<a href="https://kyzylorda-news.kz/ru/">Kyzylorda-news.kz</a>. Ел болашағының тұтқасы – жастардың әлеуметтік, физикалық, рухани дамуы, жастар саясаты мемлекет назарынан тыс қалған емес. Жыл сайын шығатын сан түрлі бағыттағы бағдарламалар мен гранттар мыңдаған жасқа мүмкіндік сыйлап келеді. Осы орайда сырбойылық жастардың көшбасшысы, облыстық «Жастар ресурстық орталығының» директоры Талғат Тілеспен өткен жылдың оң өзгерістері мен жаңалықтары жайында сөз еттік.– «Жастар орталығының» жастардың бос уақытын тиімді өткізуінде, қоғамға белсене араласуында, тұлға болып қалыптасуында қолтаңбасы қалыптасқандай…– Әрине, орталық – Сыр жастарын бір арнаға тоғыстыратын, жастардың түйткілді мәселелерін шешуге тікелей ықпал ететін, шығармашыл, талантты буынға қолдау білдіретін бірден-бір мекеме. Ал, жастар қоғамның қозғаушы күші ғана емес, мемлекеттің тұрақты дамуының басты механизаторы. Жастарға құйылған инвестиция – өзінің маңызын жоғалтпайтын, қуатты Қазақстанның қарышты дамуына жасалған ең үлкен қадам.Бүгінде өңір халқының 21 пайызын жастар құрайды. Бір ғана 2022 жылдың ішінде оларды жан-жақты қолдауға бағытталған 5 мыңға жуық шара ұйымдастырылып, оған 100 мыңнан астам жас белсенді қатысты. Мемлекеттік бағдарламалар мен жобалар арқылы жастарды жұмыспен қамту, кәсіпкерлікке баулу, түрлі бағытта кеңес беруге бағытталған «Мүмкіндіктер керуені» шарасы тұрақты түрде ұйымдастырылып келеді. Игі шараның нәтижесінде 10 мың жас тұрақты жұмысқа орналасса, маусымдық кезеңдегі жұмыстарға 2 мың жас тартылды. Аймақ басшысының тапсырмасына сәйкес, NEET санатындағы жастардың үлесін төмендету бағытында да кешенді шаралар тұрақты түрде атқарылуда.Өңірімізге арнайы сапармен келген Ақпарат және қоғамдық даму министрі Дархан Қыдырәлі «Жастар орталығының» жұмысымен кеңінен танысып, бірқатар бастамаларға оң бағасын берді. Сондай-ақ жуырда өткен облыстық жастар форумында аймақ басшысы Нұрлыбек Нәлібаев Сыр жастарын қолдауға бағытталған тың бастамаларды хабарлады. Соның негізінде алдағы уақытта да ерекше жобалар қолға алынып, сырбойылық жастарға бірқатар мүмкіндік берілмек.– Сыр жастары өнер жағынан өрге қадам басқан. Соңғы уақытта ғылым, технология, жаңа дағдылар бойынша да топ жарып келеді. Талапты жастарға ЖРО тарапынан қандай қолдау бар?– Сыр елі – қашанда өнер мен жырдың ордасы. Сыр топырағында туған талантты жастар қазір еліміздің түкпір-түкпірінде дарынымен дараланып, елге адал қызмет атқарып келеді. Хош. Біздің жұмысымызға келер болсақ, орталық барлық санаттағы жастарға тікелей қолдау білдіріп келеді. Білім саласында жүргізілген тиімді реформалар арқасында жастар биіктерден көрінуде. Ізденіске құштар жастарды ұштау мақсатында «Жастар ресурстық орталығының» ұйымдастыруымен үздік жобалар қолға алынды. Атап айтсақ, «Жас ғалым» облыстық ғылыми жобалар және инновациялық идеялар байқауы, «ТОП – 20 студент» жобасы, алғаш рет «IQ-ORDA» республикалық интеллектуалдық байқауы, «ІNNOFEST» облыстық инновациялық жобалар фестивалі өткізілді. Бұл жобалар білімді жастарды қолдауға бағытталып отыр. Сонымен қатар талантты жастарды үлкен сахнаға шығаруда да орталықтың еңбегі зор. Қазір қоғамға неформалды білім түсінігі терең еніп келеді. Орталықтың қолдауымен ағылшын, түрік тілдерін меңгергісі келетін жастарға арнайы курстар ұйымдастырылуда.Тағы қоса кетерлігі, тікелей орталық жанынан құрылған ұлттық ережесіз жекпе-жек, таэквондо, каратэ сынды спорт түрлерінен арнайы үйірмелер де жұмыс істейді.– Жастар санатына кіретін топтың жас ерекшелігіне өзгеріс енді. Бұл замандастарымыздың өміріне қаншалықты әсер етеді?– Осы кезге дейін 29 жасқа дейінгі жастар мемлекеттік бағдарламалардың мүмкіндігін мейлінше өз қажетіне пайдаланып келді. Жақында категория 35 жасқа дейін көтерілгендігіне байланысты осы санаттағы әрбір тұлға тұрғын үй мен кәсіп бастауға қолдау беретін мемлекеттік бағдарламаларға еркін қатыса алады. Бұл – әрбір жас үшін үлкен қолдау.– Жастармен бірге жүріп, өз ортаңды табу бір бөлек. Олардың көшбасшысы болу – үлкен жауапкершілік. Мағжан сенетін жастардың бойында болу керек қасиет қайсы?– Жастар – ел үміт күтетін болашақтың темірқазығы. Қай қоғамды алсаңыз да, жастарға артылатын жауапкершілік жүгі жоғары. Жастар қандай болуы керек деген сауалға әрбіріміз жауап бере аламыз. Ал менің ойымша, жастардың бойында ең алдымен еңбекқорлық, білімге, жаңаны тануға деген құштарлық болуы қажет. Әр қазақ баласы өзі сүйетін дүниемен айналыса алатын рухани кемел тұлға болуы керек. Шәкәрім атамыз: «Біреудің мінін көргенше, жамандығын тергенше, өз ойыңды мазалап, өз бойыңды тазалап, өзіңмен алыс өлгенше» дейді ғой. Осы ұстаныммен жүрген әр адам жаман болмасы анық. Сан салалы мемлекеттік сектор – жастар саясатында жүргеніме біраз уақыт болды. Сондықтан жастар мемлекет дамуына ықпал ете алатын, тікелей жұмыс жүргізе алатын буын деп толық сеніммен айта аламын. Әр жастың өзіне артылған жауапкершілікті сезінуі аса маңызды.– Сұхбатыңызға рахмет! &nbsp;

