<a href="https://kyzylorda-news.kz/">Kyzylorda-news.kz.</a> Қызылорда облысының бұрынғы әкімі Гүлшара Әбдіқалықова сырбойылықтарға алғысын білдіріп, «<a href="https://www.facebook.com/profile.php?id=100059231132711">Facebook</a>» әлеуметтік желісінде жазба қалдырды.
Қадірлі сырбойылықтар! Осыдан екі жылдай уақыт бұрын ел Президенті маған Қызылорда облысын басқаруды сеніп тапсырды. Алғашқы әйел әкім ретінде туған жерімді түлетуге үлес қосқаным үшін Мемлекет басшысына ризамын.
Біздің елімізге ғана емес, әлемге зиянын тигізген пандемия тұсында облыс басшылығына келу де жеңіл емес екені белгілі. Мұндай қиын кезеңде әйел адамға ел басқару қиын ба, қиын емес пе, ойлануға, еш босаңсуға уақыт болмастан, қолдан келген бар мүмкіндікті пайдаландық. Өзекті мәселелерді өздеріңіздің қолдауларыңызбен барынша шешуге тырыстым.
Кез келген азамат туған жеріне, еліне адалдықпен қызмет етіп, жауапкершілік жүгін үлкен жігермен арқалауы керек деп түсінемін.
Менің туған жерімде атқарған жұмыстарым көз алдарыңызда өтті. Сынасаңыздар, сындарыңызға шыдадым, ұсыныстарыңызды, ой-пікірлеріңізді ескеріп, кеткен кемшілік болса, түзетуге жұмыс істедім.
Сын сағаттардан сүрінбейтін Сыр елінің жайсаң халқымен, жерлестеріммен бірге атқарған жұмыстарым үшін өздеріңізге алғысым шексіз!
Әр отбасына құт-береке, амандық тілеймін! Тәуелсіз еліміздің тұғыры биік, іргесі берік болсын! Сыр елі – менің жүрегімде!

Гүлшара Әбдіқалықова: Сынасаңыздар, сындарыңызға шыдадым, кеткен кемшілік болса, түзетуге жұмыс істедім

<a href="https://kyzylorda-news.kz/">Kyzylorda-news.kz.</a> Шиелі ауданының «Құрметті азаматы» Әбдіманап Шорабаевты еске алуға арналған бокстан жасөспірімдер арасында VIII Республикалық турнир өтіп жатыр.
Турнирге Шиелі ауданының «Құрметті азаматы» П.Архабаев, аудандық ардагерлер кеңесінің төрағасы Ө.Исмаил, қоғамдық кеңестің төрағасы Қ.Бекішев, зиялы қауым өкілдері, жас спортшылар мен БАҚ өкілдері қатысты. 
Турнир барысында аудандық мәслихат хатшысы сөз сөйлеп, турнирге қатысушы жас спортшыларға жеңіс тұғырынан көрініп, еліміздің көк байрағын әлемге танытып жүрулеріне тілектестігін білдірді.
<blockquote>
 «Бүгін жыл сайынғы дәстүрге айналған, ауданымызда кәсіпкерлік саласын дамытуда өз үлесін қосып, имандылық үйлері саналатын мешіттер салдырып, мұсылмандықтың бес парызының бірі қажылыққа баратын қаншама азаматтарға, тұрмысы төмен отбасыларға көмек қолын созған, «Атымтай жомарт» атанған, меценат ауданымыздың «Құрметті азаматы» Әбдіманап Шорабаев атындағы бокстан спорттық сайысты бұған дейін облыстық деңгейде төрт рет өткізсек, биыл сегізінші рет республикалық деңгейде өткізіліп отыр. Бұл турнир жыл өткен сайын құлашын кеңге жайып, облысымыздың барлық аудандарынан, еліміздің әр аймағынан спортшылардың асыға келер дүбірлі додасына айналды. Еліміздің түкпір түкпірінен спорт жанашырлары, спортшылардың ауданымызға келіп, сайыстың көркін қыздыруы Әбдіманап бауырымызға арналған құрметі деп білеміз, – деді турнирге қатысқан аудандық мәслихат хатшысы Т.Жағыпбаров.
</blockquote>
Айта кетейік бүгінгі турнирге 10 облыстан 270 спортшы спортшылар қатысып жатыр.
<img src="https://kyzylorda-news.kz/wp-content/uploads/2022/04/277746403_1287498951780561_6468113477793440235_n.jpg" alt="" />

