<a href="https://kyzylorda-news.kz/">Kyzylorda-news.kz</a> &nbsp;Көптеген елде 12 сәуір ғарышкерлер күні ретінде атап өтіледі. Бұл датаның ерекшеленуіне Байқоңыр ғарыш айлағының тікелей ықпалы бар. Себебі осыдан 63 жыл бұрын, 12 сәуірде дәл осы айлақтан Юрий Гагарин «Восток-1» ғарыш кемесімен жер орбитасын айналып шыққан еді. Кеңістіктегі бұл шолу әлі күнге дейін адамзаттың ғарышты ашудағы ірі жетістіктерінің бірі ретінде саналады. Бұдан кейін де Байқоңыр айлағы көп жаңалықтың жаршысы болды. Еліміз түркітілдес мемлекеттер арасынан алғаш болып азаматын осы жерден ғарышқа ұшырды. Айтулы күннің қарсаңында Байқоңыр ғарыш айлағының тарихтағы орны мен саланың дамуына қосқан үлесін бір шолып өтуді жөн санадық. &nbsp;&nbsp;Ел атын әйгілеген айлақҚазақстан тәуелсіздік алған 30 жылдан астам уақытта ғарышқа азаматтарды ұшырған алғашқы 40, жасанды жер серігін шығарған 70 мемлекеттің қатарына қосылып үлгерді. Әдетте ғарышты игеруге қатысып жатқан мемлекеттерді көбіне бейресми түрде ғарышқа ұшқан ғарышкерлерінің және жер серіктерінің санымен бағалайды. Ал еліміз тәуелсіздік алған кезде жер серігі де, ғарышкері де жоқ мемлекет болатын. Алайда әлемдегі тұңғыш ғарыш айлағы – Байқоңыр біздің елде. 1961 жылдан бері ғарышқа адам ұшырып келе жатқан айлақтан қазақ түгілі түбі түркінің бірде-бір перзенті ғарышқа ұшпады. Алпауыттар қатарына қосылған Түркияның өзі алғашқы ғарышкерін осы жылдың басында ғана ұшырғанын ескеріңіз. Кеңес одағы ыдырайтын кезде осынау олқылықтың орнын толтыруға еліміз мықтап кірісті. Сөйтіп 1991 жылы қазанда Тоқтар Әубәкіров ғарышқа ұшқан еді. Көп ұзамай 1994 жылы Талғат Мұсабаев зеңгір көкке самғаса, беріректе, 2015 жылы Айдын Айымбетов жер төңірегінде ұшып жүрген халықаралық ғарыш стансасына барып қайтты. Бұл тұста Талғат Мұсабаевтың ғарышқа бір емес, үш рет ұшқанын атап өткен жөн.Еліміз 90-жылдардағы әлеуметтік-экономикалық қиын кездерге қарамастан, ғарыш саласын назардан тыс қалдырмады. Байқоңыр ғарыш айлағын 1994 жылы Ресейге алдымен 50 жылға, кейін 2050 жылға дейін жалға бере отырып, қалай болғанда да бірегей кешенді ғылыми негізде сақтап қалуға ұмтылды. Себебі адамзаттың ғарышты ашуға деген ұмтылысында айлақ үздік саналады. Біріншіден, экватор бойынша барлығы тең есептелген. Осы жерден ең ауыр жүктер ғарышқа ұшырылады. Адамның ғарышқа ең жылдам жетуі де осы жерден оңай. Сондықтан ел билігі Байқоңырдың маңызы мен оны сақтап қалудың өзектілігін жақсы түсінді. Байқоңыр – әлем үшін ғылыми-техникалық прогреске, ал адамзат үшін ғарышқа жол ашқан айлақ. Дәл осы ғарыш алаңынан ғарыш дәуірінің басталуын жариялаған алғашқы спутник ұшырылды.Ғылым мен ғарыш – егіз ұғымҚазір әлемнің дамыған елдерінің түгелі дерлік ғарыш саласына бас қойды. Берісі айға, әрісі Марс секілді планеталар мен жұлдыздар кеңістігіне дейін зерттеу жүргізілуде. Мемлекеттер, жекелеген компаниялар осы мүддеге жұмылды. Бұл тұрғыда Қазақстан да елеулі жұмыстар атқара алды. Мәселен, еліміздің ғарыштық байланыс жүйесін қамтитын KazSat-2 мен KazSat-3 бар. Олар Қазақстанның телехабар тарату мен байланыс саласындағы қажеттілігін толық қамтамасыз етеді. Олардың көмегімен еліміздің барлық аумағында орналасқан мемлекеттік мекемелерге байланыс, деректер беру қызметі мен интернет желісі ұсынылады. Сондай-ақ кейінгі жылдары байланыс спутниктері арқылы шалғай аудандардың тұрғындары үшін интернет тарату ісі жүзеге асырылуда.2019 жылы елімізде ғарыш аппараттарын құрастыру-сынау кешенінің құрылысы аяқталды. Ал 2020 жылы халықаралық стандарттарды және ғарыш аппараттарын құрастыру мен сынауға дайындығын растау үшін кешеннің операциялық біліктілігі тексерілді. Кешен жобалаудан бастап, спутниктерді құрастыруға және сынауға, сондай-ақ бөлшектерін дайындауға дейінгі жұмыстардың толық циклін жүргізуге мүмкіндік беріп отыр.Әріге барар болсақ, 2005 жылы жарғылық капиталын 100 пайыз мемлекет өз мойнына алған «Қазкосмос» ұлттық компаниясы құрылған еді. Компания 2007 жылы «Қазақстан ғарыш сапары» ҰК» акционерлік қоғамы болып қайта жасақталды. Сол кезден бері бұл компания елге қызмет етіп келеді. Жерді қашықтан зондтау, ғарыш технологиясын дамыту, шетелдік компаниялармен бірлескен жобалар әзірлеу тәрізді қызметтерді осы компания атқарады. Қазір ғарыш саласындағы көптеген компаниялармен тізе қоса отырып жұмыс істеп жатқан жайы бар. Тіпті «Қазақстан ғарыш сапары» отандық ғарыш қызметін үйлестіруші деуге де болады. Өйткені компанияның бірнеше еншілес кәсіпорны бар. Жерді қашықтан зондтау, мониторинг, аэроғарыштық түсірілімдер қатарлы қызметтер осы компанияның еншісінде. Мәселен, 2021 жылдың басында компания Қазақстанда 1 млн гектардан астам егіс алқабының пайдаланылмай жатқанын ғарыш арқылы анықтаған. Жалпы, компания жер серіктерінің көмегімен ондаған миллион жерді цифрландырған. Сөйтіп, жер теліміне қатысты ақпаратты жүйелеп отыр. Демек, енді ол жерлерді заңсыз басып алу, игермей қою сияқты деректерді көзден таса қылмайды. Бұдан бөлек, отандық жер серігі 2019 жылы ел аумағынан заңсыз қоқыс төгілген 9628 орынды тапқан. Оның үстіне жыл сайын өрт шыққан жерлерді анықтап отырады. Қай маңда қандай нысан өртеніп жатқанын анық түсірілген суреттерімен қоса ұсына алады.Сөз соңында, 2016 жылы елімізде алғаш рет «аэроғарыш өнеркәсібі» термині ресми мекеме атауларының қатарына енгенін айтсақ. Осы арқылы Қазақстан аэроғарыш саласы ел экономикасындағы маңызды бағыттардың қатарына қосылғанын паш етті. Ал жоғарыда тізбектеген қаншама жетістіктің бастауында Байқоңыр ғарыш айлағы тұрғанын ұмытпаған абзал. Қайткен күнде де айлақ келешекте ел үшін маңызды саналатын ауқымды жобаларды жүзеге асыруға себепші боларына сенім мол.&nbsp;

