<a href="https://kyzylorda-news.kz/ru">Kyzylorda-news.kz.</a> Бүгінде тағам дайындаудың сан түрі бар. Қаласаңыз, есігіңізге дейін дайын асты әкелетін немесе үйіңізге келіп, тамақ әзірлейтін қызметті пайдалану қолжетімді. Әсіресе, саны артқан жартылай дайын тағамдардың жұмысбасты адамдарға пайдасы орасан. Қазалылық Әйгерім Нұржігіт те осы салада кәсіп бастап, ісін дөңгелетіп отырған табысты жан. Кәсіпкер бүгінде өзінің «Келінжан» асханасында жартылай дайын тағам әзірлеу ісін қолға алып, тұтынушылардың қолдауына ие болуда.Жас кәсіпкер алдымен салалық білімін жетілдіруді арман еткен. Осы мақсатта «Бастау-Бизнес» жобасын аяқтап, кәсіпке қажетті дағдыны игеруге мүмкіндік алды. Кейін нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасы шеңберінде грантқа қол жеткізген. Кәсіпкер алған қаражатына пеш пен тоңазытқыш секілді құралдар сатып алып, алғашқы қадам жасай білді. Бүгінде «Келінжан» асханасының иесі 4 адамды жұмыспен қамтып отыр. Аталған асханада манты, тұшпара, болгар бұрышынан пісірме секілді астан бөлек, тәтті бәліш пен дәмді торт дайындалады.Жалпы, еңбек пен талапты тұмар еткен Әйгерім – мемлекеттік қызметші. Дегенмен, ол бұл саламен шектелмей, ұзақ жыл қосымша курстардан тәжірибе жинап, астың, тіл үйірер дәмдінің түр-түрін жасауға бейімделуге талпынған. Содан болар, жас кәсіпер сүйікті ісін әрмен қарай дамытуды көздейді.<blockquote>– Ас үйде жүріп, тағам дайындаудан жалықпаймын. Ғаламтор желісіндегі рецепттермен танысып, көрген-білгенімді жүзеге асыруға талпынамын. Әсіресе, түрлі тағам, дәмді торттарды. Бірер жыл бұрын хоббиді бизнеске айналдыру жайлы ой келді. Өйткені, бұл – тынығуға септесетін керемет әдіс. Тек шабыт керек. Қазір еңбектің арқасында ойдағыны жүзеге асыруға мүмкіндік алдым. Мемлекет қолдауы да қанаттандырды. Өнімдерді дайындап, технологиясына жіті мән беріп, сатылымға шығарамыз. Ұялы байланыстың дамыған кезеңі болғандықтан, көбіне әлеуметтік желі арқылы тапсырыс көп. Баға да қолжетімді. Ол – шағын ауданның өзінде істің көзін тауып, табысқа жетуге болады деген сөз, – дейді жас кәсіпкер.</blockquote>Кейіпкердің айтуынша, шағын асханаға сұраныс жоғары. Әсіресе, мереке күндері тапсырыс саны артатын көрінеді. Сапалы тағамның құнын білетін аудан тұрғындары да «Келінжанға» келуін жиілеткен. Әркез ұқыпты да сапалы қызмет көрсететін асханаға тұтынушылардың алғысы зор.Бір қызығы, уақыт тапшылығы мен жұмысбастылықтың салдарынан тез даярланатын тағамды тұтыну артты. Бұл орайда зерттеушілер қарқынды қатыру технологиясынан өткен тағамдардың бойында барлық қасиет пен дәрумен сақталатынын айтып, тұтынуға кеңес беруде. Оны арнайы ерітіп, күтіп отырудың қажеті жоқ, сыртындағы нұсқаулық бойынша қуырып немесе қайнатып, бірден пісіре беруге болады. Сондықтан тұтынушы талабын дөп басқан Әйгерімнің кәсібі табысты болуда.

Қызылордалық  «Бастау-Бизнес» жобасы арқылы кәсібін ашқан 

<a href="https://kyzylorda-news.kz/">Kyzylorda-news.kz.</a> Тәуелсіз еліміздің мәдени-рухани өркендеуіне зор үлес қосып, жас ұрпақты отансүйгіштікке тәрбиелеу, тарихымызды насихаттау, салт-дәстүрлерімізді жаңғырту, елді бірлік пен ынтымаққа шақыру жолында еңбек етіп жүрген мәдениет пен өнер саласы қызметкерлерінің қоғамдағы орны ерекше.Бүгін Қызылорда қаласының әкімі Асылбек Шәменов руханиятты дамытуға, адамгершілікті, қайырымдылық пен өзара түсіністікті өрістетуге жол ашып, үздік мәдени дәстүрлерді сақтауға және молайтуға өлшеусіз үлес қосып келе жатқан сала қызметкерлерін атаулы мерекемен құттықтады.<blockquote>«Ел Президенті Қасым-Жомарт Кемелұлы Тоқаев өз Жолдауында: «Әлеуметтік жаңғырудың жаңа кезеңіне қадам басудың бір тетігі – мәдениет қызметкерлерін қолдау» деген болатын. Расында, елдің рухани дамуы мен кемелденуі мәдениеттің қарқынды дамуымен ұштасып жатыр. Шаһардағы мәдениет және өнер қызметкерлерінің кәсіби шеберлігі мен ерекше таланты, қажыр-қайраты қаламыздың рухани кемелденуіне игі ықпалын тигізуде. Бұл ретте, мәдениет саласының дамуына үлес қосып, бүгінде арқа сүйер ақылшысы болып жүрген сала ардагерлеріне де құрметім мол», - деді Асылбек Шәменов.&nbsp;</blockquote>Сонымен қатар мәденеит және өнер саласының бірқатар үздіктеріне облыс әкімінің Алғыс хаты мен арнайы марапаттарды табыстады. Мерекелік шара бұдан әрі қала өнерпаздарының концертіне ұласып, құлақтан кіріп бойды алар тәтті әуен мен күмбірлеген күй, үйлесім тапқан ырғақты би, жарасымды әзіл-сықақ қойылымдары жиылған жұртшылықты ерекше әсерге бөледі.Мәдениет пен өнер – әр халықтың дүниетанымын, рухани байлығын, тыныс-тіршілігін тұтас жинақтайтын егіз ұғым. Сондықтан «мылтықсыз майданның» майталмандарына деген құрмет ешуақытта ортаймайды.

