<a href="https://kyzylorda-news.kz/">Kyzylorda-news.kz.</a> Биылғы 2022-2023 оқу жылында жаңа өзгерістер көп. Айталық, бірінші сыныпта оқу жылының ұзақтығы 35 апта болып белгіленсе, 2-11 сыныптарда 36 аптаға дейін ұзартылды. Осыған байланысты биылдан бастап жаңа оқу жылы 31 мамырға дейін жалғаспақ. Бұл туралы Өңірлік коммуникациялар қызметінде өткен баспасөз конференциясында Қызылорда облысының білім басқармасы басшысының орынбасары Бағдат Бердаулетов хабарлады.
Оның айтуынша, 1-ші сыныптың оқу бағдарламасында «Шетел тілі» мен «Орыс тілі» пәндері оқытылмайды. Бұл ретте меншік және оқыту түріне қарамастан, үлгілік оқу жоспарын таңдауға академиялық еркіндік беріледі.
<blockquote>
 «Облыстағы 295 мемлекеттік және 16 жекеменшіктік білім беру ұйымдарында 182 мың оқушы білім алады деп күтілуде. Бұл өткен оқу жылымен салыстырғанда бес мың балаға артып отыр. Осы ретте Арал және Жаңақорған аудандарындағы екі апатты мектептің құрылысы толық аяқталып, жаңа оқу жылына беріледі. Сондай-ақ, қалалық және ауылдық мектептердегі сынып оқушыларын екі топқа бөліп оқыту қарастырылады», – деді облыстық білім басқармасы басшысының орынбасары Бағдат Бердаулетов.
</blockquote>
«Республикалық «Мектепке жол» акциясы аясында міндетті оқу қоры есебінен көмекке мұқтаж отбасы ретінде 31 322 бала есепке алынды. Осыған сәйкес, тиісті санаттан шыққан отбасы балаларына – 37 389 теңге көлемінде қаржылай көмек көрсетілмек. Бұл бөлінген қаржы ата-ананың немесе заңды өкілдердің жеке есепшотына аударылады. Былтырғы жылмен салыстырғанда көмек көрсетілетін бала саны – 1451-ге көбейді.
<blockquote>
 «Міндетті оқу қорынан қаржы алмайтын балаларға демеушілер есебінен көмек беру ұйымдастырылуда. Бүгінде қала және аудан бойынша екі мыңға жуық балаға бюджеттен тыс қаржының есебінен 18 млн 653 мың теңге көлемінде материалдық көмек көрсетілді. Сонымен қатар, жеке кәсіпкерлер есебінен де аталған санаттағы балаларға тегін мектеп формасы берілуде», – деді Бағдат Қамбозұлы.
</blockquote>
<img src="https://kyzylorda-news.kz/wp-content/uploads/2022/08/300151643_1599141080481398_8300035642727891509_n.jpg" alt="" />

