<a href="https://kyzylorda-news.kz/">Kyzylorda-news.kz.</a> Қазақстанда балаларды 1-сыныпқа қабылдау науқаны аяқталды. Құжаттарды қабылдау толық 4 айға, яғни 1 сәуірден 1 тамызға дейін созылды. Осы уақыт ішінде қазақстандықтар шамамен 400 мың өтініш беріп үлгерді. Балалардың 70%-дан астамы мемлекеттік тілде оқуды таңдады.
Өтініштерді қабылдау тәртібі автоматтандырылған және ата-аналар құжаттарды дәстүрлі форматта да, онлайн форматта да тапсыра алды. Өтініштердің 80%-ы электронды форматта берілді.
<blockquote>
 «Оқу жылының басталуына бір ай қалды. Енді мектептер оқу-тәрбие үрдісін сапалы дайындау мен ұйымдастыруға, сынып жиынтықтарын қалыптастыруға кіріседі. Жүргізілетін жұмыстар әлі жеткілікті және ол үшін мектептер тамыз айын тиімді пайдаланады. Бірінші сынып оқушыларының басым бөлігі Абай, Шығыс Қазақстан, Батыс Қазақстан, Қостанай және Қарағанды ​​облыстарында, сондай-ақ Нұр-Сұлтан, Алматы және Шымкент қалаларында байқалады. Балаларды қазақ тілінде оқытатын сыныптарға қамтудың жоғары көрсеткіші Қызылорда (89,6%), Ұлытау (86,6%), Маңғыстау (86,2%), Жамбыл (80,4%) облыстарында байқалады», – деді ҚР Оқу-ағарту министрлігі Мектепке дейінгі және орта білім комитеті төрағасы Гүлмира Кәрімова.
</blockquote>
<a href="https://24.kz/kz/zha-aly-tar/bilim-zh-ne-ylym/item/557516-1-synyp-a-zhat-abyldau-400-my-nan-astam-tinish-t-sti">Хабар 24</a>

