<a href="https://kyzylorda-news.kz/">Kyzylorda-news.kz.</a>&nbsp;Қазақстан терриориясының басым бөлігі антициклонның ықпалында болады. Осыған байланысты күн жауын-шашынсыз болады, деп хабарлайды Қазгидромет.
Тек еліміздің оңтүстігінде, оңтүстік-шығысында фронталды бөліктердің өтуіне байланысты күн құбылмалы болады (жаңбыр, қар) жауады. Елдің солтүстігінде, оңтүстік-батысында, оңтүстік-шығысында жел күшейіп, оңтүстік-батысында шаңды дауыл тұрады.
Күндіз Ақмола облысының солтүстігінде жаяу бұрқасын болады, облыстың солтүстігінде, шығысында жел 15-20 м/с жылдамдықпен соғады.
Солтүстік Қазақстан облысының солтүстік-шығысында, шығысында жел 15-20 м/с жылдамдықпен ұйтқып, шаңды дауыл тұрады.
Күндіз Павлодар облысының батысында, солтүстігінде жел 15-20 м/с эылдамдықпен соғып, жаяу бұрқасын болады.
Қостанай облысының солтүстігінде жел күшейіп, секундына 15-20 метрге жетеді, бұрқасын соғады. Елдің оңтүстігінде тұман түседі.
Түнде және таңертең Түркістан облысының оңтүстігінде, батысында, таулы және тау бөктеріндегі аудандарында тұман түсіп, көктайғақ болады.
Жамбыл облысының солтүстігінде, таулы және тау бөктеріндегі аудандарында тұман түсіп, көктайғақ болады.
Маңғыстау облысының солтүстігінде тұман түседі, батысында және орталығында желдің күші секундына 17-22 метрге жетеді, шаңды дауыл тұрады.
Атырау облысының батысында, шығысында және орталығында желдің күші секундына 15-20 метрге жетеді.
Түнде және таңертең Алматы, Шығыс Қазақстан областарының солтүстігінде тұман түседі.
Қызылорда облысының оңтүстігінде тұман түседі.

Қызылордада күн жауын-шашынсыз болады

<a href="https://kyzylorda-news.kz/">Kyzylorda-news.kz.</a> Көл иелену – жай ғана кәсіп емес, ол Табиғат-Анаға деген жанашырлығыңды білдіру. Бүгінде елімізде көлдерді иеленіп, оған қажетті деңгейде еңбектенбей, тек қана балығын пайдаланып, бас пайдасын биік қоятындар көп. Десе де, табиғатқа жанашырлық танытып, оны әркез аялай білу керегін жадымыздан шығарып жатамыз. Мені көл иеленушілердің бірі ретінде көп ой мазалайды.
Мал шаруашылығын атакәсібіміз деп бағамдаған елміз. Кез келген сауын малдың қажетті азығын бермесеңіз, сүт бермейді. Міне, осы қағида қоғамның қай саласында да болу керек. Көлді иелендіңіз бе, уақытылы суын ауыстырып, оның айналасын таза ұстап, табиғаттағы тепе-теңдікті сақтап отыру керек. Өз тәжірибемізде егістік алқабының тартылған арналарынан бастап, күріш алқабында қалатын жүздеген, тіпті, бірнеше мыңдаған балықты алып, өзен-көлдерге жіберу жолға қойылған. Сырдария ауданына қарасты Қоғалыкөл елді мекені аумағындағы Базарқұл, Кіндіккөл атаулы көлдерді иелене отырып, біз ондағы тазалық жұмыстары мен балық шаруашылығын жолға қойып келеміз. Өйткені, қай іске болсын, білек сыбанып кіріскен соң, жауапкершілігін сезіну керек. Ал елдегі әрбір көл иеленуші осы қағидаларды ұстанса екен дейміз. Тіпті, бұл ретте жергілікті тұрғындардың да табиғатқа жанашырлық көзқарасын қалыптастыру керек сияқты.
Темірбек ҚОЖАНОВ, 
Кіндіккөл-Базарқұл су айдынын иеленуші.

