<a href="https://kyzylorda-news.kz/ru/">Kyzylorda-news.kz</a>. Білім саласы ауқымды өзгерістерімен ерекшеленеді. Әсіресе, «Педагог мәртебесінің» сақталуы бойынша қолға алынған жұмыс көп.Мысалы, бір ғана «Педагог мәртебесі» туралы заң көп нәрсені өзгертті. Мектеп, колледж мұғалімдерінің, балабақша тәрбиешілерінің және қосымша білім беру саласы қызметкерлерінің жалақысын көтеру сияқты бірнеше бағытта жұмыс жүргізілді. Ұлттық статистика бюросының мәліметі бойынша соңғы 3 жылда мұғалімдердің жалақысы 2 еседен аса өскен. Ал биылғы жылы білім беру қызметкерлері мен педагогтардың еңбекақысы қосымша тағы 25 пайызға артты.Деректерге сүйенсек, биыл республикалық бюджеттен бұл бастамаға оларға біліктілік санаттары, магистр дәрежесі үшін қосымша ақы төлеуге және дене шынықтыру мұғалімдерінің сабақтан тыс сабақ өткізуіне 1,2 трлн теңге бөлінген. Оның 121,5 млрд теңгесі мектепке дейінгі білім беру педагогтеріне, 1 трлн теңгесі орта білім беру ұйымдарына, 39,8 млрд теңгесі техникалық және кәсіптік білім беру ұйымдарына бағытталды.«Мемлекет басшысы Қасым-Жомарт Тоқаевтың тапсырмасы бойынша 2021-2022 жылдардың қаңтарында жалақы 25%-ға өсті. Сәйкесінше жылдан жылға білім беру ұйымдары қызметкерлерінің, яғни тәрбиешілердің, мектеп пен колледж педагогтерінің, сондай-ақ қосымша білім беру жүйесі мамандарының еңбекақысын арттыруға бөлінетін қаражат көлемі ұлғайып келеді. Сондай-ақ олар біліктілік санаты (лауазымдық жалақының 30%-дан 50%-ға дейінгі мөлшерін), магистр дәрежесі, пәндерді ағылшын тілінде оқытқаны, дәптер тексергені, сынып жетекшілігі мен тәлімгерлік қызметі үшін қосымша ақы алады» делінген Оқу-ағарту министрлігінің ақпаратында.&nbsp;Бұған қоса «Мұғалім миллион ала ма?» деген сұрақты қоюшылар көп. &nbsp;«Бізде 350 мың мұғалімнің жалақысын төлеу жүйесі бірдей. Бірақ бірдей болғаннан кейін, екі мұғалім бір мектепте жұмыс істеп жатса, яғни жалақысы мен жүктемесі бірдей қойылса да, біліктілігіне сәйкес қазірдің өзінде айырмашылық бар. Мысалы, оның «шебер» деген біліктілігі болса, 50%-ке артық жалақы алады. Ал магистратура дәрежесі болса, онда ай сайын 30 мың теңге үстемақы төленеді. Сол сияқты бұл жерде де қосымша шарттар қосылып отыр. Егер сол мектептегі мұғалімнің өзі басқа тапшылығы бар жерге көшіп барса және ол тиісті емтиханнан өте алса, оның дәл осындай жалақы алуға мүмкіндігі бар» делінген тағы бір ақпарда.Бұдан бөлек, пән мұғалімдері мен сынып жетекшілері толтыратын құжат саны да қысқармақ. Енді тек әр мұғалім күніне тек қана екі құжат бекіту керек. Ол баланың бағасын қоятын электрондық журнал және мұғалімнің күделікті оқу жоспары. Басқа ешқандай қосымша құжат болмау керек. Бұдан артық құжатты талап ету заң бұзушылыққа жатады. Жауапты ведомство педагогтер қандай құжаттармен жұмыс жасаудан босатылатынына қатысты жадынама дайындаған. Енді келер жылдан бастап пән мұғалімдері дарынды балалармен жұмыс жоспарын, «Алтын белгіге» үміткерлермен жүргізілетін жұмыс туралы есепті, педогогикалық тәжірибені трансляциялау жөніндегі құжатты, кабинет паспортын, өзін-өзі дамыту бойынша жұмысты, оқушыларды қорытынды аттестаттауға және пән бойынша білім жетістіктерін бағалауға дайындық жоспарын, тоқсан-оқу жылы бөлінісінде пән бойынша үлгерім динамикасы бойынша есепті және аттестаттауға дайындық жоспарын толтыруға міндетті емес. Сонымен қатар Оқу-ағарту министрлігінің 2020 жылғы 6 сәуірдегі № 130 бұйрығына сәйкес, сынып жетекшілері де артық құжат толтыруға міндеттелмейді.Енгізілетін өзгерістерлегі мұнымен тоқтамайды. Бұған қоса мектеп мұғалімдерінің аттестациясына қатысты да жаңашылдық бар. Жыл басында мұғалімдердің, ауыл директорлары мен директор орынбасарларының, қала мектептерінің, білім бөлімдері мен білім басқармалары өкілдерінің қатысуымен педагогтердің аттестациядан өту жүйесін жетілдіру бойынша жұмыс тобы құрылған. Жұмыс тобы әдістемеге, әрбір біліктілік санатына қойылатын талаптарға, күтілетін нәтижеге, кәсіби стандарттың өзара байланысына және т.б. қатысты өз ұсыныстарын жасаған. Қазір барлық педагог аттестацияның екі кезеңінен өтеді: бірінші кезең – барлық педагогтің пән мен оқыту әдістемесін білуге арналған тестілеуден міндетті түрде өтуі және екінші кезең – педагог портфолиосын, жетістіктерін бағалау.Аттестацияға мынадай өзгерістер ұсынылады. Бірінші кезеңге, яғни ҰБТ-ға қатысты. Әдістеме бойынша тестілеу сұрақтарын қамтитын толық тақырыптар мен әдебиеттер барлығына қолжетімді болады. Педагогикалық өтілі 30 жыл және жаңа аттестация жүйесі бойынша санаты бар педагогтерді біліктілік тестілеуден босату ұсынылады. Олар аттестацияның екінші кезеңінен ғана өтеді, яғни портфолио тапсырады. Бұл ретте егер олар біліктілік санатын көтергісі келсе, онда аттестация жалпы негізде өтеді. Мысалы, 30 жылды қеңбекөтілі бар педагог-сарапшы өз санатын растаса, аттестациядан тек екіншікезеңнен ҰБТ-сызөтеді, ал арттырғысыкелсеқосымша ҰБТ тапсырады. Сондай-ақ педагогикалық өтілі 30 жыл, бірақескі аттестаттау жүйесі бойынша жоғары, бірінші санатты педагогтер, «педагог-модератор» санатына ауысатын болса, онда олар біліктілік тестілеуден өтуден босатылады. Бұл жағдайда олар аттестацияның екінші кезеңінен өтеді, яғни портфолио тапсырады. Ал егер бұл педагогтер аттестацияның жаңа жүйесі бойынша басқа санаттарды алғысы келсе, онда аттестация жалпы негізде өтеді. Зейнетке шығуына 4 жыл қалған мұғалімдер де жаңа жүйе бойынша бар санатын растаған жағдайда оларды аттестациядан босату ұсынылады. Ал егер олар қолданыстағы біліктілік санатын, тиісінше алатын үстемақысын арттырғысы келсе, онда аттестация жалпы негізде өтеді.Аттестацияның екінші кезеңінде де өзгерістер болады. Құжаттардың саны айтарлықтай қысқарады. Екінші кезеңдегі негізгі бағалау критерийлері: сабаққа қатысуы және оны талдауы, педагогтің біліктілікті арттыру курстарынан өтуі. ҰБДҚ-да әр мұғалім үшін маңызды ақпараты бар электронды портфолио құру жоспарланып отыр, мұғалімдер аттестация кезінде мәліметтерді сол жерден алады. Бұл шаралар мұғалімдерге біліктілік деңгейін арттыру мәселелеріне тиімдірек қарауға мүмкіндік береді. Гаждеттер заманын кітап заманына айналдыру үшін мектептердің базасында «құлыпсыз» кітапханалар ашу және өзге де бастамалар осы жылдың еншісіне белгіленіп отыр.&nbsp; &nbsp;

Мұғалім миллион ала ма?

