<a href="https://kyzylorda-news.kz/">Kyzylorda-news.kz.</a> Қармақшы ауданының әкімі Жандос Еркінбектің төрағалығымен «Қарасора-2023» жедел-профилактикалық іс-шарасының басталуына орай жедел кеңес өтті.Кеңес отырысына аудандық құқық қорғау органдарының басшылары, бөлім басшылары және бейнебайланыс арқылы кент, ауыл әкімдері, жергілікті учаскелік полиция инспекторлары мен орман шаруашылығы мекемесінің қызметкерлері қатысты.Жиында «2023 жылдың 1 маусым – 31 қазан аралығында өткізілетін «Қарасора-2023» жедел-профилактикалық іс-шарасы бойынша атқарылатын жұмыстар туралы» аудандық полиция бөлімі бастығының орынбасары Мерей Өмірбекұлының хабарламасы тыңдалды.Аудан басшысы жиын барысында нашақорлық мәселесі ауданымызда ғана емес, бүкіл еліміздегі күрделі мәселелердің бірі болып отырғандығын тілге тиек етті.Сондай-ақ өңіріміздің табиғи-климаттық жағдайы құрамында жоғары есірткі заты бар қарасора өсімдіктерін өсіруге қолайлы болып саналатындығын айта келе, есірткі қылмысының алдын алу жұмыстарын күшейту жөнінде тиісті сала басшыларына нақты тапсырмалар берді.

Қармақшыда жедел кеңес өтті

<a href="https://egemen.kz/article/232282-eshki-suti-%E2%80%93-el-yryzdyghy">ФОТО</a><a href="https://kyzylorda-news.kz/">Kyzylorda-news.kz.</a> Ешкі сүтінің адам денсаулығына пайдасы туралы жаңақорғандықтар жақсы біледі. Себебі ешкі ерекше күй талғамайды, әрі қойға қарағанда тез көбейеді. Ешкінің сүті де, еті де шипалы қасиетке ие. Сол себептен де, кейінгі кездері ешкі сүтіне деген сұраныс артты. Әсіресе, қыс ауасында ешкі сүтінің өтімі жақсы, соған орай бағасы да өсті. Литрі 600 теңгеден сатылуда. Аудан тұрғындары да бұл берекелі кәсіптің керегесін кеңейтуге тырысып бағуда. Осы атакәсіпті ісіне жаратып, бүгінгі күннің сұранысын ұтымды пайдаланып отырған Махаббат Ыдырысованың шағын шаруасымен танысқан болатынбыз.Жалпы ешкі малы әлемдік нарықта үлкен сұраныста. Мәселен, Швейцарияда өкпе ауруы, қан аздық, рахит, буын, тері ауруына шалдыққандарды емдеу үшін ешкінің сүті қажет. Ал, АҚШ-та жас нәрестелерге беру үшін арнайы дайындайды. Жер бетінде бір миллиардқа жуық ешкі бар болса, оның 180 миллионы Қытайда. Біздің еншімізде 155 мыңға жуықтайды екен. Бүгінгі біздің кейіпкеріміз бұл бизнесті қосымша табыс көзі ретінде пайдаланады. Өйткені өзі жедел жәрдем бөлімінде қызмет етеді. Жұмысы мен кәсібін қатар алып жүрген Махаббат өз балаларына ешкі сүтін кішкентайынан беріп өсірген. Оны көрші-қолаң естіп, кейіннен пұлдауға көшеді. Әзірге шаруа адамының қорасындағы Сексек ата түлегінің саны бесеу. Барлығы да орыс ешкісі. Бүгінде асырап отырған 5 ешкі кәдімгідей кірістің көзіне айналған. Мәселен, дәл қазір төлдеп тұрған 5 ешкіден 10 литрге дейін сүт алады.<blockquote>«Білген адамға ешкі сүтінің пайдасы зор. Мұндағы май түйіршіктері сиыр сүтіне қарағанда өте ұсақ болғандықтан ағзаға тез сіңеді, құрамында кальций да көп. Бұл, әсіресе, балаларға өте пайдалы. Сиыр сүтіне қарағанда сіңімді. Ал, бағасына келсек бала-шағама бұйыртқан осы несібені халыққа қолжетімді бағада ұсынуға тырысамын. Литрін 500 теңгеден артық көтермеймін. Сүтінен бөлек айраны мен құртының дәмі бір бөлек. Маған алушылар алдын ала тапсырып беріп, жазылып қояды», – деді кәсіп иесі.</blockquote>Ешкінің сүтін көбіне анасының уыз сүтіне тоймай қалған балаларға береді екен. Себебі ешкі сүті сиыр сүтіне қарағанда жеңіл әрі сіңімді. Сонымен бірге күрделі операциядан шыққаннан кейін оңалу үшін немесе өкпе ауруы¬на шалдыққандарға пайдалы. Емге алушылар негізінен дәрігерлердің кеңесіне жүгінеді. Адам иммунитетін көтеруде, әсіресе көктем кезінде ешкі сүтінің денсаулыққа пайдасы көп. Осындай құнды мағлұмат берген Махаббат апай бұл жануарды бағуға да ерекше күтім керек екендігін айтады.<blockquote>«Ешкі малын бағу оңай емес. Қой астынан сыз өтсе жата береді, ал ешкі сызға осал. Тұяғынан суық өтсе, ол жерге мүлде жоламайды. Жалпы, қорасы жылы, азығы мол болса, болғаны. Ал қора ылғал, шөп құнарсыз болса, сүтінің майлылығы азаяды. Сондықтан ешкіге ерекше күтім жасап, жем-шөбін уақытылы беріп отырамын», – деді ол.</blockquote>Күнделікті өріске шығып, шөпті жерден жұлып жемей, қорада қамаулы тұрған малдың күтімі, әлбетте оңай емес. Сөзі мен ісі бір жерден шығатын еңбек адамының жұмысын біз де өз көзімізбен көрдік. Бәрінен бұрын тазалықты бірінші орынға қоятын кейіпкеріміздің ешкі сауудағы әрекетіне сүйсіндік. Ешкіні саумас бұрын, оның желінін жақсылап тазалап жуып, содан кейін ғана саууға кірісті. Алдына таққан алжапқышының өзі мұнтаздай аппақ. Арнайы салынған қора-жайы да тап-тұйнақтай. Лақтарын бөлек, сауын ешкілерін бөлек ұстайтын бұл кәсіпкер отбасының әрбір тірлігінің жинақы екендігі көзге көрініп тұр. Ешкі сүтінің емдік қасиеттері жетерлік, асқазан, ауруларында, анемияда, көздің нашар көруінде, диатезде, онкологиялық аурулар, суық тигенде пайдасы мол. Емшек жасындағы балаларды коректендіру үшін аса қолайлы. Жалпы, педиатрлар ешкі сүтіне бірауыздан ықылас білдіруде. Балаларды жасанды немесе аралас азықтандыруда ешкі сүті ана сүтін алмастыру үшін лайықты. Әрі 6 айдан асқан балалар үшін қосымша қорек ретінде пайдалануға болады.«Білген адамға ешкі сүтінің пайдасы орасан зор. Мұндағы май түйіршіктері сиыр сүтіне қарағанда өте ұсақ болғандықтан ағзаға тез сіңеді. &nbsp;Ешкінің сүтінде кальций көп. Бұл, әсіресе, балаларға өте пайдалы. Дәмі сиыр сүтіне қарағанда өзгеше болғандықтан, көп адам бірден іше алмайды. Ал, бағасына келсек бала-шағама бұйыртқан осы несібені халыққа қол жетімді бағада ұсынуға тырысамын. Атап айтқанда, сүттің литрін 600 теңгеден артық көтермеймін. Естуішме, біздің ауданда 700-800 теңгеден сатылып жатыр екен. Сүтінен бөлек айраны мен құртын айтсаңшы, дәмі бір бөлек қой. Маған алушылар алдын ала тапсырып беріп, жазылып қояды. Әсіресе, құртын бірнеше ай бұрын дайындап, ақшасын төлеп қоятындар да бар. Ешкі сүтіне деген сұраныс жоғары. Көбінесе сүтті анасының уыз сүтіне тоймай қалған балаларға береді. Себебі ешкі сүті сиыр сүтіне қарағанда жеңіл әрі сіңімді. Сонымен бірге күрделі операциядан шыққаннан кейін оңалу үшін немесе өкпе ауруына шалдыққандар алып жатады. Олардың көпшілігі дәрігерлердің кеңесімен келеді. Адамның иммунитетін көтеруде, әсіресе көктем кезінде ешкі сүтін ішкен денсаулыққа өте пайдалы &nbsp;Әйтсе де, ешкі малын бағу оңай емес. Қой астынан сыз өтсе жата береді, ал ешкі сызға осал. Табанынан суық өтсе, ол жерге мүлде жоламайды. Жалпы, қорасы жылы, азығы мол болса, болғаны. Ал қора ылғал, шөп құнарсыз болса, сүтінің майлылығы азаяды. Сондықтан ешкіге де ерекше күтім жасап, жем-шөбін уақытылы беріп отырамыну қажет.Күнделікті өріске шығып, шөпті жерден жұлып жемей, қорада қамаулы тұрған малдың күтімі, әлбетте оңай емес. Сөзі мен ісі бір жерден шығатын еңбек адамының жұмысын бізде өз көзімізбен көрдік. Бәрінен бұрын тазалықты бірінші орынға қоятын Махаббат апайдың ешкі сауудағы әрекетіне сүйсіндік. Ешкіні саумас бұрын, оның желінін жақсылап тазалап жуып, содан кейін ғана саууға кірісті. Ал, алдына таққан алжапқышының мұнтаздай аппақтығына таңқалдым. Құдды, қымбат мейрамханада жұмыс жасайтын даяшыларды елестетті. Ал, арнайы соғылған қора-жайы да тап-тұйнақтай. Лақтарын бөлек, сауын ешкілерін бөлек ұстайтын бұл кәсіпкер отбасының әрбір тірлігінің жинақы екендігі көзге көрініп тұрды. Арнайы үйіне іздеп келіп, ақшасын беріп сатып алса да алғысын айтып жатқандарын да көрдік. Осыдан-ақ, табиғи таза өнімге халық тарапынан сұраныс шынымен жоғары екеніне көзіміз жетті. Содан болар ешкі сүтінің пайдасын там-тұмдап болса да айтылып та, жазылып та келеді. Қандай дерт болмасын, ағзаны күшейтіп, қорғаныс қабілетін арттыруға таптырмас дәрумен.Сондай-ақ, ағарғанды сатып алушылардың арасында алғысын айтып жатқандарын да көрдік. Осыдан-ақ, табиғи таза өнімге халық тарапынан сұраныс шынымен жоғары екеніне көзіміз жетті. Содан болар, ешкі сүтінің пайдасын там-тұмдап болса да айтылып та, жазылып та келеді. Қандай дерт болсын, ағзаны күшейтіп, қорғаныс қабілетін арттыруға таптырмас дәрумен.

