Kyzylorda-news.kz. Сыр өңірінде тұрғындарды тұрғын үймен қамту мәселесі кезең-кезеңімен оң шешімін тауып келеді. Игі бастаманың жалғасы ретінде СПМК-70 тұрғын ауданынан 50 пәтерлік 5 көпқабатты ипотекалық тұрғын үйдің кілті салтанатты түрде табысталды.
Облыс әкімі Нұрлыбек Нәлібаев қоныстой иелерін құттықтап, шаңырақтарына бақ-береке тіледі.
<blockquote>
 Соңғы жылдары Сыр өңірінде тұрғын үй құрылысы қарқын алып, қала аумағы әлдеқайда кеңейді. Зәулім ғимараттар бой көтеріп, шаһардың сәулеттік келбеті көркейе түсті. Бүгін де жаңа тұрғын үйді пайдалануға беріп, отбасылардың қуанышын еселемекпіз. 
 Жаңа баспаналарыңыз татулық пен берекенің ордасы болып, қуаныш пен бақыт, құт пен ырыс салтанат құрсын! 
 Қуаныштарыңыз көбейе берсін! Шаңырақтарыңызға шаттық орнасын! 
 Сіздерді құттықтай отырып әр жанұяға жақсылық, ынтымақ пен бірлік, амандық тілеймін,-деді Н.Нәлібаев.
</blockquote>
Пәтер алушылардың атынан Мұхтар Сүлейменов үйді сапалы әрі әсем етіп салған мердігер компанияларына алғысын білдірді, ал еңбек ардагері Қорғанбек Қайруллаев қоныстанушыларға ізгі тілектерін арнап, ақ батасын берді.
Іс-шара соңында аймақ басшысы жаңа пәтерлердің біріне кіріп, баспана бақытына келген отбасының қуанышына ортақтасты. 
СПМК-70 тұрғын ауданынан салынған 5 көпқабатты ипотекалық тұрғын үй баспана кезегінде тұрған «Отбасы банктың» салымшыларына арнап салынған. 
Айта кетейік, соңғы 3 жылда өңірде жалпы ауданы 315,4 мың шаршы метрді құрайтын 3 мың 827 пәтерлік 172 тұрғын үй құрылысы жүргізілді. Былтырғы жылы апаттық жағдайда тұрған үйлердің тұрғындарына 50 пәтердің кілті табысталды. 
Биылдың өзінде өңірде сатып алу құқығынсыз жалға берілетін 372 пәтерді құрайтын 10 тұрғын үйдің құрылысы жүруде.
<img src="https://kyzylorda-news.kz/wp-content/uploads/2022/06/fb_img_1656607694346.jpg" alt="" />
<img src="https://kyzylorda-news.kz/wp-content/uploads/2022/06/fb_img_1656607698031.jpg" alt="" />

Қызылордада 250 отбасы баспаналы болды

<a href="https://kyzylorda-news.kz/">Kyzylorda-news.kz.</a> Қызылорда облысы Арал ауданы Қызылжар ауылының тұрғыны Ринат Жеткергенов&nbsp;2020 жылдың күзінде Ақтау қаласындағы әскери бөлімнен есін білмей оралған болатын. Қазір Ринаттың әжесі Мәриям немересін бұл жағдайға түсірген сержанттардың жазаға тартылуын талап етуде. Бұл туралы «Хабар»&nbsp;арнасының&nbsp;<a href="https://www.youtube.com/watch?v=RolsW3ebs7E">“Біздің назарда”</a>&nbsp;жаңалықтар бағдарламасында жарияланды.
Ринат 9 айдай емделіп, қазір жағдайы тұрақталған. Ринат бұған дейін жасатқан Алматы мен Қызылордадағы сараптама нәтижелеріне сенімсіздік танытып Нұр-Сұлтан қаласына барған.&nbsp;
<blockquote>
 “Қызылорда мен Алматының сараптамасы мүлде дұрыс емес. Сараптама бойынша баламызды бұрыннан ауруы бар деп көрсетіп тұр. Егер бұрыннан ауыратын болса, онда әскерге қалай қабылданды? Аралдың, Қызылорданың әскери бөліміндегілердің барлығы баланың денсаулығы мықты деп теңіз флотына жіберді. Бірақ меніңше барлық мәселені туындатып жүрген әскердегі сержанттар болуы керек”,- деді әжесі Мәриям.
</blockquote>
Қазір жағдайым тұрақталды деген Ринат сержанттардың бұл іске қатысы бар екенін ашық айтты.
“Әжемнің, отбасымның арқасында қазір денсаулығым жақсарды. Барлығы сол сержанттардың кесірі ғой. 360 күн жақсы жүрдім де үйге оралуыма 5 күн қалғанда осындай жағдайға ұшыратып отыр”,- дейді Ринат.

