<a href="https://kyzylorda-news.kz/">Kyzylorda-news.kz.</a> «Бала – бауыр етің» демекші, бала тәрбиесіне ата-ананың оның ішінде ананың қосар үлесі зор. Жақында Қармақшы ауданы, Ақжар ауылында «Өнеге – отбасынан» атты сыр-сұқбат кеші өтті. Онда түрлі салада жемісті еңбек етіп жүрген мамандармен бірге, ақ жаулықты аналар бала, немере, келін тәрбиесі жайлы кеңінен ой-пікірлерін бөлісті.Алғаш рет өткізіліп отырған ауылдағы көшбасшы әйел-аналардың бас қосуында ауыл әкімі Нұржамал Бектайқызы жанұяның береке-бірлігі жайлы сөз қозғады. «Офицердің анасы» төсбелгісінің иегері, зейнеткер ұстаз Рая Мүсіркегенова, «Парасатты ене» номинациясының иегері Төлеу Медетова, «Мерейлі отбасы анасы» номинациясының иегері Сапура Шайкеновалармен бірге ҚР «Құрметті азаматы» төсбелгісінің иегері С.Бөртебайұлы атындағы клуб үйінің меңгерушісі Роза Кенжеғұлова, «Ораз ахун» серіктестігінің &nbsp;қызметкері Шәрі Қаражанова, «Өнегелі ене» номинациясының иегері Дүйсенкүл Жайсаңбаевалар баланың отбасының жылуын, қолдауын сезінгенде ғана бақытты &nbsp;болып ержететініне тоқталды.«Белсенді отбасының келіні» номинациясының иегері, ұстаз Назерке Тарғанованы «Білім беру ісінің үздік педагогы – 2023» атты республикалық байқаудың жеңімпазы және «Қазақ тілі» қоғамдық бірлестігі &nbsp;ұйымдастырған «Келіні &nbsp;жақсы үйдің керегесі алтын» тақырыбында өткен аудандық келіндер байқауында жүлделі ІІ орын алуымен ауыл әкімі құттықтап, марапаттарын табыстады.«Үлгілі ана» номинациясын иеленген кітапханашы Ақмарал Сағатқызы, жас әжелер Жанат Лекерова, Света Ізбенбетовалар босағаның берік болып қалыптасуына жанұядағы ауызбіршілік, сыйластық, ене мен келін, немере мен әже арасындағы өнеге тұтар қасиеттер жайлы ойларын ортаға салды.Өнерпаздар Гүлнар Жұмахметова, Ақлимаш Әбілтаевалар кеш қонақтарына әсем ән айтып, көтеріңкі көңіл күй сыйлады. Ауылдың клуб үйі ұжымы әзірлеген «Ақжарымның аналары», жас ана Ақмарал Әміралиеваның өзінің жанұясындағы беріліп жатқан тәрбие жайлы «Ата-ана: Өз балаңа үлгі бол!» атты бейнебаяндар мен слайдтар көпшіліктің көңілінен шықты.Жанұя тәрбиесіндегі &nbsp;ерекше тұлға ана жайлы сыр-сұқбаттан жас аналар өздерін мазалап жүрген сұрақтарына кең көлемде мағлұмат алды. Көпбалалы жас ана, кәсіпкер Айнұр Досмағұлованың дайындаған түрлі тәтті нандары мен Нұргүл Әбішеваның түрлі қолөнер бұйымдарынан әзірлеген «Бақыт кілті – өз қолыңда» атты көрмесіне кеш қонақтары ризашылық білдірді.Кешті ауылдық әйелдер кеңесінің төрайымы Рая Қайырқызы қорытындылады. Көшбасшы әйел-аналармен болған кездесуге қатысқандар өздерінің алған ерекше бір әсерлерін «Тілек дәптеріне» түсірді.

Ақжар ауылында көшбасшы аналар  басқосты

<a href="https://kyzylorda-news.kz/ru">Kyzylorda-news.kz.</a> Ұстаз, шәкірт, мектеп. Үш ұғымды байланыстыратын негізгі құрал – білім екені даусыз. Арамызда шәкірттері үшін бар уақытын аямаған ұстаздар қатары баршылық. Білім беру ісінде озық тәжірибесімен ерекшеленетін мұғалім – мектеп жүрегі саналады. Демек, өз мамандығының шебері атанған ұстазды оқушылары үнемі мақтан тұтады. Бұл ретте, №35 Иса Тоқтыбаев атындағы мектеп-лицейдің дене шынықтыру пәнінің мұғалімі Бақытжан Абылбеков жайлы қалам айтпақшымыз.Негізінен, көп балалалы отбасынан шыққан Бақытжан Абылбеков – Жаңақорған ауданының тумасы екені мәлім. Кең пейілді мінезімен ерекшеленетін ол – 8 ағайындының кенжесі екен. Көршілес ауданға қарасты Талап ауылындағы №160 орта мектепті бітірген оның бойында спортқа деген қызығушылық басым болған. Бала кезінен қазақша күреспен шұғылданған ауыл баласы арманына қанат бітіру үшін Алматы қаласына барған еді. Осында педогикалық училищеде «Дене шынықтыру» пәні бойынша білім алған. Қайбір жылдары әскер сапына қабылданған Бақытжан Абылбеков Отан алдындағы борышын өтеді. Әскерден келген жас сарбаз еңбек жолын Алматы қаласындағы №139 Ахмет Байтұрсынұлы атындағы орта мектептен бастаған. Кейіннен, Тереңөзекке қоныс аударған ұлағатты ұстаз №35 Иса Тоқтыбаев атындағы мектеп-лицейдің дене шынықтыру пәні бойынша қызметке орналасқан.<blockquote>– Шын мәнінде, менің білім саласы қызметінде жүрегеніме отыз жылдан асқан екен. Алматы қаласынан келгенімде аға буын өкілдері айқын жол көрсете білді. Мен үшін ұлағатты ұстаздардың берген бағыт-бағдары өмірлік сабақ болғаны жасырын емес. Асылында, әке-шешем темір жол саласында қызмет еткен. Дене шынықтыру пәнінің мұғалімі болу – бала кездегі негізігі арманым болды. Бір жылдары Тараз қаласындағы мемлекеттік университетте білімімді жетілдірдім. Қазіргі жаңартылған білім мазмұны – бұрынғыдан өзгерек. Осы күні мұғалімдерге талап жоғары қойылатыны тағы бар. Бұдан бөлек, ертеректе балаларға арналған спорт секциялары сирек ашылатын. Ал осы күні барлық мүмкіндік қарастырылған. Біз үнемі баланың бойындағы қай спортқа қабілеті бар екенін анықтап, ақыл-кеңесімізді айтамыз. Расында, кәсіби спортшы болудың негізгі баспалдағы – мектепте қалыптасатыны ақиқат.</blockquote>Айта кетейік, әрбір буындағы шәкірттердің өзіндік ерекшеліктері болады. Талай жыл дәріс берген оқушыларымыз халықаралық дәрежедегі спорт шеберлері екенін мақта тұтамыз. Әрқашан хабарласып, өз салалары бойынша жан-жақты ақылдасып отырады. Олардың жетістікке жетуіне кішкене үлес қоса білсек, қуаныштымыз, – дейді ұлағатты ұстаз.Тарихы терең білім ордасынан түлеп ұшқан дарынды оқушылар тәжірибелі ұстаз Бақытжан Абылбековтің тәлім-тәрбиесіне қаныққан. Талай жыл спортқа бейім жастар білікті мұғалімнің нұсқауы бойынша байрақты бәсекелерден топ жарды. Өткен күндерін еске алған білікті маман жаттығу залдарының материалдық базасының төмендігі жастардың тұрақты спортпен шұғылдануына кедергі келтіргендігін айтады. Мәселен, қара жерде доп қуалаған балалардың чемпион болуға құштарлығы зор болған.<blockquote>– №35 Иса Тоқтыбаев атындағы мектеп-лицейде 7 дене шынықтыру пәнінің мұғалімі жұмыс жасайды. Балалардың спортқа деген ынтасын ояту – біздің міндетіміз. Жаңартылған білім мазмұны бойынша практикалық сабақтарға басымдық беріледі. Әрине, көкейде жүрген қынжылыс бар. Осыдан 10-15 жыл бұрын бір сыныпта бірнеше бала спортпен шұғылданатын. Бала санасын әлеуметтік желі, ғаламтор жау­лаған уақытта спортқа қызығатындар саны азайды. Дегенмен, оқушылар өзіне керекті ақпаратты, білімді, спортқа қатысты мағ­лұматты алуға тырысады. Сондықтан дене шынықтыру пәні бойынша енгізілген тың жаңалықтармен, ғылыми тео­риялармен ұдайы танысып отырамыз – дейді Бақытжан Абылбеков.</blockquote>Талантты шәкірттердің томағасын сыпырып, үлкен спортқа дайындаған Бақытжан Әшетұлы тереңөзектік Шынар Мырхиевамен отбасын құрады. Зайыбы Шынар Бағдатқызы бүгінде аудандық оқушылар үйінде қызмет етеді. Педагогика саласында қажырлы еңбек етіп келе жатқан ерлі-зайыптының екі ұлы бар. Үлкен ұлы – Ернұр кәсіби тұрғыдан волейбол спортымен шұғылданған. Екі дүркін ҚР чемпионы. Ал кішісі – Асхат әлі күнге футболмен айналысады. Кейіпкеріміз бос уақытында темірден түйін түйіп, ағаштан түрлі бұйымдарды жасағанды ұнатады. Сонымен бірге ол үйінен жаттығуға арналған бөлме жасақтап, уақытылы дене бітімін қалыпқа келтіріп отырады. Үнемі спорттық жаттығуларға көңіл бөлетін ұстаз жас ұрпақтың шымыр, денсаулығы мықты болып өсуіне ерік-жігерін арнай бермек. &nbsp;

