<a href="https://kyzylorda-news.kz/">Kyzylorda-news.kz.</a> Құрбан айт – қастерлі мейрам. Құрбандыққа мал шалып, құран оқытқан, ата-бабаның асыл үрдісін ұмытпаған, қастерлі мейрамды ұлықтаған елденбіз. Мұсылман қауымға дәл осы мейрам күні ізгілік пен ізеттің, мейірім мен мерейдің, береке мен бірліктің ұштасатыны мағлұм. Бұл күні аудандық орталық мешітте таң сәріден айт намазы оқылып, құрбандық шалынды. Мешітке жиналған жамағат дұға жасап, мұсылмандық парыздарын орындады. Араздасқан ағайынның татуласып, шаттыққа кенелетін мерекесі одан әрі орталық алаңда жалғасты.Биылғы Құрбан айт сәрсенбінің еншісіне бұйырды. Қасиетті күнде сәждеге бас қойып, аталған ұлық мейрамды жамағатпен қарсы алуға жиналған халық көп болды. Ауа райының ыстығына қарамастан, 7 жасар баладан 70 жасар қартқа дейін сонда жүрді. Барлығы да бір-біріне ақ тілектерін жаудырып, шаттыққа кенелген күн болды.Шара барысында аудан әкімінің орынбасары Ерсұлтан Әпетов сөз алып, Құрбан айт мерекесін тойлауға жиналған жамағат пен аудан қонақтарын құттықтап, мемлекеттің дін саласындағы саясатын жүзеге асыруға атсалысып жүрген имамдар мен мешіт қызметкерлерін аудан әкімінің алғыс хатымен марапаттады.Сонымен қатар «Гежуба-Шиелі» цемент зауыты ұжымы Шеген Қодаманов ауылдық амбулаториясына «Лада-Ларгус» жедел-жәрдем автокөлігін сыйға тартып, амбулаторияның бас маманы Гүлбану Сәрсенбаеваға автокөліктің кілтін табыстады. Сондай-ақ ерекше күтімді қажет ететін жандар мен балаларды қуанту мақсатында алаңда киіз үй тігіліп, ақысыз ойын алаңы жасақталды.Бұл күні ұлттық спорттың бағы жанған күн болды. Қошқар көтеру, қол күрестіру, бағанаға өрмелеп шығу, асық ату сынды ұмыт қалған ұлттық ойындар жаңғырып, таңдай қақтырды. Нәтижелі өнер көрсеткен қатысушыларға қомақты сыйлықтар табысталды.

Шиеліліктер қасиетті мерекені атап өтті

<a href="https://kyzylorda-news.kz/">Kyzylorda-news.kz.</a> Ақпарат ағыны үстемдік құрып тұрғанда өмірімізді газет, радио, телеарна және өзге де электронды құралдарсыз, ақпараттар ағынысыз елестете алмаймыз. Медиа кеңістікте ғана емес, өркениет көшіне бет бұрған даму тіршілігімізде БАҚ-тың айрықша орын алатынын ешкім теріске шығара алмайды. Себебі мазасыз және маңызды қызметті атқарып келе жатқан қаламгерлер қауымы үшін бұқараның сенімі әркез жоғары. Күнделікті күйбең тіршілікте кезігетін жағдайлар да тағдыр тауқыметін тартқан жандар кейде күрмеулі мәселелерді шешу үшін тілшілерге жүгініп жатады. Бұл әлі де болсын қаламын қару еткен журналистерге халықтың құрметі мен сенімінің жоғалмағандығын көрсетеді.Қазақ журналистикасының қарымды қаламгері Шерхан Мұртаза «Жолбарыс пен журналисті аш қоюға болмайды» дегенде журналистің қабілетін қаншама аңдардың арасында ең мықтысына теңегені болар. Сондай-ақ жолбарыстың олжасын жұртымен бөлісіп жейтінін де меңзеген шығар, бәлкім. Бейбіт күндері қында жатса да, нағыз соғыста таптырмас қаруға айналатын алмас қылыш секілді журналистер де жыл &nbsp;бойына жұрт деп жүгіргенімен, жұртының алғысына бөленетін тұстары болып &nbsp;тұрады. Соның бірі – 28 маусым күніндегі кәсіби мерекелері. Осындай мереке қарсаңында сейсенбі күні аудан әкімдігінің мәжіліс залында журналистерді марапаттау рәсімі өтті.Мерекелік шарада аудан әкімі Нұржан Ахатов қаруы – қалам, өрісі – қағаз болған қаламгерлерді құттықтап, ізгі тілегін арнады.&nbsp;<blockquote>«Құрметті журналистер! Сіздерді кәсіби мерекелеріңізбен шын жүректен құттықтаймын! ХХІ ғасырға адамзат зор жетістіктермен, ілгері басқан саяси-әлеуметтік, экономикалық табыстармен келді. Ал осы өркениеттік үрдіс алға басқан сайын бұқаралық ақпарат құралдарының да ақпараттық ағыны күшейді. Бізді күнбе-күн халықпен жүздестіріп, өңір экономикасына, әлеуметтік дамуына қалам қаруының күшімен үлес қосып, тарихи өмірімізді, мәдени тұрмысымызды әлеуметке жан-жақты көрсетіп, тіршілігіміздің деңгейін айқындап отырған сіздерге ерекше ризашылығымды білдіремін», – дей келе өңір басшысы Шиелі ауданынан жарық көретін аймақтық «Шарайна-Сейхун» газетінің 10 жылдығын тілге тиек етіп, аталған газеттің бас редакторы Нұрмахан Назымханұлын құттықтады.</blockquote>Салтанатты шара әрмен қарай халық пен билік арасында алтын көпір болып жүрген журналистерді марапаттаумен жалғасты. Мереке қарсаңында аудан әкімінің алғыс хатын ақпарат саласының үздігі, Қазақстан Жазушылар және Журналистер одағының мүшесі, белгілі сатирик, «Шарайна-Сейхун» газетінің редакторы Н.Елтай, Қазақстан Журналистер одағының мүшесі, «Кызылординский вести» газетінің Шиелі ауданы бойынша меншікті тілшісі М.Ибрашев, «Өскен өңір» қоғамдық-саяси газетінің бас редакторы Н.Пірімбет, «Өскен өңір» ақпарат агентігінің тілшісі М.Құрманғалиева және аталған басылымның тілшілері Д.Байтілес, С.Сұлтан, «Тұлға тағылымы» журналының аудандағы тілшісі Ш.Тлеубаев, «Шарайна-Сейхун» газетінің тілшісі Ғ.Рүстембек, аудан әкімінің баспасөз хатшысы Р.Әнәпия, Шиелі ауданының қоғамдық даму бөлімінің әдіскері А.Бөлебай, жастар ресурстық орталығының Жастар тәжірибесінің маманы І.Қасымханова, «Өскен өңір» газетінің штаттан тыс тілшісі М.Сәдуақасқызы иеленді. &nbsp;Алғыстың тиегі ағытылған күні аудандық бөлім басшылары әртүрлі сала бойынша қалам тербеп, жан-жақты мәселені көтеріп, жағымды жаңалықтың жаршысы болып жүрген «Өскен өңір» газетінің тілшілеріне жеке-дара алғыс білдірді. Атап айтар болсақ, аудандық білім бөлімінің басшысы Ж.Баймұратова «Бүгінгі күні еліміздің бұқаралық ақпарат құралдары азаматтық қоғамның құрамдас бөлшегі ретінде билік пен бұқараның арасындағы дәнекер ғана емес, еліміздің толағай табыстары мен зор жетістіктерінің жаршысы болып келеді. Ауданымыздағы білім саласының тыныс-тіршілігін көрсетіп, жағымды жаңалықтармен сүйіншілейтін біздің ең жақын серігіміз ретінде сізге шығармашылық табыс тілеймін» дей келе аудандық газеттің бас редакторының орынбасары Сұлушаш Мадияроваға алғыс хат пен сый-сияпатын табыстады. Сондай-ақ ауыл шаруашылығы тақырыбында мақала жазып, зерттеу жүргізген әріптесіміз Д.Байтілес ауыл шаруашылығы бөлімінің алғысына бөленді. Ал аудандық мәслихат төрағасы А.Жандарбеков фототілші Б.Бәйімбетке, «Amanat» партиясы С.Сымбатқа, мәдениет бөлімі Г.Яхияеваға, жұмыспен қамту, әлеуметтік бағдарламалар &nbsp;және азаматтық хал актілерін тіркеу бөлімі М.Болатқызына, денсаулық сақтау саласы М.Кеңесұлына рақмет айтып, арнайы сый-сияпат тағайындап, мерекемен құттықтады. Қалам ұстаған қауымға құрмет білдіру шарасында аудандық әйелдер кеңесінің төрайымы Нәйла Палымбет баспасөз мамандарына ақжарма тілегін айтты. Ал &nbsp;аудандық ардагерлер кеңесінің төрағасы Өркен Исмаил тілшілерге арналған жыр шумағын оқып, қошеметке бөленді.&nbsp;Мереке қарсаңында қанжығасы майланып, құрметке бөленген әріптестеріміздің қатарында Ерұлан Даткенов те бар. Ақпарат тасқыны алапат дәуірде мамандығына адал болып, ұстанымынан айнымай, қалам қасиетін ардақ тұтқан тілшіміз облыстық «Қанатты қалам – 2023» салтанатты шарасынан «Ізденімпаз журналист» аталымын иеленді. &nbsp;Тағы бір айта кететін жайт, жылдағы дәстүр бойынша биыл да журналистер одағы жаңа мүшелермен толықты. Одақтың облыстық филиал төрағасы А.Оңғарбаев 27 маусым күні 20 адамға мүшелік билет табыстады. Осы салтанатты жиында әріптесіміз, жас тілші М.Болатқызы да Қазақстан Журналистер одағының мүшелігіне қабылданды. Дүйім жұрттың көзі, құлағы һәм тілі қызметін атқарып, халықтың әл-ауқаты мен қоғам тынысынан хабар тарататын тілшілер қауымы осылайша құрметке бөленді.

