<a href="https://kyzylorda-news.kz/">Kyzylorda-news.kz</a> Бүгінде екі қолға бір күрек іздеген жандарға мемлекеттен қолдау көп. Осы бағдарламалар арқылы талай жас тірлігін түзеп, тұрақты жұмыс орындарына қабылдануда. Мәселен, 2024 жылға арналған Өңірлік жұмыспен қамту картасы аясында 46 475 адамды тұрақты жұмыспен қамту белгіленген болса, оның ішінде 60 пайызы жастардың үлесінде. Жалпы облыста да жастар арасында жұмыссыздық деңгейі 3,5 пайызға төмендеген. Бұл туралы Өңірлік коммуникациялар қызметінде өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Жұмабекқызы мәлімдеді.Сонымен қатар, Мемлекет басшысының «10 мың адамға 100 жұмыс орнын» құру тапсырмасына сәйкес, өңірде 466 жұмыс орны ашылған болатын. Ал «Бастау Бизнес» жобасы бойынша кәсіпкерлік негіздерін оқытуға 198 жас жолданған.<blockquote>-Жалпы, облыста «Мансап» орталықтары арқылы тұрақты түрде бос жұмыс орындарының жәрмеңкесі өткізіліп келеді. Тиісінше, жыл басынан бері 16 рет бос жұмыс орындар жәрмеңкесі ұйымдастырылды. Онда 211 жұмыс берушіден 952 бос жұмыс орны ұсынылды. Бос жұмыс орындары жәрмеңкесіне қатысқан 1002 жұмыссыз азаматтың 316-сы тұрақты, ал 29 адам уақытша жұмысқа орналастырылды. Жалпы аталмыш жәрмеңке арқылы жұмыспен қамтылғандардың 78,7 пайызы жастардың үлесінде. Бұдан бөлек, былтырдан бері Ел Президентінің тапсырмасына сәйкес, жастардың кәсіпкерлік бастамаларына қолдау көрсету мақсатында оларға жеңілдетілген түрде жылдық өсімі 2,5 пайыздық шағын несие берілуде. Осы бағдарлама аясында биыл 400 жасқа шағын несие беру жоспарлануда. Одан бөлек, халықтың осал топтарына жататын жұмыссыз азаматтардың жаңа бизнес идеяларын дамытуға арналған мемлекеттік гранттар бар. Бұл гранттардың басым бөлігі мал мен құс шаруашылығына, еңбек құралдарына, технологиялық жабдықтарды құрайды,- деді Жанар Жұмабекқызы.</blockquote>Фото: egemen.kz

Қызылордада жастар арасында жұмыссыздық деңгейі төмендеп келеді 

<a href="https://kyzylorda-news.kz/">Kyzylorda-news.kz</a> Арал қаласынан бастап Ақтөбе облысының шекарасына дейін жол жабылды. Бұл туралы «ҚазАвтоЖол» АҚ Қызылорда облысы бойынша филиалы хабарлады.<blockquote>«Ақтөбе облысы ауа-райының нашарлауына байланысты 2024 жылдың 28 наурыз сағат 21:00-ден бастап республикалық маңызы бар М-32 «Самара-Шымкент» автомобиль жолының 1240-1357 шақырым аралығы барлық көліктердің қозғалысына уақытша шектеу қойылды. Яғни, Ақтөбе облысының шекарасынан бастап Арал қаласына дейінгі жол жабылды. &nbsp;Жол көпіріне барар жол ішанара бұзылған», - делінген хабарламада.</blockquote>&nbsp;Фото: kazgazeta.kz&nbsp;&nbsp;&nbsp;

Су тасқыны: Арал қаласынан бастап жол жабық

<a href="https://kyzylorda-news.kz/">Kyzylorda-news.kz</a> Қала әкімінің орынбасары Дархан Тұрсынбаевтың төрағалығымен «Әлеуметтік әріптестік пен әлеуметтік және еңбек қатынастарын реттеу жөніндегі қалалық үшжақты комиссияның» кезекті отырысы өтті.&nbsp;Отырыстың күн тәртібінде қаладағы еңбек қарым-қатынастарының жағдайы, кәсіпорындар мен ұйымдарда ұжымдық шарт жасасу, өндірістік жарақаттануды алдын алу бойынша қабылданған шаралар және міндетті әлеуметтік сақтандыру жүйесіндегі мәселелер қаралды.Күн тәртібіндегі бірінші мәселе бойынша Қызылорда облысының бақылау жөніндегі басқармасы басшысының орынбасары Талант Ерманов хабарлама жасады.&nbsp;Комиссия төрағасы Дархан Есалыұлы қала кәсіпорындарында әлеуметтік-еңбек ахуалының тұрақтылығын қамтамасыз ету мақсатында мекемелерге жалақы көтеру мәселесін пысықтауды тапсырды. Сондай-ақ, «Қызылорда су жүйесі» КММ қалыптасқан жалақы жағдайын талқылады.Келесі мәселе, міндетті әлеуметтік сақтандыру жүйесіндегі проблемалық мәселелер туралы Қызылорда облысы бойынша «Мемлекеттік әлеуметттік сақтандыру қоры» АҚ филиалының директоры Гүлсім Денеева баяндады.Дархан Есалыұлы әлеуметтік аударымдарды уақытылы төлемей отырған мекемелерге ескерту жасап,&nbsp;қалалық жұмыспен қамту және әлеуметтік бағдарламалар бөліміне берілген тапсырманың сапалы және мерзімінде орындалуын қамтамасыз етуді жүктеді.&nbsp;