Ешкі сүтін кәсіпке айналдырған жаңақорғандық ана

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Кемелұлы өз Жолдауында «Бұқаралық спортты дамыту пирамидаға айналуы қажет. Оның басына чемпиондар шықса, соның негізінде біз сау әрі саналы ұрпақты, мықты ұлтты қалыптастырамыз» деген еді.Өткен аптаның жексенбі күні мекеме қызметкерлері арасында шағын футболдан «Шиелі ауданы әкімінің кубогының» турнирі өтті. Жексенбі күні өткен турнирде 4 ұжым командалары алғашқы орындарға жайғасты. Атап айтқанда, Шиелі ауданы әкімдігі, Шиелі АПБ, Шиелі аудандық ауруханасы, Шиелі РЭС алғашқы бестікте көш бастады.&nbsp;Бұл жолы Шиелі ауданы әкімдігі командасы қарсылас ойыншыларға ерекше шабуыл жасап, Шиелі өрт командасын 6:4 есебімен жеңіп, аудан әкімдігінен жасақталған команда құрамы жеңіс тұғырынан көрінді. Одан кейін Шиелі РЭС командасы Шиелі сушар командасын 5:10 есебімен ойсырата жеңіп, жеңістің екінші тұғырын місе тұтты.Айта кетейік, турнирге мемлекеттік қызметкерлер, құқық қорғау органдарының қызметкерлері, медицина, білім беру салалары мен орман, су, өртке қарсы қызмет, теміржол сынды бірқатар мекеме өкілдері және ардагерлерден жасақталған 14 бірдей команда қатысып жатыр.Турнир әр аптаның жексенбі күндері ұйымдастырылып, бірнеше айға созылатын болады. Аталған турнир 26 кезеңнен тұрады.

