<a href="https://kyzylorda-news.kz/">Kyzylorda-news.kz.</a> Қармақшы ауданының дамуына сүбелі үлесін қосқан аптал азаматтар жетерлік. Солардың бірі – Қармақшы ауданының Құрметті азаматы Нажмадин Ысқақовтың атына көше атауы берілді. Есімі елімізге белгілі жас айтыскер ақын Сырым Әділбековтің арнау өлеңімен басталған көшенің ашылу салтанатында аудан әкімі Жандос Еркінбек жас ұрпаққа патриоттық тәрбие беруде еселі еңбегімен танылған Нажмадин Ысқақовтай тұғырлы тұлғаның өмірі аудан тұрғындарына үлгі-өнеге екенін айтты.«Қазақ халқы қашанда үлкенге құрмет, кішіге ізет көрсеткен ел. Өткенін бағалай, қазіргісін саралай білетін халық. Саналы ғұмырын халықтың әл-ауқатын жақсартуға арнап, туған жерінің өркендеуіне қайталанбас қолтаңба қалдырған Нажмадин Ысқақовтай нар тұлғаның есімі мен оның өнегеге толы өткен өмірі уақыт өткен сайын ел есінде сақталып, биіктей береді. Еңбектің ерен үлгісін көрсетіп, артына үлгі қалдырған ардақты азаматтың есімі қай кезде де ұмытылмақ емес, ағамыздың есімі халық құрметімен мәңгі жаңғыра береді», деді аудан басшысы.Содан соң сөз алған мемлекет және қоғам қайраткері Бекмырза Еламанов пен еңбек ардагері Исағали Жұмағұлов осындай тағылымы мол, тәрбиелік мәні зор өнегелі іске бастамашы болған азаматтарға ағалық алғаусыз алғысын айтып, асыл азаматтың өнегеге толы өмірі мен еңбек жолынан естелік, жүрекжарды жылы лебізін жеткізді.Шара барысында көшенің лентасын қию рәсімі тамашаланды. Еңбек ардагері, Қармақшы ауданының Құрметті азаматы Жақсылық Жалғасбаев ағалық батасын беріп, ұйымдастырушыларға ризашылығын білдірді.Осы жерде айта кететін жайт, бар саналы өмірін аудан экономикасын нығайтуға, өңір тұрғындарының әлеуетін арттыруға арнаған ардагердің өмірі мен еңбек жолына тоқталсақ.Ол 1934 жылы Ақжар ауылында өмірге келіп, ауылдағы орта мектепті тәмамдаған соң еңбек жолын қарапайым жұмысшы болып бастаған. Жылдар өте Жалағаш, Қармақшы аудандарында бас зоотехник, аудандық ауыл шаруашылығы басқармасының басшысы, аудандық кеңесі атқару комитетінің төрағасы қызметтерін атқарған. Сондай-ақ, облыстық ауыл шаруашылығы өнімдері сапасын тексеру инспекциясының басшысы, аудандық тұрмыс қажетін өтеу комбинатының директоры қызметтерін абыроймен атқарып, құрметке бөленген. 1994 жылы республикалық дәрежедегі зейнеткерлік демалысқа шыққан соң аудандық ардагерлер кеңесінің төрағасы қызметін атқарған.Ел алдындағы елеулі еңбектері үшін «Еңбек Қызыл Ту» орденімен, ҚазКСР Құрмет грамотасымен, «Халық шаруашылығын дамытудағы үздік жетістіктері үшін», «КСРО азаматтық қорғанысының үздігі» медальдарымен, «Еңбек ардагері» төсбелгісімен марапатталған.

Қармақшыда көшеге жаңа атау берілді

<a href="https://kyzylorda-news.kz/">Kyzylorda-news.kz.</a> 2023 жылғы 4 сәуірде Алматы қаласындағы №81 және №83 мектеп-гимназияларының оқушылары үшін балалар киберқауіпсіздігі тақырыбы бойынша тақырыптық сағаттар өтеді. Сабақтар мемлекеттік және орыс тілдерінде өтеді.ҚР Қаржы нарығын реттеу және дамыту агенттігінің (Агенттік) көмегімен оқыту сабақтарының лекторы Алматы қаласындағы «Қазпошта» АҚ директоры Алтын Садықова болады.Тақырыптық сабақтарда оқушыларға қаржылық алаяқтық және қаржы пирамидалары тақырыбы ашылады. Келешекте мектеп оқушыларының алған білімі оларды алаяқтар мен қаржы пирамидаларынан сақтандыруға, әртүрлі қаржылық қызметтер мен өнімдерге ұрынбауға, сараланған және дұрыс қаржылық шешімдер қабылдауға үйретуге, сондай-ақ олардың қаржылық сауаттылық деңгейін арттыруға көмектеседі.2022 жылдың көктемінде Агенттіктің республикалық маңызы бар үш қалада: Астана, Алматы және Шымкентте балалар киберқауіпсіздігі тақырыбы бойынша 5-11 сынып оқушыларына арналған арнайы оқыту жобасын іске қосқанын атап өткен жөн. 2022 жылдың күзінен бастап «Киберқауіпсіздік бойынша тақырыптық сағаттар» Қазақстанның барлық өңірлерінде, оның ішінде облыс, аудан орталықтары мен шалғайдағы ауылдық елді мекендерде өткізіледі.Қазақстан Республикасының Оқу-ағарту министрлігінің қолдауымен ұйымдастырылған оқыту іс-шараларына ҚНРДА-ның өңірлік өкілдер басқармаларының, ҚР Қаржылық мониторинг агенттігінің, «Қазақстан қаржыгерлерінің қауымдастығы» ЗТБ-ның, «КМФ-Демеу» корпоративтік қорының және қаржы ұйымдарының өкілдері қатысуда.Агенттік Fingramota.kz жобасының шеңберінде өткізетін барлық оқыту &nbsp;іс-шаралары тегін екенін атап өтеміз және қаржылық сауаттылық жөнінде &nbsp;дәрістер мен вебинарлар өткізуге қызығушылық танытқан жағдайда, бізге fingramota@finreg.kz электрондық поштасына жазуларыңызға немесе Сall-орталықтың + 7 727 237 1000 немесе 1459 нөмірі бойынша телефон соғуларыңызға болады.&nbsp;

