<h4 id="kyzylordanewskzhttpskyzylordanewskzruobshestvo"><a href="https://kyzylorda-news.kz/ru/obshestvo/">Kyzylorda-news.kz</a>. Палата төрағасының орынбасары Асқар Шәкіров Дүниежүзілік банктің Еуропа және Орталық Азия өңірі жөніндегі Вице-президенті Анна Бьердемен келіссөз жүргізіп, Қазақстанның осы халықаралық ұйыммен өзара іс-қимыл мәселелерін талқылады.</h4>
Төраға орынбасары Дүниежүзілік банкпен стратегиялық серіктестіктің маңызын атап өтті. Қазақстанда қазіргі уақытта банктің көмегімен әлеуметтік-экономикалық және экология салаларында жалпы сомасы 3,5 млрд&nbsp;доллар болатын 12 жоба іске асуда.
Анна Бьерде инклюзивтік өсу, адам капиталын нығайту, мемлекеттік сектордың тиімділігін арттыру, елдің институционалдық дамуына жәрдемдесуді банк қызметінің Қазақстандағы негізгі бағыттары ретінде белгілегенін айтты. Бұл тұрғыда нәтижеге бағдарланған бюджетті жетілдіруде Үкіметке техникалық жәрдемдесу дербес назар аударуды талап етеді.
Жүздесушілер Глазгодағы климаттық саммиттің қорытындыларын, Қазақстандағы булану нәтижесіндегі шығарындыларды 15%-ға азайту, көміртегінен бейтарап болуға 2060 жылға дейін қол жеткізу жөніндегі жоспарларын талқылады. Қазақстан Республикасының Президенті Қасым-Жомарт Тоқаевтың елімізде Орнықты даму жөніндегі Орталық Азия Аймақтық климаттық хабын құру бастамасына қолдау білдірілді.
Дүниежүзілік банктің Вице-президенті Қазақстандағы булану нәтижесіндегі шығарындыларды азайтуға ықпал ететін мал шаруашылығын тұрақты дамыту бағдарламасын тез арада ратификациялауға мүдделі екенін жеткізді. Осыған байланысты мал шаруашылығы саласын дамыту құралдарын жетілдіру арқылы климаттық өзгерістерге қарсы күрестегі Қазақстанның көшбасшылығы атап өтілді.
<blockquote>
 Су ресурстарын тиімді пайдалану және қоршаған ортаны қорғаумен бірге Орнықты даму мәселелерінің мән-маңызы бірінші дәрежеге ие әрі баршаға ортақ. Арал теңізі апатының салдарымен күрес Орталық Азия мемлекеттерінің ортақ проблемасы, сондай-ақ&nbsp;екі және көпжақты негізде шешілуі тиіс, – деді Сенат төрағасының орынбасары.&nbsp;
</blockquote>
Банктің қолдауымен жүзеге асқан экологиялық жобалар су деңгейінің жоғарылауына, Арал теңізінің солтүстік бөлігіндегі балық аулауды қалпына келтіруге, сондай-ақ жалпы экологиялық жағдайды жақсартуға ықпал етті.
Дүниежүзілік банк өкілі Орнықты даму мақсаттарын іске асыруда Қазақстанға жәрдемдесуге және климаттың өзгеруіне қарсы күресте бастамаларды ілгерілетуге ықпал етуге дайын екендігін білдірді.
<a href="https://baq.kz/authors/?author=16730">BAQ.KZ</a>

