<a href="https://kyzylorda-news.kz/">Kyzylorda-news.kz</a> &nbsp;Қазалы ауданының әкімі Алмасбек Есмаханов отбасы құндылықтарын дәріптеу, аяулы аналарға деген құрметті арттыру мақсатында көпбалалы аналармен арнайы кездесу өткізіп, Президент Жарлығына сәйкес «Алтын алқа» және «Күміс алқа» төсбелгілерін салтанатты түрде табыстады.Кездесу барысында аудан басшысы әйел-аналардың қоғамдағы, отбасы мен ұрпақ тәрбиесіндегі айрықша рөлін атап өтіп, елдің бүгінгі жетістігі мен ертеңгі болашағы аналардың мейірімі мен еңбегінің нәтижесі екенін айтты.<blockquote>-Әрбір отбасының ұйытқысы болып отырған аналар – берекенің бастауы, тіршіліктің күретамыры. Мемлекет тарапынан аналар мен балаларды қолдауға әрдайым басымдық беріліп келеді. Бұл бағытта ауданымызда көпбалалы және аз қамтылған отбасыларға, мүмкіндігі шектеулі бала тәрбиелеп отырған аналарға әлеуметтік қолдау шаралары жүйелі түрде жүзеге асырылуда. Қазіргі таңда ауданда 4 мыңға жуық отбасының балалары мемлекеттік жәрдемақымен қамтылған. Аяулы аналарымызға деген құрмет әрдайым жалғаса бермек, - деді аудан әкімі.</blockquote>Марапаттау рәсімінен кейін Роза Бағланова атындағы аудандық мәдениет орталығының өнерпаздары аналарға арнап ән шырқап, мерекелік көңіл күй сыйлады.«Ана – ұлттың айнасы, берекенің бастауы» - деген аудан әкімі марапат иелерін наградаларымен құттықтап, аналарға мықты денсаулық, отбасыларының амандығы, ұрпақтарының қызығын көруді тіледі.

Қазалыда көпбалалы аналарға «алтын алқа» және «күміс алқа» табысталды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде Қазақстанның еңбек сіңірген қайраткері, көрнекті ғалым, филология ғылымдарының докторы, профессор Бағдат Кәрібозұлы атындағы «Әдебиет теориясы» дәрісханасы ашылды.&nbsp;Салтанатты шараға «AMANAT» партиясы Қызылорда облыстық филиалының төрағасы Жандос Базартай, облыс әкімінің орынбасары Мейрамбек Шермағанбет, облыстың зиялы қауым өкілдері, оқытушы-профессорлар, ғалымның әріптестері, достары мен шәкірттері қатысты.Іс-шара барысында «AMANAT» партиясы Қызылорда облыстық филиалының төрағасы Жандос Базартай профессор Бағдат Кәрібозұлының ғылыми мұрасы мен ұстаздық жолы жас ұрпаққа үлгі екенін атап өтіп, «AMANAT» партиясының Атқарушы хатшысы Кәрібек &nbsp;Дәулет Жамаубайұлының жүрекжарды құттықтауын жеткізді. &nbsp;Сондай-ақ салтанатты жиында облыс әкімінің орынбасары Мейрамбек Шермағанбет құттықтау сөз сөйлеп, аймақ басшысының ізгі тілегін жеткізді.Жаңадан ашылған дәрісхана – ғалымның әдебиет пен ғылымға арнаған ғұмырлық еңбегіне көрсетілген зор құрметтің, ұлағатты ұстазға деген тағзымның айқын көрінісі болды.«AMANAT» партиясы «Ұлттық мұра» партиялық &nbsp;жобасы аясында отандық авторларға қолдау көрсету және шығармаларын насихаттау бағытындағы жүйелі жұмыстарды жалғастыра беретін болады.<img src="https://knadmin.beoblood.kz/uploads/Zha_a_d_rishana_2_6c46a5174e.jpg" alt="Жаңа дәрісхана 2.jpg">