Әлеуметтік-еңбек ахуалының тұрақтылығы назарда

<a href="https://kyzylorda-news.kz/">Kyzylorda-news.kz</a> Қазақстан Республикасының Мемлекеттік қызмет істері агенттігінің Қызылорда облысы бойынша департаменті тарапынан азаматтардың құқықтары мен заңды мүдделерінің қорғалуына ерекше басымдық беріледі.Осы ретте, Қазақстан Республикасының Мемлекеттік қызмет істері агенттігінің Қызылорда облысы бойынша департаменті көрсетілетін мемлекеттік қызметтердің мәселелері бойынша мемлекеттік органдардың немесе лауазымды тұлғалардың іс-әрекеттеріне және шешімдеріне қатысты жеке және заңды тұлғалардың өтініштерін қарайды.Ағымдағы жылдың ақпан айында Арал ауданының тұрғыны департаментке жер учаскесін табыстау бойынша мемлекеттік қызметін көрсетуден бас тарту фактісіне сәйкес шағымданды.Аталған шағым бойынша департамент сұрау салып, тексеру жұмыстары жүргізілді. Қызмет алушыға мемлекеттік орган тарапынан мемлекеттік қызмет көрсету қағидалары бойынша дәйексіз ақпарат берілгені анықталды.Осы ретте, департаменттің хатына сәйкес кінәлі тұлғаның жауапкершілігі қаралып, Арал ауданы тұрғынының бұзылған құқығы қалпына келтірілді.<blockquote>«Атап өту керек, мемлекеттік қызметтерді сапалы әрі мерзімінде көрсету және оларды көрсету нәтижесімен қызмет алушылардың құқықтары мен заңды мүдделерінің сақталуы – мемлекеттік аппараттың тиімділігін бағалаудың негізгі көрсеткіштерінің бірі болып қала бермек. Мемлекеттік қызметтерді көрсету барысындағы жеке және заңды тұлғалардың құқықтарының сақталуы алдағы уақытта да департаменттің жіті бақылауында болады. Егерде Сіздің мемлекеттік қызмет алуда құқықтарыңыз бұзылған болса Қазақстан Республикасының Мемлекеттік қызмет істері агенттігінің Қызылорда облысы бойынша департаментіне шағымдануыңызға болады», - дейді ҚР Мемлекеттік қызмет істері агенттігінің Қызылорда облысы бойынша департаментінің бас маманы Ербол Бөлебаев. &nbsp;</blockquote>Фото: Нұрболат Нұржаубай

Жер мәселесі: Аралдық тұрғынның құқығы қорғалды 

<a href="https://kyzylorda-news.kz/">Kyzylorda-news.kz</a>&nbsp; Халықаралық театр күні аясында Қызылорда қалалық “Жастар” театры көзайым көрерменге жаңа туындысын тарту етті.&nbsp;Жас драматург Нұрдәулет Баймаханның “Сезімді қайтейін?…” атты музыкалық-лирикалық қойылымы қос ғашықтың баянсыз махаббатына құрылған, музыкалық және поезиялық диалогтар үйлесімін тапқан ерекше махаббат көрінісі.Мектеп бітіру кешіндегі түлектердің түрлі арман-тілектерімен басталған қойылым, Америкаға оқуға кеткен Аружан есімді қыздың сезімге адалдығымен, ол сүйген Аянның тағдыр жолындағы шешімдерімен шиеленіседі.&nbsp;Қойылым соңында театр ұжымына Қызылорда облысы әкімі аппараты басшысының, облыстық мәдениет басқармасы басшысының, Қызылорда қаласы әкімі орынбасарының алғыс хаттары табысталды. Театрдың қоюшы суретшісі Жарқынбек Елеусінұлы “Қазақстандық салалық мәдениет, спорт, туризм және ақпарат қызметкерлерінің кәсіптік одағы” қоғамдық бірлестігінің “Еңбек даңқы” төсбелгісімен марапатталды.&nbsp;Қойылымның құрметті қонақтары Нартай Бекежанов атындағы облыстық қазақ академиялық музыкалық драма театрының басшысы Мұхтар Ниязов, қалалық мәдениет және спорт бөлімінің басшысы Жағыпар Тажмаханов, облыстық кәсіподақ төреайымы Раушан Балтабайқызы жылы лебіздерін білдірді.&nbsp;Қалың көрерменнің театр ұжымына қошеметі қойылымның жоғары деңгейде өткенін сездіріп-ақ тұрды. “Жастар” театрының алдағы спектакльдеріне толағай табыстар тілейміз.

