<a href="https://kyzylorda-news.kz/">Kyzylorda-news.kz.</a>&nbsp;Қазақстан президенті Қасым-Жомарт Тоқаев Дүниежүзілік денсаулық сақтау ұйымы арнайы сессиясының ашылу салтанатында сөз сөйледі.
<blockquote>
 «ДДСҰ-ға мүше барлық мемлекет пен денсаулық сақтау жүйелері ауыр дағдарысты бастан кешіріп жатыр. Бүкіл әлемге жылдам тарала бастаған коронавирустың жаңа түрінен алдағы апталарда COVID-19 жұқтырғандар көбейеді. «Омикронды» Оңтүстік Африка зерттеушілері анықтады және ол жаңа жаһандық қауіп-қатер», – деді Қасым-Жомарт Тоқаев.
</blockquote>
Мемлекет басшысының пікірінше, пандемия халықаралық ынтымақтастықтың көптеген кемшілігін ашып берді. Айтуынша, пандемия ниеттестікке негізделген және биологиялық сын-қатерлерді еңсеру жүйесіне қарағанда әлдеқайда тиімді жаңа жаһандық тәсіл қажет екенін растады.
Президент елдер «өздерін вирус алдында әлжуаз еткен» барлық түсініспеушілікті еңсеруі керек екенін мәлімдеді.
Тоқаев ДДСҰ-ның жаңа қауіп-қатерлерге дайындық пен әрекет етуін күшейтуге арналған конвенция құру идеясын қолдайтынын атап өтті.
<blockquote>
 «Қазақстан ДДСҰ-ны біздің үкіметтің жақсы, сенімді серіктесі ретінде қолдайды. Біз бас директор, доктор Тедростың (Гебреисус, ДДСҰ басшысы)&nbsp;осы індетке қарсы күреске қосқан оң үлесін бағалаймыз», – деді Тоқаев.
</blockquote>
Презденттің сөзінше, дағдарыс елдік деңгейде және ұлттық денсаулық жүйелерінде құрылымдық кемшіліктерді ғана емес, жаһандық деңгейде&nbsp; жүйелі теңсіздік барын көрсетті.
<blockquote>
 «Сол себепті Қазақстан бәріне бірдей қолжетімділікті қолдайды. ДДСҰ-ның 2022 жылдың ортасына қарай вакцинациямен қамту стратегиясын құптайды. Біз өз тарапымыздан «дельтаға» қарсы QazVac вакцинасын әзірледік. Біз вакцинаны өз елімізде тиімді пайдаланып қана қоймай, Орталық Азияның басқа елдеріне де мүмкіндік беріп жатырмыз», – деді мемлекет басшысы.
</blockquote>
Ол әлемдегі әр адамның денсаулығы бүкіл елдің ортақ қауіп-қатерге қарсы үйлескен күресіне байланысты екенін айтты.
<blockquote>
 «Барлық елді ДДСҰ басшылығымен мақсаттарға қол жеткізу үшін күш-жігер біріктіруге шақырамын», – деп түйіндеді Тоқаев.
</blockquote>

Мемлекет басшысы: «Омикрон» жаңа жаһандық қауіп-қатер

<a href="https://kyzylorda-news.kz/">Kyzylorda-news.kz.</a>&nbsp;Қазақстанда коронавирустың омикрон деп аталатын жаңа штамының пайда болу қаупі бар. Бұл туралы Алматы қаласы бас санитарлық дәрігерінің орынбасары Сәдуақас Байғабылов мәлімдеді.
Маманның айтуынша, бұрын анықталған барлық COVID-19 қоздырғыштары адамнан адамға ауа тамшылары арқылы тарады. Ал соңғы кездері әлем елдері арасында әуе қатынасы біртіндеп қалпына келіп жатыр. Бұл инфекцияның біздің елге келуіне жанама себеп болуы мүмкін. 24 қарашада Африканың оңтүстігінде – Оңтүстік Африка мен Ботсванада жаңа коронавирус мутагені анықталды.
Сарапшылардың пайымдауынша, бұл COVID-19-дың кез келген басқа штамдарынан, тіпті дельта штамынан да қауіпті болуы мүмкін. Жаңа қоздырғышта 32 мутация бар, олардың кейбіреулері штамның жоғары таралу қабілетін және вакциналарға төзімділігін көрсетеді. 26 қарашада Израильде Африканың Малави елінен оралған адамда алғаш рет коронавирустың омикрон атты жаңа штамы табылды. Дүниежүзілік денсаулық сақтау ұйымы коронавирустың жаңа штамын зерттеуге бірнеше апта қажет екенін айтты. Бірақ қазірдің өзінде сарапшылар омикрон вакциналарға төзімді және тезірек таралуы мүмкін деп болжап отыр.
<blockquote>
 «COVID-19-дың штамдары негізінен ауа арқылы таралатынын ескерсек, жаңа штамдары басқа елдерге сөзсіз таралады. Демек, қауіп бар. Сонымен бірге жаңа штамдарды вакцина алмаған адамдар жұқтыруда. Сондықтан аурудың алдын алудың басты жолы коронавирус инфекциясына қарсы екпе алу. Алматы қаласында коронавирус инфекциясын жұқтыру күн сайын төмендеуде. Эпидемиологиялық ахуал тұрақтанып келеді. Сондықтан қазіргі уақытта Алматы қаласында омикрон штамының белгілері байқалмайды», – деді Алматы қаласы Бас санитарлық дәрігердің орынбасары Сәдуақас Байғабылов.
</blockquote>
<a href="https://24.kz/kz/zha-aly-tar/o-am/item/513118-omikron-shtamy-aza-stan-a-zhetui-m-mkin-be">24 kz</a>

Омикрон штамы Қазақстанға жетуі мүмкін бе?

