<a href="https://kyzylorda-news.kz/">Kyzylorda-news.kz.</a> Соңғы уақытта Қызылордада жылыжай шаруашылығы жақсы қолға алынып келеді. Жалпы, Сыр өңірінің климаты ерекше ыстық және құрғақтығы басым аймаққа жататыны белгілі. Содан да болар, Қызылордада жасыл желектің жайқалып өсуі қиын деген пікірді жиі естиміз. Дегенмен, ынта, ықылас болса, бұл пікірге келісе қоюға болмайды. Аймақта ағаштың да, жемістің де түр-түрін өсіруге болады. Тіпті, өз ауласының ішінен жылыжай салып, оған алуан түрлі көкөністі отырғызуға болады. Қызылорда қалалық ауыл шаруашылығы бөлімінің басшысы Нұрбек Әзірбектің айтуынша ауыл шаруашылығына қызығатын қызылордалықтар саны жыл өткен сайын артып келеді.Жалпы, өткен жылы ауыл шарашылығы құрылымдарында 9036 гектарға ауыл шаруашылық дақылдары егіліп, 2 519,8 тонна ет, 3241 тонна сүт, 685 мың дана жұмыртқа өндірілді.<blockquote>«Мемлекеттік бағдарламалар да шаруа қожалықтарына мал басын көбейтуде өз жеңілдігін тигізуде. Мәселен, өткен жылы «2021-2025 жылдарға арналған кәсіпкерлікті дамыту жөніндегі ұлттық жоба» аясында кент, ауылдық округтер бойынша қаржы институттары арқылы – 25 жоба мақұлданып, 232,7 млн. теңге несиеге &nbsp;45 бас МІҚ, 616 бас уақ мал, 246 бас жылқы сатып алынды. Сонымен қатар, қала тұрғындарын көкөніс және бақша өнімдерімен қамтамасыз ету мақсатында Қарауылтөбе ауылдық округінен 10 гектар егістік жер бөлініп, ынта білдірген 70 тұрғын картоп, қияр, қызанақ, сәбіз, асқабақ, қауын-қарбыз &nbsp;дақылдарын егумен айналысты», – деді бөлім басшысы Нұрбек Әзірбекұлы.</blockquote>Өткен жылы өнімдерді өндірудің жаңа технологиялары арқылы, яғни жаңбырлатып суару әдісімен Ақсуат ауылдық округінде «Алдан» шаруа қожалығымен 200 гектарға жаңа жоңышқа егілді. «Golden Bridge Turan» ЖШС-імен 6 гектар аумақтағы жылыжайдың 50 данасына күріш дақылы көшеттеп егу тәсілі арқылы орналастырылды. Сондай-ақ, тамшылатып суару технологиясымен &nbsp;Қарауылтөбе ауылдық округінде 3 гектар қызанақ және Қызылөзек ауылдық округінде 8 гектар картоп егілді. Ал, Ақсуат ауылдық округінде көлемі 2,2 гектар автоматтандырылған жылыжай кешеніне қаңтар айында егілген қияр өнімінен 246 тоннаға жуық өнім жиналды.Шағын жылыжай кешенін дамытуда Ақсуат пен Қызылжарма ауылдық округтерінен &nbsp;жаңадан жалпы көлемі 1300 шаршы метрді құрайтын 2 дана жылыжай кешені іске қосылды. Сонымен қатар, Ақсуат ауылдық округі мен Белкөл кентінен «Қызылорда өңірілік инвестиция орталығы» арқылы 13,0 млн. теңгеге 2 дана жылыжай кешені салынды.Бүгінде әлеуметтік маңызы бар азық-түлік тауарлары бағаларын тұрақтандыру мақсатында «Байқоңыр» ӘКК»-ы арқылы 5 сауда үйлерінде («Аль-Асад», «Ажар», «Қызылорда», «Мирас», «Анвар») әлеуметтік бұрыштар орналыстырылса, 37 әлеуметтік дүкен қызмет көрсетуде. Сонымен қатар, 2022 жылы қала әкімдігі және күріш өндірушілер мен негізгі ірі сауда орындары арасында үш жақты меморандум жасалып, қазіргі уақытта күріш «Қызылорда» Оптомаркетінде 370 теңгеден, «Анвар» Сауда үйінде 372 теңгеден, «Аль-Асад» және «Ажар Сити» сауда үйлерінде 373 теңгеден сатылуда.Осы орайда, ҚР Үкіметімен бекітілген 19 түрлі әлеуметтік маңызы бар азық-түлік тауарларына әр аптаның дүйсенбі күні қала әкімдігі мен &nbsp;ауыл шаруашылығы басқармасы, Статистика департаменті, «Байқоңыр» ӘКК»-ымен қала аумағындағы ірі сауда орындары мен супермаркеттерден ашылған әлеуметтік бұрыштарға мониторинг жұмыстары тұрақты жүргізілуде.

Қызылордада жылыжай шаруашылығы қарқынды дамуда

<a href="https://kyzylorda-news.kz/">Kyzylorda-news.kz.</a> KMF және «KMF-Демеу» корпоративтік қоры бірлесіп алғаш рет Жаңақорған агротехникалық колледжінде «Құрғақшылық кезінде бизнесті басқару» тақырыбында агрофорум ұйымдастырды. Елдегі әлеуметтік жағдайды ескеріп, шаруалардың басын біріктірген семинар диқандар үшін өте маңызды өрбіді. Өйткені, бүгінгідей су тапшылығы кезінде егісті әртараптандыру, суландыру жүйесін тиімді пайдалану, үнемдеуді үйлестіру үлкен мүмкіндіктер береді.Иә, тіршілігін егін шаруасымен түйіндеп, нәпақасын Жер-Анадан теріп жүрген дала еңбеккерлері үшін су мәселесі бірінші орындағы түйткіл. Осыны ескеріп, егінші қауымның ертеңіне сара жол салуды салмақтаған «KMF» қаржы ұйымының бұл форумына аудандағы шаруалар түгел келуге тырысты.Алдымен колледжге кіре берістегі фойеде KMF компаниясының ауылшаруашылық көрмесі топтасып, бақша өнімдері туралы түсіндірілді. Көрме семинар соңына дейін жалғасып, ауданның дала еңбеккерлері керекті мәліметтерін ала алды. Шараның ашылуында көрмеге өнімдерін ала келген «Alem agro» ЖШС, «ASELL LTD» ЖШС, «СТ АГРО» ЖШС, «ENZA ZADEN» ЖШС, «KWS» ЖШС компаниясы өздерін таныстырды. Алғашқы сөз аудан әкімінің орынбасары Дархан Тұрсынбаевқа берілді.<blockquote>«Ең бірінші KMF компаниясының 25 жылдық мерейтойымен аудан әкімдігі мен тұрғындар атынан шын жүректен құттықтаймын. Осыдан 1 ай бұрын компания өкілдері бізге келіп, мән-жайды түсіндіргеннен кейін біз бірден қолдай кеттік. Өйткені, бүгінгі қозғалып отырған мәселе тек Жаңақорған ғана емес, Сыр өңірінің шаруалары үшін өте өзекті. Сондықтан осындай қысылтаяң кезде біздің ауданға келіп, үлкен семинар өткізіп жатқан сіздерге де алғыс айтамыз», – деп ізгі тілегін білдірді.&nbsp;</blockquote>Содан соң сату және аймақтық желіні дамыту департаментінің директоры Арман Абылайхан сөз алып, форумның өтуіне қолдау білдірген аудан әкімдігіне алғыс білдірді. «Алғашқы жиынды Жаңақорғанда өткізуіміздің себебі көп, ең бастысы, аймақтағы егін саласына ең қолайлы аудан екенін ескеріп, бастама көтердік. Бәрінен бұрын бүгінгі басқосуда бизнес өкілдері, диқандар өздеріне қажетті мағлұматтар алады деген сенімдемін», – деп «KMF» МҚҰ-ның аймақтық директоры Әділбек Қайырбаев қысқа қайырды.Ал, компанияның аудандағы бөлімше бастығы Әлия Алиева жалпы ұйымның тарихы туралы, әр жылдағы жетістігін саралады. 1997 жылы кепілсіз кредит беруден басталған мекеме жұмысы айналдырған 10 жыл ішінде елдің әр өңірінен 23 бөлімше ашып, ҚР экономика саласындағы үздік ұйым саналды. 2012 жылы 140 млрд теңге көлемінде несие берілсе, 2017 жылы KMF – Орталық Азияда және ТМД елдері арасында микроқаржы секторының көшбасшысы атанды. Қазір кредиттік портфелі 190 млрд-тан асып жығылады.Жиынның модераторы, KMF-Демеу бизнес-тренері Біржан Серіков «Аграрлық нарық пен технологиядағы өзекті жағдай» тақырыбында алғашқы сессияны таныстырды. Әлем нарығы мен Қазақстандағы ахуалды салыстырып, саралады. Екінші сессияда, «Қант қызылшасын өсіру» тақырыбында PhD докторы, Альберт университетінің түлегі (Канада), KWS компаниясының аймақтық өкілі Бекзат Түрегелдиев талдау жасады. Қант қызылшасын өсірудегі тиімділік, пайдасы мен ел нарығындағы алар орны түсіндірілді. «Топырақты талдау» бойынша &nbsp;агросарапшы Самалбек Қосанов, «Қызылорда облысы жағдайында тамшылатып суарудың тиімділігі» турасында агросарапшы Серік Жантасов және «Фермерлер үшін маркетплейстің пайдасы мен артықшылығы» жөнінде KMF-Демеу агрокеңесшісі Жәнібек Қалиев баяндама жасады.<blockquote>«Шыны керек, бүгінгі тақырып өте өзекті, өйткені, алдағы құрғақшылықта егістікті төмендетпей, керісінше көлемін кеңейтуді жолға қоюымыз керек. &nbsp;Бүгінгі форумда келешекке жүйелі жоспар жасадық. Жалпы KMF ұйымының қазіргідей ахуалдағы қолдауы өте үлкен. Өзім 12 жылдан бері осы компанияның тұрақты тұтынушысымын. Аз уақыт емес, еш өкпеміз жоқ, керек кезінде уақыт оздырмай қажетті қаржыны береді. Бұл шаруаларға көп көмек және үлкен қолдау, &nbsp;– деді қыркеңселік Әлеухан Шайхсламов.</blockquote>Иә, бұл қаржы ұйымының артықшылығы аз емес. Комиссия алынбайды, кепілге бейілді талаптар қойылады, кепілді тегін бағалайды және бизнесті тиімді жүзеге асыру үшін бизнес-сауаттылық бойынша семинарлардан өту құқығы болады. Бүгінгі форум соның айғағы.<blockquote>«2018 жылдан бастап осы компанияның тұрақты тұтынушысымын. Бастапқыда 5 млн қаржымен бастадым, содан соң 18 млн, 20 млн-ға дейін қаржы алдым. Көбіне қаржы егістікке бағытталады, ең бастысы, қаржы керек кезде мекеме уақытылы қолдау көрсетеді. Бұл бастамасы, бұйырса, бұдан да бірлесе жұмыс жасауға дайынбыз. Бүгінгі форумнан маңызды мағлұмат ала алдым. Біздің ауылға қажетті қант қызылшасы мен тамшылатып суаруды ұтымды ұйымдастырып, келешекте осы жүйеге көшеміз. Алдағы уақытта да осындай семинарлар жиі өткізіліп тұрса», – дейді қожакенттік «Еркінқожа» шаруа қожалығының төрағасы Еркін Әбілхайыров.</blockquote>25 жылдық мерейтойы қарсаңында KMF және «KMF-Демеу» корпоративтік қоры бірлесе өткізген «Құрғақшылық кезінде бизнесті басқару» тақырыбындағы агрофорумның мәні мен маңызы осындай.

