<a href="https://kyzylorda-news.kz/">Kyzylorda-news.kz.</a> Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері <a href="https://kyzylorda-news.kz/bez-rubriki/syr-zhwrnalistikasynyng-tarihy-5-tomdyghynyng-tusawkeseri-bastaldy-134824/">өтті</a>.
Шара барысында Сенат депутаты Нұртөре Жүсіп тарихты түгендеуде баспасөздің ролі ерекше екенін алға тартты. Бұл ретте бестомдықтың басы-қасында жүрген барша азаматтарға, “Сыр медиа” ЖШС бас директоры Аманжол Оңғарбаевқа, қолдау танытқан облыс әкімдігіне ризашылығын білдірді.
Сонымен қатар Сырбойылықтарды Тәуелсіздіктің 30 жылдығымен құттықтап, Тәуелсіздік біздің бақытымыз екенін айтты.
Айта кетейік, «Сыр журналистикасының тарихы» 5 томдығы ел Тәуелсіздігінің 30 жылдығы қарсаңында жарық көріп отыр. Бұл еңбектің ерекшелігі сол, Сыр өңіріндегі бұқаралық ақпарат құралдарының өткені мен бүгінін қызылордалық журналистердің өздері саралап, зерттеп жазып шықты. Шығармашылық топ бұған екі жыл уақыт арнады. Кітап жазу барысында Сыр журналистикасының тарихына қатысты бұрын-соңды қалам тербеген аға-әріптестердің, ғалымдардың еңбегі пайдаланылды. Мұнымен қоса Мәскеу, Алматы қалаларындағы, Қызылорда облысындағы архивтерден, кітапханалардан нақты мәліметтер, тың деректер алынды.

Нұртөре Жүсіп: Тарихты түгендеуде баспасөздің рөлі ерекше

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері өтті.
Шара барысында Қазақстан Журналистер Одағының төрағасы Сейітқазы Матаев бестомдықтың шығуы айтулы оқиғаға екенін айтты.
<blockquote>
 «Мұндай кітаптар басқа өңірлерге үлгі болады. Өңірлер арасында сырбойылық журналистердің бастама көтеріп, руханиятты дамыту үшін қажетті кітапты қолға алуы құптарлық және көпке үлгі», -деді Сейітқазы Матаев.
</blockquote>

Сейітқазы Матаев: Сырбойылық журналистердің мұндай бастама көтеруі құптарлық және көпке үлгі

<a href="https://kyzylorda-news.kz/">Kyzylorda-news.kz.</a> Бүгін «Сыр медиа» ЖШС-де «Өңірлік журналистиканың медиаменеджмент мәселелері» тақырыбында семинар-тренинг өтті.
Семинар-тренингке Қазақстан Журнилистер Одағы Түркістан филиалының төрағасы, «Егемен Қазақстан» газетінің Түркістан облысындағы меншікті тілшісі Ғалымжан Елшібай, «Tukistan media Holding» бас директорының орынбасары Тельман Бейсен, «Бас редакторлар клубы» ҚБ атқарушы директоры Әсем Есілбаева және аудандық газет редакторлары, Қорқыт ата атындағы Қызылорда университетінің журналистика кафедрасының оқытушылар мен студенттері қатысты.
Шараға арнайы келген қонақтар әлеуметтік желідегі ақпараттардың шынайылығы, журналистикада сапалы контент жасау сынды мәселелер бойынша өз ойларын ортаға салды.
<blockquote>
 «Журналистикадағы сапалы контент – сараптамалық материалды талдап, зерттеп жазу. Қазіргі таңда бүгін орын алған жағдайға байланысты ақпараттық сараптамалық мақала дайындау үшін бір апта немесе үш күніңіз кетуі мүмкін. Бірақ бұл материалыңызбен оқырманың назарын аудара алмайсыз. Себебі қазір тек жылдам ақпарат тарау керек», – деді Ғалымжан Елшібай.
</blockquote>
Семинар барысында «Tukistan media Holding» бас директорының орынбасары Тельман Бейсен басылымға сапалы контент жасау үшін ең алдымен медиаменеджмент жақсы болу қажет екенін айтты. Сондай-ақ «Сыр медиа» ЖШС осы саланы үздік меңгерген мекемелердің алғашқыларының бірі екенін де ескертті.
Семинар тренинг соңында аудандық газет редакторлары мен оқу орнының оқытушылары мен студенттер тарапынан сұрақтар қойылып, ұсыныс-пікірлер айтылды.

