<a href="https://kyzylorda-news.kz/">Kyzylorda-news.kz</a> Қоғамға, азаматтарға &nbsp;аса зор материалдық &nbsp;нұқсан келтіретін &nbsp;экономикалық қылмыстар &nbsp;өте қауіпті. Қазіргі кезде ол кең тарап, жаңа форматта өрбуде. Бұл ретте &nbsp;қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл саласында, сондай-ақ экономикалық және қаржылық қылмыстар мен құқық бұзушылықтардың алдын алу, оларды анықтау, жолын кесу, ашу және тергеп-тексеруде облыс бойынша экономикалық тергеп-тексеру департаменті бірқатар жұмыс атқаруда.&nbsp;Мәселен, осы жылдың І тоқсанында &nbsp;27 іс анықталып, оның 11-і өндіріспен аяқталған, яғни 6 іс сотқа жолданып, 5 іс ақталмайтын негізде тоқтатылған. Мемлекетке 620 млн теңге көлемінде залал келтіріліп, 455 млн теңгенің мүлігіне тыйым салынған. Сондай-ақ, &nbsp;қаржылық тергеп-тексеру &nbsp;барысында 47 млн теңгенің мүлігі анықталып, &nbsp;тыйым салу жұмыстары жүргізілген.<blockquote>− Аймақта құқық бұзушылықтың тіркелуі алдыңғы жылдарға қарағанда төмендеген. Бірақ бұл – қылмыс азайды деген сөз емес. Қазір біздер саннан гөрі сапаға көңіл бөлу ұстанымымен жұмыс жасаймыз, яғни, залал мөлшері көлемді (50 млн-нан жоғары) &nbsp;және бұған дейін жедел-іздестіру шаралары толық жүргізілген қылмыстық істерді анықтауға басымдық беріледі. Аса ірі емес құқық бұзушылықтар бойынша материалдар қаржы органдарына тексеруге ұсынылып, салықтық әкімшілендіру шеңберінде қарастырылады.Сондай-ақ,департамент қылмыстық істерді 100% электронды форматта тіркеп аяқтайды. Барлық басым бағыт бойынша жүйелі жұмыс жүргізіліп, нәтижесімен жыл басынан бері 19 қылмыстық іс тіркелді. Осылайша есептік кезеңде залал мөлшері 252 млн теңгені құрайтын 58 автокөлік құралын заңсыз тіркеу фактісі анықталды. Сонымен қатар, мемлекеттік жеңілдетілген несиені заңсыз алу және алаяқтық деректері анықталып, сотқа дейін тергеу жүргізілуде, − дейді департамент басшысының міндетін атқарушы Арман Жанәділов.</blockquote>Бүгінде &nbsp;департамент ҚР ҚМА-ның қолға алған «Бизнесті қорғау» жобасы бойынша да жұмыстар жүргізуде. Бұл жоба өз ісін жауапкершілікпен және адал жүргізіп отырған кәсіпкерлердің құқықтарын қорғауға, құқықтық қудалауға ұшырауы мүмкін азаматтардың санын азайтуға бағытталған. &nbsp; Жыл басынан бері азаматтардың конституциялық құқықтарын бұзу фактілері орын алмаған.&nbsp;<blockquote>− ҚМА, ҰҚК, ІІМ және прокуратураның бірлескен бұйрығы негізінде жедел және тергеу кабинеттері видеокамерамен жабдықталған, бұл − барлық тергеу әрекеттерінің заң аясында жүргізілетінінің негізгі кепілі. Мұндай қадам қызметкерлер немесе қылмыстық процеске қатысушы тарапынан заңсыз әрекеттердің алдын-алуға немесе болдырмауға мүмкіндік береді, − дейді Арман Барысханұлы.</blockquote>Қалтаны қаққан қаржы пирамидасы Қоғамның алаңдаушылығын туғызған мәселенің бірі – қаржы пирамидасы мен интернет алаяқтықтың қарқын алуы. Елімізде түрлі форматтағы алаяқтық жобалар көбейіп барады. Бүгінде олар жұмысын әртараптандырып үлгерген. Сондай қаржы пирамидасының бірі – Q-Net. Қанша уақыттан бері елімізде жұмыс жасап, халықты қарызға батырған бұл пирамиданы көбі білсе де, құрығына түскендер қатары азаймай тұр.&nbsp;Бұл ретте &nbsp;Қызылордада «Qnet» қаржы пирамидасының құрылымдық бөлімшесінің ұйымдастырған ағайынды екі азамат ұсталып, &nbsp;5 жыл мерзімге сотталды. Олар құрылымдық бөлімшені облыс аумағында 2020-2021 жылдар аралығында &nbsp;құрған, қабылданған міндеттемелердің орындалуын қамтамасыз ететін кәсіпкерлік қызметке тартылған қаражатты пайдаланбай, осы активтерді қайта бөлу және басқа қатысушылардың жарналары есебінен байыту жолымен ұйымдастырып отырған.Аталған қаржы пирамидасынан 40 салымшы зардап шеккен. Шығын көлемі 53 млн теңгені құрайды. Сотқа дейінгі тергеп тексеру барысында келтірілген шығын салымшыларға &nbsp;толық қайтарылған. Сондай-ақ, жүргізілген профилактикалық жұмыстардың нәтижесінде жыл басынан бері «Кибернадзор» жүйесі арқылы 185 сілтеме бұғатталды, 5 аккаунт жойылды.Қоғам дерті – құмар ойынЖарнамасы мықты, ұсынысы көз қызықтырып адамдарды жолдан тайдырып отырған саланың бірі – заңсыз құмар ойындар. Түрлі форматтағы қаржылық алаяқтық жобаларының және заңсыз ойын орындарының құрығына ілігіп, қаражатынан айрылып, отбасы мен ортасының берекесін кетіріп жүрген жерлестеріміздің саны ондап, жүздеп, мыңдап өсіп барады.Мысалы, департамент 600 млн теңге көлемінде банктің ақшасын жымқырған екінші деңгейлі банктің қызметкеріне қатысты қылмыстық істі аяқтап, сотқа жолдаған.Тергеу барысында ұрланған ақшаның басым бөлігі құмар ойындар мен онлайн казиноларға жұмсалғаны анықталып отыр. Қылмыскер өз атынан тіркелген логиннің есепшотына бір ғана букмекерлік сайттың өзіне 160 млн теңге көлемінде ақша салған.