<a href="https://kyzylorda-news.kz/">Kyzylorda-news.kz.</a> Шаһар басшысы Асылбек Шаменов халықпен тығыз байланыста болу, олардың мұң-мұқтажы мен ұсыныс-тілектерін жүзбе-жүз тыңдау мақсатында тоқсан сайын кездесу өткізіп, көтерілген мәселелер ескерусіз қалмай кезең-кезеңімен шешілуде.Қала әкімінің елдімекендерді аралау сапары бүгін де өз жалғасын тауып, Қызылөзек, Талсуат, Ақжарма және Ақсуат ауылдық округтерінің тыныс-тіршілігі мен қазіргі атқарылып жатқан жұмыстар барысы сараланды.Қызылөзекте «Ауыл – ел бесігі» бағдарламасы аясында 173 млн 832 мың теңге бөлініп, 6 көшеге орташа жөндеу жұмыстары жүргізілуде. 2 көшеге жаяу жүргіншілер жолын салу және 2 көшеге түнгі жарық бағаналарын орнату бойынша мемлекеттік сатып алу конкурстары жүруде.Асылбек Өмірбекұлы кездесуде ауыл әкіміне мемлекет ұсынған бағдарламаларға көбірек қатысуды, елдімекеннің тыныс-тіршілігін әлде де ширатуды тапсырып, ауыл тұрғындарының ұсыныс-тілектеріне құлақ түрді. Ауылдағы ағайын өзекті мәселелердің шешімін тауып келе жатқандығын айтып, қоғамдық көлік қатынасын реттеуді сұрады. Бұл талап қыркүйек айына дейін орындалатын болды.Содан соң Талсуат ауылына ат басын бұрған қала басшысы елдімекен ажарын келтіруге бағытталған жұмыстармен танысты. Жергілікті бюджеттен бөлінген қаражатқа елді мекендегі көшелердің түнгі жарық бағаналарын күтіп ұстау жұмыстары жүргізілуде. Ауылдық округтегі 13 көшені электрмен жабдықтау үшін жобалау-сметалық құжаты әзірленіп, «Ауыл-Ел бесігі» жобасымен қаржысы шешілді.Сондай-ақ, «Қызылорда-Траст» және «Орда Автодор» ЖШС конкурс жеңімпазы деп танылып, ауылдағы 8 көшені асфальттау жұмыстары басталып кетті. Ауыл тұрғындарының мемлекеттік бағдарламаларға қатысу көрсеткіші артып, жыл басынан 13 тұрғын жылқы, қой, түйе, шаруашылығы, жылыжай құрылысы, жүк тасымалдау жобасымен жалпы сомасы 77 млн.760 мың теңге несие алды.Өткен жылы құрылысы басталған 150 орындық клуб ғимараты тамыз айында пайдалануға беріледі. Ойын алаңдарына ағымдағы жөндеу жасалынып, түнгі жарықтандыру сияқты инфрақұрылымды жаңғыртуға бағытталған жоспарлары бар ауылдың тұрғындары қала әкімімен кездесуде елдімекендегі жүйелі жұмыстарға көңілі толатынын айтып, бірқатар көкейде жүрген мәселелерін жеткізді. Шаһар басшысы ұсыныстардың оң шешу жолдарын қарастыруды тиісті сала басшыларына жүктеді.Қала әкімінің жұмыс кестесіндегі келесі елдімекен - Ақжарма ауылдық округі. Ауылда көптен бері өзекті мәселенің бірі саналып келген дәрігерлік амбулаторияның құрылысы басталды.Округте бұқаралық спорт түрлері жақсы дамуда. Спорттық үйірмелерде 192 жасөспірім спортпен шұғылдануда. Қазіргі кезде «Талдыарал» футбол клубы облыстық «В» тобында ойын көрсетуде. Ақжармалық жасөспірімдер өнерде де оқ бойы озық атанып келеді. Мәдениет үйіндегі Гүлназ Рысбекова «Қазақстан дауысы» балалар мега жобасына 6000 қатысушы арасынан жолдама алып, көрмей таңдау кезеңінен жекпе-жек сынына өткен.Ауылдың инфрақұрылымын жаңғырту мақсатында ауқымды жұмыстардың жобалы-сметалық құжаттары дайындалып, оң шешімі күтілуде. Яғни, Баймұрат батыр ауылындағы арықтарға науа салу, 3 көшеге орташа жол жөндеу, Талдыарал елді мекеніне тренажер жабдықтары мен футбол алаңын салу, елдімекенге газ жүргізу секілді жұмыстар атқарылады.Елдімекендегі өзекті мәселе ұялы байланыстың, интернет жылдамдығының төмендігі. Оған қатысты шұғыл шаралар қабылданып, жауапты мекемемен бірлесе жұмыстар жасалынады.Қала әкімінің жұмыс кестесін түйіндеген келесі елдімекен Ақсуат ауылдық округі. Мемлекеттің шағын және орта кәсіпкерлікті дамытуға жасап жатқан қолдауының арқасында бұл ауылда 524 кәсіпкерлік субъектісі тіркеліп, жаңа жұмыс орындары ашылды.Ең өзекті мәселелердің бірі саналған табиғи газбен қамтамасыз ету шешімін тапты. Жыл басынан бері «Өңірлік инвестиция орталығы» микро қаржылық ұйымы арқылы «Іскер» бағдарламасымен 42,1 млн. теңгені құрайтын 7 жоба, «Аграрлық несие корпорациясы» АҚ арқылы «Іскер» бағдарламасы аясында 10,9 млн.теңгені құрайтын 2 жоба қаржыландырылды. Сондай-ақ, «2021-2025 жылдарға арналған кәсіпкерлікті дамыту жөніндегі ұлттық жоба» бағдарламасымен 4 жоба қайтарымсыз грантқа ие болды.Ауылдық округ тұрғындарының табысын арттыруға арналған «Ауыл аманаты» жобасына 127 жоба ұсынылды. Бұқаралық спортты дамыту мақсатында 3 спорт ойын алаңы, көше тренажеры және мектептерде спорттық үйірмелер жұмыс жасауда. «Samruk-Kazyna Trust» корпоративтік қоры ауыл орталығынан 239 млн. теңгеге спорт кешенінің құрылысын жүргізіп, биылғы жылы пайдалануға бермек.Ауыл халқымен кездесуде шаһар басшысы тұрғындардың өзекті ұсыныстарын тыңдады. Асылбек Өмірбекұлы мемлекеттік бағдарламалардың мүмкіндіктер ағынын ауыл әкімдері тиімді пайдалану қажеттігін айтып, жауапты сала басшыларына жоспарланған жұмыстарды жүйелеуді тапсырды.<blockquote>«Өздеріңізге белгілі, ауылда бүгінгі күнге дейін шешімі табылған және алдағы уақытта жүзеге асырылатын жұмыстардың барлығы өткен жылғы кездесуімізде көтерілген өзекті мәселелер. Бұл халықтың ұсыныс-тілектері ешқашан назардан тыс қалмайтынының айқын дәлелі. Барлық жұмыс тікелей өз бақылауымда болады»,- деді қала әкімі Асылбек Шаменов.</blockquote>Тоғыз жолдың торабында орналасқан шаһар мен оған қарасты кент және ауылдық округтердің күрмеулі мәселелерін шешіп, даму қарқынын бәсеңдетпеу мақсатында жүйелі жұмыстар жалғаса бермек.<figure class="image"><img src="https://knadmin.beoblood.kz/uploads/354527742_3383154188617982_6558343915202934075_n_ec2fdd0b04.jpg" alt="354527742_3383154188617982_6558343915202934075_n.jpg"></figure>

