<a href="https://kyzylorda-news.kz/">Kyzylorda-news.kz</a>. Санитарлық-эпидемиологиялық бақылау комиетінің ресми өкілі Ержан Байтанаев Pfizer вакцинасы қазақстандықтардың кейбір санаты үшін ақылы болатыны туралы ақпаратты теріске шығарды, деп хабарлайды <a href="https://lenta.inform.kz/kz/endi-kazakstandyktar-pfizer-men-revakcinaciya-zhasay-alady_a3915239">ҚазАқпарат</a>.
Кешегі өткен Қазақстан аумағында коронавирус инфекциясының таралуының алдын алу жөніндегі ведомствоаралық комиссияның отырысында «Pfizer» препаратымен вакциналауға жататын адамдар контингентін кеңейту туралы шешім қабылданғаны хабарланған болатын. Осы мәліметтің негізінде әлеуметтік желіде Pfizer вакцинасы ақылы негізде салынатыны туралы ақпараттар тарады. Ержан Байтанаевтың айтуынша, бұл ақпарат шындыққа жанаспайды.
<blockquote>
 «Қазақстан аумағында коронавирус инфекциясына қарсы ақылы вакциналау мүлде атымен жоқ. Сондықтан, Pfizer вакцинасы ақылы болады деген ақпараттың жалған екенін түсіну керек. Вакцина алуға жататын кез келген адам кез келген вакциналау бекетіне немесе емханаға барып, Pfizer вакцинасын салғыза алады», – деді комитеттің ресми өкілі.
</blockquote>
Сондай-ақ, ол Pfizer вакцинасын алуға құқылы азаматтардың санаты қалай кеңейтілгенін түсіндірді.
<blockquote>
 «Егер бұған дейін коронавирусқа қарсы вакцина алып көрмеген болсаңыз, Pfizer -дің бірінші және екінші дозасын алуыңызға болады. Ал бұған дейін басқа вакцина алып қойған болсаңыз, ревакцинацияға Pfizer -ді қабылдай аласыз. Шетелден Pfizer -дің алғашқы дозасын алып қойған болсаңыз, Қазақстанда қалған дозасын салғызуыңызға болады. Шетелге шығу қажет болса, онда да Pfizer -ді қабылдауыңызға болады. Демек Қазақстан аумағында Pfizer вакцинасын салғызу бойынша ешбір шектеу жоқ. Елімізде коронавирусқа қарсы белгіленген вакцинаның толық қоры бар. Pfizer бойынша да тапшылық жоқ», – деді Ержан Байтанаев.
</blockquote>

Енді қазақстандықтар Pfizer-мен ревакцинация жасай алады

<a href="https://kyzylorda-news.kz/">Kyzylorda-news.kz</a>. Бүгін аймақ басшысы Гүлшара Әбдіқалықова кезектілік тәртібімен азаматтарды жеке мәселелері бойынша онлайн форматта қабылдады. Облыс әкімінің жеке қабылдауында 21 азаматтың өтініші қаралды. Басым бөлігі – мүгедектігі бар азаматтар.
Тұрғындардың мәселелерін зерделеу үшін жиынға жауапты басқарма басшылары, онлайн режимде Қызылорда қаласы мен бірқатар аудан әкімдері қатысты.
Азаматтардың негізгі сауалдарының бағыты әлеуметтік мәселелерден туындайды. Мәселен, 13 сұрақ тұрғын үй кезегіне тұру, 2 сауал денсаулық, 2 сұрақ мәдениет саласына бағытталды. Сондай-ақ, су шаруашылығы, ономастика және әлеуметтік мәселелер де қаралды. Аймақ басшысы тұрғын үйлерді табыстау бағытында Сыр елінде баспананы пәтерлеп емес, мөлтек аудан ретінде табыстау жолға қойылғанын айтып, кезектілік ретімен баспана берілетінін жеткізді. Биыл 1000-нан астам үй табыстау жоспарда тұрғанын еске салды. Сонымен қатар әрбір көтерілген мәселелерді саралай келе жауапты сала басшыларына тапсырма беріп, заң аясында жұмыс жасау қажет екенін айтты.
<img src="https://kyzylorda-news.kz/wp-content/uploads/2022/03/276205343_268914402096478_5872255341075501885_n.jpg" alt="" />

