<a href="https://kyzylorda-news.kz/">Kyzylorda-news.kz.</a> Халықаралық жастар күні қарсаңында Қазалы ауданында жалынды жастарға Ғани Мұратбаевтың 120 жылдығы аясында өткізілетін дәстүрлі IV республикалық Ғани Мұратбаев атындағы сыйлығы табысталды.
Шара күндіз Қазақстан Республикасы Жазушылар одағының мүшесі, республикалық Ғани Мұратбаев атындағы жастар сыйлығының лауреаты, қазақ поэзиясының жас толқыны, ақын Ақжол Түменбайдың «Ең сұлу гүлі Тәңірдің…» атты шығармашылық кешімен басталды.
Қасиетті Қазалы топырағында дүниеге келіп, талайды талантымен тамсандырған ақиық ақындардың ізбасары, өнер өлкесіне кеңінен қанат жайған қаламгер Ақжол Түменбайға аудан басшысы Мұхтар Оразбаев ақжарма тілегін арнады.
<blockquote>
 «Бүгін Халықаралық жастар күні аясында шығыстың жарық жұлдызы Ғанидай ұлды өмірге әкелген қасиетті Қазалы ауданында ауқымды шаралар ұйымдастырылып жатыр. Соның бірі талантты ақын Ақжол Түменбайдың жеке шығармашылық кеші. Ақжол жас болса да поэзия әлемінде өзіндік қолтаңбасымен ойып тұрып орын алатын ерекше дарын иесі. Оның сөзіне жазылған әндерді барлық жас сүйіп тыңдайды десем артық айтқандық емес. Өзінің қатарының алды, қазақ әдебиеті мен өнерінде өз қолтаңбасы қалыптасып келе жатқан Ақжолмен біз мақтанамыз. Оның әлі талай белестерді бағындырып, шыңдарға жетеріне сенеміз», – деген аудан әкімі ақынға «Алғыс» хат пен сертификат табыстады.
</blockquote>
Бұдан соң жер-жерден Қазалыға жиналған жастар Әйтеке би кенті, Қазалы қаласы, Ғани Мұратбаев және Жанкент ауылдарында болып, ауданның тарихи орындары мен көрікті жерлерін тамашалады.
Кешкілік кент орталығындағы алаңда республикалық Ғани Мұратбаев атындағы сыйлықты беру салтанаты болды. Бұл сыйлық Қазақстандық патриотизмді арттыруға елеулі үлес қосқан жас дарынды белсенділерді қолдау, Орта Азия мен Шығыс жастарының жалынды жетекшісі, белгілі қоғам қайраткері Ғани Мұратбаевтың ісі мен өнегесін өскелең ұрпаққа дәріптеу, кеңінен насихаттау үшін өткізіліп келеді. Сонымен қатар сыйлық талантты жастарды ынталандыру және олардың айрықша сіңірген еңбегін тану мақсатында беріледі.
Ғани Мұратбаев атындағы жастар сыйлығы өз саласында жетістікке жеткен 17 жасқа табысталды. Олардың қатарында қазалылықтар да бар. Атап айтқанда Қазақстандық патриотизмді қалыптастыру ісіндегі қоғамдық-саяси белсенділігі мен жетістігі үшін Талап Мурзалиев, Қуаныш Сырлыбай, мәдениет пен өнер саласы бойынша Сәкен Кермеш, Бақытбек Макеев, Серікбол Шайхов, әдебиет және журналистика саласынан «Қазалы» газеті редакторының орынбасары Ринат Әбдіқалық және спорт саласының дамуына үлес қосып жүрген Жандосбек Нәбиев, Самалбек Нысанбаев аталған сыйлыққа лайық деп танылды. «Дарын» мемлекеттік жастар сыйлығының иегері, «Астана» опера театрының солисі Алтынбек Әбілда марапат мінберіне көтерілгендерді құттықтап, лебізін арнады. 
Мереке гала-концертке ұласып, эстрада жұлдыздары Өмірқұл Айниязов, Нұртуған Жаңабай және ақын Ақжол Түменбай өнер көрсетті.
Орталық алаңда өткен шарадан кейін Ғани Мұратбаев атындағы республикалық жастар сыйлығына ие болғандар еркін форматта бас қосып, өзара пікір алмасты.
Аудандық оқушылар үйінің ауласында өткен шараға аудан әкімі Мұхтар Оразбаев, облыстық қоғамдық даму басқармасы басшысының орынбасары Руслан Қаюпов, аудан әкімінің орынбасары Дәурен Тілеумбетов, аудандық ішкі саясат бөлімінің басшысы Қайрат Әбубәкірұлы, облыстық жастар ресурстық орталығының директоры Мақсат Дауылбай қатысты.
Айта кетейік, биыл төртінші рет ұйымдастырылған байқауға 40-тан астам үміткер қатысып, соның ішінде 17 жүйрік лайықты деп танылды.

