<a href="https://kyzylorda-news.kz/">Kyzylorda-news.kz.</a>&nbsp; Облыс орталығында жыл сайынғы үрдіспен «Қазақстанның үздік тауары – 2023» өңірлік көрме-байқауы өткізілген болатын. Байқауда түрлі бағытта кәсіптерін жандандырған жергілікті кәсіпкерлер өз өнімдерін ортаға салып, сайысқа түскені мәлім. Аталған көрме арқылы өңірдегі кәсіпкерлік саласындағы жарқын жетістіктер көрсетілді.Еңбек адамын құрметтеп, насихаттауды тапсырған Мемлекет басшысы Қасым-Жомарт Тоқаев өз Жолдауында «Кәсібилік пен еңбекқорлық қоғамымызда ең жоғары орында тұруы қажет. Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Біз қарапайым еңбек адамына құрмет көрсетуіміз керек» деп атап өткен болатын. Қазіргі таңда қоғамда кәсіпкерлердің беделі көтеріліп келеді. Екі қолға бір күрек іздеген жанға мемлекет те ұдайы қолдау көрсетуде.«Қазақстанның үздік тауары» байқауы да осындай игі іс шаралардың бірі сасналады. Облыстық кәсіпкерлік және өнеркәсіп басқармасы мен Қызылорда облысының кәсіпкерлер палатасының ұйымдастыруымен өткен өңірлік көрме-байқауына барлығы 80 кәсіпкер қатысуға өтінім берген еді. Кәсіпкерлердің &nbsp;өзі іріктеуден өтіп, көрмеге 64 кәсіпкер қатысуға жолдама алғандығы мәлім. Маңызды көрме-байқаумен қатар ұйымдастырылған «Бір ауыл – бір өнім» жобасы бойынша облыстың 23 кәсіпкері өтінім беріп, өз өнімдерін көпшілік назарына ұсынға анықталды. Жүзден жүйрік шығып, өнімдері көпшілік сарапшылар таңдауына ие болған кәсіпкерлер қатарында сырдариялық кәсіпкерлер де бар.Аудан мен ауданға қарасты ауылдық округтерден бес кәсіпкер «Қазақстанның үздік тауары» өңірлік көрме-байқауына өз қолынан шық-қан өнімдерін ұсынды. Олардың ішінде бал өнімдерін өндіруші Роллан Олинов, тәтті өнімдерін пісіріп, он саусағынан бал тамған Айсәуле Уббихожаева, макарон өнімдерін өн¬діріп, тың кәсіпке бастама жасаған Ғалымжан Таңатаров бар. Сонымен қоса тігін өнеркәсібін жандандырып жүрген Ақжарқын Шахманова мен көздің жауын алатын ұлттық киімдерді тігіп, көпшілік сұранысына ие болған Гүлзат Құдайбергенова өз өнімдерін облыс орталығында халыққа ұсынды. Ал «Бір ауыл – бір өнім» жобасы аясында текемет басып, ұлттық өнерді өркендетіп жүрген Марияш Алжанова, қой жүнінен кілем тоқып, сұранысқа ие болған Салтанат Абдраманова, бал өнімдерін ұсынып, халықтан қолдау тапқан Эльмира Туретаева өз өнімдерін облыс орталығына алып барды.Аталған іс шараға облыс әкімінің орынбасары Балмейір Сансызбайұлы, Өңірлік кеңес мүшелері, байқау сарапшылары қатысты. Сондай-ақ өнім сапасын тұрақты түрде жоғары деңгейде қамтамасыз етіп, республика көлемінде кәсібін дөңгелетіп жүрген еңбек адамдары өз өнімдерін көпшілікке ұсынды. Жергілікті тауар өндірушілердің өнімін бизнес, мемлекеттік орган өкілдерінен тұратын сарапшылар бағалап, «Өндірістік мақсаттағы үздік тауарлар», «Үздік азық-түлік тауарлары», «Халыққа арналған үздік тауарлар» номинациялары бойынша жеңімпаздарды анықтады. Облыс әкімінің орынбасары жеңімпаздарға арнайы дипломдар мен теледидардың сертификатын табыс етті. Өңірлік кеңес төрағасы Ерлан Райымов пен облыстық кәсіпкерлік және өнеркәсіп басқармасы басшысының орынбасары Жанар Берденова өзге қатысу-шыларға «Алғыс хаттар» табыс етті. «Қазақстанның үздік тауары» көрме-байқауына арнайы қатысқан сырдариялық кәсіпкерлер арнайы Алғыс хат және естелік-сыйлықтармен марапатталып, аудан мерейін үстем етті.Сондай-ақ көрмеде қолөнер шебері Роза Әлбатырова түкті кілем тоқудан, суретші-қолөнерші Малика Сұлтанғазина иірілген құрғақ жүннен басу техникасында панно, сәнді қолөнер, кәде-сый, ойыншықтар, аксессуарлар жасау, «Резин арт» және барельеф техникасы арқылы эпоксидті шайырмен суреттер мен декор элементтерін салу, кенеп¬терді, шыныаяқ ұстағыштарды, табақша-ларды безендіру, былғары және поталь, аралас техникада декорация жасау, сурет салу әдісі бойынша шебер-сынып көрсетті.<blockquote>– Көрме-байқау – кәсіпкерлер үшін үлкен тәжірибе алаңы. Күнделікті қауырт тіршіліктен бір сәт бой жазып, өзге кәсіпкерлермен пікір алмасып, тәжірибеміз толығып қайттық. Мемлекет кәсіпкерлерді ұдайы қолдап келеді. Есесіне біз де өз еңбегімізді ел экономикасын көтеруге арнай бермекпіз. Кең көлемді іс-шараны ұйымдастырушыларға, қолдау көрсеткен жандарға, аудандық кә-сіпкерлік, өнеркәсіп және туризм бөлімі мен кәсіпкерлер палатасы мамандарына алғыс білдіргіміз келеді. Негізінен, Кәсіп бастайм деген ниеті бар адамдарға айтарым қаражат көзін тауып, қымсынбай жұмыс жасай білу керек. Тауарын өтімді, сапалы болса, тұтынушы өзі келеді. Сондықтан менің өзім тігін тігу саласын меңгеру үстіндемін. Әркез ізденуден жалықпаған дұрыс – дейді «Айнара» тігін шеберханасының негізін салған кәсіпкер А.Шахманова.</blockquote>&nbsp;