Ақсуат ауылында 524 кәсіпкерлік субъектісі тіркеліп, жаңа жұмыс орындары ашылды

<a href="https://kyzylorda-news.kz/">Kyzylorda-news.kz.</a>&nbsp; Мемлекет басшысы Қасым-Жомарт Тоқаев сыбайлас жемқорлықпен ымырасыз күресу мемлекеттік саясаттағы негізгі басымдықтың бірі екенін атап өткен болатын. Ел Президентінің пікірінше, заң үстемдігін орнатып, нағыз құқықтық мемлекет құру үшін, ең алдымен, жемқорлықтың тамырына балта шабу керек. Қазіргі уақытта сыбайлас жемқорлыққа қарсы күресті күшейту бойынша жұмыс жалғасуда және үнемі жетілдіруде.&nbsp;Осыған байланысты біздің елімізде Қазақстанның сыбайлас жемқорлыққа қарсы саясатының 2022-2026 жылдарға арналған тұжырымдамасы бекітілді. Негізінен, тұжырымдаманың мақсаты – мемлекеттің сыбайлас жемқорлыққа қарсы саясатының тиімділігін арттыру, сыбайлас жемқорлықтың кез келген көріністеріне «мүлдем» төзбеушілік атмосферасын қалыптастыру, сыбайлас жемқорлықтың деңгейін төмендету арқылы сыбайлас жемқорлыққа қарсы қозғалысқа бүкіл қоғамды тарту болып табылады. Аудандық құрылыс, сәулет және қала құрылысы бөлімінде жемқорлықпен күрес мемлекеттік саясаттың және сыбайлас жемқорлыққа қарсы іс-қимыл жөніндегі салалық бағдарлама аясында тиісті жұмыстар атқарылуда. Өз кезегінде аудандық құрылыс, сәулет және қала құрылысы бөлім басшысының міндетін атқарушы Сабит Аймаханов аталған салаға байланысты бөлімде атқарылып жатқан жұмыстарға тоқталды. &nbsp;&nbsp;<blockquote>Аудандық құрылыс, сәулет және қала құрылысы бөлімінің бағынысты қызметкерлеріне &nbsp;қолданыстағы заңнамаларда көзделген шектеулердің қатаң сақталуын қамтамасыз ету, орындаушылық тәртібіне, жүріс-тұрысына бақылау күшейтілді. Сонымен қатар сыбайлас жемқорлықтың кез-келген фактісі төтенше жағдай ретінде қаралып, оның орын алуы себеп-салдарын анықталуын қамтамасыз ету мақсатында Бөлім қызметкерлері арасында түсіндірме жұмыстары, құқықтық оқытулар жүргізіліп, бөлімнің (фейсбук) ресми парақшасында жарияланып, қатаң бақылауға алынған. Бөлімде өткізілген жиналыс отырысында айтылған сын-ескертпелерден қорытынды шығарып, ұжымда сыбайлас жемқорлық фактілеріне жол бермеу іс-шарасы бекітілді. Сыбайлас жемқорлыққа қарсы күресті жетілдіру мақсатында Бөлім ғимараты ішінде жемқорлыққа қарсы агитациялық стендтер ілінген, жеке және заңды тұлғалардың өз мұқтаждары мен көзқарасын бiлдiргісі келген жағдайда бөлім басшылығының «Жеке және заңды тұлғаларды қабылдау кестесі» бөлімнің көрнекі жерінде ілінді және «Азаматтар мен заңды тұлғалар өтініштерін қабылдау» жәшігі орнатылған, интернет желісінде бөлімнің арнайы Фейсбук әлеуметтік парақшасы тұрақты түрде жұмыс жасауда. Фейсбук әлеуметтік парақшасы арқылы Сыбайлас жемқорлықтың алдын алу мақсатында түрлі тақырыптағы бейне роликтер мен материалдар жарияланды. Алдағы уақытта белгіленген мақсат-міндеттерді орындауға бар күш-жігерімізді жұмылдырып, құрылыс, сәулет және қала құрылысы аясындағы жемқорлыққа қарсы жүргізіліп жатқан жұмыстарды жалғастыратын боламыз, – деді Сәбит Аймаханов.</blockquote>Жалпы, биылғы жылы бөлім арқылы жалпы құны 2,4 млрд.теңгеге &nbsp;11 жобаның құрылысы іске асырылуда. Оның ішінде, 2,1 млрд.теңгеге 8 жобаның құрылыс жұмыстары жүргізілуде. Мәселен, Айдарлы, Аманкелді, Қоғалыкөл, Жетікөл елді мекенін электрмен жабдықтау, Бесарық спорткешені, Жетікөл елді мекеніндегі 3 бөлмелі екі тұрғын үй құрылысы, Тереңөзек кентіндегі инфрақұрылым қиыршықтас жолының құрылысы (100 және 35 га) жүргізілуде. 246 млн. теңгеге 3 жобаға облыстық мемлекеттік сатып алу басқармасы арқылы мемлекеттік сатып алу жұмыстары жасалуда. Біздің мекеменің мамандары комиссия құрамында төраға, мүше болып қатысып жүргені мәлім. Бөлім тарапынан құрылысы жүріп жатқан нысандардың бөлінген қаржының уақытылы игерілуі, сыбайлас жемқорлыққа жол бермей, тұрақты түрде құрылыс жұмыстарының сапасы қатаң бақылауға алынған.&nbsp;Мемлекеттік көрсетілетін қызмет бойынша бөлім тарапынан 5-мемлекеттік қызмет көрсетіледі 2023 жылдың 5-айында 418 қызмет көрсетілді. Оның ішінде 62-і қызмет халыққа қызмет көрсету орталығы арқылы көрсетілсе, 356-і «Электронды үкімет» веб-порталы арқылы көрсетілді. Сондай-ақ, бөлім ғимаратында «Өзіне-өзі қызмет ету бұрышы» &nbsp;орнатылып, тұрақты түрде жұмыс жасауда.&nbsp; Сырдария ауданы бойынша нысаналы индикаторларының 2023 жылдың 5 ай қортындысымен орындалуы бойынша, аудан көлемінде 6453,3 шаршы метрге тұрғын үй салынып, 2022 жылдың тиісті кезеңімен салыстырғанда 136,8 пайызға орындалды.Сонымен қатар, Сырдария ауданы әкімдігінің 2023 жылға арналған №4 «Сыбайлас жемқорлықтың алдын алу және оған қарсы іс-қимыл» үлгілік базалық бағытын іске асыру жобалар картасына сәйкес, бөлімнің Сыбайлас жемқорлық тәуекелдеріне ішкі талдау жүргізу туралы бұйрығымен бөлімнің қызметтерін қозғайтын нормативтік құқықтық актілерде және ұйымдастырушылық-басқарушылық қызметінде сыбайлас жемқорлық тәуекелдеріне ішкі талдау жұмыстары жүргізіліп, талдау анықтамасы мен іс-шаралар жоспары Әкімдіктің ресми сайтына мерзімінде жарияланды. Бұл да бір сыбайлас жемқорлықтың тәуекелдерін болдырмау мен алдын алуға бағытталған тиісті шаралар жиынтығы деп ұғынуға болады. &nbsp;

 Сырдария ауданында 11 жобаның құрылысы іске асырылуда

<a href="https://kyzylorda-news.kz/">Kyzylorda-news.kz.</a>&nbsp; Жақсы немесе жаман дәрігерлер болмайды, тек дәрігерлікті таңдаған жандар болады. Бұл Сыр елінің танымал травматологы, Денсаулық сақтау ісінің үздігі Бауыржан Бекпановтың пікірі. Жоғары санатты хирург, Ауған соғысының ардагері Әлеуметтік медициналық сақтандыру қорының Қызылорда облысы бойынша филиалында қызмет етеді.Жас кезінен дәрігер болуды армандағанмын, - дейді Бауыржан Төлепбергенұлы. Бірақ медициналық институтқа түсу әрқашан оңай болған емес. Бірінші кезекте Ж. Жабаев атындағы 411 орта мектептің түлегі өзінің әскери интернациналдық борышын өтеуге шешім қабылдады. 1986-88 жылдары Кеңес әскерлерінің шектеулі контингенті қатарында, Ауғанстан Республикасының Лашкаргах қаласында, арнайы мақсаттағы бригаданың 22 әскери бөлімінде қызмет етті. Көрсеткен батылдығы мен батырлығы үшін мемлекеттік наградалармен, «Ауғанстан халқының ризашылық білдіргені», «Жауынгерлік еңбегі үшін» медалімен және көптеген марапаттарға ие болды.&nbsp;Әскерде қызмет еткеннен кейін жауынгер-интернационалист Бауыржан Төлепбергенұлы Қызылорданың өнеркәсіптік ұйымдарында жүргізуші болып жұмыс істеді. 1990 жылы Алматы мемлекеттік медицина институтының дайындық курсына, одан кейін осы жоғары оқу орнына түсті. Аяқтағаннан кейін, 1997 жылы кәсіби еңбек жолын Қызылорда медициналық колледжінде оқытушы болып бастады. Кейінгі он жыл ішінде колледж директордың орынбасары болды.Одан әрі 2007-2012 жылдары №1 қалалық емханада травматолог-хирург, 2012-2018 жылдары қалалық ауруханада травматолог-дәрігер, бас дәрігердің орынбасары болып жұмыс істеді. Сол жылдары Қызылорда, Жамбыл және Түркістан облыстары бойынша қоғамдық денсаулық сақтау департаментінің штаттан тыс сарапшысы болды. Содан кейін бірнеше жыл №3 қалалық емхананың бөлімшелерінің бірін басқарды, қалалық әскери комиссариаттың медициналық комиссиясының төрағасы болды. 2018 жылдан бастап бүгінгі күнге дейін Әлеуметтік медициналық сақтандыру қорының облыстық филиалында бас сарапшы болып жұмыс істейді.Кәсіби дәрігердің еңбегі ҚР Денсаулық сақтау министрлігінің, облыстық денсаулық сақтау басқармасының алғыс хаттарымен марапатталды. 2014 жылы «Үздік тәуелсіз сарапшы» номинациясының иегері атанды.&nbsp;Бауыржан Төлепбергенұлының отбасында барлығы осы асыл және сұранысқа ие мамандыққа қатысты. Студенттік жылдары жұбайы Әлия Әбілдашевамен шаңырақ көтерді. Әлия Шазатқызы орталық қалалық емхананың кардиолог-дәрігері болып жұмыс істейді. Түнғышы Мақсұт - стомотолог, киелі Түркістан қаласының Халықаралық Қазақ-Түрік университетін бітірген соң, &nbsp;стомотология кафедрасында қалып, студенттерге дәріс беруде және стомотологиялық емханада халыққа қызмет көрсетіп отыр. Отбасылы. Жары Айжан Қадырқызы да жалпы тәжірибелі дәрігер. Екеуі Әзима және Бақберген есімді ұл мен қыз тәрбиелеп отырған жас отбасы. Екінші ұлы Мағжан мен кенжесі Жасұлан С.Асфендяров атындағы Қазақ ұлттық медицина университетінің студенттері.&nbsp;Балалардың өздері дәрігер мамандығын тандағанын айта келе, еңбекке, білімге деген сүйіспеншілікті оятқан ата-анасын ерекше жылы лебізімен еске алады. Әкесі Төлепберген Бекпанов 30 жылдан астам Қызылорда теміржол депосының тепловоз машинисінің көмекшісі болып жұмыс істеді. Анасы Жазық темір жолының ОРС НОД-1 сауда саласында көпжылдар бойы қажырлы еңбек етті. Бекпановтардың көп балалы отбасында төрт ұл, төрт қыз бар.Жоғары санатты хирург өзінің көп жылдық тәжірибесін Әлеуметтік медициналық сақтандыру қорының жұмысында да қолданады. Облыстық филиалда тәжірибелі дәрігер Бақыт Исмаханбетовтың жетекшілігімен 35 маман жұмыс істейді. Қордың жүрегі - медициналық көмек көрсету сапасын бағалау және шарттық міндеттемелерді бақылау бөлімі, деп атап өтті Бауыржан Бекпанов. Мұнда 12 кәсіби дәрігер жұмыс істейді. Олар халыққа көрсетілген медициналық қызметтердің сапасы мен көлемін қадағалайды. Бұл әрбір медицина қызметкерінің жұмыс принципі болуы тиіс, деп атап өтті Бауыржан Төлепбергенұлы. Басты міндет – деңсаулықты қорғау және сақтау!<figure class="image"><img src="https://knadmin.beoblood.kz/uploads/3_e3955e1db0.jpg" alt="3.jpg"></figure> &nbsp;<figure class="image"><img src="https://knadmin.beoblood.kz/uploads/4_d3f7c6d45e.jpeg" alt="4.jpeg"></figure>

