<a href="https://kyzylorda-news.kz/">Kyzylorda-news.kz.</a> Елде бес күнде 13 майнингтік ферма электр энергиясынан ажыратылды. ҚР Энергетика министрлігінің мәліметінше жалпы тұтыну қуаты – 202 МВт құраған. Бұл туралы Өңірлік коммуникациялар қызметінде өткен брифингте облыстық энергетика және тұрғын үй-коммуналдық шаруашылық басқармасының басшысы Ерлан Жаңабаев хабарлады.
<blockquote>
 «Электр энергиясын тұтыну көлемінің динамикасы өткен жылмен салыстырғанда кішігірім өскені байқалады. Сонымен қатар электр энергиясын таратушы және энергиямен жабдықтаушы кәсіпорындармен бірлесіп, энергия көздерінің тапшылығы және апаттық жағдай туындаған кезде тұтынушыларды шектеу кестесі әзірленді. Бүгінде облыс аумағында электр энергия штаттық режимде берілуде», – деді басқарма басшысы Ерлан Жаңабаев.
</blockquote>
Ел аумағында 17 майнинг фермасы жұмыс істеуде. Олар өз кезегінде -540 МВт қуат көзін тұтынып отыр. Жақында ҚР Энергетика министрлігі атомдық және энергетикалық қадағалау мен бақылау комитеті мобильді топтың қатысуымен цифрлық майнинг нысандарын анықтау бойынша тексеріс жүргізуде.
<blockquote>
 «Қазіргі таңда майнингтік-фермасына байланысты тұтынушылар тіркелген жоқ. Бұл ретте, ең жоғары жүктеме сағаттарында энергия жүйесінде электр қуатының тапшылығы байқалуда. Сондықтан электр энергиясына қажеттіліктің негізгі себебі – цифрлық майнинг субъектілерінің қызметі», – деді «Қызылорда электр тарату тораптары компаниясы» АҚ-ның басқарма төрағасының міндетін атқарушы Дінмұханбет Әбдіреев.
 «Бүгінде жауапты мекемелермен талдау жүргізілуде. Майнингке қосылған нысандар анықталмады. Бұл жұмыстарды жүйелі түрде жалғастыратын боламыз», – деді «ҚР энергетика министрлігі атомдық және энергетикалық қадағалау мен бақылау комитетінің Қызылорда облысы бойынша аумақтық департаменті» ММ-нің бөлім басшысы Марат Мұңайтбасов.
</blockquote>

Қазақстанда 13 майнингтік ферма анықталды

<a href="https://kyzylorda-news.kz/">Kyzylorda-news.kz.</a> Кәмелетке толмағандарға қарсы жасалатын қылмыстардың алдын алу, болдырмау бағытында кәмелетке толмағандардың жүріс тұрыстарына бақылау жасалуы керек.
Заңды өкілдерінің қарауынсыз түнгі уақытта, көшеде және ойын-сауық орындарында бей-берекет жасөспірімдер жүруге болмайды. Осы орайда аталған мәселелерді анықтау мақсатында 23-27 ақпан аралығында облыс көлемінде «Бала және Отбасы» жедел профилактикалық іс-шарасы өткізіледі.
Іс-шараның мақсаты – кәмелетке толмағандарға қарсы жасалатын жыныстық тиіспеушілік, тұрмыстық зорлық-зомбылық және балаларға қатыгездікпен қарау қылмыстарының алдын алу. Кәмелетке толмағандарға теріс тәрбие беретін ата-аналар мен ересектер анықталып, қолайсыз отбасылар ішкі істер органдарының профилактикалық есебіне қойылады. Кәмелетке толмаған балаларына қатыгездік көрсететін олардың тәрбиесімен айналыспайтын отбасылар анықталады.
Білім беру ұйымдарында оқушылар мен студенттер арасында қылмыстық және әкімшілік жауапкершіліктер туралы түсіндіру жұмыстары жүргізіледі.

Қызылордада балаларына теріс тәрбие беретін ата-аналар жазаланады

<a href="https://kyzylorda-news.kz/">Kyzylorda-news.kz.</a> Жаңа бизнес-идеяларды іске асыруға берілетін қайтарымсыз грант беру шарттарына өзгерістер енгізілді. Мемлекеттік грант мөлшері 200 ден 400 айлық есептік көрсеткішке дейін артты, биыл 1 225 200 теңгені құрайтын болады.
Өңірлік палатаның бөлім басшысы Гаухар Елеусінованың айтуынша, бұрын мемлекеттік гранттарға барлық санаттағы азаматтар үміткер бола алса, биылғы жылдан бастап тек 29 жасқа дейінгі жастар мен әлеуметтік осал топтарына жататын азаматтар ғана грант ала алады. Әлеуметтік осал топтарына атаулы көмек алушы отбасы мүшелері, көп балалы отбасылардың мүшелері, мүгедектігі бар азаматтар, мүгедектігі бар баланы тәрбиелеушіге берілетін жәрдемақыны алатын адамдар және қандастар жатады.
Грант беру процесі биыл электронды түрде өтеді.
«Бастау бизнес» жобасы бойынша кәсіпкерлік негіздеріне оқыту Өңірлік кәсіпкерлер палатасымен биыл да онлайн-форматта өткізіледі. Оқыту тегін өткізіледі. Оқытылатындардың 30 пайызы – 29 жасқа дейінгі жастар, 30 пайызы – әлеуметтік осал топтар санатына сәйкес келуі туралы өзгерістер енгізілді.

