<a href="https://kyzylorda-news.kz/">Kyzylorda-news.kz</a> 4-12 мамыр аралығында Қырғызстанның Бішкек қаласында тоғызқұмалақтан қыздар мен әйелдер арасында Халықаралық турнир өтті. Оған Жалағаш аудандық «Наркескен» спорт клубының «Тоғызқұмалақ» үйірмесінің жаттықтырушысы Ақерке Кенжебекова қатысты. Жеңісті жолдан жығылмайтын жас спортшымыз бұл жолы да топ жарып, ел мерейін үстем етті.&nbsp;<blockquote>– Қазақстан мен Қырғызстаннан 130-ға жуық спортшы қатысты.&nbsp;Басты қар­сыластарым Қырғызстаннан Азия чемпионы Айзада Бақтыбаева мен Ал­тынай Шамбетова болды. Соңғы ше­шуші кезеңде Азиза Жамансартова есімді спортшымен бақ сынастым. Елі­міз­дің абыройы үшін барынша мұ­қият ойнауға тырыстым. Қазақ 7 санын қа­шанда киелі деп санаған. Сон­дық­тан мен де көбіне ойынды 7-ші отаудан бастаймын. Себебі бұл отау маған ойын­ды жеңіспен аяқтауыма септігін ти­гізеді, – дейді Ақерке Батырбекқызы.</blockquote>Бірнеше мәрте жарысқа қатысып, жүлделі орындардан төбе көр­сет­­кен Ақерке – Азия және Әлем чемпионы. Ол – 2016 жылы Ресей Фе­дерациясының Алтай Рес­пуб­ли­ка­сын­да тоғызқұмалақтан өткен жастар арасындағы Азия чемпионатының ІІ орын иегері. 2017 жылы Астана қа­ла­сында өткен ересектер арасында&nbsp;IV әлем чемпионатының қола жүлдегері. 2018 жылы Моңғолия Республикасында өткен ересектер арасында&nbsp;IV Азия чемпионатының алтын жүлде иегері атанған. Сондай-ақ ол Моңғолия Рес­публикасының Баян-Өлгей қаласында 9 елден 200-ден астам спортшы қатысқан тоғызқұмалақтан өткен&nbsp;VI Азия чем­пио­натының алтын жүлде иегері атанып, ел мерейін асқақтатқан болатын. Бұдан бөлек Румыния мемлекетінің Кон­станца қаласында ересектер ара­сында өткен әлем кубогында тоғыз­құ­малақ спортының рапид түрінен де үлкен жетістікке жетіп, Әлем чемпионы болды.<blockquote>– Ақерке мен жетекшілік ететін үйір­меге алғаш келген күннен өзінің тоғызқұмалаққа деген қарым-қабілетін көрсетіп, үйреткен білімді тез қағып алатын, ойлау қабілеті жылдам шәкірт­терімнің бірі. Ол тыңғылықты әрі үз­діксіз дайындықтың арқасында халық­аралық дәрежедегі спорт шебері атан­ды. Кешегі ойында да оқ бойы озық шы­ғып, кіл мықтының арасынан өзінің қарым-қабілеті мен талантын көрсете білді. Алдағы уақытта Ақеркені екі жарыс күтіп тұр. Бірі – топтық әйелдер чемпионаты, ол Ақтау қаласында өтеді. Ал екіншісі – Әлем кубогы, ол шілдеде өтеді. Бұйыртса, осы екі жарыстан да жеңіспен ораламыз деген ойдамыз, – дейді білікті бапкер Асхат Маратұлы.&nbsp;</blockquote>Халықаралық дәрежедегі спорт ше­бері Ақерке Батырбекқызы спортшы үшін ең үлкен күш өзіне сенім білдірген жандардың қолдауы екенін жеткізді. Ол тілектес болған жерлестеріне риза­шылығын білдіріп, алдағы уақыт­та бұ­дан да зор жетістіктерге ұмтыла­тынын айтты.&nbsp;Айта кетейік, «Тоғызқұмалақ» үйір­­месі 2022 жылдан бастап «Нар­кес­­кен» спорт клубы жанынан ашы­лып, жұмысын бастаған. Қа­­зіргі таңда үйірме құрамында 20 шәкірт тәрбиеленуде. 4 мың жыл­дан астам тарихы бар бұл спорт тү­рі­нен аудан спортшылары ха­лық­аралық, республикалық ірі дода­ларда жүлдесіз оралған емес. Қазіргі таңда ауданда тоғыз­құ­малақ спор­тынан 1 халықаралық дә­режедегі спорт шебері, 1 спорт шебері және 40-қа жуық спорт шеберлігіне үміт­кер бар.<blockquote>– Әр жарыста туған жеріміздің атын, әнұранын әлем алдында шырқату – менің басты мақсатым, алдағы сайыс­та артылған сенімнің ақталуына бар күш-жігерімді саламын. Үлкен дода­лар­ға қатысуыма демеушілік етіп, же­тістікке жетуіме жағдай жасап отырған «Наркескен» спорт клубының ди­рек­торы Ғалымжан Ержанов пен осы спортқа мені бала кезімнен баулыған бапкерім Асхат Ма­рат­ұлына үлкен ал­ғысымды білді­ремін, – дейді Халықа­ралық дәрежедегі спорт шебері Ақерке Батырбекқызы.&nbsp;</blockquote>Тоғызқұмалақ – ақыл-ойдың ұш­қыр­лығын талап ететін ең күрделі ұлт­тық ойын. Ұлттық спортымызды жа­н­дандырып, ұшқыр ой, қажырлы қа­бі­летінің арқасынща дү­бірлі дода­лар­да топ жарып, еліміздің көк бай­рағын көкке көтеріп жүрген Ақеркенің алдағы сайыстарда топ жаратынына сенеміз.&nbsp;