Жаңақорған ауданында агрофорум өтті

<a href="https://kyzylorda-news.kz/">Kyzylorda-news.kz.</a> Жаңақорған кенті белесі “Алпамыс батыр” спорт кешенінде білікті бапкер, ұлағатты ұстаз Бектұрсын Абутраповты еске алуға арналған еркін күрестен 2009- 2010 жылы туылған балуандар турнирінің жалауы желбіреді. Жасөспірімдер арасында өткен республикалық турнирге бірнеше өңірден балғын балуандар келіп, бақ сынады.Жалпы Сыр еліндегі еркін күрес балуандарының мектебі Жаңақорғанда қалыптасқан. Жарты ғасырдан астам тарихы бар мектептің бүгінгі түлектері әлемдік ареналарда бақ сынап, ел абыройын асырып жүр. Бүгінгі еске алу турнирінің себепкері бапкер, күрес мектебінің қаоыптасуына еңбегі сіңген жаттықтырушы Бектұрсын Абутраповтың есімі жыл сайын ұлықталу дәстүрге айналды. Бұл кісінің жалпы еңбек жолынан бұрын әріптестері, замандастары пікір білдірген еді.<blockquote>«Жарыс болатыннан 15 күн бұрын бапкерлерді жұмыстан босатып, арнайы дайындық жүргізетінбіз. Спорт мектебі мен №51 М.Қаратев атындағы мектептің спортзалында кезек-кезек жаттығу жасайтын едік. Бектұрсын Абутрапов, спорт мектептің директоры Жақсылық Егізбаев пен шабандоз Айдар Рыспабев, Әбдіхалық Абдуллаев сынды азаматтардың еңбегі көп сіңді. Жетпісінші жылдары еркін күрес пен волейбол, ат спортының тынысы осылай ашылды», – деді спорт ардагері Омар Төлегенов.</blockquote>Иә, өткен ғасырдың сексенінші жылдарында аудан күресін өрге сүйрегеннің бірі Бектұрсын ағамыз дейді кейінгі көзін көрген буын. Сол ағалардың ізін басып, жолын жалғаған жастардың алды Олимпиада ойындарында бақ сынап жүр. Төрт құрылықтың басты спорт додасында еркін күрестен төрт рет қатарынан жаңақорғандық балуандар барын салды. Азияны бірнеше рет бағындырып, әлемнің жүлдегері де атанып үлгерді. Енді солардың басқан қадамымен жүріп келе жатқан бала балуандар биыл жақсы нәтиже көрсете бастады.Сонымен екі күнге созылған жарыс нәтижесінде жаңақорған жеткіншектер жеңіс жолынан көрінді. №8 спорт мектебінің шәкірттері алтын апталып, күміспен қапталып, қоламен қуантты. Жас болса да білікті бапкер Ғабит Әбіловтің үш оқушысы алтын тұғырдан көрінді. 38 келіде Палмахан Жорабек, 44 келіде Зұлхарнай Қасымжомарт және 57 келіде Серік Қуаныш чемпион атанды.<blockquote>«Жарыс жоғары дәрежеде өтті. Әрине, оқушылардың алды жаттығуда жүргеніне жылдан асты. Дегенмен нәтиже жақсы. Бұйырса келер жылы бұдан да биікті бағындыруға бар күшімізді саламыз», – дед Ғабит бапкер.</blockquote>Жалпы Жаңақорғанда еркін күрестен бір жылдың ішінде республикалық бірнеше турнир өтеді. Бұның өзі өсіп келе жатқан жеткіншектердің спорттық шыңдалуына, биіктеуіне үлкен септігін тигізеді. Жаңақорған кентінде «2022 жыл Балалар жылы» мерекесіне орай тоғызқұмалақтан 2009 жылы туылған және одан кіші жасөспірім ұлдар және қыздар арасында аудандық жарыс өтті. Жарысқа кент және ауылдық округтердегі жалпы білім беретін мектептерден 40 спортшы қатысты.Жарыс қорытындысы бойынша ұлдар арасында: 1-орын Тасан Жанболатқа (№56 орта мектеп) бұйырды. 2-орын Мырзахмет Асылнұрдың (№163 орта мектеп) еншісінде, үздік үштікті Нұрназар Жомартұлы (№51 орта мектеп) түйіндеді. Ал, қыздар арасында Аянат Қасым (№163 орта мектеп) алтын тұғырдан көрінсе, Інжу Орынбасар (№51орта мектеп) күміспен күптелді. Айзере Амангелді (№51 орта мектеп) қолаға қол созды. Жеңімпаз жүлдегерлер аудандық дене шынықтыру және спорт бөлімінің грамоталарымен және медальдарымен марапатталды.Жаңақорғанда тоғызқұмалақ ойыны соңғы бес жылда жақсы нәтиже көрсетіп келеді. Қасен ағайдың шәкірттері жарап тұр. Ермұхамед бастаған алтын жолды кіші буын жалғап, жақсы нәтижемен көзге түсуде. Міне, өткен аптада жаңақорғандық жас спортшылар осылай жылды қорытты.

