<a href="https://kyzylorda-news.kz/">Kyzylorda-news.kz.</a>&nbsp; Биыл Қызылорда қаласында жол-көлік инфрақұрылымын дамыту бағытында 231 көшеге жол жөндеу жұмыстарын жүргізу қарастырылған. Осы мақсатта бюджеттің барлық түрлері мен мемлекеттік бағдарламалар арқылы жалпы соммасы 10 млрд. 246 млн. теңге бөлінді. Қазіргі таңда, жол жөндеу жұмыстары «Саяхат», «Бәйтерек» тұрғын аудандарында басталды.&nbsp;Айта кету керек, «Ауыл - Ел бесігі» жобасы аясында&nbsp; Қызылжарма, Ақсуат, Қарауылтөбе, Қосшыңырау, Талсуат, Қызылөзек ауылдық округтерінен барлығы 46 көшеге, Ұлттық қордан бөлінген қаржыға Қарауылтөбе ауылдық округіне қарасты кіре беріс жолдың бойында орналасқан жаңа қоныс аумағына, Қызылорда қаласы - Жезқазған тас жолының бойындағы 150 га жерге, Қызылорда қаласының Сарысу көшесі бойындағы Шорғазы тұйығына және кенттер мен ауылдық округтердің 26 көшесіне қиыршық тас төсеу жұмыстары жүргізіледі.Бұдан бөлек, Қызылорда қаласы мен оған қарасты кент және ауылдық округтердегі 106 көшеге облыстық бюджеттен орташа жол жөндеуге 1 752,6 млн.теңге қаралып, Қызылорда қаласы бойынша 76 көшеге, Бөлкөл кенті бойынша 6 көшеге, Тасбөгет кенті бойынша 14 көшеге және Сабалақ саяжайына 10 көшеге асфальт төселінбек.<figure class="image"><img src="https://knadmin.beoblood.kz/uploads/02_b619692611.JPG" alt="02.JPG"></figure>

Қызылорда қаласында жол жөндеу жұмыстары басталды

<a href="https://kyzylorda-news.kz/">Kyzylorda-news.kz.</a> Жаңақорған ауданында 19 ауылдық округ мектептерінен, ал аудан орталығындағы 4 мектептің талапкерлері яғни 39 бала «Сырдың азаматы, өнердің қазанаты» атты аудандық байқауда бақ сынады.Жаңақорған аудандық балалар кітапханасы ұйымдастыруымен Қазақстан Жазушылар одағының мүшесі, балалар әдебиетінің классигі, жерлесіміз А.Сопыбековтің құрметіне &nbsp;орай «Сырдың азаматы, өнердің қазанаты» атты аудандық байқау өтті. Байқау 3 кезеңнен тұрды. Алғашқы сын «Өлеңінен керемет сыр өрілген» атты көркемсөз оқу болса, келесі кезекте А.Сопыбековтің шығармашылығынан «Сынық әйнек», «Кітап», «Менің әліппем» атты өлеңдерін мәнерлеп оқу еді. Үшіншісі - «Төлдер мінезі» атты көркемсөз оқу кезеңі болатын. Бұған балалар ерекше дайындықпен келген. Соңынан «Балаларға базарлық» атты көркемсөз оқу кезеңінде мысал, жұмбақ, ертегі, аңыз өлеңдерінен жатқа айту жағы да сынаққа қойылды.Әділқазылар алқасына ақын әлеміне жатық, шығармашылығымен етене таныс кітапхананың тұрақты оқырманы, зиялы зейнеткер Әбибулла Шерімбетов, Жаңақорған ауданының Құрметті азаматы, ұстаз Үмбет Абибуллаев, «Жаңақорған тынысы» газетінің қызметкері, журналист Айсұлу Алданазар іріктелді. Ашылу салтанатында аудандық кітапхана директоры, аудандық мәслихат депутаты Әсемкүл Тілеубергенова қатысушыларды қанаттандырып, шығармашылық өкілдерін шабыттандырып сөйледі.<blockquote>«Ақын Адырбек – балалар әдебиетінің көрнекті өкілі, табиғи тұла бойы періште баланың пайымын дөп басатын мінезге де, шығармашылыққа да тән еді. Бүгін ерекше қуанышқа тоқталғым келеді, біздің кітапханаға ақынның есімін беру ұсынысымыз ескеріліп, атқарушы биліктен қолдау тауып отыр. Біз ақын Адырбек ағамызбен мақтанамыз, оның кәусар кеудесін жарып шыққан өлеңдері руханиятымыздың алтын қоры болып қалыптасты. Байқау жас таланттарды өсіре берсін» деді.&nbsp;</blockquote>Ал, ақынның жары Шарипа Шерімбетова болса, ерекше толғаныспен сыр шертті.<blockquote>«Аталарыңызбен 60 жыл бірге ғұмыр кештім. Ол дауыс көтеру дегенді білмей өтті. Жүрегі жұмсақ, көңілі бала көзқарасындай нәзік болатын. Оның оқырманы да балалар еді. Үнемі үйге оқушылар келетін. Қыз сыны, жігіт сұлтаны секілді сайыстарға арнау өлең жазып беруді сұрайды. Ал, ол болса, өлеңді жазып, қолына тәттілер ұсынып, жетектеп көшенің көлік жоқ жағына өткізіп, шығарып салатын. Міне, балалар ақыны болуының бір сыры осындай болатын» деді.</blockquote>Бүгінгі шараның басты қонағы болып, ақынның қызы Ләззат Сопыбекова да қатысты. Байқау әдеттегідей қызу жүрді. Бірінен-бірі қалысар емес. Күн сүйген қара домалақ балалардың әдебиетке әуестігі бәрімізді қуантты. Дегенмен сайыстың аты сайыс, жеңімпаз анықталуы тиіс. Сонымен әділқазылар алқасының шешімімен жүлделі 1орынды №51 орта мектептің 2 сынып оқушысы Бақдаулет Оразбек жеңіп алды. Енді екінші орынға Әлшекей атындағы өнер мектебінен келген 3 сынып оқушысы Інжу Тұрсынбек көтерілді. Үшінші орынға №169 орта мектепбінің 4 сынып оқушысы Әбдікамал Кәусар лайықты деп мақұлданды. Оларға бағалы сыйлықтар табысталды. Айту керек, ақын шығармашылығына арналған онкүндіктің бұл байқау алғашқы беташары ретінде аталды. Сайыстағы жалғасын таба береді.