Дәрігерлер династиясы

<a href="https://kyzylorda-news.kz/">Kyzylorda-news.kz.</a> Сыртқа шыққанда Сыр бойы, Шиелі туралы әңгіме айтыла қалса кешегі тарих есінде қалған елдің «Е-е, жарықтық Ыбекең түлеткен топырақ қой» деп жататыны бар. Еңбек бағаланатын кешегі кезеңде Қазақстанда осындай жоғары марапатты қатарынан екі рет иеленгендер санаулы ғана. Сондықтан болар, Сыр күрішін жайқалтып, дән атасы атанған Ы.Жақаев атындағы күріш өсіру тарихы музейіне қадам бассаңыз қара күш пен адал еңбекті сезінесіз.&nbsp;Ескіріп, ел жадынан өше бастаған әрбір құнды дүниеге қайта жан бітіріп, жаңғыртып, жаңарта білетін музей директоры Құттықыз Ыханованың еңбегін елемеу мүмкін емес.Қырық жылға жуық тарихы бар музейдің іші екі мәрте Еңбек Ері атанған Ы.Жақаевтың қолынан еңбек аттестатын алған «Коммунизм» колхозындағы күріш звеносының жетекшісі, Еңбек Ері Ш.Қазанбаева, З.Ержанова, күрішші Д.Сейітова т.б Жақаевшылар жайлы мәліметтерге толы. Сондай-ақ туған жердің тарихынан сыр шертетін қасиетті мекенге келген қонақтар табан тіремей кетпейді. Онда бас сұққан жанның ерекше әсермен, жаңаша қарқынмен шығатынын да аңғарамыз. Әрбіржанға жайлылық сыйлайтын даңқты диқаншының ауылынан салынған жаңа ғимараттың сәні мен сымбаты да келісіп тұр.Музей алдын жасыл желекке айналдырып, сан түрлі гүлдермен көмкерген Құттықыз Ықанова жыл сайын жаңашылдығымен таңқалдырып келеді. Бір жылдары шырмауық гүлдермен паравоз жасаса, енді бір жылдары 10 шыршаны қаз-қатар тізілтіп қойды. Тіпті, музей алдындағы арнайы гүлден жасалған орындыққа отыру үшін баратындардың қарасы да қалыңдаған еді. Міне, осындай әсемдік пен әдемілікпен көркейту-көгалдандыру басында жүруі тиіс жанның бірі – Қ.Ыханова десек жаңылыспаймыз.Кент ішінде халыққа қызмет көрсететін қаншама мекеме бар. Соның ішінде Шиелі ауданаралық аурухана алдын да осылай жасыл желекке айналдырса нұр үстіне нұр емес пе? Жаңа аурхананың бой көтергеніне 3 жылдай уақыт болды. Алайда, әлі күнге көгалдандыру жұмыстарына толық ден қойылмай келеді. Таза ауа, жайлылық пен жылылық дерті дендеген адамдарға керек-ақ.

Аудандағы музей алдын жасыл желекке айналдырды

<a href="https://kyzylorda-news.kz/">Kyzylorda-news.kz.</a> &nbsp;«AMANAT» партиясы облыстық филиалының төрағасы Наурызбай Байқадамов бастаған партиялық бақылау комиссиясының мүшелері бүгін сайлауалды бағдарлама аясында жүзеге асырылып жатқан Қызылорда қаласындағы әлеуметтік нысандардың құрылыс жұмыстарына мониторинг жүргізді.Партиялық бақылау тобы алдымен қаланың сол жағалауындағы ауысымына 100 адам қабылдайтын емханасы бар, онкологиялық бөлімшесімен 300 төсектік көбейінді аурухана құрылысы, мұнан соң СПМК-70 мөлтек ауданындағы №3 тұрғын үй орамының инженерлік инфрақұрылымы, абаттандыру жұмыстары сонымен қатар «Бәйтерек» шағын ауданындағы 600 орындық мектеп құрылысымен танысты.Көп бейінді аурухана 36 млрд теңгені құрайтын үлкен жоба. Болашақта бұл қала халқын емес, облыс тұрғындарына да қызмететін медициналық нысан құрылысын «SHEBER BUILD» ЖШС-і жүргізуде. Құрылыс жұмысына партиялық бекет орнатылып, пайдалануға берілгенше партиялық бақылауда болмақ.СПМК-70 мөлтек ауданындағы абаттандыру жұмыстары кестеге сай жүргізілуде. Алайда комиссия мүшелері мердігерге балалар жазғы демалыста үйде отырғандығын атап өтіп, бірінші кезекте олардың қауіпсіздігін екіншіден, ертерек ауладағы ойын алаңдарымен қамтылуын, тұрғын үйге азаматтардың көбірек қоныстануына жағдай жасалса деген ұсыныс білдірді.Мұнан соң партиялық бақылау тобы көптен бері тұрғындардың арасында әңгіме болып жүрген «Бәйтерек» шағын ауданындағы білім ордасы құрылысына барды. Бұл нысанға да партиялық бақылау бекеті орнатылған. Білім ордасының құрылыс жұмыстары құжаттарды рәсімдеу салдарынан ұзақ тұрып қалған болатын. Алайда мердігерлер биылғы оқу жылына дейін пайдалануға беретіндіктерін атап өтті.Комиссия мүшелері зерделеу барысында анықталған кемшіліктерге қатысты әрбір нысанға тапсырыс беруші, мердігер, техникалық бақылаушы, жобалаушы, мемлекеттік сараптамашы да жоғары жауапкершілікпен қарау керектігін жеткізді.<figure class="image"><img src="https://knadmin.beoblood.kz/uploads/354061129_651643190334654_8131794389938694991_n_d8101f6f2f.jpg" alt="354061129_651643190334654_8131794389938694991_n.jpg"></figure>&nbsp;<figure class="image"><img src="https://knadmin.beoblood.kz/uploads/354463052_651643160334657_7244313250943561294_n_16abee5f85.jpg" alt="354463052_651643160334657_7244313250943561294_n.jpg"></figure>