Байқоңыр айлағы жаңалықтың жаршысы болды

<a href="https://kyzylorda-news.kz/">Kyzylorda-news.kz</a>&nbsp; Арал ауданындағы №83 орта мектептің мұғалімі Ақмарал Нұрадинова жапондық кинусайга әдісі арқылы оқушыларды қолөнерге баулып келеді. Бұл қалдық маталардан инесіз құрақ құрау дегенді білдіреді.Бұрын музыка пәні мұғалімі болған ол &nbsp;кейінгі екі жылда көркем еңбек сабағынан дәріс береді. Бүгінде «Дарындылар палитрасы» атты үйірмеде 30 шәкірті қолөнердің түрлі әдісін меңгеріп, байқауларда жеңімпаз атануда. Қалдық маталарды тастамай, оларға жан бітірген ұстаздың қолынан шыққан дүниелері көз тартады. Бейнебір суретшінің түрлі-түсті бояумен салған картинасындай.<blockquote>– Оқушыларды қолөнерге баулу үшін алдымен өзімнің шеберлігімді дамытып, түрлі әдістерді меңгеруім керек болды. Сондықтан кинусайганы әлеуметтік желі арқылы үйрендім. Қажет емес мата қиындыларын пайдаға жаратуда таптырмас әдіс. Ол үшін пенопласт, пышақ, желім керек. Бірінші қалтқыға сурет саламыз, содан кейін оның үстінен тесіктер жасаймыз. Оған мата қиындыларын жапсырамыз. Үйірмеде оқушыларым жіп графикасы арқылы да басқа дүниелер жасауды меңгеруде. Аты айтып тұрғандай, мұнда жіп қолданылады. Қатты затқа жіңішке жіптерді түстердің үйлесіміне қарай жапсыру арқылы әдемі картина шығаруға болады. Моншақтан тақия тігуді де үйреніп алғандары бар. Қажетті құрал-жабдықтың барлығын өзім алып беремін. Дайын өнімдерді ақшаға сатып алғысы келетіндер бар. Бірақ мен одан табыс табуды ойламаймын. Менің мақсатым – қолөнерді шәкірттеріме дарыту, – дейді.</blockquote>Қазір кесте тігіп, ою ойып, қолөнермен айналысатын қыз балаларды кездестіре бермейміз. Оның орнына телефонмен тик-ток түсіруге бейім. Ақмарал апайдың айтуынша, балаларды қызықтыра білсе, қолөнер – баға жетпес құндылық. Бұл ең бірінші қыз баланы әсемдікке, шеберлікке, тігін тіге білуге және үйлесімділікке үйретеді.Қазір шәкірттері аудан, облыс көлеміндегі көрмелерге қатысып, жүлделі орындарды иеленуде. Алдағы уақытта мұғалімнің қолынан шыққан бұйымдардан көрме ұйымдастырылмақ. &nbsp;

Аралдық мұғалім кинусайга әдісі арқылы оқушыларды қолөнерге баулып келеді

<a href="https://kyzylorda-news.kz/">Kyzylorda-news.kz</a> &nbsp;«Қызылорда жастар» театры өнерімен көпті мойындата алатын дәрежеге жеткені жасырын емес. Көрерменге сапалы дүние ұсынып жүрген ұжымда мықты өнерпаздар жетерлік. Соның бірі – Тоғжан Дастанқызы.&nbsp;Театр өз алдына шаңырақ көтергелі бері жуырда жазушы Төлен Әбдіктің «Оң қол» психологиялық драмасын сахналады. Күрделі туындының басты рөлін дәл осы біз әңгімелескен Тоғжан ойнап шыққан болатын. Осы орайда жас актрисамен сұхбаттасып, оқырман назарына ұсынуды жөн санадық.– Әңгімені туған топырағыңыздан бастасақ, қай жерде дүниеге келдіңіз, қайда білім алдыңыз?<blockquote>– Мен Шиелі ауданында туғанмын. Сол жердегі Ыбырай Алтынсарин атындағы №219 қазақ орта мектебін тәмамдап, 2014 жылы Қ.Жұбанов атындағы Ақтөбе өңірлік мемлекеттік университетінеи грантқа оқуға түстім. Дегенмен оқыған мамандығым қазақ тілі мен әдебиеті болатын. Бұл мамандық та өнер секілді жаныма жақын. 2018 жылы оқу ордасын қызыл дипломмен аяқтадым. Содан соң 2018-2020 жылдары Қорқыт ата атындағы Қызылорда мемлекеттік университетінде «Филология» мамандығы бойынша магистратурада оқыдым.</blockquote>– Өнер де бақ тәрізді, біреуге ерте, біреуге кеш келіп жатады.&nbsp;Театр сахнасындағы жол қай кезден басталды?<blockquote>– Театр әлеміне ең алғаш 3 курс оқып жүргенде келдім. Қ.Жұбанов атындағы өңірлік мемлекеттік университеті жанынан Т.Ахтанов атындағы драма театрдың режиссері Елтай Кемал «Кемал» театр студиясын құрды. Студия университеттің Жастар сарайында орналасқан. Сол жерде хореграф, вокал бойынша сабақ беретін мамандармен жұмыс істедік. Театр өнеріне қызығатын, қабілеті бар университет студенттерінің арасында кастинг өткізіліп, 80-ге жуық студент қатысты. Ақыры студияға 25 студент іріктеліп алынды, арасында мен де болдым. Ең алғаш театр әлеміне аяқ басуыма себепші, қолдаушы болған ұстазым Елтай Кемал деп айтар едім.</blockquote>– Қаламыздың «Қызылорда жастар» театры шығармашылық потенциалды қажет ететін мықты ортаға айналып үлгерді. Бұл ұжымға қалай қабылдандыңыз?<blockquote>– Жалпы, театр сахнасында жүргеніме 7 жылға жуық уақыт болыпты. Қалалық «Жастар» театрына 2020 жылы жұмысқа қабылдандым. Ақтөбедегі «Кемал» театрында жүргенде «Өмір-өзен» спектаклінде ең алғаш көпшілік алдында сахнада өнер көрсеткен едім. Мен үшін әуелгі үлкен тәжірибе сол болды. Оның алдында тек ән айтып сахнаға шығып жүргенмін. Мектеп қабырғасында Шиелідегі музыкалық мектепте 5 жыл вокалдан сабақ алғаным бар.Ал маған алғаш рет басты рөлде ойнау бақытын осы «Жастар» театры сыйлады. Жазушы-драматург Жолтай Әлмашұлының «Отырардың жасыны» атты тарихи драмасында Әбудің сүйген ғашығы Айымжанды сомдап шықтым. Осы ретте шығармашылық жолымда үлкен мүмкіндіктер берген Оңталап Нұрмаханов ұстазыма көп алғыс айтамын. Ұстазымның арқасында театр әлемінің қыр-сырымен одан әрі терең таныстым, үйрендім, білім алдым. Қазір театр өнерінде жеткен жетістіктерім болса, ол да ағайымның сенімінің, қолдауының, берген білімінің арқасында екені сөзсіз.</blockquote>– Кейбір даңқты өнер шеберлері театр сахнасында мыңдаған қойылымда ойнағаны белгілі.&nbsp;Ал сіз шығармашылық жолыңызда қанша қойылымда ойнап үлгердіңіз?<blockquote>– Алдағы өнер жолымыз әлі де ұзақ екеніне сенемін. Әзірге оншақты қойылымның басты рөлдерін сомдадым. Кейінгісі Төлен Әбдіктің әйгілі «Оң қол» психологиялық драмасы. Бұдан бөлек С.Балғабаевтың «Қызылорданың қыздары» қойылымында көпшілік сахнада, Оңталап Нұрмахановтың «Қалың елім, қазағым, қайран жұртым…» атты қойылымында Тоғжан бейнесінде, Қ.Түменбайдың екі мәрте Социалистік Еңбек ері Ыбырай Жақаев пен Жазылбек Қуанышбаевқа арналған «Екі бала-екі шал» қойылымында көпшілік сахна мен хатшы қыздың бейнесінде, Ж.Ермановтың өмірі мен өлеңдеріне құрылған А.Алматов пен О.Нұрмахановтың бірлескен туындысы «Ұлардың дауысы» атты поэзиялық қойылымында көпшілік сахнада ойнадым.Шетелдік жазушылардың да туындыларын ұмытпадық. Мәселен, Башқұрт жазушысы Флюр Галимовтың «Олимптің күйреуі» қойылымында сұлулық пен махаббат құдайы – Афродитаны сомдап шықтым. Бұдан бөлек көптеген қойылымдарда өнер көрсеттім. Ешқайсысын бөліп жармаймын, сомдаған рөлдерімнің бәрі де жаныма жақын, ыстық болды. Алдағы уақытта өзімді табиғатыма, мінезіме жақын емес рөлдерде сынап көргім келеді.</blockquote>– Сұхбатыңызға рақмет!&nbsp;Фото: Қала әкімдігі

