<a href="https://kyzylorda-news.kz/ru">Kyzylorda-news.kz.</a> Жастар саясатын жүргізу тұрақты бақылау мен жүйелі сараптауды қажет етеді. Әсіресе, жас буын арасындағы діни ахуал мемлекеттің жіті қадағалауына мұқтаж. Осы орайда білімді теологтар мен тәжірибелі әлеуметтанушылардың маңызы жоғары екенін айқын сезінеміз. Аймақ жастарының діни ахуалын зерттеуде жемісті еңбек етіп жүрген Бақберген Сарсенбайұлы да облыстағы білікті маманның қатарында.– Бүгінде діни білімді сенімді орта, қауіпсіз мекеннен алу маңызға айналды. Алғашқы сауалды шетелде діни білім алып жатқан Сыр жастарынан бастасақ. Тәуелсіздің жылдарынан бері қанша азамат шетелде діни білім алды? Бүгінде мемлекет тарапынан арнайы белгіленген шетелдік ЖОО тізімі бар ма?&nbsp;– Шетелде діни білім алуға барлық жағдай жасалғаны белгілі. Мемлекет тарапынан түрлі білім гранты, «Болашақ» мемлекеттік бағдарламасы және демеушілердің қаражат есебінен шетелде діни білім алып жатқан азамат жетерлік. Оның ішінде, әрине, өзіміздің Сыр өңірінің жастары да бар. Шетелде діни білім алудың жақсы жақтарымен қатар, жағымсыз тұстарын да көз көріп, құлақ естіп жүр. Осы орайда, олар шетелдің діни білімімен қоса, ол жақтың мәдениетін, тұрмыс-салтын меңгеріп келетінін айта кетуіміз керек.&nbsp;Тәуелсіздік алғаннан бері шетелде теріс діни білім алған кейбір ұлан ел аумағына түрлі жат ағым мен көптеген діни топтың енуіне себеп болды. Соның салдарымен дін мамандары мен имамдар әлі күнге дейін күресуде. Сол үшін бүгінгі таңда ҚМДБ шетелде діни білім алсам деп ниеттенген жастарға бірнеше елдің ЖОО-дарымен келісімшартқа отырған. Ол елдердің қатарында Түркия («Хасики»), Мысыр («Әл-Азһар»), Иордания сынды мемлекеттер бар.– Жастарды радикалды діни ағымнан алыс ұстау бағытында қандай жұмыс жүргізілуде?&nbsp;– Жастарды радикалды діни ағымдардан аулақ ұстау үшін ата-бабаларымыз ұстанған сара жолды, яғни, имам ағзам Абу Ханифа мазһабын насихаттайтын медреселер мен мектептер көптеп бой көтеруде. Иә, жастардың арасында басқа елдермен салыстырғанда дінге қызығушылық өте жоғары. Сондықтан да мұндай оқу орындарының көбеюі біз үшін өте маңызды болып тұр. Оған қоса теолог мамандардың жер-жерде профилактикалық &nbsp;түсіндірме жұмыстарын жүргізуі халықтың көзі ашып, деструктивті діни ағым ұстанушыға қарсы иммунитет қалыптастыруда.– Дін мен дәстүр сабақтастығын қалай түсінесіз?&nbsp;– Қазақ халқының дәстүрі ислам дінімен біте қайнасып жатқаны ақиқат. Меніңше, бұл пікірге тек қазақтың салт-дәстүрінің байыбына бармай байбалам салатын надан адамдар ғана қарсы болар. Өйткені, оқыған-тоқыған адам мұндай жаңсақ ойға бармасы анық. Кезіндегі Қасым ханның қасқа жолы мен Есім ханның ескі жолы, Тәукенің «Жеті жарғысындағы» исламның сарындары бұл мәселеге анық дәлел болады. Ислам діні де ешқашан дәстүрге қарсы шықпаған. Тіпті, кейде ғалымдар әр елдің дәстүріне сүйеніп пәтуа шығарған, өзекті мәселелерге дәстүрден дәлел алған. Сондықтан ислам діні мен қазақ халқының дәстүрі егіз ұғым іспетті.– Әлеуметтік желі ақпарат таратудың негізгі нысанына айналды. &nbsp;Әлеуметтік желілерде діни контенттерді таразылап отырасыздар ма?&nbsp;– Әлеуметтік желіде сақ болу керегі айтылып та, жазылып та жүр. Біздің Дін мәселелерін зерттеу орталығында арнайы БАҚ бөлімі жұмыс істейді. Сол жерде мамандар мониторинг жасау арқылы ҚР бойынша тыйым салынған сайттар мен уағызын тыңдауға болмайтын уағызшылардың діни материалдарын таратқан, жүктеген не лүпіл басқан аккаунттарды қадағалап отырады. Әрине, бұл әдіс өз кезегінде жемісін беріп жатыр. Алайда ата-аналар тарапынан да үйде смартфон қарап отырған баласына, жақындарына, іні-қарындастарына қадағалау болса, олқылықпен күресу анағұрлым жеңіл болар еді.– Дәстүрлі емес діни ағым жетегіндегі жастарды қайта әлеуметтендірудің басты жолы қандай деп ойлайсыз?&nbsp;– Жат ағым жетегінде кеткен жастарды қайта әлеуметтендіріп, қоғамға бейімдеу үшін оларға ең алдымен мемлекет тарапынан қолдау керек деп ойлаймын. Яғни, олардың мемлекетке деген сенімін қайтару қажет. Сондай-ақ оларды оқшаулап, шеттетуден аса сақ болу керек. Керісінше, ортаға тартып, қандай да бір көмек керек болған жағдайда, көмек қолын созатын болсақ, олардың да ойының, ұстанымының өзгерері анық.– Мешіт пен медресе құрылысына қаржы жинайтын қоғамдық қор саны артты. Бұл орайда бақылау бар ма, заңбұзушылықтар кездесе ме?– Мешіт пен медресе жайына келер болсақ, елімізде мешіт саны өте аз. Сонымен қатар, еліміз зайырлы болғандықтан, мемлекет тарапынан мешіт пен медреселердің құрылысына қаражат бөлінбейтіні белгілі. Осы себепті халық қаражат жинап, мешіт пен медресе салу көбейді. Бұл ретте, салынып жатқан ғимарат ҚМДБ-ға қарайтын болса, мүфтияттың қажеттілігіне жарайтын болса, құптарлық іс деп ойлаймын. Өйткені, жат ағыммен күресу үшін біздің рухани бай және білімді болуымыз өте маңызды.– Әңгімеңізге рақмет!