Қайтарымсыз грант беру шарты өзгерді

<a href="https://kyzylorda-news.kz/">Kyzylorda-news.kz.</a> Бүгіннен бастап елде картоп пен сәбіз экспортына қайта рұқсат етіледі, деп хабарлайды <a href="https://24.kz/kz/zha-aly-tar/ekonomika/item/529437-aza-standa-kartop-pen-s-biz-eksporty-zhandandy">«Хабар 24»</a>.
Қаңтардың соңында әлеуметтік маңызы бар тауар бағасын ұстап тұру мақсатында бұл өнімдерді сыртқа шығаруға шектеу қойылған. Мемлекеттік кірістер комитеті сыртқы сауда саясаты және халықаралық экономикалық ұйымдарда қатысу мәселелері бойынша ведомствоаралық комиссия отырысында тыйымды алып тастауға шешім шығарды. Алайда бірінші мамырға дейін 144,5 мың тонна картоп пен 57,5 мың тонна тұқымдық картопты ел аумағынан әкетуге сандық шектеуді бір мезгілде енгізу бойынша шешім қабылданды.

Қазақстанда картоп пен сәбіз экспорты жанданды

<a href="https://kyzylorda-news.kz/">Kyzylorda-news.kz.</a> Қоғамдық жұмыстар, жастар практикасы мен әлеуметтік жұмыс орындарын ұйымдастыру ережелеріне өзгерістер енгізілді. Сондай-ақ, кәсіпкерлік бастамаларды қолдауға бағытталған «Бастау Бизнес» жобасы бойынша оқыту мен қайтарымсыз гранттар беру қағидалары қайта бекітілді. Бұл туралы Өңірлік коммуникациялар қызметінде өткен баспасөз конференциясында облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова мәлімдеді.
Қоғамдық жұмыстардың жалақысы 61260 теңгеге артты. Қатысу мерзімі 12 ай, тіркеуде тұрған барлық жұмыссыздар қатыса алады. Жұмыс беруші қоғамдық жұмыстарды ұйымдастыруға екі жылда бір рет қатысады.
<blockquote>
 «Жастар практикасы» жобасының төлемі 91890 теңгеге дейін көбейіп, қатысу мерзімі 6-12 айға дейін ұлғайды. Бұл жобаға 29 жасқа толмаған, соңғы 3 жылда жоғарғы және арнаулы орта оқу орындарын бітірген және еңбек өтілі жоқ түлектердің қатысуға мүмкіндігі бар. Ал, әлеуметтік жұмыс орындарына орналастыру жобасы жалақыны 35 пайызын субсидиялау арқылы жүзеге асырылады, субсидияның мөлшері 61260 теңгеге дейін артты. Сонымен қатар, биылғы жаңалық – жұмыс беруші қоғамдық жұмысқа өтінімді тиісті құжаттарды толтырып, электронды түрде электрондық еңбек биржасы арқылы береді», – деді Гаухар Қалмақова.
</blockquote>
Жобалардың тағы бірі ол, «Алғашқы жұмыс орны». Онда 29 жасқа толмаған, жұмыс тәжірибесі жоқ жастар, оның ішінде NEET санатындағы жастарға оқыған мамандығына сәйкес ұйымдастырылады. Жұмыс беруші жобаға қатысу мерзімі аяқталғаннан кейін жұмыссызды кемінде 12 ай мерзімге тұрақты жұмыс орнына жұмысқа орналастыруға міндетті.
«Ұрпақтар келісім-шарты» жобасына 2 жыл ішінде оқуын аяқтаған және 29 жасқа толмаған білім беру ұйымдары түлектері қатысады, жоба шеңберінде жұмысқа орналасқан адамға зейнеткерлік жасқа жетуге кемінде 6 ай қалған тәлімгер тағайындалады. Жұмыс беруші жобаға қатысу мерзімі аяқталғаннан кейін жұмыссызды Еңбек кодексінің 38-бабына сәйкес тәлімгердің бос жұмыс орнына немесе басқа бос орынға ауыстыруға міндетті. 
Биылғы жылдан бастап зейнеталды жастағы адамдар үшін «Күміс жас» жобасы іске қосылды. Бұл жоба зейнетке шығуына екі жыл мерзімі қалған жұмыссыздарды орналастыруды көздейді, жалақының 50 пайызы мемлекеттен субсидияланады.

Гаухар Қалмақова: «Жастар практикасы» жобасының төлемі 91890 теңгеге дейін көбейді