<a href="https://kyzylorda-news.kz/">Kyzylorda-news.kz.</a> Қызылорда облысының әкім Гүлшара Әбдіқалықова Сыр жұртшылығын Дала Академигі, ақ күріштің атасы, екі дүркін Социалистік Еңбек Ері Ыбырай Жақаевтың 130 жылдық мерейтойымен құттықтады.
Тәуелсіздігіміздің 30 жылдық мерейлі жылымен қатар келген Дала Академигі, ақ күріштің атасы, екі дүркін Социалистік Еңбек Ері Ыбырай Жақаевтың 130 жылдық мерейтойы баршаңызға құтты болсын!
Даңғайыр диқан, әлемдік рекордтың иесі Ыбырай Жақаев әлемге қазақтың еңбекте де ересен зор табысқа жете алатын жұрт екенін дәлелдеп кетті. Туған жер төсіне қайың кетпенімен ерлікке тән еңбек дастанын жазып қалдырды.
Жыл басынан бергі мерейтойға арналған шараларды қорытындылау есебінде «Қазақстанның күріш шаруашылығын дамыту перспективалары» тақырыбында халықаралық ғылыми-тәжірибелік конференция өткіздік.
Конференцияға Ресей Федерациясынан келген ауылшаруашылығы ғылымдарының докторы М.А.Ладатко мен Өзбекстан Республикасынан келген ауылшаруашылығы ғылымдарының кандидаты Е.П.Садықов күріш өндірісіне байланысты өз тәжірибелерімен бөлісіп, мамандарымыздың қызығушылығын тудырды.
Сондай-ақ, ел, өңір ғалымдарының баяндамаларында айтылған Қызылорда облысына қатысты өзекті мәселелер, тың ойлар мен құнды пікірлердің барлығы Сыр өңірінің одан әрі дамуына, алға қарай қарқынды ілгерілеуіне үлес қоса беретініне сенемін.
Дала академигі, екі дүркін Социалистік Еңбек Ері Ыбырай Жақаев атамыздың ең алдымен еңбек, содан соң еңбек, тағы да еңбек деген сөзі жалпыға бірдей еңбек қоғамын қалыптастыруда, жас ұрпақты еңбекке баулуда ең басты тәрбие бола берері сөзсіз.
Ақ күріштің атасы Ыбырай Жақаевтың өнегелі өмірі, еңбекқорлығы мен қажырлы қайраткерлігі, жарқын бейнесі халқының есінде мәңгі сақталады.