Аймақта діни ахуал тұрақты

<a href="https://kyzylorda-news.kz/ru">Kyzylorda-news.kz.</a> Қазақстандықтардан түсетін салық – мемлекеттік кірістің бір бөлігі. Алайда жеке меншігіне тиесілі салықты төлемей, жылдар бойы қашып жүретіндер бар. Осы орайда Қызылорда қаласы бойынша Мемлекеттік кірістер басқармасы басшысының орынбасары &nbsp;Жорабек Нәбиұлымен өңірдегі салық төлеу мәдениеті жөнінде сұқбаттасқан едік.&nbsp;– Жеке меншікке салық төлеуде кімдерге жеңілдік қарастырылған?– Салық Кодексінің 526-бабы 2-тармағына сәйкес жеке тұлғаларға мүлік салығы бойынша келесідей жеңілдіктер қарастырылған. Атап айтқанда Кеңес Одағының Батырлары, Социалистiк Еңбек Ерлерi, "Халық қаhарманы", "Қазақстанның Еңбек Ері" атақтарына ие болған, үш дәрежелi Даңқ орденiмен және "Отан" орденiмен наградталған адамдар, "Батыр ана" атағына ие болған, "Алтын алқа" алқасымен наградталған көп балалы аналар, бөлек тұратын зейнеткерлер — меншiк құқығындағы барлық салық салу объектiсінiң жалпы құнынан республикалық бюджет туралы заңда белгіленген және тиісті қаржы жылының 1 қаңтарында қолданыста болатын айлық есептік көрсеткiштің 1000 еселенген мөлшері шегiнде; &nbsp;Ұлы Отан соғысының ардагерлері, жеңілдіктер бойынша Ұлы Отан соғысының ардагерлеріне теңестірілген ардагерлер және басқа мемлекеттердің аумағындағы ұрыс қимылдарының ардагерлері, Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталған адамдар, сондай-ақ 1941 жылғы 22 маусым – 1945 жылғы 9 мамыр аралығында кемінде алты ай жұмыс істеген (қызмет өткерген) және Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен наградталмаған адамдар, мүгедектер – меншік құқығындағы барлық салық салу объектісінің жалпы құнынан республикалық бюджет туралы заңда белгiленген және тиiстi қаржы жылының 1 қаңтарында қолданыста болатын айлық есептік көрсеткіштің 1500 еселенген мөлшері шегінде, &nbsp;жетім балалар және 18 жасқа толғанға дейінгі кезеңге ата-анасының қамқорлығынсыз қалған балаларға жеңілдік бар.&nbsp;Ал ҚР Салық Кодексінің 490-бабына сәйкес меншігіндегі бір автокөлік құралы бойынша:1) Ұлы Отан соғысының ардагерлері, жеңілдіктер бойынша Ұлы Отан соғысының ардагерлеріне теңестірілген ардагерлер және басқа мемлекеттердің аумағындағы ұрыс қимылдарының ардагерлері, Ұлы Отан соғысы жылдарында тылдағы қажырлы еңбегi мен мінсiз әскери қызметi үшiн бұрынғы КСР Одағы ордендерiмен және медальдарымен наградталған адамдар, сондай-ақ 1941 жылғы 22 маусым – 1945 жылғы 9 мамыр аралығында кемінде алты ай жұмыс істеген (қызмет өткерген) және Ұлы Отан соғысы жылдарында тылдағы қажырлы еңбегi мен мінсiз әскери қызметi үшiн бұрынғы КСР Одағы ордендерiмен және медальдарымен наградталмаған адамдар, Кеңес Одағының батырлары мен Социалистiк Еңбек ерлерi, "Халық қаhарманы", "Қазақстанның Еңбек Ері" атақтарына ие болған, үш дәрежелі Даңқ орденiмен және "Отан"орденiмен наградталған адамдар, "Батыр ана" атағына ие болған немесе "Алтын алқа" не "Күмiс алқа" алқаларымен наградталған көп балалы аналар;2) меншiгiнде мотоколяскалары мен автомобильдерi бар мүгедектер көлік құралы салығын төлеушілер болып табылмайды.– Өңірде салықтан жалтаратындар көп пе?— Кірістер органдары салық төлеуші (салық агенті) ұсынған есепті, уәкілетті мемлекеттік органдардың мәліметтерін, сондай-ақ салық төлеушінің қызметі туралы басқа да құжаттар мен мәліметтерді зерделеу және талдау негізінде камералдық бақылау жүзеге асырылады.Осыған сәйкес, салықтан жалтару фактісі анықталған жағдайда кірістер органдарымен салық төлеушіге ҚР Салық Кодексі 96-бабына сәйкес камералдық бақылау нәтижесімен анықталған бұзушылықтар бойынша хабарлама жасалады. Оның орындалу мерзімі 30 жұмыс күнін құрайды. Мерзімінде орындалмаған жағдайда, Салық Кодексінің 118 бабына сай, салық төлеушінің банктік шығыс операциялары тоқтатылу бойынша өкім шығарылады.Қазіргі танда, салықтан жалтаратын салық төлеушілердің саны аз емес, бірақ олардың барлығы автоматтандырылған ақпараттық жүйелер арқылы анықталып, тиісті жауапкершілікке тартылатын болады.– Жылдар бойы салық төлемей келе жатқандарға қандай шаралар қолданылады?– Барлығы заңмен шешіледі. Мәселен, Салық Кодексінің 116-бабына сәйкес салық төлеушінің (салық агентінің) белгіленген мерзімде орындалмаған салықтық міндеттеменің орындалуын қамтамасыз ету тәсілдері мынадай: 1) салықтардың және бюджетке төленетін төлемдердің төленбеген сомасына өсімпұлды есепке жазу; 2) салық төлеушінің банктік шоттары бойынша шығыс операцияларын тоқтата тұру; 3) салық төлеушінің кассасы бойынша шығыс операцияларын тоқтата тұру; 4) салық төлеушінің мүлікке билік етуін шектеу тәсілдерімен қамтамасыз етілуі мүмкін.– Салық төленбесе, мүлік иесінің карталары бұғатталып, іс сотқа жіберіледі. Ал салық төленген сәтте сот орындаушыға қанша пайызы беріледі? – Бұл сұрақтың жауабы да арнайы заңда қарастырылған. Берешек бюджет есебіне өндірілмеген жағдайда жеке сот орындаушыларға бағдарламалар арқылы салық бұйрықтары жолданады. Осыған байланысты, жеке сот орындаушылар өз құзіреттілігіне сәйкес мәжбүрлеп өндіру шараларын қабылдайды. Нақтырақ айтар болсақ: - атқарушылық құжаттарды орындайды; - борышкерлердің ел аумағынан шығуын уақытша шектейді; - мерзімді орындау үшін борышкерлердің жұмыс орындарына атқарушылық істі жолдайды; - жүргізуші куәлігіне шектеу салады; - борышкерлердің мүліктеріне тиым салады; - мүлкінен өндіріп алу және берешектерді төлеуден жалтарып жүрген борышкерлерді әкімшілік жауаптылыққа тартады. Өз кұзіреттігіне сәйкес 25 пайызға дейінгі өндірісте тұрған сомаға сәйкес қызметіне сома алады.– Мемлекеттік кіріске бір жылда қанша салық төленді?– Өткен жылы жалпы мемлекеттік бюджетке 109 млрд 487,8 млн теңге түсім түсіп, 2021 жылмен салыстырғанда 18 млрд 288,7 млн теңгеге артты. Оның ішінде, республикалық бюджет түсімі 67 млрд 432,2 млн теңгені құрады. Ал жергілікті бюджет түсімі 42 млрд 55,6 млн теңге болып, 2021 жылмен салыстырғанда түсім 3 млрд 849,9 млн теңгеге артқан. Дегенмен салық төлеу мәдениеті енді ғана қалыптасып келеді.– Сұқбатыңызға рақмет!