Шиеліде республикалық турнир өтіп жатыр

<a href="https://kyzylorda-news.kz/">Kyzylorda-news.kz.</a> Қызылорда облысы бойынша ҚАЖ департаментіне қарасты қауіпсіздігі барынша төмен мекемесінде жазасын өтей жүріп ақылы жұмыс жасайтын сотталғандарға жұмыс берушінің тарапынан ҚР Еңбек кодексінің талаптарына сәйкес ақылы еңбек демалысы беріледі.
Сотталған азамат ҚР ҚАК-нің 113 бабының талаптарының негізінде мекеме аумағынан тыс жерде еңбек демалысын өткізуге мекеме бастығына өтініш береді. Мекеме әкімшілігінен құралған комиссия сотталғанның өтінішін 1 тәулікте қарап, оның мінез-құлқы ескеріле отырып беріледі.
Ақылы демалысқа өтініш жазған сотталғанның бірі – Ерлан. Ол масаң күйде автокөлік басқарғаны үшін сот үкімімен бас бостандығынан айырылып, жазасын осы мекемеде өтеуде. Қазір темір тордағы күндерін құр өткізбей, «Алтай-транс Ойл» ЖШС дәнекерлеуші болып жұмыс жасап жүр. Айлығын да уақытылы алып, отбасына жіберіп отыр.
<blockquote>
 «Мені сағына күтіп отырған бес балам бар. Жаңылмайтын жақ, сүрінбейтін тұяқ болмайды» демекші, өзім кінәлімін, мас күйімде көлік жүргіздім, заң бәрімізге ортақ. Жазамды өтеп жатырмын. Масаң күйде көлік басқару өзіңді де өзгені де жарға жығады. Балаларыма ақыл айтып отыратын кезімде темір торда жазамды өтеп жатқаныма өкінемін»,- дейді сотталған Ерлан.
</blockquote>
Сотталғандардың еңбегін ұйымдастыру тобының инспекторы әділет аға лейтенанты Айгүл Ботпанованың айтуынша, жазасын өтеушілердің жыл сайынғы ақылы еңбек демалысына шығуына құқығы бар. Еңбек Кодексінің 92 бабына сәйкес тараптардың келісуі бойынша ақылы еңбек демалысын 1жыл ішінде 2-3 рет бөліп алуына болады. Қазіргі таңда мекемемен келісім-шарт негізінде сотталғандарды жұмыспен қамтып отырған 30-дан жеке кәсіпкерлік субьектілері бар. Мекемеде 100-ден астам сотталған осы жеке кәсіпкерлерде жұмыспен қамтылған. Сотталғандарды жұмыспен қамтудағы басты міндет сот үкімі негізінде мемлекет пайдасына, жеке, заңды тұлға пайдасына келтірілген шығындарын өтеу болып табылады дейді мекеме қызметкері.