Жаңақорғанда аудандық байқау өтті

<a href="https://kyzylorda-news.kz/">Kyzylorda-news.kz.</a> Қызылорда облыстық білім басқармасының басшысы Мейрамбек Шермағанбет ардагерлерді құттықтады.Ардагерлер кеңесінің ұйымдастыруымен өткен шарада Қызылорда облыстық білім басқармасының басшысы Мейрамбек Шермағанбет саналы ғұмырын білім саласына арнаған ардагерлер қауымын құттықтап, ризашылығын білдірді.Аталған шарада Мейрамбек Зинабдинұлы қоғамда нәзік жанды ұстаздардың және ардагерлердің алар орны ерекше екенін атап өтіп, ыстық ықыласын білдірді.<blockquote>«Сіздер рухани өресі биік, ұлттық құндылықтарды ұлықтай білетін, білім мен тәрбиеге сусындаған, тәуелсіз елге тірек болар жас ұрпақ тәрбиелеген биік тұлғасыздар. Ұстаз деген ұлағатты есімді қастерлеп, білім-біліктеріңіз бен шеберліктеріңіздің арқасында еліміздің білім саласының дамуына өлшеусіз үлес қосып, талантты шәкірттерді тәрбиеледіңіздер. Өнегелі өмір жолдарыңыз көпке үлгі. Барша Сыр ұстаздарының атынан шынайы алғысымды білдіремін», - деді басқарма басшысы.</blockquote>Сондай-ақ, мереке қарсаңында облыстық білім басқармасы кәсіподақ комитетімен бірлесіп, мерейтой иелерін де құттықтап, сый-сияпат көрсетті.

Қызылорда облыстық білім басқармасының басшысы ардагерлерді құттықтады

<a href="https://kyzylorda-news.kz/">Kyzylorda-news.kz.</a> Бейсенбі күні Қазақстанның басым бөлігінде құбылмалы ауа райы болады, деп хабарлайды Қазгидромет.Әсіресе елдің оңтүстік-шығысында қар, жауын-шашын болып, тұман түседі. Солтүстік, шығыс, орталық өңірлерде түнде ауа температурасы 5-18 градусқа дейін төменлейді.

9 наурызға арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp; Өңірде түйеқұс өсіру табысты кәсіпке айналтын секілді. Сырдария ауданы Бесарық ауылында кәдімгі теледидардан ғана көретін африкалық түйеқұс жерсіндірілді. Кейін арнайы салынып жатқан қоражайда 100 түйеқұс күтімге алынып, инкубатор арқылы екі есеге дейін көбейтілмек. Бұл жоба ойдағыдай жүзеге асса, қосымша 10 тұрақты жұмыс орны ашылады.Түп-төркіні Африка құрлығынан өрбитін түйеқұсты әкелуге демеушілік еткен «Абай-Дәулет» ЖШС. Құс Өзбекстан арқылы жеткен. Климаттың ылғалдығы мен жылылығына үйренген бұл құсқа еліміздің климаты басында ыңғайлы болмаған. Сол үшін де әуелгіде бабын жасап, Сарыағашта бір ай бойы үйретілген. Карантинде тұрған. Көпшілікке таңсық, бұрын-соңды өңірде болмаған түйеқұсты ауылға алғаш рет әкелгенде басында жергілікті халық бұған біртүрлі қарағанмен, біраздан соң көздері де, бойлары да үйреніпті. Сұсты көрінетін бұл құстың пайдасы шашетектен көрінеді. Бойы 3 метрге жуықтайтын аталығы 100-140 келі ет береді екен. Ал аналығы әбден толысып-жетілген шағында биіктігі 1 метр 70 сантиметрге жетеді. Қауырсындарын бас киімге, сахналық костюмдерге пайдалануға болады. Жұмыртқасының салмағы 2,5 келіден 4 келіге дейін барады.Шаруашылықты жүргізіп отырған «Бесарық» ЖШС директоры Мақсат Биболатов түйеқұс шаруашылығын қалдықсыз өнім ретінде қарастыра отырып, одан үлкен табыс күтетінін айтты.<blockquote>«Осыдан бір ай бұрын 12 түйеқұстың әрқайсысын 400 мың теңгеден сатып алдық. Көбі 5 жаста. Жуырда екінші бөлігі жетті. Баға өзгеріссіз. Жасы мен салмағына қарамайды. Бұл құсты қазір елімізде өсіруді қолға алған шаруашылықтардың ісі оңынан жүріп жатыр. Өйткені, өнімі сұранысқа ие. Еті пайдалы, әсіресе, қан қысымы және қант диабетімен ауыратындар үшін мың да бір ем екен. Сондықтан қызығушылық уақыт өткен сайын артуда. Бір қызығы, күтімді, қамқорлықты қажет ете бермейді. Шаруашылықта екі баптаушы бәріне үлгеріп жүр. Көбінесе құсқа ашық жер пайдалы. Алда бұлардың өсіп-өнуіне барынша қолайлы жағдай жасаймыз. Негізі 1,5 жасында жұмыртқа туа бастайды. Сәтін салса, инкубатор құрылғысын сатып алу жағын тиісті мамандармен келісіп қойғанбыз», – дейді ол.</blockquote>Негізінен түйеқұсқа шөп, әсіресе, жоңышқа, жүгері, бидай береді. Сондай-ақ, уақытында суарып отырса, бабының аса қиындығы жоқ. Өзі көп ауыра да бермейтін секілді. Ал ауыра қалса, Сарыағаштағы мамандар көмек колын созуға даяр екен. Әзірге түйеқұсты тек өсіріп, санын көбейтуді мақсат еткен шаруашылық, құс саны артқан соң өнімдерін сатумен айналыспақ. Шама жетіп, өнімге сұраныс болса, сыртқы нарықты да байқап көрмек ниетте.<blockquote>«Көпшілік біле бермейді. Негізі түйеқұстың өнімдері өте пайдалы. Терісі, тұяғы, тұмсығы, еті, жұмыртқасы бәрі кәдеге жарайды. Оның үстіне тез өседі, тез көбейеді. Тірі салмағының 60%-ы еттен тұрады. Мейрамханаларда диеталық тағам ретінде сұранысқа ие. Ал оның терісінің беріктігі піл мен қолтырауынның терісіне пара-пар. Оны аяқ киім қаптауға, басқа да сәндік бұйымдарды жасауға пайдалануға болады», – дейді серіктестік директоры.</blockquote>Жалпы түйеқұс жыл бойы емес, негізінен сәуір мен қазан айы аралығында жұмыртқалайды екен. Ол кезде біреуі аптасына бір-екіден, бір маусымда 50-60 жұмыртқаға дейін беруі ықтимал. Нарықтағы бағасы – 3-5 мың аралығында. Ал етінің 1 келісінің бағасы 7-12 мың теңгенің о жақ бұ жағында саудаланады. Демек, жем-шөбін уақытылы берсе, пайдасы да көл-көсір деген сөз.Елімізде «Бесарық» ЖШС сияқты түйеқұсты жерсіндірген фермерлердің қатары көбейді. Келешекте біздің өңірде де бәсекеге қабілетті шаруа қожалықтарының саны артады. Қазірдің өзінде ауылда оған қызығып, сатып алу жолын сұрастырып жатқандардың қатары көбейіпті. Әрине, қарапайым азықпен қоректеніп, өнімді мол беретін, аса қамқорлықты қажет ете бермейтін, ал өнімі қымбат бағада бағаланып жатса, неге өсірмеске? Сұраныс артса, алдағы уақытта бұл бағытта бірталай жұмыстар атқарылатын секілді.Орайы келгенде айта кетейік, бұл ерекше құстар планетада &nbsp;миллиондаған жыл бұрын пайда болды деп саналады. Австралия мен Африка елдерінде өмір сүреді, яғни, шөлейтті жерге барынша бейім. Шамамен 300 жыл бұрын, түйеқұстар тек Африкада ғана емес, Палестинада және Кіші Азияның үлкен аумағында өмір сүрген.&nbsp;

