<a href="https://kyzylorda-news.kz/">Kyzylorda-news.kz.</a> «Worldskills Kazakhstan» ұлттық чемпионаты – білікті кадрларды даярлаудың жаңа тренді. Бұл колледж және жоғары оқу орнының студенттерінің болашақ мамандығы бойынша сынға түсіп, қабілетін танытатын білім бәсекесі.
Білікті кадрларды даярлап, жаңа идеялар мен трендтер жасауға және кәсіби білім сапасын арттыруға мүмкіндік беретін аталмыш байқауға М.Мәметова атындағы Қызылорда педагогикалық жоғары колледжі 2016 жылдан бері белсенді қатысып келеді.
Болашақ маманның кәсіби бағытын шыңдауға арналған ең алғашқы чемпионатта аймақ абыройын қорғауға аталмыш педагогикалық жоғары колледждің 2020 жылғы түлегі Аяулым Сарманова қатысқан болатын.
Бүлдіршіндермен жұмыс істегенді жаны сүйетін Аяулым «Мектепке дейінгі тәрбие» құзыреттілігі бойынша өткізілген «Worldskills college – 2018» колледжішілік чемпионатында І орын иеленіп, одан соң «Worldskills Kyzylorda – 2018» аймақтық чемпионатында да І орынды жеңіп алды. Өңірлік іріктеу кезеңінен жоғары жетістік көрсеткен Аяулымның республикалық деңгейде бәсекеге түсуіне жол ашып, 2019 жылы ол республикалық «Worldskills Kazakhstan» ұлттық чемпионатында ІІ орын мен күміс медальді иеленді.
Дарынымен даралған үздік түлек бүгінде Абай атындағы Қазақ Ұлттық педагогикалық университетінде «Екі шетел тілі» мамандығы бойынша білімін одан әрі жетілдіруде.
Аяулымның айтуынша, білім ордасында алған білімін практикамен ұштастыруда «Worldskills Kazakhstan» ұлттық чемпионаты мамандыққа машықтануға мол мүмкіндік берді дейді.

«Worldskills Kazakhstan»: Мамандыққа машықтануға мүмкіндік берді

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласындағы Назарбаев Зияткерлік мектебінің түлегі Жангерей Зинелов Гонконгтың төрт бірдей жоғары оқу орнынан шақырту алып, олардың екеуі толық білім грантын ұсынып отыр.
Қызылордалық зияткердің академиялық біліміне қызығушылық танытып, мыңдаған өреннің арасынан тандағандар – Chinese University of Hong Kong (CUHK), City University of Hong Kong, Hong Kong University of Science and Technology және Hong Kong Baptist University. Алғашқы екеуі Жангерейдің потенциалын жоғары бағалап, толық оқу грантына лайықты деп таныды. Бұл білім ошақтары әлемдік университеттер рейтінгісінде топ 100 ЖОО-ның қатарына енеді және ғылым, техника мен инженерия салалары бойынша мамандар даярлайды.
<blockquote>
 «Инженерия мамандығына қызығушылығым 9-сыныпта пайда болды. Физика мен математика сүйікті пәндерімнің бірі. Әртүрлі олимпиадаларға қатысып, ғылыми жобалар байқауында білімімді шыңдадым. Болашақта еліміздің технология саласын дамытуға үлес қосқым келеді», – дейді Жангерей Зинелов.
</blockquote>
Бірнеше жыл бойы оқу озаты болған Жангерей Зинелов мектеп өміріне белсенді араласты. Өзін-өзі басқару ұйымының көшбасшысы болып, талай жобалардың іске асуына септігін тигізді. Бітіруші сыныпқа келгенде жоғары оқу орнына түсу үшін үздіксіз еңбек етті.
<blockquote>
 «Шетелдік университеттердің бағалайтын тұсы ол – оқушылардың жан-жақты болуы. Академиялық біліммен бірге әртүрлі бағытта жетістіктерінің де болуы маңызды. Сонымен қатар болашақ мамандығын ертерек анықтап, болашақта кім болғысы келетінін нақты білетін және түсінетін жастарды қолдауға әрқашан дайын», – дейді Жангерей Зинелов.
</blockquote>