Асылбек Шәменов мәдениет және өнер қызметкерлеріне құрмет көрсетті

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласы әкімінің орынбасары Жанмұрат Сейіловтың төрағалығымен өткен қала әкімі жанындағы әйелдер істері және отбасылық демографиялық саясат жөніндегі комиссия отырысында үш мәселе қаралды.Күн тәртібіндегі бірінші мәселе бойынша мүгедектігі бар әйелдерге көмек көрсету және жұмысқа орналастыру мәселесі қаралып, қалалық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Кенжегүл Құрақбаева атқарылған жұмыстар туралы баяндады.<blockquote>«Бүгінде атаулы әлеуметтік көмек алатын аз қамтылған отбасы мүшелеріне, көп балалы отбасыларға, мүгедек бала тәрбиелеп отырған адамдарға және мүгедектігі бар тұлғаларға жаңа бизнес – идеяларды іске асыруға мемлекеттік гранттар берілуде. Грантқа қатысу үшін «Бастау бизнес» жобасы бойынша кәсіпкерлік негіздеріне мың үш жүзден аса әйел оқытылған, оның ішінде мүгедектігі бар әйелдердің саны 224-ті құрайды. Конкурстың бірінші легінен мемлекеттік грантқа ие болған 95 адамның ішінде 63-і әйелдердің үлесінде. Осы бағыттағы жұмыстар тиісті деңгейде жалғасын табатын болады», – деді бөлім басшысы.&nbsp;</blockquote>Осы орайда, Жанмұрат Жақсымұратұлы әлеуметтік осал топтағы әйелдерге көмек және қолдау көрсету шараларын ұдайы жүргізуді тапсырды.Ал күн тәртібіндегі екінші мәселе бойынша «Қызылорда қалалық әйелдер кеңесі» қоғамдық бірлестігінің төрайымы Жаннат Садуақасова кеңестің атқарған жұмыстары жайлы айтып өтті.&nbsp;Жаннат Мылтықбайқызы қоғамдық бірлестіктің қызметі нәзік жандылар арасында кәсіпкерліктің дамуына, отбасы институтын нығайту, отбасындағы тұрмыстық зорлық-зомбылықтың алдын алу, ана мен балалар құқығын және денсаулығын қорғау бағытындағы маңызды істерді ілгерлетуге бағытталғандығын айтып, алдағы уақытта қиын жағдайда қалған азаматшаларды қолдау мақсатында бірқатар әлеуметтік жобаларды жүзеге асыру жоспарға енгізілгендігін атап өтті.&nbsp;Кеңес мүшелері қоғамдық бірлестік төрайымына денсаулық сақтау басқармасымен бірлесіп, ерте жүктілік мәселесінің алдын алу, қыздар арасында жыныстық сауаттылық пен ұлттық тәрбиені дамыту мақсатында жүйелі жұмыстарды жүргізу бойынша ұсыныстар берді.Кеңесте көтерілген тақырыптардың бірі – қаламыздағы жасөспірімдер арасындағы өзіне-өзі қол жұмсау мен түрлі құқықбұзушылықтың алдын-алу мәселесі болды. Бұл жөнінде қалалық білім бөлімінің бас маманы Самат Күнқожаев баяндап өтті.Кеңес төрағасы Жанмұрат Жақсымұратұлы құқықбұзушылықтың алдын алу мақсатында түнгі рейд жұмыстарын күшейтуді, мектеп бітіру кештерін ұйымдастыру барысында заң талаптарына сәйкес келмейтін әрекеттерді болдырмауды және мектептердегі діни сауаттылықты арттыру ұлттық мәдениет пен құндылықты дамыту бағытында түсіндірме жұмыстарын жандандырып, теолог мамандарының балалармен тығыз жұмыс жасауын бақылауға алу керектігін де тапсырды.Сонымен қатар, алдағы кеңес отырыстарының күн тәртібіне қоғамдағы ең өзекті деген мәселелер бойынша ұсыныс енгізуді жүктеді.

Қызылорда: Қоғамның өзекті мәселесі қаралды

<a href="https://kyzylorda-news.kz/">Kyzylorda-news.kz.</a> Соңғы жылдары тасбөгеттіктердің &nbsp;мемлекеттік бағдарламаға қатысу қарқыны артып келеді. Биыл да тұрғындарға мемлекеттік &nbsp;бағдарламалардың игілігін пайдалануға &nbsp;кеңес берілуде. Нәтижесінде ұлттық жоба аясында жыл басынан бері 20 тұрғын Қызылорда «Өңірлік инвестиция орталығы» микроқаржы ұйымы арқылы өз жобаларын қорғап, 120,4 млн теңге көлемінде қаржылай қолдау тапқан.&nbsp;Сондай-ақ 400 АЕК көлеміндегі қайтарымсыз гранттың 1-ші легі бойынша 9 азамат жалпы сомасы 12 млн 420 мың теңгеге қол жеткізді. Қазіргі уақытта жаңадан кәсіп аш-қысы келетін немесе кәсібін кеңейтуге ниет білдіруші 100-ге жуық тұрғын бағдарлама шеңберінде өз жобаларын ұсынуда.&nbsp;Айта кету керек, 2022 жылы Тасбөгет кентіне 2,6 млрд теңге инвестиция тартылса, биыл бұл көрсеткіш 3 млрд теңгеден асып отыр. Аталған бағдарлама аясында кент тұрғыны Асылхан Оңалбаев жылыжай кешені жобасына 5 млн теңге &nbsp;қаржылай қолдау алған еді. Жеке кәсіпкер «Оңалбаев» иелігіндегі нысан сәуір айынан бастап алғашқы өнімін бере бастаған. Кәсіп иесінің айтуынша, жалпы ауданы 500 шаршы метр шағын жылыжайға әзірге қияр, қызанақ, бұрыш, көшеттер егіп, өсіріп баптауда. Егер жақсы өнім беріп, тұтынушы қызығушылығын арттыра алса, кәсібін одан әрі &nbsp;кеңейтіп, өнім түрін де көбейтпек.&nbsp;Жаңа іс бастауға жүрексінбей, тәуекелге бел буып, білек сыбана кіріскен азаматтың еңбекққорлығына риза болып, қолға алған үлкен жұмысына біз де сәттілік тіледік.