Қызылорда: Өңірлік журналистиканың медиаменеджент мәселелері талқыланды

<a href="https://kyzylorda-news.kz/">Kyzylorda-news.kz.</a> «Сыр журналистикасының тарихы» 5 томдығының тұсаукесерінде Л.Гумилев атындағы ЕҰУ түркітану кафедрасының профессоры, ҚР Ұлттық Ғылым академиясының корреспондент мүшесі, филология ғылымдарының докторы Амантай Шәріп кітапқа ерекше баға берді.
Ол өз сөзінде «Бұл еңбек бір ғылыми зерттеу институты атқаратын жұмыс» – деді.
Айта кетейік, бүгін Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері өтті.
Шараға облыс әкімінің орынбасары Серік Ахмет, облыстық мәслихат хатшысы Наурызбай Байқадамов, Қазақстан Журналистер одағының төрағасы Сейітқазы Матаев, ҚР Парламент Сенатының депутаты Нұртөре Жүсіп, «Бас редакторлар клубы» ҚБ президенті Бибігүл Жексенбай, Л.Гумилев атындағы ЕҰУ түркітану кафедрасының профессоры, ҚР Ұлттық Ғылым академиясының корреспондент мүшесі, филология ғылымдарының докторы Амантай Шәріп және Түркістан облысындағы БАҚ басшылары, қызылордалық қаламгерлер, зиялы қауым өкілдері қатысты.