Оқушылар үшін киберқауіпсіздік сабақтары өтеді  

<a href="https://kyzylorda-news.kz/">Kyzylorda-news.kz.</a> Қазақ қариясын құрметтеп, қартын қадірлеген халық. Елбасына күн туып, жау етектен алған қилы заманда да ақсақалын төрден түсірмей, ақжаулықты аналарын ардақтай білген елдің ұрпағы екеніміз белгілі. Әр халықтың бойында сонау заманнан бері қалыптасып, оны өзгелерден даралап тұратын, тек өзіне тән қасиеттері болады. Біздің халқымыздың сондай ерекшеліктерінің бірі – үлкенді сыйлау, оның сөзіне құлақ асу.<blockquote>«Атадан бота қалғанша, бата қалсын» дегендей батасымен елін көгертіп, өнегелі сөзімен ұрпағына тәлім-тәрбие беріп жүрген жанның бірі, тыл, еңбек ардагері, көпбалалы ана – Алмагүл Кенбаева. Тоқсанның алтауын алқымдаған әжемен тілдесудің де сәті түскен еді. &nbsp;Редакциядан келгенімізді естіп, балаша қуанды. «Газеттің соңғы нөмірін жаңа ғана парақтап болып едім, әр нөмірін асыға күтіп оқимын» деп бізге жанындағы газетті көрсетті.</blockquote>Бір қызығы, апамыз жасының үлкендігіне қарамастан көзілдірікті пайдаланбайды екен. Тіпті инені де өзім сабақтай аламын деп бізді таңқалдырды. Иә, Алмагүл әжені бір көрген адам тоқсанның төріндегі жасты бере қоймайды. Себебі әжей әлі де тың. Отырып-тұруы, жүріс-тұрысы, қимылы ширақ. Өмірдің талай өткелінен өтіп, бүгінде үлкен әулеттің қамқоршысына айналған әжейдің өмір жолына аз-кем тоқталсақ.Алмагүл Кенбаева Қазалы ауданына қарасты Байқожа ауылында 1926 жылы дүниеге келген. 1934 жылы мектепке барып, 7 сыныптық білім алады. Қанқұйлы соғыс басталғанда 1 әке, 2 анадан тараған 9 бауыры соғысқа аттанады. Жат жерде Отан үшін алысқан бір үйдің тоғыз баласы осы соғыста опат болады. Сонымен қатар Алмагүл әжейдің әкесі Жайлыбай да соғыста жан берген. Қатал соғыс ерте есейткен Алмагүл анасымен бірге ерте тұрып, кеш жатып, күріштікте масақ теріп, шұлық тоқып майдандағы азаматтарға жолдап отырған.1944 жылы Байқожа ауылынан 40 қызды эшалонға тиеп, Қызылорда қала сындағы плотинаға қолдап құм тасуға жібереді. Осы қырық қызды 4 бригадаға бөліп, оның біреуіне бар болғаны 18 жастағы Алмагүлді бригадир етіп тағайындайды. Жас болса да зеректігімен, ақылдылығымен, ұйымдастырушылық қабілетімен көзге түскен А.Кенбае ваның адал еңбегі еленіп, «иіс су, кір сабын, жеңсіз көйлек, қиық орамалды» сыйлыққа алған. 1945 жылы соғыс аяқталған тұста, қолдарына «тылда» жұмыс атқарған деген құжат беріп, ауылдарына қайтарған. Еңбекпен шыңдалған кейіпкеріміз ауылға оралған соң, ауданға қарасты Октябрь кеңшарының фермасында сауылған сүттерді тартып, майын үкіметке өткізіп, фермада жұмыс атқарып, бұл жерде де марапат төрінен көрінген.1947 жылы жары Қаспаймен отбасын құрып, төрт түліктің бірі – қой бағумен айналысады. Өздерінің ең бексүйгіштігінің арқасында Октябрь кеңшарында 1947 жылы алдарына салған 600 бас қойдан шығын шығармай адал еңбек етіп, 1962 жылы Қармақшы кеңшарына осы қойымен ауысып, 1983 жылы зейнеткерлікке шығады. Осы уақыт аралығында ақ-адал еңбектерімен көзге түсіп, бірнеше рет орденмен марапатталып, түрлі сыйлықтарды иеленген. Мәселен, 1975 жылы жары Қаспайдың құрметіне «Қаспай» бұлағы ашылып, «Қызыл кітапқа» енгізілген. 1978 жылы «Еңбек ардагері» төсбелгісін тағынса, 1979 жылы «Нива» автокөлігін, кейіннен «Жигули», мотоцикл, сондай-ақ ол уақытта көптің қолы жете бермейтін кілемді де сый ретінде алған. Қойдың соңында, түйенің қомында жүріп 9 баланы өмірге әкелген.– Ол уақытта қазіргідей перзентхана жоқ. Толғағымыз қысқанда түйеден түсіп, келген жерімізге тоқтап, босанып алатынбыз. 9 баланы да осылай қой бағып жүрген кезде өмірге әкелдім. Өкінішке орай, үшеуі шетінеп кетті. Қазір алты баладан тараған ұрпағымның қызығына бөленіп отырмын, барына шүкір. Балаларымның алды зейнеткер, ата-әже болып отыр. Жолдасым екеуміз бас қосқан соң, бірыңғай қойдың соңында жүрдік. Алайда одан жаман болмадық. Отағасым қойды шөбі шүйгін жерлерге күні бойы жайып әкелсе, мен үйде қалған қозыларға бас-көз боламын. Олардың төлдеуі мен есебіне мен жауапты едім. Ол кезде қой үшін жан беруге дайын едік. Басқа малшылар қорадағы қойынан айырылып, саны кем болып жатады. Менен де шығын болды. Алайда мен өзіміздің жеке қойымыздан шығынның орнын толтырып, үкіметтің қойын түгендеп отыратынмын. Жыл сайын алған төліміздің де саны арта түсті. Қойымыз да өзгелерге қарағанда семіздеу болатын. Бұл біз үшін үлкен абырой болды, – дейді ақ жаулықты әжей.Қой артында ілесіп, көрген қиындықтары мен бүгінгі заманның кеңшілігі туралы әңгімелеген әжей үш ұл, үш қыз тәрбиелеп өсіріп, оларды ел қатарына қосып, ұлын – ұяға, қызын – қияға қондырғанын айтты. Бүгінде ұл-қыздарынан 28 немере, 47 шөбере, 8 шөпшек сүйіп, отбасының берекесі мен мерекесіне айналып отырған жайы бар. «Әр заманның өзіне тән еншісі бар. Алайда бүгінгі күніміз еркіндік пен кеңшілікке толы ғой. Басшымыздың арқасында елімізде өркениетіміз қанат жайып, дәстүріміз жаңғырып, дініміз тұрақталды. Ұмыт болған ұлттық құндылықтарымыз қайта оралды. Хал қымыздың жағдайы неғұрлым жақ сарды. Қазіргі басшы да игі жұмыстарды жүзеге асырып, халықтың жағдайын бүгінгіден де жақсартуға байланысты ой қозғап келеді. Бұл – ұрпағымыздың басына қонған бағы мен байлығы» дейді кейіпкеріміз. Сондықтан да жас ұрпақтан әжейдің күтетіні көп. Ұрпақтары үлкенге құрмет, кішіге ізет көрсетіп, дәстүрге сай тәлімді тәрбиеге қанып өссе екен деген тілегін жеткізді.– Ал ұзақ жасаудың сыры – адалдықта деп ойлаймын. Қандай нәрсе жасасаң да адал ниетпен, шын ықыласпен жасау маңызды. Біз уақытында үкіметтің қойын бақсақ та, пайдакүнемдікке берілмей бар ынта-шынтамызбен беріліп жұмыс істедік. Бүгінгі бағымыз – осы ақ адал еңбек пен маңдай тердің арқасы болса керек, – дейді ол.Иә, «Қарты бар елдің – қазынасы бар» дейді дана халқымыз. Шындығында өскелең ұрпаққа өсиетін айтып, жолға жүрерде ақ батасын беріп отыратын осындай қазыналы қарттарымыз төрімізде отырса, жастарымыз алған бетінен қайтпасы, жолынан адаспасы анық. Сол сияқты өткен өмірінен сыр шертіп, еткен еңбектерін жіпке тізіп, Аллаға шүкіршілік етіп отырған әжеміз ұрпақтарының адал, еңбегінің жемісті, жалқаулықтан алыс, жақсылыққа жақын болуларын тілейді. Аузынан «айналайыны» түспеген ақжаулықты ана Отанын, елін, жерін сүйер азаматтар көп болса екен деген тілегін айтып, ақ батасын берді.