Талғат Тілес: Қоғамның қозғаушы күші – жастар

<a href="https://kyzylorda-news.kz/ru/">Kyzylorda-news.kz</a>. Қызылордалық Дінмұхаммед Ақпан М.В.Ломоносов атындағы Мәскеу Мемлекеттік Университетінде оқиды. Жас ғалымның жеткен жетістігі көп. Ол мектеп қабырғасында жүріп-ақ, түрлі интеллектуалды сайыстарда шыңдалды, химия пәні бойынша өткен халықаралық олимпиадада, Корея Респуб¬ликасында өткен халықаралық «Жас ғалым» ғылыми жобасында жүлдегер атанды. Ой-өрісі өзгеше, ізденісі ерекше жаспен жақында әңгімелесудің сәті түскен еді.‒ &nbsp;Жас ғалым ретінде айтыңызшы, соңғы бірнеше жылда қандай жетістікке жеттіңіз?‒ Бұл жыл аса күрделі болды. Сонау Ұлы Отан соғысынан бері адамзат біріге ешбір сынаққа қарсы тұрған жоқ. Бірақ әр қиыншылық бізді бір жақсы нәрсеге үйретеді. Мысалы, ендігі жерде адамдар ғылым мен білімнің болашаққа бастайтын жалғыз ұғым екенін түсінді. Ғалымдарды бейбіт күннің батыры деп мәртебе көрсетті. Жеке менің ғылыми жетістіктерім үшін бұл жыл сәтті болды десем болады. Биыл көп өлшемді комплекстік кеңістіктің ішіндегі нақты кеңістіктерге классификация жасайтын теорема дәлелденді. Ломоносов конференциясында нәтиже жоғары бағаланды. Жаз айынан бастап қазіргі күннің ең мықты математиктерінің бірі, физика-математика ғылымдарының докторы, Ломоносов атындағы Мәскеу Мемлекеттік университетіндегі механика-математика факультетінің профессоры Андрей Ошемковпен бірлесе жұмыс бастадым.Дифференциалды геометрия бағытында маңызды теоремаларға қол жеткіздік. Жаңа математика тілінде мұны «Нийенхейс геометриясы» деп атайды. Қысқаша айтқанда, жанама кеңістікте берілген арнайы операторларды классификациялау. Бұл бағытта үш халықаралық конференцияда баяндама жасадым. Әлі де атқаратын жұмыс көп, себебі әр шешілген есеп астында жаңа он сұрақ жатады.Осы жылы мені 1,5 айлық дискретті геометрия бағытында құрылған жазғы бағдарлама үшін Мәскеу Физико-Техникалық Университетіне шақырды. Онда біз ұсынылған есептер бойынша ізденіс бастадық. 1999 жылы екі өлшемді Морс-Максвелл теориясы құрылса, оны әрі қарай көп өлшемді деңгейге жеткіздік. Бұл бағыт бойынша да мақалалар дайындалуда.‒ Математика шынымен қиын ғылым ба? Көбіне қиын есептің жауабы логикаға салып ойланғанда қарапайым болып шығады ғой. Дегенмен кей сәттерде сізде есептің жауабын таба алмай қаламын-ау деген қорқыныш бола ма?‒ Сізге кез келген ғалым-математик ең алдымен «математика – тіл» деп жауап береді. Шынымен де, жан-жағымызда болып жатқан әр құбылыс, қимыл математика тілімен жазылады. Оның өзге филологиялық тілдерден айырмашылығы – «ережеден өзгешелігі болмауы», яғни қазақ тілінде жуанға жуан, жіңішкеге жіңішке жалғанады десек: кітап деген кірме сөз бар. Математикада мұндай ерекшеліктер болмайды. Сіз санды екіге көбейтсеңіз жұп болады, бірақ мына сандардан басқасын деп айта алмайсыз. Ол – теорема, ол әрқашан дұрыс. Атақты физик Ричард Фейман: «математикада қиын деген не? Есеп шықса түсінуге болады, яғни қиын емес» деген. Әрине бізді ең алдымен жауабы қызықтырады. Мысалы, екі нүктені алайық, бірі екіншісінен жоғары болсын. Ешбір күш әрекет етпей бір нүктеден екіншісіне жіберсек, уақыт жағынан ұтымды траектория қандай? Көбі түзу сызық дейді, бірақ жауабы арнайы қисық – брахистохрона. Міне осы секілді жағдайлар жиі кездеседі, күтпеген жауаптар бәрімізді қызықтырады. Есепті шешу дегеніміз отыра қалып шығара бастау емес, олай болмайды да. Алдымен сенің алдыңда адамдар қандай нәтиже алғанын түсіну қажет, оларды зерделіп өзіңе ұнаған бағытта есепті шығарған жөн деп санаймын. Қазіргі таңда математика өте кең ғылым, мысалы алгебрамен айналысатын ғалым геометрияны түсіне қоймайды.‒ Жыл сайын математика тақырыбында түрлі жобалар қолға алынады. Ал соңғы уақытта бұл ғылымға енген өзгеріс бар ма?‒ &nbsp;Математика өзге ғылымдарға қарағанда консервативті. Түбегейлі өзгерістерді жақтыра қоймайды. Физикада алдында болған теорияны кеңейтетін жаңа теория құрылса – бұл өзгеріс, басқа ғылым салаларында да осындай.‒ Академик Асқар Жұмаділдаевтің есебін шығарып, бақ сынап көрдіңіз бе? Есептің әлі күнге жауабы табылмауына не себеп деп ойлайсыз?‒ Математика глобальді тұрғыда үшке бөлінеді: алгебра, геометрия және анализ. Асқар Серқұлұлының есебі алгебра мен сандар теориясы бағытында, ал мен геометрия және анализ бағытында жұмыс істеймін. Жалпы бәріміз математикпыз десек те, айналысатын облыстарымыз тым бөлек. &nbsp;Есептің ұзақ жылдар бойы шықпауы математикада қалыпты жағдай. Мысалы, Ферма теоремасы үш жүз жылдан аса уақыт шешімін таппады. &nbsp;Неге мына есепті шығарған жоқсыз деу, дәл солай ақынға келіп «мына тақырыпта поэма жаз» дегенмен тең. Математика қатал ғылым болса да, мұнда да шабыт пен идея керек.‒ Өзіңізді дамыту үшін жаңадан не үйренгіңіз келеді?‒ Тек қана ғылыммен айналысу, менің ойымша қате. Ми деген кез-келген бұлшық ет секілді шаршайды, сол себепті қалыпты режимде оны демалдыру қажет. Өзіме теңіз ұнайды, теңіз жағасында кешқұрым серуендеп сан алуан ойларға батып жүру мен үшін демалыс. Жылы күннің шуағы мен толқындаған суға шомылу бар күйзелісті алып кететін секілді. Сол себепті серфингті үйренсем деймін. Тағы бір маған рахат әкелетін физикалық жаттығу – атқа міну. Бала кезімнен атқа көп міндім. Қазір Мәскеуде жүріп ауылдағы сол кездерім еске түседі. Физикалық жаттығулар мидағы кернеуді алады, ми шаршауы физикалық шаршауға қарағанда аса ауыр тиеді.‒ Математиканы академик есекке теңейді. Адамзаттың бар жұмысын атқарғанмен, қадірсіз дегені ғой. Ал сіздің теңеуіңіз қандай болар еді?‒ Шынымен де математика бар ғылымның аппараты, барлығы қолданады. Бірақ оның қадірі жоқ дегенге келіспеймін. Бір ғасыр бұрын адамдар ғалымдарды жақсы танитын еді, олар қазіргі теледидардағы жұлдыздар секілді болған. Уақыт өте келе адамдар мұны ұмытты. Біз жалақысы аз, ешкімге қажеті жоқ нәрсемен айналысатын жұмысшыларға айналдық. Коронавирус кімнің кім екенін анық көрсетті. Вакцина ойлап тапқан – ғалым, цифрлы технологияны дамытқан да – ғалым болып шыға келді.Менен ақыл сұраса: жерде жүріп күлгеннен, аспанға қарап армандаған артық дер едім. Ал аспанға, ғарышқа адамды алып баратын ғалымдар, олардың ғылымдағы жетістіктері.‒ Сұхбатыңызға рақмет!

Дінмұхаммед Ақпан: Математика өзге ғылымдарға қарағанда консервативті

<a href="https://kyzylorda-news.kz/ru/">Kyzylorda-news.kz</a>. Мемлекет тарапынан көңіл бөліне бастағалы аудандар мен ауылдық жерлерде кәсіпкерлік саласы құлашын кеңге жаюда. Өткен жылы бір ғана Қазалы ауданында алғашқы жартыжылдықта 5208 кәсіпкерлік субъектісі тіркелген. Оның ішінде күнделікті қажеттілік қатарындағы тамақ өндірісінің орны ерекше. Уақыт пен қоғам сұранысына сай жартылай дайын өнімдер мен тәттілерді дайындаушылар саны көбейгенмен тапсырыс берушілер азайған емес. Демек кәсіпкер өзіне де, өзгеге де пайдалы бола білгені ғой. азалылық жас кәсіпкер Айдана Тілекпен жартылай дайын өнімдер өндірісі мен кәсіп бастау туралы сұқбаттасқан едік.– Кез келген қазақ қызының ас үйден алыс емес екенін білеміз. Дегенмен бұл салаға қалай келдіңіз?– Қасиетті Қазалы топырағында туып-өстім. Отбасылымын, құдайға шүкір, екі қыздың анасымын. Қаладағы С.Сейфуллин атындағы №165 мектеп түлегімін. Кейін Қорқыт ата атындағы Қызылорда университетінде «Ақпараттық жүйелер» мамандығында оқыдым. Өзіңіз айтқандай, қазақ қыздарының қай-қайсысы да ас үйден алыс емес. Оның үстіне біздің жақтың қонақ күтуі, дастархан дайындауы бөлек әңгіме. Мамандығым ақпараттық жүйелерге қатысты болғанмен тұрмыс құрған соң тәтті пісіру, түрлі тағамдар әзірлеуге қызығушылығым арта түсті. Үйде отырып онлайн курстарға қатысып, сан түрлі тәттілерді үйрене бастадым. Үйге келген қонақтарға, отбасыма дайындап, қуантатынмын. Өзім де тәтті тағамдар әзірлегеннен рақат аламын. Ас үйдегі шеберліктен гөрі сүйікті ісім, хобииім десем артық емес.Қазақтың үйінен қонақ арылған ба? Кез келген күні, кез келген уақытта жақын туысың, жұрағатың келіп қалады. Сондай уақыт тығыз болып, асыққан сәттерде ойыма келетін шешім – дүкеннен тез дайын болатын, жартылай дайын тағам алу. Осылайша кәсіп бастауға идея келді. Неге осы кәсіпті егжей-тегжейлі зерттеп қарап, дамытпасқа деген оймен іздене бастадым. Жартылай дайын өнім шығаруды бастағаныма бірнеше ай ғана болса да сұраныс күннен күнге артуда. Бұл – &nbsp;біздің өнімдердің халыққа пайдалы, күнделікті қажеттілігіне жарайтынының белгісі. Кәсіп бастарда мемлекеттен ешқандай грант алмадым, жоспарыма сай аздаған мөлшермен сатылымға шығара бастадым. Осылайша тапсырыс та көбейді, тұрақты клиенттер де пайда болды.– Қазір жартылай дайын өнім шығаратындар көп. Тұтынушы неге сіздің өнімді таңдайды?– Иә, ауданның өзінде жартылай дайын өнім шығарып жатқандар көп. Бірақ «Дәмді әлемнің» ерекшелігі – өнім құрамының табиғилығында, тазалығында. Үй жағдайында таза етті өзіміз тартып, қоспаларын қолмен турап, қамырын қолмен жайып, аналарымыз үйде қалай дайындаса, дәл солай жасап ұсынамыз. Етіміз 100% халал, өнімдеріміз, дайындайтын асханамыз тап-таза. Сондықтан тұтынушы жарнамасыз-ақ бір рет біздің өнімнің дәмін көрсе, тұрақты тапсырыс берушіге айналады.Демек, біздің мақсат орындалды.– Айдана, жартылай дайын өнім түрлеріне тоқталсаңыз…– Біздегі өнім түрлері: тұшпара, манты, тефтели, котлет, кеспе, самса, бәліш. Өнімдерді үш адам болып дайындаймыз.. Күніне 30 келіден жоғары тапсырысты дайындап жібереміз. Тәуекел деп кәсіп бастадым, енді алда жоспар көп. Алдымен «Дәмді әлем Қазалы» деген атаумен жартылай дайын өнімдерімізге арналған шағын дүкен ашсам деймін. Ассортиментті де көбейткім келеді. Бұйырса, барлығы да жоспарға сай жүзеге асады.– Кәсібіңіз өркендей берсін!&nbsp; &nbsp;<figure class="image"><img src="https://knadmin.beoblood.kz/uploads/kasipker_bfa90f188f.jpg" alt="касипкер.jpg"></figure>