Сырдариялық кәсіпкерлер «Қазақстанның үздік тауары» байқауына қатысты

<a href="https://kyzylorda-news.kz/">Kyzylorda-news.kz.</a> Ғаламтордағы ақпараттарда vlast.kz порталынан "Новая газета" басылымының "Аралдың жанайқайы" тақырыбымен жарияланған мақаланы табуға болады. "Арал бар-жоғы қырық жылдың ішінде тартылды. Трагедия 60-жылдары ауыл шаруашылығына суды шектен тыс көп қолданудан басталған еді. Ал 2000 жылы көлемі жағынан әлемде төртінші орында тұрған көлдің 10%-ы ғана қалды, теңіз аумағының төрттен үші қысқарды. Кемелер қайраңға батып, теңіз жағасын мекен еткен халық экологиялық апаттың ортасында қалды. Шаңды боран тұз бен теңізге ағылған тыңайтқыштардың улы қалдығын 500 шақырымға дейін ұшырып әкетті" деп басталатын мақалада теңіздің жай-күйін қалай суреттегіне бір тоқтала өтсек.&nbsp;<blockquote>"Қала" деп аталатын I бөлімде сұхбат алған Мәди дейтін азаматтың сөзін айта келе "– Әке-шешеміз мұнда кемелерді тамашалауға келетін. Қыздар әдемі көйлегін киіп, портқа келген теңізшілерді қарсы алатын. Бәріміз теңіздің жағасында жүретінбіз. Қазір Арал туралы әңгімені балаларымызға айтсақ, ертегі сияқты. Ол жақта тіршілік бар еді. Бірақ 70-жылдары теңіз тартыла бастады. Оның орнына жұмыссыздық пен жоқшылық келді. – Теңіз барда, бәрі болды. Балығы – тамақ, суы ем болды. Жұмыс, денсаулық, жанға жайлы ауа райы, бәрі болды... Сөйткен теңіз көз алдымда тартылды" – дейді деп көрсеткен.&nbsp;</blockquote><blockquote>– Бес жастағы кезім, жағаға келіп, аяғымды толқын шайғанын күтіп тұрдым. Ал келесі жылы ол жерде балшық қана қалды. Соңғы рет 1977 жылы шомылғаным есімде. Кейін зауыттар мен порттар жабылып, қиын кезең басталды. &nbsp;Тоқсаныншы жылдары кеңес үкіметі тарағаннан кейін, жағдай одан бетер қиындады. Әскери қалашықтар мен кәсіпорындар жабылды. Жұмыс жоқ, жалақы жоқ, су да жетпейді. Күн көру үшін халық құмдағы қараусыз қалған кемелерді бөлшектеп, өткізе бастады… Теңізді сағынасың. Біреу кеп қалай тартылғанын сұраса, «коммунистер ішіп қойды» деп жауап беретін болдым, – дейді Мәди.</blockquote>Теңіздің арқасында күн көріп отырған Арал өңірінде жұмыссыздық белең алып, ауру-сырқат көбейе бастады. Ауаның улы химикаттармен ластануы созылмалы аурудың көбеюіне, тыныс жолы, жүрек-қантамырлар және обыр ауруларының асқынуына әкеліп соқты. – Ағам бауыр циррозынан қайтыс болды. Бірінші әйелім обырдан кетті. Бәрі экологиядан деп ойлаймын, екеуі де жас кетті. Арал – біздің қайғымыз бен қасіретіміз, – дейді бар өмірі Аралда өткен Көлбай. Ол зейнетке шыққан соң, экология мәселемен айналысатын қоғамдық ұйымға жетекшілік етті.<blockquote>– Әкімшілікте жұмыс істегенде, ауру бойынша ауданның деректерін көретінмін. Көрсеткішіміз мәз емес еді. Ауыл мен қала ауруханаларында орын жетпейтін. Қатерлі ісік, қаназдық, жүрек-қантамыр аурулары көп. Қазір жағдай жақсарған. Кіші Аралдың деңгейі өсті, халық та Сырдарияның лас суын ішпейтін болды. Бірақ ауру-сырқау азая қойған жоқ. Арал теңізі – 60 мың шаршы шақырым аумақты алып жатқан, көлемі бойынша әлемдегі төртінші көл еді. Жыл сайын 60 тоннаға дейін балық беретін. Ал оған құятын Сырдария мен Әмудария елді күрішпен (КСРО-да өндірілетін жалпы көлемнің 40%-ы) және мақтамен (КСРО-да өндірілетін жалпы көлемнің 95%-ы) қамтамасыз етіп отырды. Бірақ кеңестік суару жүйесі үнем дегенді білмейтін: адамдар суды шектен тыс көп алды, көп жұмсады. Аралдың тартылу себебі де осы. 60-жылдардың басында өзен ағыны азайды. Соның салдарынан теңіз деңгейі түсті. Ал 1984 жылы мұндағы балық өндірісі тоқтады. 1989 жылы Арал теңізі екіге бөлінді: Кіші Арал (Қазақстан аумағы) және Үлкен Арал (Өзбекстан аумағы). Бұрынғыдан бетер тартыла берді. Бұл климатқа да әсер етті. Жүз шақырымға дейінгі аумақта жаз бұрынғыдан ыстық әрі құрғақ, ал қыс суық және ұзақ болды. Судың тасуы тоқтап, жауын-шашын азайды. Теңіздің кепкен табанында 5,5 млн гектар жерді алып жатқан, тұзды-топырақты Аралқұм деген шөл пайда болды. Түрлі дерек бойынша, бұл жерден атмосфераға жыл сайын 75 млн тонна пестицид пен химикаттар қосылған топырақ көтеріледі. Боран да Аралдың уланған тұзын алысқа тасиды. Ғалымдар оларды тіпті Норвегияның ормандарынан да тапқан".</blockquote>Міне, осындай мәтінмен жарияланған ақпаратта мұнан өзге де көптеген деректер келтірілген. Дегенмен бүгінгі Аралдың ахуалы құлдырауға емес, күн санап қайта қалпына келуге бет алған. Расында ғасыр жоғасына айналған САРАТС-тың бірінші кезеңінің өзінде біз жемісті еңбекке куә болдық. Шындығында бір кездері тұралап кеткен балықшылықтың бағы жанып, балық зауыттары шет елдерге экспорт шығаруды әлдеқашан бастап кетті. Бүгінде тек шекаралас елдер ғана емес, алыс-жақын Еуропа елдері де Аралдық теңіз маржандарының дәмін татып отыр. Мәулен Әшімбаевтың Сенат төрағасы болып тұрған уақытында «Тек Тәуелсіздік алғаннан кейін ғана Арал проблемасына шынайы мән беріле бастады. «Сырдария өзенінің арнасын реттеу және Арал теңізінің солтүстік бөлігін сақтау» жобасы қолға алынды. Осының нәтижесінде Солтүстік Аралдың арнасы толып, көптеген биологиялық түрлер қалпына келгені бәріміз үшін үлкен қуаныш» дегені сөзімізді салмақтай түседі.&nbsp;Айталық, 2005 жылы құрылысы басталаған "Көкарал" бөгеті теӊіздіӊ солтүстік бөлігініӊ су мөлшерін 68 пайызға жоғарылатты. Айдынын толтырған Аралдыӊ табаны көрініп, оныӊ зардабын бүкіл әлем сезіне бастаған тұста да шалқар жағасын мекендеген байырғы жұрт бір кереметке сенді. Көбі атамекенінен кіндігін үзбей, көк толқынды көзбен ұзатып салып туған жерде қала берді. Олардыӊ үміттері орындалды да. САРАТС жобасы тартылған теӊізді тірілтті. Дүниежүзілік банктіӊ қолдауымен жүзеге асырылған САРАТС жобасыныӊ І кезеӊінде біршама толымды тірліктер атқарылды. Қазіргі таӊда Сырдария өзенініӊ арнасын реттеу және Арал теӊізініӊ солтүстік бөлігін сақтау жөніндегі жобаныӊ бірінші кезеӊі аяқталған. Жоба барысында теӊіз деӊгейі көтерілді. Қолға алынған шаралар нәтижесінде Арал өӊірініӊ солтүстігіндегі су мөлшерініӊ ортаймауына жағдай жасалды. Соныӊ арқасында аймақтыӊ экологиялық ахуалы айтарлықтай жақсарып, облыстыӊ әлеуметтік-экономикалық тұрғыдан дамуына жол ашты. Арал теӊізіне түсетін судыӊ көбеюі өӊірдегі тіршіліктіӊ қайта жандануына әкелді. Бірнеше ірі көлдердіӊ қалпына келуіне, балық шаруашылығыныӊ дамуына мүмкіндік берді. Балық аулау көлемі күрт артты.Иә, САРАТС жобасының алғашқы кезеңінің өзі теңіз жұрты үшін жемісті болды. Алдағы уақытта жағымды жаңалықтар жиілей түседі деген сенімдеміз.