Әскерден есін білмей оралған қызылордалық Ринаттың отбасы кінәлілердің жауапқа тартылуын талап етуде

<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» мемлекеттік корпорациясы ҚР цифрлық даму, инновациялар және аэроғарыш өнеркәсібі министрлігі, ауыл шаруашылығы және әділет министрліктерімен, «Ұлттық ақпараттық технологиялар» АҚ-мен және облыстық әкімдіктермен бірлесіп, бірыңғай мемлекеттік жер кадастрын жасау және енгізу аясында электрондық сауда-саттық арқылы мемлекеттік жер телімдерін сату бойынша жобаны жүзеге асырды.
Онлайн-аукцион арқылы Қызылордада үш жер телімі сатылды. Біреуі бастапқы бағасы 1,5 млн теңгені құрап, соңында 2,8 млн теңгеге, қалған екеуінің бірі – 246 мың, екіншісі – 396 мың теңгеге сатылды.
Онлайн-аукцион қалай өткізіледі?
Саудаға әрбір қазақстандық қатыса алады. Онлайн-аукционның қатысушысы болу үшін eGov порталына тіркеліп, “Жер учаскелерін немесе жер учаскелерін жалдау құқығын сату жөніндегі сауда-саттықты (аукциондарды) ұйымдастыру және өткізу арқылы жер учаскесін мемлекеттік меншіктен беру” мемлекеттік қызметін таңдап, қатысушының өтінімін толтыру керек. 
ЭСҚ көмегімен өтінім толтырылғаннан кейін қатысушы https://e-auction.gosreestr.kz/ сілтемесімен “Электрондық сауда алаңына” бағытталады.Бұл жерде де тіркеуден өтіп, кепілдік төлемақысын төлеуі қажет.
Сауда бағаның жоғарылауы, яғни ағылшын әдісімен жүргізіледі. Бастапқы құны жердің кадастрлық құнымен анықталады.
Сауда аяқталған соң жеңімпаз жер телімінің құқық белгілеуші құжаттарын алады. Бұл қызмет мемлекеттік корпорация арқылы көрсетіледі.
Жобаның мақсаты
Онлайн сауданың барлық процесі ашық, нәтижесіне әсер ету мүмкін емес – бұл жер қатынастары саласындағы сыбайлас жемқорлықты жоюға бағытталған алғашқы қадам. Жоба бүкіл республика көлемінде жүргізілетін болады. Келесі онлайн-аукцион 8 шілдеде Ақтөбеде өтеді. Мұнда да бірнеше жер телімі сатылымға шығарылады.
Айта кетейік, “Азаматтарға арналған үкімет” мемлекеттік корпорациясы жер теліміне қатысты жерге орналастыру жобасынан бастап жер теліміне мемлекеттік акт даярлап, оны тіркеуге дейінгі барлық құжаттардың рәсімделу процесін жүргізеді.

Қызылорда облысында үш жер телімі онлайн-аукцион арқылы сатылды

<a href="https://kyzylorda-news.kz/">Kyzylorda-news.kz.</a> Облыста конго-қырым қанды безгегіне шалдыққандар саны 15-ке жетті. Оның 8-і зертханалық жолмен нақтыланған. Сала мамандары облыс тұрғындарын далалық жерде зиянкестерден қорғанып жүруге және ауыл шаруашылығы жануарларынан абай болуға шақырды.
<blockquote>
 «Қазіргі таңда ауруға шалдыққан азаматтарға тиісті ем жүргізілуде. Бүгінде облыста конго-қырым қанды безгегін қоздырушы кененің 16 түрі бар. Соның салдарынан жылдан-жылға ауру тасымалдаушы кенелердің түрлері көбейіп келеді. Республика бойынша кенелердің зақымдалу көрсеткіші орташа есеппен 4,2 болса, біздің облыстың көрсеткіші одан жоғары. Бұл алаңдатарлық жағдай. Конго-қырым қанды безгегі әсіресе мамыр және маусым айларында белсенділігі өте жоғары болады. Сондықтан әрбір азамат далалық жерде немесе үй жануарларының қасында міндетті түрде сақтық шараларын ұмытпау керек», – деді облыстық санитариялық-эпидемиологиялық бақылау департаменті басшысының орынбасары Әлия Әбдіқайымова.
</blockquote>
Конго-қырым геморрагиялық қызбасымен сырқаттанғандардың басым көпшілігі ауыр жағдайда ауруханаға жеткізілді. Олардың 70 пайызында клиникалық белгілер болғанымен уақытылы медициналық көмекке жүгінбеген.
<blockquote>
 «Бізге түскен науқастардың барлығы осы бір аптаның ішінде ауырғандар. Олар ауруханаға келген күннен бастап арнайы препараттар беріліп, 3 рет зертханалық тексерістен өтеді. Конго-қырым қанды безгегінің басты белгілері – бас айналу, жүрек айну, дене қызбасы және іш өту. Бұл белгілерден бөлек тістің қанауы немесе мұрын қанауы болуы мүмкін. Егер осы сиптомдар байқалса жедел түрде медициналық тексерістен өту қажет. Себебі ауру асқанып кетуі мүмкін», – деді облыстық жұқпалы аурулар ауруханасының бас дәрігері Айна Мұхамбетова.
</blockquote>
<img src="https://kyzylorda-news.kz/wp-content/uploads/2022/06/290910948_1565780253817481_607433311921694566_n.jpg" alt="" />