Тасбөгеттегі жылыжайдың жемісі

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Асылбек Шәменовтің төрағалығымен аппарат мәжілісі өтті. Жиынға мәслихат төрағасы, қала әкімінің орынбасарлары, кент және ауыл әкімдері, дербес бөлім басшылары мен БАҚ өкілдері қатысты.Күн жыли бастаса айдынды арналарға шомылуға асығатынымыз жасырын емес. Әсіресе ойын балалары суға түскенді жақсы көреді. Бірақ қауіпсіздік жағын ойлайтындар аз. Балалар түгілі, үлкендердің өзі кейде судың да тілсіз жау екенін ұмытып кетеді. Күн тәртібіндегі алғашқы мәселеге осы тақырып арқау болды. Қалалық төтенше жағдайлар басқармасының бастығы Жасұлан Түйменов қала аумағындағы су айдындарында, әсіресе Сырдария өзенінде азаматтардың түрлі себептермен қайғылы жағдайларға ұшырайтынын мәлім етті.Басқарма басшысының айтуынша, өткен жылы 12 адам суға кеткен, оның 6-ы бала. Суда адамдардың қаза болуының негізгі себебі – қауіпсіздік ережелерін өрескел бұзуы дейді басқарма басшысы. Бұл жағдайларға байланысты халық арасында және барлық мектептің оқушылары мен ата-аналарына WhatsApp желісі арқылы күнделікті түсіндірме жұмыстары жүргізілуде.<blockquote>«Су айдындарында адам өлімін болдырмау үшін қалалық төтенше жағдайлар басқармасының қызметкерлері, құтқару бөлімшелерінің құтқарушылары және полиция қызметкерлерімен бірлесіп, суға шомылуға тыйым салатын орындарда шомылу фактілерін анықтау бойынша күн сайын рейдтік іс-шаралар жүргізіп, 462 азаматқа судағы қауіпсіздік ережелері түсіндіріліп, үнпарақтар таратты. Қала аумағында адам көп шоғырланған орындарда (Арай сити молл ойын-сауық орталығы, Жаңа базар, Ескі базарларға және темір жол автовокзалдарға) дауыстық зорайтқыштары арқылы судағы қауіпсіздік бойынша түсіндірме жұмыстары жүргізілуде», – дейді қалалық төтенше жағдайлар басқармасының бастығы.</blockquote>Жиында қалалық мәслихат төрағасы Ибадулла Құттықожаев суға түсуге рұқсат етілмеген жерлерге арнайы тақтайшалар орнату керектігін атап өтті. Қала әкімі Асылбек Шәменов түсіндірме жұмыстарынан бөлек, барлық сала өзен жағалауларына, арналар бойына күнделікті рейдтік шараларын ұйымдастыруы керектігін қаперге салды. «Адам өмірінен артық ештеңе жоқ» деген қала басшысы рейд бойынша кесте бекітуді тапсырды.Бүгінде әскерге бару да, Отан алдындағы борышын өтеу де үлкен мәселеге айналып барады. Несін жасырамыз әскердегі әлім¬жеттік, адам өлімі секілді оқиғалар қоғамға әсер етіп, ата-аналардың өздері балаларын Отан алдындағы борыштарын өтеуге жіберуге қорқатын болды. Бір Қызылорданың өзінде 200-ге жуық азамат әскерден жалтарып жүрген көрінеді. Мінберге шығып, баяндама жасаған қалалық қорғаныс істері жөніндегі басқарма басшысы Бауыржан Асанов осылай деді.<blockquote>«Әскери қызметтің белгіленген мерзімін өткерген мерзімді әскери қызметтегі әскери қызметшілерді запасқа шығару және Қазақстан Республикасының азаматтарын 2023 жылдың наурыз-маусымында және қыркүйек-желтоқсанында мерзімді әскери қызметке кезекті шақыру туралы Қазақстан Республикасы Президентінің 2023 жылғы 2 ақпандағы № 120 Жарлығына сәйкес, &nbsp;2023 жылдың наурыз-маусымында және қыркүйек-желтоқсанында азаматтарды мерзімді әскери қызметке шақыруды жүргізуді ұйымдастыру туралы Қызылорда қаласының әкімінің 2023 жылғы 28 ақпандағы № 2039 Қаулысына сәйкес Қызылорда қаласының 18-27 жас, 1996-2005 жылдар аралығындағы ер азаматтарын әскерге шақыру жұмыстары жүргізілуде. Дегенмен түрлі себептермен әскерден жалтарып жүргендер бар. Олардың нақты саны 198 азаматты құрайды», – деді басқарма басшысы.</blockquote>Қала әкімі басқарма басшысына нақты шараларды қолға алып, түсіндірме жұмыстарын күшейтуді міндеттеді.Оқу жылының аяқталуына да аз уақыт қалды. Оған қатысты қандай шаралар ұйымдастырылады және жазғы каникулда балалар демалысын қалай өткізеді? Осы мәселе бойынша қалалық білім бөлімінің басшысы Ерлан Боданов баяндама жасады.Биылғы «Балабақшамен қоштасу», «Бастауыш сыныппен қоштасу», «Негізгі сыныпты бітіру», «Соңғы қоңырау», «Аттестат тапсыру» кештерін өткізу барысында ата-аналардан ақша жинауға, білім беру ұйымдары мен педагог қызметкерлеріне сыйлықтар беруге қатаң тиым салынды. Сондай-ақ мектеп бітіру кештері міндетті түрде мектеп қабырғасында және ауласында барынша қарапайым түрде өту керек. Үйлер мен мейрамханаларда, ойын-сауық орындарында мектеп бітіру кештерін өткізу және бітірушілердің автокөліктермен кортежге шығуына, білім алушылардың табиғат аясына серуендеуіне, өзен-көлдерге, шағын су алаптарына суға түсуіне жол берілмейді. Қазірде ата-аналардың барлығына түсіндірме жүргізілуде.<blockquote>«2022-2023 оқу жылын аяқтау және орта білім беру ұйымдарында білім алушыларды қорытынды аттестаттаудан өткізу мерзімдерін бекіту туралы «Білім туралы» Қазақстан Республикасы Заңының 5-бабының 14- тармақшасына сәйкес, ҚР Оқу-ағарту министрлігінің 2023 жылғы 10 сәуірдегі №88 бұйрығына сәйкес орта білім беру ұйымдарында 2022-2023 оқу жылында меншік нысанына және ведомстволық бағыныстылығына қарамастан орта білім беру ұйымдарындағы оқу сабақтары 2023 жылғы 31 мамырда аяқталады. 9-сыныптарда білім алушылардың қорытынды бітіру емтихандары 2023 жылғы 2-13 маусым аралығында, 11-сынып білім алушылардың мемлекеттік бітіру емтихандары – 2023 жылғы 5-19 маусым аралығында өткізіледі», – деді білім бөлімінің басшысы.</blockquote>Бөлім басшысы берген мәліметке сәйкес, алдағы уақыттағы балалар мен жасөспірімдердің жазғы маусымдағы демалысын ұйымдастыру бойынша іс-шаралар жоспары бекітілген. Бірінші кезекте мемлекеттік атаулы әлеуметтік көмек алуға құқығы бар, мемлекеттік атаулы әлеуметтік көмек алмайтын, жан басына шаққандағы табысы ең төменгі күнкөріс деңгейінің шамасынан төмен отбасылардан, жетім балаларға, ата-анасының қамқорлығынсыз қалған, төтенше жағдайлардың салдарынан шұғыл жәрдемді талап ететін отбасылардан шыққан балалар &nbsp;қамтылады. Балаларды сауықтыру «Дария», «Зерентай» және «Аңсар-Кәусар» ЖК, «Сыр Төресі», Жаңақорған ауданында орналасқан мемлекеттік кәсіпорын «Талды су» тынығу лагерлері арқылы ұйымдастырылады. Жалпы міндетті оқу қоры есебінен 2 500 баланы демалдыру жоспарланып отыр. Демеушілер мен инвесторлар есебінен аз қамтамасыз етілген отбасынан шыққан 200 бала «Арай-санрайз» лагеріне ба-рады. Осы сынды мәліметтерді алға тартқан қаланың бас мұғалімі мектептер жанынан да күндізгі тынығу лагерлері ашылып, онда 2 386 оқушы 2 ауысымда ыстық тамақпен қамтылатынын жеткізді.Қала әкімі сала басшысына балалардың жазғы демалысын ұйымдастыруда жұмыстарды жүйелеп, бақылау шараларын күшейтуді тапсырды.Айта кетейік, аппарат мәжілісінде қала әкімі бірқатар кадрлық өзгерістер болғанын да тілге тиек етті. Тобажанов Ғабит Рүстемұлы қалалық ауыл шаруашылығы және жер қатынастары бөлімінің басшысы лауазымына тағайындалса, Сырлыбаев Дінмұхамбет Мұратбекұлы қалалық сәулет және қала құрылысы бөлімінің басшысы болды. Сонымен қатар Қызылорда қаласының қорғаныс істері жөніндегі басқармасының бастығы да жаңарыпты. Бұл қызметке Қорғаныс министрінің бұйрығымен Асанов Бауыржан Махсұтханұлы тағайындалды.