Теңіздің кешегі мен бүгіні

<a href="https://kyzylorda-news.kz/">Kyzylorda-news.kz.</a> Қазалы ауданының білім саласындағы деңгейі тым биікте. Оған дәлел республикалық олимпиадаларда топ жарып, білімі мен біліктілігін қатар алып жүрген оқушылар. Осы ретте олардың ұстаздарын естен шығармаған жөн. Өйткені ұстазсыз шәкірттің болуы мүмкін емес. Мұндай үздік мұғалімдер қатарында жуырда ғана Президент жарлығымен педагогика саласына тұңғыш рет берілген «Қазақстанның еңбек сіңірген ұстазы» құрметті атағын алғашқы болып иеленген Жәмилә Әбжан да бар. Абыройлы мұғаліммен еркін әңгіме өрбітудің сәті түскен болатын.– Жәмилә Әбдінағиқызы, жалпы «Қазақстанның еңбек сіңірген ұстазы» құрметті атағы иегерінің еңбек жолы қайдан бастау алды?– Мен 1988 жылы Алматыдан шет тілі институтын бітіріп келген болатынмын. Ең алғаш №165 қазақ орта мектебінде еңбек жолын бастадым. Одан кейін аудандық білім бөілімінде, жастар одағында, кейін Қ.Сәтпаев атындағы №216 мектепте, Б.К. Мергенбаев атындағы №226 мектеп-гимназиясында жұмыс жасадым. Қазіргі таңда Е.Бозғұлов атындағы №249 мектеп-лицейде ағылшын тілі пәні мұғалімі болып қызмет етудемін. Негізі мен бұл салаға табаны күректей 32 жылымды арнадым. Алдағы уақытта оқушылардың осы пәнді жетік меңгеруі жолында аянбай еңбек етіп, ағылшын тілін үйретудің қыр-сырын зерттеуді жалғастыра беремін.– Президент пәрменімен педагогика саласында тұңғыш рет берілген атақтың алғашқы иегері болдыңыз. Бұл бүгінге дейін еткен еңбегіңіздің еш кетпегені. Сол сәттегі қуанышпен бөліссеңіз…– Иә, «Педагог мәртебесі» заңы аясында бекітілген «Қазақстанның еңбек сіңірген ұстазы» құрметті атағы Сыр өңірі ұстаздары арасында маған бұйырыпты. Яғни аймақтағы 22 мыңнан аса ұстаздың ішінен үздік деп танылдым. Бұл тек маған емес бүкіл аймақ педагогтарына берілген құрмет деп білемін. Бүгінге дейін қандай марапаттың иегері болып жүрсем де, мұндай сезім болмады. Қуаныштан төбем көкке жетіп, ерекше көңіл-күйге бөлендім. Осы сәтте мені марапатқа лайық деп таныған облыс әкіміне, облыстық білім басқармасына, аудандық білім бөліміне, №249 мектеп-лицей әкімшілігіне алғыс білдіремін. Мұнан бөлек әріптестеріме де ризашылығым зор.– Білім саласында жылдан жылға көптеген өзгерістер орын алуда. Алайда қазіргі ұстаздардың сапасынан саны басым секілді. Бұған не айтасыз?– Меніңше жаңа министр келгелі бұл түсінік ептеп жойылып келе жатқан секілді. Себебі қазір педагогика мамандығына түсу үшін талаптар өзгерді. Келешекте педагогтарға қойылатын талап та, тәртіп те күшейіп, барлығы бір жолға қойылады деп есептеймін. Одан бөлек министр келгелі пилоттық режимде «Ауыл мектебі» деген жоба жүріп жатыр. Мақсаты – қала мен ауыл арасындағы алшақтықты жою. Міне бұл алдағы күндері жақсы жолға түссе барлық білім ошақтары Н.Назарбаев атындағы мектептің іс-тәжірибесін қолға алып, жұмыс жасауды бастаймыз. Ол біз үшін үлкен мүмкіндік, бастама болмақ. Ал жаңағы сапа мен санына келетін болсақ, саны көп мамандардың ұзамай-ақ сапалылар қатарына енетініне күмәнім жоқ. Өйткені оларға қойылатын талаптың соңы осыған алып келеді.– «Ауыл балаларына ағылшын тілін меңгерту қиын» деген біржақты түсінікті жоюды жолға қойып келесіз. Жалпы білікті ұстаз болу үшін жас педагог қандай талаптарға сай болуы тиіс?– Осы сұрақ қойылғанда өзімнің жас маман болып жүрген кезім есіме түсіп отыр. Ол – қандай олимпиадаға барсамда оқушыларым биік-белестерді бағындыра алмай жүрген уақыт. Сол кезде ізденісті одан әрі үдетіп, жеңіске жетудің әдіс-тәсілін табуға тура келді. Бір күні жарыстан көңіл-күйім болмай келе жатқанда жолай бір мықты ағылшын тілі пәнінің мұғалімімен сөйлесе отырып, «қалай жетістікке жетсем болады?» деген сұрақ қойған болатынмын. Ұстаз маған: «Сіз қазіргі таңда «Тойфул» бағдарламасы арқылы оқушыларды дайындасаңыз ғана, биіктерден көріне аласыз» деген ой салды. Көп ұзамай «Тойфул» бағдарламасын іздеп, қымбат бағаға сатып алдым. Бұлай жасағанымды естігенде көп адам маған таңғалып, «Мұның не қажеті бар, осынша бағаға бұл кітапты неге алдың?» деп біртүрлі көзқараста қалды. Сонда мектеп басшысы Күләш апай: «Осы кітап келешек сенің наның болады, сол арқылы үлкен жетістіктерге жетіп, талай белесті бағындырасың» деді. Артынша бағдарламаның пайдасы тиіп, оқушыларды дайындаудың жолын іздеп тауып, биіктен көрініп жатқан жайымыз бар. Ал «Мен мықты маман боламын» деген әрбір педагог алдына нақты мақсат қойып, үнемі ізденісте болып, оқушының назарын білімге бұру үшін бір жолын табуы қажет. Сонда ғана жас маман ойлағанына жетеді.Бұрынғыдай емес қазір «Білімімді одан әрі жетілдіремін» деген ұстазға мүмкіндік өте көп. Олай дейтінім бүгінде ұстаздардың біліктілігін арттыру үшін түрлі онлайн сабақтар шығып жатыр. Бастысы – қол қусырып қарап отырмау қажет. Егер таңның атысы кештің батысы уақыт өткізуді ойлаған педагог болатын болса, оның арты жақсылыққа апармайды, ол одан дамымайды өспейді. Сондай-ақ алдына келген оқушыдан мықты шәкірт дайындап шығармайды. Менің көбіне қорқатыным осы. Ұстаздар құр уақыт өткізбесе екен деймін. Сонда ғана талай қазақ баласы жаһан елдерінің ең биік нүктесінен қарап, қазақ еліне қызмет ететін болады.– Жәмилә апай, атақты алу бір бөлек, оны сақтап қалу бөлек дүние. Бұл алдағы уақытта жауапкершілік одан әрі артады деген сөз. Алдағы жоспарыңызбен бөліссеңіз…– Дұрыс айтасыз. Бұрын көпшілік маған Е.Бозғұлов атындағы №249 мектептің ағылшын тілі пәні мұғалімі Жәмилә Әбжан деп қараған болса, енді «Қазақстанға еңбек сіңірген ұстаз» дейтін болады. Сондықтан бұл мен үшін үлкен жауапкершілік.Біріншіден, мен ағылшын пәні бойынша шәкірттерімнің қатарын көбейткім келеді. Мәселен, былтыр 10 сыныптағы оқушым Ақжүніс Ақатай республикалық олимпиадаға жолдама алған болатын. Алайда елдегі ахуалға байланысты олимпиада болмай қалды. Міне менің мақсатым – осындай аудан оқушыларын дайындап, елімізде ғана емес, әлемге танымал жеңімпаздар шығару. Екіншіден жас мамандарға, яғни ізімнен ерген әріптестеріме «Оқушыны олимпиадаға қалай дайындауға болады?» немесе «Олардың қабілеттерін қалай арттыруға болады?» деген әдістемелік құрал дайындаудамын. Қысқасы аудан ұстаздарының қатары тек мықтыларға толығып, келешекте асуларды біріге бағындырсақ нұр үстіне нұр. Сол арқылы жоғарыда айтқандай қала мен ауыл арасындағы алшақтықты, ауыл балаларына ағылшын тілін үйрету, меңгерту қиын деген түсінікті жою қажет. Тек қала оқушылары ғана емес, ауыл балаларының да қабілет-қарымы жоғары екенін көпшілік білсін.– Ашық әңгіме өрбіткеніңізге рақмет!

 Жәмилә Әбжан: Ауыл балалары қабілетсіз емес

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданы бойынша өткен жылы бірнеше ойын алаңы пайдалануға берілді. Бұл ретте, өскелең ұрпақты спортқа бейімдеу мақсатында футбол, волейбол секілді спорт түрлеріне арналған ойын алаңда «Балалар жылы» аясында жүзеге асты. Жақында Тереңөзек кенті әкімдінің қолдуымен &nbsp;Иса Тоқтыбаев көшесі бойындағы балалар ойын алаңына орташа жөңдеу жұмыстары жүргізіген болаты.&nbsp;Ойын алаңы негізінен бірнеше жыл бұрын балалар үшін арнайы салынған. &nbsp;Тозығы жеткен ойын алаңын қалыпқа келтіру үшін кент әкімдігінің мамандары тартылды.&nbsp;<blockquote>– Құрметті кент тұрғындары балалар үшін салынған және жаңартылған ойын алаңдарын күтіп ұстауда жаңашырлық танытып, ұқыпты қарауды сұраймыз. Алдағы уақытта &nbsp;балалар ойын алаңдарын салу ойда бар. Демалыс уақытында балалар көбіне ойын алаңдарынан табылады. Сондықтан мүлікті күтіп ұстау – маңызды рөл ойнайды. Әрине, балалардың қауіпсіз әрі &nbsp;сапалы ойын алаңдарында ойнауына ата-аналар жауапкершілікпен қараса. Қашанда балаларға ойын алаңында орналасқан мүлікті күтіп ұстау керектігін ескертсе дейміз. Шындығында, бірінеше жөндеуден өткен ойын алаңы ұзақ мерзімде балалар игілігіне жараса деген тілегіміз бар, – деді Тереңөзек кентінің әкімі Ержан Бақтияров.</blockquote>&nbsp;

Сырдарияда ойын алаңы жөндеуден өткізілді 

<a href="https://kyzylorda-news.kz/">Kyzylorda-news.kz.</a> Мына заман дамимын деген кез келген жанға зор мүмкіндік береді. Оған технологияның да үлесі зор. Әсіресе, иненің көзін сабақтап, тігін тігіп, тіршілік етіп жүрген жандар үшін қарекет қылу бұрынғымен салыстырғанда әлдеқайда жеңіл. Өйткені оларға мемлекет те үлкен мүмкіндік қарастырған. Бизнес ашқысы келетіндер кез-келген уақытта өз жобасын қорғап, мемлекеттің берген игілігін пайдаланып, арнайы грант та жеңіп ала алады. Алайда жұмыстың оңай жоқ екені белгілі емес пе? Бірақ біздің арамызда көптеген мүмкіндікті пайдаланып, жоқтан бар жасап, істің көзін тапқан жандар жетерлік. Солардың бірі – Нұргүл Бақымова. Он саусағынан өнер тамған кейіпкеріміз бүгінде кәсібінен нәсіп көріп отырған жанның бірі.Қаламымызға арқау болып отырған кәсіпкер – Нұргүл Бақымова қазіргі таңда бала баққан келіншек қана емес, жеке бизнесін ашып отырған жан. Және көпке үлгі болып, қолынан іс келетінін дәлелдеген мықты маман. Олай деуімізге себеп көп. Себебі Нұргүл «Атамекен» кәсіпкерлік палатасындағы «Бастау Бизнес» жобасын жеңіп алып, мемлекеттің берген мүмкіндігін пайдаланып, шағын шеберхана ашқан. Ортақшыл ауылында өмірге келген кәсіпкер бүгінде Бидайкөл ауылының тұрғыны. Ол – үлгілі келін, аяулы жар, бақытты ана. Ауыл тұрғыны болса да, ауқымды істерге құмар кейіпкеріміз алғашында аудандағы оңалту орталығында талай жылдар бойы еңбек нұсқаушысы болып жұмыс істеген. Біраз жыл шәкірт тәрбиелеген Нұргүл осы уақытқа дейін бар білгенін өзгелерге үйретіп, қаншама жанның жеңімпаз болуына себепкер болған. Одан бөлек бірнеше мектепте қазақ тілі мен әдебиеті пәнінен оқушыларға білім беріп, абыройлы қызмет атқарған. Алайда оның жан-жүрегі кәсіпкер болуды қалап, үш жыл бұрын осы салаға бет бұрып, тынымды тірлігімен талай жанның сүйіспеншілігіне бөленді. «Қанмен келген қасиет қара жерге жанмен бірге сіңеді» демекші, Нұргүлдің тігінге қызығуы оған әжесі мен анасынан берілген қасиет. Ал сол қасиетті ары қарай алып кетіп, дамыту – өнер. Оның осы өнері бүгінде тіршілігін түзеуге ықпал етуде. Иә, көп балалы ана қазіргі таңда кәсібінен нәсіп көріп, арнайы грант жеңіп алып, тігін машинасын сатып алды.Кейіпкеріміз бүгінде аудан тұрғындары үшін қолжетімді бағада әртүрлі киімдерді тігіп, ел алғысына бөленіп отыр. Ол тіпті әлеуметтік желіде де белсенді. Сол арқылы Нұргүлдің қолынан шыққан бұйымдарға көптеген тапсырыстар түсіп, сұраныста артып келеді.<blockquote>«Мен бала күнімнен тігінге құмар болып өстім. Тігіншілік – менің бір хоббиім іспеттес. Бұл іс жаныма рахат сыйлайды. Қазіргі таңда мен 5 баланың анасы, бір әулеттің келінімін. Өздеріңіз көргендей, шағын шеберхана ашып, табыс тауып отыр¬мын. Тігін тігудің өзі үлкен өнер. Ал мұндай өнер маған анамнан берілген қасиет. Кішкентай кезде, құрақ құрап, ұршық үйіруді маған анам үйреткен. Сондықтан анамның құрметіне шеберханама «Фатима» деген ат бердім. Оның өзі мен үшін үлкен жетістік. Бұл ісімді мемлекет тарапы да қолдап, қайтарымсыз қаражат бөлді. Әрине, ол ақша маған маңдай термен келді. Бизнес жоспарымды әзірлеп, сертификат алдым. Қазіргі таңда мен де үйде отырған жас анамын. Тапсырыс өзім тұрып жатқан ауылдан ғана емес, ауданнан тіпті қаладан да келеді. Керек десеңіз, еліміздің түкпір-түкпірінен тапсырыс қабылдаймын. Ұлттық өнерді жаңғыртып, құрақ көрпешелер, көрпелер, қыз жасауларын, жас келіншектерге арналған сәнді орамалдар мен қамзолдар тігіп жүрмін. Аллаға шүкір, шеберханама келіп түсетін тапсырыстар өте көп. Қолөнерімнің арқасында мен бес баламды осы Құдайдың берген кәсібі арқылы асырап отырмын», – дейді жас кәсіпкер.</blockquote>Хәкім Абай «Өзіңе сен, өзіңді алып шығар, еңбегің мен ақылың екі жақтап» деп бекер айтпаса керкек-ті. Рас. Еңбек пен ақыл адам баласын ешқашан жолда қалдырмайды. Еңбек еткен жан әрдайым қатардың алдында жүреді, қиындыққа ширайды, көпке үлгі болады. Оған Нұргүл Бақымова дәлел. Ал ауданда Нұргүл секілді іскер, майталман келіншектер көбейсе, кәсіпкерліктің тасы өрге домалайтыны анық. Ал өңірдегі бизнес дамыса, ол ауданның бәсі биіктеп, мәртебесі артаныны сөзсіз.