Түйеқұс өсіру табысты кәсіпке айналды 

<a href="https://kyzylorda-news.kz/">Kyzylorda-news.kz.</a> Қазіргі уақытта нәзік жандылар қызмет талғамайды. Сан салаға білек сыбана кірісіп, өз міндетін адал әрі білікті атқарып жүр. Сондай жанның бірі, Маңызбаева Жадыра Маратқызы. Ол қылмыстық атқару саласың Қызылорда облысы бойынша ҚАЖ департаментіне қарасты №68 мемлекеттік мекемесінде Тылмен қамтамасыз ету бөлімінің мемлекеттік сатып алу туралы инспекторы болып жұмыс істейді.Оның негізгі міндеті мекемеге қажетті мемлекеттік сатып алуды жүзеге асыруды бекіту және тауарларды, жұмыстарды және қызметтерді мемлекеттік сатып алудың жылдық жоспарына сүйене отырып жұмыс атқару болып табылады.<blockquote>«Әр ай сайын мемлекеттік сатып алу жайлы веб порталына тауарлар, қызметтер, жұмыстарға хабарлама беріліп, веб портал арқылы қорытындысы шығарылып, өнім берушімен электронды келісіп шарт жасалады. Осы жасалынған келісім шарттың уақтылы орындалуын, яғни мекеме қоймаға келіп түсуін қадағалайды. Үстіміздегі жылдың басында мекеме қаржы жоспарына сәйкес, мемлекеттік сатып алу жоспарлары бұйрықпен бекітіліп, электронды веб порталға енгізілді. Яғни, бұл веб порталдағы млекеттік сатып алу жоспарына, мекеме қызметкерлерінің сұраныстары мен қызметтік қажеттілік заттай мүліктері, тауарлар, сотталғандардың азық-түлік өнімдері, мүліктері, қажетті қызметтер мен жұмыстар көлемдері бойынша енгізілді», – деп өз қызметтік міндеттемесі бойынша нақты атқарылып жатқан жұмыстары жайлы айтып берді.</blockquote>Он жылға жуық осы мекемеде үздіксіз еңбек етіп келе жатқан ҚАЖ қызметкері өз ісіне, тиянақтылықпен қарап, ұжымның ортасында бедел мен құрметке ие болған жан. Еңбегі еленіп, бірнеше рет мақтау қағаздар мен алғыс хаттармен марапатталған. Жадыра жұмыста жауапкершілігі мол қызметкер болса, отбасында жарының – аяулысы, ұлына – асыл ана, ата-енесі мен ел-жұртына сыйлы келін.