Табиғат-Ананы аялау – адамзаттың парызы

<a href="https://kyzylorda-news.kz/">Kyzylorda-news.kz.</a> «Nur Otan» партиясының «Өзгерістер жолы: Әр азаматқа лайықты өмір!» атты сайлауалды бағдарламасын іске асыру жөніндегі Қызылорда облысы бойынша Жол картасында 2025 жылға дейін 25 жаңа денсаулық сақтау нысандарының құрылысын аяқтау, 2 нысанға күрделі жөндеу жұмыстарын жүргізу, ана мен бала өлімін азайту мәселелердің барлығы түбегейлі қаралған.
Бүгін осы мәселелердің орындалуын қадағалау мен алдағы міндеттеді пысықтау мақсатында облыстық партия филиалы жанындағы «Ұлт денсаулығы» жөніндегі аймақтық қоғамдық кеңестің отырысы өтті.
Жиында өңірде осы бағытта атқарылған жұмыстар төңірегінде облыстық денсаулық сақтау басқармасы басшысының орынбасары Үсенов Жалғасбек Тұрлыбекұлы хабарлама жасады.

Қызылордада «Ұлт денсаулығы» бағытындағы қоғамдық кеңес отырысы өтті

<a href="https://kyzylorda-news.kz/">Kyzylorda-news.kz.</a> Сыр елінде ҚР Тәуелсіздігінің 30 жылдық мерекесінде Нартай Бекежанов атындағы қазақ академиялық музыкалық драма театрында 15 желтоқсан күні «Абылай ханның арманы» атты тарихи драмасы сахналанады.
<blockquote>
 «Тарихи қойылымда Абылай ханның жоңғар тұтқынына түскен кезінен басталады. Сондай-ақ, 1720-1770 жылдар аралығында ел билеген хандар мен жаужүрек батырлардың ерлігі баяндалып, қазақ халқының басына түскен қиындықтары көрсетіледі. Драмада Абылай ханның көшбасшылық қасиеті, елін, жерін сақтап қалудағы саясаткерлігі, ақыл-парасаттылығы, ержүрек батырлығы жан-жақты қырынан ашып көрсетіледі. Спектакльде ойнайтын актерлардың дайындығы жоғары деңгейді. Бұл қойымды бұған дейін де бірнеше мәрте сахналағанбыз. Көрерменнің ықыласы ерекше болды», – дейді Н.Бекежанов атындағы қазақ академиялық музыкалық драма театрының көркемдік жетекшісінің міндетін атқарушы Ақтөре Оразалы.
 «Кез келген қойылымның басты кейіпкерін сомдау үлкен жауапкершілік жүктейді. Иығыңда екі есе жүк тұрады. Ал Абылайдай ханның ролін ойнау екінің біріне бұйырмайтын бақ. Берілген мүмкіндікті әрдайым дұрыс пайдаланып келеміз. Көрерменннің ықыласы тіпті шабыттандырады. Шығармашылық топ өте жоғары деңгейде өнер көрсетуге бар күштерін салады. Баршаңызды қойылымды тамашалауға шақырамын. Тәуелсіздік мерекесі құтты болсын», – деді актер, мәдениет саласының үздігі Сырым Әбдіразақов.
</blockquote>

Қызылордада Тәуелсіздік мерекесінде тарихи қойылым сахналанады

<a href="https://kyzylorda-news.kz/">Kyzylorda-news.kz.</a> Партия халықтың көкейіндегі проблемаларды шешудің тиімді жүйесін жасауды, қоғамдық қабылдау жұмысын күшейтуді жауапты міндет етіп қойды. Соның ең негізгісі – азаматтардың өтініш-тілектеріне құлақ асу.
Бүгінде партияның аймақтық және аумақтық филиалдарының қоғамдық қабылдау бөлмелерінде жеке қабылдаулар тұрақты түрде өткізіліп келеді. Сейсенбі күні де облыстық мәслихат депутаты Аманжол Оңғарбаев «Nur Otan» партиясы облыстық филиалында тұрғындармен кездесіп, мәселелерін, ұсыныс-пікірлерін тыңдады.
Қабылдауда әлеуметтік көмек, денсаулық сақтау салаларына қатысты өтініштер қаралды. Аманжол Сақыпұлы олардың ешқайсысы ескерусіз, қараусыз қалмайтынын, көмек берілетінін жеткізіп, әрқайсысын зерделеп шықты.
Айта кетейік, бүгінде депутаттардың ресми парақшасындағы өтініштерге де жауап берілуде. Осыған қарап, елдің мәселесіне назар аудару, халықпен кері байланыс орнату ісі көңіл көншітерлік деуге болады.