Сырдариялық спортшылардың алғашқы бапкері

<a href="https://kyzylorda-news.kz/">Kyzylorda-news.kz.</a> Жастар – ұлт үмітін арқалаған ел ертеңі. Үміт пен сенімді ақтау сол буынның парызы. Сол себептен де жастар қазіргі қоғамның жетекші күші ретінде еліміздің дамуы үшін жауапты екені мәлім. Еліміздің тарихы мен мәдениетінің тағдыры, дамуы мен модернизациялануы, жалпы бүгіні мен ертеңі де жастарға байланысты. Жастар қай заманда, қай елде болмасын, асқақ арман мен үміт, биік ар мен өр намыстың символы болған.Биылғы жылдың ақпан айында жастар туралы заң күшіне енді. Жаңа заңда жастарға қатысты бірнеше жаңашылдық бар. Осы орайда заңнамада қарастырылған басты өзгерістерге тоқталып өтсек.Заңға сәйкес жастар ұғымының шегі ұлғайды, яғни ендігі уақытта 35 жасқа дейінгі азаматтар аталған санатқа кіреді. Осылайша елімізде жастардың үлесі 3,7 млн-нан 6 млн-ға дейін артты. Енді 35 жасқа дейінгі азаматтар жастарға арналған мемлекет тарапынан қарастырылған жеңілдіктер мен мүмкіндіктерді пайдалана алады.Заңнамадағы келесі жаңашылдық елімізде жастардың даму индексі енгізіледі. Еске салсақ, осыдан бірер жыл бұрын Мемлекет басшысы жастар арасында даму индексін енгізуді ұсынған еді. Биыл қаңтарда Ақпарат және қоғамдық даму министрлігі жастар индексінің әзірленіп жатқанын хабарлады.Жастарды дамыту индексі – денсаулық сақтау, білім беру, жұмыспен қамту, қоғам өміріне араласу, бос уақытты тиімді өткізу, қауіпсіздік деңгейін талдауға арналған жиынтық.Сонымен қатар NEET санатына кіретін жастарды да жаңалық күтіп тұр. Елімізде аталған санатқа жататындардың қатары көпбалалы және жалғызбасты аналармен көбейді. Бұған дейін NEET санатына тек жұмыссыз жастар ғана есептелетін.Тағы бір айта кетерлігі, жаңа заңнамаға сәйкес елімізде жастармен жұмыс жөніндегі маман пайда болды. Ол – жастардың жеке және әлеуметтік дамуын қолдауға бағытталған іс-шараларды жүзеге асыратын қызметкер. Аталған маманның мемлекеттік жастар саясаты мәселелері жөніндегі уәкілетті орган бекіткен сипаттамаларға сәйкес біліктілігі болады.Жастар туралы заңның тағы бір ерекше тұсы, елімізде еңбек жасақтары құрылады. Жастардың еңбек жасақтарына қатысу үшін 14-35 жас аралығындағы ел азаматтарынан өтінімдер қабылданады. Құжаттар жастар ресурстық орталықтарына тікелей жүгіну немесе «EL JASTARY» интернет-ресурсы арқылы тапсырылады. Жасақ құрамына қабылданған азаматтар көшелер мен саябақтарды абаттандыру, аумақтарды көгалдандыру, бос уақытты тиімді ұйымдастыру бойынша жұмыс, мәдени-бұқаралық іс-шараларды өткізу және оған қатысу, жастардың қажеттіліктері мен мүдделері негізінде ҚР заңнамасына қайшы келмейтін өзге де жұмыстармен айналысады. Яғни, жастар еңбек жасақтарының қызметі ҚР заңнамасына сәйкес жүзеге асырылады. Ескеретіні – жасақ құрамындағы азаматтар зиянды немесе қауіпті еңбек жағдайлары бар жұмыстарға жіберілмейді.Жастар санатындағы әрбір жас мемлекет ұсынған түрлі бағдарламаға да еркін қатыса алады. Оның ең алғашқысы – 2,5 пайыздық несие. Несиенің бұл түрін 21-35 жастағы кәсіпкерлер ала алады. Негізгі шарттарыне келсек, номиналды сыйақы мөлшерлемесі – жылдық 2,5%. Ал қарыздың ең жоғары сомасы – 5 миллион теңге. Берілу мерзімі – 5 жыл, ал мал шаруашылығы саласы үшін – 7 жыл. Міндетті түрле кепілге зат қойылуы тиіс. Сондай-ақ негізгі берешек пен сыйақыны өтеу бойынша жеңілдік кезеңі қарастырылған. Ол несие берілген мерзімнің үштен бірінен аспауы шарт. Ал мүмкіндігі шектеулі азаматтарға несие өтеусіз беріледі. Өтінімдер «Аграрлық кредиттік корпорация» АҚ-сында қаралады.&nbsp;Ал екінші мүмкіндік – жастарға арналған жалдамалы баспана. Бүгінде үш ірі мегаполисте, яғни Астана, Алматы, Шымкент қалаларында жұмыс істейтін жастарға жалдамалы баспана беріледі. Оны жеке меншікке сатып алуға рұқсат жоқ. Бірақ жалға алу ақысы төмен. Соның арқасында бес жылдың ішінде алғашқы жарнаны жинап алуға болады.Бағдарламаның негізгі шарттары – қатысушының 35 жастан аспауы, аталған қалаларда кем дегенде 2 жыл тұрақты тіркеуде тұру, тұрақты жұмыс орнының болуы, жеке меншікте баспананың болмауы, ақшаны жинауға арналған депозитті ашу, ай сайынғы табыстың нақты көлемі көрсетілуі тиіс. Жастарға арналған бұл жеңілдік бойынша Астанада тұрғын үй қорына, Алматыда қоғамдық даму басқармасына, ал Шымкентте отбасы, жастар және балалар істері жөніндегі басқармасымен байланысып, құжат тапсыруға болады.Үшіншісі – 35 жасқа дейінгі жастар ипотека ала алады. Қазіргі таңда «Елорда жастары» мен «Алматы жастары» сияқты ипотекалық бағдарламалар басқа өңірлерде біртіндеп іске қосылуда. 2025 жылға дейін оған барлық облыс қосылады. Осы бағдарламамен жастарға жеңілдетілген ипотека беріледі. Әрбір өңірде шарттары әртүрлі. Бұдан бөлек, Отбасы банкінде «Жас отбасы» деген тағы бір ипотекалық бағдарлама бар.Жастарға деген тағы бір мүмкіндік – ол жастар практикасына қатыса алуы. Қазақстанда білім беру ұйымдарының түлектері үшін жастар практикасы да ұйымдастырылады. Негізгі мақсаты – алғашқы тәжірибе жинақтауға көмектесу. Сондықтан 35 жасқа дейін бұрынғы немесе жаңа мамандық бойынша тәжірибе болмаса, жастар практикасы бағдарламасына қатысуға болады. Жастар практикасының мерзімі – 6 ай. Мемлекет тарапынан жалақы төленеді. Бағдарламаға қатысу үшін тұрғылықты жері бойынша жұмыспен қамту орталығына бару керек.Жаңа заңның берер бесінші мүмкіндігі – «Жас маман» жобасы. Бұл жоба аясында колледждерде индустрия мен қызмет көрсету саласы бойынша сұранысы жоғары 100 мамандықтың біреуін меңгеріп алуға болады. Ол үшін мемлекет кәсіптік-техникалық білім беру ұйымдарын қажетті құрал-жабдықтармен қамтамасыз еткен. Осы жобаны іске асыру үшін шетелдік сарапшылар да тартылды. Жоғарыда аталғандардан бөлек, елімізде жастарға арналған «Дипломмен ауылға» бағдарламасы бар. Ал Астанада «Еңбек» тұрғын үй бағдарламасына қатысып көруге болады. Яғни, талаптансаң, көп нәрсеге жетуге болады. Біз санамалап көрсеткендей, мемлекет жастарға осындай мол мүмкіндіктер ұсынып отыр. Ал сол мүмкіндіктерден мейлінше өзіне тиімдісін қанжығалап, пайдасына асыратындар ғана көш басынан көрінбек.Алайда, «Отызыңда орда бұзбасаң, қырқыңда қамал ала алмайсың» деген даналыққа ден қойып, 35-ке келгенше мен жаспын деп арқаны кеңге салмай, мемлекет берген мүмкіндікті тиімді уақытында пайдаланған жөн. Себебі жаспын деп желпініп жүргенде, қалай қырыққа келгеніңізді аңдамай қалуыңыз бек мүмкін.