Облыста салық төлеу мәдениеті қалыптасқан

<a href="https://kyzylorda-news.kz/ru">Kyzylorda-news.kz.</a> Нарық заманы қоғамды жаңа арнаға бет бұрғызды. Жансыз дүниеге жан бітіріп креатив ролик дайындайтын мобилографтар бүгінгі қоғамда трендте. Себебі қазіргі заман бейнежазбаға жан бітіре алатын қабілетті және еңбекқор жандардың қызметіне тәуелді. Яғни кәсібін дөңгеленткісі келетіндер мобилографтардың жұмысына &nbsp;қомақты ақша ұсынуға даяр. Сондықтан 4 жыл оқыған мамандығын мобилографияға алмастырғандардың қатары қалың. Соның бірі – Нұртай Төреахмет.Сантехникадан СмартфонғаМамандығымды естіген жұрттың біразы таңқалады. Негізі бітірген мамандығым сантехник. Бірақ видеограф саласын таңдадым. Өйткені мамандығыма сәйкес біліктілігім өте төмен. Қолдан келмейтін шаруа десемде болады. Сондықтан әр адам өзінің қабілетіне қарап, жұмыс істеуі керек деп есептеймін. Мектепте оқып жүргенде қай сабақтан нашар баға аламыз, сол пәннен қосымша курстарға қатысып, әлсіз тұсымызды жақсартуға әлек болатын едік. Бірақ қазір керісінше болуы керек екенін түсіндім. Адамның бойында қай қабілет басым болса, соны дамыту керек.Мектеп бітіріп, колледжде оқып жүрген кезімде видео түсіруге, монтажға қызыға бастадым. Сөйтіп тойларды түсіріп, қосымша табыс таптым. Өзімде арнайы құрылғылар болмаған соң студияларға жалданып жұмыс істедім. 2020 жылы карантин басталып, күн көрістің қамымен істеп жүрген тіршілігім тоқтап қалды. Күнделікті ресторанда болатын тойларға шектеу қойылды. Бастапқыда біраз қиналдық. Күнделікті келетін қаржымыз таусылды. Түрлі ойлар келіп, тығырықтан шығудың амалын қарастырдым. Қолымда заманауи iphone. «Телефонды неге кәдеге жаратпасқа?» деген ой келді. Қыран Талапбектың трендте тұрған шағы. Онлайн курсына жазылып, мобилографияны меңгеріп алдым.&nbsp;Мобилография – мамандық&nbsp;Заманның талабына сәйкес мобилографияны жаңа мамандық деп қарау керек. Өйткені бұл салаға бет бұрушылар күн санап артып келеді. Оқу орындары секілді мұндада дәрістер болады. Дәріс арқылы маман болып шығады. Бұл саланы толықтай білмеген адамдар видео түсіру мен монтаждау оңай деп ойлайды. Ал шынына келгенде бұл да үлкен шығармашылық жұмыс. Тапсырыс берушімен тіл табысу, оның ойындағыдай етіп ролик жасау – қиынның қиыны. Кейбір кезде адамдар мобилографтарға ақша бергенше, өзіміз түсіріп аламыз деп ойлайды. Бірақ кәсіби түрде айналысқан адамның мәнері мен үйренуші адамның видеоларында жер мен көктей айырмашылық бар Күніне тек 1-2 видео түсіруге болады. Видео түсіретін де арнайы уақыт болады. Кешке видео түсіру қиындық туғызады, ал күндіз тым жарық. Көбіне кәсібін енді бастап, көрілім (охватты) көтеретін адамдарға видео түсіріп берем. Жұмыстың қиындығы, әрине баршылық.&nbsp;Жан-жақты болсаң, өзіңе жақсыКреатив видео түсіру үшін ең алдымен шабыт қажет сосын жоспар керек. Ал онан кейін &nbsp;идея, оған қандай актер түседі немесе кімді, нені түсіремін деген сұраққа жауап табу маңызды. Сценарий, қандай өлшемде, қанша минут, қандай кадр, анимация, бәрін жазып алу керек. Видеоны түсіргенде мобилограф продюсер, режиссер, стилист болады. Түсірілімде бүкіл саланы білсең жақсы. Ал жарнамалық ролик түсіретін болсаң, 10 секунд болу керек деген сияқты талаптар да бар. Осы 10 секундта роликте 12-13 кадр болуы тиіс. Мұны динамикалы, көз ілеспес жылдамдықпен түсіреді.Табыс қомақтыМойындау керек, қазір Қазақстанда мобилографиямен айналысушылар өте көп. Жаңа салаға сұраныс та жоқ емес. Бірақ әркімнің әдісі әртүрлі. Сол үшін әрдайым бәрінен ерекшеленуге, басқалар білмейтін «фишкаларды» бірінші білуге талпынамын. Мен де өзімнің білігімді арттыру мақсатында түрлі әріптестерімнің сабағына қатысып, тәжірибемді молайтамын. Бұрындары таңнан кешке дейін аз қаржыға жұмыс істесем. Ал қазір ай сайын кем дегенде 300 000 теңге ақша табамын. Сосын бір түсінгенім: бір жерде 30-40 жыл тұрақты жұмыс істеп, тәжірибе жинасам, жетістікке жетемін деген ой – қажет емес. Жететін жетістікке ештеңені күтпей, қазір жету керек.Байқаулар тәжірибені арттырадыҚай саланы алып қарасаң да белгілі бір байқаулары бар. Мысалы, журналистер де шығармашылық, спортшылар да чемпионат деген секілді. Міне сол байқаулар адамның жоғары шыңдалуына әсер етеді. Биыл қала күні мерекесіне орай мобилографтар арасында байқау ұйымдастырылғанда қатты қуандым. Шыны керек, қалалық жастар ресурстық орталығының бастамасын қолдаған әкімдікке ризашылығымды білдіремін. Жаңа әріптестерді көріп, Қыран Талапбектен оффлайн дәріс алдық. Бұл – мобилографтар үшін үлкен тәжірибе алаңы болды. Мереке қарсаңында ұйымдастырылған байқау нәтижесінде бас жүлдені еншіледім. Әріптестерім Дархан Әбілқасым мен Темір Ерсұлтанның да роликтері жоғары бағаланып, жүлдегерлер қатарынан көрінді.&nbsp;

Мобилографқа сұраныс жоғары

<a href="https://kyzylorda-news.kz/ru">Kyzylorda-news.kz.</a> Қылқалам мен бояудың құдіреті арқылы бір ғана туынды жан дүниеге тереңірек әсер сыйлаған сәтте адам талантының шексіз екеніне таңданып жатамыз. Айтылмаған сөзді, қозғалмайтын тақырыпты, фото немесе бейнежазбаға назар салғанда байқалмайтын сұлулықты сезуге мүмкіндік беретін де – сурет туындысы.«Әлемді құтқаратын сұлулықты» әр сәттен, жолай кезіккен әр адамның кескінінен, табиғаттың тылсым сырынан байқай алатын суретшінің еңбегі қоғамда еленбей жатады. Алайда бүгінгі кейіпкерлеріміз, жас суретші – Нұржан Нұғыман мен Ерсұлтан Темірдің жасаған әр туындысы қаланың бұрыш-бұрышында көңіл көзіне эстетикалық ләззат сыйлап тұр. Сонымен бірге екеуінің орталықта орналасқан арт студиялары қызылордалық бүлдіршіндер мен жастардың сурет салу қабілеті, шығармашылық біліктілігін арттыру мақсатында өз жұмысын бастап кетіпті.Нұржан Нұғыман – М.Мәметова атындағы жоғарғы педагогикалық колледжінің түлегі. Ерсұлтан Темір екеуі 2014-2018 жылдары бейнелеу өнері және сызу мамандығы бойынша кәсіби білім алған. Тай құлындай тебісіп қатар білім алған қазалылық қос жігіт колледж қабырғасынан бастап әлі күнге дейін берік достық пен өз ісіне жан-тәнімен берілген кәсібиліктің үлгісіне айналғандай.<blockquote>«Студия ретінде ашып, жұмыс істеп жатырмыз. Нәтиже жаман емес. Ал өзіміз диплом алған сурет өнері бойынша тапсырыс қабылдап, сүйікті ісімізді кәсіпке айналдыру жолындағы алғашқы әрекет 2017 жылдың наурыз айынан басталды. Шамамен наурыздың оны. Тапсырыс деп айтуға да келмейді. Таныс досымыз көмектесуді сұрады. Ағасы қалада Play Station ойын клубын ашып жатыр екен. Ол кезде мұндай ойын клубтары көп емес. Жаңадан ашылғанның бәрі хит. Ойын клубтары енді ғана ашылып, кәсіпкерлік бағыты жайлап дами бастаған уақыт.Әрі ол кезде екеуміздің де қабырғаға сурет салудан тәжірибеміз жоқ. Тек қағаз бен холстқа салып үйренген біз «сала аласыңдар ма?» деп сұраған досымызға сенімді түрде жауап бердік. Осылайша алғаш рет ойын клубының қабырғасына арнайы сурет салып, ол көңілден шықты. Студентпіз ғой. Қаладағы кафе, ресторандарда даяшы боп жұмыс істеп, әрі кетсе 2000 теңге алатынбыз. Ал сол күні алғашқы жұмысымызды аяқтап, қайтатын кезде ағасы 5000 теңге берді. Біз тек досымыздың өтініші үшін ғана келгенбіз. Сонда екеуміз сурет салып та ақша табуға болады екен ғой деп таңданып, қуанып қайттық. Осылайша қабырғаға тапсырыспен сурет сала бастадық. Әрі қаладағы басқа орындар да осы Play Station клубынан көріп, сурет салғызу үшін арнайы тапсырыс бере бастады», – дейді талантты жас Ерсұлтан.</blockquote>Жоғарыда айтып өткеніміздей, Ерсұлтан мен Бағжан арт-орталықта сурет үйірмесін жүргізеді. Мұнда 5 жастан бастап ересектерге дейін үйірмеге қатысып, қабілетін дамыта алады. Тіпті, бір реттік сурет салу да қарастырылған. Яғни күйбең тірліктен шаршаған адамның демалыс ретінде орталықта өзі қалаған суретін салып, үйіне алып кетуіне мүмкіндік бар. Бұл бағыт арт-терапия деп аталады. Өнермен емделу, демалу десек артық емес.<blockquote>Ал үйірме қағаз, холст, қабырғаға сурет салуды үйрену бойынша үш бағытта жүргізілуде. Жалпы орталықта Бағжан мен Ерсұлтаннан бөлек теориялық білім беретін Маржан Байзақ есімді кәсіби маман бар. «Өз басым суретке икемі бар жастарға қабырғаға сурет салу бағытында қатысып, білім алуды ұсынамын. Өйткені қабырға суреті – негізгі жұмысы бар адамға қосымша табыс көзі әрі бос уақытында айналысатын хоббиі болмақ. Өзіне ұнайтын дүниені табыс көзіне айналдыра алады. Қазір оннан аса шәкірт дайындап жатырмыз. Аптасына үш рет немесе екі рет қатысуға болатын екі график бойынша ұйымдастырылуда. Сонымен бірге қабырғаға сурет салу курсы бөлек сатылымда. Бағасы өте тиімді. Әрі қабырғаға сурет салуды меңгеріп алған адам бір тапсырыспен-ақ үйірме ақысын бірнеше есе артық қылып қайтарып алады», – дейді суретші Нұғыман.</blockquote>Ресми түрде алғашқы тапсырыстан 1500 теңгеден бөліп алғанын күліп еске алған қос дос қаладағы көптеген бизнес жобалардың, тамақтанатын орын, тіпті, білім беру мекемелерінің қабырғаларына сурет салып, дизайнын қос қолы мен қылқаламның, сан қилы құпиясы бар бояулардың әсерімен әсемдеген. Мәселен, «Balaland» балалар ойын-сауық орталығы, «Renzo» рестораны, түрлі балабақшалардың көркем қабырғалары қос суретшінің қолынан шыққан. Тіпті, өзге қалалардан да тапсырыс берушілер жеткілікті. Қазалы қаласындағы ұлы данышпан, ақын Абай Құнанбайұлының муралы – соның айғағы. Маңызды жобаларға суретші ретінде бекітіліп, жауапкершілік алып жүргенінен өнердің сатылмайтынын, оның құны биіктемесе, түспейтінін ұғынамыз.