1-сыныпқа құжат қабылдау: 400 мыңнан астам өтініш түсті

<a href="https://kyzylorda-news.kz/">Kyzylorda-news.kz.</a>&nbsp; Аудандардың әлеуметтік-экономикалық даму көрсеткіштеріне талдау жүргізілетін арнайы жиында облыс әкімі Нұрлыбек Нәлібаев бүгін Жаңақорған ауданының әкімі Мұрат Тілеумбетовтің есебін тыңдады.
Жиынға облыстық, аудандық мәслихат депутаттары, ардагерлер мен қоғамдық кеңес төрағалары, салалық басқарма басшылары қатысты.
Алдымен Мұрат Жолкелдіұлы ауданның негізгі даму көрсеткіштерін тізбектеді. Аймақ басшысы ауданның тынысын 4 негізгі бағыт бойынша саралады. Макроэкономикалық көрсеткіштердің қорытындысына сәйкес, Жаңақорған ауданы І орынға шығып, жоғары даму динамикасын көрсетті. Дегенмен, өнеркәсіп өндірісі мен өңдеуші өнеркәсіпте өсім болғанымен, кейбір өндіріс түрлерінде қалыс қалу деректері бар.
Жиында өңір басшысы Жаңақорғанда жаңа өндірістік жобалардың тым аз екенін айтып, сынға алды. Жұмысты шапшаң әрі тиімді етудің жолын қарастыру аудан әкімінің тікелей міндеті екенін тағы бір еске салды.
<blockquote>
 Бүгінгі таңда ауданда 66 өндірістік цех жұмыс жасайды екен. Әлеуеті жоғары ауданға бұл өте аз. Себебі, халық саны 1,5 есе төмен Қармақшы ауданында 126 цех бар. Ал, халық саны шамалас Қазалы және Шиелі аудандарында 286 және 336 өндірістік цех жұмыс жасауда. 
 Өңдеу өнеркәсібіндегі үлесі облыстың 34%-ын құрайды. Бұл көрсеткіш уран саласындағы 2 кәсіпорын есебінен құралады. Өңдеу саласында шағын кәсіпорындар мүлдем жоқ десек болады,-деді Н.Нәлібаев.
</blockquote>
Арнайы кеңесте облыс әкімі ауданда соңғы кездері жұмысы тоқтап қалған кәсіпкерлік нысандардың көбейгенін айтып, бұл бағытта жұмысты күшейтуді тапсырды. Мәселен, Жаңақорған ауданы бойынша соңғы 3 жылда тіркелген кәсіпкерлік субъектілерінің саны небәрі 365 бірлікке өскен.
<blockquote>
 Ауданда 87 мыңға жуық халық болса, оның кәсіпкерлікке тек 7% тіркелген. Ал, көршілес жатқан Түркістан облысының 80 мың халқы бар Шардара ауданында кәсіпкерлердің үлесі 11%. 
 Шардара облыс орталығынан шалғай орналасқан аудан бола тұра, кәсіпкерлік әлеуеті жоғары Жаңақорған ауданынан артық дамыған,-деді Нұрлыбек Нәлібаев.
</blockquote>
Мұнан бөлек, облыс әкімі томат пастасын шығару жобасы 5 жылдан бері іске аспай, созбалаңға салынғанын, зауыт құрылысы әр түрлі себептермен басталмағанын қатаң ескертті. Бұл ретте аудан әкімі инвесторлармен жұмысты күшейтуі қажет.
Ауданда инвестиция қарқыны тым төмен. Биыл жоспарланған 48 млрд.теңге инвестицияның тек 11,3 млрд.теңгесі орындалған. Өңір басшысы Жаңақорған табиғи ресурстарға бай аудан бола тұра өнімділік бағытында ізденіс жоқ екенін қатаң ескертті.
<blockquote>
 Қаратау бөктерінде мырыш пен қорғасынды айтпағанда алтын, мыс, магний, әктас, керамзит және тағы басқа минералдық ресурстары бар. Бірақ толығымен зерттелмеген. 
 Әктас аясында бір ғана мысал келтірейін. Қазір білесіздер, қағаз тапшылығы байқалуда. Бірқатар ірі кәсіпорындар сапасы төмен өңделген қағазды пайдалануға көшуде. Көршілес Өзбекстан 2019 жылдан бастап әктастан кеңсе қағазын шығаруды қолға алса, қазіргі таңда Ресей осы бағытта жұмыстар жүргізуде. Елімізге жылына 51 мың тонна кеңсе қағазы импортталады. Неліктен көрші Өзбекстанға барып, тәжірибесін зерттемейсіздер. Қажет болса, тәжірибені енгізейік. Мұрат Жолкелдіұлы, жаңа инвесторларды тарту керек. Осыған байланысты сізден нақты ұсыныстар мен нәтиже күтемін,-деді Н.Нәлібаев.
</blockquote>
Халықты жұмыспен қамту бағыты да талданды. Ауданда жоспарланған 3 118 жаңа жұмыс орынның бар болғаны 1013-і ашылған. Сонымен қатар, Ұлттық жоба шеңберінде жоспарланған 16 жоба бойынша құрылуы тиіс 168 жұмыс орынның бүгінгі күнге тек 14-і ашылған. 
Жиында азық-түлік қорын көбейту, бақша дақылдарын егу жұмыстарының нәтижесі талданды. Облыс әкімі Жаңақорған ауданы табиғи орналасу ерекшелігіне байланысты аймақтағы бақша-көкөніс өнімдерімен қамтамасыз етуші негізгі аудан болуы тиіс екенін ашып айтты. 
Ауданда негізгі дақыл күріш көлемі берілген тапсырмаға сәйкес 6600 гектарға күріш дақылы егілуі тиіс болса, тапсырмадан 416 гектарға кем егілген. Күріштен басқа дәндік дақылдар 81 гектарға, көкөніс 104 гектарға жоспардан кем егілген. Бұл ретте аймақ басшысы көкөніс, бақша дақылдары көлемін арттырып, экспорттау мүмкіндігін қарап, қажет болса осы бағыттарды дамыту үшін арнайы жоба дайындау қажет екенін тілге тиек етті. 
Арнайы кеңесте ауданның кадрлық әлеуеті мен қоғамдық-саяси ахуалы қаралды. Аудандағы басшылық құрамның қызмет өтіліне талдау жүргізілді. Нәтижесінде, үш ауылдық округ әкімі 6-11 жыл арасында, бір бөлім басшысы 7 жыл, 12 мектеп директоры 10-20 жыл аралығында ұзақ мерзім бір лауазымды қызметте келгендігі анықталды. 
Облыс әкімі заңдылыққа сәйкес ротация тәртібін қолдануды ұсынды. Сондай-ақ, аудандағы қоғамдық-саяси ахуалды бақылауға алып, тұрғындардың мәселесіне атүсті қарамай, сындарлы диалог орнатуға шақырды. 
Жиын соңында облыс әкімі 9 айдың қорытындысымен бұл көрсеткіштер қайта қаралып, жауапты мамандардың жұмысы сарапқа салынатынын еске салды.
<img src="https://kyzylorda-news.kz/wp-content/uploads/2022/08/297030955_354910680163516_1743824703825991284_n.jpg" alt="" />