Әдебиет пен ғылымға құрмет: Бағдат Кәрібозұлы атындағы дәрісхана ашылды

<a href="https://kyzylorda-news.kz/">Kyzylorda-news.kz</a> Ерте, ерте, ертеде, ешкі жүні бөртеде, қырғауылы қызылда, құйрық жүні ұзында Елемес дейтін ер болыпты. Елеместің төрт түлігі сай екен, ел-жұрт оны оңынан қараса да, солынан қараса да, шіркін, Елеместен артық бақытты адам бар ма екен дейтіндей қызылды-жасылды жарқ-жұрқ еткен өмір сүріпті.&nbsp;Бірақ аузынан ақ май аққан Елеместің есіл-дерті әлдебір жоқты іздеумен өтіпті. Тіпті оның не екенін білмесе де, өміріне әйтеуір бірдеңе жетпейтіндей, көңілі жайланбай, сол аңсарын іздеп, басын тауға да, тасқа да соғыпты. Жұрт бақытты байлықтан іздейді, мен де сол байлықтың бәрі бар, бірақ неге бақытты емеспін деп жатса да, тұрса да өзін іштей мүжіген сұрақтар мазасын ала беріпті.&nbsp;Күндердің күнінде бақытын іздеп, асыл мұратыма жетсем деген тілекпен жолға шығыпты. Жолда келе жатып, әлдебір өсіп тұрған өзгеше шөпті көріпті. Бұл шөптің иісінің басын айналдырғаны сонша, қасынан жай ғана өту мүмкін емес еді. Иіске елітіп, қанша уақыт өткенін тіпті білмей де қалыпты. &nbsp;Осы адамдар түтіндетіп отырып, өзін бақытты сезінетін шөп осы шығар деп ойлайды да, іле-шала ойын жүзеге асыру үшін оны қағазға орап, қайсы бір жылы Жібек жолының бойында көпестерден көргенін өзінше қайталап көріпті. Осылайша ай артынан ай, жыл артынан жыл өтіпті. Еліне оралмаған Елеместі іздеп жолға шыққан жақындары шөпке масайып, есінен адасқан Елеместі көріпті. Жақындары оны ауруынан айықтырғанда ғана адамның ақылын сау мақсатқа жұмсауы бақыттың нағыз өзі екен ғой деген ойға келіпті.Ермұхаммед АСҚАР,№290 орта мектептің 6 сынып оқушысыФото: gov.kz

Есірткі жайлы (ертегі)

<a href="https://kyzylorda-news.kz/">Kyzylorda-news.kz</a> Күні кеше желіде туған аға-жеңгесі 17 жыл құлдықта ұстаған апалы-сіңлілердің бірінің қол-аяғы, аузы скотчталғаны түсірілген фото тараған еді. Бүгін журналист Руслан Өтепбай суреттің тарихын Құндыздың өзінен сұрап білді. Бұл туралы <a href="https://stan.kz/meni-zulfiya-bayladi-kyndiz-429370/">Stan.kz </a>ақпарат агенттігі хабарлады.Руслан Өтепбай әлеуметтік желідегі парақшасында видео жариялады. Онда журналист Құндыздан “Суреттегі сен бе? Сені кім бұлай байлап тастады?” деп сұрайды. Сонда Құндыз “Мама істеді. Зүлфия мама істеді” деп жауап береді.Құндыздың айтуынша, ол осындай күйде ұзақ уақыт бойы жатқан.<blockquote>“Мені байлап жатқанда Зүлфия мама осында болды”, - деді Құндыз.</blockquote>Ал Зүлфия Төлегенованың өзі Құндызды байламағанын айтып, бұл деректі жоққа шығарып отыр.<blockquote>“Мен оны байлаған жоқпын, тек “Құндызды үйге алып кіріңдерші” дедім. Оның байланған күйін өз көзіммен көрген жоқпын”, - деді Зүлфия Төлегенова.</blockquote>Құндыз Руслан Өтепбайдың сұрақтарына жауап беріп, аузының да скотчталғанын, байлаулы жатқан кезінде денесінің ауырсынғанын жеткізді.Таня есімді тұрғын да Руслан Өтепбайдың сауалдарына жауап берді.<blockquote>“Құндызды Әділхан байлады. Ол кезде мама үйде болмады, Алматыда болды”, - деді ол.</blockquote>Ал Құндыздың өзі оны байлаған сәтте Зүлфия Төлегенованың үйде болғанын нақты айтты.Фото: Видеодан скриншот

17 жыл құлдықта болған Құндыз өзін қамқоршысы байлап тастағанын айтты: "Азаптау" бабымен іс қозғалды