Қызылордада жазасын өтеушілер ақылы еңбек демалысына шықты

<a href="https://kyzylorda-news.kz/">Kyzylorda-news.kz.</a>&nbsp;Жеке тұрғын үй салу үшін жер учаскесін алу үшін egov.kz арқылы кезекке тұруға болады
Бұған дейін ҚР Президенті Қасым-Жомарт Тоқаев Жеке тұрғын үй құрылысы&nbsp;(ЖТҚ)&nbsp;үшін жер учаскелерін алуға&nbsp;кезекте тұрғандардың бірыңғай тізілімін&nbsp;әзірлеуді&nbsp;тапсырған болатын.&nbsp;
ҚР Цифрлық даму, инновациялар және аэроғарыш өнеркәсібі министрлігі ҚР Ауыл шаруашылығы министрлігімен бірлесіп, ЖТҚ-ға жер учаскесін алуға кезекке қою процесін автоматтандыру мәселесін пысықтады, ал әкімдіктер «Жылжымайтын мүліктің бірыңғай мемлекеттік кадастры» жаңа ақпараттық жүйесінің Жария кадастр картасына жүктеу үшін бұдан бұрын кезекте тұрғандар туралы жиналған ақпаратты ұсынды.
Бұған дейін ЖТҚ үшін жер учаскесін алу кезегіне тұру үшін қазақстандықтар әкімдіктерге қағаз жүзінде өтініш тапсыратын, онда кезек ретінің дұрыс жүргізілмеу қауіпі болатын. Ол кезде кезекке тұру процесі 12 күн уақыт алатын. Бұл өтініштер 16 жыл бойы аудан, қала, облыс деңгейінде бөлек-бөлек сақталды.
Жаңа жүйенің арқасында қазақстандықтар кезекке тұрып, eGov.kz-те оның жылжу барысын өз бетінше бақылап, жер кезегіне бұдан бұрын берілген өтініштің деректерін өзектендіре алады. Осылайша, әрбір қазақстандық алуы тиіс 10 сотық жерді алу процесі барынша ашық болады. Ал автоматизация арқасында бұл процеске 5 минут қана жұмсалады.
<blockquote>
 «Әкімдіктер берген тізімді біз цифрландырып, электронды форматқа ауыстырдық. Жер теліміне кезекті Цифрландыру – сыбайлас жемқорлықты жою және жерді игеру үдерісінде жасалған үлкен ілгері қадам. Енді кәмелет жасына толған әрбір қазақстандық үйден шықпай-ақ, 10 сотық жерге eGov.kz арқылы өтінім бере алады. Тағы бір жаңашылдық – енді таңдаған аймақтың әкімдігіне бармай-ақ, еліміздің кез келген өңірінен жер теліміне өтінім беруге болады», – деп түсіндірді ҚР Цифрлық даму, инновациялар және аэроғарыш өнеркәсібі вице-министрі Әсет Тұрысов.
</blockquote>
Қызметті пайдалану үшін&nbsp;eGov.kz&nbsp;порталына кіріп, «Жылжымайтын мүлік» – «Жер қатынастары» бөлімінен «Жеке тұрғын үй құрылысына жер учаскесін (10 сотық жер) алуға кезекті қарау немесе кезекке тұру» қызметін таңдау қажет.
Әрі қарай өтініш түрін таңдау керек. Бүгінде порталда өтініштің үш түрі бар:
кезекке қою;
деректерді өзектендіру;
кезектен шығару.
Егер сіз жер учаскесін алу үшін кезекке алғаш рет өтініш білдіріп тұрсаңыз, онда өзіңіз жер алуды қалайтын аймақты таңдайсыз.
Егер сіз бұдан бұрын жер кезегіне тұрған болсаңыз, бірақ ол туралы ақпарат таппасаңыз, онда «Өзектендіру» өтініш түрін таңдауыңыз қажет.
Кезек алғаныңызды растау үшін қолыңызда бар құжатты (талонның скан-нұсқасы, өтініштің, жеке куәліктің және т.б. көшірмелері) жүктеу қажет. Сондай-ақ кезек ретін&nbsp;www.map.gov4c.kz/egkn/&nbsp;сайтында ЭЦҚ арқылы авторизациядан өтіп, бақылап отыруға болады.
Бұдан бұрын алған жер кезегінен бас тарту үшін «Шығару» өтініш түрін таңдау қажет.
Егер азамат бұдан бұрын мемлекеттен тегін жер телімін алған болса немесе елдімекенде ЖТҚ үшін бос жер телімі болмаса,&nbsp;жер кезегіне өтініш бере алмайды. Бос учаскелерді беру жөніндегі шешімді әкімдіктер қабылдайды. Учаскелер алаңдардың дайын болуына қарай немесе елдімекеннің бас жоспарына сәйкес, бос аумақтар болған жағдайда берілетін болады.
Егер бұрын бір өңірде жер теліміне кезекке тұрған болсаңыз, ал қазір өзге аймақтан жер алуға ниеттенсеңіз, 10 сотыққа кезек реті ертерек келген өңірден жер бір рет қана берілетінін, қалған өтініштердің күші жойылатынын ескеру қажет.

