<a href="https://kyzylorda-news.kz/">Kyzylorda-news.kz.</a> Жалағаш ауданындағы 124 орта мектептің мұғалімі Зухра Тоқшылықованың білім саласында 25 жылға жуық тәжірибесі бар. Ол – бүгінде аудандағы білікті педагогтарының бірі де бірегейі. Ұзақ жыл ұстаздық қызмет атқарған ол ауыл мектебінде еңбек жолын бастап, бүгінде әлі де сол білім ошағында бәсекеге қабілетті ұрпақ қалыптастыруға үлкен үлес қосуда. Нәтижесін һәм жетістігін тарқатсақ, жазатын дүние көп. Бастысы, шәкірт тәрбиелеп, бәсекеге қабілетті ұрпақ қалыптастыруда еткен еңбегі еш кетпеген.Жиырма үш жылда білікті педагог екі сыныпқа жетекшілік еткен. Сынып жетекшісінің айтқан ақылы мен берген тәлімінің жемісі болса керек, қазіргі таңда Зухра апай жетекшілік еткен оқушылардың басым бөлігі түрлі салада қажырлы еңбек етсе, бірқатары әлі де жоғары оқу орындарында мемлекеттік грантпен білім алып жатыр екен.&nbsp;«Шәкірттеріміз қандай жетістікке жетсе де, біз еңбегіміздің еш кетпегенін біліп марқаямыз» деген Зухра Досымқызының әрбір оқушының тәлім-тәрбиесіне өзінің баласындай қарайтынын айқын аңғардық. Мектеп директорымен сұхбаттасқанымызда озат 3 оқушының шәкіртақы алатынын айтқан. Соның екеуі бүгінде Зухра апай жетекшілік ететін сыныпта оқиды екен.&nbsp;– Баламен тек мұғалім болып жұмыс жасайтын уақыт артта қалды. Кейде олардың ата-анасындай сөйлесіп, пікіріне құлақ асуға тура келеді. Кез келген баланың шамшырағын жағуға болады. Оқымайтын бала болмайды. Ондай балалар қадағалаудың, еркін пікір алмасудың кемдігінен қалыптасады. Осыған дейін қаншама балаға білім беріп, еңбек өтілімізде біраз тәжірибе жинадық. Соның барлығын енді оқушыларымыздың болашағына жұмсап жатырмыз. «Бала жаман болса, ата-анасын түйе үстінен ит қабады» деген сөз бар. Мен үшін бұл тек ата-анаға қаратып айтылған сөз емес. Біз де оқушы тәрбиелеп отырғаннан кейін олардың болашағына ата-анасындай қараймыз. Сондықтан оларға жаман сөз келмеуі үшін мейлінше біліммен қатар тәлім-тәрбие де береміз, – дейді мектеп мұғалімі.Зухра Досымқызы – бүгінде Есет батыр ауылындағы мектепте 6 сыныптың жетекшісі. Қазақ тілі мен әдебиет пәнінен сабақ береді. Мақалдатып, сөзді орнымен қолданатынына қарап, оның қай пәннің мұғалімі екенін аңғару қиын емес. Барлық баладан озат оқушы қалыптастыруды дәстүрге айналдырған ұлағатты ұстаздың өз мамандығына, жұмысына адалдығы көрініп-ақ тұр.Зухра Досымқызының 23 жылдық еңбек өтілінде ауылдағы алтын ұядан түлеген 11 оқушы қазақ тілі мен әдебиеті пәнінің мұғалімі болуға талап қылыпты. Олардың да ұлағатты ұстаздан алған білімі еш кеткен жоқ. Қазіргі таңда олардың басым бөлігі мемлекеттің дамуына қажырлы еңбек етуде. Былтыр Аламесектегі №124 орта мектептің 2 түлегі тағы да қазақ тілі мен әдебиеті пәнін таңдаған. Қазіргі таңда олардың мектеп қабырғасында жүріп-ақ түрлі деңгейдегі олимпиадалық жарыстарда жеткен жетістігін айтып тауыса алмайсыз. Тіпті бір оқушысы 4 жыл қатарынан олимпиадаға қатысып, барлығында жүлделі орындардан бой көрсетіпті. Сондай-ақ ол былтыр Түркістан облысындағы Қожа Ахмет атындағы халықаралық қазақ-түрік университетінің ішкі грантын жеңіп алған. Алайда мектеп оқушысы Қарақат Аманкелді оған тоқмейілсімей, ҰБТ-ға қатысуға бел буған. Ұлттық бірыңғай тестілеудің қорытындысымен Қарағандыдағы мемлекеттік университетке мемлекеттік грантпен оқуға түсіпті. Бір емес, екі грантты қатар жеңіп алатын шәкіртті кез келген мұғалім дайындай алмайтыны тағы да анық. Осы ретте оның біліктілігіне, жаңа жоғарыда айтқандай, барлық оқушыға өз баласындай қарайтынына күмәнмен келтіре алмайсыз.&nbsp;– Барлық оқушымның болашағынан үлкен үміт күтемін. Жаңа айтып кеткен шәкіртім Қарақат Аманкелдінің өзі мектеп қабырғасында жүріп, қаншама жетістікке жетті. Қазіргі таңда мемлекеттік университетте грантпен білім алып жатқан қызымыз бір жағынан сондағы кітпханалардың бірінде жұмыс жасап жатыр. Жұмыспен оқуды қатар алып жүргенін мен оның үлкен ізденісімен байланыстырамын. Тағы бір шәкіртім Көкшетау қаласындағы мемлекеттік университетте былтыр грантпен оқуға түсті. Оның да жетістігі көп. Осындай балаларымызға қарап, қуанамыз, еткен еңбегіміздің ақталғанына марқаямыз, бірақ тоқмейілсу – өзіме жат әдет, – дейді Зухра Досымқызы.Зухра Тоқшылықованың тоқмейілсімейтініне біз де толық көз жеткіздік. «Қайтсем, шәкірттерім қалаған мамандығын игеріп, мына қоғамға, мемлекеттің дамуына өз үлесін қосады?» деген сауалды ол өзіне күн сайын қояды. Ал жауабын еңбекпен табатынына, әр жылдары мектеп бітірген, білім ошағындағы шәкірттерінің жетістігінен шабыт алатынын тағы байқадық. Кейіпкеріміздің &nbsp;расында бір салада тапжылмай 23 жыл еткен еңбегі еш кетпеген. Мәртебелі мұғалімнің осыған дейінгі қажырлы еңбегі мемлекет тарапынан да лайықты бағаланды. Қазір оның алған алғыс хаттарын, дипломдарын да айтар болсақ, тағы да жазатын дүние көп. Бастысы, білікті мұғалімнің оның барлығына лайық екеніне күмәніміз жоқ.