Әлеуметтік нысандар құрылысына партиялық бақылау жасалды

<a href="https://kyzylorda-news.kz/">Kyzylorda-news.kz.</a>&nbsp; «Qaratau Fruits» шаруа қожалығы Жаңақорған ауданы Қыраш ауылдық округінен 50 гектар жер алып, алма бағын ашты. Түрік мамандарымен біріге отырып, 35 гектар жер дайындалып, Түркиядан келген 75 мың көшет толығымен егіліп, тамшылатып суару әдісімен суару жұмыстары жүргізілуде. Осы орайда, облыстық кәсіпкерлік және өнеркәсіп басқармасының басшысы Исатай Ансат бақша жұмысымен танысу мақсатында Жаңақорған ауданына арнайы барды.Қазіргі таңда қарқынды алма бағының жер учаскесі қоршаланып, егіс басына қадалары қағылып (шпалер), Түркия елінен арнайы келген агроном маманы, су маманы егіс басында жұмыс жасауда.Аталған бақшаны сумен қамтамасыз ету мәселесі насос қондырғылары арқылы жүзеге асырылса, оған қажетті 250 кВ трансформаторлар орнатылып, 6,5 шақырым электр желісі тартылды.Егіс басында екі МТЗ82 тракторлары жұмыс жасап жатыр. Сонымен қатар, жер қопсытатын техника, 2 дана арнайы алма жинайтын техникасы жеткізіліп және дәрі шашатын бүріккішпен (опрыскыватель) қамтамасыз етілді.Биылғы жылы алма ағаштарына күтіп-баптау жұмыстары жүргізіледі. 3 жылдан кейін жемістерін алу көзделуде.Шаруашылықта 50 адам жұмыс қамтылу жоспарланса, егіс басында тұрақты түрде - 5 адам, маусымдық кезеңге – 10 адам жұмысқа алынды.Айта кетейік, өнім Қазақстаннан бөлек, көрші мемлекеттерге де экспортталады.<figure class="image"><img src="https://knadmin.beoblood.kz/uploads/354576445_1442030516558141_8255149554823274724_n_3fc65e91d4.jpg" alt="354576445_1442030516558141_8255149554823274724_n.jpg"></figure>

 «Qaratau Fruits» шаруа қожалығы алма бағын ашты

<a href="https://kyzylorda-news.kz/">Kyzylorda-news.kz.</a> Туризм – біздің көздің жауын алатын биік-биік ғимаратымыз, әсем қаламыз емес. Туризм – қазақтың кім екенін көзбен көрсететін көрікті мекеніміз. Бір ғана Қаратаудың баурайында мұндай жерлеріміз өте көп. Мәселе сол жерлердің жанданып, нағыз туристік орталыққа айнала алмай тұрғандығында.Туризм саласы – экономиканы дамыту көздерінің бірі болып саналады. Тəуелсіздік алғаннан кейін мəдени жəне тарихи құндылықтарды жаңартуға бағытталған жұмыстар қолға алынуда. Туризмнің қазіргі индустриясы табысы жоғары және серпінді дамып келе жатқан қызметтің бірі болып табылады. Одан түсетін табыс, мұнай мен мұнай өнімдері және автомобиль экспортының табысынан кейінгі тұрақты үшінші орында. Туризмнің аясы – туристер тамашалайтын жаңа аумақтар есебінен дамитындықтан, еліміздің әлемдік туристік нарықта өзінің лайықты орнын табуға бірегей мүмкіндігі бар.Алайда бізде туризм саласы тоқырап тұр. Тоқыраған туризм дегенге оқырман дұрыс түсінбей қалмасын. Біз бұл пікіріміз арқылы осыдан тура 70 жыл бұрын тікен тілді түрік жазушысы Әзиз Несиннің туризм саласы туралы жазған сатирасындай бұл саланы терістей, сынап-мінегелі отырған жоқпыз. Мақсатымыз аталған саланы дамыту, содан пайда табу, аудан эконоикасына, бюджетіне қаражат түсіру, аудан әкімдігіне ұсыныс айту, сол арқылы жауапты салалық бөлімнің халыққа жауабын бергізу.Қазақстан Республикасы Премьер-Министрінің ресми сайтында «ҚР Үкіметінің 2019 жылғы 31 мамырдағы №360 қаулысымен «Қазақстан Республикасының Туристік саласын дамытудың 2019-2025 жылдарға арналған мемлекеттік бағдарламасы» бекітілген. Бағдарламаны толық оқып, танысып шықсаңыз алдағы бес жылда елімізде бұл салаға мол қаражат құйылмақ. Туризмді дамытудың түрлі механизмдерін бүге-шүгесіне дейін жазып көрсеткен. Онда агротуризм, қолөнер туризмі, акватуризм, экологиялық туризм, балықшылық, аңшылық, саятшылық туризмдері, этнографиялық туризм, тарихи-мәдени туризм мен балалардың өлкетану туризімін дамытудың тың идеялары көрсетілген. Осы бағыттар бойынша ақсап жатқан жұмыстар мен бұл салаларға баса мән бермей отырған аймақтар, облыстардың аты аталған.Қазақстанды туристтендірудің картасына маңызды туристік объектілерді іріктеу жұмысы жасалған. Іріктеу критерилеріне объектілердің тарихи-мәдени маңызы ескерілген, оның ішінде ЮНЕСКО немесе Ұлы жібек жолы объектілерінің тізбесіне енген ескерткіштер, сондай-ақ, «Рухани Жаңғыру» бағдарламасынының киелі объектілері енген.Бағдарлама жоспарына сәйкес, Түркістанның тарихи-мәдени туризімін дамыту әлеуетін 1 жылда 1 500 000 адамға дейін жеткізу көзделген. Киелі қаланың қазіргі әлеуеті 500 000 адам. Байқап отырғандарыңыздай алдағы бес жылда туризм саласын дамытуға үш есе басымдық бермек. Түркістан бізге алыс емес. Бар-жоғы 160 шақырым. Айнадай тегіс жол жатыр сайрап. Түркістанға келген туристі Шиеліге де тартудың тың жоспарларын жасай беруіміз керек. Бізде де ежелгі қорғанды қала, қамалдар мен жер асты жолдары бар. Тауымыз мен мұндалап оған сырын ішіне бүгіп жатқан Қаратау қойнауларында неше түрлі аңыз-әфсаналарға негіз боларлық жер-суларымызды қосыңыз. «Рухани Жаңғыру» бағдарламасына сәйкес келетін киелі объектілеріміз бар. Баяғы сақтар дәуірінен сыр шертетін Қарауыл төбелеріміз ше? Сақ патшайымы, әйгілі Тұмар-Томиристің парсы патшасы Кирдің басын шапқан жері Шиелінің Қаратау бөктері деп тарихшылар тың тақырып пен тарихи зерттеулерге негіздеп тұжырымдар жасауда. Кешегі Кеңес өкіметінің алғашқы жылдарында Қазақ КСР астанасы Орынбордан Қызылордаға көшіп келгенде қызылдар мен қазақ байларының арасындағы қақтығыстың дені осы Шиелінің Қаратауы мен Сарысу бойында өткендігі туралы мәліметтер жетерлік. Сәкен Сейфулиннің «Бандыны қуған Хамитіндегі» Құдіре мен Хамиттің бірін-бірі қуып жүрген жері осы Шиелінің Қаратау, Сарысуы. Абдолла Қарсақбаев түсірген кинодағы Құдіренің тау шатқалында Хамитке ұсталатын жері Шиелінің Қаратауындағы Дарбаза. Сол бай Құдіренің бау-бақшасы, шаруашылығы бүгінгі Шиелі кентінің Тәуелсіздік көшесі бойындағы Ы.Жақаев ауылына қарай тартылған жолдың жағасы. Қазақ хандығы алғаш орнап жатқан кезде Керей мен Жәнібек сұлтандар сонау Жетісудан, Моғолстан жерінен қалың қол жиып келіп, Дешті-Қыпшақ даласының әйгілі астанасы – Сығанақ қаласын Әбілқайыр-Шайбаниден шауып алар кезде әуелі Шиелі қамалында ат суытып, әскер тынықтырғаны туралы тың мәліметтер бар бүгінде. Одан бергі Жоңғар ханы Цеван-Рабданның қалың қолы Жаңақорғанды басып өтіп, Сығанаққа таяу жазыққа келіп жатқан кезінде қазақ ханы Әбілқайырдың 20 мың қолмен Шиеліде бекініп, 40 мың әскермен Арқадан жылжыған Сәмеке қолын күтуі, Әбілқайыр ханға Көкше жерінен көмекке келген Баян Батырдың 10 мың әскері Шиелінің Дарбазасынан лек-легімен өткені, сол өткен күндердің ақиқаты тарихта сайрап жатыр. Оны тек сөйлету керек. Көрсету керек.Біздің өңірді тамашалауға ниет білдіргендер саны да артып келеді. Сала бойынша ауданда орналасқан тарихи мұра «Оқшы ата» кесенесі, «Бала Сауысқандық» шатқалындағы тасқа қашалған көне суреттер, «Нартай Бекежанов» мемориалды өнер музейі, «Ыбырай Жақаев» күріш өсіру тарихы музейлерін аудан қонақтары келіп тамашалауда. Сонымен қатар, Бәйгеқұм ауылындағы «Ханқожа» көлінің жағалауындағы жазғы демалыс орындарына қызығушылық танытып, келушілердің қатары көбеюде.Қазір күн санап озық технология төрімізге озып барады. Сандық жүйенің кереметі сол саусақпен түртсең әлемнің ғажайыптарын смартфонның бетінен көре аласың. Алпауыт елдердің ұтып тұрған тұсы да осы. Олар өз кереметтерін көрсете алады. Жарнама жасай біледі. Міне, бұл мәселе аудандық туризм саласында да көрініс тапса, экономикалық көрсеткіштеріміздің артатыны анық. Яғни, жоғарыда аталған орындар жайлы барлық мәліметтер электронды нұсқада болса. Кез-келген ауданға табан тіреген қонақтың назарына ұсынуға мүмкіндік болса, меймандардың қызығушылығы артатыны сөзсіз. Қолындағы ақпараттар арқылы танысып, келіп тамашалар еді. Мәселен, Оқшы ата кешені жайлы, ондағы Асан қайғы, Есабыз, Бала би, Ғайып ата, Қыш ата, Мұстафа Шоқайдың атасы Торғай датқалар жайындағы мәліметтерді жоғарыда аталғандай электронды базаға ендіріп қойса, туристер тартылар еді. Сонымен қатар, соңғы кездері Бәйгеқұм ауылындағы «Қанқожа» көлі де туристік аймаққа сұранып тұрған демалыс орны екендігі айқын. Ұзындығы 35 шақырым, ені 1,5 шақырымды құрайтын демалыс аймағында бір маусымда 30 мың адамға дейін жиналады. Қамбаш көлінен кейін үлкен аумаққа ие «Ханқожа» көлі маңында инфрақұрылым мәселесі шешімін тауып, кәсіпкерлер келетін туристерге қолайлы жағдай жасаса, болашақта аймақ туризміне жаңаша серпін беретін жобаға айналатынына сенім мол. Тіпті жұрт тамсанған жанымыздағы «Керуен сарайдай» өзіне тартып тұрар еді.Біз тілге тиек еткен осы орындар туралы сапасы жоғары полиграфиялық және аудиобейне жарнама материалдарын шығару және белсенді түрде тарату қажет. Жаңа ақпараттық технологияларды пайдалануға, оның ішінде Интернет жүйесінде Шиелі ауданының туристік қызмет орындарының WEB-сайттарын құруға айрықша мән беру қажет. Сондай-ақ, қонақжай аудан беделін жасауға турис¬тер жиі болатын орындарға қазақша, орысша мәтіндеріне латын транскрипциясымен қоса берілген ақпараттық таблолар мен жазбалардың жасалуы мен орнатылуы өз септігін тигізеді. Аталған ұсынысымызға аудандық кәсіпкерлік, өнеркәсіп және туризм бөлімі назар салып, өңір туризімін цифрландыру бағытында мейлінше мүмкіндіктерді пайдаланғаны абзал. Сол кезде, сырттан келетін қонақтар қолындағы смартфонын сипалап отырып, Шиеліге келіп қалғанын сезбей қалар.