Жалағаштық спортшы Бішкектен жеңіспен оралды 

Жексенбіде облыс әкімі Нұрлыбек Нәлібаевтың төрағалығымен өткен жиында Жалағаш ауданының Таң ауылдық округінің әлеуметтік-экономикалық дамуы, «Қорқыт ата» әуежайының аумағын абаттандыру мәселелері талқыланды. Сонымен қатар жиында «Жайлы мектеп» ұлттық жобасы аясындағы білім ошақтарының, физика-математика мектеп-интернатының, теннис корты мен Оқушылар сарайының құрылыс барысындағы мәселелері қаралды. Аймақ басшысы құрылыстың барлығына қойылатын басты талап сапалы әрі мерзімінде аяқтау екенін жеткізіп, осы талапты бұлжытпай орындауды тапсырды.&nbsp;– Бұған дейін жұмыс сапарымен Таң ауылына барғанда жүзеге асырылуы керек жобаларға қатысты тапсырмалар бердім. «Батыс Еуропа – Батыс Қы­тай» автодәлізінен ел­ді мекенге кі­ре­­­бе­ріс­ке дейін ағаш отырғызу қа­жет. «Таң-Жаңақоныс», «Таң-Са­мұрат» ав­­­то­­мобиль жолда­ры мен «Боза­рық» каналы­ның көпірін қай­та жаң­ғыр­­туды пысықтаңыз­дар. Ауыл­да жа­рық­­тандырылуы тиіс көше­лер бар. Жұ­мыс­ты тиянақты орындап, нысан­дар­ды мерзімінде пайдалануға беру керек. Елді мекендегі балабақша, дә­­рі­герлік амбулатория және спорт кешені ғимараттарын арнайы эскиздік жобаға сәйкестендіруді бастау қажет. Құрылыстың сапасы аса маңызды. Қажет болса, жұмысты күнделікті ба­қы­лайтын арнайы адам бекітіңіздер. «Қорқыт ата» әуежайының аумағын абаттандыруды уақытылы әрі сапалы жүргізу керек. Инфрақұрылымды дамы­туға, абаттандыруға, яғни жылу, су, электр, телефон және кәріз, желілерін, автожол жүргізуге жергілікті бюджеттен 4 млрд 300 млн теңге қаржы бөлінді. Ғимараттың айналасындағы жол құрылысын бақылауға алыңыздар, – деді аймақ басшысы.Айта кетейік, «Таң LTD» ЖШС Жа­ла­ғаш ауданының әлеуметтік-экономи­калық дамуына үлес қосып, бірқатар маңызды бастаманы іске асыруда. Алда ауыл тұрғындарына арналған екі пәтерлік 10 тұрғын үй салынады. Сон­дай-ақ кәсіпорын 3 өндірістік базаны іске қосып, жаңа жұмыс орындарын ашуды жоспарлауда.&nbsp;Қазір шаруашылық иелігінде күріш ақтау зауыты мен ет өңдеу цехы бар. Күріш ақтау зауыты 5 жыл бұрын іске қосылған, тәулігіне 100 тонна өнім өң­деуге қауқарлы, 15 адам тұ­­рақ­ты жұмыспен қамтылған. Ал 2019 жылы ауылдық округке қа­расты Жаңа­қо­ныс елді мекенінде «Агро­ли­дер Таң» ЖШС-ның ет өңдеу цехы ашыл­ған. Кәсіпорын тәулігіне 0,5 тонна ет өн­діріп, 15 түрлі (түшпара, манты, қа­­зы, әсіп, бір асым ет және т.б.) өнім шығаруда. Мұнда 8 адам жұмыс істейді.Серіктестіктің демеу­шілігі­м­ен ауыл­­­да бала­­лардың ойын алаңы мен кіші фут­бол алаңы салы­­нып, жарықшам­дар орнатылды. Сондай-ақ Ұлы Отан соғысында қаза тапқан боздақтардың құрметіне «Тағзым алаңы» салынып, қазір жаңа спорт кешенінің құрылысы жүргізілуде. Өткен жылы бір ғасыр бұрын салынған «Әбжәли» мешітінің ғимараты жөнделді.«Болат Өтемұратов» қорының қол­дауымен салынған халықаралық та­лап­тарға сай келетін әуежайдың жаңа терминалында ішкі және халықаралық рейстерге, транзиттік жолаушыларға арналған залдар, CIP-зал, жүкті авто­матты түрде беру жүйесі, «Duty Free» аймағы, сауда нүктелері, медпункт, кафе, ғибадат ету, жүк сақтау, ана мен бала бөлмелері бар. Екі қабатты ғи­марат сағатына 250 адамға, төлқұжат бақылайтын 10 кабина қызмет етеді. Нысан таяуда ел игілігіне табысталмақ. Жобаға аталған қордан 16 млрд теңге бөлінген.&nbsp;Айта кетейік, Таңда 1300-ге жуық тұрғын бар. Елді мекенде 37 адам кә­сіппен айналысады. Былтыр 4 адам қай­тарымсыз грантқа қол жет­кі­зіп, мал шаруашылығымен айна­лы­суда. Сондай-ақ 11 адам пайыздық үс­тем­­ақысы төмен несие алып, кәсіп бастаған. Осыдан-ақ ауыл тұрғын­да­рының іс бастауға ынтасы жоғары екенін аңғаруға болады. Ауылда жалпы 14 ішкі көше бар, бүгінде олардың 12-сіне асфальт төселген. Өткен жылы құ­ры­лыс қарқын алған елді мекенде биыл да жарқын жобалар жүзеге асады.&nbsp;Әуежай аумағын абаттандыруға, яғни жаңбыр суын тазарту, сыртқы кәріз бен жарықтандыру желілерінің құ­рылысына 1 354 968 мың теңге бө­лінді. Жан-жағына гранит жабыны, асфальт, кеспе тас және қиыршық тас төселеді. Құрылыс-монтаждау жұмыс­тарын «Сәт-Сервис» ЖШС жүргізуде. Ал іргелес аумақты абаттандыруға 634050 мың теңге бөлініп, 4 жолақты, ұзындығы 480 метр, әр жолақтың ені 3,5 метр болатын жол салынады. Құ­­рылыс-монтаждау жұмыстарын «Иман» ЖШС жүргізеді.

Таң ауылының әлеуметтік-экономикалық  дамуы талқыланды 

<a href="https://kyzylorda-news.kz/">Kyzylorda-news.kz</a> Мемлекет басшысының тапсырмасымен қолға алынған «Таза Қазақстан» республикалық акциясы шеңберіндегі «Мөлдір бұлақ» апталығы сенбіде қорытындыланды. Қармақшыда өткен сенбілікке мемлекеттік мекеме қызметкерлері, жеке ұйымдар, жастар және волонтерлер, сондай-ақ тұрғындармен техникалар қатысты.Ұйымдастырылған тазалық іс-шарасында аймақ бойынша су айдындары мен өзен-көл жағалаулары, аяқ су арықтары тазартылып, қала, аудан, ауылдарда көркейту-көгалдандыру жұмыстары жүргізілді. Акцияның негізгі мақсаты да сол. Табиғатты таза ұстап, тұрғындардың хал ахуалын, мәдениетін көтеру.Қармақшы ауданында өткізілген сенбілікте Сырдария өзенінің бойы мен су каналдары қоқыс қалдықтарынан тазартылып, техникамен шығарылды. Бұл жұмыстар ауданға қарасты барлық ауылдық округтерде де атқарылды. Кент ішіндегі көшелерге бөлінген мекеме қызметкерлері тазалық жүргізді. Сенбілік бойынша облыс әкімі Нұрлыбек Нәлібаевтың «Таза Қазақстан» республикалық экологиялық акциясына аймақ жұртшылығын белсене қатысуға шақырған үндеуі жарияланған болатын. Бұл жұмыстар көктемнің алғашқы күні 1 наурыздан бастау алған-ды. Содан бері акцияның нәтижесі аймағымызға оң өзгеріс әкелуде.Бүгінде ауданымызда көркейту-көгалдандыру, абаттандыру бойынша атқарылып жатқан жұмыс көп. Уақыт өткен сайын кентіміз көрік беріп, тұрғындарға жайлылық сыйлауда. Бір ауық күндіз немесе кешкілік серуенге шығып кентті араласаңыз, сөзсіз көзіңіз жетеді. Бұрынғыдай шаңы бұрқыраған қара жолдардың ауылы алыстап, тақтайдай тегіс жолдар мен төбеден жарық шашқан қаз-қатар түнгі шамдар діттеген жеріңізге дейін апарады. Басты көшелерге салынған жаяу жүргіншілер жолы жол қауіпсіздігін қамтамасыз етсе, орынтақтар сіздің аяқ сергітіп демалуыңызға ол да бір жайлылық сыйлауда. Жалпы ауданда аудан әкімінің бастамасымен бірқатар жұмыс қолға алынып, өз нәтижесін беруде. Соның негізгілері сенбіде бақыланды.Аудан басшысы Жандос Еркінбек кент орталығындағы Т.Рысқұлов пен К.Тәуекелов көшелеріндегі абаттандыру жұмыстарын аралап көрді. Қазіргі таңда мұнда жаяу жүргінші жолы салынуда. Сондай-ақ жарық шамдар орнату, көгалдандыру секілді жұмыстар жүргізілетін болады. Одан бөлек темір жолдың арғы бетіндегі «Шығыс» каналын абаттандыру бақыланды. Тексеру барысында тиісті сала басшыларына жұмыстың сапалы орындалуын қатаң қадағалауды міндеттесе, мердігерге жұмыстың мерзімінде аяқталуын тапсырды. &nbsp;