<a href="https://kyzylorda-news.kz/">Kyzylorda-news.kz.</a> Жаңақорған кентіндегі №110 мектеп-лицейінде пәндік олимпиада білімпаздарды бақ сынады. Бұл кісінің есімімен тұңғыш рет өткен аудандық олимпиада Қазақ ССР халық ағарту ісінің озық қызметкері, білікті ұстаз, математик Үкібай Исаұлына арналды.Үкібай Исаұлы 1945 жылы Жаңақорған ауданы Бесарық ауылдық кеңесіне қарасты қазіргі «Қосымсарай» аталып жүрген жердегі Ворошилов колхозында дүниеге келген. Мектеп бітірген соң Қызылорда қаласындағы Н.В.Гоголь атындағы мемлекеттік педагогикалық институтына түсіп, математика мамандығы бойынша оқып, бітіреді. Еңбек жолын өзі оқыған №54 «Октябрь» орта мектебінде математика пәні мұғалімі боп бастады. Бүкіл саналы ғұмырын ұрпақ тәрбиесіне арнаған ол «Бесарық» сегізжылдық мектебінде директордың орынбасары, №239 «Кеңес» сегізжылдық мектебінде математика пәнінің мұғалімі, Алматы облысы Қаскелең қаласындағы орта мектепте математика пәнінің мұғалімі болып қызмет етеді. Көптеген мемлекеттік марапатқа ие болған. Осындай нар тұлғалы ұстазды еске алу мақсатында білім бәсекесінің жоғары деңгейде өтуіне облыстық білім басқармасы және аудандық білім бөлімі ұйытқы болды.Пәндік олимпиаданың ашылуында сөз алған аудандық білім бөлімінің басшысы Болат Ибрагимов:<blockquote>«Атаулы олимпиаданың мақсаты – математикадан қиындығы жоғары есептерді шығарумен шұғылданатын, танымал математиктердің ізін қуушы ынталы әрі дарынды жастарды анықтай отырып, математика және басқа да жаратылыстану салаларында мықты талапкерлерді анықтау, оларға қолдау көрсету. Мемлекет басшысы ҚасымЖомарт Тоқаев білім саласына ерекше назар аударып, Жолдауында да осы мәселеге үлкен көңіл бөлді. Қазір &nbsp;біліммен бәсекелесетін уақыт. Әлемнің озық елдері адами капиталды дамыту арқылы өркениет көшін түзеді. Біз де дамудың даңғыл жолында өз жолымызды табу үшін жастарға сапалы білім беруді жолға қоюымыз керек. Үкібай Исаұлы атындағы олимпиаданың осындай жұмысымызды жүйелеуде септігі көп. Қатысушыларға сәттілік тілеймін!» деді.</blockquote>Олимпиадаға аудандар бойынша 11 сынып оқушылары арасында 40 білімпаз қатысты. Олар математикадан 1,5 сағатта 4 тапсырманы орындады. Әр мектептің намысын қорғаған оқушылар білім таразысында үздік шығуға талпынды. Олимпиада қорытындысында жүлдегерлер анықталып, оларға сыйсияпаттар тапсырылды.<blockquote>«Әкеміз – осы ауданның тумасы. Осы ауданда еңбек етіп, саналы ғұмырын ұрпақ тәрбиелеуге арнаған ұстаз. Екі жыл бұрын 75 жасында дүниеден өтті. Әкемізді еске алу әрі жастардың математикаға деген қызығушылығын арттыру мақсатында ұрпақтары пән олимпиадасын өткізіп отырмыз. Биыл дәстүрлі түрде жалғасын тауып отыр. Бұл сауапті іс деп есептейміз. Былтыр бірінші орынды иеленген қыз Қорқыт ата атындағы университетке «математика» факультетіне грантқа оқуға түсіпті. Осы жерге ата-анасы келіп, оқушыларға сәттілік тілеп, алғыстарын білдіріп жатыр. Соған қарағанда бүгінгі келіп отырған 40 қатысушының барлығы да математика пәнін ұнатып, осы мамандыққа оқуға түсуге ниеттеніп отырған талапкерлер. Әкеміздің атын ұлықтап, отбасымыздың атынан осындай олимпиада ұйымдастыруды құп көрдік. Бірінші орынға – 150 мың теңге, екінші орынға – 100 мың теңге, үшінші орынға – 50 мың теңгеден екі орын тағайындадық. Алда осындай пән олимпиадасын облыстық, республикалық деңгейге көтеруге ниеттеніп отырмыз» деді ұлы Әбіләзиз Исаев.</blockquote>Пәндік олимпиаданы қашықтықтан бақылап отырған академик, физикаматематика ғылымдарының докторы, профессор Асқар Жұмаділдаев «ZOOM» бейне-конференция арқылы байланысып, пікір бөлісті. Әл-Фараби атындағы Қазақ Ұлттық университетінің механика-математика факультетінің деканы, доктор, профессор Дәурен Жәкебаев та жылы лебізін білдірді.Олимпиада қорытындысы бойынша үшінші орынды N54 мектептің оқушысы Кеңесбек Әбдімансұр мен N54 мектептің оқушысы Кеңесбек Әбдімансұр енжіледі. Екінші орынға N163 мектептің оушысы Әбділат Дана лайық болды. Ал, 40 оқушының арасынан N110 мектептің оқушысы Сағындық Тоғжан үздік шықты.<blockquote>«Бүгінгі сын мен үшін ауыр болды деуге келмейді. Олимпиада берілген барлық есепті шығара алдым. Жеңіске жеткеніме қуаныштымын, болашақта өзім де математика пәнінің мұғалімі болуды армандаймын. Бүгінгі бағытым соның бастауы деп білемін, ұстаздарыма үлкен алғыс білдіремін. Ал, математика пәнінің қас шебері Үкібай Исаевтың атындағы олемпиада бізге үлкен мүмкіндік деп есептеймін. Алдағы уақытта да өз жалғасын тапса деген тілегім бар» деді жарыс жеңімпазы.</blockquote>