Ғани Мұратбаев атындағы жастар сыйлығы табысталды

<a href="https://kyzylorda-news.kz/">Kyzylorda-news.kz.</a> Елімізде жыл сайын әлеуметтік бағытта өтетін «Мектепке жол» акциясы басталды.
«Адамға қажетті нәрсе – жұрт қамы, жұрт ісі» деп Ахмет Байтұрсынұлы айтқандай, осы қайырымдылық акциясына ЗК-169/1 тергеу изоляторы қызметкерлері де өз үлесін қосты.
Мекеме бастығы,әділет майоры Қ.Илясов пен мекеменің кәсіби қызметтік және денешынықтыру даярлығы жөніндегі инспекторы, әділет капитаны, М.Тұрымбетовтың және аға сержант А.Тоқжолованың бастамасымен жеке құрам мен ерікті жалдамалы қызметкерлерді жұмылдырып, акцияға бір кісідей ат салысты.
Акция барысында жиналған қаражатқа екі мүмкіндігі шектеулі және бір көпбалалы отбасындағы қызға мектеп сөмкелері мен оқу құрал-жабдықтарын алып беріп, қаржылай көмек көрсетті.
<blockquote>
 «Менің қызым мүмкіндігі шектеулі бала болғандықтан, үйде оқытылады.Үйде оқытылса да,мектепке баратын басқа балаларымнан кем көрмейміз. Әкесі екеуміз көңілі көтерілсін деп, тәуірлеу оқу-құралдарын алып беріп отырамыз. Бойжетіп келе жатқан қыз бала болған соң, әдемі заттар пайдаланғанды жақсы көреді. Бүгін де міне, погондағы қызметкерлер сәнді сөмке мен біраз оқу- құралдарын әкеліп берді. Қызыма бұл тосын сый болды. Демеушілік танытқан мекеме қызметкерлеріне сыйлықтары үшін рахмет айтамын», – деді 9 сынып оқушысы Гүлназдың анасы.
 «Ал келесі көпбалалы жалғызбасты ананың қызы Жібек есімді бүлдіршін апарған сыйлықтарды көріп қуанып қалды. Мен де бес ұл, бір қыз бар. Оның біреуі әлі мектепке бармайды. Әкелері дүниеден өткелі бес оқушыны жаңа оқу жылына киіндіріп,оқу құралдарымен қамтамасыз ету бір өзіме ауырлық тудыруда. Қызыма әкелген сыйлықтарыңыз бен қаржылай көрсеткен көмектеріңіз үшін алғысым зор» – деді жалғыз басты ана.
</blockquote>
«Балалардың қуанышы – қуаныштың төресі» демекші, балаларға қуаныш сыйлаған тергеу изоляторының қызметкерлері бұндай игі амалдары бұдан әрі де жалғастыра бермек.
<img src="https://kyzylorda-news.kz/wp-content/uploads/2022/08/img_20220813_201716-1.jpg" alt="" />
<img src="https://kyzylorda-news.kz/wp-content/uploads/2022/08/img-20220813-wa0059.jpg" alt="" />

«Мектепке жол»: Тергеу изоляторының қызметкерлері балаларға сый жасады

<a href="https://kyzylorda-news.kz/">Kyzylorda-news.kz.</a>&nbsp;Жол қозғалысы қауіпсіздігін қамтамасыз ету, жол-көлік оқиғаларын болдырмау, жол қозғалысы ережелерін өрескел бұзу деректерінің алдын алу мақсатында Қызылорда облысы көлемінде «Қауіпсіз жол» жедел-профилактикалық іс-шарасы өтуде.
Шарасы аясында жол-көлік оқиғаларының артуына септігін тигізетін жол қозғалысы ережелерін өрескел бұзу жағдайларын анықтау, профилактикалық бағыттағы жұмыстарды барынша жандандыруға бағытталған бірқатар рейдтік шаралары өткізілуде.
Белгілі болғандай, шара барысында барлығы 3347 жол қозғалысы ережесін бұзушылықтар анықталды. Оның ішінде: ҚР ӘҚБтК-нің 590 бабының 4 бөлігі бойынша (жалған немесе кернеу м/б тағып к/қ басқарудың)-4, ҚР ӘҚБтК-нің 590 бабының 7 бөлігі (тиісті рұқсатсыз қайта жабдықталған көлік құралын басқарудың) – 141, ҚР ӘҚБтК-нің 596.3-бабы бойынша (қозғалыстың қарсы жолағына шығудың) – 23, ҚР ӘҚБтК-нің 599-бабы бойынша (бағдаршамның тыйым салатын сигналына немесе реттеушінің тыйым салатын қимылына қарамай өтудің) – 33, ҚР ӘҚБтК-нің 600-бабы бойынша (Жаяу жүргiншiлердің немесе жол жүрiсiнiң өзге де қатысушыларының жүруiне басымдық бермеу) –162, ҚР ӘҚБтК-нің 606 – бабы бойынша (авариялық жағдай туындату) – 50, ҚР ӘҚБтК-нің 608- бабы бойынша (көлік құралын мас күйде басқару) – 36, ҚР ӘҚБтК-нің 615-бабы бойынша (жаяу жүргіншілердің жол қозғалысы ережесін бұзуы) – 180 деректері анықталды.
Сонымен қатар, 492 автокөлік айып тұрағына қойылса, 588 автокөліктің мемлекеттік белгісі шешілді. 
«Қауіпсіз жол» жедел-профилактикалық іс-шарасы тамыз айының 18-не дейін жалғасады.
<img src="https://kyzylorda-news.kz/wp-content/uploads/2022/08/mas.jpeg" alt="" />