Жастар театрының жаңа қойылымы көрермен жүрегіне жол тапты

<a href="https://kyzylorda-news.kz/">Kyzylorda-news.kz</a> Қызылорда қалалық Полиция басқармасының бастығы полиция полковнигі Айдар Қасановтың бұйрығымен полиция қызметкерлері құқық бұзушылықты болдырмау және алдын алу мақсатында «Квадрат» жедел-профилактикалық іс-шарасын №1 УПИ-ның ауқымды әкімшілік аумағында өткізілді.Профилактикалық іс-шараның мақсаты құқық бұзушылықтардың алдын-алу, патрульдеуді жүзеге асыру, профилактикалық есепте тұрған тұлғаларды, қару иелерін тексеру, тұрғындарға, шағын және орта бизнес иелеріне учаскелік инспекторларын таныстыру, заңмен белгіленбеген уақытта алкоголь өнімін сатқаны үшін әкімшілік жауапкершілік көрсетілгенін ескерту, сондай-ақ кәмелетке толмағандармен және оларға қарсы қылмыстарды болдырмау болып табылады.<blockquote>«Тұрғындардың мекен-жайларын аралау кезінде осы әкімшілік аймаққа жауапты учаскелік полиция инспекторларының аты-жөндері, қызметтік және ұялы байланыс телефондары көрсетілген визиткалар таратылды. Аумақта 17 292 тұрғын тұрады. Сонымен қатар, профилактикалық және тізімдік есепте тұрған 39 адамның 22-і мекенжай бойынша тексерілді. Олармен профилактикалық әңгімелер жүргізілді.Тұрғылықты жері бойынша азаматтық қарудың 174 иесінің 51-і тексерілді.Атқарылған жұмыс барысында 31 әкімшілік құқық бұзушылықтар анықталып, оларға қатысты ҚР ӘҚБтК-нің 505-бабы бойынша (қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру) 20 дерегі, ҚР ӘҚБтК-нің 440 бабы бойынша (алкогольдік ішімдіктерді ішу немесе қоғамдық орындарға масаң күйде келу) 2 дерегі, ҚР ӘҚБтК-нің 492 бабы бойынша (ҚР тіркеусіз не жеке басты куәландыратын құжаттарсыз тұру) 7 дерегі және ҚР ӘҚБтК -нің 204 бабы (белгіленбеген орындарда сауда жасау) 2 дерегі анықталып, құқық бұзушыларға қатысты әкімшілік шара көрілді», делінген полиция басқармасының хабарламасында.</blockquote>Іс-шара барысында кәмелетке толмағандарға қарсы жасалатын құқық бұзушылықтардың алдын алу мақсатында ата-аналармен түсіндірме жұмыстары жүргізілді.Сонымен қатар қала тұрғындарын ұрлықты алдын алуүа өздерінің мүліктерін (велосипед, скутер, коляска т.б) қараусыз қалдырмауларын, темір есік, решетка, дабыл белгісін, бейнекамера орнату жөнінде түсіндірме жұмыстары жүргізілді. Бұл бағыттағы жұмыстар өз жалғасын табуда.Фото: Нұрболат Нұржаубай

Қызылордада «Квадрат» жедел-профилактикалық іс-шарасы өтіп жатыр 

<a href="https://kyzylorda-news.kz/">Kyzylorda-news.kz</a> «Қазгидромет» РК-сы наурыздың 29-ы күнгі күн райы болжамын жариялады, деп хабарлайды Қазгидромет.Кәсіпорын таратқан деректерге қарағанда, Қазақстанның басым бөлігінің күн райын орталығы Ақтөбеде орналасқан кең алқапты циклон және онымен байланысты атмосфералық фронталды бөліктер айқындайтын болады.Осыған байланысты Қазақстан бойынша күн құбылмалы болады. Республиканың басым бөлігінде жауын жауып, солтүстік облыстарда қатты нөсерлетеді, елдің оңтүстік-шығысында да жаңбыр болжанады.Қазақстан бойынша тұман түсіп, оңтүстікте, оңтүстік-шығыста найзағай ойнайды, оңтүстікте бұршақ жауып, солтүстік батыста жаяу бұрқасын соғады. Батыста, солтүстік батыста, солтүстікте көктайғақ болуы ықтимал.Фото: freepik.com

