<a href="https://kyzylorda-news.kz/">Kyzylorda-news.kz.</a> Сырдария ауданының әкімі Берік Сәрменбаев аудандағы «Алтын той» иелеріне құрмет көрсетті.Аудандық мәдениет үйінде өткен «Мәуелі қос бәйтеректің саясындай» атты іс-шарада аудан басшысы мерейлі отбасыларды марапаттап, олардың өмір белестері жастарға үлгі-өнеге екенін айтты.<blockquote>«Дана халқымызда «Отан – отбасынан басталады» деген керемет сөз бар. Өйткені, Отанды сүюге тәрбиелейтін бірден-бір орта ол – отбасы. Отбасында жарасым, сүйіспеншілік, мейірім болса ғана шаңырақ биік құрылып, керегесі кең болады. Ел Президенті Қасым-Жомарт Кемелұлы Тоқаев «Әділетті мемлекет. Біртұтас ұлт. Берекелі қоғам» атты Жолдауында отбасын қорғау және бала капиталын қалыптастыруға ерекше мән берді. Мұндай қолдау әрбір қазақстандықтың өз болашағына деген сенімін нығайта түсетіні сөзсіз. Ал облыс әкімі Нұрлыбек Машбекұлы Нәлібаевтың бастамасымен отбасылық құндылықтар дәріптелетін "Анаға тағзым" орталығы салынуда. Осындай халық игілігіне бағытталған шынайы шешімдердің ел арасында дұрыс қабылдануында Сіздердің пікірлеріңіз зор маңызға ие. Біздің ауданда мәуелі әулетке айналған мерейлі отбасылардың қатары қалың. Олар бүгінде бүтін бір елдің үлгі-өнеге алар жанұясына айналған. Отбасылық құндылықтарды сақтап, салт-дәстүрді берік ұстанған осындай ардақты жандар қай кезде де мақтануға лайық, – деді Берік Әбдіғаппарұлы.</blockquote>Мұнан соң отасқандарына 50, 55, 60 жыл толған «Алтын той» иелеріне "Құттықтау" табыс етіліп, сый-құрмет көрсетілді. Сондай-ақ, аудан әкімі жас отбасы Нұрсұлтан Маратұлы мен Қызғалдақ Бекмұратқызына неке куәлігін табыстады.Іс-шарада Ұлы Отан соғысының ардагері Яхия Тасыров ақ батасын берді. Аудан көркемөнерпаздары концерттік бағдарлама ұсынды.

«Алтын той» иелеріне құрмет көрсетілді

<a href="https://kyzylorda-news.kz/">Kyzylorda-news.kz.</a> Жалағаш ауданындағы Пак әулеті қазақы салт-дәстүрге берік жандар. Күні кеше Лилия әжей осымен 11-ші немересінің тұсауын кестірді. Қашанда даладай дарқан мінездерімен төрінен қонағы арылмаған бұл отбасы – тамырын тереңге жайып келеді. Пак әулетінің өзгелерге үлгі болар тұсы көп-ақ. Лилия Пак өзінен кейінгі келіндерге өнеге көрсеткен үлкен өмір мектебі сынды. Ақыл-кеңесін айтып, білгенімен бөлісіп отырады.Жалағаш аудан орталығындағы №31 орта мектептен орта білім алып, 1972 жылы Қызылорда медициналық колледжін үздік оқып бітірген Лилия Пак аудандық өкпе аурулары ауруханасынан еңбек жолын бастады. Ең алдымен емделушілерді дер кезінде қажетті дәрі-дәрмекпен қамтамасыз етуге ден қойды. Алдына келген науқастың талап-тілегіне мұқият қарайтын. Содан болар, дертіне дауа іздеген жабырқау жандар оның кәсіби қызметінен бөлек, жылы сөзінен де жұбаныш табатын. Өз ісін талапқа сай тиянақты атқаратын &nbsp;маман қоғамдық және санитарлық ағарту жұмыстарына да белсене араласты. Арада жылдар өте келе абыройлы қызметімен ауыл-аймақтың алғысына бөленді. Еңбек жолының соңғы жылдары аудандық орталық ауруханада аға мейіркеш қызметін атқарды. Бас-аяғы қырық екі жыл денсаулық сақтау саласында қызмет еткен Пак Лилия Андрейқызы Елбасының Құрмет грамотасын, ҚР Денсаулық сақтау министрлігінің «Денсаулық сақтау ісіндегі үздік қызметі үшін» төсбелгісін, тағы басқа көптеген марапаттарды иеленді.<img src="https://knadmin.beoblood.kz/uploads/7e1d1270_d8e2_4b97_8ce4_723406260107_c3c5ead04e.jpg" alt="7e1d1270-d8e2-4b97-8ce4-723406260107.jpg">Аяулы жары Мирон Пакпен бір шаңырақта 50 жылдан астам бақытты ғұмыр кешіп, үш бала тәрбиелеп өсірді. Мирон Пак аудандық электр тарату жүйесі мекемесінде ұзақ жыл абыройлы еңбек етті. Бүгінде олар ұлын ұяға, қызын қияға қондырып, немере-шөбере сүйіп отыр. Айта кетейік, Пак отбасының екі келіні қазақ, сондай-ақ, немере қызы да қазақ отбасына келін боп түсті. Бүгінгі күні 11 немере, 8 шөбере сүйіп отырған ақ жаулықты әже. Аудан халқымен бірге араласып, біте қайнасып келе жатқан Пак әулеті «Атамекен, құтты қонысымыз – Қазақстан», – дейді. Соның айғағы болар, олардың «Беташар», «Қыз ұзату», «Бесіксалар», «Тұсаукесер» тойлары да қазақы дәстүрге сай аталып өтеді. Құда күтіп, сый табағын тартады. Сондай-ақ, Наурыз, Айт мерекелерінде қазы-қартасын асып, бауырсағын пісіріп, дастарханын дәмге толтырып, қонақ күтеді.Жуырда ғана дүркіретіп қазақы салт-дәстүрмен 11-ші немересі Роман Пактың тұсауын кестірді. Тойға ағайын-туыс, көрші көлемдердің барлығы барып, әулеттің қуанышына ортақтасты. Пак әулеті қазақы салт-дәстүрлерді берік ұстануымен, ағайынды байланыстырып, туыстық қарым-қатынасқа да зор мән беретіндігімен сыйлы. Бұл күнде үлкен әулет тұтастай ағайын-туыс, көрші-қолаңның да балтыры сыздап, басы ауырса, қол ұшын созуға даяр тұрады. Өз кезегінде қашан да темірдей тәртіп пен талапшылдықты серік қылған олар аталған істі соңына жеткізіп, ел алғысына бөленіп келеді. Өйткені, өз ісі мен ұстанымы арқылы өзгелерге үлгі болып отырған отбасылар – қашанда мемлекет байлығы, ел мерейі.Әсел Абзалқызы, “Қоғамдық келісім” КММ баспасөз хатшысы