Шиеліде қалам ұстаған қауымға құрмет көрсетілді

<a href="https://kyzylorda-news.kz/">Kyzylorda-news.kz.</a> Алтайдан Ақтеңізге дейінгі аралықты қоныстанған түркі халықтарына ортақ мәдени, әдеби, тарихи құндылықтар өте көп. Соның бірі – қазақтың ұлттық аспабы домбыра. Екі ішекті, тоғыз пернелі аспаптың тарихын тым тереңнен тарқататын дерек-дәйектер жетерлік. 1986 жылы көне домбыраның суреті қашалған тас табылған. Ғалымдар зерттей келе жер бетіндегі ішекті музыкалық аспаптардың арғы атасы – қазақтың қара домбырасы деп топшалаған. Сол уақытта домбырада ойналатын жеті мыңнан астам күй болса, бүгінде екі мыңдайы ғана айналымда жүр.Ұлттық аспапты дәріптеуде қазақ жұрты аянып жатқан жоқ. Мерекелік күнтізбеге Ұлттық домбыра күнін енгізіп, жер-жерде атап өтуде. Соның бір дәлелі аудандық К.Рүстембеков атындағы жыраулар үйінде «Ақ домбыра қолға алып» атты мерекелік іс-шарасы ұйымдастырылды. Салтанатты іс-шараға аудан әкімінің орынбасары Жұлдызхан Ерқосаев қатысып, жиналған жұртты атаулы күнмен құттықтады.<blockquote>«Қазақ халқына ұлттық домбыра тек музыкалық аспап қана емес, еліміз үшін салт-дәстүріміз, тарихымыз, асыл мұрамыз екені белгілі. Киелі домбырамыз арқылы Сыр елі – жыр елі атанып, жыршы-жарауларымыз көпке танылды. Ешнияз сал, Кете Жүсіп, Балқы Базар, Тұрмағамбет, жеті атасынан жыраулық өнер үзілмеген Жиенбай жыраулар ұлттық аспабымызды қолынан тастамай, Қармақшыны жүз жыраудың елі атануына себеп болды. Сондай-ақ еліміздің түпкір-түпкірінен шығып жатқан танымал әнші, өнерпаздар домбыраны әлемдік деңгейге көтеруде. Мереке баршамызға құтты болсын, ұлттық аспабымыздың абыройы арта берсін», – деді ол.</blockquote>Іс-шарада Сыр сүлейлерінің мұрагерлері, жыршы жыраулар &nbsp;Әйгерім Ешбаева, Балтабай Бедебаев, Алмат Азаматов, Руслан Өтегенов және Әлішер Мырзағалиев жырдан шашу шашты. Мұнан соң кеш Ұлттық домбыра күнімен Құрманғазы Сағырбайұлының 200 жылдық мерейтойына арналған «Көңіл толқыны» атты күйшілер фестиваліне жалғасты. Өнерпаздар атақты күйшілердің күйін екі ішекте күмбірлете тартып, тыңдармандардың құлақ құрышын қандырды. Жиын соңында фестивалге қатысқан өнер майталмандары аудан әкімінің алғыс хатымен марапатталды.

