<a href="https://kyzylorda-news.kz/">Kyzylorda-news.kz.</a>&nbsp;Қазақстанда өткен тәулікте 2087 адамнан коронавирус індеті анықталды, деп хабарлайды coronavirus2020.kz.
Өңірлер бойынша:
Нұр-Сұлтан қаласы – 1442,
Алматы қаласы – 93,
Шымкент қаласы – 123,
Ақмола облысы – 31,
Ақтөбе облысы – 19,
Алматы облысы – 28,
Атырау облысы – 42,
Шығыс Қазақстан облысы – 16,
Жамбыл облысы – 35,
Батыс Қазақстан облысы – 55,
Қарағанды облысы – 49,
Қостанай облысы – 19,
Қызылорда облысы – 35,
Маңғыстау облысы – 25,
Павлодар облысы – 35,
Солтүстік Қазақстан облысы – 9,
Түркістан облысы – 31.
Жалпы пандемия басталғалы елімізде коронавирус&nbsp;997 438&nbsp;адамнан тіркелді.

Қызылордада коронавирус жұқтырғандар көбейді

<a href="https://kyzylorda-news.kz/">Kyzylorda-news.kz.</a>&nbsp;10 қаңтар Қазақстан бойынша Жалпыұлттық аза тұту күні деп жарияланды.
Елдегі жаппай тәртіпсіздіктер кезінде көптеген адамның қайтыс болуына байланысты ҚР Президенті Қасым-Жомарт Тоқаев 10 қаңтарды Жалпыұлттық аза тұту&nbsp;күні&nbsp;деп&nbsp;жариялады.
Бүгін Қазақстан бойынша Мемлекеттік тулардың барлығы төмен түсіріледі. Осылайша бүлік кезінде қаза тапқан бейбіт тұрғындар мен әскерилер, полиция өкілдері мен құқық қорғау қызметкерлеріне құрмет көрсетіледі.
<blockquote>
 «Алматыда содыр-лаңкестердің қолынан әкімшілік ғимараттар ғана емес, бейбіт тұрғындардың мүлкіне де залал келді. Сондай-ақ жүздеген бейбіт тұрғын мен әскери қызметшінің денсаулығы мен өміріне қатер төнді. Осы трагедиялар кезінде қайтыс болғандардың отбасына көңіл айтамын», – деді Президент.
</blockquote>
Сондай-ақ Мемлекет басшысы қаскөйлікке барған адамдардың бәрі қатаң жазаланатыны айтты.