<a href="https://kyzylorda-news.kz/">Kyzylorda-news.kz.</a> ҚР Парламенті Мәжілісінің депутаты, Мәжіліс Төрағасының орынбасары, Мәжілістегі «Nur Otan» партиясы депуаттық фракциясының мүшесі Балайым Кесебаева Сыр журналистерімен кездесіп, қоғамдағы қордаланған мәселелер бойынша олардың ұсыныс пікірлерін тыңдады.
Халықтың мұңын билікке жеткізудегі алтын көпірлік рөл атқарып отырған журналистер қауымы өзінің емес елдік мәселелерді алға тартты. Атап айтар болсақ, бүгінгі таңда өзекті болып отырған жер мәселесі, жайылымдық жерлердің үлескерлері тарапынан наразылық күй, Көкарал су бекетіндегі жарықтың пайда болып, алдағы уақытта облыс тұрғындары үшін өте өзекті мәселе болу қаупі, республикалық бюджеттен қаржы бөлініп бөгетті жөндеу жұмыстарын қолға алу қажет екендігі, Сырдария өзеніндегі су деңгейінің түсіп кетуі, оның Үкімет тарапынан шешу жолдарын тез арада қолға алу қажет екендігі, облыс аумағындағы ақылы жол мәселесі, аймақ аумағынан шықпайтын көлік жүргізушілерінен ақы алынбау жолдарын қарастыру мәселесі.
Әлеуметтік әлсіз топтарды қолдау бағытында мүгедектігі бар азаматтардың шипажайларда тынығуға жолдама берілген кезде олардың көмекшілеріне де бірге жолдама беру жолдарын қарастыру, зағип жандардың көмекшілеріне қаржы төлеу мәселесін шешу жолдарын және мүгедектігі бар азаматтарға қоғамдық көліктерде тегін жүру мүмкіндіктерін қарастыру сонымен қатар салаға қатысты БАҚ өкілдерінің дәрежесін көтеру үшін арнайы Заңға өзгерістер енгізу қажеттігін қарастыру секілді көптеген мәселелерді көтерді.
Мәжіліс депутаты барлық сұрақтарға жауап беріп, көтерілген мәселелер бойынша парламент мінберінде көтеріп, нақты жұмыстар жасауға жұмыс жасайтындығын жеткізді.
<img src="https://kyzylorda-news.kz/wp-content/uploads/2022/02/274256299_322350533263923_248129147065700690_n.jpg" alt="" />
<img src="https://kyzylorda-news.kz/wp-content/uploads/2022/02/273961779_322350623263914_2659678438945204172_n.jpg" alt="" />
<img src="https://kyzylorda-news.kz/wp-content/uploads/2022/02/273964871_322350659930577_1202741269787608355_n.jpg" alt="" />

