<a href="https://kyzylorda-news.kz/">Kyzylorda-news.kz.</a> Қызылорда облысы бойынша Мемлекеттік кірістер департаментінің қызметкерлері&nbsp;алкоголь өнімдерінің заңсыз айналымын анықтады.
Департамент мамандары жүргізілген тексеру барысында көтерме саудамен айналысатын жеке кәсіпкердің қоймасынан шығу тегі белгісіз есептік-бақылау маркалары жапсырылған 648 дана алкоголь өнімдері табылды.
Барлық заңсыз алкоголь өнімдері көлеңкелі бизнес айналымнан алынып, қазіргі уақытта Қазақстан Республикасының қолданыстағы заңнамасына сәйкес тиісті шаралар жүргізілуде.

Қызылордада заңсыз алкоголь өнімдерін дайындаған кәсіпкер анықталды

<a href="https://kyzylorda-news.kz/">Kyzylorda-news.kz.</a> ҚР Білім және ғылым бірінші вице-министрі Шолпан Каринова Қызылорда облысындағы жұмыс сапары барысында М.Мәметова атындағы Қызылорда педагогикалық жоғары колледжінде болып, «Жастық жалынымыз – сүйікті Отанымызға!» тақырыбындағы республикалық патриоттық жастар форумының ашылуына қатысты.
Салтанатты шарада ҚР Білім және ғылым бірінші вице-министрі Шолпан Танатқызы, аймақ басшысының орынбасары Балжан Шаменова, «Қос шынар: Әлия – Мәншүк» қоғамдық бірлестігі жетекшісі Ғалымжан Байдербес және Ақтөбе қаласынан арнайы келген колледждің көшбасшы студенті А.Нұрлыбекқызы мерейтоймен құттықтап, Мәншүк Мәметованың ескерткішіне тағзым жасады.
<blockquote>
 «Баршаңызды қазақтың батыр қызы – Мәншүк Мәметованың 100 жылдық, батыр есімімен аталатын киелі білім шаңырағының 90 жылдық мерейтойымен шын жүректен құттықтаймын! Ерекше атап өтетін жәйт, батыр есімін иеленген Қызылорда педагогикалық жоғары колледжі бүгінде білікті педагог мамандар даярлайтын облыстағы іргелі білім шаңырағына айналды. Ғасырға жуық тарихында бұл оқу орнын мыңдаған шәкірт бітірді. Оның ішінде саналы ғұмырын еліміздің ағарту саласына арнаған, 2000-жылдары ҚР Білім және ғылым министрі болған Шәмша Беркімбаеваның осы оқу орнының түлегі екенін зор мақтанышпен айтуға болады. Бүгін, міне, алдымызда тұрған студенттеріміз де ертең үлкен өмірге жолдама алып, еліміздің жарқын болашағы үшін еңбек ететін болады. Осы игілікті сапарда барлық студент жастарға табыс тілеп, форум жұмысына сәттілік тілеймін. Барлық ұстаздар қауымына үлкен еңбектері үшін алғысымды айтамын», – деді Шолпан Танатқызы.
</blockquote>
Шара барысында ҚР Білім және ғылым бірінші вице-министрі колледждің материалдық базасы мен атқарып жатқан жұмыстарымен танысты. Сондай-ақ, Шолпан Каринова форум аясында жарық көрген «Білім шамшырағы» атты кітаптың презентациясына қатысып, салтанатты түрде лентасын қиды.
Мұнан соң Шолпан Танатқызы форумға қатысушы қонақтармен бірге «Мектепке дейінгі тәрбие және оқыту» мамандығының «Дуалды оқыту алаңы», «Білім нұры» атты педагогикалық сабақтастық галереясы мен «Құзіреттілік орталығы», «Коркем енбек» шеберханасындағы кіріктірілген сабақтарға қатысып, студенттердің енгізген жаңарған жобаларына оң бағасын берді.
Айта кетейік, аталмыш форум Кеңес Одағының Батыры Мәншүк Мәметованың 100 жылдығы мен іргетасы 1932 жылы қаланған білім шаңырағының 90 жылдық мерейтойына орай өткізілуде.
<img src="https://kyzylorda-news.kz/wp-content/uploads/2022/05/ped2.jpg" alt="" />
<img src="https://kyzylorda-news.kz/wp-content/uploads/2022/05/ped.jpg" alt="" />
<img src="https://kyzylorda-news.kz/wp-content/uploads/2022/05/ped3.jpg" alt="" />
<img src="https://kyzylorda-news.kz/wp-content/uploads/2022/05/ped4.jpg" alt="" />
<img src="https://kyzylorda-news.kz/wp-content/uploads/2022/05/ped5.jpg" alt="" />
<img src="https://kyzylorda-news.kz/wp-content/uploads/2022/05/ped6.jpg" alt="" />
<img src="https://kyzylorda-news.kz/wp-content/uploads/2022/05/ped7.jpg" alt="" />
<img src="https://kyzylorda-news.kz/wp-content/uploads/2022/05/ped8.jpg" alt="" />