Қоғамдық қабылдаудан нәтиже көп

<a href="https://kyzylorda-news.kz/">Kyzylorda-news.kz.</a> Қазақстан Республикасы Тәуелсіздігінің 30 жылдығына орай Қорқыт Ата атындағы Қызылорда университетінде «Тәуелсіздік – мәңгілік елдің тұғыры» атты салтанатты жиын өтті.
Шараға белгілі қоғам қайраткерлері, университеттің профессор-оқытушылар құрамы мен білім алушылары қатысты.&nbsp;
Қазіргі таңда еліміз білім беру саласы бойынша инновациялық дамуға бейімделген, еңбек нарығында бәсекеге қабілетті мамандарды дайындаудың ұлттық моделін қалыптастыру кезеңінде. Мемлекет басшысы әр Жолдауында білім саласын халықтың тұрмыс сапасын арттырудың маңызды бөлігі ретінде қарастырып, басымдық береді. Бұл ретте жоо жауапкершілігін күшейтіп, ғылыми-инновациялық бағыттың үлесін арттыру көзделіп келеді.
Мерекелік шарада Абайбек Жүнісов еліміздің 30 жылда қол жеткізген табыстары мен тәуелсіздіктің ел дамуындағы мән-маңызын айтты. Сондай-ақ, жиынға қатысушыларды мерекемен құттықтап, білім ордасының жетістіктеріне тоқталды.
<blockquote>
 «Егемендік алған жылдар ішінде университет көптеген сала бойынша кәсіби білікті маман даярлап, еліміздің әлеуметтік-экономикалық тұрғыдан дамуына үлкен үлес қосты. Қорқыт Ата атындағы Қызылорда университетінің профессор-оқытушылары білім мен ғылым саласында ауқымды жетістіктерге қол жеткізіп, саланың жандануына орасан еңбек сіңірді. Алдағы уақытта егемен еліміздің игілігі үшін атқарып жүрген қызметтеріңізге толағай табыс тілеймін! Тәуелсіздігіміздің 30 жылдық мерейлі мерекесі құтты болсын», – деді ректордың міндетін атқарушы Абайбек Жүнісов.
</blockquote>
Шара марапаттау рәсімімен жалғасып, оқу орнының бірқатар қызметкерлері марапат төрінен көрінді. Атап айтсақ, «Nur Otan» партиясы төрағасының бірінші орынбасары Бауыржан Байбектің Құрмет грамотасына Ғылыми кітапхананың директоры Сатбаева Гүлмира мен «Инжирингтік технологиялар және экология» кафедрасының профессор-зерттеушісі Нұрбол Аппазов лайық деп танылды. Қазақтан Республикасы жоо қауымдастығының шешімімен «Ахмет Байтұрсынов» атындағы орденімен «Биология, география және химия» кафедрасының профессоры Анипа Тапалова, «Ахмет Байтұрсынов» атындағы алтын медалімен «Сәндік қолданбалы және бейнелеу өнері» кафедрасының меңгерушісі Жұлдыз Смаилова, «Ахмет Байтұрсынов» атындағы күміс медалімен «Информатика және ақпараттық–коммуникациялық технологиялар» кафедрасының меңгерушісі Сәрсен Тілеубай марапатталды.
Екі мәрте социалистік Еңбек Ері, күрішші Ыбырай Жақаевтың 130 жылдық мерейтойлық медалі «Аграрлық технологиялар» кафедрасының профессоры Ибадулла Таутенов пен «Су шаруашылығы және жерге орналастыру» кафедрасының профессоры Серікбай Өмірзақовқа берілді.
<img src="https://kyzylorda-news.kz/wp-content/uploads/2021/12/p1599064-scaled.jpg" alt="" />
Ал Құжаттармен қамтамасыз ету және архив бөлімінің архивариусы Нұржамал Күдербаева мен «Қазақ тілі әдебиеті және журналистика» кафедрасының аға оқытушысы Гүлмира Бекмағанбетова «Nur Otan» партиясы Қызылорда облыстық филиалы атынан алғыс хатпен марапатталды.
Сонымен қатар, жоғары білікті мамандар даярлауға еңбек сіңіріп, өз саласының кәсіби шебері саналатын университеттің стратегиялық дамуына қосқан 70 қызметкерге Қызылорда облысы әкімінің алғыс хаты мен Басқарма Төрағасы-ректордың арнайы марапаттары табысталып, құрмет көрсетілді. Салтанатты шара патриоттық рухтағы мерекелік концертпен қорытындыланды.