Қармақшыда экологиялық акция қорытындыланды

<a href="https://kyzylorda-news.kz/">Kyzylorda-news.kz.</a>Халықты ізгілік пен эстетикалық адамгершілікке тәрбиелеудің басты құралы театр екені даусыз. Сондықтан өскелең ұрпақтың арасында өнердің осы бір түрін дамыту маңызды. Бірнеше жылдан бері білім беру ұйымдарының тәрбие бағытындағы жұмыстарының мазмұнын толықтыру мақсатында «Мектеп театры» жобасы қолға алынған болатын. «Мектеп театры» жобасын енгізудегі мақсат – оқушылардың шығармашылығын дамыту, балалардың бойына рухани қазынаны сіңірумен бірге елжандылыққа, адамгершілікке тәрбиелеу, баланың сөйлеу мәнерін жақсарту, көпшілік алдында өзін ұстай білу, жан-жақты дамуына ықпал жасау, жаңа таланттардың жолын ашу.Аталған жоба аясында Қармақшы ауданы, Жосалы кент орталығындағы Тәйімбет Көмекбаев атындағы №250 мектеп-лицейінде 1-4 сыныптарда «Әдемі-ай» қуыршақ театры, 5-7 сыныптарда «Өнерлі өрендер», 8-10 сыныптарда «Самға» балалар мен жасөспірімдер театры жұмыс жасап келеді.&nbsp;Талантты балалардың басын біріктіретін үйірмелердің берері көп. Жобаның мүшелері де сахнада өздерін еркін ұстауға, кейіпкер бейнесін ашуға, шығарманың мазмұнын толық түсініп, сахналап шығуға машықтанған.&nbsp;Жаңа оқу жылы басталған тұста мектеп-лицейде театр маусымының ашылу салтанаты болды. Онда үйірме жетекшілері оқушылармен дайындаған түрлі қойылымдарын көрермен назарына ұсынды. Соның ішінде мектеп тәлімгері Шерхан Кәрібаев пен аудандық мәдениет үйінің режиссері Мадияр Махамбетовтың бірлесе ұйымдастыруымен «Ұлты ұлықтаған ұлы Абай» тақырыбындағы сахналық қойылым арада қанша уақыт өтсе де естен кетпейді. Абай, Құнанбай, Зере мен Ұлжан, Әйгерім рөлін сомдаған оқушылардың актерлық шеберлігіне тәнті болғандар сонша қойылымнан алған әсерін көпке дейін айтып жүрді. Бұл қойылым тек мектеп сахнасында емес Қызылорда облысының білім басқармасы тәрбие, спорт және қосымша білім беру орталығы ұйымдастырған «Атаулы күндер, айтулы тұлғалар» тақырыбында өткізілген «Мектеп театры» жобасы аясында TED TALKS алаңында жүлделі І орын иеленді. Осы байқауда 10-сынып оқушысы Қайсар Қарабдинов «Ең үздік &nbsp;идея» номинациясымен марапатталды. Үйірме мүшелерінің күн сайын машығып, аудандық, облыстық деңгейдегі байқауларға қатысып жүргені де қуантады.&nbsp;<blockquote>– Оқу жылы басында театр үйірмесіне оқушы қабылдау үшін кастинг ұйымдастырдық. Осылайша талантты, өнерлі, шығармашылыққа жақын шәкірттерді қабылдадық. Әрбір баланың мүмкіндігін жетілдіру мен жақсартудың жолдарын іздеуде жұмыс істеп жатырмыз. Шәкірттеріміздің жауапкершілігі, өнерге құштарлығы біздің жұмысымыздың жандандыруда, – дейді мектеп тәлімгері Шерхан Кәрібаев.&nbsp;</blockquote>Жуырда мектеп-лицейде оқу жылының аяқталуына орай үйірмелердің жұмысын қорытындылау, баға беру маусымы ұйымдастырылды. Ақмарал Әбдірахманованың жетекшілігімен бастауыш сынып оқушыларының қатысуымен "Маймақ қаз" қойылымы көрсетілді. Қойылым балаларды әдептілікке, бірін-бірі сыйлауға, бауырмал болуға бағытталды. Данагүл Дюсекбаеваның жетекшілігімен 6 «А» &nbsp;сынып оқушыларынан құралған қуыршақ театрының жас жеткіншектері сахнада «Ұр, тоқпақ» ертегісін сомдады. &nbsp;Ертегінің негізгі мақсаты – кішкентай көрермендерге қойылым арқылы халқымыздың тұрмыс-салтын, әдет-ғұрпын, наным-сенімін, дүниетанымдық көзқарасын сақтауға, жат әдеттен аулақ болуға, адал еңбек етуге шақыру. &nbsp;Б9л ертегілерді бастауыш сынып оқушылары тапжылмай отырып көріп, ұйып тыңдады. Келесі күні Фариза Айманшаеваның жетекшілігімен 6 "Б" сынып оқушылары әлем ертегілерінің бір үлгісі &nbsp;”Cinderella” (Күлшеқыз) ертегісі бойынша қойылым қойды. &nbsp;Ағылшын тілінде көрініс қою – грамматикалық сөйлемдерді дұрыс құру және сөздерді анық айтуға жаттықтырады. Театр жобасы бойынша ағылшын тілінде қойылым қою арқылы балалар ағылшынша сөйлемдерді қатесіз айтуға төселеді. Маусымның соңғы күнінде ұлттың ұлы тұлғасы Сәкен Сейфуллинның 130 жылдығына орай Шерхан Кәрібаевтың жетекшілігімен «Самға» балалар мен жасөспірімдер театрының мүшелерінің қатысуымен «Сәкен – алаш сұңқары» тақырыбында қойылым сахналанды.&nbsp;Қойылым барысында сауатсыздықты серпіп, қараңғылықтың түнегін қақ жарып шыққан оқулықтарды шығарған алаш апталдарының үлесі, Алжир түрмесіндегі әйелдер бейнесі, жалғыздықтан жабыққан Сәкеннің жары Гүлбахрам мен түрме теперішін тартқан Сәкеннің образы көрініс тапты. Қатысушылар алаш арыстарының еңбегін, Сәкен тартқан теперіш пен қазақ қыздары көрген келеңсіздікті шебер жеткізе білді.&nbsp;<blockquote>– Ұлт үшін, жер үшін, оқулық үшін, қазақ болмысының сақталып қалуы үшін күрескен арыстардың еңбегін, олардың қиын да қауіпті өмірін көз алдымызға әкеліп, сол арқылы патриоттыққа шақырған туынды бәрімізді елең еткізді, ойландырды. Үлкен театрға күнде бармасақ та, мектептегі театр жобасы біздің жан дүниемізді байытуға септігін тигізіп, рухани демалыс сыйлады» деді арнайы қонақ ретінде шақырылып, қойылымды тамашалаған аудандық білім бөлімінің әдіскері Ақтолқын Тоқшылықова.</blockquote><blockquote>– Мектеп жанынан құрылған «Әдемі-ай» қуыршақ театры, «Өнерлі өрендер», «Самға» балалар мен жасөсірімдер театры шәкірттердің шығармашылығын шыңдап қана қоймай, көрерменге де келелі ой түюге ықпал етті. Тыңғылықты дайындалып, керемет көрініс ұсынған өнерпаздар мен олардың жетекшілеріне алғысымды білдіремін. Азаттық &nbsp;жолында қаншама азаматтар шейіт болды. Олар бізге елді, халықты сүю үлгісін көрсетті. Әлемде күн сайын түрлі оқиғалар орын алып жатыр. Қандай жағдайдан болсын алып шығар күш – ол бірлік пен &nbsp;Отанға деген адалдық. Бұл мәні мен мазмұны терең қойылым «Мен қазақпын» деген әр азаматтың жүрегіне жетті, тәуелсіздігіміздің оңай келмегенін әрбір оқушы саналы түрде түйсінді, сезінді деп ойлаймын. Осындай керемет сезім сыйлаған шәкірттеріме ризамын» деді қорытынды сөз алған №250 мектеп-лицей директоры Гүлжахан Жұмағалиқызы. &nbsp;</blockquote>Иә театр өнері аса талғампаздық пен шынайылықты талап етеді. Кәсіби актерліктен алыс болса да жас өнерпаздар басты рөлдерді шебер сомдап шығуда. Көрермендерді сендіріп, көзге ыстық жас келтіруде. Мұндай қойылымдар оқушылардың киелі сахнаға шығып қалыптасуына үлкен септігін тигізіп, рухани тәрбиелейтіні анық.&nbsp; &nbsp;