Жаңақорған ауданында математик құрметіне олимпиада өтті

<a href="https://kyzylorda-news.kz/">Kyzylorda-news.kz.</a> «Amanat» партиясының республикалық сайлауалды штабы мүшелерінің өңірлердегі сайлаушылармен кездесулері жалғасып жатыр. Жуырда партиялықтар Шымкент қаласында болып, бизнес-қауымдастық өкілдерімен шағын және орта кәсіпкерлікті қолдау мәселелерін талқылады.Партия төрағасы Ерлан Қошанов партия шағын және орта бизнес үшін елде бизнес жүргізу бо­йынша қарапайым ережелерді қамтамасыз етуді жалғастыратынын атап өтті. «Біз жеке бастамалар мен нарықтық экономиканың күшіне сенеміз. Партия заңнама деңгейінде экономикадағы монополияны жоюға және адал бәсекелестікті дамытуға қол жеткізеді. 2027 жылға дейін біз кем дегенде 15 мың артық реттеуші кедергіні жоямыз», деді Е.Қошанов.Оның айтуынша, «Amanat» партиясы машина жасау, металлургия, тамақ және жеңіл өнеркәсіпте жүздеген жаңа кәсіпорын құруға ықпал етеді, онда жыл сайын кемінде 40 мың сапалы, жоғары жалақы төленетін жұмыс орны ашылады. Штаб мүшелері «Асар» шағын ауданының тұрғындарымен инфрақұрылымды дамыту және тұрғын үйге қолжетімділікке қатысты өзекті мәселелерді талқылады. Қала тұрғындары инженерлік желілердің тозуы, коммуналдық тарифтер құнының жоғарылауы, абаттандыру және жасыл желек тақырыптарын қозғады. Партия сайлауалды уәделерін орындау аясында Шымкентте 5,5 млн шаршы метр тұрғын үй салу, жақсы және қанағаттанарлық жағдайдағы автомобиль жолдарының үлесін 67,4%-дан 85%-ға дейін көбейту, аулаларда 100 ашық спорт алаңын салу және көшелерді жарықтандыру мәселесін толығымен шешу жоспарланып отыр.Аманаттықтар қаладағы «Белсенді ұзақ өмір сүру» орталығына барып, аға буын өкілдеріне зейнет жасындағы адамдардың өмір сапасын жақсарту жөніндегі партияның бастамалары туралы айтып берді. Осы күні «Айна» базарында өзін-өзі жұмыспен қамтыған жастармен экспромт-кездесу өтті. Шымкентте партияның сайлауалды бағдарламасы аясында 6 мыңнан астам жас тегін кәсіптік білім, 32 мың адам кәсіпкерлік негіздерін оқуға мүмкіндік алады және 5 мың жас алғашқы жұмыс орындарымен қамтамасыз етіледі.Үгіт-насихат науқаны басталғаннан бері 17 күн ішінде аманаттықтар 1 871 300 адам қатысқан 19 мың іс-шара өткізді. Қоғамдық қабылдау бөлмелеріне сайлаушылардың 14 700-ден астам ұсыныс-пікірі келіп түсті.