Бүгін еліміздің басым бөлігінде жауын-шашын болады

<a href="https://kyzylorda-news.kz/">Kyzylorda-news.kz</a>&nbsp;Бүгінде Қармашы ауданында кәсіпкерлікке бет бұрған тұрғындарға қайтарымсыз грант негізіндегі қаржылар, жеңілдетілген несиелер бөлу жұмыстары қарқынды жүргізіліп келеді. Осылайша адалдық пен ерінбей еңбек етуді мақсат еткендер шағын кәсіптен-ақ көктеп, көгеріп отыр. Соның бірі Төретам кентінің тұрғыны – Бибігүл Жылкелдиева. Ол бүгінде шағын наубайхана ашып, нан өнімдерін жергілікті халыққа ұсынуда.&nbsp;«Жас келсе, іске» демекші, ерінбеген адам табыстың көзін табады. Бибігүл бойындағы жастық жалынын жұмысқа, кәсіпке қарай арнағанды жөн көреді.Бала күнінен анасының тәтті тоқашына үйреніп өскен оған бұл іс еш қиындық туғызбай, керісінше одан әрі дамытуды ойлайды. Өткен жылы бизнес-идеялар негізіндегі мемлекеттік «Ұлттық жоба» шеңберінде грантқа қатысып, қайтарымсыз қаражат алады. Алған қаражатына қажетті құрал-жабдықтарын алып, вокзал маңындағы шағын дүңгіршек пен жанындағы 2 бөлмелі жерді наубайхана қылады. Содан бері шағын кәсібін дөңгелетіп, кент тұрғындарын тәтті нанмен қуантып отыр.<blockquote>– Өзім біраз уақыт жұмыссыз отырдым. Үйде қарап отырмай кондитерлік өнімді өздігімнен үйрендім, қыздарыма да үйреттім. Сол уақыттан бері түрлі тәттілерді пісіріп, тапсырыс қабылдап жүрдім. Былтыр Бибігүлім «Кәсіп бастайық, тәуекел етейік» деген тілегіне ата-ана ретінде қолдау көрсетіп, қызымыздың бастамасына қуана келістік. Жолдасым Серікбай қазірде зейнеткер. Осы нан өнімдеріне қажетті заттарды алып көмектеседі. Өзім 4 баланың анасымын. Ұлым Талғат Байқоңыр қаласында жұмыс істейді. Индирам биыл Астанадағы ЕҰУ оқуға түсті. Кенже қызымыз Іңкәр 2 сыныпта оқиды, – дейді анасы Марзия апай.&nbsp;</blockquote>Қазір қалада болсын, ауылда болсын, азық-түлік дүкендері мен &nbsp;сауда орындарының ішінде сұранысқа ие тауарлардың бірінші тізімін күнделікті тұтынатын нан және нан өнімдері құрайды. Ал сапасы жоғары нан-тоқашқа тұтынушылар тарапынан сұраныс күннен-күнге артып келеді. Себебі таңертеңгілік күйбің тіршілікпен таңғы ас ішіп үлгермегендер осындай тәтті нанмен жүрек жалғап алады.<blockquote>– &nbsp;Мемлекет басшысы әрдайым өзін-өзі жұмыспен қамтығандарды тіркеу үдерісін мейлінше жеңілдетіп, оларға мемлекет алдындағы міндеттерін адал атқару тиімді болатындай жағдай туғызу қажет деген ойға басымдық береді. Сол себепті де түрлі бағдарлама қолға алынып, қарапайым жанның кәсіпкер атануына, ал кәсіпкердің өз ісін одан әрі үлкейтуіне жағдай жасалуда. Сондықтан халық қолда бар мүмкіндіктен айырылып қалмай, қажетіне жарата білсе деймін. Осы жерді алар кезде біздің алдымыздағы кісілердің біраз заттары болды. Қолданылған пештері бар-ды. Бірақ жаңа кәсіпті жаңа заттармен бастағанды дұрыс көрдім. Пештерді арнайы Алматыдан алдырдық. Тек қана нан өнімдерін дайындап қоймай, жартылай фабрикатталған заттарға да тапсырыс қабылдаймыз. Сонымен қатар, пирожки, бәліш, қалаш, жұмсақ көп рогалики, бал тортын әзірлейміз. Фаст-фудтың ішінен бургер, ход-дог, донер, пицца секілді түрлерін дайындап сатамыз. Орталық жер болғандықтан адамның қарасы үзілмейді. Мұнымен қоса дүкендерге де өткіземіз. Аллаға шүкір, ақырындап алға жылжып келеміз. Келешекте осы кәсібімізді кеңейту жоспарда бар, – дейді кәсіп иесі. &nbsp;</blockquote>Наубайхана өнімдері тұтынушы тарапынан жоғары бағалануда. Тұрақты тапсырыс беретін тұрғындармен қоса сұраныс саны күннен-күнге көбеюде. Ең бастысы, дайындалған өнім сөреде тұрып қалмайды. Ал баға – қолжетімді, сапа – көңілге қонымды. Кәсіп қылған адам қашанда жетістікке, мақсатына жетеді. Оны көзімізбен көріп келеміз. Ебін тауып әрекет етсеңіз, кәсіпті дөңгелетіп әкетуге болады. Әркім тек өзіне ыңғайлы, бейіміне қарай еңбек етсе болғаны.

