&nbsp;<a href="https://kyzylorda-news.kz/">Kyzylorda-news.kz.</a> &nbsp;Әйтеке бидің 380 жылдығына арналған «Әділ сөздің алдаспаны» атты Қызылорда облысы мен Шымкент қаласы ақындарының арасында республикалық командалық айтыс өтті.Командалық айтыста сырбойылық таланттар басым түсіп, жеңіске жетті.Азулы ақын Нұрмат Мансұров бапкерлік еткен, сүре айтыс, түре айтыс, қайым айтыс, дәстүрлі ән, жыр, күй өнерінен сынға түскен дарындар қай жағынан алып қарағанда да мықтылықтарын дәлелдеді.Күйші Алдияр Шағдатов күй бөлімінде Мұраттың төкпесін құйқылжытқанда төбе-құйқамыз шымырлады. Жыршы Бейсенбек Төлеубаев Сырдың мақпал мақамымен рухымызды асқақтатты. Түре айтыста оза шапқан Бексұлтанымыз, Ержан мен Мөлдір ақындарымыз жүйріктіктерін дәлелдеді.Нартайдың ән мұрасын арқалаған жерлесіміз Ақмарал Ноғайбаева мен Тасбергеннің маңырамасымен тұла бойды тітіркендірген термешіміз Әділхан Қуаңбаев та деңгейлі өнер көрсетті.Ал, айтыстың ақтаңгері, мақтанышымыз Мұхтар Ниязов қайым айтыста қарсыласына ғана емес, көрерменге ақберен де, берен де өзі болып сезіліп, бір мүдірместен команданы жеңіске сүйреді. Осылайша өрілген дәстүрлі өнер додасы Сыр бойына үлкен жеңіс сыйлады. Фото: Облыстық мәдениет басқармасы

Айтыста сырбойылық таланттар жеңіске жетті

&nbsp;<a href="https://kyzylorda-news.kz/ru">Kyzylorda-news.kz</a>&nbsp; Отан – отбасынан құралады. Ынтымағы мығым әрбір шаңырақ елдің баға жетпес байлығы. Ұлттық үрдіс тінін нығайтып, ұрпақтар сабақтастығын ширатып, болашақты берік жалғастыратын да солар. Осындай адамгершілік құндылықты қасиет тұтып, «Мерейлі отбасы» ұлттық конкурсының аудандық, облыстық кезеңінде бас жүлдені алып, республикалық сынақта лауреат атанған Бекарыстан би ауылындағы Смағұловтар әулетін қалай дәріптесек те артық етпейді.&nbsp; Қарашаңырақтың алтын діңгегіне айналған қазыналы қария Қабақ Смағұлов биыл жүз жастың асқар асуын бағындырып, абыздық кезеңге жетті. Есте қаларлық қуаныш пен мерейлі мерейтойды аудан халқы Жеңіс мерекесімен қоса-қабат атап өтіп, қарт жауынгерге зор құрмет көрсетілді.&nbsp; 1923 жылдың көктем айында «Мыңбаймыса» қыратында жарық дүние есігін ашқан, Қабақ көкенің бозбала шағы қасіретті қуғын-сүргін уақытымен тұспа-тұс келген. Жеті жасында Жетес атасының жазықсыз халық жауы ретінде атылғаны балғын жүрегіне өшпес қаяу салған. Ашаршылық пен тұрмыстағы жоқшылықтың да біраз тауқыметін тартқан.&nbsp; Ұлы Отан соғысы жылдарындағы жалпақ жұрттың басына төнген қиындықты да көппен бірге бөлісті. Әкесі Смағұл алғашында Ресейдің Магнитогорск қаласындағы еңбек майданына алынады. Ұзамай неміс-фашист басқыншыларынан жерімізді қорғау жолындағы жорықта белгісіз жауынгерлер қатарында шейіт кеткен (Бір қуантарлығы, 2017 жылы Беларусияның Витевск облысының Дубровна елдімекеніндегі бауырластар зиратында жерленгені анықталды).&nbsp; Он тоғыз жасында қан майдан төсіндегі сарбаздар қатарын толықтырған Қабекең де Мәскеу бағытындағы шайқас даласында зұлым жаумен бетпе-бет келіп, Тула, Орел қаласын азат етуге қатысады.&nbsp; Ол соғыс аяқталысымен Жаңабасшылық, Октябрь колхозында есепші, кітапханашылықты атқарған. 