Шарапаты мол шағын бизнес

<a href="https://kyzylorda-news.kz/">Kyzylorda-news.kz.</a> &nbsp;Жаңақорған аудан орталығындағы ғасырлық тарихы бар ғимаратты жаңарту идеясын мекемеге жаңадан басшы болып келген Ажар Жанаева қолға алған. Жаңартылған музейдің ашылу салтанатына аудан әкімі бастаған ауданның зиялы қауым өкілдері арнайы қатысып, тарихи орынның тынысымен танысты.Музей толықтай жаңғыртылып, жаңа мебельмен жасақталыпты. Шынымен қапталған арнайы тақырыптық бұрыштар қайта жүйеленгені байқалды.Ауданның жаңа картасы алдымен көзге түсті. Туған жер табиғатына арналған алдыңғы залда облыстық музейден жеткізілген қасқыр, бүркіт, қаршыға сынды өз жерімізде мекендейтін аң-құс, жануарлардың табиғи мүсінінің қойылуы танымдық орталықтың сән-салтанатын арттыра түскен.Келесі қабырғада Жаңақорған өңірінің қола дәуірі, сақ дәуірі, орта ғасырлық кезеңдердегі тарихынан сыр шертетін жәдігерлер қатарында үш хандықтың астанасы болған Сығанақтан табылған мұраларға кең орын беріліпті. Музейде археологиялық қазба бұйымдарымен қатар жеке адамдардан алынған зергерлік бұйымдар да көз тартады. Ерте заманда баланың тұсауын кескенде қолданған әшекей мен әтір құтысын жекенің қолынан сатып алғандарын айтты экскурсовод. Бұл жерде алтынмен апталған бойтұмар, сырға, шашбау сынды сәнді бұйымдардың өрнегі өз алдына, тас диірмен, торсық, асадал, күбі, кесеқап сынды тұрмыстық бұйымдардың өзі халықтың ежелгі мәдениетінін хабар беріп тұр. Солардың қатарында тоқылған кілем, қасқыр ішік, сәнді оюланған бесік, басқа да жихаздық бұйымдар қол өнері ерте дамыған ежелгі салт-санамызды әйгілеп тұрғандай. Ал қазақ хандығына арналған бұрышта өз жерімізден шыққан Желкілдек батыр, Төлек батыр туралы мағлұматтар қойылыпты. Тіпті Төлек батырдың Ташкенттен ұрпағы әкеп тапсырған қылышы көрерменді еріксіз таң етті.Саяси қуғын-сүргінге арналған бұрышта ашаршылықта бір елді қорғап қалған бірліктік Ақылбай деген қарт әкеп тапсырған мылтық тұр. Ұлы Отан соғысы жылдарына арналған бұрышта жауынгер Тұрсынбек Исмайловтың әскери киімі қойылыпты. 64 дана сарғайған үшбу жауынгер хаты көңілді толқытты.Екінші залда ауданның құрылуы негізін дәйектейтін отызыншы жылдардан бастап бүгінге дейінгі тарихы сап түзепті. Ауданнан шыққан 13 Социалистік Еңбек ері, 20 Академик, мәдениет және өнер, медицина және спорт майталмандары туралы бай деректер қоры жинақталған. Манаптың домбырасы, Нартайдың сырнайы өткеннен сыр шертіп жүректі қозғайды. Мұнда Жандарбек Мәлібековтың өзі сыйға берген авторлық қолтаңбасы Қазақстан Республикасының Елтаңбасы сақтаулы. Музейді аралап шығып, бағасын берген қауым алдында сөз алған аудан әкімі Мұрат Тілеуімбетов:<blockquote>«Елде қайбір жаңалық болса ел ағаларының құлағы түрік. Музейдің жаңарғанын көріп қуанып жатырмыз. Өткенін білмей алдыға болжам жасау қиын. Музей – ертедегі өмірімізді көз алдымызға елестететін орын. Өйткені ол ата-бабаның күнкөріс жағдайы, кәсіп-қарекеті ғана емес сол дәуірдің болмысынан хабар береді. Руханиятынан мағлұматтар аңдатады. Ал енді осы жәдігерлердің жарқырап тұрғаны елдіктің мерейі. Сондықтан заманауи үлгіде талғам-талабы жарасқан тарихи орынды жасақтауға атсалысқан барша жанашыр азаматтарға алғысым үлкен. Бәрі басшыға байланысты. Жанашырлықпен жұмыс жасағаны көрініп тұр. Өткен күннің қадір-қасиетін бағалай білген азаматтарға рахмет», – дей келе, облыстық музей басшылығында экспо-зиция жұмысына өзіндік көмегімен дем берген қамқорлығына алғысын жеткізді.&nbsp;</blockquote>Бүгінде 11 мыңнан астам экспонатты шоғырландырған қасиетті мекеннің алдағы жұмысына сәттілік тіледі. Одан әрі аудандық ардагерлер кеңесі төрағасы Өмірсерік Тақырбасов сөз алып, ағалық батасын берді. Ал облыстық тарихи өлкетану музейінің директоры Сапар Көзейбаев өз сөзінде жергілікті маңызы бар ескерткіштер қатарында бір ғасырдан астам халыққа қызмет етіп келе жатқан еңселі ғимараттың ел мәдениетіне қосып келе жатқан үлесін айрықша айтып өтті. Оны 20 жыл басқарған Нәбихан Шалаповтың мүзей қорын құнды экспонаттармен толықтырудағы еңбегіне де жеке тоқталыр өтті. Мемлекеттен бір тиын қаржы алмай-ақ кәсіпкерлерді тартып, оған қосымша музейдің ақылы қызметінен түскен қаржыны үстемелеп, музейдің экспозициясын жасауға қол жеткізген Ажар Жанаеваға да өз атынан алғысын білдірді. Облыстық музейде былтыр экспозициялық бөлім ашылғанын, мына жетістіктер сол азаматтардың қолынан өткенін айтты.Сапар Әлиасқарұлы одан әрі музей экспозициясына қаржы салған азаматтарға облыстық Мәдениет және спорт басқармасының басшысы Руслан Рүстемовтың Алғыс хатын тапсырды. Олардың қатарында белгілі кәсіпкерлер Рахымбаба Құтыбаев, Әбдіхан Шайықов, Серік Әбжаппарұлы, Нұрғали Тұрсынбекұлы көпшілік алдында атаулы марапатқа ие болды. Сол сияқты аудандық мәслихат депутаты, кәсіпкер Әлібек Нәлібаевтың да музейге қамқорлығын айрықша айту орынды.Осы кешке келіп арнайы қатысқан ауыл шаруашылығы ардагері Алмас¬бек Омарұлы Қаратаудың қойнауындағы бай шежірені ұрпақ санасында тірілтуде музейдің қызметіне тоқталып, елге еңбегі сіңген қайраткерлерді тұлғаландыруда әлі атқарылар жұмыстың көп екендігіне тоқталды.Ал ел ағасы, «Қазақстанның Құрметті құрылысшысы» Алшынбай Тұртановтың мәдениет жанашыры екенін айқындайтын мына төмендегі пікірі көптің көңілінен шықты.<blockquote>«Музейдің ашылуы ауыр болды, –деді ол. Жекешелендірудің алғашқы кезеңдері Сібірден ағаш әкеп сатып, аудан шаруашылықтарын қамтамасыз етіп отырған кездеріміз болды. Сонда жеке кәсіпкерлігімнен он бес миллион теңге қаржыны осы музейдің аяққа тұруына қарызға болсын беріп, көп дүниенің жасақталуына үлес қосқаным үшін Алғыс хат алғаным бар еді. Міне, шын мәнісінде заманауи үлгіде жасақталғанын көріп тұрмыз. Мен өзім Алматы қаласындағы Қонаев ақсақалдың музейін аралап көргенім бар еді. Музей¬ді аралап жүргенімде ол кісінің бүкіл қасиеті санамызда тіріліп сала бергені атаулы орынның кереметтей киелілігінен болса керек. Сондықтан музейге жеңіл-желпі қарауға болмайды. Қазір мекеме басшысына құнды мүлік ретінде Герб авторының маған сыйлаған кітабын, содан кейін Жаңақорғаннан шыққан жалғыз әскери академик, Ресей және Қазақстан Академиясының академигі Сатыпалды Ділмановтың суретін табыс етпекпін», – деп өзінің үнемі руханияттың жоқшысы болып жүретін болмысын тағы бір танытты. Музей кеңейсе экспонат табылады.&nbsp;</blockquote>Бұл бұған дейін аудандық тарихи өлкетану музейін басқарып келген Нәбихан Шалаповтың пікірі.– Музей бүгінге дейін үш рет жаңарды, – деді ол. Музейдің алғашқы экспозициясын 1997 жылы аудандық Мәдениет үйінің екінші қабатында аштық. Музейдің үшінші экспозициясына елдегі азаматтардың көмектесіп отырғанына біз де ризамыз.<blockquote>«Музей – өткен өмір мен бүгінгіні жалғап тұрған алтын көпір. Осы жерде ауданымызға келген сол кездегі облыс басшысы Қырымбек Көшербаевтың «Тарихты білгің келсе Жаңақорғанға бар. Төрт хандықтың астанасы болған Сығанақ жатыр. Әулиені білгің келсе Жаңақорғанға кел, Қорасан Атадан бастап қанша әулиелер осы топырақта мәңгі тыныстауда, Байлықты білгің келсе Шалқия тұр, Менделеев кестесіндегі бүкіл элементтер осы төңіректен табылады» дегенін өз құлағыммен естіп едім. Екі мыңыншы жылдары Татьяна Бурмистрова келді ауылға, пойыздан түсе сала осында алып келдік. «Басқа жақтың музейінен не айырмашылығымыз бар екен?» деп сауал тастадық қонағымызға. «Музейдің айырмашылығы жоқ. Бірақ бір ерекшелік, бізді пойыздан түсе сала бірден музейге алып келдіңдер. Біз осы жерден ауданның бүкіл тарихын көріп тұрмыз. Осыдан шыға сала Сығанаққа барам, одан әрі Манап Көкеновтың басына құран оқимын. Орыс ойына келгенін айтады, мен ойыма келгенін айттым» дегені есте. Музей қорсыз болмайды. Қорға түскеннің бәрі экспонат болып есептеледі», – деп сөзін қорытындылады.</blockquote>Аудандық қоғамдық кеңес мүшесі Төребай Сапарбаев «Жақсы келсе күншуақ, білімді келсе шамшырақ» деген мәтел бар. Қай мемлекетке барсаңыз да мәдениеті мен тарихын музейінен білесіз. Өзім Парижде, Миланда, Сингапурде болғанымда музейіне бардым. «Жеті атасын білген ер жеті елдің қамын жер, жеті атасын білмеген жағы менен тілін жер» дегендей, ұрпаққа кешегі тарихының тамырын ұғындыру үшін бұл музейдің орны бөлек» деген пікірін айтты. Шиелі ауданы Ыбырай Жақаев атындағы музейдің директоры, «Мәдениет саласының үздігі» Құттықыз Ықанованың тілектестік лебізі жиналғандардың барлығын риза етті.<blockquote>«Тұғырда тас мүсін емес, тарих жатыр. Экспонатсыз музей ол ерттелмеген атпен тең. Осы уақытқа дейін осы музейді инемен құдық қазғандай еңбегімен жинақтаған Нәбиханға рахмет. Осыны жандандыруда әрі қарай да жанашырлықпен жұмыс жасап жатқан әріптестеріме рахмет. Музейдің жұмысын ғасырлар бойы тарихи тұрғыда жандандыру керек. Еленбей қалған қалған есімдерді тірілту керек. Елдің елдігі мұраны жарқырата білуімен танылады. Осы үрдіс одан әрі де жалғасын таба берсін», – деді ол.</blockquote>Жаңақорған аудандық тарихи-өлкетану музейі бұған дейін де көрерменсіз емес, күн сайын түрлі шаралар өткізіліп жататын. Енді мынадай жаңарған сәулетіне сай мұнда келушілер қатары арта түсері анық. Өткеннің мұрасын көзбен көріп, қолмен ұстағанның әсері тым бөлек. Алдағы уақытта ата-ана да ұл-қызын тариха орынға әкеліп отырса, байланыс нығая түседі деген сенімдеміз.