Биылғы жаңа оқу жылы бірқатар өзгерістермен басталады

<a href="https://kyzylorda-news.kz/">Kyzylorda-news.kz.</a> Студенттер мемлекет есебінен сақтандырылған және МӘМС жүйесінде медициналық көмек ала алады. Әлеуметтік медициналық сақтандыру қорының Қызылорда облысы бойынша филиалына мемлекет МӘМС жарналарын төлейтін жеңілдікті санаттардың бірінің өкілдері ретінде студенттер үшін сақтандырылған мәртебесін алу мәселелерімен жиі жүгінеді.
Қор филиалының директоры Бақыт Исмаханбетов біздің тілшімізге бұл мүмкіндік шетелде оқитын қазақстандықтар үшін қалай қарастырылғанын, сондай-ақ студенттердің неге кейде сақтандырылмайтынын түсіндірді.
Жеңілдік бойынша сақтандыру кімге беріледі?
МӘМС туралы заңға сәйкес (26-баптың 1-тармағының 13-тармақшасы), жасына қарамастан, күндізгі оқу нысаны бойынша оқитындардың барлығы (мейлі ол 18 жасқа толған мектеп оқушылары болсын, колледж, ЖОО немесе басқа да оқу орындарының студенттері болсын) азаматтардың жеңілдікті санатына кіреді, олар үшін МӘМС жарналарын мемлекет төлейді.
Студенттер мемлекет есебінен сақтандырылған болып табылады және МӘМС пакетінде көрсетілетін медициналық қызметтерге қол жеткізе алады.
Қазақстанда оқитын студенттер үшін сақтандырылған мәртебесін алу алгоритмі: 
Сақтандырылғандар мәртебесі Қазақстан аумағында оқитын азаматтарға жеңілдік ретінде беріледі және олардың деректері оқу орнының ақпараттық жүйесіне енгізіледі. Ол, өз кезегінде Қазақстан Республикасы Білім және ғылым министрлігінің қарамағындағы Ұлттық білім беру деректер базасымен (ҰБДҚ) біріктірілген.
Деректерді енгізуге студенттер оқитын оқу орындарының әкімшілігі немесе деканаттарының қызметкерлері жауапты болады. ЖСН, Т.А.Ә., оқу кезеңі және оқыту нысанын дұрыс толтыру міндетті шарт болып табылады. Егер бұл жолдар дұрыс толтырылмаған жағдайда, онда сақтандырудың жеңілдетілген мәртебесі автоматты түрде берілмейді.
Егер отандық ЖОО студенті сақтандырылмаған болса не істеу керек?
Мәртебе ҰБДҚ-да студент туралы тиісті ақпараттың болуына байланысты берілетіндіктен, сіз өзіңіздің оқу орныңыздағы жауапты қызметкерге хабарласып, ақпараттық жүйеде деректерді тексеруді сұрауыңыз қажет. Кейде ақпараттың жаңартылмағаны анықталады.
Оқу орындарына арналған жадынама:
<ul>
<li>Оқу орнының ақпараттық жүйесіне білім алушылар туралы мәліметтерді (оның ішінде оқу жылы ішінде келгендер бойынша) уақтылы және дұрыс енгізу қажет, өйткені студенттерге ҰБДҚ-да біріктірілген деректердің болуы арқылы жеңілдік мәртебесі беріледі.</li>
<li>Егер бір жылдың ішінде білім алушы оқудан шығарылса немесе басқа оқу орнына ауыстырылса, онда ол туралы мәліметтерді өзінің оқу орнының ақпараттық жүйесінен алып тастау қажет.</li>
<li>Егер оқу орнының ақпараттық жүйесінде оқуды бұрын аяқтаған білім алушылар туралы деректер болса, оларды аталған жүйеден шығару қажет, өйткені бұл адамдар жұмысқа орналасу кезінде МӘМС жарналарын төлей алмайды.</li>
</ul>
Есіңізде болсын: Білім алушылардың МӘМС жүйесінде медициналық көмек алу мүмкіндігі ақпараттық жүйеде олар туралы мәліметтердің дұрыс және уақтылы толтырылуына байланысты болады.
Шетелде оқитын қазақстандықтар үшін сақтандырылған мәртебесін алу алгоритмі: 
Шетелдік оқу орындарында оқитын қазақстандық күндізгі оқу нысанының студенттері МӘМС жүйесінде сақтандырылған тұлғалардың автоматты түрде жеңілдік мәртебесін ала алмайды. Ол үшін олар жүйеге өздігінен тіркелуі керек.
Ол үшін электрондық үкімет порталындағы egov.kz сервисін пайдалану қажет:
<ol>
<li>Ізденіс жолына келесіні енгізу: «Шетелде оқитын студенттерді тіркеу».</li>
<li>Ашылған терезедегі өтінішті толтыру және оқуды растайтын құжаттарды қоса беру қажет.</li>
<li>Өтінішке ЭЦҚ көмегімен қол қою.</li>
<li>Көптеген жағдайларда сақтандырудың жеңілдікті мәртебесі жолдарды дұрыс толтырған жағдайда 10 жұмыс күні ішінде беріледі.</li>
<li>Егер сақтандырудың жеңілдікті мәртебесін беру көрсетілген мерзім ішінде орындалмаса, онда ҚР Білім және ғылым министрлігінің Халықаралық департаментіне жүгіну қажет. Әр семестр аяқталғаннан кейін сақтандыру мәртебесін тексеру және оқудың өзектілігін растау қажет екенін есте ұстаған жөн, өйткені дерекқордағы мәліметтер өзгеруі мүмкін.</li>
</ol>
<img src="https://kyzylorda-news.kz/wp-content/uploads/2022/08/image-1.png" alt="" />
Кері байланыс
Өкінішке орай, күндізгі нысанда оқитын студенттердің барлығы МӘМС туралы заң бойынша өздерінің жеңілдік берілгендер санатында екендігін және МӘМС-ке жарналар мен аударымдарды төлеулері қажет еместігін біле бермейді. Әсіресе шетелде білім алып жүрген студенттер. Сондықтан Қор мемлекет есебінен олардың МӘМС жүйесінде сақтандырылған мәртебеге ие екендіктерін тағы да еске салады.
Егер студент көрсетілген тәсілдермен жеңілдік мәртебесін ала алмаса немесе мәртебесінен айрылып, оқу орнының қабырғасында шешім таба алмаса, онда ол өтінішті Қордың кеңсесі арқылы пошта арқылы жібере алады: kanc@fms.kz немесе Qoldau 24/7 мобильді қосымшасы арқылы. Қор өзіне жүгінген тұлғаға сақтандырылған мәртебесін беру үшін ҚР Білім және ғылым министрлігімен, ҚР Сыртқы істер министрлігімен ынтымақтастықта қажетті жұмысты жүргізеді.
Егер сұрақтарыңыз болса, Қорға келесі қол жетімді байланыс арналары арқылы хабарласа аласыз: fms.kz ресми сайты, 1406 байланыс орталығы, Qoldau 24/7 және Telegramдағы Saqtandyry-Bot мобильді қосымшасы.
<img src="https://kyzylorda-news.kz/wp-content/uploads/2022/08/stwdentter-3.jpg" alt="" />
<img src="https://kyzylorda-news.kz/wp-content/uploads/2022/08/stwdentter-2.jpg" alt="" />
<img src="https://kyzylorda-news.kz/wp-content/uploads/2022/08/stwdentter.jpg" alt="" />