Тігінмен тіршілік еткен жан

<a href="https://kyzylorda-news.kz/">Kyzylorda-news.kz.</a> Әлемде сан қилы мамандық бар екені бәрімізге белгілі. Сәйкесінше олардың өзіне тән қиындығы &nbsp;мен қызығы да кездесіп жатады. Сондай бұлтарысы мен қалтарысы көп, маңызды әрі мазасыз саланың бірі – сот.&nbsp;Бір ауыз сөзбен айту әрине, оңай. Алайда ғимараттың ішінде қандай жауапты істер жасалып, шешімдер қабылданып жатқаны өздеріне ғана аян. Сырттан бақылап отырған қараша халық сот саласының қызу жұмысын түсінбеуі мүмкін. Бірақ қара қылды қақ жарып, туралықтан таймай, өгізді де өлтірмей, арбаны да сындырмай шешім шығару әсте оңай емес. Әрине, ұлылық пен тазалыққа ұмтылу біздің бағзы заманнан бері қанымызға сіңген қасиет. Соның бір дәлелі – төл тарихымызда ұлт тағдырын шешкен талай құрылтайлар. Иә, бұрынғы жылдары соттың орнына билер шешім қабылдап, түйткілді мәселенің түйінін тарқатқанын білеміз. Құрылтай басында нағыз әділ билеріміз ұрпақ келешегі үшін маңызды шешімдер қабылдаған. Ең ірі құрылтай – үш жүздің басын қосқан алқалы тарихи жиын Орбасында өткені белгілі. Тәуелсіздіктің алғашқы жылдары Н.Назарбаев кешегі Төле, Қазыбек, Әйтеке бидің рухына арнап жиын өткізген болатын. Президенттің Ордабасындағы отырысынан кейін сот саласындағылар ұлылардың ұстанған бағытын, олардың даналық ойларын кітапқа түсіріп, сот залдарына іліп, ежелгі дала заңы мен қазіргі заман заңын үйлестіруді дәстүрге айналдырған еді. Осының барлығы бабалар салған әділдіктің даңғыл жолынан айнымауға, судьяларға көрсеткен тәрбиелік ұғымы бар әрекет деп түсінсек айып болмас. Ежелгі заманды билер кеңесінсіз елестете алмайтынымыз секілді, қазіргі дәуірді де сотсыз елестету мүмкін емес. Өйткені «Тәртіпсіз ел болмайды, тәртіпке бас иген құл болмайды». Ел арасындағы тентекті тізгіндеп, бұзақыны бұғаулап, қарақшы құрықтап, жауызды жөнге салатын да осы – сот қызметкерлері. Сол себепті газетіміздің осы санын судья және сот қызметкерлеріне арнағанды жөн санадық.Тарихтан тағылымТопырағы талай талантты тудырған Шиелінің киелі, әулиелі жер екені жұртқа мәлім. Оның үстінде осы ауданда өзге ұлт өкілдері көп шоғырланғанын да тарихтан білеміз. Халық көп орналасқан өңірде тыныштық пен татулықты сақтап қалу да оңай емес. Ертеректе осы ауданда елдің дауын қызыл тілдің шешені Досбол датқа, Бала би секілді сөздің киесін түсінетін ер-азаматтар шешіп отырған. Әрине, олардың барлығы дала заңымен шешім қабылдап, ел арасында тұрақтылықты қалыптастырды. Осыған сүйеніп, біз Шиелі аудандық сотының тарихын сонау аудан құрылған жылмен байланыстырсақ болады. Өйткені сол жылдары ауданда «халық соты» ұғымы пайда болып, барлығы заң шеңберінде шешілген. Атап айтар болсақ, 1929-1932 жылдары Шиелі ауданында ел арасында «Төлек сот» атанып кеткен Төлек Есенкелдіқызы халық соты қызметін атқарған. Ол мемлекет мүддесін қорғаумен қатар жеке адамның да құқығын сақтауда айтарлықтай қызмет атқарып, шешім шығарғанда турасын айтып, әділдікке қол жеткізген. Ол кісіден кейін заң мүддесін қорғайтын сот саласындағылардың қатары көбейіп, аталған салаға адамдардың қызығушылығы да арта бастады. Мәселен, 1933-1935 жылдары А.Палмухамедов, 1947-1951 жылдары А.Балымбетов, 1942 жылы Ы.Өтепбергенов, 1958-1962 жылдары Т.Ахатов және басқа да біртума азаматтар аудан абыройы үшін аянып қалмаған. Шиелі аудандық сотында қызмет етіп, еселі еңбегінің нәтижесін көрген тек бұл мамандар ғана емес, сондай-ақ М.Ақпанбетов, Ш.Өміртаев, Ж.Аяпбергенов, С.Қанафиянов, Ө.Жарықбаев, Т.Оспанов сынды азаматтар аудандық сот саласына басшылық жасаса, З.Жаңбыршаева, К.Сұлтанов сот төрағалары болған. 1986-1991 жылдары Мерғали Ыбыраев, сондай-ақ 1991-1996 жылдары Әбдікәрім Елібаев сот саласына төрағалық еткен. 1996-2007 жылдары Т.Баймағамбет төрағалық етті. Сол секілді аудандық сотта ұзақ мерзім судья болған С.Тасыбаева және А.Сайдуллаевтың еңбегін айтпай кетуге болмайды. Оның алғашқысы 1985-2002 жылдары аудандық сотта еселі еңбек етсе, екіншісі өз өмірін осы салаға арнаған жан.&nbsp;Тарихы тереңге тартқан мекеме талай жас маманның қанатын қатайтып, алдыңа түрлі тағдыр келгенде тосын әрекетін тосырқамай қабылдауды үйретіп, мамандық майталманы қылып шығарады. Осылай бірнеше қызмет сатысынан өтіп, төрағалық деңгейге дейін көтерілгендер де аз емес. Олардың қатарында 2007-2011 жылы Шиелі аудандық сотының төрағасы болған С.Сүлейменді, 2011-2012 жылдары сот тізгінін алған Ғ.Алмаханды, &nbsp;2012-2017 жылдары төрағалық еткен М.Еркінбековті, 2017-2021 жылдары сотты басқарған М.Күздеубаевты айта аламыз. &nbsp;Әр &nbsp;төрағаның уақытында әралуан өзгеріс орын алып, әртүрлі тағдырлар шешілді. Мысалы, Сағатбек Сүлейменнің кезінде, яғни 2008 жылы аудандық сот жаңа ғимаратқа қоныс аударды. Жаңа сот ғимаратының қазіргі заманауи үлгімен салынып, соңғы үлгідегі технологиялық құрал-жабдықтармен қамтамасыз етілгенін, соны¬мен қатар жиһаздардың да заманға сай әрі ыңғайлылығын айтқан артық болмас. Аудандық сотта электрондық құжат айна¬лымы толық жолға қойылуы – жұмыс¬тың жеделдігін арттыра түсті. Осы¬ның арқасында сотта бір терезе тәртібі енгі¬зіліп, құжаттар мен істер жүйе бойынша, рет-ретімен орналастырылып, бір қалыпқа енді. Сондай-ақ сот саласындағы сардарлар тек мемлекеттік қызметті ғана атқарып қоймай, қоғамдық жұмыстарға да белсене аралас¬ты. Әсіресе, 2008 жылдан бастап адам құқығы мен бостандығын қамтамасыз ететін қызметкерлер жасөспірімдер арасындағы республикалық турнирлерден бой көрсете бастады. Қазіргі таңда аудандық сот ғимаратының ішінен мұражай ашылып, онда осы өңірдің өрлеу тарихы туралы және сот саласына еңбек сіңірген беделді азаматтардың есім-сойы көрсетілген. Тарихты білмеген ұлттың болашағы бұлыңғыр. Демек сот ішінен мұражай ашылып, сот саласындағы сайыпқырандардың есімін ұлықтау кейінгі ұрпаққа – өшпес өнеге.Тұғыры биік төрағаӘңгімеміздің әлқиссасында тарихқа көз жүгіртіп, осы уақытқа дейін аудандық сотқа төраға болған қызметкерлерді атап өттік. Енді бүгінгі күні Шиелі өңірінің сотын басқарып отырған төрағаға жеке тоқталып кетпесек болмас. 1989 жылы Қызылорда қаласында дүниеге келген Нұржан Бекетаев аудандық сот төрағасы лауазымына 2021 жылы тағайындалған. Білім мен біліктілігін қатар алып жүрген төрағаның заң саласында оқып, көңілге тоқығаны аз емес. Нақтырақ айтар болсақ, ол 2005-2008 жылдары «Қызылорда гуманитарлық заң колледжін», 2008-2012 жылдары «Қазақ гуманитарлық заң университетін», 2012-2014 жылдары «Қазақстан Республикасы Президентінің жанындағы Мемлекеттік басқару академия¬сы» сот төрелігі институтын тәмамдаған. Әрине, оқуды аяқтап, жұмысқа орналаса сала үлкен дауларға нүкте қойды деуден аулақпыз. Бірақ оқу орнын аяқтаған Н.Нұрадинұлы тынбай ізденіп, ізденістің ізінде жүріп, Байқоңыр қалалық сотының жетекші маманы, Қызылорда облысы әкімшілік сотының сот приставы, Қызылорда облыстық соты кеңесінің сот приставы, Арал аудандық сотының судьясы қызметтерін атқарған. Еселі еңбегінің нәтижесінде көпшіліктің ыстық ықыласына бөленіп, қазіргі кезде аудандық соттың төрағасы болып отыр.&nbsp;Иә, мамандық та майдан. Қалам ұстаған біздікі – қарусыз майдан болса, сот саласындағылардікі кәдімгі – қоғам майданы. Алдыңа түрлі тағдырлар келгенде, екі жақта зардап көрмейтіндей шешім қабылдау керек. Қабылдарын қабылдарсың-ау, шешім шығарар тұста шындықты шегелемесең – ар алдында сын. Оған қоса, мамандығына деген құрметсіздік болар. Осындай салмақты салада басшылық ету жүгі ауыр қызмет. Алайда көпке сыйлы болып, әділдік пен татулыққа ұмтылуы Нұржан Бекетаевтың мамандық майталманы екенін айғақтайды.Үш бидің ізіменСот жүйесі – адамның құқықтары мен бостандықтарының сақталуының, қоғамдағы тұрақтылық пен дамудың қамтамасыз етілуінің кепілі. Ал судьялар сот жүйесіндегі негізгі тұлға болып табылады. Елімізде судьялыққа үміткерлер барынша қатаң, бірнеше сатылы іріктеуден өтеді. Оларға қойылатын талап та жоғары. &nbsp;Қаз дауысты Қазыбек би 13 жасынан бастап дауға араласып, дұрыс шешім шығара білгені бәрімізге мәлім. Ежелгінің билерін қазіргі судьялар деп танимыз. Себебі екеуінің де – мақсаты бір. Екеуі де әділдік пен татулықты ту етеді. Судьяның да негізгі мақсаты – жәбірленушінің жоғын тауып, өшкенін жандыруға үлес қосу. Осындай межелі мақсатты алға тартып, үш бидің ізімен жүйелі жұмыс істеп келе жатқан ауданда үш судья бар. Олар Жақсыгүл Тиышбекқызы, Айдос Жолдыбаев және Абдуллажан Сайдуллаев. Қазақ қауымында әділеттің жақтаушысы, ақиқат-шындықтың қорғаушысы бола білген үш үздік ауданда талай мәселенің түйінін тарқатқан. Әрине, көптің көңілінен шығу – оңай дүние емес. Бірақ әрқайсысы сындарлы сәтте сынып қалмауға тырысып, заң шеңберінде шешім қабылдап, &nbsp;ар &nbsp;мен әділдікті қатар ұстап келеді.&nbsp;Сырт көзге судья болу оңай көрінгенімен, жауапкершілігі өте жоғары. Себебі әрбір шығарған үкім, шешімнің арғы жағында адам тағдыры тұрады. Сотқа шындық іздеп жүгінген жандар шығарылған шешімге көңілі толса – үлкен қуаныш. Осы орайда судьялыққа талаптың қатаюы да құптарлық. Себебі ар мен заңды қатар алып жүру – қиын іс. Осындайда судьяға көмекке келетін – заң және ереже.&nbsp; Көріп отырғанымыздай, аудандық сотта алға қарай жылжу бар. &nbsp;Білікті мамандарынан бөлек, жаңа заманға сай жылдам әрі сапалы жұмыс істеуі де ілгері қадам &nbsp;басуды көрсетеді. Сот жүйесінің алдағы уақытта да ел игілігі үшін, қоғамдағы әділеттің үстемдік құруы үшін атқаратын міндеттері орасан. Ел судьяларының бұл міндеттерді де абыроймен атқаруға білім-білігі жететініне еш күмән жоқ.