Қорқыт ата атындағы Қызылорда университетінде ел Тәуелсіздігінің 30 жылдығы аталып өтті

<a href="https://kyzylorda-news.kz/">Kyzylorda-news.kz.</a> Қызылордада «Тең қоғам» орталығының қолдауымен Қазақстан Республикасы Тәуелсіздігінің 30 жылдығы қарсаңында көрнекті ағартушы, педагог, қоғам қайраткері Ы.Алтынсариннің туғанына 180 жыл толуына орай «Ұлы даланың – ұлы тұлғасы» атты ақын өлеңі мен әңгімелерін оқудан қалалық байқау өтті.
Байқауды ерекше жандардың шығармашылығын шыңдау, бос уақытын тиімді өткізу мақсатында «Зағиптар қоғамы» клубы ұйымдастырды.
Мәдени шараға 18-60 жас аралығындағы қоғамда тіркеуде тұратын 16 ерекше жан қатысты.
Олар Ы.Алтынсариннің кез келген шығармасын жатқа айтып, &nbsp;«Тәуелсіздік тұғырым» атты кезеңінде тәуелсіздікке арналған ақындардың өлеңдерін мәнерлеп оқудан сынға түсті.
Әділ-қазы алқасының шешіміне сәйкес бас жүлде Р.Ақатаевқа бұйырды. Ал І орынды А.Нұрлиева, ІІ орынды К.Дүзбай, Т.Есмағамбетовалар жеңіп алды. ІІІ орынды Д.Ешниязова, М.Қауынбай өзара бөлісті.
Барлық қатысушы талапкерлер алғыс хат және бағалы сыйлықтармен марапатталды.
<img src="https://kyzylorda-news.kz/wp-content/uploads/2021/12/b575411b-dacf-4af8-9474-9937f738cace.jpg" alt="" />

Ы.Алтынсариннің шығармаларын жатқа айтқан ерекше жандар марапатталды

<a href="https://kyzylorda-news.kz/">Kyzylorda-news.kz.</a> Тәуелсіздігіміздің 30 жылдығының қарсаңында Қазақстан Республикасының Тұңғыш Президенті — Елбасы Нұрсұлтан Әбішұлы Назарбаевтың «Тәуелсіздік тағылымы» атты мақаласы жарияланды. Халқымыз үшін тарихы тереңде жатқан елдің өз алдына қайта егеменді ел болған күні Тәуелсіздіктің орны айрықша. Бұл күн – бабалар арманы ақиқатқа айналған, азаттыққа қол жеткен ұлы күн. 30 жыл ішінде Тұңғыш Президент пен халқымыздың жасампаз еңбегінің нәтижесінде, Отанымыз — әлемге танылған, қуатты мемлекетке айналды.
Елбасының «Тәуелсіздік тағылымы» атты мақаласы арқылы отыз жылдық торқалы той қарсаңында тәуелсіздіктен тағылым алу үшін туған халқымен ой бөліскен. Мақалада Тұңғыш Президент еліміздің басты құндылығын атады. Мемлекетіміздің тірегі де, алтын діңгегі де – Қазақстан халқы. Мен бойымдағы қуат, қызметімдегі тәжірибе, ойымдағы нәр – бәрі-бәрін халқыма қызмет етуге жұмсап келемін» деді. Тәуелсіздіктің алғашқы күндерінен бастап біз береке-бірлікке, ынтымаққа, ұлтаралық татулық пен дінаралық келісімге негізделген саясатты жүзеге асырдық. Бұл елімізді үздіксіз өсу мен өркендеуге бастады. Осының қадірін білуіміз керек екенін де Елбасы еске салды.
Үш онжылдықтың шеңберінде әлем таныған жетістіктеріміз, халыққа арналған игіліктер болса-ол Тәуелсіздік жемісі. Бүгінгі бейбіт күнге жету үшін аз күш жұмсалған жоқ. Талай тағылымды істің басында Елбасы Нұрсұлтан Назарбаев тұрды. Мұны «Тәуелсіздік тағылымы» мақаласын қарап шыққан жан тереңірек ұғынары сөзсіз. Өткен мен бүгінді байланыстырған мақалада Елбасы: -Ең бастысы-еліміз аман, ұрпағымыз азат. Біз алақанға салып өсірген сол азат ұрпақ енді «Мен Қазақстаныма не беремін?» дегенді ойлауы керек,-деп жастарға бағыт ұсынады.
Ия, мемлекеттің баянды болашағын ойлаған әр жас құндылықтарды құрметтеп, қабілетіне қарай ел дамуына еңбек етсе, даламыз жайнап, қаламыз көркейе түсері сөзсіз.
Нұрболат ИБРАЕВ, 
Қызылорда облыстық мәслихаттағы 
«Nur Otan» партиясы депутаттық фракциясының мүшесі