Аймақ басшысы қызылордалықтарды құттықтады

<a href="https://kyzylorda-news.kz/">Kyzylorda-news.kz.</a>&nbsp;Бүгін Қорқыт Ата атындағы Қызылорда университетінің Студенттер сарайында облыс әкімі Гүлшара Әбдіқалықованың төрағалығымен ақ күріштің атасы, екі дүркін Социалистік Еңбек Ері Ыбырай Жақаевтың 130 жылдық мерейтойына арналған ғылыми-тәжірибелік конференция өтті.
Жиынға Қазақстан Республикасы Парламенті Сенатының депутаты Мұрат Бақтиярұлы және Қазақстанның Еңбек Ері Абзал Ералиев, Ыбырай Жақаевтың ұлы, еңбек ардагері Сейітбек Жақаев, Ресей Федерациясының, Қазақстан және Өзбекстан Республикаларының белгілі ғалымдары, аймағымыздың атақты еңбек ардагерлері мен ауылшаруашылық құрылымдарының өкілдері қатысты.
Конференцияда аймақ басшысы «дала академигі» Ыбырай Жақаевтың күріш дақылын өсіру, оны күтіп-баптау ісіне қосқан еңбегін ерекше атап өтіп, Ыбырай Жақаевтың еңбегін бүгінгі күні ізбасарлары жаңғыртып келе жатқанын тілге тиек етті.
<blockquote>
 «Ежелден тарихы бай Сыр өңірінде елі мақтан етер біртуар тұлғалар жетерлік. Солардың арасынан даңғайыр диқан Ыбырай Жақаев әлемге қазақтың еңбекте орасан зор табысқа жете алатының дәлелдеп кетті. Туған жер төсіне қайың кетпенімен ерлікке тән еңбек дастанын жазып қалдырды. Ақ күріштің атасы атанған Ыбырай Жақаевтың кеңестік кезеңдегі еңбек адамына берілетін ең жоғары марапат – Социалистік Еңбек Ері атағын екі дүркін иеленуі, Мемлекеттік сыйлықтың лауреаты атануы қарапайым еңбек адамын бағалаудың үлгісі болды», – деді облыс әкімі.
</blockquote>
ҚР Парламенті Сенатының депутаты Мұрат Бахтиярұлы іс-шараға қатысушыларды құттықтап, конференция жұмысына сәттілік тілеп, еңбек адамдарының мәртебесін арттыру ісіне қатысты ұсыныстарын жеткізді. 
Конференция барысында Қазақ күріш шаруашылығы ғылыми-зерттеу институтының басқарма төрағасы Қамбарбек Мүбараков «Қазақстанның күріш шаруашылығын дамыту перспективалары» тақырыбында баяндама жасады.
Сондай-ақ, Ресей Федерациясының Күріш федералды ғылыми орталығының профессоры, ауылшаруашылық ғылымдарының докторы Максим Ладатко мен Өзбекстан Республикасындағы Қарақалпақ дәнді және дәнді-бұршақты дақылдар Ғылыми зерттеу институтының ғылыми тәжірибе станциясының ауылшаруашылығы ғылымдарының кандидаты Есбосын Садықов өңірлеріндегі күріш өсіру бойынша селекциялық жұмыстар барысы мен осы бағыттағы өзара әріптестік мүмкіндіктерін таныстырды.
Шарада Қазақ егіншілік және өсімдік шаруашылығы Ғылыми зерттеу институтының басқарма төрайымы, ауылшаруашылығы ғылымдарының кандидаты Шолпан Бастаубаева елімізде мал азықтық дақылдарын өсірудің озық технологияларын сөз етсе, Қазақ жеміс-көкөніс шаруашылығы Ғылыми зерттеу институтының басқарма төрағасы, ауыл шаруашылығы ғылымдарының докторы, ҚР Ұлттық Ғылым Академиясының академигі Теміржан Айтбаев картоп және көкөніс бақша салаларын дамыту және қолдау шараларын тізбектеді. Мұнан кейін, Қорқыт Ата атындағы Қызылорда университетінің профессоры, ҚР Ауыл шаруашылығы ғылым академиясының академигі Серікбай Өмірзақов Арал өңірінің су шаруашылығы саласындағы проблемаларды шешу жолдарын, ал Қазақ топырақтану және агрохимия Ғылыми зерттеу институтының басқарма төрайымы Раушан Рамазанова Қызылорда облысының топырақ құнарлылығын арттыру жолдарын саралады. Сондай-ақ, Ж.Жиембаев атындағы Қазақ өсімдіктерді қорғау және карантин Ғылыми зерттеу институтының төрағасы Бақытжан Дүйсембеков күріш дақылының ауыспалы егістігінде зиянды организмдерге қарсы өсімдік қорғау шараларын тиімді қолдану технологияларына талдау жасап, аймағымызда барлық ауылшаруашылық дақылдарын өсіруге мүмкін деп тұжырым жасаса, «Өндірістік микробиология» жауапкершілігі шектеулі серіктестігінің директоры Ерік Шорабаев ауыл шаруашылығы саласында қолданылатын биологиялық препараттары туралы баяндады.
Іс-шара соңында облыс әкімі бірқатар сала үздігі мен егін шаруашылығы мәселелерін зерттеп жүрген ғалымдарға Ыбырай Жақаевтың 130 жылдығына арналған арнайы төсбелгіні табыстады. 
Айта кетейік, өңірімізге даңғайыр диқан мерейтойын атап өтуге арнайы келген қонақтар облыс орталығындағы Ы.Жақаев атындағы Қазақ күріш шаруашылығы институтының жұмысымен танысады. Сондай-ақ, іс-шара аясында атақты күрішшінің ескерткішіне гүл қою рәсімін өткізілді.
Еске салсақ, осыдан 5 жыл бұрын даңқты диқанның 125 жылдық мерейтойы аясында Ыбырай Жақаев атындағы күріш өсіру тарихы мұражайының жаңа ғимаратының құрылысы салынды. Мұражайда Ыбырай атамыздың кезінде тұтынған жеке заттары мен еңбекте өзіне серік еткен кетпен, соқа, орақ, шалғы басқа да құнды дүниелері қойылған. Сондай-ақ, «Ақ күріштен тау тұрғызған Нар тұлға», «Дән патшасы, ақ күріштің атасы – Ыбырай», «Тұғырда тас мүсін емес, тарих жатыр» тақырыптарында көптеген іс-шаралар ұйымдастырылды.
Мұнан бөлек, Қызылорда облысында «Жақаев ізбасарлары» деген атаумен танылған азаматтардың жалғасы ретінде жастардан құрылған «Жақаевшылар ізбасарлары» қозғалысы ауылдық ұжымдарда еңбек етуде.
<img src="https://kyzylorda-news.kz/wp-content/uploads/2021/11/262211434_195614956093090_2014994284878088672_n.jpg" alt="" />
<img src="https://kyzylorda-news.kz/wp-content/uploads/2021/11/262513794_195614346093151_5288324769153124321_n.jpg" alt="" />
<img src="https://kyzylorda-news.kz/wp-content/uploads/2021/11/262291208_195614642759788_2717264077264441606_n.jpg" alt="" />
<img src="https://kyzylorda-news.kz/wp-content/uploads/2021/11/262300026_195614566093129_7294866564963497483_n.jpg" alt="" />
<img src="https://kyzylorda-news.kz/wp-content/uploads/2021/11/262603395_195614812759771_2930654642715180052_n.jpg" alt="" />