Қармақшылықтар ұлттық домбыра күні атап өтті

Адамның туған күні оның өміріне, тағдырына және мінезіне әсер етеді. Аптаның қай күні дүниеге келдіңіз? Өзіңізді немесе жақыныңызды тексеріңіз, дейді <a href="https://massaget.kz/basty-zhaalytar-438/86407/">Массагет.</a>ДүйсенбіДүйсенбіде, әдетте, күшті мінезді адамдар туады. Олардың ойын өзгерту қиын. Олардың тіл-көзден және айналадағылардың теріс әсерінен сақтайтын керемет қорғанышы бар.Олар бір адамды жақсы көрсе, басқаға назар аудармайды. Алайда олар үшін махаббат пен достықта үйлесімділік болуы маңызды. Сезім екіжақты болмаса, қарым-қатынасты сақтап қалуға тырыспайды. Олар өмір бойына сүйіктісімен бірге болуды немесе жалғыз болып өтуді таңдайды.Бұл адамдарды Ай басқарады, сондықтан олар өте эмоционалды және ашық келеді. Олардың қиялы мен эмпатиясы жақсы дамыған.СейсенбіСейсенбі күні дүниеге келген адамдар өте ашық және көпшіл. Олар сауатты жұмыс істеуге көп күш жұмсайды.Бұл адамдардың тағдыры махаббатта да, жұмыста да сәтті қалыптасады. Олардың әзілді түсіне білу сезімі және жарқын мінезі бар, бірақ олар құпия сақтай алмайды.Сейсенбіде туғандарды жауынгерлер планетасы Марс басқарады, сондықтан олар табандылықпен, кейде агрессивтілікпен ерекшеленеді. Алайда, бұл адамдар өздерінің және шешімдерінің дұрыстығына жиі күмәнданады. Сондай-ақ олар жиі алдымен жасап, сосын ойланады.СәрсенбіСәрсенбіде туған адамдар өте тұрақты. &nbsp;Олар әдетте қаржы саласында және жұмыста жетістікке жылдам жетеді.Алайда, аптаның осы күнінде туған адамдардың басқалармен қарым-қатынас жасауы қиын. Сондықтан олардың достары аз және олар үшін өмірлік серігін табу қиынға соғады. Мұндай адамдарға некеде қиын болады, сондықтан оларға кейде өз-өзімен қалуға мүмкін беру керек.Сәрсенбіде туғандарды Меркурий планетасы басқарады. Олар ғылымда және бизнесте өздерін жақсы дамыта алады.БейсенбіБейсенбіде туғандардың жолы болды, өйткені олардың интуициясы жақсы дамыған және олар ерекше ақылға ие.Бұл адамдар махаббатта да, жұмыста да бірдей жетістікке жете алады. Олардың өмірі көбінесе қызықты оқиғаларға толы, сондықтан олар ешқашан еңсесін түсірмейді. Олардың &nbsp;достары мен таныстары көп.Бейсенбіде дүниеге келгендерді Юпитер басқарады. Сондықтан бұл күні туған адамдар ұйымдастырушылық қабілеттеріге ие. &nbsp;Олар көбіне саясат пен басқару саласында үлкен жетістіктерге жетеді.ЖұмаБұл күні дүниеге келгендер адамдарды жақсы тани алмайды. Сондықтан олар ұжымдық жұмыста немесе жаңа қатынастар құру кезінде мұқият болуы керек. Жұмыста алға жылжу үшін аптаның бұл күнінде туғандарға мотивация мен өмірлік мақсат қажет.Жұма күні туғандар уақыт сынынан өткен және сенімді адамдардың жанында жүруі керек.Бұл күні туған адамдарға Венера қамқорлық жасайды. Бұл планетаның үлкен сыйы бар: ол жақсы көруді, сүйікті болуды үйретеді. Үйде бұл адамдар жайлы атмосфера жасайды.СенбіСенбі күнгі адамдар тәуелсіз келеді және олар &nbsp;көшбасшылық қасиетке ие. Олар өзін жақсы көретін адамдар, бірақ сонда да олардың достары көп. Себебі олардағы эмпатия деңгейі жоғары.Сондай-ақ, бұл адамдар өздерінің алтыншы сезімі арқылы болашақты болжай алады. Олар керемет психологтар және табиғатынан өте дана адамдар.Бұл күні дүниеге келгендерді Сатурн планетасы басқарады. Олар еңбекқор, дарынды және ақылды.ЖексенбіЖексенбі күні дүниеге келгендер рухани жағынан &nbsp;жақсы дамыған. Олар бала кезінен ненің жақсы, ненің жаман екенін жақсы түсінеді.Оларда басқаларға маңызды нәрселерді үйрету және білім беру қабілеті бар, сондықтан олардан керемет тәлімгерлер шығады.Жексенбіде туғандар Күннің қамқорлығында. Олар белсенді, бірақ жиі өмірлеріне немқұрайлы қарап, болашағы жайлы ойлана бермейді. Сол үшін де өмірде сәтсіздіктерге жолығуы мүмкін. Сондықтан бұл күні дүниеге келгендерге өмірге көзқарасын өзгертіп, мақсат қою ұсынылады.

Аптаның қай күні дүниеге келдіңіз?

<a href="https://kyzylorda-news.kz/">Kyzylorda-news.kz.</a> Бүгін қазақы ит тұқымдарын сақтау және өсімін молайту жөніндегі заң күшіне енді, деп хабарлайды Экология және табиғи ресурстар министрлігінің баспасөз қызметі.2023 жылғы 3 қаңтарда «Қазақы ит тұқымдарын сақтау және өсімін молайту мәселелері бойынша ҚР кейбір заңнамалық актілеріне өзгерістер мен толықтырулар енгізу туралы» заң қабылданған болатын. Онда қазақ ит тұқымдарын сақтау және өсімін молайту саласындағы қызметті жүзеге асырудың құқықтық, ұйымдастырушылық және экономикалық негіздері белгіленген.Заңда уәкілетті органның құзыреті белгіленген. Ол – нормативтік-құқықтық актілерді бекіту, оның ішінде қазақ ит тұқымдарының Ұлттық орталығын құру.Қазақстанда алғаш рет құрылатын қазақы ит тұқымдарының Ұлттық орталығы Орман шаруашылығы және жануарлар дүниесі комитетінің «Охотзоопром» ӨБ» РМҚК-ның құрылымдық бөлімшесі болып табылады.Ұлттық орталыққа стандартқа неғұрлым сай, оның ішінде сыртқы-конституциялық сипаттамалары, өзге де қасиеттері сәйкес келетін тазы мен төбет іріктеп алынады, олардан кейіннен таза тұқымды иттер шығарылады. Аталған орталықтың жұмысына ғалымдар мен білікті кинологтар шақырылады.Сондай-ақ Ұлттық орталықта қазақы ит тұқымдарын сақтау және өсімін молайту саласында мемлекеттік ғылыми-техникалық бағдарламалар әзірленеді. Сарапшылар мен кинолог мамандарды оқыту жұмыстары жүргізіледі. Әзірленген стандарттарға сәйкес тазы мен төбеттің бірыңғай кітабы жүргізіліп, олардың шығу тегі туралы куәлік беріледі.Комитеттің бастамасымен жұмыс тобы құрылды. Оған уәкілетті органның, ғылыми және қоғамдық ұйымдардың өкілдері, кинологтар, қазақы ит тұқымдарын өсірушілер кірді. Қазіргі таңда жұмыс тобы Ұлттық орталықтың қызметкерлер құрылымын, штаттық кесте және біліктілік талаптарын әзірледі.Сондай-ақ Президентіміз тазы мен төбетті қазақы ит тұқымдары ретінде әлемге таныту міндетін қойды.Осыған орай, 2023 жылдың мамыр айында Бельгияның Тюэн қаласында Қазақстан кинологтар одағының президенті мен Халықаралық кинологиялық федерацияның (FCI) басшысымен келіссөз жүргізді.Кездесу аясында ҚКО-ның FCI-ге толық құқылы мүшелігіне ресми өтінім берілді. Бұл мәселе Халықаралық кинологиялық Федерацияның Бас Ассамблеясында 2023 жылғы 21-22 тамызда Женевада (Швейцария) қаралатын болады. &nbsp;

