комиссиясының құрамы мен VІ құрылтайға делегаттар сайланды.
Сонымен қатар, «Қазақ тілі» қоғамының облыстық филиалының төрағасы болып Сәдуақас Аңсат қайта сайланды.
<img src="https://kyzylorda-news.kz/wp-content/uploads/2021/11/f89602b5-a103-46f0-b2d7-aa1f1e30ff52.jpg" alt="" />
<img src="https://kyzylorda-news.kz/wp-content/uploads/2021/11/521a8311-c9f7-4b48-9086-df641388aa43.jpg" alt="" />
<img src="https://kyzylorda-news.kz/wp-content/uploads/2021/11/4aeea358-062e-4408-a52b-842e3cd89598.jpg" alt="" />

«Қазақ тілі» қоғамы» қоғамдық бірлестігі облыстық филиалының есеп беру-сайлау конференциясы өтті

<a href="https://kyzylorda-news.kz/">Kyzylorda-news.kz.</a> Қызылорда қаласында жеңіл көлік иесі жаяу жүргіншілер жолында 17 жастағы жасөспірімді қағып кетті.
Оқыс оқиға 1 қарашада Абай даңғылы мен Панфилов көшесі қиылысындағы жаяу жүргіншілер жолында болды.
<blockquote>
 «Toyota Camry автокөлігін басқарып келе жатқан 54 жастағы жүргізуші жаяу жүргіншілер өткелінен өтіп бара жатқан 17 жастағы жасөспірімді қағып кеткен. Жүргізушіге қатысты ҚР Әкімшілік құқық бұзушылық туралы кодексінің 610-бабының 2-бөлігімен әкімшілік хаттама толтырылды», – деп мәлім етті Қызылорда қалалық полиция басқармасынан.
</blockquote>
Жаяу жүргіншіге алғашқы медициналық көмек көрсетіліп, ауруханаға жеткізілген.