Гүлшара Әбдіқалықова: Ыбырай Жақаевқа берілген марапат қарапайым еңбек адамын бағалаудың үлгісі болды

<a href="https://kyzylorda-news.kz/">Kyzylorda-news.kz.</a> 29 қараша күні түнгі сағат 03:58-де Сырдария өзенінің Қызылорда қаласы Рисмаш шағын ауданы маңындағы бөлігіне автокөлік түсіп кетті. Көлікте 2 адам болған. Бұл туралы облысы Төтенше жағдайлар департаментінің баспасөз қызметі хабарлады.
<blockquote>
 «Хабарлама келіп түскеннен соң су асты іздестіру жұмыстары басталды. «DAEWOO NEXIA» автокөлігінде 2 адам болған. Жолаушы 1994 жылы туған азамат өз күшімен сыртқа шыққан. Көлік жүргізушісі 1994 жылы туған азамат автокөлік ішінен шыға алмай қалған. Сағат 09:22-де автокөлік судан шығарылып, жүргізушінің денесі туыстарына тапсырылды», – делінген хабарламада.
</blockquote>
Су астындағы іздестіру жұмыстарына 17 құтқарушы 4 техникасымен, 1 жүзу құралымен атсалысты.
Департамент қызметкерлері автокөлікте барынша қауіпсіздік ережесін сақтап, жолда сақ болуды, мүмкіндігінше түнде жолға шықпауды сұрайды.
<img src="https://kyzylorda-news.kz/wp-content/uploads/2021/11/262694847_1891980071010835_7817363270297021905_n.jpg" alt="" />

Қызылордада дарияға жеңіл көлік батып кетті

<a href="https://kyzylorda-news.kz/">Kyzylorda-news.kz.</a>&nbsp; Қазақстанда 1 желтоқсаннан 28 ақпанға дейін жазғы дөңгелекпен жүрген жүргізушілерге айыппұл салынады.
Айыппұл көлемі&nbsp;– 5 АЕК. Бұл – 14 585 теңгені құрайды.
Елде бірнеше жыл бұрын қыс мезгілінде жазғы дөңгелекпен жүруге тыйым салынған. Айыппұл қыстың тек үш айында ғана арналған, қалған уақытта ескертумен шектеледі.
Сонымен қатар, көлік иесі доңғалақты ауыстырғанға дейін мемлекеттік нөмірінен айырылуы мүмкін.
Қазақстанда сыртында тау шыңының, ал ішінде қар түйіршіктерінің белгісі бар және “М+S”, “M&amp;S”, “M S” белгілерімен таңбаланған шиналар “жарамды” қысқы шина болып есептеледі.

Жазғы дөңгелекпен жүргендерге айыппұл салынады

<a href="https://kyzylorda-news.kz/">Kyzylorda-news.kz.</a> Жыл басынан Қызылорда облысы Полиция департаментінің Жедел басқару орталығының “102” арнасына 40 мыңға жуық қоңырау келіп түсті және олардың барлығына &nbsp;тиісті&nbsp; қызмет көрсетілді.&nbsp;
Бейнебақылаушылар азаматтардан келіп түскен хабарламаларды қабылдау және өңдеу барысында аймақтағы&nbsp; ахуалды қадағалап, құқыққа қарсы әрекеттерді анықтау және алдын алу бағытында қызмет атқарады.
<blockquote>
 «Бейнекамералар көлік қозғалысының жүрісін жедел бақылап, қауіпті жағдайлардың алдын алуға және құқық бұзушылықтың ізін суытпай анықтауға ықпал етеді.&nbsp; Сонымен қатар, полиция жұмысының тиімділігінің артуына және қылмыстың жедел ашылуына тиер көмегі зор. Мәселен, жыл басынан&nbsp; Жедел басқару орталығының бейнебақылау камераларының&nbsp; көмегімен&nbsp; 109 қылмыс ашылды» дейді Қызылорда облысы Полиция департаментінің бастығы полиция полковнигі Сұлтан Бектөре.&nbsp;&nbsp;
</blockquote>
Айта кетейік, жыл басынан бері бейнебақылау камераларының көмегімен 21 мыңнан &nbsp;астам әкімшілік құқық бұзушылық, оның ішінде 17 мыңнан астам жол қозғалысы ережелерін бұзу деректері анықталды.&nbsp;&nbsp;&nbsp;&nbsp;
<img src="https://kyzylorda-news.kz/wp-content/uploads/2021/11/img_6084-scaled.jpg" alt="" />