Қызылордада «Қауіпсіз жол» шарасында 36 мас жүргізуші ұсталды

<a href="https://kyzylorda-news.kz/">Kyzylorda-news.kz.</a>&nbsp;Мұнай өндіретін кәсіпорындар қалдықтарды терең өңдеу үшін инновациялық технология енгізіп жатыр, деп хабарлайды «<a href="https://24.kz/kz/zha-aly-tar/o-am/item/559588-yzylorda-oblysynda-m-naj-aldy-y-da-k-dege-asatyn-boldy">Хабар 24</a>».
Отандық ғалымдар ойлап тапқан залалсыздандыру жобасы қоршаған ортаға зиянды заттардан пайдалы тауар шығаруға мүмкіндік береді. Табиғатты ластанудан қорғайтын құрылғы кеніштердің бірінде сынақтан өткізілді.
Мына алып қазандықтар тонналаған мұнай қалдығына лық толы. Оны жағып жіберейін десе, оттегіге бөлінетін канцерогенді элементі тым көп. Ал жер астына көмейін десе, топырақ пен су, өсімдіктерге зияны орасан. Осындай улы заттарды кәдеге жаратудың тың тәсілін ойлап табуға ұзақ уақыт жұмсаған жергілікті ғалымдар ақыры оң нәтиже шығарды.
<blockquote>
 «Біз жылдар бойы жиналған қалдықты 98% жарамды етеміз. Түрлі қоспа арқылы терең өңдеудің нәтижесінде біршама бөлігін І дәрежелі тауарлы мұнайға айналдырамыз. Қалған суды да сүзгіден өткізіп, жол құрылысына пайдаланылатын стандартқа сай сұйықтық шығарамыз», – деді жоба авторы Аслан Орынғалиев.
</blockquote>
Модульді кешен көмірсутек шикізатының кез-келген күйдегі қалдығын өңдей алады. Сан түрлі сүзу, тазалау және қоспа қосу процесі толық автоматтандырлыған.
<blockquote>
 «Қысымның барлық көрсеткіштерін осы басқару тетігі арқылы қадағаланады. Қосу, өшіру, бір-біріне тізбекті жалғау, манометр мен термометр көрсеткіштерін талдау да осы жерде жүзеге асырылады. Сондай-ақ өңделген шикізаттың шығу жиілігі де бақыланады», – дейді технолог Мұхтар Оспанов.
</blockquote>
Табиғатқа жанашыр «Жасыл» жобаны іске асыруға ғалымдар шоғырымен қатар өндіріс мамандары мен қаржыгерлер де атсалысты. Жұмыс тобы жоспарды сәтті аяқтады.
<blockquote>
 «Бізде бірнеше жылдан бері жиналған қалдықтар бар. Біздің қондырғылар оған әлі келмей тұр еді. Сол қалдықтарды алып, тауарлы майын бір жаққа, ілеспе суын бір жаққа айырып беріп жатыр. Соның арқасында біздің компанияға қосымша мұнай өнімі қосылып, пайда келтіріп жатыр. Экологиялық тұрғыда да қазандықтарда іссіз тұрған затты пайдаланып, одан тауарлы зат шығарып жатырмыз», – дейді мұнай кеніші директорының орынбасары Серік Жұмахметов.
 «Аталған жобаның сәтті жүзеге асуы біздің ғалымдардың жаңа деңгейге шыққанын көрсетеді. Университет академиялық және ғылыми тұрғыда өсіп, инфрақұрылымды дамытуға басымдық бермек. Сонда ғылыми зерттеулер орталығына айналамыз», – дейді Қорқыт ата атындағы университеттің басқарма төрағасы Бейбіткүл Кәрімова,
</blockquote>
Қанатқақты жоба өндірістік тұрғыда тиімділігін дәлелдеді. Осы ретте модульді кешенді орнатуға бірнеше мұнай компаниялары ынта білдіріп отыр екен.