Қармақшыда ғасыр жасаған қария бар

<a href="https://kyzylorda-news.kz/">Kyzylorda-news.kz.</a> Ауыл шаруашылығы – мемлекет үшін маңызды сала. Аудан еңбеккерлері бұл саланың көкжиегін кеңейтуде кенде қалмақ емес. Осыбір мезгілде диқаншылар жер жыртып, егін салуға асығады. Бүгінде олар алғашқы жұмыстарын бастап үлгерді. Жалпы аудандағы ауыл шаруашылығы саласы қандай жұмыстар атқарды, алдағы жоспары қандай болмақ? Бұл туралы Қармақшы аудандық ауыл шаруашылық бөлімі мамандарымен тілдескен едік.&nbsp;<blockquote>«Иә, ауыл шаруашылығы – еліміздің азық-түлік қауіпсіздігінің кепілі, ауыл тұрғындарын еңбекпен қамту саласы ғана емес, бұл – ұлттық дәстүрімізді, өмір сүру салтымыз бен мәдениетімізді сақтап қалудың бірден-бір көзі. Жалпы күріш – мелиоративтік дақыл. Ғылыми тілде егіс айналымы деген түсінік береді. Біздің жерде оған күріш және жоңышқаны пайдаланады. Оны шаруашылықтар өздері үшін сақтайды. Күріш танапқа үш жыл егілсе, одан кейін үш жылға жоңышқа алмасады. Күріш егілгеннен кейін жердің қорегі азаяды. Жоңышқаны органикалық тыңайтқыш ретінде өсіреді. Ол жердің құнарын көтереді. Бұл әдіс – Сыр өңіріне тән құбылыс. Егер жерімізде ауыспалы егіс тәртібі сақталмаса, ол жердің тұздануына әкеп соғады. Былтыр негізгі күріш дақылы бойынша, су тапшылығына байланысты өткен жылмен салыстырғанда 383 гектарға қысқарыпа 12773 гектар күріш орналастырылып, күтімге алынды», – деді бөлім басшысы Әсет Омаров. &nbsp;</blockquote>2022 жылы жалпы көлемі 24326 гектар алаңға егіс орналастыру жоспарланды, оның ішінде күріш көлемі &nbsp;12773 гектар (2021 жылы 13156 га), майлы дақылдар (мақсары) 1021 гектар (2021 жылы 1085 га), жаздық бидай 941 гектар (2021 жылы 1081 гектар), арпа 150 гектар (2021 жылы 150 гектар), &nbsp;жүгері 100 гектар (2021 жылы 80 га), күнбағыс 5 гектар (2021 жылы 10 га), құмай 50 гектар, мал азықтық дақылдар 7789 &nbsp;гектар (2021 жылы 7785 га), картоп, көкөніс, бақша дақылдары 1531 гектар (2021 жылы 1503 гектар). Күріш дақылының шығымдылығы бойынша 6510 га (51%) жақсы, 4470 га орта (35%), 1793 га қанағаттанарлық (14%) болып бағаланды.&nbsp;2022 &nbsp;жылдың егісіне 3383 &nbsp;тн күріш, 192 тн бидай, 32 тн арпа, 30 тн жоңышқа, 32 тонна мақсары, 2,2 тн жүгері, 0,2 тн күнбағыс &nbsp;тұқымдары қажет болса, бүгінгі күні 4000 тн күріш, 192 тн бидай, 32 тн арпа, 110 тн жоңышқа, 50 тн мақсары, 2,2 тн жүгері, 0,2 тн күнбағыс тұқымдары пайдаланылды.&nbsp;2022 жылғы егіске қолданылған минералдық тыңайтқыштардың көлемі 14,4 &nbsp;мың тоннаны құрады. Оның ішінде аммоний сульфаты 8,4 мың тонна, карбамид 3,2 мың тонна, аммофос 2,6 мың тонна, өзге түрлері 0,09 мың тонна. Гербицидтер бойынша 16,5 мың литрді қолданылды (солито – 3200 литр, рейнбоу – 8700 литр, өзге түрлері 4680 литр). Қазіргі &nbsp;таңда ерте егіліп, күтімге алынған 1021 гектар жаздық бидай, 941 гектар мақсары, 50 га құмай дақылы толықтай жиналып, 455,3 тонна бидай (орта өнім 4,45 ц/га), 556,2 тонна мақсары (орта өнім 5,9 ц/га), 50 тонна құмай (орта өнім 10 ц/га) өнім алынды. Ауданда әәртараптандыру бойынша жаңашылдыққа бет бұрып келеді. Мәселен, 2021 жылы Ақжар ауылында күнбағыс қолға алынды. Сол сияқты биыл қандай дақыл түріне де жыл өткен сайын маңыз береіп келеді.&nbsp;– Жаңашылдық бар әрине. Былтыр ауданның тарихында егілмеген қант құмайы өсірілді. Жаңажол ауылдық округінде 50 гектар жерге сынама ретінде ектік. Бұл мал азығына жатады. Шығымы жақсы, жақында бір орымы алынды. Жалпы қант құмайы малдың оңалуына, тез семіруіне өте пайдалы. Ерте көктемде егіледі, суды да аз қажет етеді. Күзгі ылғалдылықпен де шыға береді, – дейді сала мамандары.&nbsp;Мал азығын дайындау бойынша 3383 гектар жаңа жоңышқа 1 мәрте орылып, 3180 тонна шөп дайындалса (орта өнім 9,4 ц/га), 4406 гектар ескі жоңышқа 2 рет орылып, 17 745 тонна мал азығы дайындалды. Күзгі егін жинау науқаны өз деңгейінде жүргізіліп, толықтай орылып, бастырылды. Қамбаға 76,6 мың тонна сыр салысы құйылды. Орта өнім гектарына 60,0 центнерден айналды. Егін жинау жұмыстарына барлығы 2008 &nbsp;тонна дизель отыны бөлініп, 1780 тоннасы жеткізілді. Қажетті жанар-жағар май отындары арзандатылған бағамен (210 тг/л) уақытылы алынды. Күзгі дала жұмыстарына &nbsp;152 трактор, 82 комбайн, 84 жатка, 62 автомашина, 94 трактор тіркемесі қатысты.<blockquote>«Осы жылдағы дерекке сүйенсек, салалар бойынша мал басында өсім бар. Аудан халқы мал бағу жағынан жақсы кәсіпке бейімделіп келеді. Одан бөлек бір-екі ұсақ мал, яғни ірі-қарадан ұстау дәстүр есебінде болып отыр. Шаруашылықтар қанша қиыншылық көрсе де кәсіптері алға басып, ілгері келе жатыр. Мал шаруашылығын дамыту, өнімділігі мен сапасын арттыруға өкіметтен тиісті субсидия бар. 2021 жылы жем-шөп алуға субсидия берілді. Бұл енді сәл болса да көмек. Жем-шөп мәселесіне келсек былтыр Арал аймағында қуаңшылық орын алып, мал азығында көп қиыншылық болды. Қазірде ол жақта да, өзіміздің аймағымызда да мал азығынан мәселе туындап жатқан жоқ», – дейді бөлім басшысы Әсет Омаров.&nbsp;</blockquote>Мал шаруашылығына келер болсақ, аудан бойынша 2022 жылдың қаңтар-желтоқсан айларында &nbsp;34894 бас мүйізді ірі қара, 39891 бас қой, 25486 бас ешкі, 15294 бас жылқы, 4050 бас түйе, 20523 бас құс тіркеліп, өткен жылдың осы кезеңімен салыстырғанда мал басы бойынша айтарлықтай өсім қалыптасты. Былтырғы жылмен салыстырғанда мүйізді ірі қара 107,7-ға, қой 107,9-ға, ешкі 106-ға, жылқы 119,1-ға, түйе 109-ға, үй құстары 102,4-ға көбейді.Есепті кезеңде аудан бойынша барлығы 4306,5 тонна ет (тірі салмақта), 6541,4 тонна сүт және 955 мың дана жұмыртқа өндірілді. Өткен жылмен салыстырғанда өсім тиісінше ет өндіру 104,6%, &nbsp;сүт өндіру 103,1%, жұмыртқа 105,1% құрады. Өндірілген ауыл шаруашылығы өнімдерінің жалпы көлемі 18248,2 млн. теңгені құрап, өткен жылдың тиісті кезеңімен салыстырғанда 100%-ға орындалды. Асыл тұқымды мүйізді ірі қара мал басын көбейту барысында Қврмақшы ауылдық округінен «Момыш» шаруа қожалығы Қазалы ауданынан 2 бас «Ақбас» асыл тұқымды бұқа, Ақай ауылдық округінен «Береке» шаруа қожалығы «Олжа» шаруа қожалығынан &nbsp;1 бас «Ақбас» асыл тұқымды бұқа сатып алды. Жылқы малын асылдандыру үшін «Емен-Даулет» шаруа қожалығы Ақтөбе &nbsp;облысы, Әйтеке Би ауданы, 11 бас «Мұғалжар» асыл тұқымды айғыр сатып алды.Аудан бойынша ветеринариялық базаға малдардың тіркелуі 2022 жылға 01 маусымға ауыл шаруашылығы жануарларын бірдейлендіру МІҚ-11200 бас, уақ мал 19800 бас, түйе-650 бас, жылқы-3000 бас, шошқа &nbsp;50 басқа &nbsp;жоспарланған болатын. Қазіргі таңда МІҚ-6500 бас &nbsp;58 % , уақ мал-12000 бас, 60,6 % , түйе-387 бас 64,5 % , жылқы- 2792 бас 93,0 %, шошқа 25 бас 50 % бірдейлендірілді. Осы бірдейлендірілген жануарлар толық дерекқор жүйесіне енгізілді. Көрсетілген мемлекеттік қызметтерге келер болсақ, 2022 жылы тракторларды және олардың базасында жасалған өздігінен жүретін шассилер мен механизмдерді, өздігінен жүретін ауыл шаруашылығы, мелиоративтік және жол-құрылыс машиналары мен механизмдерін, сондай-ақ жүріп өту мүмкіндігі жоғары арнайы машиналарды жүргізу құқығына куәліктер беру және ауыстыру – 80 дана. Тракторларды және олардың базасында жасалған өздігінен жүретін шассилер мен механизмдерді, өздігінен жүретін ауыл шаруашылығы, мелиоративтік және жол-құрылыс машиналары мен механизмдерін, сондай-ақ жүріп өту мүмкіндігі жоғары арнайы машиналарды тіркеу және тіркеуден шығару – 81 дана.&nbsp;Тракторларды және олардың базасында жасалған өздігінен жүретін шассилер мен механизмдерді, өздігінен жүретін ауыл шаруашылығы, мелиоративтік және жол-құрылыс машиналары мен механизмдерін, сондай-ақ жүріп өту мүмкіндігі жоғары арнайы машиналарды техникалық байқаудан өткізу – 16 дана; Дипломмен ауылға» бағдарламасы бойынша 2022 жылы 75 маманға 22972,5 мың теңге көтерме жәрдемақы (1 маманға 306,3 мың теңге) және 50 маманға 229725,0 мың теңге тұрғын үйге (1 маманға 4594,5 мың теңге) жеңілдетілген несие алу үшін қаржы бөлінді. Оның ішінде көтерме жәрдемақы алған мамандар білім беру саласы – 38 маман, 11639,4 мың теңге; денсаулық сақтау саласы – 22 маман, 6738,6 мың теңге; спорт саласы – 9 маман, 2756,7 мың теңге; АӨК (агроөнеркәсіптік кешен) – 5 маман, 1531,5 мың теңге; Мәдениет саласы – 1 маман, 306,3 мың теңге; Тұрғын үй алған мамандарға келсек, білім беру саласы – 28 маман, 128646,0 мың теңге; Денсаулық сақтау саласы – 13 маман, 59728,5 мың теңге; спорт саласы – 5 маман, 22972,5 мың теңге; АӨК (агроөнеркәсіптік кешен) – 1 маман, 4594,5 мың теңге; мәдениет саласы – 3 маман, 13783,5 мың теңге; Әлеуметтік маңызы бар азық-түлік бағасын тұрақтандыру бойынша &nbsp;Қазіргі таңда аудан көлеміндегі барлық сауда орындарында қажетті азық-түлік өнімдерінің тұрақты сатылуы және оның бағасының тұрақты болуы қадағаланады және күнделікті мониторинг жұмыстары жүргізіліп, нәтижесі тиісті орындарға баяндалып отыр.Нан бағасын тұрақтандыру бойынша «Өңірлік тұрақтандыру қорынан» ауданның ірі ұн операторы ЖК «Жаппасбаев Жомарт» 7,5 тонна бірінші сұрыпты «Дәстүр» маркалы, 68 тонна бірінші сұрыпты «Рояль» маркалы ұнын 7000 теңгеден наубайханаларға таратуда. Нәтижесінде кент орталығындағы дүкендерде нан бағасы 90-95 теңгеден сатылуда. Қармақшы – аграрлы аудан. Сол себепті жәрмеңкелер жиі өткізіліп тұрады. Айталық өткен жылы жы басынан бері 5 рет «Байқоңыр» әлеуметтік-кәсіпкерлік корпорациясы» акционерлік қоғамының еншілес ұйымы «Алтын Қамба Агро өнеркәсіп кешені» ЖШС-нің қатысуымен 3 рет және де аудан кәсіпкерлерінің қатысуымен 2 &nbsp;рет, Қызылорда қаласында 4 рет, &nbsp;Астана қаласында 1 рет, Байқоңыр қаласында 3 рет, жалпы саны 18 рет ауыл шаруашылығы өнімдерінің жәрмеңкесі ұйымдастырылды. Сонымен қатар «Алқаптан сөреге дейін» тізбегін дамыту бағытында жергілікті өнімдері делдалсыз, арзандатылған бағада халыққа сату үшін аудан орталығынан 10 павильон салу жоспарланды. Бұдан бөлек, Төретам кентінен (Қазиев Ә. жеке кәсіпкер «Әлия+» СҮ) &nbsp;1 әлеуметтік бұрыш ашуға тұрақтандыру қорынан &nbsp;20 млн. теңге зайым алып, өз жұмысын жасауда. &nbsp; Аудан бойынша әлеуметтік маңызы бар тауарлардың бағасын тұрақтандыру мақсатында күнделікті бақылау жұмыстары мен осы аталған іс-шаралар бойынша жұмыстар жыл бойына жүргізілетін болады.