Қызылордада бейнекамералардың көмегімен 109 қылмыс  ашылды

<a href="https://kyzylorda-news.kz/">Kyzylorda-news.kz.</a> Бүгін облыс әкімі, «Nur Otan» партиясы Қызылорда облыстық филиалының төрағасы Гүлшара Әбдіқалықованың қатысуымен 1 желтоқсан – ҚР Тұңғыш Президенті күніне орай «Nur Otan» партиясының қатарына салтанатты қабылдау шарасы өтті.
Аймақ басшысы мерекеге орай құттықтауын жеткізіп, партияның үлкен саяси ұйым екенін атап өтті.
<blockquote>
 1 желтоқсан – «Қазақстан Республикасының Тұңғыш Президенті күні» мерекесімен құттықтаймын! Бұл күн – елді егемендікке жеткізген Ұлт Көшбасшысы Нұрсұлтан Әбішұлы Назарбаевқа 1991 жылы халқымыздың ел тізгінін ұстатқан күні. 
 Ел мен Елбасы ұғымы егіз десек, Тұңғыш Президентіміздің «Nur Otan» партиясының бүгінгі күні ел тағдырына жауапты ең басты саяси күшке айналуына да еңбегі зор. Ел дамуымен қатар келе жатқан 20 жылдан астам уақытта партиямыз Ұлт Көшбасшысының саясатына берік ұстанымын танытып, Тәуелсіз Қазақстанның экономикалық, әлеуметтік, рухани дамуын қамтамасыз етуші үлкен саяси ұйымға айналды. 
 Бүгінгі салтанатты шарада партия қатарына жаңадан қабылданушыларға үлкен жауапкершілік жүктеумен қатар, алдағы жұмыстарды атқаруға мол күш-қуат берері сөзсіз. Қатарымызға жаңадан қосылып жатқан азаматтар партияның сенімді саяси жасағы ретінде, мықты партияның – мықты лидерлеріне айналады деп сенім білдіремін, – деді Гүлшара Әбдіқалықова.
</blockquote>
Салтанатты шарада облыс әкімі әр салада қызмет етіп жүрген «Nur Otan» партиясының қатарына қабылданушы 10 азаматқа партиялық билетті табыстады.
Сондай-ақ, «Nur Otan» партиясының мақсаттары мен міндеттерін орындауда белсенділік танытқан 10 партия мүшесі Алғыспен марапатталды.
Жиында облыстық қоғамдық кеңес төрағасы, қоғам қайраткері Бақберген Досманбетов Тәуелсіздіктің құндылығы туралы сөз сөйлеп, Қызылорда қаласындағы Назарбаев Зияткерлік мектебінің баспасөз хатшысы Елена Рыбина елдігіміздің мызғымас тұғыры – бірлік пен келісім туралы пікірін білдірді.
Ал, Қорқыт Ата атындағы Қызылорда университеті журналистика факультетінің 2 курс студенті Жамбыл Бақытәлі «Прагматизм – білім, бәсекеге қабілетті болудың кепілі, Елбасының қандастарға деген қамқорлығы туралы» ойын ортаға салып, жыр шумағымен құттықтауын жеткізді.
Шара соңында Арал ауданындағы келісім кеңесінің төрағасы, Арал ауданының құрметті азаматы Нұралы Оспанов, Қармақшы ауданының құрметті азаматы, жырау Бидас Рүстембекұлы мен Шиелі ауданы, «Ақмая» шаруа қожалығының басшысы Дәулет Жұмбеков онлайн байланыс арқылы қосылып, Елбасының Аралға деген қамқорлығы, ұлттық мәдениет пен салт-дәстүр және бақуатты өмірдің кілті – еңбек туралы пікірлерін білдірді.
<img src="https://kyzylorda-news.kz/wp-content/uploads/2021/11/262172440_195566786097907_7474828916907767052_n.jpg" alt="" />
<img src="https://kyzylorda-news.kz/wp-content/uploads/2021/11/262167670_195566669431252_808300744340550028_n.jpg" alt="" />
<img src="https://kyzylorda-news.kz/wp-content/uploads/2021/11/262445498_195566752764577_2222675965196006593_n.jpg" alt="" />