Қарт Қаратау, Ханқожа туризмге тиімді

<a href="https://kyzylorda-news.kz/">Kyzylorda-news.kz.</a> Елу бес жылдық тарихы бар «Шұғыла» бөбекжай-балабақшасы алғашында орыс тілінде тәлім-тәрбие беретін 140 орындық, екі қабаттық типтік жобамен салынған «Солнышко» бөбекжай-балабақша болып ашылған. Сол уақытта екі кіші, төрт жоғары топта 140 бала тәрбиеленді. Оқу-тәрбие процесі орыс тілінде жүрді.1989 жылы балабақшадағы оқу-тәрбие процесі қазақ тілінде жүретін балабақша болуына байланысты №4 «Солнышко» балалар комбинаты №4 «Шұғыла» балабақшасы болып өзгертілді. 1997-1998 оқу жылы аралығындағы оңтайландыру саясаты кезінде балабақша жабылды. Балабақша 1998-1999 оқу жылынан бастап қайта ашылды.Қазіргі таңда кәсіпорын «Қызылорда облысының білім басқармасының «Қазалы ауданы бойынша білім бөлімінің №4 «Шұғыла» бөбекжай-балабақшасы» коммуналдық мемлекеттік қазыналық кәсіпорны болып қайта аталды. Балабақшадағы алты топта 140 бала тәрбиеленуде. Бұнда ересек «Балауса», «Айгөлек», ортаңғы «Ақбота», «Ертөстік» кіші «Құлыншақ» және «Қызғалдақ» топтары бар. Педагогтар саны 25. Жоғары білімдісі 22, арнаулы орта білімдісі 3-еу. Бір басшы-менеджер, бір Педагог-зерттеуші, бес. педагог-сарапшы, 6 педагог-модератор, II-ші санат -3, санаты жоқ -9 маман қызмет етеді.<blockquote>«Балабақша үздіксіз білім беру арқасында еліміздің ертеңі өсіп келе жатқан жас ұрпақтың білімін тереңдетті. Білімді, жан-жақты қабілетті ұрпақ – ұлтымыздың баға жетпес қазынасын тәрбиелеп шығарды. Әрбір топ жеке ойын, жатын бөлмелермен, жұмсақ және қатты жиһаздармен, дүние – мүліктермен қамтамасыз етілген. Топтарда бала өмірін ұйымдастыруды қамтамасыз ететін пәндік дамытушы орталықтар ұйымдастырылған. Балабақшада санитарлық – гигиеналық талаптар сақталған. Тазарту, жуу залалсыздандыруға қажетті құралдармен қамтамасыз етілген. Баланың жас ерекшелігіне сай түрлі көрнекілік құралдармен жабықталған. Сондай-ақ ізденуге арналған түрлі материалдар, эксперименттеу, коллекция жинақтау жұмыстарына арналған заттармен, көрнекті, дидактикалық материалдармен, ойыншықтармен қамтамасыз етілген. Әдістемелік тұрғыдан жинақталған педагогтардың кәсіби шеберлігін арттыруға бағытталған электронды көрнекі-әдістемелік құралдар, мультимедиялық құрал-жабдықтар, қажетті техникалық құралдар, музыка орталығы, компьютер, ноутбук, планшет, принтер, сканер бар», – дейді балабақша меңгерушісі Айгүл Ерішова.</blockquote>Тәрбиеленушілердің сұраныстарын ескере отырып, ойыншықтар мен дамытушы ойын түрлері, спорттық жаңа жабдықтар пайдалануға берілген. Әр топ көгілдір экранды телевизорлармен жабдықталған. Блім сапасын дамытуда, балалардың ой-өрісін арттыруда «Монтоссори» «Воскобович дамыту ойыншықтары» алынып, пайдаланылып келеді. «Электрондық қазақ үй» «Сиқырлы қалам», «Дана» желілес дыбысты кітаптар, «Ақылды қоян», «Развлечение и изучение» электронды оқулықтары да тәрбиеленушілердің жан-жақты дамуына септігін тигізуде.Балабақшаның спорт залы батут, балаларға арналған матрас, кегли, массажный дорожка, балаларға арналған гпнтель, кольцеброс, скакалка, гимнастикалық палкалар, обруч, доптар және түрлі заманауи спорттық құрал жабдықтармен жабдықталған. Ән-әуез залында домбра, жетіген, басқа да ұлттық аспаптар және қазіргі заманауи дыбыс күшейткіш, синтезатор, микрофондар, усилитель 3/1, ноутбук, түсті музыка құрылғылары бар.Балалардың жеке дара қабілеттері бойынша шығармашылық әлеуетін, танымдық, эстетикалық қабілеттерін дамытуға арналған «Логика» танымдық ойындар, «Балдаурен» аспаптар ансаблі, «Жетіген» ән, «Сымбат» би үйірмесі, «Қуыршақ» театры, «Сиқырлы қалам» дәстүрден тыс сурет салу, «Алтын асық» ұлттық ойын, «Тілашар» ,«Шебер қолдар» атты шығармашылық үйірмелер жұмыс жасайды. Балаларға арналған халық ертегілері, ақын-жазушыларының ертегі-аңыздары, танымдық және электронды кітаптар бар. Тәрбиешілер өз тобының жас ерекшелігіне арналған әдістемелік құралдармен, бағдарламалармен, міндетті білім беру стандартымен және балаларға арналған ертегі кітаптармен қамтамасыз етілген.Бір байқағанымыз бұнда ата-аналар мен балабақша қызметкерлері арасындағы байланыс жақсы жолға қойылған. Ата-аналармен бірлесе түрлі кездесу кештері, пікір –сайыс, дөңгелек үстел, тренинг, конференция өткізіліп тұрады. Топтық жиналыстарда ата-аналарға тәрбиешілер, психолог, әдіскер, логопед, медбике түрлі кеңестер беріп, ой бөлісіп отырды.Балабақшада арнайы құрал-жабдықтармен жасақталған логопед кабинеті бар. Онда 11 ерекше білім беру қажеттіліктері бар балалар оқытылуда. Арнайы логопед маман жұмыс жасайды. Қауіпсіздікті сақтауда қатаң қолға алынған. Бұл ретте 22 бейнебақылау құралы жұмыс істеп тұр. Балабақша педагогтары үнемі ізденіс үстінде жүреді. Олар өз білімдерін жетілдіріп, түрлі біліктілік арттыру курстарына қатысты. Нәтижесі де жоқ емес. 2022-2023 оқу жылына арналған оқу-тәрбие жұмыстары жоспар бойынша жоғары деңгейде жүргізіліп, педагогтар мен тәрбиеленушілер біршама жетістікке жеткен.Республикалық «Alma Production» шығармашылық орталығының «Шабыт Тарландары» халықаралық шығармашылық байқауының «Аспапта ойнау» номинациясы бойынша балабақша бүлдіршіндерінен құралған «Балдәурен» ансамблі бас жүлде иеленіп арнайы дипломмен кубокпен марапатталды. Балғындарды өнерге баулыған жетекшілері Гүлмира Кушжанова мен Ертуған Ізтілеуов «Алғыс хат» иеленді. Аталған байқауда «Аспапта ойнау» номинациясы бойынша тәрбиеленуші Аңсар Жанғалидың өнері бас жүлдеге лайық деп бағаланды. «Қазақстан – бақытты балалар мекені» I Халықаралық шығармашылық фестиваль конкурсының «Аспапта орындаушылық өнері–Қасықтар ансамблі» номинациясы бойынша бүлдіршіндерден құралған топ тағы да топ жарды. Бас жүлдені қанжығаға байлап, арнайы дипломмен кубок алды. Жетекшілері Гүлмира Кушжанова мен Даметкен Сұлтанова «Құрмет грамотасымен» марапатталды. Өнерлі өрендер Әмина Нұрсұлтан, Дильназ Әли және бір топ бүлдіршіндер «Диплом» иеленді.Роза Бағланова 100 жылдық мерейтойына орай «Қазағымның бұлбұлы» атты республикалық балалар мен ересектер байқауында балабақша педагогтері Гулмира Кушжанова, Жеңіскүл Қожахметова, Нұргүл Ешимова, Алтын Орыналиева, Даметкен Сұлтанова, Майра Алимбетова, Гүлбану Жазықбай, Нұргүл Мыңбаева «Диплом» иеленді. Бүлдіршіндер Дильназ Әли, Нұрсауле Байғани, Айша Болат, Аяла Абдулла және бір топ бүлдіршіндер «Диплом» марапатталды. Қазақстан Республикасы «Жеті өнер» шығармашылық орталығының ұйымдастырумен өткізілген «Ұстазға мың алғыс» республикалық шығармашылық конкурсынан Нұргүл Мыңбаева «Құрмет грамотасын» алды.«FLTYN DFUYS» балалар шығармашылық орталығы өткізген I Республикалық «FLTYN DFUYS» балалар өнер шығармашылық байқауының «Алғыс» хатымен Нұргүл Мыңбаева марапатталды. Қазалы ауданы әкімдігі Ғани Мұратбаевтың туылғанына 120 жыл толуына орай өткізілген марафонында Жолмағанбет Рахметов атындағы жүлделі бірінші орынмен Элмира Медетбай «Диплом» иеленді. Қазалы аудандық білім қызметкерлері кәсіподақ комитеті атынан «Қашықтықтан оқыту форматындағы «Үздік бейне сабақ» облыстық байқауының аудандық кезеңіне қатысып, «Шығармашыл педагог» номинациясымен Айман Сексембаева марапатталды. Халықаралық «Ғұмырдария» өнер байқауына белсене қатысып, егемен еліміздің ертеңін ойлайтын, зерделі де зейінді, қабілетті де қайырымды, өнерлі шәкірт тәрбиелегені үшін №4 «Шұғыла» бөбекжай-балабақшасы ұжымы Алғыс хатқа лайықты деп танылды.Осы байқаудың «Аспапта ойнау» номинациясы бойынша Гүлмира Кушжанова, Арықбаева Баян жетекшілік еткен балабақша бүлдіршіндерінен құралған «Балдәурен» ұрмалы аспаптар ансамблі «Бас жүлде» иеленіп, арнайы дипломмен, кубокпен марапатталды. Өнерлі өрендер Анель Ким, Жанерке Ғабидулла, Әли-Имран Мақсат және бір топ бүлдіршіндер «Диплом» иеленді.Балалардың бойына тәрбие мен білімді тел сіңіру жолында тер төгіп келе жатқан балабақша ұжымы заман ағымынан әсте қалған емес. Жаңашылдыққа жаны құмар балабақша басшысы мен тәрбиешілер балғындардың әр сәтін әсерлі өткізуіне күш салып келеді. Білімнің баспалдағына айналған киелі орында әрбір тәрбиеленушіге елдің ертеңі, келешектің иесі деп қарайды. Осы ұстанымды үнемі есте ұстайтын ұжым педагогикалық үрдісті ұйымдастыруда жаңашыл әдіс-тәсілдерді, тың идеяларды жүзеге асырады.Балабақша ұжымы жаңа педагогикалық технологияларды меңгере отырып, оқыту мен тәрбиелеуде инновациялық ойын технологиясының элементтерін пайдалана отырып, жан - жақты, білімді, құзыретті тұлға тәрбиелеуді басты мақсат еткен.