Қазақы салт-дәстүрге берік – Пак әулеті

<a href="https://kyzylorda-news.kz/">Kyzylorda-news.kz.</a> Қыркүйек айының екінші жексенбісі – Отбасы күні. Соған сәйкес Қазалы аудандық Р.Бағланова атындағы мәдениет орталығында «Мерейлі отбасы – 2023» ұлттық байқауында лауреат атанып, Қазақстан бойынша үздік 20 отбасының қатарынан көрінген ғасыр жасаған майдангер Қабақ Смағұлмен кездесу және Отбасы күніне арналған салтанатты шара ұйымдастырылды.Мерейлі кеште аудан әкімі Мұхтар Оразбаев сахна төріне көтеріліп, көпшілікке жылы лебізін жеткізді.<blockquote>«Шындығында, отбасы – адамзат баласының дүниеге шыр етіп келгенде, есігін айқара ашып енетін үйі, өсіп ержететін, тәрбие алатын аса қажетті, әрі қасиетті алтын бесігі. Қай заманда, қай елде болмасын отбасының адамзат ұрпағына ықпал мен әсерін өмірдегі басқа еш нәрсенің күшімен салыстыруға болмайды. Өздеріңізге белгілі, елімізде жыл сайын «Мерейлі отбасы» ұлттық байқауы тұрақты түрде ұйымдастырылып келеді. Биыл қос ғасырдың куәсі болған, ғасыр жасаған майдангер Қабақ Смағұл ақсақалдың әулеті аудандық, облыстық конкурста жеңімпаз атанып, республикалық байқауда Қазақстандағы үздік 20 отбасының қатарынан көрінді. Мұнан бөлек, облыстық байқауда жүлделі екінші орыннан көрінген «Бөлебаевтар» әулеті көпке үлгі боларлықтай киелі шаңырақ. Бүгінгі қуанышты кеште отау құрғандарына 50, 55, 60 және 65 жыл толған отбасылар біздің арамызда отыр. Бұл сол шаңырақ астындағы шаттықтың, береке-бірліктің айқын көрінісі. Тағы да отбасы күні құтты болсын! Әрбір шаңырақтан қуаныш, шаттық, береке-бірлік үзілмесін», – деді аудан басшысы.</blockquote>Мұнан соң Мұхтар Әуесұлы «Мерейлі отбасы – 2023» ұлттық байқауының жеңімпазы, қос ғасырдың куәсі, Ұлы Отан соғысының ардагері Қабақ Смағұл мен аталған байқаудың облыстық кезеңінде жеңімпаздар қатарынан көрінген еңбек ардагері Бекқожа Бөлебайдың отбасын аудан әкімінің «Құттықтауы» мен бағалы сыйлықтарымен марапаттады.Сонымен қатар, отау құрғандарына 50, 55, 60, 65 жыл болған 10 әулеттің мерейтой иелеріне аудан әкімінің арнайы «Дипломдары» мен сый-сияпаттары табысталды.Мерекелік кеш одан әрі аудан өнерпаздары мен бірнеше отбасы мүшелерінің ән шашуына ұласты.