Гүлшара Әбдіқалықова азаматтарды жеке мәселелері бойынша қабылдады

<a href="https://kyzylorda-news.kz/">Kyzylorda-news.kz</a>.&nbsp;Құрметті азаматтар! Соңғы уақытта облыс кәсіпорындарындағы еңбек даулары жиілеп кетті. Көбінесе олар стихиялық ереуілдерге көшеді.
Әлеуметтік-экономикалық және кәсіптік талаптарды қанағаттандыру мақсатында қызметкерлер ереуіл жариялауға құқылы. Алайда бұл үшін татуластыру рәсімдерінің кезеңдерінен өту керек, әйтпесе ереуіл заңсыз деп танылады. Осыған байланысты ұжымдық еңбек дауларын қарау тәртібі 2015 жылғы 23 қарашада қабылданған Еңбек кодексімен (бұдан әрі – Кодекс) реттелетінін түсіндіреміз.
Жұмыс беруші үш жұмыс күні ішінде жұмыскерлердің қойған талаптарын қарауға және оларды шешу үшін шаралар қабылдауға, ал оларды шешу мүмкін болмаған кезде,өз шешімдері мен ұсыныстарын жазбаша түрде жұмыскерлерге жеткізуге міндетті (кодекстің 163-бабының 2-бөлігі).
Бұдан әрі дау татуластыру комиссиясында (жеті жұмыс күніне дейінгі мерзімде) шешілуге тиіс. Бұл тепе-теңдік негізде тараптардың бірлескен шешімімен құрылған орган.
Татуластыру комиссиясы дауды шешу процесінде қызметкерлермен, жұмыс берушімен және басқа да адамдармен консультация жүргізеді.
Комиссияның шешімі тараптардың келісімі негізінде қабылданады, хаттамамен ресімделеді және тараптар үшін міндетті күші болады.
Татуластыру комиссиясының мүшелері келіссөздерге қатысқан уақытта жалақысы сақтала отырып, жұмыстан босатылады. Бұл ретте тараптардың ешқайсысы татуластыру рәсімдеріне қатысудан жалтаруға құқылы емес екенін атап өтеміз.
Татуластыру комиссиясында келісімге қол жеткізілмеген кезде оның жұмысы тоқтатылады, ал тараптар дауды шешу үшін әкімдік өкілдерін (мемлекеттік еңбек инспекторын)тарта отырып, еңбек төрелігін құрады (Кодекстің 165-бабының 6-бөлігі).
Еңбек төрелігі мүшелерінің саны, оның құрамы және еңбек дауын қарау тәртібі тепе-теңдік негізде тараптардың келісімімен айқындалады (бұл ретте еңбек төрелігі кемінде бес адам болуға тиіс).
Татуластыру комиссиясының мүшелері жұмыскерлердің қаралып отырған талаптары бойынша еңбек төрелігінің құрамына кіре алмайды.
Еңбек төрелігінің шешімі жеті жұмыс күніненкешіктірілмей төрелік мүшелерінің қарапайым көпшілік даусымен қабылданады және орындау үшін міндетті болып табылады. Төрелік реттемеген мәселелер бойынша соттарға жүгіну қажет.
Бұл ретте жұмыс берушінің немесе прокурордың өтініші бойынша тиісті рәсімді сақтамай ереуіл өткізу тек сотпензаңсыз деп танылуы мүмкін. Бұл жағдайда сот заңсыз деп таныған ереуілге қатысуды жалғастыруға мәжбүрлегені және шақырғаны үшін 3 жылға дейінгі мерзімге бас бостандығынан айырумен қылмыстық жауапкершілік көзделген (Қылмыстық кодекстің 157 және 402-баптары).
Азаматтарды қолданыстағы заңнама нормаларын мүлтіксіз сақтауға, арандатушылыққа бой алдырмауға және заңсыз ереуілдерге қатыспауға шақырамыз.
Құқық қорғау органдары белгіленген тәртіпке, қоғамдық қауіпсіздікке қол сұғатын кез келген құқық бұзушылықтың жолын кеседі, сондай-ақ оларға жол бермеу жөнінде заңда көзделген шараларды қолданады.
Нұрлан БИЖАНОВ,
Қызылорда облысының прокуроры