Кәсіпкерге қолдау көп

<a href="https://kyzylorda-news.kz/">Kyzylorda-news.kz.</a> Жақында Сыр еліне Албанияда сүйінші хабар жетті. Қасиетті Қармақшы топырағының толағайы Ерасыл Сәулебеков зілтемір көтеруден жасөспірімдер арасында өткізілген әлем біріншілігінде 73 келі салмақ дәрежесі бойынша чемпион атанды. Қармақшылық жас зілтемірші Ерасыл аз ғана уақыт ішінде көк туымызды Әлем көгінде екінші рет желбіретіп, еліміздің мерейін тағы бір мәрте асқақтатты. Алғашында Мексикада топ жарса, бұл жолы Албания мемлекетінде жасөспірімдер арасында өткен әлем чемпионатында жұлдызы жарқырап, алтын медальды қанжығасына байлады. Өз салмағында жұлқа көтеруден 137 келі, серпе көтеруден 168 келі, жалпы қоссайыс бойынша 305 келі зілтемірді көтеріп, жасөспірімдер арасында Әлем біріншілігінің шыңына көтерілді. Ол олимпиадалық резервтің мамандандырылған аудандық №15 балалар мен жасөспірімдер мектебінің ауыр атлетика бөлімінің жаттықтырушысы Айдар Ерәлиевтың шәкірті. &nbsp;Жақында ол туған жерге табан тіреп, аудан жұртшылығымен кездескен еді. Одан соң арнайылап «Қармақшы таңы» газеті редакциясына да бас сұқты. Мүмкіндікті жіберіп алмай, біз де жас чемпионмен әңгімелескен едік.&nbsp;– Күні кеше ғана өзге елде Қазақстанның көк байрағын бір сатыға жоғары қойып, Әнұранын шырқатып «Әлем чемпионы» атанып келдіңіз. Сол сәттегі алғашқы әсеріңізбен бөліссеңіз?– Ол әсерді тіптен сөзбен жеткізе алмаймын. Әрине, кеудені қуаныш кереген сәт болды. «Төбең көкке бір елі жетпей тұр» деген тіркес дәл осы тұста айтылатын секілді. Елімнің Әнұраны ойнағанда жанарыма еріксіз жас үйірілді. Бұны қуаныштың, талай уақыттағы еселі еңбектің жемісі деп білемін. Кей адамдар осы сәтті дұрыс түсіне бермеуі мүмкін. Сондықтан бұл сезімді көзбен көріп, сезіну керек секілді. Осыған дейін Қазақстанды әлемге танытып жүрген аға-інілер мұны жақсы біледі деп ойлаймын. Әнұранды өзге елде шырқату ерекше сезім.&nbsp;– Неге таңдауыңыз осы спорт түріне түсті? Жалпы ауыр атлетикаға қалай келдіңіз?– Бала күнімнен спортқа бейім болдым. Кішкентай күнімнен үлкен ағама «Мені күреске, боксқа апаршы» деп қолқа салатынмын. Солай 6 жастан бастап Айдар ағайымның ықпалымен спортқа келдім. Спорттағы қызығушылығым ауыр атлетикаға алып келді. Түрлі спорттық сайыстарға қатыстым, жарыстарда топ жара бастадым. Бұл одан әрі шыңдала түсуіме сеп болды. Алға қарай ұмтыла бастадым. Осылайша 10 жылдық нәтижеде екі дүркін Әлем чемпионы атандық. Аллаға шүкір, төккен теріміз еңбегіміз текке кетпеді. Негізі адам алға қандай да бір мақсат қойып, сол жолға барын салса, алын¬байтын қамал жоқ екен. Соған тағы бір мәрте көзіміз жетті.– Дайындық қалай өтеді? Болашаққа қойған жоспарыңыз қандай?– Дайындық әр адамның өзіне байланысты. Кейде шаршау мен жалқаулық та болып тұрады. Мұны жасырмаймын. «Бап шаба ма, бақ шаба ма?» деп жатады ғой. Ол рас нәрсе. Кейде бағым бірінші шауып жатады. Бірақ бабымды да жоғалтпауға тырысамын. Спортта еңбек еш кетпейді. Түбі бір ақталады, жемісі көрінеді. Төккен әрбір тердің өтемі жеңіс болып қайтатынын көз көріп жүр. Біз бұл жеңіспен тоқтап қалмаймыз. Алда түрлі жарыстарға қатысуды жоспарлап отырмыз. Арманым – олимпиада чемпионы болу.– Ең мықты қарсылас кім болды?– Мықты қарсыластардың қатарында әзірбайжандық ауыр атлетші &nbsp;мен кәріс спортшысы болды. Олардың да дайындығы осал болған жоқ. Біз де қалыс қалмай чемпиондық атақты қанжығамызға байладық.&nbsp;– Әлем чемпионы ретінде &nbsp;өзіңізден кейінгі жас спортшыларға қандай ақыл-кеңес бересіз?– Қандай жағдай болмасын бапкердің ақылына құлақ асу керек. Спортта көп дүние үздіксіз жаттығумен, шынығумен келеді. Жалқаулыққа бой алдырмай дайындықты қалдырмау қажет. Сонымен қатар, зиянды іс-әрекеттен ада болған дұрыс. Мұның бәрі айналып келгенде денсаулыққа кері әсерін беріп жатады. Спортшы үшін деннің саулығы басты орында тұрады емес пе?! «Еңбек бәрін жеңбек» дейді ғой дана халқымыз. Дәл солай еңбектің жемісін көретін шақ келеді. Әрине, кейде сүрініп, құлау да болады. Тек алға қарай ұмтылу керек. Бұл шыңдалудың жолы. Берер ақыл-кеңесім – осы.&nbsp;– Спортшының жеткен жетістігі бапкерге де байланысты ғой. Бапкеріңіз туралы да айта отырсаңыз.– &nbsp;Мықты спортшының жетістігі тынымсыз еңбек пен талапшыл жаттық¬тырушыға байланысты. Әлбетте менің бапкерім Айдар Ералиев ағайымның еңбегі зор. Мектепте мұғалім оқушыны білімге қалай баулыса, спортта бапкер солай жол көрсетеді. Спорттың күшімен Қазақстанды әлем елдеріне танытуға болады. Жаттықтырушы жақсы болса, спортшының да алар асуы көп болады. Мұның барлығы сайып келгенде сол бапкердің арқасы. Ал менің бұл тұста жолым болды деп айта аламын.&nbsp;– Сіз үшін өмірдің құндылығы неде, жеңіске жету үшін не істеу керек?– Жеңіске жету үшін талпыныс пен еңбек, арман мен мақсат керек. Спортшының жетістігі тынымсыз жаттығу мен білікті бапкерден бөлек ата-анасына, жанкүйерлеріне де байланысты екенін айтқым келеді. Әрине, бұл жандардың қолдауы мен үшін ерекше.&nbsp;– Әңгімеңізге үлкен рақмет! Жеңісті күндеріңіз көп болсын!