Жастар жасы ұлғайды: Мүмкіндіктер қандай?

<a href="https://kyzylorda-news.kz/">Kyzylorda-news.kz.</a> КБИ мөлтек ауданың қала орталығымен жалғайтын қалаішілік №10 бағыт жаңғыртылып халыққа бүгіннен бастап қызмет көрсетеді. Бұл туралы «Қызылорда» автобус паркі» ЖШС директоры Мақсат Жүсіп хабарлады.Аймақ басшысының қолдауымен алынған жаңа автобустар халық игілігіне жұмыс жасауда. Солардын бірі КБИ мөлтек ауданы тұрғындары үшін қала орталығына қатынауына ынғайлы жағдайлар жасай отырып №10 бағыт іске қосылды. Қоғамдық көлікте мүгедектігі бар жандарға арналған пандус бар. Автобус салоны жолаушылардың қауіпсіздігі үшін бейнебақылау камерасымен, жылыту және салқындатқыш, GPS қондырғысымен жабдықталған.Аталған бағыт бұрынғы жол сызбасымен жүретін болады.Биылғы жылдың аяғына дейін облыс орталығы тұрғындарымен қала қонақтарына сапалы қызмет көрсету мақсатында қосымша 150 дана үлкен сыйымлықтағы автобустар сатып алынып, қала ішілік бағыттарды толықтай қамту жоспарланған.Айта кетейік, бүгінде серіктестік - №1, 3, 11, 12, 14, 15, 17, 18, 19, 20, 22, 25, 28, 29, 30, 31 қала ішілік бағыттары және «Ягодка», «ПМК - 29» бен «Қараөзек» саяжайлары бойынша жолаушылар тасымалдарын жүзеге асыруда. Осыған №10 бағыт қосылды.

Қызылордада тағы бір бағытқа жаңа автобустар беріледі

<a href="https://kyzylorda-news.kz/">Kyzylorda-news.kz.</a> Қызылорда облысы Полиция департаментінің бастығы полиция генерал-майоры Аблазимов Махсудхан Нұғманұлы оқу-жаттығу орталығы және қалалық полиция басқармасының ғимараттарына барып, жеке құрамымен кездесті.Басқарма, бөлім басшылары 2023 жылдың 4 айы 15 күнінде атқарылған жұмыстар жөнінде есеп берді. Облыс орталығында жастар мен жасөспірімдер қылмыстылығының профилактикасы ерекше бақылауда. Сондықтан департамент бастығы кәмелетке толмағандар тарапынан және оларға қатысты заңсыз әрекеттерді болдырмау және оларды ескерту бағытындағы жұмыстарды тұрақты түрде жүргізуді тапсырды.Кездесу барысында жыл басынан атқарылған жұмыс нәтижесі және жеке құрам арасындағы тәртіп пен заңдылықтың сақталу мәселелері талқыланды.Сонымен қатар, аталмыш кездесу барысында полиция қызметкерлерін әлеуметтік қолдау мәселесі де қозғалды. Облыс әкімінің қолдауымен биылғы жылы полиция қызметкерлерінің жалақысы артты. Жалақысы көтеріліп, жағдайы түзелген қызметкердің жемқорлыққа бармайтыны анық. Кадрлық мәселелер, оның ішінде кезекті еңбек демалысы, шендерді иелену сынды сұрақтардың барлығы электронды форматта қаралатындығы да айтылды. Мұның барлығы полиция қатарында сыбайлас жемқорлық көріністеріне мүлдем төзбеушілік деңгейіне көтерілуге әсер етпек.Бұдан бөлек, аудандардағы жанар-жағармай материалдарының электронды карточкалық жүйеге көшіп, оны дұрыс пайдалану мәселесі де қозғалды. Сондай-ақ, полиция қызметкерлерімен Қазақстан Республикасы Еңбек кодексі талаптарының қатаң сақталу қажеттігі де айтылды. Қоғамдық тәртіпті, жол қауіпсіздігін қамтамасыз ету, қызметкерлердің заңдылық пен тәртіпті сөзсіз сақтауы бойынша міндеттер қойылды. Департамент бастығы жеке құрамымен кездесуде ел Президенті Қасым-Жомарт Тоқаевтың Жолдауындағы негізгі қағидаларды түсіндірді. Ішкі істер органдарына жүктелген міндеттер, сондай-ақ оларды жүзеге асырудағы қызмет бөлімшелері басшылары мен қызметкерлерінің рөлі ерекше атап өтілді.<img src="https://knadmin.beoblood.kz/uploads/348636752_193013003228805_1121195104261504369_n_a6303cec8d.jpg" alt="348636752_193013003228805_1121195104261504369_n.jpg"><img src="https://knadmin.beoblood.kz/uploads/345062308_791414305707515_5419789734852905906_n_bda9dd5edf.jpg" alt="345062308_791414305707515_5419789734852905906_n.jpg">