&nbsp;<blockquote>− Құмар ойынның құрбанына айналмаудың бірден-бір жолы − алдын-алу жұмыстарын жүргізу. Департамент тарапынан халықтың қаржылық сауаттылығын арттыруға, құмар ойынның құрбаны болудың алдын-алуға, күмәнді қаржылық пирамидалар мен ойындарға қатысудан бас таруға бағытталған түрлі шаралар ұйымдастырады. Сондай-ақ, кейінгі уақытта әлеуметтік желілірде заңсыз ойындар ұйымдастыру үрдісі өсуде. Биыл заңсыз ойын бизнесі бойынша 2 қылмыстық іс тіркелді. Атап айтатын болсақ, аймақ тұрғыны «Instagram» әлеуметтік желісінде тікілей эфирде бәс тігушілердің қатысуымен ойын ойнайды. Одан түскен заңсыз кіріс 13 млн теңгеден асты. Қылмыстық іс сотқа жолданды, − дейді &nbsp;облыс бойынша экономикалық тергеп-тексеру департаменті тергеу басқармасының басшысы Ерлан Қасқырбайұлы.</blockquote>Айта кету керек, кейінгі 2 жылда департамент өндірісінде заңсыз ойын бизнесіне қатысты 23 қылмыстық іс тіркеліп, 22 ойын орны жабылған.&nbsp; − Құмар ойынға деген тәуелділік – қазақ қоғамына дендеп бара жатқан дерт. Бұл ретте біздер жергілікті «Qyzylorda» және «Қазақстан» ұлттық телеарнасымен бірлескен бірнеше талдау материалдарын жасап, оған ойынқұмарлықтан, ішімдіктен зардап шеккен кейіпкерлерді, психолог-дәрігерді қатыстырдық. Мұндай шаралар адамға ой салады, оң нәтижесін береді деген мақсатпен жасалып отыр. Сондай-ақ департамент қызметкерлері құқық бұзушылықтардың алдын алу мақсатында ауқымды ақпараттық-түсіндіру жұмысын жасауда. Білім беру, мектепке дейінгі оқу орындарында және ірі кәсіпорындарында қаржылық сауаттылық тақырыбы бойынша үнемі сабақтар жүргізіледі. &nbsp;Сонымен қатар облыстағы көленкелі экономика денгейін төмендету, қауіп-қатерлерді жою және туындаған мәселелерді шешу мақсатында департаменттің бастамасымен облыс әкімдігі жанында көлеңкелі экономикаға қарсы іс-қимыл жөніндегі комиссия кұрылды. Комиссия құрамына барлық мемлекеттік органдарының бірінші басшылары қосылды. Бұл комиссия аймақтың ерекшелігіне байланысты түйткілді мәселелерді қарайтын болады. Алғашқы кездесуді жақын арада өткізу жоспарлануда, − дейді департамент басшысының міндетін атқарушы. Жазадан − алдын алуғаБүгінде департамент жұмыс бағытын жазалаудан превенцияға қайта бағдарлап отыр. Бұл ретте департамент &nbsp;«Қызылорда-Ұлытау облысы шекарасы» (216 шақырым) көлік жолын қайта жаңғырту жобасына қашықтан талдау жүргізіп, нәтижесінде 1.5 млрд теңгеден астам қаражаттың мақсатсыз пайдалану тәуекелдерін анықтады.<blockquote>−Аталған деректер бойынша, «Қазавтожол» АҚ-на және облыстық әкімдікке, жол құрылысының сапасын бақылауға алу туралы хаттар жолданды.&nbsp; Уакытында қабылданған шаралар нәтижесінде жоба құнының негізсіз өсуіне жол берілмеді (жоба құны 70 млрд теңге), Ұлытау облысындағы осы тектес жобаның құны 90 млрд теңгеден 140 млрд теңгеге дейін, яғни 50 млрд теңгеге қымбаттады. Бұл бағытта жұмыс жалғасуда, тұрақты мониторинг жүргізілуде, − дейді Е.Қасқырбайұлы.</blockquote>Департамент жұмысының негізгі бағыттарының бірі – әлеуметтік маңызы бар азық-түлік тауарлары бағасын тұрақтандыру және қадағалау. &nbsp; Облыс әкімдігі жанынан құрылған комиссия ай сайын жергілікті жерде өндірілетін азық-түлік тауарларына (күріш, тұз) бағаны негізсіз көтеру, және әлеуметтік маңызы бар азық-түлік тауарларын жеткізуші делдалдардың бағасын қадағалайды.&nbsp;Әлеуметтік маңызы бар азық-түлік тауарларын сату барысындағы үстемесін асыру бойынша 4 факті анықталған. Асырғандар әкімшілік жауапкершілікке тартылды. Мемлекеттік органдарда сатып алудың кезінде өнімсіз делдалдарды жоюдың оң тәжірибесі бар, 3 мемлекеттік мекемеде 11 өнім бойынша 6 делдал алып тасталып, нәтижесінде баға төмендеп бюджет қаражаты 6 млн теңгеге үнемделді.&nbsp;<blockquote>− Өздеріңіз білетіндей, еліміздің 10 өңірінде су тасқынына байланысты төтенше жағдай режимі жарияланды. Қазіргі уақытта, ҚР Қаржы мониторинг агенттігімен еліміздің 3 өңірінде, селден қорғау бөгеттерін ұстауға және өзен арналарын кеңейтуге бөлінген бюджет қаражатын жымқыру фактілері бойынша сотқа дейінгі тергеп-тексеру басталған. Осыған сәйкес біздің департамент облыста су тасқынына қарсы іс шараларға бөлінген бюджет қаражатының жұмсалуына талдау жүргізіліп жатыр. Талдау қашықтан, бизнес қызметіне араласпай жүргізілетінін түсіндіргім келеді, − дейді А. Жанәділов.</blockquote>Экономикалық қылмыстарды әшкерелеу ұзақ уақытты талап етеді. Қаржы саласындағы заң бұзушылықтардың көлемін анықтау мен растау барысында өзге қаржы органдарының (аудит, салықт.б.) мәліметтері күтіледі. Қылмыстың ашылуы, залалдың мемлекетке қайтарылуы, тергеу сапасы, қылмыстық процесстерге қатысушылардың конституциялық құқығының бұзылмауы секілді &nbsp;критерийлер бойынша нақты межелер мен мерзімдер бекітілген. Сондықтан экономикалық қылмыстардың ашылуы және залалдың қалпына келтірілуі бойынша жылдам нәтиже күту қиын. Қалай десек де экономикалық қылмыстың алдын алуда департаментке артылатын жүк ауыр.Мейрамгүл ДауылбайқызыФото: Нұрболат Нұржаубай &nbsp;

