<a href="https://kyzylorda-news.kz/">Kyzylorda-news.kz.</a> 2009 жылдың шілде айында талантты журналист Руслан Бөлебай жол апатынан көз жұмды деген ақпарат елді дүр сілкіндірді. Небәрі 24 жасында елге танылып, халықтың сүйіктісіне айналған журналистің қазасын қазақ жұрты ауыр қабылдады. Ұлттық арнадағы «Таңшолпан» бағдарламасын жүргізген жас журналист көптің көңіліне жол таба білді. Ол тілшілік тіршіліктен бөлек, әншілікті де қатар алып жүрді. «Кең дала», «Сен болмасаң», «Жанарым», «Елес», «Мөлдір моншақтар», «Кешікпей келем деп ең», «Махаббатпен ойнама сен», «Іңкәрім-ай» әндерін мәнеріне келтіре орындап, көрермен ықыласына бөленді.26 маусым күні Шиелі ауданының 95 жылдығына орай «Арман» мәдениет үйінде журналист Р.Бөлебайды еске алуға байланысты «Өлең болып өрілген өмір» атты аудандық жас жазба ақындар арасында мүшәйра өтті. Дүбірлі додаға барлық ауылдан қолына қалам ұстап, сөз өнерін серік еткен жазба ақындар қатысты. Қатысушыларға ақын, ҚР мәдениет қайраткері, қазылар алқасының төрағасы Кенжебай Жүсіп, республикалық ақындар айтысы мен жыр мүшәйларының жеңімпазы Бекжан Ержігіт, «Арман» мәдениет үйінің директоры Нұргүл Шәлекеева қазылық етті. Мүшәйра екі кезеңнен өтті. Бірінші бөлім бойынша ақындар Руслан Бөлебайға арнау өлеңдерін оқыса, екінші кезеңде Шиелі ауданына арнаған жыр шумақтарымен бөлісті. Жыр бәйгесінде «Арман» мәдениет үйінің өнерпаздары ән шырқап, көрермен қошеметіне бөленді.&nbsp;Жарыс нәтижесі бойынша Досбол би ауылының қатысушысы Мақсат Қалиев бас жүлдені қанжығасына байлады. Ал жүлделі І орын Жиделі ауылынан келген Гүлназ Ержігітоваға бұйырды. Шиелі кентінен қатысқан Олжас Базарханова, Бала би ауылынан Нұрсәуле Тұрмағамбетова ІІ орын иеленді. Ал ІІІ орын алғабастық Еламан Кенжеш мен 1 мамыр ауылының тұрғыны Дамир Нұртай, Гүлім Болатова, Гүлайна Мерекеге бұйырды. &nbsp;Руслан Бөлебайдың жарқын да жайсаң бейнесі тек жақындарының ғана емес әрбір қазақтың жүрегінен орын алғаны анық. Екі мүшел ғана өмір сүрсе де әр сәтін мәнді де мағыналы өткізген, артына өшпестей із қалдырған танымал журналистің есімі ел есінде. Адам өмірі ұзақтығымен емес, мазмұндылығымен өлшенеді. Отты жанарымен талайлардың жүрегінен жол тапқан талантты ұлының есімін күллі қазақ елі мәңгі асқақтата бермек.