Мәжіліс депутаты Балайым Кесебаева БАҚ өкілдерімен кездесті

<a href="https://kyzylorda-news.kz/">Kyzylorda-news.kz.</a> Жалпы, жемқорлықты жою – күн тәртібінен түспейтін мәселе. Ол – елдің экономикалық жүйесінің қауіпсіздігіне, тұрақтылығына әсер ететін күрделі құбылыс. Сыбайлас жемқорлық мемлекеттік реформаларға көп кедергісін, зиянын келтіреді, ұлттық экономиканың дамуына әсерін тигізеді, мемлекеттік құрылымдарға деген халықтың сенімсіздігін оятады және халықаралық аренада мемлекеттің жағымсыз имиджін қалыптастырады.
Көпшілікке белгілі, 21 қаңтарда ҚР Президенті Қасым-Жомарт Тоқаев отандық бизнес өкілдерімен кездесіп, халық игілігі үшін билік пен бизнестің өзара ықпалдастығына қатысты жолдарды айқындау қажеттігін атап өтті. Сыбайлас жемқорлыққа қарсы кешенді тұжырымдама әзірлеуді де тапсырған болатын. Мемлекет басшысы бірінші кезекте қарапайым халықтың, кәсіпкерлердің мүддесі ескерілуі тиіс екенін, сыбайлас жемқорлықтың себебімен емес, салдармен күресуге баса назар аударылатындығын, сондай-ақ, сыбайлас жемқорлықтың алғышарттарын жүйелі талдау, шенеуніктердің бизнеске және азаматтарға әсер ету мүмкіндігінің төмендеуі турасында айта келе, бұл жұмысты жаңа деңгейде қарауға мән берді. Бұл ретте ол коорпоративтік сыбайлас жемқорлыққа қарсы іс-қимылға ерекше назар аудару қажет екенін ескертті. Сыбайлас жемқорлыққа қарсы саясат тұжырымдамасының бес жылға арналған жобасын қосымша нақтылау аясында барлық өңірлерде бизнес өкілдерімен талқылауды тапсырды.
Осы ретте Қызылорда облысының әкімі Гүлшара Әбдіқалықова Сыбайлас жемқорлыққа қарсы саясаттың 2022-2026 жылдарға арналған тұжырымдамасы жобасын аймақтың бизнес өкілдерімен талқылап, кәсіпкерлердің ұсыныс-пікірлерін тыңдаған еді.
Кездесуде аймақ басшысы сыбайлас жемқорлық мемлекеттік басқарудың тиімділігін төмендетіп, елдің инвестициялық тартымдылығын жоятынын тілге тиек етіп, келеңсіз құбылыспен күресте мемлекет пен қоғам күш-жігерін біріктіруі керектігін айтқан еді.
«Бүгінгі күні ҚР Сыбайлас жемқорлыққа қарсы саясатының 2022-2026 жылдарға арналған тұжырымдамасының жобасы әзірленді. Сыбайлас жемқорлық деңгейін төмендету және оған қарсы саясатты одан әрі дамыту осы құжаттың аясында жүргізілетін болады. Тұжырымдама жобасын талқылау кезінде азаматтық қоғам мен кәсіпкерлік субъектілерінің пікірі маңызды», – деді Гүлшара Әбдіқалықова.
Тұжырымдаманы әзірлеуде шетелдік тәжірибе мен халықаралық стандарттар ескерілгені анық. Әсіресе, тұрмыстық жемқорлықты жоюға, бюджеттік рәсімдер мен сатып алу тәртібінің ашық болуына, мемлекеттің экономикаға әсері мен әкімшілік кедергілерді азайту принциптері енгізілген. Тұжырымдамада нақты реформалар мен жобаларды қамтитын 6 міндеттер блогы бар. Бірінші блокта – сыбайлас жемқорлыққа төзбеушілікті қалыптастыру айқын көрсетіледі. Екінші блоктағы шаралар сыбайлас жемқорлық мүмкіндіктерін барынша азайтуға бағытталған. Үшінші блок жауапкершіліктің бұлтартпастығын қамтамасыз етуге үндейді. Төртінші блок азаматтық қоғамды сыбайлас жемқорлыққа қарсы іс-қимылға одан әрі ауқымды тарту жөніндегі шараларды қамтыса, бесінші блок сыбайлас жемқорлыққа қарсы саясат мониторингіне арналған. Ал соңғы блок сыбайлас жемқорлыққа қарсы іс-қимыл жөніндегі уәкілетті органның қызметін одан әрі жетілдіруге бағытталған.
«Тұжырымдамада нақты реформалар мен жобаларды қамтитын 6 міндеттер блогы бар» деп жоғарыда жаздық. Енді осыларға жеке-жеке тоқталсақ.
Біз сыбайлас жемқорлыққа мүлдем төзбеушілік қағидатын ілгерілету бойынша бірқатар шараларды қабылдаймыз.
Бұл – «жылдам жеңіс» емес, басым міндеттердің бірі, негізі. Яғни, құндылықтарды отбасы институты арқылы алға жылжыту маңызды екенін айтқым келеді. Сыбайлас жемқорлыққа қарсы тақырып мектепке дейінгі және барлық деңгейдегі білім беру жүйесіне енгізілуі тиіс. Сыбайлас жемқорлыққа қарсы оқытуды мемлекеттік қызметшілер үшін үздіксіз енгізуге ниеттіміз. Бұл өз кезегінде жемісін береді.
Шынын айтқанда, адам сыбайлас жемқорлық қылмысын пайда табу мақсатында немесе өз мәселесін арзан әрі жылдам шешу үшін жасайды. Сондықтан, біз сыбайлас жемқорлық материалдық жағынан тиімсіз болатындай етіп жағдай туғызуымыз керек. Бұл мемлекеттік қызметшілерге де, азаматтарға да, бизнеске де қатысты.
Екінші блогтағы тақырып – сыбайлас жемқорлық мүмкіндіктерін барынша азайтуға бағытталған шаралар.
Мұнда бюджеттік процестердің транспаренттілігін қамтамасыз ету бойынша шаралар әзірленді. Мемлекеттік бағдарламалар мен ұлттық жобаларды іске асыру барысына азаматтық мониторинг, бюджеттік қаражат бенефициарларының жария тізілімін енгізу көзделген.
Мемлекеттік қаржыландыруды нысаналы және өлшенетін индикаторлар болған кезде ғана жүзеге асыру ұсынылмақ. Тұтастай алғанда, бюджеттеуде жобалық қаржыландыруға көше отырып, қаржы жылы шегінде қаражатты игеруден бас тарту ұсынылады.
Бұл күнтізбелік жылдың соңында жалған жұмыс актілеріне асығыс қол қоюды болдырмауға мүмкіндік береді. Демек, мемлекеттік құжаттар мен жобаларды іске асыру кезінде жобалық менеджментті енгізу мемлекеттік басқарудың барлық деңгейлерінде сыбайлас жемқорлықты алдын алудың тиімді құралына айналады.
Бюджеттік субсидиялардың экономикалық тиімділігін арттыру үшін әлеуметтік маңызы бар салаларды жан басына қаржыландыру арқылы «ақша адамның соңынан ереді» қағидатын одан әрі дамыту маңызды саналады.