Қазалылықтар отбасы күнін атап өтті

<a href="https://kyzylorda-news.kz/">Kyzylorda-news.kz.</a> Осыдан 151 жыл бұрын Алаш руханиятының темірқазығы Ахмет Байтұрсынұлы дүниеге келген, деп хабарлайды <a href="https://www.inform.kz/kz/bugin-ahmet-baytursynuly-tugan-kun_a4108035">ҚазАқпарат</a>.ХІХ-ХХ ғасырда қазақ халқы үшін қандай ауыр болғанын түсіну үшін Байтұрсын әулетінің арғы-бергі тарихына көз салса жетіп жатыр.Әкесі мен ағаларының нақақ қудалануы жүрегіне шоқ боп түскен алаш арысы 1937 жылы атылғанға дейін ұлт ұпайын түгендеп өтті.Бұған оның бүгінге цензура мен плагиаттан әупіріммен аман жеткен ғылыми еңбектері мен әлі күнге дейін табылмай келе жатқан құнды дүниелерінің даңқ-дақпырты дәлел.Ол қазақ публицистикасы мен ғылыми тілін жасанды, қасаң сипаттан арылтып, халық тіліне жақындату үшін төл терминологияның негізін қалады.Ақын, лингвист, әдебиетші, түркітанушы, публицист, педагог, аудармашы, мемлекет қайраткері, қазақ тіл білімі мен әдебиеттану ғылымдарының негізін салушы, ұлттық жазудың реформаторы, араб графикасының негізінде қазақтың төл әліпбиін түзіп, төте жазудың көмегімен «Қазақ» газетін ұйымдастырды, ұлттық журналистиканы дамытты.Алашорда үкіметінің белді мүшесі болған. 2017 жылы Үкімет қаулысымен Қазақстан халқы тілдерінің күні 22 қыркүйектен Ахмет Байтұрсынұлының туған күніне ауыстырылды.Былтыр ғұламаның 150 жылдық мерейтойы ЮНЕСКО деңгейінде атап өтілді. Осыған орай, ҚазАқпарат арнайы жоба әзірлеген болатын.Ғалымның ғылыми еңбектері мен шығармаларын қамитын академиялық басылымын баспаға әзірлеген топқа жетекшілік еткен ғалым Айгүл Ісмақованың пайымынша, қазақ тілінің латын әліпбиі Ахмет Байтұрсынұлының теориясы бойынша түзілуі керек.ӨмірбаяныАхмет Байтұрсынұлы 1872 жылдың 5 қыркүйегінде қазіргі Қостанай облысы, Жангелді ауданы Ақкөл ауылында дүниеге келген.1937 жылдың 8 желтоқсанында Алматыда ату жазасына кесілді.Оның 1929 жылдың 12 мамырына дейінгі өмірбаяны өз қолымен жазылып, тарихқа қатталған.1882-84 жылдары кейде ел ішіндегі сауатты адамдардан, кейде жақын маңдағы ауыл мектептерінен білім алып, сауат ашады.1886-1891 жылдары Торғайдағы екі сатылы (әр сыныбы 3 жылдан) орыс-қырғыз (қазақ) училищесінде оқыды.1891-1895 жылдары Орынбор қазақ мұғалімдер мектебінде білімін тереңдетті. Бұл мектепті бітіргендер 6 жыл мұғалім болып жұмыс істеуге міндетті еді. Осылайша 1895-1891 жылдары әртүрлі ауыл мектептерінде, кейін облыстық мектепте, екі сыныптық (екі сатылы) оқу мекемелерінде жұмыс істеді.1901-1909 жылдары өз бетімен білімін толықтырып, шығармашылықпен айналысады.1909 жылы Қарқаралы қаласындағы екі сыныптық училищенің меңгерушісі болып жүргенде Семей губернаторы Тройницкидің өкімімен тұтқындалып, Семей түрмесіне жіберіледі.1909 жылдың 1 шілдесінен 1910 жылдың 21 ақпанына дейін сол түрмеде отырады. Одан босағанымен Қазақстан аумағында тұруға тыйым салынады. Тек Ресей аумағындағы губернияда тұруға рұқсат етіледі.«Менің таңдауым Қазақстанға жақын жатқан Орынбор қаласы болды, мұнда 1910 жылдың 10 наурызында келдім», - деп жазады өзі.1910-1918 жылдары қазақ тілінің дыбыстық жүйесін, грамматикалық құрылымын, қазақ әліпбиі мен емлесін ғылыми дәйекпен ретке келтіріп, қазақ тілінің лексикалық қорымен синтаксистік құрылымын өзге тілдердің ықпалынан тазартуға күш салды. Сол мақсаттың жетегінде қазақ тіл білімі, әдебиеттану, түркология саласына негіз болған ғылыми еңбектерін құрастырып бастады. Қазақ публицистикасы мен ғылыми тілін жасанды, қасаң сипаттан арылтып, халық тіліне жақындату үшін төл терминологияның негізін қалады.1918 жылдан 1919 жылдың басына дейін «Алаш-Орда» құрамында қызмет істейді.1919 жылы наурызға дейін Алаш-Орда үкіметінің Торғай облысы бөлімінің мүшесі болды.1919 жылы наурызда Алаш-Орда үкіметі атынан Мәскеуге Кеңес үкіметімен келіссөзге қатысты.Оның табандылығының арқасында сәуірде Алаш-Орда басшылары мен мүшелеріне Кеңес үкіметінің кешірімі жарияланды.1919 жылдың екінші жартысынан 1920 жылдың соңына дейін «Қазақ өлкесінің әскери-төңкерістік комитетінде» комитет мүшесі болып қызмет етеді.1920 жылы сол кездегі бірінші басшы В.И. Ленинге Мәскеудің Қазақстанды басқару ісіндегі қателіктерін сынап, хат жолдады. Қазревком мүшесі ретінде Қазақстанның Ресеймен шекарасының қалыптасу ісіне атсалысты. 1919 жылдың 27 тамызында Бүкілресейлік орталық атқару комитетінің «Қостанай уезін Челябинск облысына қосу туралы» шешіміне қарсы жазған саяси наразылығы Қостанай өлкесін бөлшектенуден құтқарып қалды.1921 жылдан бастап Қазақстандағы жауапты лауазымдарда қызмет атқарды. Атап айтсақ, Оқу-ағарту ісі жөніндегі бірінші халық комиссары, Халық ағарту комиссариаты жанынан құрылған Академиялық орталықтың төрағасы, Қазақ халық ағарту комиссариаты жанындағы Ғылыми-әдеби комиссияның төрағасы, алқа мүшесі сияқты лауазымдарда еңбек етті.1921-1928 жылдары Халыққа білім беру институтында қазақ тілі мен әдебиеті, қазақ мәдениеті пәндерінен дәріс оқыған.1926-1928 жылдары Ташкенттегі Қазақ педагогикалық институтының Қазақ тілі мен әдебиеті кафедрасының доценті болды.1928 жылдың 1 қазанында Қазақ халық ағарту комиссариатының ұсынысымен Қазақ мемлекеттік университетінің Қазақ тілі кафедрасына профессор лазауызымына шақырылады.1929 жылғы маусымның басында Алаш қозғалысы қайраткерлерімен бірге Алматыда тұтқынға алынып, Мәскеудегі Бутырка абақтысына тергеуге жөнелтіледі. Аты шулы «үштіктің» 1930 жылғы 4 сәуірдегі шешімі бойынша ату жазасына кесілген еді. Бірақ бұл шешім бірнеше рет өзгертіліп, 1931 жылы қаңтарда 10 жылға концлагерьге ауыстырылса, 1932 жылдың қарашасында 3 жылға Архангельскіге жер аударылады. Ал 1933 жылы мамырда денсаулығының нашарлауына байланысты қалған мерзімді Батыс Сібірде айдауда жүрген отбасымен бірге өткізуге рұқсат беріледі.1934 жылы М.Горькийдің жұбайы Е.П. Пешкованың ара түсуімен отбасымен бірге мерзімінен бұрын босап, Алматыға оралады.Сол кезден 1937 жылға дейін түрлі мекемелерде ауық-ауық жұмыс істейді. 1937 жылы 8 қазанда соңғы рет тұтқындалып, 8 желтоқсанда ату жазасына кесілді.Ең алғаш жарық көрген әдеби жинағы – «Қырық мысал» (1909 ж.). Екінші кітабы – «Маса» (1911ж.).Сондай-ақ, А.С. Пушкин, М.Ю. Лермонтов, Ф. Вольтер, С.Я. Надсон өлеңдерін аударды.Ғылыми еңбектері: 1911-1912 жылдары төте жазу негізінде «Әліппе» түзіп, Уфа, Орынбор қалаларының баспаханаларынан басып шығарды. 1912-1925 жылдары «Оқу құралы» атты еңбегі 7 рет (кейінгі деректер бойынша 8 рет) жетілдіріліп басылды.1926 жылы «Әліп-бидің» жаңа түрін жазды.«Тіл – құрал» атты үш бөлімнен тұратын, үш шағын кітап болып жарияланған еңбегі және бар.1913 жылы «Қазақ» газетінің үш санында «Қазақтың бас ақыны» деген көлемді мақаласы шықты. Бұл Абайға қазақ жазба әдебиетінің төрін ұсынған еңбек еді.1923 жылы Мәскеуде жүріп «Ер Сайын» жырын алғысөз бен түсініктеме бере отырып шығарды.1926 жылы «23 жоқтау» кітабы жарық көрді. Дәл сол жылы «Әдебиет танытқыш» та баспа бетін көрді.Ахметтанушы Райхан Имаханбеттің дерегі бойынша, архив құжаттары Ахмет Байтұрсынұлының «Мәдениет тарихы», «Уголовный кодекс РСФСР» атты кітаптары болғанын айғақтайды. Аталған еңбектер әлі табылмай отыр. Ғалым өзі жазған өмірбаянында 14 кітабы басылғанын айтады. Қазіргі ахметтанушылардың пайымынша, 20 кітабы баспадан жарық көріп, 3 қолжазбасын баспаға ұсынғанымен шығаруға мүмкіндік болмаған.