Жаңақорғанда спорт жаттықтырушысы Бектұрсын Абутраповтың есімі ұлықталды

<a href="https://kyzylorda-news.kz/">Kyzylorda-news.kz.</a> Қазір құрылыс саласының материалдары нарықта үлкен сұранысқа ие. Өзге өңірді айтпағанда, біздің ауданның өзінде тапсырыс тым көп. Әсіресе, маусымдық кезеңде көлемі артып, тауар айналымы тұтынушылар талғамына сай түрленіп тұрады. Бірақ, соған сай баға да өсіп барады. Бағаны нарық реттейді, бәсекелестік күшейген ортада құрлылыс материалдарының жаңаруын жыл сайын көріп келеміз. Мәселен, үй қабырғасын тұрғызу үшін бүгінге дейін қызыл кірпіш, шлакоблок, пеноблок бренд болса, енді полистеролбетонды тұтыну трендке айналуы мүмкін. Мұндай өнім шығаруды Жаңақорғанда бірінші болып Сәкен Сыздықов қолға алыпты.Дара кәсіпкер «Өркен» деп аталатын кәсіп иесі былтыр шағын цехын іске қосып, өнім шығарды. Тек қаржы тапшылығынан, оның үстінен тапсырыстың аздығынан кешегі күнге дейін нарықтың үлкен айналымына толық ене алмаған. Енді тұтынушылардың талғамына, ұсынысына сай өнімнің өрісін кеңейтуде.<blockquote>«Бұл кәсіпті ашу туралы ой өзім үй құрылысын бастағаннан соң келді. Бастапқыда қызыл кірпіштен қабырғаны тұрғызуға ниет қылдым. Бірақ, интернет арқылы осы өнімге назарым ауып, сатып алуға бел байладым. Алайда, Алматы қаласынан тапсырыс беру уақыты 1-2 жыл көлемі болғандықтан, техникалық-экономикалық жағдайын зерттей келе өзіміз қолға алуды ұйғардық. 2020 жылдан бастап зерделей бастадым, алдымен елдегі өндірістердің әлуетін байқадым. Сөйтіп, интернет арқылы ресейлік мамандармен байланысып, қазақстандық кәсіпкер блогерлермен де кеңесіп көрдім. Тәжірибе жинақтаған соң Ресейдің Пермь каласынан шағын зауыт алдырдық. Оның ішінде шикізатты өнімге айналдыратын құрылғылар мен бетон қалыптары келді. Зауыт қызм еткерлерімен кез келген уақытта қоңырау шалып, білмеген тұстарымды сұрап отырдым», – деді кәсіп иесі.</blockquote>Тиісті сынақ-тест барысын ағамыз бағамдап көрген. Жылу сақтағыштығы, ауыр заттармен ұрып-соғу, 5 метр биіктіктен бетон бетіне тастау, суға батырып қою, от пен күйдіру, шеге қағу, қол арамен қырқу, қамаз автокөлігімен басу сынды сынақтан өткеннен кейін полистеролбетон блоктары басқа материалдарға қарағанда оқ бойы озып шыққан екен. Біздің білетініміз бұл құрылыс материалы көбіне ірі құрылыстарға, яғни, екі-үш қабатты нысан¬дар салуға қолданады. Енді үйдің құрылысын салуға да жұмсала бастады. Сәкен ағамыздың бастамасын ұлы Өркен қоштап, қазір күніне екі мезгіл, тапсырыс аз кезінде бір уақыт шикізаттан өнім шығарып отырады.<blockquote>«Жұмыс жүгі кесек құйып, шлакоблок өндіруден әлдеқайда жеңіл, тек қалыпты құрып, қайта жинау уақыт алады демесеңіз, барлығын техника жасайды. Өнім иленіп дайын болған кезде қалыпқа арнайы құбыр арқылы құйып отыру ғана қолды ұстайды. Бұл маусымдық жұмыс емес, қысы-жазы шығаратын боламыз. Өйткені, шағын цехымызда барлық жағдай жасалынған», – деді жас жігіт.</blockquote>Иә, Сәкен ағамыз келешекте бұл кәсіптің көкжиегін кеңейтіп, қосымша жұмыс күшін көбейтуді ойлап отыр. Әзірге сәл қаржы мен тапсырыс көбірек келсе болғаны, жастарды жұмыс жұмылдыруға дайын. Қазір 4 қызметкер бар, еңбекақысы күнделікті. Жазда цех іші салқын, қыста жылы болады. Ішінде, жуынатын бөлме, аяқ су мен ауыз, газ кіргізілген.<blockquote>«Бұл жобаға аз қаражат кеткен жоқ. Бұйырса «Атамекен» кәсіпкерлік палатасы арқылы 6 проценттік несие арқылы 5 млн қаржы алып, ісімді кеңейткім келеді. Құжаттарды өткізіп қойдық, бұйырса жақын арада қаржы аламыз деген ниеттеміз. Шыны керек, бұл жай ғана құрылыс заты емес. Бұның тиімді тұсы өте көп, үй жағдайында жаздай ыстықты өткізбесе, қыста жылы температура ұстайды. Мәселен, полистеролбетонды жалпағынан қалайтын болсаңыз, қақаған аязда 1 күн от жақпасаңызда үйдің температурасы сақталады. Тек 1 градус төмен түсуі мүмкін. Әрі, 2 метр кірпіштің жылылғымен бірдей, яғни кірпіштің қалыңдығымен есептегенде, екі метр кірпішті қатар өргенмен тең. Ал, тік өрсеңіз, онда 1,5 метр кірпіштің қалыңдығымен пара-пар. Оған көзім анық жеткен соң, тәуекелге барып, кәсіпті бастап кеттім» дейді ол.</blockquote>– Бағасы қолжетімді ме?– &nbsp;Әр данасы 1200 теңгеден. Көбісі қымбатсынатын, алайда биылдан бастап сатып алушылар қатары көбейіп келеді. Айына 3000 дана шығарудамыз, жалпы көлемі 600×300×200 болады. Ал, құрамына келетін болсаңыз, қоспасы аз емес. Бірақ, адамзатқа зиянды ққоспа құрамда болмайды.Полистиролбетон – жеңіл және ауыр бетонды араластыру технологиясы арқылы түйіршіктелген кеуек пенопласт пен цементті қолдана отырып дайын¬далады. Пенопласт өнімге жылу айырғыш қасиеттер берсе, бетондық негіз оның беріктігін сақтайды. Мұндай құрылыс блоктары суыққа төзімді, дыбыс айырғыш және оттан сақтайтын қасиеттерге ие. Олар кәдуілгі кірпіштерден біршама жеңіл болады. Сондай-ақ, жарамдылық мерзімі де ұзақ. Полистиролбетон алғаш рет Германияда пайда болған, кейінірек Ресей мен Кореяда дамып, бүгінде Алматы, Қарағанды қалаларында қолға алына бастады.Полистиролбетон экологиялық жағынан қауіпсіз, биологиялық әсерге ұшырамайды, керемет кесіледі, оған шегелер мен өзге де бекіту құралдары жақсы кіреді. Полистиролбетон өзінің сапалық және бағалық сипаттамалары жағынан кеуек блоктардан және тіпті газобетоннан асып кетеді, ал тым аз жылу өткізгіштігіне орай қазіргі коммуналдық тарифтердің шарықтаған кезінде ерекше көзге түседі.Кәсіпкердің өнімі Д-500 деп аталады, бұл жеңіл түрі, бірақ сапасы өте жоғары. Ал, құрамын біз толық ашпадық, егер қызығып, толық мәлімет аламын немесе құрылысыма жаратуға ниеттімін десеңіздер мекен-жай Жаңақорған кенті, Жаңаауыл аумағы, М.Түйменұлы көшесінде орналасқан. Біз зерделедік, мүмкіндігінше мағлұмат беруге тырыстық. Қалғаны уақыттың еншісінде...