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Кемелұлы Тоқаев 2026 жылғы &nbsp;05 қаңтарда «Түркістан» газетіне берген сұқбатында «Әскери қызметтің абырой-беделін көтеру және еліміздің қорғаныс қабілетін арттыру – мемлекеттің басты басымдығының бірі.Қарулы Күштерімізді технологиялық тұрғыдан жаңғырту жұмысы қарқынды жүргізіле бастады. Былтыр Ұлы Жеңістің 80 жылдығына орай өткізілген әскери шеруді шетелдік саясаткерлер мен әскери қайраткерлер жоғары бағалады, бұл іс-шара армиямыздың заманауи қару-жарақпен және техникамен, соның ішінде Қазақстанда жасалған өнімдермен толық жабдықталғанын, сондай-ақ, әскери қызметшілеріміздің дайындығы өте жақсы екенін айқын көрсетті» деген болатын.«Atamnyn Amanaty» ұйымының миссиясы - тарихи жадыны сақтау, ұрпақтар сабақтастығын арттыру, жастарға рухани-адамгершілік және әскери-патриоттық тәрбие беру және осы бағытта мемлекетке барынша қолдау көрсету.Қазақстан сол соғыста хабар-ошарсыз кеткен азаматтарын іздеуші әлемдегі санаулы мемлекеттердің қатарынан. Майданға кетіп, із-түзсіз жоғалғандардың саны 271 мыңнан асады. Бұл шаруамен 2019 жылдың 19 мамырында құрылған «Atamnyn Amanaty» қоғамдық бірлестігі айналысады. Содан бері ұйымның ресми сайты, әлеуметтік желілері және байланыс телефондары арқылы хабарсыз кеткендерді іздестіруге 12 мыңнан астам өтініш келіп түскен. 4500-ден астам қазақстандық жауынгерлердің жерленген жерлері мен жеке бастарын анықталды. Майдан даласынан табылған 23сарбаздың сүйегі Қазақстанға жеткізіліп, әскери құрметпен салтанатты түрде жерленді.Далалық қазба жұмыстарын жүргізуде біздің ұйымның біршама тәжірибесі бар. Біздіңеріктілер жасағы Ресейдің Калуга облысы аумағындағы «Батыс майданы. Варшава тас жолы» халықаралық әскери-тарихи экспедициясына тұрақты түрде қатысып келеді. Бірер жыл бұрынбіздің еріктіліер 387-ші Ақмола атқыштар дивизиясы соғысқан Ульяновск ауданында жерлестеріміздің құрметіне ескерткіш-белгі орнатып қайтты.Өскелең ұрпақ өзінің өткен тарихын білуге тиіс. Мәселен, «Аталар аманатына адалмыз» атты акциясын ұйымдастыру дәістүрге айналды. Акция аясында әрбір колледждің студенттері Қазақстанда жасақталып, Екінші дүниежүзілік соғысқа қатысқан двизиялар мен құрмалардың тарихын, майдан жолын зерттеп, солар жөнінде ғылыми-іздестіру жұмыстарын жасайды.&nbsp;«Мың естігеннен бір рет көрген артық» дейді қазақ. &nbsp;Сол себепті Астана қаласының бір топ студенттерін қала түбіндегі әскери бөлімдерге алып бару дәстүрге айналды. Жасөспірімдер сапар барысында казармадан бастап, қару-жарақ, әскери техникалармен, иісшіл итермен танысып, солдат ботқасынан дәм татып, жауынгерлік өмірмен етене танысады. Бір күннің ішінде олардың әскери қызметке деген көзқарастары түбегейлі өзгерді деуге болады. Көбі бұрынғы ойларынан айнып, қажет болса Отан қорғаушысы ретінде сапқа тұруға тілек білдіріп жатады.Ұлы Абайдың: «Өлді деуге бола ма айтыңдаршы, Өлмейтұғын артында сөз қалдырған?» деген өлең жолдарын соңына өшпес із тастап, өлмес ерлік жасаған кез келген азаматқа айтуға болатындай. Кешегі қан майданда қас дұшпанемен арыстандай айқасқан батырдың бірі – Байбол Рахметов. Зеңбірек көздеушісі болған Сыр перзентінің сүйегі сексен жылдан астам уақыт өткен соң Псков түбінен табылып отыр. Топырақ астынан өзімен бірге көзі тірісінде қаһармандығы үшін алған «Қызыл жұлдыз» ордені мен «Ерлігі үшін» медалі бірге шықты. Сүйегі Псков облысынан табылған тағы бір боздақ ол - Оңтүстік Қазақстан облысы, Шаян ауданы, Ақбастау ауылында 1921 жылы дүниеге келген Мұсахан Қалмырзаев. Оның да дерегі «Ерлігі үшін» медалінің номері арқылы анықталды.Былтырғы жылдың басты оқиғаларының бірі – осы екі майдангердіңелге оралуы деуге болады. 2025 жылдың соңғы күндері олардың сүйегі әскери ұшақпен Қазақстанға жеткізіліп, 80 жылдан астам уақыт сарыла күткен туыстарына табыс етілді. Сосын бірі Түркістан облысында, екіншісі Қызылорда облысында әскери құрметпен жерленді. Біз осы сауапты іске атсалысқан барлық азаматтарға алғыс айтамыз. Ал, «Atamnyn Amanaty» қоғамдық бірлестігінің жұмысы жаңа жылда да жалғаса бермек.Мысалы жаңа 2026 жылға мынадай жобаларды әзірлеп, соларды іске асырудан үміттіміз:<ul><li style="text-align:justify;">Қазақстаннан шақырылған және Екінші дүниежүзілік соғысқа қатысқан солдаттар мен офицерлер туралы электрондық дерекқор құру. Ұлттық платформа нақты ақпаратты сақтап, олардың есімдерін ұрпақтарға жеткізіп, олардың үлестерін мойындауды қамтамасыз етеді.</li><li style="text-align:justify;">Халықаралық әскери-тарихи экспедиция «Батыс Қазақстан – Сталинград шайқасының алдыңғы шебі». Мақсат — соғыста қаза тапқан солдаттардың және бейбіт тұрғындардың сүйектерін көтеріп, есімдерін қалпына келтіріп, ескерткіштер орнату. Бөкейорда ауданында зерттеу мен мәңгі есте сақтау қажет 40-50 бауырлас қабір бар.</li><li style="text-align:justify;">Соғыс жылдары Қазақстан аумағында эвакуациялық госпитальдардың тарихын зерттеу, госпитальдарға жерленген орындарды анықтау, оларды абаттандыру және естелік тақтайшаларын орнату. Соғыс жылдары Қазақстанда шамамен 150 000 жаралы емделді, олардың көпшілігі қаза тауып, жергілікті зираттарға жерленді.</li></ul>Еуропада қаза тапқан қазақстандық солдаттарды іздеу. Қолда бар деректерге сәйкес, 2,2 миллионнан астам қызыл әскерлер, оның ішінде қазақстандықтар да бар, белгісіз жауынгерлер ретінде жерленген. Бұл жоба олардың есімдерін қалпына келтіріп, Қазақстанның Жеңіске қосқан үлесін халықаралық деңгейде мойындауға көмектеседі.Бұл ата-баба аманатын орындауға, ерлікті ұмытпауға,елдікті ұлықтуға, және ұлт тарихындағы тағы бір ақтаңдақты жабуға бағытталған игілікті іс болып табылады. Өйткені өскелең ұрпақтың бойында рухани-адамгершілік құндылықтарды, отансүйгіштік сезімді қалыптастыру мемлекет басшысы айтқандай ортақ парызымыз. &nbsp;Майданда хабар-ошарсыз кеткен туыстарын іздестірем деген адамдар болса бізге төмендегі байланыс телефондары арқылы тегін өтініш бере алады:8 -776 -828- 45- 35; 8-776- 828- 45- 34; 8 -701- 999- 78 -20,ata.amanaty@gmail.com. &nbsp; &nbsp;Мұрат Молдағалиев,«Atamnyn Amanaty» ҚБ басқарма төрағасы