Экономикалық қылмыстың алдын алуда атқарылған жұмыс көп

<a href="https://kyzylorda-news.kz/">Kyzylorda-news.kz</a>&nbsp;Республика бойынша Мемлекет басшысының бастамасымен «Таза Қазақстан» экологиялық акциясы қарқын алуда. Бес аптаға жоспарланған тазалық науқанының әр бөлігінің өзіне тән атауы мен мақсаты бар. Аталған акцияның «Киелі мекен» тақырыбындағы екінші аптасы тарихи-мәдени ескерткіштердің аумағын абаттандыруға арналған болатын. Осы орайда Шиелі ауданының тұрғындары да көктем шуағындағы сенбілік жұмыстарына үн қосты.Тазалық шарасы Шиелі ауданына қарасты «Оқшы ата» мазаратында жалғасын тапты. Ежелгі өркениеттің белгісі іспетті, бүгінде сыры кетсе де, сыны кетпеген оғыз-қыпшақ дәуірінің жәдігеріне айналған тарихи орынды абаттандыру жұмыстарына барлық кент және ауылдық округтерден жиналған 270 адам, 11 техника жұмылдырылды.&nbsp;Расында, еңбек атмосферасы адамдарды біріктіре түседі. Тұрғындар, әуелі, бір қорымда жерленген арыстардың рухына Құран бағыштап, кесене айналасын тазартып, аумақты қоқыстардан арылтып, арық қазып, су жүргізіп, жерге жас көшеттер отырғызды. Әйгілі жеті әулиенің, есімі дүйім жұртқа белгілі ділмар датқалардың ордасына айналған қасиетті орын табиғат перзенттерінің жұмыла атсалысуымен көркейе түсті.&nbsp;<blockquote>– Қазіргі таңда республика көлемінде «Таза Қазақстан» экологиялық акциясы, соның ішінде аудандық мешіттерді және қасиетті орындарды абаттандыру жұмыстары жүйелі түрде жүргізілуде. Бүгін әйгілі жеті әулие жерленген осындай киелі орынды тазалау мақсатында барлық ауылдан адамдар жиналып, іске кірісті. Бұндай тазалық жұмыстары, бір жағынан, тұрғындар арасындағы ауызбіршілік пен ынтымақты көрсетсе, екінші жағынан, сондай ауызбіршілік бар кезде үлкен жетістіктерге жететінімізді дәлелдеп отыр. Сондықтан Алла осындай игі қасиеттерімізден айырмасын.&nbsp;</blockquote>Пайғамбарымыз (с.ғ.с.) «Тазалық – иманның жартысы» деген болатын. Әрі таза жерге періштелер де үйір болады. Аталған шараны ұйымдастырып жатқан аудан әкімдігіне және оған атсалысып жатқан барша бауырларымызға Алланың нұры жаусын. Алла Тағала елімізге амандық, жұртымызға тыныштық беріп, таза ел, таза мемлекетте өмір сүруді нәсіп етсін, – дейді Шиелі ауданының бас имамы Бақыт Ұлжаев.&nbsp;«Атадан мал қалғанша, тал қалсын» демекші, аудан ардагерлері де жерге көшеттер отырғызып, көгалдандыру жұмыстарына үлестерін қосты. Еккен жасыл желектер алдағы бірнеше жылда кесене аумағын тоғайға айналдырады деген сенімде.&nbsp;Табиғат-Анаға жанашырлық танытып, туған мекенді таза ұстау – үлкен мәдениет пен талғамның белгісі. Экологиялық акция – жауапкершілік танытқан барлық топтарды жұмылдырып, көктемгі жаңарудың нышанына айналған тазалық жұмыстарының асқан маңыздылығын көрсетіп отыр. Асылында, адамзат табиғатпен және ондағы барлық тіршілікпен байланысты. Бұл – табиғат пен оның перзенті арасындағы тепе-теңдік болса керек. Ендеше, жақсы дәстүрлер жалғасын таба берсін.

"Киелі мекен": 270 адам, 11 техника

<a href="https://kyzylorda-news.kz/">Kyzylorda-news.kz</a> &nbsp;Жалағаш ауданына қарасты Мөрәлі Шәменов ауылына былтыр барғанымызда кіреберіс жолдың мәселесін ауыл әкімі Ғалымжан Есжановтың назарына салғанбыз. Аузын бақсақ, бұл жолдың жайы Ғалекеңнің де жанына батып жүр екен. Арнайы жоба дайындап, қаржылай қолдауға ұсынып қойғанын айтқан. Мақұлданса, ауылда жол мәселесі толық шешілгелі тұр.Бұлай деуімізге негіз жоқ емес, Ауылда бас-аяғы 12 көше бар. оның 10-ына асфальт төселген. Қалған екі көшеде жай тас жатыр. Ауылдағылардың бар тілегі осы «кіреберіс жол жақсарса» дейді. Кешегі сапарымызда қарқынды құ­ры­лыс жүріп жатыр екен. Шаңды бұрқыратып, техникалар ескі труба­ларды қазып алып тастаған. Жолдың бергі бетіне жаңасын түсіріп үлгеріпті. Ішімізден жақсылыққа жорып, «жоба қолдау тапқан екен» деп түйдік.Жаңылмаппыз, ауыл әкімінен ар­да­герлерге дейін құрылыстың ба­сында жүр, бәрі де балаша мәз. Енді қайтсін, ішкі көшелерің тақ­тайдай тегіс болғаннан не пайда, ауыз­дағы 4 шақырымдай жолың жайсыз болса, міне, енді оның да мәсе­лесі ше­шілгелі тұр.&nbsp;Ауылға алып баратын жолды бас мердігер «ӘлемТрансЖол» ЖШС жүр­гізуде. Облыстық филиал ди­рек­торы Сәрсенбек Махаев қазір құрылыс басында 10 адам жұмыс жасап жатқанын айтады. Серіктестік ұжымы алдымен ауылға дейін жолды кесетін 4 каналға трубалар орнатады. Содан кейін қиыршық тас төселеді, бетіне шебін сепкеннен кейін асфальт төсейді. Демек алдағы 1-2 айда бұл жол да халықтың игілігіне берілмек.&nbsp;<blockquote>– Қазір 2-2, 2-2,5 шаршы метр ескі трубалар қазылды, орны та­зар­­­тылып, жаңасын орнату жұ­мыс­тары жүруде. Енді ауылға дейін 1-1,5 шаршы метр болатын тағы 2 трубаның орны тазартылып, жаңасы салынады. Содан кейін жол құ­ры­лы­сына кірісеміз. Бұйыртса, көп ұзамай жолаушылар, жергілікті халық тақ­тайдай тегіс сапалы жолмен қа­ты­­найтын болады. Құ­ры­лыс жұмыстарын уақытында және са­палы аяқтаймыз. Оған біздің тех­­­никаларымыз жарақты, жұмыс­шыларымыз да тәжірибелі, – дейді серіктстіктіктің облыстық филиал директоры Сәрсенбек Махаев.</blockquote>Сәкеңнен сұхбат алып болға­ны­­­мыз сол еді, ауыл әкімі Ғалекең тағы бір жақсы жаңалықтың шетін шығарды. Сөзіне сүйенсек, әлгі тас төселген 2 ішкі көшенің орташа жөндеу жұмыстарына қатысты жоба әзір тұр екен. Жалпы құны 60 млн теңгеден асатын бұл жоба да қол­дау тапса, әлгі екі көше орташа жөн­деуден өтеді. Мұнан кейін Мөрәлі Шәменовтің жол мәселесі 100 пайыз шешімін тапқалы тұр.&nbsp;Айтпақшы, алдағы жылу маусы­мынан бастап бұл ауылдың халқы көгілдір отын тұтынады. Елді ме­кен жұрты үшін басты жаңалық осы бол­ғалы тұр. Біз барғанда мер­дігер мекеме трубаларды көму жұмыс­та­рын аяқтап қалыпты. Енді оларды жел­детіп, ішін тазартады. Мұнан кейін үйлерге газ тарту жұмыстары жүреді.&nbsp;Мердігер мекеменің операторы Самат Баймаханов қазір трубаларды орналастыру бойынша 3-4 күндік жұмыс қалғанын айтады. Сапасын тексертіп алғаннан кейін үйлерге газ тартылады. Негізінен бұл ауылда 197 отбасы бар екен.&nbsp;<blockquote>– Өзіміз ақпанның аяғында кел­дік, 27 ақпанда техника түсірдік. Тру­баларды орналастыруға ең таязы 1,2 метр және 1,40 метр тереңдікте қазып жатырмыз. Қазір оларды да орналастырып болып қалдық. Енді бас-аяғы 3-4 күндей жұмыс қалды. Қазір облыстан қажетті басқа да құрал-саймандар, қажетті мате­риал­дар келе жатыр. Барлығын болғасын желдетіп, тапсырыс беруші мекемеге сапасын көрсетеміз. Мұнан кейін үйлерге газ тарту жұмыстарына кірі­семіз. Қазір құрылыс басында 20-ға жуық адам жұмыс жасап жатыр. Алдағы 1 айда толық газ құрылысын аяқтауды жоспарлап отырмыз, – дейді оператор Самат Баймаханов.</blockquote>Сәкеңнің бұл салада 16 жылдық тәжірибесі бар. Бұл жобаны са­палы аяқтауға жауапкершілікпен қара­ғанын айтады. Себебі газ өте қауіпті болғандықтан оны тұрғындардың тұ­тынуында ешқандай мәселе бол­мауы керек деп есептейді.&nbsp;Жолы жөндеуден өткен, бір жа­ғынан көгілдір отын кіріп жатыр. Бұл ауылдың болашағы қандай екенін осыдан-ақ бағамдаса болатындай. Ауыл әкімінің елге деп еңбек етіп жатқаны жерлестерінің көз алдында. Орталықтан ауылға қатысты бір жобасы қолдау тапса, елді мекенге ба­лаша қуанып келеді екен. Бірлігі бекем, тірлігі түзу ауылдың соңғы жылдары біршама мәселесі шешіліп қалғандай.&nbsp;