Сенатор: Арал апатымен күрес – Орталық Азия мемлекеттерінің ортақ мәселесі

<a href="https://kyzylorda-news.kz/ru/obshestvo/">Kyzylorda-news.kz</a>. Көкпар жарысы кезінде Шиелі ауданы Балаби ауылының тұрғыны 25 жастағы кәсіпкер Манар Маханов астындағы атымен бірге құлап қалды. Жылқы шабандозды қысып, оның ішкі мүшелерін зақымдады. Зардап шеккен азаматты Шиелі аудандық ауруханасына жеткізіп, шұғыл ота жасады. Қазіргі таңда науқастың жағадайы тұрақты.
<blockquote>
 «Жылқы үстіме барлық салмақпен құлады. Ішек, асқазан, ұйқы безімде жарақат алдым. Ота барысында жыртылған жерлер тігіліп, ішкі мүшелерімде қан кетуді тоқтатты. 5 күн жансақтау бөлемінде жаттым. Дәрігерлерге уақытылы, кәсіби медициналық көмек көрсеткені үшін алғысым шексіз», – дейді Манар.
</blockquote>
Аудандық аурухананың хирург дәрігері Азамат Мақұлбековтың айтуынша, науқас МӘМС жүйесінде сақтандырылған сондықтан денсаулық жағдайы жақсарғаннан кейін медициналық оңалтуға жіберіледі. Дәрігер көп жағдайда жедел холециститпен, соқыршекпен сондай-ақ әртүрлі жарақаттармен шұғыл науқастар түсетінін атап өтті.
<blockquote>
 «Пышақ жарақаттары бар науқастардың өмірін бірнеше рет құтқардық. Олардың бірінің бауыры, асқазаны, бүйрегі, ішегі зақымдалған, ал басқа аудан тұрғынының жүрегінде пышақ жарақаты болған. Екеуі де құтқарылды. Балалар мен ересектерден түйреуіштер, батареялар, тіс тазартқыштар, балық сүйектері және т.б. сияқты бөгде заттарды алу бойынша көптеген ота жасалды. 2015 жылдан бастап ауруханада аз инвазивті хирургиялық медкөмектер жүзеге асырыла бастады», – дейді дәрігер.
</blockquote>
Жыл басынан аудандық аурухананың хирургия бөлімінде міндетті әлеуметтік медициналық сақтандыру шеңберінде 886 науқасқа, ал тегін медициналық көмектің кепілдік берілген көлемі бойынша – 131 науқасқа медициналық көмектер көрсетілді. Осы мақсаттарға Әлеуметтік медициналық сақтандыру қорынан 179,7 млн теңге бөлінді.

Шиеліде дәрігерлер аттан құлаған көкпаршыны аман алып қалды

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстанда 1 271 адам коронавирус инфекциясынан жазылып шықты, деп хабарлайды коронавирустың таралуына жол бермеу жөніндегі ведомствоаралық комиссия.
Нұр-Сұлтан қаласында – 104,
Алматы қаласында – 75,
Шымкент қаласында – 20,
Ақмола облысында – 120,
Ақтөбе облысында – 0,
Алматы облысында – 201,
Атырау облысында – 51,
Шығыс Қазақстан облысында – 268,
Жамбыл облысында – 10,
Батыс Қазақстан облысында – 8,
Қарағанды облысында – 132,
Қостанай облысында – 6,
Қызылорда облысында – 24,
Маңғыстау облысында – 0,
Павлодар облысында – 77,
Солтүстік Қазақстан облысында – 152,
Түркістан облысында – 23.
Елімізде барлығы 915 369 адам COVID-19-дан емделіп, сауығып шықты.