Жер учаскесін алу үшін egov.kz арқылы кезекке тұруға болады

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы Полиция департаментінің бастығы полиция полковнигі Сұлтан Бектөре Жеңісбайұлы есептік кездесу өткізеді.
2022 жылы 14 сәуір күні сағат 09:30-да Қызылорда облысы Полиция департаментінің бастығы полиция полковнигі Сұлтан Бектөре Жеңісбайұлының халық алдында есептік кездесуі онлайн режимде өтеді.
Кездесу барысында Полиция департаментімен атқарылып жатқан жұмыс нәтижелері туралы баяндалады.
Есептік кездесу Полиция департаментінің «Facebook» әлеуметтік желісінің тікелей эфирінде өтеді. Сұрақтар және ұсыныстар туындаған жағдайда press-sluzhba-dvd@mail.ru электрондық мекенжайға және әлеуметтік желілердегі департаменттің ресми парақшаларына мессенджер арқылы жолдауға болады.
<img src="https://kyzylorda-news.kz/wp-content/uploads/2022/04/278125984_1073255806558188_1019045449758556991_n.jpg" alt="" />

Қызылорданың бас полицейі халыққа есеп береді

<a href="https://kyzylorda-news.kz/">Kyzylorda-news.kz.</a> Бұған дейін Қызылорда қаласында жаяу жүргіншілер жолағымен өтіп бара жатқан 10 жасар қызды көлік қағып кеткенін <a href="https://kyzylorda-news.kz/kogam/qyzylordada-mektep-oqwshysyn-koelik-qaghyp-ketti-video-147556/?doing_wp_cron=1649405519.8177080154418945312500">хабарлаған</a> болатынбыз. Облыстық көпбейінді балалар ауруханасының дәрігерлері ауруханаға түскен жасөспірімнің жағдайын хабарлады.
<blockquote>
 «Жол апатынан кейін ол бірден облыстық көпбейінді ауруханасына жеткізілді. Жағдайды бағалағаннан кейін дәрігерлер оны реанимация бөліміне жатқызды. Дәрігерлер зардап шеккен жасөспірімге барлық қажетті медициналық көмек көрсетті. Жасөспірім түрлі жарақат алған. Балалар ауруханасы дәрігерлерінің шеберлігі мен кәсіпқойлығының арқасында бүгінде ол өзіне келіп, бөлімге ауыстырылды. Оның жанында анасы бар. Жағдайы жақсы. Қыздың өміріне қауіп төніп тұрған жоқ», – делінген аурухана таратқан хабарламада.
</blockquote>