Қызылорда облысында мұнай қалдығы да кәдеге асатын болды

<a href="https://kyzylorda-news.kz/">Kyzylorda-news.kz.</a>&nbsp;Қазақстан Республикасының Сыбайлас жемқорлыққа қарсы іс-қимыл агенттігінің Қызылорда облысы бойынша департамент басшысының бірінші орынбасары Бақытжан Ниязовтың қатысуымен және Қызылорда қаласы әкімінің орынбасары Руслан Нұрмағанбетовтың төрағалығымен арнайы жиын өтті.
Жиналыстың күн тәртібінде Сыбайлас жемқорлыққа қарсы іс-қимыл заңнамасын сақтау және аймақтарда туындаған сыбайлас жемқорлық тәуекелдерге қатысты мәселелері талқыланды. 
Жиын барысында Қызылорда облысы бойынша департамент басшысының бірінші орынбасары Бақытжан Мақсұтұлы барлық салалардағы сыбайлас жемқорлыққа қарсы бағытталғын бірқатар атқарылатын шаралардың маңыздылығын атап өтті.
Сонымен қатар, сыбайлас жемқорлық тәуекелдерінің алдын алуға бағытталған ішкі талдау жұмыстарын ұдайы жүргізу мен тұтынушыларға көрсетілетін қызметтердің түрлерін цифрландыру қажеттілігін ұсынып, тұрғын үй және жол құрылысы, ауыл шаруашылық салаларына тұрақты бақылау жүргізу керектігін жеткізді.
Өз кезегінде қала әкімінің орынбасары Руслан Аймұрзаұлы алдағы уақытта сыбайлас жемқорлықтың көріністерін алдын алу және тәуекелдерін жою мақсатында бірлескен нәтижелі жұмыстар атқарылатындығын айтты.
<img src="https://kyzylorda-news.kz/wp-content/uploads/2022/08/gorod2.jpg" alt="" />

Қызылордада сыбайлас жемқорлыққа қарсы іс-қимыл мәселелері қаралды

<a href="https://kyzylorda-news.kz/">Kyzylorda-news.kz.</a>&nbsp;Қоғамда жемқорлыққа төзімсіздік ортасын қалыптастыру мақсатында «Әділдікті талап ет!» науқаны басталды.
Шараны ҚР Сыбайлас жемқорлыққа қарсы агенттігі мен «Әділдік жолы» республикалық қоғамдық бірлестігі ұйымдастыруда. Республикалық ауқымды шараға Қазақстан Республикасының кез келген азаматы қатыса алады. Бұл туралы Өңірлік коммуникациялар қызметінде өткен брифингте «Әділдік жолы» РҚБ Қызылорда облысы филиалының басшысы Ляззат Бақтыбаева мәлімдеді.
<blockquote>
 «Бірінші кезеңде автожол саласындағы мәселелерге тоқталып, жолдарды салу, жөндеу және күтіп ұстау барысындағы жемқорлық тәуекелдерін анықтауға назар аударылады. Азаматтар науқанға Adildik.kz веб-сайты арқылы қосылып, 1463 Call center бойынша Қазақстан автожолдарын салу, жөндеу және күтіп ұстау саласындағы жемқорлық туралы ақпаратты 15 тамыздан бастап хабарлай алады. Түскен барлық ақпарат қалың жұртшылықты жұмылдыра отырып, жергілікті және республикалық «Әділдік кеңесі» атты кеңестерінде талқыланады. Сонымен қатар, салалық нормативті-құқықтық актілерді жетілдіру мақсатында және уәкілетті органдарға сындарлы ұсыныстар беріледі», – деді Ляззат Шайзадақызы.
</blockquote>
Айта кетейік, науқан қорытындысы жыл аяғында өтетін жемқорлыққа қарсы форумда жарияланып, белсенді қатысқан азаматтар «Әділдік жауынгері» мәртебесіне ие болады.
<img src="https://kyzylorda-news.kz/wp-content/uploads/2022/08/baktybaeva.jpg" alt="" />

Қызылордада «Әділдікті талап ет!» науқаны басталды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында браконьерлікті, биологиялық ресурстар объектілерінің заңсыз айналымын анықтау және жолын кесу мақсатында «Киік» жедел профилактикалық іс-шарасы өткізіліп жатыр.
Іс-шара барысында Қызылорда ҚПБ-ң Ақсай полиция бөлімінің қызметкерлері 11 тамыз күні сағат 05:30 шамасында Сырдария өзенінің сол жағалауында Арал – Қызылорда бағытында қатынайтын «Сетра» жолаушылар автобусын тоқтатты.
Тексеру барысында жолаушыдан қапшыққа салынған заңсыз ауланған 154 келі балық алынды. Ол ешбір құжатсыз ауланған заңсыз балықты сату мақсатында Қызылорда қаласына жеткізбекші болған. Тиісті сараптамалар тағайындалды. Жолаушы полиция бөліміне жеткізіліп, одан ІІО келу туралы міндеттеме алынды.
Аталған дерек бойынша Қазақстан Республикасы Қылмыстық кодексінің 335-бабының 1-бөлігі (заңсыз балық аулау) сотқа дейінгі тергеп-тексеру әрекеттері жүргізілуде. Оқиғаның мән-жайы анықталуда.
<img src="https://kyzylorda-news.kz/wp-content/uploads/2022/08/image-15-08-22-02-32-1.jpeg" alt="" />