Қызылордада көлік жүргізушісі 17 жастағы жасөспірімді қағып кетті

<a href="https://kyzylorda-news.kz/">Kyzylorda-news.kz.</a>&nbsp; Қызылорда қаласында Ғ. Мұратбаев атындағы орталық стадионның қосалқы алаңында футболдан “Арал теңізі Кубогы” ІІ халықаралық турнирі басталды.
“Жастар “ОРМБЖМ” (Қарағанды), “СТС” (Алматы), “Қайсар — 2007” (Қызылорда), “Арал” (Арал), “БКМОФМ” (Түркістан), “Жетісу-Жаркент” (Талдықорған), “№6 ОРМБЖМ” (Қызылорда) және “Сырдария” (Тереңөзек кенті) сияқты 8 жасөспірімдер командасынан 2007 жылы туған жүзден астам спортшы жарыстың жүлделері үшін сынға түсті.
Жарыс “Aral soda” ЖШС, Қазақстан Республикасындағы БҰҰ Даму Бағдарламасы және “Қазақстанның биоалуантүрлілігін сақтау Қоры”ҚҚ демеушілігімен өтеді. Атап айтқанда, олар Арал ауданынан келген команданың қатысуына толық демеушілік жасады.
Турнирдің ашылу салтанатында Қазақстан Республикасындағы Халықаралық Аралды құтқару қорының (ХАҚҚ АД) Атқарушы Дирекциясының директоры Болат Бекнияз, облыстық дене шынықтыру және спорт басқармасы басшысының міндетін атқарушы Жағыпар Тәжмаханов, белгілі футбол ардагері Нұрлан Әбуов сөз сөйледі. Олар балаларға сәтті ойын және табысты нәтижелер тіледі.
Атап айтқанда, Б.Бекнияз өз сөзінде “Арал теңізі Кубогы” Қазақстанның, шет елдердің спорт қоғамдастығы мен жұртшылығының назарын Арал теңізінің проблемаларына аудару, сондай-ақ елдердің футбол және спорт ұйымдары арасындағы халықаралық достық қатынастарды нығайту, салауатты өмір салтын насихаттау және балалар мен жасөспірімдер арасында футболды танымал ету үшін өткізілетінін атап өтті.
<blockquote>
 2018 жылғы 24 тамызда Түрікменбашы қаласында Орталық Азия мемлекет басшылары – ХАҚҚ құрылтайшылар кеңесі жариялаған бірлескен коммюникеде өскелең ұрпақты қазіргі заманғы сын-тегеуріндер мен қауіптерді шешуге тарту және қатысу үшін су ресурстары мен қоршаған ортаны қорғау жөніндегі өңірлік жастар қозғалысының маңыздылығы туралы атап өтілді. Екінші турнирді Арал өңірінде өткізіп жатырмыз. Өткен жылы пандемияға байланысты жарыс өтпеді, ал ағымдағы жылы Ресей, Қырғызстан, Тәжікстан, Түркіменстан және Өзбекстаннан командалар келе алмады. Егер әлемдегі “КоВид-19” жағдайы тұрақтанса, келесі турнирлер Орталық Азияның басқа елдерінде келісілген кезектілік тәртібімен өтеді. Бұл балалар спорт ұйымдарының дамуына және Орталық Азия елдерінің халықаралық ынтымақтастығының одан әрі нығаюына ықпал етеді. Сондай-ақ, жеңімпаз команда Германиядағы жасөспірімдер турниріне қатысу құқығына ие болады деп жоспарлап отырмыз, — деді Б.Бекнияз.
</blockquote>
Естеріңізге сала кетейік, алғашқы турнир 2019 жылы Алматыда Тимур Сегізбаев спорт клубының стадионында өтті. Сол кезде өтіп бара жатқан “Арал теңізі Кубогын” алматылық жас қайратшылар жеңіп алды.
Клуб жетекшісі Жұмабек Сәрсенбаевтың айтуынша, “СТС” СК (Сегізбаев Тимур Санжарұлы атындағы спорт клубы) 2007-2008 жылы туылған балалардан құралған және 2018 жылдың мамыр айында құрылған.
Жаттығулар, спорт залдарын және футбол алаңдарын жалға алу, киім — кешектер мен турнирлерге шығу “AlMoBi” логистикалық компаниясының және ойыншылардың ата – аналарының демеушілігімен өтеді, – дейді Ж.Сәрсенбаев. — Үш жыл ішінде біздің тәрбиеленушілеріміз көптеген түрлі турнирлер мен ресми отандық жарыстарды, атап айтқанда, “СТС” СК — Алматы қаласының чемпионы, Қазақстан чемпионатының күміс жүлдегері, ХФЛ аясында өткізілетін “Жастар” жарыстарының жеңімпазы, халықаралық “Бағанашыл Кубогының”, балалар жаттықтырушысы А.А. Утканов Кубогының (Астана), “Алтын күз” Кубогының және т. б. иегері болды.
Қызылордадағы Турнир 7 қарашада аяқталады.
<img src="https://kyzylorda-news.kz/wp-content/uploads/2021/11/a0ae51dcbda1b3a165c59134ef7d4f22_1280x720.jpeg" alt="" />

«Арал теңізі Кубогы» ІІ халықаралық турнирі басталды

<a href="https://kyzylorda-news.kz/">Kyzylorda-news.kz.</a> Сербия астанасында өтіп жатқан бокстан әлем чемпионатында Қазақстанның он бірдей боксшысы ширек финалға өтті, деп хабарлайды&nbsp;<a href="https://sputnik.kz/">Sputnik Қазақстан.</a>
Соңғы жекпе-жектер кезінде алты қазақстандық боксшы рингке шықты. Барлығы жеңіске жетіп, ¼ финалына өтті. Серік Теміржанов (57 келі) үндістандық Рохита Мораны 4:1 есебімен жеңсе, Абылайхан Жүсіпов (67 келі) поляк Дамиан Дуркачты айқын басымдықпен жеңді.
Нұрқанат Райыс (75 келі) “Әділ мүмкіндік командасының” өкілі Сүлейман Асламиді жеңді. Бұл командаға Ауғанстандағы қарулы қақтығыс кезінде көшіп кеткен спортшылар кіреді.
Сәкен Бибосынов (51 келі) үндістандық Дипакты 5:0 есебімен ұтты.
Санатәлі Төлтаев (63,5 келі) пен Нұрбек Оралбай (80 келі) да өз қарсыластарын жеңді.
Бұған дейін Теміртас Жүсіпов (48 келі), Махмұд Сабырхан (54 келі), Саматәлі Төлтаев (60 келі) пен Асланбек Шымбергенов (71 келі) ширек финалға шыққан болатын. Бүгін барлығы жартылай финалға шығу үшін жұдырықтасады.
Айта кетері, 92 келі салмақ дәрежесінде өнер көрсететін Айбек Оралбай Өзбекстан өкілі Мадияр Саидрахимовтан ұтылып қалған. Нұрлан Сапарбай (+92 келі) бірінші айналымнан аса алмаса, Бек Нұрмағамбет (86 келі) бразилиялық Кено Мачадодан жеңілген.
Сербия астанасына 13 боксшымыз аттанды. Олар:
<ul>
<li>Теміртас Жүсіпов (48 келі);</li>
<li>Сәкен Бибосынов (51 келі);</li>
<li>Махмұд Сабырхан (54 келі);</li>
<li>Серік Теміржанов (57 келі);</li>
<li>Саматәлі Төлтаев (60 келі);</li>
<li>Санатәлі Төлтаев (63,5 келі);</li>
<li>Абылайхан Жүсіпов (67 келі);</li>
<li>Асланбек Шымбергенов (71 келі);</li>
<li>Нұрқанат Райыс (75 келі);</li>
<li>Нұрбек Оралбай (80 келі);</li>
<li>Бек Нұрмағанбет (86 келі);</li>
<li>Айбек Оралбай (92 келі);</li>
<li>Нұрлан Сапарбай (+92 келі).</li>
</ul>
Әлем чемпионатының сыйақы қоры 2,6 миллион АҚШ долларын құрап отыр.
Алтыннан алқа таққандар 100 000 долларға ие болады. Күміс медаль үшін 50 000, ал қолаға 25 000 доллар беріледі. Чемпионат 24 қазан мен 6 қараша аралығында өтеді.