Шиелі: Сот саласындағы сардарлар

<a href="https://kyzylorda-news.kz/">Kyzylorda-news.kz.</a> Қазақ халқы «Ханда қырық адамның ақылы болса, биде қырық адамның білімі мен ары болады» деп бекер айтпаған. Би – дала демократиясының діңгегі. Қара қылды қақ жарған, адамдар арасында қалыпты тіршілік қағидасына қиянат келтіргенге немесе ардан аттағанға ақиқат үкімін айтып, туралыққа үндеген төбе билер төрелігіне қалың ел қашанда тәнті болған. Тәнті болып қана қоймай, бидің шешіміне қарсы шықпай, қолдау білдірген. Мысалы, Төле, Әйтеке, Қазыбек билердің тарихын тартсақ, үш кемеңгер уағында қазақ даласының тұтастығы үшін тұтанған дауға әділ нүкте қойылып отырған. &nbsp;Шешімдері ойға қонымды болғаны сондай бұра тарту, қарсы пікір білдіру болмапты. Оның үстіне Әз-Тәукенің «Жеті жарғысынан» жол тартқан билер төрелігі Ата Заңға негізделген. Ал би дегеніңіз – кәсіби судьялар. Сәл айырмашылығы егемен елдің дау шешерлері едәуір көп. Солардың ішінде ілкімді ісімен, әділ күшімен, кәсіби мысымен дараланатындары бір бөлек. Уақыт елегінен еленіп, бүгінде еселі еңбегінің зейнетін көріп отырған Тұрмат Баймағамбет сол бөлек биіктің өкілі.Халық арасында «Татулықты ту еткен Тұрмат» атанып кеткен ақсақалын дүйім жұрт біледі. Қаз дауысты Қазыбек би секілді етжеңді тірлікке ерте араласқан ол бүгінде өмірін өнегемен өрген. Еңбек жолын небәрі 18 жасында аудандық соттың сот отырысының хатшысы болып бастап, одан әрі сот орындаушысы, Шиелі мемлекеттік нотариалдық кеңсенің нотариусы қызметтерін атқарып, судьялық лауазымды алғаш рет 1986 жылы Қармақшы аудандық халық сотының судья қызметімен жалғастырады. &nbsp;Ал 1987-1996 жылдары Тереңөзек, 1996-2007 жылдары Шиелі аудандық сотының төрағасы, 2007-2008 жылдары Қызылорда қалалық мамандандырылған әкімшілік сотының судьясы секілді қызмет сатыларынан өтеді. Сол 2008 жылдан бастап доғарыстағы судья, 2009-2015 жылдары Қызылорда облыстық адвокаттар алқасының мүшесі, Шиелі заң кеңесінің адвокаты қызметін абыроймен атқарады. &nbsp;Мамандық атты майданда өзінің қолтаңбасын қалдыра білген ол әлі күнге дейін қоғамнан жырақтай қойған жоқ. Елінің ертеңі үшін алаңдайтын ақсақал қазіргі таңда жас судьяларға жол көрсетіп, ел арасындағы күрмеулі мәселенің мәнісін анықтап, төрелігі мен даналығын көрсетіп келеді.<blockquote>– Сот саласы – өте ауыр. Осы саладағы жастарға тек абырой тілеймін. Бұл – &nbsp;бір емес бірнеше адамның өмірін шешетін қызмет. Мүлт кетуге болмайды. Жас қызметкерлерге айтарым, тек абырой биіктері аласармасын, – дейді өз сөзінде Тұрмат Сабекұлы.</blockquote>Осы саланың қызығы мен шыжығын қатар көрген ол осылайша ізін басып келе жатқан жас мамандарға әркез ақылын айтуға даяр. «Ұстаздық еткен жалықпас, үйретуден балаға» демекші сот саласының сардары шәкірт тәрбиелеуден жалыққан емес. Соның арқасында қазір саналы шәкірттері еліміздің түкпір-түкпірінде ұстазының атын ұлықтап, абыройлы еңбек етуде. Т.Сабекұлының сот саласындағы салған сара жолын жас мамандар жалғастырып келеді. &nbsp;Жалғастырмағанда ше? Шешім шығарар тұста шындықты шегелеп, түрлі тағдырлар келгенде тосылмай дұрыс әрі нақты пәтуа келтіретін судьядан білім үйрену кімге де &nbsp;болсын арман әрі мақтаныш. Сондықтан болар қазіргі таңда жетпіс жетінің желкенін керіп, зейнетке шықса да әлі саламен сабақтастығын үзбей келе жатқаны. Себебі қараша халықты татулыққа шақыратын би Тұрматты іздеушілер, сұраушылар, көмегіне зәру адамдары бар. Осыған орай аудан әкімдігінің қолдауымен «Билер кеңесі» ашылып, қазіргі таңда ақылшы ағамыз аудан халқының мұң-мұқтажын, дау-дамайын сотқа дейін жеткізбей, бейбіт түрде шешуге атсалысып келеді. &nbsp;Ажырасу, мүлікке талас, баланы бөлісе алмау, адам өлтіру, ұрлық-қарлық сынды қылмыстар көбейіп кеткен қазіргі заманда адамдардың бейбітшілікке шақыратын осындай орталықтың болуы да дәтке қуат. Ал оның төрағасы болып Тұрмат Баймағамбеттің сайлануы екі есе қуаныш. Өйткені халық жадында әділ судья, тұғыры биік төреші болып қалған оны естір құлақ көп.Т.Сабекұлы халықтың ыстық ықыласына бөленгеннен бөлек мемлекет тарапынан да мерейін үстем етер марапат алып келеді. Бұл да еңбегінің бағаланғаны шығар. Кеудесі төсбелгімен жарқырап, алғыс хатпен абыройы асқақтауда. Оның үстіне мәртебелі маманға берілетін ең биік марапат «Үш би» құрмет белгісінің иегері. Бұл саналы ғұмырында билер ізінен тайқымай, әділдіктің ақ &nbsp;туын көтергендерге ғана көрсетілетін құрмет. Айта кетерлігі, «Үш би» құрмет белгісін біздің өлкеде иеленген тұңғыш судья – осы кісі. Бұдан бөлек жіпке тізсең таусылмайтын марапаттары да жетіп артылады. Мұның барлығы Тұрмат Сабекұлының мамандық майталманы екенін дәлелдейді. Міне, осындай ағалардың өмірі кейінгі ұрпаққа – өшпес өнеге.