Қармақшыда «Дипломмен ауылға» бағдарламасымен 50 жас маман үйлі болды

<a href="https://kyzylorda-news.kz/">Kyzylorda-news.kz.</a> Еліміздің басым аумағына әлі де антициклон жотасы әсер етеді. Осыған байланысты күн жауын-шашынсыз болады, деп хабарлайды Қазгидромет.&nbsp;Тек еліміздің оңтүстігінде, күндіз оңтүстік-шығысында фронталды бөліктердің өтуіне орай жаңбыр жауып, оңтүстігінде найзағай ойнап, қатты жаңбыр жауады.

Сейсенбі күнге арналған ауа райы болжамы

<a href="https://kyzylorda-news.kz/ru/">Kyzylorda-news.kz</a>. Қызылордалық Дінмұхаммед Ақпан М.В.Ломоносов атындағы Мәскеу Мемлекеттік Университетінде оқиды. Жас ғалымның жеткен жетістігі көп. Ол мектеп қабырғасында жүріп-ақ, түрлі интеллектуалды сайыстарда шыңдалды, химия пәні бойынша өткен халықаралық олимпиадада, Корея Респуб¬ликасында өткен халықаралық «Жас ғалым» ғылыми жобасында жүлдегер атанды. Ой-өрісі өзгеше, ізденісі ерекше жаспен жақында әңгімелесудің сәті түскен еді.‒ &nbsp;Жас ғалым ретінде айтыңызшы, соңғы бірнеше жылда қандай жетістікке жеттіңіз?‒ Бұл жыл аса күрделі болды. Сонау Ұлы Отан соғысынан бері адамзат біріге ешбір сынаққа қарсы тұрған жоқ. Бірақ әр қиыншылық бізді бір жақсы нәрсеге үйретеді. Мысалы, ендігі жерде адамдар ғылым мен білімнің болашаққа бастайтын жалғыз ұғым екенін түсінді. Ғалымдарды бейбіт күннің батыры деп мәртебе көрсетті. Жеке менің ғылыми жетістіктерім үшін бұл жыл сәтті болды десем болады. Биыл көп өлшемді комплекстік кеңістіктің ішіндегі нақты кеңістіктерге классификация жасайтын теорема дәлелденді. Ломоносов конференциясында нәтиже жоғары бағаланды. Жаз айынан бастап қазіргі күннің ең мықты математиктерінің бірі, физика-математика ғылымдарының докторы, Ломоносов атындағы Мәскеу Мемлекеттік университетіндегі механика-математика факультетінің профессоры Андрей Ошемковпен бірлесе жұмыс бастадым.Дифференциалды геометрия бағытында маңызды теоремаларға қол жеткіздік. Жаңа математика тілінде мұны «Нийенхейс геометриясы» деп атайды. Қысқаша айтқанда, жанама кеңістікте берілген арнайы операторларды классификациялау. Бұл бағытта үш халықаралық конференцияда баяндама жасадым. Әлі де атқаратын жұмыс көп, себебі әр шешілген есеп астында жаңа он сұрақ жатады.Осы жылы мені 1,5 айлық дискретті геометрия бағытында құрылған жазғы бағдарлама үшін Мәскеу Физико-Техникалық Университетіне шақырды. Онда біз ұсынылған есептер бойынша ізденіс бастадық. 1999 жылы екі өлшемді Морс-Максвелл теориясы құрылса, оны әрі қарай көп өлшемді деңгейге жеткіздік. Бұл бағыт бойынша да мақалалар дайындалуда.‒ Математика шынымен қиын ғылым ба? Көбіне қиын есептің жауабы логикаға салып ойланғанда қарапайым болып шығады ғой. Дегенмен кей сәттерде сізде есептің жауабын таба алмай қаламын-ау деген қорқыныш бола ма?‒ Сізге кез келген ғалым-математик ең алдымен «математика – тіл» деп жауап береді. Шынымен де, жан-жағымызда болып жатқан әр құбылыс, қимыл математика тілімен жазылады. Оның өзге филологиялық тілдерден айырмашылығы – «ережеден өзгешелігі болмауы», яғни қазақ тілінде жуанға жуан, жіңішкеге жіңішке жалғанады десек: кітап деген кірме сөз бар. Математикада мұндай ерекшеліктер болмайды. Сіз санды екіге көбейтсеңіз жұп болады, бірақ мына сандардан басқасын деп айта алмайсыз. Ол – теорема, ол әрқашан дұрыс. Атақты физик Ричард Фейман: «математикада қиын деген не? Есеп шықса түсінуге болады, яғни қиын емес» деген. Әрине бізді ең алдымен жауабы қызықтырады. Мысалы, екі нүктені алайық, бірі екіншісінен жоғары болсын. Ешбір күш әрекет етпей бір нүктеден екіншісіне жіберсек, уақыт жағынан ұтымды траектория қандай? Көбі түзу сызық дейді, бірақ жауабы арнайы қисық – брахистохрона. Міне осы секілді жағдайлар жиі кездеседі, күтпеген жауаптар бәрімізді қызықтырады. Есепті шешу дегеніміз отыра қалып шығара бастау емес, олай болмайды да. Алдымен сенің алдыңда адамдар қандай нәтиже алғанын түсіну қажет, оларды зерделіп өзіңе ұнаған бағытта есепті шығарған жөн деп санаймын. Қазіргі таңда математика өте кең ғылым, мысалы алгебрамен айналысатын ғалым геометрияны түсіне қоймайды.‒ Жыл сайын математика тақырыбында түрлі жобалар қолға алынады. Ал соңғы уақытта бұл ғылымға енген өзгеріс бар ма?‒ &nbsp;Математика өзге ғылымдарға қарағанда консервативті. Түбегейлі өзгерістерді жақтыра қоймайды. Физикада алдында болған теорияны кеңейтетін жаңа теория құрылса – бұл өзгеріс, басқа ғылым салаларында да осындай.‒ Академик Асқар Жұмаділдаевтің есебін шығарып, бақ сынап көрдіңіз бе? Есептің әлі күнге жауабы табылмауына не себеп деп ойлайсыз?‒ Математика глобальді тұрғыда үшке бөлінеді: алгебра, геометрия және анализ. Асқар Серқұлұлының есебі алгебра мен сандар теориясы бағытында, ал мен геометрия және анализ бағытында жұмыс істеймін. Жалпы бәріміз математикпыз десек те, айналысатын облыстарымыз тым бөлек. &nbsp;Есептің ұзақ жылдар бойы шықпауы математикада қалыпты жағдай. Мысалы, Ферма теоремасы үш жүз жылдан аса уақыт шешімін таппады. &nbsp;Неге мына есепті шығарған жоқсыз деу, дәл солай ақынға келіп «мына тақырыпта поэма жаз» дегенмен тең. Математика қатал ғылым болса да, мұнда да шабыт пен идея керек.‒ Өзіңізді дамыту үшін жаңадан не үйренгіңіз келеді?‒ Тек қана ғылыммен айналысу, менің ойымша қате. Ми деген кез-келген бұлшық ет секілді шаршайды, сол себепті қалыпты режимде оны демалдыру қажет. Өзіме теңіз ұнайды, теңіз жағасында кешқұрым серуендеп сан алуан ойларға батып жүру мен үшін демалыс. Жылы күннің шуағы мен толқындаған суға шомылу бар күйзелісті алып кететін секілді. Сол себепті серфингті үйренсем деймін. Тағы бір маған рахат әкелетін физикалық жаттығу – атқа міну. Бала кезімнен атқа көп міндім. Қазір Мәскеуде жүріп ауылдағы сол кездерім еске түседі. Физикалық жаттығулар мидағы кернеуді алады, ми шаршауы физикалық шаршауға қарағанда аса ауыр тиеді.‒ Математиканы академик есекке теңейді. Адамзаттың бар жұмысын атқарғанмен, қадірсіз дегені ғой. Ал сіздің теңеуіңіз қандай болар еді?‒ Шынымен де математика бар ғылымның аппараты, барлығы қолданады. Бірақ оның қадірі жоқ дегенге келіспеймін. Бір ғасыр бұрын адамдар ғалымдарды жақсы танитын еді, олар қазіргі теледидардағы жұлдыздар секілді болған. Уақыт өте келе адамдар мұны ұмытты. Біз жалақысы аз, ешкімге қажеті жоқ нәрсемен айналысатын жұмысшыларға айналдық. Коронавирус кімнің кім екенін анық көрсетті. Вакцина ойлап тапқан – ғалым, цифрлы технологияны дамытқан да – ғалым болып шыға келді.Менен ақыл сұраса: жерде жүріп күлгеннен, аспанға қарап армандаған артық дер едім. Ал аспанға, ғарышқа адамды алып баратын ғалымдар, олардың ғылымдағы жетістіктері.‒ Сұхбатыңызға рақмет!