Қызылордалық оқушыны әлемнің 4 беделді университеті оқуға шақырды

<a href="https://kyzylorda-news.kz/">Kyzylorda-news.kz.</a>&nbsp;Украинаға қарсы шабуыл жасап, соғыс бастаған Ресейге Америка мен Батыс елдері қатаң санкциялар салды. Джо Байден «енді Ресейден мұнай алмайтынын» ашық айтты. Бұл Қазақстан экономикасына қалай әсер етеді? Бұл сұраққа экономист Мақсат Халық жауап берді, деп хабарлайды <a href="https://stan.kz/mynaydan-endi-tusetin-payda-halikka-zhymsaladi-degen-um-361398/">Stan.kz</a>.
Маманның айтуынша, Ресей «әлемдік мұнай саласындағы үлкен ойыншы». Алдағы уақытта Ресейден ешкім мұнай алмайтын болса, бұл әлемде энергетикалық ресурстарға деген тапшылықты тудырады. Ал ол белгілі бір дәрежеде бағалардың өсуіне алып келеді. Қазірдің өзінде мұнайдың бағасы рекордтық көрсеткішке дейін жетті.&nbsp;
<blockquote>
 «Мұның барлығы Ресейге&nbsp;қойылған&nbsp;шектеулермен байланысты», –&nbsp;&nbsp;дейді Мақсат Халық.&nbsp;
</blockquote>
Экономистің сөзіне сенсек, «осы жерде Қазақстан үшін үлкен мүмкіндік бар». Бұған дейін АҚШ билігі Ресейге салынған санкциялардың Қазақстанға&nbsp;әсер етпейтінін&nbsp;айтқан еді.
<blockquote>
 «Мұнай бағасы&nbsp;бюджетте 60 доллар деп бекітілсе, оны 120 доллардан саттық дегеннің өзінде ол Қазақстанның экспорттық әлеуетін жақсартады. Біздің алтын валюталық қорының, оның ішінде ұлттық қордың резервін арттырады. Бюджеттік кіріс те артады, ішкі өнімнің өсуіне әсер етеді», – дейді ол.
</blockquote>
Бұған дейін берген&nbsp;<a href="https://stan.kz/kazakstandiktar-nege-arabtar-siyakti-shalkip-omir-surme-358838/">сұхбатында</a>&nbsp;Мақсат Халық қазақстандықтардың неге арабтар сияқты шалқып өмір сүрмейтінін түсірдірген еді. Ол мұнай саудасынан түсетін пайданың 80 пайызын шетелдік компаниялар, ал қалған 20 пайызын ғана Қазақстан алатынын атап өтті. Оның өзінде «қара алтыннан» түсетін пайданы тек олигополия өкілдері көріп келді, дейді маман. Ал ендігі жағдайда барлығы өзгеруі мүмкін екенін алға тартты.
<blockquote>
 «Президентіміз олигополиямен күресіп жатса, енді түсетін пайда белгілі бір дәрежеде халыққа қарай жұмсалады деген үміт бар. Яғни бюджеттің кірісі артатын болса, онда халықтың табысын арттыруды қарастыру қажет», – деді Мақсат Халық.
</blockquote>