Оқушылары озат ұлағатты ұстаз

<a href="https://kyzylorda-news.kz/">Kyzylorda-news.kz.</a> &nbsp; Сырдария ауданында жол саласының жұмыстарына аудандық тұрғын үй-коммуналдық шаруашылық, жолаушылар көлігі және автомобиль жолдары бөлімі жауапты болып табылады. Жыл сайын аудан көлемінде халыққа жақсы жағдай жасау үшін жол жөндеу жұмыстары жоспарлы жүргізіліп келеді.Жуырда аудан әкімі Берік Сәрменбаевпен бірге аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Нұржан Бисембаев Тереңөзек кентінде атқарылып жатқан жұмыстарды көрген болатын. Бүгінгі таңда аудан орталығында Д.Қонаев көшесі бойында жөндеу жұмысы жасалуда. Бұл жұмыстарды «Айзон» мердігер мекемесі атқаруда. Жоба бойынша аталған көшенің А.Әлиакбаров көшесінен Н.Ілиясов көшесіне дейінгі аралық, яғни 1,32 шақырым автомобиль жолына асфальт қабаттары төселетіндігін айта кетейін.Аудан басшысы қазіргі кездегі көше жолының екі жиегіне жол жиек тастарын орнату жұмыстарын көріп, мердігер мекеме өкілімен тілдесті. Мердігер мекеме басшысына атқарылып жатқан жұмыстардың сапалы әрі уақытылы жүргізілу керектігін жеткізді. Сондай-ақ бөлім мамандарына жұмыстардың сапалы атқарылуын тұрақты бақылауда ұстау керектігін назарға салды.Көше жұмыстары барасында бөлім басшысы Н.Бисембаев аудан әкіміне жол жөндеу саласында биыл атқарылатын жұмыстарды атап көрсеткен болатын.<blockquote>2023 жылдың 1 қаңтарына аудандық маңызы бар автомобиль жолдарының жақсы және қанағаттанарлық жағдайы 98 пайызды құрады. Биыл «Қызылорда-Қоғалыкөл-Шіркейлі» автожолының 5 шақырымына орташа жөндеу жұмыстары жүргізілетін болады. Жоба іске асқан жағдайда аудандық маңызы бар автомобиль жолдарының жақсы және қанағаттанарлық жағдайы 99 пайызды құрамақ. Биыл аудан бойынша жол саласына 29 жобаға 1 млрд теңге қаржы бөлінді. Соған орай 29,8 шақырым автомобиль жолдары жөнделеді. Оның қатарында Тереңөзек кенті және елді мекендер бойынша 24 шақырым, аудандық маңызы бар автомобиль жолдары бойынша 5,8 шақырым жол жөндеуден өтетіндігін ескертейік. Биыл Тереңөзек кентінде 12 көшеге орташа жөндеу жұмыстарын жүргізу жоспарланды. Атап айтқанда, Қ.Бөдеев, Ә.Тоқмағамбетов, Ә.Тәжібаев, А.Әлиакбаров, Айтбай арық, Д.Қонаев, Б.Момышұлы 1,2,3,4,5,6 көшесін жөндеуге мердігер мекемелер анықталып, тиісті жұмыстар жасалуда. Ал А.Тоқмағамбетов 2,4,5,6, Б.Өтепов, С.Усабаев, Ә.Найзабаев, Т.Қозыбаев көшелері бойынша мемлекеттік сатып алу жұмыстары жүргізілуде, – деді Н.Бисембаев.</blockquote>Айта кетейік, ауданға қарасты елді мекендерде жалпы ұзындығы 234,31 шақырымды құрайтын 223 көше бар. Асфальтты жол 170,80, қиыршық тасты жол 34,18, топырақты жол 29,33 шақырымды құрайды. Елді мекендер көшелері бойынша автомобиль жолдарының жақсы және қанағаттанарлық жағдайы – 66,5 пайызды құрайды.<blockquote>Негізінен, аудан әлеуетін арттыру мақсатында тың жобалар жүзеге асырылып жатқандығын көзімізбен көріп жүрміз. Тереңөзек кентінің көшелері жөндеуден өткізілсе дән риазамыз. Жолымыз тақтайдай тегіс болғаны жолдағы қозғалысты реттейтіні жасырын емес. Бұрыннан келе жатқан, тозығы жеткен жолдар жөнделсе, кент көшелерінің келбеті келісті болмақ. Біз сырттан келген ағайын-туысымызға ауданның көркейту-көгалдандыру жұмыстары жасалатындығын, тұрақты түрде жолдар жөнделетінің жарыса айтамыз, – дейді кент тұрғыны Аябек Сардарбеков.&nbsp; &nbsp;</blockquote>

Сырдарияда жол жөндеу жұмыстары қарқын алуда

<a href="https://kyzylorda-news.kz/">Kyzylorda-news.kz.</a> Қазақ әдебиетінің көрнекті өкілі, халқымыздың руханиятын жаңа сапалы биікке көтеруге мол үлес қосып, артына елеулі қазына қалдырған қаламгер, жазушы, ақын, аудармашы Қалмақан Әбдіқадыровтың туғанына биыл 120 жыл толды.Тумысынан тұлғасы бөлек, өлең жырға деген құштарлығы ерекше әдебиеттің асқары іспеттес тұлғаның өмірі де, өзі де дара, дана. Алғашқы еңбек жолын «Еңбекші қазақ» газеті редакциясынан бастаған ақын тұңғыш өлеңін 1925 жылы осы газет бетіне жариялайды. Жүрек түбіндегі жырға деген іңкәрліктің оянуына да аталмыш газет редакциясы сеп болады. Жалынды жырларын жиып, тұңғыш өлеңдер жинағын «Жалшы» деген атаумен 1928 жылы басып шығарады.Сонымен қатар, 1935-1951 жылдар аралығында жазылған «Май», «Батыр», «Сәтбаев», «Еділ-Дон», «Келес қызы» поэмалары нақты өмір шындығынан алынып, ерлік пен өнегелі істерін бейнелеген нағыз туынды. Ал, қазақ тарихындағы тұңғыш кәсіпқой балуан Қажымұқан Мұңайтпасұлы жайындағы «Қажымұқан» повесі 1954, 1956, 1959 жылдары қайта басылса, 1970 жылы орыс тілінде жарық көреді. Поэзия әлемінен бөлек, балалар әдебиетін дамытуға да айтарлықтай үлес қосқан Қ.Әбдіқадыров «Алатаудың бауыры», «Амантай», «Тапқыш», «Тәтті қауын» кітаптарын жазып шығады. Ел жадында сақталған Ұлы Отан соғысы жылдарында қан майданның ортасында жүріп жазған өлеңдері «Серт» атты жинаққа енеді. Төрт томдық «Мың бір түнді» тікелей парсы тілінен тәржімалаған да біздің жерлесіміз Қ.Әбдіқадыров болатын. Оның аудармасы әлемдік әдебиеттің алтын қазынасына жататын ең үздік нұсқалардың бірі болып табылды.Қаламынан құнды дүниелер туып, әлем әдебиетін тәржімалаған жазушы жауынгерлік «Қызыл жұлдыз» орденімен марапатталған. Бүгінде Қарғалы ауылдық округі, Бұланбайбауы ауылындағы орта мектеп Қалмақан Әбдіқадыровтың есімімен аталады. Жуырда осы &nbsp;аталған мектеп ұжымы ақынның мерейтойын аудандық деңгейде атап өтті. Оған аудандық білім бөлімінің әдіскері Ә.Тәжиева, оқушылар үйі директорының оқу-тәрбие ісі жөніндегі орынбасары Р.Жолтаев, №241 мектептің директоры Д.Ахбенбетов және ақынның көзін көрген қарияларымен туыстары &nbsp;қатысты.Шара барысында &nbsp;жергілікті жерден шыққан қазақ әдебиетінің көрнекті өкілі, жазушы, ақын, аудармашы &nbsp;Қалмақан Әбдіқадыров жайлы &nbsp;кейінгі ұрпаққа насихаттай отырып, оның &nbsp;өмір жолын, еңбегі мен шығармашылығын халыққа кеңінен таныстыру мақсатында «Сырдың сырбаз саңлағы» атты аудандық ғылыми-практикалық конференция мен жазба ақындар мүшәйрасы ұйымдастырылды.Жыр додасына ауданның онға жуық білім ордасынан ұстаздар қауымы қатысып, нәтижесінде бас жүлдені №241мектептің мұғалімі Б.Доситяров, І орынды №150 мектептің мұғалімі Ф.Алтынбекқызы, ІІ орынды №127 мектептің мұғалімі &nbsp;К.Абилкайрова мен №156 мектептің мұғалімі М.Ермекбаева ІІІ орынды №84 негізгі мектептің мұғалімі Г.Калтаева мен &nbsp;№157 мектептің мұғалімі П.Ержігітовалар иеленді. Ал ғылыми-практикалық конференцияға қатысқан ұстаздарға алғыс хаттармен бағалы сыйлықтар табысталды.Кеш соңында Р.Жолтаев «Қалмақан атамызға» арнаған арнау жырын домбырамен әнге қосса, мектеп оқушысы Г.Болатова өзі жазған өлеңін оқып, көрермендерді тәнті етті.