Жаңақорған ауданында музей экспозициясы жаңартылды

<a href="https://kyzylorda-news.kz/">Kyzylorda-news.kz.</a> Жаңақорған ауданында соңғы жылдары гандбол спорты кеңінен дамыды. Бапкерлікке Құнанбай Салыбеков келгелі аудан гандболы биіктей түскен. Соның жемісінің бірі Жанерке Сейітқасымды айтуға болады. Ол бүгінде Сыр құрамасын ғана емес, ұлттық құрманың да белді ойыншысы. Ол әлі жас, болашағы алда, сондықтан бұл қызды қалай таныстырсақ та жарасады.Жанерке Келінтөбе ауылының тумасы. Аядай ғана ауылдан Сыр гандболын өрге сүйреп жүрген өрендер шықты. Соның көшін Жанерке бастап келеді. Бойы аласа келген, қазақтың қара торы қызы қазір ұлттық құраманың белді ойыншысы. 12 жасынан бастап Құнанбай Салыбековтің қол астында жаттығып жүрген талантты шәкірт небәрі 15 жасында «спорт шебері» атанды. Осылайаудан спортшылары арасындағы жас рекордсмендер қатарынан көрініп, тарихта қалды.<blockquote>«Жанерке қазіргі уақытта облыстың «Сейхун» командасының сапында ел біріншілігінде жүр. Небәрі жиырмадағы қыздың жетістігі жаман емес, әзірге оның еншісінде Азия жүлдегері деген атағы бар. Бұйырса әлемдік дода өнер көрсетіп, чемпион атанады деген үмітіміз зор» деді алғашқы бапкері.</blockquote>Жанерке Құнанбайдың қол астында шыңдалып, қазір Вячеслав Ким мен Ольга Егунова сынды білікті бапкерлерден тәлім алады. Жалпы, талантты қызды әкесі Аманжол Бақбергенов 2014 жылы гандболдан ауданның аға жаттықтырушысы Құнанбай Қайратұлына тапсырады. Араға екі жыл салып жасөспірімдер құрамасында тер төккен шебер ойыншы көпшілікті тәнті етеді. Облыстық ашық біріншіліктерде көзге түсіп жүрген келінтөбелік гандболшы 2016 жылы Қызылордадағы Жалаңтөс Баһадүр атындағы дарынды балаларға арналған мектеп-интернатқа оқуға түсті. Сол жылдан бастап облыс командасының құрамына ілініп, мықтылығын дәлелдей алды.<blockquote>«Ең бірінші маған тәлім-тәрбие берген ата-анама, Құнанбай бапкеріме, демеу беретін достарыма алғысым шексіз. Басында қай спортқа бару керек деген сауал болған, алайда ауылдағы гандбол спортының беталысы мені тәнті етті. Алтыншы сыныпта жүргенде осы спортқа келдім. Қазір облыс командасының құрамында жаттығып жүрмін. Шүкір етемін. Алда жоспар көп, тек аянбай еңбек ете білсек болғаны» деді жас спортшы.</blockquote>Иә, үш мыңға жуық тұрғыны бар Келінтөбе ауылында гандбол спорты өте жақсы дамып келеді. Тіпті, аудан құрамасының барлық ойыншылары осы ауылдың түлектері. Облыстық жарыстарда үздік үштіктен түспейтін команданың бұрымдыларының табысты өнер көрсетіп жүргенін білеміз. Әрі, мақтан тұтамыз. Құнанбай бапкер баптаған қыздар әлі биіктерден көрінетініне сенім мол. Тек ептеп демеулік жасап жіберсек болғаны. Ол үшін Келінтөбеде салынатын спорт кешенінің құрылысын тездетіп бітіру керек.Тынымсыз еңбек, төккен тер, үкілеген үміттің арқасында жас гандболшы осындай биіктерге жетті. Ата-анасы да қыздарына қолдау көрсетіп, үнемі жанынан табылуға тырысады. Иә, «баласы көкпар шапса, анасы үйде отырып тақымын қысады», демекші анасының да көңілі әрдайым балапаны үшін алаңдаулы.<blockquote>«Қызым үшін алаңдап, амандығын тілеп отырамын. Оның спортта жүргеніне өте қуаныштымын. Біз оған әрдайым қолдау көрсетіп, биіктерден көрінуіне тілектестік білдіреміз. Жанеркенің болашағынан біз ғана емес, жанкүйерлері мен бапкерлері үлкен үміт күтеді. Сондықтан, аянбай еңбектенуі керек» деді анасы Айгүл Қалжанова.</blockquote>Жанеркенің ізін басып жүрген бұрымдылардан құралған «Сығанақ» командасы облыс біріншілігінде үнемі үздік үштіктен түспей келеді. Құнанбай Салыбековтың төл шәкірттеріне әзірге қала құрамасы ғана төтеп бере алуда. Ал аудандар арасынан алтын біздің қыздардың қанжығасында. Қазір алты бірдей ару Сыр елінің атынан сынға түсетін «Қайсар» командасында өнер көрсетсе, Жанерке Сейітқасым ұлттық құраманың құрамын толықтырды. Байрақты бәсекелерде ел мерейін үстем етіп, өзінің мықты екенін дәлелдеп келеді.Қол добы, яғни гандбол спортының бұл әлі бастамасы деп білеміз. Өйткені Жанеркенің ізінен ерген жаңақорғандық қыздардың қарқыны қатты. Ең жас ойыншы Нұрдана жасы жетпесе де облыс құрамасына шақырту алып, бүгінде жастардың сапында жалындап жүр. Міне, біздің гандболшы қыздардың әзірге биігі, бұйырса бұдан да мол табысты өнер көрсетеді деп үміттенеміз. Ол да уақыттың еншісінде.