Мақсат Халық: Мұнайдан енді түсетін пайда халыққа жұмсалады деген үміт бар

<a href="https://kyzylorda-news.kz/">Kyzylorda-news.kz.</a>&nbsp;Оқу-тәрбие үдерісі жаңалықтарға толы. Бүгінгі талап деңгейінде сол үдеден шығу, жаңартылған оқу мазмұнына сай білім беру, шәкірттерін ғылыми-зерттеушілік бағытқа ұмтылдыру – ұстаздар қауымының маңызды міндеті.
Сырдария ауданында түрлі байқауларда ғылыми ізденістерімен, нәтижелі жұмыстарымен дараланған оқушылар қатары аз емес. Солардың бірі – Сырдария ауданы, С.Сейфуллин ауылындағы №137 орта мектебінің 3 сынып оқушылары – Жанниет Бердібек пен Іңкәр Құдайберген.
Қос дарынды оқушы «Зерде» сайысының аудандық, облыстық кезеңдерінің жеңімпаздары атанып, 2022 жылдың 9-11 ақпанында сол сайыстың Көкшетау қаласындағы «Балдәурен» тынығу лагерінде ұйымдастырылған республикалық кезеңінде «Робототехника» бағыты бойынша ІІІ орын иегерлері атанды. Шәкірттерін шыңға шығарып, ғылыми сайысқа дайындаған білікті ұстаз, сынып жетекшісі – Марта Елеукееваның жетекшілігімен «ВАЛЛ-И қуаттағышы» роботы тақырыбындағы жобасы арқылы олар үздіктер қатарынан көрініп, Сыр елінің мерейін үстем етті.
Сонымен қатар оқушылар бұған дейін де қашықтықтан өткізілген халықаралық, республикалық олимпиадаларына қатысып, халықаралық «Кенгуру – математика» зияткерлік конкурс ІІ дәрежелі дипломдарымен, халықаралық «Человек и природа» балалар байқауы, халықаралық «Бастау» олимпиадасының І дәрежелі дипломдарын иеленген болатын.
Сабақтан тыс уақыттарда ізденімпаз жастар – Жанниет пене Іңкәр «Домбыра», «Өнер», «Би» үйірмелеріне қатысып, өздерінің өнер жолындағы шығармашылықтарын да шыңдау үстінде.
Ұлы Абайдың «Талап, еңбек, терең ой» деген ұлағатын ұлықтай білетін екі дарынды жас Жанниет Бердібек пен Іңкәр Құдайберген Сыр елінің байрағын әлі талай ғылыми байқауларда биіктетіп, жаңа Қазақстанның жалынды жастарының қатарын толтыра бермек.
<img src="https://kyzylorda-news.kz/wp-content/uploads/2022/03/275621352_1311588012677734_4566059804055571799_n.jpg" alt="" />
<img src="https://kyzylorda-news.kz/wp-content/uploads/2022/03/275485875_1311588209344381_6331669678754062445_n.jpg" alt="" />

Сырдариялық жас дарындар ғылыми ізденіс жолында

<a href="https://kyzylorda-news.kz/">Kyzylorda-news.kz.</a> Қызылорда қалалық Полиция басқармасының кезекші бөліміне алаяқтың құрбаны болған қала тұрғыны арызданды.
Арызданушының айтуынша, танысы 2 жыл бұрын сеніміне кіріп, сіңілісін «университетке грантқа оқуға түсіріп беремін» деп, 570 мың теңге көлемінде ақшасын алдап алған.
Полиция қызметкерлерімен жүргізілген жедел-іздестіру іс-шараларының нәтижесінде күдікті әйел ұсталды. Ол Қызылорда қаласының 33 жастағы тұрғыны болып шықты.
Аталған дерек бойынша Қазақстан Республикасы Қылмыстық кодексінің 190-бабының 1-бөлігіне (Алаяқтық) сәйкес сотқа дейінгі тергеп-тексеру әрекеттері жүргізілуде. Күдіктіге қатысты «ешқайда кетпеу және тиісті мінез-құлық туралы қолхат» түрінде бұлтартпау шарасы таңдалды.