«Үш би» құрмет белгісін иеленген тұңғыш судья

<a href="https://kyzylorda-news.kz/">Kyzylorda-news.kz.</a> Өңірлік коммуникациялар қызметі әртараптандыру бағытындағы бақша дақылдарының үлесін және экспорттық әлеуетін арттыруда атқарылып жатқан жұмыстарды насихаттау мақсатында Жаңақорған ауданына көшпелі брифинг ұйымдастырды.Жаңақорғандық диқандар тағы бір берекелі жылды тарихқа хаттады. Әрбір уақыттың қиындығымен күрескен аудан диқандары су тапшылығының туындауына да қарамастан, күріштің әр гектарынан жақсы өнім алып, қамбаға астық құйылып жүр.&nbsp; Биыл Жаңақорған ауданында 37 781 гектарға егін егілген. Жалпы 460 шаруашылық құрылымы егін шаруашылығымен айналысады.Мәселен, бүгінде аудандағы «АгроСервис» ЖШС-і 20 гектар жерге қарбыз тұқымын еккен. Негізінен күріш егетін қожалық , төрт жылдан бері әртараптандыру бағытындағы бақша дақылдарын ұлғайту жұмыстарын жүргізуде.<blockquote>«Қазіргі таңда қарбыздың холер сортын химиялық қоспасыз, табиғи жолмен ектік. Биыл қожалық 50 ц/га өнім алып, еліміздің басқа өңірлеріне және көршілес Ресей еліне экспортталуда. Ал дақыл аяқ су арқылы өсіріліп жатыр», деді «АгроСервис» ЖШС-нің өкілі Ерқұтты Байбосын.</blockquote><blockquote>«Аудан бойынша егілген 2000 гектар бақшаның 55 га жиналып, әр гектарынан 240 цн өнім алынуда. Сондай-ақ күтімге алынған 15 414 гектар ескі жоңышқаның бірінші орымы аяқталып, барлығы 46,7 тонна өнім жиналды. Ал егілген 3 151 күздік бидай дақылдарын ішінара жинау жұмыстары жалғасуда», деді Жаңақорған ауданының ауыл шаруашылығы және жер қатынастары бөлімінің бас маманы Дәурен Әбибуллаев.</blockquote>Айта кетейік, жалпы облыс бойынша 19,6 мың гектар жерге картоп, көкөніс, бақша дақылдары егілді. Бұған қоса, биыл әртараптандыру бағытында қосымша соя дақылының егіс көлемі 74 гектарға, қант құмайы 221 га ұлғайтылды.Биылғы межені айқындап, келер жылдың жүгі қандай боларын түсінеді көпшілік. Ең бастысы, елдің еңсесі тік, шаруалардың шаруасы ширақ болғаны дұрыс екенін алға тартады мамандар. Егіннің бітік шығуы, бұл еңбектің өтелгені деп білеміз.&nbsp;

Жаңақорған: Әртараптандыру жұмыстары жүйелі

<a href="https://kyzylorda-news.kz/">Kyzylorda-news.kz.</a> Сырдария ауданы әкімі аппаратының мемлекеттік-құқықтық жұмыстар бөлімінің ұйымдастыруымен бүгін «Әділет органдарында мемлекеттік тіркеуге жатпайтын нормативтік құқықтық актілердің тізбесін бекіту туралы» Қазақстан Республикасы Әділет министрінің 2023 жылғы 26 маусымдағы №408 бұйрығын түсіндіру және «Сыбайлас жемқорлыққа қарсы іс-қимыл» Қазақстан Республикасы Заңының өзекті мәселелері туралы» тақырыбында Әкімдікке қарасты дербес бөлімдер, кент және ауылдық округ әкімі аппараты қызметкерлерінің қатысуымен құқықтық оқыту семинары өткізілді.Семинар барысында аудан әкімі аппаратының мемлекеттік-құқықтық жұмыстар бөлімінің басшысы Ернар Зұлқарнаев баяндама жасап, қабылданған жаңа бұйрықтың және заңның талаптарын кеңінен түсіндірді. Сонымен қатар жұмыс барысында қолданыстағы заңнамаларды қатаң сақтап, заңдылықтың бұзылуына жол бермеу үшін &nbsp;сала мамандарына тиісті іс-шаралар қабылдау қажеттігі тапсырылды.<blockquote>– Кез келген маманға өзінің саласына қатысты жауапкершілік жүктелетіні жасырын емес. Бүгінде мемлекеттік қызметкер мен сала мамандарына жергілікті халық сенім артатыны сөзсіз. Бұл ретте, «Әділет органдарында мемлекеттік тіркеуге жатпайтын нормативтік құқықтық актілердің тізбесін бекіту туралы» Қазақстан Республикасы Әділет министрінің 2023 жылғы 26 маусымдағы №408 бұйрығын түсіндіру барысында біздің мамандарымыз ескеретін бірқатар мәселелер бар. Сондықтан бүгінгі құқықтық оқудың әрібіріміз үшін маңыздылығы зор. Сонымен бірге «Сыбайлас жемқорлыққа қарсы іс-қимыл» Қазақстан Республикасы Заңында қамтылған өзекті дүниелер назарымыздан тыс қалмауы тиіс, – деді аудан әкімі аппаратының мемлекеттік-құқықтық жұмыстар бөлімінің басшысы Ернар Зұлқарнаев. &nbsp;</blockquote>&nbsp;