Ауылға көгілдір отын тартылуда

&nbsp;<a href="https://kyzylorda-news.kz/">Kyzylorda-news.kz</a> «AMANAT» партиясының қалалық филиалына қарасты «Шаңырақ», «Жарық», «Дарын», «Атамекен», «Айқын», «Қызылорда темір жолы» бастауыш партия ұйымының төрағалары 2023 жылы атқарылған жұмыстары бойынша есеп берді.Бүгінде бастауыш партия ұйымдары жарнапұл жинағы, партиялық жобалардың іске асуы, ақпараттық қолдау, Жол картасының іске асуы бойынша белсенділік танытып, жоспарға сәйкес жүйелі жұмыстар атқарып келеді.&nbsp;Жиын барысында партияның қалалық филиалының Төрағасы Ибадулла Дүйсенбайұлы бастауыш партия ұйымдарының төрағалары жергілікті тұрғындардың өтініштерін орындауға атсалысып, партияның қалалық филиалымен үнемі байланыста отыру керектігін жеткізді.&nbsp;Сонымен қатар, алдағы жоспарға сәйкес жұмыстардың атқарылуына сәйкес тиісті тапсырмалар берді.&nbsp;Өткен жыл бастауыш партия ұйымдары үшін толайым табысқа толы, үлкен іс шаралардың іске асқан жылы болды.&nbsp;Себебі, партиялық жобалардың ауқымы кеңейіп, «Ауыл аманаты», «Жер аманаты», «Қарызсыз қоғам» жобалары бойынша бастауыш ұйым өкілдеріне жан-жақты түсіндірме жұмыстары жүргізілді.&nbsp;Мәселен, «Ауыл аманаты» жобасы аясында партияның қалалық филиалының кент пен ауылдық округтерден құралған бастауыш ұйымдарында ашық есік күндері өтті. Өткен жылы Мемлекет басшысы Қ.Тоқаев Үкіметпен бірлесіп «Қарызсыз қоғам» жобасының аясын арттыруды тапсырғандықтан, 2023 жылдың соңғы тоқсанында бастауыш партия ұйымдарында аталған жоба бойынша түсіндірме жұмыстары жүргізілді.Бүгінде партияның қалалық филиалына қарасты бастауыш ұйымдары партиялық жарна қаражатынан шотқа кері қайтарылатын 20% қаржыға партиялық жобалар аясында шаралар өткізуде. Бұл игі іс шаралар партия мүшелерін қоғамдық жұмысқа белсенді қатыстырып, жобалар бойынша шаралар ауқымын кеңейту бағытында атқарылуда.