Қызылордалық тұрғын алаяқ әйелге алданып қалды

<a href="https://kyzylorda-news.kz/">Kyzylorda-news.kz.</a>&nbsp;Украинадан қазақстандықтарды эвакуациялау үшін төртінші ұшақ жолға шықты, деп хабарлайды <a href="https://sputnik.kz/20220309/ukrainadagy-qazaqstandyqtardy-ushaq-23395026.html">Sputnik Қазақстан</a>.
Азаматтық авиация комитетінің хабарлауынша, төртінші репатриациялық рейс Атырау әуежайынан Польшаның Катовице қаласына Нұр-Сұлтан уақыты бойынша сағат 16:02-де ұшып шықты. Ұшақ Катовицеге сол жердің уақыты бойынша 16:26-де жетеді.
Айта кетері, бұған дейін 28 ақпанда Украинадағы қазақстандықтардың алғашқы легі жеткізілді. Алғашқы рейспен 169 ересек, 6 бала елге оралды.
1 наурызда Украинадан эвакуацияланған қазақстандықтар мінген екінші рейс Нұр-Сұлтанға жетті. Ол рейспен 120 ересек және 4 бала елге оралды.
Үшінші рейс 4 наурызда орындалды. Бортта 131 адам болды, оның 20-сы бала.

Украинадағы қазақстандықтарды алып келуге төртінші ұшақ жіберілді

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында соңғы тәулікте коронавирустың бір жағдайы тіркелді. Өңірде вакцинацияның І компонентін 94,8 пайыз, ІІ компонентімен 92,2 пайызды құрады. Ал «PFIZER» екпесімен 70 475 адам қамтылды. Бұл туралы Өңірлік коммуникациялар қызметінде өткен брифингте облыстық денсаулық сақтау басқармасы басшысының орынбасары Жангелді Шаймбетов хабарлады.
<blockquote>
 «Өңірдегі эпидемиологиялық жағдай күннен-күнге жақсарып келеді. Қазіргі таңда облыс бойынша инфекциялық стационарда 1 адам, ал жансақтау бөлімінде 4 науқас емделуде. Облыстағы барлық емханаларда вакцинациялау жұмыстары жоспар бойынша жүргізілуде. Бүгінде 154 637 облыс тұрғыны ревакцинациядан өтті», – деді Жангелді Шаймбетов.
</blockquote>
Облыс көлемінде бүгінгі күнге дейін коронавирус инфекциясының 24 105 жағдайы тіркелді. Ауруға шалдыққандардың 65 пайызы клиникалық белгілермен анықталған.
<blockquote>
 «Өткен тәулікте бір науқас тіркелді. Қазіргі таңда оған барлық медициналық шаралар қолданылуда. Сонымен қатар, облыста «PFIZER» екпесін 97 695 тұрғын алды. Оның 63 500 жасөспірім. Жоспарланғандардың І турмен 72,0 пайыз, ІІ турмен 40,4 пайызына екпе жүргізілді. Ал жасөспірімдер арасында І турмен 62 101, ІІ турмен 35 054 жасөспірім екпеден өтті», – деді облыстық санитарлық-эпидемиологиялық бақылау департаментінің бөлім басшысы Әлия Ыдырысова.
</blockquote>