Жаңақорғандық Жанерке «спорт шебері» атанды

<a href="https://kyzylorda-news.kz/">Kyzylorda-news.kz.</a> «Respublica» партиясының Көкшетаудағы жиындарына мыңға жуық адам қатысты. Көкшетау қаласында ауыл шаруашылығы тауар өндірушілері, еңбек ұжымдары және іскер әйелдер қауымдастығы өкілдерімен кездесулер өтті.<blockquote>«Қазір университеттер мен бизнестің әртүрлі кеңістікте екенін көріп отырмыз. Бизнес өкілдері жоғары оқу орындарының қамқоршылық кеңестерінде болып, болашақ мамандарды даярлау бағдарламаларын реттеуі қажет. Бұл шара орта мерзімді перспективада білім сапасы мен елдің кадрлық әлеуетін арттыруға мүмкіндік береді», деді партия төрағасы, Парламент Мәжілісінің депутаттығына кандидат Айдарбек Қожаназаров.</blockquote>Ол «Тыныс» АҚ ұжымымен кездесу барысында жоғары білікті мамандарды даярлау үшін бизнес пен жоғары оқу орындарының белсенді ынтымақтастығы қажеттігін атап өтті.Ал партияның тең төрағасы, Парламент Мәжілісінің депутаттығына кандидат Динара Шүкіжанова облыстық іскер әйелдер қауым­дастығының өкілдерімен кездесуінде қоғамда әлі күнге дейін әйелдермен байланысы бар стереотиптер тақырыбын көтерді.<blockquote>«Қостанай қаласында «АгромашХолдинг KZ» және «СарыарқаАвтопром» сияқты комбайн мен машина шығаратын зауыттар бар екенін бәріңіз білесіздер. Мен осы құрылымдарға 2011 жылы қатардағы қызметкер болып келдім, 12 жылдан кейін осы кәсіпорындарды басқаруға кірістім. Бір күні клиенттердің бірі менімен кездесуге келді. Дәлізде жүр екен, қарсы алайын деп алдынан шықтым, ол күртешесін шешіп, менің қолыма ұстатты. Содан соң: «Рахмет, сіздің президентіңіз қайда?» деді. Мен президент екенімді айттым, бірақ ол: «Жоқ, жоқ! Компанияның прези­денті Динара қайда?» деді. Мен компанияның бас­шысы екенімді айттым тағы да. Ол таңғалды, кең шалбар киген, қолында балғасы бар, бойы екі метр әйелді елестеткенін де жасырмады. Мен мұндай стереотиптерді жиі кездестіремін», деді Динара Шүкіжанова.</blockquote>Жалпы, «Respublica» партиясының тең төрағасы қоғамдағы көшбасшы әйелдерге деген көзқарасты өзгерту қажет деп санайды. «Парламенттегі әйелдер үлесін арттыруды талап етуінің бір себебі де осында», дейді ол.

Білім мен біліктің бірлігі

<a href="https://kyzylorda-news.kz/">Kyzylorda-news.kz.</a> «Ауыл» партиясынан түрлі деңгейдегі жергілікті мәслихаттарға кандидат Асқар Болатбек, Әлия Аяпбергенова, Абзал Жиенбаев, Байқоңыр Сейдалин, Гүлназ Омарова, Балтабек Жоламанұлы Ұлытау облысында зиялы қауым өкілдерімен кездесті.Кандидаттардың зиялы қауым өкілдерімен және ауылдық мәдениет үйлері­нің қызмет­керлерімен кездесуі «Ұлытау – ұлт ұйытқысы» тақырыбында өтті. Кандидаттар үгіт-насихат жұмыс­тарын жүргізіп, қатысушылармен ауыл­дағы мәдениет саласына қажет қолдау туралы сөз қозғады.<blockquote>«Біздің сайлауалды бағдарламамызда ауыл­дық аумақтарды жақсартуға қажет барлық аспек­ті ескерілген. Қазіргі таңда ауыл мен қала арасында бірден көзге ұратын әлеуметтік теңсіздік бар. Ол экономиканың нақты секторына және ауылдың демографиялық әлеуетіне зиян келтіретін қайтымсыз урбанизация үдерісін бастады. Ауыл тұрғыны, әсіресе әйелдер мен жастар үшін қалаға бару «барса келмеске» айналды. Сондықтан «Ауыл» партиясы ауыл мен қала арасындағы қызмет сапасының айырмашылығын айтарлықтай қысқартуды көздейді. Қала тұрғынына берілген барлық жағдай мен жайлылық ауыл тұрғынында да болуға тиіс», деді Абзал Жиенбаев.</blockquote>Бұдан кейін кандидаттар Ұлытау облысының ауыл шаруашылығы өндірушілерінің дөңгелек үстеліне қатысты. Жиналыста кандидаттар «Ауыл» партиясы Парламент Мәжілісінде «Азық-түлік қауіпсіздігі туралы» жаңа заңды қабылдауға бас­тамашы болуға дайын екенін атап өтті.«Бұл заң ауыл халқын сапалы және тұрақты әлеу­меттік қамтамасыз етуге, ауыл инфра­құры­лымын тұрақты бюджеттік қаржыландыруға, аграр­шылар мен отандық азық-түлік өндіруші­лерін сөз­сіз мемлекеттік қолдауға берік кепілдіктер береді», деді кандидаттар.Сондай-ақ «Ауыл» партиясының делегация­сы Сәтбаев қаласында болып, «Қазақстан» спорт­тық-сауықтыру кешенінің ұжымымен кездесті. Кешен қызметкерлері партияның сайлауалды бағдарламасымен танысып, өздерін қызықтыр­ған сұрақтарын қойды. Кандидаттар айтылған мәселелерді, ұсыныстарды назарда ұстап, құзырлы органдармен бірге проблеманы шешудің жолын қарастыруға уәде берді.

Қала тұрғынына берілген барлық жағдай ауыл тұрғындарына да жасалуы тиіс

<a href="https://kyzylorda-news.kz/">Kyzylorda-news.kz.</a> Қазақстан Халық партиясынан Мәжіліс депутаттығына кандидат, партия төрағасының орынбасары Асхат Асылбеков Маңғыстау облысындағы «ӨзенМұнайГаз» ЖШС ұжымымен кездесті.Партия өкілі серіктестік ұжымына Халық пар­тиясының сайлауалды бағдарламасын таныс­тырды. А.Асылбеков партия елде қалыптасқан жүйенің мәнін түбегейлі өзгертуді талап ететінін, билік пен байлық Қазақстан халқына тиесілі болатын әділетті қоғам құруды қолдайтынын және билік өкілеттіктерін бөлуде тежеу мен тепе-теңдіктің саяси жүйесін сақтауды жақтайтынын жариялады.<blockquote>«Біз азаматтардың құқығы мен бостандығы барлығынан жоғары тұратын нағыз халықтық мемлекет құруды қолдаймыз. Жер мен жер қойнауы халыққа тиесілі болу керек», деді ол.</blockquote>Кандидат Жаңа Қазақстанға жалдамалы қыз­меткерлердің&nbsp; әлеуметтік және еңбек құқығын толық қорғайтын жаңа Еңбек кодексі қажет екенін мәлімдеді.<blockquote>«Экономикада орта тап құруға және кедей­лікті жоюға мүмкіндік беретін жаңа тәсілдерді енгізу маңызды. Халық партиясы ел аумағын­да өз азаматтарымыз өндірген тауарлардан, көрсеткен қызметтерден қосымша құн салығын алып тастауды және айналымға 5% мөлшерінде бірыңғай салық енгізуді қолдайды», – деді партия өкілі.</blockquote>Кездесуде білім, медицина, құрылыс сала­ларындағы өзекті мәселелер де талқы таразысына салынды. Кандидат мемлекеттік мекемелерде (арнаулы орта және жоғары) білім беру мен денсаулық сақтау мамандарын тегін оқыту, әйелдердің зейнетке шығу жасын 58-ге бекіту, ал 4 және одан көп бала тәрбиелеп отырған аналарды 55 жасқа дейін зейнетке шығару ұсынысын қолдайтынын, бұл бағытта жүйелі жұмыстарды жалғастыра беретінін айтты. Кандидаттар сайлауалды бағдарламада банктерге азаматтардың артық төлемдерін қайтарып беру туралы талап қойғандарын мәлімдеді.<blockquote>Кандидат халықтың қарызға батқанын, онлайн несиенің салдарынан елімізде алаяқтардың қаптап кеткенін, жастардың құмар ойынының құрбанына айналып бара жатқанын да алға тартты. «Қазір онлайн несиенің жарнамасы қаптап кетті. Халық мәжбүрліктен несие алып, қарызға батып отыр. Алаяқ компаниялар елді қанап жатыр. Осыларды мемлекет ауыздықтауы керек», деді кандидат.</blockquote>