Шиеліде ала доп додасы жалғасуда

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев әнші, композитор Батырхан Шөкеновтің бауырлары Мүсірәлі мен Бақытжан Шөкеновтерді қабылдады.&nbsp;Олар аймақ басшысына жаңадан жарық көрген әндер жинағын, ҚР Ұлттық банкі шығарған «Батырхан Шөкенов» коллекциялық монетасын және әнші туралы жарық көрген сұхбаттар мен мақалалар жинақталған кітапты табыстады.Өз кезегінде, Нұрлыбек Машбекұлы Батырхан Шөкеновтің есімі еліміздің өнер тарихына алтын әріппен жазылғанын, туған жерінде оның жарқын бейнесі, көңіл сырын дөп басатын әндері ешқашан ұмытылмайтынын айтты.Айта кетейік,18 мамыр – Батырхан Шөкеновтің туған күні. Осы күні Б.Шөкенов атындағы саябақта еске алу іс-шарасы өткізіліп, композитор ескерткішіне гүл шоқтары қойылды.Еске салсақ, 2018 жылы 18 мамыр күні Қызылордада Батырхан Шөкеновтің ескерткіші ашылды. Алматы қаласының Бостандық ауданында әнші атымен аталған көше бар. Өткен жылы ҚР Ұлттық банкі Батырхан Шөкеновтің құрметіне арнайы естелік монетасын шығарды.

Облыс әкімі Мүсірәлі мен Бақытжан Шөкеновтерді қабылдады

<a href="https://kyzylorda-news.kz/">Kyzylorda-news.kz.</a> «Қазгидромет» РМК Қазақстан қалаларындағы ауа сапасына болжамын жариялады.20 мамырда Қазақстан бойынша Өскемен, Риддер, Атырау, Ақтау қалаларында ауаның қолайсыз метеорологиялық жағдайлары күтіледі.Қолайсыз метеорологиялық жағдайлар - атмосфералық ауаның беткі қабатында зиянды (ластаушы) заттардың шоғырлануына ықпал ететін қысқамерзімді метеофакторлардың (тымық ауа райы, жеңіл жел, тұман, инверсия) жиынтығы.Қолайсыз метеорологиялық жағдай кезінде елдімекендердегі атмосфералық ауаның сапасы нашарлауы ықтимал.Ал Қызылордада күн ала бұлтты, күндіз 26 градус жылылықты көрсетсе түнде &nbsp;12 градусқа дейін түседі.

Бүгін бірнеше қалада ауа сапасы нашарлайды

<a href="https://kyzylorda-news.kz/ru">Kyzylorda-news.kz.</a> Халқымыздың барлық ұлттық құндылығы сияқты қазақтың қолөнер бұйымдары да – ұрпаққа мұра және мақтаныш. Адам қиялының шексіздігін қолының ісмерлігі-ұсынақтылығымен көркем өнерге айналдырып, тұрмыстық қажеттілікке тұтынатын мүлік әзірлеу – бабадан жалғасқан асыл өнер. Міне, осы өнерді жалғап келе жатқандар көп. Соның бірі – Индира Ырзакулова.Ине сабақтап, тігін тігу бәрінің қолынан келеді. Ал оюмен өрнектеп, кестелеп, құрақ құрап, көрпеше тігу екінің бірінің қолынан келе бермесі анық. Бүгінде құрақ көрпе мен көрпеше сұраныста. Жастық та құрақтан құралып, үйге әсемдік беріп тұрады. Мұның барлығын жинақ етіп сатып алу сәнге айналды. Қонаққа бара қал¬саңыз, мамық та жұп-жұқа көрпешелерге көз түседі. Қыз бала болған соң да ондай нәрселерді аңғармау мүмкін емес. Жақында құр¬бымның әпкесі көк түсті үш көрпе мен жастықтың құрағын өзі тікті. Бір күннің ішінде. Ұйқысыз өткізген еңбегі байқалады. Бүгінгі кейіпкеріміздің өнімдері әдемілігімен ерекшеленеді. Қаладағы құрақ құрау студиясы «Indira Rzakul» ақ алтынды егуден бастап, дайын өнімге дейін арадағы технилогияны өздері атқарады.<blockquote>– Бізге келіп түсетін тапсырыс көп. Тұтынушының көңілінен шықпаған кезіміз болған жоқ. Қай тапсырысты алсақ та, мұқият сұрап, жобасын ұсынып, ақылдасып отырамыз. Наурыз айы той маусымы болғандықтан да ол айда қыз жасауына сұраныс жетерлік. Тігіншілер көз майын тауысып еңбектенетіні белгілі ғой. Қай істе болмасын ұнатып, жылы тілегін білдірсе қуанамыз. Тігіншілік те сондай. Көзге көріне бермейді, уақыттың да біраз бөлігі кетеді. Дегенмен махаббатпен жасалатын іс жемісін бермей қоймайды. Мерекеге арналған тапсырыс көп. Қуантарлығы, жігіттер анасына сыйлық іздеп, қалауындағы көрпе-көрпешені алуда. Аналар, келіндер қашан да үйдің сәнін ойлайды емес пе? Бұл да «анама не сыйлауға болады?» деген сауалдың орнын толтырса керек, – дейді кәсіпкер.</blockquote>Сұраныс артқан сайын өнімнің сапасын да жақсарта түсуді көздеген Индира студиясын заманауи тігін машиналары, өзге де қажетті құрал-жабдықтармен қамтамасыз еткен. Кең, әрі жарық бөлме түрлі тамаша дүниені тудыруға ыңғайлы. Бұл жетістікке кәсіпорын мемлекет қолдауының арқасында жеткен. «Бизнестің жол картасы – 2025» бағдарламасымен қаржы алған өндіріс орны көрпе-төсек қыз жасауын тігіп, құрақ көрпе кестелеумен айналысады. Тігін цехының алға қойған мақсатының ауқымы үлкен. Тігіннің тілін түсінетін мамандардың жұмысы көптің көңілінен шығып жүр. Тірлігі тиянақты тігіншілердің ұқыптылығы кіре берістен-ақ байқалады. Әдемі жиналған бұйымдар, қаз-қатар тізілген көрпешелер сүйсіндірмей қоймайды. Одан бөлек, заманауи үлгідегі төсек-жабдық, қыз жасауына қажетті бұйымдар да бар.<blockquote>– Біздегі баға келушілердің қалтасына қонымды. Сапаға көңіл бөлеміз. Болашақта кәсіпті үлкейтіп, жастарды жұмысқа тарту болашақ еншісінде. Тігін тігу оңай емес, дегенмен де ынта болса бәрін де меңгеруге болады. Біз қызығушылығы бар жастардан маман шығаруға дайынбыз, – дейді ол.</blockquote>Тұтынушының талабына байланысты көрпенің ішіне мақта, түйе, қой жүнін салады. Сыртын қаптайтын материалды жергілікті сатушылардан алып, тек қана ұлттық нақыштағы емес, күнделікті тұтынуға арналғандай етіп ұсынатын көрпе-жастықтарға сұраныс жоғары.