Шиеліде Руслан Бөлебайға арналған жас жазба ақындар сайысы өтті

<a href="https://kyzylorda-news.kz/">Kyzylorda-news.kz.</a> Отыз жылға таяу ғұмыр жасын қоғамдық тәртіп сақшылығына арнаған полиция подполковнигі Нағашыбай Нарымбетұлының есімі бұл саладағы қызметтестерінің есінде деуге толық негіз бар. Нағашыбайды мен елу бес жылдан бері жақсы танимын. Екеуміз 1968 жылдары Қазалы ауданындағы №34 кәсіптік-техникалық училищесінде екі жылдық курсында бірге оқыдық. Одан кейін ішкі істер қызметінде бірге жұмыс жасап достығымыз ныяғая түсті.Нарымбетұлы Нағашыбай 1952 жылдың 23-ші қарашасында Бозкөл ауылында қарапайым отбасында дүниеге келген. 1961 жылы сол ауылдағы мектептің 1-ші сыныбына оқуға барып, 4-ші сыныпты бітірген соң &nbsp;Жанқожа батыр ауылындағы мектепте оқуын жалғастырып орта мектепті тамамдаған.1971-1973 жыл аралығында кеңес армиясы қатарында болып борышын өтеп келіп жаңадан құрылған Өркендеу кеңшарына барып трактор рөліне отырады.Ол кезде Өркендеу кеңшары негізінен күріш егумен айналысатын шаруашылықтың бірі болатын. Күз айларында егін жинаудың қызған шағында ауылдағы қырман басының нағыз еңбек адамдарымен қатар техникалар тынымсыз күндіз түні уақытпен санаспай жұмыс істейтін. Қырманда ауданнан барған өкілдер де, кеңшар басшылары да, құқық қорғау қызметкерлері де жиі болатын.Аудандық ішкі істер бөлімінен сол ауылға өкіл болып барған милиция аға сержанты Әшірбек Қалмұратов өз ісіне тиянақты, дене бітімі де ержігітке сай, мінезі ұстамды, сабырлы Нағашыбайға көзі түсіп:<blockquote>«Сен бала нағыз милиция қызметіне лайық жігіт екенсің. Өзің жассың, әрі тиісті жұмысыңды беріліп атқарады екенсің. Әскери борышыңды да жақсы тәртіпшілікпен өтеп келгеніңді де қатарластарыңнан сұрастырып білдім. Қарапайым отбасында тәрбиеленген екенсің. Менімен бірге егін жинау науқаны аяқталған соң аудан орталығына жүр.Басшыларыма таныстырып сені әуелі қатардағы милиция қызметіне орналасуыңа көмектесейін. Кейін сырттай оқып қызмет сатысына өсемін десең, тіпті жақсы»,– дейді сақа сержант.</blockquote>«Әр нәрсенің сәті болады» дегендей, қысқасы Нағашыбай 1976 жылы қатардағы милиция қызметіне орналасады. Қызметтік форманы киімін енді киемін деп, әрі үш айлық білім жетілдіру курсына бармақшы болып жүргенде, яғни 1975 жылдың тамыз айының 13-мен 14-не қараған күні сол кездегі аудан орталығындағы Большевик көшесінің батыс жағындағы үлкен азық-түлік дүкенінің ағаш қоршауының ішінде бір адамның әйнек қиятын құралмен терезесінің әйнегін қиып жатқанын қоршаудың саңылауынан көшеде патрулде жүрген Нағашыбай байқап қалады. Көшенің қараңғы жағынан сығалап қараса, түсі суық шашы дудыраған қолына резина қолғап, үстіне спорт киімін киген жігіттің әлсін-әлсін тың-тыңдап алып, әйнекті өте сақтықпен қиып жатқанын анық көреді. Нағашыбай дүкенге жақын жердегі хоздвордағы қарауылдың будкісінен тездетіп кезекші милицияға жағдайды хабарлайды. Жеделдетіп жеткен үш милиция қызметкері мен Нағашыбай өзінің қиған терезесінен енді сыртқа &nbsp;шығып келе жатқан жерінен қылмыскерді &nbsp;дүкеннен алып шыққан. 970 сом ақшасымен ұстағанының көзі тірі куәсінің бірімін. Бұл оқиға қызметінде кездесетін жағдайлардың бірі ғана, әлі талай бұл сияқты жағдайға кездесуіңе тура келеді, бетпе-бет кездесесің деп Нағашыбайға басшылары ескерте отырып алғысын білдіреді.&nbsp;1976 жылдың күзінде Қостанай қаласындағы милицияның арнаулы үш айлық курсында оқып, қайтадан Қазалыдағы қызметіне кіріседі. Тағы бір қызықты қарасаңшы. Оқудан келіп түнгі патрульдік қызметін аяқтап түн &nbsp;ортасы ауа кенттің батыс жағындағы үйіне қайтып бара жатады. Үйіне жақын ПМК-ның асханасы болатын көшеде &nbsp;ешқандай адам да, автокөлік қозғалысы да жоқ. Асхананың қапталынан өтіп бара жатып, ішінде біреудің &nbsp;жүргенін көзі шалады. «Беймезгіл уақытта жүрген бұл кім?» деп тасада тұрып, бақылау жасайды. Милиция &nbsp;бөліміне хабарлауға жақын маңда байланыста жоқ. Өзінің бір-екі жігітке әлі жететініне әрі үстіндегі формасына сенген тәжірибесі әлі толыса қоймаған албырт жігіт емін-еркін бір кісі сиятын терезеден асхана ішіне секіріп түседі. Бұны күтпеген ұры да иығындағы қос ауызды аңшы мылтығымен бұны атады. Құдай оңдап оғы бетон қабырғаға тиіп бытыралар жан-жаққа шашырайды. Екінші рет атпақшы болған қылмыскердің &nbsp;қолына жармасқан Нағашыбайды &nbsp;атқан оғы төбедегі бетонға тиеді. Бірақ жан екпінмен барын салып мылтық ұстаған қолын қатты қайырғандықтан қылмыскердің қолы иығынан шығады. &nbsp;Қанатынан қайырылған құстай болып қолға түскен қылмыскер тиісті жазасын алды.&nbsp;1975 жылы Өркендеу ауылының сүйкімді &nbsp;сұлуы Гүлбарам Кішкенеқызымен бас қосты. Тағдыр Нағашыбай сынды баласының, келіндері мен немерелерінің қызығын көруді әкесі Нарымбетпен анасы Зағипаға жазбапты.&nbsp;1974 жылы әкесі, 1975 жылы анасы о дүниелік болып кете барды. 1978 жылы Қызылорданың іргесіндегі Тасбөгет кентіндегі бөлімшеге қызметін &nbsp;ауыстырды. Әрі сол жылы Алматы қаласындағы милицияның арнаулы мектебіне сырттай оқуға түсті. Өте асқан тәртіптілікпен, ізденімпаздықпен, көркем де сыпайы мінезбен жас сарбаздың атқарған еңбегі зая кетпеді. Жеті жыл қатарынан облыстық басқарманың (УВД-ның) озаттар тақтасында суреті ілулі тұрды. Өсті, өнді. Сырттай да болса оқуын бітіріп, офицерлік дәрежеге жетті.&nbsp;Қайтадан туған жері Қазалыға келіп қызметін жалғастырды. К.Маркс, Майдакөл, Ү.Түктібаев, Жаңақұрылыс төрт бірдей кеңшарға учаскелік уәкіл болып қызметін адал атқарды. Талай рет ауылдық жерлердегі мал ұрлықтарын әшкереледі. 1977 жылдан бастап Қармақшы аудандық ішкі істер бөлімінің тергеу саласы бойынша бастықтың орынбасары болып іскерлігімен көрініп облыстық басшылардың назарына ілікті.&nbsp;1999 жылдан бастап Қазалыға келіп тергеу бөлімінің бастығы лауазымына көтерілді. Екінің бірінің қолы жете бермейтін подполковник шенін алды. Министрдің қолынан «Еңбегі сіңген аймақтық уәкіл» марапатын да алды, «Мінсіз қызметі үшін» ІІІ-ІІ-І дәрежелі медалымен қатар «ҚР полициясының үздігі» төсбелгісімен де марапатталды. Облыстық, аудандық әкімдермен, арнаулы бөлім басшыларының мақтау қағаздары да жеткілікті.&nbsp;Бұл қызметтің әрқашанда қиыншылығы мен қызығы қатар жүретіні белгілі ғой. Өміріңе қауіп төнетін кездері көптеп кездеседі. Соның бірін Нағашыбай әлі күнге дейін айтып мені бір Алла сақтады ғой деп отырады.&nbsp;1980 жылдың жаз айында түн ортасы ауа Тасбөгет кентіндегі ресторанның көше жақ бетімен үйіне келе жатады. Ресторан ішінде терезеден біреудің жүргенін байқайды. Әуелі &nbsp;ресторанның қызметкерлері не күзетшілері ма деп терезеден қарағанда ол адам қапталдағы терезеден секіріп түседі де &nbsp;қараңғыға қарай қашады. Бірақ оның қолында ет шабатын шағын балта барын да қырағы сақшы байқап үлгіреді. Көшеде оны қуып келе жатып бір қуысқа қарай бұрылып қашқанын көреді. Бұл да қуысқа ізінен кірейін десе балтасымен ұрады ма деп қауіптенеді. &nbsp;Әрі-бері шыдамаған Нағашыбай қуыстың тұсынан өте бергенде зу етіп лақтырылған өткір балта желке тұсымнан өте шықты дейді. Қаша жөнелген қылмыскерді қуа бердім, не дегенмен аяғым ұзын, әрі жаспын, әрі оның балтасының лақтырған жерінде қалғанын білген соң барымды салдым. Бір көшенің тасасында &nbsp;«Москвич» машинасы тұр екен. &nbsp;Машинасына жетіп есігін аша бергенде мен де жетіп қолын артына қайырып белімдегі &nbsp;белдігіммен байладым. «Қайда жүрсем де асхана мен дүкенге түскендердің үстінен түсумен болдым ғой», – деп Нағашыбай &nbsp;өткен күндерін еске алып айтып отырады.&nbsp;Нағашыбай 2003 жылы абыроймен зейнеткерлікке полполковник шенімен шықты. Таза 27 жыл қызмет еткенде еңбек кітапшасында ешқандай жазаланғаны жазылмаған. Марапаттары ғана тізілген. Осыншама демалысы аз, міндеті көп қиыншылығы жетіп артылатын қызметте жүріп, бұл әріптесіміз ұрпақ тәрбиесінде &nbsp;дұрыс &nbsp;жолға қоя білген. 8 бірдей ұл, қыздың әкесі. 14 немере мен 5 шөберенің атасы. Ұл қыздары өсіп жетіліп әке тәрбиесінен нәр алып тәртіптіліктерімен ерекшеленгендердің қатарында. Көбісі Алматы қаласының тұрғындары. Бір қызы &nbsp;мед академияны бітірген Астанада дәрігер. Нұрсұлтан есімді баласы Қонаев атындағы заң академиясын бітіріп, әкесінің ізін қумақшы. Ең кенже баласы Қожахмет Алматыдағы Қазақ-Британ техникалық университетінің үшінші курс студенті. Ал қалған ұл-қыздары да өмірден өз орындарын таба білгендер қатарында.Нағашыбай қазір медиация &nbsp;саласында 2018 жылдан бері медиатор. Әрі аудандық полиция бөлімі жанындағы ардагерлер кеңесінің төрағасы. Бұл салада да атқарған істері жетерлік. Кеңес құрамында 96 ардагер есепте тұрып жатыр. Пагонды қариялардың төрағасы Нағашыбай Нарымбет ұлы осындай тәртіп сақшыларының суарылған семсері деуге лайықты азамат.