Нұрлан Бижанов қызылордалықтарға үндеу жариялады

<a href="https://kyzylorda-news.kz/">Kyzylorda-news.kz</a>. ҚР Әділет министрі Қанат Мусин Алматы қаласының белсенділерімен, қоғамдық кеңес мүшелерімен кездесуінде министрліктің қазақстандықтардың құқықтық сауаттылығын көтеруді қалай жүзеге асыратыны туралы айтты. Министр сондай-ақ халықтың құқықтық сауаттылық деңгейі жай ғана төмен емес, нөлдік деңгейде екенін мойындады, деп хабарлайды <a href="https://stan.kz/kazakstan-halkinin-kykiktik-sauati-noldik-dengeyde---mi-362084/">Stan.kz</a>.
Мусин қоғамда пайда болған құқықтық қарама-қайшылық “сіз бен біздің қарым-қатынасымыздың” нәтижесі екенін атап өтті.
<blockquote>
 «Біз тәжірибе жинауға келген адамды қосымша жұмыс күші ретінде көріп немесе мүлдем көрінбейді деп үйреніп қалдық. Түсіндіру жұмыстарына мән бермейміз. Ақпаратты алуға болатын көздер де тым аз, ал олар ақпарат беретін болса&nbsp;қызық емес академиялық пішінде жазылады ал бұл керісінше болуы керек», – деді министр.
</blockquote>
Сол себепті министрлік алдағы уақытта жаңа тұжырымдаманы қолға алмақшы екенін жеткізді. Заңдар, сондай-ақ әлеуметтік құқықтар, жәрдемақылар, зейнетақылар туралы барлық ақпарат әлеуметтік желілер арқылы түсінікті тілде жазылатын болады.
<blockquote>
 «Біз ақпаратты, қысқа бейнероликтерді ұсынудың графикалық форматын әзірлеу үшін жаңа технологияларды дамытуға ұмтыламыз», – деп қосты Мусин.
</blockquote>
Қанат Мусин сондай-ақ құқықтық сауаттылықты бала кезінен үйрету қажет деп санайтынын атап өтті.

Қанат Мусин: Қазақстан халқының құқықтық сауаты нөлдік деңгейде

<a href="https://kyzylorda-news.kz/">Kyzylorda-news.kz</a>. Бас мүфти Наурызбай қажы Тағанұлының төрағалығымен өткен Қазақстан мұсылмандары діни басқармасының Төралқа мәжілісінде биылғы пітір садақасының мөлшері айтылды.
Биыл пітір садақа мөлшері 500 теңге болып белгіленді.
Айта кетейік, пітір садақаның мөлшері еліміз бойынша 2 келі ұнның орташа бағасымен есептелді. Ал ұнның бағасы ҚМДБ-ның қала және облыс өкілдіктерінің берген мәліметі негізінде анықталды.

Пітір садақа 500 теңге болып белгіленді

<a href="https://kyzylorda-news.kz/">Kyzylorda-news.kz</a>. Қызылорда облысындағы тұрақтандыру қорында 1441,2 тонна өнім қоры бар. Биыл облыстық бюджеттен 800 млн. теңгеге жуық қаржы бөлініп, әлеуметтік маңызы бар тауарлар сатып алынды. Бұл туралы Өңірлік коммуникациялар қызметінде өткен баспасөз конференциясында тұрақтандыру қорының басқарма төрағасы Талғат Бекішов хабарлады.
<blockquote>
 «Қазіргі таңда тұрақтандыру қорында барлық азық-түлік тауарлары жеткілікті. Бүгінде 85 тонна сәбіз және 50 тонна қырыққабат, 220 тонна өсімдік майы, 204 тонна қарақұмық жармасы, 204 тонна бірінші сортты ұн сатып алынды. Ұн бағасын тұрақтандыру үшін «Азық-түлік келісімшарт корпорациясы» ҰҚ» АҚ мекемесімен арзандатылған бидай алуға меморандум жасалып, бірінші сортты бидай ұнын 125 теңгеден сатып алуға келісім шарт жасалды. Сонымен қатар Ыбырай Жахаев атындағы Қазақ күріш ғылыми зерттеу институтымен 50 тоннадан картоп, пияз, сәбіз, қырыққабатты сатып алуға меморандум жасалды», – деді Талғат Бекішов.
</blockquote>
Айта кетейік, 26 наурыз күні Тағзым алаңында «Байқоңыр» ӘКК» АҚ және оның серіктестерінің ұйымдастыруымен жәрмеңке өтеді.

Талғат Бекішов: Тұрақтандыру қорында 14 мың тоннадан астам өнім бар

<a href="https://kyzylorda-news.kz/">Kyzylorda-news.kz</a>. Рейдтік шаралар барысында 33 жастағы Жаңақорған ауданының тұрғынының үйінде заңсыз, тіркеуде жоқ, 2-ұңғылы, 16 калибрлі аңшы мылтығын сақтағаны анықталды.
Құқық бұзушыға қатысты ҚР ӘҚБтК-нің 482-бабы (Заңсыз қару алу, беру, өткізу, сақтау, алып жүру, тасымалдау) бойынша хаттама толтырылды.
Қызылорда облысының Полиция департаменті заңсыз сақталған қаруды немесе оқ-дәріні өз еркімен тапсырған адамдар қылмыстық және әкімшілік жауапкершіліктен босатылатынын еске салады.