Махсудхан Аблазимов қалалық полиция басқармасының жұмысымен танысты

<a href="https://kyzylorda-news.kz/ru">Kyzylorda-news.kz.</a> Өңірде көркейту, көгалдандыру және санитарлық тазалық айлығы басталғалы біршама жұмыс атқарылды. Мұны жергілікті тұрғын мен еңбек ұжымдарының белсенділігінен анық аңғарамыз. Әр сенбіде сенбілік жұмыстар жалғасын тауып, талай тірліктің басы қайырылды. Иә, туған жердің тазалығы күн тәртібіндегі бірінші мәселенің бірі болып тұр. Себебі сенбілік – айналаны қоқыс қалдығынан тазартып, халықты ауызбіршілікке шақыратын игі іс. 2 айға созылған көркейту-көгалдандыру жұмыстары бүгінде аяқталды.&nbsp;Таза үй, таза аула, таза көше кімнің де болсын еңсесін көтеріп, жақсы көңіл-күй сыйлайтыны белгілі. Сол үшін әр тұрғын сенбілікке салғырт қарамау қажет. Үйреншікті үрдіске айналған сенбілік жылдағы дәстүрге сай аудан әкімінің игі бастамасымен әр мекемеге белгіленген көшені абаттандыру, тазалау жұмысы қарқынды жүрді. Көктемгі тазалық жұмыстарын ұйымдастыру үшін көшелерді 6 аймаққа бөліп, ол мекеме, кәсіпорындарға бекітілді. Сол бойынша мекеме қызметкерлері әр сенбі таңертеңгі сағат 9.00-10.00-ден бастап сенбілікке қатысып, өз аумақтарынан қоқыс-қалдығын шығарып, мекеме ғимаратын әктеп, сырлаған ұжымдастар мен қызметкерлер &nbsp;ортақ үйдің әсемденуі үшін жұмыла еңбек етті. Әр сенбі сайын көшелер күл-қоқыс, тасталған бос құты мен қураған шөптерден тазартылып сыртқа шығарылды. Олардан бөлек сенбілік басталғалы аудан тұрғындары да білек сыбана жұмыс істеді. Осындайда тазалықты тек сенбілікке жүктемей әр тұрғын өз ауласын ұқыпты ұсьаса дейсіз.Көктемгі көркейту-көгалдандыру барысында көше бойына жиналған күл-қоқысты белгіленген орынға (полигонға) өздерінің техникаларымен шығарып тастап отырды. Алайда Жосалы кенті әкімшілігінің мамандары &nbsp;тұрғындар мен жеке кәсіпкерлерді тұрмыстық қатты қалдықтарды шығаратын мекеме мен келісім-шартқа отырғызу қазіргі таңда үлкен мәселе болып отырғанын айтады. Себебі, тұрғындар тарапынан қоқысты бей-берекет көше бойына қойып кету жағдайы жиілеген. Бұл тұрғыда құқықбұзушылықтарға қарсы бірқатар жұмыстар жүргізілуде. Көш бойына қоқысты ретсіз тастаған тұрғындарға заң аясында шаралар көрілетін болады. Мәселен, өткен жылы көшеге қоқыс тастаған, ортақ пайдаланатын орындарды ластаған 70 азаматқа айыппұл салынса, биыл жыл басынан бастап 56 азаматқа айыппұл салынған. Сол себепті айыппұл арқалағыңыз келмесе, тазалыққа тиянақты болғаныңыз дұрыс.Жосалы кентінің әкімшілігі тұрмыстық қалдықтар төгуге арналған қоқыс жәшіктерін (контейнер) бір жыл мерзімге, егер тараптар жағынан қарсылықтар болмаған жағдайда ұзақ мерзімге жалға беру және оған ақы төлеу үшін жекелеген тұрғындармен келісім-шарт жасасып отыр. Жалға беру ақысы айына – 400 теңге, жылына – 4800 теңге. Егер қоқыс жәшігін жалға алуға ниетті тұрғындар болса, Жосалы кентінің әкімшілігіне келіп, жалға алу келісім шартын жасасқаннан кейін контейнерді алып кетіп пайдалануына болады.&nbsp;Тазалық айлығы барысында Жосалы кенті мекемелерін арнайы тексеруге мониторинг топ шығады. Оның қорытындысы бойынша анықталған кемшіліктер аудан әкіміне және кентте жұмыс істейтін облыстық басқармаларға қарасты мекемелердің облыстағы басшыларына тікелей хат жазылып, ақпарат беріледі. Қоршаған ортаның тазалығына жауапкершілікпен қарау, туған жердің тазалығымен көркеюіне үлес қосу – әрбір азаматтың міндеті. Ал, сенбілікті ұйымдастырудың басты мақсаты – мекеме қызметкерлерінен бастап елге өнеге болу арқылы халықты ортақ іске жұмылдыру. «Ауылына қарап азаматын таны» деген нақыл сөз бар. Осы сөзді әрбір тұрғын санасында ұстаса, ауданымыз көркейіп, гүлдене түсері сөзсіз.