Еңбегімен еленген ер

<a href="https://kyzylorda-news.kz/">Kyzylorda-news.kz.</a> Қазалы аудандық полиция бөлімінің Жергілікті полиция қызметі бөлімшесінің учаскелік полиция инспекторы полиция подполковнигі Бердібай Ұлықбек Өмірбекұлы 1974 жылдың 23 тамызында Қызылорда облысы, Қазалы ауданында дүниеге келген.Ішкі істер органдарында жиырма бес жылға жуық қызмет атқарып келеді. Ол қызмет барысында өзін үлгілі, жауапты қызметкер ретінде көрсете білді. Ұжымда сыйлы, әріптестері арасында беделді қызметкердің ізін жалғап, ұлы да құқық қорғау саласында еңбек етуді таңдаған.&nbsp;<blockquote>«Әке көрген оқ жонар, ат тұяғын тай басар» деген қазақтың нақыл сөзіндей полиция подполковнигі Бердібай Ұлықбектің баласы полиция лейтенанты Ұлықбекұлы Бекжан қазіргі таңда Қазалы ауданы полиция бөлімінде Жергілікті полиция қызметі бөлімшесінің әйелдерді зорлық-зомбылықтан қорғау тобының инспекторы лауазымында қызмет атқаруда.</blockquote>«Мен өз жұмысыммен мақтанамын. Осы салаға келуімді әкеммен байланыстыра аламын. Бала күнімнен әкемнің формасына қарап, қызығушы едім. Мектеп бітірген соң көп ойланбастан бала арманымды жүзеге асыруға бел будым. Орлық-зомбылықсыз қоғамды қалыптастыру әрбіріміз үшін парыз. Сондықтан барша адамзатты мейірімділікке, адамгершілікке шақырамын, – дейді жас маман Бекжан Ұлықбекұлы.Бөлім қызметкерлерң Полиция династиясы отбасына 23 маусым – Қазақстан Полициясы күні мерекесімен құттықтай отырып, отбасыларына аманшылық, бақ пен дәулет, құт-береке тілейді.

Аудандағы полицейлер династиясы

<a href="https://kyzylorda-news.kz/">Kyzylorda-news.kz.</a> Бүгін облыс әкімі Нұрлыбек Нәлібаевтың төрағалығымен өткен терроризмге қарсы облыстық комиссия отырысында терроризм мен экстремизмнің алдын алу мәселелері талқыланды.Жиында облыстық дін істері басқармасының басшысы Бауыржан Қамзаев осал нысаналы топтарда, оның ішінде, NEET санатындағы және жұмыссыз жастар арасында терроризм мен экстремизмнің алдын алуды жетілдіру, мәселелер мен оларды шешу жолдарын баяндады.Мәжілісте Қызылорда қаласы және Шиелі, Жаңақорған аудандарының әкімдері аудандық терроризмге қарсы комиссиялар мен Қызылорда қалалық жұмыс тобының қызметі туралы баяндама жасады. Сонымен бірге республикалық Терроризмге қарсы орталық пен облыстық терроризмге қарсы комиссияның хаттамалық шешімдерінің облыс аумағында жүзеге асырылуын таныстырды.<figure class="image"><img src="https://knadmin.beoblood.kz/uploads/347271272_567062852281630_7568760208762501510_n_c37849c1c8.jpg" alt="347271272_567062852281630_7568760208762501510_n.jpg"></figure>