Нұрболат Ибраев: Барымызды бағалап, болашағымызды бағамдай білейік

<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығына орай бүгін бірқатар білім саласының қызметкерлері марапатталды. Асқар Тоқмағамбетов атындағы мәдениет үйінде өткен салтанатты жиынға облыс әкімі аппаратының басшысы Ерлан Райғаниев, облыстық білім басқармасының басшысы Ақзира Қасымова және аймағымыздағы үздік педагогтар мен білім беру саласының қызметкерлері қатысты.
Мерекелік жиынға қатысқан Ерлан Телманұлы аймақ ұстаздарын мерейлі мерекемен құттықтап, Сыр өңірінің жан-жақты дамуында Сыр ұстаздарының да үлесі мол екендігін тілге тиек етті.
Салтанатты шарада өз ісімен дараланған 40-тан астам білім саласының қызметкерлеріне ҚР Білім және ғылым министрінің құрмет грамотасы мен мерекелік төсбелгі табыстап, облыс әкімінің алғыс хаттарымен марапаттады.
Ұстаздар құрметіне арналған салтанатты шарада құрметті қонақтар ұйымға жаңадан қабылданған “жасұландықтарға” галстук тағып, шара соңы концерттік бағдарламаға ұласты.
<img src="https://kyzylorda-news.kz/wp-content/uploads/2021/12/266366667_1257194278117108_4844942956685354639_n-1.jpg" alt="" />
<img src="https://kyzylorda-news.kz/wp-content/uploads/2021/12/266268702_1257194321450437_2514151105380662875_n.jpg" alt="" />
<img src="https://kyzylorda-news.kz/wp-content/uploads/2021/12/266075272_1257194398117096_3446503055490119344_n.jpg" alt="" />
<img src="https://kyzylorda-news.kz/wp-content/uploads/2021/12/266375240_1257194354783767_7021149075852888454_n.jpg" alt="" />

Тәуелсіздік күні қарсаңында қызылордалық ұстаздар марапатталды

<a href="https://kyzylorda-news.kz/">Kyzylorda-news.kz.</a> Аймағымызда өнеркәсіп өндірісінің көлемі 691,9 млрд. теңгені құрады. Өңдеу өнеркәсібінің көлемі 157,8 млрд. теңгеге артты. Сондай-ақ, ауыл шаруашылығының жалпы өнім көлемі 159,6 млрд. теңге болды. Бұл туралы бүгін Өңірлік коммуникациялар қызметінде өткен баспасөз конференциясында облыстық экономика және бюджеттік жоспарлау басқармасы басшысының орынбасары Ринат Құдайбергенов мәлімдеді.
Сонымен қатар, құрылыс жұмыстарының көлемі 83,9 млрд. теңгені құрады, 567,6 мың шаршы метр тұрғын үй пайдалануға берілді. Биыл ауыл шаруашылығы дақылдары 188,1 мың га егілді. Дәнді дақылдар – 96,6 мың га, оның ішінде күріш – 83,6 мың га, майлы дақылдар-6,7 мың га, көкөніс – бақша дақылдары мен картоп – 18,3 мың га, жемшөп дақылдары – 66,4 мың га. Бұл да өңірдің экономикалық дамуына әсерін тигізді.