Дәрігерлер көлік қағып кеткен оқушының жағдайын хабарлады

<a href="https://kyzylorda-news.kz/">Kyzylorda-news.kz.</a> Қызылорда қаласындағы Нұрсұлтан Назарбаев даңғылында жаяу жүргіншілер жолағымен өтіп бара жатқан мектеп оқушысын көлік қағып кетті.
Қазіргі таңда оқушы қыз ауруханаға жеткізіліп, ем-дом жасалуда.
<blockquote>
 «Аталған оқиға ҚР Қылмыстық Кодексінің 345-бабының 2-бөлігімен сотқа дейінгі тергеп-тексерудің бірыңғай тізіліміне тіркелді. Тиісті сараптама тағайындалып, анықтау жұмыстары жүргізілуде. Күдікті азамат Қызылорда қалалық Полиция басқармасына жеткізілді. Оған қатысты ешқайда кетпеу туралы бұлтартпау шарасы қолданылды. Жасөспірім облыстық балалар ауруханасына жатқызылды», – деп мәлім етті Қызылорда қалалық полиция басқармасынан.
</blockquote>

Қызылордада мектеп оқушысын көлік қағып кетті (ВИДЕО)

<a href="https://kyzylorda-news.kz/">Kyzylorda-news.kz.</a>&nbsp;Қызылордада қауіпсіздігі барынша төмен мекемесінен 34 сотталған рақымшылықпен босатылды.
ҚАЖ мекемелеріндегі сотталғандарды есепке алу, жеке істерін тіркеу, есебін жүргізу мекемелердің арнайы есепке алу бөлімі жүзеге асырады. Қызылорда қаласындағы қауіпсіздігі барынша төмен ЗК-169/4 мекемесінің арнайы есепке алу бөлімінің инспекторы Мерей Табылғанованың айтуынша, мекемеге қабылданған әрбір сотталған туралы мәліметтерді, жеке істерін зерделеп, Қазақстан Республикасы Ішкі істер министрлігі қылмыстық-атқару жүйесінің Орталықтандырылған автоматтандырылған деректер қорына сотталғандар туралы және бір тәулік ішінде жазалардың орындалуы туралы мәліметтерді енгізеді.
Сондай-ақ мекемеге келгені әрбір сотталған туралы екі жұмыс күні ішінде үкім шығарған сотқа, оның зайыбына, сотталғанның таңдауы бойынша туыстарының біріне немесе заңды өкіліне хабарлама жібереді. Сотталған азаматтармен жеке қабылдаулар жүргізіп, жаза өтеу мерзімдері туралы ҚР заңнамаларына сәйкес түсіндірме жұмыстарын жүргізеді.
Арнайы есепке алу қызметкерлері үкімдерді орындау кезінде туындаған кез келген күмәндармен түсініксіз жайттар бойынша сотталғанның сотынан түсіндірме сұратылады. Сотталғандарды құжаттандыру жұмысын да арнайы есепке алу бөлімі жүргізеді. Осы жылдың үш айында бес сотталғанның жеке куәлігі қайта жасалды. –
<blockquote>
 «Қазақстан Республикасы Тәуелсіздігінің отыз жылдығына байланысты рақымшылық жасау туралы” Заңы мекемеде жазасын өтеуші 39 сотталғанға қолданылып, Қызылорда қалалық №2 сотының қаулысымен 34 сотталған жазадан босатылып, бес сотталғанның жаза мерзімі қысқартылды. Жыл басынан мекемеден мерзім соңымен 15 сотталған , шартты түрде мерзімінен бұрын алты сотталған босатылды. 17 сотталғаннның жазасының өтелмеген бөлігі неғұрлым жеңіл жаза түріне ауыстырылды», – дейді М.Табылғанова.
</blockquote>