Қаладағы құрақ құрау студиясы тұтынушының көңілінен шығуда

<a href="https://kyzylorda-news.kz/ru">Kyzylorda-news.kz.</a> «Дарын» ғылыми-практикалық орталығы өткізген республикалық жобалар байқауынан қызылордалық зияткерлер жүлделі оралды. Жобалар арасында үздік деп танылған Арайлым Анарбекқызының электронды «кітап сөресі» оқушылардың кітап оқуға деген ынтасын арттыру мақсатында жасалған. Әдеби сайттың авторы бізге жобаның артықшылықтары жайлы кеңінен айтып берді.Алдымен, байқау барысына тоқталсақ. Шымкент қаласында ұйымдастырылған ең ауқымды білім додасына республика бойынша 800-ге жуық оқушы ғылыми жұмысын ұсынған. Жаратылыстану-математикалық бағытта 389 жоба таныстырылса, қоғамдық-гуманитарлық пәндер бойынша 208 авторлық еңбек қорғалған. Сыр бойындағы NIS-тен байқауға Арайлым Әшірмет, Нұрай Өмірзақова мен Зарина Айсауытова &nbsp;қатысып, жас ғалымдар тілтаным, өндіріс және өлкетану салалары бойынша әділқазылардың жоғары бағасын алды.Қазіргі қоғамда жастардың кітапқа деген қызығушылығының азаюы ‒ басты мәселенің бірі. Кітапты заман талабына сай әртүрлі нұсқада ұсыну осы мәселені шешудің тиімді тәсілі екені рас. Осыны ескерген Арайлым бұл жобаны өткен жылдан бастап қолға алған. Жоба идеясы мен оның құрастырылу барысын кейіпкеріміз келесідей әңгімеледі:<blockquote>‒ Элективті курс кезінде лонгрид деген жаңа форматпен таныстық. Сол кезде лонгрид терминіне деген ерекше қызығу¬шы¬лық пайда болып, әртүрлі әңгімелер, кітаптар жайлы лонгридтер жасай бастадым. Лонгрид ‒ ауқымды мәтіндерді интернет желісінде қызықты етіп берудің жаңа жолы. Менің лонгридтерім сайтта интерактивті, яғни визуалды форматта берілді. Өйткені жасөспірімдер интернетті ақпаратты жылдам алу үшін пайдаланады, ал лонгрид визуалды форматта болған соң қолдануға тиімді бола түседі. Сайттың басты артық¬шылығы ‒ барлық адамға қолжетім-ділігінде, яғни қолданушыдан тіркелуді қажет етпейді. Жасқа да ешқандай шектеу жоқ. Лонгридтер автор және кітап жайлы мәлімет, кітаптың экранизациясы, автордың басқа кітаптары туралы ақпарат беретін төрт-бес бөліктен тұрады. Платформада әзірге он бес кітап бар. Олар жыл басында оқушылар арасында талқыланып, таңдалған. Кітап санын жыл соңына дейін көбейту ойымызда бар.Сайт қазақ әдебиеті, орыс және шетел әдебиеті сынды үш рубрикадан тұрады. Қазақ әдебиеті бойынша Ілияс Есенберлиннің «Көшпенділер» триологиясы, Бердібек Соқпақбаевтың «Менің атым Қожа» кітабы, Мұхтар Әуезовтың «Көксерек» шығармасы таңдалған, ‒ дейді Арайлым.</blockquote>Айта кетейік, Арайлым бұл жобасын жетекшісі Айгүл Абуовамен бірге құрастырған. Тың идеясын ұсынған оның өніміне әділқазылар тарапынан сайтта пікір жазатын орын дайындау жөнінде ұсыныс беріліпті.<blockquote>‒ Сайыстың шешуші кезеңінде барлық қатысушылар жұмыстарын арнайы көрмеге қойып, келушілерге таныстырды. Біз жобаларды көрме барысында жеке-жеке қорғадық. Бұл мұғалімдер мен оқушыларға жобамызды кеңінен түсіндіруге мүмкіндік берді. Мен қатысқан секцияда өзіндік ерекшелігі бар үздік 19 жоба қорғалды, ‒ дейді байқау жеңімпазы.</blockquote>