Қаламгер Қалқаман Әбдіқадыровтың туғанына - 120 жыл

<a href="https://kyzylorda-news.kz/">Kyzylorda-news.kz.</a> Бұл – Жалағаш ауданы Аламесек ауылдық округіндегі №124 орта мектеп, Шалғай ауылдағы мектепте білім сапасын арттыру мақсатында бірқатар жоба қолға алынған. Қуантарлығы, бүгінде олардың барлығы жемісін беріп, ауылдағы атын ұяда озат оқушылар қатары артқан. &nbsp;Иә, біз білім саласына бұған дейін де қалам тербедік, мемлекет келешегі бәсекеге қабілетті жастардың болашағына тікелей байланысты болғандықтан әр жылдары салада атқарылған жұмыстар ұдайы сарапталуы тиіс. Қазір мектеп директорларын ротациямен орындарын ауыстыру басталып кетті. Мақсат айтпаса да түсінікті, яғни тәжірибе алмасу арқылы білім берудегі олқылықтарға жол бермей, керісінше қалыптасқан серпінді одан әрі ілгерілету. Алайда бұл жоба өз жемісін беріп жатыр ма? Ротациямен жаңа мектепке барған директорлар білім жүйесіне нендей жаңалықтар енгізуде және оның жемісі қалай? Осы және өзге де сауалдардың түйінін тарқату үшін тілшілер тобы ауылдық елді мекендердегі мектеп тысыеымен танысып, жұмысын сараптауда. Бүгін жолымыз Жалағаш ауданына қарасты Есет батыр ауылына түсіп, орталықта орналасқан №124 орта мектепке табан тіредік.&nbsp;Шынар Халелқызының мұнда директор болып келгеніне көп болмаған. Яғни биыл ауыл мектебі жаңа оқу жылын жаңа директормен бастапты. Есет батырдағы білім ошағында бүгінде 354 оқушы білім алуда. Оның ішінде 42 оқушы алғаш мектеп табалдырығын аттаса, ауылдағы алтын ұяда 68 мұғалім бар. Бәсекеге қабілетті жастарды қалыптастыру жұмыстары біріші мектепте басталатындықтан оларға сапалы білім беру ұлағатты ұстаздардың ұдайы назарында. Шынар Халелқызы бұл бағытта жүйелі жұмыс жасап жатқан әріптестерімнің еңбегін жоғары бағалайды.&nbsp;– Қазір заман ағымына қарай кез келген жұмыс жүйесіне жаңалық қажет, оны өздеріңіз де білесіздер. Маған дейінгі мектеп директорының кемшілігін байқамадым. Бұған дейін де ауыл мектебінде білім сапасына серпін беруде тиісті жұмыс атқарылған. Бұл ротацияның мақсатын тек кемшіліктің орнын толтыру деп түсінбеуіміз керек, бұған дейін де Жалағаш ауданында ерекше қарқынмен дамыған бір сала болса, ол – &nbsp;білім. Біз енді осы қарқында қалып қоймай, керісінше әлі де ілгерілеу үшін жаңа бастамалармен жұмыс жасауымыз керек, салаға мұндай өзгерісті сол үшін енгізді деп есептеймін. Былтыр 32 түлек мектеп бітірген, оның 26-сы ҰБТ-ға қатысқан. Орташа балл – 75. Түлектердің 23-і мемлекеттік грантпен жоғары оқу орындарында білім алуға қол жеткізді. Ал қалғаны ақылы негізде оқуға қабылданған. Бір сөзбен айтқанда, былтыр мектеп бітірген оқушылар 100 пайыз жоғары және арнаулы оқу орындарында білім алуға қол жеткізген, – дейді мектеп директоры.&nbsp; Айта кетейік, биыл Жалағаш ауданындағы №124 орта мектепте 354 оқушының 22-сі 11 сыныпты тәмамдайды. Бұйыртса, барлығы да 100 пайыз ҰБТ-ға қатысуға ниетті. Олардың Ұлттық бірыңғай тестілеуге қатысу-қатыспауы өз еркінде. Ұстаздар мен түлектер дайындықты қыркүйек айында бастапты. Балалардың қарқыны жаман емес. «Үйрек балапанын күзде санайды» дегендей, директор нәтижесін алдағы уақыттың еншісіне қалдырды.&nbsp;– Меже барлық баланың мемлекеттік грант иегері болуына жұмыс жасау ғой. Алдағы уақытта сол межеге жұмыс жасауға тырысамыз. Мектеп түлектерін негізінен қандай пәндер, қандай мамандықтар қызықтырады, біз алдымен осы жағын зерттеп аламыз. &nbsp;Балаларымыздың басым бөлігі жараты¬лыстану бағытындағы пәндерді таңдап отыр. Көбісі химия, биология, физика пәндерін таң¬дауда. Оларға «Сен мына мамандыққа қарағанда басқасын таңда» дей алмаймыз. Бала қай пәнді, қай мамандықты таңдаса, сол салада оның үлкен жетістікке жетуіне әріптестеріммен шама-шарқымша жұмыс жасаймын. Себебі мақсатымыз да сол, мейлінше олардың қалаған мамандық иегері болып, мемлекеттің, қоғамның дамуына сүбелі үлес қосатын бәсекеге қабілетті болуына жұмыс жасау, – дейді Шынар Халелқызы.&nbsp;Мектептегі оқушылардың түрлі деңгейдегі олимпиадаларға, жарыстарға қатысу қарқыны да жоғары, нәтиже де жоқ емес. Жалпы, білім ошағында озат оқушылар санында өсім бар. Олардың қатарын көбейтуде бірқатар жоба да қолға алынған.&nbsp;– Балалардың олимпиада, байқау секілді түрлі деңгейдегі жарыстарға қатысу қарқыны жоғары. Нәтиже де жаман емес. Аудандық, облыстық деңгейдегі жарыстарда топ жарып жүрген оқушыларымыз да жетерлік. Мұның барлығы осындағы ұстаздардың еңбегі мен шәкірттер ізденісінің арқасы деп білемін. Мектепте 3 озат оқушымыз болған, енді олардың санында өсім қалыптастыруымыз керек болатын. Бұл бағытта жергілікті кәсіпкерлермен, шаруашылық төрағаларымен ақылдасып, демеушілер есебінен оларға шәкіртақы тағайындауды қолға алғанбыз. Бұл жобаға ауылдағы «Көктөбе» шаруашылығының негізін қалаған Әбдірасулла Әбдәлиев ағамыз қаржылай қолдау көрсететінін айтты. Сондай-ақ білім саласында ұзақ жылдар қажырлы еңбек еткен осы ауылдың тумасы Гүлбану Орынбаева да әкесінің атынан шәкіртақы тағайындауды жөн деп тапты. Оларға алғыстан басқа айтарымыз жоқ. Білімге, жас ұрпақтың келешегіне, мемлекеттің болашағына алаңдайтын жағдайы бар азаматтар осындай-ақ болсын. Қазір сол кісілердің арқасында мектептегі 3 озат оқушымыз қаңтардан бастап айына 5 мың теңге көлемінде шәкіртақы алып отыр, – деді мектеп директоры.Иә, бұл – жақсы бастама, оған дау жоқ. Мұның озат оқушылар санында өсім қалыптастыруға сеп болары сөзсіз. &nbsp;Оның білім саласына айтарлықтай көмегі тигенін мектеп директоры да жоққа шығармады.&nbsp;– Біз ол қаржыны тек озат оқушының өзіне жай бере салмаймыз. Барлық оқушылардың басын қосып, озаттарды үлгі етеміз. Оның да нәтижесі бар. Мәселен, қаңтар айында озат оқушылар үшеу болса, бір тоқсанда олардың санында өсім қалыптасып отыр. «Олар да алдағы уақытта мұндай шәкіртақы ала ма?» деген заңды сауал туындайтыны сөзсіз. Немесе ертең «жай сөз екен, ізденіп не істейміз» деген кейбір балаларда таяз түсінік қалыптасуы да мүмкін ғой. Қазірдің өзінде «біз де шәкіртақы тағайындасақ» деген кәсіпкерлерден, жеке азаматтардан ұсыныс түсіп жатыр. Сондықтан алдағы уақытта оларға да шәкіртақы тағайындауға жол ашылады деп ойлаймын.&nbsp;Мәселен, қазірдің өзінде ауылдағы Сыздықовтар отбасы «бір озат оқушы болса, шәкіртақысын өзіміз берейік» деп ұсыныс айтып отыр. Ауыл әкімі Дәулет Тәжібаев та 2-3 оқушыға шәкіртақы тағайындауға дайын екенін айтып жатыр. Қазір озат оқушылар санында өсім бар. Енді оларға шәкіртақы төлейтін кезде демеуші азаматтармен жұмыс жасап, бұл жобаны қолға алсақ дейміз, – деді білім ошағының басшысы.Қазір ресми ақпараттардан, әлеуметтік желілерден жасөспірімдер арасында орын алған қылмыстың жиілегенін байқау қиын емес. Оның алдын алуда ауыл мектебінде бірқатар жұмыс жүруде. Жалпы, баланың болашағына тек ұстаздар ғана жауапты емес, бұл мәселеге ата-ана да, учаскелік полиция инспекторы да алаңдауы тиіс. Бірақ мектеп ұжымы олардың арасында қылмыстың алдын алуда шама-шарқынша жұмыс жасап жатыр.&nbsp;Ауылда жасөспірімдер арасында ахуал тұрақты. Күнделікті мұғалімдермен кезекшілік ұдайы ұйымдастырылып тұрады. Әрқайсысының өзіне берілген көше бар, жасөспірімдердің ата-анасыз қоғамдық орында тек белгіленген уақытта ғана жүруіне рұқсат бар. Бұл дұрыс деп есептеймін. Бұл талап ауылда қатаң сақталған.&nbsp;– Менің ойымша жастарда бос уақыт болмауы керек. Олар да ұдайы ізденіс үстінде жүрсе дейміз. Бәсекеге қабілетті ұрпақ осындай жастардан қалыптасады. Ал баланың олай өсуіне жоғарыда айтқанымдай, бәріміз жұмыла жұмыс жасауымыз керек. Баланың болашағына бейжай қарауға болмайды. Ал мұндай түсініктегі ата-ана оған жол бермейді деп ойлаймын.&nbsp;Мұнан бөлек ата-аналар жиналысы да ұдайы ұйымдастырылып тұрады. сондай-ақ балалардың өзімен де жиі бас қосып ұлдармен, қыздармен жеке-жеке пікірлесеміз. Сонда байқайтыным, балалар жиналыстың мақсатын кейде өздері де біліп тұрады. Олардың әлеуметтік желіден қоғамдағы жағдайлардан хабардар екенін аңғару қиын емес. Біз үшін әр баланың түзу жолмен жүруі, бәсекеге қабілетті, мақсатты болуы маңызды. Сондықтан олардың тәртібі де біздің күн тәртібімізден түскен емес, түспейді де, – деді Шынар Халелқызы.&nbsp;Мектепте 1-4 сынып аралығында 133 бала бар. Олар 100 пайыз ыстық тамақпен қамтамасыз етіледі. Директордың өзі бұл бағыттағы жұмыс барысын қадағалап отырады. Ата-аналардың немесе оқушылар тарапынан әзірге ешқандай арыз-шағым түспеген. Оған алдағы уақытта да жол бер-мейтін сияқты. Керісінше ата-аналардан баласының оған көңілі толатынын-толмайтынын ұстаздар сұрап отырады екен.&nbsp;– Аламесектегі білім ошағы 2 корпустан тұрады, оның бір бөлігі жаңадан салынған. Ал бір бөлігі – бұрынғы нысан. Оның сапасына қатысты мәселе бұған дейін болған. Бірақ мемлекет тарапынан қолдау болып, аталған нысан күрделі жөндеуден өткен. Қазір ғимарат сапасына қатысты ешқандай мәселе жоқ.