Қызылордада 34 сотталған рақымшылықпен босатылды

<a href="https://kyzylorda-news.kz/">Kyzylorda-news.kz.</a> Мемлекет басшысы кәсіпқой боксшы, әлем чемпионы Геннадий Головкинді туған күнімен құттықтап, жеделхат жолдады.
<blockquote>
 «Әуесқой және кәсіпқой бокстағы мансабыңызда өзіңізді бірегей спортшы ретінде таныттыңыз. Деңгейі өте жоғары жарыстарда еліміздің намысын абыроймен қорғадыңыз, сондай-ақ Қазақстандағы және әлемдегі көптеген бокс жанкүйеріне қуаныш, жарқын көңіл күй сыйладыңыз. Табиғи талантыңыз бен еңбексүйгіштік қасиетіңіз спорт саласында зор жетістіктерге жетуге ықпал етті. Жастарымызға үлгі болдыңыз. Сіздің отандық бокстың дамуына үлкен үлес қоса беретініңізге сенімдімін», – деп жазылған Президенттің құттықтау жеделхатында.
</blockquote>
Қасым-Жомарт Тоқаев спортшының шаршы алаңда ертең өтетін кезекті жекпе-жегінде жеңіске жетуіне тілектестік білдірді.
<img src="https://kyzylorda-news.kz/wp-content/uploads/2022/04/277816956_1100985447126191_8753090353051704115_n.jpg" alt="" />

Қасым-Жомарт Тоқаев Геннадий Головкинді туған күнімен құттықтады

<h5 id="kyzylordanewskznbsp0911">Kyzylorda-news. kz. Синоптиктер Қазақстан бойынша алдағы демалыс күндері&nbsp;09-11 сәуірге арналған ауа райы болжамын айтты.</h5>
Қазгидромет хабарлауынша, еліміздің кейбір аймақтарында қар жауады.&nbsp;
<blockquote>
 “Алдағы үш тәулікте&nbsp;Қазақстан аумағының басым бөлігінде оңтүстік циклонның және онымен байланысты атмосфералық фронтальді бөліктердің әсерінен, тұрақсыз ауа райы сақталады — жаңбыр жауады, республиканың солтүстік-батысында түнгі уақытта қар мен жаңбыр түріндегі жауын-шашын күтіледі”, –&nbsp;делінген ауа райы болжамында.
</blockquote>
Синоптиктердің айтуынша, еліміздің солтүстік-батысында күн бірте-бірте жылынады.
<blockquote>
 “Оңтүстік және оңтүстік-шығыс аймақтарда, кейде найзағай мен қатты жаңбыр жауады. Қазақстанның солтүстік, шығыс аудандары ғана солтүстік-батыс антициклон жотасының ықпалында болады. Осыған байланысты мұнда жауын-шашынсыз ауа райы және температураның біртіндеп жоғарылауы күтіледі. Республика бойынша тұман, желдің күшеюі байқалады”, –&nbsp;деді синоптиктер
</blockquote>

Алдағы күндерге арналған ауа райы болжамы

**<a href="https://kyzylorda-news.kz/">Kyzylorda-news.kz.</a> *Қызылорда қаласының әкімдігі* «Балалар жылына» орай дарияның сол жағалауындағы балаларға арнап ұлттық спорт түрлерінен сайыс ұйымдастырды.**
Атап айтар болсақ, қол күрес, арқан тартыс, гір көтеру, бесасық, тоғызқұмалақ, ләңгі тебу, асық ату секілді спорт түрлерінен жарысқан оқушылар өзара мықтыларын анықтады. Әрбір сайыстың жеңімпаздарына қалалық дене шынықтыру және спорт бөлімінің мадақтамалары мен медальдары табысталды.
Қала әкімінің орынбасары Бектас Нұридинов мұндай жарыстар қаланың барлық аумағында өткізілетіндігін айтып, жеңімпаздарға құттықтау лебізін жеткізді.
<img src="https://kyzylorda-news.kz/wp-content/uploads/2022/04/278121239_1161547747912269_692002080531637424_n.jpg" alt="" />
<img src="https://kyzylorda-news.kz/wp-content/uploads/2022/04/278118729_1161547801245597_7720130942220235293_n.jpg" alt="" />
<img src="https://kyzylorda-news.kz/wp-content/uploads/2022/04/278113042_1161547764578934_2432499499624567847_n.jpg" alt="" />
<img src="https://kyzylorda-news.kz/wp-content/uploads/2022/04/278077072_1161547974578913_4982039850426855513_n.jpg" alt="" />
<img src="https://kyzylorda-news.kz/wp-content/uploads/2022/04/278068543_1161547991245578_5785916639254037006_n.jpg" alt="" />
<img src="https://kyzylorda-news.kz/wp-content/uploads/2022/04/277803227_1161547631245614_2722165194065801167_n.jpg" alt="" />