Қызылордада 15 адам конго-қырым қанды безгегіне шалдықты

<a href="https://kyzylorda-news.kz/">Kyzylorda-news.kz.</a> Мемлекет басшысының Жарлығы аясында бүгін облыс әкімі Нұрлыбек Нәлібаев Қызылорда қаласының халқымен кездесті. Жиынға Сыр еліне арнайы келген Президент Әкімшілігінің мемлекеттік инспекторы Эльдар Күзенбаев қатысты.
Аймақ басшысы өңірді дамытудың перспективалық қадамдарына тоқталып, тұрғындар үшін өзекті саналатын инфрақұрылым тарту, қоғамдық көлік мәселелерін тізбектеді.
Халықтың әл-ауқатын арттырудың тағы да бір өлшемшарты – инженерлік-коммуналдық инфрақұрылымды дамыту. Әлемдік стандарттарға сай әуежайымыз да заманауи сипатқа ие болуы керек. Жерлесіміз Болат Өтемұратовтың демеушілігімен жаңа әуежай терминалын саламыз. Өңірде қоғамдық көлік мәселесі де өзекті. Биыл Қызылорда қаласына үлкен сыйымдылықтағы 150 жаңа автобус алынады.
Жақын күндері Қызылорда қаласында облыстық қан орталығының құрылысы басталады. Келер жылы 100 келушіге арналған емханасымен бірге 300 төсектік көпбейінді аурухана құрылысы салынады. Алдағы кезде облыс халқы үшін заманауи үлгідегі жаңа нысандарды саламыз. Облыс орталығынан неке сарайы, өнер орталығы бой көтеретін болады. «ҚазГерМұнай» кәсіпорны қаланың сол жағалауынан «Оқушылар сарайын» салып беруді өз міндетіне алды, – деді аймақ басшысы.
Сондай-ақ, облыс әкімі өткен айда өңірімізге жұмыс сапарлары аясында Ұлттық экономика және Энергетика министрлері бірқатар маңызды жобаға қолдау білдіргенін жеткізді. Соның бірі – құны 215 млрд. теңгені құрайтын, қуаттылығы 240 мегаватқа жететін жаңа жылу электр станциясын салу. Жоба 2025 жылы жүзеге асады.
Биыл Қызылорда қаласын сумен жабдықтау үшін «Нұрлы жер» мемлекеттік бағдарламасы аясында 4 жоба және облыстық бюджет есебінен 4 жоба бойынша жұмыстар жүргізілуде. 
Қаланың жаңа тұрғын аймағын дамыту мақсатында Сырдария өзенінің сол жағалауындағы «Гүл бульварын» абаттандыру үшін жобалық құжаттары әзірленуде.
Кездесуде газдандыру мәселесі де айтылды. Қаладағы Наурыз, Махамбетов елді мекендерін газдандыру жұмыстарын келесі жылы аяқталмақ және Қосшыңырау ауылдық округі Абай ауылын газдандыру бойынша Энергетика министрлігіне бюджеттік өтінімдер ұсынылған.
Басқосу барысында өңір басшысы облыс орталығындағы жол инфрақұрылымын дамыту бойынша кеңінен тоқталды. Қызылорда қаласында 34 шақырым жолын жөндеуге 5,1 млрд. теңге қаржы қаралған. Мұнан бөлек, облыс орталығының 19 көшесіне жаяу жүргіншілер жолы төселіп, қаланың орталық көшелері жарық диодты шамдармен безендіріледі.
Сондай-ақ, 13 көшеде орташа жөндеу жұмыстары жүргізілуде. Облыстық бюджет есебінен қаланың 10 көшесінің қиылысына бағдаршамдар орнатылатын болады.
Аймақ басшысы биылға жоспарланған жұмыстарды жүйелі іске асыру мақсатында арнайы Іс-қимыл жоспарының бекітілгенін, ондағы әрбір жобаның құрылысы облыстық мәслихаттың шешімімен бекітілетін кезектілік тізімі негізінде ғана орындалуы тиіс екенін жеткізді.
Басқосу соңында облыс әкімі қала тұрғындарының сауалдарына жауап берді. Қала азаматтары қоғамдық көлік, жол сапасын жақсарту, ауыз су желілерін тарту және денсаулық сақтау саласына қатысты көкейкесті сауалдарын жолдады.
Халықпен кездесуден кейін Нұрлыбек Нәлібаев кезектілік тәртібімен жазылған азаматтарды жеке қабылдап, мәселелерін тыңдап, жауап берді.
<img src="https://kyzylorda-news.kz/wp-content/uploads/2022/06/291351148_333580902296494_5053002162114480994_n.jpg" alt="" />
<img src="https://kyzylorda-news.kz/wp-content/uploads/2022/06/291114077_333581162296468_1285339513496750175_n.jpg" alt="" />