Жалағашта озат оқушылар шәкіртақы алатын орта мектеп бар

<a href="https://kyzylorda-news.kz/">Kyzylorda-news.kz.</a> Синоптиктер 18-20 сәуірге арналған ауа райы болжамын ұсынды.Қазгидромет мәліметінше, Қазақстанның басым бөлігінде атмосфералық фронтальды учаскелердің өтуіне байланысты ауа райының тұрақсыз сипаты сақталады. 18 сәуірде шығыста - қалың қар, 18-19 сәуірде оңтүстік-шығыста кей уақытта қатты жауын-шашын (жаңбыр, қар) жауады.<blockquote>«18-20 сәуірде солтүстік-батыс антициклонның әсерінен Республиканың солтүстігінде, орталығында, шығысында ауа температурасы 7-15 градус аязға дейін төмендейді. Батыста, оңтүстік-батыста, оңтүстікте, оңтүстік-шығыста түнде аяз болып, тәуліктік температура біртіндеп көтеріледі», - делінген хабарламада.</blockquote>Барлық облыста жел күшейіп, тұман болады. Оңтүстікте шаңды дауыл соғып, найзағай ойнайды, солтүстікте, солтүстік-батыста, орталықта, шығыста көктайғақ болып, қар жауады. &nbsp;

Алдағы күндері ауа райы қандай болады?

<a href="https://kyzylorda-news.kz/">Kyzylorda-news.kz.</a> Жылжымайтын мүлік желісі бойынша мемлекеттік қызметтер қазақстандықтар үшін 2023 жылғы 26 сәуірден бастап 9 мамырға дейін қолжетімді болмайды.«Жылжымайтын мүліктің бірыңғай мемлекеттік кадастры» жаңа ақпарат жүйесіне көшуіне байланысты жылжымайтын мүлік желісі бойынша қызметтер көрсетуге өтінімді қабылдау уақытша тоқтатылады.Мемлекеттік корпорация 2023 жылғы 26 сәуір мен 9 мамыр аралығында еліміздің ХҚКО-ларында жылжымайтын мүлікке құқықтарды (ауыртпалықтарды) мемлекеттік тіркеу, міндетті тіркеуге жатпайтын жылжымалы мүлікті тіркеу және жылжымайтын мүлік объектілерін техникалық тексеру саласында қызметтердің барлық түрлерін көрсетпейтінін хабарлайды. Қағаз жеткізгіштерде қызметтің орындалуы, әрі құжаттарды жеткізу мерізімінің ұзақтығына байланысты ХҚКО-ларда көрсетілетін қызметтерді қабылдау eGov.kz-тен бұрын тоқтатылады. Айта кетейік, қызметке 26 сәуірге дейін тапсырыс берген азаматтар нәтижені көрсетілген мерзімде ала алады. &nbsp;Сонымен қатар, биыл 2-9 мамыр аралығында eGov.kz порталы арқылы жылжымайтын мүлікті ресімдеуге әрі техникалық тексеруге құжаттарды онлайн қабылдау, нотариустар, салық жүйелері арқылы, екінші деңгейдегі банктер және ҚР Әділет министрлігінің атқарушы органдарының жүйелері бойынша қабылдау тоқтатылатынын атап өтеміз. Одан бөлек, көрсетілген кезеңде азаматтар тұрғын үй бағдарламаларына байланысты қызметтерді пайдалана алмайды.&nbsp;<blockquote>«Жаңа жүйеге көшу мереке күндері ұйымдастырылады. Айта кетейік, ЖМБМК-ға көшу кезінде жер учаскелерін ресімдеуге байланысты барлық өмірлік жағдай кезең-кезеңімен цифрланады. Одан бөлек, мемлекеттік қызметтердің барлық спектрін көрсету, оның ішінде жаңа және қолданыстағы учаскелер бойынша түзету енгізу мүмкіндігі көзделген. Сондай-ақ, сыбайлас жемқорлық қаупіне жол бермеу мақсатында жер учаскелері мен жылжымайтын мүлікті ресімдеуі заңнама тұрғыда қарастырылатын болады», - деді, Мемлекеттік корпорацияның басқарма төрағасы Сүйеніш Әбділдин.</blockquote>Еске сала кетейік, 2023 жылдың 5 сәуірінде «Қазақстан Республикасының кейбір заңнамалық актілеріне жер қатынастарын дамыту мәселелері бойынша өзгерістер мен толықтырулар енгізу туралы» заңға қол қойылды. Мемлекеттік корпорация жер қатынастары саласында мемлекеттік қызметті көрсетуді автоматтандыру мақсатында «жылжымайтын мүліктің бірыңғай мемлекеттік кадастры» ақпарат жүйесін іске қосу жүріп жатыр. Ақпарат жүйесі екі дерекқордан алынған мәліметтерді қамтиды. Олар: &nbsp;«жылжымайтын мүлік тіркелімі» мемлекеттік дерекқоры және мемлекеттік жер кадастрының автоматтандырылған ақпараттық жүйесі. Деректер базасынан барлық ақпаратты көшіру аяқталғаннан кейін олар жойылады.