Асылбек Шәменов балалардың қауіпсіздігіне көңіл бөлуді тапсырды

<a href="https://kyzylorda-news.kz/">Kyzylorda-news.kz.</a> Бүгін Қызылорда облыстық Қазақстан халқы ассамблеясы жанындағы Ақсақалдар кеңесінің екінші отырысы өтті.Отырыстың модераторы – Ақсақалдар кеңесінің төрағасы, қоғам қайраткері Нұрмұрат Ерманов болды. Іс-шараға облыстық, қалалық, аудандық Ақсақалдар кеңестерінің төрағалары мен мүшелері қатысты.Кеңес отырысында аймақтағы азық-түлік және алғашқы қажетті тауарларға баға нарығының өсу себептері және бағаны тұрақтандыру, жыл көлеміндегі жүргізіліп жатқан әлеуметтік бағдарламалар туралы мәселелері талқыланды.Шарада облыстық сауда және тұтынушылардың құқығын қорғау департаментінің басшысы Ерқасым Сүлейменов, бәсекелестікті қорғау және дамыту агенттігінің Қызылорда облысы департаментінің басшысы Ерсін Орынбаев, ауылшаруашылық басқармасынан азық-түлікпен қамтамасыз ету бөлімінің маманы Әлия Спандиярова және облыстық жұмыспен қамтуды үйлестіру және әлеуметтік бағдарламалар басқарма басшысының орынбасары Жанар Дәулетбаева баяндама жасады.Баяндамашылардың сөздерінен кейін кеңес мүшелері маусымаралық кезеңде көкөніс бағасының күрт өсуін болдырмауға және өз өңіріміздің шығатын күріш бағасын тұрақтандыру мәселелерін қозғады. Осы ретте бәсекелестікті қорғау және дамыту агенттігінің Қызылорда облысы департаментінің басшысы Ерсін Орынбаев айтуынша облыс бойынша 400-ден астам күріш шаруашылығымен айналысатындар, 30-ға жуық күрішті өңдейтін мекемелер бар.<blockquote>«Сол күрішті өңдейтін 6 мекемеге арнайы тергеу, тексеру жұмыстарын жүргіздік. Біз тексеру жүргізерден бұрын күріш бағасын түсіру туралы хабарлама берген болатынбыз. Хабарлама орындалмауына байланысты хаттама толтырылып, сотқа жүгіндік. Жалпы алғанда 70 млн. теңге айыппұл салынды. Тұз бағасы да көтерілді. «Арал тұз» компаниясына 170 млн. теңге айыппұл салынды. Сот процесі жүріп жатыр», - деп атап өтті.</blockquote>Ал кеңестің мүшесі Мамыр Байдәулетов әсіресе жастарға табиғи өнімді көбірек тұтынуға кеңес берді. Тұтынып қана қоймай, қара жерді өз игіліктеріне пайдаланып, масылдықтан арылып, еңбекқор болуға шақырды.Отырыс соңында ұсыныстар айтылып, пікірлер тыңдалды.