Тоғжан Дастанқызы: Театр сахнасында жүргеніме  7 жыл болды

<a href="https://kyzylorda-news.kz/">Kyzylorda-news.kz</a> &nbsp;Қазір облыста бьюти-индустрияға бет бұрғандардың қатары қалың. Жыл өткен сайын арулардың сұлулыққа деген көзқарасы өзгеріп, әдемілік үшін пластикалық отаның кішігірім түрлері де жасалуда. Сырбойылық арулармен тілдесіп қаладағы сұлулық салондарының мүмкіндіктері, пластикалық отаның артықшылығы мен кемшілігі туралы әңгімелестік.Пластикалық ота – қазір әлемдегі ең танымал сұлулыққа бағытталған хирургияның бағыты. Жылына 11 млн-нан астам отаның осы түрі жасалынады. Оның да түрлері көп. Атап айтсақ, блефаропластика, ринопластика, маммопластика, липофилинг және де басқалары. Мұрынға жасалынатын отаның құны 150 мың теңгеден 300 мың теңгеге дейін, ал артық салмақтан арылу үшін 1 млн-нан 3 млн теңгеге дейін қаражат қажет. Әлемде пластикалық операция жасайтын клиника көп. Соның ішінде Джонс Хопкинс емханасы, Грейт-Ормонд-стрит ауруханасы және Гарвард медициналық мектебі үштіктің көшін бастап тұр.Биылғы жылдың тренді ретінде «табиғи сұлулық» пен бет-әлпетке жеңіл-желпі түзетулер жасау қарастырылуда. Жалпы көптеген қыз-келіншек көздеріне қабақ жасатып, бет пен маңдай, мойынның терісін тарту, жақ пен мұрынның мүсінін өзгерту деген сияқты қауіпті процесске келісім береді. Әлемде Оңтүстік Корея көш бастап тұр. Ал Қазақстанда ернін үлкейтуші қыздар жыл санап артып келеді. Инъекция арқылы жүретін бұл процессті араға уақыт салып қайта қайталап отыру қажет. Дегенмен көпшілігі өзі қалаған ерінді көре алмай, көріксіз нәтижеге ие болады.<blockquote>– Менің ернімнің формасы өздігінше әдемі еді. Туған күніме орай өзіме шағын сыйлық жасайын деп шештім. Формасын аз-маз үлкейткім келіп, қаламыздағы косметологтарға жүгіндім. Процесс ұзақ емес, маған бағасы да ұнады. Арнайы ауруды сездірмейтін жақпамай жақса да, ернімнің қатты ауырғанын сездім. Бастапқы күндері бұрын ине салдырғандар секілді көгеріп, ісінді. Бірнеше күннен кейін көгергені қайтып, ісігі басылды. Алайда ерін жасатудың қажеті жоқ екенін кеш түсіндім. Себебі жасандының аты жасанды, табиғи сұлулықтың орнын баса алмайды. Шамалы уақыттан соң инъекция тарап кетеді, сондықтан албырт шешім қабылдап, өз сұлулығыңызға қиянат жасамаңыз, – деп өкінішін білдірді Айсұлу Әбілқай.</blockquote>Дегенмен бұл барлығының пікірі осындай дегенді білдірмейді. Қалаған нәтижені көргендер қайта жасатудан еш қашпайды. Бұған тәуелді болып, ажарын басқа да әдістермен «әдемілеуші» қыздар жеткілікті.<blockquote>– Ерекше ерін жасатқаныма біраз уақыт болды. Өзім қалаған нәтижені ала алдым. Бұл заман талабына сай және қауіпті деп айта алмаймын. Өз ісінің маманы болған, жақсы косметологтарға жүгінсек қатерлі болмайды деп ойлаймын. Көпшіліктің пікірі маған қарсы болса да, мен өзімді жақсы сезінемін. Алдағы уақытта тағы да түзетулер жасатамын деген ойым бар, – деп пікірлер легін жалғастырды қызылордалық Алуа Оразғали.</blockquote>Пластикалық ота қауіпті деп атауға себеп көп. Ең сорақысы, сұлу боламын деп ота үстелінде жан тәсілім еткен қыздар бар. Ғаламтор кеңістігінде зардап шеккендердің қорқынышты фотолары мен жантүршігерлік диагноздары туралы мақала мен пост жеткілікті. Көптеген ауру осы ота кесірінен асқынуы мүмкін екендігін ешкім ескермейді. Мәселен, невроз, ішкі қабынулар, инфекция, көздің көру қабілеті, басқа да психологиялық және физикалық дерттерді деніңізге жиып алуыңыз мүмкін. Сапасыз отадан кейін байырғы қалпыңызға оралу мүлде мүмкін болмайды. Бұрын ота жасатып, кейін зардабын шеккендердің бүгінде беті қисық, ота орнында тыртық, ал жүректерінде қаяу бар.Әлемнің сұлулық аренасында жұлдыз болып жанған кейбір хас сұлулар бүгінде пластикалық отаның кесірінен халық көзіне көрінуге ұялатын халге жетті. Мәселен, «супермодель» терминін енгізген Дженис Дикинсонның қазіргі келбеті түбегейлі өзгерген. Табиғи сұлулығынан жұғым да қалмаған Дженис әжімдермен күресемін деп отаның көмегіне жүгінген. Келесі кейіпкеріміз «арыстан әйел» атанған Джоселин Вильденштейн. Ерекше сұлулық символы болған Джоселин пластикалық отаның барлық түрін қолданып көрген. Жұбайының көңілінен шыққысы келген швейцарлық ару қанша талпынса да, ақыр соңы жалғыз қалды. Жасаған операциялары оны танымал қылғанымен, халық пластикалық оталардың ең сәтсіз мысалы ретінде ғана біледі. Жас Джоселин өте көрікті әйел болған. Бірақ енді ол жасаған олқылықтың орнын ештеңе толтыра алмайтынын есте сақтаған абзал.XXI ғасырдағы өте өзекті мәселелердің бірі – дене бітімі. Салауатты өмір салтын ұстанушылар көп болғанымен, физикалық белсенділіктің күшіне сенбейтіндер жетерлік. Арықтауға арналған коктейль, препарат көп. Оны дәрігердің нұсқауынсыз қабылдап, расымен артық салмақтан арылып жатқан жандар бар. Өкінішке қарай, құрамы тексерістен өтпеген кейбір дәрілер кері әсер етіп, арықтаудың бұл тәсілі де өлімге әкелген жағдайлар аз емес. Бұрын тек бетке жасалатын операция қазір дененің де сұлбасын келтіруге қауқарлы бола бастаған. Яғни, артық салмақпен күресіп жүрген жандар ұзақ уақыт бойы спортпен шұғылданып салмақ тастағанша, аз уақыт ішінде арықтаудың жолын іздейді. Дене бітімінің формасын өзгертемін деушілер арнайы операцияның көмегіне жүгініп жатады. Алайда отаның орнында ұсқынсыз тыртық қалып, кейін жасыру мүмкін болмайтынын ескермейді.&nbsp;Фото: Нұрболат Нұржаубай