COVID-19: 24 қызылордалық жазылып шықты

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Ұлттық валюта – теңгенің айналымға енген күні және ҚР қаржы саласы қызметкерлерінің кәсіби мерекесі, деп хабарлайды ҚазАқпарат.
Төл валютамызды дайындау жұмыстары 1992 жылы қолға алынып, сол жылдың 27 тамызында Ұлттық банк теңге купюрасының үлгілерін бекіткен еді. Содан кейін қазақ валютасын салған суретшілер Тимур Сүлейменов, Меңдібай Алин, Ағымсалы Дүзелханов, Қайролла Әбжәлеловтер Англияға аттанды.
Ұлттық валютаны «теңге» деп атауды ұсынған Халықаралық Инженерлер академиясының академигі, Қазақстанның белгілі ғалымы, КСРО Мемлекеттік сыйлығының лауреаты, «Құрмет» орденінің иегері Сауық Тәкежанов еді. «Теңге» сөзі – түркі халқының орта ғасырда есеп айырысқан күміс монеталарының атынан пайда болған. Осылайша теңге атауының қайта оралуы – XIII ғасырда өз монеталары соғыла бастаған еліміздің Отырар мен Тараз сияқты ірі қаласының дәстүрін жалғастырды.
1992 жылы теңге дизайнындағы портреттер бекітілді. Ал 1993 жылы алғашқы теңге партиясы Англияның ең көне және әйгілі «Харрисон және ұлдары» фабрикасында басылып шықты.
Бұл жайында ҚР Тұңғыш Президенті Нұрсұлтан Назарбаев былай деп еске алған еді: «Ил-76» төрт ұшағын жалдап алып, ақшамыздың 60 пайызын тасып әкелдік. Бұл өте құпия операция еді. Құжаттарға: «Мемлекет басшысының салынып жатқан резиденциясына керекті мүлік» деп жазылды. Оған дейін облыстарда жерасты қойма жасатып қойдық. Төрт ұшақ аптасына Лондон-Орал, одан облыстарға дейін әрлі-берлі он сегіз рейс жасап тұрды. 12 қарашаны мен ақшаны енгізу күні деп жарияладым. Жиырма күнге жетер жетпес уақыт қалды. ҰҚК басшыларының бәрін операцияны өткізуге жұмылдырдым. Ең қиыны ақшаны барлық аудандарға, барлық банкілерге жеткізу. Ол сегіз күннің ішінде атқарылып шықты. Бәлкім дүниежүзінде жаңа ақшаны енгізу тап осындай тез әрі табысты жүзеге асырылған жоқ шығар»…
1993 жылдың қазан-қараша айларында Қазақстан рубль аймағынан толықтай шығып, 15 қараша күні теңге ресми айналымға енді. Ескі ақшаны қазақстандық теңгеге айырбастау сол жылдың 15 қарашасы таңғы 8.00-де басталып, 20 қараша күні 20.00-де аяқталған еді.
1994 жылы қағаз тиындардың орнына жезден жасалынған 2,5,10, 20 және 50 номиналды монеталар шықты. 2006 жылы 15 қарашада 200, 500, 1000, 2000, 5000 және 10000 теңгелік банкноттар жаңа дизайнда жарыққа шықты. Қазіргі уақытта банкноттар Ұлттық банктің Алматы қаласындағы Банкнот фабрикасында, ал монета – Өскемендегі Монета сарайында шығарылады.
Теңгенің алғашқы банкноттарында Сүйінбай Аронұлы, Құрманғазы, Абай, Шоқан Уәлиханов, Әбілқайыр хан, Абылай хан, әл-Фараби сынды белгілі тарихи тұлғалардың портреттері, Алатау мен Көкшетау көріністері, Қожа Ахмет Яссауи кесенесінің бейнесі, Маңғыстаудан табылған тастағы таңбалар пайдаланылды. Бір теңгелік банкнотқа Әбу Насыр әл-Фараби, үш теңгелікте Сүйінбай, бес теңгелікте Құрманғазы, он теңгелікте Шоқан, жиырма теңгелікте Абай, елу теңгелікте Әбілқайыр хан, жүз теңгелікте Абылай хан бейнесі сомдалды.
Кейіннен теңгедегі тарихи тұлғалардың бейнелері алынып тасталды, дизайндары өзгертілді. Бірақ Қазақстан теңгесі өз тарихында үш жыл қатарынан «Үздік банкнот» атағын алған валюта ретінде тарихта қалды.
Жыл сайын халықаралық банкнот қоғамдастығы интернет-дауыс беру арқылы жылдың ең үздік банкнотын анықтайды. Дәл осы қоғамдастық «2011 жылғы ең үздік банкнот» атағын Қазақстан Республикасы Тәуелсіздігінің 20 жылдығына арналған 10 000 теңгелік естелік банкнотына берген болатын. Келесі жылы да ҚР Ұлттық Банкінің «Қазақ Елі» сериясынан 5 000 теңгелік банкноты екінші рет «2012 жылғы ең үздік банкнот» атағын иеленді. Ал Түркі жазба ескерткішіне арналған, 1 000 теңгелік «Kүлтегін» ескерткіш банкнотына үшінші «2013 жылғы ең үздік банкнот» атағы берілген.
Ұлттық банк алғашқыда 1 теңгені сол кездегі 1000 рубльге бағалаған болатын. Алайда, кейін еліміздің саяси және әлеуметтік, мемлекетаралық қатынастары ескеріліп, 1 теңге 500 рубль бағамында белгіленді. Сондай-ақ, теңге бірінші айналымға кірген күні 1 доллар 4,75 теңге болып бекітілді. Қазіргі уақытта – 1 рубль – 5,96 теңге, 1 АҚШ доллары – 429,59 теңге.
Мемлекет басшысының Жарлығымен 1997 жылдан бері 15 қараша – төл валютамыздың туған күні әрі қаржыгерлер күні болып белгіленді.