Қармақшыда тазалық жұмыстары тиянақталды

<a href="https://kyzylorda-news.kz/ru">Kyzylorda-news.kz.</a>&nbsp;Конго-Қырым геморрагиялық қызбасы адамдарға кененің тікелей шағуы, малды кенеден қолмен тазарту, жүнін қырқу кезінде және осы дертпен ауырған адамды күту барысында жұғады. Конго-Қырым геморрагиялық қызбасы ауруы немесе көкала – табиғи ошақтық аса қауіпті жұқпалы вирусты инфекция. Бұл аурудың аса қауіптілігі – өлім-жітім көрсеткішінің өте жоғары болуы. Яғни вирус жұқтырған адамның 30-70 пайызы өкінішке орай өмірден өтіп жатады.Ауруды қоздырушы вирустың табиғат пен жануарлар арасында айналымға түсуіне байланысты медицинада қазіргі таңда ауруды мүлде жойып жіберу мүмкін болмай отыр. Қармақшы ауданының халқы негізінен мал шаруашылығымен шұғылданатындықтан, Конго-Қырым геморрагиялық қызбасы табиғи ошақтары бар елді-мекендерде аурудың кездесу ықтималдығы да өте жоғары болып саналады.<blockquote>«Ауданда &nbsp;Конго-Қырым &nbsp;геморрагиялық &nbsp;қызбасының &nbsp;табиғи ошағында &nbsp;орналасқандықтан &nbsp;жыл &nbsp;сайын &nbsp;аталған &nbsp;індеттен &nbsp;«қолайсыз» болып &nbsp;табылатын &nbsp;елді &nbsp;мекендерде &nbsp;жоспарлы &nbsp;түрде &nbsp;профилактикалық &nbsp;шаралар &nbsp;жүргізіліп &nbsp;отырады. Осыған орай, жыл сайынғы кезекті эпид маусымдылығы алдындағы кенеге қарсы залалсыздандыру жолдары аудан әкімінің өкімі бекітіліп, оған сай аудандық жұмысшы топ құрамы және 2023 жылға арналған кешенді іс- шара жоспары бекітілді. Аудан өкіміне байланысты кезекті кенеге улау жұмыстары 6 мамырдан бастап жасалынуда. Ол Шымкент қаласының «SATTI TULIK» ЖШС мердігер компаниясының &nbsp;ауданда &nbsp;кенеге қарсы «қолайсыз» болып анықталған 11 елді &nbsp;мекеннің (Жосалы кенті, Қызылтам, Диірментөбе, Дүр Оңғар-Жаңажол, ІІІ-Интернационал, Алдашбай ахун, Қуаңдария, Кекірелі, Шобанқазған, Төретам, Ақай) ауылдарында І-ІІ тур залалсыздандыру жұмыстары ағымдағы айдың 26 мамырына дейін жүргізілу жоспарлануда. Сонымен қатар ауданда елді-мекен малдарынан, пададан және табиғаттан жиналған кенелерде ауру қоздырғышының бар жоғын анықтауда «оң» нәтиже анықталған аймақтарған қайталама нүктелік залалсыздандыру жұмыстары жүргізілуде. Сонымен қатар, басқарма тарапынан аурудың алдын алуда және болдырмау мақсатында санитариялық ағарту жұмыстары үздіксіз жүргізуде. Басқарма мамандары аудан және елді-мекен тұрғындарына түсіндірме жұмыстарын жүргізуде, санбюллетень шығарып, үнпарақшалар таратылуда. Кене шағу кезеңінде және ауру тіркелген жағдайда атқарылатын іс-шаралар туралы медициналық қызметкерлер арасында семинар сабақтары, жаттығу сабақтары және аттестациялау ұйымдастырып өткізуде», – дейді аудандық санитариялық эпидемиологиялық бақылау және қадағалау бөлімінің басшысы Перизат Қобылашқызы.&nbsp;</blockquote>Мамандардың айтуынша, кене шаққанда өзінің сілекейімен арнайы фермент бөледі, сол себепті көпшілік жағдайда кененің шаққаны білінбейді. Денеге жабысқан кенені байқаған кезде жақын орналасқан емхана немесе ауруханаға медициналық көмекке жүгіну керек. Қорғалмаған қолмен кенені ұстау қауіпті екенін есте сақтаған абзал. Кенені жалаң қолмен және бірден жұлып алуға болмайды, өйткені кененің тұмсығы қалып қойып, орны іріңдеп, жара болуы мүмкін. Дүниежүзілік денсаулық сақтау ұйымының ұсынысы бойынша кенені қарапайым медициналық қысқышпен (пинцетпен) немесе резина қолғап киіп, шүберекпен неғұрлым тұмсығына жақын жай қысып ұстап, шайқамай, бұрамай тарту керек. Шаққан орнын иод ерітіндісімен немесе спиртпен залалсыздандыру қажет. Кенені шыны ыдысқа салып, медициналық мекемеге өзімен бірге апару керек (қажетті жағдайда кене зерттеледі) немесе Ұлттық сараптама орталығының облыстық филиалына тапсырып, ақылы түрде зерттеуге болады.Аудандағы эпидемиологиялық ахуалға келсек, жыл басынан «кене шағу» жағдайымен медициналық көмекке жүгінгендер саны – 3 адам. Олар 14 күн бойы медициналық бақылауға алынып, аймақтық дәрігерлерінің бақылануында болады. Өткен жылмен салыстырғанда тұрғындар арасында «кене шағу» саны 2 жағдайға артып отыр. Ал Конго-Қырым геморрагиялық қызбасымен ауданда 2021 жылы – 1 жағдай және 2022 жылы – 1 жағдай тіркеліп, науқастар дер кезінде емін алып, жазылып шыққан. Барлығы ересек адамдар. Биыл 3 адамды кене шаққанымен, олардан аталған ауру белгісі табылмаған. Сондықтан ағымдағы жыл бойынша аталған дертпен тіркелгендер жоқ. Конго-Қырым геморрагиялық қызбасы ауруының алдын алу мақсатында атқарылатын басты іс-шаралар мыналар болып табылады. Біріншіден, вирусты кенеден адамға жұқтырмау шарасы, оған кене шақпау үшін сақтандыру киімін қолдану қажет. Яғни мейлінше ашық жер қалдырмай киіну. Жеңі ұзын жейде, шалбар кию. Кене тез табылуға көмек беретін ақшыл түсті киімді таңдау да сізге кенеден қорғануға үлкен мүмкіндік. Екіншіден, малдан адамға жұқтырмау шараларын қарастыру, оған жануарларға күтім жасағанда, жануарларды мүшелеген, сойған, тасымалдаған және өткізген кезде олардың қанымен, терісімен, ұлпаларымен жанасқанда сақтандыру киімдерін пайдалану. Үшіншіден, адамнан адамға жұғу қаупін азайту, оған науқаспен қатынаста болған жеке адамдардың және медицина қызметкерлері тарапынан жұқтырмау шараларын қарастыру, ауру күткенде арнайы медициналық киімдерді пайдалану, жеке басының гигиенасын сақтау керек.Кене шағып алғанда немесе кенемен жанасқанда, жануарларға күтім жасағанда, жануарларды мүшелеген, сойған, тасымалдаған және өткізген кезде олардың қанымен, терісімен, ұлпаларымен жанасқанда, табиғат аясында демалғанда, қансыраған науқас адаммен жанасқанда ауру жұқтыру қаупі көбейеді.Ал егер, жоғарыда көрсетілген жағдайдан кейін адам өзін нашар сезініп, дененің қызуы көтеріліп, кем дегенде бас және бұлшық еттер ауырғанда, жүрек айнығанда, лоқсу сезімі пайда болғанда, іш ауырғанда немесе іш өткенде, яғни, аурудың алғашқы белгілері кезінде дереу медицина мекемелеріне қаралуы қажет. "Сақтансаң, сақтаймын" деген. Сол себепті сақтық шараларын ескерусіз қалдырмау қажет.

Қармақшыда кенені улау жұмыстары жүргізілуде

<a href="https://kyzylorda-news.kz/ru">Kyzylorda-news.kz.</a>&nbsp; Ел көлемінде мемлекеттік бағдарлама шеңберінде кәсіпкерлікті бастау үшін жеңілдетілген пайызбен несие беру жолы &nbsp;толықтай қарастырылғаны мәлім. Осындай мүмкіндікті «Еңбек» мемлекеттік бағдарламасы аясында өңіріміздің жастары мен әлеуметтік аз қамтамасыз етілген азаматтар пайдалану үстіде.Мәселен, ақжармалық жас кәсіпкер Әйгерім Елікбаева – «Нәтижелі жұмыспен қамтуды және жаппай кәсіпкерлікті дамыту» мемлекеттік бағдарламасының игілігін көріп отырған жайы бар. Жас кәсіпкер биыл өз бизнесін бастауға 583 мың теңге көлемінде грант алды. Ауыл тұрғындарына шаштараз қызметін көрсетіп отырған кәсіпкер бұл салада он жылдан бері тәжірибе жинақтаған.<blockquote>Шаштараз қызметімен 2010 жылдан бері айналысып келемін. Осыдан 9 жыл &nbsp;бұрын Ақжарма ауылына тұрмысқа шыққаннан кейін қол қусырып отыруды жөн көрмей, ауылда сүйікті ісіммен айналысуды қолға ала бастадым. Отбасым да қолдау көрсеткен еді. Бастапқыда өз күшіммен есік алдындағы бос бөлмені шаштаразға лайықтандыра алдым. Жұмыссыздарды мемлекеттік қолдаудың арқасында «Бастау Бизнес» кәсіпкерлік негіздерін оқыту жобасы бойынша курстан өтіп, сертификат алғаным әлі есімде. Қазір қайтарымсыз несие алып, ауыл орталығынан тұрғындарға шаштараз қызметін ұсынып келемін, – дейді кәсіпкер Әйгерім Бекетбайқызы.</blockquote>Шаштаразға маманданған шебер облыс орталығындағы «Лилия» сән салонында шеберлігін шыңдап, тәжірибе жинақтаған. Сонымен қатар Әйгерім түрлі сән үлгілерін жасаудағы қабілетін күнделікті толықтырып отыруды дағдыға айналдырған. Қызылордадағы «Үміт» сән салонындағы шеберлерден қыз-келіншектердің шаш үлгісін жасауды үйренген. Шашты сәнді етіп қиюмен қатар ерлердің де шашын алуды меңгерген. Қазір шаштараз шебері қосымша қызмет түрлерін ашуды жоспарлап отыр. Ауылда үлкен сұранысқа ие кәсіп түрін табыс көзіне айналдырған жас кәсіпкер мемлекет тарапынан берілген қайтарымсыз несиенің арқасында қажетті құрал жабдықтарын жаңалап алуға мүмкіндік алған.<blockquote>Қазір шаштаразға келген келушілерге заманауи талапқа сәйкес қызмет көрсетуді бастадым. Арнайы шаш жуатын құрылғыны орнатып, қажетті құралдардың барлығын сатып алған едім. Келушілерге сапалы қызмет көрсету үшін Қызылорда қаласындағы сән салондарына барып, мамандардан біліктілігімді жетілдірдім. Алда біраз жоспарларым бар. Аптаның 7 күнінде демалыссыз жұмыс жасағандықтан, тұрақты келушілерім де бар, – дейді шаштараз Әйгерім.</blockquote>Шаштараз қызметін ауылда пайдалану ауыл тұрғындары үшін үлкен көмек. Бұрындары аудан, облыс орталығына уақыт бөліп, арнайы шаштаразға баратындар енді ауылдағы шебердің қызметін пайдаланады. Тұрақты келушілердің бірі ауыл тұрғыны Нұргүл Махан:<blockquote>&nbsp;Отбасымызбен Әйгерімге шаш алғызуға келеміз. Балаларым мен немерелерім де шашын осында алғызады. Әдемі, әрі сәнді етіп шаш алудың шебері десе де болады. Шаштараздың ішінде жақсы жағдай жасалған. Заманауи құрал-жабдықтармен толықтырып, қызметінің сапалы болуына мән беретін Әйгерімнің кәсібіне береке берсін деймін, – дейді.</blockquote>Бүгінде 34 жастағы кәсіпкерге нәтижелі жұмыспен қамтуды және жаппай кәсіпкерлікті дамыту мемлекеттік бағдарламасы сүйікті ісі мен хоббиін табыс көзіне айналдыруға мүмкіндік берді. Яғни қайтарымсыз қаржылай көмек алып, оны тиімді пайдаланып, шағын бизнесін бастады.Аудандық жұмыспен қамту орталығының маманы Айнаш Баймбетованың айтуынша, қазіргі таңда ауданда жұмыссыздар түрлі мемлекеттік бағдарламаға қатысу арқылы өз бизнестерін бастауға немесе кеңейтуге мүмкіндік алуда. Бүгінде ауданда 235 адам 583 мың 400 теңге көлемінде мемлекеттік грант алса, «Ауыл шаруашылығын қолдау қоры» арқылы – 66, «Аграрлы кредиттік корпорация» арқылы 8 кәсіпкер жеңілдетілген пайызбен қаржыға қол жеткізді. Бұл өз кезегінде ауданда жұмыссыздардың жұмыспен қамтылуына мүмкіндік берді.Қандай кәсіп болмасын оның дұрыс үйлестірілуі отбасыға байланысты. Бұл ретте жас кәсіпкерге енесі Жұмакүл Құрмантаева мен Әйгерімнің жұбайы Серік үнемі қолдау көрсетіп отырады. Жұмакүл апа ауылдағы «Сәуле» дәріханасының иесі. Тәжірибелі фармацевт зейнеткерлікке шықса да, өз кәсібін жандандырып отыр.&nbsp;