Терроризмге қарсы облыстық комиссияның отырысы өтті

<a href="https://kyzylorda-news.kz/">Kyzylorda-news.kz.</a> Қазалы аудандық Орталық «Жанқожа батыр» мешітінің «Әйелдер-қыздар» секторы, Әжелер мектебінің ұйымдастыруымен «Ананың ақыл-кеңесі» атты рухани шара өтті.Шара барысында аналар өмір тәжірибесі мен отбасылық, салт-дәстүр құндылықтарын ұштастыра сөз қозғады. Аналық ақ лебіздерімен қатар мейірімді де өнегелі, ғибратты ақыл-кеңестері айтылды. Ана қай жерде де Ана, Ол – Әже, Жар, отбасының бірлігін ойлайтын, құлшылығы мен тіршілігін бірге алып жүретін, жан-жағына шуақ шашатын мейірімді жан екенін көрсете білді. Сұхбат кезінде әрбір ана өзінің өмірлік тәжірбиесі, ене мен келін арасындағы сыйластықты, ер адамға көрсетілетін құрмет туралы өзекті мәселелерді ортаға салды.&nbsp;<blockquote>«Көпті көрген аналарымыз аман болғай. Дәстүрге сай үлгілі сөздері, жастарға айтқан өсиеттері ұрпақтарға жалғассын деген ізгі ниетпен бас қосу жиыны қорытыланды. Алла Тағала елімізге амандық, жанұямызға бақыт, бірлік бергей. Ел іргесі аман болғай. Бүгінгі тағылымды кештен мол рухани байлық алдым. Өмір жолы өнегег толы осындай қайсар аналардың жолын кейінгі толқынға берсін. Біраз кеңеске қанығып, ақыл тыңдадық. Бала үшін қай уақытта да жанын шүберекке түйіп, тақым қысып отырар аяулы жандардың қабағын кір, жүзін мұң шалмасын», – деген тіле тілеп тарқасты кешке жиналған қауым.</blockquote>

Қазалыда «Ананың ақыл-кеңесі» атты рухани кеш өтті

<a href="https://kyzylorda-news.kz/">Kyzylorda-news.kz.</a> 25 маусымда өткен Жаңақорған ауданының Сүттіқұдық және Қаратөбе ауылдық округі әкімдерінің сайлауы заң талаптарына сай ұйымдастырылып, қорытындыланды.Құрылған сайлау округтері бойынша сайлаушылар тізіміне барлығы 2155 адам енгізілген, оның ішінде Сүттіқұдық сайлау округінде 1185 адам, Қаратөбе сайлау округінде 970 адам.Дауыс беруге қатысқан сайлаушылар саны 1560 адам, оның ішінде Cүттіқұдық сайлау округінде 831 адам, Қаратөбе сайлау округінде 730 адам.Есептен шығару куәліктері бойынша дауыс бергендер жоқ, дауыс беру жайынан тыс жерде дауыс бергендер – 31 адам, оның ішінде Сүттіқұдық сайлау округінде - 24, Қаратөбе сайлау округінде – 7.Ауылдық округ әкімінің кандидаттығына 7 адам ұсынылып, 1-і талапқа сәйкес еместігі бойынша, 1-і өз өтініші негізінде кандидаттықтан алынды, 5-і сайлау бюллетеньдеріне енгізілді, оның ішінде Сүттіқұдық сайлау округі бойынша – 2, Қаратөбе сайлау округі бойынша – 3.Дауыс беру қорытындысымен Сүттіқұдық ауылдық округінің әкімі болып Абуов Икрам Азизович сайланды.1983 жылы туған, ұлты қазақ, Жаңақорған ауданы, Жайылма ауылдық округі аппаратының бас маманы, Сүттіқұдық ауылдық округінде тұрады. Өзі-өзін ұсынған.- Қаратөбе сайлау округінде дауыс беру қорытындысымен ауылдық округ әкімі болып Манамбаев Женис Абаевич сайланды.1980 жылы туған, ұлты қазақ, Жаңақорған ауданы, Қаратөбе ауылдық округіндегі №229 мектеп директоры. Қаратөбе ауылдық округінде тұрады. Өзі-өзін ұсынған.