Қармақшылық зілтемірші: Төккен әрбір тердің өтемі жеңіс болып қайтады

<a href="https://kyzylorda-news.kz/">Kyzylorda-news.kz.</a> &nbsp;Бұл өмірде ешкім мұқтаждықты, зәру болуды қаламайтыны белгілі. Әйтсе де қоғамда түрлі тағдыр бар. Өзгеге қол ұшын созып көмектесу қанымызда бар қасиет. Қиналғанды демеп, жақыны болмаса да жанашырлыққа асыққан жастардың күн сайын қатары артып келе жатқанына, әрине қуаныштымыз. 2020 жылды Мемлекет басшысы Еріктілер жылы деп жариялады. Сол тұста ауданның ерікті жастарының басын қосатын «Демеу» тобы құрылды. Жетекшісі – аудандық емхананың медбикесі Әсем Мерекова. Қоғамдық жұмыстардың бел ортасында жүретін қайсар қыз жұрт үйден шығуға қорқып, екінің бірі ауруға шалдығып, кеселмен күрескен уақытта үй-үйді аралап, тегін дәрі екті. Қаншама адамның бата мен са¬уабын алды. Сондай жаны жайсаң жанмен жақында тілдескен едік.– Еріктілер жылында «Демеу» еріктілер тобын құрдыңыз. Бұған не түрткі болды? Идея қайдан келді?– 2020 жылы еліміздің Президенті Қасым-Жомарт Тоқаев «Еріктілер» жылы деп жариялады. Сол жылмен жаһанды жайлаған пандемия да тұспа-тұс келді. Әлі күнге дейін есімде. Бір өзім күніне 28-30 үйге дейін барып тегін екпе салып жүрдім. Мұғалімдер арасында сондай көмек қолын созды. Жалпы қай саланың жастары болмасын әр жерде өз қолынан келгенінше жақсылықтарын жасап жүрді. Содан аудандық Жастар ресурстық орталығы жанынан аудандағы белсенді жандар кездесіп, топтың атын құрып «Демеу» деп қойдық. Сол уақыттан бері жығылған жанға демеу болып, түрлі іс-шараларды ұйымдастырып, аудан тұрғындарын жақсылық жасауға шақырып жүрген жайымыз бар.– Пандемия көп нәрсенің көзін ашты. Құндылықтар ауысты. Көпшіліктің де волонтерлыққа деген көзқарасы өзгерген шығар. Қалай ойлайсыз?– Қазақ өзі ертеден жетімін жылатпаған, жесірін қаңғытпаған халық қой. Біз бір үзім нанның өзін жанындағысына бөліп берген, жақсы мен жаманды бірге көріп келген халықпыз. Бұл асыл қасиетімізді бүгінгі күнде жоғалтқан емеспіз. Жанашырлық шуағын жан-жаққа таратуға мүмкіндігінше ат салысып келеміз. Расымен, қазір әлеуметтік желінің қайсысын ашып қарасаңыз да жанашыр жандардың игі ісіне толы жазбаға тұнып тұр. Ол біздің асылдығымыз бен жанашырлығымыздың дәлелі. Барлығымыздың бір-ақ мақсатымыз бар. Ол – адам болып өмірге келген соң, сауапты іспен айналысу. Міне, осы мақсатта ауданның белсенді жастары талай жан игі істің қасынан табылуда. Жастар игі іс жасауға қашанда дайын. Міне, бұл көзқарастың өзгергенінің айқын көрінісі емес пе?!– Еріктінің бір күні екіншісіне ұқсамайды. Түрлі адамдарға жолығып жатасыздар. Солардың қатарында жадыңызда ерекше сақталғандары бар ма?– Әрине, түрлі жағдай болды. Барлығын көзбен көрдік. Әсіресе пандемия кезінде жағдайы жақсы тұратын үйден тұрмысы төмен үйлерге «Витамин С» ұрлап салғаным бар. Сол жағдай есіме түссе әлі күнге дейін күлемін. Қазір еске алып, күліп жатырмыз ғой. Ол кезде тек адамдарға қайтсем көмектесемін деген ой ғана болды ғой. Сонымен қатар, жалғызбасты ата-әжелерге барып ыстық тамақ беріп, үйін жинауға барамыз. Олар балаша қуанып қалады. Сондай сәтті көргенде өзімді бақытты сезінетінмін. Себебі адамға қуаныш сыйлаудан артық бақыт жоқ секілді.– «Еріктілер өзгелерге көмектесуден гөрі көзбояушылықпен айналысады» деп сөгіп жататындар да кездеседі. Ондай пікір айтатындарға қалай жауап берер едіңіз?– Иә, түрлі әңгіме айтатындар кездеседі. Бастапқы жылдары жылап қалатынмын. Жұмысымда да түрлі кедергілер болды. Содан кейін «өзіңе сен, ісіңді Алла көріп тұр» деп өзімді жұбатып қоятын болдым. Көпшілігі жасаған жақсылығын бірден әлеуметтік желіге салады деп сөгіп жатады. Ол мақтаныш үшін емес, басқалардың мейірімін ояту және демеушілерге есеп ретінде саламын. Өйткені ол жерде мен қалтамнан шығармаймын, жәй ғана ұйымдастыру қызметін атқарамын.– Еріктілік – өз уақытыңды, күшіңді сарп етіп, өзгеге көмек қолын созу. Мұндай әрекетке кез келген адам бара бермейді. Дегенмен, соңғы жылдары елімізде бұл қозғалыстың дамып, еріктілердің саны артып келе жатқандығы байқалады. Волонтерлікпен айналысуды ниет етіп жүрген жастарға не айтар едіңіз?– Рас, әдепкіде ерікккендер, жұмыстары жоқ деп түрлі әңгімелер ерді. Бірақ соның бәріне мойымай, «адамдарға қайтсем көмек қолын соза аламын» деп шын ниетпен көмектесу қажет. &nbsp;– Мұнан өзге «Demeu Travel» туристік компания құрғанызды білеміз. Қазіргі жұмыстар қалай жүріп жатыр?– Қазір қасиетті Рамазан айы болған соң бұл жұмысымыз сәл тоқтап тұр. Дегенмен алдағы уақытқа жоспарымызды бастап кеттік. Түрлі саяхаттарды да ұйымдастыратын боламыз. Тур агенттік негізінде облыс және аудан тұрғындары Қазақстанның көрікті жерлеріне саяхатқа шығып жүр. Сол арқылы адамдар қайырымдылыққа өз үлестерін қоса алады. Халықтан не кәсіпкерлерден сұрай бермей, осы саяхаттан түскен қаражаттың 10 процентін көпбалалы немесе жағдайы төмен отбасыға және ерекше балаларға жұмсауды басты мақсат етіп қойдық. Осылайша бәр жағынан адамдарға қызықты саяхат жасаумен қатар екінші жақтан мұқтаж жандарға да қуаныш сыйлауды жөн көрдік.– Әңгімеңізге көп рақмет! Жұмысыңызға тек сәттілік тілейміз.

Қармақшылық жастар игі істің қасында жүр

<a href="https://kyzylorda-news.kz/ru/">Kyzylorda-news.kz</a>. Актер Арай Көшімбаевтың тұлғалық болмысы Н.Бекежанов атындағы қазақ музыкалық драма театрында сахналанған «Сыған серенадасы», «Адам болып өтейін», «Жүз жылдық махаббат», «Ауылдан келген ару» қойылымынан таныс. Режиссер О.Нұрмахановтың «Бір келіншек» қысқаметражды кинофильмінде, «Марал ишан» туралы деректі фильмде экрандық бейнелерді сомдаған талант Қазақстан Театр Қайраткерлері Одағының қазақ театр өнеріне қосқан үлесі үшін “Құрмет” грамотасымен марапатталған. Өнер адамымен театр тақырыбында әңгіме өрбіттік.‒ Әдетте &nbsp;өнер адамына тән тереңдікті отбасы тәрбиесімен, дала философиясымен байланыстырады. Өнерге әсем өрнек салуда адамды тағы не тәрбиелейді?‒ Шынайылық пен жан дүниенің тазалығы өнер адамын биіктете түседі. Сондай-ақ адам болмысының қалыптасуында білімнің алар орны бөлек. Әдетте әдеби мағынада естілетін ұшқыр қиял, асқақ арман жай сөз болып көрінсе де, осы дүниелер өнер адамын алға жетелейді. Сондықтан халыққа адал еңбек ету үшін алдымен жақсылыққа, өзің сомдаған кейіпкеріңнің тұлғалық болмысына балаша сенуің керек.‒ «Актер деген мамандық ‒ күндіз-түні ұйықтамайтын оқу-тоқуды таңдап алу» деген Оралхан Бөкейдің сөзі бар. Қызығынан қиындығы басым мамандықты сіз қалай таңдадыңыз?‒ Өнерге адам екі жолмен келеді: бірі кездейсоқ, бірі өзі қалауымен өнерді жақсы көрушілер. Сахнаға шынайы сезіммен келген актер бәріне көнеді деп ойлаймын. Мен де бала күнімнен өнерден алыс емес едім. Сондықтан қиын болса да театр сахнасын өзім таңдап келдім деп толық айта аламын. Кейде кейіпкердің болмысына ене алмай, қиналғаннан жаның ауырып, &nbsp;қолыңды бір сілтеп кетіп қалғың келетін сәттер де болады. Бірақ соңына дейін төзіп, бар еңбегіңді жұмсаған образың көрермен көңілінен шығып, қошеметке бөленгенде бәрін ұмытып бір марқайып қаласың. Кәсібіңе деген сүйіспеншілік, өнерге деген адалдық деген осы болар?! Осылайша театрда &nbsp;жаңа күн, жаңа образ, тың қойылым бірінен соң бірі үздіксіз &nbsp;жалғаса береді. Осы орайда Өнер Академиясында тәлім берген Жайлау Ақшабайұлының, театрдағы ұстазым режиссер Хұсейн Әмір-Темір ағаның еңбегі зор.‒ Театр сахнасында жүрген 13 жылда біршама тарихи рөлді сомдаған екенсіз. Айтыңызшы, тарихи тұлғаларды сомдауда қандай да бір тылсым дүние бола ма?‒ Тарихи тұлғаларды сомдауда есте қаларлықтай тылсым дүние болған емес. Бірақ ойдан шығарған кейіпкерлерден гөрі тарихи тұлғаларды сомдау өте қиын. Өйткені, тау тұлғалардың бейнесін сомдау екі есе жауапкершілікті талап етеді.‒ Белгілі бір тұлғаны бейнелеу актер психологиясына әсер ететіні рас. Қойылымнан соң кейіпкердің аурасынан шығу ұзақ уақыт алатын болар…‒ Әрине, ондай сәттер жиі болады. Кейде жүрегің дүрсілдеп «аузыңа тығылады». Сосын «бұл тек қойылым, өзіңе кел» деп басу айтып, сабырға келемін.‒ Аға, қойылымнан соң көрермен көзінен қандай әсер іздейсіз?‒ Спектакльден кейін халықтың шынайы разылығын білдіруін қалап тұрасың. Көз ‒ адамның айнасы. Қуаныш та, күйініш те адамның жанарында жазылып тұрады. Сенің еңбегіңе риза болғаны немесе көңілі толмағанын көрермен көзінен оқуға болады.‒ &nbsp;Кезінде толық бір пьесаны дайындау үшін ұзақ уақыт жұмсалған екен. Ал қазір қойылымның бір-екі ай ішінде дайын болатынын естіп жүрміз. Бұл қаншалықты рас? Қаншалықты дұрыс?‒ Ол енді шығарманың салмағына байланысты. Күрделі шығарманың дайындығы ұзақ уақытқа созылады. Театр репертуарында жеңіл бірақ айтар ойы, мазмұнды мәні бар шығармалар да кездеседі. Сондай қысқа туындыларды аз уақыт көлемінде сахналайды. Бұл жерде актерлардың жұдырықтай жұмылып, өз ісіне мұқият кірісуі өте маңызды.‒ Көрермен мәдениеті төмен деген пікірмен келісесіз бе? &nbsp;‒ Әрине бес саусақ бірдей емес. Театрға келушілердің бәрі бірдей мәдениеті төмен адамдар деп айта алмаймын. Қазақта «бір қарын майды бір құмалақ шірітеді» деген мәтел бар ғой. Кейде залда не үшін, қайда келгенін білмейтін көрермендер де отырады. Сахнадағы болып жатқан дүниенің исі мұрнына бармай, телефонға үңіліп қараушылар да жоқ емес. Ондай жандарға жеңіл әзіл, арзан күлкі керек. Менің ойымша, әр адамның ішкі мәдениеті, көңіл таразысы болу керек. Сонда ғана өзіңе және өзгеге деген құрметің арта түседі.‒ Театр сахнасы ‒ тарих, психология үндескен орын, ал актерге берілген рөл үміт пен үрейдің арпалысы тәрізді. «Қап, осы кейіпкердің бейнесін аша алмадым-ау» деген өкініш сізде де кездесе ме?‒ Әттеген-айлар ара-тұра болып тұрады. Кезінде берген рөлдерді «енді қайталап ойнасам ғой, басқаша жасар едім» деп көңілің толмайтын кез барлық актерде кездеседі деп ойлаймын.‒ Осыдан тоғыз жыл бұрын С.Жүсіптің «Адам болып өтейін» драмасындағы Барғай рөліңіз үшін «Эпизодтық бейнесі үшін» номинациясымен марапатталған екенсіз. Бұдан өзге сіз үшін қайсы кейіпкердің шоқтығы биік?‒ «Эпизодтық бейнесі үшін» номинациясы алғаш берілген марапат еді. Одан кейін де басты рөлге, қосалқы рөлге бекітілдім. Мен үшін барлық рөлімнің өзіндік ерекше орны бар. Ал шоқтығы биік бейне деп Шәмші Қалдаяқов, Мағжан Жұмабаевтың рөлін ойнаған сәтті айтар едім. Әрі болашақта басқа да басты кейіпкерлерді ойнаймын деп үміттенемін.‒ Театрға келген көрермен қоңыр даусыңызды бірден таниды. Ән айту табиғатыңызда бар қасиет тәрізді…‒ Әнді бала күннен айтамын. Кезінде әнші болсам деген арманым да болған, сол мақсатпен Алматыдағы Ж.Елебеков колледжіндемузыкант мамандығында оқыдым. Бірақ денсаулығыма байланысты ән айтуды қоя тұруға тура келді. Дегенмен соның пайдасын қазір театрда көріп жүрмін. Жалпы домбырамен өлең айтқанды жақсы көремін. Шаршағанда домбыраны қолға алып, үйдегілерге «тегін концерт» қойып беріп демаламын (күліп).‒ Әдетте сахнадағы спектакльді көргенімізбен театрдың ішкі кухнясын біле бермейміз. Қойылым барысында рөлге әсер ететін оқыс оқиғалар бола ма?‒ Әрине оқыс оқиғалар жиі болып тұрады. Мысалы, менің сахнада тісім мен мұрным сынған, қабырғам да майысқан. Мұның бәрінен көрермен хабарсыз. Ал сахнада жарақатты сездірмеуге тырысамыз.‒ «Театр ‒ шахмат, ал актер пешкі ме? Жоқ! Әр актер ‒ өзіне &nbsp; бекітілген рөлдің авторы» дейді А.Әшімов. Ал сіз үшін актер дегеніміз кім?‒ Мен үшін актер ‒тұлға мен өнерді қалыптастырушы.‒ Өнерге даярлаған шәкірттеріңіз бар ма?‒ Әзірге шәкірт тәрбиелей қойған жоқпын, бірақ болашақта ізбасарларды дайындайтын боламын.‒ Сұхбаттасқаныңызға рақмет!&nbsp;