Аймақта бьюти-индустрия дамып келеді

&nbsp;<a href="https://kyzylorda-news.kz/">Kyzylorda-news.kz</a>&nbsp;«AMANAT» партиясы облыстық филиалының Партиялық бақылау комиссиясы жанындағы мониторингтік топ денсаулық сақтау өкілдерімен бірге қаладағы мемлекеттік жекеменшік әріптестік шартымен жұмыс жасап жатқан емханалардың жағдайына, ондағы халыққа көрсетілетін медициналық қызметтердің қол жетімділігі мен сапасына мониторинг жүргізді.Зерделеу тобы алдымен 16 мыңнан астам қала тұрғыны қамтылған «Қызылорда темір жол ауруханасы» ЖШС болды. Бұл серіктестік құрамында емхана мен аурухана бар. Мұндағы емхана мен ауруханаға 2022 жылдан бері кезең кезеңімен жұмысты тоқтатпастан күрделі жөндеу жұмыстары жүргілізіп жатыр. Емхана талапқа сай көптеген жаңа құрал-жабдықтармен қамтамасыз етілген.Ауруханаға барлық бөлімге жаңа керуеттер, тумбалар алынған. Халықтың кедергісіз кіріп шығуы үшін емхана алды тегістеліп брусчатка төселген. Мүмкіндігі шектеулі жандарға қалыпты орта қалыптастырылған.Мұнан соң зерделеу тобы «ALEXEY SULTAN-AKHMET» ЖШС-нің (Жеке серіктес) емханасында болды. Емхана мемлекеттік-жекеменшік әріптестік негізде жұмыс жасағандықтан заманауи медициналық жабдықтары бар жаңа ғимаратқа көшірілген. Бүгінгі таңда бұл жоба заманауи медицинаның барлық критерийлеріне сәйкес келетін жабдықты пайдалана отырып, жоғары білікті медицина мамандарымен 40 000-ға жуық қала тұрғындарының игілігі үшін медициналық қызмет көрсетуде. Жеке серіктестің өз қаражаты есебінен сатып алынған техникалар қатары жыл сайын жаңартылып отыр.Жалпы жоба іске қосылғаннан бастап 7 жыл ішінде емханаға бекітілген тұрғындардың саны ,азаматтардың өз еркімен тіркелуі негізінде 7000 адамға өскен. «Бұл жобаның сөзсіз сәттілігін көрсетіп отыр»,- дейді емхана басшылығы.Партиялық мониторингтік топ сонымен қатар 1972 жылы С. Макаренко атындағы балалар үйіне арналып салынған Баласағұн №5А мекен -жайындағы №6 емхананың №3 ЖТД бөлімінде болды. Типтік емес ғимарат емханаға пайдалануға 2017ж берілген.Ғимаратқа осыдан 8 жыл бұрын ағымдағы жөндеу жұмыстары жүргізілген екен. Ғимараттың жалпы ауданы 2168,8 м/кв болғанымен, мониторингтік топ оның 3/1 бөлігі пайдаланылмай отырғандығын анықтады. Сондай-ақ аумақтағы 14 мыңнан астам халыққа медициналық қызмет көрсетіп отырған ғимаратқа күрделі жөндеу қажет екенін айтты. Дегенмен қазіргі таңда «Проект Сервис ЖШС» - мен жобалау сметасы дайындалған екен.Үш емхананың жағдайын бағамдаған мониторинг топ, әрбір ұжым тарапынан айтылған ұсыныстарды тиісті басқармаларға жеткізетінін және партиялық бақылауға алатындарын айтып тарқасты.