Амантай Шәріп: Бұл еңбек бір ғылыми зерттеу институты атқаратын жұмыс

<a href="https://kyzylorda-news.kz/">Kyzylorda-news.kz.</a> Бүгін, 11 желтоқсанда Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері басталды.
Іс-шараға облыс әкімінің орынбасары Серік Ахмет, облыстық мәслихат хатшысы Наурызбай Байқадамов, Қазақстан Журналистер одағының төрағасы Сейітқазы Матаев, ҚР Парламент Сенатының депутаты Нұртөре Жүсіп, «Бас редакторлар клубы» ҚБ президенті Бибігүл Жексенбай, Л.Гумилев атындағы ЕҰУ түркітану кафедрасының профессоры, ҚР Ұлттық Ғылым академиясының корреспондент мүшесі, филология ғылымдарының докторы Амантай Шәріп және Түркістан облысындағы БАҚ басшылары, қызылордалық қаламгерлер, зиялы қауым өкілдері қатысты.
Тағылымды шараны облыс әкімінің орынбасары Серік Ахмет жүргізді. Облыс әкімінің орынбасары алдымен журналистика жайын, қазақ баспасөзінің алдаспанына айналған “Қазақ”, “Айқап” басылымдарының тарихына тоқталды. Сонымен қатар Тәуелсіздік жылдарындағы Сыр өңірінің жетістіктерін баяндап, бестомдық кітапты баспасөздің ғана емес, халықтың шежіресі екенін жеткізді. Себебі ел тарихы баспасөзбен тікелей байланысты.
Сондай-ақ, Серік Әбжәліұлы тарих бедерінен ойып тұрып орын алатын Сыр баспасөзінің бүтін тарихы қамтылғанын және ол болашақта жас ұрпақтың тарихқа терең бойлап, майталман азаматтардың, ұлы тұлғалардың өмір жолына үңіліп, рухани жаңғыруына мүмкіндік беретінін айтты.
Айта кетейік, «Сыр журналистикасының тарихы» 5 томдығы ел Тәуелсіздігінің 30 жылдығы қарсаңында жарық көріп отыр. Бұл еңбектің ерекшелігі сол, Сыр өңіріндегі бұқаралық ақпарат құралдарының өткені мен бүгінін қызылордалық журналистердің өздері саралап, зерттеп жазып шықты. Шығармашылық топ бұған екі жыл уақыт арнады. Кітап жазу барысында Сыр журналистикасының тарихына қатысты бұрын-соңды қалам тербеген аға-әріптестердің, ғалымдардың еңбегі пайдаланылды. Мұнымен қоса Мәскеу, Алматы қалаларындағы, Қызылорда облысындағы архивтерден, кітапханалардан нақты мәліметтер, тың деректер алынды.
Бестомдық кітап қазақ журналистикасы әрі өлкетану үшін үлкен қазына болғалы тұр. Себебі, ҚР Тұңғыш Президенті – Елбасы Н.Ә.Назарбаев Алаштың анасы деп баға берген Сыр бойы шежіресінің бір парағы – бұқаралық ақпарат құралдарының бай тарихы алғаш рет жүйеленіп, жазылды. Ауқымды жоба көмескі тартқан тарихты қайта түгендеу, қалам ұстаған кешегі әрі бүгінгі буынның азды-көпті еңбегін дәріптеу, талдап-таразылау, ғылыми айналымға қосу, жас журналистерге кәсіби бағдар беру секілді мақсаттарды көздеді. Сондықтан, бұл еңбек оқырмандардың, әсіресе, журналистердің, ғалымдардың назарын аударып, қызығушылығын оятады деген сенім мол.
Айта кетейік, Сыр бойында жарық көрген бұқаралық ақпарат құралдарының тарихын зерттеп-зерделеген жинақтың І томы облыс әкімі Гүлшара Әбдіқалықованың алғысөзінен бастау алған. Сонымен бірге «Сыр медиа» ЖШС бас директоры, филология ғылымдарының кандидаты Аманжол Оңғарбаевтың, филология ғылымдарының докторы Құлбек Ергөбектің, Қорқыт ата атындағы Қызылорда университетінің доценті, тарих ғылымдарының кандидаты Сағат Тайманның жалпы қазақ баспасөзіне жасаған талдау ойлары, Сыр журналистикасына айтылған пайым-пікірлері берілген. Жалпы I томда ғасырға жуық тарихы бар облыстық «Сыр бойы», «Кызылординские вести» газеттері және «Ақмешіт жастары» басылымы қамтылған. Сондай-ақ «Сыр медиа» ЖШС-ның құрылу кезеңі жайлы айтылады.
Кітаптың ІІ томында облыс аумағына кіретін қалалық газет және аудандардың мемлекеттік басылымы қамтылған. Бұл үнжариялардың тарихи кезеңі, онда жарық көрген тақырыптардың ауқымы, жалпы қоғам дамуындағы газеттің рөлі жайында қызықты мағлұматтар бар.
Кітаптың ІІІ томы қазіргі күні заманауи цифрлық мүмкіндіктер арқылы Сыр бойынан республика аумағына тарайтын «Қазақстан» РТРК облыстық филиалының және Қызылорда қоғамдық телекомпаниясының тарихына арналады. Сондай-ақ бүгінде жабылып қалған облыстық радионың 80 жылға жуық тарихы да оқырманын бей-жай қалдырмайды. Аз уақыт болса да Қазалыдан хабар таратқан «Серік ТВ» және қызылордалық жастардың құлағында үні қалған СЕТА радиосы жайлы да азды-көпті мәлімет бар. Жаңа медианың жолашары болған «Qyzylorda news» ақпараттық агенттігі және оның азаматтық медианы дамытудағы рөлі жайында айтылады. Бұл томда облыстағы баспа ісі жайлы да жазылған.
Жинақтың ІV томында берілген Сыр бойында жарық көрген бұқаралық ақпарат құралдарының үлкен бір легі жекеменшік басылымдар тарихы жаңа дәуірдегі жаңа Қазақстанның тынысындай әсер қалдырады. Сондай-ақ тәуелсіздіктің алғашқы жылдары ашылып, кейін қаржы тапшылығынан жабылып қалған қанатқақты ірілі-ұсақты газеттер, мұнымен қоса жоғары және орта оқу орындарының, басқармалардың ведомстволық басылымдары қамтылды.
Бесінші кітап «БАҚ саласындағы Сыр мақтаныштары» және «Практикалық журналистика» деген екі бөлімнен тұрады. «БАҚ саласындағы Сыр мақтаныштары» жай ғана анықтамалық емес, сырбойылық қалам ұстаған қауымның шеберлік бастау-бұлағы деп ұсынылып отыр. «Практикалық журналистика» бөлімінде сырбойылық журналистердің тәжірибесі, жас журналистер үшін шеберлік дәрістері жинақталған.Жиында жаңа кітаптың құндылығы, маңыздылығы туралы ой-пікірлер айтылып, бестомдықтың тұсауы кесіледі.

«Сыр журналистикасының тарихы» 5 томдығының тұсаукесері басталды (ВИДЕО)