Арай Көшімбаев: Адамның ішкі мәдениеті маңызды 

<a href="https://kyzylorda-news.kz/ru/">Kyzylorda-news.kz</a>. Асқар Шалқарұлы − 1996 жылы 30 наурызда Алматы қаласында дүниеге келген. «Қабілет» мектеп-гимназиясында, Қ.Мұхаммеджанов атындағы №1 мектеп гимназиясында орта білім алған. Қорқыт ата атындағы ҚМУ-дың түлегі. Еңбек жолын «Қазақстан-Қызылорда» телеарнасында жаңалықтар жүргізушісі болып бастаған. Кейін Қорқыт ата атындағы ҚМУ-да студенттер кәсіподақ комитетінің төрағасы, облыстық филармонияда конферансье, «Б-Асқар» серіктестігінің директоры қызметін атқарған. Жасөспірімдер арасында велоспорттан екі дүркін чемпион, кәсіпкер:− Сыр елі сізді тележүргізуші ретінде таниды. Телеарнаға қалай келдіңіз?− Анам Қаршыға Есімсейітова белгілі журналист, ақын. Кішкентайымнан журналистің баласы болған соң сол ортадағы қызу тіршілікті көріп өстім. Анаммен бірге іс-сапарға баратынмын. Үлкендерді көріп тез есейгім келді. Ол кезде мемлекеттің қаржыландыруы аз еді. Тележобалардың жарыққа шығуына кәсіпкерлер көмектесетін. Сол үшін мен кәсіпкерлерге қызығатынмын. Кейін студенттік жылдары телеарнада жүргізуші болдым. Басында аз ақшаға уақытша келісіп бардым. Басшылық менің жаңалық жүргізгенімді ұнатып тұрақты жұмыс ұсынып, айлығымды көбейтті. Мен үшін «Қазақстан-Қызылорда» телеарнасы – үлкен мектеп. Қаншама дарынды ірі додаға баптап қосқан орта. Халыққа тікелей эфир арқылы шығу үлкен жауапкершілік жүктейді. «Жаңа күн», «Өзекжарды» бағдарламасының редакторы әрі жүргізушісі болыпта жұмыс істедім. Бұл ұжымнан үйренгенім көп болды. Әртүрлі тұлғалармен сұхбат құрып, мол тәжірибе жинадым. Бұл ортада білімді де, біліктілігімді де арттырдым.− Кәсіп бастауыңызға не түрткі болды?− Үшінші курста оқып жүріп концерт, телеарнаға барып хабар жүргіздім. Студенттер кәсіподақ комитетінде төрағалық жұмысым бар бәрін қатар алып жүру қиын болды. Тапқан жалақымнан бөлек жұмыстың жауапкершілігі де жоғары еді. Біріне үлгерсем, бірін ренжітіп ұятқа қалғым келмеді. Өзімнің кәсібімді ашқым келді. Бір орында тұра бермей, өзгеру керек екенін ұқтым. Бір уақытта бірнеше жерде жұмыс істеп жинаған азын-аулақ ақшама кәсіп бастадым. Халыққа түрлі қызмет көрсетеміз. Түрлі шараларды ұйымдастырып, мұғалімдерге арналған әдістемелік журнал да шығарамыз. Алайда мемлекеттік тапсырысты алмаймыз. Халықпен жеке ұйымдармен байланыстамыз. Ұжымға көп адамды жұмысқа алып, оның тек үш-төртеуі ғана жұмыс жасағанын қаламаймын. Сондықтан қазір командама тек белсенді жастарды жинақтадым.− Велоспорт мектебіне қанша жасыңызда бардыңыз?− 7 сынып оқитын кезім, теледидардан "Тур де Франс" жарысына көзім түсті. Біздің елдің намысын қорғайтын Александр Винокуровты көрдім. Барлық жарыс күндері жанкүйер болып, осы спортқа қызығушылығым оянды. Уақыт жібермей қаламыздағы велоспорт мектебіне бардым. Жаттыға келе облыстық жарыстарда бақ сынадым. Алғашында 60-50 орындарды қанағат етіп жүрдім. Күнделікті жаттығу, дайындықтан қалмайтынмын. 2009 жылы облыстық жарыста топ жарып, Алматы қаласында өткен ел біріншілігінде үштікке кіріп "Спорт шеберлігіне үміткер" межесін орындадым. 2010 жылы "ҚР чемпионы боламын", "Ұлттық құрамаға кіремін" деп, мақсат қойдым.− Мақсатыңызға жеттіңіз бе?− Кенет ойламаған жерден көлік апатына ұшырап, басымнан жарақат алдым. Бірақ, бір аптаға жетпей қайта жаттығуға қосылдым. Араға 10 күн салмай турникке тартылу барысында жерге құлап, қолымды сындырдым. Бұл мен үшін үлкен сынақ болды. Бірақ ол мені мақсатымнан тайдырған емес. Уақытылы емделген соң, велосипедімді қайта тізгіндедім. Үзілістен кейінгі алғашқы жарысым Астана қаласында өтті. Елдік үлкен сайыста 6-шы орынды еншіледім. Алматы қаласында Ел Чемпионаты басталды. Бірінші күні асығым алшысынан түсіп, қола медаль иелендім. Ертесіне, топтық жарыста тағы да құладым. Бірақ бұл жолы шегінерге жол жоқ еді. Барлық күш жігерімді жинап жарысты жалғастырып, мәреге бірінші болып жеттім. Үшінші күні тағы алтынды жеңіп алдым. Сөйтіп, 2011 жылы Ұлттық құрамаға кіріп, Астана қаласында өткен бес күндікте үш алтын бір күміс еншілеп велоспортты тәмәмдадым. Спортты қойғаныммен велосипед айдауды тоқтатпадым.− Еліміздің велоспорт саласын қалай бағалайсыз?− Қаладағы велоспорт мектебінің түлегімін. Ол − мықты тәрбие ошағы. «Астана» велокомандасы әлемдегі әйгілі топтармен тең. Тұңғыш Президент Нұрсұлтан Әбішұлының қолдауымен құрылған команданың болашағы жарқын. «Команда да легионерлер көп» деп сын айтатындар бар. Атақты легионерлерді шақыру арқылы бізді әлем біледі, елді таниды. Қазақстандағы велоспорт мектебінің жарысқа дайындау жүйесі жоғары деңгейде. Еліміздің спортшылары Азия чемпионатына барса да, әлемдік додаға қатысса да жоғары нәтиже көрсете алады.− «Темір адам» атануға талпынып жүр екенсіз. Бұл спорт туралы толығырақ айтсаңыз…− Спорт дегеніміз − өмір. Өмір қозғалыстан тұрады. Әрбір адамның алдына қойған мақсаты болады. Мақсатқа кедергілерді еңсеру арқылы ғана жетеміз. Ол үшін бойымызда төзімділік, ерік-жігер, жауапкершілік сияқты қасиет болу керек. Спорт осы қасиеттерді шыңдайды. Қиын спорт түрлерінің бірі – триатлон. Онда 4 км қашықтықты жүзіп өту, 42 шақырымда жүгіру және 180 шақырымды велосипедпен еңсеру керек. Ironman − темір адам деген мағынаны білдіреді. Кім жоғарыда аталған көрсеткіштерге қол жеткізсе, сол «темір адам» атанады. Менің бұл спорт түрін таңдауымның басты себебі айналамдағы адамдарды спортқа, саламатты өмір салтын ұстануға шақыру.− «Жастар ресурстық орталығының» директорының орынбасары болып қызмет істедіңіз. Жастардың қандай өзекті мәселесі бар және ол қалай шешімін табады?− Қызмет бабымен барлық жеті ауданда болып, ондағы ауылдарды аралап, жастармен кездестім. Жастар арасындағы ажырасу, маскүнемдік, төбелесу, ақша жетпеу, отбасылық дау-дамай секілді мәселе бар. Мұның бәрі жұмыссыздықтан шығады. Мен жастардың мемлекеттік бағдарламаларға қатысуына қарсымын. Қайтарымсыз грант мәселені уақытша ғана шешеді. Кешегі атаулы әлеуметтік көмек те солай. Жұмыссыздықпен күресу керек. Барлығын бірдей мемлекеттік жұмыспен қамту мүмкін емес. Кәсіп ашу керек. Фрила́нсерлерді көбейту қажет. Ағылшын тілінен аударғанда freelancer еркін суретші, еркін жұмысшы деген мағына білдіреді. Өз өзін жұмыспен қамтыған азаматтардың санын арттыру қажет. Ауылда еңбекқор жастар бар. Есік алдынан дүкен ашып, монша салып немесе жарнама агенттігін ашып қызмет етіп отыр.− Азаматтық қоғамды дамыту үшін не істеуге болады?− Мемлекеттік сектор қоғамдағы көптеген жұмыспен міндетті мойнына ала отырып, үлкен жауапкершілікті жүктеді. Олай болса, мәселеге кінәлі – тарап әрине мемлекеттік органдар болады. Ал, қоғам өкілдері мен азаматтар көңіл толмаушылығын білдіріп, сын айтып жатады. Яғни жауапкершіліктің барлығы мемлекеттік органда, ал қоғамдық сектор, яғни азаматтар жауапкершілікті бұл жерде сезінбейді. Демек, мемлекеттік сектордың жұмысын жеңілдетіп, көптеген функцияларды, қызметті қоғамдық, азаматтық секторға беру керек. Көптеген дамыған мемлекетте осы жүйе жұмыс жасайды. Сол кезде мыңдаған мемлекеттік қызметкерді ұстап отырудың қажеті болмайды. Мемлекеттік орган мемлекеттік сатып алуды жасап, тек қадағалаушы, бақылаушы функциясын атқару керек. Сол кезде жемқорлық тиылып, қоғамдық сектор мен азаматтар жауапкершілікті сезінер еді.− Болашақта нені армандайсыз?− Шет елде білім алып, түрлі кәсіпті үйреніп, елге еңбек еткім келеді. Халық сенім артып, арқа сүйейтін ардақты азаматы атанғым келеді.− Әңгімеңізге рахмет! &nbsp;