Сырдариялық мемлекеттік қызметкерлер құқықтық оқытудан өткізілді 

<a href="https://kyzylorda-news.kz/">Kyzylorda-news.kz.</a> Аранды ауылдық округінің орталығы Қожабақы ауылы Әйтеке би кентінен 45, Сырдария өзенінің сол жағалауынан 15 шақырым қашықтықта орналасқан.Бүгінде мұнда тіркелген кәсіпкерлер саны 63-ке жетті. Ауыл аймағы мал жаюға қолайлы. Арандылықтар жеке ісін ашу жолында білімін жетілдіріп, өз кәсібін төрт түлік немесе саудамен көркейтуді қолға алуда. Осындай еңбекқор жанның бірі – Ақшолпан Бисенбай «Еңбек» бағдарламасы аясында Ауыл шаруашылығын қаржылай қолдау қорынан мал шаруашылығын дамыту бағытында 1 миллион 800 мың теңге несие алды. Қазір 6 процентпен алған қаражатына 6 жылқы алып бағуда.Оның айтуынша, қазіргідей уақытта қол қусырып отырмай, кез келген іспен айналысқан жөн. Бұл кезге дейін де отбасы жағдайын жақсарту үшін саудамен айналысқан. Биыл мемлекеттік бағдарламаның игілігін көріп, өрісін төрт түлікке толтыру мүмкіндігіне ие болғанына риза. Алға қойған жоспарлары да жетерлік.<blockquote>«Үкімет тарапынан ұсынылған жобалар халықтың әлеуметтік тұрмысын арттыруға бірден-бір көмек. Осындай бағдарламалар көптеп іске асырылса, нұр үстіне нұр. Берілген қаражат Думан, Ерасыл, Нұрайымдарымның несібесі деп білемін. Бәріміз де балаларымыздың келешегі үшін еңбек етеміз. Ал атакәсіп мал шаруашылығының берекесі мол. Бұған дейін де қолда ұстап отырған сиыр мен уақ малдарымыз бар. Соған қосымша жылқы алуды көздедік. Сыртқа жайып жіберіп, бақылап отырамыз. Өйткені ол жем-суын өзі жайылып табады. Азық жағына аса салмақ салмайтын жануар. Несиемді жапсам 3-4 жылда тағы да жылқы алып, мал санын көбейтсем деген ой бар», – дейді кәсіпкер келіншек.</blockquote>Бүгіндері Ақшолпан мемлекет тарапынан жасалған қолдауға дән риза. Ол Қызылорда облысы кәсіпкерлер палатасының Қазалы ауданындағы филиалы арқылы «Еңбек» нәтижелі жұмыспен қамтуды және жаппай кәсіпкерлікті дамыту бағдарламасы аясында «Бастау бизнес» оқу курсына қатысыпты.&nbsp;<blockquote>«Қазір мемлекет түрлі жоба арқылы кәсіп ашамын дегенге жағдай жасауда. Ізденсең, талаптансаң ойлағаныңды іске асыра аласың. Бір «Бастау бизнесте» көп мәліметке қанықтық. Сабақ барысында салық төлеудің оңайлатылған жолдары, мал бордақылауды қалай қолға алуды үйретті. Төрт түліктің басын көбейту әдістерін сабақ түрінде түсіндірді. Бұл салада өмірлік тәжірибем мол болғандықтан маған ақпаратты қабылдау оңайға тиді», – деп пікір білдірді кәсіпкер.</blockquote>Атакәсіптен береке мен абырой тапқан Ақшолпанның мақсаты нық, арманы асқақ.

Атакәсіптен абырой тапқан

<a href="https://kyzylorda-news.kz/">Kyzylorda-news.kz.</a> Жыл өткен сайын елімізде шет тілдеріне деген сұраныстың артып келе жатқаны рас. Бүгінгі таңда кәсіп пен озық техника саласына дендеп ене бастаған тілді еркін меңгерген жастардың көбейгені көңілге қуаныш ұялатады. Осы ретте, шәкірттер санасына ағылшын тілінің сан қырын сіңіріп келе жатқан ұстаздар қауымы біздің ауданымызда да жетерлік. Солардың бірі – Ержігіт Бозғұлов атындағы №249 мектеп-лицейдің ағылшын тілі пәнінің мұғалімі Жәмилә Әбжан деуге толық негіз бар.Саналы ғұмырының 32 жылын ұстаздық жолға арнаған оның талай буынның бойына терең білім мен тұнық тәрбиені сіңірудегі орны ерекше.1988 жылы Алматы қаласындағы шетел тілдері институтын тәмамдап келген Жәмилә Әбдінағиқызы алғашқы еңбек жолын Cәкен Сейфуллин атындағы №165 мектептен бастаған. Мұнан соң аудандық оқушылар үйінің әдіскері, аудандық комсомол комитетінің бөлім меңгерушісі болып, 1997 жылдан бері Б.Мергенбаев атындағы №226 гимназияда ұстаздық қызметте шыңдалған.Шәкіртсіз ұстаз – тұл. Кез келген мұғалімнің арманы өзі дайындаған шәкіртінің олимпиадалардан жүлде алғанын көру десек, бұл тұрғыдан келгенде Жәмиләны бақытты ұстаз деуге болады. Мысалы, оның оқушылары VII, IX, X және XI халықаралық олимпиадалардың алтын, күміс, қола медалдарын мойнына таққан. Сонымен қатар, ол баптаған оқушылар «Заманауи білім – өмір талабы» атты оқушылардың республикалық интелектуалдық турнирінің жеңімпаздары. Ал, өзі АКСЕЛС қоғамы ұйымдастырған сайыстың I, II, III турының жеңімпазы атанып, Америкаға жолдама ұтып алған қазалылық алғашқы ұстаздардың бірегейі десек қателеспейміз. Мұнымен қоса, облыстық «Ағылшын тілі пәнінің ең үздік мұғалімі», «Ең үздік бірлестік жетекшісі» номинацияларының, «Алтын глобус» сыйлығының, облыс әкімінің 200 мың теңге грантының иегері. Жалпы, бұлардың барлығы шет тілінің шеберіне айналған Жәмилә Әбінағиқызының көптеген жетістігінің бір парасы ғана. Әріптестеріне сыйлы ұстаз жайлы мектеп басшысы Күлзипа Нақан:<blockquote>«Жәмилә Әбдінағиқызы ұжымдағы өте талантты, еңбекқор, талапшыл ұстаз. Көптеген тақырыптағы түрлі ғылыми-әдіс¬темелік еңбектеріде педагогикалық журналдарға жарияланып, жинақтарға енген. Шәкірт¬терінің алды еліміздің сан саласында қызмет етіп, абыройдың асқарынан, беделдің биігінен көрініп жүр. Айта кетерлігі, Жәмиләның сайыстарға дайындаған оқушылары үнемі жүлделі оралады. Бәрі де мектебіміздің маңдайалды мақтаныштары. Тағы бір айта кетерлігі Жәмилә 2016 жылы халықаралық «Наланда» олимпиадасының үйлестірушісі қызметін атқарып, үздік ұйым-дастырушы ретінде Дубайға екі жолдама жеңіп алды. Бұның барлығы оның ізденімпаз ұстаз екенін айғақтайды», – деген пікірін жеткізді.</blockquote>Ал, Жәмилә Әбжанның дарынды оқушыларының бірі, «Алтын белгі» иегері, «Болашақ» степендианты, бүгінгі таңда Астана қаласындағы Н.Назарбаев университетінде қызмет атқаратын Бекзат Бәлдіров ұстазының өте талапшыл, білімді екенін былайша баяндайды.<blockquote>«Жәмилә апай бастауыштан кейін мектеп бітіргенше сыныбымызға жетекшілік етті. Талапшылдығымен қатар, оқушы¬ларды түрлі жарыстар мен олимпиадаларға дайындауда өзіне тән сан қыры болатын. Көзінде оты бар, шет тілін меңгергісі келетін кез келген баламен тез тіл табысатын. Мектеп қабырғасында жүргенде біздің сыныбымыздағы көптеген оқушыларды АКСЕЛС ұйымдастырған турнирлердің жеңімпазы еткені есімде. Мен де апайымыздың қолдауымен түрлі байқауларда бақ сынадым. Ол кісі менің ағылшын тіліне деген қызығушылығымды оятты. «Болашақ» бағдарламасымен Англияда оқығанымда ұстазым үйреткен шет тілінің үлкен көмегі тиді. Кейін Испания, Швеция секілді елдерге шыққанымда да мектеп қабырғасынан алған шет тілімнің нәтижесінде өзге елдің өкілдерімен еркін сөйлесетіндей дәрежеге жеттім. Бұл да болса, Жәмиләдай ұстазымның ерен еңбегі», – дейді.</blockquote>«Еңбектің бейнеті ащы, жемісі тәтті» деген ұлағатты сөз бар. Жәмилә Әбдінағиқызы білім саласындағы өлшеусіз қызметі үшін әрі жылдары аудандық білім бөлімінің, облыстық білім департаментінің «Алғыс хаттарымен», облыс әкімінің, республикалық Білім Академиясының, халықаралық АКСЕЛС қоғамының Құрмет грамоталарымен марапатталған.Жуырда ғана жаңа оқу жылы басталар тұста Қызылорда қаласында өткізілген «Төртінші өнеркәсіптік революция жағдайындағы адами капитал» атты облыс мұғалімдерінің дәстүрлі тамыз кеңесінде Жәмилә Әбжан «ҚР Білім беру ісінің құрметті қызметкері» төсбелігісін иеленіп, өз кәсібінің нағыз маманы екенін тағы бір дәлелдей түсті. Ұлтымыздың ұландарын ұлағаттыққа тәрбиелеу жолында аянбай қызмет етіп жүрген ұстаздың бұл жоғары наградаға лайықты екеніне кәміл сенімдіміз.