«ATAMNYN AMANATY» ұйымы – ұрпақ сабақтастығының ұйытқысы

<a href="https://kyzylorda-news.kz/">Kyzylorda-news.kz</a> Қазақстан Республикасы Ішкі істер министрлігімен жыл сайын дәстүрлі түрде республика көлемінде «Погонды журналист» жобасы ұйымдастырылып келеді.Жоба бұқаралық ақпарат құралдарында және әлеуметтік желілерде учаскелік полиция инспекторларының, патрульдік, жедел қызметкерлердің, тергеушілердің, криминалистердің және басқа да полиция қызметкерлерінің күнделікті жұмысын көрсетуге бағытталған. &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;«Погонды журналист» жобасы Сыр өңірінде де жалғасын &nbsp;тауып келеді. Өңірлік бұқаралық ақпарат құралдарының өкілдері &nbsp;погон тағып, полицейлердің бір күндік жұмысымен танысты. &nbsp; &nbsp;Жуырда Қазақстан Республикасының Ішкі істер министрлігі &nbsp;жобаны қорытындылады. Байқауға еліміз бойынша республикалық және өңірлік БАҚ өкілдері қатысты.Жобада белсенділік танытқан өңіріміздегі «77 каналдың» тілшісі Смағұлов Ержан Орынбасарұлы Қазақстан Республикасының Ішкі істер министрі &nbsp;Саденов Ержан Сапарбекұлының «Алғыс хатымен» марапатталды.Міне, бүгін &nbsp;Қызылорда облысы Полиция департаментінің бастығы полиция полковнигі Ергешов Серік Жүрсінбайұлы журналистке Министр марапатын салтанатты түрде табыстады.Серік Жүрсінбайұлы Сыр өңірінің журналистері ішінде ерекше белсенділік танытып, қиын салада қалтқысыз еңбек етіп жүрген полицейлердің тынымсыз еңбегін көпшілікке жоғары деңгейде көрсете білген облыстық «77» каналдың тілшісі Смағұлов Ержан Орынбасарұлын марапатымен құттықтап, алғысын білдірді.