Қайтарымсыз грант алған кәсіпкер шағын наубайхана ашты 

&nbsp;<a href="https://kyzylorda-news.kz/">Kyzylorda-news.kz</a> &nbsp;Еліміздің бірқатар аймағында күрт еріген ардың әсерінен су тасып жатыр. Тіпті тасыған су тас жолдан асып ағуда. Нақтырақ айтсақ, төрт облыстағы республикалық маңызы бар бес жолда еріген қар суы тас жолдан асып кеткен. Бұл туралы «ҚазАвтоЖол» АҚ хабарлады.Назарларыңызға Қырмызы Жұмағалиқызының&nbsp;Egemen.kz-ке жазған ақпаратына сәйкес су басқан жолдарды ұсынып отырмыз. Дәл қазір бұл аумақтардан өту қауіпті.Абай ауданы:Қарағанды ​​- Аягөз - Тарбағатай - Боғаз тасжолында (707-ден 941 шақырымға дейін) жеңіл авто көліктер үшін қозғалыс шектелді. Айта кетейік, жолдың 878 және 923 шақырымында диаметрі 1 метр бір нүктелі құбыр мен екі аралықты көпір бар.«Жолдың өту мүмкіндігін сақтау үшін филиал мамандары жол жиектерін нығайту, қап контейнерлерін орнату және жасанды жағалаулар жасау жұмыстарын жүргізіп жатыр. Жұмысқа 7 техника жұмылдырылды, оның ішінде жүк тиегіштер, самосвалдар және автогрейдерлер бар», деп түсіндірді «ҚазАвтоЖол».Ақтөбе облысы:Қандыағаш – Ембі – Шалқар – Ырғыз тасжолында (288 шақырым) су тасқыны болды. Бұл аумақта диаметрі 1,5 метр болатын бір нүктелі су өткізгіш құбыр бар.«Судың одан әрі ағып кетуіне жол бермеу үшін 650 құм салынған қап қойылып, қосымша 480 тонна құм жеткізілді.Тасудың салдарын жою үшін бес жол жұмысшысы, үш бірлік мамандандырылған техника (МТЗ, тиегіш, КамАЗ) жұмылдырылды», деп хабарлады жол қызметкерлері.27 наурыз күні сағат 20:15-тен бастап Қандыағаш – Ембі – Шалқар – Ырғыз тас жолының 3-ші шақырымынан 92-ші шақырымына дейінгіучаскедекөліктіңбарлықтүріүшінқозғалысқашектеуенгізілді.Сондай-ақ бүгін таңғы сағат 8:00-ден бастап Самара-Шымкент жолының учаскесінде (526-шы шақырымнан 618-ші шақырымға дейін) жеңіл автокөліктер қозғалысына уақытша шектеу енгізілді.«Судың одан әрі ағуын болдырмау үшін 200 құм салынған қап қойылып, қосымша 40 тонна құм жеткізілді. 5 адам мен 2 техника жұмылдырылды. Сондай-ақ жолдын ығайтуға 110 тонна құм және 450 құм салынған қап дайындалды. &nbsp;Суды шығаруға 15 адам мен 7 техника жұмылдырылды», деп түсіндірді «ҚазАвтоЖол» баспасөз қызметі.Қостанай облысы:Жезқазған – Петропавл тасжолының 269-шақырымында (Жазғызталкентінен 28 шақырым) су тасқыны болды. Бұл аймақта диаметрі 2,5-тен 2 метрге дейін үш нүктелі түтік құбыры бар. Көлік қозғалысына шектеу қойылмаған. Дегенмен, жолға уақытша өзгерістер енгізу үшін уақытша жол белгілері мен бағаналар орнатылды. Жол төсемін оқшаулау үшін көлемі 150 текше метр болатын инертті материал (ұсатқыш, қиыршықтас) дайындалды. Үш техника мен тоғыз адам жұмылдырылды.Ұлытау облысы:Ақшатау – Ортау – Бидайық тасжолында (189-шы шақырым – Бидайық ауылы) еріген су тасқыны жол төсемінен асып кетті. Бұл аймақта диаметрі 70 сантиметр болатын бір нүктелі құбыр бар. Көлік қозғалысына шектеу жоқ.«Қазіргі уақытта жылжымалы апаттық жол белгілерін орнату жұмыстары жүргізіліп жатыр. Төрт техника мен бес адам жұмылдырылған. Жалпы, республикалық маңызы бар жолдарда түрлі жұмыстарды жүргізу және қауіпсіздікті қамтамасыз етуүшін 610 бірлік техника мен 1558 адам жұмылдырылған», деп атап өтті ведомство өкілдері.Сурет: gov.kz&nbsp;