24 мектепте, аудандық оқу бөлімінде, фансиондық интернатта, мал сою пунктінде үйреншікті қызметін жалғастырады. 1969 жылы Майдакөл ауылдық Кеңес атқару комитеті жанындағы орталықтандырылған бухгалтер аппаратына бас есепшілікке ауысады. Содан он алты жыл бойы ілкімді істің иінін қандырып, 1985 жылы зейнеткерлік демалысына шыққан.&nbsp; Қос ғасырдың куәгері, соғыс және еңбек ардагері, Қазалы ауданының Құрметті азаматы Қабақ Смағұловтың кеудесінде майдандағы ерлігі үшін берілген «Қызыл жұлдыз» ордені, «Ерлігі үшін» медалімен бірге «Социалистік жарыстың екпіндісі» төсбелгісі, II дәрежелі «Отан соғысы» ордені мен «Еңбек ардагері», «КСРО Қарулы Күштеріне – 70 жыл», «Маршал Г.К.Жуков атындағы» және де Ұлы Жеңістің әр жылдардағы мерекелік медальдары жарқырайды. Қабақ көке отбасында Құдай қосқан қосағы Гүлжан екеуі тәлімді ұл-қыз тәрбиелеп өсірді. Барлығы да өмірден өз жолдарын тауып, ата-ана мен ел-жұртының абыройын асқақтатып жүр.&nbsp; Атап өтсек, тұңғышы Барша Қызылорда қаласындағы Н.В.Гоголь атындағы педагогикалық институттың қазақ тілі мен әдебиеті факультетін бітірген. Ұзақ жыл білім саласының өркендеуіне атсалысқан ұлағатты ұстаз. Кемал жоғары білімді экономист. Қазалы ауданының бірнеше совхозында, аудандық қаржы бөлімінде есепші-экономист, кірістер инспекциясының, бюджет бөлімінің бастығы, аудандық қаржы бөлімі бастығының орынбасары болған. Алматы өңіріне қоныс аударып, облыстық қаржылық бақылау басқармасында, тексеру комиссиясында, ҚР Қаржы министрлігінің орталық аппаратында қаржылық бақылау бойынша жауапты қызметтер атқарған. Гүлшара Арқалық қаласындағы медицицналық училищесін аяқтап, еңбек жолын туған ауылында медбике болып бастаған. Аудандық ауруханада, туберкулезге қарсы күрес диспансерінде істеген. Төлеген мектептен кейін Қызылорда совхоз техникумында зоотехник мамандығында оқып,шаруашылықта осменатор, кіші мал дәрігері болған. Қазірде «Смағұл» жеке қожалығының құрамында жылқы бағып,ата кәсіп тізгінін қалдан шығарар емес.&nbsp; Қарттыққа жеткен әкесін қамқорлығына алған Төлеу Алматыдағы темір жол институтын тәмамдаған. Ақтөбе қатынас-құрылыс мекемесінің бетон цехында, 244 ПМС мекемесінде, Қазалы аудандық салық басқармасында қызмет етті. 2000 жылы «Смағұл»жеке шаруа қожалығын құрып, егін, бау-бақша дақылдарын өсірді. Бүгіндері ет өнімдерін өндірумен айналысады. Сонымен бірге «Тілеулес» мейрамханасы арқылы тұрғындарға кәсіпкерлік қызмет көрсетіп, алғысқа кенелуде. Төлеуден кейінгі Гүлнар Алматы қаласындағы білім беру жүйесінде отыз жылдан астам мұғалім болып,жас ұрпақ бойына тәлім-тәрбие нәрін егуде.Гүлназым ҚР Білім және ғылым, Индустрия және сауда, Қорғаныс министрлігінде, ҚР Парламенті Мәжілісінде аудармашы-редакторлық қызметті меңгерген. Қалдыгүл Қазақ онкология және радиология ғылыми-зерттеу институтының химиотерапия бөлімінің меңгерушісі.