Жаңақорған ауданы: Қос ауылдың әкімі сайланды 

<a href="https://kyzylorda-news.kz/">Kyzylorda-news.kz.</a>&nbsp; Түрлі салада еңбек етіп, ардагер атанған азаматтардың ішінде редакция ардагерлерінің орны бөлек. Ұзақ жылдар бойы жергілікті газетте жемісті еңбек етіп, ардагерлік кезеңге абы-роймен жеткен олардың еңбегі, атқарған қызметі, жетістігі бүгінде тарих қойнауына еніп, кейінгі буынға үлгі-өнеге болып сақталып қалды. Мұның бәрі біз үшін, біздің аудандық газеттің тағылымды тарихы үшін қай кезде де маңызды.Кәсіби мерекемізге орай Сырдария аудандық "Тіршілік тынысы" газетінің бас редакторы Ақтөре Ибрагимұлының ұсынысымен қолға қалам алып, редакция жанындағы бастауыш ардагер ұйымының төрағасы ретінде өткен-кеткенді ой елегінен өткізуді жөн санадым. Бұл өте жауапты жұмыс екенін білемін. Өйткені, шағын ғана мақалада бәрін түгел қамту мүмкін емес. Бірақ, менің мақаламда аты аталса да, аталмаса да алдыңғы буын ардагерлердің өлшеусіз еңбегіне біз әркез бас иеміз. Құрметпен қарап, қадір тұтамыз. Қолымыздан келсе, ардагерлердің есімі мен еңбегін төрге оздырып, биікке жетелейміз. Ең бастысы, ардагерлерде деген біздің көңіліміз, пейіліміз таза және құрметіміз де шексіз болар еді.Екі жыл бұрын «Сыр журналистикасының тарихы» атты бес томдық кітап жарыққа шықты. Сол кітапта бәрі кеңінен жазылып, өңір журналистикасымен қатар аудандағы бұқаралық ақпарат құралының тарихы да қайта зерделенді. Осы ретте, аудандық газеттің ең алғашқы атауы «Сталин жолы» болғанын және оның сонау 1939 жылдың 26 наурызынан бастап 1956 жылға дейін осы атаумен оқырманға таратылғанын айта кетейін. Одан кейін 1956-1963 жылдары газет «Еңбек майданы» болса, екі ауданның бірігуіне байланысты 1963-1967 жылдары «Сырдария» деп аталған. 1967 жылы аудандар екіге бөлініп, басылым атауы «Еңбек туы» болып өзгертілді. Төл газетіміз 1990 жылдың 2 қарашасында Қазақ ССР Министрлер Кеңесінің Қазақ ССР Баспасөз жөніндегі мемлекеттік комитетінде тіркелді. Еліміз Тәуелсіздік алғаннан кейін 1992 жылы 30 шілдесінде басылым атауы «Тереңөзек тынысы» деген атпен ҚР Бұқаралық ақпарат министрлігінде тіркелді. Ал 1997 жылдан бері «Тіршілік тынысы» атауымен шығып келетіні жасырын емес.Мен бүгінгі мақаламда газет редакторларының есімін атап өтуді дұрыс деп санаймын. Олардың қатарында ең алғашқы редактор Серғазы Абдуллаевтан бастап Баймахан Уызбаев, Әбілда Құрманаев, Смайыл Ақжігітов, Шілдебай Оңғалбаев, Айтбай Қойшыбаев, Жұмағали Елеуов, Б.Өтепов, Болатбек Аманбаев, Смағұл Маханбетов, Ізхан Досмағамбетов, Абызбай Маханбетов, Қуаныш Татанов, Тынышбек Дайрабай, Келдібай Уәйісов, Тұрғанбай Болғанбаев, Асқар Кіребаев, Нұрлыбек Ғизатов пен Сәуле Ерімбеттің есімін ерекше атауға болады. Ал 2019 жылдан бастап редакторлық қызметті атқарып келе жатқан Ақтөре Ибрагимұлы аудандық газеттің жиырмасыншы бас редакторы екен. 84 жылдық тарихында жиырма редактор басшылық қызмет атқарған газетте адал еңбекті ту еткен талай азаматтар да нәтижелі еңбек етті. Олардың ішінде 1939-1946 жылдары Т.Аралбаев, С.Қожаниязов, С.Дәрібаев, М.Нұрманов, Б.Әденов, Сайлығараев, Қ.Оспанов, Үмбетов, Н.Төртбаев, Е.Дәуітбаев, Қ.Қоянбаев, Д.Жұқабаев есімді тұрақты авторлардың есімі құрметпен аталады. Одан бөлек әрі ақын, әрі журналист болған М.Сақтаповтың еңбегі ерекше. Ол кісі біздің ортақ ұстазымыз болып, журналистика саласында өзіндік дара қолтаңбасын қалдырды. Сол еңбегі еленіп «Сырдария ауданының Құрметті азаматы» атанды. 2020 жылы Қазақстанның құрметті журналисі атағын иеленді. Соғыс жылдарынан кейін газет жұмысының ілгері басуына Қ.Ысмайылов, Б.Шертаев, А.Салыбаев, Е.Жүсіповтер де атсалысқан. Әсіресе Сейтмұрат Ембергеновтің рухани-танымдық еңбектері оқыр¬ман қауым тарапынан жоғары бағаланды.Газет журналистерімен қатар бас¬пахана директорлары да мерзімді басылымның халыққа тез жетуіне айрықша үлес қосты. Біз бүгінде аудандағы редакция мен баспахана тарихын бөлек қарастыра алмаймыз. Қос мекеме тоңның ішкі бауындай бірлесе, бір мүдде жолында еңбек етті. Аудандық баспахана директоры болған В.Те, У.Аманбаев, Б.Жұмсабековтердің еңбегі зор. Әсіресе Сергей Тоқсанбаевтың есімі ерекше аталады. Сергей ағамыз нағыз тәртіптің адамы ретінде есте қалды және әлі күнге сол тәртіп пен тазалық ол кісінің басты ұстанымы. Ол кісі газет бір минутқа да кешікпеуі керек деген ұстанымды ұстанды. Бәрінен соны талап етіп, жұмысқа ерекше жауапкершілікпен қарады. Сол жауапкершілік, жаңашылдық оны биікке шығарды. Ал баспахана қызметкерлерінің ішінде Қ.