МӘМС: Студенттер мемлекет есебінен сақтандырылған

<a href="https://kyzylorda-news.kz/">Kyzylorda-news.kz.</a> Бүгінде Қызылорда облысындағы елді мекендерде кәсіпкерлікке бет бұрғандар жетерлік. Солардың бірі – Тасбөгет кентінің тұрғыны Молдашова Жанар Маханбетжанқызы. Ол 2015 жылы жеке кәсіпкер ретінде тіркеліп, халыққа қажетті құрылыс тауарлары дүкенін ашты. Бұл іспен айналысқанға дейін ол 10 жылдан астам уақыт бойы туыстарының дүкенінде сатушы болып жұмыс істеген.
Қазір кәсіпкердің дүкенінде арнайы қоспалар, цемент, праймер, гипс, алинекс, бояулар, шелектер, әртүрлі құрылыс құралдары, роликтер, шпательдер, балғалар, шегелер, бұрғылар, бұрағыштар сияқты құрылыс материалдарының барлық түрі даналап сатылады. Бұл жерден кент тұрғындары жұмыс тапқан.
<blockquote>
 «Құрылыс материалдарына деген сұраныс ешқашан толастамайды. Біреу үй салып жатса, үйі барлар үнемі жөндеу жұмыстарын жүргізіп отырады. Тіпті тұратын жеріне жөндеу жүргізудің қажеті жоқ болса да, күнделікті өмірде шеге, балға, бұрағыш, арба, күрек сияқты ұсақ-түйек заттар үнемі қажет. Сондықтан бәсеке аз жерде құрылыс заттар дүкенін ашу – жеке кәсіпке бет бұрудағы тамаша идея», – дейді Жанар Маханбетжанқызы.
</blockquote>
Өткен жылы кәсіпкер тауар ассортиментін арттыру мақсатында «Қазақстан Халық Банкінен» несие алды. Жобаны «Бизнестің жол картасы – 2025» мемлекеттік бағдарламасы аясында «Даму» Қоры қолдап, соның арқасында кәсіпкер қарызды тек 6 пайыз мөлшермен төлейді. Ал айырмасын мемлекет субсидиялайды.
Тасбөгет кентінің тұрғындарына қажетті заттарын осы дүкеннен сатып алған тиімдірек. Өйткені, дүкен тауарлары қол жетімді бағада сатылады.
<img src="https://kyzylorda-news.kz/wp-content/uploads/2022/08/300063266_1244988546262340_2049268101205267829_n.jpg" alt="" />