<a href="https://kyzylorda-news.kz/">Kyzylorda-news.kz.</a> Google компаниясы 2021 жылы қазақстандықтар Google жүйесінде ең көп іздеген мәліметтерді ұсынды, деп хабарлайды Қ<a href="https://lenta.inform.kz/kz/2021-zhyly-kazakstandyktar-google-da-en-kop-izdegen-malimetter_a3872495">азАқпарат</a>.
Әдеттегідей, жыл соңында миллиондаған іздеу сұранысына талдау жүргізілген.
Нәтижесінде, биыл Қазақстан тұрғындары Google-да ең көп&nbsp;«Онлайн мектеп»-ті&nbsp;іздеген.
Қазақстандықтардың білім ресурстарына жоғары сұранысы екінші жыл қатарынан сақталып отыр.&nbsp;Алғашқы «ондыққа»&nbsp;сондай-ақ: Дайын үй тапсырмалары (ГДЗ), Вilimland.kz, Кundelik.kz кіру және Нұр сабақ тұр. Бұдан бөлек, Ұлттық санақ, Еуро-2020 чемпионаты және «Игра в кальмара», «Битва титанов» және «Истинная красота» сериалдары туралы ақпарат іздестірілген.
Қазақстандықтар&nbsp;адамдар арасында&nbsp;– саясаткерлер, бизнесмендер мен селебрити жөнінде көп ақпарат іздеген. Сұраныс бойынша алдыңғы орындарда саяси және қоғам қайраткері Алексей Навальный, биші және блогер Азамат Айталиев, әнші МакSим, актер Фархат Абдраимов және бизнесмен Кеңес Рақышев тұр. Сондай-ақ «Персона» санатындағы топ-сұранысқа Принц Филипп, Арон Атабек, Ильназ Галявиев, Жан Поль Бельмондо және Саид Губденский енді.
Қазақстандық Google пайдаланушылардың нұсқасы бойынша&nbsp;«Веном 2» триллері – жыл фильмі болды.&nbsp;Сондай-ақ «Жыл фильмі» санатындағы ең танымал сұраныстардың қатарына «Лига справедливости Зака Снайдера», «Отряд самоубийц 2», «Круэлла» картиналары, «Душа» әсерлі мультфильмі және Marvel әлемінен «Вечные» жаңа фильмі кірді. Одан басқа, «Гнев человеческий», «Черная вдова», «Красное уведомление» және «Мортал комбат» картиналары алдыңғы ондыққа кірді.
«Сериал» санаты&nbsp;бойынша алдыңғы үштікте «Игра в кальмара» сериалы, «Атака титанов» анимесі және «Истинная красота» дорамасы тұр. Қазақстандықтар арасында бұрынғыша Түрік және Оңтүстік Корея сериалдары ең таңдаулы болып отыр. Биыл тізімді «Королева Чорин» және «Винченцо» дорамалары мен түріктің «Постучись в мою дверь» сериалы бастап тұр. Топ «ондыққа» сондай-ақ, Netfliх-тің «Токийские мстители» мен «Обещанный Неверленд», «Джинни мен Джорджия» анимелері және Ресейдің «Трудные подростки» сериалы кірді.
«Сатып алу» санатында&nbsp;төртінші жыл қатарынан темір жол билеттері сұранысқа ие болып отыр. Сондай-ақ қазақстандықтар Алматыдан пәтерлер сатып алу, ұшаққа, киноға және Медеуге билеттер, бассейндер, кондиционерлер мен елордада көмір сатып алу туралы ақпарат іздеген.
2021 жылы қазақстандықтар Google-да ең көп іздеген мәліметтер:
Ең танымал сұраныстар: 
Онлайн мектеп 
ГДЗ 
Білім ленд 
Нұр сабақ 
Игра в кальмара 
Евро 2020 
Sanaq gov kz 
Атака титанов 
Күнделік кз кіру 
Истинная красота 
Фильм: 
Веном 2 
Лига справедливости Зака Снайдера 
Отряд самоубийц 2 
Круэлла 
Душа 
Вечные 
Гнев человеческий 
Красное уведомление 
Мортал комбат 
Черная вдова 
Сатып алулар: 
ТЖ билеті 
Алматыда пәтерлер 
Ұшаққа билет 
Бассейн 
Машина 
Кондиционер 
Медеу билеттер 
Сәтті жұлдыз онлайн билет сатып алу 
Киноға билеттер 
Астанада көмір
Персона: 
Алексей Навальный 
Азамат Айталиев 
МакSим 
Фархат Абдраимов 
Кенес Ракишев 
Принц Филипп 
Арон Атабек 
Ильназ Галявиев 
Жан Поль Бельмондо 
Саид Губденский 
Сериал: 
Игра в кальмара 
Атака титанов 
Истинная красота 
Королева Чорин 
Токийские мстители 
Джинни и Джорджия 
Постучись в мою дверь 
Винченцо 
Трудные подростки 3 сезон 
Обещанный Неверленд