Жүзінен нұр тұнған Жадыра

<a href="https://kyzylorda-news.kz/">Kyzylorda-news.kz.</a> Салихитдин Айтбаев атындағы көркемсурет галереясында Қазақстан Республикасы Суретшілер және Қолөнершілер одағының мүшесі Ұлмекен Маутованың «Көңілдегі керуен» атты шығармашылық көрмесі ашылды.Аталған іс-шараға танымал суретшілер мен қолөнер шеберлері қатысты.Көрменің мақсаты – өнер иесінің шығармашылығын дәріптеп, ұлттық қолөнерді дамытып, қазақтың сәндік-қолданбалы бұйымдарын көпшілік назарына ұсыну.Ұлмекен Маутова 1961 жылы Атырау облысы Мақат ауданы Доссор кентінде дүниеге келген. 1979-1982 жылдары Алматы қаласындағы Гоголь атындағы көркемсурет училищесінде театр-декоратор мамандығы бойынша білім алды. Бірнеше облыстық, республикалық, халықаралық көрмелеріне қатысқан өнер иесі «Мәдениет саласының үздігі» медалімен марапатталған. Көрменің ашылу салтанатында облыстық тарихи-өлкетану музейінің басшысы Сапар Көзейбаев құттықтау сөз сөйледі.<blockquote>– Ұлмекен Қайырбайқызының жұмыстары философиялық мағына береді және стилизация әдістері арқылы ерекшеленеді. Суретші туған жерінің сұлу табиғатын өз туындыларында алуан түрлі бағытта берген. Мұны көрмеге қойылған 40-қа жуық кескіндеме және қолөнер туындыларынан байқауға болады. Баршаңызды көрменің ашылуымен құттықтаймын. Дәстүрлі өнерді жалғастыратын тұлғалар барда қазақ мәдениеті дамудың даңғыл жолына түсетініне сенемін, – деді ол.</blockquote>Көрме соңында Жаңақорған ауданы мәдениет және спорт бөлімінің бас маманы Жадыра Шертекова Ұлмекен Қайырбайқызына аудан әкімінің Алғыс хатын табыстады. Келушілер өнер иесінің тамаша туындыларымен танысты.&nbsp;

«Көңілдегі керуен» шығармашылық көрмесі ашылды

<a href="https://kyzylorda-news.kz/ru/">Kyzylorda-news.kz</a>. Төртеу түгел болса, төбедегі келеді. Кез келген мемлекеттің инфрақұрылым, экономикалық жағынан дамуы биліктегілер мен халықтың, тұрғындар мен жақсы бастама көрсе, бетін қақпай, белін буатындардың біріккен жұмысының нәтижесінде көрініс табады. Білетініміздей, осыдан бес жыл бұрын кәсіпкерлік қызметті тіркеу және салық тапсыру жүйесі жеңілдетілген болатын. Содан бері көптеген азамат бизнес бастауға мүмкіндік алып, Қазақстан саладағы қолайлы орта құру бойынша алдыңғы қатарға шықты. Оның ішінде қажетті қызметтерді онлайн алу орайы, кәсіпті жылдам тіркеу мүмкіндігі ерекше назарда болғаны шындық. Ал биылғы ахуал қай деңгейде? Жеке кәсіптің салық жүйесінде нендей өзгеріс бар? Аталған сауалдарға жауап іздеп көрелік.Қазақстанда жеке кәсіпкерлікті тіркеудің әдісі көп. Салық органына құжат тапсырып, ескі тәсілді қолдануға немесе уақыт үнемдеп, онлайн қызметке жүгінуге де құқыңыз бар. Көбі соңғы нұсқаны таңдап, үйде отырып-ақ кәсібін тіркеуге көшкен. Онлайн-сервистер, яғни, «электронды лицензиялау» порталы немесе Egov, Halyk Bank және Kaspi.kz мобайл қолданбалар арқылы тіркеуге болады. Биыл бұл бағытта айтарлықтай жаңалық жоқ.Ал жеке кәсіпкерлерге салынатын салық жүйесіне өзгеріс енді. Атап айтсақ, 2023 жылдың 1 қаңтарынан бастап жекелеген кәсіпкерлік субъектілерін тексеруге және шағын кәсіпкерлік субъектілерінің бірқатар санаттарын салықтан босату жеңілдігінің мерзімі аяқталды. Енді 1,2 миллионға жуық шағын және микробизнес өкілдері қайтадан табыс салығын төлеуге мәжбүр болады. Есте болса, 2020 жылғы 1 қаңтардан бастап 2022 жылғы 31 желтоқсанға дейінгі кезеңде арнаулы салық режимдерін қолданатын шағын және микробизнес субъектілері салық төлеуден босатылған болатын. Бұл мүмкіндікті қызметкерлердің орташа жылдық саны 15 адамнан аспайтын немесе орташа жылдық табысы 30 000 АЕК-тен аспайтын компаниялар (микрокәсіпорындар), сондай-ақ қызметкерлерінің орташа жылдық саны 100 адамға дейінгі және орташа жылдық табысы 300 000 АЕК аспайтын жеке кәсіпкерлер (шағын кәсіпорындар) мен заңды тұлғалар пайдаланғанын білеміз. Елдегі кәсіпкерлікті ілгерілетуге де аталған артықшылық себеп болғаны анық. Енді, міне, биыл салық төлеу жүйесі қалпына келді. Яғни, жеке табыс салығы, әлеуметтік салық, бірыңғай жер салығы қайта оралады деген сөз. Салық туралы ой тарқатқанда саладағы оң өзгерістерді де айта кеткен жөн. Мәселен, жуырда Kaspi.kz Мемлекеттік кірістер комитетімен бірлесіп кәсіпкерлер үшін тағы бір онлайн сервисті іске қосты. Енді жеңілдетілген декларация негізінде жұмыс істейтін жеке кәсіпкерлер Kaspi Pay қосымшасындағы «Салық» бөлімінде 910-нысан бойынша салық есебін тапсыра алады. Бұл өзгерістің мән-жайын ҚР ҚМ Мемлекеттік кірістер комитеті төрағасының орынбасары Азамат Панбаев тарқатып, отандық БАҚ-та мәлімдеме жасаған болатын:«Мемлекеттік кірістер комитеті екінші деңгейдегі банктермен ынтымақтастық аясында Kaspi Pay платформасында шағын бизнес субъектілері үшін 910-нысанды салық есептілігін қабылдау сервисін тегін іске қосты. Бұл сервис салықты есептеуге, есептілікті жасауға және ұсынуға жұмсалатын уақытты үнемдей отырып, салық міндеттемелерін жылдам, қолжетімді, уақтылы орындауға мүмкіндік береді. Бұл бағытта ынтымақтастық қолайлы жағдай жасап, салық төлеушілер мен мемлекеттің арасындағы өзара іс-қимылды жақсарта отырып, жалғасын табады».Kaspi.kz-тің басшысы әрі негізін қалаушылардың бірі Михаил Ломтадзе де аталған қадам бизнес өкілдерінің жұмысын жеңілдететініне сенім білдіріп, компанияның жаңа деңгейге көтерілгенін сүйіншілеген еді.&nbsp;<blockquote>«Kaspi Pay – қазақстандық кәсіпкерлер үшін Kaspi.kz-тің ең танымал қосымшасы. Басты мақсатымыз – кәсіпкерлердің өмірін жеңілдету әрі жақсарту. Біздің жаңа «Салық есебі» сервисінің көмегімен жеке кәсіпкерлер енді салық есебін онлайн, жылдам әрі оңай тапсыра алады. Команда¬ларымыз бірлесіп әзірлеген тағы бір табысты сервис үшін Мемлекеттік кірістер комитетіне, сондай-ақ ҰАТ АҚ пен Цифрландыру министрлігіне рақмет айтамыз!» – деді ол.</blockquote>Мұнымен жеке кәсіпкерлікте жаңалық түгесілмеді. Ендігі өзгеріс біріңғай төлем төңірегінде болмақ. Биыл Еңбек және халықты әлеуметтік қорғау министрлігі жеке кәсіпкерлер үшін бірыңғай төлем енгізді. Жұмыс берушілердің жүктемесін азайтуға және қызметкерлерді әлеуметтік қорғауды қамтамасыз етуге бағытталған бастама қоғамда қызу талқыға түсуде. Министрліктің ақпаратына сүйенсек, бірыңғай төлем көлемі жыл сайын ұлғая бермек.&nbsp;<blockquote>«Бірыңғай төлем ставкасының жыл сайын ұлғаюы 2024 жылғы 1 қаңтардан бастап жұмыс берушінің міндетті зейнетақы жарналарының енгізілуімен байланысты. Сондай-ақ 2028 жылы 1,5%-тен 5%-ке дейін өсуімен, сондай-ақ бірыңғай төлем төлеушілер үшін 2025 жылы Мемлекеттік әлеуметтік сақтандыру қорына әлеуметтік аударымдар ставкасының 3,2%-тен 4,5%-ке дейін өзгеретін болады», – делінген хабарламада.</blockquote>Жеке кәсіпкерлер бірыңғай төлемді есептік айдан кейінгі айдың 25-нен кешіктірмей төлеуге тиіс. Айта кетейік, бірыңғай төлемдерге жеке табыс салығы, Бірыңғай жинақтаушы зейнетақы қорына міндетті зейнетақы жарналар, Мемлекеттік әлеуметтік сақтандыру қорына әлеуметтік аударымдар, Әлеуметтік медициналық сақтандыру қорына жарналар мен аударымдар және жұмыс берушінің БЖЗҚ-ға міндетті зейнетақы жарналары жатады.Жалпы аталған өзгерістер елдегі бизнеске қойылатын талаптарды оңтайландыру, кәсіпкерлікті өркендетуге септесу амалынан туса керек. Себебі, қазіргі таңда ресми қолданыстағы 10 мыңнан астам талап жаңа саясатқа сай келмейді. Ұлттық экономика министрінің ақпарынша, кәсіпкерлікті реттеудің 44 саласына талдау жүргізілген. Нәтижесінде 66 жобаға түзету енгізу қажет. Министрдің айтуынша, негізсіз тексеру, артық салық сынды кедергіге енді жол берілмейді. Нәтижесінде 2029 жылға қарай шағын және орта кәсіп иелерінің саны 4,7 млн-ға дейін өседі деген болжам бар. &nbsp;