Шолпан Каринова М.Мәметова атындағы педагогикалық колледжіне барды (ФОТО)

<a href="https://kyzylorda-news.kz/">Kyzylorda-news.kz.</a> Бүгін Сыр елінде балалар арасында шахмат фестивалінің ашылу салтанаты өтті.
Балалар жылына орай өткізілген интеллектуалды додаға ҚР Білім және ғылым бірінші вице-минстрі Шолпан Каринова, облыс әкімінің орынбасары Балжан Шаменова, облыстық білім басқармасының басшысы Ақзира Қасымова, «KazPetrol Group» ЖШС бас директоры Ержан Какимұлы мен Сыр елінің мақтанышы, шахматтан Әлем және Азия чемпионы Әсел Серікбай қатысты.
Фестивалдің ашылу салтанатында Шолпан Танатқызы ойынның алғашқы жүрісін бастап, сайысқа қатысушы оқушыларға сәттілік тіледі.
<blockquote>
 «Бүгінде қосымша білім берумен қамту бойынша белсенді жұмыс жасаудамыз. Елімізде балалардың спортпен, шығармашылықпен айналысуына мүмкіндік мол. Қазіргі таңда Қызылорда облысында 176 771 оқушы болса, оның 139 536-сы мектеп жанындағы қосымша біліммен қамтылып жатыр. Басқармамен бірлескен жұмыс аясында бұл көрсеткіштер алдағы уақытта да ұлғаятын болады. Айта кетейін, Мемлекет басшысы Қасым-Жомарт Кемелұлы биылғы жылды «Балалар жылы» деп жариялады. Сондықтан барлық игілігіміз балаларға арналады. Осы ретте бүлдіршіндер үшін бүгінгідей үлкен фестивальді өткізуге қолдау білдірген демеушілерге, жанашыр азаматтарға, спорт функционерлеріне, ұйымдастырушыларға алғысымды білдіремін. Жеңістеріміз көп болсын», – деді ҚР Білім және ғылым бірінші вице-министрі.
</blockquote>
Қызылорда облыстық білім басқармасының ұйымдастыруымен және «KazPetrol Group» ЖШС-ның қолдауымен өтіп жатқан ақ қара ойынына еліміздің 12 өңірі мен облысымыздың аудандарынан барлығы 300-ге жуық шахматшы қатысып, өз өнерлерін ортаға салуда.
Мектеп жасындағы балалар арасында шахмат ойынының таралуына, балалардың интеллектуалды дамуына ықпал жасап, шахматшылардың шеберліктерін дамытуды мақсат еткен сайыс 6 күнге жалғасатын болады.
Айта кетейік, 6-12 жас аралығындағы балалар жас ерекшкліктеріне қарай «Ең жас шахматшы» атағы үшін бақ сынасады.

Қызылордада республикалық шахмат фестивалі басталды

<a href="https://kyzylorda-news.kz/">Kyzylorda-news.kz.</a> Бүгін облыс әкімі Нұрлыбек Нәлібаев ҚР Білім және ғылым бірінші вице-министрі Шолпан Кариновамен кездесті. Басқосуда аймақтың білім беру саласының өзекті мәселелері талқыланды.
Өңір басшысы Сыр елінде Президенттің тапсырмалары жүйелі түрде орындалып жатқанын тілге тиек етіп, білім саласына ұдайы қолдау барын жеткізді. Сондай-ақ, мектептер салу, мұғалімдердің айлық жалақысына қаражат бөлу, ғылым саласын дамыту, дарынды балаларды қолдау мәселелері талқыланды.
«Кез келген мемлекеттің дамуы тікелей білім және ғылым саласына байланысты, сондықтан бірінші кезекте білімге ерекше көңіл бөліп келеміз. Биыл 6 мемлекеттік, 3 жеке мектепті пайдалануға береміз. Нәтижесімен жыл соңына дейін өңірдегі 2 апатты және 2 үш ауысымды мектеп мәселесін толық шешеміз. Жеке мектеп салуға ниетті инвесторлармен де қарқынды жұмыс бар», – деді облыс әкімі.
Өз кезегінде, Шолпан Каринова білім саласындағы ортақ мәселелерді бірлесіп жұмыс істеуге мүдделі екенін жеткізді.