Қызылордалық оқушылар дайындаған электронды «кітап сөресі» үздік деп танылды

<a href="https://kyzylorda-news.kz/ru">Kyzylorda-news.kz.</a> «Қазақты домбырасыз елестету мүмкін емес» дейді кей кісілер. Әрине домбыра қазақпен егіз ұғым. Бүгінде әр шаңырақтың төрінен ілулі домбыра көрсек, жанымыздың әлі де бірге екенін аңдағандай боламыз. Әсіресе ауылдағы осындай көріністер жаныңды жадыратады.3000-ға жуық тұрғыны бар Абай ауылының тең жартысының шаңырағының төрінде домбыра ілулі тұрады. Мұнда әу демейтін адам да кемде-кем. Той-думан, туған күн кештері, шілдеханада домбырасыз өтпейді. Ауылдық мәдениет үйінде де домбыра үйреніп жүрген оқушылардың қарасы қалың.Ауылдағы Әкімовтар әулеті домбыраны киелі деп бағалайды. Күнделікті таңғы астан кейін домбырамен әсем әуен тыңдау – олардың әдеті. Осылайша отбасылық құндылықты балаларының бойына сіңіріп келеді.Ізбасар Әкімов асаба, жыршылық, термешілік өнерімен ауылға жақсы таныс. Оны тыңдауға ауыл тұрғындары асығып тұрады. Өнерін тамашалау үшін үйіне әдейілеп баратын ақсақалдар да бар. Домбыра тартқанда ерекше сезімге бөленетін Ізбасар келіншегіне самаурынға шоқ салдырып, өзі ардагерлердің сұранысы бойынша домбырасын қолға алады. Сол сәтте екі ұлы да қасына жайғасады.<blockquote>‒ Домбыраны жаныма серік етіп жүргеніме біршама уақыт болды. Домбыра тартқан өзіме қатты ұнайды. Керемет әсерде боламын. Балаларымның да қызығушылығын оятып, үйретуге ден қойып жүрмін. Ұлдарым мектеп жасына барар кезде домбыра үйретемін деп ойлаймын. Олар да мен қолыма домбыра алсам, дереу қасыма келеді. Кейде ұстап көреді, жерде жатса анасына “көтеріп қойыңызшы” дейді. Өзге балалардың ойыншық қылып ұстап отыратыны да бар ғой. Ал біздің үйдің балалары осы бастан домбыраның киелі зат екенін түсінеді, – дейді Ізбасар.</blockquote>Халқымыз домбыраға үкі тағып, төріне ілген. Күйшілерді төредей күтіп, төбесіне көтерген. Осы игі үрдіс қазір де жалғасып келеді. Ауылға келін түссе немесе қыз ұзатылса, құда шақырғанда қолына домбырасын алған Ізбасарды көреміз.<blockquote>«Бала кезден домбыраны қолыма алып өстім. Бірте-бірте дәстүрлі әндерді айтып үйрендім. Рас, қазір жастардың көбісі дәстүрлі өнерге бара бермейді. Бірі дәстүрлі өнерді түсінбесе, енді бірі қызығушылық танытпайды. Қазақ халқының рухани жәдігерлерінің ішінде мақтаныш етер бай мұрасының бірі – дәстүрлі әндер болса, оны ұлықтау – біздің мақсатымыз. Жастайымнан терме, жыр жаныма жақын болды. &nbsp;Нұртуған мен Тұрмағанбеттің термелерін тыңдап өстім, – дейді ол.</blockquote>Президенттің домбыра күнін белгілеуін барша қазақстандық ықыласпен қабыл алды. Еліміздің құнды дүниесін баршаға паш ету, насихаттау мақсатында бұл күннің маңызы зор. Бұл рухани жаңғыру бағытындағы ең сүбелі істің бірі болды.<blockquote>«Термені түрлі аспаптармен әрлеп, қоғам талабына сай бейімдеп айту үшін үлкен жүрек пен дауыс мүмкіндігі болу керек. Ол шеберлікті қажет етеді. Қазіргі жастардың талғамы бөлек. Бір өкініштісі, жастардың көбі терме тыңдамайды. Шетелге еліктеген олар өзге тілдің әніне қызығушылық танытып, соны орындауға бейім. Сол себепті термені түрлендіруді қолдаймын, – дейді жыршы. – «Жаздыгүн шілде болғанда…» деп Абай атамыз айтқандай, «көкорай шалғын, бәйшешек, ұзарып, өсіп, толғанда» бүкіл қазақ даласы күмбір-күмбір күй төккей, көктегі күн нұр төккей, домбырасын қолға алғай, әуелете ән салғай… «Дариға, домбырамды берші маған, Жаныма келші жарым, келші балам…» деп Мұқағалиша толғайық, «Нағыз қазақ қазақ емес, нағыз қазақ – домбыра!» деп Қадырша қайырайық! Ұлы ұлттың баласы, ұлықта домбыраңды, әр шаңырақта ілулі тұрсын, қазақтың киелі аспабы. Ұлттық домбыра күні құтты болсын! – дейді кейіпкеріміз.</blockquote>