Қызылордада кәсіпкерлікке бет бұрғандар көп

<a href="https://kyzylorda-news.kz/">Kyzylorda-news.kz.</a> Биыл Қазақстан Республикасының ұлттық қауіпсіздік органдарының құрылғанына 30 жыл толды. 18 шілде – қоғамның тұрақтылығы мен қауіпсіздігін күзетіп, бейбітшіліктің кепілі жолында қызмет етіп келе жатқан шекарашылардың төл мерекесі. Осы ретте өңірлік коммуникациялар қызметінде ҚР ҰҚК ШҚ Қызылорда облысы бойынша департаментінің мемлекеттік шекараны күзету бөлімінің аға офицері, майор Азамат Құмарбектің қатысуымен баспасөз конференциясы өтті.
<blockquote>
 «Шекара қызметі құрылғалы салада көптеген жақсы өзгерістер болды. Еліміз тәуелсіздік алған жылдармен салыстырғанда қызмет көрсету тұрғысынан бастап, шекарашылардың әлеуметтік тұрғыдағы жағдайлары да біршама жақсы қалыпқа түсті. Бүгінде Қызылорда облысы аумағындағы шекара бекетінің аумағы барлығы 740-745 шақырымды қамтиды. 2021 жылдан бастап облыс аумағында атаулы шекара бекеттері орнатылған. Онда функционалдық қызметті жүзеге асыру үшін жаңа технологиялық құрал-жабдықтар қолданылады. Орнатылған камералардың көмегімен күніне 250-ге жуық фото-видео айғақтар бақылау пунктіне жіберіліп отырады. Осындай қырағылық пен күзет деңгейі қауіпсіздігі жоғары болғандықтан жыл басынан бері шекара аумағында ешқандай заңсыздық деректері анықталған жоқ», – деді Азамат Құмарбек.
</blockquote>
Сондай-ақ, шекара бөлімшесінде қызметкерлер сырттан келетін көліктерді қатаң бақылауға алып, аймақ тыныштығын қамтамасыз етіп отыр.
<img src="https://kyzylorda-news.kz/wp-content/uploads/2022/08/300187203_1599140853814754_6633951878241665158_n-1.jpg" alt="" />

Қызылорданың шекарасында жыл басынан бері заңсыздық деректері тіркелген жоқ

<a href="https://kyzylorda-news.kz/">Kyzylorda-news.kz.</a> «Жол активтерінің ұлттық сапа орталығы» Қызылорда облыстық филиалы еліміздегі үздік 100 кәсіпорынның қатарына енді.
Жергілікті жолшылардың зертханасы өз саласы бойынша «Сапа жұлдызы» ұлттық компаниясы жүргізген рейтингте жоғары бағаланып отыр.
<img src="https://kyzylorda-news.kz/wp-content/uploads/2022/08/whatsapp-image-2022-08-18-at-13.57.18.jpeg" alt="" />
Атап айтсақ, орталықтың зертханасы қызмет көрсету сапасы жағынан еліміздегі озық зертханалардың бірі атанды. Бүгінде «Kaidzen» технологиясын енгізіп, жаңашылдыққа бетбұрған орталықта кез келген жол құрылыс материалынжіті тексеруден өткізуге мүмкіндік бар. Мәселен, былтыр мамандар аймақ жолдарынан 1400-ге жуық сынама алып, соның 480-і талапқа сай еместігін анықтаған. Жалпы «Сапа жұлдызы» сертификатын иеленген «Жол активтерінің ұлттық сапа орталығы» мамандары биыл да ұдайы бақылау жүргізіп, олқылықтардың алдын алуда аянбай еңбек етуде.
Динара ДЕМЕСІНОВА, 
«Жол активтерінің ұлттық сапа орталығы» ҚОФ 
сапа жөніндегі менеджер