Жалпы, сапалы цифрландыру сыбайлас жемқорлықтың, ең алдымен тұрмыстық жемқорлықтың алғышарттарын төмендету факторы ретінде айқындалған.
Шаралардың үшінші блогы жауапкершіліктің бұлтартпастығын қамтамасыз етуге бағытталып отыр.
Революционерлердің ішінде сыбайлас жемқорлыққа тұрақтылықты тестілеуді енгізу, бұл жосықсыз қызметшілерді уақытылы анықтауға және жұмыстан босатуға, олардың сыбайлас жемқорлық әрекетінен қоғамға зиян келтіруіне жол бермейді. Ол үшін мемлекеттік органдардың басшыларына осындай тексерулерге өз бетінше бастамашылық жасау құқығы берілетін болады.
Сыбайлас жемқорлық құқықбұзушылықтарын жасағаны үшін заңды тұлғалардың жауапкершілігін күшейту жоспарланып отыр. Бұл оның мүддесі үшін сыбайлас жемқорлық қылмыс жасаған кезде компанияның әкімшілік жауапкершілігі болады.
Төртінші блок азаматтық қоғамды сыбайлас жемқорлыққа қарсы іс-қимылға одан әрі ауқымды тарту жөніндегі шараларға арналған.
Қоғамдық бақылауды іске асыру тетіктері парасаттылық мәдениетін қалыптастыруға барлық тілек білдірушілердің қатысу мүмкіндігін қамтамасыз ете отырып, қоғамдық кеңестердің қызметімен шектелмейді. Сондықтан, «Қоғамдық бақылау туралы» Заңның қабылдануы маңызды саналады.
Мемлекеттік органдардың шешімдері туралы ақпараттың жариялылығы азаматтық қоғаммен сындарлы диалогқа жәрдемдеседі. Бұл ретте мемлекеттік органдар ұсынатын ақпараттың деректердің түсініктілігін қамтамасыз ете отырып, шашыраңқылығын жою жөнінде шаралар қабылданбақ.
Сыбайлас жемқорлыққа қарсы іс-қимылда БАҚ пен журналистердің әлеуетін кеңейту жөнінде шаралар қабылданатын болады. Сондай-ақ, сыбайлас жемқорлық туралы хабарлау тетіктерін жақсарту және осындай фактілер туралы хабарлайтын адамдарды қорғау бойынша шаралар жүзеге асады.
Бесінші блок сыбайлас жемқорлыққа қарсы саясат мониторингіне бағытталған.
Оны объективті бағалау және енгізілетін жобалық тәсілді ескере отырып, барабар шаралар қабылдау үшін арнайы мониторинг жүйесін құру ұсынылады.
Бұл үшін жобалық басқарудың ақпараттық жүйесі мүмкін платформа бола алады, онда бүгінде әлеуметтік маңызы бар жобаларды іске асырудың тиімділігіне күнделікті мониторинг пен бақылау қамтамасыз етіледі.
Жүйенің жариялылығы жұртшылықтың сыбайлас жемқорлыққа қарсы күрес саласындағы басқару шешімдерін әзірлеуге және іске асыруға, сондай-ақ сыбайлас жемқорлыққа қарсы саясаттың тиімділігін бағалауға толыққанды қатысуына мүмкіндік береді.
Осы жүйеде сыбайлас жемқорлықтың алдын алу бөлігінде министрлер мен әкімдердің рейтингтік бағасы көрсетілетін болады.
Сыбайлас жемқорлықты қабылдаудың Ұлттық индексін енгізу ұсынылады. Бұл белгілі бір дәрежеде халықаралық рейтингтерге тәуелділікті төмендете отырып, икемді әрекет етуге және уақтылы түзетулер енгізуге мүмкіндік береді.
Алтыншы блок сыбайлас жемқорлыққа қарсы іс-қимыл жөніндегі уәкілетті органның қызметін одан әрі жетілдіруді көздейді.
Үлкен деректерді талдау негізінде интеграцияланған талдау құралдарын қолдану қарастырылған. Квазимемлекеттік сектордың комплаенс-қызметтерінің қызметін үйлестіру бөлігінде Агенттіктің құзыретін кеңейту көзделген.
Сыбайлас жемқорлықтың алдын алу мәселелерінде кешенділік пен толықтығын қамтамасыз ету үшін мемлекеттік және жергілікті атқарушы органдардың әдеп жөніндегі уәкілдерін сыбайлас жемқорлыққа қарсы бағыттағы олардың рөлін күшейте отырып, «қайта жүктеуді» жасау ұсынылады.
Жаңа сын-қатерлерді ескере отырып, цифрлық қаржы активтерін, криптобиржаларды және басқа да цифрлық платформаларды пайдалана отырып, жасалған қылмыстарды анықтау және жолын кесу бойынша шаралар қабылданады. Осы аспектіде қызметкерлеріміздің біліктілігін арттыруымыз қажет.
Сыбайлас жемқорлыққа қарсы озық стандарттарды одан әрі имплементациялау жөніндегі, оның ішінде ГРЕКО мен ЭЫДҰ ұсынымдарын сапалы іске асыру жолымен іс-қимыл пысықталатын болады.
Тұтастай алғанда, дайындалған құжатта олардың сапалы іске асырылуы жағдайында біздің қоғамдағы сыбайлас жемқорлықты жоюға ықпал етуге қабілетті шаралар бар деп айта аламыз. Тұжырымдаманы іске асыруда бізге азаматтардың, кәсіпкерлердің, үкіметтік емес ұйымдардың көмегі қажет болады.
Жемқорлыққа қарсылық – елдің ертеңіне деген қамқорлық. Ел-жұрт ең әуелі осыны ұғынуы қажет секілді. Сыбайлас жемқорлыққа қарсы тиімді шаралардың бірі – жемқорлықтың алдын алу, оны мейлінше азайту. Бұл – мемлекеттік саясаттың да басымды бағыттарының бірі. Осы орайда, ҚР Сыбайлас жемқорлыққа қарсы іс-қимыл агенттігінің Қызылорда облысы бойынша департаментінде де көптеген іс-шара атқарылып жатыр.
Негізі, Сыр өңірінде парасаттылық идеологияның драйвері болып табылатын Арнайы мониторингтік топ, «Ақмешіт – Адалдық алаңы», Ақпараттық-ағартушылық штаб мүшесі, «Адал Ұрпақ», «Саналы Ұрпақ», «Парасатты жол», т.б. жобалар жүзеге асырылуда. Бұл жобалардың әрқайсысы бір-бір тақырыптың жүгін көтеруге жарайды.
Сонымен, сыбайлас жемқорлық сипатындағы қылмыстар, оларды тергеу, кінәлілерді жауапкершілікке тарту – арнайы мамандардың ісі делік. Дегенмен, осы жұмыстардың нәтижесі, сыбайлас жемқорлық тәуекелдің туындау себептеріне қатысты еліміздің әрбір азаматының өзіндік пікірі болуы шарт. Демек, ел ертеңі үшін сыбайлас жемқорлық пен оның көріністеріне қарсылық туындауы кез келген азамат үшін қалыпты жағдайға айналуы қажет.
Ғалия ӘЛІМҚҰЛОВА,
ҚР Сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының бірінші орынбасары