Нұрлыбек Нәлібаев Білім және ғылым бірінші вице-министрімен кездесті

<a href="https://kyzylorda-news.kz/">Kyzylorda-news.kz.</a> Бүгін ҚР Білім және ғылым бірінші вице-министрі Шолпан Каринова Қызылорда облысына арнайы жұмыс сапарымен келді. Сапар барысында вице-министр қаладағы Тәкей Есетов атындағы №264 мектеп-лицейінің педагогтарымен кездесті.
Шолпан Танатқызы білім ошағындағы жаңа технологиямен жабдықталған ОБСЕРВАТОРИЯ, КИНОСТУДИЯ, BIOMASTER, BIOFLOWERS, STEM лабораториясы мен «Ғылыми идеялар аллеясы» көрмесінің жұмысымен танысты. Вице-министр сондай-ақ мектептегі шахмат, тоғызқұмалақ, стол теннисі, баскетбол ойыны, бассейн және көркем-эстетика бағытындағы би үйірмелерін көріп, оқушылармен сұхбаттасты.
Мұнан соң Шолпан Каринова музыка, көркем еңбек мұғалімдерінің, көркем-эстетикалық бағыттағы қосымша білім беру педагогтерінің съезі аясындағы секция отырысына қатысты. Аталмыш жиын мектеп-лицейдің қабырғасынан бөлек, Қорқыт ата атындағы Қызылорда университетінің базасында өткізілуде. 17 өңірден 350 педагог қатысып жатқан секция жұмысына Шолпан Танатқызы сәттілік тілеп, ұстаздар қауымына зор сенім артылып отырғанын атап өтті.
Айта кетейік, съезд барысында өткізіліп жатырған секция отырысында педагогтар түрлі тақырыптарда баяндамалар жасап, ұсыныс-пікірлерін ортаға салатын болады.
<img src="https://kyzylorda-news.kz/wp-content/uploads/2022/05/sholpan1.jpg" alt="" />
<img src="https://kyzylorda-news.kz/wp-content/uploads/2022/05/sholpan2.jpg" alt="" />
<img src="https://kyzylorda-news.kz/wp-content/uploads/2022/05/okwshy-2.jpg" alt="" />
<img src="https://kyzylorda-news.kz/wp-content/uploads/2022/05/hor.jpg" alt="" />
<img src="https://kyzylorda-news.kz/wp-content/uploads/2022/05/robot.jpg" alt="" />
<img src="https://kyzylorda-news.kz/wp-content/uploads/2022/05/okwshy2.jpg" alt="" />
<img src="https://kyzylorda-news.kz/wp-content/uploads/2022/05/okwshy1.jpg" alt="" />

ҚР Білім және ғылым бірінші вице-министрі Шолпан Каринова жұмыс сапарымен Қызылорда облысына келді

<a href="https://kyzylorda-news.kz/">Kyzylorda-news.kz.</a>&nbsp;Ахмет Байтұрсынұлының 150 жылдығы және Роза Бағланованың 100 жылдығын мерекелеу аясында Қазақстанның Қытайдағы Елшілігінде атақты мерейтой иелеріне арналған салтанатты іс-шара өтті.
Іс-шара аясында қазақ диаспорасының өкілдері мен қазақстандық жас ұрпақ үшін ұлы қазақстандық қайраткерлердің өмірі мен шығармашылығына арналған дәріс ұйымдастырылып, қазақ жазуының дамуына елеулі үлес қосқан А.Байтұрсынұлы туралы деректі фильм көрсетілді.
Шығармашылық кеш шеңберінде А.Байтұрсынұлы және Р.Бағланованың мерейтойлық күндеріне арналған пошталық хатқалталардың тұсаукесері өткізілді. Аталған хатқалталарды Елшілік қытайлық «Beijing Diplomatic Gift Co. Ltd.» компаниясымен бірлесіп басып шығарды.
А.Байтұрсынұлының танымал шығармаларын насихаттап, ән шырқап би билеген қазақстандық және қытай жастары мерекелік іс-шараға ерекше көңіл күй сыйлады.
<img src="https://kyzylorda-news.kz/wp-content/uploads/2022/05/bejzhin.jpg" alt="" />