Сол жағалаудың балалары сайысқа түсті

<a href="https://kyzylorda-news.kz/">Kyzylorda-news.kz.</a> Президент Қасым-Жомарт Тоқаев «Орталық атқарушы органдар басшыларының халықпен кездесулерін өткізу туралы» жарлыққа қол қойды.
Жарлықтың мәтіні төменде келтірілген.
«Қазақстан Республикасының президенті туралы» Қазақстан Республикасы Конституциялық заңының 10, 17 және 21-баптарына сәйкес және қазақстандық қоғамды одан әрі демократияландыру, халықтың елде жүргізіліп жатқан реформалар туралы хабардар болуын арттыру, атқарушы органдардың халық алдындағы жауаптылығы мен есептілігін күшейту, мемлекеттік басқару процесіне халықты кеңінен тарту мақсатында қаулы етемін:
<ol>
<li>Орталық атқарушы органдардың (Қазақстан Республикасының қорғаныс, сыртқы істер министрліктерін қоспағанда) басшылары жыл бойы халықпен тұрақты кездесулер өткізсін.</li>
<li>Орталық атқарушы органдар басшыларының халықпен кездесулерінің кестесін (бұдан әрі – кесте) қалыптастыру мен бекітудің мынадай тәртібі белгіленсін: 
1) жыл сайын 1 желтоқсанға дейін орталық атқарушы органдар алдағы күнтізбелік жылға арналған кестені қалыптастыру үшін ақпаратқа қол жеткізу саласындағы уәкілетті органға ұсыныстар жіберсін; 
2) жыл сайын 15 желтоқсанға дейін ақпаратқа қол жеткізу саласындағы уәкілетті орган кестенің жобасын Қазақстан Республикасы премьер-министрінің Кеңсесіне енгізсін; 
3) жыл сайын 10 қаңтарға дейін Қазақстан Республикасының үкіметі кестені бекітсін.</li>
<li>Орталық атқарушы органдардың (Қазақстан Республикасының қорғаныс, сыртқы істер министрліктерін қоспағанда) басшылары: 
1) қандай да бір өңірде жетекшілік ететін салада жағдайдың нашарлау тәуекелдері болжанған не туындаған жағдайда, халықпен кестеден тыс кездесу өткізсін; 
2) техникалық мүмкіндіктерді ескеріп, халықтың әлеуметтік желілердегі ресми аккаунттарда пікір білдіру мүмкіндігін міндетті түрде бере отырып, онлайн-трансляциялар, сондай-ақ қажет болған жағдайда бейнеконференцбайланыс ұйымдастыру арқылы кездесулер өткізуді қамтамасыз етсін; 
3) кездесу үшін жоспарланған уақыттың төрттен бірден аспайтын бөлігін – баяндаманы таныстырып, уақыттың қалған бөлігін “сұрақ-жауап” форматында өткізсін; 
4) кездесулер өткізудің барлық кезеңінде ақпаратқа қол жеткізу саласындағы уәкілетті органмен тұрақты ақпараттық өзара іс-қимылды қамтамасыз етсін; 
5) халықпен кездесу өткізгенге дейін: 
халықтың пікірін ескере отырып, оны өткізу күні мен уақытын айқындауды; 
ресми интернет-ресурстарға, орталық атқарушы органдар басшыларының блог-платформасына, коммуникацияның басқа да нысандарына және әкімдердің халықпен кездесулерінің қорытындылары бойынша халықтан келіп түскен сұрау салулар мен ұсыныстарды жинауды, талдауды қамтамасыз етсін; 
6) халықпен кездесу өткізу шеңберінде: 
азаматтарға жеке қабылдау жүргізуді; 