Кәсіпкер: кеше және бүгін

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев ел дамуына елеулі еңбек сіңірген «Құрмет» орденінің иегері, Жалағаш ауданының құрметті азаматы Өмірбек Шәменовті 70 жас мерейтойымен құттықтады. Салтанатты жиында аймақ басшысы сырбойылықтардың еңбектің парқын білетінін, қадірі мен қасиетін барынша жоғары бағалайтынын атап өтті.<blockquote>«Мәнді де мағыналы ғұмыр кешіп, кіндігі байланған еліне адал қызмет етіп, абыройға, сый-құрметке бөленген салиқалы аға буынның арасында Өмірбек Мөрәліұлының тұлғалық келбеті, адами болмысы ерекше. Сындарлы сәтте ел мүддесі үшін аянбай қызмет атқарғаныңызды ел бағалайды. Құрметті Өмірбек Мөрәліұлы, қажырлы еңбектің зейнетін көрген бүгінгі мерейтойыңызда деніңізге саулық, отбасыңызға амандық, сарқылмас күш-қайрат, құт-береке тілеймін! Атқарған істеріңіз ұрпақтарыңыз бен ізбасарларыңыздың, барша жерлестеріңіз бен дүйім халқымыздың игілігіне жарасын! Сізді ақ пейілді Сыр жұртшылығының атынан мерейтойыңызбен шын жүректен құттықтаймыз»,– деді облыс әкімі.</blockquote>Өңірдің әлеуметтік-экономикалық дамуына зор үлес қосқан Өмірбек Мөрәліұлына Қызылорда облысының «Құрмет» грамотасы табысталды. Мерейтой иесін Жалағаш аудандық ардагерлер кеңесінің төрағасы, Жалағаш ауданының құрметті азаматы, «Ерен еңбегі үшін» медалінің иегері Садық Әлиев, қоғам қайраткері, Жалағаш және Қармақшы аудандарының құрметті азаматы, «Құрмет» орденінің иегері Шахизат Төребаев және қоғам қайраткері, Арал, Жалағаш, Қармақшы аудандары және Қызылорда қаласының құрметті азаматы, «Құрмет» орденінің иегері Биғали Қаюпов құттықтады.Өмірбек Шәменов 1953 жылы Қызылорда қаласында дүниеге келген. Еңбек жолын 1971 жылы Жалағаш аудандық су жүйелері басқармасында техник болып бастаған. 1972-1974 жылдары «ПМК-9» мекемесінде экономист, инженер, мастер, учаске бастығы, 1981-1993 жылдары «ПМК-17» мекемесінде бас инженер, аудандық құрылыс жөндеу мекемесінің бастығы, аудандық жүк тасы¬малдау-автотранспорт кәсіпорынның басшысы, «Коммунизм» совхозының директоры қызметін атқарды. 1993-2007 жылдары «Мөрәлі Шәменов» атындағы өндірістік кооперативтің, кейін жауапкершігі шектеулі серіктестіктің төрағасы қызметінде болды. 1999-2003 жылдары облыстық мәслихаттың депутаты болып сайланды.&nbsp;2007-2011 жылдары Жалағаш ауданының әкімі, облыстық жолаушылар көлігі және автомобиль жолдары басқармасының басшысы қызметтерін абыроймен атқарды. Аудан әкімі қызметін атқарған кезде Жалағашта әлеуметтік нысандар, тұрғын үйлер бой көтеріп, жаңадан инженерлік инфрақұрылымдар, көптеген ауылда ауыз су жүйесіне қайта жаңғырту жүргізілді. Жол саласын басқарған тұста да облыстық, қалалық, аудандық маңызы бар жолдардың жағдайын жақсартуға белсене атсалысты.