Бүгін – Жалпыұлттық аза тұту күні

<a href="https://kyzylorda-news.kz/">Kyzylorda-news.kz.</a> ҚР Президенті Қасым-Жомарт Тоқаевтың Қазақстан халқына үндеуі жарияланды.
Құрметті отандастар!
Елімізде лаңкестікке қарсы операция жалғасуда. Полиция, ұлттық ұлан және армиямыздың күшімен Конституцияға сәйкес заңдылық пен тәртіп орнату мақсатында ауқымды әрі күрделі жұмыс атқарылып жатыр.
Кеше Алматы, Ақтөбе қалалары мен Алматы облысындағы жағдай қалпына келтірілді. Енгізілген төтенше жағдай режимі өз нәтижесін берді. Бүкіл еліміз бойынша конституциялық заңдылық орнатылды. &nbsp;&nbsp;
Бірақ террористер мемлекеттік және жеке азаматтардың дүние-мүлкіне әлі де залалын келтіріп, азаматтарға қарсы қару қолдануда.
Құқық қорғау органдары мен армияға ескертусіз оқ атуға бұйрық бердім.
Шетелде тараптарға келіссөз жүргізіп, &nbsp;проблемаларды бейбіт жолмен шешуге шақырған сөздер айтылуда. Не деген ақымақтық?! Қылмыскерлермен, қанішерлермен қандай келіссөз болуы мүмкін?
Біз қаруланған әрі дайындықтан өткен жергілікті және шетелдік содырлармен бетпе-бет келіп отырмыз. Нақты айтқанда, содырлармен және лаңкестермен. Сондықтан оларды жою керек. Бұл жуық арада жүзеге асырылады.
Күштік құрылымдар бұл міндетті моральдық және техникалық тұрғыдан орындауға дайын.
Өздеріңізге мәлім, ҰҚШҰ-ның жарғылық құжаттарының негізгі ережелеріне сәйкес Қазақстан конституциялық тәртіпті ретке келтіруге көмек беру үшін Ұйымға мүше мемлекеттердің басшыларынан біріккен бітімгерлік күштерін енгізуді сұрады.
Бітімгерлік күштер еліміздегі стратегиялық нысандардың қорғалуын және қызметін қамтамасыз ету үшін қысқа мерзімге келді.
ҰҚШҰ-ға төрағалық етіп отырған Арменияның Премьер-министріне, сондай-ақ Беларусь, Қырғызстан, Тәжікстан президенттеріне шынайы алғыс айтамын.
Ресей Президенті Владимир Путинге ерекше ризашылық білдіремін. Ол менің үндеуіме&nbsp; жедел, ең бастысы, жолдастық ниетпен үн қатты.
Сонымен қатар Қытай Төрағасына, Өзбекстан, Түркия президенттеріне, БҰҰ-ның және басқа да халықаралық ұйымдардың басшыларына қолдау көрсеткені үшін алғыс айтамын.
Еліміздегі қайғылы жағдай демократия мен адам құқығы &nbsp;мәселелерінің жаңа қырын ашып көрсетті.
Демократия дегеніміз – жүгенсіздік емес, әсіресе блогосферада заңға қайшы әрекет ететін арандатушылық емес. &nbsp;
Тәуелсіздіктің 30 жылдығына орай сөйлеген сөзімде заң мен тәртіп еліміздің игілігі мен берекесінің негізгі кепілі екенін айттым.
Бұл тек Қазақстанға ғана емес, барлық өркениетті мемлекетке тән. Бұл азаматтардың бостандығы мен адам құқығын шектеу деген сөз емес. Керісінше, Алматыдағы және Қазақстанның өзге де қалаларындағы қайғылы жағдай заңның сақталмауы, шектен шыққандық және анархия адам құқығының бұзылуына әкеп соқтыратынын көрсетті.
Алматыда содыр-лаңкестердің қолынан әкімшілік ғимараттар ғана емес, бейбіт тұрғындардың мүлкіне де залал келді.
Сондай-ақ&nbsp; жүздеген бейбіт тұрғын мен әскери қызметшінің денсаулығы мен өміріне қатер төнді.
Қаза тапқан азаматтардың отбасылары мен жақындарына қайғырып көңіл айтамын.
Естеріңізде болса, 2020 жылдың мамыр айында менің ұсынысыммен азаматтардың бейбіт жиналыстарды өткізуі туралы заң қабылданды.
Бұл заң, шын мәнінде, елімізде демократияны ілгерілету бағытында жасалған маңызды қадам. Өйткені құжатта митингілер мен жиналыстарды өткізу үшін рұқсат алудың қажет еместігі, тек билік органдарына ескерту жеткілікті екені қарастырылған. Жиынды еліміздің кез келген қаласының орталығында өткізуге болатыны көрсетілген. Алайда қай жерде жиналып, не айтсақ та құқымыз бар деп санайтын кейбір «құқық қорғаушылар» мен «белсенділер» өздерін заңнан жоғары қояды. &nbsp;
Осындай шолақ белсенділердің жауапсыз әрекеттерінің кесірінен полиция қызметкерлері өздерінің негізгі құқықтық тәртіпті сақтау қызметіне толық көңіл бөле алмайды. Оларға көбінесе зорлық-зомбылық көрсетіп, тіл тигізеді.
Осындай «белсенділердің» кесірінен интернет бұғатталады. Нәтижесінде миллиондаған азамат пен отандық бизнес зардап шегеді.
Яғни, ішкі экономикалық, әлеуметтік және саяси тұрақтылыққа орасан зор зиянын тигізеді.