Жемқорлыққа қарсылық – елдің ертеңіне деген қамқорлық

<a href="https://kyzylorda-news.kz/">Kyzylorda-news.kz.</a>&nbsp; Сырдарияда соңғы уақытта бұқаралық спортты дамыту мақсатында арнайы спорт клубтары көптеп ашылуда. Жақында кезекті рет «Syrdarya» спорттық-зияткерлік орталығы ашылды. &nbsp;Жаңадан ашылған ғимарат базасын­да халықаралық «Қазақ тілі қоғамы» ҚБ Сырдария аудандық филиа­лының ұйымдастыруымен «Ел намысын қорғаушылар Отан қор­ғаушыдан бата алады» тақырыбында кездесу өтті.
Жиынға аудан әкімінің орынбасары Талғат Нұртазаев, ҰОС-ның ардагері Яхия Тасыров, аудандық мәслихат депутаты Ақтөре Ибрагимұлы, №11 Сырдария ауданының олим­пиадалық резервтің мамандандырылған ба­лалар мен жасөспірімдер мектебінің директоры Бағдат Есенов, еңбек ардагері Мектепхан Елеусінов, халықаралық «Қазақ тілі қоғамы» ҚБ Сырдария аудандық филиа­лының төрғасы Шаһарбек Нұрсейітов, тоғыз­құмалақтан облыс құрамасының бас жаттық­тырушысы Хәкімжан Елеусінов, ауданның бас жаттықтырушысы Білімжан Елеусінов және спортшылар қатысты. Кездесу кешін ашқан аудан әкімінің орынбасары Т.Нұртазаев орта­лықтың ашылуымен құттықтап, спорт­шыларға сәттілік тіледі.
<blockquote>
 «Әр жылдары аудан спортын жетілдіруге көңіл бөлінуде. Біз тоғызқұмалақ және шахмат үйірмесіне тұрақты түрде қатысатын жаңа орталықтың ашылғанына қуаныштымыз. Спорт­шыларымыз ыңғайлы ғимаратта алаң­сыз дайындық жүргізе алады. Сонымен бір­ге жақсы істі бастамас бұрын қазақ халқы үлкеннен бата алған. Міне,&nbsp; спорт саңлақтары батагөй қария Яхия Тасыровтың батасын алып, ұрпақтар сабақтастығын жаңғыртуда. Жыл көлемінде Сыр мақтаныштары жоғарғы жетістікке жетуіне тілектеспін», – деді Талғат Мейрамханұлы.
</blockquote>
Өз кезегінде Ұлы отан соғысының ардагері Яхия Тасыров майдан даласында&nbsp; көрген қиын­дықтарын жас ұрпаққа айтып берді. Ал­дағы байрақты бәсекелерден топ жаруы үшін спортшыларға ақ батасын берді.
<blockquote>
 «Сырдың мерейін тасытып жүрген&nbsp; спортшы балаларыма сәттілік тілеймін! Біздің ке­зімізде нағыз қиын-қыстау күндер туды. Елі­мізден жырақта жүрсек те Отанды қорғауға барымызды салдық. Қан майданды көзімізбен көріп, ауыртпалықты сезіндік. От пен оқтың арасында жүріп, ел үшін жаумен күрестік. Ол уақытта оқуға түсу қиындық соқтыратын. Ешбірімізге мұндай бейбіт күндегідей барлық мүмкіндік жасалған емес. Өткеннен сабақ алып, жақсылыққа ұмтылған абзал. Спортшыларымыз табысты бола берсін», – деді батагөй ақсақал.
</blockquote>
Іс-шара барысында №11 Сырдария ау­данының олим­пиадалық резервтің мамандан­дырылған ба­лалар мен жасөспірімдер мек­тебінің директоры Б.Есенов, тоғыз­құмалақтан облыс құрамасының бас жаттық­тырушысы Х.Елеусінов сөз сөйлеп, спортшыларға ақ­жарма тілегін жеткізді. Сырдариялық спорт­шылардың қатарында Бексұлтан Бостан­дықов, Жантөре Аманқос, Дамир Ахметов, Ерасыл Пернебаев, Айым Ақылбек, Нұ­рай Мектепхан, Нұрила Мектепхан, Әсем Дәуренбек секілді мықты спортшылар бар. Кент мәде­ниет үйінің мәдени ұйымдастырушысы Ербол Сағымбайұлы жиналғандарға домбырамен күй тартып берді. Спортшылар мен қонақтарға&nbsp; халықаралық «Қазақ тілі қоғамы» ҚБ Сырдария аудандық филиалы атынан арнайы сыйлық тапсырылды.
<img src="https://kyzylorda-news.kz/wp-content/uploads/2022/02/db6c1bae-d15d-481c-bf96-3bb13badf3fb.jpg" alt="" />
<img src="https://kyzylorda-news.kz/wp-content/uploads/2022/02/ba7d3882-84c4-4a58-8957-a89cf302cdb0.jpg" alt="" />

«Syrdarya» спорттық-зияткерлік орталығы ашылды

<a href="https://kyzylorda-news.kz/">Kyzylorda-news.kz.</a> Бүгінгі таңда жастардың бос уақытын тиімді пайдалану, оларды салауатты өмір салтына баулу – ең өзекті мәселелердің бірі екені жасырын емес.
Бұл бағытта Қазалы ауданында ауқымды жұмыстар атқарылуда. Қазіргі таңда Қ.Пірімов ауылында спорт кешенінің құрылысы жүргізіліп жатыр.
Алдағы уақытта Қазалы қаласы мен Әйтеке би кентінің екі аралығынан, Ү.Түктібаев, Бекарыстан би ауылдарынан спорт кешенін салу үшін тиісті жоба-сметалық құжаттары әзірленіп, қаржыландыру үшін ұсынылды.
Одан бөлек аудан әкімі Мұхтар Оразбаев аудан орталығындағы «Жеңіс» саябағының ішінен спорт кешенін салу үшін тиісті сала басшыларына тапсырма берді.
Қазіргі таңда жоба-сметалық құжаттарын дайындау үшін қаржы бөлініп, тиісті жұмыстар атқарылуда.
Бүгін аудан әкімі Мұхтар Оразбаев жаңа спорт кешені салынатын орынды белгілеп, тиісті сала басшыларымен біргеатқарылуы тиіс жұмыстарды талқылады.
Сондай-ақ, аудандық құрылыс, сәулет және қала құрылысы бөлімінің басшысы Нұрбек Күзембаевқа тез арада құжаттарын дайындап, қаржыландыруға ұсынуды тапсырды.
<img src="https://kyzylorda-news.kz/wp-content/uploads/2022/02/01-2.jpg" alt="" />
<img src="https://kyzylorda-news.kz/wp-content/uploads/2022/02/02-1.jpg" alt="" />