Қазақстандықтарға жылжымайтын мүлік желісі бойынша мемлекеттік қызметтер уақытша тоқтатылады

<a href="https://kyzylorda-news.kz/">Kyzylorda-news.kz.</a> Қармақшы аудандық мемлекеттік кірістер басқармасының басшысы Даниияр Қосбергенов – білікті басшы, өз ісінің маманы. Ол ел болашағы үшін саналы өмірін арнап, жерлестерінің құрметіне бөленіп жүрген жан. &nbsp;Ол 1977 жылы Жосалы кенті тұрғындары, қаржы саласының маманы Жамбыл Сүйінтайұлы мен ұзақ жыл медицина саласында елеулі еңбек еткен Патима Шайхысламқызының отбасында дүние дидарын ашқан. Замандастары сияқты орта мектепте білім алып, жүрек қалауымен Алматы қаласындағы Қазақ мемлекеттік ауыл шаруашылығы институтының «Агроөндірістік кешеніндегі экономика және менеджмент» бөлімінде жоғары білім алса, кейіннен әл-Фараби атындағы Қазақ ұлттық университетінде «Құқықтану» мамандығы бойынша білімін жетілдіреді.Еңбек жолын Қармақшы ауданы бойынша салық комитетінде салық жинаушы болып бастаған ол жылдар өте аудит бөлімінің жетекші маманы, бөлім бастығы, басқарма басшысының орынбасары қызметтерінде үлгілі ісімен танылып, салалық басшылық міндеттеген тапсырмаларды абыроймен атқарады.«Көп еңбек еткен адамға бақыт басын иеді» дегендей, жас та болса өзіне жүктелген функционалдық міндерттерді жауапкершілікпен атқарған жас маман кейін келе облыстық салалық басшылықтың ұйғарымымен Жалағаш ауданындағы мемлекеттік Кірістер басқармасына басшы болып тағайындалады. Жауапкершілік, ізденімпаздық, талапшылдық деген ұстанымды өміріне серік еткен Данияр Жамбылұлы Жалағаш ауданында қызмет еткен жылдарда да өзіне жүктелген міндетті абыроймен атқара білді. Салық базасын арттыруда сала бойынша жинаған тәжірибесімен ауданның аймақта алдыңғы қатарға шығуына сүбелі үлесін қосты.«Адал еңбекпен мал іздемек – ол арлы адамның ісі», – дегендей, ұлылық тәмсілін санасына сіңіріп өскен білікті басшы қай лауазымдық қызметте жүрсе де өзінің туған жерге деген адал қызметі, жауапкершілігі мен талапшылдығының арқасында басшылық тарапынан қолдау тауып, 2019 жылы туған жерге оралады. Нақты айтқанда, аудандық мемлекеттік Кірістер басқармасына басшы болып келеді. Салада кәсіби маманның аудан экономикасының нығаюына, өңірдің дамуына қосқан ерекше үлесін де айта кету біздің міндетіміз.Ол екі рет Қазақстан Республикасы Қаржы министрлігі Салық Комитетінің Құрмет грамотасымен, Қазақстан Республикасы Қаржы министрлігінің «Мемлекеттік Кірістер органдарының үздігі» төсбелгісімен, Қазақстан Республикасы Президентінің «Қазақстан Конституциясына – 25 жыл» мерекелік медалімен, «Қазақстан Республикасының Қаржы министрлігіне – 10 жыл» төсбелгісімен наградталды. Сондай-ақ, облыс, аудан әкімдерінің Алғыс хатына ие болса, өткен жылы аудан бойынша «Қаржы саласының үздігі» номинациясының иесі атанып, абырой биігінен көрінді.<blockquote>«Әке өнегесі ұрпаққа аманат» деп даналарымыз айтқандай, бала кезімде қаржыгер болып еңбек еткен әкемнің жұмысына қызығып өстім. Өсе келе әке жолын өзіме аманат ретінде таңдадым. Еңбек жолымда салықшы деген құрметті мамандықтың қыр-сырын терең меңгеруге атсалысқан, саланы ұзақ жылдар басқарған ұстазым Қалдыбек Сүлейменовтің &nbsp;орны бір бөлек. Осы мамандықпен туған халқыма қызмет етіп келе жатқаныма 25 жылға жуық уақыт болыпты. Талғат Ильясов, Мейрамбек Сатлабаев, Айтбай Бұғыбаев, Зере Метерова сынды білікті де білімді аға-әпкелерімнен тәжірибе жинадым. Ал, бүгінгі күні өздерінің Қайрат Сәден, Ләззат Қыпшақбаева, Дәуіржан Мусилимов, Нұрсұлтан Бектұрғанов, Гүлзана Қожамұратова, Оразбек Құлқатов сынды өз ісінің шеберлерімен бірге ауданның экономикалық даму көрсеткішінің бірі – салық және бюджетке төленетін басқа да міндетті төлемдердің толық және уақытылы түсуін қамтамасыз етуде еңбек етіп жатқан жайымыз бар. Басқарма қызметкерлерінің тындырымды жұмыстарының арқасында биылғы жылдың І тоқсанының қорытындысымен жалпы мемлекеттік бюджет жоспары 608 млн 383 мың теңге болса, оның түсімі 717 млн 378 мың теңгені құрап, 108 млн 995 теңгеге артық немесе 117,9 пайызға орындалуы қамтамасыз етілді. Сонымен қатар, басқарма қызметкерлері көлеңкелі экономикамен күресу мақсатында салық базасын ұлғайту бағытында атқарылған жұмыстар қорытындысымен аудан қоржынына осы тоқсанда қосымша 76 млн 398 мың теңгенің қосымша салығының түсуі қамтамасыз етілді. Сондай-ақ, қазіргі таңда басқармада жас мамандар тобы өздеріне міндеттелген функционалдық қызметтерін абыроймен атқарып, ауданымыздың әлеуметтік экономикалық дамуына тың серпіліс беруде», – деді ол.</blockquote>Қазір Данияр Жамбылұлы басшылық етіп отырған бөлім жақсы нәтижелерге қол жеткізіп, атқарылып жатқан жұмыс сапасы мен көрсеткіштері жоғары деңгейге жетіп отыр. Әрине, бұл — көреген басшының оңтайлы әдістері мен мол тәжірибесінің жемісі. Адамның жеке басының қалыптасуы отбасынан басталады. Оның өсіп-жетілуі, өн бойындағы адамгершілік қасиеттерде осы отбасында қалыптасады. Отбасы – табиғат сыйлаған кереметтердің бірі. Ата-ана тәрбиесін алып, осындай қасиетті ұғымды санасына сіңіріп өскен Данияр Қосбергенов өмірлік жары, аудандық экономика және қаржы бөлімінде бас &nbsp;маман болып қызмет ететін Майра Рысбекқызымен бірге көтерген бақытты шаңырағында тәрбиеленген &nbsp;Нұрай және Айдана есімді қыздары Астана қаласындағы медицина университетінің «Жалпы медицина» факультетінің грант иегері атанса, Дінмұхаммед, Данаби, Дінислам есімді ұлдары Т.Көмекбаев атындағы №250 мектеп-лицейінің &nbsp;озат оқушылары.