«Мектеп театры» жобасының берері мол

<a href="https://kyzylorda-news.kz/">Kyzylorda-news.kz.</a> БҰҰ Бас Ассамблеясының 1993 жылдың қыркүйек айындағы резолюциясында 15 мамыр – Халықаралық отбасы күні болып белгіленген болатын. Бұл бастама әлемдік қауымдастықтың қазіргі замандағы отбасының жағдайына алаңдаушылығынан туындаған еді. Сол 1994 жылдан бастап биыл отызыншы жыл әлемде «Отбасы күні» аталып өтеді.Қызылорда қаласындағы былтыр &nbsp;пайдалануға берілген «Отбасы орталығы» негізінен шаңырақтың беріктігін сақтауда жас жұбайлардың қарым-қатынасын нығайтып, тәрбиедегі ұлттық құндылықтарды қалыптастыруға қолдау танытады. &nbsp;Мәселен, ынтымақ пен жарастықты нығайту бағытында ел тарихындағы белгілі тұлғалардың үйде алған тәрбиесін, олардың ел өміріндегі алатын орнын, қоғамға сіңірген еңбегі, өнегелі өмірін отау құрған жастарға насихаттау арқылы отбасы құндылығын арттыру жұмыстары жыл бойы үздіксіз жүргізіледі. Жаңа өмірге қадам басқан жұптарға отбасы &nbsp;ұғымының қадір-қасиетін, ата-ананың бала тәрбиесіндегі жауапкершілігін түсіндіре отырып, оларды өмірге даярлайды. Өмірде кездесетін қиындықтарға төтеп беріп, қандай жағдайда болсын, шаңырақтың беріктігін сақтап қалу бағытында қажетті кеңестер ұсынылады. Бұдан бөлек, үйленуге бір ай бұрын өтініш білдірген жас жұбайлар отбасын жоспарлау мақсатында медициналық тексеруден өте алады. «Жастар денсаулығы» орталығының мамандары оларға жүктілікті жоспарлау, бедеуліктің алдын алу бойынша кеңес береді. Сонымен қатар, қазіргі күрделі мәселенің бірі жастар арасындағы жұмыссыздық екенін жасыра алмаймыз. Осы орайда жұмыссыз жастар «Отбасы орталығындағы» «Мансап» бөліміне келсе, мамандығы бойынша жұмысқа орналасуына қолдау көрсетіледі.«Бақытты отбасы» бөлімі жас отбасын тұрғын үймен қамтамасыз етудің жолын қарастырады. Бұл ретте «Отбасы банк» филиалының қызметкерлері жастарға үй алудың тиімді жолдарын ұсынып, бағыт береді. Сондай-ақ «Бақыт мекені» бөлімінде қазақы отбасының құндылығы мен ұлттық тәрбие туралы түсіндіріледі. Осындай жан-жақты жұмыстар отау құратын жастарды өз бетінше шешім қабылдауға үйретіп, болашаққа деген сенімін қалыптастырып, жаңа өмірге дайындауға септігін тигізері &nbsp;сөзсіз.<blockquote>– «Отбасы» орталығында «Неке қию», «Алтын той», «Күміс той», «Маржан той» рәсімдері өткізіледі. Сонымен қатар, «Туу туралы куәлік», «Зейнетақы кітапшасын» табыстау да салтанатты іс-шараның біріне айналып отыр. Орталық ашылғалы, яғни, өткен жылдың қыркүйек-желтоқсан айы аралығында 54, биыл жыл басынан бері 58 жұптың некесі қиылды. Алтын той рәсімі өтті.Орталықтың қызметіне жүгініп, қажетті кеңес алған жас жұбайлардың сөзінен болашаққа деген үміт пен сенімді байқап, іштей қуанып тұрамыз. Осы мекен олардың берекелі ғұмырының алғашқы баспалдағы болса деп тілектестігімізді білдіреміз, – дейді орталық басшысының орынбасары Ұлбосын Қылышбаева.</blockquote>«Отбасы орталығынан» жаңа өмірге қадам басып, заңды неке куәлігін алған жас жұбайлар, олардың ата-аналары, сондай-ақ, өмірге келген сәбиінің «Туу туралы куәлігін» алған &nbsp;жастар жүрекжарды алғыс-тілектерін арнайы кітапқа жазып қалдырады.Былтыр ҚР Үкіметінің қаулысымен 12 мамыр – Аналар күні болып мерекелер тізіміне енгізілгенін білеміз. Осы мерекеге орай мұнда «Сәлем, Анашым…» терапиялық кеші өтті. Алғаш шымылдығын түрген «Күретамыр» отбасылық лабораториясында еркін форматта өткен шарада қоғам қайраткері Сәпен Аңсат, жыршы Жұмабай Шерниязов, ардагер-ұстаз Құрбанкүл Уахитқызы бастаған «Асыл жандар» әжелер ансамблі, Райкүл Байназарова, Нұржамал Бектайқызы, Қаламқас Арыстанқызы, Орынкүл Бұрханова сынды әр салада қызмет етіп жүрген қыз-келіншектер асыл аналары жайлы сағынышқа толы естеліктерін бөлісті. Айта кетейік, терапиялық кештің шарты бойынша кеш қонақтары анасына арнап хат жазып, жүрек түкпіріндегі сырын бөлісті. Осы орайда о дүниелік анасына хат жазып, перзенттік сырын ақтарған қоғам қайраткері Сәпен Аңсатов, жыршы Жұмабай Шерниязовтың хаттары тыңдаушыларды толғанысқа жетелеп, көздеріне еріксіз жас үйірді.Қармақшы ауданы «Ақжар» ауылының әкімі Нұржамал Бектайқызы анасының бойындағы қайсарлық пен қажырды, шыдамдылықты әңгімесіне арқау етіп, бүгінгі өмір жолында сол тәрбиенің жемісін көріп келе жатқанын айтты. Ал режиссер Орынкүл Бұрханова «Бұл өмірде адам қанша жетістікке жетсе де ананың бір ауыз жылы лебізіне, мейіріміне ештеңе тең келмейді» деп естеліктерін ортаға салды.«Ғаламнын сұлулары татымайды, Анамның күліп тұрған бейнесіне» деген жыр шумақтарының авторы Ержеңіс Әбді сол сәттегі басынан кешкен хәлді баяндай отырып, анасына арнаған жырын орындап, көпшіліктің көңілін босатты. Жас ақын, «Ақмешіт жастары» газетінің бас редакторы Айдар Сайлауов ана туралы өлең жолдарын назарға ұсынды. «Сенімен болашақ» қоғамдық бірлестігі Қызылорда филиалының басшысы Шакизат Қаратайұлы анасына арнап жазған «Мизам шуақ» атты кітабын орталыққа сыйға тартты. Кеште ана тақырыбында жазылған әндер шырқалып, көрермендер бір мезет әуен құшағында тербелді. Терапиялық кешке қатысқан әрбір көрерменге орталық басшысы Жанат Ашанқызы алғысын білдіріп, аналарға ақ жаулық сыйға тартты. &nbsp;