Сыр бойылық суретшілер қабырға суретін салуды үйретуде

<a href="https://kyzylorda-news.kz/ru">Kyzylorda-news.kz.</a> Сырда велоспорттың қарқыны тұралап, Марат Сатыбалдиев пен Сергей Капустинның жетістігін жалғайтын шабандоздар жоқтың қасы еді. Жақында Үндістанда үміт оянып, Аслан Силықбек қос аңыздың жолын қайта жалғады. Нью-Делиде жерлесіміз жеңімпаз атанып, Сыр спортының жарқын көрінісін байқатты. Азияны бағындырған шабандозды туған жерге келісімен әңгімеге тарттық.– Аслан, Азия чемпионатындағы алтын жүлдең құтты болсын! Алтын &nbsp;оңай келмегені анық…– Рақмет, жарыс жоғары деңгейде өтті. 4 шақырымды құрады. Азия біріншілігіне ұзақ мерзімде дайындық жүргіздік. Астана қаласында оқу-жаттығу жиындары бірнеше айға созылды. Одан бөлек Парижде әлем кубогына қатысып, өз-өзімізді қамшылап алдық. Парижде көрсеткішке қарағанда физикалық күш қуат жинауымыз маңызды болды. Бапкердің тапсырмасына сәйкес барлығын сәтті жүзеге асырдық. Үндістанға баруымыздың өзі қызық болды. Бірден бара салмадық. Алдымен іріктеу болды. 8 велошабандоз Астана қаласында дайындалдық. Бас бапкер Тимур Харисов сегіздің ішінен алтауын қалдырды. Жарыс таяған сәтте тағы біреуімен қоштасуға тура келді. Солай 5 жүйрік Азияға аттандық.– Үндістанда адаптация қалай қалыптасты?– Дұрыс айтасыз, спортшылар үшін адаптация өте маңызды. Климат ауыстыру кейбіреуіне оң нәтиже берсе, кейбіреуіне керсінше. Сондықтан адаптацияға қатты көңіл бөлеміз. Үндістан Азияда орналасқандықтан қатты әсер етпеді. Ауа-райына жылдам бейімделіп кеттік.– Велотрек сайысы командалық эстафетадан тұратыны белгілі. Үндістанда дәл осы командалық сайыстан топ жардың. Жабық аренадағы &nbsp;жарысқа тоқталайықшы…– Командамыз 5 спортшыдан жасақталды. Оның біреу қосалқы құрамда болды. Негізгі құрамнан бірі жарақат не болмаса сырқаттанып қалса соның орнын басатын болды. Ал негізгі құрамда Максим Тарскин, Илья Карабутов, Вадим Белугинмен бірге өнер көрсеттік. Іріктеу сынында сүрінбедік. Іріктеу кезеңдерде жарысты бірінші бастап жүрдім. Бұл командалық жарыста күрделі кезең болып есептеледі. Бар ауыртпашылықты мойныма алып, финалға өтуге барымды салдым. Ал финалда мәрені аяқтайтын қорытынды шабандоздың қызметін атқардым. Кореядан 3 секундқа алға шығып, жеңімпаз атандық. Үздік үштікті жарыстың қожайындары түйіндеді. Жалпы елге еңбектің арқасында абыроймен оралдық.– Әңгімеңізге рақмет!