Сырдариялық кәсіпкер мемлекеттік грантқа ие болды

<a href="https://kyzylorda-news.kz/">Kyzylorda-news.kz.</a> Ботулизм – Clostridium botulinum бактериясы шығаратын токсиннен туындаған сирек, бірақ ауыр сырқат. Ботулизмді болдырмау үшін кейбір алдын алу шараларын сақтау керек.Ботулизм көбінесе нашар консервіленген немесе дұрыс оралмаған тағаммен байланысты. Егер сіз үйде тағамды консервілеумен айналысатын болсаңыз, қауіпсіздік жөніндегі ұсынымдарды ескеріңіз, дұрыс консервілеу әдістерін қолданыңыз және гигиенаны сақтаңыз.Ерекше иісі, сыртқы түрі немесе бүліну белгілері бар тағамдарды тұтынбаңыз. Алайда өнімнің сыртқы түрін өзгерте алмайтын Clostridium botulinum бактериясы бар. Ботулизм кейде нашар пісірілген немесе сақталған саңырауқұлақтарды тұтынумен байланысты. Саңырауқұлақтарды дұрыс өңдеп, сақтағаныңызға көз жеткізіңіз және оларды жинау кезінде қауіпсіздік бойынша ұсынымдарды есте сақтаңыз.Аурудың кейбір жағдайлары пастерленбеген балды тұтынумен байланысты болды. Бір жасқа толмаған балаларға пастерленбеген балды тұтыну ұсынылмайды.<blockquote>«Бір жасқа толмаған балаларға Clostridium botulinum бактериясы жұғуы мүмкін тағамдарды (бал, жаңғақ пастасы және шикі немесе толық пісірілмеген тағамдар) беруден аулақ болыңыз. Тағамды дұрыс өңдеуді, пісіруді және сақтауды қамтамасыз етіңіз. Тағамды дұрыс термиялық өңдеу бактерияларды, оның ішінде Clostridium botulinum-ды өлтіреді және инфекция қаупін болдырмайды. Ботулизмнің белгілері туралы біліп, ауруға күдік туындаған кезде дереу медициналық көмекке жүгініңіз», – дейді Қызылорда облысының санитариялық-эпидемиологиялық бақылау департаменті басшысының орынбасары Әлия Әбдіқайымова.&nbsp;</blockquote>Ботулизм сирек кездесетін ауру екенін есте ұстаған жөн және тағамның жалпы қауіпсіздік қағидаларын сақтау, әдетте оның пайда болуын болдырмау үшін жеткілікті. Егер сізде сұрақтар немесе алаңдаушылық туындаса, медицина маманынан немесе дәрігерден кеңес алыңыз. Ауруға бей-жай қарамаңыз.

Қызылордалық эпидемиологтар консервіленген тағамды тұтынуда абай болуды ескертеді

<a href="https://kyzylorda-news.kz/">Kyzylorda-news.kz.</a> Байқоңыр ғарыш айлағында «Прогресс МС-23» ғарыштық жүк көлігін Халықаралық ғарыш стансасына (ХҒС) ұшыруға дайындықтың соңғы кезеңі басталды, деп хабарлайды ҚазАқпарат.Кеше, 21 мамыр күні «Прогресс МС-23» жүк кемесі бар «Союз-2.1а» ғарыштық мақсаттағы зымыран монтаждау-сынақ корпусынан шығарылып, Байқоңыр ғарыш айлағының 31-ші алаңының ұшыру кешеніне теміржол көлігімен жеткізілді және орнатылды.Роскосмостың баспасөз қызметінен мәлім еткендей, зымыран тік күйінде орнатылғаннан кейін ресейлік ғарыш саласы кәсіпорындарының мамандары ғарыштық мақсаттағы зымыранды ұшыруға дайындықты жалғастырды.«Прогресс МС-23» жүк кемесі бар «Союз-2.1а» зымыран-тасығышы Байқоңыр ғарыш айлағынан 2023 жылғы 24 мамырда, Астана уақытымен сағат 18 сағат 56 минутта ұшырылады деп жоспарланған.«Прогресс МС-23» ғарыштық жүк көлігі ХҒС-қа станцияның жұмысы мен онда жұмыс істейтін ғарышкерлердің өмірін қамтамасыз ету үшін қажетті 2,5 тоннадан астам жүкті жеткізуі тиіс.Қазіргі кезде Халықаралық ғарыш станциясында 69-шы ұзақмерзімді экспедицияның экипажы жұмыс істеп жатыр. Оның құрамында Роскосмос ғарышкерлері Сергей Прокопьев (ХҒС-69 командирі), Дмитрий Петелин және Андрей Федяев, NASA астронавттары Франсиско Рубио, Стивен Боуэн, Уоррен Хобург және БАӘ астронавты Сұлтан әл-Нейади бар.