Қызылордада 70 мыңнан астам адамға «Pfizer» вакцинасы салынды

<a href="https://kyzylorda-news.kz/">Kyzylorda-news.kz.</a> Елімізде 4 ақпаннан бастап «Қару» жедел профилактикалық іс-шарасы өтуде.
Шара барысында 5076 қару иесі тексеріліп, 120 құқық бұзушылық анықталды.
Қазақстан Республикасы Әкімшілік құқық бұзушылық туралы кодексінің 482-бабымен (қаруды заңсыз сақтау, алып жүру, тасымалдау) заңсыз айналымнан барлығы – 27 дана қарулар тәркіленген. ҚР ӘҚБтК-нің 484-бабымен (қаруды сақтау ережесін бұзу) 38 азаматқа және 486-бабымен (қару тасымалдау, тіркеу ережелерін бұзу) 55 азаматқа әкімшілік шара көрілді.
17 ақпан күні сағат 23:10 шамасында Бала би ауылының шетінде күдік тудырған 38 жастағы тұрғынды тоқтатқан. Тексеру барысында ол өзімен бірге ІІО-да тіркеуде жоқ, 1-ұнғылы, 12-калибрлі аңшы мылтығын алып жүргені анықталды.
Анықталған дерек бойынша Қазақстан Республикасы Әкімшілік құқық бұзушылық кодексінің 482–бабының 1-бөлігімен (Iшкi iстер органдарында тiркелмеген тегiс ұңғылы, газды қару мен олардың патрондарын, сол сияқты электрлі қаруды, үрлемелi қуаты 7,5 Джоульдан жоғары, калибрi 4,5 миллиметрден асатын пневматикалық қаруды заңсыз иеленіп алу, беру, өткiзу, сақтау, алып жүру, тасымалдау) әкімшілік хаттама рәсімделіп, сотқа жолданады.
Аталған бағыттағы жұмыстар өз жалғасын табуда.

Қызылордада 5076 қару иесі тексерілді

<a href="https://kyzylorda-news.kz/">Kyzylorda-news.kz.</a> Мәжіліс депутаты Бақытбек Смағұл мектепке дейінгі тәрбие мен оқытудың жан басына шаққандағы нормативтік қаржыландыру әдістемесіне қатысты мәселені көтерді, деп хабарлайды <a href="https://lenta.inform.kz/kz/bakytbek-smagul-balabakshalarga-karazhat-nege-zhetpey-zhatkanyn-aytty_a3909049">ҚазАқпарат</a>.
<blockquote>
 «Депутаттық сауал мектепке дейінгі тәрбие мен оқытудың жан басына шаққандағы нормативтік қаржыландыру әдістемесіне қатысты болмақ. Бұл мәселеде үлкен проблема бар екенін өңірлерге барғанда танысып білдім. 2017 жылы ҚР Білім және ғылым министрлігінің бұйрығымен білім беру мекемелерін жан басына шаққандағы нормативтік қаржыландыру әдістемесі бекітілген, оның ішінде мектепке дейінгі тәрбие мен оқыту ұйымдары да қамтылған. Бұл әдістеме 2020 жылы Қызылорда қаласында, ал 2021 жылдан бастап облыс бойынша қолданыла бастады. Осы кездегі тәжірибе әдістемеде ескерілмеген бірқатар жәйттарды көрсетті. Жобалық қуаты төмен балабақшаларға осы әдістемемен есептелген қаржы жеткіліксіз. Нәтижесінде, балабақшаларда еңбекақы мен коммуналдық қызметтерге берешектер қалыптасып, қызметкерлердің заңды ренішін тудыруда», – деді Б. Смағұл Білім және ғылым министрлігіне жолдаған сауалында.
</blockquote>
Оның айтуынша, бала-бақшалардағы штат құрылымы ҚР Үкіметінің 2008 жылғы 30 қаңтардағы 77 қаулысына сәйкес болуы тиіс. Алайда, әдістемемен есептелген қаржы жеткіліксіз болғандықтан, нақты штат саны көптеген жағдайда қажеттілікке сәйкес емес.
<blockquote>
 «Министрліктің бұйрығымен бекітілген әдістеме Қазақстан Республикасы Үкіметінің қаулысын орындамауына әкелуде. Қызметкерлер толық штаттың орнына 0,5-0,75 штат бірлігімен жұмыс істеп, олардың еңбек құқықтары бұзылуда. Бұған қоса, бір Қазалы ауданы бойынша бүгінгі таңда 17 бала-бақшаға жабылу қауіпі төніп тұр. Сонымен қатар, дәл осындай жағдай Түркістан облысында да орын алып отыр. Қазақстан Республикасының Бюджет кодексінің 42 бабының 7 тармағына сәйкес, министрліктің қабылданған бұйрығы жергілікті бюджет шығыстарының ұлғаюына әкелуіне байланысты жетіспейтін қаржы республикалық бюджет есебінен өтелуі тиіс. Және де алдағы уақытта мұндай жағдай орын алмау үшін әдістемеде жобалық қуаты төмен бала-бақшалардың нормативіне жоғарылату коэффициенті қолданылуы керек және жылуға қажетті қаржы әдістемеден тыс бөлек есептеліп қаралуы тиіс», – деді ол.
</blockquote>