Нұрлыбек Нәлібаев: Жаңақорған бақша-көкөніс өнімдерімен қамтамасыз ететін тірек аудан болуы керек

<a href="https://kyzylorda-news.kz/">Kyzylorda-news.kz.</a> Қызылорда қаласындағы ЗК-169/1 тергеу изоляторы қамауында отырған сотталғандар арасында кітап оқитындардың саны күн сайын артып келеді. Осыған байланысты мекеме бастығының тәрбие жөніндегі орынбасары әділет майоры Қайрат Олжабаев кітапхана қорын арттыру әрі соталғандады тәрбиелеуге пайдалану мақсатында жан-жақтан кітап сұрастыру жұмыстарын жүргізді.
Қазіргі таңда кітапхана қоры 70-ке жуық кітаппен толықтырылды. Бұл кітаптардың алғашқы легіне жастар арасында құрылған «Кітап құрттары» ұйымының жетекшісі Талғат Меңдібай ұйымдастырған «Кітап сыйла» акциясы аясында қол жеткізілді.
Мекеме бастығының тәрбие жөніндегі орынбасары Қайрат Олжабаевтың айтуынша, бұл кітаптар арнайы сараптамадан өткізіліп, мекеме кітапханасына тапсырылады.
<blockquote>
 «Теміртордағы азаматтардың электронды кітаптар мен ақпараттық порталдарға қолы жетпейді. Бірақ, «көз жетпейтін жерге ұшқыр ой жетеді» демекші, ойдың жүйріктігін жетілдіріп, ұтқырлығын оздыратын, рухани тәрбие беретін құнды қазына – кітап екені ақиқат. Сондықтан да бүгінгі акция барысында жиналған кітаптарымыздың қателік жасап жазаға тартылған адамдарды тәрбиелеуге, рухани байытуға, өмірге жаңаша көзқараспен қарауға игі әсері болады деп ойлаймын – деді, Талғат Меңдібай.
</blockquote>
Айта кетейік, «Кітап құрттары» ұйымының жетекшісі Талғат Меңдібай алдағы уақытта сотталғандарды кітап оқуға тартуға арналған тың идеялары бар екенін айтты. Мекеме бастығының орынбасары бұл ұсыныстарды жүзеге асыру үшін бірлесе жұмыс жасайтындығын жеткізді.
<img src="https://kyzylorda-news.kz/wp-content/uploads/2022/08/25d4e62f-969c-46d2-812f-3d8a7087e8c9.jpg" alt="" />