2021 жылы қазақстандықтар Google-да ең көп іздеген мәліметтер

<a href="https://kyzylorda-news.kz/">Kyzylorda-news.kz.</a>&nbsp;АҚШ-тың Pantone институты 2022 жылдың басты түсін атады. Ол түс көк пен күлгін түстің қосындысы, яғни Very Peri деп аталады.
Ұйым сайтында Very Peri жылы түс, оның қолданылуы шығармашылыққа шабыт береді делінген.
Pantone зерттеу компаниясы түстердің әртүрлі салаларға (сән, баспа ісі, интерьер дизайны, жарнама, кино және т.б.) қалай ықпал ететінін анықтайды.
Институт 2000 жылдан бері басты түсті анықтап келеді. Былтыр Pantone 2021 жылдың түсі деп&nbsp;тоқ сұр және сары түстерді атады.
<a href="https://24.kz/kz/zha-aly-tar/lemde/item/515052-2022-zhyldy-basty-t-si-ataldy">Хабар 24</a>

2022 жылдың басты түсі аталды

<a href="https://kyzylorda-news.kz/">Kyzylorda-news.kz.</a> Британдық дәрігер Дэвид Ллойд омикрон штаммын жұқтырған балаларда пайда болатын аурудың ерекше белгісін атады. Бұл туралы маман Sky News телеарнасының эфирінде мәлімдеді.
Оның айтуынша ересектер мен балалардағы ауру белгілерінің айырмашылығы бар екенін және «омикронмен» ауыратын балалардың 15 пайызында әдеттен тыс бөртпе пайда болады.
Дәрігер мамандардың вирустың осы штаммы туралы біртіндеп көбірек біліп жатқанын айтты.
<blockquote>
 «Бұл нұсқа «дельта» сияқты көп өлімге әкелмейді және біз оны жеңе аламыз деп үміттенейік», – деп түйіндеді маман.
</blockquote>
Айта кетейік, 24 қарашада ғалымдар Оңтүстік Африка мен Ботсванада коронавирустың жаңа штаммын анықтады. Оған гректің omicron әрпі берілді. Оның COVID-19-дың кез келген басқа штаммдарынан, соның ішінде «дельтадан» да қауіпті болуы мүмкін екені атап өтілді.
Жаңа штамм құрамында 32 мутация бар, олардың кейбіреулері оның жоғары таралу қабілетін және вакциналарға төзімділігін көрсетеді.
Дүниежүзілік денсаулық сақтау ұйымы коронавирустың жаңа штаммын зерттеуге бірнеше апта қажет болатынын айтты. Бірақ сарапшылар қазірдің өзінде омикрон вакциналарға төзімдірек және тезірек таралуы мүмкін деп болжайды.
Сонымен қатар, сарапшылардың пікірінше, қолданыстағы ПТР сынақтары бұл штаммды тануға қабілетті. Дегенмен, олар омикрон адамзатқа Эбола вирусы сияқты қауіп төндіреді деп есептейді.
Дүниежүзілік денсаулық сақтау ұйымының алдын ала мәліметтері бойынша, коронавирус жұқтырған адамдарда жаңа штамммен жұқтыру қаупі жоғары болуы мүмкін.
Бұған дейін Гамалея орталығының профессоры Анатолий Альштейн коронавирустың омикрон штаммының таралуы COVID-19 пандемиясының аяқталуына әкелуі мүмкін деп болжады.
<a href="https://massaget.kz/layfstayl/Zdorove/66874/">massaget.kz</a>

Дәрігер балаларда кездесетін омикрон штаммының белгілерін атады

<a href="https://kyzylorda-news.kz/">Kyzylorda-news.kz.</a>&nbsp;Тәуелсіздіктің 30 жылдық мерейтойы қарсаңында Алматы қаласында «Тәуелсіздік-мәңгілік елдің тұғыры» атты оқушылар арасындағы V республикалық айтыс өткізілді.
Төл өнерімізді дәріптеуді мақсат тұтқан республикалық айтысқа әр аймақтан жалпы білім беру ұйымдарының 7-11 қазақ сынып оқушылары қатысып, өзара бақ сынасты.
Дүбірлі додаданың қорытындысы бойынша Қызылорда облысының намысын қорғаған Жалағаш ауданы №114 орта мектептің 11 сынып оқушысы Мейіржан Қартбай жүлделі 3 орын иеленіп, 30 000 теңге ақшалай сыйақымен марапатталды.