Құқықтық тәртіпті бұзуға өздерін «еркін» бұқаралық ақпарат құралдарымыз деп санайтындар мен біздің көпұлтты халқымыздың негізгі мүдделерінен алшақ «сырттағы қайраткерлер» ықпал етіп, шын мәнінде арандатушылық рөл атқарады.
Осы жауапсыз демагогтардың барлығы Қазақстанда қайғылы жағдайдың туындауына себепкер болды десек, асыра айтқанымыз емес. Біз құқықтық вандализмнің кез-келген түріне қатаң шара қолданамыз.
Біздің тарихымыздағы осы бір қиындықты тез арада еңсеретінімізге ешқандай күмән жоқ. Ең бастысы, болашақта мұндай оқиғалардың қайталануына жол бермеу керек.
Мен құрған ведомствоаралық топ содырлар мен лаңкестерді іздеумен және оларды ұстаумен айналысады. Олардың бәрі қатаң қылмыстық жауапкершілікке тартылады деп азаматтарымызға уәде беремін.
Барша қазақстандықтан өтінерім, сақтық танытып, барынша қырағы болыңыздар. Күмәнді адамдардың қандай да бір күдік тудыратын белсенді әрекетін байқасаңыз, құқық қорғау органдары мен жедел желілерге хабарлаңыздар.
Құқық қорғау органдары мен армияның іс-қимылына, сондай-ақ олардың ведомствоаралық үйлесіміне қатысты анықтайтын мәселе көп.
Арнаулы жасақтың, арнаулы құрал-жабдықтардың жетіспейтіні белгілі болды. Осы мәселелерді шұғыл түрде шешуіміз керек.
Содырлардың терракт жасау туралы жымысқы жоспары мен жасырын дайындығын мемлекет қалайша білмей қалғанын анықтап, түсіну аса маңызды. Тек Алматының өзіне 20 мың содыр шабуыл жасады.
Барлық облыста әскери, әкімшілік және әлеуметтік нысандарға ұйымдасқан түрде, жоғары жауынгерлік дайындықпен және асқан қатігездікпен шабуыл жасау әрекеті олардың нақты жоспарының болғанын көрсетті.
Содырлардан бөлек, идеологиялық диверсия жасауға әбден жаттыққан, жалған ақпараттар мен «фейктер» таратуды шебер меңгерген және адамдардың көңіл-күйіне ықпал ете алатын мамандар жұмыс істеген.
Оларды дайындаумен және басқарумен біртұтас командалық пункт айналысқанға ұқсайды. Бұл мәселемен ҰҚК мен Бас прокуратура айналысып жатыр.
Енді жақсы жаңалықтар туралы.
Жағдайдың тұрақталғанына қарай еліміздің кейбір өңірлерінде интернет-байланысты белгілі бір уақыттарда қосу туралы шешім қабылдадым. Бұл шешім азаматтарымыздың тұрмыс-тіршілігіне оң әсер ететініне сенімдімін.&nbsp;
Алайда, интернетке еркіндік берілгенімен ойына келгенді жазуға, жалған ақпарат таратуға, біреуге тіл тигізуге, арандатушылыққа жол берілмейтінін ескертемін.
Ондай материалдар шықса, олардың авторларын тауып жауапкершілікке тарту шараларын қабылдаймыз.&nbsp;
Лаңкестікке қарсы операция жалғасып жатыр. Содырлар әлі де қаруларын тастаған жоқ, қылмыстарын жалғастыруда немесе соған дайындық жүргізуде. Олармен соңына дейін күресу керек. Берілмегендерді жоямыз.
Болашақта басымыздан өткерген қайғылы жағдайдан сабақ алуымыз керек. Бұның әлеуметтік-экономикалық ауыртпалығы да бар.
Үкімет менің 11 қаңтарда Мәжілісте айтатын сөзіме қатысты нақты шешімдер қабылдауы керек.
Ал әзірге айтарым, қадірлі отандастарым, мен сіздерді мақтан тұтамын.
Осы күндері сабыр сақтап, тұрақтылық пен қоғамдық тәртіпті қамтамасыз етуге күш салған Қазақстан азаматтарына алғыс білдіремін.
Арандату мен деструктивті ұрандарға қарамастан заңға және өз елдеріңізге деген адалдықты сақтап қалдыңыздар.
Ірі қалалардағы студенттерге, еңбек ұжымдарының мүшелеріне, өнеркәсіп және ауыл шаруашылығының жұмысшыларына азаматтық ұстанымдарыңыз үшін алғыс айтамын.
Наразылықтың бейбіт тәртібін сақтағаны үшін өңір тұрғындарына ризашылығымды білдіремін.
Бейбіт шеруде қойылған талаптардың бәрін ескереміз. Диалогтың нәтижесінде компромиске келіп, өткір әлеуметтік-экономикалық мәселелер бойынша шешімдер қабылданды.
Сондықтан жағдай тұрақталған өңірлерде біртіндеп төтенше жағдай режимін аламыз.
Қастерлі Отанымыз – Қазақстан әлем картасындағы егемен ел ретінде қуатты мемлекетке айналады, экономикамыз анағұрлым қарқынды дамиды, азаматтарымыздың әлеуметтік жағдайы жақсара түседі.&nbsp;
Мен мұны зор сеніммен айтып тұрмын. Өйткені, оған қол жеткізу үшін қажетті реформалар мен нақты іс-шаралар жоспарын ұсынатын боламын.
Баршаңызға зор денсаулық, құт-береке тілеймін.
Тек қана аманшылықта кездесе берейік!