Жаңақорған ауданынан полистеролбетон шығарыла бастады

<a href="https://kyzylorda-news.kz/">Kyzylorda-news.kz.</a> Жаңақорған ауданының ат спорты бүгінде Сыр өңірінің брендіне айналуда. Құрылғанына 12 жылдан асқан аймақ шабандоздары ат спортының кез келген түрінен үздік үштікте келеді. Аға буынның ізін жалғаған жастар жақында ел чемпионатында сүйіншілеп қайтты.&nbsp;Сыр өңірінің намысын 10 жылдан астам биік ұстап келе жатқан жаңақорғандық жігіттердің жеңісті жолына Сыр жұрты куә. Бірақ, бұл спортшыларға да серпін керек, қолдау маңызды. Осы мәселе және алдағы жоспарды саралау үшін білікті бапкер, облыс құрамасының белді жаттықтырушысы Сламхан Боранбаев тілге тиек етті.«Биылғы жыл табысты басталды. Ел чемпионаттарында жеңіс тұғырында жүрдік, жастар ұлттық құрама сапын толықтырды. Көкпардан сол үштік тұғырдан түспесек, аударыспақ пен жамбы атудан алтын тұғыр бұйырып келеді. Теңге ілуде де жаман емеспіз. Бұйырса, саяткерлік спортын да биікке көтереміз деген жоспар бар. Оның бастауына биыл ел куә болып, чемпионат біздің ауданда өтті. Одан бөлек, биылғы облыстық «Алтын күз» спартакиадасында алтын тұғыр біздің еншімізде. Қалай десек те, біздің бар арманымыз ел чемпионы болу. Барлығы уақыттың еншісінде, нәтижелерге жыл салып жетіп келеміз, – деді аға бапкер.Иә, жақында Елорда төрінде өткен жамбы атудан жаңақорғандық жас өрен Ақәділ Пернебай кезеңнің 3 стилі бойынша ешкімге дес бермей, мерген екенін дәлелдеді. Түрік стилінен 1-орын, қалған түрінен күмісті олжалап, жалпы кезеңдердің қорытындысында чемпион атанды. Ғалымжан Өміртай мен Наурызқожа Әмзеев баптаған Ақәділ тағы бір мықтылығын дәлелдеп, «Қазанат» ипподромында өткен ел чемпионатында атой салды. «Тектіден текті туады» деген осы болар. Чемпионның әкесі Бекқали Өзенбаев та кезінде аламандарда атой салған азамат еді. Енді перзенті жасындай жарқылдай бастады.Айта кететіні, Ғалымжан 2019 жылы жамбы атудан ел біріншілігінде алғаш рет Сыр еліне алтын сыйлап, жарыстың ең жас спортшысы атанған еді. Бұл жолы оған қола бұйырып, олжалы оралды. Ересектер арасындағы теңге ілуден жаңақорғандық Исрайыл Айдар 3 орын иеленіп, Түркияның Стамбул қаласында өтіп жатқан V этноспорт мәдени фестиваліне жолдама алды.«Алдымен алдағы жоспармен бөлісейік. Жуырда Көкшетау қаласында жасөспірімдер арасында ел чемпионатының жалауы желбірейтін болады. Бұл сында 2005-2007 жылы туылған балуандар тартысады. Ал, күзде көшпенділер ойыны басталады, оған баруға мүмкіндігіміз бар. Ол үшін тамызда іріктеуден сүрінбей өтуіміз керек. Жігіттер сақадай сай, бұйырса ол тұғырды да бағындыратын боламыз», – деді С.Боранбаев.Биылғы жылдың тағы бір жетістігі, 14 жас шабандоз «спорт шебер» атағына қол жеткізді. 12 балуан көкпардан, екеуі аударыспақтан. Міне, осындай оғландар облыстың атын оздырып, бәйгеде барын салып жүр. Тек оларға қолдау болса болғаны, әрине, қаржылық қолдау керекақ, бірақ, бәрінен бұрын астарындағы тұлпарларына тіреу болса. Шыны керек, көз көріп жүр, шабандоздардың жаттығатын алаңы болғанымен, ешқандай жағдай &nbsp;жасалмаған. Аттар да адам секілді, шаршағанда көлеңке керек, жаттығудан кейін суытып, қалпына қайта келтіру керек. Мұның барлығы үлкен жұмыс, оны бір күндік жаттығу барысында байқадық.<blockquote>«Қазір аудан орталығындағы арнайы алаңның айналасына жасауға тиісті жұмыстарды тізбектеп, жобасметасын жасап қойдық. Яғни, алаңды қоршау, көрермендер отыратын орындықтар, жылқы өнімі мен құралсаймандарын сататын дүңгіршіктер және жануарлардың тынығатын орындарын салу жоспарда бар. Мұндағы мақсат – ұлттық спорттың деңгейін көтеріп, өскелең ұрпақты осы жолға тәрбиелеу. Өйткені, атадан келе жатқан, қанымызға сіңген өнер біз дәріптемесек, кім дәрптейді. Әрине, мұның барлығы алдағы уақыттың еншісінде, дегенмен, тездетіп, ат спортына жағдай жасамасақ бұдан да биікке шығамыз деген үміт сөніп қалады-ау», – деді бапкер.</blockquote>Өте дұрыс, қарап тұрсаңыз, біздің елде спортқа көбірек көңіл бөліне бастады. Қай спорты алсаңыз да арнайы жаттығу залы, қажетті саймандары жетерлік. Әрине, ат спортына да көңіл бөлінеді, бірақ жағдай мәз емес. Қазір жылқылардың барлығы Қыркеңсе ауылында, күнделікті жаттығуға аудан орталығына келіп-кету үлкен мәселе. Келгеннен соң жаттығатын алаңның бүгінгі беделі көңіл көншітпейді. Әрине, бұл аудан шешетін мәселе емес, десе де көңіл бөлінсе нұр үстіне нұр болар еді. Екіншіден, құс ұшырып, тазы жүгіртуді де қолға алдық, келер жылы ел чемпионаттарында саңлақтар топ жаратын болады. Сондықтан іске бүгін кіріссек, үштіктен үздікке көтерілетініміз ақиқат. Жалпы нәтижені сараласақ, ұлттық спорттан ұпайымыз түгел.