Облыс әкімі «Nur Otan» партиясына өткен азаматтарға партиялық билетті табыстады

<a href="https://kyzylorda-news.kz/">Kyzylorda-news.kz.</a>&nbsp; 2020 жылдың көктемі бұрынғыдан өзгерек басталды. Жер Ана көкке малынғанымен, адамзаттың басына қара бұлт үйірілді. Күн жадырап шыққанымен, көше тастанды қаланың күйін кешті. Қар еріп, жылғалап аққан су, көктемгі егінге дайындықты ойлауға емес, алдағы күннің не боларын болжай алмайтын халге жетті, Қызылорданың көңіл күйі қыстың ызғарынан да қатал күйге енді.
Әлемді коронавирус жайлап, пандемия жарияланды. Күн сайын өлім саны көбейіп, мыңдаған адам індеттің құрығына түсіп, төсекке таңылды. Жақынының қазасына жете алмаған жұрт, пәтерінен шыға алмай қалған тұрғын, дәрменсіз күй кешкен халық сансырап қалды. Балалар бақшаға, оқушылар мектепке бармады. Үйге қамалған баланың ермегі ұялы телефон болды, сабағы ватсаппен беріліп, қосымшасы Білім лендпен оқытылды. Баланың жаны жабырқамасын деп бабын табуды ойлана бастадық. Тығырықтан шығар жол іздедік. Оқушының онлайн білім алуына, ата-ананың қашықтықтан жұмыс істеуіне мүмкіндіктің қажеттігі туды. Жан-жақты саралай келе, мүмкіндіктерін зерделей отырып, байланыс желілерін жілікше шақтық. Тоқтам біреуіне тоқталды. Көпшіліктің сұранысына сай, «Қазақтелеком» таңдалынды. Менің отбасымның да таңдауы осы болды.&nbsp;&nbsp;
*** &nbsp;&nbsp;&nbsp;
– Қайырлы күн, «Қазақтелеком» тыңдап тұр. Қандай көмегіміз қажет?
– Сәлеметсіз бе, мен Сіздердің қызметтеріңізді пайдаланып, үйіме интернет желісін орнатсам деп едім.
– Әрине, қуаныштымыз. Елімізде жайлаған індетке байланысты «Қазақтелеком» АҚ қызметтерін қосуға ниеттенген жаңа тұтынушылардың рекордтық саны өтініш білдіріп жатыр. Сіздердің қауіпсіздіктеріңіз үшін қызмет көрсету желісінің нүктелерін уақытша жауып, онлайн қызмет көрсетудеміз. Ол үшін тапсырыс жасасаңыз болады.
–&nbsp; Тұтынушылар көп болса, менің өтінішімнің орындалмауы да мүмкін бе?
– Әрине, жоқ. Өтініштер көп түскенімен, ешқайсысы да жауапсыз қалмайды. Міндетті түрде, тексеріп, бар мүмкіндікті жасаймыз.
– Рақмет.
***
– Анашым, бұл нее? – деп тұтқасын тосырқай ұстап, телефонды төңкере қарап шыққан 7 жасар қызымның таңқалып қойған алғашқы сұрағы осы болды.
Баламның сұраулы жүзіне қарап, асықпай түсіндіруге тырыстым. Бір ойым болса, балалық пен жастық шақты шарлап кетті. &nbsp;Көз алдымнан ата-ана, бауырмен телефон арқылы жөн сұрасып, бір бөлмеден келесі бөлмеге шұбатылған сымын сүйретіп жүрген кездер, алыс-жақын елдермен байланысу үшін тұрған ұзын-сонар кезек еске түсті.
***
Иә, жылдармен бірге жаңашылдықта еніп келеді. Байланыс құралдары да өзгерді. Көш бастаған мемлекеттермен бірге цифрлық технологиялар дами түсті.
Індеттің ылаңы өткенді еске салды. Осындайда бүгінгіні пайымдау арқылы ертеңгіге сенімділік берді. Халық абдырамай, жұмыс істеудің жолын іздеді. Мен секілді «Қазақтелекомды» таңдағандар саны өткен жылдың наурызынан бастап жыл соңына дейін 4600 өтініш білдірген. Яғни……..
Расымен, жұмыс, оқу онлайн режимге көшіп, байланыс қызметтеріне сұраныс артты. “Карантиндік” айларда “Қазақтелеком” қызметтеріне қосылулардың негізгі көлемі кең жолақты қолжетімділік қызметтеріне қатысты болды, себебі бір пәтердің ішінде тіркелген бір модемге қанша гаджетті қосуға болады, және бұл ұялы құрылғыдан Интернетті таратуда сигнал сапасы тұрғысынан арзан әрі сенімді еді.
Жалпы, телекоммуникация қызметтерін қосуға ниет білдірген азаматтардың өтініштері өңірлік қызмет көрсету желілері мен белсенді сауда орталықтарында қаралды, содан кейін 24 сағат ішінде Телекоммуникация желілерін дамыту орталығының мамандары абоненттерге қосылған қызметтердің техникалық мүмкіндігін және қосылуын анықтады. Қызметкерлердің айтуынша, бұрын екі-үш айдың ішінде атқарылатын жұмыс көлемі жанкешті еңбектің арқасында бір айда тез бітіп жатты. Жоғары кәсібиліктің нәтижесінде «Қазақтелеком» еш тығырықсыз жұмысын реттеді, абоненттерінің де ақпараттық вакуумда қалып қоймауы үшін қолдан келгеннің бәрін жасады.
«Қазақтелекомдықтар» медицина саласына да қол ұшын созды. Вируспен бетпе-бет кездесіп, алғы шепте аурумен алысқан медицина саласы қызметкерлеріне жақсылығын аямады. Айлап үй бетін көрмей, бастарын қатерге тіккендерді ынталандыруға күш жұмсады. Пандемия кезінде Қазақтелеком бес мыңнан астам қазақстандық дәрігерді тегін ұялы байланыс және интернетпен қамтамасыз етті. Бұл бастама 90 күнге жалғасты.
Осы орайда, айта кету қажет, жақсылықтың жалғасы ретінде «Қазақтелеком» іске қосқан «Онлайн-медицина» қызметі де көп көмегін тигізуде.
Басқарма төрағасы Қуанышбек Есекеевтің «Фейсбук» әлеуметтік желісіндегі жеке парақшасында жазған мәліметіне сүйенсек, аталмыш қосымшаны тұрақты қолданушылар қатары бүгінде 50 000-нан асқан екен. Онда «осы статистиканың өзі қосымшаның халық арасында өзекті екендігін көрсетеді. Оны пайдалану өте қарапайым. Бар болғаны, тіркелуге сұранысты telecom.kz порталына қалдырып, қосымшаны телефонға жүктеп алу. Осыдан кейін бірден қажетті дәрігердің кеңесін ала беруге болады. Басқаша сөзбен айтқанда, қосымшаны жүктеу арқылы, дәрігерді қалтаңызға салып аласыз. Мұндай қызметтің қажеттілігі әсіресе былтырғы пандемия кезінде қатты білінгенін айтқым келеді. Коронавируспен күрес кезінде көптеген мемлекеттік және жеке ауруханалар да карантинге жабылып, «қатардағы» науқастар әп-сәтте кімге жүгінерін білмей, айдалада қалғандай күй кешті. Бұл қызмет түрі әсіресе ауыл халқы үшін пайдалы екені белгілі. Қазіргі кезде Қазақстандық мықты дәрігерлермен келіссөздер жүргізіліп жатыр», – делінген екен.
Жақында «Онлайн-Медицина» қазақ тілінде де қызмет көрсететіні қуантады.
Шалғай ауылдарда да «оптика» келгелі тірлігі жанданып жатыр. Қаншама ай күтіп, қанша уақытын босқа өткізетін күндер артта қалды. Интернет деген заманның сиқырлы желісі санаулы сәтте меселіңді қайтармай, мәселеңді шешіп беріп, жұмысты жеңілдетіп жіберді.
Өздеріңізге белгілі, «Қазақтелеком» ауылдарға талшықты-оптикалық байланыс желісін тарту жұмыстарын 2018 жылы бастап, екі жыл бойы тоқтаусыз жүргізді. Былтыр желтоқсанда жоба бойынша жоспарланған ең соңғы нүктені Түркістан облысында іске қосып, жобаны аяқтады.
Барлық өңірде бір мезетте басталып, бір кезеңде қатар жүргізілген құрылыс жұмыстарының арқасында 14 514 шақырымдық оптика желісі қысқа мерзім ішінде тартылды. Талшықты-оптикалық байланыс желісі 828 ауылдағы 2496 мемлекеттік мекеме мен бюджеттік ұйымға қосылған. Бүгінгі таңда тартылған оптиканың негізінде тұрғын үйлерге де интернет жүргізілуде. Ол үшін интернетті көп нүктелі сымсыз желі арқылы таратып, радио көпір ұйымдастыратын бірегей технологияны қолданады.
***
Жұмыста компьютерде мәтін жазып отырып, ұялы телефоныма қалалық нөмірден қоңырау түсті.
– Тыңдап тұрмын.
– Алло, анашым, біз мектептен келдік.
– Қазір барамын.
– Анашым, «Қазақтелекомнан» хабарласты. Ақша төлесін дейді. Ал мен ол ағаға, Сіздерге рахмет айтамын дедім.
– Не үшін қызым?
– Әкем мен анама хабарласуға мүмкіндік бергеніңіз үшін!
– Рақмет…
Гүлнұр Бейбітбекқызы