Тасқын: 4 облыстың жолын су басқан

<a href="https://kyzylorda-news.kz/">Kyzylorda-news.kz</a> Бүгінде ұстаздың балаға тек қана бағдарламамен сабақ беруі аздық етеді. Алдындағы шәкіртінің сабаққа деген қызығушылығын ояту үшін шығармашылықпен жұмыс істеу керек. Осындай білікті ұстаздың бірі – Серік Ниязов.Ол Қармақшы ауданы, Төретам кентіндегі №80 мектеп-гимназиясында география пәні бойынша ұстаздық етеді. Ұстаздық еңбек өтілі 15 жылды ғана құраса да, жеткен жетістігі біршама. Бұл оның еңбексүйгіштігі мен қызметіне деген адалдығының көрінісі. Серік Ұзақбайұлы өз пәні бойынша сабақ беріп қана қоймай, қоғамдық, ғылыми жұмыстарға да белсенді араласады. Оның әдістемелік құралы мен іс-тәжірибесі республика, облыс, аудан көлемінде таратылған. Түрлі тақырыпты қозғаған 40-тан астам мақаласы мен сабақтары бұқаралық ақпарат құралдарында жарияланған. Өз білімін жетілдіру мақсатында республикадан бөлек, Өзбекстан, Қырғызстан елдеріндегі ғылыми-практикалық семинарға қатысқан. Білікті ұстаз Қазақстан Ресупбликасы Білім және ғылым министрлігінің, Ыбырай Алтынсарин атындағы ұлттық білім академиясының құрмет грамотасын, республикалық деңгейде «Үздік ауыл мұғалімі – 2019» номинациясын иеленген. Онан бөлек, жетістіктер қатарын республикадағы белді жоғары оқу орнының сертификаттары толықтырған. Жаңашыл әрі талапшыл ұстаздың оқушылары да биік белесті бағындырып, топ жарып жүрген озаттар. Ұлттық бірыңғай тестілеу бойынша оқушылары алтын белгі, үздік аттестат иеленсе, таңдау пәні бойынша толық 40 ұпай жинаған шәкірттері де бар. Сондай-ақ озат мұғалімнің оқушылары республикалық, облыстық, аудандық деңгейдегі түрлі байқау, ғылыми жобаны қорғау, олимпиадаларда жүлдегер атануда.Өткен жылы білікті мұғалім мемлекеттерді танып-білудің инновациялық бағдарламасын жасап шығарды. Бұл мемлекеттік тілдегі бірден-бір платформа. Ол барлық заманауи талаптарға сәйкес жасалған. Жалпы платформаның аталуының өзі де ерекше. Ол «Әлемді таны. Серік ағаймен бірге оқы» деп аталады. Қазіргі жеке брендті дамыту деген түсінікпен де тура келіп тұр. Осылайша білікті маман ұстаз деген ұғымның ауқымын кеңейтіп, мәртебесін асқақтатуда айрықша еңбек сіңіруде.&nbsp;<blockquote>– Заман талабы шарықтаған сайын цифрланған білім беру платформалары мен бағдарламаларын талап ету де жоғарылап келеді. Сабақ өтілу барысында білім беруші жаңа сабақ мазмұны ашылатындай көптеген әртүрлі саладағы ақпараттарды пайдалана отырып, ресурстарды жүйелеп әдістемеге қосу қажет. Әрине, бұл көптеген уақыт пен күшті талап етеді, бірақ білім беру саласындағы жетістіктерге жету талабы осы болғандықтан, жаңашылдықпен педагогикалық идеяны &nbsp;орындау керек. География пәні елтану бөлімі бойынша заман талабына сай елдерді, мемлекет туларын, елтаңбаларын, астаналарын, валюталарын танытатын ресурстарға Settera.com., Страны мира, Флаги всех стран, StudyGe.com, тағы басқа платформалар жетерлік. Бұл ресурстар қарапайым әдіс-тәсілдерге қарағанда мультимедиалық, қызығушылық білдіретін білім алушыға тапсырмалар орындау, іздену барысында көмекші құрал бола алады, алайда, қазақ тіліндегі платформалардың болмауы оқушыларға қиындық туғызады. Оқушыларға қолайлылық жасау мақсатында «Әлемді таны, Серік ағаймен бірге оқы» платформасын құрастырып шығардым, – дейді білікті ұстаз.