Президент Қасым-Жомарт Тоқаевтың Қазақстан халқына үндеуі

<a href="https://kyzylorda-news.kz/">Kyzylorda-news.kz.</a> Қызылорда өңірінде террористік қауіптің қызыл шекті деңгейі енгізілді.
Қазіргі таңда Қызылорда облысының аумағында террористерге қарсы операция жалғасып жатыр. Қарулы топ облыстық, қалалық әкімдікке, Nur Otan партиясы мен облыстық сот ғимаратына шабуыл жасаған. Ондағы қызметкерлер шұғыл түрде көшірілді.
Жарақат алған 168 адам медициналдық көмекке жүгінді. Оның 77-сі ауруханаға жатқызылса, 38 азамат жансақтау бөлімінде жатыр.
Айта кетейікғ аймақта жедел штаб құрылған.

Қызылордада террористерге қарсы операция жүріп жатыр

<a href="https://kyzylorda-news.kz/">Kyzylorda-news.kz.</a> Қазақстанда мектеп оқушыларының қысқы каникулы ұзартылды. Бұл туралы ҚР Білім және ғылым министрінің баспасөз хатшысы Мөлдір Әбдуәлиева айтты.
<blockquote>
 «30 желтоқсан мен 10 қаңтар аралығында мектеп оқушылары қысқы демалыста. ҚР Білім және ғылым министрінің бұйрығымен қысқы каникул 17 қаңтарға дейін ұзартылды. Мектеп мұғалімдері каниекул кезінде елді мекендегі жағдайға байланысты қашықтан немесе дәстүрлі форматта жұмыс істейді. Балабақшалар да нақты елді мекендегі жағдайға байланысты жұмысын жалғастырады. Бұл ретте балабақшалардың көпшілігі балаларды қабылдауда», – деді Мөлдір Әбдуәлиева.
</blockquote>
<a href="https://lenta.inform.kz/kz/okushylardyn-kysky-kanikuly-uzartyldy-bilim-ministrligi_a3881849">ҚазАқпарат</a>

Оқушылардың қысқы каникулы ұзартылды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықованың елімізде қалыптасқан жағдайға байланысты аймақ тұрғындарына үндеуі жарияланды.
Қымбатты жерлестер! Соңғы күндердегі ахуал бәрімізді бей-жай қалдырып отырған жоқ.
Бүгін Мемлекет басшысы еліміздегі әлеуметтік-экономикалық жағдайға қатысты кеңес өткізді, қосымша бірқатар тапсырмалар берді:
<ol>
<li>Мұнай өнімдерінің (бензин, дизель, сұйытылған газ) бағасына мемлекеттік реттеуді 180 күнге енгізу;</li>
</ol>
2. Әлеуметтік маңызы бар азық-түлік тауарларының бағасы бойынша мемлекеттік реттеуді енгізу;
3. Халық үшін 180 күнге коммуналдық тарифтерді көтеруге мораторий енгізу қажеттігін қарастыру;
4. Халықтың әлеуметтік жағдайы нашар топтары үшін нарықтағы баспананы жалға алу құнын субсидиялау мәселесін қарастыру;
5. Денсаулық сақтау және балалар мәселелерін шешу үшін «Қазақстан халқына» деп аталатын қоғамдық қор құру, оны мемлекеттік және жеке көздер арқылы қаржыландыру.
Іштен және сырттан болған сан түрлі ақпаратқа сеніп, еліміздің тұтастығы мен бірлігіне сызат түсіруді көздейтін деструктивті топтардың арандатушылығына ермей, парасатпен, ақылмен шешім қабылдауға шақырамын.
Елдің әрбір азаматы заңды сақтауы тиіс!
Өңірдегі қоғамдық-саяси ахуал түгел біздің бақылауымызда тұр, заң аясында барлық өтініштер мен талаптар ескеріліп, тиісті шешімдер қабылданады.
Барлық мәселе бейбітшілік форматта шешілуі керек.
Жастар, жарқын болашағымызды, жақындарымыздың амандығын ойлайық!
Сыр елі – қалың қазақтың қаймағы бұзылмаған, ауызбіршілікті сақтаған берекелі ордасы!
«Алтау араз болса, ауыздағы кетер, төртеу түгел болса, төбедегі келер», – деген халықпыз.
Елдің тыныштығын, бірлігімізді сақтайық, ардақты ағайын!