«Кітап құрттары» ұйымы сотталғандарға кітап сыйлады

<a href="https://kyzylorda-news.kz/">Kyzylorda-news.kz.</a> Қызылорда облысында 19 шілде мен 18 тамыз аралығында өтіп жатқан «Қауіпсіз жол» айлығы іс-шарасының алғашқы 7 күнінде 3891 құқық бұзушылық анықталды.
Тиiстi тiркеусiз, рұқсатсыз немесе хабарлама жібермей кәсіпкерлік немесе өзге де қызметпен айналысудың (ҚР ӘҚБтК-нің 463 бап)-14,медициналық қарап-тексеруден өтпеудің (ҚР ӘҚБтК-нің 590.8-б.) -9,заңсыз қайта жабдықтаудың /590.7-бөлігімен/-121, міндетті техникалық қарап-тексеруден өтпеген /590.9-бөлігімен/-330, ұялы телефонмен сөйлесудің /591.1-бөлігімен/-150, жүргізушінің көлік құралын мас күйінде басқарудың/608-бабы/ -39, қауіпсіздік белдігін тақпаудың /593.1-бөлігімен/-788, жаяу жүргіншіге жол бермеудің /600 бап/ -98, құжатсыз автокөлік басқару /612.1-бөлігімен/- 229, жаяу жүргіншілер жолағынан өтпеу /615 бап/- 195, маневр жасау ережесін бұзу /595 бап/-156 деректері анықталды.
Бұл бағыттағы жұмыстар жалғасуда.

Қызылордада «Қауіпсіз жол» шарасы жүріп жатыр

<a href="https://kyzylorda-news.kz/">Kyzylorda-news.kz.</a>&nbsp; «Азаматтарға арналған үкімет» мемлекеттік корпорациясы «Халықтың табысын арттырудың 2025 жылға дейінгі бағдарламасы» кешенді жоспарын орындау аясында биыл шілдеден бастап өз қызметкерлерінің жалақысын 25 пайызға арттырды.
Мемлекеттік корпорацияны дамытудың бір бағыты — қызметкерлердің еңбек жағдайын жақсарту. Бұл тиімді жұмыс істеу және корпоративтегі мәдениет деңгейін арттыру үшін жасалынған стратегиялық қадам.
2022 жылдың қаңтарында қызметкерлердің жалақысы 25 пайызға өсті. 2022 жылғы 1 шілдеден бастап жалақы мөлшері тағы 25 пайызға ұлғайды. Жалпы алғанда жалақы өсімі 50 пайыз болды.
<blockquote>
 «Мемлекеттік корпорация «бір терезе», «бір өтініш», процестерді барынша оңайлату және оңтайландыру мақсатында проактив қағидаты бойынша мемлекеттік қызметтерді жеке және заңды тұлғаларға көрсете отырып, өзін толыққанды бірыңғай провайдер есебінде бекітті. Қызметкерлердің жалақысын көтеру – мемлекеттік қызметтер жүйесін одан әрі табысты дамытудағы өте маңызды мәселе екені анық. Мемлекеттік корпорация құрылғаннан кейін, өкінішке қарай, біздің қызметкерлеріміз белгілі бір статуссыз қалды. Олар мемлекеттік қызметкерлерге де, мемлекеттік қызметшілерге де жатпайды. Біздің қызметкерлер – өте білімді, азаматтар үшін нақты қолайлы жағдай жасай білетін мамандар, көпшілігі – жастар. Қазір клиенттер мемлекеттік органдардың табалдырығын тоздырмай, кез келген анықтаманы оңай ала алады, уақытын, қаражатын айтарлықтай үнемдейді. Еңбекақыны арттырудың нәтижесінде қызметкерлердің жалақысы 150 мың теңгеге жетті. Мемлекеттік корпорацияның басшылығы бұған ішкі шығындарды оңтайландыру және бизнес-процестерді автоматтандыру арқылы қол жеткізді. Инфляция мен үлкен қалалардағы өмірді ескерсек, жалақы әлдеқайда жоғары болуы керек. Бұл мәселені Парламент депутаттары да көтерді. Жалақыны көтеру және қызметкерлеріміздің мәртебесін айқындау мәселесі Үкімет тарапынан тиісті назар аударуды талап етеді деп ойлаймын» – деді «Азаматтарға арналған үкімет» мемлекеттік корпорациясының омбудсмені Майра Айсина.
</blockquote>
Бұған дейін Мемлекеттік корпорация қызметкерлерінің жалақысы 85-115 мың теңге болған еді, соңғы 5 жылда қызметкерлердің айлығы айтарлықтай өскен жоқ.&nbsp;
«Азаматтарға арналған үкімет» мемлекеттік корпорациясында бүгінде 22 мыңға жуық қызметкер жұмыс істейді. Бұл – 20 филиал, 328 фронт және 442 бэк-офис, 68 мобильдік ХҚО.