Жол зертханасы үздік деп танылды

<a href="https://kyzylorda-news.kz/">Kyzylorda-news.kz.</a> ҚР Президенті Қасым-Жомарт Тоқаев Үкіметтің кеңейтілген отырысында бос жатқан жайылым жерді қайтаруды және оларды ауыл тұрғындарына қолжетімді етуді тапсырған болатын.
Осыған орай «AMANAT» партиясының жанынан «Жер аманаты» комиссиясы құрылып, комиссия жұмысының нәтижесінде бүгінде мемлекет меншігіне еліміз бойынша 293,2 мың гектар жайылым жер қайтарылды.
Осы бағыттарды жұмыстарды жетілдіру мақсатында партияның облыстық филиалы жанынан құрамы тиісті сала мамандарын, қоғам белсенділерін қамтитын «Жер аманаты» аймақтық комиссиясы құрылған болатын. Бүгін аталмыш комиссияның кезекті отырысы өтті.
Жалпы өңірде елді мекендердің жайылымдармен қамтамасыз етілуі жағдайына талдау жасау, ұтымсыз пайдаланудағы жайылымдарды анықтау, оларды мемлекет меншігіне қайтарып алу жұмыстары тұрақты жүруде. Әр ауылдық округ бойынша жайылымның барына талдау жасалып, әр елді мекенде мал жайылымының жерлері белгіленген.
Жиын барысында сондай-ақ партия филиалының қоғамдық қабылдау бөлмесіне Шиелі ауданынан түскен жер дауына қатысты арыз бойынша зерделеу жұмыстары жүргізіліп, күн тәртібіндегі мәселеге орай түрлі ұсыныстар ортаға салынды. Бұл ұсыныстар алдағы уақытта «Жер аманаты» республикалық комиссиясының қарауына жолданатын болады.
Атап өтейік комиссияның мақсаты – пайдаланылмай жатқан, оның ішінде заңсыз жеке меншікке өткен жерлерді мемлекет меншігіне қайтару және оларды ауыл тұрғындарына ұсыну, әділ үлестіру.
Ақпарат үшін: «Жер аманаты» комиссиясының жер мәселелері жөніндегі «Жедел желісі» телефоны 8 800 080 44 41,өтінімдер WhatsApp арқылы да + 77008004441 нөмірі бойынша қабылданады.
<img src="https://kyzylorda-news.kz/wp-content/uploads/2022/08/whatsapp-image-2022-08-18-at-11.21.34.jpeg" alt="" />
<img src="https://kyzylorda-news.kz/wp-content/uploads/2022/08/whatsapp-image-2022-08-18-at-11.21.34-1.jpeg" alt="" />

Заңсыз алынған және пайдаланылмай жатқан жерлер мемлекет меншігіне қайтарылуы тиіс

<a href="https://kyzylorda-news.kz/">Kyzylorda-news.kz.</a> Жалағаш ауданының әкімі Асқарбек Есжанов Жаңадария ауылдық округінің тұрғындарымен кездесіп, аудан көлемінде атқарылған жұмыстарды баяндап, олардың ұсыныс-пікірлерін тыңдады.
Аталған кездесуге аудандық мәслихат хатшысы Гүлзат Құрманбаева, аудандық мәслихат депутаттары, аудандық салалық бөлім басшылары, ауыл тұрғындары және бұқаралық ақпарат құралдары өкілдері қатысты.
Өз кезегінде тұрғындар бірінші кезекте ауылға келетін жол мәселесінің қиындық тудыратынын, ауылдағы мектептің жөндеу жұмыстарының шешімін табуға ықпал жасауды сұрады.
Аудан басшысы ауыл тұрғындарымен жүздесу барысында елді мекендегі кемшіліктерді назарға алып, салалық бөлім басшыларына нақты тапсырма берді. Сонымен қатар аудан басшысы ауыл халқының сұранысына орай атқарылуға тиіс жұмыстардың реттілігін де атап өтті.
Айта кету керек, биылғы жылы «Есет батыр – Жаңадария» ауылы аралығындағы аудандық маңыздағы автомобиль жолының 17,1 шақырымын орташа жөндеуге республикалық бюджеттен 100 млн. теңге бөлінді.
№203 орта мектептің күрделі жөндеу жұмыстарын жүргізу үшін жоба-сметалық құжаттарын әзірлеуге облыстық білім басқармасына бюджеттік өтінім тапсырылды.
Кездесу барысында аудан әкімі халықты жеке мәселелері бойынша да қабылдады. Айдан әкімі Асқарбек Есжанов халықтың әрбір өтініші ескерусіз қалмайтынын ескертті.
<img src="https://kyzylorda-news.kz/wp-content/uploads/2022/08/299793566_1515794342205972_580365578779222747_n.jpg" alt="" />