Бейжіңде Ахмет Байтұрсынұлына және Роза Бағлановаға арналған шығармашылық кеш өтті

<a href="https://kyzylorda-news.kz/">Kyzylorda-news.kz.</a>&nbsp;9 жыл ішінде киіктердің жалпы саны 6 еседен жоғары өсті. Соңғы екі жылда Орал мен Бетпақдала популяцияларында ақбөкендердің саны 2,5 есеге ұлғайды. Мұндай деректі Energyprom.kz сарапшылары ұсынды.
Қазақстанда ақбөкендердің үш популяциясы бар: Бетпақдала, Үстірт және Еділ-Жайық (Жайық). 
9 жыл ішінде киіктердің жалпы саны 6 еседен астам өсті. 2016 жылдан бастап геометриялық орташа мән ретінде бағаланатын барлық үш популяцияның орташа жылдық өсімі 2016 жылғы табынның бастапқы мөлшерінен шамамен 2,5–2,7 есеге өсті.
Әсіресе соңғы екі жылдағы өсім таңғалдырады: киіктердің саны Жайық пен Бетпақдала популяцияларында 2,5 есеге, трансшекаралық миграциясы бар Үстірт популяциясында 2 есеге артты. 
2021 жылы жалпы популяция 842 мың басты құрады, оның ішінде Жайықта – 545 мың бас, Бетпақдалада – 285 мың, Үстірт – 12 мың бас.
Бұл оң қарқынға қарамастан, елімізде киіктердің жоғалу қаупі әлі де сақталып тұр.
<blockquote>
 «Біріншіден, бұл браконьерлік әрекеттер. Оны екіге бөліп қарастыруға болады: заңсыз сату мақсатында киік мүйіздерін алуды көздеу және жеке қажеттілігін қанағаттандыру үшін киік етін жеу», – деп жазылған материалда.
</blockquote>
2019-2021 жылдары елімізде қолға түскен браконьерлер саны алдыңғы үш жылмен салыстырғанда 22,2%-ке азайды. Дегенмен, тәркіленген киіктің тұтас еті мен мүйіздердің саны артып жатыр. Мысалы, осы үш жылда тәркіленген мүйіздердің саны 12,5 мыңды құраса, 2016-2018 жылдары 3,7 мың болған.
Ал тәркіленген өлі киік саны 945-тен 1498-ге дейін өсті.
Екінші қауіп – ресурстар үшін бәсекелестік. Батыс Қазақстан облысында соңғы 15 жылда ауыл шаруашылығы жерлерінің көлемі 3 есеге, ал ақбөкендердің саны 30 есеге, яғни 15 мыңнан 545 мыңға дейін өсті.
Жануарлардың арасындағы ауру үшінші проблема болуы мүмкін. Өйткені жабайы жануарлардың жоғары тығыздықта мекен етуі эпизоотияны, сонымен қатар ақбөкендер мен үй жануарлары арасында аурудың таралу қаупін арттырады.
Мысалы, 1980 жылдан бері киік санының қарқынына жүргізілген анализ кезінде 3,6 жылда бір рет болатын жиілікпен жануарлардың жаппай қырылуының 11 жағдайы тіркелген. Орташа есеппен бүкіл популяцияның 34%-і немесе жалпы санының 18%-і қырылды.
Energyprom.kz сарапшылары бұл проблемаларды аң аулауға және тұрақты пайдалануға тыйым салуды алып тастау арқылы жоюға болады деген пікір білдірді.
Киіктерді сақтау альянсының есебіне сәйкес, жабайы жануарлардың қоныс аударатын түрлерін сақтау туралы конвенция бойынша бірлесіп жұмыс істейтін ұйымдардың көмегімен Ақбөкенді (Saiga spp) сақтау, қалпына келтіру және тұрақты пайдалануға қатысты өзара түсіністік туралы меморандум киіктерді сақтаудың негізгі халықаралық құжаты болып отыр.
<a href="https://sputnik.kz/20220505/qazaqstan-kiikter-sany-24653130.html">Sputnik.kz</a>