Қазақы ит тұқымдарын сақтау туралы заң күшіне енді

<a href="https://kyzylorda-news.kz/">Kyzylorda-news.kz.</a> Бір ай ішінде тұтыну бағасының индексі баяулап, маусым айындағы көрсеткіш 0,5% болды, деп хабарлайды ҚазАқпарат.Ұлттық статистика бюросы азық-түлікке жатпайтын тауарлар бағасы – 0,7%, ақылы қызметтер – 0,6%, азық-түлік тауарлары 0,2% өскенін хабарлады.Азық-түлікке жатпайтын тауарлардың ішінде маусым айында жиhаз бен үйге қажетті заттар бағасы 2,6% өсті: шабадандар, жол сөмкелері – 1,4%, велосипедтер – 1,2%, жеке қолданатын заттар бағасы 1% қымбаттады. Мамырмен салыстырғанда маусымда құрылыс материалдары – 0,8%, киім және аяқ киім, фармацевтика өнімдері – әрқайсысы 0,7%-дан өсті. Бензин АИ-95/96 – 1,1%, баллондағы сұйытылған газ 0,7% қымбаттады.Әуе жолаушылар көлігі қызметтері 9,6%, кешенді демалыстарды ұйымдастыру – 8,8%, санаторийлер қызметтері – 6%, тұрғын үй-жайларды жөндеу және қызмет көрсету бойынша қызметтерге – 1,6%, қоғамдық тамақтандыру қызметіне – 1,4%, денсаулық сақтау қызметіне 0,9% өсті.Азық-түлік тауарлары арасында картоп бағасы 9,9%, жүзім – 4%, лимон – 3,9%, алма – 3,1% өсті. Бағаның өсуі минералды және ауыз суға, салқындатылған сусындарға 2,4%-дан, жеміс және көкөніс шырындарына 1,8% байқалды. Банан – 10,6%, жаңа жиналған көкөніс – 8,8%, жұмыртқа – 5,9%, күнбағыс майы – 4,2%, қарақұмық жармасы – 4,1% арзандады.Өңірлер арасында ең жоғары айлық инфляция Солтүстік Қазақстан және Маңғыстау облыстарында – 0,9%-дан (орташа республикалық деңгейден 0,4 п.т. жоғары), ең төменгі – Ақтөбе облысында 0,1% тіркелді. Тұтыну бағаларының индексі бір айда Шымкент қаласында 100% болды.Өңірлер бойынша ең жоғары азық-түлік тауарларының бағалары Ұлытау облысында – 1,3%, азық-түлік емес тауарлары Астана қаласында – 1,3%, ақылы қызметтер Солтүстік Қазақстан облысында 1,4% өсті.2023 жылғы маусымда жылдық мәнде инфляция деңгейі 14,6% болған. Азық-түлік тауарларының бағасы 14,6%, азық-түлікке жатпайтын тауарлар 15,8%, ақылы қызметтер 13,3% өсті.2022 жылғы маусыммен салыстырғанда кеңсе тауарлары 67,7%, қияр – 33,4%, кір сабын – 42,1%, ыдыс жууға арналған құралдар – 41%, қантсыз қоюландырылған сүт – 42,9%, күріш – 47,6%, күндізгі стационарлық емдеу – 40,8%, шақпақ қант 32,2% қымбаттады. Керісінше, жылдық мәнде қырыққабат – 13,8%, сәбіз – 9,5%, картоп – 9,1%, у сарымсақ – 5,4%, қызылша 6,9% арзандады.Инфляция деңгейін сипаттайтын тұтыну бағалары индексінің көрсеткіші ай сайын есептеледі. Бақылау қызметтер мен тауарлардың тарифтері мен бағалары – барлығы 508 позиция бойынша жүргізіледі. Бағаларды тіркеу барлық облыс орталығында, астанада және қалалар мен аудан орталықтарының белгілі бір шеңберінде әртүрлі меншік нысанындағы сауда және қызмет көрсету саласы кәсіпорындарының іріктемелі желісі бойынша жүргізіледі.2023 жылғы қаңтардан бастап, тұтыну бағаларының индексін есептегенде, азық-түлік тауарларының үлесі – 41,8%, азық-түлікке жатпайтын тауарлар – 29,6%, ақылы қызметтер 28,6% болған.

Маусым айында инфляция қарқыны баяулады

<a href="https://kyzylorda-news.kz/">Kyzylorda-news.kz.</a> Қазақстан Ұлттық банкі 1 шілдеде елорданың мерейтойына орай «Есте қалатын оқиғалар мен біртуар адамдар» сериясынан «ASTANA. 25 JYL» коллекциялық монеталарын айналымға шығарады.Ұлттық банк мәліметіне сәйкес, шақалар 3 шілдеден бастапҰБ-ның <a href="https://kazcoins.nationalbank.kz/">интернет-дүкені</a> арқылы сатылады.«ASTANA. 25 JYL» монеталары МН 25 мельхиор қоспасынан дайындалған. Массасы – 15 грамм, диаметрі – 33 мм, дайындау сапасы – brilliant uncirculated, номиналы – 100 теңгелік, таралымы – 20 000 дана.Коллекциялық монеталар Қазақстан Республикасының бүкіл аумағында өзінің белгіленген құнымен төлемнің барлық түрі бойынша қабылдануға, сондай-ақ елдің барлық банкінде банк шоттарына есепке алынуға, аударылуға, ұсақталуға және айырбасталуға жатады.Коллекциялық монеталар Қазақстан теңге сарайында дайындалды.