Жаңа технология мүмкіндіктерге жол ашады

<a href="https://kyzylorda-news.kz/">Kyzylorda-news.kz.</a>&nbsp;Жаңақорған аудан тұрғыны танысы мамыр айында 2 млн теңгесін алдап алғаны үшін Жаңақорған аудандық полиция бөліміне арызданған.&nbsp;&nbsp; &nbsp;Алаяқ Шымкент қаласынан төмен бағада алтын әкеліп беруге уәде еткен.
Жедел-іздестіру шаралары жүргізіліп, нәтижесінде 33 жастағы азаматша анықталып, ұсталды. Ол Жаңақорған ауданның тұрғыны болып шықты.
Аталған дерек бойынша Қазақстан Республикасы Қылмыстық кодексінің 190-бабының 1-бөлігімен (Алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену) сотқа дейінгі тергеп-тексеру амалдары жүргізілуде.Күдіктіге қатысты ешқайда кетпеу және тиісті мінез-құлық туралы қолхат түрінде бұлтартпау шарасы таңдалды.
<blockquote>
 «Бүгінгі күнге алаяқтық қылмыстарының алдын алу, болдырмау бағытында Қызылорда облысы Полиция департаментімен кешенді іс-шаралар атқа­рылуда. Бұқаралық ақпарат құралдары арқылы облыстың тұрғындарына түсіндіру жұмыстары жүргізіліп, алаяқтардың&nbsp; арбауына түсіп қалмау жайлы қандай сақтық шараларын сақтау керектігі түсіндірілуде.Сонымен қатар, алаяқтық фактілері орын алған жағдайда тез арада полицияға хабарлауды естен шығармағаныңыз абзал. Алаяқтықпен күресті бүкіл ел болып жүзеге асыруымыз керек. Бұл – баршаға ортақ іс»,-деді Қызылорда облысы Полиция департаментінің бастығы полиция полковнигі Бектөре Сұлтан.
</blockquote>