Төлегенов, Б.Әбдіхалықов, Ш.Әбдіхалықова, Ә.Әбдірахманова, Ш.Беркінбаева, Қ.Балшықбаева, Ж.Тасымбаева, Б.Бай-жүнісова, Қ.Асықбаева, Ж.Қожағұлова, Қ.Жаншыбаева, Г.Ысқақова, А.Манасова, Р.Досмағанбетова, Р.Есмағанбетова, К.Жұмабаева, Л.Өскенбаева, А.Болғанбаева, О.Күзембаева мен А.Ысқақовалар, Б.Таңатаров, С.Еркінбаева, А.Алданова, М.Өтепбергенова, Э.Баймұханова, Б.Қорғанбекқызылар ұзақ жылдар ортақ абырой жолында тер төкті. Бұл кісілердің көбі бүгінде дүниеден озса, қалғандары ардагерлік кезеңге абыроймен жетіп, кейбірі түрлі салада еңбек етіп, ұрпақтарының қызығын көруде.Айта кету керек, тырнақалды туындылары, ең алғашқы материалдары аудандық газетте жарияланған есімі елге белгілі қаламгерлер көп. Олардың көшін Қалтай Мұхамеджанов, Асқар Тоқмағамбетов, Әбілмәжін Жұмабаев, Әбіраш Жәмішов, Төлепберген Тобағабылов, Сейфолла Оспанов, Нұрхан Жанаев, Қанапия Дәрібаев, Қалмахан Нұрғалиев, Қайырбек Асанов, Жадыра Дәрібаева, Бексейіт Шайлановтар бастайды. Олардың бәрі аудандық газетті «Шыңдалу мектебі» деп атаған. Сонымен қатар 1970-1980 жылдары Алтынбай Дәуренбеков, Сәуле Ерімбет, Мейрамбек Шілдебаев, Дәметкүл Құмақбайлардың есімі мен еңбегі баспасөз арқылы халыққа танылды. Олардың әрбір туындысын халық асыға күтті, сүйсіне оқыды. Газет абыройы мен беделін көтеру жолында тынымсыз еңбек еткен Шолпан Оразәулеті мен Серік Әлімбетовтің жылт еткен жаңалықты қалт жібермейтін мақала-лары да көп оқылымға ие болды. Радиохабарын ұйымдастырушы Кеңес Әбуов пен корректор, әдеби қызметкер болған Мұса Келдібаевтар да осы жылдары еңбек етті. Жалпы газеттің түлектері ауданда, облыста жоғары қызметтерді атқарды. Бүгінде Мұсекең аудандық ардагерлер кеңесін басқаруда. Біздің газеттен түлеп-ұшқан азаматтар ауданда бөлім, мекеме басқарып жүр. Олар – біздің ортақ мақтанышымыз.Газетте еңбек еткен фототілшілердің өзі бір төбе. Оларға деген құрмет ешқашан толастамайды. Әсіресе Владимир Ягуниннің есімі сырдариялық жұртшылықтың жадында деп ойлаймын. Фототілші Ибадулла Пірімбетовтің де суреттері газет мазмұнын байытты. Ерғали Әбдіхалықовтың түсірген суреттері де редакцияның алтын қорында сақтаулы. Ол суреттер аудан туралы жазылған кітаптарға да енді. Бірер жыл бұрын Ерекеңнің ұрпақтары үйдегі суреттерін, фотоаппаратын редакцияға өткізді. Құнды жәдігерлер қазір редакциядағы ардагерлер бөлмесінде сақтаулы тұр. Келген қонақтарға көрсетіп, таныстырып, суреттер шежіресін үлгі етеміз.2015 жылы А.Тоқмағамбетовтің ғасырлық мерейтойына орай газет форматы ауысып, бірінші рет А2 форматымен жарыққа шықты. Бұл үлкен жаңалық болды. Кейін бұл үрдіс 2012 жылы сол кездегі аудан әкімі Ғ.Әбілтайдың қолдауымен қолға алынып, газет біржолата А2 форматымен таратылатын болды. Алғашында газеттің бетін мақалалармен толтыру оңайға соқпады. Бірақ бұл жаңалыққа тілшілер тез төселіп, жұмысты бір жолға қойды. Қазіргі таңда «Сыр медиа» серіктестігіне қарайтын басылым аптасына екі рет таратылып келеді. Тағы бір жаңалық газетке Арал мен Жаңақорған аралығындағы барлық ауданның тұрғындары жазыла алады. Биылдан бастап ақпараттық агенттік ретінде де жұмыс істеуде. Яғни, газеттің өз сайты бар, ол сайт тәулік бойы ақпарат таратуда.Соңғы жылдары газеттен зейнет демалысына шыққан қаламгерлердің ішінде Шаһарбек Нұрсейітов екеуміз ардагерлер қатарын толықтырдық. Мен редакция жанындағы бастауыш ардагерлер ұйымының төрағасы ретінде өзім ұзақ жылдар еңбек еткен ұжыммен тығыз байланыстамын. Редакцияда жеке жұмыс бөлмем бар. Ал, Шаһарбек – халықаралық «Қазақ тілі» қоғамының аудандық филиалының төрағасы. Екеуміз де кейінгі буын жастарға жанашыр болып, бағыт-бағдар беріп, қолдап келеміз. Мерекелік даталарда редактормен бірге редакция ардагерлерінің үйіне барып, сый-сыяпатымызды табыстаймыз. Бұл – біздің ортақ міндетіміз.Мен кәсіби мереке қарсаңында ардагерлер мен әріптестерімнің есімін жаңғыртып мақала жаздым. Біраздан бері қолға қалам алған соң өткен күндер көңілімде, жүрегімде жаңғырды. Бізге бәрі де ыстық, бәрі де аяулы. Ардагерлерге құрметіміз қай кезде де ерекше. Мерекеде редакцияның, баспахананың ардагерлеріне зор денсаулық, абырой-амандық тілеймін. Ал өмірден өтіп кеткен әріптестеріміздің жатқан жері жайлы, топырағы торқа болғай!&nbsp;