Жалағаш ауданының құрметті азаматы Өмірбек Шәменовті 70 жас мерейтойымен құттықтады

<a href="https://kyzylorda-news.kz/">Kyzylorda-news.kz.</a> 8 наурыз – Халықаралық әйелдер күні мерекесі қарсаңында Жалағаш ауданының аналары ерекше құрметке бөленіп, аудан орталығындағыҚ.Қазантаев атындағы мәдениет үйінде салтанатты шара өтті. «Әлемді тербеткен ана» атты мерекелік кешке жиылған жұртшылықты алдымен аудан әкімінің міндетін атқарушы А.Нұрмағанбетов құттықтап, аудан әкімінің жылы лебізін жеткізді.&nbsp;Жер бетіндегі бар тіршілік нәр алып, табиғат оянып, бәйшешек гүлдер көңілге қуаныш ұялататын көктемнің алғашқы мерекесі аналарға арналған. «Шығыс халықтарының арасында, жалпы мұсылман елдерінде әйел затын ерекше бағалайтын, ананы қастерлеп сыйлайтын халықтың бірі де бірегейі – қазақ. Әйел-Ана – ұлтымыздың бойындағы бар жақсы қасиеттерді тілін, әдет-ғұрпын, салт-санасын, ұлттық дәстүрін ұрпақтан-ұрпаққа жеткізуші, дарытушы. Жалпы, анаңды Меккеге үш рет ар¬қалап алып барсаң да перзенттік парызыңды өтей алмайсың. Бұл сөздің астарында «Ана» деген асыл аттың құдіреті жатқандай. Тоғыз ай құрсағында көтеріп жарық дүниеге әкелген, түн ұйқысын төрт бөліп ақ сүтін берген, қанаттыға қақтырмай, тұмсықтыға шоқтырмай өсірген ардақты аналарға жылдың бір күнінде ғана емес, әр күн сайын құрмет көрсетсек те артық етпейді.Қашанда еліне тұтқа, ұрпаққа пана болған, тіршілікке нәр берген, адамзатқа өмір сыйлаған анадан құдіретті, анадан ардақты, анадан аяулы жан жоқ. Тіршіліктің тірегі, отбасының берекесі, барша адамзаттың тәрбиешісі де – ана. Мынау тынымсыз тіршілік пен кең дүниенің өзі де тек аналармен ажарлы емес пе!? Көктем шұғыласын шашқанда, қар астынан қылтиып бәйшешек көрінгенде, қыз-келіншек құл¬пырып, тіршілік жанданғанда адамзат әйел затына алғыс айтып, құрмет көрсетеді. Өйткені тіршіліктің бастауы да, қайнары да, қантамыры да – әйел.<blockquote>«Баршаңызды &nbsp;көктемнің шуақты да шырайлы мерекесі 8 наурыз – Халық-аралық әйелдер күнімен шын жүректен құттықтаймын! Адамзат үшін анадан құдіретті, анадан ардақты, анадан аяулы ештеңе жоқ. Сондықтан әлемдегі ең жоғары мадақ пен құрмет аналар қауымына арналады. «Отан отбасынан басталады» десек, отбасының тілегі де, жүрегі де – Аналар. Бала тәрбиесіне қашан да ұлт тәрбиесі деп қараған дана халқымыз ұрпағын дүниеге әкеліп, бағып-қағып, жүрегінің жылуын аямаған аналарды ардақтай да, аялай да білген. Әйел затына құрмет көрсетіп, олардың жүрегіне қуаныш сыйлау үшін көктемді күту, осы мерекені тосу міндетті емес. Анаға, әйелге, қыз-келіншектерге жылдың қай мезгілінде болсын қуаныш сыйлау артық етпейтіні тағы белгілі. Бұған таласар жан жоқ шығар. Өйткені қазақ әйелінің болмысы, тектілігі, даналығы мен даралығы бүтіндей бір ұлттың сақталуында орасан үлес қоса алды, – деген Арнұр Нұрмағанбетов қашаннан қазақ әйелінің орны ерекше құрметке лайықты екенін де атап өтті.&nbsp;</blockquote>Иә, әйел әрқашан ізгіліктің, нәзіктіктің және дархан көңілдің көрінісі. Ал бұл мереке – барша әйелдер қауымына &nbsp;деген шынайы құрметтің белгісі. Мәдениет үйіндегі салтанатты шарада «Ана» деген қасиетті атқа ие болып, батыр ана атанған алтынқұрсақты аналар марапат төрінен көрінді. Аудан әкімінің міндетін атқарушы Арнұр Нұрмағанбетов бірқатар көпбалалы анаға күміс, алтын алқаларын тапсырса, әр салада елеулі еңбек етіп жүрген қыз-келіншектерге облыс әкімінің алғыс хаты мен аудан әкімінің құттықтауын табыстады. Мұнан соң салтанатты жиын аудан өнерпаздарының мерекелік концертіне ұласты. Айта кетейік, ауданымызда өмірге ұрпақ әкеліп, оларды тәрбиелеп өсіруде үлгі-өнеге болып жүрген алтынқұрсақты аналарымыз бар. Бүгінде 1300-ден аса көпбалалы ана есепте тұрса, оның 41-і – Кеңес одағының «Батыр ана» атағына ие болғандар, ал 300-ге жуығы – «Алтын алқа», 650-дейі «Күміс алқа» медальдарының иегерлері.