Дінмұхаммед Ақпан: Математика өзге ғылымдарға қарағанда консервативті

<a href="https://kyzylorda-news.kz/">Kyzylorda-news.kz.</a> Елімізде еңбек етемін &nbsp;деген адамға мүмкіндік мол. Ешкім ештеңеге кедергі келтірмейді. Айлығың шайлығыңа жетпей жүргеннен жеке кәсіп ашып, өзің жұмыс көзін тауып, нәпақа тапқанға не жетсін! Соңғы кезде елімізде кәсіп бастауға қызығушылық танытатын жандардың қатары артуда. Кәсіпті бастау үшін алдымен адамның сол кәсіпке деген ынтасы, талабы болу керек. Дегенмен көпшілігінің кәсіп жүргізуге қызығушылығы болғанымен, &nbsp;біліктілігі мен қаржының жетіспеушілігі кедергі болып жатады. Осы кедергілерді болдырмау үшін елімізде кәсіпкерлікті дамытуға қатысты түрлі бағдарламалар қабылданып жатыр. Осы орайда аудандық кәсіпкерлік, өнеркәсіп және туризм бөлімінің басшысы Ренат Жанаевпен тілдескен едік.– Қарапайым тұрғындарға түсінікті болу үшін кәсіп ашқысы келген адам алдымен неден бастау керектігіне тоқталсаңыз. Сондай-ақ ауданда мемлекеттік бағдарламаның жүзеге асуы туралы да айтып өтсеңіз…– Кәсіпкерлікті бастау үшін ең алдымен адамның ынтасы, кәсіпке деген қызығушылығы мен небір тәуекелге дайын болуы қажет. Қай салада кәсіп ашқыңыз келеді, қаржының көлемі де соған байланысты. Бүгінде бізде шағын және орта бизнеске айрықша көңіл бөлінуде. Яғни кәсіп ашамын, жұмыс істеймін деген адамға бар мүмкіндік қарастырылған. Кәсібін енді бастаймын деуші азаматтарға мемлекеттік қайтарымсыз гранттар қарастырылған. Өткен жылы «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған» мемлекеттік бағдарламасы арқылы 583 400 мың теңге қайтарымсыз қаражатына 430 азамат қол жеткізіп, өз кәсіптерін бастады. Қазіргі таңда бұл бағдарламаның атауы 2021-2025 жылдарға арналған кәсіпкерлікті дамыту жөніндегі ұлттық жоба болып өзгеріп, қайтарымсыз грант көлемі 400 айлық есептік көрсеткішке, яғни 1 225 200 теңгеге өсті. Бұл дегеніміз кәсібін ашамын деуші азаматтар өз қалтасынан қаражат шығармай, ешқандай несиесіз мемлекет тарапынан ұсынылып отырған қайтарымсыз грантты жеңіп алып, өз кәсібін бастауға үлкен мүмкіндік.Бұдан бөлек «Бизнестің жол картасы – 2025» мемлекеттік бағдарламасы аясында 2 000 000 мен 5 000 000 теңге аралығында инновациялық жобаға қомақты қайтарымсыз қаражат алып, кәсіп бастауға болады. Өткен жылы осы мүмкіндікті пайдаланып ауданымызда 4 жас кәсіпкер жалпы құны 14,5 млн теңгені жеңіп алып өз кәсіптерін бастап, 14 адамды жұмыспен қамтыды. Атап айтатын болсақ, "Су ұңғымасын бұрғылау" жобасы, "Пескоблок өндірісі" жобасы, Сексеуіл кентінде "Балалар, ДЦП мүгедектеріне және ересектерге арналған массаж кабинетін ашу" жобасы, "Түйе сүтінен сүт өнімдерін өндіру, яғни шұбат өнімі" жобасы. Ағымдағы жылы осы бағдарлама арқылы 1 жоба қолдау тапты. Ол – "Фибробетоннан құрылыс заттарын өндіру" жобасы. Бұл жастар өз әлеуеттерін кәсіп ашу арқылы көтеріп қана қоймай, аудан тұрғындарына өз өнімдері мен қызметтерін көрсету арқылы септігін тигізуде.&nbsp;–Ауданда кәсіпкерліктің даму барысы қандай деңгейде және мемлекеттік бағдарламалар мен қаржы ұйымдары арқылы қандай жұмыстар қолға алынды? Атқарылған жұмыстар жөнінде толығырақ айтып өтсеңіз…– Кәсіпкерлік саласы – еліміздің басты секторы. Қазіргі таңда аудан әкімі Серік Сермағамбетовтің &nbsp;бастамасымен индустриялық- инновациялық даму мемлекеттік &nbsp;бағдарламасы аясында ауқымды жұмыстар атқарылуда. Ауданымыз бойынша бүгінгі күнге тіркелген шағын және орта кәсіпкерлік субъектілері 5197 бірлікті құрап, өткен жылғы осы кезеңмен салыстырғанда 19,1 пайызға өсім көрсетті. Ал жұмыс жасап тұрған шағын және орта кәсіпкерлік субъектілері 4800 бірлікті құрап, өткен жылғы сәйкес кезеңмен салыстырғанда 23 пайызға артқан. Жыл басынан бері (қаңтар-шілде айлары) аудандағы бөлшек сауданың көлемі 3,620 млрд теңгеге, көтерме сауда 9,782 млрд теңгеге жетті. Сонымен қатар өнеркәсіп орындары 13,144 млрд теңгенің өнімін өндіріп, өткен жылдың сәйкес кезеңімен салыстырғанда өнеркәсіп өнімінің көлемі 28,7 пайызға артқан.– Ауданда шағын және орта бизнес көкжиегін кеңейтіп келеді. Осы бағытта ауданда қандай жобалар іске асады деп күтілуде?– Қазіргі таңда ауданымызда индустриялық-инновациялық дамытудың мемлекеттік бағдарламасы аясында жалпы құны 158,48 млрд теңгені құрайтын, іске қосылғанда 1352 адамды жұмыспен қамтитын 7 жоба іске асырылуда. Бұдан бөлек кәсіпкерлікті дамыту картасына аудан әкімдігі тарапынан қосымша жалпы құны 5674,5 млн теңге болатын, іске қосылғанда 448 азаматты жұмыспен қамтитын 5 жобаны енгізу мақсатында тиісті жұмыстар жүргізілуде. Олар: «Қап өндіру», «Құрғақ құрылыс ұнтақтарын өндіру»,«Мал бордақылау алаңы және шұжық өндіру цехын ашу», «Түйе сүтінен құрғақ ұнтақ дайындау», «Тұрмыстық қатты қалдықтарды қайта өңдеу, төсеме тастар (брусчатка) өндірісі» жобалары.– Мемлекеттік қайтарымсыз грант қаражаттары кәсібін енді бастайтын азаматтарға арналған болса, кәсібін одан әрі дамытамын, кеңейтемін деуші кәсіпкерлерге де мемлекет тарапынан қандай қолдау шаралары қарастырылған?– Қазіргі таңда кәсібін одан әрі дамытамын, кеңейтемін деуші кәсіпкерлерге біршама қолдаулар бар. Атап айтатын болсақ, «Бизнестің жол картасы-2025» мемлекеттік бағдарламасы және «Қарапайым заттар экономикасы» бағдарламалары аясында кәсіпкерлерге екінші деңгейлі банктер арқылы жылдық жарнасы 6%-бен 5 жылға кепілдікке койылатын мүліктің (залог) бағасына қарай 7 млрд теңгеге дейін төмендетілген несие алып, кәсіптерін дөңгелетсе болады. Бұл жерде екінші деңгейлі банктер кәсіпкерге 14,5% -бен несие берсе, оның 8,5 %-ын мемлекет субсидиялайды.Сондай-ақ кепілдік мүлкі жоқ кәсіпкерлерге «Бизнестің жол картасы-2025» мемлекеттік бағдарламасы аясында 2 жылға 5 млн теңге көлемінде 6%-бен кепілсіз несие беру қарастырылған.Бұдан бөлек, «Еңбек» мемлекеттік бағдарламасы аясында «Atameken Qyzylorda» микроқаржылық &nbsp;ұйымы арқылы 1 млн теңгеден бастап 7 млн теңгеге дейін жылдық &nbsp;6% жарнамен 5 жылдан 7 жылға дейін несие алуға болады.«Аграрлық несие корпорациясы»АҚ арқылы жылдық 4%-дан 6%-ға дейін 1 жылдан 5 жылға дейін несие қарастырылған. Бұл қаржы ұйымының бір тиімділігі 24 айға дейін жеңілдікті кезең қарастырылған. Басқаша айтқанда каникул. Бұл жерде 4%-дық жарна көп балалы аналарға қарастырылған.«Қызылордаөңірлік инвестициялық орталық шағын қаржылық ұйым» ЖШС арқылы жылдық 2%-дан 6%-ға дейін несие алуға болады. Бұл жерде 2%-бен несие тек өнім өндіруші кәсіпкерлерге беріледі.&nbsp;– Ренат Қуанғанұлы, келелі сұхбатыңыз үшін рақмет. Енді оқырмандарға айтарыңыз болса…– Жоғарыда айтып өткенімдей, кәсіпкерлікті дамыту арқылы біз ауданымыздың экономикасын, тұрғындардың әл-ауқатын көтеруге жағдай жасаймыз. Бұл тұрғыда мемлекет тарапынан кәсібін бастаймын немесе өз кәсібін одан әрі жандандырамын деуші азаматтарға барлық мүмкіндіктер қарастырылған.Тек жұмыс жасаймын, өз кәсібімді ашамын, жағдайымды жақсартамын деген адамға талап пен ынта керек. Мемлекет басшысы Қ.К.Тоқаевтың халыққа арнаған Жолдауында кәсіпкерлікті қол¬дау арқылы елдегі шағын және орта бизнесті өрістетуге байланысты тың жобаларды іске асыру жөнінде өз ұсынысын айтқан болатын. Алдағы уақытта басты мақсат – ел экономикасын одан әрі дамыту, халықтың әл-ауқатын арттыруға қатысты бірқатар ауқымды шараны жеделдетіп қолға алу жолында тынымсыз еңбек ету.&nbsp;