Сырдариялық журналистердің қарашаңырағы

<a href="https://kyzylorda-news.kz/">Kyzylorda-news.kz.</a> Қызылордадағы Абай ауылдық кітапханасының тамыры тереңге жайылған. Оны барынша тереңдетіп, нәрлендіріп, құнарландырып отыратын кітапханашысы Айгүл Жаңбыршиева. Ауылда кітапханашы Айгүлді еңбектеген сәбиден еңкейген қарияға дейін жақсы таниды. Сыйлайды, құрметтейді. Алдына келген оқырманының іздегенін лезде тауып беруге дағдыланған.&nbsp;Кітапхана мен Айгүл егіз ұғым. Екеуі біте қайнасып кеткен. Қашан барсаңыз да, Айгүл Жәмиқызының қолынан кітап түспейді. Қашан кірсеңіз де, оның ұйымдастыруымен өтіп жататын іс-шараның үстінен түсесіз. Еңбек адамының еңбекқорлығынан айналасындағы шәкірттер де кітап оқуға бет бұрғалы қашааан!..&nbsp;Кейіпкерім Айгүл Жәмиқызы туралы осындай ойлар орала бергені сол, Абай кітапханасына да табан тіреппін. Айгүл ханым мені жылы шыраймен қарсы алды. Кіргеннен кітап пен газеттің иісі келді. Екеуміз кітап сөрелерін айнала жүріп әңгіме-дүкен құрдық.&nbsp;Айгүл Жаңбыршиева 1979 жылы 12 &nbsp;қаңтарда Қазалы ауданы, Өркендеу ауылында туып, өсіпті. 2000 жылдың ақпан айынан осы кітапханаға жұмысқа қабылданады. 2001 жылы Ақтөбе гуманитарлық колледжінің «Кітапхана ісі» мамандығын бітіреді. 2013 жылы Болашақ университетінің «Кітапхана ісі» мамандығын аяқтайды. Ә.Тәжібаев атындағы облыстық әмбебап ғылыми кітапханасының, аудандық мәдениет және тілдерді дамыту бөлімінің, аудан әкімінің «Алғыс хатымен» марапатталған.– Бұл кітапханада 23 жылдан бері табан аудармай істеп келе жатыр екенсіз. Сізге дейін бұл жерде кімдер тер төккенін білесіз бе?&nbsp;– Абай ауылдық кітапханасының іргетасы алғаш 1957 жылы қаланды. Сол жылы кітапханашы Смағұл Қонарбаев 450 дана кітаппен халыққа рухани-мәдени қызмет көрсетуді бастаған. Алғашқы қамтылған оқырмандар саны 40 болды. Міне, осылайша дүниеге келген кітапхананың ұланғайыр игілікті істерінің басында ең алғаш С.Қонарбаев тұрды.&nbsp;1957-58 жылдары Смағұл Қонарбаев, 1959 жылы Гүлшат Сереева, 1960-68 жылдары Қаламқас, 1969 жылы Зейнегүл Ермауытова, Мәрияш Әжмамбетова, 1970-73 жылдары Нағипа Жұмаева, 1970-2000 жылдары Бибігүл Көптілеуова 30 жылдай халыққа қызмет жасап, кітапхана шаңырағынан зейнеткерлікке шыққан.&nbsp;Бүгінгі таңда кітапханада кітап қоры 22 654 дана, 623 тұрақты оқырманы бар. Осы жылдар ішінде оқырман мен кітапхана арасындағы байланыс жақсарып, кітапхана қабырғасында өткізілетін мәдени-көпшілік жұмыстардың түрі көбейіп, халыққа игілікті қызмет көрсетілуде.– Жақсы екен. Еліміздің іргелі кітапханалары модернизациядан өткізіліп, адам танымастай болып өзгергенін көріп жүрміз. Ауылдық кітапханаларда нендей жаңалықтар бар?– Биыл Қазалы аудандық орталықтандырылған кітапхананың қолдауымен «Болашаққа кітаппен барар жол», « Кітап – оқырманын іздейді», «Жыр жауһары», «Оқуға құштар отбасы» жобасы аясында ауылдық кітапханаларда іс-шаралар өткізілуде.– Белсенді оқырмандарыңыз бар ма?– Абай атындағы №90мектептің &nbsp;оқушылары, мұғалімдері кітапханамен үздіксіз байланысты. Сосын ардагер оқырмандарымыз да белсенділік танытудан шаршамайды.Осылайша біз сұхбатымызды жалғастырдық. Еңбек етуден шаршамайтын, айлығы аз болса да, таудай тірліктер жасап жүрген ауыл кітапханашысы тек кітапты насихаттап қана қоймайды. Оқырмандарына мәдени-көпшілік, рухани іс-шараларды, мерейтойларды ұйымдастырумен де шапқылайды. Өте ізденімпаз, барлық іс-шараға мұқият дайындалады. Ол үшін күн демей, түн демей әдебиет ақтарады. Бір кітапханашы өзі сценарий жазады, іс-шара, мерейтой өткізеді, кітап насихаттайды, жылдық жоспары тағы бар. Осындай іс-шаралар бір кітапханашыға ауырлық қылады, негізі. Жанында тағы бір кітапханашы не оператор болса жарар еді.&nbsp;Ауылдықтардың бәрі Айгүл апайды сол көпшілдігі, сол қарапайымдылығы, ашықтығы, өнері үшін риясыз құрметтейді. Өнері демекші, Айгүл Жәмиқызы ұлттық билерді жақсы билейтінін айта кетейік.&nbsp;Ақындардан Жетіскен Мәкеналиев, Мұқағали Мақатаев, жазушылардан Әлмамбет Әлішев, Дулат Исабеков сияқты қаламгерлерді сүйіп оқитын кітапханашы кейіпкеріміздің келбеті осындай.&nbsp;Белгілі жазушы, қоғам қайраткері Ә.Кекілбаев «Мен кітапханаларды білім, адамгершілік, парасат ордасы деп білемін, ал кітапханашыларды сол ешқашан жоғалмауға тиісті асыл қазынаның сақшылары деп санаймын» дейді. Иә, қызығы мен қиындығы мол кітапханашы мамандығы туралы бір-ақ ауыз сөзбен жеткізу мүмкін емес, жұрт көп біле бермейтін, көп елене бермейтін, бірақ дүйім оқырманның кітап жайлы бағыт-бағдар алуы үшін жан-тәнімен беріліп қызмет атқарып жатқан кітапханашылардың еңбегі ұшан-теңіз. Қасиетті қазынамызды көздің қарашығындай сақтап, насихаттап, ел игілігіне жаратып жүрген кітапханашылар – ең қажет, абыройлы, қастерлі, киелі мамандық иелері. Кітапханашылар білім, ғылым, өнер мен мәдениеттің дамуы¬на өлшеусіз үлес қосып, өркениетті елге айналуымыздың негізін қалауда.

Асыл қазынаның сақшысы

<a href="https://kyzylorda-news.kz/">Kyzylorda-news.kz.</a> Қызылорда облысының жұмыспен қамтуды үйлестіру және әлеуметтік бағдарламалар басқармасының мемлекеттік әлеуметтік тапсырысы негізінде мүмкіндігі шектеулі жандар үшін жаңарған Түркістанға саяхат ұйымдастырылды.Іс-шараның мақсаты мүгедектігі бар адамдар мен мүгедектігі бар балаларға әлеуметтік көмек көрсетуден бөлек оларды түрлі шараларға қатыстырып, қоғамдық ортаға бейімдеу, белсенділіктерін арттыру арқылы позитивті ойлау дағдыларын дамыту, спорттық, мәдени, қоғамдық іс-шараларға қатыстыру.Саяхатқа 1-топ 20 мүгедектігі бар жандарды және олардың көмекшілері қатысты. Оған барған жандар Қожа Ахмет Яссауи кесенесіне барып зиярат етіп, түрленіп, түлеген Түркістан қаласының бүгінгі келбетін тамашалап, саяхаттан рухани серпіліс алды.&nbsp;&nbsp;&nbsp;&nbsp;&nbsp;&nbsp;

Мүмкіндігі шектеулі жандарға Түркістан қаласына саяхат ұйымдастырылды

<a href="https://kyzylorda-news.kz/">Kyzylorda-news.kz.</a> Қазалы аудандық Орталық «Жанқожа батыр» мешіті Қазалы ауданының әкімдігімен бірлесе Құрбан айт мерекесіне орай аудан мешіттерінің жамағаты арасында «Бірлігі жарасқан жамағат» атты кіші футболдан ашық турнирін өткізді.Футбол турниріне жеті команда қатысты. Аталған сайыстың басты мақсаты – жамағат арасындағы бірлікті, бауырмашылдықты, салауатты өмір салтын ұстануды насихаттау, жалпы құндылықтарды қалыптастыру. Бір-бірімен жарысқа түскен дүбірлі додада жүйріктердің тізімі төмендегідей: Бірінші орынды «Әли Муса-2» командасы алды (100 000 теңге). Екінші орын «Әли Муса-1» командасына (70 000 теңге), үшінші орын «Жанқожа батыр» командасына (50 000 теңге) бұйырды.&nbsp;Жолмырзаев Нұрқасым «Үздік қақпашы», Ерғалиев Дәуренбек «Үздік қорғаушы», Иман Мейірімжан «Үздік шабуылшы» номинациясымен марапатталды. Қалған қатысушы төрт командаға да 20 000 теңгеден ынталандыру сыйлығы берілді.<blockquote>«Осындай шараларды үнемі ұйымдастыру жамағат бірлігін арттыруға септігін тигізеді. Спорт – денсаулық кепілі. Әр адам жүйелі түрде спортпен шұғылданып тұрса нұр үстіне нұр болары сөзсіз. Игі іске бастамашы болған мешіт қызметкерлеріне алғыс білдіреміз» – дейді турнир қатысушылары.&nbsp;</blockquote>