Сыр елі – өнердің мөлдір бұлағы

<a href="https://kyzylorda-news.kz/ru">Kyzylorda-news.kz.</a> Білімнің дамуына атсалысып жүрген мамандардың көбі жастар болғанмен, ерте жасында басшылық лауазымға отырғандарды саусақпен санауға болады. Солардың бірі Абылай хан атындағы жоғарғы колледж директорының орынбасары – Берікол Әбдібеков. Берікбол қазір жастармен жұмыс жасап, оларға тәлімгерлік жол көрсетуде. Білім беру саласында жас та болса, бас болып жүрген Берікболдың сұхбатын назарларыңызға ұсынамыз.– Студенттер әлі де онлайн білім алуға мәжбүр. Сабақ үлгеріміне бұл қаншалықты әсер етеді?– Қоғамда болып жатқан жағдайға байланысты карантиннің сақтық шараларын қатаң сақтау мақсатында тек 1 және 4 курстың білім алушылары ғана оффлайн білім алып жатса, ал 2 және 3 курс студенттері онлайн түрде білім алуда. Колледж оқытушылары Platonus &nbsp;автоматтандырылған жүйесі арқылы өздерінің видеосабақтарын түсіріп, оқушының түсінуіне барынша жағдай жасап жатыр. Бұл сапалы білім беруге деген жасалып жатқан &nbsp;мүмкіндік. Әрбір студентпен кері байланыс жұмысы жүргізіліп отырғандықтан, &nbsp;сабақ үлгерімдеріне ешқандай қауіп-қатер жоқ деп айтуға негіз бар.– Онлайн тәрбиені қалай түсінуге болады?– «Тәрбиесіз берілген білім – адамзаттың қас жауы» деп ұлы ойшыл Әбу-Насыр Әл Фараби айтқандай, тәрбиенің &nbsp;өскелең ұрпақ үшін маңызы жоғары. Сондықтан онлайн түрде оқытудың формасы жүргізіліп жатқан жағдайға қарамастан, зум платформасы арқылы жан-жақты бағытта тәрбие сағаттары жүргізіліп, топ жиналысы жасалынуда. Қандай жағдай болса да, бала тәрбиесіне барынша жауапкершілікпен қарауымыз тиіс.– Бүгінде ата-ана жұмысы еселенді. Мұғалімге қойылатын талап та баршылық. Әйтеуір ата-ана мұғалімнің жұмысының қиын екенін сезді. Сіздіңше қалай?– Қазіргі оқыту формасының талабы бойынша ата-аналармен бірігіп, тығыз жұмыс жасау қажеттілігі туындауда. Сондықтан әрбір топ жетекшілері баланың уақытын сапалы өткізу мақсатында ата-аналармен бірлескен түрде жұмыс жасауда. Мұғалімнің жұмысы қиын деп жатамыз, бала тәрбиелеу ата-ана мен мұғалімнің тығыз жұмыс жасауының арқасында жүзеге асатын ауқымды процесс екенін естен шығармаған жөн.– Колледжде ауданнан оқитын студенттер бар. Оларда онлайн емтихан тапсырарда қиындықтар болмады ма?– «Абылай хан» атындағы жоғары колледжінде ауданның білім алушылары көп, дегенмен олардың білім алуына барынша мүмкіндік жасалуда. Интернет желісінің мүмкіндігі төмен аудандарда оқитын студенттердің ата-анасымен байланыса отырып, оң шешім қабылдау жұмыстарын жүргізіп жатырмыз. Сондықтан онлайн емтихан тапсыруда қиындықтар орын алған жоқ.– Жасыратыны жоқ, “мұғалімннің жалақысы көбейді” деп мұғалім болуға асығатындар қатары артып барады. Кәсіби маман қандай болу керек?– Мұғалім болу – екінің бірінің қолынан келе бермейтін мамандық. Сондықтан оның қиындығы мен қуанышы қатар жүретіні сөзсіз. Бүгінде педагог мәртебесі артып, қоғамда өзіндік жақсы жаңалықтар орын алып, жалақылары өсіп, мүмкіндік жасалуда. Дегенмен, сәйкесінше талап та күшейтілуде. Сондықтан кәсіби тұрғыда үнемі білімін жетілдіріп, заман ағымына сәйкес әдіс-тәсілдерді пайдалану арқылы үнемі ізденіс үстінде жүруді талап ететін маман ғана жақсы мұғалім бола алады.– Әр колледжде кітапхана бар. Студенттердің кітап оқуға қызығушылығы қандай?– Жасыратыны жоқ, қазіргі интернеттің дамыған заманында кітап оқитын жастар өте аз. Сондықтан олардың кітапқа деген қызығушылығын арттыру мақсатында &nbsp;оқытушылардың ұсынысымен әртүрлі бағытта 100 оқулық колледж кітапханасына алынды. Бұл жастардың кітап оқуға деген қызығушылығын арттыратыны сөзсіз. Әрине, ол бағытта колледж оқытушылары жан-жақты бағыт-бағдар беру арқылы нәтижелі жұмыс жасауда.– Тіл мәселесі қашанда өзекті. Қайтсек қазақ тілінің мәртебесін көтереміз?– Қай ұлттың болмасын баға жетпес құндылығы ол – тіл мәртебесі. Сондықтан тілге деген құрмет, ана тіліне деген махаббат отбасынан басталуы тиіс деп ойлаймын. «Өзге тілдің бәрін біл, өз тіліңді құрметте», деген сөзді үнемі өскелең ұрпақтың бойына сіңіруге тырысамын. Жүрегі қазақ деп соққан әрбір сәулелі жас бұл тақырыпта өзіндік жауапкершілікті сезінуі қажет.– Білуімізше колледж директорының тәрбие ісі жөніндегі орынбасарысыз…– «Абылай хан» атындағы жоғары колледж директорының тәрбие жұмыстары жөніндегі орынбасары қызметін атқарып жүргеніме биыл үшінші жыл. Іс-тәжірибем аз болса да, жасап жатқан жұмысыма деген жауапкершілігім өте жоғары. Әрбір маман өз ісіне жауапкершілікпен қараған жағдайда ғана нәтижеге жетеді. Сондықтан &nbsp;жауапты қызметке лайықты болып, әрбір баланың жүрегінен жол табу – мен үшін басты мақсат!– Берікбол сізді мұғалім ретінде танимыз. Ал еріктілікке қалай келдіңіз?– Ерікті жастармен тығыз жұмыс жасайтындықтан, бұл бағыт мен үшін таңсық емес. Сондықтан колледж директоры Дүлдүл Руслан Кажденбекұлының қолдауымен үнемі қайырымдылық шараларын ұйымдастырып, еріктілер қатарынан көрініп жүргеніміз біз үшін – азаматтық міндетіміз деп білемін.– Автоволонтерлікте қандай қиындықтар бар?– Айтарлықтай қиындық бар деп айта алмаймын, «сабақты ине –сәтімен» дегендей, әрбір бастама жауапкершіліктің арқасында жақсы нәтижемен аяқталып жатады. Ол үшін қоғамды, адамдарды үлкен жүрекпен қабылдап, жақсылық жасауға ықылас болса жеткілікті дер едім!– Сұқбатыңызға рақмет!&nbsp;

Қызылордалық мұғалім еріктілікпен айналысуда

<a href="https://kyzylorda-news.kz/ru">Kyzylorda-news.kz.</a> «Бастау» жобасының түлегі айына 200 мың теңгеден артық табыс табатынын жеткізді. Қызылорда облысына қарасты Арал ауданында тұрады. Тұрмыста, жолдасымен 3 бала тәрбиелеп отыр. Мамандығы заңгер Гаухар ешқашан бір ғана табыс көзімен шектелмепті.<blockquote>«Мамандығым бойынша отбасылы болғанша 7 жыл жұмыс жасадым. Іс-қағаздарымен айналыстым, мұнан өзге мәтін теру, слайд жасау секілді компьютерлік қызметтер көрсеттім, қосымша тойларда жедел суретке түсірумен айналыстым. Желілік бизнесте де нәтиже көрсете алдым. Кейін тұрмысқа шыққан соң жаңа ортаға бейімделу, үйдің тірлігі, бала күтімі секілді міндеттерім қосылған соң барлығын тоқтаттым», – деген Гаухар Жаңабаевава араға алты жыл салып, кәсіпке қайта келгенін айтты.</blockquote>Бала күтіміндеге аралдық келіншек өзінің тігінге икемі бар екенін ескере келе, кестелеп тігуді қолға алады. Ол үшін жолдасы шет елдік әріптермен жұмыс жасауға мүмкіндік беретін алғашқы тігін машинасын алып береді. Аталмыш тігін машинасымен тапқан табысының басын құрап, бір жылдың ішінде қазақ тілінің алфавитіне негізделген жаңа тігін машинасын сатып алады.<blockquote>«Кәсібім жүре бастағанын көрдім. Бұл машина да маған аздық етті. Сонымен елдің аузында жүрген «Бастау» жобасын жолдасым екеуміз зерттеп, қатысамын деп шештім. 1 ай оқып, біліктілігімді жетілдірген соң қайтарымсыз қаржы алу үшін жобамды қорғадым. Нәтижесінде 505 мың теңге грант алып, тігінге керек құрал-жабдықтарымды түгелдеуге мүмкіндік алдым», – дейді кәсіпкер Гаухар.</blockquote>Жас кәсіпкер «Бастау» жобасының тұтынушымен жұмыс жасап, түрлі есептіліктерді тапсыруда айтарлықтай көмек болғанын жеткізіп отыр. Ол «Бастау» жобасына дейін бұл қызметтерді ақылы тапсыртып келген екен.Бүгінде Гаухар Жаңабаева тойға арналған бұйымдар мен жас нәрестелердің киімдерін кестелеу қызметін көрсетеді. Әсіресе нәрестенің перзентханадан шыққанда киетін киіміне баланың атын кестелеп беруді сұраушылар басым екен.<blockquote>«Жақында тұтынушылардың сұранысын ескере келе киімдерге жазуды бояумен салуды, кружкаларға сурет салу секілді қызметтерді енгіздім. Жалпы қазіргі кәсібім Арал ауданында жоғары сұранысқа ие. Айына орта есеппен 200 мың теңге табыс табуға мүмкіндік беріп отыр. Еңбектенсең нәтижесін көруге болатынына нақты көзім жетті. Тапсырысты уақытылы орындау үшін кейде уақытпен санаспай жұмыс жасауға тура келеді. Алда кәсібімді ұлғайтып, жаңа қызмет түрлерін қосқым келеді. Ол үшін қазір жобамды әзірлеп жатырмын», – дейді Гаухар Жаңабаева.</blockquote>Айта кету керек, Арал ауданында 2017-2020 жылдары 1156 азамат «Бастау» жобасы бойынша оқытылып, 801 азаматтың жобасы мемлекет тарапынан түрлі қаржы көздері арқылы қаржыландырылған. Биылғы жылы 300 адамды жоба аясында оқыту жоспарлануда.