</blockquote>Мақаланы жазу барысында өзіміз де жаңа платформамен танысып шықтық. Расында да өте қызықты. Алар ақпарат көп-ақ. Қызығына батып, біраз уақыттың қалай өткенін де байқамай қалыппыз. Платформаның басты бетіндегі іздеу батырмасы арқылы кез келген елді іздеп, ол туралы ақпарат алуға болады. Сондай-ақ «ойындар» батырмасын басып географиялық білімін толықтыру мақсатында жұмыс жасауға болады.Бұл платформаның басты ерекшелігі кез келген мессенджер арқылы оқушыға жіберіп, оқушы &nbsp;тіркеусіз-ақ қолдана алады. «Әлемді таны, Серік ағаймен бірге оқы» платформасында оқушы елдердің астаналарын, мемлекеттердің басқару формасын, валюталарын, жер көлемін, халық санын анықтауды онай үйрене алады. Сабақ барысында спринт түрінде платформаны телефоннан, интерактивті тақтадан ашып сайыс ұйымдастырып жіберуге қолайлы. Бұл бағдарлама білім алушыларға визуалды ойлауға, есте сақтау қабілетін арттыра отырып, географиялық нысандардың орналасуын оңай әрі тез табуына көмектеседі. Платформаны пайдаланудың оқушыларға пәндік олимпиадаға, ұлттық бірыңғай тестілеуге дайындалуға көмегі көп. Қазіргі кезде жаңартылған мазмұндағы Ұлттық бірыңғай тестілеу сұрақтарына елтану мәліметтері енуде.Бізге тағы бір ұнаған тұсы – бұл платформа тек оқушылар үшін ғана &nbsp;емес, халықаралық қатынаста, саяхаттауда, білім ізденуде, іскерлік байланыста алыс-жақын шет елдерге сапар шегушілерге қажет дүние. – Жалпы платформа қызығушылық танытқандар үшін қолайлы, оны Goоgle Play market жүйесіне орналастырып, бас-аяғы 1 айда 2500-ге жуық адам жүктеп алып жұмыс жасауда. Бұл еліміздегі және шетелдегі қандас бауырларымыздың оқушы балаларына қолжетімді болады деп санаймын. Интерактивті тақтадан пайдаланатын жұмыс нұсқасын шығарып сабақ барысында пайдалануда. Бұл құралдың көмегімен оқу процессін қолдауға, ойын-сайыс өткізуге, сабақ барысында алған білімдерін &nbsp;бекіту жұмыстарын құрастыруға, әрбір білім алушының нәтижелерін қадағалауға болады. Мұнда әр білім алушыға автоматты түрде кері байланыс беру жұмыстары орындалады. Жалпы сабақтың табысты болуы оның құрамдас бөліктерінің мазмұнына, сапасына және білім берушінің осы сабақты қандай жаңашылдықпен, қандай ресурстармен «толтыратындығына» байланысты. Заманауи маман қазіргі болмысына, жұмысына, ахуалына, жетістіктеріне қанағаттанбай, оларды үнемі жақсартуға кемелдендіруге ұмтылуы тиіс. Ізденуден, жаңаны үйренуден, заман талабына сай өзіңді дамытудан тоқтамау қажет, – дейді платформа авторы.Иә, қарап отырсақ, қазір қалтафонсыз тірлігіміз өнбейді. Бар қажетімізге жарап-ақ тұр. Ал оқушыларға қанша тыйым салғанымызбен, олар да оны қолданудан бас тартып жатқан жоқ. Осындайда заман талабына қарай бейімделген де жөн бе дейміз, кейде. Қазақ тіліндегі платформалар көбейсе, оны оқушы емін-еркін тұтынып, білімін арттырып жатса қарсылық білдірмей қолдаған жөн. Ал ондай дүниені ортамызда жүрген білікті ұстаз жасап тұрса нұр үстіне нұр емес пе? Қазақстанда жоқ мұндай платформаны жерлес ұстаздың қолданысқа енгізуі біз үшін зор мақтаныш.