Қызылордада бастауыш партия ұйымдарының төрағалары есеп берді

<a href="https://kyzylorda-news.kz/">Kyzylorda-news.kz</a> Қазақстан Республикасының Президенті Қасым-Жомарт Кемелұлы Тоқаев үшінші ұлттық Құрылтайда: "Жазушылар Одағының төрағасы, Ұлттық құрылтайдың мүшесі Мереке Құлкенов жақында осы мәселе туралы орынды пікір білдірді.&nbsp;Халқымыздың көрнекті тұлғалары бірін-бірі мойындап, өзара құрмет көрсете білсе, ұлтымыз ұйыса түседі деп айтты.&nbsp;Қазір ертеде өткен оқиғаларға, белгілі бір тұлғаларға қатысты талқылау көбейіп барады. Дәл осындай сөз тартыстарының ақиқатына жету қиын, жеткеннің өзінде ел ішіне іріткі салатын мұндай дау-дамайдың еш қажеті жоқ.&nbsp;Әр дәуірдің өз ерекшелігі бар. Әрбір тұлға өзінің көзқарасына, дүниетанымына қарай және өз қоғамының мүддесіне сәйкес елге қызмет етті. Олар, яғни, сол заманның қайраткерлері бір кездері ұстанған бағытына бола дауласса, ендігі ұрпақ кімнің ісі дұрыс, кімдікі бұрыс деп даурығып жүр. Жалпы, бұрынғы және қазіргі тарихтың түрлі кезеңдерін, тұлғаларын бір-біріне қарсы қоюға болмайды. Түптеп келгенде, мұның бәрі – біздің тарихымыз. Бұл – халқымыздың жүріп өткен жолы. Сол себепті, қалай десек те, тарихымызға шынайы көзбен қарап, оны сол қалпында қабылдауымыз керек" деген болатын.Расында Мемлекет басшысы айтқандай ұлт жылнамасы елді біріктіретін фактор болуға тиіс. "Қазақты бөліп-жаруға болмайды. Біз жалпыұлттық деңгейде ойлауға ұмтылуымыз керек. Мысалы, әрбір қазақ ата-бабасын құрметтейді, рухына тағзым етеді. Сондықтан шежіре біздің мәдени кодымыздың ажырамас бөлігіне айналған. Бірақ біз тек қана осы түсінікпен шектеліп қалмауымыз қажет. Ең бастысы, бұл мәселені ешқашан саясатпен араластыруға болмайды" деген ел Президентінің сөзі өте орынды айтылған.Расында оларға құрмет қылу баршаның міндеті. Осындай ұлағатты бастама ауданда да басталып жатыр. Әттең ажарын келтіремін десе осы Аралдың өзінде сонау ескіден сыр шертетін шежірелі дүниелер мен киелі мекендер көп-ақ. Тек соны жұртқа танытуда ұқсата алмайтын жеріміз көп. Арабтар жай ғана шөл даланың өзінен туристік әлеуетін қалыптастыра білді. Мысырлықтар ежелгі тас мүсіндер мен Пирамидаларын жұрт көзіне көрсету арқылы еліне табыс әкелсе, жапондар мен кәрістер таза табиғи жаратылыстар мен құбылыстарға құрметпен қарау арқылы әлемдік мәдниет һәм өркениет орната білді. Айта берсек мысал көп. Ал өзімізге келгенде қаншама тарихи жер-су атаулары бола тұра сол жерлерді өзгелерге таныта алмай келеміз. Әйтпесе бізде де мақтанатын жерлер жетіп артылады. Әлем назарындағы құрғаған Арал теңізінің ұлтаны мен құдды тас мүсін тәрізді қырат-жоталардың өзі неге тұрады?! Ол жерді сөзбен суреттеу өз алдына, көзбен көргенге ештеңе жетпейді. Соны қазіргі әлеуметтік желілердің мүмкіндігі арқылы әлемге тарата білсек туристік әлеует қалыптастыруға болар еді. Бұдан бөлек күллі ислам жұртына ортақ тұлға саналған, адамзаттың асыл тәжі Мұхаммед (с.ғ.с) пайғамбарымыздың көзін көрген сахаба, түрлі аңыздар мен әфсаналарда аманат арқалаушы алып тұлға Арыстан бабтың жеті жайының бірі осы Арал аймағанда орналасқан десе жұрт сенер ме еді?! Қасиетті Ақирек тауының үстінде орын тепкен қасиетті жердің көзден таса қалуы оның лайықты түрде айтылмауында шығар. Осындай қасиет қонған тұлғаны жайын дер шағында күллі түркі жұртына тарата білген Түркістан зиялылары өз мекендерін сол Арыстан баб, Қожа Ахмет Яссауи сынды даналардың киелі ошағына айналдырып, қасиет қонған өңір санатына енгізіп отыр. Ендеше сондай мүмкіндік бізде де бар емес пе?! Енді неге осындай қасиетті өңірлерді біз өзге жұртқа таныта алмай жатырмыз? Сұрақ біреу, бірақ жауабы сан түрлі сылтаулармен септеседі.Жарайды сонау совет заманында мұндай қазақы наным-сенімдер бойынша түрлі жөн-жоралғыларды жасауға мүмкіндік болмаған шығар. Қасиетті дініміз қысымға ұшыраған тұста мұндай мүмкіндіктерге жол берілмегені түсінікті. Алайда еліміз тәуелсіздік алып, Арал өз алдына аудан болғалы да 30 жылдан әрі уақыт болды. Сол жылдар ішінде аудан басшылығына бірнеше азаматтар келіп, олардың әрқайсысы еткен еңбегінің арқасында халықтан лайықты бағаларын алып кетті. Алайда солардың бірі де осы Ақирек тауының үстіндегі Арыстан баб бабаның басына лайықты құрметпен қарай алды ма? Ниет бөлек әрине. Ал іске келгенде ше? Абзал Мұхимов есімді ағамыз Аралға әкім болған кезде ел-жерді аралап, қасиетті өңірлерге табан тіреді. Сонда осы Арыстан баб бабаның жайына соғып, зиярат еткен-ді. Сол кездегі баба басындағы шырақшы Серік есімді ақсақалмен тілдесіп, бұл жердің өзге де қасиеті туралы тәптіштеп сұраған-ды. Сонда өз басымда осы мекен өзге мұсылмандер келіп, зиярат ететін, атағы әлемге жететін қасиетті өңірлер санатына ене ме екен деген жауабы жоқ сұрақ болған еді. Арада бірнеше жылдар өтті. Әлі де қозғалыссыз.&nbsp;Биыл Аралға келген әкім Аманжол Оңғарбаев жақын күндері осы баба басына барып, қасиетті жерге зиярат етіп, оның басына кезекті тазалық жұмыстарымен қатар, әктеу, сырлау сынды жөндеу жұмыстарын жүргізген-ді. Оны әлеуметтік желілер арқылы көрдік. Газеттің өткен санында аудан жұртын ақпараттандырдық. «Бардық, құрмет көрсеттік» деумен бұл тақырып та жабылатын шығар деген кезекті ой сана түкпірінде жаңғырды. Жоқ... Олай емес екен.Туған жерге тағзым ету үрдісін Президент бастамасымен жүзеге асып жатқан «киелі мекен» акциясына ілестіріп әкеткен аудан әкімі А.Сақыпұлы бұл жердің тарихын танытып, туған жердің атын әлемге шығару ісін мықтап қолға алуға ниетті секілді. Бастама көтеріліп жатыр. Алдағы жылдар еншісіндегі екпінді жұмыстар санатына енді Арыстан баб бабаның киелі мекені саналған Ақирек тауындағы айтулы жер енбек. Әрине бұған да үкіметтен ақша сұрап, аз қаржыны ары-бері тартқыламақшыма деген ой тууы мүмкін. Бұл мәселені оңтайлы шешудің жолы да қарастырылып жатыр-мыс. Қалай дейсіз ғой. Бабаның құрметіне, оның басында жасалатын игі жұмыстардың іске асуы үшін үнемі үкімет қаржысына қол жаймау мақсатында арнайы қор құру бастамасы көтеріліп жатыр. Дұрыс-ақ. Негізі мұндай жерлерге іштей құрмет көрсету аздық етеді. Тіпті бұл мақсатқа арнайы қаржы бөлу де жарасымды іс. Яғни, сол қасиетті жерге қиындықсыз жету үшін жақсы жол, қараңғы маңғаз даланы жарық ету үшін түнгі жарық шамдар, басына барып түнеп, зиярат ету үшін арнайы түнеухана немесе туристер тынығатын түрлі санаттағы қонақ үйлер салу біздің туристік әлеуетімізді арттыра түседі. Ал одан кейінгі күтіп ұстау шығындарына арнайы ашылатын қордың мүмкіндіктерін пайдалануға болады. Орынды бастама көтерілген екен, біз де қолдаймыз. Елдің де ендігі тілегі сол сияқты.&nbsp;Иә, не нәрсенің де жарнамасы күшті болса құмнан құдірет, судан шима шығаруға болады. Бізге де сол жарнама жағы жетіспей жатыр-ау сірә! Әйтпесе Арыстан бабты білмейтін ұрпақ жоқ. Ал оның жеті жайының бірі Аралда десе және оған бару үшін барлық жағдай жасалған десе, оған қарай тізгін бұратындар саны арта түсер еді деп ойлаймын. Бұрынғы ата-әжелеріміз «Ақиректе Арыстан баб, Түркістанда Қожа Ахмет» деп жиі айтатын тіркес бүгінгі буынның түсінде емес, өңінде жиі жаңғырып тұрса нұр үстіне нұр емес пе?! Енді соны жүзеге асыру ісі тұр алдымызда.&nbsp;

Арал өткен мен келешекті қабыстырған аудан

&nbsp;<a href="https://kyzylorda-news.kz/">Kyzylorda-news.kz</a> &nbsp;Қазақстан Халық партиясының Қызылорда облыстық филиалының ұйымдастыруымен Қызылорда қаласына қарасты Талсуат ауылдық округінің мәдениет үйінде 23 сәуір – дүниежүзілік кітап күні қарсаңында Талсуат ауылдық округінің 140 жылдық мерейтойына орай ауылдың өткені мен бүгіні туралы жазылған «Талсуат» кітабының тұсаукесер рәсімі өтті.&nbsp; Рухани кешке облыстық мәслихат депутаты, «ҚХП» Қызылорда облыстық филиалының төрағасы Қайрат Ерназаров, кітап авторы Сағат Жүсіп, Талсуат ауылдық округінің әкімі Ерлан Бейсенбев, ауыл ардагерлері мен тұрғындары қатысты.&nbsp; Кітап авторы саясаткер, өлкетанушы, журналист, аудармашы Сағат Жүсіп. Бұл кітаптың жарыққа шығуына Талсуат ауылдық округінің тумасы, облыстық мәслихат депутаты, Қазақстан Халық партиясы Қызылорда облыстық филиалының төрағасы &nbsp;Ерназаров Қайрат Шаршыбекұлы себепкер болып, демеушілік жасады. Бүгінде Талсуат кітабының 500 дана таралымы жарық көрді.&nbsp; Ауыл тарихы – ел тарихы. Аталған кітапта ХІХ ғасырдың аяғында Ақмешіт (кейін Перовск, сосын Қызылорда аталған) қамалына жақын жерге Ресейден көшірілген орыс переселендерінің Талсуат деген жерге қоныстанып, Александровск деген қыстақ орнатып қазақтармен патша және кеңес заманында көрші қоныс болып бірге тұрғаны, «Колос» атты колхоз ұйымдастырған тарихы айтылған. Талсуат («Шәйкөл» деген де аты болған), сосын Александровское, одан соң «Колос» болып аталған ауылдың тарихи кезеңдері нақты деректермен, құжаттармен дәлелденген. Ауыл жайында жазылған тарихи деректер туған өлкесі туралы білгісі келетін жас ұрпақтың қызығушылығын арттырары анық.&nbsp; Іс-шара барысында Қазақстан Халық партиясы облыстық филиалының төрағасы Қайрат Шаршыбекқлы кітап авторы Сағат Жүсіпке құрмет көрсетіп, шапан жапты. Сондай-ақ кеште Талсуат туралы жазылған әнұран шырқалды.