Асқар Құрмаш: Мақсатқа кедергілерді еңсеру арқылы ғана жетеміз

<a href="https://kyzylorda-news.kz/ru/">Kyzylorda-news.kz</a>. Сыр халқы Берік Байділдаевты өнерлі азамат есебінде таниды. Бойындағы жыршылық қасиеттен бөлек, асабалық қыры да бар. Ол жырлаған жырдың әсері ерекше. Қолынан домбыра түспейтін Берік Қармақшы аудандық мәдениет үйінен жастар ресурстық орталығын да басқарды. Бүгінде жастардың мәселесін шешуге атсалысуда. Жасыратыны жоқ, нақты цифрмен көрсетпесе де, жастар арасында төбелес болып тұрады. Ал Беріктің мақсаты сол – жастар арасында қылмысты азайту.– Жастардың ортасына келуге не түрткі болды?Мен өнер адамы болған соң жастардың ортасына келуіме көбісінің таңырқай қарайтыны рас. Дегенмен өзім де жаспын. Қармақшылық жастардың жағдайымен етене таныспын. Қандай мәселе бар, оларды қалай жеңуге болады бұл турасында жақсы білемін. Оның үстіне ауылға еңбегімді сіңіргім келді. Ауыл жастарының дені қалаға келген соң да ауылда қалуды жөн көрдім. Мен не себепті ауылда еңбек етіп, туған жерге тер төгіп, неге қолымнан келген көмегімді бермеймін деген ой үстінде жүргенім рас. Реті келген соң орайлы сәт туып, ойды жүзеге асырдым. Елбасының «Туған жерге тағзым» жобасының да мақсаты осы емес пе? Жастардың жұмыссыздық деңгейін төмендету, қылмыстың алдын-алу, жастарды шығармашылыққа баулу, олардың спортпен шұғылдануына септігімді тигізу сынды негізгі жоспар бойынша жұмыс істеп жатқан жайымыз бар.– Жұмыссыз жастар деп қалдыңыз, айтыңызшы NEET &nbsp;санатындағы жастар қанша? Қандай жұмыстар жасалуда?– Жұмыссыз жастардың көп екенін жасыра алмаймыз, бұл тек біздің аудандағы мәселе емес. Облыс, қала тіпті республикада да жұмыссыздық басты проблема. Мұнымен барлығымыз бірге күресудеміз. Ал жұмыссыздықты азайтудың басты жолы – кәсіпкерлікке бет бұруға қолғабыс ету. Қажет болса жоспарын жазып беру, қалайда өтіп кетуге ықпал ету, қайтарымсыз қаржы жастарға алып беру, оларға бағыт-бағдар көрсету, кәсіпті алып кетемін дегенше қадағалау. Жоғарыда айтып өткенімдей, жұмыссыз жастарды жұмысқа қамту мақсатында біршама жұмыстар жасалуда. Былтырғымен салыстырғанда 50 пайызға азайттық. Осылайша жастардың денін кәсіпкерлік бағытына бұрдық. Оларға қайтарымсыз грант алып бердік. «Атамекен» бағдарламасы арқылы 505 мың теңге қаражатты көбісіне алып беруге ықпал жасадық. Несие аламын деген жастарға қолдау білдірдік. Жоспарына сертификат иеленуіне де қолғабыс еттік. NEET негізінен ауыр тақырып, пробацияның ішінде де жұмыссыздар бар. Тұрақты немесе тұрақсыз емес болса да жан-жаққа ұсыныс айтып, жұмыспен қамту орталығына жүгіндік. Жұмыс осылай жүйелі түрде жасалып жатса, жұмыссыздар саны азаяды деген ниеттемін.– Қармақшылық жастар қандай кәсіпке бейім? Қанша жас кәсіпкер бар?– Қазір кім болса да кәсіпке бет бұрғанды жөн санайды. Бір жұмысқа қарап отырған адамды аз кездестіресіз. Бір, екі кәсіпті дөңгелетіп отырғандары да бар. Бүгінде кәсіп ашамын деген адамға ешқандай қиындық жоқ. Қаржылай да, субсидия арқылы да көмек көрсетілуде. Жалпы қармақшылықтар ауылшаруашылығына бейім. Малшаруашылығымен айналысатын қаншама жас кәсіпкер шығуда. Олар өзінің идеясымен грант алды. Тіркеуде тұрған 500-ден аса жас кәсіпкер бар.– Еріктілер жылын қорытындыладыңыздар. Ауданда қанша ерікті бар, қандай шаралар атқарылды?– Ауданда тұрақты түрде көмек көрсететін 40-қа жуық ерікті бар. Жанама түрде жұмыс істейтін 200-ге тарта ерікті бар. Олар Қармақшының тумасы, бірақ өзге жақта жұмыс істейтіндер, кәсіпкерлер. Ерікті түрде қаржылай қолдау білдіреді. Биыл жылды жақсы деңгейде қорытындыладық. Облыс бойынша үш волонтер «Жыл волонтері» атағына ие болды. Оның екеуі – қармақшылық.– Жыл басынан бері қанша қылмыс тіркелді? Алдын алу үшін не істеу керек?– Нақты цифрға тоқталмай-ақ қояйын. Карантинге байланысты жұмыстар онлайн түрде өткізілуде. Мәселен, жастар ресурстық орталығының жанынан видеороликтер жасалды. Үн парақтар таратылды. Рейд жұмыстары да жиі ұйымдастырылуда. Бізбен бірге ішкі істер бөлімі, білім бөлімі де шығып жатыр. Біраз еріктілер де қамтылған. Мүмкіндігінше қылмысты азайту бағытында жұмыс істейміз.– Адам жаңа қызметке келгенде алдына мақсат қояды. Сіз қай бағытқа басымдық бересіз?– Жастар арасында ең өзекті мәселе ол – ажырасу. Бүгінде шаңырақ көтеріп, көп ұзамай айырылысып жатқандар жетерлік. «Үйлену оңай, үй болу қиын» дейді ғой. Бәлкім үй &nbsp;болып, алып кетуді қиындық көреді немесе жар таңдаудан қателесіп жатады. Міне, біз осы бағыт бойынша жұмыс істеуді қолға алдық. Бұл тақырып төңірегінде жастармен бетпе-бет сөйлесуді жөн көреміз. Жас отбасыларға психологиялық жағынан көмектесеміз. Оның үстіне ажыраспауға кеңес береміз. Екінші мақсатым – жұмыссыз жастармен жұмыс істеу, жұмыссыз жастарды азайтуды жолға қою. «Заманына қарай заңы, тоғайына қарай аңы» дегендей, кәсіпке баулып жатырмыз. Бизнис хаб жобасы бойынша ауданымыз екінші орын алды. Келер жылы кәсіпкерлік клубын құрамыз деген жоспарда бар. Аудан экономикасын қалай көтереміз деген сауалды дебатта көтергім келеді. Жас кәсіпкерлердің кәсібін дөңгелету мақсатында кәсіпкерлер бөлімімен, кәсіпкерлер палатасымен меморандумға отыру жоспарымызда бар.– Жастар орталығы әр ауданда бар. Оны аудан, ауыл тұрғындары жақсы біледі. Жалпы жастармен байланыс қандай? Өз еркімен орталық қызметінің жұмысын жиі пайдаланатындар бар ма?– Әр округте жастар жөнінде маман бар. Солармен тығыз байланыстамыз. Жастар бізбен бірлесе жұмыс істейді. Тамыз айында «Демеу» еріктілер тобы құрылды. Оған қаншама жас тартылды. Оның ішінде жас кәсіпкерлер, қызмет істейтін жастардың бәрі бар. 9 желтоқсанда форум өткізіп, жастарды марапаттадық. Онымен қоса жастар мәслихатын құрдық. 10 жасты мәслихат депутаттығына лайықты деп сайладық. Бәрі белсенді жастар, ішінде ақын да, мұғалім де бар.– Келер жылы ең бірінші нені қолға аласыз? Қысқаша тоқталсаңыз…– Биылғы жылдың қиын болғаны белгілі. Қаншама іс кейінге қалдырылды. Жоспарлар да өзгертілді. Аяқ-астынан індетпен күресіп кеттік. Алда не боларын болжай алмаймыз, сондықтан оны уақыт еншісіне қалдыруды жөн санап отырмын. Бастысы, мына індеттен аман-есен құтылайықшы.– Бұған дейін мәдениет саласында жүрдіңіз. Қай орта жаныңызға жақын?– Әр қазақ баласы үшін домбырадан құнды дүние жоқ. Қазақтың ұлттық аспабы қашанда жаныма жақын. Ол мен үшін басты орында. Жастарға келгенім, мәдениеттен кеткендігімді аңғартпайды. Мен өнер адамымын. Жастарға келгендегі мақсатым көп, өзіндік жоспарларым да жетерлік. Облыстық «Ақмешіт жастары» тікелей жастардың басылымы. Осы уақыт аралығында қаншама жасты баспасөз бетінен оқыдым, оның ішінде қармақшылықтар да бар.&nbsp;– Сұқтабыңызға рақмет!&nbsp;