15 қараша – теңгенің айналымға енген күні

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстанда коронавирусқа қатысты 14 қарашадағы эпидемиологиялық жағдай бойынша коронавирус инфекциясын жұқтырған ПТР тестінің оң нәтижесі бар өткен 1 038 жағдай тіркелді, деп хабарлайды Коронавирустың таралуына жол бермеу жөніндегі ведомствоаралық&nbsp;<a href="https://t.me/MVK_kz_Covid19/15853">комиссия</a>.
Елімізде коронавирус инфекциясын жұқтырғандар саны 957 537 жетті.
Оның ішінде:
Нұр-Сұлтан қаласында – 112,
Алматы қаласында – 143,
Шымкент қаласында – 4,
Ақмола облысында – 79,
Ақтөбе облысында – 15,
Алматы облысында – 52,
Атырау облысында – 16,
Шығыс Қазақстан облысында – 55,
Жамбыл облысында – 9,
Батыс Қазақстан облысында -17,
Қарағанды облысында – 112,
Қостанай облысында – 113,
Қызылорда облысында – 18,
Маңғыстау облысында – 13,
Павлодар облысында – 125,
Солтүстік Қазақстан облысында – 141,
Түркістан облысында – 14.

Қызылордада 18 адамнан коронавирус табылды

<a href="https://kyzylorda-news.kz/ru/obshestvo/">Kyzylorda-news.kz</a>. «Қазгидромет» 15 қарашадағы ауа райына қатысты болжамын жариялады.
Синоптиктердің болжауынша, бүгін солтүстік-батыс циклоны Қазақстан территориясымен тез жылжи отырып, еліміздің солтүстік жартысында көбінесе қар, оңтүстігіне жаңбыр жаууына ықпал етеді.
Республиканың басым бөлігінде жел күшейіп, солтүстікте жаяу бұрқасын, көктайғақ болып, оңтүстікте тұман түседі.
Таңертең және күндіз Қызылорда облысының солтүстігінде көктайғақ болады.