Жаңақорған ауданы ат спортынан алда келеді

<a href="https://kyzylorda-news.kz/">Kyzylorda-news.kz.</a> Жаңақорған ауданы Сыр өңірінде сәулеттік-архитектуралық келбеттенуі болсын, инвестицияның тартылуы, қаражаттың игерілуі, жалпы макроэкономикалық көрсеткіштердің көлемі жөнінен алдыңғы орыннан көрінуі, сайып келгенде елдің ынтымақты бірлігі мен тірлігінің арқасында екенін айтқан аудан әкімі Мұрат Жолкелдіұлы бұл басқосуда ортақ жауапкершілік жолында қапталдаса қатар жүрген қалың қол – әріптестеріне алғаусыз алғысын да жеткізуді де ұмытпады.Жаңа келіп кірген жылдың жағымды жаңалығы бұдан да ауқымды, бұдан да биік болғалы тұр. Бұл туралы аудан басшысы былай жеткізді:<blockquote>«Аллаға шүкір, 2022 жыл ауданда өте жоғары көрсеткішпен қорытындыланды. 2023 жылдың бюджеті қалыптастырылу үстінде. Былтыр республикалық және облыстық трансферттен келетін қаржы 6 жарым миллиардтан аспаған,бүгінгі таңда бұл аталған қаржы 15 миллиардқа, яғни екі жарым есеге артып отыр. Бұған іс басындағы азаматтардың талапқа сай жұмыс жасап, құжаттарды дер кезінде ұсынуы нәтижесінде қол жетті, бұйырса, жемісін де көретін боламыз», - деді ол.&nbsp;</blockquote>Аудан бюджеті былтыр сәуір айында 2,6 млрд еді, жыл бойы зерттеп-зерделеп, ықтимал көздіктерді тауып, жыл соңына дейін 3,1 млрд теңгеге жеткізіліпті, енді 4 млрд теңгеге жеткізу жоспарланып отыр екен. Сонда барлығын есептегенде ауданға 20 миллиардқа жуық қаржы келетін болады.Аудан әкімі бірінші кезекте кентте атқарылған жемісті жұмыстарға тоқталды. Осындай әлеуетті жағдайды аудандағы қалған 24 ауылдық округ бойынша табысты іске асыру қолға алынатынын жеткізді. Яғни жыл соңына дейін көп елді мекеннің көркі ажарлана түсетіні, атап айтқанда, кіре беріс көшелерін жаңарту, жарықтандыру, асфальттау, мектепке, балабақшаға баратын жолдарға тротуар салу жұмыстары бойынша өз бюджетімізден қаржы бөлдіруне бекініп отырғанын жеткізді. Ауылдық жерлерде де саябақ, аллея, демалатын орындар салу ойда бар. Осы жағдайларды жасау арқылы ауыл баласының да өркениеттен кем емес өрісті мекенде өсіп-өніп, жан-жақты жетілуіне жол аша білсек елге жасаған ең үлкен қамқорлығымыз осы болғалы отыр.Әкім биылғы жылы кентке бөлінген қаржыға атқарылып жатқан жұмыстарға тоқталды. Соның бірі - Тәуелсіздік көшесінің қоршаулары жаңартылып, тал егіліп, ортасына тротуар салынады, анығында аталмыш даңғыл көпшілік үшін еркін сейілдейтін ерекше орынға айналғалы отыр. Транспорт қозғалысы кемдеу әрі кең Бекмахан Дүйсенбаев көшесінің екі жағына да тротуар салынып, жарықтандырылатынын, мешіт жақ беттегі кеңістікте тұрғындарға демалатын жағдай жасалып, көлеңкелі бастырмалар, орындықтар қойылса, осы аумақтағы мөлтек ауданның үлкен-кішісі осында келіп уақыт өткізген болар еді. Аудан басшысының Мұсаханов көшесінің жиегін кеңейту, көлдің жағажайын ретке келтіру арқылы балық аулауға жайлылық орнатуға тапсырма беруі тұрғындарға теңдей жағдай жасаудың жарасымды үлгісін көз алдымызға әкеліп, «Қалауын тапса қар жанар» деген мәтелдің мәнісін тірілткендей болды. Соңғы кездері аудан орталығындағы жаңадан ашылған №169 орта мектебінде балалары оқитын ата-ананы қауіпсіздік мәселесі қатты алаңдатып жүргені белгілі. Біріншіден мектепке Манап Көкенов, Ақмешіт, Амангелді көшелері жағынан қатынайтын оқушылар көлдің ортасынан түсіп, зулап жатқан көліктің жолымен қатынауға мәжбүр. Біреулері базарды кесіп өтіп стадионның жанынан өтіп барып жүр. Бұл екі тарапта да оқушыларға қауіптілік басым. Осы мәселені жылдам шешуге пәрмен берген аудан әкімінің тапсырмасына сай кент әкімі Асқар Ибрагимов бұл жұмыстардың шет жағасы басталып та кеткенін айтып, көпшілікті қуантып қойды. №169 мектеп алдында көлік кептелісін жою үшін білім ошаағының артынан автожол жасалынбақ.Аудан басшысы одан әрі кент орталығында кезекте тұрған кісілерге Саяжайдан 300 гектар жер аршылып, қазір ол жерге инфарқұрылымға 6,5 мррд теңгенің жобасы жасалып, республикаға жіберілгенін, таяу уақытта шешілетінін айтты. Мөлтекауданның жарығы, суы, жолы шешілсе 1,5 мың адамға жер беріледі. Саяжайға 600 орындық мектеп салынады. Аймақ басшысының арқасында өңірімізде 22 мектеп салынатын болса, соның екеуі Жаңақорғанның еншісінде. Бірі Жаңарықта, екіншісі Саяжайға салынады. Содан соң Байкенжеге 150 орындық мектеп салынады. Кент орталығынан келесі оқу жылына дейін тағы бір мектеп Май бекетінде беріледі. Міне, осы кезде бүгінге дейін қиындық көріп келе жатқан Ипподром, Май бекеті, Саяжай оқушылары өз аудандарында білім алатын болады .Кентті ішінде әлі де жарықтандырылу жалғасады. Биыл 4 көшеге жарық жұргізіледі. Алдағы уақытта көркейту-көгалдандыру бағытында жұмыстар атқарыла береді. Қорасан ата көшесінде Неке сарайының құрылысы жақын уақытта басталатынын білдік. Парк ішіне жаңадан аттракцион орнатылып, ойын балаларына тамақтанатын орын ашылатыны да кент тұрғындары үшін тосын жаңалық болды.Аудан әкімі Мұрат Жолкелдіұлы облыста өткен «Отбасы – тәрбие бесігі» атты кеңесте талқыланған мәселелердің біздің ауданымыз үшін де өте өзекті екенін айтып, бұл жөнінде тиісті салалар ғана емес, елдің жанашыр ағалары мен қоғамдық ұйымдарды бірлесе отырып, жұмыс жасауға үндеді.Жиында сөз алған Серік Мұсабаев кент тұрғындары атынан аудан әкімінің жұмысына жоғары баға беретіндіктерін айтты. Ол өзі Саяжай мөлтек ауданы тұрғыны.Көше жарқырап жанып тұр. Ауыз су шешілді Бәрінен бұрын жол салынып, мектепте оқитын балапандарымыздың бәтеңкесі балшықтан ажырады деді ол.Сол төңіректегі ата-ананың жылдар бойы көтеріп келе жатқан мәселесін осы бір жылда тап-тұйнақтай еткен аудан басшысына шын пейілді ризашылығын жеткізді. Одан әрі ауыл шаруашылығының майталман мамандары Жұмабек Қосдәуіров, Алмас Нәлібаевтардың көтерген мәселелері бойынша аудан басшыысы қолға алынған нәтижелі бастамалардың жай-күйін тарқатып берді.Қандай мәселеде болмасын көргені көп, көшелі кеңесін айтуды үлкендік міндеті санайтын ардагер аға Алшынбай Тұртановтың ұрпақ тәрбиесі төңірегіндегі талапты насихаты саналы кеуделерге салмақты міндет арқалатты деуге болады. Ақ тілекті қадір тұтқан халықтық қасиетіміздің жоралғысымен Махмұдұлы Мұзарап ақсаақал батасын беріп, барлығымызды алғы күнге бір мақсатқа бас қосуға үндеді. Ал бауырдай бірігіп, жақсылыққа ниеттенгеннің несібесі ешуақытта кем болмайды.

Жаңақорғанда жаңа нысандар бой көтермек

<a href="https://kyzylorda-news.kz/">Kyzylorda-news.kz.</a> &nbsp;Жаңақорған ауданында енді әр жұма сайын қоғамдық көліктердің барлығы халыққа тегін қызмет етеді. &nbsp;Жаңақорған кенті 226,6 км. аумақты қамтитын облыстағы ең үлкен кент. Мұнда үш бағытта қоғамдық көліктер қатынайды. Осы игілікті істі аудандық мәслихат депутаттығына үміткер болған Асан Алкеевтің бастамасы.Біз ең ұзақ жол кестесін түзген КТУ маршутына жайғасып, елдің пікірін тыңдадық. Рамазан айы басталғандықтан халықтың көбі ауызашарға қажетті азық-түлік алуға орталық базарға бет алған. Рамазан айында есен-саулық сұрасқан ел әр жұма сайын тегін көлік жүргізіп жатқан жастарға алғыстарын жауғызды. Соның бірі – Құттығыз Байділлақызы:&nbsp;<blockquote>«Жастарыңды көрсет, ертеңіңді айтайын демей ме? Біздің арамызда қоғамның қамын ойлайтын, иманды ұлдардың бары қуантады. Кешегі сайлауда есімі есте қалған жас Асан Алкеевтің отбасына, ата-анасына рахмет айтамын. Жанатын-ақ бала, болашағынан үлкен үміт күтеміз», –деді.&nbsp;</blockquote>Қуанышты жаңалықты естіген қария Айқожа Балтабаев та риза болып: Қасиетті Рамазан айында, Қолға алып жақсы істі. Жастарымыз жарады, Жүректерге нұр түсті, Істерін Алла оңласын,&nbsp; Пайғамбарым қолдасын, – деп ақ батасын берді. Ақиқатын айту керек, бұл игі іс жеке кәсіпкердің өз қаражатына ұйымдастырылады. Бұған жергілікті билік өкілдерінің ешқандай жауапкершілігі жоқ. Алла разылығы үшін игі амал жасап жатқан Асан Алкеев бұл ісі туралы өзінің әлеуметтік желідегі күнделігінде «Кешегі сайлау науқаны кезінде Рамазан айында қоғамдық көліктерді тегін жүргіземіз деп айтқан болатынмын. Осы уәдемізді орындау мақсатында достарыммен бірге әр жұмада игі амал жасауды жөн санадым» деп бейнелі ақпарат таратты. Біз Асан Алкеевпен сұхбаттасып, елдің ыстық ықыласын жеткіздік.<blockquote>«Біздің ниетіміз қолдан келген кішкентай болса да көмекті бөлісу, ағайынның батасын алу. Достарым да бұл идеямызды қолдап, әр жұмадағы істі қолдауға ниеттерін білдіруде. Бізге елдің ризалығынан артық ештеңе керек емес! Еліміз үшін күш біріктіріп, халықты сауаптылыққа, имандылыққа бағыттағымыз келеді», – дейді ақ жүрек жас ағынан жарыла.</blockquote>Түйін. Мәдениеті дамыған елдерде қоғамдық көліктер тегін жүрген күндері халық та сол құрметке сай әлеуметтік мәдениетін жоғары екенін білдіру үшін, көлік жүргізушілеріне доңғалақ ауыстыруға, көлік тазалауға қолғабыс етеді. Мұны олар өзінің қоғам алдындағы жауапкершілігі ретінде қабылдайды. Ал бізде ше? Айтудың өзі тым ұят...Сондықтан әрбір қоғамдық көлікті өзіміздің дүниеміздей аялап, ішінде тазалықты сақтап, сөзіміз бен іс-әрекетімізді түзесек, бипыл әңгімеден нақты іске кіріссек, қоғам үшін үн қосқан болар едік-ау! Рамазан айы сауапты іспен де, салауатты іспен де ерекшеленетін ай екенін естен шығармасақ игі.