Медициналық қызметтің қолжетімділігіне партиялық бақылау жасалды

<a href="https://kyzylorda-news.kz/">Kyzylorda-news.kz</a>&nbsp; Жасыратыны жоқ, «жастар сондай, жастар мұндай» деген әңгімені жиі құлағымыз шалып жүр. Дей тұра тізе берсек жастар арасындағы тындырымды тірлік те көп. &nbsp;Сондай істің бел ортасында жүрген жанның бірі қармақшылық – Рахат Бахытжанұлы. Жақында белсенді жаспен тілдесудің сәті түсті.&nbsp;– Бірде бала арманым журналист болу деп жазғаның бар. Осы туралы айтып берші.– Мен Жосалы кентінде орналасқан Шоқан Уәлиханов атындағы 26 орта мектептің түлегімін. Иә, расында мектеп кездегі арманым журналист болу болатын. Ол салаға қызығушылығым бала күнімнен болды. Бұл саланың атқарар негізгі қызметі – елдің басында қандай да бір тауқымет пет жақсылық орын алған жағдайда елмен бірге болып, көрермендер тарапына уақытылы сапалы ақпарат жеткізу. Адамның дегені бола бермейді ғой. Уақыт өте келе мүлдем басқа саланы таңдап, бүгінде сол салада білім алып, қазіргі уақытта аудандық жастар орталығында директордың кеңесшісі болып қызмет атқарудамын. Бірақ бала арманымды қолымнан келгенше жүзеге асырайын деп өзіме жүктелген &nbsp;қызметтегі бөлінісіме орталықтың баспасөз қызметін қатар алып жүрген жайым бар. Қазіргі таңда орталықтың атқарылған іс-шараларын жастар мен тұрғындар жиі оқитын әлеуметтік желілерге ақпараттандырып келемін. Бір жағы жұмысымды, екінші жағынан бала күнгі арманымды жүзеге асырып жүрмін деп ойлаймын.– Қайырымдылыққа, ерікті жастардың қатарына қалай қосылдың?– Қайырымдылыққа келуімнің басты себебі 2019 жылы ел басына күн туған сәтте &nbsp;басталды. Ол кезде мен 15-жастамын. Еліміздің басына тауқымет болып келген короновирус әлемді шарпыған уақытта ауруханада ине шаншар орын болмай, ауырған аудан тұрғындарына оттегі аппараты сырттан келіп, оны таситын азаматтар болмағанын естідім. Қасымдағы достарымды ауруханаға апарып әлгі аппаратты жиі тасып отырдық. Осы сәттен бастап қолымнан келгенінше, мүмкіндігім жеткенше қиналған азаматтарға қолдау білдіремін деп өзіме серт бердім. Одан кейін елімізде қуаңшылық болып көршілес өңірлер мен аудандардың төрт-түліктері шетінен қырылғанын естіп, БАҚ өкілдерінің ресми сайттарынан байқап қалдым. Сол кезден бастап мешіт жамағаты және аудан волонтерлері бір жағадан бас, бір жеңнен қол шығарып ауданға қарасты ІІІ Интернационал ауылына барып шөп орып қуаңшылыққа тап болған өңірлерге қолдау көрсеттік. Одан &nbsp;қасіретті қаңтар оқиғасы орын алған сәтте елімізде төтенше жағдай жарияланып ішкі істер бөлімінің қызметкерлері блок бекеттер де күн-түн демей кезекшілікке тұрғанда тағы да аудан еріктілері бірігіп ас әзірлеп қызметкерлермен бірге екенімізді жеткізіп, қолдау білдірдік. Содан кейін Қостанай облысында алапат өрт болып жаны қысылып, үй-күйінен айырылған азаматтарға қолдау білдіру мақсатында гуманитарлық пункт ашып, азық-түлік жинап Қостанай облысына өз қолдауымызды білдірдік. Ал қазір еліміздің бірқатар аймағындағы су басқан өңірлерге азық-түлік жинап барынша Батыс өңірлеріне қолдау білдірудеміз. Аудан халқының аманатын жеткіздік. Әлі де қолдау жинап үстіндеміз. Міне, бес жылға жуық уақыт болды осы еріктілер қатарында қызмет етіп келемін, Алла қаласа әлі де жалғастыра беремін.&nbsp;– Алдағы жоспарың қандай? 10 жылдан кейінгі өзіңді кім ретінде көресің?– Ойда жүрген жоспарлар жетерлік, сол жоспарларды жүзеге асыру үшін ерінбей еңбектеніп жатырмын. Енді қоғамдық ортада волонтерлық бағытта көп шараларда жүрген соң алдыңғы аға буынмен бірлесе отырып ауданда әлеуметтік жағдайы төмен отбасылардың қатарын азайту, яғни «балық берме қармақ бер» жобасын жүзеге асыру жоспарда бар. Ашығырақ айтқанда, қайырымдылық алатын жандарға елге, халыққа қол жайдыра бермей өз-өзін қамтамасыз ететіндей жағдайға келтіру үшін өздерінің қолдарынан келетін түрлң іспен мәселен тоқаш, самса тағы басқа тағамдар жасауына қолдау білдіріп ұнын, майын алып беріп, әрі қарай кәсібін жалғастыруына ықпал ету жоспарда бар. Енді 10 жылдан кейін жоғарыда айтылған жоспарларды 100 пайыз командамызбен орындасақ, қайырымдылық алатын кісілердің жағдайының тұрақталуына көмек қолын созған болып және сол кісілердің ақ жүректерінен шыққан баталарымен өсіп- өнгендердің қатарынан көрінгіміз келеді.– Жас та болса көп істің қасынан табылып жүрсің. Жалпы өзің кімді үлгі тұтасың?– Әр адамның үлгі тұтарлық жеке тұлғалары болады. Менің де үлгі тұтатын азаматтарым бар. Ол кісілер осы ауданның өсіп-өркендеуіне өзіндік үлесін қосып жүрген жандар, яғни Қармақшы аудандық ардагерлер кеңесінің төрағасы Асқар Мереков ағай мен аудандық әйелдер кеңесінің төрайымы Күлжауһар Раева апай. Асқар ағаны үлгі тұтатыным көркем мінезді, сөйлегенде адамды өзіне ұйыта алатындай азамат. Кейбір азаматтар өз отбасының ауызбіршілігін сақтай алмай жүргенде ол кісі бүкіл аудан ақсақалдарының руға, ұлт пен ұлысқа бөлмей ауызбіршілікте сақтап, ауданымыздың тұрақтылығын сақтап жүрген азамат. Күлжауһар апайды үлгі тұтатыным – елге, халыққа абыройлы кісі. Ол кісі жалғыз балаларды ғана &nbsp;тәрбиелеп қоймай, осы жастардың дұрыс тәлім-тәрбиесіне және сауатты болып өсуіне өз септігін тигізіп келеді. Апайымызбен біршама іс-шараларда болған уақытта өзінің көрегенділігін көрсетіп, барған жерлерде сыйлылығы жанарымызға оттай басылады. Мен де осы кісілерге қарап және әр айтқан сөздері мен істерінен сабақ алып келе жатқан жас буынның бірімін.– Жастар кітап оқымайды дегенді жиі естіп жатамыз. Ал сен кітап оқып тұрасың ба? Соңғы оқыған кітабың қандай?– Жоғарыда айтқанымдай, өзім аудандық жастар орталығында жұмыс жасаймын. Біздің орталықта жастардың бос уақытын тиімді пайдалану мақсатында «Қазына» кітап клубы құрылған болатын. Сол кітап клубында қазіргі таңда бос уақытымда Шерхан Мұртазаның «Ай мен Айша» кітабына көз жүргізіп қоятыным бар. Ал оқыған кітаптарым баршылық. Барынша бір айда жеңіл бір кітапты оқып шығуға тырысамын.– Жас болсаң да ісіңмен көпке үлгі болып жүрсің. Жан-жақтылығыңа қарап қызығамыз. Өзің секілді жастар бос уақытын тиімді пайдалана бермейді. Осы орайда не айтасың?– Замандастарыма айтарым тек тынбау керек. Жас, күшіміз бойымызда кезде елге, жерге көмегімізді тигізіп қалуымыз керек деп есептеймін. Қазіргі таңда расында болашақ білімді әрі сауатты жастардың қолында екеніне көзіміз жетті. Соңғы уақыттарда кезіндегідей ешбір таныссыз жұмысқа тұруға болатынын түсіндім. Соның бірі өзім. Бір қызығы мен дипломды түске дейін алсам, уақыт өткізбей түстен кейін тұрақты жұмысқа орналастым. Сол сәтте еңбегімнің жемісі деп түсіндім.– Ауданға белгілі зиялы қауым өкілдерімен бірге белсенді болып жүресің. &nbsp;Көрген-түйгенің бар шығар. Соларды бөлісе отырсаң…– Көбінесе зиялы қауым өкілдерімен түрлі бағыттағы шараларда және мектептердің шақыруымен өткізілетін келелі кездесуде болып қаламыз. Жосалы кентіндегі Шоқан Уәлиханов атындағы №26 орта мектептің оқушыларымен кездесу ұйымдастырылып жатқанда Жосалы кентінің ардагерлер кеңесінің төрағасы Ерболат Ұзақбаев ағамен бір іс-шарада болдым. Сол уақытта Ерболат ағайдың оқушыларға бір айтқан сөзі өзіме сабақ болып қалды. Ол кісі «Балаларым қолдарыңда тұрған әр сәтті бағалаңдар және сол сәтті махаббатпен жасаңдар. &nbsp;Бізге мұғалімдеріміз әр істі махаббатпен жасауды үйретті, сол нарсе миымызда сіңгені соншалық менің зейнеткерлікке шығатын кездегі кітапшама бір жерде жұмыс жасаған және сол жұмыс жасаған жерден зейнеткерлікке шықты деген мөр басылды» деді. Міне, тсүіне білген адамға мұнан артық сөздің қажеті де болмайды. Біз де әр ісімізді махаббатпен жасай білсек болғаны.&nbsp;– Уақыт бөліп, әңгімелескеніңе көп рақмет! Жұмысыңа жеңіс тілейміз.&nbsp;