Ширек ғасыр белесіндегі балабақша

<a href="https://kyzylorda-news.kz/">Kyzylorda-news.kz.</a> Әкелер күніне орай Абылай хан атындағы №140 орта мектебінде «Әке – бала қорғаны» атты лекторий өтті. Оған Қызылорда облыстық қоғамдық даму басқармасының басшысы Алмасбек Есмаханов, облыс әкімі жанындағы әйелдер істері және отбасы-демографиялық саясат жөніндегі комиссия хатшысы Қаламқас Каримова және отбасы институтын дамытуға үлес қосып жүрген түрлі сала мамандары, оқушылар мен ата-аналар қатысты.Қызылорда облыс әкімі жанындағы әйелдер істері және отбасылық-демографиялық саясат жөніндегі комиссия, Абылай хан атындағы №140 қазақ орта мектебі, облыстық ҚХА жанындағы Аналар кеңесінің бірлескен шарасының басты мақсаты – отбасындағы ата, әке, ер азаматтың рөлінін мәнін ұғындыру, әкені қадір тұту, сүйіспеншілік құндылықтарды қалыптастыру. Оқушыларға отбасының ұйытқысы, негізгі тірегі ата мен әке екенін дәріптеу. Әке мен бала арасындағы тығыз әрі ыстық байланысты игерту.Шараның алғы сөзі Қызылорда облыстық қоғамдық даму басқармасының басшысы Алмасбек Есмахановқа берілді.<blockquote>«Ақпарат және әлеуметтік даму министрлігінің бастамасымен еліміздегі мерекелік күндердің тізбесіне Әкелер күні енгізілді. Маусымның үшінші жексенбісі - Әкелер күні болып бекітілді. Әке - ұрпақтың панасы, үйдің басшысы, әрі тәрбиешісі. Отбасындағы ынтымақ пен бірлік болуы әке тәрбиесіне тікелей байланысты. Әкелер күні – олардың отбасындағы беделін көтеруге, құттықтауға және олардың бала тәрбиесіне деген жауапкершілігін арттыруға себеп болады», - деді Алмасбек Есмаханов.</blockquote>Танымдық шараға қатысушылар аға, орта, жас буын әкелерден кеңес алды. Лекторидің бірінші бөлімінде «Парасатты отбасы» жобасы аясында шеберлік сыныбы өтті. Екінші бөлімде «Ата-ана жұмысындағы бір күн» жобасы негізінде кәсіби тәжірибелік тұжырымдамасы көпшіліктің назарына ұсынылды. Ал үшінші бөлімде «Қамқор аға, қамқор әпке» жобасы таныстырылды.Шара соңында Абылай хан атындағы №140 орта мектебінің директоры, Аналар кеңесінің белсенді мүшесі Айгүл Мұсабаеваға қатысушылар алғысын білдіріп, отбасы институтын нығайту бағытында сүбелі үлестерін қосқан әкелер марапатталды.