Астананың 25 жылдығы құрметіне 100 теңгелік монета шығарылды

<a href="https://kyzylorda-news.kz/">Kyzylorda-news.kz.</a> Ұлттық құндылықтарымыздың бiрi - қасиетті қара домбыраны дәріптеу мақсатында Сыр өңірінде көптеген iс-шаралар ұйымдастырылуда.&nbsp;Аудан орталықтары мен ауылдарда түрлi мәдени-көпшілік жиындар мен кештер өткiзiлуде. Ұлттық домбыра күні қарсаңында &nbsp;Құрманғазы Сағырбайұлының 200 жылдығына арналған "Күй мен күйшi" атты халық аспаптар оркестрінің күйші-концертмейстерлерінің республикалық фестивалі өтті. Оның қорытындысымен Тұңғыш Президент саябағында гала-концерт ұйымдастырылды.Облыс әкімінің орынбасары Балмейір Сансызбайұлы өнер шеберлерін құттықтады.Мерекелік кеште "Қара жорға", "Сарыарқа", "Адай" секілді күйлер орындалып, қалың көрерменге рухани азық, көтеріңкі көңіл-күй сыйлады.

Қызылордада ұлттық домбыра күніне орай гала концерт өтті

<a href="https://kyzylorda-news.kz/ru">Kyzylorda-news.kz.</a> Күмбірлеп қос ішектен төгілген күй, қазақ даласын ерекше ырғағымен тербеп тұрғандай. Халықтың қазынасы, құнды мұрасы да осы домбыра. Шілденің бірінші жексенбісі – Ұлттық домбыра күні екені әмбеге аян. Бабадан қалған қара домбыраны қалай дәріптесе те жарасады. Бұл домбыра – қазағымның тілі, даламыздың үні болып бүкіл болмысымызға еніп кеткені белгілі.Домбыра – қазақ жанының барометрі. Қалың бұқараның басынан өткен қуанышты сәт те, қайғылы кезеңдер де домбыра үнімен қабысып, шанағынан күй болып төгіледі. Қазақтың көңіл-күйін, тылсым табиғатпен байланысын, көкірегіндегі мұңын дәл осы домбыра мен қобыздан анық естуге болады. Үн арқылы ұғысқан, күй арқылы табысқан көшпелі жұрттың домбыраға деген құрметі, махаббаты ерекше. Бұл құрметті өткен сенбі күні орталық алаңда өткен мерекелік шарадан байқауға болады. Ұлттық домбыра күні қарсаңында мәдениет саласының қызметкерлері ұлттық аспабымызды насихаттау үшін халық көп жиналатын орындардың бірі әрі бірегейі орталық алаңды таңдады.&nbsp;«Ұлы даланың дүбірі, домбыраның күмбірі» атты мерекелік шараның шымылдығы прологпен түрілді. Ұлттық нақышта киініп, қолына ұлттық аспапты ұстаған өнерпаздар домбыра туралы жыр шумақтарын оқып, ә дегеннен-ақ көпшіліктің көңілінен шығып, қошеметіне бөленді. Әрмен қарай мерекелік құттықтауға кезек беріліп, ортаға аудан әкімінің орынбасары Б.Ысмағұлов шығып, жұртшылыққа ізгі тілегін жолдады.&nbsp;<blockquote>«Музыкаға жаны жақын халқымыздың арасынан домбыраны ерекше меңгеріп, күмбірлеген күйімен ел жүрегінде, шертпе күйдің шебері болып есімі тарихта қалған тұлғаларымыз аз емес. Құрманғазы, Тәттімбет, Дина, бертін келе Нұрғиса, Қаршыға есімді тума таланттарымыз киелі аспап арқылы, ел жүрегінен орын тапты. Бүгінде елімізде, оның ішінде Шиелі ауданында тыңдаушысын жігерлендіретін төкпе күйлер мен шертпе күйлерді тартқанда, жүйріктердей қимылына көз ілеспейтін кәсіби домбырашыларымыз жетерлік. &nbsp;Олардың әрбір орындаған күйлері мен өнер жолында жеткен жетістіктерін біз ерекше мақтанышпен айта аламыз. Жылдан жылға домбыра тартатын жастарымыздың да қатары көбейіп, ұлттық мәдениетіміздің аясы кеңейіп келе жатқаны бізді ерекше қуантады. Осы орайда, қазақтың дәстүрлі ән-күйін насихаттап жүрген барша өнерпаздарға алғыс білдіремін», – деді аудан әкімінің орынбасары ағынан жарылып.&nbsp;</blockquote>Ал мерекенің мазмұнын айшықтап, патриоттық көңіл-күй сыйлаған әндердің орны бөлек. Ұлттық әуендер сезімнің қылын шертіп, шараға қатысушыларды өзгеше күйдің иіріміне жетелегені сөзсіз. Әсіресе, «Нартай сазы» және «Сырлы саз» ансамблдері орындаған күйді тыңдаған халықтың құлақ құрышы қанып, тұла бойында еліне деген махаббат оты лаулай түсті. Домбыра – тек музыкалық аспап емес. Ол – қазақ үшін тұтастай әлем, халықтың тұтастай өмірі. Сондықтан болар мереке қарсаңында қос ішекті домбыраның әуеніне елітпеген жан қалмады. Қазақтың күмбірлеген күйін жақсы қабылдаған халық домбырашылармен суретке түсіп, мәз-мейрам болып ұлттық мерекенің маңызын түсінді. Аудан көлеміндегі отыздан аса домбырашының басын біріктірген аталмыш шарада күмбір күйдің қоңыр үнін, жырдың жақұтын, дәстүрлі әннің әуенін, мың бұралған бидің көрінісіне куә болып, аудан тұрғындары өнеріміздің ұйытқысы болған «Домбыра» күнін осылай тойлады.