Қызылордада Ақсақалдар кеңесінің отырысы өтті

<a href="https://kyzylorda-news.kz/">Kyzylorda-news.kz.</a> Кез келген істе тұрақтылық пен жұмысқа деген сүйіспеншілік аса маңызды. Ал сүйікті ісі арқылы табыс таба алса, ол – жұмыстың төресі. Мұндай бақытқа ие болған жандардың бірі Қызылорда қаласының тұрғыны Гүлмира Сариева.Цех иесі бұл кәсіпті алғаш 2015 жылы бастапты, үйінде шағын бөлмесінде тапсырыспен көрпе-жастық, ұлттық нақыштағы киімдер тігіп бастады. Сұраныс артқан сайын, өнімнің сапасын да жақсарта түсуді көздейді, &nbsp;шеберлік сабақтарына да қатысады. Кейін оны өзінің тігіншілеріне үйретеді. Осылайша, ұлттық ою-өрнегі бар көрпелерге, ұлттық киімдерге &nbsp;сұраныс көбейе береді.Біз барған сәтте тігіншінің бірі төсек-жабдық тіксе, енді бірі – әдемі матадан әйелдерге арналған көйлек тігуде. Нақтылап білгенімізде, тұрғыннан түскен тапсырыс екен. Цех заманауи 8 тігін машинасы, орау машинасы және өзге де қажетті құрал-жабдықтармен қамтамасыз етілген. Кең, әрі жарық бөлме түрлі тамаша дүниені тудыруға ыңғайлы. Тігін цехының алға қойған мақсатының ауқымы үлкен.<blockquote>«Қазір цехта тәжірибелі 8 тігінші әйел жұмыс істейді. Кәсіпорындар үшін арнайы киім, ұлттық бұйымдар мен басқа да тоқыма бұйымдарын әзірлейміз. Тігіншілер ең алдымен сапаға мән береді. Сондай-ақ, ателье форматында жұмыс істеп, ересектер мен балалар киімін тігеміз. Қазір тапсырыс түрленуде. Қолдан келгенше тұрғынның сұраған дүниесін үдесінен шыға орындап беруге тырысамыз. Қолжетімді бағада әрі сапалы өнім дайындау үшін тігіншілер барын салуда. Киімдерді жалға беру– кәсібіміздің бір бағыты», – дейді кәсіпкер.</blockquote>Тұрақты тұтынушылар пайда болып, сұраныс көбейген соң бөлмені кеңейтіп, шағын цех қылып ашқан Гүлмира &nbsp;бұнымен тоқтап қалмақ емес. Несие алып, тағы да үлкейткісі келеді.Тұрғынның кез келген тапсырысын орындауға, олардың риза болған көңілді жүзін көруге асық екенін жеткізді. Жылы жүздері мен ақжарма әңгімелерінен олардың жұмысына деген ыстық ықыласы мен сүйіспеншілігі анық байқалады. Жұмысыңды шынайы беріліп сүйсең ғана берекелі табыс болатыны белгілі.&nbsp;