Қызылордада «Әке – бала қорғаны» тақырыбында лекторий өтті

<a href="https://kyzylorda-news.kz/">Kyzylorda-news.kz.</a> Маусымның үшінші жексенбісі – медицина қызметкерлерінің күні. Мерейлі мереке қарсаңында адам жанына араша түсіп, жедел қызметке жүгінгендердің дертіне дауа болып жүрген Қызылорда облыстық медициналық жедел жәрдем станциясының Қазалы жедел жәрдем құрылымдық бөлімшесіне бағыт алдық. Ондағы мақсат – жылына бір рет келетін күнтізбедегі арнаулы күнді айналып өтпей, ұйымшыл ұжымның жаңалықтарына қанығып, бөлім меңгерушісі Данияр Баекеевпен әңгімелесіп, сұхбат құру. Олай болса, тынымсыз тірлік арасындағы тілдесуді сіздердің назарларыңызға ұсынамыз.– Данияр Берікұлы, алдымен келіп жеткен төл мерекеңізбен шын жүректен құттықтаймын. Мерейлі мерекедегі сұхбатымызды жағымды жаңалықтардан бастасақ. Бөлім жұмысындағы жаңашылдықтармен бөліссеңіз.– Құттықтауыңызға көп рақмет. Бөлімде ауыз толтырып айтатын жаңалық жетерлік деуге болады. Бүгінгі таңда бөлімше ғимараты толық күрделі жөндеуден өткен. Жаңа санитарлық автокөліктермен қамтамасыз етіліп, заманауи үлгідегі медициналық құрал-жабдықтармен де жабдықталған. Атап айтатын болсақ, электрокардиограф, жасанды оттегі беру аппараты, ферталдық доплер аппараты, соңғы үлгідегі монитор, реанимациялық наборлармен жабдықталған. 1 дәрігерлік бригада және 4 фельдшерлік бригада тәулік бойы жұмыс жасайды. Қазіргі уақытта №225 бұйрық бойынша Қазалы ауданының 77027 халыққа тәулік бойы қызмет көрсетудеміз.– Жедел жәрдем қызметіне біршама өзгерістер енгенін білеміз. Белгіленген санат бойынша қызмет көрсететінінен хабардармыз. Десе де мұны көпшілігі қаперге алмай, бұл қызметке жиі наразылығын білдіріп жатады. Осы орайда халық ескермейтін санат турасында толығырақ ақпарат беріп өтсеңіз.– Иә, бүгінде жедел-жәрдем 4 санат бойынша қызмет көрсетеді. Расымен де, сіз айтқандай жедел жәрдемнің келу уақыты жеделділік санатына байланысты екендігін жұртшылық біле бермейді. Білсе де ескермей жатады. Осы орайда жедел-жәрдем қызметі шұғыл көмек көрсетудің 4 санаты бойынша қызмет көрсететінін тағы да еске салғым келеді.Жедел жәрдем шақыру науқастың ауру нышанына және жеделдігі бойынша былай топтастырылған. Бірінші санат – науқастың жағдайы өмірге тікелей қауіп төндіргенде және дереу медициналық көмекке мұқтаж болса бригада діттеген жерге 10 минут ішінде жетуі тиіс. Ал екінші санат бойынша науқастың медициналық көмексіз өміріне қауіп төнуі ықтимал жағдайда бригаданың келу уақыты 15 минутқа дейін деп көрсетілген. Үшінші санатта науқастың медициналық көмексіз денсаулығына зиян келуі мүмкін жағдайда жедел жәрдем 30 минут аралығында жетеді. Төртінші санатта науқастың өмірі мен денсаулығына тікелей қауіп төнбеген кезде, науқастың жағдайы өткір немесе созылмалы аурудың шиеленісуіне, ағзалары мен жүйелердің кенеттен және анық бұзылыстан туындаған кезде бригаданың келу уақыты 60 минутқа дейін созылады. Жалпы соңғы санатқа қатысты халық тарапынан түрлі наразылық туындайтыны рас. Дегенмен мына жайтты халық білуі тиіс. Төртінші санатта адам өміріне қауіп төнбеген жағдайда шақырту емханалар жанындағы кезек күттірмейтін көмек бөлімшелеріне жолданады. Сондықтан тұрғындар әр санатқа белгіленген нақты регламент бар екендігін ескеріп, сабырлылық танытса екен деймін.− Сіздің қызмет аты айтып тұрғандай, жедел болған соң, шұғыл іс-әрекетті талап ететіні белгілі. Тіпті сабыр мен төзім сыналып, ортада адам өмірі тұрады. Осындай сәттерде мамандардың кәсібилігі мен кешенді қызметі маңызға ие. Бөлімде кадр мәселесі қалай шешілген? Қанша маман жұмыс істейді?– Иә, оныңыз рас. Жедел жәрдемде қызмет ету екінің бірінің қолынан келеді деп айту қиын. Себебі біздің қызмет асқан төзімділікті, жауапкершілікті қажет етеді. Бөлімшедегі қызметкерлер өз ісіне берілген нағыз мамандар. Мұнда еңбек өтілі біршама жылды құрайтын, тәжірибесі толысқан кәсіби мамандармен қатар аға буынның жолын жалғаған жас мамандар да еңбек етуде. Бүгінде бөлімшеде 2 дәрігер, 39 фельдшер, 10 мейіркеш, 22 жүргізуші, 7 техникалық қызметкер қызмет етеді.– Жедел-жәрдемде қызмет ететін қызметкердің кәсібилігінен бөлек бойында қандай қасиеттер болуы керек деп ойлайсыз?– Ең алдымен батылдық қажет деп ойлаймын. Қандай жағдайда да батыл шешім қабылдай алу керек. Сондай-ақ жан-жақты сауаттылық қажет. Себебі, жедел жәрдем дәрігерінің басқа мамандықтағы дәрігерлердің, атап айтар болсақ акушер-гинеколог, терапевт, педиатр сияқты біліктілігі болуы керек. Нұсқаулық беру кезінде ұйымдастырушылық қабілеттің де болуы маңызды.– Сіздің жұмыста адамдардың қайғысымен бетпе-бет келетін сәттер аз болмайды. Мұндайда салқынқандылықты жоғалтпау да маңызды. Осындай кезеңдерде бойдағы эмоционалдық кедергілерді қалай жеңесіздер?– Кез келген дәрігер алғашқыда науқастың жағдайын эмоционалды тұрғыда қабылдайды, алаңдаушылық танытады. Дегенмен уақыт өте келе бұл кедергілерден бәрі өтеді. Әрине бұл тез орын алатын жайт емес. Бұл жылдармен, тәжірибемен келеді. Дегенмен осы мамандықты таңдаған әрбір адам осындай жағдаяттармен бетпе-бет келетініне алдын-ала дайын болса, эмоциялар мен эмпатияны өздігінен бір жаққа қоюды үйренеді деп ойлаймын. Оның үстіне біздің жұмыс эмоциямен серік болуға арналмаған. Бұл қателікке ұрындыруы мүмкін. Сондықтан қандай жағдай болса да, салқынқандылық таныту бірінші кезекте тұрады. Медицина қызметкері болғандықтан этиканы қатаң сақтап, науқаспен және оның туыстарымен адамгершілік тұрғыда сөйлесіп, олардың қайғысына ортақтасып, сабырлылыққа шақыру да біздің міндетіміз. Біз мұны да қаперде ұстаймыз. Бірақ дәрігер әр нәрсенің өз шекарасы болатынын үнемі қаперден шығармай, бақылауда ұстай білуі керек.– Жұмыстан тыс уақытта жедел көмек көрсеткен сәттер болды ма?– Әрине болып тұрады. Тіпті жиі десем қателеспеймін. Медицина қызметкері ретінде қай уақыт, қай мезгіл болмасын көмек көрсетуге әзірміз. Егер қолымыздан келіп тұрып, қол ұшын созбасақ, қызметімнен бұрын, адамдығыма сын болады деп ойлаймын. Көмекке мұқтаж жанның дертіне дауа болып, санасында сәулелі із қалдыра алсам – арманымның орындалғаны. Себебі, менің бұл мамандықты таңдаудағы мақсатым да – тәні мен жанына көлеңке түскен жандарға көмек көрсету болатын.– Қай әлеуметтік желіні ашып қарасақ та, жедел-жәрдем қызметіне айтылар сын көп. Мұны қалай қабылдайсыз және айтылған пікірлер қаншалықты орынды?– Сын – адамзатқа тән нәрсе. Дегенмен оның қандай мақсатпен айтылатыны өте маңызды. Егер жанашырлықпен айтылса, оның жөні бөлек. Егер сондай пікірлер болса, әрине оны оң қабылдаймыз. Бірақ кейде кейбір адамдар біздің қызметті білмей, жөнсіз сынап, жұрт арасында түрлі көзқарас қалыптастырып жатады. Күні-түні тынымсыз еңбек ететін ақ халаттылардың жұмысына бұлай шек келтіру орынсыз деп есептеймін. Себебі жедел-жәрдем қызметінің артында жұртшылық біле бермейтін қиындық жатыр.– Көпшілік арасында бұл мамандық мансаптық өсуге арналмаған деген пікірлер жиі айтылып жүр. Сіздің көзқарасыңыз.– Ол рас. Жедел жәрдем қызметі мансаптық өсуге арналмаған. Себебі, жедел жәрдем жұмысы «алтын сағат» қағидасына негізделген. Дәрігерлер осы қағиданы берік ұстанады. Бұл мамандықты таңдаған әрбір дәрігердің басты миссиясы қызмет бабында саты бойынша өсіп, мансапқа ие болу емес. Басты мақсат – белгіленген уақыт аралығында науқасқа жетіп, жедел көмек көрсету, адам жанына араша болу. Мен жедел жәрдемде қызмет ететін кез келген дәрігер мансаптық өсуді көздемейді деп анық айта аламын. Себебі, біз үшін адам өмірін құтқарудан асқан жетістік жоқ.– Қарбалас жұмыс арасынан алтын уақытыңызды бөліп, сұхбат бергеніңізге рақмет. Жұмыстарыңызға сәттілік тілеймін.