Қызылордалық кәсіпкер айына 200 мың табыс табады

<a href="https://kyzylorda-news.kz/ru">Kyzylorda-news.kz.</a> Жерлесіміз Дінмұхаммед Ақпан М.В.Ломоносов атындағы Мәскеу Мемлекеттік Университетінде оқиды.&nbsp;Жас ғалымның жеткен жетістігі көп. Ол мектеп қабырғасында жүріп-ақ, түрлі интеллектуалды сайыстарда шыңдалды, химия пәні бойынша өткен халықаралық олимпиадада, Корея Респуб­ликасында өткен халықаралық «Жас ғалым» ғылыми жобасында жүлдегер атанды. Ой-өрісі өзгеше, ізденісі ерекше жаспен жақында әңгімелесудің сәті түскен еді.‒ Әне-міне дегенше, 2021 жыл бітуге таяу. Сіз үшін бұл жыл қандай сәттерімен есте қалды? Жас ғалым ретінде айтыңызшы, жылдың сізге берген мүмкіндігі қандай?‒ Бұл жыл аса күрделі болды. Сонау Ұлы Отан соғысынан бері адамзат біріге ешбір сынаққа қарсы тұрған жоқ. Бірақ әр қиыншылық бізді бір жақсы нәрсеге үйретеді. Мысалы, ендігі жерде адамдар ғылым мен білімнің болашаққа бастайтын жалғыз ұғым екенін түсінді. Ғалымдарды бейбіт күннің батыры деп мәртебе көрсетті. Жеке менің ғылыми жетістіктерім үшін бұл жыл сәтті болды десем болады. Биыл көп өлшемді комплекстік кеңістіктің ішіндегі нақты кеңістіктерге классификация жасайтын теорема дәлелденді. Ломоносов конференциясында нәтиже жоғары бағаланды. Жаз айынан бастап қазіргі күннің ең мықты математиктерінің бірі, физика-математика ғылымдарының докторы, Ломоносов атындағы Мәскеу Мемлекеттік университетіндегі механика-математика факультетінің профессоры Андрей Ошемковпен бірлесе жұмыс бастадым. Дифференциалды геометрия бағытында маңызды теоремаларға қол жеткіздік. Жаңа математика тілінде мұны «Нийенхейс геометриясы» деп атайды. Қысқаша айтқанда, жанама кеңістікте берілген арнайы операторларды классификациялау. Бұл бағытта үш халықаралық конференцияда баяндама жасадым. Әлі де атқаратын жұмыс көп, себебі әр шешілген есеп астында жаңа он сұрақ жатады.Осы жылы мені 1,5 айлық дискретті геометрия бағытында құрылған жазғы бағдарлама үшін Мәскеу Физико-Техникалық Университетіне шақырды. Онда біз ұсынылған есептер бойынша ізденіс бастадық. 1999 жылы екі өлшемді Морс-Максвелл теориясы құрылса, оны әрі қарай көп өлшемді деңгейге жеткіздік. Бұл бағыт бойынша да мақалалар дайындалуда.‒ Математика шынымен қиын ғылым ба? Көбіне қиын есептің жауабы логикаға салып ойланғанда қарапайым болып шығады ғой. Дегенмен кей сәттерде сізде есептің жауабын таба алмай қаламын-ау деген қорқыныш бола ма?&nbsp;‒ Сізге кез келген ғалым-математик ең алдымен «математика – тіл» деп жауап береді. Шынымен де, жан-жағымызда болып жатқан әр құбылыс, қимыл математика тілімен жазылады. Оның өзге филологиялық тілдерден айырмашылығы – «ережеден өзгешелігі болмауы», яғни қазақ тілінде жуанға жуан, жіңішкеге жіңішке жалғанады десек: кітап деген кірме сөз бар. Математикада мұндай ерекшеліктер болмайды. Сіз санды екіге көбейтсеңіз жұп болады, бірақ мына сандардан басқасын деп айта алмайсыз. Ол – теорема, ол әрқашан дұрыс. Атақты физик Ричард Фейман: «математикада қиын деген не? Есеп шықса түсінуге болады, яғни қиын емес» деген. Әрине бізді ең алдымен жауабы қызықтырады. Мысалы, екі нүктені алайық, бірі екіншісінен жоғары болсын. Ешбір күш әрекет етпей бір нүктеден екіншісіне жіберсек, уақыт жағынан ұтымды траектория қандай? Көбі түзу сызық дейді, бірақ жауабы арнайы қисық – брахистохрона. Міне осы секілді жағдайлар жиі кездеседі, күтпеген жауаптар бәрімізді қызықтырады. Есепті шешу дегеніміз отыра қалып шығара бастау емес, олай болмайды да. Алдымен сенің алдыңда адамдар қандай нәтиже алғанын түсіну қажет, оларды зерделіп өзіңе ұнаған бағытта есепті шығарған жөн деп санаймын. Қазіргі таңда математика өте кең ғылым, мысалы алгебрамен айналысатын ғалым геометрияны түсіне қоймайды.‒ Жыл сайын математика тақырыбында түрлі жобалар қолға алынады. Ал соңғы уақытта бұл ғылымға енген өзгеріс бар ма?‒&nbsp; Математика өзге ғылымдарға қарағанда консервативті. Түбегейлі өзгерістерді жақтыра қоймайды. Физикада алдында болған теорияны кеңейтетін жаңа теория құрылса – бұл өзгеріс, басқа ғылым салаларында да осындай.‒ Академик Асқар Жұмаділдаевтің есебін шығарып, бақ сынап көрдіңіз бе? Есептің әлі күнге жауабы табылмауына не себеп деп ойлайсыз?‒ Математика глобальді тұрғыда үшке бөлінеді: алгебра, геометрия және анализ. Асқар Серқұлұлының есебі алгебра мен сандар теориясы бағытында, ал мен геометрия және анализ бағытында жұмыс істеймін. Жалпы бәріміз математикпыз десек те, айналысатын облыстарымыз тым бөлек.&nbsp; Есептің ұзақ жылдар бойы шықпауы математикада қалыпты жағдай. Мысалы, Ферма теоремасы үш жүз жылдан аса уақыт шешімін таппады.&nbsp; Неге мына есепті шығарған жоқсыз деу, дәл солай ақынға келіп «мына тақырыпта поэма жаз» дегенмен тең. Математика қатал ғылым болса да, мұнда да шабыт пен идея керек.‒ Өзіңізді дамыту үшін жаңадан не үйренгіңіз келеді?‒ Тек қана ғылыммен айналысу, менің ойымша қате. Ми деген кез-келген бұлшық ет секілді шаршайды, сол себепті қалыпты режимде оны демалдыру қажет. Өзіме теңіз ұнайды, теңіз жағасында кешқұрым серуендеп сан алуан ойларға батып жүру мен үшін демалыс. Жылы күннің шуағы мен толқындаған суға шомылу бар күйзелісті алып кететін секілді. Сол себепті серфингті үйренсем деймін. Тағы бір маған рахат әкелетін физикалық жаттығу – атқа міну. Бала кезімнен атқа көп міндім. Қазір Мәскеуде жүріп ауылдағы сол кездерім еске түседі. Физикалық жаттығулар мидағы кернеуді алады, ми шаршауы физикалық шаршауға қарағанда аса ауыр тиеді.‒ Математиканы академик есекке теңейді. Адамзаттың бар жұмысын атқарғанмен, қадірсіз дегені ғой. Ал сіздің теңеуіңіз қандай болар еді?‒ Шынымен де математика бар ғылымның аппараты, барлығы қолданады. Бірақ оның қадірі жоқ дегенге келіспеймін. Бір ғасыр бұрын адамдар ғалымдарды жақсы танитын еді, олар қазіргі теледидардағы жұлдыздар секілді болған. Уақыт өте келе адамдар мұны ұмытты. Біз жалақысы аз, ешкімге қажеті жоқ нәрсемен айналысатын жұмысшыларға айналдық. Коронавирус кімнің кім екенін анық көрсетті. Вакцина ойлап тапқан – ғалым, цифрлы технологияны дамытқан да – ғалым болып шыға келді.Менен ақыл сұраса: жерде жүріп күлгеннен, аспанға қарап армандаған артық дер едім. Ал аспанға, ғарышқа адамды алып баратын ғалымдар, олардың ғылымдағы жетістіктері.‒ Сұхбатыңызға рақмет!