Қазалыда шағын футболдан турнирі өтті

<a href="https://kyzylorda-news.kz/">Kyzylorda-news.kz.</a> Достық үйінің мәжіліс залында Қызылорда облыстық Қазақстан халқы ассамблеясы жанындағы «Ассамблея жастар» ұйымының белсенділері Орал өңірінен келген қонақтар және Қызылорда облыстық полиция департаменті бастығының орынбасары Әміржан Өтегеновпен кездесті.&nbsp;Кездесуге «Ассамблея жастар» белсенділері, оның ішінде №198 мектеп оқушылары мен «Орда» жоғары колледжінің студенттері қатысты.«Қоғамдық келісім» КММ директоры Бақытжан Камалов өңірлік ассамблеяның қоғамдағы рөлі, келісім мен бірлікті сақтау бағытында жүргізіп жатқан жұмыстарына кеңінен тоқталып өтті. Бұдан әрі сөз Әміржан Өтегеновке берілді. Ол жастар арасындағы құқық бұзушылықтармен күрес және оның алдын алу тәсілдеріне қатысты қазіргі жағдай туралы баяндады. Бұрынғы және қазіргі жастардың мүдделері әртүрлі деп санайды. Өкінішке орай, бізде бар нәрсенің рұқсат етілуі мен қол жетімділігі бүгінгі ұрпаққа кері әсер етеді. Дәлірек айтқанда, синтетикалық есірткіні жиі және кеңінен сату, букмекерлік кеңселердегі қызметтердің кең спектрі, жас ересектер арасындағы жаппай бейресми қозғалыстар және олар айналысатын бұзақылық, тұрмыстық зорлық-зомбылық, интернет-алаяқтық сияқты қоғамдық мәселелер өршіп тұр.Орал қаласы Қазақстан халқы ассамблеясы жанындағы «Қазақ-Вайнах» клубының төрағасы Талғат Чудобаев та өз сөзінде көптеген алаяқтық фактілерді атап өтті. Ол, әсіресе, жастар арасында әлеуметтік желілердің қолжетімділігін ескерсек, интернет-алаяқтық – бұл оңай қулық екенін алға тартты.Шара соңында Қызылорда облысы «Ассамблея жастар» ұйымының жетекшісі Елизавета Есмаева өңірлік ұйым белсенділерін таныстырып, облыстың және жалпы қоғамның дамуына жастардың қосқан үлесі туралы қысқаша айтып өтті.

Жастар мәселесі талқыланды

<a href="https://kyzylorda-news.kz/">Kyzylorda-news.kz.</a> 1997 жылы БҰҰ Бас Ассамблеясы 26 маусымды азаптау құрбандарын қолдау үшін БҰҰ-ның халықаралық күні деп жариялады. &nbsp;Бұл туралы Бас прокуратураның баспасөз қызметі хабарлады.&nbsp;Қазақстан 1998 жылы азаптауға қарсы конвенцияны ратификациялады және бұл құбылысты жоюға ұмтылуда.Конвенция ережелерін орындау Қазақстандағы құқықтық қорғау институттарын одан әрі дамыту жолында түбегейлі маңызды бағдар болып табылады.Мемлекет басшысы «Әділетті Қазақстан: бәріміз және әрқайсымыз үшін. Қазір және әрдайым» атты бағдарламасында азаматтардың құқықтарын қорғауды ерекше атап өтті. Азаптаудың алдын алу шараларын және адамның қадір-қасиетін төмендететін және азаматтардың денсаулығына зиян келтіретін тергеудің басқа да рұқсат етілмеген әдістерін қолдануға баса назар аударды.Президент белгілеген курсты іске асыру мақсатында азаптауға «нөлдік төзімділікті» қамтамасыз етуге бағытталған қылмыстық-құқықтық салада шаралар кешені қабылданды.Ағымдағы жылдың 1 қаңтарынан бастап азаптау істері бойынша тергеу прокуратура органдарына бекітілді.Еліміздің Конституциясынан «өлім жазасы» ұғымы алынып тасталды.Қылмыстық кодекстің 146-бабына қатыгез, адамгершілікке жатпайтын және ар-намысты қорлайтын қарым-қатынас үшін жауапкершілікті көздейтін толықтыру енгізілді.Азаптау және қатыгездік субъектілерінің тізіміне жаңа субъект қосылды-бұл «ресми қызмет атқаратын тұлға».Азаптаулар жасағаны үшін жаза 12 жылға дейін бас бостандығынан айыру мерзімінің ұлғаюымен қатаңдатылды.Қазір азаптағаны үшін сотталғандарға қатысты шартты түрде соттау қолданыла алмайды. Бұл адамдарға рақымшылық және ескіру мерзімі қолданылмайды. Олардың жәбірленушімен татуласуы да қылмыстық жауапкершіліктен босатпайды.Азаптаудан зардап шеккен адамның құқықтық көмегін алу және әлеуметтік, медициналық және психологиялық қызметтерге қол жеткізу құқығы қамтамасыз етіледі.Ол үшін еліміздің барлық өңірлерінде дағдарыс орталықтары жұмыс істейді.Жәбірленушілерге өтемақы қоры жұмыс істейді. Өтемақы, оның ішінде азаптау, адам саудасы және басқа да түрлер бойынша танылған жәбірленушілерге төленеді.Президенттің жаппай бейнебақылау жөніндегі тапсырмасын орындау мақсатында құқық қорғау органдары мен пенитенциарлық мекемелерде 6159 көрінбейтін аймақ және 937 ақауы бар бейнебақылау камерасы анықталды.Бұдан басқа, Ішкі істер министрінің бұйрығымен басшылардың азаматтарды негізсіз әкелгені, жеткізгені және ұстағаны, сондай-ақ азаптауға және өзге де қатыгез, адамгершілікке жатпайтын немесе қадір-қасиетін қорлайтын қарым-қатынасқа жол бергені үшін дербес жауапкершілігі бекітілді.&nbsp;

Қазақстан және Қызылорда облысының жаңалықтары