«Погонды журналист»  жобасының қатысушысы марапатталды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде шетелден келген студенттермен кездесу өтті.Іс-шара барысында университеттің Ғылыми жұмыстар және халықаралық байланыстар жөніндегі проректоры Майнура Бурибаева алғысөз сөйлеп, кездесудің мақсатына тоқталды. Ол өз сөзінде шетелдік студенттердің оқу ордасында еркін бейімделуіне жағдай жасалатынын атап өтіп, оқу және тұрмыс барысында туындайтын кез келген мәселені ашық айтуға шақырды.Кездесудің негізгі мақсаты – университеттің ішкі тәртіп ережелерін және Қазақстан Республикасының заң талаптарын түсіндіру, сондай-ақ шетелдік азаматтардың құқықтық сауаттылығын арттыру болды.Іс-шара аясында Қызылорда қаласы прокуратурасының бөлім прокуроры Сәкен Абдулғазиз шетелдік азаматтарға қатысты қылмыстық заңнаманың негізгі талаптары бойынша түсіндірме жұмыстарын жүргізді. Сонымен қатар, заң ғылымдарының кандидаты, аға оқытушы Ғанибек Отарбаев шетелдік студенттердің қылмыстық құқық бұзушылықтарға, оның ішінде есірткі құралдары мен өзге де тыйым салынған заттарды тасымалдауға абайсыздан немесе алдау жолымен тартылып кетуінің алдын алу мәселелеріне тоқталды.Кездесуге прокуратура және полиция органдарының өкілдері де қатысып, студенттердің қойған сұрақтарына жан-жақты жауап берді. Шетелдік студенттер өздерін толғандырған мәселелер бойынша пікір білдіріп, тиісті мамандардан нақты түсіндірмелер алды.Мұндай шаралар шетелден келген студенттердің білім алу сапасын арттыруға, Қазақстан қоғамына бейімделуін жеңілдетуге және олардың құқықтық қауіпсіздігін қамтамасыз етуге бағытталған.<img src="https://knadmin.beoblood.kz/uploads/Whats_App_Image_2026_01_24_at_12_11_02_1fe78193ac.jpeg" alt="ПД.jpeg">