Бақытбек Смағұл балабақшаларға қаражат неге жетпей жатқанын айтты

<a href="https://kyzylorda-news.kz/">Kyzylorda-news.kz.</a>&nbsp;Енді ЖОО-ларға жаңа онлайн оқыту формасы енгізіледі. Бұл туралы Білім және ғылым министрі Асхат Аймағамбетов хабарлады.
<blockquote>
 «Енді ЖОО-лар оқытудың онлайн түрінде белгілі бір оқыту бағыты бойынша кадрларды дайындай алады. Бұл ретте біліктілік талаптарына сәйкес оқытудың белгілі бір бағыты бойынша жеке лицензия алу міндетті болады», – деді министр.
</blockquote>
Сондай-ақ халықаралық пәндік олимпиада, халықаралық орындаушылар конкурсы мен спорттық жарыс жеңімпаздарына ЖОО-да тегін білім алуға грант беріледі.
Қазақстан тарихы мен Дүниежүзі тарихы оқулықтары енді еліміздің барлық мектебі үшін бірыңғай және базалық болады. Яғни бір оқу бағдарламасы және бір негізгі оқулық негізінде.

ЖОО-ларға жаңа онлайн оқыту формасы енгізіледі

<a href="https://kyzylorda-news.kz/">Kyzylorda-news.kz.</a>&nbsp;Украинадағы жағдай, Ресейге салынып жатқан санкциялар қазақстандық кәсіпкерлердің қызметіне айтарлықтай әсер етіп отыр. Осыған сәйкес «Атамекен» Ұлттық кәсіпкерлер палатасы Үкіметке бизнес мәселелерін шешу жөніндегі жедел штаб құру бастамасын көтеріп, кәсіпкерлердің ұсыныстарын сауалнама арқылы жедел жинақтап жатыр.
Қызылорда облысы кәсіпкерлер палатасына проблемасын айта келген күрішшілер қазіргі жағдайда салаға Үкіметтің қолдауы аса қажет екенін жеткізді.
Елімізде күріш экспортымен айналысатын көшбасшы компания «Абзал және К» толық серіктестігі директорының орынбасары Айгүл Қосмұратова Киевке жіберілген 3 вагон тауардың Ресей аумағында тұрып қалғанын айтты.
<blockquote>
 «Қазір сол жақтан сатып алушы іздеп жатырмыз. Тапқан күннің өзінде бізге өзіміздің мемлекеттік органдардан көмек керек. Себебі фитосанитарлық және СТ-1 сертификаттарына, өзге де құжаттарға өзгерістер енгізу керек», – деген Айгүл Қосмұратова өзге де мәселелерге тоқталды.
</blockquote>
«Абзал және К» ТС өкілінің айтуынша, қазақстандық күрішшілер соңғы 10 жылда тауарларының басым бөлігін ТМД-ның Азия бөлігіндегі нарығына шығарады. Ал Ресей Турция мен Еуропалық Одаққа қарасты елдерге экспорттап келген.
<blockquote>
 «Санкциялардың салдарынан Ресей ендігі жерде күріш өнімдерін ТМД-ның Азия бөлігіндегі елдеріне шығарса, онда біздің онсыз да арзан өнімдеріміздің құны түсіп кете ме деп қауіптеніп отырмыз. Ал бұл тауарөндірушілер үшін үлкен соққы. Өйткені күріш егуге қажеттінің барлығы қымбаттады», – дейді кәсіпкер.
</blockquote>
Күрішшілерді алаңдатып отырған тағы бір мәселе – тыңайтқышқа қатысты. Кей тынайтқыштар мен гербицидтер шет елден келеді екен. Кәсіпкерлер жартылай алдын ала төлем жасап қойған, ал қалғанына енді есеп айырысады. Теңгенің құнсыздануы салдарынан сырттан келетін тыңайтқыштар құны да өседі деген кәсіпкерлер бұл жайт күріш бағасының өсуіне алып келетінін айтуда.
<blockquote>
 «Үкіметтен ауыл шаруашылығы техникаларына арналған утильалым үшін біраз уақытқа мораторий жариялау мүмкіндігін қарастыруды сұраймыз. Бұл осы саладағы кәсіпкерлерге көрсетілген қолдау болар еді», – деді «Абзал және К» ТС өкілі.
</blockquote>
Мұнан өзге, кәсіпкерлер ауыл шаруашылық техникаларының бағасына, доллардың құбылмалы бағасына орай экспорттың жай-күйіне алаңдаулы екенін жеткізді.
<blockquote>
 «Жедел штаб қазір белсенді жұмыс жасап жатыр. Кәсіпкерлердің осындай өзекті мәселелерін «Атамекеннің» Орталық аппаратына шұғыл жеткізіп, ондағы әріптестерімізбен шешу жолдарын қарастырып жатырмыз, – дейді бұл мәселеге қатысты Кәсіпкерлер палатасы директорының орынбасары Пірмұхаммед Сыздықов.
</blockquote>
Егер бизнесіңіз зардап шексе, өз деректеріңізді тәулік бойы жұмыс істейтін +7 778-870-1432 WhatsApp телефонына немесе <a href="https://docs.google.com/forms/d/e/1FAIpQLScO8POLWqIO1LEunCM_i1rbaCfBkpliwCMOv9QYCf1GfOGcGA/viewform">мына сілтеме</a> арқылы жолдауға болады. Қызылорда облысы кәсіпкерлер палатасының байланыс нөмірі 8 /7242/ 40-09-81.