Шет тілінің шебер мұғалімі

<a href="https://baq.kz/25-zhyl-astana-nur-sultan-astanaga-deyin-307098/">ФОТО</a><a href="https://kyzylorda-news.kz/">Kyzylorda-news.kz.</a> Ата-бабамыз қаншама қиындықты артқа тастап, тәуелсіз ел үшін жанын пида етті. Қаншама ел азаматтары азаттық үшін арын сатпады. Осындай ерен еңбекпен келген тәуелсіздіктің арқасында біз бейбіт елде өмір сүрудеміз. Шекарамыз айқын, егемен ел болғанымызға отыз жылдан асты. Ал Тәуелсіз Қазақстандағы елеулі оқиғалардың бірі – Сарыарқа төрінен Астана қаласының салынуы.&nbsp;Бұған дейін Ақмолинск, Целиноград, Ақмола, Нұр-Сұлтан деп те аталған қала 1997 жылдың 10 желтоқсанынан бастап Қазақстан Республикасының бас қаласы болып келеді. Тәуелсіз Қазақстанға жаңа астана салу еліміздің бірінші президенті Нұрсұлтан Назарбаевтың идеясы екені барлығына белгілі. Дегенмен, елорданы Алматы қаласынан Ақмолаға ауыстыру туралы шешім 1994 жылдың 6 шілдесінде Қазақстан Республикасы Жоғарғы Кеңесінде қабылданғанын және астананы ресми түрде көшіру 1997 жылдың 10 желтоқсанында жүзеге асырыла бастағанын көпшілік біле бермейді.&nbsp;6 шілде күні ел тарихында орны бар шешім қабылданды. Сондықтан да бұл күн «Астана күні» болып бекітілді. Жыл сайын бұл күн мереке ретінде тойланып келе жатыр. &nbsp;Ал биыл Астана қаласына 25 жыл толып отыр. &nbsp;Осы уақытқа дейін еліміздің елордасы дамудың бірнеше сатысынан өтті. Бүгінде халықаралық аренада өзіндік келбеті бар, заманауи даму үрдісінен қалмай келе жатқан жас қала. Елорданың өткен тарихына хронологиялық талдау жасайтын болсақ, бұл қаланың іргетасы 1830 жылы орыс әскерлері Есіл өзенінің жағалауына келіп қалаға бекініс салудан бастау алады. Содан соң, 1862 жылы бекініс қала мәртебесіне ие болып, Ақмолинск деген атау берілсе, 100 жыл өткеннен кейін Целиноград деп атала бастаған. Одан кейін, Ақмола болып, Президент жарлық шығарған кезде Астана деген атауға ие болған. 1998 жылы Астана қаласы ЮНЕСКО ұйымының шешімімен аз ғана уақыт арасында әлеуметтік-экономикалық, саяси және мәдени тұрғыдан даму жағынан көзге түсіп, этносаралық тұрақтылыққа қол жеткізген жас қалаларға берілетін «Бейбітшілік қаласы» атты мәртебеге ие болды. Бразилия елінде өткізілген бұл конкурсқа қатыстырылған Астана әлемнің он екі шаһарын әртүрлі талаптар бойынша басып озған. Астана тарихындағы тағы бір елді елең еткізген оқиға – 2019 жылдың 20 наурызында қазіргі президентіміз Қасым-Жомарт Тоқаевтың шешімімен қаланың атауы экс-президент Нұрсұлтан Назарбаевтың құрметіне Нұр-Сұлтан деп өзгертілуі болды. Алайда, өткен жылдың 17 қыркүйегінде Мемлекет басшысының Жарлығымен қала қайтадан Астана деп аталды.&nbsp;Бүгінде Астананың жер көлемі 797,33 шаршы шақырымды құрайды. Астананың қақ ортасында әсем Есіл өзені ағып жатыр. Сол өзен қаланы екіге бөлетіндіктен, тұрғындар оң және сол жағалауда өмір сүріп жатыр. Астананың климаты аса континенталды, дәлірек айтсақ, қысы суық әрі ұзақ болса, жазы ыстық және құрғақ. Адамдар әсіресе Астананың қысына қатты қамданады. Себебі, бұл қалаға Сібір аяздары жеткен кезде, ауа температурасы – -50 градусқа дейін жетуі ықтимал. Ғалымдардың сөзіне сенсек, Астана Моңғолия астанасы Ұланбатырдан кейінгі әлемдегі ең суық елорда болып саналады екен.&nbsp; Елорданың сәнін кіргізіп, әлем халқына әйгілі етіп тұрған сәулет туындылары да жетерлік.&nbsp;Астананың инфрақұрылымы, қала құрылысы, кей көшедегі кептеліс, сумен қамтамасыз ету, мектептерде орын тапшылығы секілді әлеуметтік мәселелер туралы сын жиі айтылады. Алайда қала 40-50 жылда жетеді деген нәтижені ширек ғасырда көрсетті. Миллиондаған адамның жас әрі бас қалада өз жолын тапқаны анық.Кеше ғана іргетасы қалаған Астана дем арасында ширек ғасыр жасап, бұл күн дүбірлі мерейтойға ұласып отыр. Десе де, күллі қазақ жұрты бұл қаланың сәулетіне тамсанып қана қоймай, саяси және идеологиялық маңызын тереңірек түсінгені абзал. Сарыарқаның төрі Астанамыздың мәңгілік мекені болғай.Гүлсім Мұқаметәлиқызы, Астана қаласының тұрғыны:– Мен &nbsp;ауданға қарасты қазіргі Ақтөбе ауылының тумасымын. №109 мектептің 1996 жылғы түлегімін. Мектепті аяқтаған соң, Алматы қаласындағы әл-Фараби атындағы Ұлттық университетке оқуға түсіп, «Инженер-метеоролог бакалавры», «Экология магистрі» дәрежесін алдым. Магистратурадан соң Х.Досмұхамедов атындағы университетте ұстаздық қызметте, одан соң Алматыда Экология және ғылыми зерттеу институтында ғылыми қызметкер болып еңбек еттім. 2009 жылы Астанаға қоныс аударып, қызметімді әрі қарай да өз мамандығыммен жалғастырудамын. Астана – болашақтың қаласы. Алға қойған мақсаттар мен тың идеяларды жүзеге асыруда елордамызға көшіп келдік. Бүгінгі таңда Экология және Табиғи ресурстар министрлігі, Ұлттық гидрометеорология саласында басқарма бастығы болып қызмет етемін. Еңбек жолымда Түркия, Испания, Ресей, Жапония елдерінде біліктіліктен өтіп, қызметіме өз үлесімді қосып келемін. Отбасылымын, жолдасым Бауыржан да осы Қармақшы өңірінің тумасы. Ләйлә, Нұрәлі атты ұл-қыздардың ата-анасымыз. Жолдасым Ұлттық Қауіпсіздік комитеті, Шекара қызметінде еңбек етеді. Қызымыз Ләйлә Алматыда, ұлымыз Нұрәлі Астанада дүниеге келген. Елордамыз Астана – менің сүйікті қалам. Сарыарқаның төрінен орын алған Астана – бақытты сәттеріміздің куәсі болған жарқын қала. Сондықтан да біз Астананы жақсы көреміз. Ақниет Қиналбаева, студент:– Қазіргі таңда мен елордамыздағы Астана медициналық университетінің «жалпы медицина» факультетінде мемлекеттік грантпен білім алудамын. Көбісі Астанада оқимын десем, ауа райы жайлы сұрақтарды көп қояды. Мен Жосалымен салыстырғанда аса айырмашылықты байқамадым. Мұнда қызықты, заманауи көптеген жаңа нысандар бар. Әртүрлі ғимараттар мен гүлденген әсем көшелерге тез үйренісіп кетуге болады. Астанаға келушілердің басым көпшілігі секілді мен де білім алуға және қызмет етуге келдім. Осы салада жүргеннен кейін, медицина бағыты туралы айтар болсам, қалада өзгелермен салыстырғанда біршама артықшылықтар бар. Емхана мен аурухана саны көп. Жаңа құрылғылар тұрғындарға қызмет көрсетуге жеңілдік туғызады. Оқу жылы аяқталғанда біз университет көмегімен қалада халыққа көмек беру және алған білімімізді &nbsp;іс жүзінде дәлелдеу мақсатында емханаларға тәжірибе жасауға барып тұрамыз. Жастардың білім алуына да қолайлы жағдай жасалған. Сабақтарымыз ерекше форматта өтеді. Онымен қоса қызықты зерттеулер жүргіземіз. Қала жыл сайын көркею үстінде. Астананы болашағы жарқын қала ретінде, осында оқуға түсуді мақсат еткен едім. Түстім де. Оған еш өкінген емеспін. Болашақта білікті кардиолог болғым келеді. Астана мен үшін жастардың, дамудың, әсемдіктің, болашақтың қаласы. Отанымның астанасы Астананы ештеңеге теңгермеймін, &nbsp;думаны мол студенттік шақтың, жалынды жастықтың ордасы әрдайым жүрегімнің түкпірінде сақталмақ.Мерей Бөгенбаев, әскери қызметкер:– Мен мұнда әскери қызметкермін. Астанада тұрып жатқаныма 3 жылдан асты. Алматыда 4 жыл жоғары білім алдым. Алайда қызмет жолым елордамен тікелей &nbsp;байланысты. Осында бір жылдай қызмет атқарған соң, қармақшылық арумен шаңырақ көтердім. Одан кейін Алла аманат етіп сәби сыйлады. Былтыр өзіміздің пәтерімізді алдық. Осындай жақсы жаңалықтарымның куәсі – Астана. Мұнда бір еркіндік бар. Биік деңгейлі орта, тілеулес жандар. Сонымен қатар, өте әдемі шаһар. Сәл болмасаң, мүлде танымай қаласың. Биік нысандар пайда бола кетеді. Күн санап көркейіп жатыр. Елордамыз Астана – жастардың қаласы дер едім. Жүздеген, мыңдаған жас осылай қарай ағылып жатыр. Олардың армандары алдамайтынына сенемін. Өйткені, Астана – зор мүмкін¬діктер мекені. Себебі біздің де армандарымыз орындалып келеді. Бұл үлкен қалада үнемі қайнаған тіршілік, айналаңда жанталасып-жағаласып жүрген бір адам, яғни бәсекелестік өте жоғары, ал бәсекелестік бар жерде ғана алға жылжуға, дамуға мүмкіндік бар. Мұнда жаныңа не керектің бәрі бар және оның артықшылықтарын көре білу және оны мүмкіндік ретінде пайдалана білу – әр адамның өз қолында. Қазаққа құт мекен бол, Астана!

Қазақстан және Қызылорда облысының жаңалықтары