Жаңақорған ауданында жұма күні қоғамдық көліктер тегін қатынайды

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласында жастар ресурстық орталығы «Qosyl kenes» жобасы арқылы жастарға үздіксіз кеңес беруді ұйымдастырады. Оның ішінде мемлекеттік бағдарламаларды жастар арасында насихаттау, болашаққа деген таңдау жасауда көмектесу және тағы басқа маңызды шаралар жүзеге асырылады.&nbsp;Мысалы, Қызылорда қаласы әкімдігінің жанындағы мемлекеттік бағдарламаларды насихаттау тобы өз жұмысын бастап, М.Мәметова атындағы Қызылорда педагогикалық жоғары колледжі мен С.Ысқақов атындағы Қызылорда құрылыс және бизнес колледжінің бітіруші түлектерімен кездесті. Жастарға «Qosyl kenes» телеграм бот қызметі таныстырылып, қажетті ақпараттарды оңай алу мүмкіншіліктері көрсетілді. «1.2.3 Старт» жобасы аясында дұрыс мамандық және оқу орнын таңдау кезіндегі негізгі критерийлер бойынша әл-Фараби атындағы Қазақ Ұлттық Университетімен, Л.Н.Гумилев атындағы Еуразия Ұлттық Университетімен, Қорқыт ата атындағы университетімен мектеп бітіруші түлектерді кездестіру мақсатында тікелей эфирлер өткізілді. Жалпы тікелей эфирге 1200 жас қатысқан.&nbsp;Облыстық атамекен кәсіпкерлер палатасының заң және мемлекеттік сатып алу бойынша кеңесшісі Әмір Анельмен тікелей эфир өткізіліп, бағдарлама бойынша орын алған өзгерістер туралы толық ақпарат берілді. Ал тұрғын үй мәселесіне қатысты жастарға арналған мемлекеттік бағдарламалар бойынша «Отбасы банкі» АҚ Қызылорда филиалының қаржы кеңесшісі Нұрлыбек мырзамен «qosyl.mrc» инстаграм әлеуметтік желісінде тікелей эфир өткізілді.&nbsp;Қалалық жастар орталығының инстаграм, фейсбук және телеграм желілерінде ресми парақшалары үздіксіз жұмыс істеп, маңызды оқиғалар мен жаңалықтар легі уақытылы ақпараттандырылуда.&nbsp;Жастарға мемлекеттік бағдарламалар мен жобалар бойынша онлайн кеңес беруге арналған Telegram бот ақпараттандыру жұмыстары жүргізілуде. Жастар бот қызметі арқылы өздеріне қажетті ақпараттарды үздіксіз (24/7) және онлайн алу мүмкіндігін иеленуде. Қазіргі уақытқа дейін бот қызметін онлайн түрде 5 мыңға жуық жас пайдаланған.&nbsp;«Өмірлік маңызды дағдылар» жобасы арқылы жастардың құзыреттері мен дербестіктерін дамыту да үздіксіз жүргізіліп келеді. Бағдарлама аясында жастарға бейресми білім беру бағытында «Болашақ» университетінің белсенділеріне «Өмірлік маңызды дағдылар» курсын ұйымдастырды. Курс аясында «Командадағы ынтымақтастық», «Сыни ойлау», «Креативті ойлау» және «Шешімдер қабылдау» модулдерінен семинар-тренингтер өткізілді.&nbsp;Орталық қызметкерлерінің бастамасымен жастар ресурстық орталықтарының жастар қызметкерлеріне арналған 2 күндік семинар-тренинг өткізілді. Тренингке аудандық және қалалық жастар орталықтарының қызметкерлері қатысты. Оқыту барысында бейресми білім беретін ортаны қалыптастыратын арнайы тетіктермен жұмыс жасау механизміне байланысты тәжірибелік жұмыстар жүргізілді.&nbsp;Астанада қаласында «Жастарды әлеуметтік бағдарлау» жобасының бірінші циклінің қорытындысы өтті. Отырысқа орталық кеңесшісі Нұрасыл Бекматов қатысып, Самғау жобасын жастар орталықтарына енгізу тәжірибесімен бөлісті. Сондай-ақ, сәтті жобалар жиынтығы ретінде орталық қызметінің жұмысы арнайы бейнероликке түсірілді.&nbsp;Шығармашыл жастарға қолдау білдіру және оларға қолайлы орта қалыптастыру мақсатында А.Тоқмағамбетов атындағы Мәдениет үйінде облыстық жайдарман ойындарының ақтық кезеңі өтті. Оқу жылының басында бастау алған маусымға барлық аудандардан, білім ордалары мен оқу орындарының шығармашыл жастарынан құралған 40-тан астам құрама қатысуға мүмкіндік алып, соның ішінен үздік деп танылған 6 команда аталмыш финалда бақ сынады.&nbsp;Облыстық жайдарман ойындарының финалдық 2 кезеңі өткізілді. «Бастау» және «Супер» лигалар бойынша финалдық ойындар өтіп, 20-дан аса команда бақ сынасты. Нәтижесінде тұрақты түрде іске асырылып отыратын жайдарман ойындарына 500-ден аса жас қамтылды.&nbsp;Жастардың бейресми орталарын және жұмыс беру ошақтарын қалыптастыру аясында «Qosyl» жастар орталығы және «Қыз Жібек» мейрамханасының ұйымдастыруымен Қызылорда қаласында жас аспаздар сайысы өтті. Сайыс мақсаты – жас таланттарды анықтап, олардың кәсіби ортасын қалыптастыру, сонымен қатар үздіктерін алдағы уақытта тұрақты жұмыстарға орналастыру. Байқауға тіркелген 42 қатысушы үш кезең бойынша бақ сынады. Финалға үздік деген 14 қатысушы өтіп, аспаздық және кондитерлік бағыттар бойынша сайысқа түсті.&nbsp;Жас аспазшылардың ортасын қалыптастыру мақсатында жас аспазшылардың «Үздік аспаз» байқауы өткізілді. Байқауға аспазшы болып қызмет атқаратын қала жастары қатысты. Аспазшылар түрлі тағамдарды әзірлеуден жарысқа түсіп, авторлық және европалық тағам түрлерін әзірледі. Нәтижесінде үздіктер топ жарып, жүлделі орындарға ие болды. Сонымен қатар сайысқа қатысқан 5 жас тұрақты жұмыспен қамтылды.&nbsp;Кәсіптік-техникалық мамандықтарды насихаттау барысында «Самғау» жобасы «Жас тас қалаушылар» мен «Жас дәнекерлеушілер» байқауы өткізілді. Байқауға осы саланың түлектері қатысты. Олар кірпіш өруден және дәнекерлеу ісі бойынша бұйымдар жасаудан жарысып, үздіктері анықталды.&nbsp;Сонымен қатар, жоба аясында «Жас тігіншілер» байқауы да ұйымдастырылды. Байқауға 40 жас тіркеліп, іріктеу кезеңінен 8 жас екінші кезеңге жолдама алды. Байқаудың екінші кезеңі «Dalatex» тігін шеберханасында өткізіліп, жеңімпаз анықталды. Жеңімпаз жыл соңында қала әкімінің «Самғау» жастар сыйлығымен марапатталады. Жоба аясында алдағы уақытта жас электриктер және жас автомеханиктер байқауларын өткізу жоспарлануда.&nbsp;Жастар қажеттілігін қанағаттандыру және жастардың бос уақытын тиімді пайдалану мақсатында техникалық және кәсіптік білім беру ұйымдарының бірінші курс студенттері арасында «Кроссфит» жарысы, Халықаралық балаларды қорғау күніне орай Бәйтерек және Титов мөлтек аудандарында «AULA SPORT» мәдени-спорттық шара, ҚР Мемлекеттік рәміздері күніне орай орталығымызда Қызылорда қаласына қарасты кент және ауылдық округ жастары арасында волейбол сайысы, ауқымды стритбол турнирі өтті, турнирге Алматы, Тараз, Түркістан облысы және Қызылорда облысының жастары да келіп қатысты.&nbsp;Жастар арасында отбасы құндылықтарын насихаттау мақсатында аясында «Qoldau» волонтерлер тобы қала тұрғыны жалғыз басты ардагер Василий Геннадьевичтің үйіне барып, қол көмек көрсетті, Белкөл кенті клубының ұйымдастыруымен №189 орта мектебінде «Жасөспірімдердің денсаулығы мен өмірлік дағдыларын қалыптастыру және суицидтің алдын алу» тақырыбында кент жастарымен кездесуі, «Ізденіс жолы» қоғамдық қорымен бірлесе отырып, орталығымызда жас аналармен «Балалық шақтағы психологиялық соққы салдары» атты кездесу шаралы өткізілді.&nbsp;25 мамыр күні бітіруші түлектерге арналған мерекелік кеш ұйымдастырылды. &nbsp;Кеш қонақтары ретінде қала жастары арасында танымал диджей шақырылды. Үш сағаттан астам уақытқа созылған шара би кешіне ұласып, шараға 3000-нан аса жас қатысты.&nbsp;12 тамыз – Халықаралық жастар күнінде «Qosyl» жастар орталығының базасында жастардың қала әкімімен кездесуі өткізілді. Кездесуге белсенді жастар, ҮЕҰ өкілдері, сала басшылары мен белсенділер қатысты. Жастар шаһар басшысына ұсыныстары мен пікірлерін білдірді.&nbsp;Қала күнінде жастар арасында «Мобилография» фестивалі ұйымдастырылды. Фестивальге 100-ден аса жас мобилографтар қатысты. Фестивалді Қазақстандағы мобилографияның негізін қалаушылардың бірі Қыран Талапбек жүргізіп, жастармен кездесті. Шара нәтижесінде қаладағы жас мобилографтардың ортасы қалыптасты.&nbsp;Жастар сұранысына сәйкес «PING PONG» үстел теннисінен сайыс үздіксіз ұйымдастырылды. Екі ай көлемінде 8 мәрте сайыс ұйымдастырылып, сайысқа 80-ге жуық жастар қатысты. Әр сайыстың үздіктері анықталып, гранд финалға 10 жасқа жолдама берілді. Финал &nbsp;жеңімпаздары қаржылай сыйлықтармен марапатталды.&nbsp;«Qosyl» жастар орталығының тұрақты жобаларына айналған «Qosyl acoustic» шығармашыл жастардың ән кеші әр ай сайын өткізіліп келеді. Жаз мезгілнде ән кеші қаламыздың көрнекті жерлерінде, әдемі локацияларда ұйымдастырылды. Әр кешке кемінде ән айтатын топтың 25-ке жуық әншісі мен 150-ден астам тұрақты көрермен қатысты.