Рахат Бахытжанұлы: Бүгінде бала күнгі арманымды жүзеге асырып жүрмін

<a href="https://kyzylorda-news.kz/">Kyzylorda-news.kz</a> 10 сәуір күні Жалағаш ауданы руханият орталығында ҚР ҰЭМ Табиғи монополияларды реттеу комитетінің Қызылорда облысы бойынша департамент басшысының орынбасары К.Кеншембаева, «Нұра топтық су құбыры» ШЖҚ РМК «Арал» СЖКБД филиалының директоры Н.Шамуратов суды магистральдық құбыр жолдары және таратушы желілер арқылы беру қызметтеріне бекітуге берілген тарифтерінің жобасын талқылау бойынша жария тыңдаулар өткізді. Жиынға аудан әкімінің орынбасары Әліби Байнахатов, аудандық мәслихат депутаттары, ауылдық округ әкімдері мен сала басшылары, бұқаралық ақпарат құралдарының өкілдері және аудан тұрғындары қатысты.«Нұра топтық су құбыры» ШЖҚ РМК «Арал» СЖКБД филиалының директоры Н.Шамуратов филиалдың жобалық орташа босату тарифі 1 текше метрге ҚҚС-сыз: суды таратушы желілер арқылы беру қызметіне: 2024 жылға – 725,54 теңге, 2025 жылға – 753,38 теңге, 2026 жылға – 753,39 теңге, 2027 жылға – 777,90 теңге, 2028 жылға – 829,02 теңге, 2029 жылға – 869,21 теңгеден ұсынылғанын жеткізді.Сонымен бірге, жария тыңдау барысында Департамент қазіргі таңда қолданыстағы нормативтік-құқықтық актілерге сәйкес, «шикізат және материалдар», «жанар-жағар май», «энергия», «жалақы», «әлеуметтік салық», «ағымдағы жөндеу» және тағы басқа да баптары бойынша түзетулер қарастырылып жатқандығы айтылды.

Жалағаш ауданындағы ауыз су тарифтеріне байланысты жария тыңдау өтті

Қала бюджетіне қандай өзгерістер енді?

<a href="https://kyzylorda-news.kz/">Kyzylorda-news.kz</a> &nbsp; &nbsp;Кеше қалалық мәслихаттың 18-сессиясы өтті. Сессияға қалалық мәслихат төрағасы И.Құттықожаев төрағалық етті. Сессияға қалалық мәслихат депутаттары, қала әкімі С.Қожаниязов, әкімнің орынбасарлары, аппарат басшысы, қоғамдық ұйымдардың төрағалары, құқық қорғау, салық органдары, дербес бөлімдер мен мекеме басшылары, кент және ауылдық округтердің әкімдері, бұқаралық ақпарат құралдарының өкілдері қатысты. Сессияның күн тәртібіне «2024-2026 жылдарға арналған Қызылорда қаласының бюджетін бекіту туралы» қалалық мәслихат шешіміне өзгерістер енгізу туралы», «Қызылорда қаласы әкімдігінің дербес құрамын келісу туралы», «Қызылорда қаласының кейбір құрамдас бөліктерін қайта атау және атау беру туралы», «Қызылорда қалалық мәслихатының депутаттарын сайлау жөніндегі округтік сайлау комиссияларының мүшелерін сайлау туралы» және «Қызылорда қалалық аумақтық және учаскелік сайлау комиссияларының мүшелерін сайлау туралы» Қызылорда қалалық мәслихатының шешiмдерiне өзгерістер енгізу» мәселелер шығарылды. Аталған мәселелерге байланысты қала әкімі аппаратының басшысы М.Тасқараев, қалалық экономика және қаржы бөлімінің басшысы Г.Баймаханова, қалалық мәдениет және тілдерді дамыту бөлімінің басшысы Ж.Тажмаханов, қалалық мәслихат аппаратының заңгері М.Мұхтаров хабарлама жасап, берілген сауалдарға жауап берді.&nbsp; Республикалық, облыстық, қалалық бюджет көздерінен бөлінген қаржылық жобаларға сәйкес, қаладағы кейбір әлеуметтік мекемелерге пандус орнатуға, Тасбөгет кенті мен Сабалақ саяжайының 15 көшесіне жарық шамдарын орнатуға, «Газ тасымалдау жүйесін дамыту» бағдарламасына, «Көлік инфрақұрылымын дамыту» бағдарламасы бойынша көшелерге сараптама қорытындыларын алу, оның ішінде Яссауи көшесін Ә.Бөкейхан көшесінен Әйтеке би көшесіне дейін жаңғырту, Н.Назарбаев даңғылынан Тәуелсіздіктің 25 жылдығы даңғылына дейінгі көше көше құрылысы, Тәуелсіздіктің 25 жылдығы даңғылы бойынша «Қызылжарма» каналы арқылы автожол көпірін салу, Е.Көшербаев көшесін С.Бейбарыс көшесінен Бөкейхан көшесіне дейінгі жолды қайта жаңғырту, Қорқыт ата көшесінен көлік жол айырығына дейін Жаппасбай батыр көшесін жаңғырту, Белкөл кентіндегі екі көшені жарықтандыру, Тасбөгент кентіне жаяу жүргіншілер жолын салу, 4 көппәтерлі тұрғын үйлердің ауласын абаттандыру, қалада санитарлық тазалықты қамтамасыз ету және басқа жобаларға қаржылар бағытталды. Сонымен қатар, сессия барысында Бәйтерек мөлтек ауданындағы атаусыз көше – жазушы «Дүкенбай Досжан» есімімен, Әбу-Насыр-әл-Фараби-17 көшесі – соғыс ардагері «Оспанов Қалмағанбет» есімімен, Герман Титов-8 көшесі – мәдениет қайраткері, журналист «Мақсұтұлы Оразбек» есімімен, Яссауи-6 тұйық көшесі – Ғылым мен қоғамдық қызметте еңбек сіңірген тарихшы ұстаз «Кереев Мәди Құрманұлы» атымен атау туралы ұсыныстар Қазақстан Республикасының Үкіметі жанындағы Республикалық ономастика комиссиясының қарауына ұсынылды.&nbsp; Сесссияға қатысқан қала әкімі Серік Салауатұлы: «Автобус паркіне такси электромобильдерін сатып алу, Сол жағалауда аяқ сумен қамтамасыз ету, Тәуелсіздік көшесін төрт жолақты етіп кеңейту, темір жол вокзалы мен базар аумақтарын сәулеттік келбетке сәйкестендіру, қала ғимараттарының дизайн кодқа сай болуы, бірнеше қаланың негізгі көшелерін абаттандыру, 35 көшені жөндеуден өткізу және басқа да жобалар бойынша жұмыстар атқарылатындығын жеткізді».&nbsp; Сессия қарауына шығарылған барлық мәселелер жан-жақты қаралып, тиісті шешімдер қабылданды.