«Азаматтарға арналған үкімет» мемлекеттік корпорациясы қызметкерлердің жалақысын 25 пайызға көтерді

<a href="https://kyzylorda-news.kz/">Kyzylorda-news.kz.</a>&nbsp; Биыл тамыз айында қазақстандықтар 9 күн демалады. Биыл тамызда аптасына бес күн істейтін азаматтар 22 күн жұмыс істеп, 9 күн демалады. Ал алты күндік жұмыс аптасында – 26 жұмыс күні және алты күн демалыс.
Тамыз айында Қазақстанда Конституция күні аталып өтеді. Осы жылы 30 тамыз сейсенбіге түсіп тұр, осыған байланысты демалыс күні сенбіден дүйсенбіге ауыстырылды.
Сол себепті бес күн жұмыс істейтін қазақстандықтар қатарынан үш күн – 28, 29 және 30 тамыз демалады. Ал алты күн жұмыс істейтін қазақстандықтар 28, 30 тамыз күні демалады.

Қазақстандықтар тамыз айында қалай демалады?

<a href="https://kyzylorda-news.kz/">Kyzylorda-news.kz.</a> Биыл облыста тұтынушылар құқығының бұзылу дерегі бойынша 159 өтініш түскен. Бұл өткен жылмен салыстырғанда 32,5 пайызға өскен. Түскен арыздардың басым көпшілігі – бөлшек сауда саласына қатысты екені анықталды. Бұл туралы Өңірлік коммуникациялар қызметінде өткен брифингте облыс бойынша тұтынушылардың құқықтарын қорғау департаментінің басшысы Ерқасым Сүлейменов мәлімдеді.
<blockquote>
 «Бірінші жартыжылдықта келіп түскен арыздарға талдау жүргізілген болатын. Нәтижесінде бөлшек сауда саласына қатысты – 91 өтініш, тұрғын-үй коммуналдық шаруашылық қызметтері бойынша – 28, электрондық сауда – 13, қоғамдық тамақтану бойынша – 5, қаржы қызметі бойынша – 3 және де басқа салалар. Аталған өтініштердің 108-і заңға сәйкес қаралып, тиісті шаралар қабылданды. Ал 28 өтініш басқа мемлекеттік органдарға жолданды. Жалпы жыл басынан бері тұтынушыларға барлығы – 1,2 млн. теңгенің қаржысы қайтарылды. Сондай-ақ, тұтынушылардың құқығын қорғауға арналған кейбір заңнамалық актілерге, заңдарға өзгерістер мен толықтырулар енгізіледі. Әзірге бұл заң жобасы уәкілетті органмен қаралып, мүдделі мекемелер және үкіметтік емес ұйымдар арқылы талдануда», – деді департамент басшысы Ерқасым Сүлейменов.
</blockquote>