Қызылордада жастармен жұмыс жүйелі жүруде

Жалағашта тұрғындарға 500 гектар жер үлестірілмек

<a href="https://kyzylorda-news.kz/">Kyzylorda-news.kz.</a> Қызылорда облысы бойынша ҚАЖ департаментінің пробация есебіндегі азаматтардың басым көпшілігі жеке кәсіпке бет бұрған. Бұл пробация инспекторлары мен жергілікті атқарушы органдар өкілдерінің бірлесіп атқарған жұмыстарының нәтижесі. Жуырда Қазалы аудандық пробация есебіндегі көпбалалы әке «Бастау Бизнес» жобасы аясында кәсіпкерлік негізінде Атамекен кәсіпкерлік палатасында оқытылып, жер тыңайтқыштарын көбейту бойынша бизнес жобасын дайындап, 1млн. 380 мың теңге көлемінде мемлекет тарапынан қайтарымсыз грант ұтып алды.<blockquote>«Мемлекет тарапынан біз секілді азаматтарға қолдау көрсетіп, қайтарымсыз грант бөлініп жатқандығы бизнес жобамыздың жандануына септігін тизгізгеніне өте қуаныштымын. Алдағы уақыттағы басты мақсатым- қаламызға пайдам тиіп, жер тыңайтатын құттарды көбейтіп, кәсібімді жандандырсам», – дейді сотталған азамат.</blockquote><blockquote>«Мемлекет тарапынан берілген қайтарымсыз гранттарға пробация есебіндегі азаматтар да белсенділік танытып, бизнес жобаларын дайындап комиссия мүшелеріне ұсынуда. Солардың ішінде екі сотталғанның бизнес жобасы мақұлданып, мемлекеттен қайтарымсыз грант берілді. Олардың бірі жартылай фабрикатты өнім шығаратын аппаратын алуды жоспарласа, екінші жер тыңайтатын құрттарды көбейтуді қолға алып отыр. Жаза басып жаңылған азаматтардың жеке кәсіпке бет бұруы бізді де қуантады», – деді аудандық пробация қызметінің бастығы Ербол Сражатов. &nbsp;</blockquote>

Қызылордада пробация есебіндегі азамат қайтарымсыз грант ұтып алды

<a href="https://kyzylorda-news.kz/">Kyzylorda-news.kz.</a>&nbsp; 16 наурызда Оқу-ағарту министрлігі 9 күнге созылатын көктемгі демалыс күндерін жариялады.<blockquote>«Оқушылардың көктемгі демалысы 2023 жылдың 18 наурызы мен 26 наурыз аралығында, яғни 9 күн демалады», деп хабарлады министрліктің баспасөз қызметі.</blockquote>2022 жылғы желтоқсанда меншік нысанына және ведомстволық бағыныстылығына қарамастан жалпы білім беретін мектептерде оқу жылының басталуы мен аяқталу мерзімі белгіленді.Оқу жылының негізгі мерзімі 1 қыркүйек пен 31 мамыр аралығы:1-11 (12) сыныптардағы оқу жылындағы тоқсандар мен каникулдардың ұзақтығы:1 тоқсан – 8 оқу аптасы, күзгі каникул – 7 күн (31 қазан мен 6 қараша аралығы);2 тоқсан – 8 оқу аптасы, қысқы демалыс – 9 күн (31 желтоқсаннан 8 қаңтарға дейін);3-тоқсан – 10 оқу аптасы, көктемгі демалыс – 9 күн (18-нен 26 наурыз аралығы);4 тоқсан - 10 оқу аптасы;Сонымен қатар 1-сыныпта қосымша демалыс – 7 күн (6-12 ақпан аралығы).

Оқушылар көктемде неше күн демалады?