Облыс әкімі Қызылорда қаласының тұрғындарымен кездесті

<a href="https://kyzylorda-news.kz/">Kyzylorda-news.kz.</a> Бүгінгі күні елді-мекендер төңірегіндегі апатты үйінділер, коммуналдық қалдықтармен жұмыс істеу проблемасы өзекті болып тұр.
Қызылорда облысы бойынша экология департаменті бұқаралық ақпарат құралдарының қатысуымен заңсыз қоқыс алаңдары бойынша пресс-тур өткізді.
2018 жылдан бастап Қызылорда облысы бойынша экология департаментімен «Қазақстан Ғарыш Сапары ҰҚ» АҚ арқылы жүзеге асырылған қалдықтар орналасқан жерлерді қашықтан зондтаудың ғарыштық түсірілім қызметін пайдалану бойынша қалдық үйінділерін анықтау және оларды жою бойынша жұмыстар атқарылып келеді.
Қазіргі таңда, министрлік әрбір аймақта жүргізілген тазарту жұмыстарының нәтижесін ғарыштық мониторинг арқылы бақылап отырады.
2021 жылы «Геопортал» жүйесі бойынша Қызылорда қаласының 50 км-лік радиусы аумағында 105 рұқсатсыз қалдықтар орны анықталып, нәтижесімен анықталған заңсыз қалдықтар орындары 100 % жойылды.
Ал, 2022 жылы «Геопортал» жүйесі бойынша Қызылорда қаласының 50 км-лік радиусы аумағында 101 қалдық орны анықталды (Қызылорда қаласы – 48, қалаға қарасты округтер – 13, Сырдария ауданы – 27, Жаңақорған ауданы – 13) анықталды.
Департамент мамандары анықталған қалдықтар орындары бойынша тиісті жергілікті атқарушы орган мамандарының қатысуымен 100% анықтау жұмыстарын жүргізді.
Қазіргі таңда департаменттің жергілікті атқарушы органдармен бірлесе атқарған іс-шаралары нәтижесімен анықталған 37 заңсыз қалдықтар орны жойылып, 64 ретсіз орналасқан иесіз қалдықтар орындарын жою жұмыстары жүргізілуде.
Жыл сайын бейберекет қоқыс үйінділері азаймай тұр. Оның бір себебі, заңсыз қалдық алаңдарының пайда болуына тұрғындардың белгіленбеген орындарды қоқыстармен ластауы, қала, аудан әкімдіктері тарапынан бей-берекет орналасқан қоқыс алаңдарын жою бойынша нақты жұмыстар атқарылмауы, бақылаудың әлсіреуі болып отыр.
Сонымен қатар, стихиялық қалдықтар орындарын жоюдан бөлек, бірінші ретте заңсыз қалдық орындарының түзілуін болдырмауға бағытталған іс-шараларды жүйелі түрде жүзеге асыру болып табылады.
Қазақсан Республикасы Экологиялық кодексінің 368-бабына сәйкес тұрмыстық қатты қалдықтарды тасымалдау жөніндегі қызметті жүзеге асыратын кәсіпкерлік субъектілері тұрмыстық қатты қалдықтарды тасымалдауға арналған арнайы жабдықталған көлік құралдарын яғни спутниктік навигациялық жүйелермен (GPS) жабдықтауға тиіс.
Осы ретте тұрмыстық қатты қалдықтарды тасымалдауға арналған көлік құралдарын аталған талаптарға сәйкестендіре отырып, яғни аумақтағы әрбір ТҚҚ тасылмалдайтын көліктерді спутниктік навигациялық жүйелермен бақылау арқылы стихиялық қоқыс үйінділерінің түзілуіне жол берілмейтіндігін атап өтемін.
Бүгінгі күні елді мекендер төңірегінде рұқсатсыз қоқыс төккендерді анықтау және бақылау шаралары күшейтіліп, жауапты мекемелердің қатысуымен рейдтік іс-шаралар өткізілуде. Қазіргі таңда рұқсатсыз қоқыс төккендерді анықтау бойынша 5 рейдтік іс шара жүргізілді және заңдылықты бұзуға жол берген 3 тұлғаға қатысты әкімшілік шара қолданылды.
Департамент «Қазақстан Ғарыш Сапары» ҰК» АҚ-мен қалдықтар орналасқан жерлерді қашықтан зондтаудың ғарыштық түсірілімі қызметі арқылы заңсыз қалдықтар орындарын анықтау бойынша тұрақты түрде бірлескен жұмыстар жүргізіп, жергілікті атқарушы органдармен бірге қалдықтар орындарын жоюға бағытталған шараларды ұдайы түрде жүзеге асыратын болады.