Әлем чемпионатында он бірдей боксшымыз ширек финалға өтті – видео

<a href="https://kyzylorda-news.kz/">Kyzylorda-news.kz.</a> Қызылордада арнайы операция кезінде полицейлер есірткі притонын анықтады.
Қызылорда ПД Есірткі қылмысына қарсы іс қимыс басқармасының қызметкерлерімен жасырын тергеу әрекеттерін жүргізу барысында Қызылорда қаласының 68 жастағы тұрғыны өзінің тұрғылықты мекен жайында 3 сыбайласымен бірге есірткі затын қайнату арқылы «эктрациялық апиынды» дайындап, тамыр арқылы егіп, тұтыну үшін притон ұйымдастыру үстінде құрықталды.
Тергеп-тексеру кезінде күдікті сыбайластарымен бірге үйінде есірткі затын қайнату арқылы жасаған «эктрациялық апиынды» күнделікті бірнеше рет тамыр арқылы егіп қолданып жүрген. Мекен-жайына қарап-тексеру кезінде, айғақты заттар яғни есірткі заты қайнатылған ыдыс аяқтар, шприцтер заттай дәлелдеме ретінде алынды.Ұсталған күдікті өз кінәсін толық мойындады.
Аталған дерек бойынша Қазақстан Республикасы Қылмыстық кодексінің 302-бабының 1-бөлігімен (Есірткі, психотроптық заттарды, сол тектестерді тұтыну үшiн притондар ұйымдастыру немесе оларды ұстау, сол сияқты осы мақсаттар үшiн үй-жайлар беру) сотқа дейінгі тергеп-тексеру әрекеттері жүргізілуде. Күдіктіге қатысты «күзетпен ұстау» түріндегі бұлтартпау шарасы таңдалды және ол уақытша ұстау изоляторына қамалды.

Қызылордада есірткі сақтаған 68 жастағы тұрғын ұсталды

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 1853 адам адам коронавирус індетінен емделіп шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 140,
Алматы қаласы – 127,
Шымкент қаласы – 13,
Ақмола облысы – 126,
Ақтөбе облысы – 41,
Алматы облысы – 118,
Атырау облысы – 5,
Шығыс Қазақстан облысы – 263,
Жамбыл облысы – 7,
Батыс Қазақстан облысы – 215,
Қарағанды облысы – 161,
Қостанай облысы – 79,
Қызылорда облысы – 36,
Маңғыстау облысы – 109,
Павлодар облысы – 262,
Солтүстік Қазақстан облысы – 119,
Түркістан облысы – 32.
Қазақстан бойынша жазылғандар саны – 889558.

36 қызылордалық коронавирустан айықты

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 1181 адамда коронавирус індеті ПТР арқылы расталып ауырғаны белгілі болды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 145
Алматы қаласы – 145
Шымкент қаласы – 19
Ақмола облысы – 118
Ақтөбе облысы – 10
Алматы облысы – 89
Атырау облысы – 19
Шығыс Қазақстан облысы – 64
Жамбыл облысы – 13
Батыс Қазақстан облысы – 9
Қарағанды облысы – 131
Қостанай облысы – 79
Қызылорда облысы – 15
Маңғыстау облысы – 4
Павлодар облысы – 168
Солтүстік Қазақстан облысы – 137
Түркістан облысы – 16
Жалпы ел бойынша ауырғандар саны 941793.