Еңбек кодексін өзгертуді ұсынды

<a href="https://kyzylorda-news.kz/">Kyzylorda-news.kz.</a>&nbsp; Биыл Алаш қайраткері, ақын, қазақ әдебиетінің жарық жұлдызы Мағжан Жұмабаевтың туғанына 130 жыл толып отыр. Жыл көлемінде қазақтың арынды ақынына арналған айтулы іс-шаралар күнтізбелік жоспарға қойылған. Өз кезегінде Қоғалыкөл ауылдық клуб үйінде өлеңдерімен оқырман жүрегінен жол тапқан Мағжан Жұмабаевты еске алуға арналған жазба ақындар мүшәйрасы өтті.<blockquote>«Мен жастарға сенемін» тақырыбында өткізілген жазба ақындар мүшәйрасы 2 кезеңнен тұрды. Аталған мүшәйрада жас ақындар Мұхамеджан Мансұров, Елдос Жаппасбаев, Бақтөре Айтбаев, Құндыз Бажиева, Әсел Зұлпар, Тұмарлан Өмірбек, Баубек Әуесхан, Асанова Гүлжазира, Нұрсұлтан Сүйіндіков, Ержан Мұхиятдинов бақ сынады. Алғашқы кезеңде аузымен құс тістеген жасқа ақындар Мағжан Жұмабаевқа арналған өлеңдерін оқыды. Сонымен бірге екінші кезеңде олар еркін тақырыптағы өлеңдерін көпшілікке ұсынды. Өз кезегінде мүшәйрада оқ бойы озып шыққан 5 ақын арасында үшінші кезең ұйымдастырылды. Заматында жас ақындар «Ақ шашты көрдім апа самайыңнан» тақырыбында 2 шумақ өлең шығарды.</blockquote>Өз кезегінде Қоғалыкөл ауылдық ардагерлер кеңесінің төрағасы Базарбек Жаныбаев пен №44 орта мектептің Сламбек Қаюпов ардақты ақын жайлы ойларын ортаға салды.<blockquote>«Бүгін біз Қоғалыкөл ауылында ерекше жыр кешіне куә бола білдік. Жас ақындар шама-шарқы жеткенше Алаш қайраткерінің өмірін, тым қысқа ғұмырын жырға қосты. Барлық ақынның талабы таудай. Өлеңнің техникасын меңгерген жас ақындар тақырыпты аша білді. Жалпы, елінің егемендігі үшін күрескер атанған Мағжан ақын өлеңдері арқылы халықтың мұң-мұқтажын жырлай білді. Әрине, осындай дара тұлғаға лайықты құрмет көрсетлуі керек», – деді Қоғалыкөл ауылдық ардагерлер кеңесінің төрағасы Базарбек Жаныбаев.</blockquote>Мүшәйрада жасқан ақындардың өнеріне жергілікті ақын Байрон Есенбаев, аудандық мәдениет үйінің әдіскері Гаухар Сәрсенбаева, аудандық «Тіршілік тынысы» газетінің тілшісі Балтабай Ордабеков баға берді. Сөз сайысының нәтижесінде, ІІІ орынды Тұмарлан Өмірбек, ІІ орынды Бақтөре Айтбаев, І орынды Мұхамеджан Мансұров, бас жүлдені Ержан Мұхиятдинов еншіледі. Барлық ақынға арнайы диплом мен бағалық сыйлық табысталды.&nbsp;&nbsp;

 Шығармашылық кеш ақын рухына арналды

<a href="https://kyzylorda-news.kz/">Kyzylorda-news.kz.</a>&nbsp; «Ақ жол» партиясының төрағасы Азат Перуашев, партия төрағасының орынбасары Қазыбек Иса, партияның Жетісу облыстық филиалының төрағасы Ермек Егінбаев пен Мәжіліс және жергілікті мәслихат депутаттығына кандидаттар бастаған «Ақ жол» партиясы республикалық штабының мүшелері Талдықорған қаласының еңбек ұжымдарымен кездесу өткізді.Ақжолдықтар еліміздегі ең ірі аккумулятор зауыты – «Қайнар-АБК» ЖШС жұмысшыларымен кездесті. Кәсіпорында 1200-ден астам адам еңбек етіп, мекеме 40 жылдан астам табысты дамып келеді. Жиын барысында партия басшысы жұмысшыларға партияның саяси бағдарламасын таныстырып, «Ақ жол» жұмысындағы басым бағыттарды атады. Сондай-ақ мұндай салаларға мемлекеттік қолдаудың жаңа тетіктері қажет екенін айтты. Қызметкерлер баспананың қолжетімділігі, БЖЗҚ-дағы қаражатты басқару, тұтыну несиелерінің жоғары пайыздық мөлшерлемесі туралы сұрақтар қойды. Зейнеткерлікке шығу жасын төмендету, еңбек жағдайлары ауыр, зиянды және аса зиянды жұмыскерлердің 1 және 2 тізімдерін қайтару туралы өтініштер айтылды.Одан кейін «Ақ жол» кандидаттары Талдықор­ған­дағы көпсалалы аурухананың медицина қызметкерлерімен кездесті. Азат Перуашев нарықтық медициналық сақтандыруға көшу, дәрігерлерге бәсекеге қабілетті еңбекақы төлеу, МӘМС шоттарын жекелендіру, саламатты өмір салтын насихаттау, денсаулық сақтау саласын цифрландыру бойынша партияның ұстаны­мын баяндады. Қазыбек Иса «Ақ жол» фракциясы мен Денсаулық сақтау министрлігі арасындағы медициналық мін­детін атқару кезінде COVID-19 инфекциясын жұқ­тырған медицина қызметкерлеріне төлемдерді алып тастауға жол берілмейтіндігі туралы өткір пікірталастары туралы, медицина қызметкерлері­нің құқығы мен мәртебесі туралы заң қабылдау туралы депутаттық сауалдарды тілге тиек етті. Аурухана дәрігерлері мен медбикелері несие пайызының жоғарылығына, баспананың қолжетімсіздігі­не, жедел жәрдем бригадаларының бұзақы­лар әрекетінен қорғалмағандығына шағымданды. Сұрақтарға жауап берген партия өкілдері «Ақ жол» партиясының бастамасымен қабылданған жеке тұлғалардың банкроттығы туралы заңының қолдану тәртібін түсіндіріп, Ұлттық банкпен несие мөлшерлемелерін төмендетуге қатысты пікірталастары жөнінде айтты.