Жаңақорған тұрғыны заңсыз қару сақтаған

<a href="https://kyzylorda-news.kz/">Kyzylorda-news.kz</a>. Биыл Рамазан айы 2 сәуірде басталып, 1 мамырда аяқталады. 2 мамыр – Ораза айт күні. 27 сәуірден 28 сәуірге қараған түн – Қадір түні.
<blockquote>
 «Санаулы күндерден соң қасиетті Рамазан айы басталады. Мұсылман үмбеті үшін Рамазан – ерекше ай. Мейірім мен кешірімге, сауапқа толы айды әдеттегідей өз деңгейінде өткізуді Алла нәсіп етсін! Осы айда мейлінше қайырымдылық іс-шараларды көбірек атқаруға шақырамын», – деді ҚМДБ төрағасы Наурызбай қажы.
</blockquote>

Биыл Ораза айт мерекесі қашан басталады

<a href="https://kyzylorda-news.kz/">Kyzylorda-news.kz</a>. Мемлекет басшысының «Жаңа Қазақстан: жаңару мен жаңғыру жолы» атты халыққа Жолдауында айтылған азаматтық қоғам институттарын жаңа форматта дамытудың механизмдерін талқылау үшін республика көлемінде бірінші болып Қазақстанның Азаматтық Альянсының семинары Қызылордада ұйымдастырылды.
Шараның негізгі мақсаты – жаңа бағыттарды айқындау, үкіметтік емес ұйымдармен жұмыс жасау бойынша басқа өңірлермен тәжірибе алмасу.
Семинар жұмысына Қазақстанның Азаматтық Альянсының Президенті Бану Нұрғазиева, Нұр-Сұлтан қаласының, Қостанай, Ақтөбе, Маңғыстау, Түркістан және басқа да облыстардың Азаматтық Альянс көшбасшылары, өңірдегі белсенді үкіметтік емес ұйымдар мен БАҚ өкілдері қатысты.
Шараға қатысқан облыс әкімінің орынбасары Қайрат Нұртай өз сөзінде еліміздегі азаматтық қоғам негіздерін дамытуда Қазақстанның Азаматтық Альянсының үлесі зор екенін жеткізді.
Шара барысында республиканың әр өңірінен келген спикерлер азаматтық секторды дамытудың жаңа әдіс-тәсілдерін ұсынып, өз ойларын ортаға салды.
Сонымен қатар, үкіметтік емес ұйымдар саласындағы өзекті тақырыптар: Азаматтық орталық жұмысын ұйымдастыру стратегиясы, үкіметтік емес ұйымдардың әлеуетін арттырудағы азаматтық орталықтардың рөлі, ауылдық үкіметтік емес ұйымдарға қолдау көрсетуді ұйымдастыру, мемлекеттік органдармен байланысты нығайту, мемлекеттік әлеуметтік тапсырысты қалыптастыру, оның мониторингін және бағалау тетігін жетілдіру мәселелері қаралады.

Азаматтық қоғам институттарын жаңа форматта дамытудың механизмі қандай?

<a href="https://kyzylorda-news.kz/">Kyzylorda-news.kz</a>. Соңғы күндері әлеуметтік желілер мен интернет порталдарда Шиелі аудандық білім бөлімі бір литр сүт үшін қомақты қаржы жұмсады деген ақпарат тараған болатын. Осыған байланысты бүгін Өңірлік коммуникациялар қызметінің алаңында облыстық білім басқармасының басшысы Ақзира Қасымова мемлекеттік сатып алуға байланысты БАҚ өкілдеріне түсінік берді.
Басқарма басшысының айтуынша, әлеуметтік желіде жарияланған ақпаратта техникалық ақаулық орын алған. Онда Шиелі аудандық білім бөлімі бір литріне емес, бір жылдық қаражаттың көлемін көрсеткен.
<blockquote>
 «Бұл мәселелерге қатысты тиісті зерделеу жұмыстары жүргізілді. Нәтижесінде, Шиелі аудандық білім бөлімі 1 литріне емес, 1 лот яғни жылдық соммасын 14 млн 577 мың теңгені көрсеткен. Ал Қармақшы аудандық білім бөлімінің №275 орта мектебі мемлекеттік сатып алу порталында жылдық жоспарды орналастыру барысында техникалық қателік жіберілгені анықталды. Яғни бір күртенің негізгі бағасы – 16 701,43 теңгеден болуы қажет. Алайда техникалық қателіктің кесірінен 1 млн 670 мың 14 теңге көрсетілгені анықталды. Аталған деректер бойынша тиісті шаралар қабылданып, бөлінген қаржыға сәйкестендірілді. Ал жауапты сала мамандарына тәртіптік шаралар қолданылды», – деді Ақзира Бақтыбайқызы.
</blockquote>