Қармақшы: Көлеңкелі экономикамен күресу мақсатында атқарылған жұмыстар қарқынды

<a href="https://kyzylorda-news.kz/">Kyzylorda-news.kz.</a> Бала тәрбиесі қашан да өзекті. Олардың тәлім-тәрбиесі күн өткен сайын түрленіп барады. Оған– әлеуметтік желілердегі жағымсыз, ойға қонымсыз бейнероликтер, түрлі зорлықзомбылыққа негізделген материалдар, отбасындағы қадағалаудың аздығы мен өзге де әлеуметтік жағдайлар басты себеп болуда.Дегенмен, ақпараттың жағымдысы бар, жағымсызы бар қарша бораған уақытта әлі оңы мен солын ажыратып үлгірмеген жас ұрпағымызға шынымен де қиын соғып тұрғаны жасырын емес. Бүгінде көптеген қоғам мүшесін осы жайттар алаңдатады. Вертуалды әлем, адам санасына кері әсерін беретін қауіпті ойындар, ұялы телефонға ертелі-кеш телміру, ұлттық салт-дәстүр мен әдет-ғұрыптан алыстау, рухани-мәдени болмыстың қасаңдағы, тағысын тағы дүниелер – бала тәрбиесін күрделендіре түсуде. Ащы да болса айтайық, қазірде бала тәрбиесіндегі қоғамның көпе-көрнеу көрінісі осыған кеп саяды. Әйтпесе, осындай бейбітшілікте өмір сүріп отырған бақытты мемлекетімізде бізді не түртті?!Айналамызда орын алып жатқан топтық төбелестер, әсіресе қыз балалардың аяусыз қатігездікпен бір-бірін сабауы, кек алысу, кектесу секілді мейірімсіздік факторлары – санаға сиятын нәрсе ме?! Бірақ, «Мың асқанға бір тосқан» қашан да болған қазақта. «Жұмыла көтерген жүк жеңіл» деп те айтамыз. Көп болып атсалысса, күрмеуі тарқамас, бұрауы шешілмес мәселе болмас. Осындай мақсат-мұратты негізге алған іс-шарадан аларымыз көп болды.Жуырда жасөспірімдер, жастар арасында құқықбұзушылықтың алдын алуда аудандық білім бөлімінің ұйымдастыруымен Т.Көмекбаев атындағы №250 мектеплицейінде білім беру ұйымдарында балалардың қауіпсіздігін қамтамасыз етуде «Кәмелетке толмағандардың құқығын қорғау – баршамыздың міндетіміз» тақырыбында семинаркеңесі өтті.Аудан әкімі Жандос Еркінбек жетекшілік өткен семинаркеңеске аудандық мәслихаттың төрағасы Әділ Қошалақов, аудан прокуроры Мейрамбек Маханбетжанов, аудандық ардагерлер кеңесінің төрағасы Асқар Мереков және депутаттар, құқық қорғау, білім саласы қызметкерлері, үкіметтік емес ұйым өкілдері, ардагерлер, жастар, ата-аналар қатысты.Онда кәмелетке толмағандардың тәртібіне байланысты пікірлер айтылды. Беймезгіл уақытта көшеде жүрмеу, ұрлық, топтық төбелестің алдын алу, қоғам мүлкіне зиян келтірмеу, басқа да құқық бұзушылықтар бойынша құқық қоғау органдары қызметкерлерімен кең көлемде талқылаулар жүргізілді. Атап айтқанда, «Кәмелетке толмағандар арасында құқықбұзушылықтың алдын алу бағытында аудандық прокуратура, білім, полиция бөлімімен бірлесіп атқарылған жұмыстары туралы» аудан прокурорының орынбасары Әнуар Мұратовтың, «Кәмелетке толмағандар арасындағы құқықбұзушылық қылмыстарының алдын алу және бала қауіпсіздігін қамтамасыз ету мәселелері туралы» аудандық полиция бөлімінің бастығы, полиция полковнигі Бақытбек Жарқынбаевтың хабарламалары тыңдалды. Сондай-ақ, «Кәмелетке толмағандар арасында құқықбұзушылықтың алдын алу мақсатында атқарылған жұмыстары туралы» аудандық білім бөлімі басшысының уақытша міндетін атқарушы Гүлзира Исламханова баян етті.Қоғамды жасылық пен ізгілікке қарай бұратын бірден-бір фактор – ол отбасындағы өнеге мен үлгі десек, қателеспейміз. Осы тұрғыда өнегелі отбасының ата-аналары да өз ойларын іркіп қалмады.«Ұрпақ тәрбиесі – ұлт мәселесі» тақырыбында аудандық мәслихаттың төрағасы Әділ Үсенұлы, «Ұрпақ өсіру – ұлы жауапкершілік» тақырыбында аудандық ардагерлер кеңесінің төрағасы Асқар Ермағанбетұлы, «Бала тәрбиесіндегі дәстүрлі құндылықтар мен сабақтастық» тақырыбында аудандық әйелдер кеңесінің төрайымы Гүлжауһар Раева, «Отбасы құндылықтарының бала тәрбиесіндегі маңызы жайында» аудандық білім бөлімі жанындағы ардагерлер пулінің мүшесі, ардагер ұстаз әрі атаана Перуза Сайдалиева бала тәрбиесіне байланысты құнды пікірлерін көпшілікпен бөлісті.Жиында ата-аналар тарапынан сұрақтар қойылып, жауап берілді. Семинарды қорытындылаған аудан әкімі Жандос Еркінбекұлы білім беру ұйымдарындағы жұмыстарды жандандыруға нақты тапсырма беріп, балалардың құқығын қорғау және білім беру жұмыстарын сапалы жүргізу – әрдайым басты назарда болатынын жеткізді.

Қармақшы: Тәрбие мәселесі талқыланды

<a href="https://kyzylorda-news.kz/">Kyzylorda-news.kz.</a> Қазақстан Республикасының «Сайлау туралы» Конституциялық заңының талаптарына сәйкес 16 сәуірде Арықбалық ауылдық округі әкімінің сайлауы өткізіліп, ауыл халқы өз таңдауын жасады. Сайлаудың қорытындысы бойынша «Аmаnаt» партиясынан ұсынылған кандидат Мәулен Қайруллаев басым дауысқа ие болып, Арықбалық ауылдық округінің әкімі болып сайланды.&nbsp;Қазалы ауданының әкімі Мұхтар Оразбаев пен аудан әкімінің кеңесшісі Бақытжан Жарылқап Арықбалық ауылдық округінде ауыл тұрғындарымен бірге Мәулен Мінәжадинұлының қызметіне сәттілік тіледі.&nbsp;«Басты мақсат - халықтың әл-ауқатын арттыру, ауыл өмірін жақсартуға бағытталған кешенді жұмыстарды лайықты деңгейде атқару. Ауыл халқы өзіңізге сенім артып, сайлауда дауыс берді. Сондықтан округ тұрғындарымен тығыз байланыста жұмыс жасап, ауыл шаруашылығы, шағын және орта кәсіпкерлік салаларын дамытуды, елді мекендегі әлеуметтік-саяси ахуалын тұрақты ұстауды, салалық мекемелермен тікелей байланыста болып, мемлекеттік бағдарламаларда белгіленген міндеттерді жүйелі атқарып, тапсырмаларды уақытылы және сапалы орындауды тапсырамын. Жұмысыңызға табыс, қызметіңізге сәттілік тілеймін», – деді аудан басшысы Мұхтар Әуесұлы.&nbsp;Мұнан соң сөз алған аудандық сайлау комиссиясының төрағасы Нұрлан Аманбай Мәулен Мінәжадинұлына ресми түрде әкім куәлігін табыс етті.&nbsp;Ауыл тұрғыны Думан Жаңабайұлы сөз сөйлеп, бұған дейін елді мекеннің әлеуетін арттыру жолында еңбек етіп келген азаматтың алдағы қызметіне сәттілік тілесе, ауыл ақсақалдары батасын берді.&nbsp;<img src="https://knadmin.beoblood.kz/uploads/337293188_140374542334923_5255948001082384690_n_90dffc0bb5.jpg" alt="337293188_140374542334923_5255948001082384690_n.jpg">