Қызылордалық кәсіпкер 8 тігінші әйелді жұмыспен қамтып отыр

<a href="https://kyzylorda-news.kz/ru">Kyzylorda-news.kz.</a>&nbsp; Аудан орталығынан шалғайда жатқан ауылдық округтерінің бірі – Жетікөл. Бүгінде ауылда 145 отбасында 676 халық тұрады. Оның экономикалық белсендісі 291 адам. Халық саны бойынша ең шағын ауылда 2 тыл ардагері, 72 зейнеткер, 20 мүмкіндігі шектеулі жан, 13 «Алтын алқа» және 13 «Күміс алқа» иелері &nbsp;және 26 жас көпбалалы аналар бар.&nbsp;Ауыл әкімі Өмірбек Тоқпамбетовтың айтуынша 2023 жылдың бірінші тоқсанында жеке тұлғалардан 1 өтініш келіп түсіп, оған заң талаптарына сәйкес жауап берілген. Ауылдық округ әкімі аппаратында жыл басынан бері 7 шешім, 63 өкім шығарылған. 2023 жылға арналған ауыл бюджетінің кірістері 75346,0 мың теңге болып бекітілген.2023 жылдың І тоқсанында ауыл бюджетінің өз кірістері &nbsp;жоспар бойынша 81 000 теңгені құрады. Атап айтқанда, жер мен мүлік салығының жоспары 11 000 теңге болып, орындалуы 13 000 теңгеге яғни 115 пайызға, көлік құралдары салығының жоспары 70 000 теңге, 100 пайызға орындалған.Ауылдық округте көктемгі және күзгі уақытта санитарлық тазарту және көркейту-көгалдандыру айлығын өткізуге биылғы жылы санитарлық жұмыстарына 500 000 теңге, ал абаттандыру және көгалдандыру жұмыстарына 1,0 млн теңге қаралған. Қалдықтарды арнайы полигонға тасымалдайтын мердігер мекеме "Маханов" ЖК-мен келісім-шарт жасалып, қалдықтар уақытылы шығарылуда. Осы күні ауыл ішіндегі ағаштар, электр бағаналары әктеліп, темір шарбақтар сырлану жұмыстары жүргізілуде.Ауылдық округ бойынша 2023 жылдың І тоқсанында ауыл тұрғындары мен шаруа қожалықтарында төрт түлік малдарын қайта нақтылау жұмыстары жүргізілуде.Ауыл орталығындағы &nbsp;№174 орта мектебі 320 орындық типтік жобада салынған. 2022-2023 оқу жылында 1-11 сыныптарда 124 оқушы білім алуда. Білім ордасында 1 мектепалды даярлық тобы және мектеп жанындағы шағын орталық жұмыс жасайды. Мектепте 36 мұғалім қызмет етеді. Педагогтардың 33-і жоғары білімді, 3-і арнаулы орта білімді. Педагог зерттеуші – 5, педагог сарапшы – 14, педагог модератор – 6 мұғалім оқушыларға сапалы білім мен тәрбие беруде. Ал мектеп жанындағы шағын орталықта 25 бала тәрбиеленуде. Шағын орталықта 4 тәрбиеші,1 әдіскер, 2 техникалық қызметші жұмыс істейді.Жетікөл ауылында тұрғындарға медициналық көмек көрсететін медициналық бекетінде бір медицина қызметкері бар. Ауруханаларға жоспарлы түрде 27 науқас жолданып, ем алған. Жыл басынан бері 2 бала дүниеге келіп, ана мен бала қобдишасы берілген. Жалпы дәрігердің қабылдауында 230 адам болса, ауырып келгендері 85 науқас. Дәрігерді үйге шақыртып қаралған науқастар саны – 42, флюорографияға түскендер – 125. Қатерлі ісіктің алдын алу мақсатында скринигтік тексеруден – 30 адам өткізілді. Диспансерлік есепте тұратын науқастар – 28. Барлық науқастар дәрігердің бақылауында.Ауылдық клуб қызметкерлері ауылда мәдени көпшілік іс-шаралар өткізіп, ұлттық, мемелкеттік, кәсіби мерекелер өтуде. Клубта барлығы 9 қызметкер жұмыс жасайды. 2023 жылдың І тоқсанында клуб ұжымының ұйымдастыруымен барлығы 11 мәдени іс-шара өткізіліп, оған 535 көрермен қамтылған. Оның ішінде, балаларға арналған 1 іс-шара өткен. Оған 80 көрермен қатысқа. Клубта 5 үйірме жұмыс жасайды. Олар: «Ән», «Жыр-терме», «Әзіл-сықақ», «Көркемсөз» және «Би» үйірмесі.Жыл басынан бері ауылдық клуб өнерпаздары әртүрлі деңгейдегі &nbsp;өткізілген 6 байқауға қатысып, 4 жүлделі орындарды иеленіп, 2 жолдама алғанын айту керек.Ауылдық кітапхананың кітап қоры – 16062 кітап. Оның ішінде қазақ тілінде – 11563 кітап. Оқырмандар саны – 166, кітап берілімі – 2160, келушілер саны – 1452 адам. Кітапхананың ұйымдастыруымен 16 мәдени көпшілік ісшара өткізілген.&nbsp;Ауылдағы жұмыссыздықпен күрес бағытында 28 жұмыссыз азамат тіркелген. Осы жылы 20 адам ақылы қоғамдық жұмысқа тартылды. 5 маман жастар тәжірибесінен өтуде. Жұмыссыздар ішінен «Жетікөл Жері» ЖШС-не басым көпшілігі жұмысқа орналасқан. Әлеуметтік қорғау бойынша 2023 жылдың І тоқсанында атаулы көмек 1 отбасына тағайындалды. 1 отбасына әлеуметтік себет берілген. Кәсіпкерлікті дамыту бағытында елді мекенде бірқатар жобалар іске асты. Жыл басынан бастап жаңадан тіркелген кәсіпкерлер саны – 1. Ауылдық округ бойынша жалпы тіркелген кәсіпкерлер саны – 55.<blockquote>"Жетікөл Жері" ЖШС, «Көркем» ШҚ және «Алиакбар Ата Агро» ШҚ төрағалары ауылдағы тұрмысы төмен отбасыларға азық-түлікпен қамтамасыз етіп, өз көмектерін көрсетуде.&nbsp;Ауылдық округ әкімі келесі проблемалық мәселелерді көтерді. "Жетікөл елді мекенінде электрмен жабдықтау жұмыс жобасына сәйкес «УниверсалСтройСервис» жауапкершілігі шектеулі серіктестігі құрылыс-монтаждау жұмыстарын жүргізу барысында елді мекен тұрғындарының наразылығын тудыртуда.&nbsp;Атап айтқанда, Қызылорда-Айдарлы-Ботабай облыстық маңызы бар автокөлік жүретін жолдың және ішкі көшелердің дәл іргесіне бағаналар ыңғайсыз жағдайда орналастырылуда. Бастапқы келісілген схемадан ауытқулар байқалуда", деді ауыл әкімі.&nbsp;Биылғы жылы елді мекен ішіндегі үш көшеге Рахменше, П.Сахабаева, А.Көзейбаев орташа жөндеу жұмыстары жүргізілетін болады. Мердігер компания «АйкоСтрой» ЖШС.</blockquote>Сонымен қатар, ауылдық округтен 2 тұрғын үй құрылысы үшін жалпы көлемі 2000 шаршы метр жер учаскесін 5 жыл мерзімге уақытша өтеусіз жер пайдалану құқығы табысталды. «Арион» ЖШС тарапынан биылғы жылы ауылда 2 тұрғын үйдің құрылысын аяқтау жоспарланған. &nbsp;

Сырдария: Жетікөлде екі тұрғын үй құрылысы аяқталады

<a href="https://kyzylorda-news.kz/">Kyzylorda-news.kz.</a> Қызылорда облысы кәсіпкерлер палатасы сарапшыларының араласуымен «Аграрлық несие корпорациясы» АҚ ауылдық елді мекендердегі кепілмүлікті бағалау құнын көтерді.Кәсіпкерлік мақсатта берілетін несиенің басты талабы міндетті түрде кепілмүлік болуы керек. Түрлі алаңнан түскен ұсыныстарды ескере келе, жыл басында Қызылорда облысы кәсіпкерлер палатасының директоры Пірмұхаммед Сыздықов «Аграрлық несие корпорациясы» АҚ-на осы мәселені көтеріп, хат жолдады.<blockquote>«Облыстың ауылшаруашылық тауар өндірушілері «Қазақстан Республикасының агроөнеркәсіптік кешенін дамыту жөніндегі 2021-2025 жылдарға арналған ұлттық жоба» аясында берілетін шағын несиелерді алу барысында жиі кездесетін кедергілердің бірі – кепіл және кепілмүлікті бағалау мәселесі», – дей келе, Аграрлық несие корпорациясының мүлікті бағалауы нарық құнына мүлдем сәйкес келмейтіні айтылған», - делінген хатта.</blockquote>Мәселені шешу үшін Кәсіпкерлер палатасы әр ауылдық округ пен аудандардан нақты нарықтық бағаларды жинақтап, баға нұсқаулығын қайта әзірлеуді ұсынды.Кәсіпкерлер палатасының сұрауына қаңтарда Аграрлық несие корпорациясы құнды төмендеткен тәуелсіз бағалаушылардың есептерін жеке тәртіппен қарастыратынын айтып, биылдан бастап мүлікті сатып алу-сату нарығында қалыптасқан бағаларға сәйкес кепілмүліктің құнын айқындаудың автоматтандырылған жүйесін енгізуді жоспарлап отырғанын жеткізді.<blockquote>«Бұл іс-шаралар жылжымайтын мүлікті сату бойынша ұсыныстардың шамамен 80-90 пайызын қамтитын «Крыша.kz» маркетплейсімен корпорация кепілдерді есептеу бағдарламаларын біріктіру жолымен жүргізілетін болады. Осылайша кепіл ретінде ұсынуға арналған мүлік құнын анықтаудың әділ тәсілі, бизнес-қоғамдастық көтеріп отырған кепілді қамтамасыз ету құнын төмендету мәселесін жояды», – деген жауап хатта.</blockquote>Жақында кәсіпкерлер үшін жағымды жаңалық келді. «Аграрлық несие корпорациясы» АҚ мамырдың 15-нен бастап жаңа баға нұсқаулығын ұсынды.Нұсқаулыққа сай ауылдық елді мекендердегі жылжымайтын мүліктің бір шаршы метрінің құны 30 пайыздан 100 пайызға дейін көтерілген. Тіпті бұрын жылжымайтын мүлкі мүлдем қабылданбай келген елді мекендердің де мүлкі бағалана бастайды.<blockquote>«Бұл - өте жақсы қолдау. Мысалы, Қазалы ауданына қарасты Әйтеке би кентіндегі жылжымайтын мүліктің бір шаршы метрі бұрын 49 мың теңгеден есептеліп келсе, енді 109 мыңға дейін қарастырылады. Осы аудандағы Мұратбаев ауылында бұрын 36 мыңнан бағаланса, енді 64,5 мың теңге болды. Дәл осылай өңірдің 267 елді мекеніндегі жылжымайтын мүлікті бағалау құны өсті», – дейді Кәсіпкерлер палатасы Агроөнеркәсіп кешені бөлімінің басшысы Алма Пірманова.</blockquote>Осы мәселеге қатысты кәсіпкерлерден сұрақ туындаған жағдайда Қызылорда облысының кәсіпкерлер палатасына хабарласуына болады. Байланыс телефоны 8 /7242/ 40-09-81. Жауапты маман Агроөнеркәсіп кешені бөлімінің сарапшысы Абзал Шәмшиев.