Жалағаштық оқушы V республикалық айтыста жүлдегер атанды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықованың төрағалығымен 16 желтоқсан – ҚР Тәуелсіздік күніне арналған «Жасампаздыққа толы жылдар» республикалық ғылыми-практикалық конференциясы өтті.
Конференцияның жұмысына ҚР Парламенті Мәжілісінің Экономикалық реформа және өңірлік даму комитетінің мүшесі Ғалым Әміреев, облыстық мәслихаттың хатшысы, тарих ғылымдарының кандидаты Наурызбай Байқадамов, Ұлттық ғылым академиясының академигі, облыстық мәслихат депутаты Қылышбай Бисенов, Қазақстанның еңбек сіңірген қайраткері Қалқазбек Әжібеков, ақын, Қазақстан Жазушылар және Журналистер одағының мүшесі, облыстық мәслихат депутаты Шәкизада Әбдікәрімов, «Ақмешіт ақшамы» газетінің бас редакторы, облыстық мәслихат депутаты Сәрсенкүл Биқожа, ақын, үш дүркін «Алтын домбыра» иегері Мұхтар Ниязов, ауыр атлет Илья Ильин және облыстық, қалалық мәслихат депутаттары, жоғары оқу орындарының ғалымдары, үкіметтік емес ұйым өкілдері, облыстық этномәдени бірлестіктер мен жастар ұйымдарының жетекшілері мен белсенділері және онлайн байланыс арқылы аудандардағы зиялы қауым өкілдері қатысты. 
Аймақ басшысы салтанатты іс-шараға қатысушыларды еліміздің ең ұлық мерекесімен құттықтап, егемен еліміздің Тұңғыш Президентінің батыл қадамдары мен тарихи шешімдерінің арқасында және оған қолдау көрсеткен халқымыздың бірлігі мен қажырлы еңбегі нәтижесінде Қазақстан әлем мойындаған мемлекетке айналғанын атап өтті.
<blockquote>
 «Тәуелсіздік тағылымы» атты мақаласында бұл жылдарға баға берген Елбасы: «Мен отыз жыл бойы халқымды қанаттыға қақтырмай, тұмсықтыға шоқыттырмай, қайраңға қалдырмай, әлемдік өркениеттің алдыңғы шебіне, дүниедегі ең дамыған 40 елдің қатарына қостым. Осы жылдар ішінде әлемдік ғылым мен мәдениеттің ең үздік жетістіктерін меңгерген жаңа ұрпақ қалыптасты. Жаңа елордамыз салынды. Ең үлкен табысым да, ең үлкен бақытым да осы деп санаймын», – деді. Астаналар мекені атанған, Алаш зиялылары мен ардақтыларының арманын тоғыстырған, қасиеті қымбат, көмбесі асыл Сыр өңірі, Тәуелсіздік жылдарында зор табыстар мен жасампаз жетістіктерге қол жеткізді. Бұл жетістіктеріміздің барлығы – Елбасымыздың дара жолымен, Президентіміздің басшылығымен елдің бүгіні мен болашағы үшін еңбек етіп жүрген отандастарымыздың, Сіздер мен біздердің бірлесіп атқарған істеріміздің нәтижесі, халық артқан сенімнің жемісі», – деді облыс әкімі.
</blockquote>
Тәуелсіз Қазақстанның әлемдің саясат аренасындағы орны мен даму перспективалары Мәжіліс депутаты Ғалым Әміреевтің «Қазақстан – әлем мойындаған мемлекет» баяндамасында тарқатылды. Еліміздің өңірлер арасында ынтымақтастық орнату мақсатында жасаған жұмыстарын атап өткен ол мемлекетіміз мұнан әрі де бейбіт, жасампаздық жолды ұстанатынын жеткізді.
ҚР ҰҒА академигі Қылышбай Бисенов тәуелсіз еліміздің тұңғыш Президенті-Елбасы Нұрсұлтан Әбішұлы Назарбаевтың Қазақ елінің өсіп-өркендеуіне, қасиетті Сыр өңірінің тұрақты дамуына қосқан еңбегін «Тәуелсіздік тағылымы: Елбасы және Сыр өңірі» баяндамасында саралап шықты. Баяндамашы Елбасының Арал өңірін сақтап қалу, экономиканы әртараптандыру секілді аса көрегендікпен қабылдаған шешімдерінің аймағымыздың қарқынды дамуына тигізген әсерін ерекше атап өтті.
Азаттық алған жылдары халқымыздың бағындырған белестері Қызылорда облыстық мәслихатының хатшысы Наурызбай Байқадамов «Тәуелсіздік – ұлттың тарихи тағдырында» тақырыбын салмақтап берді. Өз сөзінде көптеген жылдар бойы ата-бабаларымыз аңсаған асыл арман – ел Тәуелсіздігінің өткен шағын, бүгіні мен ертеңін талдап шықты.
Елбасы егемендіктің елең-алаңындағы «алдымен – экономика, сонан соң саясат» атты өміршең тарихи қағидаты мен сындарлы саясаты елдің экономикалық кемелденуіне жол салып, Қазақстанның терезесі тең, керегесі кең мемлекетке айналуына жол ашты. Сыр өңірінің экономикасының қалыптасу барысын Қазақстанның еңбек сіңірген қайраткері Қалқазбек Әжібеков «Қызылорда облысының экономикасы – дағдарыстан тұрақты дамуға дейін» баяндамасында сарапқа салды.
Жиында ақын, «Қызылорда қоғамдық телерадиокомпаниясы» ЖШС құрылтайшысы Шәкизада Әбдікәрімов «Тәуелсіздік тұғырында тұрған ел» тақырыбын арқау етіп, егемендік әрбір қазаққа өр рух беріп, Сыр елінің несібесіне баланған толайым табыстарды өлеңмен өрнектеді.
Ал, «Ақмешіт ақшамы» газетінің бас редакторы Сәрсенкүл Биқожа Тәуелсіздік жылдарындағы азаматтық қоғам қызметі мен ұлт өміріндегі БАҚ құралдарының рөлі туралы айтып, даму жылнамасымен жеткен жетістіктерді тізбеледі.
Сондай-ақ, конференция барысында Қазақстанның еңбек сіңірген қайраткері Ержан Уәйіс, үш дүркін «Алтын домбыра» иегері Мұхтар Ниязов пен толағай батырымыз Илья Ильин өз пікірлерін білдіріп, ұсыныстарын айтты. 
Конференция жұмысын қорытындылаған аймақ басшысы барлық игіліктің бастауы болған Тәуелсіздіктің құндылығын сақтап, барша азаматтарды еліміздің жарқын болашағы үшін аянбай қызмет етуге шақырды.
<img src="https://kyzylorda-news.kz/wp-content/uploads/2021/12/266268704_202789362042316_2764203845107049984_n.jpg" alt="" />
<img src="https://kyzylorda-news.kz/wp-content/uploads/2021/12/265328043_202789835375602_1645781891253552075_n.jpg" alt="" />