Қызылордада жолаушыдан 154 келі балық алынды

<a href="https://kyzylorda-news.kz/">Kyzylorda-news.kz.</a> «Құрмет белгісі» орденінің, «Ерен ерлігі үшін», «Еңбектегі ерлігі үшін» медалінің иегері, «Сырдария ауданының Құрметті азаматы» Хайрулла Әбеновтің есімі аудан халқына етене таныс. Өзі өмірден өтсе де қайраткер-тұлғаның артында өнегелі ісі мен өшпес ізі қалды. Тағдыр жолы тағылымға толы ардақты ардагердің атқарған қызметі мен өмір жолы туралы «Ел ағасы – Хайрулла» атты кітап жарыққа шығып, кеше аудандық мәдениет үйінде салтанатты түрде тұсаукесер рәсімі ұйымдастырылды.
Жаңа кітаптың тұсаукесер рәсіміне аудан әкімі Мұрат Ергешбаев, облыстық ардагерлер кеңесінің төрағасы Серік Дүйсенбаев, облыс аудандарынан келген зиялы қауым өкілдері, облыстық, аудандық мәслихат депутаттары мен ардагерлер қатысты.
Кітаптың тұсаукесерінде аудан әкімі сөз сөйлеп, өмір жолы кітапқа арқау болған Хайрулла Әбеновтің ғұмыры ғибратқа толы екенін атап өтті.
<blockquote>
 «Ықылым заманнан келе жатқан Ұлы дала қағидатында «Еліңде кімің бар?» дегенде, халқымыз салиқалы жұртының санасына сәулесін төккен тұлғаларын, кемеңгерлерін алға шығарғаны белгілі. Өйткені, елдің мерей-мәртебесін көрнекті тұлғалар, қабырғалы азаматтар қалыптастырған. Сондықтан жау бетке білектісін, дау бетке біліктісін, жарастыққа жақсысын жұмсаған қазақ халқы ешқашан да ардақты тұлғаларға кенде болмаған. Ғұмыр жолы кітапқа арқау болған Хайрулла Әбенов ағамыз сондай ардақты, сыйлы, құрметті, қадірлі азамат еді. Хайрекең Сырдария ауданы халқының бірлігі бекем, тірлігі көркем, қай істе де ынтымағы жарасқан халық екенін айтып жүретін. Аудан әлеуетінің жақсы екенін де алға тартып, өркенді өңірді өрістетуге жұмыс жасайтыныма зор сенім білдіретін. Мен ардақты азаматты болмысы бөлек қайраткер тұлға деп білемін. Ол кісінің ауданның дамуына сіңірген еңбегі орасан. Сондықтан артында игілікті іс қалдырып, көптің құрметіне бөлене білген ардақты азаматтың есімі аудан тарихында мәңгі қалатынына сенімім кәміл. Бүгін тұсауы кесілетін кітап Сыр өңірінің дамуына сүбелі үлес қосқан абзал ағаға деген ерекше құрметтің белгісі. Осы ретте кітаптың құрастырушы авторы, аудандық мәслихаттың депутаты Ақтөре Ибрагимұлына ризашылығымды білдіріп, шығармашылық сәттіліктер тілеймін», – деді аудан әкімі Мұрат Ергешбаев.
</blockquote>
Тағылымды іс-шарада облыстық ардагерлер кеңесінің төрағасы Серік Дүйсенбаев парасат-пайымы биік, тазалықты ту еткен замандасы туралы естеліктерімен бөлісті.
«Мен Хайрекеңді біраз жылдардан бері сырттай білетінмін. Бертін келе облыстық ардагерлер кеңесі төрағасы қызметіне келіп, Сырдария аудандық ардагерлер кеңесі қызметіндегі Хайрекеңмен бір жағадан бас, бір жеңнен қол шығара жүріп, сыйлас та, сырлас та болдық. Өмір деген осы. Алатауды алпыс, Қаратауды қырық айналып іздесек те өмірден озған жандардың жарқын дидарлары тұнық судың түбінен шарайнадай бұлдырап елес қана береді. Десе де, Хайрекең көзден кетсе де көңілден кетпейтін текті тұлға десем, асыра айтқандығым болмас. Ардақты азаматтың өмірдерегіне жүгіртер болсақ, оның елі үшін емірене жүріп еңбек еткеніне тәнті боламыз. Ол елі үшін еткен еңбектерін, төккен маңдай терлерін пұлдамаған, күннен жұмыс, түннен тыныс сұраған, барға қанағат, жоққа салауат айтатын азамат еді», – деді Серік Әбішұлы.
Алғы сөздерден кейін аудан басшысы мен ел ағалары бастаған топ кітаптың құрастырушы авторы, Қазақстан Жазушылар және Журналистер одағының мүшесі Ақтөре Ибрагимұлымен бірге жаңа кітаптың тұсауын кесті.