Қызылордада кәсіпкерлер палатасының сарапшылары кепілмүлік құнын көтеруге көмектесті

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев кадрлық өзгерістерге байланысты актив отырысында жаңа тағайындау туралы хабарлады.Қордабай Нұрғали Рахымшаұлы Қызылорда облысы бойынша тексеру комиссиясының аппарат басшысы лауазымына тағайындалды.&nbsp;<blockquote>«Нұрғали Рахымшаұлы Сіздерге жақсы таныс, мемлекеттік қызметтің түрлі сатысынан өтіп, лауазымды қызметтер атқарған тәжірибелі, іскер басшы. Әр жылдары мемлекеттік кірістер органдарында жетекші маманнан бастап, басқарма басшысы, департамент басшысының орынбасары болып абыройлы қызмет атқарды. Салық және бюджетке төленетін басқа да міндетті төлемдер көлемінің артуына өзіндік үлесін қосты. Нұрғали Рахымшаұлының жаңа қызметіне сәттілік, ел мүддесі жолындағы еңбегіне табыс тілеймін», – деді аймақ басшысы.</blockquote>Нұрғали Қордабай 1976 жылы туған. Қызылорда политехникалық институтын «Бухгалтерлік есеп және аудит», Қорқыт Ата атындағы Қызылорда мемлекеттік университетін «Құқық» мамандықтары бойынша бітірген.Еңбек жолын 1997 жылы «Дәнекер» АҚ бухгалтері ретінде бастаған. 1999-2015 жылдары Қызылорда облысының салық органдарында жауапты басшылық қызметтер атқарған. 2015-2016 жылдары Қызылорда қаласы әкімінің кеңесшісі. 2016-2018 жылдары Қызылорда облысының экономика және бюджетті жоспарлау басқармасы басшысының орынбасары, 2018 жылдың желтоқсан айынан бастап экономика және қаржы басқармасының басшысы қызметін атқарып келді.<img src="https://knadmin.beoblood.kz/uploads/347820991_1851730568532994_5923089880682446930_n_7ea1959611.jpg" alt="347820991_1851730568532994_5923089880682446930_n.jpg">

Қызылорда облысы бойынша тексеру комиссиясының аппарат басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев кадрлық өзгерістерге байланысты актив отырысында ҚР Мемлекеттік қызмет істері агенттігінің келісімі негізінде, облыс әкімінің өкімімен Қызылорда облысының экономика және қаржы басқармасының басшысы лауазымына Мүбараков Қамбарбек Амангелдіұлы тағайындалғанын хабарлады.Аймақ басшысы Қамбарбек Амангелдіұлын құттықтап, жаңа қызметінде сәттілік тіледі.<blockquote>«Қамбарбек Амангелдіұлы – аймақтың әлеуметтік-экономикалық ахуалымен етене таныс, мемлекеттік қызметтің барлық сатысынан өтіп, басқарушылық лауазымдарда мол тәжірибе жинаған әлеуеті жоғары кадр. Өңірдің әлеуметтік-экономикалық дамуының негізгі басым бағыттары мен стратегиялық мақсаттарын айқындауда экономика және қаржы басқармасының орны ерекше. Осы ретте бюджеттің әр тиынының мақсатқа сай жұмсалуын, сапалы игерілуін қамтамасыз етіп, барлық көрсеткіштер бойынша алдыңғы қатардан көрінеді деп сенім білдіреміз», – деді Нұрлыбек Машбекұлы.</blockquote>Жаңадан тағайындалған басқарма басшысын облыстық ардагерлер кеңесінің төрағасы Серік Дүйсенбаев пен Қызылорда облысы аумақтық кәсіподақтар бірлестігі төрағасы Мақсұт Нәлібаев құттықтады.Қамбарбек Мүбараков 1973 жылы дүниеге келген. Қызылорда политехникалық институтын «Агроөнеркәсіп кешені саласындағы экономика және менеджмент», Қызылорда гуманитарлық университетін «Заңтану» мамандықтары бойынша бітірген.Еңбек жолын 1990 жылы Өзгент совхозындағы орталық қырманның слесарі болып бастаған.1997-2009 жылдары салық органдарында түрлі деңгейдегі &nbsp;басшылық лауазымдарда қызмет атқарған. 2009-2018 жылдары Шиелі ауданы әкімінің орынбасары, Қызылорда облысы бойынша тексеру комиссиясының төрағасы. 2019-2022 жылдары Қызылорда облысының ауыл шаруашылығы басқармасының басшысы, Шиелі ауданының әкімі, Ы.Жақаев атындағы Қазақ күріш шаруашылығы ғылыми-зерттеу институтының төрағасы болған.2022 жылдың қараша айынан бастап осы кезге дейін Қызылорда облысының кәсіпкерлік және өнеркәсіп басқармасының басшысы қызметін атқарып келді.<img src="https://knadmin.beoblood.kz/uploads/348433924_616721787143222_903903431949079318_n_1a6442cd1e.jpg" alt="348433924_616721787143222_903903431949079318_n.jpg">