Жерлесіміз Нью-Делиде жеңімпаз атанды

<a href="https://kyzylorda-news.kz/ru">Kyzylorda-news.kz.</a> Кәсіптің түр-түрі бар. Бірақ айналып келгенде сұлулық салоны, кандитерлік өнімдермен айналысатындар қатары көп. Тың кәсіп саусақпен санарлық. Өйткені барлығы біреу істегенді өндіріп әкету оңай деп есептейді. Мал шаруашылығына да бет бұрыс көп. Бұл істеуге жеңіл болып көрінеді. Ал Ұлан ерекше кәсіпті өрбітіп отыр. Оның қолынан шыққан дүниеге қызығушылық танытып жетерлік. Сонымен Ұланның алғашқы жасаған еңбегіне, күнделікті қанша тапсырыс қабылдайтынына тоқталып өтсек.&nbsp; &nbsp; &nbsp;&nbsp; – Ұлан, етікшілік – ата кәсіп деп жатады. Десек те аяқ киім тігудің өзіндік қиыны бар. Берекелі ісіңіз қалай бастау алды?– Бәрі карантин уақытында басталды. Жалпы әр бір кезең адамды бір іске бейімдеп алады. Карантин уақытында қимыл-қозғалыс азайды. Сабақ та бұрын-соңды болмаған онлайн форматқа көшті. Әке-шешеміздің де жұмысы тұралап қалды. Барлығымыз телефоннан әрі аса алмай қалдық. Анамның ине мен жіпке жақындығы бар. Қолы қалт етсе, құрақ көрпеше тігіп, тапсырыс қабылдайды. Содан анам мені де бейімдеуге көшті. Қазір ғаламтордың дамыған заманы. Шеберлік курстарды онлайн оқып, кәсіп бастауға болады. Инстаграмда «Алтын қол» деген парақша бар. Этнобрендке бейімдейді. Отбасымызбен ойласа келе онлайн курсын оқитын болдық. Курс тегін болмайтыны өзіңізге белгілі. 15 мың теңгемен сол курсты оқып, тоқыма тігуді үйрендік. Гүлнар Ақбұзауова ұстазымыздың күнделікті тапсырмасының көмегімен маман болып шықтық. Тоқыма тігемін деп шектеліп қалмау керек болды. Үйренгенімді пайдаға асыруым тиіс. Содан аяқкиім тігіп шығаруды қолға алдым. Алғашқы еңбегімді отбасым кәдеге асырып, бақылаудан өткізді (күліп).– Кәсіпке қандай технологияны қолданып отырсыз?– Нақты бір технологияны қолданып отырған жоқпын. Тоқыма бізі мен ирандық жіп – менің серігім. Егер кәсібім дамып, сұраныс артып жатса, жаңа технологиялар алып, шеберхана ашуды қолға аламын.– Бір тапсырысты қанша уақытта бітіресің?– Қолды енді жаттықтырып жүргенде 1 аяқкиімге 1 күнімді арнайтынмын. Қазір бұл іспен айналысып жүргеніме бір жылға жуықтап қалды. Сондықтан қазір уақытты текке жұмсамаймын. Бір күнде істейтін дүнием бір сағатқа алмасты. Егер тапсырыстың дизайны мен пішіні қиындау болса, 3-4 сағат уақытымды жұмсаймын.– Еңбегіңді қаншаға бағалайсың? &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp;– Бізде қолдан жасылған дүние қымбат тұрады деген ой қалыптасқан. Мен сол ойды түбегейлі өзгертуге тырысып жүрмін. Мысалы, үй жағдайында киетін аяқ-киімнің шикізатына 1700 теңге жұмсаймын. Қолдан жасалған өнім деп оның үстіне 5-6 мың теңге &nbsp;қоса алмаймын. Әрине, еңбекті де бағалаған жөн. Десек те халықтың ыңғайына қарағанымыз дұрыс. Менің қолымнан шыққан аяқ киімдердің қымбаты – 10 мың теңге болса, арзаны – 3 мың теңгені құрайды.– Құпия болмаса жас кәсіпкердің бір айдағы табысы қандай?– Құпия емес (күліп). Қазір істеп жатқан кәсібім ауқымды деп айта алмаймын. Белгілі бір шеберхана да жоқ. Қазір тек тапсырыс бойынша жұмыс істеудемін. Сондықтан шикізатты есепке алмағанда бір &nbsp;айдағы минималды табысым 70 мың теңге.– Қазақта «ерінбеген етікші болады» деген сөз бар. Бұған қарап етікшілік өнердің табандылықты талап ететінін байқаймыз. Дегенмен нарықтық заманда еңбектің жануы үшін қолдау да қажет сияқты. Мемлекеттен тарапынан көмек бар ма?– Әрине, дұрыс айтасыз. Екінің бірі бұл кәсіпті бейімдей алмайды. Бұл өте қиын кәсіп. Әзірге мемлекетке қол жайып отырғаным жоқ. Шама-шарқымша еңбектеніп жатырм. Бірақ мұны әрі қарай ілгерілеу үшін елден көмек қажет. “Атамекен” кәсіпкерлік палатасына кәсібімді ұсынып, қолдау алуға ұмытылып көремін.– Кәсібіңіз берекелі болсын!<figure class="image"><img src="https://knadmin.beoblood.kz/uploads/ulan_2_302a13a6d8.jpg" alt="улан 2.jpg"></figure>

Қызылордалық Ұлан тапсырыс арқылы аяқ киім тігеді

<a href="https://kyzylorda-news.kz/ru">Kyzylorda-news.kz.</a> Қоғамда әрбір маманның алатын өз орны бар. Соның ішінде медицина саласы қызметкерлеріне жүктелетін жауапкершіліктің салмағы зор. Өз міндетін ерекше ықыласпен атқарып, халықтың алғаусыз алғысына бөленіп жүрген ақ халаттылар өте көп. Бүгінгі кейіпкеріміз – облыстық психикалық денсаулық орталығының мейірбикесі &nbsp;Қарлығаш Полат.Қарлығаш – жас маман. Медицина саласына қадам басқанына санаулы жыл болды. Соған қарамастан ол өз міндетін тиянақты орындауымен ерекшеленеді. Науқастардың тілін тауып, дәрігерлердің нұсқамасын жауапкершілікпен орындайды.<blockquote>«1997 жылы Жамбыл облысы Қордай ауданында дүниеге келгенмін. 2012 жылы отбасылық жағдайға байланысты Қызылорда қаласына көшіп келдік. Мектеп бітіргеннен кейін облыс орталығындағы медицина колледжіне оқуға түстім. Осы мамандықты таңдағаныма ешқашан өкінген емеспін. Ең бастысы, халыққа қызмет көрсетеміз», – дейді мейірбике.</blockquote>Қар¬лығаш медицина саласын таңдауына анасы себепші болғанын айтады. Қатерлі дертке шалдыққан жақын адамын өзі емдегісі келген екен. Кейін мейіргер болу арқылы сырқаты мазалаған азаматтарға медициналық көмек көрсетуді мақсат етіпті.<blockquote>«Еңбек жолымды 2019 жылы Алматы қаласындағы емханалардың бірінде учаскелік мейірбике болып бастадым. 2020 жылы Қызылорда облыстық психикалық денсаулық орталығына жұмысқа қабылдандым. Бүгінде осы мекемеде қызмет атқарамын. Әлі үйренетінім көп. Бұл ретте тәжірибелі әріптестерімнің қолдауы көп», – дейді Қарлығаш.</blockquote>Адамның болашақта кім болатынына оның үйіндегі жағдайдың тигізер ықпалы бар. Мәселен, мұғалім болғысы келетіндердің отбасында ұстаздар бар екенін аңғарамыз. Ал дәрігер болуды армандайтындар ата-анасын емдеп, жағдайын жасауды бала кезден санасына құйып өседі. Қарлығаштың медицинаға келудегі ең бірінші мақсаты да сол. Ендігіде білімін шыңдап, әрі қарай жұмысына күш салу жоспары да бар.&nbsp;<blockquote>«Жұмысым өзіме ұнайды, қаншама жанның алғысын алып жатырмыз. Десе де мұны қанағат тұтып тоқтап қалмай, алдағы уақытта жан-жақты білім алып, мықты маман болғым келеді», – дейді ол.</blockquote>