Жалағаш ауданының әкімі ауыл халқымен кездесті

<a href="https://kyzylorda-news.kz/">Kyzylorda-news.kz.</a> Қызылорда облысында жол-көлік оқиғасы орын алып, бір адам қаза болды.
17 тамызда Самара-Шымкент жолының 1945/321 шақырымында Шиелі ауданы, Еңбекші ауылының тұсында КамАЗ жүк автокөлігінің тіркемесіне бір бағытта келе жатқан Audi автокөлігі соқтығысқан. Жол апаты салдарынан Audi автокөлігінің жүргізушісі оқиға орнында көз жұмды.
Орын алған дерек ҚР ҚК-нің 345- бабының 3-бөлігімен (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) СДТТБТ-ға тіркеліп, сотқа дейінгі тергеп-тексеру әрекеттері жүргізілуде. Тиісті сот сараптамалары тағайындалды. Оқиғаның мән-жайлары анықталуда.
Полиция департаменті жүргізушілерді жол қозғалысы ережесін қатаң сақтауды, белгіленбеген жылдамдықты шамадан тыс асырмауды, қарсы қозғалыс жолағына шықпауды ескертеді.

Шиеліде жол-көлік оқиғасы орын алып, бір адам қаза болды

<a href="https://kyzylorda-news.kz/">Kyzylorda-news.kz.</a> Қызылордада мектеп формасын тігетін цехтардың саны артып келеді.
Жаңа оқу жылының басталуына санаулы күндер қалды. Ата-аналар базар мен дүкен жағалап, оқушы балаларына мектеп формаларын алып әлек. Сәйкесінше, сұраныстың артуымен қатар баға мәселесі өзекті болып тұр. Осы тұста, ішкі нарықты қамтамасыз ету үшін көптеген жергілікті кәсіпкерлер өз өнімдерін көпшілік назарына ұсынуда. Атап айтқанда, «Далатекс» ЖШС, «Sapa-Ка» ЖШС, жеке кәсіпкер «Ас-Ка», «Ақжүрек мүгедектер қоғамы» ҚБ мектеп формасын тігуде. Мәселен, «Ас-Ка» жеке кәсіпкері ер жігітке арналған костюм жинағын 12 000 тг, қыз балаларға арналған ақ жейде мен белдемшені 6000 теңгеге, ал «Ақжүрек мүгедектер қоғамы» қоғамдық бірлестігі 1-3 сынып оқушыларына арналған мектеп формасын 6000 мың тг, ал 8 сыныптың ер және қыз балаларына 8000 мың теңгеден, «Sapa-Ка» ЖШС-і 1-3 сыныптың ер балаларына 7-8 мың теңгеден, ал қыздардың ақ жейдесі 3-4 мың тг, белдемше 4-5 мың теңге, сондай-ақ, «Далатекс» ЖШС-і 1-11 сыныптың оқушыларына 50 пайыз жеңілдекпен мектеп формасын 7000 мың теңгеден сатуда.
Айта кететін жайт, облыс көлемінде «Мектепке жол» жалпы республикалық қайырымдылық акциясы аясында қала, аудан аумағында жәрмеңке ұйымдастырылуда. Аталған науқан тамыз айының соңына дейін жалғасын табады.
<img src="https://kyzylorda-news.kz/wp-content/uploads/2022/08/forma.jpg" alt="" />
<img src="https://kyzylorda-news.kz/wp-content/uploads/2022/08/forma2.jpg" alt="" />