Ақзира Қасымова сүт пен күрте бағасына қатысты түсініктеме берді

<a href="https://kyzylorda-news.kz/">Kyzylorda-news.kz</a>. Қапшағай қалалық мәслихаты тұрақты комиссиясының отырысы өтті. Онда қалалық ішкі саясат бөлімінің басшысы Бибігүл Шайкенованың Қапшағай қаласына Дінмұхамед Қонаев есімін беру мәселесі жөніндегі баяндамасы тыңдалды, деп хабарлайды <a href="https://www.inform.kz/kz/kapshagay-kalasyna-dinmuhamed-konaev-esimen-beru-usynysy-birauyzdan-makuldandy_a3915027">ҚазАқпарат</a>.
Шайкенова қала әкімінің атына «Қамқор жүрек» және «Қапшағай, самға» мүгедектердің қоғамдық бірлестіктері, көпбалалы аналарды «Ана сәулесі» қоғамдық бірлестігі, Қапшағай қалалық «Семей полигоны» қоғамдық бірлестігі, Қапшағай қалалық «Қапшағай қалалық полигоны» қоғамдық бірлестіктері сияқты түрлі үкіметтік емес ұйымдар мен AMANAT, «Ақ жол» партияларынан Қапшағай қаласын Дінмұхамед Қонаев деп атау туралы бастама қолдаухат келіп түскенін мәлімдеді.
Дауыс беру қорытындысы бойынша Қапшағай қаласын «Дінмұхамед Қонаев«деп қайта атау туралы бірауыздан шешім қабылданды.
Айта кетейік, жария тыңдаудың хаттамасы жергілікті атқарушы және өкілді органдардың интернет-ресурстарында және «Нұрлы өлке» газетінде жарияланды.

Қапшағай қаласына Дінмұхамед Қонаев есімен беру ұсынысы мақұлданды

<a href="https://kyzylorda-news.kz/">Kyzylorda-news.kz</a>. Қызылорда облыстық Ассамблея жастарының бірінші отырысы өтті. Жастар ұйымының белсенділерімен облыстық ішкі саясат басқармасының «Қоғамдық келісім» КММ директоры Болатбек Айтбенбетов кездесті.
<blockquote>
 «Өңірдің дамуына жастардың қосар үлестері қомақты. Жастар қоғамның қозғаушы күші. Сондықтан олардың қызығушылықтарына құлақ түріп, дамытуға жол ашу аса маңызды. Осы арнада сіз бен біз болып жұмысты ілгерлетуіміз керек»,- деді Болатбек Айтбенбетов.
</blockquote>
Еркін форматта кездесуде ұйымның жаңа жетекшісі таныстырылды. Енді ұйымның жұмысын тіл жанашыры, «Абай қазынасына саяхат» клубының жетекшісі Елена Пак жүргізеді. Ол кездесу аясында өңірдегі ассамблея жастар ұйымын кешенді дамыту бағытындағы жоспарларымен бөлісті.
<blockquote>
 _«Бүгінгі таңда Ассамблея жастары ұйымын кешенді дамыту үшін алты магистральдық жоба анықталды. «Social Assambly» негізгі бағыты – жастарды әлеуметтік қолдау, білім деңгейін арттыру және жұмысқа орналастыруға көмек көрсету. Жоба «жастар жастарды үйретеді» форматында жоспарланған: өңірлерде, әсіресе моноқалалар мен ауылдық жерлерде көшбасшылардың жастармен self-made кездесулері өткізіледі. Жастармен жұмыстың келесі бағыты мемлекеттік тілді үйрену. Осы ретте «Бірлік тілі» түрлі этностардың жастары қазақ тілін үйренетін Speaking-club нетворкинг-алаңы ашылады. Жастар «Ел мұрасы» тарихи-мәдени мұрасын сақтау және экология мен қоршаған ортаны қорғау жобаларын жүзеге асырады»,- _Болатбек Айтбенбетов.
</blockquote>
Кездесуде сұрақтар қойылып, соңы пікір алмасумен аяқталды.

Қазақстан және Қызылорда облысының жаңалықтары