Жалағаш ауданында мерекелік кеш өтті

<a href="https://kyzylorda-news.kz/">Kyzylorda-news.kz.</a> Қаржы саласы мемлекет дамуында ерекше рөлге ие екені айтпаса да түсінікті. Себебі ол – экономиканың құрамдас бөлігі, ал экономика елдің дамуын айшықтайды. Қаржы секторындағы ахуал мемлекеттің дұрыс ұйымдастырылған саясаты мен мамандар біліктілігіне және қаржы саласының ашықтық жағдайына байланысты болады.Апта басында Жалағаш кентінде Қызылорда облысы бойынша тексеру комиссиясымен «Қаржылық бұзушылықтардың алдын-алу және қаржылық тәртіпті нығайту» тақырыбында семинар-кеңес ұйымдастырылды. Оған облыстық қаржылық бақылау органдарының өкілдері және аудан әкімінің орынбасары Арнұр Нұрмағанбетов, аудан әкімі аппаратының, аудандық мәслихат аппаратының, аудандық бөлімдердің, ауылдық округтердің, кенттің, мәдениет үйлері мен клубтардың басшылары мен есепшілері, сонымен қатар аудан аумағында орналасқан бюджеттік ұйымдардың, яғни білім бөлімі, мектептер, балабақшалар, орталық аурухана, спорт мекемелері басшылары мен қаржы жөніндегі жауапты мамандары қатысты.Жиында алдымен қаржылық бақылау органдарының өкілдері баяндама жасады. Есепшілер мен қызметкерлер тарапынан қойылған бірнеше сұрақтарға да тұшымды жауап берді. Жалпы, семинар кеңесті ұйымдастырудың негізгі мақсаты мемлекеттік және квазимемлекеттік сектор субъектілерінде қаржылық бұзушылықтардың алдын алу және қаржылық тәртіпті нығайту болып табылады. Себебі қаржы мамандарының, есепшілердің және бірінші басшылардың немқұрайлылығынан биыл аймақта, оның ішінде ауданда бірнеше олқылықтар орын алған. Мәселен, Қызылорда облысы бойынша тексеру комиссиясымен былтыр жүргізілген 22 аудиторлық іс-шара бойынша 228 аудит объектісі қамтылған. Нәтижесінде ҚР заңнамасы нормаларының, квазимемлекеттік сектор субъектілері актілерінің сақталмауынан жалпы құны 30,9 млрд теңгеге қаржылық бұзушылықтар анықталған. Оның ішінде 29,5 млрд теңгені құрайтын мемлекеттік сатып алулар, сатып алынған негізгі құралдар мен қорларды тиісті шоттарға кірістемегеннен және шығындарды түрлеріне қарай шығыстардың тиісті шотына шығыстамағаннан, таза кірістің бip бөлігін тиісті бюджет кірісіне есептемеу фактілері орын алған. Ал тиімсіз пайдаланылған бюджет қаражаты 0,4 млрд теңгені, тиімсіз жоспарлау 1 млрд теңгені көрсеткен. Анықталған 29,5 млрд теңге қаржылық бұзушылық мемлекеттік аудит жүргізу барысында дереу қалпына келтірілген. Сондай-ақ мемлекеттік аудит нәтижелерімен сот, уәкілетті органдар және тексеру комиссиясымен қарау үшін 600 аудит материалы жолданып, 152 аудит материалы бойынша 33,2 млн теңге әкімшілік айыппұл салынған. 448 тұлға «ескерту» түріндегі әкімшілік жауапкершілікке тартылған.&nbsp;Сонымен қатар қылмыстық қудалау органдарымен 2 қылмыстық іс қозғалса, ҚР Мемлекеттік қызмет істері агенттігінің облыс бойынша департаментінің жанындағы тәртіптік кеңесте 3 тәртіптік іс қаралып, 3 тұлға, 1-еуі лауазымынан босату, 1-еуі қызметке толық сәйкес еместігі туралы ескерту және 1-еуі ескерту түріндегі тәртіптік жауапкершілікке тартылған. Жол берілген бұзушылықтар мен кемшіліктерді жою бойынша 136 нұсқама қабылданып, тиісті мемлекеттік мекемелер мен ұйымдарға 268 тапсырма мен ұсыным берілген.Семинар кеңес қорытындысымен мемлекеттік мекемелер мен квазимемлекеттік сектор басшыларына есепші мамандарды арнайы курстардан оқытып, біліктілігін арттырып отыру қажет екені айтылды.