Қызылордада мектеп формасын тігетін цехтардың саны артып келеді

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласындағы Назарбаев Зияткерлік мектебінің оқушысы Сырсұңқар Базарбайұлы ХХІІІ республикалық Абай оқуларында жүлделі ІІ орынды жеңіп алды.
Абай облысының «Абай-Шәкәрім» мемориалдық кешенінің базасында өткен дәстүрлі байқауға жалпы білім беретін ұйымдардан 120-дан астам оқушы қатысты.
Дарынды өрендер Абай мен Шәкәрім шығармашылығынан 6 номинацияда бақ сынасып, қазақ халқының поэзиясын, рухани мұрасын көпшілікке насихаттады.
Сырдағы зияткерлік мектептің оқушысы Сырсұңқар Базарбайұлы «Көңілім әнді ұғады» номинациясы бойынша өнер көрсетіп, ұлы Абайдың «Өлсем орным қара жер сыз болмай ма?» атты өлеңін домбырамен шебер орындап шықты.
<blockquote>
 «Бұл шығарма Абайдың тағдырын, өмірдегі қиыншылықтарын, еңбектерін ашып көрсетеді. Өмірде мықты болғың келсе, Абайды оқы. Ақын өлеңдерінің зор тәрбиелік мәні бар. Ұлы ақынның әрбір шығармасы адамның дұрыс өмір сүруіне септігі мол. Мен үшін Абай – қайталанбас тұлға», – дейді жүлдегер.
</blockquote>
Сырсұңқар Базарбайұлының әдебиеттанудағы жетекшісі Күлжахан Өксікбаева мен музыкадағы ұстазы Жарасбек Өтебаев шәкірт жетістігі оның бойындағы таланты мен қажырлы еңбегінің жемісі деп санайды және алдағы уақытта бірлесе отырып талай жетістіктерді бағындыратындарына сенімді.
<img src="https://kyzylorda-news.kz/wp-content/uploads/2022/08/whatsapp-image-2022-08-18-at-10.52.19.jpeg" alt="" />

Қызылордадағы НЗМ оқушысы Абай оқуларында жүлдегер атанды

<a href="https://kyzylorda-news.kz/">Kyzylorda-news.kz.</a> Сырдария ауданы әкімінің орынбасары Димаш Байдушевпен «Сырдария ауданы бойынша құқық бұзушылықтың алдын-алу, профилактикалық шараларды атқару, құқықтық-түсіндірме профилактикалық шаралардың тиімді, әрі шынайы жүзеге асырылуы» тақырыбында кездесу өтті.
Кездесуге аудан әкімі аппаратының мемлекеттік-құқықтық жұмыстары бөлімінің басшысы Е.Зұлқарнаев, аудандық полиция бөлімінің бастығының орынбасары Н.Қордабай, аудандық ветеринариялық станция басшысы Н.Дәулетбаев, қоғамдық кеңес пен кент әкімінің өкілдері қатысты. Ауылдық округ әкімдері «Зум» платформасы арқылы қосылды.
Аудан әкімінің орынбасары Димаш Байдушев есепті кезеңде аудан бойынша қалыптасқан қылмыстық ахуалға тоқталып, Сырдария ауданы бойынша қылмыстық деңгейі төмендегенін көрсетті. Атап айтқанда, пәтер ұрлығы – 80 пайызға, ұрлық – 37 пайызға азайған.
Бірақ дегенмен, қылмыстың кейбір санаттары бойынша өсім байқалатынын сөз етті (алаяқтық 200 пайызға, мал ұрлығы 300 пайызға өскен).
Мал ұрлығына қатысты қылмыс (4-тен 16-ға) көбейген, оның 4 ашылған. Малдардың 13 өрістен (барлығы –20 бас), 3 қорадан (барлығы – 5 бас) ұрланған.
Жалпы елді-мекендерде 28 пада ұйымдастырылғанын, өрістегі мал ұрлығының және малдардың автомобиль тас жолына шығуын болдырмау мақсатында учаскелік полиция инспекторларына қосымша 37 сақшы-сарбаздар көмек ретінде қоғамдықпен жіберілгенін айтты. Бұл өз кезегінде қылмыстың алдын-алу мақсатында өз септігін тигізетінін жеткізді.
Ұрлықтың басым көпшілігі өз бетімен жайылымдық жерде жайылатын малдарды құраған. Ал пада немесе кезекпен бағылған малдарды ұрлау деректері орын алмаған.
Пада немесе кезек арқылы бағудың тиісті дәрежеде ұйымдастырылмауынан, өз бетінше өрісте жүрген үй жануарларының қылмыскерлер ұрлануына оңтайлы сәт туғызуда.
Осыған сәйкес, елді-мекендерде пада санын ұлғайтып, тиісті деңгейде ұйымдастыру шараларын күшейтуді тапсырды. Қылмысты алдын-алу мақсатында жергілікті учаскелік полиция инспекторларымен бірлесіп, профилактикалық шараларын ұдайы өткізіп, тұрғындарға тұрақты түрде түсіндірме жұмыстарын жүргізу қажеттілігі тапсырылды.
Батыс Еуропа – Батыс Қытай тас жолы бойындағы жақын орналасқан елді мекендердегі мал ұстайтын үй иелеріне түнгі мезгілде мойындарына жарық қайтарғыш ленталар тағылуы қажет екендігі жөнінде түсіндірмелер беріліп, үн парақтары таратылып жатқандығын айтып өтті.
Анықтама ретінде: Есепті кезеңде жол көлік оқиғасы бойынша автомобиль тас жолында – 38 мал қағу деректері орын алған, оның 5-і мал иесі анықталып, тиісті әкімшілік шара көрілген болса, қалған мал иелері табылмаған құқық қорғау органдарымен профилактикалық шаралары жүргізілуде.
Бұл бағыттағы жұмыстар тұрақты бақылауға алынып, құзырлы органдармен бірлесіп тиісті жұмыстар атқарылуда.
Сондықтан, аудан көлемінде құқық бұзушылықты алдын-алу, жолын кесу, оларды жасауға итермелейтін себептер мен жағдайларды жою мақсатында заңдылыққа сәйкес тиісті шараларды ұйымдастыру қажеттілігін айтып, тиісті органдарға бірқатар тапсырмалар жүктелді.
Кездесу қорытындысымен Д.Байдушев осы салаға жауапты орындаушыларға, мемлекеттік және құқық қорғау орган басшыларына, кент және ауылдық округ әкімдеріне құқық бұзушылықты алдын-алу мақсатында жұмысты күшейтуді тапсырып, орындалуы өзінің қатаң бақылауына алынды.
<img src="https://kyzylorda-news.kz/wp-content/uploads/2022/08/299987291_1477122359394037_5139533909930704135_n.jpg" alt="" />