Аралда кәсіпкерлер саны 19,1 пайызға өскен

<a href="https://kyzylorda-news.kz/ru/">Kyzylorda-news.kz</a>. Еліміз еңсесін көтеріп, есін жиып, тәуелсіздік алғалы бері жастарды қолдау мақсатында бірқатар ірі жобалар дамылсыз жүзеге асырылып келеді. Атын атап, түсін түстесек, білім және ғылым саласындағы «Болашақ» бағдарламасы, «Дипломмен ауылға» және жастарға тікелей қатысы бар басқа да ірі масштабты жобалар жеткілікті.&nbsp;Қазіргі таңдағы жастардың сапалық көрсеткіші, жетістігі – мемлекеттік жастар саясаты нәтижесінің көрінісі. Осыдан тура он жыл бұрын 2012 жылдан бастап жастардың ортақ мәселелерін жергілікті, республикалық дәрежеде қолға алу үшін Жастар ресурстық орталықтары құрыла бастады.Жастар ресурстық орталығы – жастардың әлеуметтік әрі тұлғалық дамуына жәрдемдесетін және жастар ұйымдарының қызметіне қолдау көрсететін ұйым. Оның негізгі міндеттеріне жергілікті ұйымға қарасты жастарды жұмысқа тұруға дайындау, цифрлық сауаттылығын арттыру, жастар ортасында волонтерлік қызметті дамыту, жас отбасылармен жұмыс істеу, жастарға қатысты мәселелерді анықтау, мемлекеттік бағдарламаларды жастарға түсіндіру, жұмыс мәселесіне қатысты жәрмеңкелер, әлеуметтік желілерде ақпараттандыру, түрлі мәдени шаралар ұйымдастыру, әлеуметтік зерттеулер, талдамалық жұмыстар жүргізу сынды маңызды бағыттар кіреді. Бүгінде институционалдық жағынан республика бойынша 209 жастар ресурстық орталығы ашылған, онда 3 мыңнан аса қызметкер жұмыс істейді деген дерек бар.Айта кету керек, 2021 жылы елімізде жастар саны халықтың жалпы санының 20,2% құраған. Яғни 14 пен 29 жас аралығындағы 3,7 млн жас бар деген сөз. Барлық өңірде облыстық жастар ресурстық орталығы бар десек, аудандық орталықтардың әрқайсысы онымен тікелей байланыса отырып, жұмыс істейді. «Республиканың әр өңірінде стратегиялық сессиялар, қоғамдық тыңдаулар ұйымдастырылып жүр. Басты мақсат – жергілікті жерлердегі жастардың проблемаларын, оларды шешу үшін қажетті нақты іс-қимылдарды анықтау. 2021 жылы «Жастар саясаты туралы» заңға өзгерістер енгізу көзделіп, соған орай Ұлттық баяндама әзірленді. 2020 жылғы Жастар ғылыми зерттеу орталығы қазақстандық жастардың топ-3 негізгі мәселесін атап көрсетті. Олар: жоғары білім, жұмыс және тұрғын үй мәселесі.Атап өткеніміздей, жастардың мәселесі – мемлекеттік саясаттың маңызды нысаны. Себебі ертеңгі тарихты жасайтын, болашақтың кірпішін бүгін құятын жастарды дамытып, қолдау да, елемей, жастық жалынын өшіру де өз қолымызда.Дегенмен осы бағытты қолға алған әр аудандағы жастар ресурстық орталықтарының іргелі, үздіксіз жұмысы көңіл қуантады Топ бастап тұрған Шиелі ауданының жастар ресурстық орталығы екенін атап өттік. Ержан Әбдешев бастаған шиелілік жастар түрлі бағытта тынбай еңбек етіп келеді. Дін саласындағы мемлекеттік саясатты түсіндіру, тұрақтылықты нығайту және діни экстремизмнің алдын алу мақсатында аудан көлемінде – 8 кездесу өткізіліп, барлығы 1200-нан астам жас белсенділік танытқан.Ақпан айының 28 жұлдызынан бастап, Шиелі кенті және ауылдық округтерге қарасты мектептерде «Тұрғындар арасында діни экстремизм құбылыстарының алдын алу» және құқық¬бұзушылықтың алдын алу бағы-тында арнайы ақпараттық түсіндіру тобы мектеп оқушылары, түлектердің зияткерлік, шығармашылық, спорттық салада дамуынан бөлек түрлі мақсаттағы күмәнді оқу орындарында білім алмауын немесе тәрбиеленбеуін кездесу барысында түсіндірді.Ал Жаңақорған ауданына қарасты ЖРО-ның ұйымдастыруымен жыл басынан бері барлығы 74 шара ұйымдастырылса, 1770 жас қоғам өміріне белсенді қатысқан. Оның ішінде мәдени шара, спорттық, қайырымдылық, рухани жаңғыру бағдарламасына қатысты, құқықбұзушылықтың алдын-алу, жастарға кеңес бағыттары қамтылды. Мәселен, Наурыз мерекесі қарсаңында тұңғыш рет Жаңақорған ауданында «Наурыз қоржыны» әзірленіп, үйден оқитын жағдайы төмен отбасыдан шыққан балаларға сыйлық ретінде тарту етілген. ЖРО-ның директоры Наурызбай Ерікұлының бастамасы бойынша аудан жастары жан-жақтылығымен танылып келеді. Сәуір айында «Білгеніңмен бөліс» жобасы қолға алынып, осы уақытқа дейін тігін, тоқыма, қолөнер курстарына 50-ден астам қыз-келіншектер қатысып, жаңа кәсіп түрлеріне бейімделуде.Сонымен бірге «Тұлғалыққа бір қадам» кітап оқу бәйгесі ұйымдастырылып, оған 400-ден астам кітап оқырмандары қатысты. Жеңімпаздар түрлі пайдалы курстарға арналған абонементтермен марапатталған.Арал ауданының жастары да жыл басынан бері белсенділігімен көзге түсіп жүр. Жастарды бастап жүрген директор Абай Әбілбаевтың айтуынша, орталық 12 бағыт бойынша нақты жоба әзірлеп, нәтижесінде тұрақты жұмыстар жүргізіліп келеді. Атап айтар болсақ, 15 сәуір ұлттық ғашықтар күніне орай жас отбасылылар арасында «LOVE STORY…» атты әлеуметтік желіде видеоролик байқауы ұйымдастырылып, орталық алаңда қала жастарының қатысуымен өткен мерекелік концерттік бағдар-ламада қорытындыланған. «7 мамыр – Отан қорғаушылар күніне орай жас сарбаздарды әскер қатарына шығарып салдық. Бұл патриоттық тәрбиеге тікелей әсер ететін маңызды шара болса, 1 маусым – Балаларды қорғау күніне орай «Балаларға базарлық» атты қайырымдылық марафонын ұйымдастырып, Аянат Алмасқызының еміне қаржылай көмек көрсете алдық. Айтулы күндерден бөлек жастардың тәрбиесіне, тұлғалық дамуына қатысты шаралар, кездесулер өткізіліп жүр. Әр шарада – мән бар», – дейді Абай Сәкенұлы.Жалағаштық жастар орталығын 2021 жылдың 1 маусымынан бастап Нұржан Амандық сынды көшбасшы басқарып келеді. Айта кету керек, аудан жастары еңбектің наны тәтті екенін бірлесе жасаған игі істерінен аңғаруда. Мәселен, Ұлыстың ұлы күні мерекесі қарсаңында С.Мұқашев демалыс саябағында аудан жастарының қатысуымен «Бір тал кессең, он тал ек!» акциясы өткізіліп, аудан жастары 40 түп ағаш көшеттерін отырғызып, аудан ажарын арайландыруға белсенділік танытты.Шетелде немесе еліміздің басқа аймақтарында өз саласы бойынша белсенділік танытып, абыройлы қызмет атқарып жүрген ауданның 35 жасқа дейінгі жастарын насихаттау мақсатында «Tanys bolaiyq» рубрикасы жүргізілуде. Қазіргі таңда 50-ге жуық жас таныстырылған.Көптің қолдауына ие болған аудандық ұйымның бірі – қазалылық жастар ресурстық орталығы. Нұрбек Ақпанбетов басшылық ететін орталық қай бағытта да белсенділігін жоғалтқан емес. Мысалы, Балалар жылы аясында «Жаңа Дәуір – жаңа Қазақстан» тақырыбында жастар фестивалі ұйымдастырылды. Оған барлығы 187 жас қатыстырылып 6 бағытқа бөлінген. Нәтижесінде, жеңімпаздарға Қорқыт Ата атындағы Қызылорда университетінің толық гранты және осы оқу орынының 50,25% жеңілдікпен оқитын сертификаттары, салаларына байланысты барлығы 500 мың теңгенің көлемінде қаржылай сыйақылар табысталды. «Жылу сыйла жандарға» акциясы аясында әлеуметтік жағдайы төмен отбасыларға Әйтеке би кентінен 25 отбасыға және елді мекендерден 67 отбасыға барлығы 92 отбасыға қыстық отын жеткізіліп берілген.Сонымен бірге мүмкіндігі шектеулі, әлеуметтік жағдайы төмен 98 отбасыға қазалылық ерікті жастар қол көмек жұмысын ұсынған. Мұның бәрі – бекем бірліктің белгісі.Ғани Оралов басшылық ететін Сырдария ауданының жастар орталығының зерттеуі бойынша, ауданның өзінде осы жылы14 пен 29 жас аралығында 8144 жас бар екен. Аудан көлемінде қаңтар мен сәуір айлары аралығында 52 шара ұйымдастырылып, 1050 жас белсене араласып, өзіндік көзқарасын білдірген. Атап айтқанда, жастар арасында діни ағымдардың, құқықбұзушылықтың алдын алу, спорттық және қайырымдылық, интеллектуалды бағытта бірнеше шара ұйымдастырылыпты. Сонымен қатар, «Еріктілер штабы» жанынан азық-түлік, киім-кешек, дәрі-дәрмек және тұрмыстық техниканы қабылдайтын «Қайырымды жандар бұрышы» құрылып, тұрғындардан жиналған заттар мұқтаж жандарға берілуде.Келесі үздіктің бірі – Қармақшы аудандық жастар ресурстық орталығы көшбасшы, айтыскер ақын Сырым Әділбековтың басшылығымен 2022 жылы түрлі тың бағытта 77 шара ұйымдастырылып 1500-ден аса жас қоғам өміріне белсене араласқан. Мысалы, шайыр Т.Ізтілеуовтың 140 жылдығына орай мектеп оқушыларымен Қармақшы аудандық кітапханасында экскурсия өткізілген. «30 игі іс» жобасы аясында, қаңтар оқиғасына байланысты, блок бекеттердегі полиция қыметкерлеріне азық-түлік таратылды. &nbsp;

Жастар орталығы: жұмыс жүйелі ме?