Қазақстанда 9 жыл ішінде киіктердің саны 6 есе өскен

<a href="https://kyzylorda-news.kz/">Kyzylorda-news.kz.</a> Интернет алаяқтық көбейіп барады.
Статистика бойынша, соңғы 5 жылда елімізде интернет-алаяқтық фактісі 10 есе өскен (2017 жылы 2 мыңнан 2021 жылы 21 мыңға дейін).
Азаматтардың әлеуметтік желілердегі онлайн сауда мен танымал сайттар арқылы алаяқтық құрбаны болу көрсеткіші айтарлықтай жоғары. Сонымен қатар қылмыскерлер онлайн-қарыз алу жолымен және банк карталарынан ақша жымқырады. Алаяқтар көбінесе, құрбанына инвестиция салу, бәс тігу, ойын және лотереяны жарнамалайды.
Уақыт өткен сайын алаяқтардың ақша жымқыру әдісі күрделеніп барады. Алайда көп жағдайда алаяқтардың қасақана ойын іске асыруына азаматтардың өзі де кінәлі. Өйткені олар алаяқтардың жаңа әдістерін білмейді. Интернеттегі жарнамаға сеніп, оңай олжаға кенелемін деп, опық жеп қалады.
Бас прокуратура осындай қылмыстарды азайту үшін цифрлық технологияларды енгізуді, қолданыстағы нормативтік құжаттарды жетілдіруді, ІТ-бағдарламалар мен қосымшаларды әзірлеуді көздейтін арнайы Жол картасын әзірледі.
Алаяқтардың құрбаны болған адамдардың оқиғалары және интернет-алаяқтар туралы фактілер БАҚ-та жарияланып тұрады.
Бұған дейін Жол картасын жүзеге асыру аясында БАҚ-да 2 мыңнан астам ақпараттық материал жарияланды. Киберқылмысқа қарсы күрес орталығының да, оның аумақтық бөлімшелерінде штат саны көбейді. Онлайн несие алу тәртібін қатаңдату мақсатында биометрика және ЭЦҚ қолдану міндетті болды.
Қаржы нарығын реттеу және дамыту агенттігімен бірге заңсыз онлайн несиелер бойынша ақпарат алмасу туралы Меморандум жасалды. Бұл интернет алаяқтарына қарсы жүргізіліп жатқан жұмыстардың маңызды бөлігі. Қазірдің өзінде алдын алу шаралары оң нәтижелерін беруде.
Өткен жылмен салыстырғанда интернеттегі алаяқтық фактілерінің саны 7-ден 4,5 мыңға дейін (34%-ға) азайды. 808 (644) іс сотқа жолданды.
Өңірлерде осындай іспен айналысқан қылмыстық топтар ұсталды. Мысалы, Шымкентте өздерін банк қызметкері ретінде таныстырған 5 адам қашықтан қол жеткізу бағдарламалары арқылы азаматтарға несие беріп, несие қаражатын иемденіп отырған.
Ескертеміз, онлайн сауда жасайтын кезде күмәнді транзакциялардан бас тартыңыз! Банк картасының деректерін, шот номерін және қауіпсіздік кодын бөтен адамға бермеңіз! Банктердің күмәнді сілтемелерін ашпаңыз! Күмән туғызған сілтеме бойынша кіріп, ол жерге жеке мәліметтеріңізді енгізбеңіз! Танымайтын адамға ақша аудармаңыз!
Егер банк картаңыздан ақшаны заңсыз алып қойса, дереу банкке немесе полицияға хабарласыңыз!

Бас прокуратура: Интернет алаяқтарынан сақ болыңыздар

<a href="https://kyzylorda-news.kz/">Kyzylorda-news.kz.</a>&nbsp;Қазалы ауданында абайсызда каналға құлаған 5 жасар сәби көз жұмды.
Оқыс оқиға 4 мамыр сағат 22:15 шамасында аудан орталығы Әйтеке би кентінде болған.
Үлкендердің қарауынсыз қалған 2017 жылғы сәби «Ақарық» каналына абайсызда құлап кеткен. Сәби оқиға орнында көз жұмды.
Облыстық төтенше жағдайлар департаментінің мәліметінше, сәбидің денесін судан жергілікті тұрғындар шығарып алған. Каналдың ені – 3, тереңдігі – 1 метр.