Қазалы: Арықбалық ауылының әкімі сайланды

<a href="https://kyzylorda-news.kz/">Kyzylorda-news.kz.</a> Қазіргі таңда үздіксіз білім беру еліміздің ертеңі өсіп келе жатқан жас ұрпақтың білімінің тереңдігімен өлшенеді. Білімді, жан-жақты қабілетті ұрпақ – ұлтымыздың баға жетпес қазынасы. &nbsp;Қоғамымызда болып жатқан әлеуметтік-экономикалық өзгерістер мен еліміздің білім беру саласының әлемдік білім кеңістігіне өтуі білім беру саласында, соның ішінде мектепке дейінгі тәрбиелеу мен оқытуға уақыт талабына сай өзгерістерді енгізуді талап етіп отыр.Білім беру балабақша табалдырығынан басталады десек ешқашан қателеспейміз. Барлық білімнің бастауы – балабақшада. Мектепке дейінгі мекемелерде тәрбие мен білім саласында заманауи педаго-гикалық &nbsp;технологиялар қаншалықты маңызды болса, мектеп жасына дейінгі балаларды оқыту мен тәрбиелеуде де педагогикалық технологиялар ұғымы кеңінен қол¬данылатын ұғымның біріне айналды. Ендеше мектепке дейінгі білім беру саласының басты міндеттерінің бірі – өскелең ұрпақты оқыту мен тәрбие беру үрдісіне заманауи әдістерін енгізу. &nbsp;Әрине &nbsp;бұл үшін мектепке дейінгі білім беру мекемелерінде балалардың жеке басының қалыптасуы мен дамуына &nbsp;педагогтардың заманауи инновациялық технологияларды қолдана білу сауаттылығына да байланысты.Балабақша – баланың жүйелі түрде білім-тәрбие алатын ең алғашқы қоғамдық ошағы. Ауданымызда болашақ ел ұрпағын тәрбиелеп, алғашқы білім баспалдағы болып отырған балабақшалар жетерлік. Осындай берекелі ұйымның бірі – кент орталығындағы «Сәтті бала» балабақшасы. Аталған балабақша 2015 жылы бой көтерген. Осы уақыттан бері біршама бүлдіршінді қанаттандырып үлгерген. Алғашқы түлектері бүгінде мектептің озық оқушылары қатарында. Жалпы балабақша 50 орынға арналған. Қазіргі уақытта мұнда 3-6 жас аралығындағы 50 бүлдіршін 2 топта тәрбиеленуде. Білім ордасының негізгі құрылтайшысы – Несібелі Агаева. Ал берілер білім мен тәрбиеге жауапты меңгеруші – Феруза Ахметова.Балабақша ғимараты және ауласы заман талабына сай жабдықталған. Құрылтайшы бүлдіршіндердің сапалы білім алуына барынша жағдай жасаған. Баланың ой-өрісін дамытатын түрлі дүниелер мен білікті мамандарды жинаған. Жалпы балабақшада 17 адам жұмыспен қамтылған. Оның ішінде 6 педагог, 11 техникалық қызметкер бар. Тәрбие мен білім – егіз. Мектеп жасына дейінгі балаларды дамыту мәселесі мем¬лекеттік саясаттың ажырамас бөлігі болып отыр. Егемен еліміздің талабына сай &nbsp;мектепке дейінгі тәрбие мен білім беру, қазіргі заманға сай білімді де тәрбиелі ұрпақ тәрбиелеу – білімді, жан-жақты тәрбиешілердің еншісінде. Заман өзгерген сайын &nbsp;әдіс-тәсілдер көбейіп, жаңарып, толығып жатыр.– Бала тәрбиелеу – біздің өміріміздегі ең маңызды міндет. Біздің қызметіміз де, өміріміз де бала өмірімен өте тығыз байланысты. Бүгінде балабақшада тәрбиеленген баланың ерекшелігі байқалып қалатынын жасыра алмаймыз. Біз қанша дамып басқа өмір саласындағы жетістіктерге жетсек те, бала тәрбиесі бір сәтте назардан тыс қалмауы тиіс. Сәби жанын небір жақсылық нәрімен суару – оны өсіруші, тәрбиелеуші тәрбиешінің міндеті. Бүлдіршіндердің сезімдері өте нәзік, әсершіл келеді. Оларға айтқан, көрсеткен нәрселердің бәрі – сұлу, әсем, жарасымды болуы керек. Тәрбие қалып тәрізді, егер қалып қисық, олпы-солпы болса, сол қалыпқа салынған зат та оңды болмайды. Бала тәрбиесі де дәл сол сияқты. Сондықтанда бала бойына жас кезінен бастап рухани құндылықтар, мейірімділік, инабаттылық, сұлулық, жақсылық, еркіндік сияқты қасиеттерді қалыптастыру – тәрбиешінің міндеті. Сонда ғана бала бой көтеріп, бәйтерекке айналады. Қазақтың белгілі ақыны Мағжан Жұмабай: «Бала тәрбиесі – бір өнер, өнер болғанда да ауыр өнер, жеке бір ғылым иесі болуды тілейтін өнер» дейді. Бізге қойылған талап балаларды ойын арқылы оқыту және тәрбиелеу. Ойын арқылы бала өмірден көмтеген мәлімет алады. Тәрбиешілер ойын ұйымдастыра отырып, балаларға барлық білімді береді. Балабақшамызда әрбір мерекелік іс-шара өз деңгейінде ұйымдастырылады. 1 қыркүйек, ұстаздар күні, Қарттар күні, Алтын күз, Жаңа жыл, 8 наурыз, 22 Наурыз секілді мерекелік іс-шаралар балалар мен ата-аналарымыздың қатысуымын ерекшеленіп өтеді. Біз ұрпақ жолындағы ұлағатты ісімізді әрі қарай да жалғай береміз. Бастысы білім ордасынан білімді, бақытты, өнерлі баланы қанат қақтырып, ел болашағының жарқын болуына аз да болса үлес қосу, – дейді балабақша меңгерушісі Феруза Балтабекқызы.

Қармақшыдағы балабақшалардың жұмысы жүйелі

<a href="https://kyzylorda-news.kz/">Kyzylorda-news.kz.</a>&nbsp; Қылыш тауының баурайындағы кеншілер кенті соңғы жылдарда толымды істерімен танылып келеді. Бұрынғыдай сүреңсіз көрініс жоқ. Жарықтандыру барынша жолға қойылған. Тұрғындардың басым бөлігі от жағып, күл шығару машақатынан арылған. Кешегі ойдым-ойдым жолдардың орнын тақтайдай тегіс асфальт алмастырған. Көшелерінде жаңашылдықтың лебі байқалады. Жаяу жүргіншілерге қолайлы жағдай жасалған. Осындағы жалғыз білім ордасына қосымша құрылыс жүргізіліп, балалар санына орай ауқымы кеңейсе, Алланың жердегі үйі деп танылған 500 орындық мешіт жаңадан тұрғызылу үстінде. Бұдан басқа дажаңадан бой көтерген әлеуметтік нысандардың қатары көбейген.Таяуда кент әкімі Пазылбек Берсүгіров қоңырау соғып, өздерінің «Әйелдің бақыты – отбасы» атты бірінші әйелдер форумын ұйымдастырғалы жатқанын айтып, мазмұны бөлек шараны төл басылымда жариялауды сұраған-ды. Сосын сөз барысында Аралдың алтынын шығарумен дараланған кенттің басқа мекендерден өзгешелігі 515 «Батыр ананың» шыққандығында екенін алға тартты.Көрдік. Көңілге түйдік. Ананы ардақтаған ел озатынына тағы да бір көз жеткіздік. Әр жыл сайын Жақсықылышта жағымды жаңалық көрініс табатыны мұндағы мызғымас бірліктің нәтижесі шығар деген ойда қалдық. Негізі солай. Жергілікті әкімшілік пен №19 орта мектебі бірлесіп өткізген форумға ауданнан бірқатар бөлім, мекеме басшылары қатысты. Жанарларынан қуаныштың лебі ескен ақ жаулықты әжелер, алтын құрсақты келіншектер осынау берері мол бастамаға ұйытқы болған жандарға риясыз пейілмен ақ тілегін білдіріп жатты.<blockquote>Нәзік жандылардың көңілін шарықтатып, басын қосқан форумды аудан әкімінің орынбасары Кете-Төлеби Досымжанұлы ашып: –Қазақ қашанда ананы ардақтап, қызын құрметтеген халық. Ұлтты тәрбиелейтін аналар десек, отбасы құндылығы осынау нәзік жандылардың адал болмысымен дараланады. Ана бір қолымен бесікті, бір қолымен әлемді тербетеді деп тектен-тек айтылмаған. Ел экономикасын өркендету жолында аянбай еңбек етумен қатар, бала тәрбиесін бірінші кезекке қойған жақсықылыштық жайсаң жандардың атқарған жемісті жұмыстары көптің көз алдында, – деп сөз сабақтап, ақжарма тілегін жеткізді.</blockquote>Бәрі керемет! Жер бетіндегі ең асыл адамды қадірлеген форумда бала тәрбиесіне ерекше басымдық берілді. Айталық, ата-анасын қарттар үйіне өткізген жас отбасының өкініші, немеренің ата мен әжеге деген сағынышы жиналғандардың ет жүрегін елжіретпей қоймады. Енді бір кезде ана мен әйел тақырыбында тағылымы мол өлеңдер оқылып, өн бойыңды сергітетін әндер шырқалды.Мұнан соң зал төріне ғибратты ғұмырымен көпке үлгі болған аяулы әжелер, қымбатты қыз-келіншектер көтерілді. Ізгілік пен рухани құндылықтарды негізге алған шуақты шарада қоғамдағы белсенді әйелдердің беделін арттыратын ойлар қаузалды. Тіршіліктің тамыры, шаңырақтың ұйытқысы деген атқа ие әйелдің мемлекеттік істер мен саяси мәселелерге араласуы тіршілік кешіп отырған ортамыз үшін маңызды екені тілге тиек етілді. Әйел-ана туралы Жүрсін Ерманнан артық кім айта алған десеңші. Аузына Алла сөз салған ақын:«Қай жерде, мейлі, қай елде,Әлемнің мәні-әйелде деп жырлағаны баршаға аян. Шындық. Қазақстан бойынша статистика бюросының соңғы 3 жылдағы есебіне сүйенсек, 2020 жылы 425 мыңға жуық бала өмірге келсе, 2021 жылы көрсеткіш алға басып, жарық дүние есігін ашқан сәбилер саны 455 мыңға жеткен екен. Санымыздағы еселенген цифрды не үшін айтып отырмыз. Жақсықылыш кентінде де балам-бағым деп білген аналар жетіп артылады.Форум аясында кенттегі 500-ге жуық сәбидің кіндік шешесі Мәрия Сапарқызына құрмет көрсетілді. Бұдан бөлек, бір кездерде аудандық мәслихаттың депутаты атанған «Аралтұз» комбинатының жұмысшысы болып жүріп, Мәскеуде өткен бүкілодақтық 19 съезіне делегат болып сайланған "Еңбекте үздік" медалінің иегері Қиғаш Молдахметқызына да қошемет жасалды. Сондай-ақ №19 орта мектепте сапалы білім, саналы тәрбие берген ұлағатты ұстаз 40 жылдық еңбегінде 200 мыңнан аса шәкіртті қияға қанаттандырған Талайлы Ойнарқызы да дәріптелді.Иә, айта берсек, құрметтілер көп. Олар хақында кейінірек жеке-жеке тоқталармыз. Барлығы дерлік еңбекпен есейген, қай істе де сала саңлақтарына айналғандар. "Тәрбие–тал бесіктен" дейді. Бұл ата-ананың баласын ибалы етіп өсірудегі рөлін аңғартса керек. Қазіргі таңда көптің санасында балатәрбиесіне тек мұғалімдер ғана жауапты деген жаңсақ түсінік бар. Алайда, бұл бұрыс пікір. Бала тәрбиесіне тек педагогтар ғана емес, ата-ана да тікелей атсалысуы тиіс.Құрметті қонақтар ретінде шақырылған аудандық білім бөлімінің басшысы Санира Нұрқожақызы, аудандық аналар қоғамының төрағасы Лаура Қолғанатқызы, аудандық халықты жұмыспен қамту, әлеуметтік бағдарламалар және азаматтық хал актілерін тіркеу бөілімінің басшысы Ғалия Тоғысқызы, Абай атындағы орталықтандырылған кітапхананың директоры Жанар Әлішева, аудандық «Толқын» газетінің бас редакторы Абай Елешов, аудандық мәслихат депутаты Ардақ Қанибайұлы, аудандық әйелдер кеңесінің төрайымы Қанағат Махамбетова өзгеше өрілген форум барысына таңданыстарын жасырмай, бағаларын берді.Жалпы, әрбір жемісті істің қайтарымы болады, еңбек еленеді. Оған дәлел форум аясында лайықты марапат десек қателеспейміз. Ұйымдастырушылар тарапынан үздіктерге құрмет көрсетілді.