«Отбасы орталығының» жұмысы жандануда

<a href="https://kyzylorda-news.kz/">Kyzylorda-news.kz.</a> Бұл жолғы дебат өзгеше форматта ұйымдастырылды. Байқағандарыңыздай, дебат ағылшын тілінде өтті, яғни оқушылар өз ой-пі­кірін, ұстанымын ағылшын тілінде қорғады. Бұл Сырдария ауданының оқушыларының оқуда озат екенін және білімге құштар­лығын, жан-жақтылығын біл­діреді.Дебат жарысын №210 О.Әбілпаттаев атындағы орта мектебінің ағылшын тілі пәнінің бірлестігінің жетек­шісі Гүлнара Өмірзақова бас­таған бірлестік мүшелері Құ­ралай Бөлегенова, Әйгерім Мейрамбекқызы, Камила Халданова, Жансая Кәрібаева бірлесе ұйымдастырды. Жа­рысқа аудан мектептерінің оқушылары қатысып, 7 топқа бөлінген жоғарғы сынып оқушылары өзара бақ сынасты. Оқушылардың талабын аудандық білім бөлімінің әдіскері С.Ғалымжанқызы, №36 Ә.Тәжібаев атындағы мектеп-лицейінің ағылшын тілі пәнінің мұғалімі А.Ыбыраева және ҚР Президенті жанын­дағы Мем­лекеттік басқару ака­­де­миясының оқыту­шысы А.Ибрагимұлы бағалады.Оқушылар «Үштілділік саясаты тиімді немесе тиімді емес», «Киноиндустрия иде­логиялық маңызды құрал немесе маңызды емес», «Атом станциясын салған дұрыс немесе дұрыс емес» және «Балалар арасындағы құмар ойындарға қатаң тыйым салған дұрыс немесе дұрыс емес» тақырыбында пікірталас жасады. Іс-шараның жоғары деңгейде ұйымдастырылуына орта мектеп оқушылары Н.Жақсылық, Ә.Абатова ерекше үлес қосты. Оқушылар дебат талабын, ережесін, басты қағидатын түсіндіріп, сергіту ойындарын да ұйымдастырды. Ал Г.Келдібай тәуелсіз сарапшы ретінде қазылар алқасына көмектесті. Нәтижесінде жүл­делі І орынды №130 Абай атындағы орта мектебінің ағылшын тілі пәнінің мұғалімі Сымбат Қалмағанбетованың шәкірттері жеңіп алды. ІІ орын №132 Т.Айтбаев атындағы орта мектебінің оқушыларына бұйырса, ІІІ орынды №42 Қ.Баймағанбетов атындағы мектеп-лицейінің оқушылары иеленді. Жеңімпаздар мен жүлде­герлерге, сондай-ақ белсенді топтарға аудандық білім бөлімі тарапынан Алғыс хаттар табысталды.

Мектеп оқушылары ағылшын тілінде сайысқа түсті

<a href="https://kyzylorda-news.kz/">Kyzylorda-news.kz.</a>&nbsp; МӘМС жүйесі туралы тұрғындардың өзекті сұрақтарына жауап беруді жалғастырамыз. Әлеуметтік медициналық сақтандыру қорының Қызылорда облысы бойынша филиалының бас сарапшысы Айгүл Аханова түсініктеме берді.Мен шетелде күндізгі оқуымды аяқтадым. Сақтандыру мәртебесін қалай алуға болады?МӘМС туралы Заңның 5-бабының 3-тармағына сәйкес Қорға аударымдар және (немесе) жарналар төленбеген тұлғалар МӘМС жүйесінде медициналық көмекке құқық алу үшін төленбеген кезең үшін, бірақ төлем күнінің алдындағы он екі айдан аспайтын мерзім үшін Қорға ең төменгі жалақы мөлшерінің 5 пайызы мөлшерінде жарналар төлеуге міндетті республикалық бюджет туралы заңмен ағымдағы қаржы жылына белгіленген төлемдер (дербес төлеуші, 2023 ж. – 3 500 теңге, 2024 ж. – 4 250 теңге). Егер сіз күндізгі бөлімде оқыған болсаңыз, қарызды жою үшін kanc@fms.kz немесе e-otinish веб-сайты арқылы хат жолдап, растайтын құжаттарды (өтініш, диплом қосымшасымен) қоса беру қажет.Емхана деңгейінде оңалтудың қандай түрін алуға болады?Медициналық оңалту қызметтерін алу үшін жергілікті дәрігерге хабарласу қажет. Анамнезді жинап, мәліметтерді нақтылағаннан кейін учаскелік дәрігер реабилитологқа жолдама береді немесе пациенттің құжаттарын мультидисциплинарлық топ (МДТ) мамандарына жібереді.&nbsp;Емханада тәулік бойы бақылау және емдеу қажет емес жағдайларда амбулаториялық негізде оңалту емін алуға болады. Бұл емхананың жабдықталуына, науқастың жағдайына және оның ауруына байланысты.Амбулаториялық деңгейде, егер пациенттің денсаулық жағдайы тұрақты болса, оңалтудың үшінші кезеңін ғана жүргізуге болады. Мұны тек дәрігер немесе МДТ анықтай алады. Медициналық оңалту қызметтерінің негізгі көлемін МӘМС пакетінде алуға болады. ТМККК-ға туберкулезбен ауыратын науқастарды оңалту бойынша медициналық қызметтер кіреді.Мен емханаға бардым, олар менің сақтандырылмағанымды айтты. Қаңтар айынан бастап МӘМС-ке аударымдар мен жарналар ресми түрде жұмыс орнынан аударылады, бірақ әлі күнге дейін мәртебе жоқ. Неліктен?Сақтандыру мәртебесі соңғы 12 айда міндетті әлеуметтік медициналық сақтандыру жүйесінде қарызы жоқ адамдарға тағайындалады. &nbsp;Егер сіз қаңтар айынан бастап МӘМС-ге аударымдар мен жарналарды аударып жүрсеңіз, алдыңғы айлардағы қарызды төлеуіңіз керек, ал Сізге сақтандыру мәртебесі 3 жұмыс күні ішінде беріледі.&nbsp;Қарызды дербес төлеуші ретінде кез-келген ыңғайлы тәсілмен банктің филиалында немесе олардың мобильді қосымшалары арқылы, «Қазпочта» филиалдарында немесе төлем терминалдарында төлей аласыз.фото: egemen.kz

Неліктен МӘМС жүйесінде «сақтандырылған» мәртебесі жоқ?