Бүгін – Ахмет Байтұрсынұлы туған күн

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев Шиелі ауданына жұмыс сапары кезінде "Оқшы ата" кесенесінің жағдайымен танысты. Кесенені жөндеу, жаңғырту және абаттандыру жұмыстарын жүргізу жоспарлануда."Оқшы ата" кесенесі Шиелі ауданы Бәйгеқұм ауылынан шығысқа қарай 5 шақырым жерде орналасқан.Республикалық маңызы бар тарих және мәдениет ескерткіші. “Қазақстанның киелі жерлерінің географиясы” жобасы аясында “Жалпыұлттық қасиетті нысандар” тізіміне енген. Мазаратты халық «Жеті әулие» деп атайды.Аймақ басшысы кесенені қалпына келтіру жұмыстарын сапалы жүргізуді тапсырды.Айта кетейік, бұған дейін облыс әкімі Жаңақорған, Қармақшы аудандарына жұмыс сапары кезінде киелі орындарының жай-күйімен танысқан еді.Биыл тарихтың ізі қалған, сыры тұнған қасиетті орындар – "Қорқыт ата" ескерткіш- кешеніне, "Хорасан ата"," Оқшы ата" және "Марал баба" кесенелеріне қайта жаңғырту, айналасын абаттандыру жұмыстары жүргізілмек. Бұл – Қызылорда облысының 85 жылдығына арналған тарту.<img src="https://knadmin.beoblood.kz/uploads/367448491_1842159546179549_8204328939046617557_n_3a97263841.jpg" alt="367448491_1842159546179549_8204328939046617557_n.jpg">

Сыр өңіріндегі киелі орындар қайта жаңғыртылуда

<a href="https://kyzylorda-news.kz/">Kyzylorda-news.kz.</a> Жаңақорған ауданы, Бірлік ауылына барған сапарымызда ұршығын иіріп, кілем тоқып отырған ақжаулыты ананы кезіктірдік. Бүгінде көненің көзі саналатын осынау істі кейіпкеріміз күнделікті тіршілікте кәдеге асырып отырғанын көргенде ерекше тебірендім. Қазақылықтың қаймағы бұзылмаған Бірлік ауылының тұрғыны Набиба Жанғабылова. Әсемдікке жаны құштар, ерекше дүниелер жасайтын ісмер, еңбекқор жан екенін үйдегі кілем, текемет пен көрпе-көрпешеге қарап аңғардық.Өзі жастайынан қолөнермен айналысқан, киіз базу, кілем тоқу, тігін тігуді шебер меңгерген. Шебер ананың сөзіне сүйенсек, бұл өнердің барлығы өз анасынан үйренгені екен. Күні бүгінге дейін &nbsp;ағайын-туыстың, ұл-қыздары мен немерелерінің сұрауымен кәделі қолөнер бұйымдарын жасап береді.<blockquote>«Біз соғыстан кейін дүниеге келген ұрпақпыз ғой. Қазіргідей аста-төк молшылықта емес, соғыстан кейінгі ауыр жылдар ата-анамызға оңай болмағаны рас. Сондай кездерде қолөнердің, халыққа үлкен көмегі болғаны аян. Жүннен кілем тоқып, киіз бастық. Қырықтықты жарқ-жұрқ еткізіп, арасына ылғал кірмейтін қойдың қалың жүнін қырыққанды айтсаңшы. Жүнді жинап алып, сабаумен жұмсартып, түтіп, дайын жүннен текемет басушы едік. Бұл кезеңнің соңғы куәгерлері 80-жылдардың төлдері. Иә, дәл солай. Одан кейінгілерге мұндай тірлік өгей, жат. Әңгіменің әлқиссасы осы. Қазір киіз үй тігетін ісмер таппайсың. Киіз үйді суреттен ғана көретін жағдайға жеттік. Ал бүгінде ауыл сыртында түйдек-түйдек боп қойдың жүні жатыр, – дейді Набиба апа.</blockquote>Кейіпкеріміздің айтуынша, ұршықпен иірілген жіптің жөні бөлек. Себебі, ол таза жүннен жасалады. Сондықтан да жылуы мол болып келеді. Шынында да, кезінде аналарымыз бас киімнен бастап, аяғымыздағы шұлыққа дейін тоқып беретін. Әсіресе, түбіттен тоқылған дүниелер көп сақталатын. Ешкі жүнін тарап алып, түбіт жинайтынымыз есімізде. Набиба апай түбіттің жылылығы тоннан кем түспейтінін айтқан-ды.<blockquote>«Қазір іс тігу мен тоқыма тоқу былай тұрсын, біреулер ұршықтың не екенін ұмытқандай. Ауылдық жерде тұрып тоқумен айналыспайтын, жүн жуып, көрпе жасамайтын жандар бар. Біреулері ол жұмысты ұнатпаймыз десе, енді бірі жүннің иісінен жиіркенетін көрінеді. «Осындай жандарды көргенде қарным ашады. Дегенмен мұның бәрі – сылтау. Шаруаға епті адам қолөнерге де уақыт табады. Қазір жастар «Жұмыстан келдік, шаршадық» деп жата кетеді. Ал, керісінше, кешкі уақытта үй-ішімен әңгіме айта отырып, іс тіксе, көңілі серпіліп, демалып қалар еді. Осындай қолөнер арқылы шаруасын дөңгелетіп, ісін жүргізіп отырғандар да бар. Оларды ұлттық өнердің қадіріне жеткен жандар деп есептеймін, – деп ағынан жарылды апамыз.</blockquote>Бүгінде тоқыма өндірісі жедел дамып, түрлі техникалар іске қосылғанмен, кейбір ауылдарда ұршық тек шаң басып жатып қалмай, мүлде жойылып бара жатқаны жанға батады. Шын мәнісінде, бүгінгі жас ұрпаққа ұршықтың суретін көрсетсең «бұл не?» деп, бетіңе қарайды. Егер де ақ жаулықты аналарымыз ұлттық дәстүрді ұмыт қалдырмай, қыздары мен келіндеріне үйретіп, кеңінен насихаттаса нұр үстіне нұр болар еді.Набиба апамыз жасының егделігіне қарамай үйренген ісін әлі жалғастырып келеді. Іс тігеді, тоқыма тоқиды, жүн түтіп, ұршық иіреді. Құрақ көрпенің түр-түрін жасайды. Тоқыған заттары таңдай қақтырады. Қолы ашық, жаны жайсаң ісмер қонақ күтуден де жалықпайды-ау. Дастарханында дәмнің түр-түрі самсап тұрады. Ол аздай келген меймандарына өз қолымен жасаған заттардан тарту-таралғы жасағанды ұнатады екен.Бір ерекшелігі, Нәбиба апа көзәйнексіз құрақ құрап, іс тігеді. Ол отыз жылдан бері киіз үй тігетін шебер ғана емес, қазаны қайнаулы қазақ әйелінің қолынан талайлар қазанжаппасы мен құрт-майын татты. Бүгінде ұлын ұяға, қызын қияға қондырып, немере сүйіп отыр. Қолындағы келіні Айшолпанды көріп, қазақтың «келін – қайын ененің топырағынан» деген сөзі еріксіз ойға оралады. Ән айтады, жүн сабап, киіз басады, ою ояды. Ол кісінің қолынан шыққан бұйымдары, тіккен киімдері, жасаған заттары басқаға ұқсамайтын өзгешелігімен көз тартады. Бүгінде музейден ғана тамашалайтын құндылықтардың біріне айналған тоқыма кілем мен киіздің қыры мен сырын айтқан Нәбиба ана сынды үлкендердің көзі азайып барады. Ұлттық рухтың айнасындай болған қазақтың қолөнерін сақтап қалып, болашақ ұрпаққа мирас етуіміз керек-ақ.