«Ел ағасы – Хайрулла» атты кітапты жұртшылық зор ықыласпен қабыл алып, шығармашылық топ мүшелерінің жұмысын жоғары бағалады. Өз кезегінде мемлекет және қоғам қайраткері Алмагүл Божанова бастаған Сырдария ауданының бұрынғы әкімдері Әріп Қожбанов, Ибрагим Абибуллаев, Сұлтанбек Тәуіпбаев, Ғанибек Қазантаев, Жалағаш аудандық ардагерлер кеңесінің төрағасы Садық Әлиев, Сырдария аудандық ардагерлер кеңесінің төрағасы Мұса Келдібаев және Х.Әбеновтің інісі Марат Тұрғанбаев сөз сөйлеп, рухы биік рухани бай азаматтың ауданның ғана емес облыстың дамуында алатын орны ерекше екенін атап өтті. Сондай-ақ қызмет барысындағы жауапкершілігі мен ұқыптылығы, мінезінің сабырлылығы мен жайсаңдығы, өзінен кейінгілерге үлгі бола білгендігі жөнінде естеліктерімен бөлісті.
Өз кезегінде кітаптың авторы Ақтөре Ибрагимұлы елге қадірлі болған Хайрулла аға Әбенов туралы кітап жазу інілік парыз болғанын тілге тиек етті.
<blockquote>
 «Халқымызда «Орны ойсырап қалды» деген сөз бар. Осынау мәнді, мағыналы, салмақты, саналы сөздің қадірін біз текті де таза, қарапайым да қадірлі ардақты ардагер Хайрулла Әбенов ағамыз өмірден өткенде түсіндік. Расында да абыз ақсақал дүниеден озғаннан кейін ол кісінің орны қатты ойсырап қалды. Сірә, ойсыраған орынды толтыру ешкімнің қолынан келмес. Өйткені, ел ағасы атанған ақсақалдың орны бөлек еді.Кітап – өткеннің бүгінге, бүгіннің болашаққа аманат сөзін арқа-лайтын құнды да қастерлі дүние. Сондықтан көрнекті мемлекет және қоғам қайраткері, Қазақстанның Еңбек Ері Әбіш Кекілбаев «Кітап – адамды, кітапхана – адамзатты тәрбиелейді» деп бекер айтпаған. Осы орайда әуелі қолдарыңызға тиіп отырған ғұмырбаяндық кітапты жазуға не түрткі болғанын айтып өтейін. Қалам ұстап, журналистика саласында еңбек етіп жүргеннен кейін тарих пен қоғам алдындағы жауапкершілікті сезінеміз. Оның үстіне өзімнің әрбір жетістігімді аға буынның қолдауымен, жанашырлығымен, ықыласымен байланыстырамын. Ғибратты ғұмыры кітапқа арқау болған Хайрулла Әбенов менің шығармашылықпен айналысуыма көп қолдау көрсеткен азаматтардың бірі де бірегейі еді. Ардагер ағаның шынайы ниеті мен тілектестігінің әсері болар, 2021 жылдың 12 қарашасында Қазақстан Жазушылар Одағының мүшесі атанған күні Х.Әбенов түсіме енді. Әдеттегідей, кең құшағын айқара ашып, құшақтап, күлімдеген қалпымен қолымды қысып, ақ батасын берді. Таңата көрген түсімді жақсылыққа жорып, өткен күндерді ой елегінен өткізіп, тағдыры тағылымға толы тұлғаның өнегелі өмір жолы туралы кітап жазу туралы ойладым. Бұл ойымды көңіл таразысына салып, жинақтап, саралап әріптестеріме, аудан ақсақалдарына, Х.Әбеновтің ұрпақтарына айтып едім, бастаманы барлығы бірден қолдап, орынды әрі құптарлық іс екенін айтып, өз үлестерін қосатынын жеткізді. Сөйтіп көпшілік құптаған жұмыс басталып, естеліктер жинақталып, міне қолдарыңызға кітап ретінде ұсынылып отыр. Бұл кітапты жарыққа шығару – біздің ардагер ағаның рухының алдындағы азаматтық, інілік парызымыз деп білемін.Кітаптың «Ел ағасы – Хайрулла» деп аталуында да үлкен мән бар. Негізі Хайрулла Әбенов қай қырынан алсақ та «Ел ағасы» деген атқа барынша лайықты тұлға болды. Осы кітаптың шығуына атсалысқан баршаңызға алғысымды білдіремін», – деді Ақтөре Ибрагимұлы.
</blockquote>
Кітаптың тұсаукесер рәсіміне жиналған жұртшылық Х.Әбенов өмірден өткеннен кейін, өмір жолы өнеге боларлық екінші өмірі сәтті бастау алды деп айтты. Енді аудан тарихында есімі алтын әріптермен жазылатын ардақты азамат Хайрулла Әбеновтің өнегелі істері ұлықтала бермек.
<img src="https://kyzylorda-news.kz/wp-content/uploads/2022/08/syrdarija-1.jpg" alt="" />
<img src="https://kyzylorda-news.kz/wp-content/uploads/2022/08/299115283_1180722129157344_255135164023649354_n.jpg" alt="" />