Жерлесіміз халықаралық «Жас ғалым» ғылыми жобасының жүлдегері

<a href="https://kyzylorda-news.kz/ru">Kyzylorda-news.kz.</a> Байқасаңыз, қыздардың көбі бала күтіміне байланысты үйде отырған кезде кәсіп бастауға бел буады. Сөйтіп іске кірісіп кетеді. Тоғжан да солай. Екі балалы ана отбасымен ақылдасып, кәсіппен айналысуға шешім қабылдайды. Ауылдық жерде бизнестің ең дамыған түрі – мал бордақылау. Жас кәсіпкердің бұл туралы азын-аулақ хабары болса да, отағасына, отбасына сеніп, істі бастауға шешім қабылдаған.<blockquote>«Ауылда тұрғандықтан үйде мал ұстаймыз. Оның күтімі бізге жақсы таныс. Ата-енем, жолдасыммен ақылдаса келе мал бордақылаумен айналысайық деп шештік. Ол үшін осы жазда «Бастау Бизнес» жобасын онлайн оқып, сертификат алдым», – дейді Тоғжан.</blockquote>Кім болса да үйде отыра беруді ұнатпайды. Балаларының керек-жарағын алып беріп, жап-жаңа киімдерді кигізсем дейді. Бұл үшін отағасының ғана табысы жеткіліксіз. Сондықтан да көмегім болсын деп бір істі бастауға асығамыз. Есесіне кәсіпті әрі қарай дамытып, мол қаржыға кенелеміз. Кәсіп бастағысы келіп, бірақ оны жүзеге асыра алмай жүргендер үшін мамандардың көмегі ауадай қажет. Тоғжан да арнайы мамандардың кеңесіне жүгінген. Ол облыстық кәсіпкерлер палатасының Сырдария аудандық филиалы мамандары арқылы мемлекеттік бағдарлама талаптарымен танысып, «Atameken Qyzylorda» микроқаржы ұйымынан 6 пайызбен несие алуға болатыны жөнінде білді.<blockquote>«Тамыздан бастап құжат жинақтай бастадым. Қажетті құжаттарды дайындауда аудандық филиал кеңесшісі көмектесті. Түсінбеген сұрақ-тардың барлығына жауап беріп, қаржыландыру алғанға дейін жобаға сүйемелдеу көрсетті. «Atameken Qyzylorda» микроқаржы ұйымынан алғашқылардың бірі болып көмек алып жатыр екенмін. Қуаныштымын. Енді бұл қаражатқа жылқы алып, бордақылаймыз», – деді ол.</blockquote>Қай іс болсын жауапкершілікті талап етеді. Ал мал бордақылау жұмысы ауыр, табысы күшті бизнес түрі.

Қазақстан және Қызылорда облысының жаңалықтары