Қызылордалық кәсіпкерлер Үкімет пен «Атамекеннен» көмек сұрайды

<a href="https://kyzylorda-news.kz/">Kyzylorda-news.kz.</a>&nbsp; Медициналық ұйымдарда халыққа медициналық көмек көрсету сапасын жақсарту үшін Әлеуметтік медициналық сақтандыру қоры осы жылы «Жасырын пациент» акциясын жалғастырды.
Акция шеңберінде Қор қызметкерлері медициналық ұйымдарға «жасырын» қоңырау шалу арқылы тіркеу мамандары мен медицина қызметкерлерінің медициналық сақтандыру жүйесі, МӘМС пен ТМККК кіретін медициналық қызметтер, медициналық көмек көрсету стандарттары, сондай-ақ пациенттердің сақтандырылу мәртебесі мәселелері туралы біліміне мониторинг жүргізді.
<blockquote>
 «2021 жылғы зерттеу қорытындысы бойынша Қызылорда облысының медицина қызметкерлерінің білім көрсеткіші 70% – ды құрады. Рейтингте 17 өңір арасында 12-орында тұр», – деп хабарлады ӘМСҚ филиалының директоры Бақыт Исмаханбетов.
</blockquote>
Қор филиалының басшысы атап өткендей, алынған нәтижелер медицина қызметкерлерінің білімін күшейту және медициналық қызмет көрсету сапасын жақсарту қажет бағыттарды анықтауға мүмкіндік береді. Мониторинг қандай да бір жазалау шараларын көздемейді, бірақ Қор сарапшылары медицина қызметкерлерін атаулы оқытуы үшін негіз болады және пациенттерге қажетті медициналық қызмет алудан заңсыз бас тарту санын азайтуға, медициналық ұйымдарда сервисті арттыруға, пациенттерді құзыретті консультациялармен қамтамасыз етуге мүмкіндік береді.

Қазақстан және Қызылорда облысының жаңалықтары