Жақсықылышта аналар форумы өтті    

<a href="https://kyzylorda-news.kz/">Kyzylorda-news.kz.</a> Ананың мойнына жүктелген ауыр жүк – ана болу, ал көп баланың анасы болу нағыз ерлікке татиды. Көп балалы ана болу оңай емес. Қазақ халқы қашанда отбасылық құндылықтарды жоғары қойған. Әсіресе, алтын құрсақты аналарды халқымыз ерекше қадірлейді. Мерекелік шаралардың бірінде аққұба өңімен, басына ақ орамал тартып, әдемі қамзол киген жас келіншек көптің назарын өзіне аударып отырғанын байқадық. Сөйлеу мәнері, жүріс-тұрысы қандай, нағыз қазақ келініне тән сыпайылық дестік іштей риза болып. Сұрай келгенде бұл жосалылық көпбалалы жас ана, «Күміс алқа» иегері Әлия Қалыбекова екен.Тек отырмай әдепті келін жайында білуге тырыстық. Сонымен, ол Жаңақорған ауданында 1992 жылы дүниеге келген. Кішкентай кезінде ата-анасы жұмыс бабымен Байқоңыр қаласына көшіп келеді. Өзі отбасындағы тәрбиеленген төрт баланың бірі. Орта білімді Ақай ауылындағы №199 мектепте алған. Еті тірі, қоғамдық іске бел шеше кірісетін мектеп оқушысының қол жеткен табыстары да аз емес болыпты. Түрлі іс-шараға қатысып, мақтаумадақтау қағаздарын алған. Небәрі 31 жасында алты баланың анасы атанып отырған кейіпкеріміз бүгінде аудандық емхананың педиатр кабинетінің медбикесі болып жұмыс істейді. 13 жылдан бері медицина саласының қыр-сырын меңгеріп келе жатқан білікті маман.<blockquote>«Отбасында берекенің болуы – үлкендерге де көп байланысты. Менің келін болып босаға аттаған шаңырағым бақытыма қарай, жайлы, жақсы кісілер болды. Сол асыл жандардың арқасында алаңсыз кызметімді жасап, өмірге ұрпақ әкелудемін. Жан жарымның да қолдауы маған үлкен күш. Жанұяда бірлік, сыйластық болса, ондағы балалар да өнегемен өседі. Қажеттілік болғасын ішіп-жеу, киіну, дүние жию дұрыс шығар, бірақ жарық дүниеге келгендегі ата-аналық миссиямыз мұнымен өлшенбейтіні анық. Сол себепті оттың басындағы басты құндылық – ол бала тәрбиесі, ұрпақ құндылығы. Үлкендерімізге деген сыйқұрмет үзілмеуі керек. Бұл жағынан екінші ата-анамды өте қадір тұтамын. Құрметтеймін. Ұл-қыздарымның осындай атасы мен әжесінің болғанына шүкір етемін» дейді жас батыр ана шынайы пейілмен.</blockquote>– Жолдасымның шаңырағына 18 жасымда келін болып түстім. Кеше ғана қосылған сияқты едік, қазір қарап тұрсам жарыммен отау тіккенімізге де 13 жыл толады екен. Жұбайымның есімі – Берік. Мен де, ол да көпбалалы отбасынан шыққанбыз. Өзімізді бақытты отбасымыз деп толық айта аламын. Екінші ата-анамнан алған тәрбием, тәжірибем өте көп. Бұл кісілерге айтар алғысым шексіз. Мені өз баласындай мәпелеп келеді. Осы кісілердің арқасында ешбір ойсыз жұмысымды істеп келемін. Қазақта: «Жақсы жерге түскен келін – келін...» деген қанатты сөз бар. Сол айтқандай, осындай үлгілі отбасына келін болғаныма қуаныштымын. Арқа сүйерім де, қолдаушым да – өздері. Қай кезде де ақыл-кеңесін беріп, демеп жүреді, – дейді жас ана Әлия Ерғалиқызы.«Отбасы – кіші мемлекет» десек, ондағы ұрпақтың тәрбиелі, білімді болып ержетуі – сол үйдің атмосферасына тікелей байланысты. Жанжақты дамыған бала бір отбасының ғана емес, мемлекеттің де байлығы. Қоғамдық жұмыстарға араласу, өнер, спортпен белсенді уақыт өткізу – Ембаевтар жанұясында да қалыптасқан үрдіс. Жанұяның тұңғышы Ерзат 6 сыныпта оқыса, Ерке 5 сыныптың оқушысы. Құрмет 1 сыныпқа барып жүр. Мариям мен Ибраһим «Сардарбек» балабақшасының тәрбиеленушілері. Жас жұбайлардың кішкентайы – Ханзада бір жастан енді асқан. Балалардың бірі – өнерлі, бірі – спортпен шұғылданады. Сабақтан тыс уақытта атасы мен әжесіне қолқабыс етеді. Ата-анасына да қал-қадірлерінше көмек береді. Мысалы, Ерзат – бокспен айналысады, оның қарындасы би үйірмесіне қатысады. Бірі – озат оқушы болуды мақсат етсе, балабақшадағы бүлдіршіндер суретке бейім.Ембаевтар шаңырағының отағасы Мыңжасар Мәженұлы ұжымына, ағайын-туысына сыйлы азамат. Ол ұзақ жылдар бойы емханада қызмет етіп келе жатса, отанасы Пернекүл Әлімқызы шаңыраққа келген қонағының жайын жасап, үй шаруасымен, бала күтімімен айналысқан ардақты ана, немерелерінің асыл әжесі.– 18 жасымда бала келін болып келсем, қазір енем мені тәрбиелеп дана келін етті. Ас бөлмесінен асты қалай дайындау керек, баланың қалай күтімін жасау керек, қонақты қалай жайғау қажет, басқа да әйел-ананың көптеген шаруасын қалай атқаруға болады, келіндік қызметім бар, соның бәрін үйретті. Қатты сөз айтпай, көңіліме жел боп тимей, мейіріммен қарап маған өнегесін көрсетті. Осының өзі керемет үлгі, тәлім-тәрбие. Болашақта осы кісідей болсам, – дейді енесіне деген сый-құрметін білдірген бүгінде жан жарымен бірге жетінші перзентін күтіп отырған бақытты жас ана.

Қазақстан және Қызылорда облысының жаңалықтары