Қызылордада тұтынушылардың өтініші бойынша 1,2 млн. теңгенің қаражаты қайтарылды

<a href="https://kyzylorda-news.kz/">Kyzylorda-news.kz.</a>&nbsp;Тамыз айының 1-6 аралығында өрт сөндіру және құтқару спортынан XXVIII ерлер және VIII әйелдер арасындағы республикалық чемпионат өтеді. Төтенше жағдайлар қызметкерлері арасындағы спорт додасына үздік деп танылған 31 команда қатысады. Бұл туралы Өңірлік коммуникациялар қызметінде өткен брифингте облыстық төтенше жағдайлар департаментінің бастығы Руслан Қайрақбаев хабарлады.
<blockquote>
 «Төтенше жағдайлар қызметкерлерінің арасындағы спорттық сайысқа еліміздің түкпір-түкпірінен жиналған кәсіби мамандар бақ сынайды. Бұл дода – төтенше жағдайлар қызметіндегі мамандардың шымырлығын, кәсіби шеберлігін одан әрі дамытуға бағытталған ауқымды шара. Мамандар арасындағы республикалық чемпионаттар жыл сайын дәстүрлі түрде әр өңірде өткізіліп тұрады. Биылғы жазғы чемпионат біздің Сыр елінде өткізілмекші. Бұл сайыстан топ жарған командалар әлемдік жарыстарда бақ сынайтын болады. Сырбойылық төтеншіліктердің команда жетекшісі – өрт сөндіру қызметі бастығының орынбасары, азаматтық қорғау полковнигі Әбділда Баякеев. Ал команда жаттықтырушылары – азаматтық қорғау майоры Владимир Ситников пен Бекболат Бакенов. Барлық жерлестерімізді өрт сөндіру және құтқару спортына жанкүйер болуға шақырамыз», – деді облыстық ТЖД бастығы Руслан Сламбекұлы.
</blockquote>

Төтенше жағдайлар қызметкерлері арасында республикалық чемпионат басталды

<a href="https://kyzylorda-news.kz/">Kyzylorda-news.kz.</a> Алдағы тәуліктерде солтүстік өңірлерде күн салқындайды. Бұл туралы Қазгидромет болжамында айтылған.
«Қазақстанның солтүстік өңірлерінде, қатты нөсерден кейін салқын ауа массаларына толы Солтүстік антициклон басымдық алады. Түнде ауа температурасы айтарлықтай төмендейді. Қазақстанның оңтүстігінде жаңбыр болжанады, ал таулы және тау бөктеріндегі аудандарда, нөсер жаңбыр жауады. Республика бойынша найзағай, бұршақ, дауыл, желдің күшеюі, республиканың солтүстігінде тұман күтіледі», – делінген хабарлама.
Күндіз батыста +28 +33°С, оңтүстік-батыста +33 +38°С, солтүстік-батыста +18 +28°С. Солтүстікте, шығыста және республиканың орталығында түнде термометрлер +7 +12°С дейін төмендейді, күндіз негізгі фон +17 +28 °С-ты, елдің оңтүстігінде болса +25 +34°С-ты құрайды. Ал оңтүстік-шығыста +30 +35-тан +25 +30°С-қа дейін төмендейді, таулы аудандарда +22°С болады.