<a href="https://kyzylorda-news.kz/ru/">Kyzylorda-news.kz</a>. «Qosyl» қалалық жастар орталығы күміс сапаға лайықты жүйелі жұмыстарды жүргізуде. Мәселен, өткен жылы орталықтың ұйымдастыруымен 143 іс-шаралар өткізіліп, оған 10 000 жас қамтылған. Жастардың сұранысына орай жабдықталған орталықтың қызметін 11 071 жас пайдаланды. Яғни, орталықта WI-FI, коворкинг орталығы, спорттық секциялар, креатив фото-видео студиясы, би залы және жастар ұйымдары кабинеті тегін қызмет көрсетуде.Өткен жылы орталықпен ұйымдастырылған ауқымды шаралардың бірі, қала әкімінің «Самғау» жастар сыйлығы арқылы кәсіптік техникалық бағыттарда қызмет ететін саланың көшбасшылары анықталды. Сонымен қатар, Қазақстандағы мобилографияның негізін қалаушылардың бірі Қыран Талапбектің қатысуымен Қызылорда облысында алғаш рет «Мобилография» фестивалі ұйымдастырылды. Шара нәтижесінде қаладағы жас мобилографтардың ортасы қалыптасты.<blockquote>«Біз ауыл жастарының дамуына септесіп, қаланың шет аймақтарынан да жастарға қолжетімді орталықтар (аула клубтар) ашуды жоспарлаған болатынбыз. Бұл алға қойған мақсат орындалды. Жастардың бос уақытын тиімді өткізу, салауатты өмір салтын қалыптастыру және бұқаралық спортты дамыту мақсатында Қарауылтөбе, Ақсуат, Ақжарма, Қызылжарма, Талсуат, Қызылөзек ауылдық округтерінен үстел теннисі орталықтары ақысыз негізде жастарға қызмет көрсетсе, «Аула клубтары» әлеуметтік жобасы аясында желтоқсан айында Тасбөгет кентінде алғашқы аула клубы өз жұмысын бастады. Алдағы уақытта аула клубтарын Белкөл кенті мен «Шанхай» аудандарынан ашуды жоспарлап отырмыз», – деді Алиби Төлепбергенұлы.</blockquote>Сонымен қатар, жазғы маусымда «Арбат» бойында әр аптаның бейсенбі күні – «PING-PONG», жұма күні – «Караоке Battle», сенбі күні – «Кино TIME» жобалары өткізілді. Осы және өзге де қала жастарына қатысты күнделікті ақпараттар мен жаңалықтар «qosylbot» телеграм-бот және «qosyl.mrc» инстаграм парақшасында жариялануда. Ал «Жұмыс бар» деген арнайы парақша арқылы бос жұмыс орындары туралы ақпараттар орналастырылуда.«Qosyl» жастар орталығының тұрақты жобаларына айналған «Qosyl kenes» жобасы арқылы жастарға үздіксіз кеңес берілуде, ал «Qosyl acoustic» жобасы аясында шығармашыл жастардың ән кеші әр ай сайын өткізіліп келеді.<blockquote>«Күні кеше Журба көшесі №63 мекенжайынан «Orta» рухани-интеллектуалды демалыс орны ашылды. Орталық қазақы нақышта, заманауи үлгідегі жабдықталған бос уақытты тиімді өткізуге және интеллектуалды орта қалыптастыруға арналған кеңістік. Жастар мен жасөспірімдерге арналған орталықта «Орта ойыны» – түрлі үстел ойындары, «IQ орта» интелектуалды сайыстары, «Орта сазы» жанды дауыстағы мерекелік кештер, «Қолайлы орта» кітап бұрышы, мәжіліс залы, «Skills Орта» жобалары және балаларға арналған логопед кабинеті мен тоғызқұмалақ, шахмат үйірмелері жұмыс жасайды. Бұл орталық алдағы уақытта біздің жобаларды да әрі қарай жандандыру мақсатында мол септігін тигізбек», – деп қорытындылады орталық директоры Алиби Басаров.</blockquote>

Әліби Басаров: Қала жастарына мүмкіндік мол

<a href="https://kyzylorda-news.kz/ru/">Kyzylorda-news.kz</a>. Мемлекет тарапынан көңіл бөліне бастағалы аудандар мен ауылдық жерлерде кәсіпкерлік саласы құлашын кеңге жаюда. Өткен жылы бір ғана Қазалы ауданында алғашқы жартыжылдықта 5208 кәсіпкерлік субъектісі тіркелген. Оның ішінде күнделікті қажеттілік қатарындағы тамақ өндірісінің орны ерекше. Уақыт пен қоғам сұранысына сай жартылай дайын өнімдер мен тәттілерді дайындаушылар саны көбейгенмен тапсырыс берушілер азайған емес. Демек кәсіпкер өзіне де, өзгеге де пайдалы бола білгені ғой. азалылық жас кәсіпкер Айдана Тілекпен жартылай дайын өнімдер өндірісі мен кәсіп бастау туралы сұқбаттасқан едік.– Кез келген қазақ қызының ас үйден алыс емес екенін білеміз. Дегенмен бұл салаға қалай келдіңіз?– Қасиетті Қазалы топырағында туып-өстім. Отбасылымын, құдайға шүкір, екі қыздың анасымын. Қаладағы С.Сейфуллин атындағы №165 мектеп түлегімін. Кейін Қорқыт ата атындағы Қызылорда университетінде «Ақпараттық жүйелер» мамандығында оқыдым. Өзіңіз айтқандай, қазақ қыздарының қай-қайсысы да ас үйден алыс емес. Оның үстіне біздің жақтың қонақ күтуі, дастархан дайындауы бөлек әңгіме. Мамандығым ақпараттық жүйелерге қатысты болғанмен тұрмыс құрған соң тәтті пісіру, түрлі тағамдар әзірлеуге қызығушылығым арта түсті. Үйде отырып онлайн курстарға қатысып, сан түрлі тәттілерді үйрене бастадым. Үйге келген қонақтарға, отбасыма дайындап, қуантатынмын. Өзім де тәтті тағамдар әзірлегеннен рақат аламын. Ас үйдегі шеберліктен гөрі сүйікті ісім, хобииім десем артық емес.Қазақтың үйінен қонақ арылған ба? Кез келген күні, кез келген уақытта жақын туысың, жұрағатың келіп қалады. Сондай уақыт тығыз болып, асыққан сәттерде ойыма келетін шешім – дүкеннен тез дайын болатын, жартылай дайын тағам алу. Осылайша кәсіп бастауға идея келді. Неге осы кәсіпті егжей-тегжейлі зерттеп қарап, дамытпасқа деген оймен іздене бастадым. Жартылай дайын өнім шығаруды бастағаныма бірнеше ай ғана болса да сұраныс күннен күнге артуда. Бұл – &nbsp;біздің өнімдердің халыққа пайдалы, күнделікті қажеттілігіне жарайтынының белгісі. Кәсіп бастарда мемлекеттен ешқандай грант алмадым, жоспарыма сай аздаған мөлшермен сатылымға шығара бастадым. Осылайша тапсырыс та көбейді, тұрақты клиенттер де пайда болды.– Қазір жартылай дайын өнім шығаратындар көп. Тұтынушы неге сіздің өнімді таңдайды?– Иә, ауданның өзінде жартылай дайын өнім шығарып жатқандар көп. Бірақ «Дәмді әлемнің» ерекшелігі – өнім құрамының табиғилығында, тазалығында. Үй жағдайында таза етті өзіміз тартып, қоспаларын қолмен турап, қамырын қолмен жайып, аналарымыз үйде қалай дайындаса, дәл солай жасап ұсынамыз. Етіміз 100% халал, өнімдеріміз, дайындайтын асханамыз тап-таза. Сондықтан тұтынушы жарнамасыз-ақ бір рет біздің өнімнің дәмін көрсе, тұрақты тапсырыс берушіге айналады.Демек, біздің мақсат орындалды.– Айдана, жартылай дайын өнім түрлеріне тоқталсаңыз…– Біздегі өнім түрлері: тұшпара, манты, тефтели, котлет, кеспе, самса, бәліш. Өнімдерді үш адам болып дайындаймыз.. Күніне 30 келіден жоғары тапсырысты дайындап жібереміз. Тәуекел деп кәсіп бастадым, енді алда жоспар көп. Алдымен «Дәмді әлем Қазалы» деген атаумен жартылай дайын өнімдерімізге арналған шағын дүкен ашсам деймін. Ассортиментті де көбейткім келеді. Бұйырса, барлығы да жоспарға сай жүзеге асады.– Кәсібіңіз өркендей берсін!&nbsp; &nbsp;<figure class="image"><img src="https://knadmin.beoblood.kz/uploads/kasipker_bfa90f188f.jpg" alt="касипкер.jpg"></figure>