 Берік Байділдаев: Кім болса да кәсіпке бет бұрғанды жөн санайды

<a href="https://kyzylorda-news.kz/ru/">Kyzylorda-news.kz</a>. Жастарды қолдау мақсатында тағайындалатын «Дарын» мемлекеттік жастар сыйлығы өткен жылы Сырдың талантты қызы, әнші Ақбота Құснадинге эстрада жанры бойынша берілген болатын. Жүзден жүйрік шығып, үздік деп танылған арудың жетістігі – өнер ордасы саналатын Қызылорданың заңды жеңісі десек болады. Ақботамен ән өнері жөнінде әңгімелескен едік.– Ақбота, «Дарын» мемлекеттік жастар сыйлығының иегері болуыңызбен құттықтаймын. Жалпы мұндай сыйлық шығармашылығыңызға қаншалықты серпін береді?– Рақмет. Кез келген өнер адамы үшін байқаулар мен дәрежесі жоғары марапаттар шабыт беретіні сөзсіз. Мысалы, өткен жылы Сыр өңірінде дәстүрлі Батырхан Шөкеновті еске алу, оның сыршыл иірімге толы әрбір туындысын насихаттау бағытындағы «Отан-Ана» байқауында топ жарып, ерекше әсерге бөлендім. Сол сәттен бастап өнерге деген жаңа тынысым ашылды. Жалпы 2022 жыл мен үшін жемісті болды. Өйткені қатысқан барлық байқаулардан сүйіншілейтін жағымды жаңалықтарым болды. Рамазан Таймановтың конкурсында да бас бәйгені еншілеп, өнерге үлкен шабыт алдым. Осы жетістіктер негізінде Астана қалалық филармониясы «Дарын» сыйлығына ұсынды. Ұсыныстың өзіне қуанғаным жасырын емес. Өйткені ұжымның құрметінің өзі зор қуаныш сыйлады. Бағыма орай көптің үкілеген үмітін ақтап, мемлекеттік сыйлықтың иегері атандым.– Өнер жолыңызға зер салсақ, DAQ entertainment ұжымы еске түседі. Мұны жоба деп қарауға бола ма?– Арман қуып Астанаға келген сәтте өнердегі аға-әпкелеріміз жатырқамай қолдауын көрсетті. Әсіресе, Майра Ілиясова апайымның қолдауы ерекше болды. Республикадағы байқауларда мені байқап, шәкірті есебінде санады. Халықаралық дәрежедегі кештерде, шетелдегі шараларға қатысуыма септігі тиді. Міне осы қадамдардан кейін DAQ entertainment ұжымына қосылдым. Бұл Дәулет Нұржанов ағамыздың төл туындысы десек болады. Бұл ұжымда жаңа әндер, каверлер жазып, тыңдармандарға ұсынудамыз. Сондай-ақ Майра апайдың «Сағындырған әндер ай» концертінде өнер көрсетіп жүрміз. Жоба деп қарағаннан көрі шығармашылық еркін топ деп айтқанымыз дұрыс. Өйткені әлі де өнерге қосатын үлесі мол. Дегенмен қазір жаңа продюсерлік орталықпен жұмыс істеуге бекіндім. Ұлықпан Жолдасов ағамыздың жаңа тобы құрылып, шығармашылығымыз сол жақта жетілдірудеміз. Алғашқы ән сапарымыз да болды. Бір қызығы топтың алғашқы түсаукесері туған жерімде яғни Қызылорда қаласында өтті.– Тыңдармандарыңыз сізді кавер орындаушы ретінде жақсы біледі. Кавер «ескі» әннің жаңа тынысын ашатын тәсіл деп қарауға бола ма?– Каверді әнді жаңашаландыру, ерекшелендіру деп түсінемін. Ескі әндерді нақышына келтіріп, заман талабына сай етіп тыңдарманға ұсыну деп санап жүрміз. Тыңдарман жақсы қабылдаса, жаман дүние деп қарауға болмайтын шығар. Әрине, каверге қарағанда репертуарда авторлық әндердің болғаны дұрыс. Бірақ кавер айтуда оңай шаруа емес. Өзім каверді «Сағындырған әндер ай» концертінде Ескендір Хасанғалиевтың «Айналайын» әнін айтып бастадым. Негізі ән әлеміндегі бұл жанр қатты ұнайды. Сондықтан ұнаған әндерге жиі кавер жасаймын. Соңғысы «Дос-Мұқасан» тобының «Сен сұлу» әні. Желідегі тыңдармандарым оң бағасын беріп, қолдау көрсетіп жатыр.– Шығармашылығыңызда жеке әндер бар ма?– Әншінің талғамына сәйкес ғұмырлы ән таңдау біздің салада маңызды құбылыс. Себебі біздің басты міндетіміз – ән арқылы халыққа жақсы дүние сыйлау. Мұндай мүмкіндік менде жақын күндері пайда болады. Уақыттың тығыздығына байланысты авторлық әнге енді бағыт алып жатырмын. Ең қуанатын нәрсе алғашқы авторлық әнім әкемнің туындысы. Әкем Марат Пірмаханов музыкадан мол хабары бар маман десек болады. Филормонияда ансамбльдің бас гитаристі. Әкемнің әнін орындау мен үшін үлкен мәртебе. Ал Ұлықпан ағамның жобасында жеке әндер көп. Бұл топтың жұмысы болғандықтан жеке әнім деп қарауға болмайтын шығар.– Үлкен концерттерде өнер көрсетіп жүрсіз. Мұндай сәттерде сын айтылмай тұрмайды. Сынды қалай қабылдайсыз?– Сынды өте жақсы көремін (күліп). Сондықтан жылы қабылдаймын. Сын түзелмей мін түзелмейді деген жақсы сөз бар. Осы сөздің астарын таразылайтын болсақ сын әлбетте айтылуы керек. Өйткені қателікті түзетуге мүмкіндік береді. Енді орынды, орынсыз айтылатын сын болады. Барлығын таразылап, ортақ шешім шығарамын. Әсіресе аға буынның ақыл кеңесіне әрдайым жүгініп тұрамын. Сынның арқасында жетістікке жеттім десем болады.Киім өндіру – өзіндік даму жолы қалыптасқан кәсіп көзі. Бірақ бүгінде сол сүрлеуді жандандыра алмай, бірнеше миллиард құрайтын қаржыны шетел асырып отырғанымыз жасырын емес. Жақында еліміздегі жеңіл өнеркәсіп саласының дамуы мен осы тектес өзекті проблемаларды «Ас-кА» серіктестігінің директоры Дина Махатовамен талқылаудың сәті түскен еді. &nbsp;