Гүлшара Әбдіқалықова: Сыр өңірі Тәуелсіздік жылдарында зор табыстар мен жасампаз жетістіктерге қол жеткізді

<a href="https://kyzylorda-news.kz/">Kyzylorda-news.kz.</a>&nbsp;Ел Тәуелсіздігінің 30 жылдық мерейтойы қарсаңында бүгін облыс әкімі Гүлшара Әбдіқалықова ветеринариялық ұйымдарға жаңа қызметтік автокөліктердің кілтін табыстады.
Аймақ басшысы салтанатты шараға қатысушыларды айтулы мерекемен құттықтап, өңірдің эпизоотиялық ахуалын сақтауда және тамақ қауіпсіздігін қамтамасыз етуде ветеринариялық ұйымдардың еңбегінің орны ерекше екенін тілге тиек етті.
<blockquote>
 «Мемлекет басшысы Қасым-Жомарт Кемелұлы «Халық бірлігі және жүйелі реформалар – ел өркендеуінің берік негізі» атты өз Жолдауында ветеринария саласын жетілдіруге үлкен мән берді. Сондықтан осы салада жүйелі жұмыстар атқарылуда. Себебі ветеринария қызметі қазіргі заман талабына сай болмаса, ауыл шаруашылығы өнімдерінің экспортын арттыру мүмкін емес. Бұл, түптеп келгенде, ауылдағы ағайынның әл-ауқатына және облыстың агроөнеркәсіп саласының дамуына тікелей әсер етеді. Ветеринария саласындағы жұмыстарды ілгерілету үшін 2021-2023 жылдарға арналған «Жол картасын» жасадық. Ал, ұйымдарды материалдық-техникалық жабдықтау мақсатында биыл облыстық бюджеттен 111 млн. теңге қаржы бөлініп, нәтижесінде өздеріңіз көріп тұрғандай, 2013 жылдан бері жаңартылмаған 15 қызметтік көлік ауыстырылды. Бұл жұмыстар келер жылы да жалғасын табатын болады», -деді Гүлшара Әбдіқалықова.
</blockquote>
Іс-шарада тапсырылған 15 қызметтік көліктің Арал ауданына 4, Қармақшы, Жалағаш, Жаңақорған аудандарына және Қызылорда қаласына 2 көліктен, Қазалы, Сырдария мен Шиелі аудандарына 1 автокөліктен жол тартты. Келер жылы да ветеринария саласының материалдық-техникалық базасын нығайту мақсатында жергілікті бюджеттен бөлінетін қаржыны арттыру көзделіп отыр. Яғни, келер жылы 30 автокөлік, 140 компьютер, 140 дана термочемодан алынбақ.
<img src="https://kyzylorda-news.kz/wp-content/uploads/2021/12/mashina2.jpg" alt="" />
<img src="https://kyzylorda-news.kz/wp-content/uploads/2021/12/mashina1.jpg" alt="" />