Студенттерге түсіндірме жұмыстары жүргізілді

<a href="https://kyzylorda-news.kz/">Kyzylorda-news.kz</a> Қазалы ауданында ауған соғысының ардагері, Қазалы ауданының құрметті азаматы, генерал-майор Әлімжан Қанағатұлы Ерниязовтың 70 жасқа толуына орай мерейтойлық қабылдау өтті.Тағылымы мол шарада аудан әкімі Алмасбек Есмаханов ерлік пен батырлықтың, Отанға адал қызмет етудің биік үлгісін көрсеткен ардагердің ел алдындағы ерен еңбегін кеңінен атап өтті. Ауған соғысының отты жылдарынан абыроймен өтіп, Қазақстан Қарулы Күштерінде жауапты басшылық қызметтерді атқарған Әлімжан Қанағатұлын – жас ұрпаққа патриоттық тәрбиенің айқын үлгісі екенін жеткізді.Жиында мерейтой иесіне Қазалы ауданының дамуына қосқан ерекше үлесі үшін ауданның ең жоғары марапаты – Қазалы ауданының «Құрмет» грамотасы табысталып, дәстүрге сай сый-құрмет көрсетілді.Салтанатты қабылдауда аудандық мәслихат төрағасы Ғазиз Әліш, аудандық қоғамдық кеңес төрағасы Талайлы Бөріқұлақов сөз сөйлеп, мерейтой иесіне ақжарма тілектерін арнады.Басқосуда Әлімжан Қанағатұлы көрсетілген зор құрмет пен ыстық ықылас үшін аудан басшысы мен зиялы қауым өкілдеріне және барша жерлестеріне шынайы алғысын білдіріп, ел амандығы мен бірлігін тілейтінін жеткізді.Әлімжан Қанағатұлы – 1955 жылы Қазалы қаласында дүниеге келген. 1977 жылы Алматы жоғары жалпы әскери командалық училищені бітіргеннен кейін Мәскеу қаласындағы М.В.Фрунзе атындағы академияда білім алады. 2001 жылы РФ Қарулы күштері Бас штабының академиясын тәмамдайды. 1977 жылы Алматы жоғары жалпы әскери командалық училищесін бітірді. 1980-1981 жылдары Ауған соғысының отты жолдарынан өткен Әлімжан Қанағатұлы «Қызыл жұлдыз», «Қарулы күштер қатарында Отанға қызмет еткені үшін» ордендерімен және бірнеше мерейтойлық медальдармен наградталған. Әскери қызметінің алғашқы жылдары Орта Азия әскери округында мотострелоктық взвод және рота командирі сияқты бастапқы командалық лауазымдарда болды. Кейінірек полк, дивизия командирінің орынбасары, штаб бастығы, қару-жарақ және техника сақтау базасының бастығы сияқты жоғары лауазымдарды атқарды. Қазақстан Республикасы Қарулы Күштері Бас штабының оқу орталығы мен Арсеналдар және әскери техника сақтау басқармасында басшылық қызметтерде болды. 2007-2009 жылдар аралығында «Батыс» аймақтық командалық құрамасының әскерлерін басқарды. Мұнан кейінгі жылдары Қызылорда облысының қорғаныс істері жөніндегі департаменттің бастығы және ҚР Қорғаныс министрлігінде түрлі жауапты қызметтерді атқарып, 2013 жылы зейнеткерлік демалысқа шықты.&nbsp;Бүгінгі таңда ағамыз – Қазақстан армиясының құрметті генералы, әскери даярлық пен отан қорғаудың маңыздылығын насихаттаушы ардагер.<img src="https://knadmin.beoblood.kz/uploads/Ardager_59d6be0286.jpg" alt="Ардагер.jpg">

Ардагерді мерейтойымен құттықтады

<a href="https://kyzylorda-news.kz/">Kyzylorda-news.kz</a> Партия алаңында халықты әлеуметтік қорғау саласындағы реттеу және бақылау комитетінің Қызылорда облысы бойынша департаментінің басшысы Бекболат Шәріпбеков азаматтарды жеке мәселелері бойынша қабылдау өткізді.Қабылдауға келген тұрғындар денсаулық сақтау саласына қатысты, мүгедектікке шығу заңдылықтары мен зейнеткерлікке жұмыс өтілінің есептелуі жайында мәселелер көтерді.Департамент басшысы тұрғындардың өтініш-тілектерін тыңдап, қолданыстағы заңнамалар аясында түсіндірме жүргізіп, құзырлы органдар арқылы мәселелердің шешілуіне жұмыс жасалатынын жеткізді.