Қызылордада көктайғақ болады

Kyzylorda-news.kz. ҚМДБ-ның Қызылорда облысы бойынша өкілдігінің ұйымдастыруымен Н.Бекежанов атындағы драма театрда “САҒЫНДЫҚ СЕНІ, ИӘ РАСУЛАЛЛА” атты рухани кеш өтті.
Есімі күллі әлем мұсылмандары үшін ерекше құрметті Мұхаммед пайғамбар дүние есігін ашқан ай- жыл құсындай айналып, сағындырып, Сыр халқына да жетті.
Мерейлі кеш шымылдығы Алланың кәләмі Құран аяттарын оқумен ашылып, қазақ тілінде “Мәуліт” жыры оқылды.
ҚМДБ төрағасының орынбасары, наиб мүфти Сансызбай қажы Құрбанұлы арнайы сапармен келіп, халықты мәуліт мерекесімен құттықтап, ардақты пайғамбар жайлы салихалы насихат айтып сағынышын білдірді.
Шараға елімізге тағылымды қойылымдарымен танымал “Өнер қырандары” театры арнайы шақырылды. Кеште салауаттар, мағыналы жырлар, діни әндер айтылып, мәнді көріністер көрсетіліп, монолог оқылды.
Кешті тамашалауға келген халыққа тағылымды кітаптар сыйға тартылды.
Шара соңында Қызылорда облысының бас имамы Болатбек Ұласқанұлы жиналған барша халыққа және осы кештің жоғары деңгейде өткізілуіне демеушілік көмек көрсеткен “Зекет және қайырымдылық қорының” өкілдігіне, атсалысқан барша жандарға риясыз ризашылығын жеткізді. Сонымен қатар, “Өнер қырандары” театрына алғыс білдіріп, Мадияр Серікбаевқа қазақы салтпен шапан жапты.
Хас өнерлі тұлғалар Алла Расуліне деген сағынышты өнердің тылсым тілімен жеткізді. Жиылған халық сағыныштан толқып, көздеріне еріксіз жас алды. Рухани кештің әсерлігі сол, адамзаттың ардақтысын сағынған жүректің бұл кеште жыламауы- мүмкін емес еді…
<blockquote>
 Көрермендер тарапы: Жыл сайын Мәуліт мерекесін ерекше күтемін. Отбасымызбен сіздер ұйымдастырған шараға біріншілердің қатарында келеміз. Бұл кеште жүрегім қатты толқиды, адамзаттың ұлы ұстазы Мұхаммед (с.ғ.с) Пайғамбарыма деген сағынышым одан әрі толықсып, жанарыма еріксіз жас ала отырып, салауатты сағынышпен жолдаймын. Рухани кештен, мол мағына, ерекше әсер алдым”- деп толқынысын жеткізді.
</blockquote>
Алласын ұлықтап, пайғамбарын патшасындай құрмет қылған қазақ халқы осы бір игі ізден жаңылмай, сағынышпен салауат жолдаған Сыр халқы – көңілден кетпес ғибратты кештің куәгері болды.
<img src="https://kyzylorda-news.kz/wp-content/uploads/2021/11/fb_img_1636893419889.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636893424032.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636893428175.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636893432745.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636893441387.jpg" alt="" />

Қызылордада Мәуліт кеші өтті

Kyzylorda-news.kz. Денсаулық сақтау министрі Алексей Цой бірінші болып өз балаларын вакцинациялайтынын айтты, деп хабарлайды&nbsp;<a href="https://stan.kz/">Stan.kz</a>&nbsp;ақпарат агенттігі.
Министр вакцинация барысында мұғалімдер қадағалау жүргізетінін айтты. Ол ата-ана вакцина салу кезінде баланың жанында болуға міндетті деген шарт жоқ екенін айтты.
<blockquote>
 “Бақылап отырған мұғалімдер бар, біздің балалар алатын барлық басқа вакциналар дәл осылай жасалады. Біз адамға өмірінде&nbsp;20 вакцина салынады. Балалар туберкулезге, қызылшаға, паратитке қарсы вакцина алып жүр. Бұл вакцинада да ешқандай өзгеріс жоқ. Балаларға вакцинацияланады, жарты сағат бақылауда болады”, – деді Цой.
</blockquote>
Министр барлық екпелерді емханалардың білікті дәрігерлері жүргізетінін айтты.
“Олардың барлығында жедел жәрдем қобдишалары бар, бұл ойластырылған нұсқа, егер кенеттен қызарып, бірдеңе болып қалса, олар міндетті түрде жедел жәрдем шақыра алады, барлығына жақын маңдағы емханаларда қызмет көрсетіледі. Ата-ананың рұқсатынсыз балаларға вакцина салынбайды.
<blockquote>
 “Менің вакцина салдыруға рұқсат етілген жастағы ұлым бар. Мен де балаларды вакцинациялау кезеңінің басталғанын к.тіп жүрмін. Бірінші болып балама вакцина салдырамын”, –&nbsp;дейді министр.
</blockquote>