Қызылордалық мейірбике алғысқа бөленуде

Құрылыс саласында қолтаңбасы қалған қызметкер

<a href="https://kyzylorda-news.kz/">Kyzylorda-news.kz.</a> Құрылыс саласының дамуы жергілікті жердің әлеуметтік-экономикалық тұрғыда өскенін білдіреді. Осы орайда Сырдария ауданында құрылыс саласы қарқынды түрде дамуда деп айтуға толық негіз бар. Әсіресе жеке тұрғындар бейбіт елдің берекелі әр күнін бақытқа балап, өз баспаналарын салып, қоныс тойларын тойлауда. Бұл – Тәуелсіздіктің мәуелі жемісі, бейбіт күннің айқын белгісі.Сырдария ауданының әкімшілік орталығы болып табылатын қасиетті Тереңөзек кентіндегі жаңа қоныстану аймағы айналдырған 4-5 жылдың ішінде үлкен құрылыс алаңына айналады деп ешкімнің ойламағаны анық. Бірақ адамның ойы үшін орындалмас оқиға қазіргі таңда шындыққа айналды. Бүгінде жаңа қоныстану аймағына 200-ге жуық тұрғын үй салынып, тұрғындар қоныс тойын тойлауда. Арасында қос қабатты коттедждер де менмұнадалайды.Ежелгі халық даналығында адам өмірге келгеннен кейін міндетті түрде үш іргелі істі атқаруы қажет екені айтылады. Соның алғашқысы ағаш отырғызу болса, екіншісі– үй салу, ал үшіншісі – ұрпақ өрбіту. Осылардың ішінде үйді тек қарым-қабілеті, денсаулығы және ертеңгі күнге деген сенімі бар адам ғана салады. Ал Сырдария ауданының кемел келешегіне деген сенімді жаңа қоныстану аймағындар бой көтерген зәулім үйлерден аңғаруға болады.Жаңа қоныстану аймағынан жер алып, жаңа баспана салуды жөн көрген жас отбасы иелері А.Асқарбек пен Н.Игілікбаева ата-аналарының қолдауымен былтыр жаңа үйдің іргетасын құйды. Жас жұбайлар биыл білікті құрылысшыларға жаңа үйлерінің қабырғасын өргізуде.<blockquote>&nbsp;Жас отбасы болған соң өзіміздің жеке үйіміз болса деп армандадық. Жаңа қоныстану аймағынан жер ашылып, тұрғын үй салу үшін жер учаскелері беріле бастағанда жер алып, іске кірістік. Бәрі ата-анамыздың арқасы, бұйырса жаңа үйге бір-екі жылда кіреміз деп ойлаймыз. Ең бастысы, ертеңгі күнге деген сеніміміз мол. Жұбайым екеуміз аудан орталығында жұмыс істейміз. Болашақта жаңа қоныстану аймағынан әлеуметтік нысандар ашылса, нұр үстіне нұр болар еді. Құрылысты қарқынды түрде жүргізіп жатқан көршілеріміз көп, – дейді Азамат бізбен әңгімесінде.</blockquote>Үй салуға мықтап кіріскен жас жігіттің сөзін көршісі Жігер есімді жас жігіт қуаттай түседі. Ол жаңа үйдің іргетасын биыл құйған және қазіргі таңда қабырғасын қалау жұмыстарын жүргізуде.<blockquote>&nbsp;Үй салар алдында ұзақ ойландық. Бұрын қалаға көшуді жоспарлайтынбыз. Ауданның соңғы жылдардағы даму қарқынын бағамдап, аудан орталығынан жаңа заман талабына сай үй салуға болатынын түсіндік. Биыл 14х18 пішінде үйдің іргетасын құйдық. Әрине құрылыс заттарының бағасы қымбат. Дегенмен қатарымыздан қалғымыз келмейді. Оның үстіне үйдің үлкені болғандықтан бөлек шығуымыз қажет. Сондықтан жаңа үйді ертерек аяқтап, қоныс тойын тойлауға барлық күш-жігерімізді салып жатырмыз. Біздің бастамамызға қолдау көрсеткен әріптестеріме, достарыма ризашылығым шексіз, – дейді болашағынан көп үміт күттіретін Жігер.</blockquote>Жаңа қоныстану аймағын аралағанымызда жер үйлерден бөлек қос қабатты коттедждердің де бой көтеріп жатқанын аңғардық. Ұзын көше бойынан құрылыс заттарын сатуға арналған қойма да ашылған екен. Биыл бұл маңда цемент сатылыпты. Жеке кәсіпкер болашақта өз бизнесін кеңейтіп, халық сұранысына сәйкес басқа да құрылыс заттарын әкелмек. Тұрғындар алдағы уақытта жақын жерге балабақша салынғанын қалайды.Атап өту керек, жаңа қоныстану аймағындағы бірнеше гектар жер бұрын орман қорының меншігінде болды. Орман қорынан Тереңөзек кентінің теңгеріміне алу жұмыстары ауданды Сұлтанбек Тәуіпбаев басқарған тұста басталды. Жер қатынастары саласының ардагері Мұса Келдібаев сол қиын да күрделі жұмыстардың басы-қасында жүрді.<blockquote>&nbsp;Орман қорының меншігіндегі жерді Тереңөзек кентінің теңгеріміне алу оңай жұмыс болған жоқ. Бұл министрлік арқылы шешілетін мәселе. Ол үшін министрлікке облыс әкімі немесе облыс әкімінің орынбасары барып, дәлелдеуі қажет еді. Біз аудан басшысының тапсырмасына сәйкес еліміздің бас қаласына бірнеше рет жұмыс сапарымен бардық. Сол кездегі аудан әкімінің орынбасары Б.Маншарипов көп еңбек сіңірді. Бірлесе атқарған жұмыстарымыз еш кеткен жоқ. Ауданның құрылыс саласын басқарған А.Әбдуовпен пікірлесу барысында бұл орындалған арман болғанын айтқан еді. Расында да кенттің тынысы кеңейді. Қоныс той жасаушылардың қатары көбейе берсін, – дейді ауданның Құрметті азаматы Мұса Алпысбайұлы.</blockquote>Иә, жаңа қоныстану аймағындағы көшелердің бірізділікпен салынуына, қажетті инфрақұрылымның жүргізілуіне аудан әкімдерінің қосқан үлесі мол болды. Бұл жұмыстардың уақытылы, сапалы атқарылуына Тереңөзек кентінің бұрынғы әкімі Н.Бисембаев пен қазіргі әкімі Е.Бахтияров та өз үлесін қосты. Білікті архитектор алдағы уақытта жер кезегінде тұрған азаматтардың мәселесі шешілетінін, жаңа қоныстану аймақтары ашылатынын айтады.<blockquote>&nbsp;Жер кезегіне тіркелушілер саны жыл санап артып келеді. Бұл тұрғындардың үй салуға деген ынтасының жоғары екенін білдіреді. Жер кезегіне бір үйден бірнеше адамның тіркеліп тұрғанын да байқауға болады. «Тиесілі жерді алсам болды» деген қағидадан арылатын уақыт келді. Мемлекет уақытылы игерілмеген, мақсатты пайдаланылмаған жерді қайтарып алады. Сондықтан жер учаскесін алған азаматтар ертерек үй салып, қамдануы қажет. Өйткені барлығы заң аясында жүргізіледі, – дейді кент әкімі.</blockquote>Аудан орталығында биыл құрылыс жұмыстары қарқынды жүргізіліп жатқаны анық аңғарылады. Үйдің іргетасын құюшылардан құралған бригадалардың бос уақыты жоқ десек те болады. Біреу жаңа жер алып, үйдің орнын құммен биіктетіп жатса, екінші біреу жаңа үйдің іргетасын құюда. Тағысын тағылар үйдің қабырғасын қалау, сылау, сырлау, үйдің ішкі құрылыс жұмыстарын жүргізу секілді жұмыстардың әуресімен жүр. Бір сөзбен айтқанда баспана салуда бәсекелестік басым.&nbsp;&nbsp;