Жалағашта қаржылық тәртіпті нығайту мақсатында семинар-кеңес ұйымдастырылды

<a href="https://kyzylorda-news.kz/">Kyzylorda-news.kz.</a> 8 наурыз – ер азаматтардың назарынан тыс қалмайтын мерекелердің бірі. Осы күнді ақ шашты қариядан бастап жас жеткіншектерге дейін асыға күтеді. Бұл күн – отбасы берекесі мен ұйытқысы болып табылатын біздің аналарымыз, жарымыз, әпкелеріміз бен қыздарымызға жарқын көңіл мен жақсылық тілейтін күн. Жалағаш ауданы әкімінің орынбасары Арнұр Әлібекұлы өз саласының үздіктері атанған арулар мен іскер аналарды қабылдап, 8 наурыз – Халықаралық әйелдер күні мерекесімен құттықтады. Мерекелік кешке жиналған нәзікжандыларға облыс әкімінің алғыс хатын және аудан әкімінің мерекелік құттықтауын &nbsp;табыстады.<blockquote>«8 наурыз – ақжаулықты апаларымыз бен аналарымыздың, қарындастарымыздың, ару қыздарымыздың төл мерекесі. Сіздер өздеріңіздің ізеттіліктеріңізбен, сыпайылықтарыңызбен өмірді шуақтандырып, жақындарыңыз бен туыстарыңызға жылу сыйлайсыздар. Қазақ әйелі бағзыдан даланы қорғаған, ерлермен бірге ерлік жасаған. Қазақ әйелі тек қана ошақ басының емес, бүкіл өмірін, ұрпағын сақтаған, ерліктің үлгісін көрсеткен. Бесік тербейтін, батырды өсіретін, ұлтымызды сақтайтын, ертеңгі ерлерді өсіретін әйел, келін, ана. Тәуелсіз еліміздің ұл-қыздарын тәрбиелеп, азаматтарға сенімді тірек болып, қоғам ісіне білек сыбана кірісіп, қиын-қыстау кезеңде демеу бола білгені үшін аналар қауымына алғыс айтамыз. Сіздерге сәттілік пен шаттық көңіл серік болсын. Ер азаматтардың сыйластығы мен құрметіне бөлене беріңіздер. Әрдайым әдемі, жылы жүректі аналық абыройлы атақтарыңыз биіктей берсін. Зор денсаулық, мәңгі жастық пен сұлулық тілеймін», – деді аудан әкімінің орынбасары Арнұр Әлібекұлы.</blockquote>Жиында өңірдің дамуына үлес қосып, қоғамдық өміріне белсене араласып жүрген аналарымыз бен қыз-келіншектер сөз алды.&nbsp;<blockquote>«Әйел затының міндеті – сырттай қарағанда «отбасы, ошақ қасы» секілді қарапайым көрінгенімен, нақтырақ зер салсақ, үй ішінің шаруасы-кәсібімен айналысып, бала-шағаны бағып-қағу, өсіру, ағайын жұрттың береке-бірлігіне ұйытқы болу сияқты ең бір маңызды істер әйелге жүктеліп, әр шаңырақтың тұрмыс-тіршілігі, хал-ахуалы да осы үйдегі ақжаулықты аналарымыздың тірлігі болып келеді. Өз басым әйелді осылай деп бағалаймын. Өйткені адамзатты жарататын – әйел, ұлтын көбейтетін – әйел, ұрпақты ұластыратын – әйел, еркекті ер ететін – әйел. Бір сөзбен айтқанда, дүниенің тірегі – әйел. Махаббаттың асыл нұры – әйел. Өмір деген алтын сарай есігінің күміс кілті – әйел махаббаты. Сіздерді көктемнің шуақ¬ты күнімен тұспа-тұс келген 8 наурыз – Халықаралық әйелдер мейрамымен шын жүректен құттықтап, әрқашан толысқан айдай ажарланып, күлімдеген күндей нұрланып, шаттық пен қуанышқа бөленіп, береке-бірліктің бастаушысы, игі істердің қостаушысы болып жүре берулеріңізге тілекшімін», – деді ауданымыздың іскер азаматшасы Күлпаш Қанатшаева.</blockquote>Көктемнің шуақты күнінде өткен іс-шара, ерекше көңіл күйде өтті. Өңір өнерпаздарының қатысуымен ән мен биден шашу да болды. Жалпы, құрметке бөленген аудан арулары мерекелік іс-шарадан керемет әсер алып, аудан басшылығына алғысын жеткізді. «Шуақ шашты жаныма гүл көктемім, Ортасында отырмын гүл дестенің Ақ батасын алмасам жақсылардың, Бақыттың не екенін білмес пе едім» деп өлең арнаған ақын Айкүміс Орынбаева нәзікжандылар қауымын мере¬кемен құттықтады.<blockquote>«Көктемнің осы бір ең жарқын мерекесі – 8 наурыз – Халықаралық әйелдер күнімен сіздерді шын жүректен құттықтаймын. Арулар, сіздер – адамзаттың ең бір асыл перзенттері ғана емессіздер, сонымен бірге табиғат бойларыңызға ақыл мен төзім, іскерлік те дарытқан абзал да ізгі жансыздар! Баршаңызға мол бақыт, істеріңіздің сәтті болуын, қазақ еліндегі бейбіт пен тыныш өмірдің шырқы бұзылмауын тілеймін. Әр шаңырақтың ырысы ортаймасын, балаларыңыз бен жақын-жұрағаттарыңыздың барлығы да аман-сау, денсаулықтары мықты болып, сіздердің жан-жүректеріңізден ертеңгі күнге деген сенім мәңгілік айнымасын», – деді ол.</blockquote>Мерекелік шара өңіріміздің өнерлі, іскер қыз-келіншектерінің қолынан шыққан бұйымдары қойылған көрмені тамашалаумен жалғасып, аудан әкімі Асқарбек Темірбекұлының атынан сыйлықтар мен гүл шоқтары табысталды.

Қазақстан және Қызылорда облысының жаңалықтары