Сырдария ауданында жаңа кітап жарыққа шықты

<a href="https://kyzylorda-news.kz/">Kyzylorda-news.kz.</a> Сырдария ауданы Нағи Ілиясов ауылында «Абзал және К» толық серіктестігінің жүлдесіне арналған дзюдодан жасөспірімдер арасындағы республикалық турнирдің ашылу салтанаты өтті.
Үш күнге жоспарланған турнирге Абай, Жамбыл, Ақтөбе, Түркістан, облыстары және Қызылорда қаласы, Жанақорған, Шиелі, Қазалы, Қармақшы, Жалағаш, Сырдария ауданынан 300-ге жуық балуан қатысуда.
Салтанатты шараға облыс әкімінің орынбасары Нұрымбет Сақтағанов пен Сырдария ауданының әкімі Мұрат Ергешбаев қатысты. Облыс әкімінің орынбасары Нұрымбет Аманұлы жас спортшыларға сәттілік тілеп, мұндай шаралардың келер ұрпақ үшін маңыздылығын айтып өтті.
<blockquote>
 «Спорттық сайыстардың жүйелі ұйымдастырылуының нәтижесінде спортшыларымыз Қазақстан чемпионаттарында, азия, және әлем біріншіліктерінде ел намысын асқақтатуда. Бүгінгі жасөспірімдер арасындағы республикалық турнир еңбегімен елге сыйлы болған ел азаматтарын құрметтеп, насихаттауға мол мүмкіндік береді деп ойлаймын. Сырдария ауданының Нағи Ілиясов ауылы бүгінде әлеуеті зор, бірлігі мен татулығы жарасқан үздік мекенге айналды. Туған жерге туын тігіп, ауылға өркениет әкелген, табысын тайқазанда тасытқан ҚР Еңбек Ері Абзал Жұмашұлының ерен еңбегі екенін ел жақсы біледі. Бүгінгі спорттық шараның ұйымдастырылуына бастамашы болып, демеушілік көрсетіп жүрген «Абзал және К» толық серіктестігіне және барлық команда жетекшілеріне алғысымызды білдіремін», – деді Нұрымбет Сақтағанов.
</blockquote>
Сонымен бірге, шараға облыстық білім басқармасының басшысы Мейрамбек Шермағамбет, қазақша күрес бойынша ҚР спорт шебері, дзюдо бойынша Халықаралық дәрежелі төреші, ҚР құрметті спорт қайраткері Садық Мұстафаев және тағы басқа қонақтар қатысты.
Әрі қарай спорттық шара жас палуандарымыздың арасындағы тартысты жекпе-жекке ұласты.
Облыс әкімінің орынбасары Нұрымбет Сақтағанов пен аудан әкімі Мұрат Ергешбаев 36 және 40 келі салмақ дәрежесіндегі жас спортшылардың марапаттауына қатысты.
<img src="https://kyzylorda-news.kz/wp-content/uploads/2022/08/298990527_1181339045762319_4790090223815551428_n.jpg" alt="" />
<img src="https://kyzylorda-news.kz/wp-content/uploads/2022/08/298899622_1181339149095642_5034353707307555707_n.jpg" alt="" />
<img src="https://kyzylorda-news.kz/wp-content/uploads/2022/08/298556787_1181339042428986_5851130413201680826_n.jpg" alt="" />
<img src="https://kyzylorda-news.kz/wp-content/uploads/2022/08/298649507_1181339055762318_6710841408492881299_n.jpg" alt="" />
<img src="https://kyzylorda-news.kz/wp-content/uploads/2022/08/298407588_1181339185762305_1597806775567289070_n.jpg" alt="" />

Нағи Ілиясов ауылында дзюдодан жасөспірімдер арасындағы республикалық турнир өтті

<a href="https://kyzylorda-news.kz/">Kyzylorda-news.kz.</a>&nbsp;2022 жылдың 16-18 тамыз күндеріне арналған ауа райы болжамы жарияланды, деп хабарлайды&nbsp;Қазгидромет.
Болжамға сәйкес алдағы тәуліктер жауын-шашынсыз өтеді. Қазақстан аумағының басым бөлігі Солтүстік-Батыс антициклонның ықпалында болады. Соның әсерінен апта ортасына қарай ауа температурасы төмендейді.
Республиканың солтүстік-батысында, солтүстігінде, шығысында және орталығында түнгі және таңертеңгі сағаттарда топырақ бетінде 2°с-қа дейін үсік күтіледі. Еліміздің солтүстік, орталық және шығыс өңірлерінде жаңбыр жауып, найзағай болады, екпінді жел күтіледі.
Республика бойынша ауа температурасының төмендеуі күтілуде:
батыста түнде + 15+28°С, күндіз +30+40°С, 
солтүстік-батыста түнде +3+12°С, күндіз +15+25°С, 
солтүстікте түнде +2+7°С дейін, күндіз +12+17°с дейін, 
орталықта түнде +3+12°с дейін, күндіз +13+23°С дейін, 
шығыста түнде +2+11 °С дейін, күндіз +12+20°С дейін, 
елдің оңтүстігінде, оңтүстік-шығысында +10 + 18°С, таулы аудандарда + 3+8°С болжанады.