Талсуат кітабының тұсаукесері өтті

<a href="https://kyzylorda-news.kz/">Kyzylorda-news.kz</a> Партияның «Қарызсыз қоғам» жобасы аясындағы оқу семинарының кезекті тағы бір аптасы қорытындыланды. Бүгін партияның облыстық филиалының Атқарушы хатшысы Ләйлә Төрешова Шиелі ауданында болып, партияның аудандық филиалының төрағасы Болат Сыздықпен бірге апталық оқу курсын нәтижелі аяқтаған Еңбекші ауылының азаматтарына арнайы сертификаттарды табыс етті.«Қарызсыз қоғам» жобасының маңыздылығына тоқталған партияның облыстық филиалының Атқарушы хатшысы биыл өңірімізде жоба аясында 8000 азамат білім алатындығын, олардың қатарында мектеп оқушылары да қамтылатындығын жеткізіп, осы бағытта жаз айларында мектептердегі «Жаһандық құзыреттілік», «Қаржылық сауаттылық», «Кәсіпкерлік негіздері» пәндері мұғалімдерінің арнайы оқудан өтулері жоспарланып отырғандығын айтты. Сонымен қатар, азаматтарға консультациялық көмек көрсету бағытындағы жобалық кеңселер жұмысымен бөлісті.<blockquote>«Оқу семинарына қатысушылар қаржы кеңесшілерінің дәрістерінен бөлек, enbek.kz порталына тіркелу мен Жеке кәсіпкерлік ашудан бастап, соттан тыс банкроттықты сүйемелдеу және берешекті өтеу кестесін жасауға дейінгі көптеген сұрақ бойынша кеңес алуда. Мұнан бөлек оқу процесіне қатысушыларға заңгердің де көмегі беріледі. Олар әр қарыз алушының несиелік тарихын жеке зерттейді және қарыз жүктемесін жеңілдету бойынша кеңес береді. Бүгінгі күні 329 адамға жеке консультация жүргізіліп, 90 бизнес жоспар жасауға, 141 депозит ашуға көмек көрсетілді. 4 азаматтың банктерге несие төлейтін кестелері реттеліп, жаңартылды», - деді Ләйлә Төрешова.</blockquote>«AMANAT» партиясы жеке қосалқы шаруашылықтарды аграрлық кооперативтерге біріктіру арқылы «Қарызсыз қоғам» жобасы түлектерінің табысын арттыру мақсатында ҚР Қаржы нарығын реттеу және дамыту агенттігінің, «Halyk Bank»-тың және «Банк Центр Кредиттің» қолдауымен «Қамқоршы AMANAT» қорын құрды. Қордың мақсаты – тұрғындардың, соның ішінде «Қарызсыз қоғам» жобасына қатысушылардың табысын жоғарылату. Бұл үшін «Қамқоршы AMANAT» қоры оқу -әдістемелік орталықтардың қаржыландыру көзіне айналады. Аталған орталықтарда тілек білдірушілер теориялық білім алып қана қоймай, ауыл шаруашылығының түрлі бағыты бойынша тәжірибелік дағдыларды игере алады. Қатысушылар үшін тәжірибелі зертханалар мен жобаларды толық жүзеге асыруға қажет барлық құрал қолжетімді болмақ. Бұған қоса, құрылып жатқан кооперативтерге лизингке өндірістік жабдықтар ұсынылып, қайтарымды гранттар беріледі.Жоба басталған 5 ақпаннан бүгінгі күнге өңірде 2 мыңнан астам азамат қаржылық сауаттылықты арттыру курсынан өтті. Оқу семинарлар жыл бойы өңірдің барлық аудандарында жүргізілетін болады.<img src="https://knadmin.beoblood.kz/uploads/437583462_835922731906698_1458831331988877144_n_d7efc166d9.jpg" alt="437583462_835922731906698_1458831331988877144_n.jpg">

«Қарызсыз қоғам»: 2 мыңнан астам қызылордалық қаржылық сауаттылықты арттыру курсынан өтті

&nbsp;<a href="https://kyzylorda-news.kz/">Kyzylorda-news.kz</a>&nbsp; 2016 жылдан бастап жүргізуші куәлігін арнайы автомектептерде оқымай дайындалып, кез-келген санатты алуға мүмкіндік берілген болатын. Одан соң 2019 жылы жүргізуші куәлігін алудың тәртібі қатаңдатылды.&nbsp;Басты себеп - көше-жол тораптарындағы апаттылықтын алдын алу, адам өмірін сақтау. Биыл да куәлік алып, көлік тізгіндеймін деген жандар үшін тәртіп күшейтілді. Куәлік алу процесінің қаншалықты өзгергенін Қызылорда облысының полиция департаменті, Әкімшілік полиция басқармасы процессингтік орталығының бастығы полиция подполковнигі Нұркен Бақтияров Өңірлік коммуникациялар қызметінің ақпарат алаңында баяндап берді.<blockquote>- 2016 жылдан бері жүргізушілерді даярлау курсынан өткен оқу ұйымы берген куәлік талап етілмейтін еді. Енді аталған куәлік талап етілетін болады және автомектептердің ақпараттық жүйелерінен курстың басталған уақыты мен аяқталу уақыттары ІІМ-мен қосымша тексеріліп отырады. Облысымызда барлығы 32 автомектеп болса, олардың 17-сі Қызылорда қаласында, 15-сі аудандарда. Аталған автомектептермен жүргізушілерге қаншалықты білім беру деңгейлері анықталып, қадағаланады,- деді Нұркен Прәліұлы.</blockquote>&nbsp;&nbsp;

Автомектеп бітіргендер ғана куәлік ала алады

<a href="https://kyzylorda-news.kz/">Kyzylorda-news.kz</a> Бүгінде ел бойынша сыбайлас жемқорлықты жою және оның көріністерін болдырмау жөнінде қоғамдық және саяси күштермен бірлесіп, сыбайлас жемқорлыққа қарсы ауқымды науқан жүргізілуде . Жемқорлыққа қарсы стретегияның басымдықтарының бірі – сыбайлас жемқорлыққа қарсы мәдениет деңгейін қалыптастыру болып табылады. Осы мақсатта қаламыздағы музыкалық колледж ұжымымен «Сыбайлас жемқорлыққа қарсы күрес – баршамызға ортақ іс» тақырыбында кездесу өтті.Кездесуге «AMANAT» партиясы Қызылорда облыстық филиалы жанындағы Сыбайлас жемқорлыққа қарсы іс-қимыл жөніндегі Кеңесінің төрағасы М.Нәлібаев, ҚР Сыбайлас жемқорлыққа қарсы іс-қимыл агенттігінің Қызылорда облысы бойынша департаментінің бас маманы Ж.Қозбағарова, “Әділдік жолы” РҚБ-нің Қызылорда облыстық филиалының басшысы Л.Бақтыбаева қатысты.Осы сыбайлас жемқорлықта құқық бұзушылықтар көбіне –көп азаматтардың өз құқықтары мен заңды мүдделерін іске асырған кездегі құқықтық сауаттылығы әлсіздігінің салдарынан болып жатады.Осыған байланысты ұжым арасында кең ауқымды түсіндіру жұмыстары, олардың жасын, кәсіби және өзге де ерекшеліктерін ескере отырып, азаматтардың құқықтық мәдениетін арттыру жөніндегі жүйе қалыптасуы орынды. Осы тұста ұжымға сыбайлас жемқорлық тәуекелдеріне ішкі талдау жұмыстары мен сыбайлас жемқорлықтың алдын-алу, құқықтық сауаттылықты арттыру туралы түсіндірме жұмыстарын жүргізіп, өз ойларымен бөлісті. Қатысушылар назарына арнайы бейнеролик көрсетілді.<img src="https://knadmin.beoblood.kz/uploads/438089013_835950441903927_2734479797818434538_n_160ac533f3.jpg" alt="438089013_835950441903927_2734479797818434538_n.jpg">