Қолөнерден қол үзбеген ана ұлттық өнерді ұлықтап жүр

Ақжар ауылдық кітапханасында 29 901 кітап қоры бар

<a href="https://kyzylorda-news.kz/">Kyzylorda-news.kz.</a> Ә.Тәжібаев атындағы облыстық әмбебап ғылыми кітапханасында «Бес жылдыққа – бес әдеби сапар» атты рухани тағылымды жиын өтті. Түркістан облыстық «Фараб» әмбебап ғылыми кітапханасының ұйымдастырумен өткен әдеби-мәдени жүздесуде екі өңірдің руханият өкілдері етене танысып, өзара шығармашылық байланыс орнатты.Айта кетейік, 2018 жылы Оңтүстік Қазақстан облысы Түркістан облысы болып қайта құрылған еді, &nbsp;яғни, биыл Түркістан облысына 5 жыл. Осыған орай облыстық кітапхана ұйымдастырған іс-шара аясында түркі жұртының рухани астанасы Түркістан өңірінің тарихы және рухани, мәдени саладағы тың жаңалықтары терең насихатталды. «Тарихыңды таны, тұлғаңды құрметте» тақырыбында &nbsp;жасақталған көрме таныстырылып, келушілер назарына ұсынылды. Одан әрі әдеби іс-шара дөңгелек үстел басындағы жиында жалғасты.Жиынды ашқан Ә.Тәжібаев атындағы облыстық әмбебап ғылыми кітапханасының басшысы, тарих ғылымдарының кандидаты Нұрлыбек Мыңжас Түркістан облысынан келген қонақтарға Сыр елінің атынан ілтипат білдіріп, естелік сыйлық табыстады. Сондай-ақ, Сыр руханиятын көтеруде еселі еңбек етіп жүрген әдебиет өкілдерін таныстырды. Олардың қатарында эколог-қаламгер, «Кіші Арал», «Қазақстан арнасы» идеяларының авторы, «Парасат» орденінің және отандық әдебиет саласы бойынша ҚР Мемлекеттік стипендиясының иегері Сайлаубай Жұбатырұлы бастап, Қорқыт ата атындағы Қызылорда университетінің профессоры Қазыбай Құдайбергенов, Қазақстан Жазушылар одағы облыстық филиалының басшысы, халықаралық «Алаш» әдеби сыйлығының иегері Қаршыға Есімсейітова, &nbsp;Қазақстан Жазушылар одағының мүшелері, жазушылар Несібелі Рахмет, Қали Омаров, облыстық ардагерлер кеңесі төрағасының орынбасары Өмірбек Шәменов болды.Киелі Түркістан шаһарының тарихы мен облыс орталығына айналған аз уақыт ішінде қалыптасқан жаңаша келбеті бейнефильм арқылы көрсетілді.Айтыскер ақын, жырау, ҚР Мәдениет саласының үздігі Серік Ыдырысов «Фараб» кітапханасының ұжымына арнау айтты. Жиын барысында сөз алған «Фараб» кітапханасының басшысы Жанат Шардарбекова Ә.Тәжібаев атындағы облыстық кітапхана директоры Нұрлыбек Кәрібозұлына Түркістан облысы әкімінің орынбасары Б.Тәжібаевтың сәлемін жеткізіп, Алғыс хат пен сый-сияпат табыстады. Сонымен қатар, қаламгерлер Сайлаубай Жұбатырұлы мен Қаршыға Есімсейітоваға құрмет көрсетті.Жиында қаламгерлер Алаштың астанасы болған, Алаш қайраткерлерінің ізі қалған Сыр өңірі жайлы әңгімеледі. Аймақтың тарихынан естеліктер айтылып, ақындар өлең оқыды.Қазақстан Жазушылар одағы Түркістан облыстық филиалының басшысы Айдар Сейдазым, облыстық «Фараб» әмбебап ғылыми кітапханасының директоры, Мәдениет саласының үздігі Жанат &nbsp;Шардарбекова Сыр өңіріне сапарлай келіп, әріптестік аясын ұлғайтуға негіз болған тақырып төңірегінде келелі ой айтты. Сонымен қатар, келешекте бірлесе зерттеп, зерделей түсетін тақырыптар жеткілікті екенін &nbsp;атап өтті.Ақын, «Алтын қауырсын» медалінің иегері Сайлаухан Жоланов, ақын, композитор, қобызшы Шерхан Әлібеков, ақын, Қазақстан Жазушылар одағының мүшесі Нұрғали Сердалиев, мәдениет және туризм басқармасының баспасөз хатшысы Тұрсынай Шаметова, ақын, журналист, «Оңтүстік Қазақстан» облыстық қоғамдық-саяси газетінің тілшісі Бауыржан Ерман &nbsp;өз шығармаларын назарға ұсынып, көптің қошеметіне бөленді.<blockquote>Түркістан облысы әкімінің орынбасары Б.Тәжібайдың бастамасымен жолға қойылған «Ауыл кітапханаларына 20 мың кітап» акциясына орай кітап қорын оқырман сұранысындағы әдебиеттермен қамтамасыз ету бағытында Тараз, Алматы, Астана қалаларында өткен шара барысында 12 мыңнан астам кітап жинақталды. Ал Қызылорда облысына сапар барысында 4000-ға жуық &nbsp;кітап сыйға алып отырмыз, – дейді облыстық кітапхана басшысы. &nbsp;</blockquote>