Цой алғашқылардың бірі болып баласына вакцина салдыратынын айтты

Kyzylorda-news.kz. Денсаулық сақтау министрлігі ревакцинациядан кейін Ashyq-тағы “жасыл” статустың мерзімін ұзартады. Бұл туралы ДСМ санитарлық-эпидемиологиялық бақылау комитетінің төрағасы Айжан Есмағамбетова мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
Ол қазіргі ереже бойынша вакцинаның екі дозасын алған адамдарда бір жыл бойы “жасыл” статус болатынын атап өтті. Ал ревакцинация кезінде статус мерзімі ұзартылуы мүмкін.
<blockquote>
 “Қайта вакцина алатындар үшін “жасыл” статус мерзімін созу мүмкіндігін қарастырып жатырмыз. Оның ұзартылатыны түсінікті, әрине. Бізге тек “жасыл” статустың қанша мерзімге ұзартылатынын анықтау қажет”, – деді Есмағамбетова орталық коммуникациялар қызметінде өткен брифингте.
</blockquote>
Сондай-ақ ол әлемде вакцинадан кейін иммунитеттің қанша уақыт сақталатыны жайлы деректер жеткіліксіз екенін атап өтті.
“Ревакцинацияның өзі иммунитеттің біз ойлағандай ұзаққа созылмайтынын дәлелдеп отыр. Яғни, екі жылға жетпейтіні анық”, – деді министрлік өкілі.
Осы орайда БАҚ өкілдері қазақстандықтар коронавирусқа қарсы вакцинаны жыл сайын салдыра ма деген сұрақ қойды.
Есмағамбетованың айтуынша, әзірге денсаулық сақтау министрлігі мұндай мәселені қарастырып жатқан жоқ.

Ashyq-тағы &#8220;жасыл&#8221; статусының мерзімі ұзарады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Ресейлік терапевт Сури Дадашева тым ыстық сусындар неліктен өмірге қауіп төндіретінін айтты.
<blockquote>
 “Көп адамдар өте ыстық шай, кофе немесе басқа сусындарды ішкенді ұнатады. Бұл өңештің қатерлі ісігінің дамуына әкелуі мүмкін. Себебі, ыстық сусындар өңештің ішкі бетінің жасушаларын зақымдап, микротравма түзеді. Кейіннен ол қатерлі ісіктің дамуына себеп болады”, – деді дәрігер.
</blockquote>
Маман ыстық сусындарды ішкенде абай болу керектігін айтты. Ыстық шайды суытып немес салқын сүт қосып ішуді ұсынды.
Айта кетейік, медицина ғылымдарының кандидаты, диетолог, гастроэнтеролог Маргарита Арзуманян да тым ыстық шай денсаулыққа зиянды екенін айтқан болатын.
Дәрігердің айтуынша, далада күн суық кезде ыстық шай ішсек жылынатындай боламыз. Бірақ, бұл – иллюзия. Егер сусынның температурасы тым жоғары болса, адам денсаулығына қауіп төндіреді.
<blockquote>
 “Ыстық сусын қатерлі ісіктің дамуына әкелуі мүмкін, өңеш пен көмей зақымдалуы мүмкін деген зерттеулер бар. Сондықтан қайнаған шайды сәл салқындатып ішкен дұрыс. Ең дұрысы шайды дене температурасымен бірдей немесе сәл ыстық –&nbsp; 40 градустан асырмай ішкен жөн”, – деп ескертті Маргарита Арзуманян.
</blockquote>
Оның айтуынша, шай қайнатқаннан кейін шамамен бес минут күту керек, содан кейін ғана ішуге болады.
Шайдың жылыну әсеріне келетін болсақ, бұл физикалық емес, психологиялық, деп санайды дәрігер.
<blockquote>
 “Шай ішкенде: ауыз температураны сезеді, бізге жылынғандай болып көрінеді, біз асқазандағы температураны сезбейміз. Бұл психологиялық әсер”, – деді гастроэнтеролог.
</blockquote>
Шайды пайдалы ету үшін дәрігер оған кептірілген жемістер, дәмдеуіштер мен шөптерді қосуға кеңес берді. Мысалы, тимьян, орегано, кептірілген алма, апельсин қабығы немесе даршын.
<a href="https://massaget.kz/layfstayl/Zdorove/66611/?fbclid=IwAR1y9ZkXR9jY14uWF_Vv-y_U1x5g2-dk75z8FbkBxgptrA1Ncy3xZwpJyaY">Massaget</a>