Ақбота Құснадин: Жетістікке жету үшін қателесу керек

Қармақшылық жас кәсіпкерлер мемлекет берген мүмкіндікті тиімді пайдалануда

<a href="https://kyzylorda-news.kz/ru/">Kyzylorda-news.kz</a>. Жастар саясаты – бүтін бір мемлекет пен ұлт болашағының іргетасы. Қазіргі таңда аудандарда орналасқан «Жастар ресурстық орталығы» азаматтардың шығармашылық қабілетімен қатар, әлеуметтік потенциалын да аша алғаны анық. Оған қоса жастармен тікелей байланыс орнатып, туындаған мәселенің бел ортасында жүрген мамандар да салаға қатысты ой-пікірін білдіріп, ақпаратпен тұрақты бөлісуде. Осыған орай жуырда Қазалы аудандық «Жастар ресурстық орталығын» басшысы Нұрбек Ақпанбетов тілдесіп, жастарды толғандырған мәселе төңірегінде пікірін білген едік.– Нұрбек Нысанбекұлы, алғашқы сауалды бүгінге дейін орталық тарапынан атқарылған жұмыстардан бастаған жөн секілді. Басшылыққа келгеніңізге жыл толмаса да айтарлықтай істің біткенін, атқарылған жұмыстың ауқымынан хабардарсыз деп ойлаймын.– Әрине, маған жастармен жұмыс жайы таңсық емес. Аудан жастарының әл-ауқаты, тыныс-тіршілігімен жақын таныспын. Жергілікті билік пен белсенділер тарапынан жасалып жатқан қолдауларды да ауыз толтырып айтуға болатындай. Соның ішінде орталық тарапынан қолға алынған немесе атсалысқан жобалардың да маңызы ерек. Мәселен, жыл басынан бері мекеменің ұйытқы болуымен 300-ге тарта шара өткізілсе, өткен жылы аудан еріктілері әлеуметтік жағдайы төмен 23 отбасыға баспана кілтін табыстап, республика бойынша үздік «Жастар ауданы» атандық.Биылда аталған бастама өз жалғасын тауып келеді. Атап айтқанда, 60 тан астам қайырымдылық жүргізілген. Оның ішінде, 10 отбасыға жылу жүйесі, 10 отбасыға көгілдір отын құрылғысы, 15 отбасындағы балаларға ем алуы үшін қаржылық қолдаулар жасалды. Ал «Жылу сыйла жандарға» акциясы әлеуметтік жағдайы нашар отбасыларға қыстық отын берілсе, ерікті жастар мүкіндігі шектеулі отбасыларға қол көмек жұмыстарын ұсынды. Жалпы, жыл басынан беорі 37 мәдени шара, 21 спорттық сайыс, 27 кеңес беру акциясы, 40–танастам қоғамдық рейд ұйымдастырылған.– Жастар арасындағы ең өзекті мәселе – жұмыссыздық. Аталған олқылықтың орнын толтыру үшін қандай қадам жасалуда?– Аталған мәселені шешу орталық үшін де маңызын жойған емес. Себебі мемлекеттің алға қойған тапсырмасы да, жастар саясатының ұстыны да азаматтардың әлеуметтік жағдайымен өлшенетінін білеміз. Бұл орайда мекеме мамандары жоспарлы кеңес беру акциясын өткізіп, нәтижесінде 4 азамат тұрақты түрде орналасты. Бұдан бөлек, жастардың бос уақыттарын тиімді пайдалану және оларды еңбекке баулу мақсатында «Жасыл ел» жобасы бойынша барлығы 140 жас уақытша жұмыспен қамтылды.Жалпы, аудан бойынша халықты жұмыспен қамту орталығына жұмыс іздеуші ретінде 899 жұмыссыз жас хабарласқан. Олардың арасында 87-сі жұмысқа орналасса, 115-і жастар практикасына, 8-і әлеуметтік жұмыс орнына, 232-сі ақылы қоғамдық жұмысқа орналасқан.– NEET санатындағы жастармен жұмыс қай деңгейде?– Шынында, NEET санатындағы жастардың көбеюі қоғам дамуына кері әсер етуде. Сондықтан аталған топқа жататын азаматтарды анықтау, бағдар беру қолға алынып келеді. Ауданда NEET санаттағы жастарды анықтау жұмыстары екі кезең бойынша жүргізілді. Бірінші кезеңде орталық мамандары ауданға қарасты барлық елді-мекенге барып, адрестік түрде сауалнама жүргізсе, екінші кезеңде сауалнама онлайн (google) форматында іске асырылды. Қос кезең бойынша бұл қатарға жататын 1500-ге жуық.Аталған азаматтарды Қазалы көліктік-техникалық жоғары колледжі, Қазалы аграрлы техникалық колледжі оқыту курс ұйымдастырылуда. Оған қоса 2021-2025 жылдарға арналған кәсіпкерлікті дамыту бағдарламасы бойынша жұмыссыз жастарды «Халықты жұмыспен қамту орталығы» арқылы қысқа курстарға оқыту қолға алынса, ерікті жастарды «Бизнестің жол картасы бағдарламасы» аясында қайтарымсыз грант конкурсына қатыстыру көзделген, Ал, қалған жасты аудан көлемінде салынып жатырған құрылыс нысандарына, «Жасыл ел» бағдарламасы бойынша жұмысқа орналастыру ойда бар.– Қазалы жастарының қоғамдық жұмысқа араласу, еріктілік көрсеткішін қалай бағалар едіңіз?– Жастар әлеуметтік желіге тәуелді уақытта оларды қоғамдық жұмысқа араластыру, қайырымдылық жұмыстарына қатыстыру маңызды екені анық. Біздің өңірде де ерікті жастардың қатары көбейіп, бірқатар игі іс қолға алынған. Алдағы уақытта да жүйелі түрде жұмыс істеледі. Әсіресе, негізгі бағыт Neet санатындағы, қылмысқа бейім немесе жұмыссыз жастарға берілетін болады. Жоспарланған іс-шаралар мереке аясында шектеліп қалмайды. Бүгінде ауданда екі «Жастар ресурстық орталығы» бар. Бәріміз бірлесе «Жастар тәжірибесі» бағдарламасын насихаттап, маусымдық жұмыспен қамту, тұрғын үймен қамтамасыз ету, бизнес-идеяларды қолдау шарасын жалғастыра бермекпіз. Мұның бәрі еріктілерге қозғау салары белгілі. Себебі жастар жаңалыққа құштар.– Жастардың бос уақытын тиімді пайдалануға мүмкіндік жасау мақсатында нендей жұмыс атқарылды?– Бұл орайда ауыз толтырып айтарлық өзгеріс мол. Мәселен, ауыл жастарының өнерін шыңдау бағытында аудан орталығында гала-концерт ұйымдастырылып келеді. Шара аясында сала мамандарының қатысуымен «Түнгі жәрмеңке» акциясыда үздіксіз өткізілуде. Сонымен қатар, Қазалы ауданында ерікті жастарымыздың ұйымдастыруымен «Көшпелі керуен» жастар жобасының құрамы құрылды. Олар барлық елді мекендерде болып, &nbsp;жастардың бос уақытын тиімді пайдалану және NEET санатындағы жастарды мемлекеттік бағдарламаға кеңінен тарту бағытында үлес қосып келеді. Оған қоса ауыл жастарының ұсыныс-пікірін тыңдап, мәселеге өзге қырынан қарауға септесуде.Бұдан бөлек, Халықаралық жастар күніне орай, аудан көлемінде апталық шара өткізілді. Онда, спорт түрлерінен, инновациялық идеялар жәрмеңкесі, мүмкіндіктер керуені, «Жайдарман ойындары», «Барлық игілік балаларға» жастар акциясы, «ЭКО марафон»сенбілік акциялары ұйымдастырылды. Мереке қарсаңында Қазалы ауданында дәстүрге айналған Ғ.Мұратбаев-тың 120 жылдығына орай республикалық жастар сыйлығын табыстаау кеші өткізілді.Жастар пікірсайысшылар клубы, тоғызқұмалақ, шахмат, &nbsp;сурет салу үйірмесінде уақыт өткізіп, «Мобилография» курсы бойынша сапалы бейне жасауға талпынуда. Алдағы уақытта «Stаnd up» клубы, &nbsp;IT-клуб жұмысын жандандыру жоспарланған.– Әңгімеңізге рақмет!

Қазақстан және Қызылорда облысының жаңалықтары: Сұхбат