Қос өңірде әріптестік байланыс орнады

<a href="https://kyzylorda-news.kz/">Kyzylorda-news.kz.</a> Жасөспірімдер арасында өзіне-өзі қол жұмсау (суицид) бүгінгі күннің өзекті мәселелерінің бірі болып отыр. Еліміздің болашағы саналатын жастардың мұндай оқыс әрекеттерге баруы расында алаңдатарлық жағдай. Статистикалық мәліметтерге үңілсеңіз адам жаны түршігеді. Әлемде жылына 1 миллион адам өзіне-өзі қол жұмсайды екен. Осындай суициді көп 80 елдің ішінде Қазақстанның 5-ші орынға тіркелуі бізді қатты қынжылтып отыр. Аталған дерттің елімізде дендеп кетуіне не себеп? Аты жаман аурудан қоғамды қалай құтқарамыз? Бұдан шығудың жолы қайсы, қандай да бір белгілері бар ма? Міне, осы сауалдар төңірегінде психолог мамандары мен мешіт имамдарының пікірін білген едік.Кеше ғана күн күлімдеп, бау-бақшада құстар сайрап, өмір маған қызықты да әсем ертегідей еді... Кенеттен көңіліме бұлт торлап, қандайда бір көңіл толмаушылық, реніш, себепсіз ашу кернеп, көңіл-күйім түсіңкі, өзімнің ешкімге керек еместігімді сезіндім... Міне, осылай адам бойындағы депрессия кенеттен пайда болып, кейде өте ұзақ жалғасуы мүмкін. Ол, бірден тез өтіп кетеді, не болмаса терең де созылмалы түрде болады. Қандай жағдайда да депрессия – түрлі эмоциялар, елестетулер, еске алулардың жиынтығы. Әдетте, депрессияны бойынан өткеретін адам оның не себептен екендігін анықтай алмай әлек болады. Қоғамдағы өзекті мәселе жайлы аудандық емхана психологы Индира айтқан болатын. «Жасөспірімдерде қазіргі таңда, телефонға тәуелділік басым. Осы орайда, ата-ана тарапынан бақылау жасалынса екен дейміз», – дейді психолог. Сонымен қатар, суицид жүйке ауруларына жатпайтынын, әлемде 15-19 жас аралығындағы жасөспірімдер арасында жиі орын алып отырғанын айтты. Сонымен бірге, бұл ата-аналары ажырасқан, қамқоршысыз қалған, қылмыстық жолға түскен, өзіне жақын адамын жоғалтып, қайғы шеккен, отбасында ұрыс-керіс жиілеген, бір нәрседен қатты көңілі қалған жасөспірімдер арасында көбірек байқалатынын жеткізді.Шетелдік ғалымдардың пікірінше, суицидтің үш түрі бар көрінеді. Оның біріншісі – шынайы суицид. Мұндай жағдайда адам өмірден түңіледі, үнемі көңілсіз жүреді. Өмір сүрудің мән-маңызын жоғалтады. Ақыры өзіне-өзі қол жұмсауға бел байлайды. Екіншісі – жариялы суицид. Әдетте, мұндай жолды таңдағандар өлместен бұрын өлгісі келетіндігіне өзгелердің назарын барынша аударуға бейім тұрады. Мәселен, біреумен ренжіссе болғаны қолына суық қару немесе арқан-жіп ала жүгіріп, «өлем» деп өзгелерді үрейлендіргісі келетіндер осы топқа жатады. Ал, үшінші бір түрі – жасырып, яғни құпия суицид. Бұған барғандар өзіне-өзі қол жұмсаудың жақсы еместігін, абырой әпермейтінін жақсы түсінеді. Алайда, оларға тірлікте кездескен қиындықтан шығатын жол жоқ болып көрінеді. Бұған көпшілігінде нашақорлар мен ішімдікке салынып кеткендер дайын тұрады.Осы тақырып төңірегінде, Шиелі ауданының бас имамы Бақыт Ұлжаевпен сөйлескен болатынбыз. Дін өкілі жүрегінде иманы бар адамның мұндай әрекетке бармайтынын айтып, шет елдерде болған осындай жағдайларды баяндап берді. Имам айтқан мәліметтерге сүйенсек, жақсы дамыған Жапонияның өзінде күніне 90 адам өз-өзіне қол жұмсайды екен. Сол себепті де, мұндай ұсқынсыз әрекеттің көптеп орын алуы бірінші кезекте адамның материалдық тұрғыдағы бай немесе кедейлігіне қарамайды.&nbsp;<blockquote>«Мәселенің мәні адамның рухани жұтаң, жігерсіз, қарсы келген қиындыққа тез беріле салуында болып отыр. Жүрегі иманға толы, рухани бай адам мұндай келеңсіздікке жолбермейді. Өйткені, ол өзіне берілген барлық нығметтің Алладан екендігін, кеудесіндегі жанның Алланың аманаты деп біледі. Жүйкесі әлсіз адамдар өз өздеріне жиі қол жұмсап жатады. Мұны ғылым «психологиялық ауытқу» деп атайды. Дін ұстанатын азаматтардың тілімен айтқанда, адамға жын-жыбыр жабысқан боп шығады. Баланың жанарының нұры жоғалып, ештеңеге қызықпайтын болса, алдын алып, білімді имамдарға көрсеткен абзал. Өзін өзі өлтіру – ауыр күнә. Сондықтан, рухани тұрғыдан жұтап жүрген адамдарды жеке қалдыруға болмайды», – дейді имам.&nbsp;</blockquote>Сөзінің соңында исламда бұған тыйым салғанын ескерте кетті. Міне, осы жағдайлардың барлығында психолог пен отбасының көмегі қажет. Өкінішке қарай, көпшілік психолог қызметінің не екендігін және оның не үшін &nbsp;қажеттігіне мән бере бермейді. Психологты көп жағдайда психиатрмен шатастырады, &nbsp; сондықтан да, оның алдына баруға &nbsp;ұялады. Ал, бұл екеуінің арасындағы айырмашылық бар. Қарапайым сөзбен &nbsp;айтқанда, психиатр ауруларды емдейді, ал психолог – психикалық тұрғыдан сау адамдарды емдейді. Дегенмен, депрессиялық жағдайда адамға көбінесе отбасы мүшелерінің шынайы қамқорлығы, жақындығы, түсіністігі мен демеуі қажет.Шығыста «Бір күндігіңді ойласаң күріш ек, он жылдығыңды ойласаң ағаш ек, жүз жылдығыңды ойласаң ұрпағыңа жақсы тәлім -тәрбие бер» деген қағида бар. Айтпағымыз, егер әрбір балаға жас­тайынан жақсы тәрбие беріп, стереотипке бой алдырмай, өмірді бағалай білуге үйретіп өсірсек, мұндай қайғылы жағдайларға тап болмасымыз анық. Бұл ретте, баланың бойында патриоттық сезімді оятып, өмірге деген құлшынысын арттыру үшін нәтижелі әрі түзу бағыт-бағдар беруіміз абзал. «Адам өмірге ессіз болып келеді, есалаң өмір сүреді» деп адам өміріне қысқа ғана «мінездеме» берген Асқар Тоқпановтың бұл сөзінен талайды аңғаруға болады. Өзіңізге жақын адамдарға көңіл бөліңіз, оларды сүйе біліңіз, сонда ғана сіз күннің күлімдеп жарқырағанын, құстардың қуана сайрағанын сезінесіз...