Қызылордада ветеринариялық ұйымдарға жаңа қызметтік көліктердің кілті табысталды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова Сырдария ауданына барып, бірқатар әлеуметтік нысанның жұмысымен танысып, көпбалалы аналарға 5 тұрғын үйдің кілтін табыс етіп, 10 отбасыға қуаныш сыйлады.
Жаңа үйлер аудандағы әлеуметтік аз қамтылған және көпбалалы отбасыларға берілді.
Пәтер кілттерін табыстау рәсімінде облыс әкімі Гүлшара Әбдіқалықова шараға қатысушыларды Тәуелсіздік күнімен құттықтап, тұрғындарды баспанамен қамту ісі қарқынды жүргізілетінін тілге тиек етті.
<blockquote>
 «Ең алдымен баршаңызды ең басты ұлық мерекеміз – қастерлі де қасиетті Тәуелсіздігіміздің 30 жылдығымен шын жүректен құттықтаймын! Жыл сайын өңірімізде түрлі заманауи нысандар бой көтеріп, көркейіп-көріктене түсуде. Халықты тұрғын үймен қамту да – жолға қойылған жақсы істердің бірі. Бүгін 710 шаршы метрді құрайтын 2 пәтерлік 5 тұрғын үй құрылысы аяқталып, халық игілігіне беріліп отыр. Жыл соңына дейін тағы да 63 отбасы жаңа шаңыраққа ие болады деп жоспарлап отырмыз. Жаңа қоныстарыңыз құтты болсын, шаңырақтарыңыз шаттыққа толсын! Алдағы мерекелер мен қуанышты күндерді жаңа қоңыстарыңызда жақсы қарсы алыңыздар! Әр отбасына береке-бірлік, амандық тілеймін»,-деді облыс әкімі.
</blockquote>
Биыл өңірде республикалық бюджеттен қажетті қаржы қаралып, 30 тұрғын үй сатып алынбақ. Сондай-ақ, жыл соңына дейін 11 елді мекенде 33 тұрғын үйдің құрылысын аяқтап, кезекте тұрған көп балалы отбасыларға беру жоспарланып отыр.
Облыс әкімі Сырдария ауданына сапары аясында Ақжарма ауылындағы «Ақжарма-2» шаруа қожалығына тиесілі күріш ақтайтын зауыт жұмысымен танысты.
Айта кету керек, зауыттың жылдық қуаттылығы 630 тоннаны құрайды. Күніне 50 тонна күрішті ақтауға қауқарлы. 10 адам тұрақты жұмыспен қамтылған.
Мұнан соң, облыс әкімі Тереңөзек кентінде «Ауыл-Ел бесігі» бағдарламасы аясында күрделі жөндеуден өткен орталық стадионға барып, жұмысын саралады. Спортшылармен кездесіп, пікір алмасты.
Әрі қарай аймақ басшысы қуаттылығы 60 тонна жем шығаратын «Аққұм Жер» ЖШС-нің зауыт жұмысымен танысты.
Облыс әкімі Гүлшара Әбдіқалықова биыл шаруаларға түскен ауыртпалықты тілге тиек етіп, осы тектес жем шығаратын зауыттардың тиімді әрі маңызды жобаларды көбейту қажет екенін алға тартты.
<img src="https://kyzylorda-news.kz/wp-content/uploads/2021/12/wjj.jpg" alt="" />
<img src="https://kyzylorda-news.kz/wp-content/uploads/2021/12/wj.jpg" alt="" />
<img src="https://kyzylorda-news.kz/wp-content/uploads/2021/12/zhatka.jpg" alt="" />
<img src="https://kyzylorda-news.kz/wp-content/uploads/2021/12/kwrish.jpg" alt="" />
<img src="https://kyzylorda-news.kz/wp-content/uploads/2021/12/kwrish1.jpg" alt="" />
<img src="https://kyzylorda-news.kz/wp-content/uploads/2021/12/syrdarija.jpg" alt="" />

Қазақстан және Қызылорда облысының жаңалықтары