Ертеңнен бастап солтүстік өңірлерде күн салқындайды

<a href="https://kyzylorda-news.kz/">Kyzylorda-news.kz.</a>&nbsp;Оқу-ағарту министрлігінің бұл жаңалығын депутаттар да құп көріп отыр. Бұған дейін бір топ сенатор осыған қатысты үкіметке депутаттық сауал да жолдаған, деп хабарлайды «<a href="https://24.kz/kz/zha-aly-tar/bilim-zh-ne-ylym/item/557418-1-synyp-o-ushylary-tek-ana-tilinde-bilim-alady-ajma-ambetov">Хабар 24</a>».
Сенатор Мұрат Бахтиярұлы, бастауыш сыныпта бала тек ана тілінде ғана білім алуы керек, дейді.
<blockquote>
 «Миы әлі қалыптаспаған кішкентай ғана 6-7 жастағы баладан бірден ана тілінен бөлек орыс, ағылшын тілін оқыту бірде-бір мемлекетте жоқ. Мен әлемнің бүкіл дамыған мемлекеттерінің білім жүйесін қарап көрдім. Соның ішінде екі тілді бірінші сыныптан оқытатын екі-ақ ел бар екен. Екінші сыныптан 4 мемлекетте бар екен. Мұны біз депутаттық сауал ретінде 17 сенатор қол қойып, үкімет басына жібердік Сәуір айының аяғында бір топ депутат бұны тағы да көтердік. Үкімет бұны қолдады», – дейді ҚР Парламенті Сенатының депутаты Мұрат Бахтиярұлы.
</blockquote>
Тілтанушы ғалымдар, ой мен сана жүйесі әлі толық қалыптаспаған балаға үш тілді қатар үйрену қиынға соғатынын айтады. Сондықтан әріппен енді танысқан бүлдіршінге бірден қос шет тілін оқытудың қажеті жоқ, дейді.
<blockquote>
 «Ана тілінің сөйлеу әрекетін 1-2 сыныптың соңында меңгеріп бітеді. Сол кезде біз айтамыз бала ана тілінің төл сөйлеу әрекетін біледі. Өз жас деңгейінде меңгереді деп айта аламыз. Осыларды меңгермей жатып, Өзінің ана тілін меңгермей жатқан балаға келіп ағылшын тілін береміз. Сондықтан, ағылшын тілін 3-сыныптан енгізу ол дұрыс. Оған дейін ағылшын тілінің қажеті жоқ», – деді тілтанушы ғалым Таңат Аяпова.
</blockquote>
Бұған дейін, бірінші сынып оқушылары ана тілімен қатар, орыс және ағылшын тілдерінде қаріп таныды. Зерттеулер осыдан 6 жыл бұрын енгізілген бұл жаңашылдықтың тиімсіз екенін көрсеткен. Оқу-ағарту министрлігі бұл тұста шетелдік білім тәжірибесімен қатар ғалымдардың зерттеуіне жүгінген.
<blockquote>
 «Бұл жерде біз білім саласының ең озық елі деп танылған Финляндияның тәжірибесін қарадық. Японияның, Қытайдың тәжірибесін зерттедік. Сонымен қатар ғалымдардың да пікіріне жүгіндік. Иә 6 жастағы бала үш тілді де меңгере алады. Тек біз қаншалықты оған қиын екенін ойлауымыз керек», – деді ҚР Оқу-ағарту министрлігі Мектепке дейінгі және орта білім комитетінің төрағасы Гүлмира Кәрімов.
</blockquote>
Бұл бастама баланың ең алдымен ана тілінде жазып, оқып үйренуіне бағытталған. Мысалы, қазақ тілінде оқытатын мектептің бірінші сыныбында сабақ тек қазақ тілінде өтеді. Екінші сыныпта орыс тілі, үшінші сыныпта ағылшын тілі қосылады. Ал, орыс тілінде оқытатын мектептерге келсек, бірінші сыныпта орыс және мемлекеттік тіл, 3-сыныптан бастап ағылшын тілі қосылатын болды.