<a href="https://kyzylorda-news.kz/">Kyzylorda-news.kz.</a> Қазір ақылмен іс қылған озады. Екі қолға бір күрек тауып, өз ісінен береке тапқандар ғана еңбегінің жемісін көреді. Бүгінде Жер-Анадан несібесін тауып жүргендер жайлы аз-кем айтылып жүрген жоқ. Соның ішінде жылына бірнеше мәрте өнім алатын жылыжайлар туралы талай айттық та. Жаңақорған ауданы бойынша жылыжай ісін дамытуға құлшыныс білдіріп отырғандар күн санап артуда.Жаз емес, қазір қытымыр қыс кезінде де кез келген дүкен сөрелерінен қалаған жемісіңізді таба аласыз. Себебі, шаруалар жылыжай өндірісін қолға алып, оны дамытудың түрлі әдіс-тәсілдерін меңгерген. Жаңақорған ауданы да аргарлы аймақтың бірі. Халықтың басым бөлігі төрт түлік пен егіншілікті кәсіп етеді. Соңғы уақыттары елімізде жылыжай шаруашылығы жан-жақты даму үстінде. Осы мүмкіншілікті басшылыққа алған жаңақорғандықтар қыстың көзі қырауда көкөніс өсіріп, табысқа кенелудің маңызын түсініп отыр. Ең табысты, жылыжай кешені – халықты таза азық-түлік өнімдерімен қамтамасыз етудің таптырмас тәсілі. Жылыжай өндірісіне қол жеткізу – әрбір бағбанның арманы емес пе?Мамандардың айтуынша, жылыжайда өскен өнімнің артықшылығы, көкөніс жылдам өсіп, сырты көз тартарлықтай жылтыр болады.<blockquote>«Сонымен бірге, ылғал мен жылу барлық аумаққа бірдей таралады. Бірақ, жабық жерде өскен өнімнен күннің иісі сезілмейді. Дәмі мен иісі жағынан далада өскен көкөністен айырмашылығы да осында. Десе де, құрамында қажетті дәрумендер мен минералдар жеткілікті. Бұл шаруашылықтың да өзіне тән қиындығы аз емес. Сапалы өнім алу үшін шаруаға біраз тер төгуге тура келеді. Жылыжайды жылу жүйесімен, сумен, жарықпен қамтамасыз ету үшін аз шығын шықпайтыны анық» дейді олар.</blockquote>Ал Жаңақорған ауданы шаруаларының жай-күйі қандай? Жаңақорған аудандық ауыл шаруашылығы бөлімінің мәліметінше, бүгінде аудан көлемінде жұмыс жасайтын ірілі-ұсақты бірнеше жылыжай бар екен. Алайда, қазіргі уақытта жұмыс жасап тұрғандары өте аз. Соның бірі – Амантай Сарбасов жетекшілік ететін қожалық Қаратөбе аумағында орналасқан. Білдей бір ауданда жұмысын үздіксіз жалғастырып келе жатқан шаруа қожалықтың атқарып жатқан жұмыстары да жүйелі.<blockquote>«2010 жылдан бері осы диқаншылықпен айналысудамыз. Көлемі 70 соттық аумақты құрайтын жылыжайда қияр өсіреміз. Осы уақытқа дейін қияр мен қызанақты бірге егіп жүргенбіз. Екі жылдан бері елімізге індет келгелі қызанаққа сұраныс азайды, әрі шығыны көп. Ерте көктемде еккен қиярды жинап алып, енді күздік егінді бастадық. Бұйыртса, қараша айынан бастап өнім бере бастайды. Негізінен жылыжайдан өнім алу өте қиын шаруа. Оған күтім көп керек. Неге десеңіздер, біздің ауданда мамандар жоқтың қасы. Бастапқыда өзге өңірден мамандар алдыртып, тәжірибесімен бөлісіп, өзіміз кәсіби бағбандар дайындадық. Қазір жаман емес, шығымы жақсы, кешенде 6-7 адам жұмыс жасайды. Жылыжайда егін егу, бесіктегі нәрестені мәпелегенмен бірдей. Сәл желкем соқса солып қалады. Жылыжайдың температурасы +6 градустың өзінде жеміс жаурап өспей қалады. Сосын 40-45 күн жылы суда жату керек. Өйткені, оның өзегінде су жатпаса өліп қалады. Қияр сумен өседі» дейді кәсіпкер.</blockquote>Дегенмен, биылғы науқан былтырғы жылмен салыстырғанда төмендеу болғанын жасырмайды ол. Көктемгі науқаннан былтыр 30 тонна өнім алса, биыл небәрі 15 тоннаға жуық өнім жиналыпты. Себебі, қаражаттың тапшылығынан дәрі-дәрмекті уақытында ала алмаған. Барға қанағат етіп отырған жылыжай иесі Түркістан мен Қызылорда қаласынан сұраныстың көп екенін де тілге тиек етті. Сондықтан өнімді көрші облысқа жөнелтіп жатқанын жасырмады. Жыл сайын жылыжай шаруасын ширатып, ауыл тұрғындарын жұмыспен қамтып отырған қожалықтың берекелі ісіне жерлестер де риза.<blockquote>«Жылыжай салу ісі көптен бері ойымда жүрген, ойға алған істі жүзеге асыру үшін қаржы мен күш керек екені белгілі. Бүгін сол арманмақсатыма қол жеткізіп отырмын. Жылыжайдың құрылысын қыста бастаған болатынбыз. Бірінші кезекте нысанды жылыту жүйесін орнаттық. Көкөністі тамшылатып суару жүйесімен суаратын боламыз. Өйткені бұл жүйе суды тиімді пайдалануға мүмкіндік береді. Жылда егілетін өнімді көбіне өзге аймақтарға жөнелтеміз. Сондай-ақ, аудан орталығында да келісім бойынша өткізетін екіүш мекеме бар. Жалпы, субсидия мәселесі бақшаға қаралсын, қаралмасын, біз мемлекеттен қолдау көрмейміз. Әуел баста жылыжайды қолға алғанда ғана субсидия беріледі. Одан кейін ыстық-суығына өзің жауаптысың. Содан болар аудандағы шығынға ұшыраған өзге жылыжайлар қаражаттың жетіспеушілігінен тоқтап тұр. Егер мемлекет тарапынан аз-кем қолдау көрсетілсе, жұмысымыз жанданып кетер еді» деп мәселесін де ашық айтты.</blockquote>Шаруа қожалық қияр ұрығын голландиялық компаниядан алады екен. Ал тыңайтқыштар мен дәрі-дәрмекті Түркістандағы «Агро» дүкенінен тасымалдайды. Бір өкініштісі, аудан нарығы жергілікті өнімді сатып алуға құлықсыз. Міне, «7 kz» шаруа қожалығын осы мәселе алаңдатады. Аудан көлемінде қолға алынып, жұмысын қарқынды бастаған жылыжайлардағы кедергілер жөнінде аудандық ауыл шаруашылығы бөлімінің маманы Дәурен Абибуллаев та пікір білдірген еді.&nbsp;<blockquote>«Дәл қазіргі уақытта аудан бойынша 1 ғана жылыжай жұмыс жасап тұр. Қалған үшеуі «Нұрлы кент», «Жан» және «Абдулла» шығынға батқан себебінен жұмысын тоқтатты. Егер оларға қолдау болса, жылыжайды дамытып, халықты көкөніспен қамтуға ниетті» деді.</blockquote>Ал кент орталығында орналасқан жылыжайлардың жай-күй қандай? Олар мемлекеттен ешқандай қаражат алмай, күнкөрістің қамын күйттеп жүргендерін айтты. Орналасқан аумағы шағын болса да, бала-шағасымен ерте көктемнен қара күзге дейін еңбек етіп, нәпақасын тауып жүргенін жеткізді олар. Біздегі жағдай осылай екен, ендеше шет елдерде қалай?Дамыған елдердің көбі көкөніс өсіруге басымдық береді. Әлемде жылыжай салудан Қытай бірінші орында. Бұл елдің жылыжай шаруашылығының алқабы шамамен 1,5 млн гектар аумақты алып жатыр. Бұл сала едәуір дамып тұрған елдер тізімінде АҚШ, Оңтүстік Корея, Израиль, Испания, Жапония, Түркия, Үндістан, Нидерланды, Ресей, Иран, Мысыр елдері бар. Израиль, Қытай, Нидерланды секілді дамыған елдерде жаңа технологиямен жабдықталған 1 гектар жылыжай кешенінің құны 1,5-2 млн евро тұрады. Өйткені оның құрылымында қуатты көп мөлшерде тұтынатын жылыту, жарықтандыру жүйелері бар. Ал Түркиядағы жылыжайдың 88 пайызында көкөніс өсірілсе, қалған 10 пайызына жеміс, қияр 2 пайызына егіледі. Халқының саны бізбен шамалас болса да, жері әлдеқайда кіші Нидерландының өзі әлемді азық-түлікпен қамтамасыз етуде. Бүгінде бұл ел тамақ өнімдерін экспорттау бойынша АҚШ-тан кейінгі 2-ші орында. Бір айта кетерлігі, еліміздегі біраз жылыжайлар Нидерланды технологиясымен салын¬ған. Өйткені, олардың қолданатын технологиясы біздің елімізге өте тиімді. Егер жергілікті диқандарға қолдау көрсетіліп, жұмыстары жүйеленсе, нарық бағамына да оң әсер ететіні сөзсіз.Айта кеткен жөн, көп қаржыны қажет ететін жылыжайды қарапайым шаруалардың қалтасы көтере бермейді. Олардың ортақ ойы жылыжайды газдандыру мәселесіне көмек болса дейді. Бұл шығынды азайтады. Осы тұста, елімізде жылыжай кәсібін дөңгелетемін деген әр адамға мемлекеттен қолдаудың да барын айта кетейік. Мәселен, «Бизнестің жол картасы 2025» бағдарламасы арқылы несие алуға, жаңа индустриялық аймақтан жер учаскесін алып, онда барлық коммуникацияларды тартуға және субсидия алуға көмек көрсетіледі. Бірақ әзірге шаруалардың жабық жерде көкөніс өсіру тәжірибесі жоқтың қасы. Өйткені, оған күтім мен уақыт көбірек жұмсалады.&nbsp;&nbsp;

Қазақстан және Қызылорда облысының жаңалықтары