Кәсіпкерге қолдау көп

<a href="https://kyzylorda-news.kz/">Kyzylorda-news.kz.</a> Айлардың сұлтаны саналатын Рамазан – Алланың мейірімі төгіліп, жұмақтың есігі айқара ашылатын, сауаптар еселене жазылатын шарапаты мен шапағаты мол ай. Исламның бес парызының бірі болған оразаның осы айда орындалатыны да сондықтан. Жан мен тәнді рухани тазартатын, игі амалдар айында оразаны мұсылман баласы қалай тұтуы қажет? Биыл пітір садақа мөлшері қанша теңгені құрап отыр? Осы және өзге де сауалдардың жауабын білмек мақсатпен орталық Жанқожа батыр атындағы мешіттің бас имамы Берік қажы Сүлейменовпен сұхбаттасқан едік.– Берік қажы, ең алдымен ораза ұғымына түсінік берсеңіз?– Ораза араб тілінде «саум» деп аталады. Ол қазақ тілінде «тыйылу» деген мағынаны білдіреді. Шариғаттағы, ислам дініндегі ораза таң атқаннан, кеш батамға дейін ішу-жеу менен жаман әдеттерден және өсек-өтірік айту, ерсі әдеттерден отыз күн бойы алшақтауды көздейді. Биыл ораза ағымдағы айдың жиырма үшінші жұлдызына келіп тұр. 22-сі күні кешке барлық мешіттерде «Тарауық» намазы оқылып, ниет етеміз. Ертеңгісін ауыз берік болады. Бұл ораза 29 күнге созылмақ. Ал 21-ші сәуір күні ораза айт намазы оқылады. Ол Қазалы бойынша таңғы сағат 6:00-де оқылатын болады. Сондай-ақ қасиетті қадір түні 17-ші сәуірден 18-ші сәуірге қараған түні өтеді.– Қазіргі жастардың көбі оразаны ашығу, арығу үшін ұстап, негізгі мақсатынан жаңылып жатады. Бұл жайында не айтасыз?– Жалпы ораза тұту үшін кез келген жан ең алдымен Алланың разылығын тілеуі қажет және бұйрығын орындап, оған бойсұну керек. Ал көздегені азу немесе басқа да мақсат болса, онда ол адамның отыз күнгі сауабы көкке ұшады. Сол үшін түзу ниетте, барлық талаптарына сай болып, орындалғаны абзал.– Ел арасында «Намаз оқымаған кісінің оразасы қабыл болмайды», «Сілекейін жұтқан жанның оразасы бұзылады» деген сынды алып-қашпа әңгімелер өрбіп жүр. Бұл қаншалықты рас?– Иә, қазір көбінде «Намаз оқымаған адамның оразасы қабыл болмайды» деген түсінік қалыптасқан. Бірақ олай жаңылмаған жөн. Себебі намаз бөлек құлшылық болса, ораза да дәл солай орны бөлек құлшылыққа жатады. Алланың алдында да жекелей құлшылықтарға сұраламыз. Сондықтан намаз оқуға мүмкіндігі жоқ не оқи алмайтын жандар болса, Рамазан айында ораза ұстай беруіне ешқандай шектеу жоқ. Ал сілекейді жұту жайына келер болсақ, әр кезде оны «түкіру» ислам әдебіне жатпайды. Сол үшін де оны жұту оразаны бұзбайды.– Турасын айтсақ, әлі күнге дейін ораза туралы түсінік әркімде әрқалай. Әсіресе, бірінші мәрте ораза тұтқан жанға көп кеңес керек сияқты. Осы ретте, оразаны не бұзады, не бұзбайды?– Әрине, оразаны әркім әрқалай мақсатта ұстайды. Себебі бірі дос-жаранына еріп ұстанса, екіншісі отбасы, ет-жақындарына еріп ұстап, сол кісілермен мақсаттас болады. Бірақ жоғарыда тоқталғандай оны Алланың разылығы үшін ұстаған жөн. Оразаны әдейі ішіп-жеу мен отбасылы жандарға аузы берік кезінде жақындауы, ал бойдақтардың зинаға баруы бұзады. Сондай-ақ адам бойына күш-қуат беретін дәрі-дәрмек, екпелер де кедергі болады. Ал оразаны бұзбайтын амалдарға асты ұмытып ішіп қою, түтін, шаңды жұту мен қан алдыру сынды әрекеттер жатады.– Белгілі бір себептермен ораза ұстай алмаған жандардың жайы қалай болмақ?– Кімде-кім ораза ұстауға белгілі бір себептермен мүмкіндігі болмаған жан жақсы да игі амалдар жасауға тырысқаны жөн. Имам Муслим жеткізген риуаятта Алланың елшісі (Алланың оған игілігі мен сәлемі болсын) былай дейді: «Адам баласының әрбір іс амалы оннан жеті жүз есеге дейін көбейтіледі», яғни әрбір амалымызға осыншама нығметтер беріледі екен. Ізгі амалдың сауабының еселенуі оның орындаған уақытына байланысты. Мысалы, зулхиджа айының алғашқы он күндігінде және рамазан айында жасалған қайырлы істердің мәртебесі биік. Бір хадисте «Қай садақа қайырлы?» – деп сұраған кісіге Пайғамбарымыз (Алланың оған игілігі мен сәлемі болсын): «Рамазан айында берілген садақа», – деп жауап берген. Олай болса ұлық айдың осындай шарапатынан құр қалмауы керек.– Биыл пітір садақаның мөлшері қандай?– Осы жылы елде пітір садақасының мөлшері әрбір үй мүшелерін жекелей алғанда 535 теңге болып бекітілді. Садақаны бидай, құрма, мейіз көлемімен өлшеп берсе де болады.– Айлардың сұлтаны Рамазанда барша аудан тұрғындарына білдірер ыстық ықыласыңыз…– Барша аудан тұрғындарын қасиетті Рамазан айымен шын жүректен құттықтаймын. Алла осы айға аман-есен жету мен берекесіне кенелуді жазсын. Әр отбасыға бақ-береке беріп, еліміз аман, жұртымыз тыныш болсын!– Қасиетті Рамазан айы барша мұсылманға мүбәрак болсын! Әңгімеңізге рахмет!

Берік Сүлейменов: Барлық талапқа сай болып орындаған абзал

<a href="https://kyzylorda-news.kz/">Kyzylorda-news.kz.</a> Тіл үйірер тәттілер. Сауда қатарында кім-кімді де еліктірмей қоймайтын мұндай тәттінің өтімділігі де жоғары. Дегенмен біздің дүкендерде көбіне сырттан тасымалданаты өнімдер болғандықтан бағасы да соңғы кездері әжептәуір өскен. Осыны ескерген жақсықылыштық кәсіпкер Ақбота Оңғарбайқызы өзінің кондитерлік өнімдер шығаратын цехынан пірәндік шығара бастады.Кәсіпкер болуды қолға алған Ақбота Бегенбетова 2019 жылы «Бастау» кәсіпкерлерді қолдау орталығында кәсіпкерлер даярлау курсынан өтеді. Осылайша мемлекет тарапынан кәсіпкерлерге берілетін қайтарымсыз грантты жеңіп алған. Сол арқылы өзнің кондитерлік кафетерий кәсібін бастаған. Кейіннен мемлекеттен кәсіпкерлерге берілетін пайыздық мөлшерлемесі аз несие алып, кәсібін жандандыра түседі.&nbsp;<blockquote>Негізгі мамандығым – технология пәніннің мұғалімі. Бірақ ол бойынша қызмет еткен жоқпын. Түрлі тәттілер пісіру менің болмысыма жақын болды. Бұл қызығушылықтан туған кәсіп деп айтсам да болады. Бастапқыда отбасылық жиын-тойларға пісіріп жүрдім. Кейіннен біртіндеп тапсырыс келе бастады. Сонан соң осы кәсібімді қолға алуға шешім қабылдадым. Осылайша кәсіпкер болып шыға келдім, – деп бастады әңгімесін Ақбота Оңғарбайқызы.&nbsp;</blockquote>Кәсіпкер ең алдымен кондитерлік кофетерие ашқан. Онда адамдар демалып түрлі тәттілермен шәй ішіп, тез дайындалатын фас-фут тағамдарды тұтына алады. Ал одан бөлек тәттілер шығаратын чехтың жұмысы қайнап тұр.&nbsp;<blockquote>Бұрын ауыл ішіне көрші ауылдарға тапсырыспен түрлі тәтті торттар, самса, тоқаш сынды дастарханның шырайын кірргізетін өнімдерді дайындайтынмын. Жақынан бастап прәндік пен коржок дайындауды неге байқап көрмеске деген ой туды. Ақыры бұл істі де қолға алдым. Қазір Арал қаласындағы оннан астам дүкенді осы өнімдермен қамтамасыз етіп отырмыз.&nbsp; Сұраныс жоғары, - дейді кәсіпкер.&nbsp;</blockquote>Расымен де қазір «жақсықылыштың прәндігі» деген сөзді жиі естейтін болдық. Дәмі ерекше бағасы қалтаға қонымды тәттіні іздеп жүріп алатындар көбейген. Соның арқасында Ақботаның кәсібі де дөңгелене түсті. Қазір 3 адамды тұрақты жұмыспен қамтып отыр.&nbsp;<blockquote>Бұрындары үлкендер береке нанда деп айтушы еді. Сол сөздың растығына көзім жетті. Ошағымыздан күнде тәтті наның иісі шыққандықтан болар аллаға шүкір несібеміз еселеніп келіуде. Бастысы ол емес. Қазіргідей қымбатшылық заманы орнап тұрған шақта халыққа сапалы, тойымды, әрі арзан тағамдар тұтынуға өз септігімізді тигіссек дейміз. Ал нәпақамызды алла пейілімізге қарай береді, - дейді ол.&nbsp;</blockquote>Кәсіптен береке тауып отырған нәзік жанды ана көпке үлгі боларлық. Жолдасы Әділбек екеуі өмірге әкелген үш баласын жетілдіріп, жеткізіп немере сүйіп отырған жайы бар.&nbsp;<blockquote>Біз балаларымызға үлгі бола білуіміз керек. Жолдасым Әділбек мектепте мұғалім. Ер адамның ас-ауқаты дайын, сырт келбеті мінсіз болуы керек. Әрине әйел ретінде оған тікелей жауаптымын. Ал өз ісіме шын пейілмен кірісу артық шығынсыз дәмді дүние шығарудың алғы шарты болмақ, – деді.&nbsp;</blockquote>Кәсіптің көзін тауып, берекелі тұрмыс кешіп отырған осындай іскер, қарапайым отбасылар біздің мемлекетіміздің гүлденуінің кепілі. Ақбота Бегенбетова &nbsp;кәсіпкер әйел, асыл жар, бақытты ана тіркестеріне сай келетін жан екендігін өз ісімен дәлелдеп жүрген жан. Қоғам осындай нәзік жандылармен мақтанады.

Қазақстан және Қызылорда облысының жаңалықтары