Қызылордада қоқыс пен тұрмыстық қалдықтар қалай жойылып жатыр?

<a href="https://kyzylorda-news.kz/">Kyzylorda-news.kz.</a> Биыл бесінші мәрте өткізілетін Кемел Тоқаев атындағы республикалық детективті шығармалар байқауы Қызылорда облысында ұйымдастырылады. Осы жылғы байқаудың ерекшелігі – жас қаламгерлер мен оқушылардың қатысуына мүмкіндік қарастырылған. Сондай-ақ, қатысушылардың жасына шектеу қойылмайды.
Бұл туралы Өңірлік коммуникациялар қызметінде өткен брифингте ҚР Журналистер Одағының мүшесі, «Заң Медиа» корпорациясының Қызылорда облысындағы арнаулы өкілі Әмірбек Шаймағамбетов хабарлады.
<blockquote>
 «Биыл Кемел Тоқаев атындағы республикалық детективті шығармалар байқауы бесінші жыл қатарынан ұйымдастырылмақшы. Оған дейін Алматы қаласында екі рет, Алматы облысында және былтыр Түркістан облысында өтті. Жақында облыс әкімі Н.Нәлібаев «Заң Медиа» корпорациясының басшысы Досымбек Өтеғалиевті қабылдаған болатын. Кездесу барысында аталған республикалық байқауды Сыр елінде өткізу туралы айтылып, аймақ басшысы қолдау білдірді. Айта кетейін, Кемел Тоқаев атындағы республикалық детективті шығармалар байқауына қатысуға шектеу қойылмаған. Сонымен қатар конкурс талабына сәйкес әрбір шығарма толықтай талданып, күзде жүлдегелер анықталады», – деді Әмірбек Шаймағамбетов.
</blockquote>
Брифинг барысында Кемел Тоқаев атындағы республикалық детективті шығармалар байқауының 2021 жылғы бас жүлдегері, республикалық «Таңшолпан» әдеби-көпшілік журналының бас редакторы Нұрлыбек Сафин детективті жанрдың ерекшелігін айтып, көпшілікті байқауға қатысуға шақырды.
<blockquote>
 «Былтыр Кемел Тоқаев атындағы республикалық детективті шығармалар бәйгесінің 4-ші жылдығында Әмірбек Шаймағамбетовтың идеясымен детективті, деректі көркем әңгіме жаздық. Әңгімеге арқау қылып Қызылорда облысында 1990 жылдан бері болған оқиғаларды жазып, ауыр қылмыстардың ашылуын зерттедік. Біздің елімізде детективті жанр айтарлықтай дамымаған. Сол үшін жас қаламгерлерді, оның ішінде детектив жанрына қызығушылығы бар азаматтарды байқауға қатысуға шақырамын», – деді Нұрлыбек Сафин.
</blockquote>

Кемел Тоқаев атындағы республикалық детективті шығармалар байқауы басталды

<a href="https://kyzylorda-news.kz/">Kyzylorda-news.kz.</a> Өңірде «Уылдырық шашу» балық қорғау акциясы басталғалы 214 заңбұзушылық анықталды. Оның 5-і қылмыстық іс ретінде танылып, ішкі істер органдарына жолданды. Ал жыл басынан бері балық аулау ережесін бұзған 151 азаматқа айыппұл салынды.
Бұл жөнінде Өңірлік коммуникациялар қызметінде өткен брифингте Арал-Сырдария облысаралық бассейндік балық шаруашылығы инспекциясы басшысының орынбасары Жанқожа Сапаров мәлімдеді.
<blockquote>
 «Уылдырық шашып көбею мезгілінде балық аулауға қатаң түрде тыйым салынады. Алайда облыс тұрғындары ескертуге мән бермей, заңбұзушылық әрекеттерге жол беруде. Дәлірек айтсақ, «Уылдырық шашу» балық қорғау акциясы барысында 209 әкімшілік хаттама толтырылып, 54 әкімшілік іс сот органдарының қарауына жіберілді. Балық аулау ережесін бұзған азаматтардан 4 тонна 2861 кг балық пен 90 дана аулау құралы тәркіленді. Сонымен қатар қала аумағындағы су айдындарын қоқыстардан тазалау мақсатында «Таза су айдындары» табиғат қорғау акциясы өткізілген болатын. Нәтижесінде, 44 тоннаға жуық әртүрлі қоқыс пен суға тасталған 494 дана қалдық шығарылды. Табиғатты қорғау аясында өткізілетін барлық іс-шаралар әрі қарай жалғаса береді», – деді Арал-Сырдария облысаралық бассейндік балық шаруашылығы инспекциясы басшысының орынбасары Жанқожа Сапаров.
</blockquote>