коммерциялық емес ұйымдармен кездесулерді; 
бұқаралық ақпарат құралдарына арналған брифингті қамтамасыз етсін; 
7) халықпен кездесу өткізгеннен кейін: 
айтылған барлық проблемалық мәселелерді жүйелеуді; 
кездесулер мен азаматтарды қабылдау аяқталған күннен бастап күнтізбелік он күннен кешіктірмей, өткізілген кездесулердің қорытындылары туралы ақпаратты, проблемалық мәселелердің тізбесін, проблемалық мәселелерді шешудің нақты мерзімдерін, жауапты орындаушыларды көрсете отырып, оларды шешу жөніндегі іс-қимыл жоспарын бұқаралық ақпарат құралдарында, оның ішінде ресми интернет-ресурстарда орналастыруды; 
кездесулерде халық көтерген проблемалық мәселелерді шешу барысы туралы ақпаратты орталық атқарушы органның ресми интернет-ресурсында тоқсан сайын орналастыруды қамтамасыз етсін.</li>
<li>Барлық деңгейдегі әкімдер: 
1) орталық атқарушы органдар басшыларының халықпен кездесулеріне қатыссын; 
2) кездесулер өткізуді, оның ішінде бұқаралық ақпарат құралдарында және әкімдіктердің (әкім аппараттарының) ресми аккаунттарында, әлеуметтік желілерде және жалпыға бірдей қолжетімді жерлерде ақпараттық-насихат жұмыстарын ұйымдастыруда орталық атқарушы органдарға қолдау көрсетсін; 
3) әкімдердің халықпен кездесулерінің қорытындылары бойынша өңірдің орталық атқарушы органдар, ұлттық холдингтер мен компаниялар деңгейінде шешуді талап ететін жүйелі проблемаларын жинақтап-қорытсын және кездесулер өткізу кезінде есепке алу үшін жарты жылда бір рет құзыреті бойынша орталық атқарушы органдарға жіберсін.</li>
<li>Ақпаратқа қол жеткізу саласындағы уәкілетті орган: 
1) республикалық бұқаралық ақпарат құралдарында кездесулер өткізілетінін хабарлауды және олардың өткізілу барысы мен нәтижелерін кеңінен ақпараттық жария етуді; 
2) орталық атқарушы органдар қызметінің тиімділігін жыл сайынғы бағалау шеңберінде кездесулер өткізу нәтижелерін есепке алуды; 
3) халықпен кездесулер өткізу жөніндегі әдістемелік ұсынымдарды бекітуді және орталық атқарушы органдардың назарына жеткізуді қамтамасыз етсін.</li>
<li>Қазақстан Республикасының үкіметі: 
1) кездесулер өткізудің қорытындыларын жартыжылдық негізде қарасын; 
2) әлеуметтік шиеленістің және қоғамдық-саяси жағдайдың тұрақсыздануының жоғары тәуекелдері болған жағдайда, орталық атқарушы органдардың кездесулеріне Қазақстан Республикасы премьер-министрі орынбасарларының қатысуын қамтамасыз етсін; 
3) орталық атқарушы органдардың бірінші басшылары орынбасарларының және ведомстволары төрағаларының халықпен тұрақты кездесулер өткізуін қамтамасыз етсін; 
4) осы жарлықты іске асыру жөнінде өзге де шаралар қабылдасын.</li>
<li>Осы жарлықтың орындалуын бақылау Қазақстан Республикасы президентінің әкімшілігіне жүктелсін.</li>
<li>Осы жарлық алғашқы ресми жарияланған күнінен бастап қолданысқа енгізіледі.</li>
</ol>

Қазақстан және Қызылорда облысының жаңалықтары