Байқоңырдан «Союз-2.1а» зымыран-тасығышы ұшырылады

<a href="https://kyzylorda-news.kz/">Kyzylorda-news.kz.</a> Қазгидромет мамандары 22 мамыр, дүйсенбіге арналған ауа райы болжамын жариялады.Атмосфералық фронттардың әсерінен Қазақстан аумағының басым бөлігінде ауа райының тұрақсыз сипаты сақталады.Жаңбыр жауып, найзағай жарқылдайды, елдің оңтүстігінде және оңтүстік-шығыстың таулы аймақтарда қатты жаңбыр, бұршақ жауады.Республика бойынша жел күшейеді, облыстың батысында және оңтүстігінде шаңды дауыл соғады.Павлодар облысының шығысында, орталығында, Ұлытау облысының орталығында, Атырау облысының оңтүстігінде, шығысында, Абай облысының Бесқарағай ауданында қауіпті өрт қаупі сақталады.Қарағанды облысының шығысында, Қостанай облысының оңтүстігінде жоғары өрт қаупі бар. &nbsp;

Дүйсенбіге арналған ауа райы болжамы жарияланды

&nbsp;<a href="https://kyzylorda-news.kz/">Kyzylorda-news.kz.</a>&nbsp; Халқымызда «Еңкейгеннің еңсесін еңбек көтереді» деген қанатты сөз бар. Еңбегі мен еңсесін тіктеп келе жатқан еліміз жылдан-жылға дамып, көркейіп келеді. Сондай сергек серпінмен Сыр өңірі, оның ішінде қазыналы Қазалы ауданының экономикасы да шапшаң ілгері басуда.Облыстың даму бағдарламасын іске асыру бағытында және макроэкономикалық көрсеткіштердің тұрақты өсімін қамтамасыз ету мақсатында іс-шаралар жоспары әзірленіп, жаңа міндеттер белгіленді.Ауданның биылғы жылғы бюджет көлемі 13,1 млрд теңгені құрады, оның ішінде 2,3 млрд теңге (яғни 18,1 пайыз) өз кірісі, қалған 81,9 пайыз (10,8 млрд теңге) субвенция, трансферттер және кредиттер есебінде.2023 жылдың 1 мамырына түсімдер жоспары 2 миллиард 966 млн теңге болса, орындалғаны 101,5 пайызды құрап отыр.&nbsp; Сонымен қатар, 2022-2024 жылдарға арналған салық және бюджетке төленетін төлемдердің резервтерін анықтау жөніндегі алгоритм бойынша корпоративтік және жеке, әлеуметтік табыс салықтарынан, жарнама обьектілерін орналастырудан, аукцион арқылы жер учаскелерін сатудан бюджетке 33,5 миллион теңге жоспардан тыс қосымша кіріс түсті. Осы жұмыстардың нәтижесінде жыл соңына дейін 150 млн теңгеге жеткізу межеленіп отыр.Ресми мәліметке сәйкес, бюджеттің шығындар жоспары есепті кезеңге 2 млрд. 719,2 млн теңгені құрап, 97,4 пайызға атқарылды. Бүгінгі күнге жылдық республикалық бюджеттен бөлінген қаржының 5 пайызы, Ұлттық қордан бөлінген қаржының 9 пайызы, облыстық бюджеттен бөлінген қаржының 10,7 пайызы, аудандық бюджеттен бөлінген қаржының 26,7 пайызы игерілді. Макроэкономикалық көрсеткіштер бойынша өнеркәсіп өнімінің көлемі 6,3 млрд. теңгені құрап, өткен жылдың тиісті кезеңімен салыстырғанда 100 пайызды құрады.Ал, өндіріс көлемінің басым бөлігін құрайтын өңдеу өнеркәсібінің көлемі 5,5 млрд. теңгені құрап, өткен жылдың тиісті кезеңімен салыстырғанда 100,6 пайызды құрады.Ауданның шағын және орта кәсіпкерлік саласында да біршама жұмыстар атқарылуда. Бүгінге дейін ауданда 6 654 кәсіпкер тіркеліп, жүйелі жұмыс жүргізіліп келеді. Аталған кәсіпкерлердің нақты жұмыс жасап тұрғаны 6 480 адамды құрап, белсенділік көрсеткіші 97,4 пайызға жетті.Өткен жылдың қорытындысымен аудан кәсіпкерлері тарапынан 20,7 млрд. теңгеге өнім өндіріліп, 17 пайызға өсті. Мұнан бөлек, өткен жылмен салыстырғанда бұл салада жұмыспен қамтылғандар саны 7,9 пайызға көбейіп, 10 123 адамды құрады. Күнделікті сауда-саттықтың нәтижесінде бөлшек сауда айналымы 3,4 млрд теңгені құрап, өткен жылмен салыстырғанда 1,8 пайызға көбейді.Жыл басынан бері 22 кәсіпкерлік нысанның құрылысы басталып, 5 нысан пайдалануға берілді. 17 адам жаңа жұмыспен қамтылды.&nbsp; Кәсіпкерлікті қолдау шараларына келер болсақ, жыл басынан бері аудан кәсіпкерлеріне қаржы ұйымдары тарапынан 126 жоба бойынша 1 млрд теңгеге несие және грант берілді.Қазалы ауданы – ауыл шаруашылығына негізделген аймақ. Өңірдің еңбекқор егіншілері мен диқандары қажырлы жұмыс атқарып келеді. Аудан бойынша биылғы жылы барлығы 17 612 гектар ауыл шаруашылығы дақылдарын орналастыру жоспарлануда. Оның ішінде негізгі дақыл – күріш 6993 гектарды құрап отыр. (2022 жылы 17 402 гектар).Атап айтқанда, дәнді дақылдар 7286 гектар, майлы дақылдар 65 гектар, картоп, көкөніс, бақша 2250 гектар, мал азықтық дақылдар 8 011 гектар. Қазіргі таңда, ауданда егіс дақылдарын егу жұмыстары толық аяқталып, 4 694 гаектар (100 пайыз) ескі жоңышқа толық тырмаланып, суғарылды.Ауыл шаруашылығы өнімінің жалпы көлемі 3 928,7 млн теңге болып, өткен жылмен салыстырғанда 1,9 пайызға артты. Жалпы төрт түлік мал басында өсім бар және оның өнімдері де ұлғайтылды.&nbsp; Мал шаруашылығын дамыту мақсатында қаржы ұйымдары тарапынан жергілікті шаруа қожалықтардың жалпы құны 98,7 млн теңгені құрайтын 19 жобасы қаржыландырылды.Тұрғындардың өзін-өзі азық түлікпен қамтамасыз ету, азық-түлік тауарларының бағасын тұрақтандыру мақсатында биыл жоспардан тыс 130 гектар (картоп-15 га, көкөніс-50 га, бақша-65 га) қосымша жер дайындалды. Жалпы есепті кезеңде аудан бойынша 6 шет мемлекетке 449,4 тонна күріш, 341 тонна балық өнімі және 570,1 тонна қамыс экспортталды. 2023 жылдың 4 айында негізгі капиталға тартылған инвестиция көлемі 3,4 млрд теңгені құрады. Бұл өткен жылдың тиісті кезеңімен салыстырғанда 71,7 пайызға артық.2023 жылы аудан экономикасына 21,5 млрд теңге инвестиция тартылады деп болжамдалды. Оның ішінде нақты шараларды жүзеге асыру арқылы жеке қаражат есебінен 9,6 млрд. теңге инвестиция тартуды жоспарда бар.Ресми мәліметтерге сәйкес, биыл аудан орталығында «Жанкент-Агро» жауапкершілігі шектеулі серіктестігінің күрішті өңдеу зауыты іске қосылады деп жоспарлануда. Бұл өз кезегінде ауданның өңдеу өнеркәсібінің артуына өз септігін тигізеді.Мұнан бөлек, білім және спорт салаларына жеке инвестиция тарту әлеуеті артып келеді. Мәселен, биыл аудан орталығынан жеке қаражат есебінен спорт кешені, Қ.