Қызылордада коронавирус жұқтырғандар азайып келеді

<a href="https://kyzylorda-news.kz/">Kyzylorda-news.kz.</a> 2 қараша күні республиканың солтүстік-шығысында қатты жауын-шашын күтіледі, деп хабарлайды Қазгидромет.
Синоптиктердің болжауынша, Қазақстанның басым бөлігінде тұрақсыз ауа райы күтіледі – жауын-шашын (қарға ауысатын жаңбыр), екпінді жел, тұман, көктайғақ, төмен бұрқасын.
Қарашаның алғашқы күндері оңтүстік, оңтүстік-шығыс аймақтарда қатты жауын-шашын болжанады. Кезеңнің соңында, суық солтүстік-батыс антициклонның енуімен жауын-шашынның біртіндеп тоқтауы және ауа температурасының едәуір төмендеуі күтіледі – солтүстік-батыста түнгі температура 5…15 аязға дейін, солтүстікте, орталықта, шығыста 10…20 аязға дейін, оңтүстікте 3…13 аязға дейін, оңтүстік-шығыста 7-16 аязға дейін төмендейді. Қазақстанның батысында ғана жауын-шашынсыз ауа райы болжанады.

Сейсенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Қазақстанның ақпарат және қоғамдық даму министрлігі Meta (Facebook) компаниясымен келісімге келді, деп хабарлайды&nbsp;<a href="https://sputnik.kz/">Sputnik Қазақстан</a>.
Министр Аида Балаеваның хабарлауынша, министрлік Meta компаниясымен жағымсыз контентке, әсіресе, балаларға зиянды ақпаратқа қарсы тұруда өзара ынтымақтастық орнату жөнінде келісімге келді.
<blockquote>
 “Күнделікті өміріміздің ажырамас бөлігіне айналған әлеуметтік желілер адамдарға білім алу, табыс табу немесе бос уақыт өткізу сияқты мүмкіндіктер берумен қатар, қоғамға жағымсыз ақпараттың кейде тіпті қауіпті контент таратудың көзі болып жататыны жасырын емес. Біздің министрліктің ақпарат комитеті жүргізген ұзақ та тыңғылықты жұмыс нәтижесінде сәтті келісімге қол жеткіздік”, – деп жазды Балаева <a href="https://www.facebook.com/permalink.php?story_fbid=5057539114270210&id=100000425144626">Facebook</a> парақшасында.
</blockquote>
Енді Қазақстанда “Контентті хабардар етудің ішкі жүйесі” (“Content Reporting System” (CRS) тікелей қолжетімді болады.
<blockquote>
 “Оның негізінде министрлік Facebook компаниясының ішкі саясатына, сондай-ақ біздің ұлттық заңнама талаптарына қайшы келетін контенттерді компанияға жедел хабарлай алады”, – деді министр.
</blockquote>
Министрдің сөзінше, Қазақстан Орталық Азия мемлекеттері ішінде CRS жүйесіне кіруге рұқсат берілген алғашқы ел. Қазір Meta компаниясының контент саясатына жауап беретін халықаралық командасымен байланыс толық жолға қойылды.
Айта кетері, қазан айының соңында Facebook атауын Meta деп ауыстырды. Бұл туралы компанияның негізін қалаушы Марк Цукерберг хабарлады.
Министрліктің хабарлауынша, 28 қазанда Facebook командасы министрліктің мамандарына “Контентті хабарлау жүйесін”, сондай-ақ Facebook контент саясаты және қоғамдастық стандарттары бойынша жұмыс бойынша тренинг өткізді. Осы айдан бастап министрлік жүйеде жұмыс істей бастайды.
Екі тарап министрлікпен түрлі аспектілер бойынша тығыз жұмыс істейтін Facebook өңірлік офисінен уәкілетті өкілді анықтау туралы келісімге келді.
Министрлік “Контентті хабарлау жүйесін” пайдалану Facebook және Instagram платформаларында құқыққа қарсы контенттің таралуына қарсы іс-қимыл бойынша жүргізіліп жатқан жұмыстың жеделдігін және жалпы тиімділігін арттыруға мүмкіндік беретініне сенім білдірді.

Қазақстан және Қызылорда облысының жаңалықтары