Қазалыда абайсызда каналға құлап кеткен сәби көз жұмды

<a href="https://kyzylorda-news.kz/">Kyzylorda-news.kz.</a> Мемлекет басшысы – Жоғарғы Бас қолбасшы Қарулы күштердің реформалаудың басым міндеттерін нақтылады. Жаңа міндеттер әскерлердің жауынгерлік қабілеті мен жауынгерлік дайындығын, әскери қызметтің беделін арттыруға және әскери қызметшілерді әлеуметтік қолдауға бағытталып отыр. Бұл туралы Қызылорда облыстық Қорғаныс істері жөніндегі департаментінің жиын пунктінде өткен көшпелі брифингте Қызылорда облысының қорғаныс істері жөніндегі департаменті бастығының орынбасары – тәрбие, идеологиялық және әскери-патриоттық жұмыстары басқармасының бастығы подполковник Алмат Жақыпов мәлімдеді.
<blockquote>
 «Қазіргі таңда елімізде Арнайы операциялар күштері құрылып, жетілдірілу үстінде. Күштік құрылымдардың өзара іс-қимылы және түрлі ведомстволық әскерлер топтамасын бірыңғай қолбасшылықпен қолдану мәселелері пысықталуда. Мемлекеттік органдардың іс-қимылдарының бірыңғай алгоритмі әзірленіп, Қарулы күштерді қолдану ерекшеліктері айқындалды. Мемлекет басшысының тапсырмаларын іске асыру үшін мерзімді әскери қызметтің беделін арттыруға қатысты бірқатар бастамалар пысықталу үстінде. «Тегін техникалық және кәсіптік білім беру» жобасын іске асыру шеңберінде Қорғаныс министрлігі бүгінде еңбек нарығында сұранысқа ие 16 мамандық негізінде мерзімді қызметтегі сарбаздарды даярлауды жүргізеді. Сонымен қатар, кадрлық әлеуетті арттыру мақсатында әскери білім беру жүйесін дамыту және кадр саясатын жетілдіру шаралары қабылдануда. Қарулы күштердегі кадр саясатының 2027 жылға дейінгі тұжырымдамасы әзірленді. Армия қызметінің барлық салаларына цифрлық технологияларды енгізу жалғасуда. Әскери міндеттілер мен әскерге шақырылушыларды есепке алу цифрлық форматқа ауыстырылды. Бұл жергілікті әскери басқару органдарының жұмысын автоматтандыруға мүмкіндік беріп отыр», – деді Қызылорда облысының қорғаныс істері жөніндегі департаменті бастығының орынбасары полковник Алмат Жақыпов.
</blockquote>
Биыл Қазақстан Қарулы күштерінің құрылғанына 30 жыл және Ұлы Отан соғысындағы Жеңістің 77 жылдығы аталып өтіледі.
Жыл басынан бері Қорғаныс министрлігінің кешенді ақпараттық-түсіндіру тобы үлкен жұмыс атқарды. «Күшіміз бірлікте» акциясы барысында еліміздің батысы, оңтүстігі мен солтүстігіндегі гарнизондарда әскери қызметшілермен кездесулер өтті. Колледж студенттерімен және орта мектеп оқушыларымен әскери-патриоттық жұмыс жаңа пішінде ұйымдастырылды. Қазақстандықтардың 1941-1945 жылдардағы Ұлы Отан соғысына және Ұлы Жеңіске қосқан үлесіне арналған Мемлекеттік әскери-тарихи музейі көшпелі көрмесі азаматтардың ерекше қызығушылығын тудырды.
Мереке күндері қарсаңында өңірімізде әскери қызметшілер Даңқ мемориалдарына, әскери борышын атқару кезінде қаза тапқан әскери қызметшілерді еске алуға арналған монументтерге, Ұлы Отан соғысының жауынгерлерінің ескерткіштеріне гүл шоқтарын қою рәсімдеріне қатысып, соғыс ардагерлерін арнайы мерекелерімен құттықтау шараларын ұйымдастырады.

Қазақстан Қарулы күштерінің 30 жылдығы: Жаңа міндеттер қандай?