Шиелі: Домбыра күні – ұлттың үні

<a href="https://kyzylorda-news.kz/ru">Kyzylorda-news.kz.</a> Мамандық атаулының төресі – ұстаздық. Мұғалім барлық мамандық иесін тәрбиелейтін, болашаққа бағыт-бағдар беріп, жөн сілтейтін асыл жандар. Ұстаз берген тәрбие әрбір жанның өміріне жол сілтер шамшырақ тәрізді. Өйткені, ғалым да, ел қорғаған батыр да, тілінен бал тамған ақын да, тегеуріні темір балқытатын жұмысшы, егін салған диқан да, мал бағып тер төккен шопан да бәрі ұстаздан білім алады. Сондықтан ұлағатты ұстаздарға бүкіл адам баласы құрметпен бас иеді.Досбол датқа ауылдық мәдениет үйінде бейнеттің зейнетіне шыққан Күләш Әлішоваға көрсетілді. «Дара тұлға, дара жол» атты шараға №155 Д.Шыныбеков атындағы орта мектебінің директоры Есім Асқар, Досбол ауылдық клуб басшысы Шолпанай Досымова, ауыл тұрғындары, мектеп мұғалімдерімен бірге мектеп оқушылары қатысты.Ең әуелі мектеп директоры Есім Асқар сөз алып, зейнет жасына шыққан Күләш Әлішоваға ізгі тілегін білдіріп, ұжым атынан бағалы сыйлығын табыстап:<blockquote>«Ұзақ жылдар бойы мектебімізде еселі еңбек етіп, қанша жас ұрпақтың үлкен өмірге қанат қағып ұшуына және әр жас түлектің бойына тәрбие, білім мен ілімді сусындатып, зейнет жасына абырой биігімен шығып жатқаныңызға қуаныштымын. Алдағы уақытта бейнеттің зейнетін көріп, немере-шөберелеріңіздің қызығына тоймай, ақ жаулықты әже атануыңызға тілектеспін», – деді Күләш Әлішова.&nbsp;</blockquote>Иә, «Адамның адамшылығы – жақсы ұстаздан» деп ұлы Абай айтқандай, мұғалім тәрбиесі мен өнегесі оқушының болашақ азығы. Жақсы ұстазға кезігіп, тәлім-тәрбие алған шәкірт өмір майданында мойымай күресіп, болашақ жолында бағытынан таймасы анық.Тағылымға толы шарада Досбол датқа ауылдық мәдениет үйінің басшысы Шолпанай Досымова ән айтып, жанарына жас алып, көкейде көмкерілген ақжарма тілегін жеткізді.<blockquote>«Шәкірт санасына білім нәрін сеуіп, ел болашағының өрендерін тәрбиелеп шығару – екінің бірінің қолынан келе бермейді. Ұстаз болу – жүрек жылуын, мейірім шуағын, адамгершілік ұлылығын баланың бойына дарыту. Ұстаз болу – шәкіртке ата-анасындай болып тәрбие сыйлау. Ұстаз болу – жас ұрпақтың жарқын болашаққа барар жолын айқындап беру болса, сіз ауылымыздан түлеп ұшқан әр түлектің жолын бағамдап, мақсатын айқындай білдің», – деді Күләш Әлішова.</blockquote>Айта кетейік, Күләш Әлішова 1962 жылы Жиделіарық ауылында дүниеге келген. 1979 жылы 8 жылдықты бітіріп, Қызылорда қаласындағы Мәншүк Мәметова атындағы педагогикалық училищесіне оқуға түседі. 1981 жылы аталған білім ордасын тәмамдап, 1982 жылы Қызылорда қаласындағы Н.В.Гоголь атындағы педагогикалық институтына сырттай оқуға түсіп, бітіреді. 1981 жылдан бастап, №155 Д.Шыныбеков атындағы орта мектебінде бастауыш сынып мұғалімі болып жұмыс істеп, 1992 жылдан бастап осы жылға дейін мектеп директорының тәрбие ісі жөніндегі орынбасары қызметін абыроймен атқарып келді. Осы еңбек еткен еселі жылдар аралығында республикалық, облыстық, аудандық, ауылдық және «Аманат» партиясының бірнеше марапаттарын иеленген.