<a href="https://kyzylorda-news.kz/">Kyzylorda-news.kz</a> Ел Президенті Қасым-Жомарт Тоқаевтың аймақтарды абаттандыру мен көгалдандыруды бастау жөніндегі тапсырмасына сәйкес облыс әкімі Нұрлыбек Нәлібаевтың ауыл-аймақтарда санитарлық тазарту жұмыстарын жүргізу жөніндегі үндеуіне орай 6 сәуірден бастау алған «Таза Қазақстан» экологиялық акциясы өз мәресіне жетті. Осы ретте Жалағаш ауданының әкімі Ардақ Ибраимов акцияға белсене қатысқан бірқатар табиғат жанашырын марапаттады. Табиғат – ананың мейіріміне бөленген бүгінгі белсенді тұрғындарға аудан әкімі шынайы алғысын білдіріп, үлгілі бастамаларға тоқталды.<blockquote>– Бұған дейін аудан тұрғындарын тазалық жұмыстарына белсене қаты­суға шақыратын үндеулер жарияла­ған болатынбыз. Осы ретте жерлесте­рі­міз­дің басым көпшілігі тазалық жұмыс­тарына белсенді араласты. Алдағы уақытта «Үздік көше» байқауын жа­рия­лап, көшелерімізге де сән бе­ре­міз деген ойдамын. Бұл да аудан тұр­ғындарының Жалағаш ортақ ме­кен екенін түсінгенін және аудан көше­лерінің айнадай таза болуына септігін тигізетінін білдіреді. Қоршаған ор­таның та­залығына жауапкершілікпен қарау, өзі тұратын үйді, аймақты, өл­кені таза ұстау және ағаш отырғызу, оны күтіп баптау әрбір азаматтың елжан­дылық парызы деп білемін, –&nbsp; деді аудан әкімі Ардақ Ибраимов.&nbsp;</blockquote>Белсенділерді марапаттау шара­сын­­да Ардақ Әбдіғаппар­ұлы елімізде су тасқыны орын алған ай­мақ­тарға көмек қолын созған аза­мат­тарға ерекше тоқталды. Тілсіз жау­­ды тізгіндеуде батылдық танытқан бү­­гінгі батырларды құрмет төріне шы­ға­рып, аудан халқы атынан алғы­с білдірді.&nbsp;«Таза Қазақс­тан» рес­пуб­ликалық ак­циясы ба­ры­сында ауданда «Таза өлке», «Кие­лі мекен», «Жасыл аймақ», «Өне­гелі ұрпақ» және «Мөлдір бұлақ» ап­та­лықтары аясында экологиялық мәде­ниетті қалыптастыру бағытында бір­қа­тар жұмыстар атқарылды. Мәселен, акцияның «Таза өлке» деп аталған алғашқы аптасында жала­ғаш­тықтар Таң елді мекенінде ағаш отырғызу, санитарлық тазалық жұмыс­тарын жүргізу, аллеяларды және аяқ су келетін арықтар мен каналдарды та­зарту жұмыстарын жүргізді. Акция­ға ауыл ардагерлері, белсенді жас­тар мен еріктілер өз үлесін қосты. Оған елді мекендегі шаруашылық құ­рылымдарынан 20 техника және 360 адам қатысты. Мұнан кейін «Киелі мекен» апталығында тарихи киелі орын «Түмен әулие» кесенесі аумағында абаттандыру жұмыстары жүргізілді. Шараға ардагерлер, ерікті жастар, мәдениет саласының қызметкерлері қатысты. Алдымен баба рухына құран бағышталып, кесене күмбезін сырлау, қорым аумағын тазарту, әктеу жұмыстары атқарылды.&nbsp;Ауданда республикалық және жергілікті маңызы бар тарихи және мәдениет ескерткіштердің саны – 71. Соның ішінде «Түмен әyлие» кесенесі «Қазақстанның киелі жерлерінің географиясы» жобасы аясында «Өңірлік қасиетті нысандар» тізіміне енген.Тарихына тоқтала өтсек, Түмен әулие ХІХ ғасырдың бірінші жартысында (1821-1875 жж) Қаракеткен, Амангелді ауылдық кеңестері, қазіргі М.Шәменов ауылдық округі елді мекенінде туып өскен. Әулиенің қасиеті, кереметтері ел аузында аңыз ретінде әлі күнге дейін айтылып жүр. Түменнің шешесі – жеті өлікке жан берген Мүсірәлі софы әзиздің баласы Қосым қожаның қызы. Өзі туып өскен жерде небәрі 54 жыл өмір сүрген.&nbsp;Тарихи жазба деректерге сүйенсек, Түмен әулиенің кесенесі 1876 жылы салынған. Аудан тарихы үшін маңызы зор бұл кесенеге 2011 жылы қайта жаңғыртуға респуб­ли­калық бюджеттен қаржы қаралып, қалпына келтірілген.Мұнан кейін аудан тұрғындары «Жасыл аймақ» апта­лығы аясында «Тағзым» аллеясында тал егу рәсімін өткізіп, санитарлық тазарту жұмыстарын жүргізілді. Шара барысында аллеядағы Социалистік еңбек Ері, мемлекет және қоғам қайраткерлері, Ауған соғысына, Семей, Чернобыль апаты зардаптарын жоюға қатысушылардың құрметіне арналған ескерткіш аумағында талдарды әктеу, санитарлық тазалық жұмыстары ұйымдастырылып, көр­кейту-көгалдандыру бағытында 100 түп сыр талы мен терек көшеттері отырғызылды. Сонымен бірге кент көше­леріндегі аяқсу арналары тазартылып, талдар әктелді.&nbsp;Одан әрі акция «Менің туған өлкем» апталығына ұласты. Акцияға аудан әкімі Ардақ Ибраимов пен облыстық ана­лар кеңесінің төрайымы Райкүл Мансұрқызы бастаған Жалағаштан шыққан, бүгінде Қызылорда қаласында тұратын аза­мат­шаларымыз қатысты. Шара барысында олар «Ақте­рек» сауықтыру лагеріне санитарлық тазалық жұ­мыс­тарын жүргізіп, 300 тал көшетін егіп, 100 ясень ағашы, 100 терек, 100 жеміс ағаштарын отыр­ғызды. Ал «Өнегелі ұрпақ» пен «Мөлдір бұлақ» апталығы аясында аудан бойынша жаппай сенбілік жұмыстары ұйым­дас­ты­рылды. Кенттің орталық алаңында орналасқан Ұлы Отан соғысынан оралмағандар ескерткіші айнала­сына аудан­дық ардагерлер кеңесі, ақсақалдар кеңесінің мүшелері санитарлық тазарту жұмыстарына белсене атсалысты.Айта кетейік, биыл көктемгі тазалық айлығы бастал­ғалы ауданда апта сайын сенбілік жұмыстары ұйым­дастырылып, бүгінге дейін 15 мыңға жуық ағаш отырғызылып, 65 мың тонна күл-қоқыс арнайы бел­гіленген орындарға шығарылған. Сондай-ақ кент және ауылдық округтерде аяқ су жүретін арықтар қазылып, жалғызбасты қариялардың ауласы тазаланып, тарихи-мәдени ескерткіштердің аумағына, орталық көшелерде, аллеялар мен саябақтарда көркейту-көгалдандыру, абат­тандыру жұмыстары жүргізілген.