Сыбайлас жемқорлыққа қарсы күрес – баршаға ортақ іс

&nbsp;<a href="https://kyzylorda-news.kz/">Kyzylorda-news.kz</a> &nbsp;Дүниежүзілік денсаулық сақтау ұйымының бастамасымен 2005 жылдан бастап тұрақты түрде Еуропалық иммундау аптасы өткізіліп келеді. Оның негізгі міндеті — әрбір азаматқа арнайы профилактикалық жолмен алдын алуға болатын аурулардан қорғануды түсіндіру. Биыл бұл апталық сәуір айының 21-і мен 27-сі аралығында жүзеге асырылмақ. Бүгін Өңірлік коммуникациялар қызметінің ақпарат алаңында Еуропалық иммундау апталығының басталуы туралы сөз болды.- Вакциналау – аурудың алдын алып, денсаулықты сақтауға септігін тигізетін бірден бір шара. Ол бүкіл әлемде инфекциялармен күресудің қолжетімді құралы ретінде танылған. Ал, иммундау қазіргі уақытта қолданылып жүрген медициналық араласудың ең тиімді және үнемді шараларының бірі. Еуропалық иммундау апталығы Дүниежүзінің бірнеше елі қатысатын әлемдік жобаға айналды. Сондай-ақ, иммундау әмбебап әдіс болып табылады. Жыл сайын иммундау дифтерия, сіреспе, көкжөтел, қызылша, паротит, қызамықтан болатын 2-3 миллион өлімнің алдын алуға, аурулар мен мүгедектіктен қорғауға мүмкіндік беретінін есте ұстаған жөн. Ал, 2024 жылғы Еуропалық иммундау апталығы ата-аналарды, медицина қызметкерлерін қызылшаға және көкжөтелге қарсы вакцинациялауға баса назар аудара отырып, сондай-ақ адам папилломасы вирусына (HPV) қарсы вакцинациялауды енгізу қажеттігіне баса назар аудара отырып, иммундаудан уақтылы өтудің маңыздылығы туралы хабардар етуге бағытталған, - деді облыстық санитарлық-эпидемиологиялық бақылау департаменті басшысының міндетін атқарушы Әлия Әбдіқайымова.<blockquote>- Профилактикалық екпелер 12 ауруға қарсы міндетті вакциналауды көздейтін Ұлттық екпе күнтізбесі шеңберінде жүзеге асырылады. Бұдан басқа, екпелер жекелеген кәсіптік топтарға, аса қауіпті инфекциялар бойынша қолайсыз елдерге баратын табиғи-ошақты аурулармен аурушаңдық деңгейі жоғары аумақтарда тұратын адамдарға және инфекциялар ошағында эпидемиялық көрсеткіштер бойынша жүргізіледі. Айта кетейік, елімізде медициналық көмектің кепілдік берілген көлемі шеңберінде міндетті профилактикалық егулер республикалық бюджет қаражаты есебінен бірнеше инфекциялық және паразиттік ауруларға қарсы міндетті профилактикалық екпелер жүргізіледі. Мәселен, жоспарлы профилактикалық екпелер мен эпидемиологиялық көрсеткіштер бойынша профилактикалық екпелер сол тарапқа жатады. Ал, жергілікті бюджет қаражаты есебінен “А” вирустық гепатиті, тұмау, сібір жарасы мен профилактикалық екпелер жүргізіледі,- деді облыстық денсаулық сақтау басқармасының бөлім басшысы Айгүл Төлегенова.</blockquote>Фото:&nbsp;Қызылорда облысының Өңірлік коммуникациялар қызметі

Облыста Еуропалық иммундау апталығы басталды

<a href="https://kyzylorda-news.kz/">Kyzylorda-news.kz</a> &nbsp;Ақмола облысында асырап алған баласын өлтіріп, денесін үйінің ауласына көміп тастаған әйел ұсталды, - деп хабарлайды <a href="https://massaget.kz/basty-zhaalytar-438/105854/">Massaget.kz</a>.Бұл жантүршігерлік қылмыс Щучьеде осыдан 4 жыл бұрын болған. Бес жетімекті қамқорлыққа алғандар екі жасар баланы өлтіріп тастаған. Бірақ оны осы күнге дейін ешкім білмепті.Бұл қылмыс аяқастынан әшкере болған. Асыранды балалардың бірі жақында басы жарылып, миы шайқалып ауруханаға түскен. Бағып алған анасы дәрігерлерге байқамай, өлген баланың туу туралы куәлігін әкеліпті. Ал науқас баланың таяқ жегені анықталған. Осыдан кейін полиция бұл отбасын терксере бастайды. Асырап алған екі жасар ұлы осыдан төрт жыл бұрын қайтыс болған. Оны ешкімге айтпай, бақшаға апарып көме салған. Ақыл есі кем, денсаулығының кінәраты бар бес баланы қамқорлыққа берген жауапты мекеме олардың бірін тіпті о дүниелік болғаннан кейін заңдастырған. Енді олар да заң алдында жауап береді.Қазір күдікті ретінде 60 жастағы әйел қамуға алынды. Күдіктінің 29 жастағы қызы да тергеліп жатыр."Жас баланың мәйіті табылуына байланысты ҚР ҚК 99-бабы, 3-тармағы, яғни "Адам өлтіру" бойынша соталды тергеу басталды. 2018 жылғы бала қайтыс болғаннан кейін асырап алушылар тиісті мемлекеттік мекемеге хабар бермеген. Қазір сот-медициналық және басқа да сараптамалар тағайындалды. Тергеу ісіне байланысты басқа ақпарат жария етілмейді", - дейді Ақмола облысы ПД бастығының орынбасары Бахтияр Өтекин.&nbsp;Фото: pixabay.com

Ақмола облысында әйел асырап алған баласын өлтіріп, денесін үйінің ауласына көміп тастаған