Cырдария ауданының құрылыс саласының дамуы қарқынды

<a href="https://kyzylorda-news.kz/">Kyzylorda-news.kz.</a> Ғұмырын бүкіл медицина саласына арнаған дәрігер денсаулық сақшыларына «Гипократ анты» деп аталатын дәрігерлік моральдық-этикалық ант мәтінін жазған. Қазір барлық ақ халатты абзал жандар қызметіне кіріспес бұрын ант беріп, қиын да жауапкершілігі зор жұмысқа кіріседі.Осындай әлемдегі ең ізгі мамандық иесі атану екінің бірінің қолынан келе бермейтіні анық. Аса ыждағаттылық пен төзімділікті қажет ететін маман иесі күрделі мамандықты меңгеру үшін ұзақ оқып, білім алады. Жас маман ретінде тәжірибе жинап, уақытпен санаспай адал еңбектің арқасында нағыз дәрігер атанады.Медицина қызметкерлерінің кәсіби мерекесі қарсаңында ауданда ана мен бала өміріне жауапты, әрі жаңа өмірдің аман-есен дүниеге келуіне себепші болып жүрген алтын қолды дәрігер, ауданның бас гинекологы Нейлә Әбішева туралы жазуды жөн көрдік.Нейлә Темірханқызы жүрек қалауымен, анасы Дүрияның аманатымен алдымен медициналық училищені оқып, арнаулы оқу орнын үздік аяқтап, жоғарғы оқу орнына түседі. Еліміздің сол жылдардағы ең іргелі оқу орындарының бірі Ақтөбе медициналық институтта 1988-1994 жылдары оқып, туған елге акушер-гинеколог болып оралады.Жас маманды туған жері құрақ ұша қарсы алып, аудандағы аурухананың перзентхана бөлімшесінде өз мамандығы бойынша алғашқы еңбек жолын бастайды.<blockquote>&nbsp;Әлі күнге дейін есімде, жас дәрігер болып перзентхана бөлімшесіне 3 тамыз күні қабылдандым. Сол күні ақылшы-ұстазым Әбілғазы Мерейдің қолдауымен алғаш рет жас ананы босандырдым. Медицина саласында сол жылдары қызмет ететін Райса Гриценко деген медбикенің Ресейден келген қызы өзінің тұңғышын дүниеге әкелді. Жас ананың аман-есен босанғанына қуандық. Дүниеге жаңа өмір әкелу, екі адамның өміріне жауапты болу деген не екенін түсіндім, – дейді дәрігер Нейлә Темірханқызы еңбек жолындағы алғашқы жұмыс күндерін еске алып.</blockquote>Осындай қиындығы мен жауапкершілігі қатар жүретін қызметте абыройлы болу ізденіс пен қажырлы еңбекті қажет етеді. Бүгінде жоғарғы санатты акушер-гинеколог атанған Нейлә Темірханқызы 28 жыл еңбек өтілінде көптеген жас кадрлардың өз ісінің білгірі атануына себепкер болды. Аудандағы акушер-гинекологтар Марал Ноғайбаева, Эльвира Галымова, Индира Өтемұратованың білікті тәлімгері Нейлә Темірханқызынан үйренгендері көп дейді әріптестері.&nbsp;<blockquote>&nbsp;Мықты дәрігер атану үшін ең алдымен үнемі біліктілікті жетілдіру қажет. Біздің қызмет уақытпен санаспауды қажет етеді. Тәуліктің кез келген уақытында ана мен баланың өмірі қыл үстінде болады. Сондай кезде дәрігер салқынқандылық танытып, дереу медициналық көмек беруге дайын болуы тиіс. Аудандағы перзентхана бөлімшесі 2018 жылы перинетальді көмектің екінші деңгейіне көшті. Міне содан бері перзентханада босанған барлық әйелдерге қажетті көмек көрсетіліп, сәбиін аман-есен өмірге әкелуіне барлық жағдай жасалды. Қазіргі кезде бөлімшенің меңгерушісі қызметін атқарып келе жатқан дәрігер Азамат Байдәулетов, дәрігер Салтанат Рүстембекқызы болашағынан зор үміт күттіретін мықты мамандар. Ал неанатолог Алтынай Ижазованың еңбегі ерлікпен пара пар. Мерізімінен бұрын дүниеге келген нәрестелердің сауығып әрі қарай өмірін жалғастыруына себепші болып келеді. Білікті дәрігердің еңбегіне ризамыз. Соңғы 4 жылдың ішінде ауданда нәрестенің шетінеуі болған емес. Сонымен қатар осынау жылдары да ана өлімі де тіркелген жоқ, – дейді білікті дәрігер.</blockquote>Нейлә Темірханқызы өткен жылы аудандық перзентханада 747 сәби дүниеге келгенін айтады. Ал осы жылдың 5 айында 286 шақалақ аман-есен дүниеге келген. Жалпы аудандағы акушер-гинекологтардың жұмысын үйлестіруге бақылау жасайтын бас гинеколог осы күні жүктілікпен 427 әйел есепке алынғанын айтты. Бұл көрсеткіш жыл соңына дейін екі есеге дейін артады. Сондықтан жүктілік бойынша есепке алынған күннен бастап, босанғаннан кейін 42 күн бойы дәрігер бақылауында болатын әрбір ана мен баланың денсаулығына аса қырағылық танытатын дәрігердің қызметі қаншалықты жауапты екенін түсіну қиын емес.Дәрігерден соңғы жылдары әйелдер арасында жиі кездесетін аурушаңдық туралы сұрағанымызда, бұл сауал гинеколог дәрігері үшін ең маңызды мәселе екенін айтты. Яғни босану жасындағы барлық әйел ең алдымен отбасын жоспарлап, жүктілік аралығын сақтаған жағдайда ешқандай теріс жағдай болмайды. Соңғы жылдары әйелдер арасында өте жиі кездесетін қан аздық, бүйрек аурулары, иод жетіспеушілігі мен жүрек-қан тамырларының ауруы дені сау сәбидің дүниеге келуіне кедергісін келтіруде.<blockquote>&nbsp;Қазір заман жақсы. Сондықтан жүктілікті жоспарлағанда ең алдымен &nbsp;әйел өз денсаулығына мән беруі керек. Дені сау әйел ғана дені сау баланы өмірге әкеле алады. Өзі аурушаң болса, баланың да өміріне қауіп төнеді. Ерте жастағы жүктілік те бүгінгі күннің өзекті мәселесі. Кәмелетке толмаған жасөспірім қыздардың аяғын шалыс басып, жүкті болып қалуы ата-анасының тәрбиесінен. Ана қыз балаға оның болашағы туралы көп әңгіме айтып, қажет болса дәрігерден кеңес сұрауы керек. Ал 43 жастан асқан әйелдер үшін жүкті болу өміріне қауіп төндіреді. Көп балалы аналар осыны түсінсе дейміз, – дейді бас гинеколог.</blockquote>Дәрігердің әр күні қауырт тіршілікке толы. Адал еңбек пен маңдай терінің арқасында "Денсаулық саласының үздігі" атанып, абыройға кенелді. Мұнан басқа басшылық тарапынан алған Алғыстары мен Құрмет грамоталары да жетерлік. Осы марапаттардың ішінде дәрігерге ең қымбаттысы халықтан алған алғаусыз алғыстың орны бір төбе. Нейлә Темірханқызы ешуақытта осынау қиын мамандықты таңдағанына өкінген емес. Әке тәрбиесі мен ана ұлағаты оның өмірлік азығы. Бір отбасында 5 қыз бала мен 1 ер бала өскен ортада әке жолымен ұлағатты ұстаз атанғандары да бар. Ал әпкесінің жолымен дәрігерлікті оқып, бүгінде облыс орталығындағы Ана мен бала орталығында реаниматолог-дәрігер қызметіндегі інісі Данияр да Гипократ антына адалдық танытқан абзал жан. Бір отбасынан дәрігерлік жолды жалғастыруға бел буған Дильназ медициналық колледждің студенті. Болашақ дәрігер болуды армандайтын қызының таңдауына анасы қарсылық танытқан емес.Сырдариялық дәрігер Нейлә Темірханқызының өмірлік ұстанымы мен қызметтік жолы күн сайын шыдамдылық пен сүйіспеншілікпен үндеседі. Осындай ізгілік пен мейірімділік қасиетке ұласқан дәрігердің дара жолы одан әрі жалғасын тауып, жаңа күн жаңа өмірдің келуіне себепші болғай! &nbsp;