Гүлшара Әбдіқалықованың қызылордалықтарға арналған үндеуі жарияланды

<a href="https://kyzylorda-news.kz/">Kyzylorda-news.kz.</a> Қазгидрометтің синоптиктері 2022 жылдың 6-8 қаңтарында Қазақстанда ауа райы қандай болатынын болжады.
6 қаңтардан бастап Скандинавия аумағынан келетін кезекті циклон еліміздің басым бөлігінде ауа райына әсер етіп, жауын-шашын әкеледі, негізінен қар жауады, жаяу бұрқасын соғып, жел күшейеді, сондай-ақ ауа температурасы аздап көтеріледі деп болжанып отыр.&nbsp; &nbsp;
Алдағы үш күнде Қазақстанда тұман түсіп, көктайғақ болады.
Республиканың батысы мен солтүстік-батысында термометр бағаны түнде 0 – минус 8-ге дейін, солтүстік пен орталықта минус 5-15 градусқа дейін көтеріледі.

Ертең қар жауып, жел күшейеді

<a href="https://kyzylorda-news.kz/">Kyzylorda-news.kz.</a> Қаржы нарығын реттеу және дамыту агенттігі мен Ұлттық банк елдегі наразылыққа байланысты банктердің жұмысына қатысты мәлімдеме жасады, деп хабарлайды <a href="https://sputnik.kz/society/20220105/19057216/bankter-kredit.html">Sputnik.kz</a>.&nbsp;
<blockquote>
 «Әлеуметтік желілер мен мессенджерлерде тарап жатқан – несиелерді есептен шығару туралы ақпараттың шындыққа сәйкес келмейтінін ресми түрде хабарлаймыз», – делінген бірлескен мәлімдемеде.
</blockquote>
Агенттік пен Ұлттық банк азаматтар мен БАҚ өкілдерін тек ресми ақпарат көздеріне сүйенуге шақырды.
Банктердің жұмысы
Ведомство ақпаратынша, екінші деңгейлі банктер үздіксіз жұмыс істеп тұр. Жалақы мен зейнетақыны, жәрдемақыны есептеу және алу, оларды банкоматтар арқылы шешу секілді барлық банк қызметі көрсетілуде. Қаржы ұйымдарына тиесілі банкоматтар мен терминалдар қолма-қол ақшамен толық қамтамасыз етілген.
Десе де, ведомство интернет желісіндегі іркілістерге байланысты банк қосымшалары мен төлем терминалдарының жұмысында уақытша кідіріс барын атап өтті.
Кеңселер мен филиалдардың жұмысына қатысты толық ақпаратты банктердің Call-орталығынан білуге болады. Сондай-ақ азаматтар Қаржы нарығын реттеу және дамыту агенттігінің +7 (727) 237 10 00 Call-орталығына және Ұлттық банктің 1477 қысқа нөміріне хабарласа алады.
Халық неге көшеге шықты?
2 қаңтар күні Маңғыстау облысында наразылық басталды. Тұрғындар сұйытылған мұнай газының бағасын 50 теңгеге дейін түсіруді талап етті. Өңірдегі жағдай ушығып, шұғыл түрде үкіметтік комиссия құрылды. Үкіметтік комиссия белсенділермен келіссөз жүргізіп, халықтың талабын орындады.
Артынша наразылық елдің өзге өңірлерінде де жалғасты.https://www.youtube.com/embed/A6zCq2Pkn50Алматыда 4 қаңтар кешке жағдай шиеленісіп, наразылықтың соңы тәртіпсіздікке ұласты. Көшеге шыққандар полиция көлігін қиратты. Жағдай ушыққан соң, қаладағы тәртіп сақшылары көзден жас ағызатын газ қолданды.
5 қаңтарда президенттің жарлығымен Алматы қаласында, Маңғыстау облысы және Алматы облысында 19 қаңтарға дейін төтенше жағдай жарияланды.
Сондай-ақ президент үкіметті отставкаға жіберді. Премьер-министр міндетін уақытша атқару Әлихан Смайыловқа жүктелді.