Данияр Баекеева: Адам өмірін құтқарудан асқан жетістік жоқ

<a href="https://kyzylorda-news.kz/">Kyzylorda-news.kz.</a>&nbsp; Қызылордада 22 жастағы азаматдүние жүзінде әлі емі табыла қоймаған «Хираяма» ауруына шалдыққан. Айықпас дерт әлемде тек 800-дей ғана адамның бойын билеген. Бауыр еті баласы үшін барын беруге даяр ата-анаcы ем іздеп, түрлі қарекетке барады.&nbsp;<blockquote>Екі жыл бұрын үлкен ұлымыздың «Хираяма» ауруына шалдыққаны отбасымызға қайғы бұлттарын үйді. Түнде ұйқыдан, күндізкүлкіденайырылдық. Баламыздың бойына жабысқан дерт тоқтаусыз өрши берді.&nbsp; Сырын ішіне бүккен бұл бәлекет аурудың емін іздеп, түрлі медициналық-зерттеу институттары мен орталықтарға жүгіндік. Алайда, айтарлықтай күткен нәтиже бола қоймағасын, Израиль мен Германия еліндегі дәрігерлерге апару ойға келді. Дегенмен,«Ұлттық нейрохирургия орталығында да білікті мамандар бар» деген кеңеске құлақ асып, баламызды Астана қаласына апардық,-деді Жаңагүл Сейділдаева.</blockquote>Анасының айтуынша,медицинада бұл дерттен толық айығып шығудың төте жолы табылмаған. Тек мойын омыртқаларына ота жасау әдісі ғанакөңілге медет сыйлайды.&nbsp;<blockquote>&nbsp;Бізге ота өте күрделі өтетінін айтты. Мойын омыртқаларының бір бөлігін кесу барысында омыртқа ішіндегі жұлынды зақымдап алмауымыз қажет деді. Егер абайсыздан жұлын зақымданған жағдайда, тұла бойы тұңғышымыздың арбаға танылып, қимыл-қозғалысы тежеліп қалуы бек мүмкін. Бар үмітімізді тағдырдың жазуына артып, Алланың сынақ-сыйына көнуден басқа амалымыз қалмады. Тәуекел етіп, ота жасатуға келісім беруге бел будық,-деді анасы Жаңагүл.&nbsp;</blockquote>Отандық дәрігелер біліктілігін тағы бір рет дәлелдеп, бойларына үміт пен күдік ұялаған отбасыға ерекше қуаныш сыйлады. Тәжірибелі дәрігер-нерохирург Алейников Виктор Григорьевич бастаған дәрігерлер тобы балаға 4 сағаттан астам уақыт ота жасап, оны іліксіз өткізді. Аналық сезімін жасыра алмаған Жаңагүл редакцияға хабарласып, дәрігерлерге алғысын жеткізуді өтінді.&nbsp;Қазір баланың жағдайы бірқалыпты. Дегенмен, бұл аурудан толық айықты деген сөз емес. Бастапқыда қолы жансызданып, қимыл-әрекетті сезінбей қалған баланың көз жанары оянып, ата-анасын қуанышқа бөледі.&nbsp;&nbsp;&nbsp;

Дәрігерлер әлемде сирек кездесетін аурумен ауыратын қызылордалық балаға үміт сыйлады

<a href="https://kyzylorda-news.kz/">Kyzylorda-news.kz.</a> Халыққа сапалы медициналық қызмет көрсетуде Жалағаш аудандық ауруханасы жүйелі жұмыс жасап келеді. Жаңадан бой көтерген нысан қазіргі таңда барлық талаптарға сай, заманауи жабдықтармен қамтамасыз етілген және білікті дәрігерлер қатары көбейген. Адам жаны қысылғанда алғашқы болып көмек қолын созатын жандардың еңбегін елеусіз қалдыру мүмкін емес. Сол себепті біз бұған дейін аудандық аурухананың бірнеше бөлімінің жұмыс барысын газет бетінде жариялаған едік. Ал бүгінгі мақаламызда аудандық аурухананың балалар бөлімінің тыныс-тіршілігін тарқатпақпыз.&nbsp;Бала – өміріңнің жалғасы, жаныңның ең нәзік бөлшегі. Бала деп қуанамыз, бала деп мұңаямыз. Қазақ халқы сол асыл перзенттеріне деген ерекше махаббатын «Баламның табанына кірген тікен менің маңдайыма қадалсын» деген бірауыз сөзбен жеткізеді. Аудандық ауруханаға бас сұққаннан еңсемізді басқан ауырлық көңілімізді жан-жаққа бұрғызбады. Түсінікті ғой, аурухана талай жанның өмірімен арпалысатын, қанша адамның жанына батқан аурумен күресетін орын ғой. Біраз жүрген соң барып томаға тұйық ойымызды балалардың дауысы бөлім жіберді. Сөйтсек, балалар бөліміне де келіп қалыппыз. Сонымен тілшілік міндетімізді ұмытпай, бөлімнің дәрігері Назира Алтаеваға жолықтық. Алғашқы сауалымызды бөлімнің тыныс-тіршілігінен бастауын сұраған бізге Н.Алтаева балалар бөлімінде тәуліктік 17 төсек орын, 5 күндізгі төсек орын бар екенін айтты.Дәрігердің сөзінше, 17 төсек орынның 15-і балалар соматикасы, 5 төсек балалар неврологиясы. Бөлімшеде жалпы штат бірлігі 14, оның ішінде дәрігер 1, аға медбике 1, кезекші мейірбикелер 6, кіші аяжан 4, шаруа бикесі 1, санитар буфетші 1. Жұмыс жасайтын қызметкерлер саны 18. Балалар бөлімінде барлығы 8 палата бар. 1 палата интенсивті науқастарға арналған. Интенсивті палата орта¬лықтандырылған оттегімен жабдықталған бөлме. Айта кетейін, балалар бөлімінің дәрігері Назира Нағашыбайқызының жалпы еңбек өтілі 30 жылдан асыпты. Жоғары білікті дәрігер қызмет барысында жинаған тәжірибесін өзінен кейінгі мамандармен бөлісуді әдетке айналдырған. Бөлімдегі ақ халатты абзал жандардың барлығы біліктілігін арттырған, сондай-ақ бала ауырып түскенде көрсетілетін ең алғашқы көмектің талап-ережелерін жетік меңгерген екен. Бұл тұрғыда арнайы оқытылғанын да айта кетті дәрігер Назира Алтаева.Мұнан соң бөлім дәрігері көп кідірместен «палаталардағы балалардың жай-күйін білуім керек» деп сұхбатты сонан соң жалғастыра алатынын жеткізді. Иә, адам өмірі, оның ішінде балалардың денсаулығы бүкіл қоғам үшін бірінші орында. Біз де дәрігердің жұмысына кедергі келтірмейік деген ниетпен палаталардағы балалардың жағдайын көруге асықтық. Дәрігер барлық палатаны аралап шықты. Әрине, оңай емес екенін айта кету керек. Балалар ауырып тұр, оның үстіне егілетін инеден қорқатыны тағы бар. Әңгіме арасында бөлімнің жұмысынан хабар беріп отырған Назира Нағашыбайқызы соңғы жылдары балалардың ауырып ауруханаға түсуі көбейіп кеткенін жасырмады. Көбіне бөлімшеге маусымдық аурулардың өршу кезінде балалар арасында пневмония, жоғарғы тыныс жолдарының қабынуы ауруларымен науқастар ем алады. Сонымен қатар аллергиялық дерматит, несеп, зәр шығару жолдарының қабыну аурулары диагноздарымен де жиі түсетін көрінеді. &nbsp;Жалпы, балалар бөлімі бойынша осы жылдың 5 айында ем қабылдап шыққан науқастар саны 367. Оның ішінде жоспарлы түскені 91 болса, бұл көрсеткіш өткен жылдың есепті кезеңімен салыстырғанда 80-ді құрайды. Ал &nbsp;шұғыл түскені 276 науқас, өткен жылы 194 науқас тіркелген. Биылғы жыл басынан бері қайтыс болған жағдай тіркелмеген, ал өткен жылдың осы кезеңінде 1 бала өмірімен қоштасқан. Балалар бөлімшесінің жұмысымен танысқан біз мұндағы ақ халатты абзал жандардың біліктілігін байқадық. Олардың әрбірі тынымсыз қауырт жұмысымен жүрді. Бірі палаталардағы балаларды қарайласа, бірі ем-дом шараларын жасап жатты. Тіпті бөлім дәрігерінің өзі әлсін-әлсін балалардың өкпесін тыңдап, олардың аналарына дәрігерлік кеңесін айтумен болды. Мөлдір әлемнің кейіпкерлері – балғын балалық шақтың нағыз шынайы бүлдіршіндері мұнда мейірімнен кенде еместігіне және көзіміз жетті. Дәрігердің әр баламен балаша сөйлесуі, жылы сөздері мен шипалы алақаны еріксіз жаныңды жадыратып, көңіліңді демдейді. Бөлімнің жұмысына риза болған әріптесім екеуміз осындағы балалардың әрбірінің құлантаза айығып, отбасына оралуына тілекші болдық. Балалар ауырмасын, аналар ауырмасын дейміз.

Қазақстан және Қызылорда облысының жаңалықтары