Қалалық мәслихаттың он сегізінші сессисы өтті

<a href="https://kyzylorda-news.kz/">Kyzylorda-news.kz</a> «AMANAT» партиясының бастамасымен және жергілікті атқарушы органдардың қолдауымен елімізде жүзеге асырылып жатқан «Қарызсыз қоғам» жобасының өңірде орындалуы бойынша брифинг өтті.БАҚ өкілдеріне арналған ресми жиында партияның облыстық филиалының Атқарушы хатшысының орынбасары Алтынбек Жарылқасынов, жобаның облыс бойынша менеджері, сертификатталған тренер, ментор Наталья Мишукова, және басқа да тренерлер мен қаржы сарапшылары партиялық жобаның маңызын, ауыл-аймақтарда өткен сабақтар барысы туралы баяндады.<blockquote>«Өкінішке орай елімізде банктер мен түрлі қаржы ұйымдары алдында қарызы мол азаматтардың үлесі өте басым. Нақты айтсақ - 2 млн шамасында және бұл топта жастардан бастап зейнеткерлерге дейін азаматтар бар. Осы ретте 2023 жылдың сәуір айында «AMANAT» партиясы мен Halyk Bankтиісті меморандумғаотырып, азаматтардың қаржылық сауаттылығын арттыруды көздейтін «Қарызсыз қоғам» жобасын іске қосқан болатын. Аталған құжат негізінде а.ж. 5 ақпаны күніпартияның «Қарызсыз қоғам» жобасы еліміздің барлық аймағында бастау алып, азаматтарға консультациялық көмек көрсету үшін өңірлерде «Қарызсыз қоғам» жобалық кеңселері құрылды. Жалпы биылғы жылы «Қарызсыз қоғам» қаржылық сауаттылық курстарымен еліміздің барлық өңірінде 800 мыңнан астам адамды оқыту жоспарлануда. Жобаға қатысатын 800 мың адамның 150 мыңытұрғындар болса, 100 мыңы студенттержәне 550 мыңы мектеп оқушылары. Жаз айларында мектептердегі «Жаһандық құзыреттілік», «Қаржылық сауаттылық», «Кәсіпкерлік негіздері» пәндері мұғалімдерінің арнайы оқудан өтулері жоспарлануда.» -деді Атқарушы хатшының орынбасары Алтынбек Жарылқасынов.</blockquote>Ал, жобаның облыс бойынша менеджері Наталья Мишукова сабақтар барысындағы түрлі тағдырлы тұрғындардың әсерін жеткізіп, олардың әлеуметтік мәселелеріне қанық болғанын атап өтті. Сабаққа қатысқандардың көбісі әйел азаматтар болғанын, мұнан бөлек оқуға қатысушылардың жартысынан көбінде несие проблемасы болғанын жеткізді. Қарызсыз қоғам сабақтарында тұрғындардың қаржылық сауаттылығын арттырып қана қоймай, оларға заң кеңестерін беру ұйымдастырылып, көпшілігінің мәселесінің шешілуіне ұйытқы болған.Брифинг барысында тренерлер мен қаржы сарапшылары БАҚ өкілдерінің сауалдарына жауап берді.Қазіргі таңда облыс бойынша ақпан – наурыз айлары қорытындысы бойынша мың жарымға жуық адам оқудан өтті (1 477 оқыды, 1399 адам сертификат алды).«Қарызсыз қоғам» жобасының қатысушылары қаржы кеңесшілерінің дәрістерінен бөлек, enbek.kz порталына тіркелу мен Жеке кәсіпкерлік ашудан бастап, соттан тыс банкроттықты сүйемелдеу және берешекті өтеу кестесін жасауға дейінгі көптеген сұрақ бойынша кеңес ала алады. Сондай-ақ, оқу процесіне қатысушыларға заңгердің де көмегі беріледі. Олар әр қарыз алушының несиелік тарихын жеке зерттейді және қарыз жүктемесін жеңілдету бойынша кеңес береді.Курсқа жазылу үшін тұрғылықты жері бойынша «AMANAT» партиясының қалалық, аудандық филиалдарынанемесе өңірлерде ашылған «Қарызсыз қоғам» жобалық кеңселеріне хабарласуға болады.