Кредиттің кешірілетіні туралы ақпарат шындыққа жанаспайды

<a href="https://kyzylorda-news.kz/">Kyzylorda-news.kz.</a>&nbsp; Алматы қаласы, Маңғыстау және Алматы облыстарында төтенше жағдайдың енгізілуіне байланысты Мақат пен Жем станциялары арқылы өтетін теміржол қозғалысы тоқтады.
<blockquote>
 “Индустрия және инфрақұрылымдық даму министрлігімен келісіліп, Алматы 1, Алматы 2, Маңғыстау, Атырау, Ақтөбе, Нұр-Сұлтан станцияларынан шығып, Мақат және Жем станциялары арқылы өтетін жолаушылар пойызының қозғалысы уақытша тоқтады”, – деп хабарлады “Қазақстан теміржолы” АҚ баспасөз қызметі.
</blockquote>
Ұлттық компания мәліметінше, 4-нен 5 қаңтарға қараған түні аталған бағыттар бойынша 14 пойыз діттеген жеріне жетпеді. Қазіргі күні пойыздар станцияларда тұр. Жолаушылар азық-түлік және сумен қамтамасыз етілді. Билет құны толықтай қайтарылып жатыр.
Сонымен қатар 5 қаңтарында 46 жүк пойызы уақытша тоқтады. Жағдай “Қазақстан теміржолы” ұлттық компаниясы жедел штабының бақылауында.
ҚТЖ жол жүруді кейінге қалдыруға және бұл жағдайға түсіністікпен қарауды сұрады.
“Бұл шаралар жолаушылардың қауіпсіздігі үшін жасалып отыр”, – делінген баспасөз хабарламасында.
<a href="https://sputnik.kz/regions/20220105/19058921/Totenshe-zhagday-poyyz.html">Sputnik Қазақстан</a>

Төтенше жағдайға байланысты бірнеше бағыттағы пойыз қозғалысы уақытша тоқтады

<a href="https://kyzylorda-news.kz/">Kyzylorda-news.kz.</a> Қазақстанда 2022 жылғы 1 қаңтардан бастап жасына байланысты зейнетақы мөлшері 7% – ға, базалық зейнетақы мен мемлекеттік жәрдемақы мөлшері 5% – ға ұлғайды, деп хабарлайды ҚР Еңбек және халықты әлеуметтік қорғау министрлігінің баспасөз қызметі.
«2022-2024 жылдарға арналған республикалық бюджет туралы» Заңға сәйкес 2022 жылғы 1 қаңтардан бастап жасына байланысты және еңбек сіңірген жылдары үшін зейнетақы төлемдерінің мөлшері 7% – ға, яғни инфляция деңгейінен 2% – ға ілгерілеп арттырылды. Бұл ретте жасы бойынша ең төменгі зейнетақы мөлшері 46 302 теңгені құрады.
Базалық зейнетақы төлемінің мөлшері 5% – ға арттырылды. 2022 жылғы 1 қаңтардан бастап оның ең төменгі мөлшері 19 450 теңгені құрайды.
Нәтижесінде базалық зейнетақы төлемін ескере отырып, ең төменгі зейнетақы мөлшері 1 қаңтардан бастап 65 752 теңгені құрайды.
Бұл өсім 2,2 млн зейнеткерге қатысты.
Бұдан басқа, 2022 жылғы 1 қаңтардан бастап ең төменгі күнкөріс деңгейі шамасының өзгеруіне байланысты жәрдемақылардың мынадай түрлері 5% – ға арттырылды:
– мүгедектігі бойынша және асыраушысынан айырылу жағдайы бойынша мемлекеттік әлеуметтік жәрдемақылар;
– мүгедектігі бар балаларды тәрбиелеп отырған ата-аналарға, қамқоршыларға берілетін мемлекеттік жәрдемақы;
– I топтағы мүгедекке күтім жасайтын отбасыларға (адамдарға) берілетін мемлекеттік жәрдемақы;
Айлық есептік көрсеткіш мөлшерінің ұлғаюына байланысты 1 қаңтардан бастап келесі жәрдемақылардың мөлшері 5% – ға артты:
– №1 және №2 тізімдер бойынша мемлекеттік арнайы жәрдемақылар;
– бала бір жасқа толғанға дейін оның күтіміне байланысты мемлекеттік жәрдемақылар;
– бала туғанда берілетін біржолғы мемлекеттік жәрдемақы;
– арнайы мемлекеттік жәрдемақылар;
– «Алтын алқа», «Күміс алқа» алқаларымен марапатталған немесе бұрын «Батыр Ана» атағын алған және «Ана даңқы» орденімен марапатталған көпбалалы аналарға арнайы мемлекеттік жәрдемақылар;
– бірге тұратын төрт және одан да көп кәмелетке толмаған балалары, оның ішінде кәмелеттік жасқа толғаннан кейін білім беру ұйымдарын бітіретін уақытқа дейін (бірақ жиырма үш жасқа толғанға дейін) орта, техникалық және кәсіптік, орта білімнен кейінгі, жоғары және (немесе) жоғары оқу орнынан кейінгі білім беру ұйымдарында күндізгі оқу нысаны бойынша оқитын балалары бар көпбалалы отбасыларға берілетін мемлекеттік жәрдемақылар;
– Семей ядролық сынақ полигонындағы ядролық сынақтардың салдарынан зардап шеккен азаматтарға және жаппай саяси қуғын-сүргін құрбандарына тағайындалған, бірақ төленбеген біржолғы ақшалай өтемақылар.
«Міндетті әлеуметтік сақтандыру туралы» Заңға сәйкес МӘСҚ-дан еңбек ету қабілетінен айрылу және асыраушысынан айрылу жағдайларына төленетін әлеуметтік төлемдердің мөлшері де 5% – ға арттырылды.