Алдағы күндерге арналған ауа райы болжамы жарияланды

<a href="https://kyzylorda-news.kz/">Kyzylorda-news.kz.</a>&nbsp;2021-2022 оқу жылының қорытындысы бойынша Қызылорда облысы көлемінде 7 506 оқушы мектеп бітіріп, олардың 6 570-і ҰБТ-ға қатысты.
Тестілеу нәтижесімен жоғары оқу орындарына 5 439 оқушы құжат тапсырып, 4 082 талапкер мемлекеттік білім беру грантына қол жеткізді. Бұл көрсеткіш өткен оқу жылымен салыстырғанда грант иегерлерінің саны – 233 түлекке көбейіп отыр.
Гранттардың бөлінісі бірнеше басым бағыттарға қарай тағайындалды. Атап айтқанда, 1 562 талапкерлер педагогика саласына гратқа түссе, медицина мамандығына 328, ауыл шаруашылығы және техникалық мамандықтарға 1500 оқушы грант иегері атанған.
Айта кетейік, 2021-2022 оқу жылының қорытындысы бойынша «Алтын белгі» белгісін алған түлектердің 160–ы, яғни 41,1 %-ы педагогикалық бағыттағы мамандықтарға оқуға қабылданған.
<img src="https://kyzylorda-news.kz/wp-content/uploads/2022/08/grant-1.jpg" alt="" />

Қызылорда облысында 4 082 талапкер грант иегері атанды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы әкімінің орынбасары Нұрымбет Сақтағанов, облыстық білім басқармасының басшысы Мейрамбек Шермағанбет жұмыс сапарымен Шиелі ауданында болып, Шиелі ауданының әкімі Нұржан Ахатовпен бірге жаңа оқу жылына білім беру нысандарының дайындық барысын пысықтады.
Нұрымбет Аманұлы алдымен Бәйтерек ауылдық округіндегі Бидайкөл ауылында орналасқан №148 орта мектеп ғимараты жылу қазандығын табиғи газға ауыстыру жұмыстарының барысын және кент орталығында орналасқан №46 А.С.Пушкин атындағы мектеп-лицейге қажетті қосымша 300 орындық қосымша ғимарат салу жұмыстарымен танысты.
Әрі қарай Шиелі индустриалды-аграрлы колледжінің алдағы оқу жылына дайындығын, оқушыларымыздың оқу шеберханаларында қолайлы тәжірибие алмасуымен сапалы білім алу жағдайын көрді.
Сондай-ақ, Жансейіт елді мекенінде орналасқан №133 негізгі мектеп ғимаратының жағдайын көріп, алдағы уақытта замануи талаптарға сәйкес 100 орындық жаңа мектептің құрылысын салу жөнінде тиісті ұсыныстарды жан-жақты зерделеп, қарау қажеттегін жеткізді.
Аралау барысында облыстық білім басқармасы мен аудан әкімдігіне төтенше жағдай салдарынан орын алып, табиғи дауылды желден толық зақым келген Досбол датқа ауылындағы №155 Д.Шыныбеков атындағы және Бәйгеқұм ауылындағы №251 М.Әуезов атындағы мектеп ғимараттарының шатырларын және ішінара шатырлары ұшып кеткен білім нысандарының төбе жабындыларын қалыпқа келтіру үшін тиісті комиссия қорытындысына сәйкес ұсыныс беріп, шұғыл арада қаражатты қарастырып, қалыпқа келтіру керектігін тапсырды.
Қазіргі таңда аудан бойынша 40 білім беретін ұйымдардың ағымдағы жөндеу жұмыстары аяқталып, балаларымыздың талапқа сәйкес жаңа оқу жылында білім алуына барлық жағдайлар қарастырылуда.
<img src="https://kyzylorda-news.kz/wp-content/uploads/2022/08/299376734_1373325293197926_3693217087243490926_n.jpg" alt="" />
<img src="https://kyzylorda-news.kz/wp-content/uploads/2022/08/299530063_1373325486531240_6128764273928363199_n.jpg" alt="" />
<img src="https://kyzylorda-news.kz/wp-content/uploads/2022/08/299600733_1373325263197929_7962459954337053497_n.jpg" alt="" />
<img src="https://kyzylorda-news.kz/wp-content/uploads/2022/08/299389326_1373324903197965_9047315162554538527_n.jpg" alt="" />
<img src="https://kyzylorda-news.kz/wp-content/uploads/2022/08/299573773_1373325136531275_8938922754117351215_n.jpg" alt="" />

Қазақстан және Қызылорда облысының жаңалықтары