Сырдарияда жыл басынан бері 286 бала дүниеге келді 

<a href="https://kyzylorda-news.kz/">Kyzylorda-news.kz.</a> Мемлекет тарапынан жыл сайын сараланған, нақтыланған көптеген бағдарлама қолға алынып келеді. Бұл халықтың пайдасына барынша жұмыс жасау бағыты болып табылады. Солардың бірі, 14 жылдан бері көптеген маманның, жастың еңбекке орналасуына өз септігін тигізген, жұмыссыздықтың азаюына ықпал етіп келе жатқан «Дипломмен – ауылға!» мемлекеттік бағдарламасы.Иә, елімізде 2009 жылдан бері ауылдық елді мекендердегі кадр әлеуетін күшейту, кәсіби мамандарды тарту мақсатында «Дипломмен ауылға» мемлекеттік бағдарламасы жүзеге асырылған болатын. Осы уақытқа дейін әлеуметтік қолдау ауылдық елдi мекендерге жұмыс iстеуге және тұруға келген денсаулық сақтау, бiлiм беру, әлеуметтiк қамсыздандыру, мәдениет, спорт және агроөнеркәсіптік кешен саласындағы мамандарға көрсетіліп келген. Ендігі уақытта кенттер мен ауылдық округтер әкімдері аппараттарының мемлекеттік қызметшілеріне деген орын алып келген кадрлардың тапшылығын жойып, білікті кадрларды тарту арқылы ауылдағы мемлекеттік қызметтің тартымдылығын арттыру мақсаты да осы бағдарлама аясында орындалатыны да анық болды. Мемлекет басшысының мемлекеттік қызметке кіруде артық кедергілерді жою және мемлекеттік қызметтен шығу тәртібін жеңілдету туралы тапсырмасына сәйкес қолға алынған бұл бастама да өзінің тиімді тұстарын көрсететініне сенім мол.Себебі бүгінгі таңға дейін аудан көлемінде осы бағдарлама аясында қызмет атқарып жатқан көптеген жас маманның жемісті жолы біздің көз алдымызда. Арал ауданының ауыл шаруашылығы мен жер қатынастары бөлімінің мәліметінше, биылдың өзінде 34 маман біржолғы көтерме жалақыға қол жеткізсе, мамыр-маусым айларында тұрғын үймен қамтылатын мамандар да өздеріне туындаған мүмкіндікке қол жеткізеді деп күтілуде. Солардың бірі бүгінгі біздің кейіпкеріміз – Жансая Шампылова.Жансая 1999 жылы Сексеуіл кентінде туған. 2017 жылы №177 орта мектебін бітіріп, арман қуып, оқуға аттанады. Осылайша Ақтөбе қаласындағы Ақтөбе Жоғарғы медициналық колледжіне қабылданып, мейірбике мамандығын алып шығады.<blockquote>&nbsp;Отбасымда әкем, анам, әпкем мен ағам, ешқайсысы медицина саласында қызмет жасамайды. Бірақ олардың пікірі менің мамандық таңдауыма әсер етпеді. Әдетте «әке көрген оқ жонар, ана көрген тон пішер» деп көпшілік жастар мектеп бітірген соң не анасының, не әкесінің жолын жалғайды ғой. Бірақ менің медицинаны таңдауыма олар қолдау білдірді. «Дұрыс, қызым, болашағы бар мамандықты таңдағаныңды қолдаймыз» деп менің сенімімді нығайта түсті. Оның үстіне маған адам жанының арашашысы болып, олардың адал тілегі мен ақ батасына ие болудан асқан бақыт жоқ сияқты көрінді, – дейді.</blockquote>Міне, осылайша ақ халаттылардың қатарынан табылған талапты жас 2020 жылы дипломын қолына алып, туған ауылына оралды. Жас маманға бірден қызмет тауып, ойлағанындай қызметке әп-сәтте орналасып кету үнемі мүмкін бола бермейді. Бірақ Жансая сол жылы қоғамдық бағытпен ауылдық жедел жәрдемге жұмысқа орналасып кетті. Бұл оқуды енді бітіріп, әлі де болса тәжірибесін толыстыру жолындағы жас маманға үлкен мүмкіндік болды. Басы ауырып, балтыры сыздаған, түрлі деңгейдегі сырқаттардың жанына жылу, дертіне шипа бола жүріп, медбикелік шеберлікті одан әрі жетілдіре түсті. Жанын қоярға жер таппай жатқан жандардың көңілі орнына түсіп, алғысын жаудырғанда осы мамандығына деген сүйіспеншілігі одан әрі арта түскендей болады екен.Алты ай уақытын сырқаттардың құрметіне бөленумен өткізген жас маман кейін «Дипломмен – ауылға!» мемлекеттік бағдарламасының игілігін көрді. Бір реттік көтерме жалақыға ие болады. Осы бағдарламаның бағытымен ол Сексеуіл ауылдық ауруханасына мейірбике болып қабылданды. Мұндағы қызу тірлік кейіпкірімізді одан әрі ширықтыра түсті. Ауруханада 5 ай еңбек еткен соң қызметтік қажеттілікке байланысты өзі оқыған №177 орта мектебіне ауысты. Қазірде осы мектепте мейірбике болып жүрген Жансая:<blockquote>&nbsp;Қазіргі қызметім өзіме қатты ұнайды. Жалпы таңдаған мамандығым медицина саласы болғандықтан қандай жұмыс ұсынса да барымды салып, өзіме сенген жандардың сенімін ақтағым келеді. Әсіресе балалармен жұмыс жасаған тіпті бөлек. Қазір түрлі жағдайларды естіп, көріп жатырмыз ғой. Мектепке білім алуға келген баланың денсаулығы да біздің міндетіміз. Қалай десек те, әрбір бала бақытты болуға лайықты. Олардың бақытты ғұмыр кешуіне менің де үлесім болғанына &nbsp;қуанамын. «Өзінің сүйікті ісін істеген адам бақытты емес, өз ісін сүйіп істеген адам бақытты» демейді ме?! Осындай бақытты бұйыртқан мемлекеттің қолдауына да алғысым шексіз, – дейді.</blockquote>Міне, «Дипломмен – ауылға!» бағдарламасы аясында Жансаядай әлі талай жас мамандар еліміздің дамуына зор үлесін қосарына сенім мол.

Дипломмен – ауылға: Мемлекет қолдауын сезін мейірбике

<a href="https://kyzylorda-news.kz/">Kyzylorda-news.kz.</a>&nbsp; «Аслан» спорт орталығына қарасты «Қазақ күресі» және «Дзюдо» үйірмесінің мүшелері осы аптада жеңісті жолды жалғастырды. Апта сайын жүлделі орындардан көрінетін спортшыларымыз Қызылорда қаласының біріншілігінде жүлделі орындардан табылды.&nbsp;Ең алдымен, қазақ күресінің шеберлері қос алтынды жеңіп алды. Бірінші тұғырдан көрінген спортшылар арасында 35 келі салмақ дәрежесінде Мырза Сүлеймен, 42 келі салмақ дәрежесінде Аслан Мирамбекұлы бар.&nbsp;Ал дзюдодан өткізілген қалалық біріншілікте 13 спортшы жеңіске қол жеткізді. 2010-2017 жылы туылған балалар арасында 20 келі салмақта Дастан Нұрланов ІІ орын, Нұрислам Ақылбек ІІІ орын, 23 келі салмақта Нұралы Мирамбекұлы І орын, Бакдаулет Саятұлы ІІІ орын, 26 келі салмақта Дарын Қуанышұлы ІІ орын, 29 келі салмақта Нұрғиса Бекболат ІІІ орын, Рахман Дарханұлы І орын, 32 келі салмақта Әділет Қалдыбек, ІІ орын, 35 келі салмақта Арман Тұрғанбай І орын, Нұртілеу Сұлтанғазиев ІІ орын, 38 келі салмақта Қуат Болат І орын, Алихан Мұханбетов ІІ орын, 42 келі салмақта Бексан Жылқыбай І орын иеленді.&nbsp;<blockquote>«Аслан» спорт орталығының спортшылары әр апта сайын жеңісімен қуантуда. Осы жолы қазақ күресі мен &nbsp;дзюдо бойынша палуандарымыз үздіктерін қатарынан көрінді. Шын мәнінде, орасан жетістікке қол жеткізіуіміз жас бапкер Аружан Темірғалидың арқасы. Табандылық пен ыждағаттылық арқасында спортшыларымыз толағай табысқа қол жеткізуде, – деді орталық құрылтайшысы Анар Қалдыбаева. &nbsp;</blockquote>Жалпы есеп бойынша 5 алтын, 5 күміс, 3 қола жеңіп алған спортшыларымызды кезекті жеңісімен құттықтаймыз! &nbsp;&nbsp;

Қазақстан және Қызылорда облысының жаңалықтары