Дәрігер ыстық шай ішу қандай ауруға себеп болатынын айтты

Kyzylorda-news.kz. Жалағаш ауданында «Серіктес директорлар» лигасының “Білім берудегі жаңа басымдық” тақырыбында көшпелі отырысы өткізілді. Жиынға облыстық білім басқармасының басшысы Ақзира Қасымова мен Қызылорда облысының білім саласындағы бақылау департаментінің басшысы Ғалия Дәулетова, «Серіктес директорлар» лигасының қала және аудандағы мүшелері қатысты.
Жиынға қатысушылар ең алдымен ерекше балаларға ерекше жағдай жасап, инклюзивті білім беруді дамытып отырған аудандағы Әл-Фараби атындағы №201 мектеп-лицейінде болды. Қонақтарға білім ордасындағы “Мұрагер” домбырашылар ансамблінің, мектеп парламентінің, “Оқуға құштар мектеп” оқу алаңы мен соңғы үлгідегі технологиямен жабдықталған инклюзивті сыныптарын таныстырды.
Мұнан соң, жиынға қатысушылар З.Жарқынбаев атындағы №202 орта мектептің жұмысымен танысты. Ұлттық құндылықтарды ұлықтайтын білім ордасындағы оқушылардан жасақталған оркестр, ұлттық ойындар (ләңгі, асық ату, бес асық) үйірмелері, «Ана мейірімі» аналар мектебі мен «Ұлағат» әкелер мектебінің жұмыстары көпшілік назарына ұсынылды. Сонымен қатар, әкелер мектебінің төрағасы, ардагер ұстаз Әбілхайыр Ералиевтің «Рухани жаңғыру» бағдарламасы аясында ашылған ұлттық этнографиялық кабинеті таныстырылып, мектеп театрының қойылымы көрсетілді.
Ары қарай шара «Серіктес директорлар» лигасының “Білім берудегі жаңа басымдық” тақырыбындағы көшпелі отырысымен жалғасты. Директорлардың басқосуында “Мектептегі көшбасшылық және адам ресурстарын дамыту” туралы Т.Жүргенов атындағы 123 мектеп-лицейінің директоры Л.Шөменова мектеп ұстанымын білім беру сызбасы арқылы көрсетіп, дамытушы топтардың жұмысына тоқталды. Содан соң, І.Қабылов атындағы 32 мектеп-лицейінің директоры Б.Әбдіриева “PRO INT” эксперименттік алаңындағы кәсіптік бағдар беру турасында өз ойларымен бөлісті.
Пікірталас алаңында Қызылорда облысының білім саласында сапаны қамтамасыз ету департаментінің басшысы Ғалия Ноғайқызы мен облыстық білім басқармасының басшысы Ақзира Бақтыбайқызы бүгінгі күні білім саласына қойылып отырған талаптың жоғарылығына, мектеп директорларының ұжымды басқару қадамдары мен тетіктеріне, жетістікке жету мүмкіндіктеріне тоқталды.
<blockquote>
 “Іс-тәжірибе алмасу бағытындағы №201, №202 мектептердің құндылыққа негізделген тәрбие жұмыстарын, инклюзивті білім берудегі жаңашылдықтарды көрдік. Осы секілді жұмыстар өңіріміздегі барлық мектептерде жалғасын табуы тиіс. Ал мектеп директорлары осыған сәйкес сапалы жұмыс жасауы керек. Сапаға бағытталған жұмысты жүйелендіруде талдау, сараптау, дамытуға басымдық беріп, нәтижелі жұмыс көрсету қажет”, – деді басқарма басшысы Ақзира Қасымова.
</blockquote>
Жалағаш ауданында өткізілген «Серіктес директорлар» лигасының көшпелі жиыны алдағы уақытта барлық ауданда өткізілетін болады.
<img src="https://kyzylorda-news.kz/wp-content/uploads/2021/11/fb_img_1636853629698.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636853638713.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636853645461.jpg" alt="" />
.