Бақыт Ұлжаев: Суицид емі – иман

<a href="https://kyzylorda-news.kz/">Kyzylorda-news.kz.</a>&nbsp; Бұрнағы күні аудандық қоғамдық даму бөлімінің ұйымдастыруымен, «Еңбек даңқы» музейінде «31 мамыр – саяси қуғын-сүргін және ашаршылық құрбандарын» еске алу күніне орай саяси қуғын-сүргін құрбандарының ұрпақтарымен және нәубет жылдары Сыр өңіріне қоныс аударған этнос өкілдерінің ұрпақтарымен кездесу өткізілді. Іс-шараға аудан әкімінің орынбасары Талғат Нұртазаев, аудандық қоғамдық даму бөлімінің басшысы Бейбіт Смайлов, «Қызылорда облысының мемле¬кет¬тік архиві» КММ-нің «Сырдария аудандық архиві» филиалының басшысы Жәнібек Сейлов, аудандық тарихи-өлке¬тану музейінің директоры Салтанат Қуандықова, саяси қуғын-сүргін құрбандарын ақтау бойынша аудандық жұмысшы топ мүшелері, өзге этнос өкілдері, саяси қуғын-сүргін құрбандарының ұрпақтары, БАҚ өкілдері мен жастар қатысты.Іс-шарада аудандық орталық кітапхананың кітапханашысы Динара Пазылбекова «Тарихтан тағылым-өткенге тағзым» атты кітап көрмесі таныстырды. Сонымен бірге аудандық мұражай экскурсоводы Айжан Жұмабекова аудандық тарихи өлкетану музейінің «Жаралы жылдар жаңғыры» тақырыбындағы тарихи-құжаттық көрмесін тізбектеп жиналғандарға айтып берді. Ал аудандық мәдениет үйі өнерпаздарының &nbsp;«Алаш арыстары» атты театрландырылған қойылымы ұсыныды.Аталған іс-шара барысында сөз алған аудан әкімінің орынбасары Талғат Нұртазаев тарихи күннің маңыздылығына тоқталды.&nbsp;<blockquote>– &nbsp;ХХ ғасырда бірнеше қайталана орын алған репрессия жылдары және батыр халқымыздың басым бөлігінің жаны қиылған ашаршылық жылдарындағы ауыр да азапты күндер қазақ халқының тарихында қалғаны ел есінде. Әрбір күндер желісінде ата-бабымыздың бастан өткерген қиындықтары тізбектеліп жатыр. Шын мәнінде, Алаш қайраткерлерінің күрескерлігі, жанқиярлық табандылығы келер ұрпаққа үлгі-өнеге. Сонымен бірге талай жылдар бойы қуғын-сүргінге ұшыраған азаматтарды ақтау жұмыстары жүргізілуде. Осы күні саяси қуғын-сүргін құрбандарын ақтау бойынша аудандық жұмысшы топ мүшелері әрбір мәселенің тереңнен зерттеуде. Азаматтарымызды ақтауға күш салуда. Сол жылдары өзге ұлт өкілдері ауданымызға қоныс аударды, – деді аудан әкімінің орынбасары.&nbsp;</blockquote>Мұнан соң, саяси қуғын-сүргін құрбанының ұрпағы Айту Байдосов, Ссыр еліне қоныс аударған Кан Мила, аудандық жұмысшы топ мүшесі, Қазақстан Журналистер одағының мүшесі, өлкетанушы Жәнібек Маханбетов халқымыздың басына түскен нәубет-зобалаң халық жадынан ешқашан өшпейтіндігін, өткен тарихымызды ұмытпай, біздің болашағымыз үшін күрескен ата-баба рухына тағзым ету парызымыз екендігін айтып өтті.&nbsp;<blockquote>– Сол күндер, зұлматты жылдар қаншама жанның өмірін қиды. Біз аудандық жұмысшы топ мүшелері әрбір азаматтың өмірін мұқият зерделеуге көңіл бөлдік. Ұлт тарихында ойып тұрып орын алатын «31 мамыр – саяси қуғын-сүргін және ашаршылық құрбандарын еске алу күні» өз мән-мағынасын жоғалтпауы тиіс. Осы күні біздер өткен тарихымызға шолу жасап, Алаш қайраткерлерін еске аламыз. Олардың жазған еңбектеріне зер салсақ, сол күннің өзінде қазақты сауаттандыруға, ұлттық идеологияны жаңғырутуға күш салғандығын байқаймыз, – деді Жәнібек Маханбетов.&nbsp;</blockquote>Қаншама зобалаң жылдарды бастан кешкен қазағымның әрқайсысының айтқан зары, кешкен мұңы, жүріп өткен тар жолдары – бәрі-бәрі бүгінгі ұрпақтың құлағында, жүрегінде, мәңгі есінде! Ел тағдыры жолында жаны қиылған азаматтардың рухына тағзым ету, олардың еңбектері үшін алғыс білдіру тәуелсіз елдің кез-келген тұрғынының парызы!&nbsp;Аудан көлемінде «31 мамыр – саяси қуғын-сүргін және ашаршылық құрбандарын еске алу күні» кеңінен аталып өтілді. Мәселен, аудандық мәдениет үйінде 31 мамыр – Саяси қуғын сүргін және ашаршылық құрбандарын еске алуға арналған «Ызғарлы жылдар жаңғырығы...» атты еске алу іс-шарасы өткізілді.&nbsp;Танымдық іс-шара барысында жазықсыз жапа шеккен, елдің болашағы, ұрпақтың бақыты үшін күрескен асыл азаматтарды көпшілік бір минут үнсіздікпен еске алды. Сонымен қатар аудан өнерпаздары патриоттық әндер шырқады. Аудан жұртшылығы саяси қуғын-сүргін құрбандарын еске алды.&nbsp; &nbsp;