Жаңақорғанда алаяқ ауылдасын 2 млн теңгеге алдап түсірген

<a href="https://kyzylorda-news.kz/">Kyzylorda-news.kz.</a>&nbsp; Қызылорда облысында ревакцинациялау жұмыстары өткен аптада басталды. Қазіргі кезде коронавирусқа қарсы қайта вакцинациялаудан облыс бойынша 192 адам өтті. Бұл туралы бүгін Өңірлік коммуникациялар қызметінде өткен баспасөз конференциясында облыстық денсаулық сақтау басқармасы басшысының орынбасары Жангелді Шаймбетов мәлімдеді.
Одан бөлек, өңірімізге 23400 доза «Pfizer» вакцинасы келді. Бұл вакцина 12-18 жас аралығындағы жасөспірімдер және жүкті әйелдермен бала емізуші әйелдерге арналған. Бүгінде «Pfizer» вакцинасын 4951 адам салдырды. Оның 3653-і бала, 646-сы жүкті әйел, 652-сі босанған әйел.
Айта кету керек, індет басталғалы бері өңірімізде коронавирус инфекциясымен 19294 науқас тіркелді. Өткен тәулікте 5 жағдай анықталды. Жалпы емделіп шыққаны 97 пайызды құрайды. Облыс бойынша инфекциялық стационарда 117 науқас, реанимациялық төсек-орында 14 науқас ем қабылдап жатыр.
Ал, вакцинациялау жұмыстары басталғалы бері облыста вакцинацияның 1 компонентімен егілгендер саны – 403 511, халықтың қамтылуы 89,2 пайызды құрады. Екінші компонентпен – 344 815 (76,2 пайыз) адам егілді.

Қызылордада қайта вакцинациялаудан  192 адам өтті

<a href="https://kyzylorda-news.kz/">Kyzylorda-news.kz.</a> Табиғат қорғаушылар жыл басынан бері бес жүзден астам рейд шараларын өткізген, деп хабарлайды «<a href="https://24.kz/kz/zha-aly-tar/o-am/item/513014-yzylorda-oblysynda-za-syz-baly-aulau-tyjylmaj-t-r">Хабар 24</a>».
Суда рұқсат етілмеген ау құралдарын және электр тоғын пайдаланушылар әлі де бар. Қолға түсіп, айыппұл арқалағандар да аз емес. 20 қылмыстық іс қозғалған. Балық шаруашылығы инспекторлары кезекті рейд барысында жаға ұстатарлық жағдайға тап болды. Рұқсат етілмеген ау түрлерінен бөлек балықты үлкен кернеулі тоқпен ұрып, қырып жібергендер қолға түсті. Бұл бірер ай бұрын ғана болған оқиға еді.
<blockquote>
 «Тоқпен ауланған құралдары сол қылмыстық іс болып саналады. Жыл басынан бері қазіргі қылмыстық істе бізде 20-сы қозғалып тұр, 561 әкімшілік хаттама толтырылған», – дейді «Арал-Сырдария» облысаралық балық шаруашылығы бассейіндік инспекциясы бөлімінің бас маманы Нұрхан Болат.
</blockquote>
Инспекторлардың айтуынша, өзен-көлдерден қармақ құралымен 1 адамның 5 келі балық аулауына болады. Ол үшін еш жерден рұқсат алаудың қажеті жоқ. Бірақ су маржанының жолына тор құру жауапкершілікке әкеп соғады.
Шиелі ауданының тұрғыны айдың күннің аманында 26 мың теңге көлемінде шығындалатын болды. Табиғатқа келтірілген залал мен айыппұлдың жалпы көлемі осындай.
<blockquote>
 «Балықты заңсыз молынан аулап, сатуды кәсіп еткендерді қолға түсіру де оңай емес», – дейді мамандар.
</blockquote>
Сондықтан «Арал-Сырдария» облысаралық бассейіндік балық шаруашылығы инспекциясына жаңадан техникалар да берілген.
<blockquote>
 «Жаңадан техникалар келіп жатыр, 4 жол талғамайтын автокөлік және 3 шетелдік моторлар салынған қайықтар келді жаңадан. Оларды да қолданысқа енгізіп, алдағы уақытта бақылау жұмыстарын бұдан да күшейтеміз деген ойдамыз», – дейді «Арал-Сырдария» облысаралық балық шаруашылығы бассейіндік инспекциясы бөлімінің бас маманы Руслан Сейітмұратов.
</blockquote>
Рейд шаралары жыл бойы бір сәтке де тоқтамайды. Жалпы биыл табиғат заңдылығын бұзғаны үшін 472 адамға 7 млн теңгеден астам айыппұл салынып, толық өндірілген.

Қазақстан және Қызылорда облысының жаңалықтары