Қармақшылық мұғалім инновациялық бағдарлама ойлап тапты 

&nbsp;<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың төрағалығымен аудан әкімдігі жанындағы құқық бұзушылық профилактикасы жөніндегі ведомствоаралық комиссия отырысы өтті.&nbsp;Күн тәртібінде құқық бұзушылықтың алдын алу, қылмыстың өсуіне жол бермеу мәселелері талқыланды.Бірінші мәселе бойынша аудандық полиция бөлімі бастығының міндетін атқарушы Оспанов Азамат «Отбасы жағдайындағы зорлық-зомбылық сипатында жасалған қылмыстардың алдын алу бағытындағы атқарылған жұмыстар» туралы баяндама жасап, тұрмыстық қарым-қатынастағы құқық бұзушылықтардың алдын алу мақсатында қабылданған және қабылданатын шараларға тоқталды.Сонымен қатар, күн тәртібіндегі екінші мәселе бойынша А.Тоқмағанбетов ауылдық округі әкімі Алданазаров Ғабдолла «Ауылдық округте құқық бұзушылықтың алдын алу, анықтау және жолын кесу, оларды жасауға итермелейтін себептер мен жағдайларды жою жөніндегі қабылданған шаралар» туралы баяндады.Жиында көтерілген мәселелер бойынша аудан әкімі жауапты сала басшыларына тиісті тапсырмалар жүктеді. Атап айтқанда, зорлық-зомбылық қаупінде тұрған және оған ұшыраған тұлғаларды анықтап, қажетті шаралар қабылдау, елді мекендегі жайсыз отбасыларынан шыққан балаларды қосымша білімге, спорттық секцияларға және түрлі үйірмелерге барынша тарту, қылмыстық жазадан босатылғандарды жұмыспен қамту тәсілдерін қайта қарау, шаруа қожалықтарының меншігіндегі өз бетінше жайылып жүрген ірі қара және жылқы малдарының жол бойларын кесіп өту жағдайларын болдырмас үшін жайылымдық жерлерді белгілеп, оны торлармен қоршалау мүмкіндігін қарастыру және басқа да мәселелер бойынша тапсырмалар берді.

Аудан әкімі жауапты сала басшыларына тиісті тапсырмалар жүктеді

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың кезектілік тәртібімен жазылған азаматтарды бүгінгі қабылдауына келушілер тұрғын үй, емделуге қаржылай көмек алу, жұмысқа орналасу және кәсіп ашу мәселелерін қозғады. Бұл туралы Қызылорда облысы әкімінің баспасөз қызметі хабарлады.&nbsp;Келушілердің ұсыныс-пікірі, өтініші, сауалдары әрдайым мамандар сарабынан, талқысынан өтеді. Әрқайсының себеп-салдары жіті зерттеліп, шешімі заң аясында қарастырылады. Кейбір сұрақтар бойынша түсіндірмені мамандар сол жерде береді. Осылайша қабылдауға жазылған азаматтың көтерген мәселесінің шешілу жолы көрсетіледі.Бүгінгі қабылдауға жол апаты салдарынан мүгедектікке тап болған 30 жастағы қала тұрғыны мен сырқаты бар баласының отасына көмек сұрап келген азаматшаның өтініштері зерттеліп, қаржыландыру тетіктері қарастырылмақ. Кәсібін жүргізуге ақшалай және заңдық тұрғыда қолдау сұраған азаматтарға да заң талаптарына сәйкес келген жағдайда көмек көрсетілетіні түсіндірілді.Еске салайық, тұрғындар облыс әкімінің қабылдауына egov.порталы, е-otinish бірыңғай базасы немесе әкімдікке келіп жазбаша өтініш тастау арқылы жазыла алады.<img src="https://knadmin.beoblood.kz/uploads/420203091_717257447262169_5224124584975416625_n_14e9d0945c.jpg" alt="420203091_717257447262169_5224124584975416625_n.jpg"><img src="https://knadmin.beoblood.kz/uploads/424868418_717257540595493_7101048707617764411_n_686f1e9694.jpg" alt="424868418_717257540595493_7101048707617764411_n.jpg"><img src="https://knadmin.beoblood.kz/uploads/419324812_717257133928867_3278791969260465679_n_21c7de3f1e.jpg" alt="419324812_717257133928867_3278791969260465679_n.jpg"><img src="https://knadmin.beoblood.kz/uploads/419248479_717257630595484_8402069638065314346_n_75acf2966c.jpg" alt="419248479_717257630595484_8402069638065314346_n.jpg">

Қазақстан және Қызылорда облысының жаңалықтары