<a href="https://kyzylorda-news.kz/">Kyzylorda-news.kz.</a>&nbsp;Сырдария ауданында 30 518 гектар егіс алқабына ауыл шаруашылығы дақылдары егіледі.
Негізгі дақыл – күріштің көлемі 18 520 гектарды құрайды. Одан бөлек, жаздық бидай мен мал азықтық дақылдарды орналастыру жоспарлануда. Бұл жөнінде Өңірлік коммуникациялар қызметінің көшпелі баспасөз конференциясында Сырдария ауданы әкімінің орынбасары Талғат Нұртазаев мәлімдеді.
<blockquote>
 «Бүгінде 5 мың гектар жерге күріш дақылы егіліп, 4 мың гектары суға бастырылды. Каналдар мен қашыртқылар бойына 50 насос қондырғысы орналастырылды. Сондай-ақ, суды аз қажет ететін дақылдар көлемі ұлғайтылды. Аудандағы барлық шаруашылықтарға су бармайтын жерлерде егін екпеу туралы ескерту жасалды», – деді аудан әкімінің орынбасары Талғат Нұртазаев.
</blockquote>
Сырдария ауданына қарасты Бесарық елді мекенінде көктемгі егін науқаны қызу жүруде. Мұнда 700 гектарға күріш дақылы егілмек.
<blockquote>
 «Биыл су тапшылығына байланысты 10 гектар қант құмайы, 20 гектар сүрлемдік жүгері, 100 гектар жаңа жоңышқа егілді. Қазіргі таңда егін егу жұмыстарына 30-дан астам техника жұмылдырылып, 9 насос іске қосылды», – деді «Абай Даулет» ЖШС агрономы Өтепберген Қалиев.
</blockquote>
<img src="https://kyzylorda-news.kz/wp-content/uploads/2022/05/syrdarija2.jpg" alt="" />
<img src="https://kyzylorda-news.kz/wp-content/uploads/2022/05/syrdarija1.jpg" alt="" />

Сырдария ауданында 18 мың гектарға Сыр салысы егілді

<a href="https://kyzylorda-news.kz/">Kyzylorda-news.kz.</a>&nbsp;28 сәуірде Қазақстан халқы Ассамблеясының ХХХІ сессиясы өтті.
Сессия жұмысы Қазақстан Республикасы Парламенті Мәжілісінің депутаттығына кандидатты сайлаудан басталды. Закиржан Кузиев көпшіліктің дауысына ие болып, ҚХА атынан ҚР Парламенті мәжілісіне сайланды. Бұл туралы Өңірлік коммуникациялар қызметінде өткен баспасөз конференциясында облыстық қоғамдық даму басқармасының ҚХА хатшылығы-этносаралық қатынастар мәселелері жөніндегі бөлімінің басшысы Уәлихан Ибраев мәлімдеді.
<blockquote>
 «Қазақстан халқы Ассамблеясының «Ел бірлігі – жаңарған Қазақстанның негізі» атты ХХХІ сессиясы «Ұлт келешегі және ҚХА-ны жаңғырту», «Халық бірлігі; білімнің, мәдениеттің және азаматтық қоғам мен бұқаралық медиа институттарының рөлі» және «Қазақстан халқы Ассамблеясының жастар сессиясы» секілді үш панелдік отырыстармен жалғасты. Онан соң, 29 сәуірде ХХХІ сессия Қазақстан Республикасының Президенті, Қазақстан халқы Ассамблеясының төрағасы Қасым-Жомарт Кемелұлы Тоқаевтың төрағалығымен жалғасты. Сессия барысында Президенттің саяси өзгерістерді жүзеге асыруға бағытталған жаңа бастамалары аясында Қазақстан халқы Ассамблеясының және оның қоғамдық құрылымдардың рөлі мен маңызы қарастырылып, талқыланады», – деді Уәлихан Серікұлы.
</blockquote>
Сонымен қатар, Мемлекет басшысы жаңа сын-қатерлердың туындауына ықпал ететін геосаяси ахуалдың ушығып тұрғанына тоқталды. Мұндай жағдайда еліміздің азаматтық бірегейлігін нығайтып, отаншылдық рухты көтеруге баса мән беру керектігін атады.
Президенттің пікірінше, Ассамблея құрылған уақыттан бері азаматтық бірлікті нығайтуға елеулі еңбек сіңірді.
Сессия делегаттары Қазақстан қоғамның барлық саласы батыл өзгерістер жолына түскенін атап өтті. Осыған байланысты Конституцияға елдің саяси жүйесін түбегейлі өзгертетін толықтырулар енгізу туралы бастама көтерді. Бұл бастамының ҚХА сессиясында көтерілуі Ассамблея институтының қоғамдық өмірдегі алатын орны мен маңызын айшықтайды.

Қазақстан және Қызылорда облысының жаңалықтары