Тазалық жанашырлары марапатталды 

<a href="https://kyzylorda-news.kz/">Kyzylorda-news.kz</a> «AMANAT» партиясының бастамасымен еліміз бойынша сайлауалды уәделердің орындалу барысын жүйелі бақылап отыру мақсатында ауданымызда салынып жатқан құрылыс нысандарына партиялық бекеттер ашылуда. Жыл басынан бері Шиелі ауданында барлығы 5 партиялық бақылау бекеті ашылған болатын.Бүгін яғни, 14 мамыр күні осындай нысандардың бірі партияның сайлауалды бағдарламасы аясында Бестам ауылындағы құрылысы басталған&nbsp;150 орындық клубқа партиялық бақылау бекеті ашылды.&nbsp;Клуб құрылысының жобалық құны – 431,0 миллион теңгені құрайды. Құрылыс жұмыстарын мемлекеттік сатып алу жұмыстары аясында жеңімпаз болып танылған Бас мердігер – «СК Дәнекер» ЖШС-гі жүргізуде. Авторлық қадағалаушы – «ПроектСервис» ЖШС-гі. Техникалық қадағалаушы – «ARTERIA» ЖШС-гі. Осы мамыр айында басталған құрылыстың 30 пайыздан астам жұмыстары атқарылған. Аяқталуы 2024 жылдың қараша айы деп жоспарлануда.&nbsp;Бақылау бекетінің ашылуына «AMANAT» партиясы Шиелі аудандық партия филиалының төрағасы Болат Сыздық, партиялық бақылау комиссиясының төрағасы Насырбек Мырзабеков және комиссия мүшелері, аудандық құрылыс бөлімі мен мердігер мекеменің өкілдері қатысты.&nbsp;Алдағы уақытта партиялық бақылау бекетінің жетекшілері мен комиссия мүшелері құрылыстың сапасына басты назар аударып, клубтың толық құрылысы аяқталғанға дейін қадағалайтын болады.

Шиеліде партиялық бақылау бекеті ашылды

<a href="https://kyzylorda-news.kz/">Kyzylorda-news.kz.</a> «Жаңа бизнес-идеяларды іске асыру үшін мемлекеттік гранттар алуға» business.enbek.kz порталында 1-лек бойынша өтінімдер қабылдау 2024 жылдың мамыр айының 20-31 аралығында басталады.Мемлекеттік грант 400 АЕК-ті (1 476 800 теңге) құрайды және нысаналы мақсаты жаңа бизнесті іске қосу және дамыту болып табылатын өтеусіз негізде тек бір рет қана беріледі.Гранттар қаражаты ісін жаңа бастаған кәсіпкерлерге өздерінің бизнес-әлеуетін ашуға, өндірісті жолға қоюға және дамытуға, сол арқылы өзін тұрақты табыспен қамтамасыз етуге мүмкіндік береді.Грантқа қатысуға өтінім беруге үміткерлер:- атаулы әлеуметтік көмек алушылар;- көпбалалы отбасы мүшесі (жұбайы / зайыбы);- асыраушысынан айрылу жағдайы бойынша әлеуметтік төлем алушылар;- қоныс аударушылар;- қандастар;- еңбекке қарсы көрсетілімдері жоқ мүгедектігі бар адамдар;- мүгедектігі бар бала (мүгедектігі бар балаларды) тәрбиелеп отырған адамдар және (немесе) оның жұбайы (зайыбы).Егер де аталған санаттың бірі болған жағдайда:- Жұмыссыз немесе 3 жылға дейінгі жеке кәсіпкер болуы шарт;- «Бастау Бизнес» жобасы шеңберінде кәсіпкерлік негіздеріне оқу курсын аяқтау;- порталда тіркелу;- грант алу шарттарына сәйкестігін тексеруден өту;- бизнес-жоспар үлгісін жүктеп алып, оны толтыру және порталға жүктеу;- өтініш формасын толтырып, ЭЦҚ кілтімен қол қою керек.Грантты: қажетті құрал-саймандарды, еңбек құралдарын, технологиялық жабдықтарды, малдарды, жануарларды, құстарды, көшеттерді, бұталарды, тұқымдарды сатып алуға, орын-жайларды жалға алу ақысын төлеуге алуға болады.Гранттар: тұтынушылық мақсаттарға, кредиттік қарыздарды өтеуге, жылжымайтын тұрғын үй сатып алуға және салуға, жер учаскелерін сатып алуға, акцизделетін өнімдер өндіруге берілмейді.Фото: Freepik

Қызылордада жаңа бизнес-идеяларды іске асыру үшін грант алуға өтінімдер қабылдау басталады