Сырдариялықтар саяси қуғын-сүргін құрбандарын еске алды

Руханияттың мәйегі болған Тасбөгет

<a href="https://kyzylorda-news.kz/">Kyzylorda-news.kz.</a> Он төрт жасынан қолөнерге құмар болған Қожабақы ауылының тұрғыны Мәдина Қаржаубаева тоқу өнерінің түр-түрін меңгерген. Ол тоқыған қалпақ, шұлық, қолғап пен тоқыма көздің жауын алады. Мәдина апайдың қолынан шыққан киіз үйдің баулары мен алашаның әсемдігін айтсаңызшы. Бұл өнердің сырын нағашы жеңгесінен үйреніпті. Алаша тоқуда қойдың жабағы жүні пайдаланылады. Қазіргі күнделікті тұрмысымыздан алыстап бара жатқан төсеніштің қалай дайындалатындығын былай түсіндірді.<blockquote>«Бұрын барлығын жасаушы едім. Қазір жас келген соң сәл алыстап қалдым. Бір ғана төсеніштің қалай жасалатындғығын айта кетейін. Қойдың көктемгі қырқылған жүні жабағы жүн деп аталады. Оны жуып, кептіріп, түтіп ұршықпен иіремін. Иірілген жүн жіпті қызыл, көк тағы басқа да бояуға қайнатып бояйтынбыз. Кепкен соң домалақтап алаша тоқуға кірісемін. Алаша тоқуға арналған жүн жіптерін үш жерге қазық қағып жүгіреміз. Сосын ортадағы күзу ағашқа тізбектейміз. Болғасын өрмек ағашты құрып арқалығына күзуді байлаймыз. Өрмек ағаштың қылышы теру қылышы, адарқысы болады. Теру қылышпен теріп, түрлі мүйіздер шығарамыз. Қылышты әрбір тартқан сайын арқау жіп өткізіледі. Сол арқылы алаша тоқылады», – дейді тоқыма өнерінің шебері.&nbsp;</blockquote>Сонымен қатар, Мәдина апа уақытында ағаш үйге түрлі құрлар мен бау тоқып дайындаған.Қазақтың көне қолөнерін жаңғыртып, заманға сай жарыққа шығарып жүрген Мәдина апаның әкесі Қаржаубай заманында ағаштан түйін түйген, қараша үй соққан шебер болған.&nbsp;<blockquote>«Қара ағаштан таңдап, қабығын аршып, дайындалған ағаштан 6-7 метр ұзындықта ошақ жасайтын. Оның мұржасының диаметрі 1 метр кеңдікте болады. Сол мұржаға ағаштарды тікесінен қояды. Ошаққа от жағып, ыссы түтінге балқыған ағашты қалыпқа салып уыққа арналғанын, керегеге қажетті ағаштарды бөлек «Тезге» салатын. Керегеге керекті ағашты ағаш жонғышпен жонады. «Пәрме» құралы арқылы кереге көздері тесіледі. Керегені сиыр терісін өңдеп, тіліп көктейді. Уықтың бау тағар жерін теседі. Шаңырақты қара ағаштың жуан түрінен таңдап алып, күлдіреуіш салып, дайындайды. Уық тесіктерін сексеуілдің шоғына үшкір темір салып, сонымен теседі. Осылайша киіз үйдің әрбір жұмысын есептеп жасайтын», – дейді шебер.</blockquote>Бар білгенін жастарға көрсетіп те үйретіп те жүрген зейнеткер Мәдина Қаржаубайқызы қазіргі таңда Аранды ауылдық әйелдер кеңесінің төрайымы. «Сегіз қырлы, бір сырлы» ана «Әжелер» ансамлінің мүшесі. Мектептен кейін еңбек жолын Энгельс атындағы совхозда құрылысшы болып бастаған ол Қызылорда ауылшаруашылығы техникумынан есепші мамандығын алды. Әр жылдары Энгельс атындағы совхозда, Аранды ауылдық кеңесінде есепші болды. СТК-ның төрайымы қызметін де абыроймен атқарған. Қазір зейнеткерлік демалысқа шығып, немере-шөберенің қызығын көріп отырған асыл әже.<blockquote>«Біздің өзгелерден ерекше тұсымыз – ұлттық құндылықтарымыздың тартымдылығында. Сәнді әрі мағыналы ою-өрнегіміздің өзі неге тұрады. Әрбір қолөнеріміздің астарында терең мән жатыр. Осының барлығын ұрпақ ұғынып өссе екен», – дейді Мәдина Қаржаубайқызы.</blockquote>Әкеден қонған құтты өнерді көзінің қарашығындай сақтап, халық назарына ұсынып жүрген шебердің өнегелі ісіне ауыл тұрғындары дән риза.

Қазақстан және Қызылорда облысының жаңалықтары: Руханият