Асхат Аймағамбетов: 1-сынып оқушылары тек ана тілінде білім алады

<a href="https://kyzylorda-news.kz/">Kyzylorda-news.kz.</a>&nbsp;ҚР ҰЭМ Табиғи монополияларды реттеу комитеті және оның аумақтық департаменттері табиғи монополиялар субъектілерінің тарифтерін және қоғамдық маңызы бар нарықтардағы бағаларды мемлекеттік реттеуді жүзеге асырады.
Бұдан бұрын, 2021 жылғы 30 маусымда ҚР ҰЭМ Табиғи монополияларды реттеу комитетінің Қызылорда облысы бойынша департаменті есептерді қарау нәтижесі бойынша, тауарлық газды газ таратушы құбырлар арқылы тасымалдау қызметіне 2021 жылғы 1 тамыздан бастап қолданысқа енгізілуімен 1000 м3 үшін ҚҚС-сыз 3 320,45 теңге мөлшерінде уақытша өтемдік тариф бекіткен болатын.
Алайда, «ҚазТрансГаз Аймақ» АҚ Қызылорда филиалы ТМРК-ның Қызылорда облысы бойынша департаментінің әрекеттерімен келіспей, аталған бұйрықты заңсыз деп тану туралы сотқа шағым түсірді.
Барлық сот талқылауларының нәтижесінде, Қызылорда облысы бойынша ТМРКД бұйрығы заңды деп танылды.
Нәтижесінде, Қызылорда облысы тұтынушыларының құқықтарын қорғау мақсатында «ҚазТрансГаз Аймақ» АҚ Қызылорда филиалының сомасы 1,4 млрд. теңге негізсіз алынған кірісі тұтынушылардың барлық топтары үшін тарифті уақытша, оның ішінде, халық үшін тариф 1000 м3 үшін ҚҚС-сыз 16 492,52 теңгеден 13 043,49 теңгеге дейін 21% шамасында төмендеуімен 2022 жылғы 1 тамыздан бастап енгізумен бір жыл мерзімге төмендету арқылы қайтарылатын болады. 
Комитет және оның аумақтық департаменттері тұрақты түрде тұтынушылар мүддесінің қорғалуын қамтамасыз ету және тұтынушылар мен субъектілер арасында мүдделер теңдігіне қол жеткізу бойынша жұмыстар жүргізіп отырады.
Қандай да бір сұрақтар туындаған жағдайда, тұтынушылар өздерінің құқықтарын қорғау үшін Комитетке және оның аумақтық департаменттеріне жүгіне алады.

Қызылорда облысының барлық тұтынушылары үшін газ бағасы 21% төмендеді

<a href="https://kyzylorda-news.kz/">Kyzylorda-news.kz.</a>&nbsp;2022 жылдың бірінші жарты жылдығында қызылордалықтарға көрсетілген медициналық қызметтердің сапасы мен көлемі бойынша 40 мыңнан аса ақау анықталды.
Әлеуметтік медициналық сақтандыру қорының сарапшылары мемлекет тегін медициналық көмектің кепілді берілген көлемі (ТМККК) шеңберінде және МӘМС пакеті бойынша жеткізушілер көрсеткен қызметтердің сапасы мен көлеміне мониторинг жүргізуді жалғастыруда.
2022 жылдың бірінші жартыжылдығындахалыққа медициналық көмек көрсету кезінде 40,06мыңдай түрлі кемшілік анықталды, медициналық ұйымдарға салынған айыппұл сомасы 1&nbsp;389,9млнтеңгеден асты.
<blockquote>
 «ТМККК және МӘМС пакеттері бойынша Қор жеткізушілері халыққа көрсеткен медициналық қызметтер үшін ақы төлеу осы қызметтердің сапасы мен көлеміне мониторинг жүргізілгеннен кейін ғана жүргізілетінін атап өткен жөн. Іс жүзінде көрсетілген және медициналық көмек көрсету стандарттары мен ережелерін, сондай – ақ клиникалық хаттамалардың ұсынымдарын сақтай отырып, құжатпен расталған қызметтерге ақы төленеді», – деп атап өтті «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.
</blockquote>
Қор филиалының директоры түсіндіргендей, анықталған кемшіліктің ең көп саны жан басына шаққандағы нормативке кірмейтін, әрбір қызмет жеке төленетін консультациялық-диагностикалық қызметтерді көрсетумен байланысты. Жалпы құны 88,6 млн теңге болатын 31 261 осындай ақаулар тіркелді. Сондай-ақ, амбулаториялық-емханалық көмек көрсету кезінде 1 992 &nbsp;ақау, тәулік бойы жұмыс істейтін көп бейінді стационарларда медициналық көмек көрсету кезінде 6 507 кемшіліктер анықталды.
Егер сізде сапалы медициналық қызметтерді алуға қатысты сұрақтар туындаса, онда өз емханаңыздың Пациентті қолдау қызметіне хабарласуыңыз қажет. Егер мәселені сол жерде шешу мүмкін болмаса, онда Әлеуметтік медициналық сақтандыру қорына өзіңізге ыңғайлы тәсілмен өтініш беріңіз: fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot.

Қазақстан және Қызылорда облысының жаңалықтары