<a href="https://kyzylorda-news.kz/">Kyzylorda-news.kz</a> Сыр өңірі – жыр сүлейлері шыққан киелі өңір. Сол себепті де «Сыр елі – жыр елі». Мұнда жыраулық дәстүрдің мектебін қалыптастырған тұлғалар Сырдың даңқын асырды, мәртебесін арттырды. Аталар жолын жалғап, қанға сіңген жыраулық дәстүрді ұстанып жүрген жас жыршымыздың бірі – Тоғжан Бақытова. Ол 2016-2020 жылдары Қазанғап атындағы Қызылорда музыкалық жоғары колледжінде білім алса, қазіргі таңда Құрманғазы атындағы Қазақ ұлттық консерваториясының 3 курс студенті.Жас болса да дауысымен көпті өзіне қаратып жүрген жерлесіміздің бағындырған белесі мол. Бидас Рүстембеков, Ұрхия Жұмабекова, Ұлжан Байбосынова, Аққалқа Арыстанқызы секілді ұстаздардан тәлім алған шәкірттің топ жармауы да мүмкін емес еді. Таудай талап пен ынта-жігердің арқасында 10 жылдан астам уақытын жырмен байланыстырып келе жатқан Тоғжан аймақтық, облыстық, республикалық сахналардан бөлек, халықаралық фестивальдерде топ жарған. 12 жасында Әзербайжан Республикасы, Баку қаласында өткен халықаралық «Mugam» конкурсында ІІ орынды жеңіп алса, «Айгөлек» телевизиялық балалар шығармашылық байқауында І орын, 2014 жылы Астана қаласында өткен халықаралық «Алтын Құлын» конкурсында «Қыз Жібек» жырын жырлап, І орын иегері атанды. 2015 жылы «Дарын» халықаралық байқауында бас жүлде иеленіп, осы жылы «Үйреніп, өсіп келемін, Сырдың сұлу мақамын» атты жеке шығармашылық концертін өткізген.<blockquote>– Елдің атынан сахнаға шығу өнер адамына үлкен жауапкершілік жүктейді. Ата-анам, ұстаздарым, барша халық, туған ел маған сенім артып топқа қосқанда олардың үмітін ақтау мен үшін басты нәрсе болды. Ол уақытта кішкентай болсам да сол жауапкершілікті санаммен сезіндім. Мен онда «Көрұғлы» жыр дастанын Жиенбай жыраудың нұсқасымен орындадым. Сонда басқа елден келген өнерпаздар өз өнерлерін артта тұрған оркестрмен орындаса, мен өз домбыраммен ғана сахнаға шықтым. Жасым 12-де. Бойым кішкентай. Ақырын барып, орындыққа отырып, домбырамды шерте бастағанымда көрермен түгелдей қол соқты. Мен неге екенін түсінбей аңтаңмын. Сөйтсем, олар жырды бір ғана домбырамен алып шыққаныма құрмет білдіріпті. Фестиваль соңында көрермендердің біршамасы маған келіп «кішкентай адамның ішінен осындай зор дауыс қайдан шығып жатыр?» деп таңданысын білдіргендері болды. Тағы бір байқағаным – біздің ұлттық киімімізге шетелдіктер қызыға қарайды. Шетелге шығарда сахналық киімімді міндетті түрде ұлттық нақышпен байланыстыра отырып дайындаймын. Жырымнан да, киімімнен де қазақ екенім сезілсе деймін, – дейді жас өнерпаз.</blockquote>Тоғжан Бақбергенқызы 17 жасында Ташкент қаласында өткен халықаралық «Iste’dod» конкурсынан ІІ орын иеленген. Мұнан бөлек те жеткен жетістіктер, шыққан белестер легі жетерлік. Талапты Тоғжан телевизиялық танымал жыр-терме бағдарламаларында өнер көрсетіп, тыңдаушының ықыласына бөленіп келеді. Түрлі ортада топ жарып жүрген талапты жас әңгіме арасында мынадай қызықты оқиғамен де бөлісе кетті.<blockquote>– 12 жасымда қатысқан халықаралық «Mugam» конкурсында әділқазы болған кісі Ташкенттегі «Iste’dod» конкурсында да төрелік етті. Арада 5 жыл уақыт өтсе де, мені ұмытпаған екен. «Сіздің дауысыңызды мен естіп таң қалып тұрмын. Сол кездегі қоңыр үн әлі солайша сайрайды. Мен сізді бірден даусыңыздан таныдым. Қандай керемет» деп құрметін білдірді. Мен мұны қазақ еліне деген құрмет деп қабылдадым. Шет елде өнер көрсеткенде бір түсінгенім, өнер көрсетуге қазақтар келді десе, өзгелер аяқ тартып, қорқақтайды екен. Біздің айту мақамымыз олардан өзгеше екені рас. Туған жердің перзенті ретінде ел есімін әлемге таныту қолымнан келіп жатса, аянып қалмаймын. Өзге елге шыққан сайын, өз еліңе, жеріңе деген құрметің көбейіп, туған жердің, өскен ортаның қадірі артады. Басты мақсатым – «Елім маған не берді емес, мен еліме не бердім» деген ұстаныммен өмір сүру, – дейді өнерлі бойжеткен. &nbsp;</blockquote>

Жыраулық дәстүрді ұстанып жүрген жас жыршы – Тоғжан Бақытова

<a href="https://kyzylorda-news.kz/">Kyzylorda-news.kz.</a> Сырдария ауданнының әкімі Берік Сәрменбаев пен аудандық мәслихат төрағасы Ержан Әжікенов №131 Т.Қозыбаев атындағы орта мектебіндегі кадеттер сыныбының ашылуына қатысты. Іс-шараға аудандық ардагерлер кеңесінің төрағасы Мұса Келдібаев бастаған ардагерлер мен аудандық полиция бөлімінің жеке құрамы, білім саласының өкілдері, жастар мен мектеп оқушылары қатысты.Қоғамдық тәртіпті сақтауда қайсарлықпен қаза тапқан батыр ұлды үнсіздікпен еске алғаннан кейін аудан басшысы ерлік ешқашан ұмытылмайтынын айтты.<blockquote>– Ел Президенті «Мемлекет туған жері үшін аянбай еңбек етіп, құқық қорғау қызметіне бүкіл ғұмырын арнаған отансүйгіш перзенттерін жан-жақты қолдауға айрықша мән береді. Біздің міндетіміз – жаңа геосаяси ахуалға сай еліміздің қорғаныс қабілетін одан әрі нығайта түсу» деп атап өтті. Отан қорғау – қасиетті парыз әрі мәртебелі міндет. Халқымыз антына адал, сертіне берік перзенттерін ерекше қадірлейді. Қызмет бабында қайсарлықпен қаза тапқан батыр ұлымыз, полиция аға лейтенанты Талғат Қозыбаевтың есімі әркез жаңғырып тұрады. Өйткені, өз антына адал болған перзенттерін ел ешқашан ұмытпайды. Бүгінгі кадеттер сыныбына Талғат Қозыбаевтың есімін берудің өзіндік мәні бар. Жастарға патриотық тәрбие беру, Отансүйгіштік қасиеттерін жетілдіру, әскери қызметке дағдыландыру аталған сыныпта жүзеге асады. Сол арқылы жастар ел қорғаны болады. Бұл жерден ержүрек, әскери қызметке дағдыланған жас ұрпақ тәрбиеленіп шығады деп сенім білдіремін, – деді Берік Әбдіғаппарұлы.</blockquote>Мұнан соң облыстық полиция департаменті бастығының орынбасары О.Омаров сөз сөйлеп, қылмыс­керлерді ұстау кезінде қаза тапқан сақшылардың есімін мәңгі ету, өскелең ұрпақты патриоттық рухта тәрбиелеу, балаларда құқық­тық дүние танымды, жоғары рухани-адамгершілік пен моральдық-психолгиялық қасиеттерді қалыптастыру мақсатында кадеттер сыныптары ашылып жатқанын жеткізді. Кадеттер сыныбының тәрбиеленушілеріне кадет кәулігін тапсырды.Өз кезегінде ІІ дәрежелі «Айбын» орденінің иегері Т.Қозыбаевтың әкесі Есентай Қозыбаев алғысын жеткізді. Іс-шара барысында Қызылорда облыстық Полиция департаментінің жылдам қимылдайтын арнайы жасағы ұрыс тәсілдерін, әскери қару-жарақтарды көрсетті. Сондай-ақ, құрметті меймандар ІІ дәрежелі «Айбын» орденінің иегері Т.Қозыбаев атындағы кадеттер сыныбымен танысты.Айта кетейік, бейбіт күннің батыры Талғат Есентайұлы небәрі 25 жасында қылмыскердің қолынан қаза тапты. Ел тыныштығын қорғаудағы ерлігі үшін ІІ дәрежелі «Айбын» орденімен марапатталды. Қайтыс болған Тартоғай елді мекенінде және өзі туып өскен О.Мәлібаев ауылындағы көшелерге батыр ұлдың есімі берілді. Өзі оқыған орта мектеп Талғат Қозыбаевтың есімімен аталады. Жыл сайын батыр ұлды еске алуға арналған казақ күресінен республикалық турнир өткізілуде.

Қазақстан және Қызылорда облысының жаңалықтары