«Қарызсыз қоғам»: Қызылордада 1399 адам сертификат алды

<a href="https://kyzylorda-news.kz/">Kyzylorda-news.kz</a>&nbsp; Егер қандай да бір науқасқа шалдығатын болсақ, алдымен маңдай тірейтін жеріміз медицина орталығы болса, ол жерде міндетті түрде дәрігер мен медбикенің қарауынан өтеміз. Бірі – ауруды түп тамырымен жою үшін диагноз қоюға ілім-білімін сарқыса, бірі – оның әрі қарайғы ем-домына, қадағалау іс-шараларына, сынама, қан анализдерін тапсыру секілді қызметтеріне басымдық береді. Сол себепті де кейде дәрігер мен медбикенің қызметін бір-бірінен бөліп қарау жөнсіздей көрінеді. Әлбетте екеуінің мойнына жүктелген жауапкершілік екі түрлі болғанымен, екеуінің де илегені бір терінің пұшпағы. Осы ретте науқасымен бірге «ауырып», онымен бірге «жазылатын» мейірбикелік жұмыстың жүгін арқалап жүрген ақ халатты абзал жандардың қызметіне тоқталмақпыз. Оның ішінде ауылдық жерлерде қызмет көрсететін дәрігерлік-амбулаториялардың халық денсаулығы үшін жасап жатқан еңбегін дәріптеуді жөн көрдік. Мұндай игілікті істі Қармақшы ауданы, ІІІ Интернационал ауылына барған сапарымызда амбулаториядан ем қабылдап жүрген науқастардың сала қызметкерлерінің атына жолдаған жылы лебіздерінен байқаған болатынбыз. Оның қатарында осы мекемеде бірнеше жылдан бері абыройлы еңбек етіп келе жатқан ақ халаттының бірі – Лаура Ералиева да болған-ды.Ол Қармақшы ауданына қарасты Жаңажол ауылындағы үлгілі Ералиевтер отбасында өмірге келген 4 баланың тұңғышы. Әкесі Төлеу Ералиев «Жаңажол» жауапкершілігі шектеулі серіктестігінің бас агрономы әрі аудандық мәслихаттың депутаты болса, анасы Зада Қошқарова тәрбиеші болып еңбек етеді. Орта мектепті ойдағыдай бітірген жас қыз 2005 жылы Қызылорда медициналық колледжінің «Мейірбике ісі» мамандығына оқуға түсіп, оны сәтті аяқтап шығады. Одан соң теориялық білімін тәжірибемен ұштастырып, облыстық психоневралогиялық ауруханасында еңбек жолын бастайды. 2013 жылы ІІІ Интернационал ауылына келін болып түскен ол Ғалымжан Ақылов есімді азаматпен шаңырақ көтереді. Отбасылық жағдайға байланысты ауылдағы дәрігерлік-амбулаториясына жұмысын ауыстырады. Қазір берекелі шаңырақта ата-ене және 4 ұл-қызымен бақытты өмір сүріп жатқан жайлары бар. Жары да медицина саласынан алыс емес, &nbsp;аудандық аурухананың қаржыгері.Жас адам қашан да еліктегіш келетіні бар ғой. Лаураның да медицина саласына деген іңкәрлігі бала кезінен басталғанға ұқсайды. Ол оны өзі күлімсіреп былайша жеткізеді.&nbsp;<blockquote>– Өмірлік таңдауға теледидардың да әсер ететінін айтқым келеді. Жалпы таңертеңнен кешке дейін көгілдір экранның алдында отыратынның санатынан емеспін. Дегенмен, маған көптеген телесериалдың арасынан өзіме сондай жақын әсер еткен бір фильм болды. Ұмытпасам, «Лайф» клиникасы" ғой дейімін. Фильмде дәрігер, медбикелердің жұмысы қарбаласып, түрлі жағдайда ауруларға көмек &nbsp;көрсетіп жатады. Онда адамгершілік, кәсіби шеберлік пен адам тағдыры талқыға түсіп жатады. Оған дейін де медицинаға қатысты деректі, танымдық контенттер көретінмін. Бірақ осы фильмнен соң түбегейлі шешім қабылдап, медбике болуды таңдағанымды айтқым келеді. Оған қоса, медицина саласында жұмыс істейтін әпкем бар еді. Сол кісіге де еліктейтін едім. Жанына шипа іздегендерге екпе салып, дәрі шанышқанда бұрынғыдан да бетер мейірбике болғым келіп кететін. &nbsp;Салада қызмет етіп, шешім қабылдауыма осы нәрселер түрткі болды, – дейді жас маман.</blockquote>Мейірбике бүгінде дәрігерлік-амбулаторияда химизатор болып жұмыс істейді. Қарапайым сөзбен айтқанда, өкпе ауруына қарайтын медбике. Ауылдағы науқастардың уақытылы рентгенге түсуі, егер де рентген қорытындысы дұрыс болмаған жағдайда анализдерін тапсыртып, оны қадағалау – Лаураның тікелей жауапкершілігінде.&nbsp;«Қанатсыз құс, армансыз адам болмайды» дегендей, жас маманның да алдына қойған арман-мақсаты толайым.&nbsp;<blockquote>– Келекшекте де осы жұмысымды жалғастырып, дертке шалдыққан жандарды тексерістен өткізіп, өкпе ауруының алдын алу іс-шараларын жүргізе беретін боламын. Ең бірінші мақсатым – ауылдың тұрғындарына адал қызмет етіп, алғыстарын алу. Ауырған жандардың сауығып кетуіне себебімді тигізу. Осы мақаланы пайдаланып, дәрігеріміз Зульфия Алдажарқызына, аға медбике Бақыткүл Меңлібаеваға және аға буын өкілдері – Рабиға Аманова, Афида Мададова және ұжымдағы басқа да апайларыма шын жүрегімнен алғысымды айтамын, – дейді Лаура Төлеуқызы. &nbsp;</blockquote>

Лаура Ералиева: Ауыл тұрғындарына адал қызмет етіп келемін

&nbsp;<a href="https://kyzylorda-news.kz/">Kyzylorda-news.kz</a> &nbsp;Қызылорда қалалық орталықтандырылған кітапханалар жүйесінде қарасты № 8 кітапхананың ұйымдастыруымен «Адал адам» мәдени-тәрбие орталығы «Әлем ВООК» жобасы аясында ақын Қарасақал Ерімбеттің туғанына – 180 жыл толуына орай №143, №268 мектеп-лицей оқушылары қатысуымен «Нұсқалы сөздің кестесі» атты танымдық сағаты өткізілді.&nbsp;Шараға тәлімгерлер Рахманқұлова Набат пен «Дәстүрлі ән-жыр» домбыра үйірме жетекшісі Маханбетжанов Мейірімжан қатысып, оқырмандарға Қарасақал Ерімбеттің өмірі мен ақындық өнер жолдары туралы айтты.Шараның мақсаты – шығыстық дидактика-философиялық мазмұндағы әдеби дәстүрді дамытып, ислам дінінің гуманистік- ағартушылық идеяларын қазақ поэзиясының поэтикалық өзегімен тұтастыра жырлаған, қазақтық дәстүрлі айтыс өнеріне өзіндік ерекшелігімен үлес қосқан, даналық мұхитына терең бойлаған Шайыр есімін ардақтауға, өмірі мен ақын шығармаларын таныстыра отырып, жас ұрпақты мейірімділікке, адалдыққа тәрбиелеу.Шара барысында жас оқырмандар Қарасақал Ерімбеттің « Нақыл сөз», « Әй, балам, саған насихат», «Мұратқа ешкім қолдан жеткен емес» атты өсиетті өлеңдерін оқып, «Дәстүрлі ән-жыр» домбыра үйірме оқушылары Қарасақал Ерімбеттің «Сыр сүлейлері» атты термесін орындады.

Қазақстан және Қызылорда облысының жаңалықтары