Сырдария ауданында қылмыс азайған

<a href="https://kyzylorda-news.kz/">Kyzylorda-news.kz.</a> Қызылорда облыстық ҚХА жанындағы Аналар кеңесінің «Мәдениетті ана -мәдениетті ұлт» жобасы аясында ақпараттық – насихаттық жұмыстары Тартоғай ауылында жалғасты. Оған Майлытоғай, Ботабай және Тартоғай ауылдарынан 40 шақты аналар, жас келіндер қатысты.
Кездесуде балаларды тәрбиелеудегі әкелердің рөлі, атап айтқанда, қыздар тәрбиесінің осалдығы, отбасындағы зорлық-зомбылықтың алдын алу, нәзік жандылардың саяси белсенділігін арттыру сияқты тақырыптар қозғалды.
Қазіргі таңда отбасы беделі жоғалуда. Отбасы құндылықтарының ықпалы азая түсуде. Оған дәлел жастардың арасында ажырасудың көбеюі, жастардың батыс тәжірибесімен тіркелмеген некеде тұруы, отбасы жасын құрудың ұлғаюы.
Жалғызбасты ана мен әкенің көбеюі, осының барлығы ұлт тағдырына әсері зор деді Аналар кеңесінің төрайымы Рахима Ахметова.
<blockquote>
 «Бүгінгі таңда ауылдық жерлердегі нәзік жандылардың саяси белсенділігін арттыру аса маңызды. Олардың білім-білігі мен қарым-қабілетін елдік істерге жұмсауға мүмкіндік беру, ана мен баланы әлеуметтік тұрғыда қолдау, отбасындағы зорлық-зомбылыққа жол бермеу, отбасы институтын күшейту. Мұндай игі істер өз кезегінде мемлекеттің дамуын одан әрі нығайтып, озық елдер қатарына қосылуға жол ашады» – деп атап өтті облыстық мәслихаттың депутаты Аида Абибуллаева.
</blockquote>
<img src="https://kyzylorda-news.kz/wp-content/uploads/2022/08/299919084_3281548125497678_363312851424003132_n.jpg" alt="" />

Қазақстан және Қызылорда облысының жаңалықтары