Медицина саласы назардан тыс қалмайды

<a href="https://kyzylorda-news.kz/">Kyzylorda-news.kz.</a>&nbsp; «Байтақ» жасылдар партиясының өкілдері «Дауыс» қоғамдық байқаушылар коалициясы» республикалық қоғамдық бірлестігі мүшелерімен кездесті. Жүздесу аясында екі тарап сайлау кезіндегі әділдікті бақылаудың методологиясымен бөлісті.«Дауыс» қоғамдық байқаушылар коалиция­сы» республикалық қоғамдық бірлестігінің төраға­сы Төлеген Күнәділов жүйелі түрде жұмыс істеу­ге бел буғандарын атап өтті. «Заң шеңберінде комиссия құрылды. Бүгінде 10 мыңдай байқаушы бар, алдағы уақытта олардың санын екі еселеуді жос­парлап отырмыз. Адамдар қаншалықты белсен­ді болса, соғұрлым сайлауды әділ, бұрмалау­сыз өткізуге болады», деді қоғамдық бірлестік төрағасы.Жасылдар партиясының жетекшісі өз кезе­гінде ұйым инфрақұрылымдары арқылы 9 600 бай­қаушы қоюды жоспарлап отырғанын, сондай-ақ күні кеше ЕҚЫҰ-дан байқаушылар келіп жұмыс барысын тексеріп, ешқандай кедер­гілер жоқ екенін мәлімдегенін айтты. Айта кетсек, алдағы сай­лауға партия атынан 187 үміткер қатысады. Олар­дың 20-ы (18-і партиялық тізім бойынша, екеуі мажоритарлық жүйеге сәйкес) Мәжіліс депу­таттығына, 167-сі (91-і партиялық тізім бойын­ша,76-сы мажоритарлық жүйеге сәйкес) қалалық мәслихат депутаттығына үміткер.«Бұл жолғы сайлау ерекше болады. Халықтың белсенділігі артты, себебі жаңа тұлғалардың пайда болғанын көрді. Біз кандидаттарымызға сенімдіміз. Олардың ниеті таза, жалпы біз қай жақтан алсақ та, таза идеологияны ұстанамыз. Президентіміз «Жаңа Қазақстан – Әділетті Қазақстан» деп айтқан болатын, сондықтан сайлау әділетті болатынына сенеміз», деді «Байтақ» жасылдар партиясының төрағасы Азаматхан Әміртай.Жалпы, партия атынан Мәжіліс депутаттығына тізім бойынша 18 кандидат ұсынылған. Олардың қатарында әйелдер квотасы бойынша – 4, жас­тар квотасымен – 1 және мүгедектігі бойынша 1 үміткер бар. Тағы төрт үміткер мажоритарлық жүйе бойынша сайлауға қатысады. Ал жергілікті мәслихаттарға 160 кандидат тіркелген. Естеріңізге салсақ, «Байтақ» жасылдар партиясы 2022 жылдың соңында экологиялық тұрақты қоғам құру, халықтық демократия және экологияға ұқыпты қарау қағидаттарын қолдау мақсатында құрылған болатын.

Сайлау-2023: Халықтың белсенділігі артты

<a href="https://kyzylorda-news.kz/">Kyzylorda-news.kz.</a>&nbsp;Жалпыұлттық социал-демократиялық партиясы атынан Парламент Мәжілісінің депутаттығына партиялық тізімі бойынша кандидат Анаргүл Әбенова Батыс Қазақстан облысының Теректі, Бөрлі және Шыңғырлау аудандары бойынша «Үгіт-насихат пойызын» іске қосты.Өңірлерге сапар барысында Анаргүл Әбенова жергілікті сайлаушылармен кездесіп, партияның сайлауалды бағдарламасының басым бағыттары жөнінде баяндап, жиналған қауымның сұрақтарына жауап берді. «Үгіт-насихат пойызы» аясында ЖСДП белсенділері еліміздің бірқатар өңірін аралап, сайлаушылармен кездесулер өткізді.Кандидат партияның сайлауалды бағдар­лама­­сын­да білім беру саласының дамуына ере­кше көңіл бөлінге­нін атап өтті. Медицина және білім беру салаларына ІЖӨ-ден жылына ең кемі 5-7%-ды бөлу ұсынылған. Жалпыұлттық социал-демократиялық партия өкілдері мұндай шара дәрігерлер мен мұғалімдер еңбекақысының банк қызметкерлері деңгейіне дейін көтеруге мүмкіндік беретінін айтты.Кандидат мемлекет алдында тұрған басты мәселе жем­қорлыққа қарсы күрес екенін атап өтті. Оның пікі­рінше, ол үшін ең алдымен саяси реформаларды жүзеге асыру керек және мәжілістің рөлін күшейту керек.<blockquote>«Ашықтық пен әділдікке негізделген азаматтық қоғам құру – қазіргі күннің басты талабы. Бұған бастайтын бірден-бір жол – жемқорлықты түп-тамырымен жою. Елімізде сыбайлас жемқорлыққа қарсы күрес қаншалықты нәтижелі атқарылып жатқанын нақты айту қиын. Мемлекет қаржысына қол сұққан шенеуніктердің темір торға тоғытылуы мәселенің шешіліп жатқанын аңғартпаса керек. Проблеманың себеп-салдарымен күресу маңызды. Реформалардың бірі бюджет процедураларын жетілдірумен айқындалады. Әр елді мекенде өзіне тиесілі ашық бюджет жасақталып, нақты уақыт режімінде онлайн түрде мемлекет қаржысының қалай және қайда жұмсалып жатқандығы ашық көрсетіліп отыруы керек. Сондай-ақ орталық және жергілікті атқару органдарында барлық деңгейдегі депутаттар мен шенеуніктердің кіріс-шығысы туралы міндетті жария декларацияны шұғыл түрде енгізу қажет», деді кандидат.</blockquote>&nbsp;

Қазақстан және Қызылорда облысының жаңалықтары

Мұғалім миллион ала ма?

Жаңақорған ауданында математик құрметіне олимпиада өтті

Шарапаты мол шағын бизнес

Жаңақорған ауданында музей экспозициясы жаңартылды

Жаңақорғандық Жанерке «спорт шебері» атанды

Білім мен біліктің бірлігі

Қала тұрғынына берілген барлық жағдай ауыл тұрғындарына да жасалуы тиіс

Еңбек кодексін өзгертуді ұсынды

Шығармашылық кеш ақын рухына арналды

Медицина саласы назардан тыс қалмайды

Сайлау-2023: Халықтың белсенділігі артты

Мемлекет алдында тұрған басты мәселе жемқорлыққа қарсы күрес

Қазақстан және Қызылорда облысының жаңалықтары

Мұғалім миллион ала ма?

Жаңақорған ауданында математик құрметіне олимпиада өтті

Шарапаты мол шағын бизнес

Жаңақорған ауданында музей экспозициясы жаңартылды

Жаңақорғандық Жанерке «спорт шебері» атанды

Білім мен біліктің бірлігі

Қала тұрғынына берілген барлық жағдай ауыл тұрғындарына да жасалуы тиіс

Еңбек кодексін өзгертуді ұсынды

Шығармашылық кеш ақын рухына арналды

Медицина саласы назардан тыс қалмайды

Сайлау-2023: Халықтың белсенділігі артты

Мемлекет алдында тұрған басты мәселе жем­қорлыққа қарсы күрес

Мемлекет алдында тұрған басты мәселе жемқорлыққа қарсы күрес