Зейнетақы мен мемлекеттік жәрдемақылардың мөлшері өсті

<a href="https://kyzylorda-news.kz/">Kyzylorda-news.kz.</a>&nbsp;ҚР Бас Прокурорының орынбасары Болат Дембаев Қазақстан халқына үндеу жолдады.
<hr />
Қазақстан Республикасы Бас Прокурорының орынбасары Б. Б. Дембаевтың «Прокуратура туралы» Заңның 31-бабы тәртібінде үндеуі
ҚҰРМЕТТІ АЗАМАТТАР!
Қоғамдық қауіпсіздікті қамтамасыз ету, заңдылық пен құқықтық тәртіпті қалпына келтіру, азаматтардың құқықтары мен бостандықтарын қорғау мақсатында Қазақстан Республикасы Президентінің Жарлықтарымен Алматы қаласы мен Маңғыстау облысының аумағында 2022 жылғы 5 қаңтар сағат 01:30-дан 2022 жылғы 19 қаңтар сағат 00:00-ге дейін төтенше жағдай енгізілді.
Қазақстан Республикасы Президентінің Жарлықтарына сәйкес төтенше жағдай қолданылатын кезеңде ол енгізілген жерде мынадай негізгі шаралар мен уақытша шектеулер көзделген:
– еркін жүріп-тұруға, оның ішінде көлік құралдарының кіруі мен шығуына шектеулер белгіленді;
– тұлғалардың жеке басын куәландыратын құжаттарды тексеру, жеке тексеру, олардың жанындағы заттарын, көлік құралдарын тексеру;
– бейбіт жиындарға, ереуілдерге және басқа да жаппай іс-шараларға тыйым салынды.
Қосымша уақытша шектеу шаралары ретінде сағат 23:00-ден 07:00-ге дейін коменданттық сағат енгізілген, қаруды, оқ-дәрілерді, жарылғыш заттарды, этил спиртін және алкоголь өнімдерін сатуға тыйым салынған, жеке тұлғалардан қару мен оқ-дәрілерді уақытша алып қою көзделген.
Қазақстан Республикасы «Төтенше жағдай туралы» Заңының 20-бабына сәйкес коменданттық сағат қағидаларын бұзған жеке тұлғаларды полиция қызметкерлері немесе әскери патрульдер коменданттық сағат аяқталғанға дейін, ал өзімен бірге олардың жеке басын куәландыратын құжаттары жоқ адамдарды – олардың жеке басын анықтағанға дейін, бірақ ішкі істер органы бастығының немесе оның орынбасарының шешімі бойынша 48 сағаттан асырмай ұстауға тиіс.
Ұсталған адамдар және олардың алып жүрген заттары мен көлік құралдары тексерілуі мүмкін.
Төтенше жағдай режимінің көрсетілген талаптарын бұзғаны үшін кінәлі тұлғалар қылмыстық және әкімшілік жауаптылыққа тартылатынын атап өтеміз.
Осылайша, билік өкілінің заңды талабына немесе өкіміне бағынбау, сондай-ақ төтенше жағдай кезеңінде тыйым салынған ереуілге басшылық ету және ұйымдардың жұмысына кедергі келтіру Қылмыстық кодекстің (бұдан әрі – ҚК) 379 және 401-баптары бойынша 2 жылға дейін бас бостандығынан айыруға әкеп соғады.
Төтенше жағдай кезінде көрінеу жалған ақпарат тарату ҚК-нің 274-бабына сай 3 жылдан 7 жылға дейін бас бостандығынан айырумен жазаланады.
Төтенше жағдай кезінде қару-жарақты, оқ-дәрiлердi, қозғалыс құралдарын, әскери техниканы немесе өзге де әскери мүлiктi қасақана жою немесе бүлдiру 10 жылдан 12 жылға дейiнгi мерзiмге бас бостандығынан айыруды көздейді (ҚК-нің 459-бабы).
Төтенше жағдай режимін бұзғаны үшін (Әкімшілік құқық бұзушылық туралы кодекстің (бұдан әрі – ӘҚБтК) 476-бабы), төтенше жағдай кезінде құқық тәртібін бұзуға итермелейтін әрекеттері үшін (ӘҚБтК-нің 478-бабы) тиісінше 15 және 30 тәулікке дейін әкімшілік қамаққа алу көзделген.
Бұл ретте төтенше жағдай кезінде қылмыстық немесе әкімшілік құқық бұзушылықтар жасау ауырлататын мән-жай болып табылады (ҚК-нің 54-бабы, ӘҚБтК-нің 57-бабы) және неғұрлым қатаң жауаптылыққа әкеп соғады.
Заңдылықты қамтамасыз ету мақсатында, «Прокуратура туралы» Заңның 31-бабын басшылыққа ала отырып, азаматтарды өткізілетін іс-шараларға түсіністікпен қарауға, ішкі істер органдары мен уәкілетті органдар қызметкерлерінің заңды талаптарын сақтауға, оларға қажетті жәрдем көрсетуге шақырамыз.
Сондай-ақ, шындыққа сәйкес келмейтін мәліметтерді таратпауға, арандатушылыққа берілмеуге және төтенше жағдай режимін бұзбауға, ресми дереккөздерде орналастырылған елдегі ағымдағы жағдай туралы сенімді ақпаратты басшылыққа алуға шақырамыз.