Мамандық атаулының төресі – ұстаздық

<a href="https://kyzylorda-news.kz/ru">Kyzylorda-news.kz.</a> Шілденің бірінші жексенбісі – ұлттық домбыра күні. Осынау бір айтулы дата қазақтың өнерін, жыры мен дастандарын терең түсінетіндер үшін ерекше күн. Домбыраның қадір-қасиетін «Қазақ поэзиясындағы домбыра бейнесі – ежелгі жыр-дастандардан бүгінгі жас толқынға дейін жырланып келе жатқан мәңгілік тақырып» деп Қадыр Мырза Әлінің өзі екі-ақ ауыз сөзбен түйіндеген. Демек, бұл қасиетті де киелі аспаптың қазақ жұртшылығы үшін маңызы қашан да зор. Күнтізбедегі керемет мереке қарсаңында біз де домбыраның қыр-сырына қанық болып, күйшілік пен жыршылық өнердің тереңіне сүңгу мақсатында «Нартай өнер мектебінің» директоры, жыршы Мұхаммедәлі Бекпейісовпен әңгімелесуді жөн көріп отырмыз.– Сәлеметсіз бе, Мұхаммедәлі Құрманбекұлы! Сұхбатымызды бастамас бұрын әуелі өзіңіз жайлы айтып өтсеңіз…– Жалпы өзіме тоқталар болсам, бала күнімнен қара домбыраға құмар болып өскен қарапайым жігітпін. Қазіргі таңда осы өнер жолында әнімізді шырқап, домбырамызды шертіп жүрген жайымыз бар. Ең бастысы – Жаратқанның құлы, қазақтың ұлымын.– Шілденің алғашқы жексенбісі ұлттық домбыра күні екені мәлім. Ал сіздер бұл мерекені жыл сайын қалай атап өтесіздер?– Өте орынды сұрақ. Иә, ұлттық домбыра күні – әр жыл сайын елімізде өз деңгейінде аталып өтіледі. Әрине, ұлан-асыр той-думанмен тойланбаса да, мәдениет қызметкерлері, кәсіби домбырашылар қолдарынан келгенше бұл мерекеде барын салып, әртүрлі шаралар өткізіп отырады. Біз де мұндай іс-шаралардан қалыс қалған емеспіз. Шақырған мерекелік шаралардан да қалмауға тырысамыз. Кез келген уақытта домбырамызды асынып алып, әндетуге де әзірміз.– Қазақта «Қанмен келген қасиет – қара жерге жанмен бірге сіңеді» деген тәмсіл бар. Яғни бұл – адам бойындағы қасиеттің ұрпақтан-ұрпаққа берілетінін айғақтайды. Сіздің осы өнерге, жырға, домбыраға деген қызығушылығыңыз кімге ұқсаған?– Бұл сұрақты көптеген тыңдармандар қойып жатады. Дегенмен, шиелілік ағайындар әкемнің өнер адамы екенін жақсы біледі. Бала күнімнен әкеме қарап бой түзеп өстім. Оның өнерге деген махаббаты – менің де шығармашылықтың адамы болуыма әсер етті десем болады. Ес білгелі осы әкемнің әндерін, жырларын тыңдап өстім. Ал есейе келе небір мықты ұстаздардан тәлім алдық. Кейіннен университет қабырғасында жүріп өнердегі аға буыннан үлгі алып, солардың ізін жалғауға тырыстық. Міне, сол кісілердің барлығы біздің қанатымызды қатайтып, осындай жарқын өмір сүруімізге, нағыз маман болуымызға өз ықпалын тигізді.– Ұлттық аспапқа қанша жасыңыздан бастап қызықтыңыз? Өнер жолына жасаған алғашқы қадамыңыз жайлы айтып бере аласыз ба?– Жоғарыда айтқанымдай, өнер жолына бала күнімнен қызықтым. Қателеспесем, әкемнің үйретуімен үшінші сыныпта ең алғаш рет қолыма домбыра ұстадым. Сол уақыттан бері домбыра менің серігіме айналды. Қанша аспапта ойнап жүрсем де, қазақтың ұлттық аспабы – домбыраның орны мен үшін ерекше.– Сіздің бүгінгі таңда ата жолын жалғап, төл өнердің тұғырын биіктетіп, жыраулық өнерді жаныңызға серік етіп жүргеніңізді білеміз. Дамыған технологияның уақытында, әсіресе шетелдің әндері қаптап, қалың тыңдарманға жол тартып, мағынасыз әндердің көбейген заманында жыршылар мен домбырашылардың еңбектері еленбей, көп көзіне көрінбей жататынын көзбен көріп жүрміз. Бұл жөнінде не айтасыз?– Дұрыс айтасыз. Сіздің айтып отырғаныңызды жоққа шығара алмаймын. Көріп жүргеніңіздей, бүгінде Батыстың халқына еліктейтіндер көбейді. Ол ол ма? Кәрістің әншілерін сүйіп тыңдайтындардың қатары тіпті көп. Әрине, өнердің адамы болған соң осы жолда жүрген әрбір өнерпаздың еңбегінің ерен екенін жоққа шығара да алмаймыз. Әркімнің өз тыңдарманы бар. Десек те, қазақ жастарының құлағына сырға таққан, ашық-шашық киінген әншілерді тыңдап, соларға еліктейтіні көңілді қынжылтады. Бірақ төл өнердің бәсін биіктетіп жүрген өнерпаздарды ешкім тыңдамайды деп айта алмаймын. Олардың да өз тыңдарманы бар. Жыршылар мен термешілер, домбырашылырдың орны қазақ үшін әрдайым бөлек.– Басты тақырып – домбыра болғандықтан, әңгімеден ауытқымай, әрі қарай жалғастырайық. «Нартай өнер мектебі» десе, біздің көз алдымызға, нағыз талантты жастардың елестейтіні рас. Басқа өнерпаздарды қоспағанда бүгінде аталған мектепте домбырашылардың көп екенін білеміз. Өнер мектебінің биылғы жеткен жетістіктеріне кішігірім тоқталып өтсеңіз.– Иә, біздің мектепте домбыраға қызығып, сал-серілердің жолын жалғағысы келетіндер көп. Нақтырақ айтар болсақ, дәл қазіргі уақытта 60-қа тарта оқушы тәлім алуда. Сонымен қатар, біздің мектепте «Дәстүрлі ән», «Бұдабай Қабылұлы» атындағы жыр үйірмесі, «Халық» үйірмесі, «Маханбетқали Тұрсанов» атындағы ақындар үйірмесі, «Құрманбек Бекпейіс» атындағы сырнай үйірмесі жұмыс істейді. «Нартай өнер мектебі» – биылдың өзінде көптеген өнерпазды сахнаға шығарып, жарық жұлдыз етуіне ат салысты. Солардың бірі – «Қазақстан дауысы. Балалар» мегажобасының финалисі Айқын Ерболатұлы. Алла қаласа, кішкентай шәкіртіміз бірінші шілде күні тікелей эфирде өз өнерін көрсетіп, бақ сынайды.– Тамаша! Қазақтың қасиетті қара домбырасын, өнерін қадірлейтін азаматтар көп болсын. Жалпы домбыраны кез келген бала үйрене ала ма? Оны меңгеру үшін қанша уақыт қажет?– Менің ойымша әрбір қазақтың бойында домбыраға деген мүмкіншілігі бар деп есептеймін. Қазақтың қанында сайрап жатқан өлеңнің һәм өнердің көзін тауып, жолға қоя алсақ, әр қазақ домбыраны өз деңгейінде тарта алады. Ал «қанша жастан бастап үйрене алады?» деген сауалыңызға жауап беретін болсам, ол енді мүмкіншілікке қарай. Біреуі 3 жасында тартса, енді бірі 3-сыныбында икемделе бастайды.– 2019 жылы Қарағанды қаласындағы мектептердің біріне «Жас ақын» ретінде қонақ болып шақыртылдым. Мені таң қалдырғаны – сол мектепте үзіліс кезінде соғылған қоңыраудың қарапайым сыңғыр емес, ұлттық аспабымыздың мәртебесі көтеріліп, түрлі күйдің шырқалғаны. Менің ойымша «Сыр елі – жыр елі» болғандықтан, барлық өңірлік &nbsp;мектептерде үзіліс кезінде күй шырқалып, қазақтың әуені сайрап тұрғаны дұрыс сыңайлы. Сіз не дейсіз?– Бұл сауалыңыз ерекше екен. Иә, мұндай жағдайларды көп естіп жатамыз. Арыға барып, көзіммен көрмесем де сізге бір оқиғаны қысқа қайырып берейін. Кешегі орыстың заманында Қармақшы ауданы, Тұрмағанбет дейтін ауылда Әлиакбар Жұматай деген бір мектепте ұзақ жылдар бойы жұмыс істеген, әрі жырау кісі болыпты. Сол кісі өз ауылындағы мектепте қоңыраудың орнына жыр-термелерді қоятын болған екен. Яғни, барлық оқушыларды жырға тәрбиелеген. Қазір енді сол Тұрмағанбет ауылынан 117 жырау шыққан. Әрине, олардың арасында көзі тірісі бар, дүние салғандары бар. Кішкентай ғана ауыл болса да, сол жыр-терменің арқасында қаншама жырау шыққан. Айтпағым, қазақтың қара домбырасының үнін естіген әр бала, рухани мықты болып өседі. Сондықтан мұндай үрдіс біздің Шиеліге де келсе қуанар едік. Міндетті түрде, қоңырау үніне жырды қосып қою шарт емес қой. Мәселен, күйді қосып қоюға болады. Ең бастысы – қазақтың дүниетанымын насихаттап оны дамыту. Тек мектепте ғана емес, бұл үрдісті балабақшадан бастау керек сыңайлы.– «Нағыз қазақ қазақ емес, нағыз қазақ домбыра» демекші, біздің қазақ екенімізді айқындайтын – қара домбырамыз екені рас. Бірақ жасыратыны жоқ, соңғы жылдарда ұлттық аспабымызды мазаққа айналдыратындар көбейді. Тіпті, сахна төрінде тұрса да кейбір өнерпаздар домбыраны келекеге айналдырып, былапыт сөздермен былғап жүр. Бұның себебі неде деп ойлайсыз? Домбыраның құнын көтеру үшін қайтпек керек?– Иә, ондай адамдарды көзіміз көріп жүр. «Алауан-алуан жүйрік бар, әліне қарай шабады» демекші, әркім өз әлінше домбыраны насихаттап жүр. Қазір көп өнерпаздардың «хайп» жасап жүргені белігілі. Ондай адамдар кез келген заманда болған. Бола береді де. Бірақ қазақ тұрған жерде, домбыраның құны ешқашан түспейді деп ойлаймын. Менің ойымша, біздің өнер уақыт өте келе құны артып, ғылыми дәрежеге жететін сияқты. Ұлы ақын Абайша айтқанда: «Көп айтса көнді, жұрт айтса болды, әдеті жаман адамның» дегендей көптің көңілінен шығамыз деп, төл өнерді аяқ асты етсек, бабалар мұрасына жасаған қиянатымыз болмай ма? Сондықтан баршамыз қазақтың қара домбырасын қастерлеп, ұлттық құндылығымызды жоғалтпауымыз қажет.– Ендігі әңгімемізді қара домбыраның күтіміне қарай ойыстырсақ. Өзіңіз ұлттық аспаптарды қайдан алдырасыз? Өзгелер секілді бағасымен сапасына мән бересіз бе? Қара домбыраға күтім керек пе?– Әрине, енді мүмкіндігінше сапалы домбыра таңдауға тырысамын. Көбінесе домбыраның жасалатын ағаш түріне қарап таңдаймын. Кептірілген, кептірілмеген түріне де мән беремін. Кептірілген ағаштан жасалған домбырадан керемет үн шығады. Көбінесе домбыраны Алматы қаласынан алдырамын. Әлбетте, қара домбыраға күтім керек. Ол да адамның он екі мүшесі секілді ғой. Күтіп қарауың керек. Ол – сенің асыраушың, беделіңді көтеретін серігің!Әңгімеңізге рақмет!