Қызылордада заңсыз балық аулаған 339 азаматқа айыппұл салынды

<a href="https://kyzylorda-news.kz/">Kyzylorda-news.kz.</a> Қызылорда облысына Кореяның Алматыдағы бас консулдығы және Кореяның ардагерлер мен патриоттар істері жөніндегі министрлігінің делегациясы іс сапармен келді.
Ең бірінші делегация мүшелері Хон Бом До мемориалдық кешеніне барып, батырдың рухына тағзым етіп, гүл шоқтарын қойды.
Содан соң облыс әкімінің орынбасары Серік Қожаниязовпен кездесті. Кездесу барысында Хон Бом До мемориалдық кешенін қайта қалпына келтіру туралы сөз қозғады.
Кореядан келген мәртебелі меймандар Сыр жұртының қаһарман тұлғаға деген ерекше құрметі үшін ризашылығын білдіріп, бұл сапар ынтымақтастық бағытындағы екіжақты әріптестікті, достықты одан әрі нығайтуға мүмкіндік беретінін айтып, алғысын жеткізді.
<img src="https://kyzylorda-news.kz/wp-content/uploads/2022/06/290995950_3244886812497143_6226618657078044377_n.jpg" alt="" />
<img src="https://kyzylorda-news.kz/wp-content/uploads/2022/06/291336993_3244886869163804_8152934915551841842_n.jpg" alt="" />

Корея делегациясы Сыр өңіріне іс сапармен келді

<a href="https://kyzylorda-news.kz/">Kyzylorda-news.kz.</a> Ротация-бір нәрсені ауыстыру, айналдыру, қайта реттеу ауыстыру процесін сипаттау үшін қолданылатын термин. Бұл сөз «rotatio» латын тілінен шыққан және сөзбе-сөз аударғанда: «айналу немесе айналмалы қозғалыс» дегенді білдіреді.
Мемлекеттік қызметті өткеру кезінде кәсіби әлеуеттің неғұрлым тиімді пайданылуын қамтамасыз ету мақсатында мемлекеттік қызметшілерді ротациялау жүзеге асырылады.
Мемлекет Басшысының 2020 жылғы 13 қарашадағы №447 Жарлығымен Қазақстан Республикасы Президентінің «Мемлекеттік қызмет өткерудің кейбір мәселелері туралы» 2015 жылғы 
29 желтоқсандағы №152 Жарлығына өзгерістер мен толықтырулар енгізілді.
Осыған сәйкес, саяси қызметшілердің және «А» корпусының мемлекеттік әкімшілік қызметшілерінің ротациясы енгізілді.
Ротацияның негізгі мақсаттары мемлекеттік органдар қызметінің тиімділігін арттыру, сыбайлас жемқорлық құқық бұзушылықтардың алдын алу, сондай-ақ қызметшілердің кәсіби әлеуеті мен басқарушылық тәжірибесін дамыту және тиімді пайдалану болып табылады.
Сондай-ақ, аталған Жарлықпен «Б» корпусының қызметшілерін ротациялау тәртібіне енгізілген толықтыруларға сәйкес, әкімдіктер басқармаларының басшыларын өңіраралық ротациялау мүмкіндігі енгізілді (бұрын оларды ротациялау тек бір өңір шегінде ғана мүмкін болатын).
Бұл ретте, «Б» корпусының қызметшісі өз лауазымына тағайындалған күнінен бастап үш жылдан кейін ротацияланады.
Осы лауазымда болу мерзімі уәкілетті адамның актісімен тағы үш жылға ұзартылуы мүмкін не «Б» корпусының қызметшісі атқаратын лауазымынан босатылуы не ол келіскен жағдайда лауазымынан төмендетілуі мүмкін.
Одан әрі, қызметшінің лауазымында болу мерзімін Ұлттық комиссияның шешімімен одан әрі екі жылға ұзартуға жол беріледі.
Бұл мерзім өткен соң «Б» корпусының қызметшілері де саяси және «А» корпусының лауазымдары тәріздес, лауазымында болуының мерзімі сегіз жылдан аспайды.
Бұдан бөлек, «Б» корпусының С-2, С-3, С-О-2, С-О-3, C-R-1, C-R-2, C-R-3, D-O-2, D-1, D-2, D-3, Е-1, E-R-1 санаттары (мемлекеттік органның бірінші басшысының орынбасары мен құрылымдық бөлімше басшылары) бойынша соңғы үш жыл бойы атқарып келген, әр түрлі әкімшілік-аумақтық бірліктерде жұмыс істейтін қызметшілерге де ротациялау мүмкіндігі берілді (бұрын оларды ротациялау қарастырылмаған болатын).
Бұл ретте, ротациялау әртүрлі мемлекеттік органдарда жұмыс істейтін қызметшілер арасында, осы қызметшілердің өзара келісімі болғанда уәкілетті адамдардың актілерімен ротация жүргізуге жол беріледі.
Сонымен қатар, жоғарыда аталған Жарлықпен «Б» корпусының лауазымдарына конкурс өткізілместен ауысу тәртібімен орналасу қағидалары жаңа редакцияда жазылып, алдағы уақытта мемлекеттік органдардың ішінде «Б» корпусының қызметшілерін ауысу тәртібімен тағайындау мүмкіндігі енгізілді.
Қағидаларға сәйкес «Б» корпусының қызметшісіне мемлекеттік органның ішіндегі өзге тең дәрежелі лауазымға және соңғы екі жыл бойы мемлекеттік органда келесі төмен тұрған лауазымды қызмет атқарған жағдайда сол мемлекеттік органның ішінде жоғары тұрған лауазымға ауысу мүмкіндігі берілді.
Мұндай жағдайда, қызметшіні ауыстыру үшін оның өтініші қажет, ал уәкілетті органның келісімі қажет емес.
Аталған өзгерістер мемлекеттік органдардың тиімділігін арттыруға, сыбайлас жемқорлықтың алдын алуға бағытталған.
Азамат Абылаев,
Қызылорда облысы әкімі аппаратының персоналды
басқару қызметінің басшысы