Қазалыда спорт кешендерінің саны артады

<a href="https://kyzylorda-news.kz/">Kyzylorda-news.kz.</a> Алғыс айту бұл қоғам мүшелерінің адамдардан, табиғаттан немесе бақытты сәттерден алған жақсылықтарына оң жауап беруге мүмкіндік беретін қасиеті немесе көңіл-күйі. Көптеген зерттеулерде алғыс айту адам бойындағы ең маңызды қасиеттердің бірі ретінде айқындалады.
Алғыс айту психологиялық, тұлғааралық, жеке және физикалық тұрғыда пайда әкелетіндігі дәлелденген. Ежелгі римнің саяси қайраткері Цицерон алғыс айтуды барлық ізгі істердің бастаушысы, негізін салушысы деп түсінген. Ғасырлар бойы философтар мен жазушылар Цицеронмен келіскен секілді, олар алғыс білдіруді ізгілік ретінде қарастырып, жақсылықты бағаламау, рақметі жоқтықты моральдық кемшілік ретінде қарастырды. Сондықтан адамның алғыс білдіруі туа біткен қасиет емес және оның дамуын зерттеу қажет.
Алғыс айтуды философиялық тұжырымдама ретінде зерттеу де маңызды. Мәселен, Аристотельден Кантқа дейінгі философтардың алғыс айту туралы ойлары мен идеяларының философиядағы рөлін білгеніміз дұрыс секілді. Философиялық тұрғыдан алғыс айтудың үш негізгі әдісін атауға болады: сыйлыққа немесе жақсылыққа жауап ретінде берілетін сезім; ризашылығымызды білдіру үшін жасайтын әрекет; өмір сүріп отырған дүниеге берілетін алғыс, ризашылық. Сүйіспеншілік пен сенім секілді алғыс айту бұл біздің өміріміздегі өзге адамдарға олардың мейірімділігі, тартымдылығы мен сенімділігі үшін берілетін жауап беру тәсілі. Алғыс айту адамдардың өзгелерді сезінуінен туындайтын әрекетке ұқсайды. Бұл қарым-қатынас барысындағы өзімізді көрсетудің негізгі тәсілі.
Алғыс айту этикетті сақтаудың, әдептіліктің белгісі. Жақсылық жасау жолындағы қайырымдылық азаматтық қоғамды нығайту үшін маңызды. Жаңа дәуірдің Еуропалық ойшылдары ризашылық ауыртпалығынан босатылған саяси экономия туралы пікірлер білдіреді. Бүгінде психологтар алғыс айту тақырыбына қызығушылық танытып отыр және ол позитивті психологияның дамуына байланысты деген пікір басым. Дегенмен, бұл пікір дұрыс емес, дамып келе жатқан құбылыс ретінде алғыс айтуға деген қызығушылық жақында пайда болған жоқ және осы тақырыптағы алғашқы жұмыстардың өзін танымал психолог Ф. Баумгартен-Трамер 1938 жылдары жүргізді. Швейцарлық психолог Ж. Пиаженің пайымдауынша, алғыс айту арқылы ризашылық білдіру балалық шақта пайда болады және моральдық дамудың маңызды аспектісі болып табылады. Адам дамуының позитивті аспектілерін зерттеу ұзақ уақыт бойы даму психологиясы мен моральдық психологияның қайнар көзі болды. Позитивті психологияның әсерінен ризашылық жағымды сыйлықтан бастап адамда бар нәрсені бағалауға дейінгі көптеген ахуалдан кейін туындайтын жағымды эмоция ретінде қарастырылуы мүмкін.
Кішкентай баладан алған сыйы үшін «рақмет» айтуды сұраймыз және ол оны орындайды. Жасөспірім өз киімдерінің достарына қарағанда қымбат екенін бағалайды және арзан киімдер кимейтініне ата-анасына ризашылығын білдіреді. Жалпы күнделікті үй жұмыстары ата-аналар мен олардың балалары арасындағы эмоционалды отбасылық қарым-қатынастағы шешуші рөлді атқарады және балалардың ризашылығын дамытудың маңызды құралы болып табылады. Сирек көретін туысы студентке өзінің армандаған оқу орнына түсуге мүмкіндік береді және ол мүмкіндігінше көп оқуға, кейін осы жақсылығын қайтаруға уәде береді. Жақында ғана көмектескен адамға реті келсе кез келген уақытта көмектесуге дайын боламыз. Жалғыз тұратын кез келген адам өз денсаулығының жақсы екендігіне ризашылық білдіреді. Демек, алғыс айту эмоция, ізгілік, моральдық сезім, түрткілер, шеберлік пен қатынастар ретінде тұжырымдалады. Негізі кез келген іс-әрекетке бейімделуде диспозициялық алғыс айту үлкен рөлі атқарады.
Алғыс айту барысында парыз, міндет және моральды талаптар ұғымдарын пайдаланған дұрыс секілді. Парыз адамның ішкі қабылданған ерікті міндеттемесі, адамның ар-ожданымен ұштасқан міндеті. Бұл этикадағы негізгі ұғымдардың бірі. Мұнда адамның іс-әрекеті моральдық тұрғыдан негізделген қысым немесе негіздеме бойынша жасалады. Міндет болса, мінез-құлықтың субъективті қағидасы ретінде моральдық қажеттілік негізінде бекітіледі. Философияда міндет моральдың императивті түрі болып саналады. Біреу белгілі бір әрекет жасауға міндетті немесе жасаудан бас тартуына болады. Әрекетті моральдық тұрғыдан жасауға міндеттілік немесе жасаудан бас тартушылық адамның адамгершілік тарапынан туындайтын қимылы деуімізге болады. Жалпы моральдық талаптар барлық қоғам мүшелерінің басқаларға қатысты міндеттемелері болып табылады.
Жалпы алғыс айту жақсы өмір сүрудің &nbsp;маңызды компоненттерін иеленген. Көптеген корреляциялық және эксперименттік зерттеулер алғыс айтудың денсаулықты жақсартады деген теориясын растап отыр. Сондықтан қоршаған ортаға жағымды факторлар және өзімізге бақыт пен денсаулық сыйлау үшін үнемі алғыс айтып жүрейік!
Мұрат НАСИМОВ,
Саяси ғылымдарының кандидаты, қауымдастырылған профессор, «Болашақ» Ғылыми-зерттеу институтының директоры, облыстық Қазақстан халқы ассамблеясы жанындағы ғылыми сараптамалық топтың мүшесі