Қызылорда облысының экономика және қаржы басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев Мәдениет және өнер қызметкерлері күніне арналған салтанатты іс-шараға қатысып, Сыр елінің мәдениет қызметкерлері мен сала ардагерлерін кәсіби мерекемен құттықтады.<blockquote>«Ел Президенті Қасым-Жомарт Кемелұлы Тоқаев «Ұлт мәдениеті – халық өмірінің айнасы, оның болмысы. Сол себепті азаматтарымыздың рухы әрқашан биік болуы үшін мәдениетімізге, яғни, руханиятымызға баса мән бергеніміз жөн», – деген болатын. Бүгін Өздеріңізге ақжолтай жаңалықпен келдік. «Сырдың елі – жырдың елі» атанған қасиетті мекеннің абыройын асырып, бақ-беделін сақтауға үлес қосушы мәдениет және өнер, әдебиет өкілдерінің сан жылдан бергі тілегі – облыс әкімінің мәдениет және әдебиет өкілдеріне арналған «Тұран» сыйлығын табыстайтын боламыз. Жүлде қоры 500 мың теңгені құрайтын облыс әкімінің сыйлығы әдебиет пен өнер өкілдерінің шығармашылығын шыңдауға септігін тигізетініне сенімдімін. &nbsp;Он жылдан астам уақыттан соң арасы үзіліп қалған дәстүрді қайта жалғадық. Талай дарын мен талант түлеген Сыр өңірінде мұндай сыйлық пен марапаттың болуы – заңдылық», – деді аймақ басшысы.</blockquote>Жиында өнер иелеріне «Тұран» сыйлығын табыстау, ҚР Мәдениет және спорт министрлігінің «Еңбек ардагері» және «Мәдениет саласының үздігі» төсбелгісімен марапаттау рәсімі өтті. Мұнан бөлек, аймақтың бірқатар мәдениет саласының қызметкері Қызылорда облысының «Құрмет» грамотасымен, облыс әкімінің Алғыс хатымен марапатталды. Аймақтың мәдениет ұйымдарындағы 8 өнер ұжымына 40 домбыра тарту етілді.Мерекелік кеште ақын, Қазақстан Жазушылар одағы облыстық филиалының төрағасы Қаршыға Есімсейтова мен ақын Шаһизада Әбдікәрімов сөз сөйлеп, әріптестеріне игі тілектерін арнады. Аймақ басшысына өнер иелеріне қолдау көрсеткені үшін алғыс білдірді.Іс-шара соңы жергілікті өнерпаздардың қатысуымен концерттік бағдарламаға ұласты.Айта кетейік, биыл Сыр өңірінің мәдениет және өнер саласында көптеген жағымды жаңалық бар. Жыл соңында Қызылорда қаласындағы 1000 орындық көпфункционалды «Өнер орталығы», ал тамыз айында «Анаға тағзым» орталығы іске қосылмақ. Оған қоса өнер әлеміне қанат қаққан мүмкіндігі шектеулі өнерпаздардың шығармашылығын шыңдауға арналған Инклюзивті театр жобасы мақұлданды. Таяу арада Қызылорда қаласының әкімдігі мен облыстық мәдениет және спорт басқармасы бұған дейін үйірме ретінде жұмыс жасап келген «Жастар театрын» өз алдына кәсіби ұжым етіп құру бойынша нақты шаралар қабылдайды.Мұнан бөлек, биыл өнердің қарашаңырағы – Н.Бекежанов атындағы қазақ академиялық музыкалық драма театры 18 жылдан соң апталық бағдарламамен Алматы қаласына гастрольдік сапарға шығады. Үш дүркін «Алтын домбыра» иегері, жерлесіміз Мұхтар Ниязовтың жаңа ізбасарларын дайындау мақсатында өңірде тұңғыш рет «Айтыс олимпиадасы» атты облыстық жасөспірімдер айтысы өткізілмек.Қызылорда облысының құрылғанына 85 жыл және Қызылорда қаласының 205 жылдығына орай мерейтойлық салтанат аясында бірінші рет бюджет тапсырысымен 12 сериялы имидждік телесериал түсіру жобасы қолға алынды. Қазіргі заманауи трендке айналған телесериал арқылы аймақтың жағымды бет-бейнесін жасап қана қоймай, инвестициялық тартымдылығы мен туристік мүмкіндіктері республикалық, халықаралық деңгейде насихатталмақ.&nbsp;<img src="https://knadmin.beoblood.kz/uploads/347408521_130990686652484_3584911016618787127_n_a88d4c202e.jpg" alt="347408521_130990686652484_3584911016618787127_n.jpg"><img src="https://knadmin.beoblood.kz/uploads/347133806_259383573254587_1795306776942551515_n_c46724eae8.jpg" alt="347133806_259383573254587_1795306776942551515_n.jpg"><img src="https://knadmin.beoblood.kz/uploads/347408459_202426685998727_4978055725898543291_n_0454bd51a1.jpg" alt="347408459_202426685998727_4978055725898543291_n.jpg"><img src="https://knadmin.beoblood.kz/uploads/347548849_633003695350297_8563431292825283309_n_6caabc6e76.jpg" alt="347548849_633003695350297_8563431292825283309_n.jpg"><img src="https://knadmin.beoblood.kz/uploads/347265666_268051102358098_1961514152393716994_n_4eebbab6e4.jpg" alt="347265666_268051102358098_1961514152393716994_n.jpg"><img src="https://knadmin.beoblood.kz/uploads/347408853_1646190485853173_1230334526159042658_n_a3948d900c.jpg" alt="347408853_1646190485853173_1230334526159042658_n.jpg">

Қазақстан және Қызылорда облысының жаңалықтары

Қызылордалық «Бастау-Бизнес» жобасы арқылы кәсібін ашқан