Жалағашта «Серіктес директорлар» лигасының көшпелі отырысы өтті

Kyzylorda-news.kz. Қазақстанда өткен тәулікте 1487 адам коронавирус инфекциясынан жазылып шықты, деп хабарлайды coronavirus2020.kz.
Аймақтар бойынша: Нұр-Сұлтан қаласы – 138, Алматы қаласы – 198, Шымкент қаласы – 33, Ақмола облысы – 127, Ақтөбе облысы – 10, Алматы облысы – 188, Атырау облысы – 9, Шығыс Қазақстан облысы – 294, Жамбыл облысы – 21, Батыс Қазақстан облысы – 220, Қарағанды облысы – 144, Қостанай облысы – 13, Қызылорда облысы – 33, Маңғыстау облысы – 6, Солтүстік Қазақстан облысы – 21, Түркістан облысы – 32.
Қазақстан бойынша жазылғандар саны – 914098.

Қазақстан және Қызылорда облысының жаңалықтары

Сенатор: Арал апатымен күрес – Орталық Азия мемлекеттерінің ортақ мәселесі

Шиеліде дәрігерлер аттан құлаған көкпаршыны аман алып қалды

COVID-19: 24 қызылордалық жазылып шықты

15 қараша – теңгенің айналымға енген күні

Қызылордада 18 адамнан коронавирус табылды

Қызылордада көктайғақ болады

Қызылордада Мәуліт кеші өтті

Цой алғашқылардың бірі болып баласына вакцина салдыратынын айтты

Ashyq-тағы “жасыл” статусының мерзімі ұзарады

Дәрігер ыстық шай ішу қандай ауруға себеп болатынын айтты

Жалағашта «Серіктес директорлар» лигасының көшпелі отырысы өтті

33 қызылордалық коронавирус инфекциясынан емделіп шықты

Қазақстан және Қызылорда облысының жаңалықтары

Сенатор: Арал апатымен күрес – Орталық Азия мемлекеттерінің ортақ мәселесі

Шиеліде дәрігерлер аттан құлаған көкпаршыны аман алып қалды

COVID-19: 24 қызылордалық жазылып шықты

15 қараша – теңгенің айналымға енген күні

Қызылордада 18 адамнан коронавирус табылды

Қызылордада көктайғақ болады

Қызылордада Мәуліт кеші өтті

Цой алғашқылардың бірі болып баласына вакцина салдыратынын айтты

Ashyq-тағы &#8220;жасыл&#8221; статусының мерзімі ұзарады

Дәрігер ыстық шай ішу қандай ауруға себеп болатынын айтты

Жалағашта «Серіктес директорлар» лигасының көшпелі отырысы өтті

33 қызылордалық коронавирус инфекциясынан емделіп шықты

Ashyq-тағы “жасыл” статусының мерзімі ұзарады