Мұрат Насимов: Алғыс айтуды философиялық тұжырымдама ретінде зерттеу де маңызды

<a href="https://kyzylorda-news.kz/">Kyzylorda-news.kz.</a> Тестілеу – мемлекеттік қызметке кірудің міндетті шарты болып табылады. Кез келген азамат тестілеуден өтуге өтінімді үйден шықпай-ақ, «egov.kz» электронды үкімет порталы немесе «Азаматтарға арналған үкімет» мемлекеттік корпорациясының Халыққа қызмет көрсету орталықтарына жүгіну арқылы бере алады.
Бұл ретте, тек бір ғана құжат – ЖСН бар Қазақстан Республикасы азаматының жеке басын куәландыратын құжат қажет.
Тестілеуге тіркелу үшін «egov.kz» электронды үкімет порталына кіріп, төмендегі қызметтерді орындау қажет:
– «Жұмысқа орналастыру және жұмыспен қамтылу»;
– «Мемлекеттік қызмет»;
– «Мемлекеттiк қызметшiлерді, бос мемлекеттік әкімшілік лауазымға орналасуға үміткерлерді және құқық қорғау қызметіне алғаш рет кіретін азаматтарды тестілеу»;
– «ОНЛАЙН СҰРАУ»;
– Бағдарламаны өз қалауынша таңдау (мемлекеттік әкімшілік қызметтің 1-ші немесе 2-ші немесе 3-ші);
– Жеке қасиеттерді таңдау (әкімшілік мемлекеттік қызмет);
– Тестілеуден өтуді қалайтын күні мен уақытын, сондай-ақ тестілеу тапсыратын қаланы өз қалауына қарай таңдау қажет;
– Тіркелу кезінде тестілеуден өтетін күнін, уақытын және орнын көрсете отырып, қолхат берілу қажет және бұл құжат өтінім қабылданғанын растау болып табылады.
Тестілеу кестесі автоматты түрде құрылады.
Тестілеуге қатысу үшін тестілеу залына қолхатта көрсетілген уақыттан кешікпей келу қажет.
Тестіленуші жеке куәліксіз, сондай-ақ қолхатта көрсетілген уақыттан кешіккен жағдайда, тестілеуге жіберілмейді.
Тестілеу басталар алдында нұсқама өткізіледі, оның барысында тестіленуші адам тестілеуді өткізу тәртібі бойынша толық ақпарат алады.
Заңнаманы білуге арналған тестілеу нәтижелері бойынша одан сәтті өткен жағдайда, жарамдылығы 1 жыл мерзімге жарайтын сертификат, ал тестілеуден өте алмаған үміткерлерге төмен нәтижелермен тестілеу өткендігі туралы анықтама беріледі.
Бұл жағдайда, осы тестілеуден өткен күннен бастап күнтізбелік он бес күн мерзімнен кейін тестілеуден қайта өтуге болады.

Мемлекеттік қызмет: Тестілеуге қалай өтінім беруге болады?

<a href="https://kyzylorda-news.kz/">Kyzylorda-news.kz.</a>&nbsp;Былтыр қоршаған ортаны қорғау шеңберінде 64 субьектіге бақылау жүргізілді. Нәтижесінде, экологиялық заңнама талаптарын бұзудың 137 фактісі анықталып, тиісті құқықтық шаралар қарастырылды. Бұл жөнінде Өңірлік коммуникациялар қызметінде өткен брифингте Қызылорда облысы бойынша экология департаменті басшысы орынбасарының міндетін атқарушы Ертай Жайназаров мәлімдеді.
<blockquote>
 «Экологиялық талаптарды өрескел бұза отырып, шаруашылық қызметін жүзеге асырған 10 нысанның жұмысы уақытша тоқтатылды. Сондай-ақ, өткен жылы аймақта кең таралған пайдалы қазбаларды өз бетінше заңсыз өндірудің 11 дерегі анықталды. Осы бойынша құқықтық шаралар жүргізілді. Байқоңыр қаласы аумағында 1,9 млн тонна құрылыс және басқа да қалдықтардың жатқандығы белгілі болды. Осыған байланысты, 2021-2023 жылдарға арналған құрылыс қалдықтарын жинау жөніндегі Жол картасы жүзеге асырылмақ. Қазіргі таңда белгіленген аумақтарда тазарту жұмыстары жүргізілуде. Сонымен қатар, ірі табиғат пайдаланушыларының және экологиялық қауіптілігі жоғары нысандар, мемлекеттік экологиялық сараптаманың теріс қорытындысын алған 14 жоба сарапшылық кеңесімен қайта қаралды», – деді Ертай Жайназаров.
</blockquote>

Қазақстан және Қызылорда облысының жаңалықтары