Қызылорда облысының экономикалық дамуы қарқынды

<a href="https://kyzylorda-news.kz/">Kyzylorda-news.kz.</a> БЖЗҚ-дағы зейнетақы жинағын пайдалану мерзімі 45 күннен 20 күнге қысқарды, деп жазылған Отбасы банктің&nbsp;<a href="https://www.instagram.com/p/CXc9dkfBaVf/">Instagram</a>&nbsp;парақшасында.
<blockquote>
 “Біржолғы зейнетақы төлемі арнайы шотқа түскеннен кейін ол қаражатты 20 жұмыс күні ішінде мақсатқа сай пайдалану мүмкіндігі болады. 20 жұмыс күнін есептеу онлайн-платформада өтініш жіберген сәттен емес, біржолғы зейнетақы төлемі арнайы шотқа түскен сәттен бастап есептеледі”, – деп жазылған хабарламада.
</blockquote>
Арнайы шот ашу үшін банкке келудің қажеті жоқ екені де айтылған. Ол үшін мобильді қосымшаны пайдалануға немесе www.otbasybank.kz сайтындағы видеоқоңырау арқылы шот ашуға да болады.
Сонымен қатар біржолғы зейнетақы төлемінің статусын чат-бот арқылы тексеру мүмкіндігі қарастырылған.
<blockquote>
 “Сондай-ақ enf-obasybank.kz зейнетақы жинағын мерзімінен бұрын қолдану платформасында жолдаған өтініштің орындалу деңгейін тексеру үшін +7 705 925 13 01 WhatsАpp нөміріне немесе Telegram-дағы Quanysh_bot ботына жазу қажет”, – деп түсіндірді Отбасы банкте.
</blockquote>
Отбасы банк (бұрынғы “Қазақстан Тұрғын үй құрылыс жинақ банкі) – тұрғын үй құрылыс жинағы жүйесін жүзеге асыратын елдегі жалғыз банк екенін атап өту керек.
Депозитке ақша аудару 2021 жылдың 16 желтоқсанынан басталады.

БЖЗҚ-дағы зейнетақы жинағын пайдалану мерзімі қысқарды

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің өкімімен 2021 жылғы 13 желтоқсаннан бастап Әбілдаев Нұрсұлтан Алтынбекұлы қалалық мәдениет және тілдерді дамыту бөлімінің басшысы лауазымына тағайындалды.
Нұрсұлтан Алтынбекұлы 1986 жылы Сырдария ауданында дүниеге келген. Жоғары білімді. Қорқыт ата атындағы Қызылорда мемлекеттік университетін «Заңгер» мамандығы бойынша бітірген.
Еңбек жолын жеке кәсіпкерлік мекемеде шебер болып бастаған.2012-2016 жылдары Қызылорда облысының әкімі аппаратының ұйымдастыру-инспекторлық жұмыс және аймақтық даму бөлімінің инспекторы, жетекші маман қызметтерін атқарған.
2016 жылы Сырдария ауданы, Нағи Ілиясов ауылдық округінің әкімі;
2016-2017 жылдары Сырдария ауданы әкімі аппаратының құжаттамалық қамтамасыз ету және бақылау бөлімінің бас маманы;
2017-2018 жылдары Сырдария ауданы әкімі аппаратының ұйымдастыру және инспекторлық жұмыс бөлімінің басшысы;
2018-2019 жылдары Сырдария ауданы әкімі аппаратының басшысы;
2019 жылдан бастап осы кезге дейін облыстық мәдениет, архивтер және құжаттама басқармасы басшысының орынбасары қызметін абыроймен атқарып келді.

Қазақстан және Қызылорда облысының жаңалықтары