Ротация туралы не білеміз?

<a href="https://kyzylorda-news.kz/">Kyzylorda-news.kz.</a> Коронавирус жұқтырғандар көбейсе, маска режиміне қайта ораламыз. Бұл туралы Премьер-министрдің орынбасары Ералы Тоғжанов айтты.
<blockquote>
 «Әзірге ең маңызды мәселе – вакциналау. Науқастар саны өскен жағдайда маска тағу режиміне қайта оралуымыз мүмкін. Қазір тәулігіне 100 адамға дейін науқастар саны артып келеді. Карантин шараларын күшейту мәселесі ведомствоаралық комиссияның отырысында қаралады. Маска тағу жөнінде ғана емес, жалпы шаралар бойынша», – деді вице-премьер.
</blockquote>
Қазақстанда өткен тәулікте 137 адам коронавирус жұқтырды.

Коронавирус жұқтырғандар көбейсе, маска режиміне қайта ораламыз

<a href="https://kyzylorda-news.kz/">Kyzylorda-news.kz.</a>&nbsp; Жоғары және орта арнаулы оқу орындарына құжаттар қабылдау басталды. Әлеуметтік медициналық сақтандыру қорының Қызылорда облысы бойынша филиалына мемлекет МӘМС жарналарын төлейтін жеңілдікті санаттардың бірінің өкілдері ретінде студенттер үшін сақтандырылған мәртебесін алу мәселелерімен жиі жүгінеді.
Қор филиалының директоры Бақыт Исмаханбетов біздің тілшімізге бұл мүмкіндік шетелде оқитын қазақстандықтар үшін қалай қарастырылғанын, сондай-ақ студенттердің неге кейде сақтандырылмайтынын түсіндірді.
Жеңілдік бойынша сақтандыру кімге беріледі?
МӘМС туралы заңға сәйкес (26-баптың 1-тармағының 13-тармақшасы), жасына қарамастан, күндізгі оқу нысаны бойынша оқитындардың барлығы (мейлі ол 18 жасқа толған мектеп оқушылары болсын, колледж, ЖОО немесе басқа да оқу орындарының студенттері болсын) азаматтардың жеңілдікті санатына кіреді, олар үшін МӘМС жарналарын мемлекет төлейді.
Студенттер мемлекет есебінен сақтандырылған болып табылады және МӘМС пакетінде көрсетілетін медициналық қызметтерге қол жеткізе алады.
Қазақстанда &nbsp;оқитын студенттер үшін сақтандырылған мәртебесін алу алгоритмі:
Сақтандырылғандар мәртебесі Қазақстан аумағында оқитын азаматтарға жеңілдік ретінде беріледі және олардың деректері оқу орнының ақпараттық жүйесіне енгізіледі. Ол, өз кезегінде Қазақстан Республикасы Білім және ғылым министрлігінің қарамағындағы Ұлттық білім беру деректер базасымен (ҰБДҚ) біріктірілген.
Деректерді енгізуге студенттер оқитын оқу орындарының әкімшілігі немесе деканаттарының қызметкерлері жауапты болады. ЖСН, Т.А.Ә., оқу кезеңі және оқыту нысанын дұрыс толтыру міндетті шарт болып табылады. Егер бұл жолдар дұрыс толтырылмаған жағдайда, онда сақтандырудың жеңілдетілген мәртебесі автоматты түрде берілмейді.
Егер отандық ЖОО студенті сақтандырылмаған болса
не істеу керек?
Мәртебе ҰБДҚ-да студент туралы тиісті ақпараттың болуына байланысты берілетіндіктен, сіз өзіңіздің оқу орныңыздағы жауапты қызметкерге &nbsp;хабарласып, ақпараттық жүйеде деректерді тексеруді сұрауыңыз қажет. Кейде ақпараттың жаңартылмағаны анықталады.
Оқу орындарына арналған жадынама:
<ul>
<li>Оқу орнының ақпараттық жүйесіне білім алушылар туралы мәліметтерді (оның ішінде оқу жылы ішінде келгендер бойынша) уақтылы және дұрыс енгізу қажет, өйткені студенттерге ҰБДҚ-да біріктірілген деректердің болуы арқылы жеңілдік мәртебесі беріледі.&nbsp;</li>