Азаматтарды жеке мәселелері бойынша қабылдады

<a href="https://kyzylorda-news.kz/">Kyzylorda-news.kz</a> Астанада Конституциялық комиссияның екінші отырысында Ата заңға енгізуге ұсынылған түзетулерді жан-жақты қаралды. Бұл түзетулер қоғам өкілдерінен, саяси партиялардан және сарапшылар қауымдастығынан келіп түскен көптеген ұсыныстардың барлығы ескеріле отырып қалыптастырылды.ҚР Конституциялық Сотының төрайымы Эльвира Азимованың хабарлауынша, Комиссияға екі мыңнан астам ұсыныс келіп түскен, олардың барлығы біртұтас Жинақталған кестеге біріктірілді.<blockquote>«Азаматтар мен сарапшылардың белсенді қатысуы конституциялық реформаның жоғары қоғамдық маңызын растайды. Мұндай диалог форматы негізгі қағидатты айқындайды: конституциялық реформа ең алдымен халықтың мүддесі үшін және оның тікелей қатысуымен жүргізіледі», – деді Эльвира Азимова.</blockquote>Отырыс барысында Әділет министрі Ерлан Сәрсембаевтың, Сенат депутаты Нұрлан Бекназаровтың және Мәжіліс депутаты Снежанна Имашеваның баяндамалары тыңдалды.Атап айтқанда, Әділет министрі түзетулерді Конституцияның Үкіметтің, Конституциялық Соттың, прокуратура органдары мен сот билігінің жекелеген функцияларын, құқық қорғау тетіктерін, жергілікті өзін-өзі басқаруды, жекелеген аумақтарда арнайы құқықтық режим белгілеу қағидаттарын, сондай-ақ Конституцияға өзгерістер мен толықтырулар енгізу тәртібін реттейтін бөлімдері мен баптарына енгізу ұсынылып отырғанын айтты.Оның айтуынша, түзетулердің жекелеген блогы болашақ бір палаталы Парламент – Құрылтайдың қызметіне қатысты болады. Мысалы, төрағаны тағайындау тәртібі, депутаттық корпусты қалыптастыру және өзге де рәсімдік мәселелер регламенттеледі.Үкіметтің функцияларын реттеу бөлігінде мемлекеттік бағдарламаларды бекіту, сондай-ақ мемлекеттік комитеттерге қатысты өкілеттіктерді алып тастау ұсынылады.Сонымен қатар, Конституцияда сот билігінің әкімшілік сот ісін жүргізу арқылы жүзеге асырылатыны тікелей көрсетілуі ұсынылады. Бұл құқық үстемдігі қағидатын нығайтуға және мемлекет пен азамат арасындағы нақты теңгерімді қамтамасыз етуге бағытталған маңызды қадамдардың бірі болмақ.Ерлан Сәрсембаевтың айтуынша, ұсынылып отырған өзгерістер мемлекеттік жүйенің тиімділігін кешенді түрде арттырады.<blockquote>«Қоғам үшін бұл мемлекеттің сыртқы немесе ішкі жағдайларға қарамастан, дәйекті әрі құқықтық алаңда әрекет ететініне деген болжамдылық пен толық сенімді білдіреді. Әлеуметтік міндеттемелер орындалады, экономикалық үрдістер жалғасады, халықаралық міндеттемелер сақталады», – деді әділет министрі.</blockquote>Өз сөзінде Сенат депутаты Нұрлан Бекназаров бір палаталы Парламентке көшуге байланысты Конституцияның тиісті баптарына көптеген өзгерістер енгізу жоспарланып отырғанын атап өтті.Ұсынылатын тәртіпке сәйкес, Құрылтай Конституциялық заңда белгіленген тәртіппен бірыңғай жалпыұлттық сайлау округі бойынша пропорционалды өкілдік жүйесі арқылы сайланатын 145 депутаттан құралады. Депутаттардың өкілеттік мерзімі бес жылды құрайды.Нұрлан Бекназаров сондай-ақ Конституцияға Халық кеңесінің өкілеттіктері туралы жеке бөлім енгізу оның айрықша маңызын айқындайтынына назар аударды.<blockquote>«Халық кеңесі – Қазақстан халқының мүдделерін білдіретін жоғары консультативтік орган, оның құрамы Қазақстан Республикасының азаматтарынан қалыптастырылады. Халық кеңесін құру тәртібі, оның құрамы, өкілеттіктері және қызметін ұйымдастыру мәселелері Конституциялық заңмен бекітіледі», – деді ол.</blockquote>Мәжіліс депутаты Снежанна Имашева Конституциялық комиссия мүшелеріне бірінші отырыстың қорытындысы бойынша әзірленген түзетулердің салыстырмалы кестесін таныстырды.Оның айтуынша, жинақталған ұсыныстар Қазақстанның конституциялық құрылысының негіздерін нақтылау мен нығайтуға, жекелеген нормалардың құқықтық айқындығын арттыруға және құқық қорғау тетіктерін күшейтуге бағытталған.Ерекше назар Преамбуланы күшейтуге, құқықтық және зайырлы мемлекет қағидаттарын бекітуге, адам қадір-қасиетін, өмір сүру құқығын, жеке бостандық пен қол сұғылмаушылықты, сондай-ақ жеке өмір мен дербес деректерді қорғауға аударылды.<blockquote>«Ұсынылып отырған өзгерістер конституциялық нормалардың іс жүзінде қолданылуын күшейтуге және оларды түсіндіруде бірыңғай тәсілдерді қалыптастыруға бағытталған», – деп түйіндеді Снежанна Имашева.</blockquote>Конституциялық комиссияның мүшелері жекелеген жұмыс секциялары шеңберінде Негізгі заңға ұсынылған түзетулерді талқылауға кірісті. Келесі отырыс бүгін сағат 16.00-де өтеді.