<a href="https://kyzylorda-news.kz/">Kyzylorda-news.kz</a> Көктем ортасынан ауа бере қарапайым жұрт ауласындағы жерін дайындап, көкөніс баптап, бақша салудың қамына кіріседі. Бұл уақытта жұрт көшетті таласып алып жатады. Әрине ерте көктемде, яки қыс аяғында үйіне арнайы ыдыстарға тұқым тастап, оны осындай уақытта сыртқа шығаратын пысықайлар да жоқ емес. Бірақ ондайлар көп те емес, реті келсе, дайын көшетті ұяшықтарға орналастырып, өнімінің ертерек өскенін қалайды.Дәл осы уақытты үй аула­сынан жылыжай ашып, көшет дайын­да­ғандар тиімді пайдаланады. Се­бебі сәуір айында түрлі көшет­тердің ба­ғасы да жоғары, оған сұраныс та көп. Бірақ ауданда кәсіптің бұл түрін қолға алғандар саусақпен санар­лық. Шыны керек, аудан бойынша жылыжай ісін қолға алғандар онға да жетпейді. Қарап отырсаң, қарапайым жұмыс, бірақ ақталамын деген адамға сылтау көп қой, бірі онық қыр-сырына қанық еместігін алға тартса, енді біріміздің жалқаулығымыз та­ғы бар. Кешегі Жалағаш ауданына қарасты Мөрәлі Шәменов ауылына барған сапарымызда кә­сіптің бұл түрінде табыс мол бола­тынын түсіндік.Ауылдағы Пұсырмановтар отба­сының жылыжай ісімен айналысып жатқанына биыл екінші жыл. Был­тыр ауладан шағын жылыжай ашып, онда көкөністің бірнеше түрін бап­таған. Отағасы Бағдат Пұсыр­манов был­тыр көктемде көшет алуға жұрт­тың кезекте тұрғанын айтады. Оның өтімділігі соншалық, бір жылға әзірлеген көшеттер бір жетіде өтіп кетіпті. Мұнан кейін де тапсырыс көп болған, бірақ оның бәрін қамта­масыз етейін десе, жылыжай көлемі кіші.&nbsp;Не керек, кәсіптің бұл түрінде мол пайда барын түсіне қойған Бәкең отбасымен ақылдасып, кәсібінің көк­жиегін кеңейтуді мақсат етеді. Қолда бар қаражатты осыған дейінгі жылы­жайдың құрылысына жұмсаған. Осы ретте кәсіпкерлікті қолдайтын мем­лекеттік бағдарламалардың көмегіне жүгінуді көздейді. Былтыр бұл отбасы қайтармсыз грантқа құжат тапсырып, дәл осы жобаны қорғауға бел буған. Абырой болғанда комиссия мүшелері Пұсырмановтар отбасының жарқын жобасын қолдап, «қайтарымсыз қа­ражат беруге лайық» деген бір ше­шімге келген. Ал нәтижесін кеше көзімізбен көрдік.&nbsp;Қай көкөніске қандай күтім керек, бұл жағы Бәкеңнің жары Айымкүл апа­мызға таңсық емес. Себебі бү­гінгі бағбанның әкесі ертеректе ауылға мә­лім диқан болған деседі. Әке­сінің қасында жүріп, бала кезінде мұның бәрін зердесіне құйған Айым­күл апамыз бүгінде көрген-білге­нін балаларына үйретіп келеді. «Егін­шінің баласы арық қазып ойнайды» деген осы шығар сірә, «алма аға­шынан алысқа түспейді» деген тағы бар. Бүгінде аналары бастаған игі істі балалары өрістетіп отыр.&nbsp;Былтыр шағын жылыжайда қыза­нақ, қырыққабат, қияр, ащы бұрыш, тұщы бұрыш, баклажан сынды кө­кө­ністің онға жуық түрі егілген. Жо­ға­рыда айтқанымыздай, мұның бар­лығы 7-8 күнде өтіп кетіпті. «Өзімізге ау­лаға орналастыратын көшет те қал­мады ғой» деп күледі Бағдат ағамыз.&nbsp;Зер салсақ, жылыжай құрылы­сына айтарлықтай көп қаражат кет­пеген. Айналдыра қоршау те­мірлерді тапсырыспен жасатқан де­­­­­­ме­­сеңіз, сырты толықтай кәнігі са­­­­ла­фанмен қаптаған. Қыстың орта­сында тастаған тұқымы бүгінде көктеп тұр. Арнайы ыдыстарға орна­лас­тырылған көшеттердің алды са­тылымға шығып жатыр. Біз барған күні аудан орталығынан келген жы­­лыжай өнімінің тұтынушылары қы­занақ пен қиярдың көшеттерін көп­­теп алып кетті. Бәкең олардың осы­дан бір жеті бұрын тапсырыс беріп қойғанын айтады.&nbsp;<blockquote>– «Еңбек етіп, табыс табамын» деген адамға тіршілік көп, тек әрекет ету керек. Негізі бұл жобаның авторы – үйдегі апаң. Біз бастапқыда тек көмекші болып жүрдік. Кейін балам анасынан көкөніс баптаудың, жалпы жылыжай ісінің қыр-сырын жетік үй­реніп алды. Өзі ауладан ашқан жылыжайдың күтіміне жауапты болды. Мына жердің барлығы бақ­ша салуға қолайсыз болды, се­бебі құмы құнарсыз еді. Біз оны өңдеп, жылыжайға дайындадық. Оған да қан­шама уақыт кетті. Ал қазір қарап отырсаңыз, ауладағы дайын тың жерге бақша салуға құлықсыз адамдар да жоқ емес. Тағы да қай­талап айтамын, еңбек ете білсең, табысқа жетудің жолы көп. Тек кер­жалқаулықтан ада болсақ жеткілікті. Мына көшеттердің көптігіне таң қалып тұрған шығарсыздар, негізінен мұның барлығына алдын ала тапсырыс беріп қойған. Қазір жылыжай ішін­дегі өнімдерім толық бой алмай тап­сырыс қабылдамай отырмын. Ертең осы жаққа көшіріп, арнайы ыдыс­тарға орналастырғаннан кейін оларды да сатылымға шығарамын, – дейді Бағдат Пұсырманов.&nbsp;</blockquote>Міне, осындай уақытта өнімнің бұл түріне қаншалықты сұраныс бола­тынын Бәкеңнің сөзінен-ақ бағамдай беріңіз. Иә, оның бізге қалай ақыл айтса да жөні бар. Әрекет етті, соның жемісін көріп отыр, «әрекет түбі – берекет» деген осы шығар, сірә.Қазір дайын өнімдерді сақтайтын шағын жылыжайда баклажан, ащы бұрыш, тұщы бұрыш, қызанақ, қияр сынды көкөністің 7-8 түрі бар. Ал үлкен жылыжайда қызанақтар бой алып, қияры құлақтап жатыр. Бұ­йырт­са, Бәкең оларды да алдағы апта сатылымға шығармақ. Мұның бәрін бағбан тамшылатып сурау әдісімен шығарып отыр.Айта кетейік, соңғы жылдары М.Шәменов ауылында кәсіп­керлік саласы қарқынды дамып ке­леді. Был­тырдың өзінде ауылдағы 7 аза­мат қайтарымсыз қаражатқа ие бол­ған. Олардың қатарында Бағдат ағамыз да бар. Ал енді бірі конди­терлік өнімдер әзірлеуді қолға алса, қалғаны мал шаруашылығында та­бысқа кенеліп отыр.Ауыл аудан орталығына ең жа­қын орналасқан елді мекендер қатарында. Бұл да жергілікті жұрттың кәсіп бастауына үлкен көмек болып отыр. Себебі ауылда өндірілген өнім­дерге Жалағаш кентінен де көптеп сұраныс түсіп жатыр. Бір бай­қағанымыз, ауыл тұрғындарының бұл мүмкіндікті құр жібергісі жоқ.&nbsp;Кенжетай Қайрақбаев

Қазақстан және Қызылорда облысының жаңалықтары