<li>Егер бір жылдың ішінде білім алушы оқудан шығарылса немесе басқа оқу орнына ауыстырылса, онда ол туралы мәліметтерді өзінің оқу орнының ақпараттық жүйесінен алып тастау қажет.</li>
<li>Егер оқу орнының ақпараттық жүйесінде оқуды бұрын аяқтаған білім алушылар туралы деректер болса, оларды аталған жүйеден шығару қажет, өйткені бұл адамдар жұмысқа орналасу кезінде МӘМС жарналарын төлей алмайды.</li>
</ul>
Есіңізде болсын: Білім алушылардың МӘМС жүйесінде медициналық көмек алу мүмкіндігі ақпараттық жүйеде олар &nbsp;туралы мәліметтердің дұрыс және уақтылы толтырылуына &nbsp;байланысты болады.
Шетелде оқитын қазақстандықтар үшін сақтандырылған мәртебесін алу алгоритмі:
Шетелдік оқу орындарында оқитын қазақстандық күндізгі оқу нысанының студенттері МӘМС жүйесінде сақтандырылған тұлғалардың автоматты түрде жеңілдік мәртебесін ала алмайды. Ол үшін олар жүйеге өздігінен тіркелуі керек.
Ол үшін электрондық үкімет порталындағы egov.kz сервисін пайдалану қажет:
<ol>
<li>Ізденіс жолына келесіні енгізу: «Шетелде оқитын студенттерді тіркеу».</li>
<li>Ашылған терезедегі өтінішті толтыру және оқуды растайтын құжаттарды қоса беру қажет.</li>
<li>Өтінішке ЭЦҚ көмегімен қол қою.</li>
<li>Көптеген жағдайларда сақтандырудың жеңілдікті мәртебесі жолдарды дұрыс толтырған жағдайда 10 жұмыс күні ішінде беріледі.</li>
</ol>
5.&nbsp;&nbsp;&nbsp;&nbsp; Егер сақтандырудың жеңілдікті мәртебесін беру көрсетілген мерзім ішінде орындалмаса, онда ҚР Білім және ғылым министрлігінің Халықаралық департаментіне жүгіну қажет. Әр семестр аяқталғаннан кейін сақтандыру мәртебесін тексеру және оқудың өзектілігін растау қажет екенін есте ұстаған жөн, өйткені дерекқордағы мәліметтер өзгеруі мүмкін.
Кері байланыс
Өкінішке орай, күндізгі нысанда оқитын студенттердің барлығы МӘМС туралы заң бойынша өздерінің жеңілдік берілгендер санатында екендігін және МӘМС-ке жарналар мен аударымдарды төлеулері қажет еместігін біле бермейді. Әсіресе шетелде білім алып жүрген студенттер. Сондықтан Қор мемлекет есебінен олардың МӘМС жүйесінде сақтандырылған мәртебеге ие екендіктерін тағы да еске салады.
Егер студент көрсетілген тәсілдермен жеңілдік мәртебесін ала алмаса немесе мәртебесінен айрылып, оқу орнының қабырғасында шешім таба алмаса, онда ол өтінішті Қордың кеңсесі арқылы пошта арқылы жібере алады: kanc@fms.kz немесе Qoldau 24/7 мобильді қосымшасы арқылы. Қор өзіне жүгінген тұлғаға сақтандырылған мәртебесін беру үшін ҚР Білім және ғылым министрлігімен, ҚР Сыртқы істер министрлігімен ынтымақтастықта қажетті жұмысты жүргізеді.
Егер сұрақтарыңыз болса, Қорға келесі қол жетімді байланыс арналары арқылы хабарласа аласыз: fms.kz ресми сайты, 1406 байланыс орталығы, Qoldau 24/7 және Telegramдағы Saqtandyry-Bot мобильді қосымшасы.
<img src="https://kyzylorda-news.kz/wp-content/uploads/2022/06/stwdentter-1.jpg" alt="" />
<img src="https://kyzylorda-news.kz/wp-content/uploads/2022/06/stwdentter-2.jpg" alt="" />
<img src="https://kyzylorda-news.kz/wp-content/uploads/2022/06/stwdentter-3.jpg" alt="" />

Қазақстан және Қызылорда облысының жаңалықтары