Мұхаммедәлі Бекпейісов: Қара домбыраға күтім керек

<a href="https://kyzylorda-news.kz/ru">Kyzylorda-news.kz.</a> Дәл осылай деп Алаш ардақтысы Әлихан Бөкейхан айтқан. Яғни, халыққа қалтқысыз қызмет етуде, оқып-білгенін іске асыруда мінез бен өзіндік көзқарастың, ұстанымның берік болуы маңызды. Ал мұқым елге мәлім ұлы Абай «Тегінде адам баласы адам баласынан ақыл, ғылым, ар, мінез деген нәрселермен озады» деп адам баласына берілген, тақ пен бақтан бөлек, оның өміріндегі адами қасиеттердің өлшемін айтып кеткен. Осының барлығы мемлекеттік қызметшілердің өн бойынан табылып жатса, ел алдындағы абыройы асқақтай берері сөзсіз.Иә, Сыр елі топырағынан нәр алып, ел мақтаныштары болған арда азаматтар аз емес. Алдыңғы буын ағалардың ізін басып, жолын жалғап, бүгінде жас болса да бас болып, ауданның экономикалық-дамуына сүбелі үлес қосып жүрген азаматтың бірі – Дәурен Әуезұлы. Қаламымызға арқау болған бүгінгі кейіпкеріміз – Дәурен Оспанов Жиделіарық ауылында туып өскен азамат. Мектепті үздік оқыған Дәурен 2013 жылы мектепті бітірген соң, Қорқыт ата атындағы Қызылорда мемлекеттік университетіне күндізгі бөлімге оқуға қабылданып, 2017 жылы «мемлекеттік және жергілікті басқару» мамандығы бойынша білімін тәмамдап, сол жылы Шиелі аудандық ішкі саясат бөлімінде «Жастар практикасы» мемлекеттік бағдарламасы аясында жұмысқа орналасып, 2018 жылы «Жиделіарық ауылдық округі әкімі аппараты» коммуналдық мемлекеттік мекемесіне арнайы тексеру қорытындысы келгенге дейін уақытша шаруашылық есебін жүргізу, әлеуметтік саланы дамыту және жастар ісі жөніндегі бас маманы лауазымына тағайындалды.Бүгінде Дәурен Әуезұлы Жиделіарық ауылдық округі әкімінің аппаратының шаруашылық есебін жүргізу, әлеуметтік саланы дамыту және жастар ісі жөніндегі бас маманы қызметін абыроймен атқарып келеді. Қазіргі уақытта осы лауазымда Қазақстан Республикасы Президентінің Жарлықтарын, ҚР Заңдарын, Үкімет Қаулыларын, облыс, аудан және ауылдық округ әкімдері қабылдаған нормативтік актілердің талаптарын орындау, елді-мекеннің әлеуметтік-экономикалық дамуын сараптау және оған бақылау жасауды ұйымдастыру, мониторинг жүргізу, әскер қатарына шақырылғандарды сараптамадан өткізу, құжаттарын даярлау, әскерге шығарып салу, сонымен қатар жастарды патриоттық отан сүйгіштік рухта тәрбиелеу, мемлекеттік жастар саясатын жүзеге асыру, ауыл жастарының белсенділігін арттырып және жастар арасында жұмыссыздық деңгейін төмендету, ауылды абаттандыру, көркейту-көгалдандыру, ауыл көлеміндегі кәсіпкерлікті дамыту және кәсіпкерлерді қорғау бағытындағы жұмыстарды ұйымдастыру бағытында түрлі жауапты салалық жұмыстармен айналысып, ел дамуына сүбелі үлес қосып келеді.Дәурен Әуезұлы 2019 жылы наурызда Қазақстан Республикасы Қорғаныс министрлігінің «Әскери-техникалық мектебі» республикалық мемлекеттік қазыналық кәсіпорны Қызылорда филиалының «Әскери оқытылған резерв» курсын «Атқыш» мамандығы бойынша бітірген. Сондай-ақ Маңғыстау облысы Азаматтық альянсы 2022 жылы ұйымдастырылған ауылдық жерлерде әлеуметтік жобаларды жүзеге асыруға арналған шағын гранттар байқауының жеңімпазы атанған. Аталған грант аясында Жиделіарық ауылының &nbsp;«Күзембай» арығы тереңдетіліп қазылып, ауылішілік арық бойына 2 дана ащы су тартуға арналған насос қондырғылары орнатылып, ауылдың ерікті өрт сөндіру құрылымы өрт сөндіруге қажетті құралдармен жабдықталып, ауыл тұрғындарының ыстық ықыласына бөленді. Кейіпкеріміз өткен жылдың қорытындысымен Шиелі аудандық «Самғау» сыйлығының иегері атанған.Міне, жас болса да білімі мен біліктілігінің арқасында талай жемісті де, жеңісті іс атқарып, өзі туған ауылдың өркендеп дамуына айрықша үлес қосып келе жатқан осындай азаматтардың еселі еңбегі өз жалғасын таба берсін демекпіз. Ауыл тұрғындары да Дәурен Әуезұлының тындырымды істерін айтып, мақтан тұтады.

Қазақстан және Қызылорда облысының жаңалықтары