Пірімов ауылынан 95 орындық және Ақтан батыр ауылынан 90 орындық балабақша салынатын болады. Инвестиция тартумен қосарлас болып келетін құрылыс жұмыстарының көлемі 69 млн теңгені құрап, өсім 8 пайызды құрады.Жыл басынан бері жеке сектор есебінен тұрғын үй құрылысына 1,4 млрд теңге инвестиция тартылды. Бүгінде 14 523 шаршы метр тұрғын үй құрылысы салынды. Нәтижесінде тұрғын үй қоры 3,5 пайызға көбейді. Жыл соңына дейін кемдегенде 54 500 шаршы метр тұрғын үй құрылысы салынады деп жоспарлануда.Сонымен қатар, биыл аудан орталығында аз қамтамасыз етілген отбасылар үшін 50 пәтерлі тұрғын үй салынады. Бұл мақсатта бюджеттен 480 млн теңге қаражат бөлінді.Биылғы жылы аудан аумағында 12 нысанның құрылысы жүргізілуде. Оның 4 жобасы өткен жылдан өтпелі болса, 8 нысан жаңадан басталған құрылыс нысандары болып табылады. Бұл жобалар үшін 2023 жылы 3 млрд теңге қаржы қаралды. Бұдан бөлек, қаржыландыру үшін салалық министрліктерге жалпы құны 9,4 млрд теңге құрайтын 5 жобаның және облыстық басқармаларға жалпы құны 6,7 млрд теңге құрайтын 21 жобаның бюджеттік өтінімі ұсынылды.2023 жылы барлық бюджет қаражаты есебінен аудандық маңыздағы автомобиль жолдарын жөндеу үшін 4 жобаға 1,2 млрд теңге және жалпы ұзындығы 30 км құрайтын елді мекенішілік жолдарды (52 көше) жөндеу үшін 1,7 млрд теңге қаржы бөлінді. Сонымен қатар, 2024 жылға аудандық маңыздағы автомобиль жолдарын жөндеуді қаржыландыру үшін салалық министрліктерге жалпы құны 3 млрд теңге құрайтын 5 жобаның бюджеттік өтінімі ұсынылды.Айта кету керек, «Бозкөл-Тасарық» аудандық маңыздағы автомобиль жолына (13 км) қайта жаңғырту үшін 687,3 млн теңге қаралуда. Сондай-ақ, «Лақалы ауылына кіре беріс» аудандық маңыздағы автомобиль жолын қайта жаңғырту үшін 351,5 млн теңге бөлінбек. «Бекарыстан би-Шөмішкөл» аудандық маңыздағы автомобиль жолын қайта жаңғырту 685 млн теңге қаралды. Қазалы аудандық маңызы бар «Жанқожа батыр ауылына кіре беріс (3 км) автомобиль жолына күрделі жөндеу» жүргізу үшін 475,8 млн теңге қаралмақ. Аудандық маңызы бар «Қазалы – Көларық – Бекарыстан би – Жаңақұрылыс» автомобиль жолына күрделі жөндеу жүргізу үшін 855,7 млн теңге бөлінбекші.Бұдан бөлек, 2023 жылы «Ауыл-Ел бесігі» арнайы жобасы шеңберінде аудан орталығы Әйтеке би кенті, Түктібаев және Мұратбаев ауылдырының елдімекенішілік жолдары жөндеуден өтеді. Бұл үшін бюджет есебінен 670,7 млн теңге қаржы бөлінді. «Шағын қалаларды дамыту» жобасы шеңберінде 2023 жылы жалпы құны 933,2 млн теңгеге Қазалы қаласының автомобиль жолдары мен электр желілерін қайта жаңғырту жұмыстары жүргізілуде.&nbsp;Есепті кезеңде ауданның газбен жабдықтау деңгейі 7,1 пайыздан 14,3 пайызға жеткізілді. Биыл Абай ауылында газ желісінің құрылысын бастау үшін бюджет есебінен 41,1 млн теңге қаралды. Қазалы ауданында атқарылып жатқан жұмыстар халықтың әлеуметтік жағдайын жақсартуға бағытталып отыр. Жұмыспен қамту мәселесі бойынша жалпы жұмыссыздық деңгейі 5 пайызды құрады. 2023 жылы 2 634 жұмыс орнын ашуды жоспарланып отыр. Есепті кезеңде 1 893 жаңа жұмыс орны ашылып, жоспар 71,8 пайызға орындалып отыр (оның ішінде тұрақты жұмыс орындары – 348, уақытша жұмыс орындары – 1 545).Бүгінгі күні жұмыс іздеуші ретінде 4 857 адам хабарласып, 1 678 адам жұмысқа орналасты. Білім беру ұйымдары базасын жақсарту мақсатында, биыл Әйтеке би кентіндегі 250 орындық мектеп құрылысы және «Жайлы мектеп» ұлттық жобасы аясында Жанқожа батыр ауылынан 300 орындық мектеп құрылысы басталады. Бұдан бөлек, «Ауыл-Ел бесігі» арнайы жобасы шеңберінде 247 оқушы оқитын Қ.Пірімов ауылындағы №92 мектепті күрделі жөндеу үшін бюджеттен 208,3 млн теңге бөлінді (жеңімпаз мердігер анықталуда).Спорт объектілеріның жағдайын жақсарту мақсатында демеушілік есебінен саябақтар және демалыс алаңдары (сквер) жөнделуде. Сонымен қатар, биыл аудандық бюджеттен 22,1 млн теңге қаржы қаралып, Қазалы қаласы, Жанқожа батыр, Майдакөл, Бекарыстан би, Қ.Пірімов, Басықара, Ақсуат, Жанкент ауылдарында спорт алаңдары жөндеуден өтуде.Мәдениет саласында 2023 жылы Каукей ауылында 100 орындық клуб құрылысы пайдалануға берілетін болады. Біздің қоғамның басты байлығы – адам және адамның денсаулығы екені рас. Оны айбынды Ата заңымыз да айғақтайды. Осы орайда, тұрғындардың денсаулығы, олардың дұрыс ем алуы – біздің күнделікті назарымызда. Қазалы ауданында тұрғындардың денсаулығын жақсарту күн тәртібінен түскен емес.&nbsp;Халық денсаулығын жақсарту мақсатында 2023 жылы Бозкөл, Абай, Кәукей ауылдарынан дәрігерлік амбулатория құрылысы басталады.&nbsp; Сонымен қатар, аудан орталығында орналасқан емхана ғимараты күрделі жөндеуден өтуде.&nbsp; Тұрғындар арасында қоғамдық саяси ахуалды тұрақтандыру бағытында бекітілген іс-шара жоспарларға сәйкес тиісті жұмыстар атқарылып, қосымша қылмыстылық, тәртіп бұзушылықтарды болдырмау мақсатында қоғамдық ұйымдар мен құқық қорғау органдармен бірлесіп, тұрақты түрде түсіндіру, рейдтік жұмыстары жүргізілуде.Жалпы, ауданның әлеуметтік-экономикалық дамуын іске асыру үшін 49,8 млрд теңгеден астам қаржы бөлінді. Бұл өткен жылмен салыстырғанда 18,2 млрд теңгеге немесе 1,5 есеге ұлғайды (2022 жылы 31,6 млрд теңге).&nbsp;Оның ішінде аудан бюджетінде 17,5 пайызы даму бюджеті, 25,3 пайызы еңбекақы қоры, 35,3 пайызы әлеуметтік сала және 14,7 пайызы ағымдағы жөндеу жұмыстары. Сонымен қатар, ауданның білім саласына 25 млрд теңге және денсаулық саласына 5,6 млрд теңге қаржы бөлінді.Бұл бөлінген қаражаттардың басым бағыттары әлеуметтік сала мен инфрақұрылымды дамыту, құрылыс нысандарын салуға, жалпы халықтың тұрмыс тіршілігін жақсартуға негізделген.&nbsp;&nbsp;

Қазақстан және Қызылорда облысының жаңалықтары

Ақжар ауылында көшбасшы аналар басқосты