Бас Прокуратура қазақстандықтарға ескерту жасады

<a href="https://kyzylorda-news.kz/">Kyzylorda-news.kz.</a> ҚР Парламенті Сенатының депутаты Нұртөре Жүсіп елдегі қазіргі жағдайға қатысты пікір білдірді, деп хабарлайды <a href="https://lenta.inform.kz/kz/nurtore-zhusip-eldegi-zhagday-turaly-kazir-kazakstannyn-ar-azamaty-ushin-syn-sagaty_a3881602">ҚазАқпарат.</a>
<blockquote>
 «Елдегі жағдайды Мемлекет басшысы толық бақылауына алды. Осы орайда Ақордада шұғыл жиын өтіп, Президент Үкіметтің отставкасын қабыл алды. Жаңа Үкімет құрамы жасақталғанша Премьер-Министр міндетін атқару уақытша Әлихан Смаиловқа жүктелді. Сондай-ақ, еліміздің 2 өңірінде Алматы қаласы және Маңғыстау облысында уақытша төтенше жағдай енгізілді. Қазір елдегі жағдайды Қазақстанның әр азаматы үшін сын сағаты деп айтуға болады. Өйткені, Тәуелсіздік пен халықтың тағдыры таразы басында тұр. Елдің сыналар шағы, сондықтан ел басына күн туған сәтте ақыл мен парасаттылыққа жүгінген жөн. Халық талап етті, билік оның үнін естіп, 2 өңірде газдың бағасын 50 теңгеге дейін арзандату туралы шешім қабылданды», – деді Нұртөре Жүсіп.
</blockquote>
Халық қалаулысының мәлімдеуінше, талап пен ұсынысының шешімі сындарлы диалог арқылы табуы тиіс.
<blockquote>
 «Ел сабырға бой алдырып, мәселенің заң аясында шешілгені абзал. Халықтың толқуы инфляцияның өршуімен байланысты. Және бұған Үкіметтің кінәсі бар екендігін Президент ашып айтты. Оған елдегі баға тұрақсыздығын қосыңыз. Халық тарапынан әлеуметтік-экономикалық талаптардың қойылуы мәселенің шиеленісіп кеткендігін көрсетеді. Сондықтан енді жасақталатын Үкіметтің алдында елдің әлеуметтік жағдайын реттеу міндеті тұр. Одан бөлек, газ, бензин, дизель бағасының қымбаттауы болды. Осы орайда еліміздің мұнай-газ саясатын қайта қарап, шұғыл реттеу керек деп ойлаймын», – дейді ол.
</blockquote>
Сондай-ақ, Сенат депутаты халықты сабырлы болуға шақырды.
<blockquote>
 «Халық заңға сәйкес бейбіт шеру өткізудің ережесін сақтаса. Сосын жастарымызды қызуқандылыққа бой алдырмауға шақырамын. Себебі, арандатушылық пен төбелес мәселені шешпейді, керісінше тығырыққа тірейді. Сондықтан артық эмоциядан абай болған жөн. Бастысы Тәуелсіздіктің тұтастығы мен халықтың амандығы», – деді Н. Жүсіп.
</blockquote>

Қазақстан және Қызылорда облысының жаңалықтары