Конституциялық комиссия түзетулер жобасын талқылауға кірісті

<a href="https://kyzylorda-news.kz/">Kyzylorda-news.kz</a> Бүгін аймақ басшысы Нұрлыбек Машбекұлының тапсырмасына сәйкес облыс әкімінің бірінші орынбасары Данияр Жаналиновтың төрағалығымен пайдалануға берілген әлеуметтік нысандар мен тұрғын үйлердің қазіргі жай-күйі талқыланған мәжіліс өтті. Жиынға жауапты сала басшылары қатысып, нақты тапсырмалар жүктелді.«Пайдалануға берілген және құрылысы жүргізіліп жатқан әлеуметтік нысандарға, тұрғын үйдің сапасына кешенді зерделеу жүргізіңіздер. Барлық нысанның жоба-сметалық құжаттамаға және қолданыстағы құрылыс нормаларына сәйкестігі қатаң бақылануы тиіс. Өйткені мемлекет қаржысына салынған нысандар халықтың игілігіне қызмет етеді. Кепілдік мерзімі аясында мердігер ұйымдар анықталған кемшіліктерді толық жойып, атқарылған жұмыстарға тұрақты мониторинг жүргізуі керек», – деді Д. Жаналинов.Мемлекет басшысының, Үкіметтің қолдауының нәтижесінде аймақта құрылыс қарқыны жыл сайын артып келеді. 2022 жылдан бері өңірде 200-ге жуық әлеуметтік нысан салынған. Тұрғындарды баспанамен қамтамасыз етуге бағытталған мемлекеттік әлеуметтік саясаттың жемісі ретінде кейінгі жылдары тұрғын үй кезегінде тұрған азаматтарға 5 мыңнан астам пәтер табысталғанын атап өту керек.2023 жылы барлық ауданда алғаш рет 1 800-ге жуық пәтер тұрғындарға пайдалануға берілді. Өткен жылы 3 600 пәтерлік тұрғын үйлер құрылысына бюджеттен 58 млрд 785 млн теңге бөлінді. Кезекте тұрған азаматтарға 2 392 пәтер табыстау үшін 57 млрд 440 млн теңге қаржы жоспарланған.Ерекше атап өту қажет, былтырдан бастап Қызылорда қаласында заманауи сәулеттік үлгідегі жеті, тоғыз және он екі қабатты тұрғын үйлер құрылысы қарқын алып келеді.Фото: Қызылорда облысы әкімінің баспасөз қызметі

Әлеуметтік нысандар мен тұрғын үйлердің сапасы қатаң бақылауда

<a href="https://kyzylorda-news.kz/">Kyzylorda-news.kz</a> Өскемен қаласында мерзімді әскери қызмет атқарып жүрген сарбаз қаза тапты. Бұл туралы <a href="https://stan.kz/shigis-kazakstanda-sarbaz-kizmet-barisinda-ozin-atip-zh-429329/">Stan.kz </a>ақпарат агенттігі хабарлады.Құрлық әскерлерінің баспасөз қызметінің мәліметіне сенсек, сарбаз оқиға орнында көз жұмған.<blockquote>"3 қаңтар күні Өскемен гарнизонындағы әскери бөлімдердің бірінде қарауыл қызметін атқару кезінде мерзімді әскери қызметкер өзіне бекітілген қарудан өзін-өзі атып жіберген. Алған жарақаттарынан ол оқиға орнында көз жұмды", – делінген хабарламада.</blockquote>Марқұм сарбаз өткен жылдың сәуір айында мерзімді әскери қызметке шақырылған.Аталған дерек бойынша Ішкі істер министрлігі Шығыс өңірлік әскери-тергеу басқармасының Өскемен бөлімі қылмыстық іс қозғады. Сотқа дейінгі тергеу барысы Өскемен гарнизонының әскери прокуратурасының бақылауында. Оқиғаның себептері мен мән-жайы анықталып жатыр. Тергеу мүддесіне байланысты өзге ақпарат жарияланбайды.Қорғаныс министрінің тапсырмасымен оқиға орнына вице-министр Асқар Мұстабековтің жетекшілігімен арнайы комиссия жіберілді.Қорғаныс министрлігі мен Қарулы күштері қаза болған сарбаздың туған-туыстары мен жақындарына көңіл айтты. Отбасына қолданыстағы заңнамаға сәйкес қажетті көмек көрсетіледі.Фото:&nbsp;Pexels.com

Қазақстан және Қызылорда облысының жаңалықтары