Денсаулық сақтау саласының үздігі, медицина ғылымдарының докторы. Сондай-ақ, осындай қасиетті босағадан аттаған Ордагүл, Мариямкүл, Жанар, Қарлығаш, Гүлнар, Фарида, Әсел, Бигүл, Назымгүл есімді келіндердің де жүзіне нұр, көкірегіне иман ұялаған ізетті де ибалы жандар. Солардан өрбіген немере, шөберелер мен шөпшектер тал-шыбықтай бой түзеп келеді.&nbsp; Тіршіліктің жайлы да жайсыз,соқтықпалы-соқпақсыз асуларын артқа тастаған қадірлі қарияға сөз арасында: «Денсаулықты күту үшін не істеген дұрыс. Ұзақ жасаудың сыры неде?» деген сұрақ қоюдың ыңғайын келтірдік. Бұған: «Дене, аяқ-қолымыз үнемі қозғалыс үстінде жүргені абзал. Әйтпесе қуат-күшіміз әлсіреп, қан айналысы жолдары бұзылады. Осыған байланысты шынықтыру жаттығуларын жасап, жаяу жүрген, болып жатса бау-бақша егу, басқа да қимыл жұмыстарымен айналысқан тиімді. Ал кімнің қанша жасқа жетерін Алла Тағала біледі. Сонда да әркез байсалды жүріп, күйгелектік, ашушақтыққа ұрынбағанды қалаңдар. Көкіректі таза ұстап, әбес сөздер айтпай, бітпей қалған шаруаны уайымдап, жүйкеге қысым түсіруден сақтаныңдар. Артық салмақ жинап, толыққан да пайдалы емес. Әбу Насыр Әл-Фараби "Адамның өмірін ұзартуға музыканың, әннің көп пайдасы бар" дейді. Сол үшін де бос уақытта осыған да назар аударыңдар», - деп қысқа да,нұсқа пайымды пікірін айтты.&nbsp;

Үлгілі Смағұловтар әулеті

<a href="https://kyzylorda-news.kz/ru">Kyzylorda-news.kz</a>&nbsp; Ақтан батыр ауылының тумасы Серік Ерболатовтың он бес жасында жазатайым жағдайға ұшырап, қос жанары көрмей қалған. Алайда, жігерлі жас бұл қиындыққа жасымады. Керісінше, қоғамнан алшақтамай, дүниенің бір кетігін тауып, кірпіш болып қаланды. Бойдағы таланты мен қайсарлығы оны алға жетелей түсті.&nbsp;Серік отбасындағы үш баланың ортаншысы. Үлкен әпкесі мен інісі бар. Ол жарық дүниеге қос жанары жарқырап келді. Қатар құрбыларымен өзі туған ауылдағы мектеп табалдырығын аттады. Алайда, 8 сыныпты тәмамдаған жылы жылқыдан құлап, жарақат алған Серіктің тағдыры басқа арнаға ауысып кете барды. Екі көзінің де көруі нашарлап, ауылынан жыраққа кетіп, Алматы қаласындағы Н.Островский атындағы зағиптар және көздері нашар көретін балаларға арналған 4 арнайы мектеп-интернатта оқуға мәжбүр болды. Бала күнінен ән айтуға құмар Серік осында білім ала жүріп, баян, домбыра, гитара аспаптарында ойнауды меңгереді. Қазір, түрлі ән байқауларында бағын сынап, жүлделі орындарды жеңіп жүр.&nbsp;«Бала кезімізде сыныптастармен кешкілік көшеде жүріп, ән салатынбыз. Мектепте де өлең айтып жүрдім. Ең алғаш «Бозторғай» ән байқауына қатыстым. Ол кезде Қонысбек деген жігіт домбырада, мен баянда ойнап, Тоқтар Серіковтің орындауындағы «Үкілі қыз» әнін айттық. Ең алғашқы үлкен сахнам сол екен. Одан кейін бірнеше байқауларға қатысып, жүлделі орындар иеленіп жүрмін», – дейді Серік.&nbsp;Иә, әнші жігіт жүлдесіз емес. Ол «Бәріміз бірдейміз – кемсітуді білмейміз» атты мүмкіндігі шектеулі жандар арасындағы аудандық байқауда үшінші, Басықара ауылдық клубында «Нұр Отан» партиясының «Кедергісіз келешек» жобасы аясында өткен «Келешекке зор үмітпен қараймыз» атты аудандық өнер фестивалінде «Әуезді әнші» номинациясымен марапатталды. Кеңес Одағының батыры Үрмаш Түктібаевтың жүз жылдық мерейтойы аясында ұйымдастырылған «Дәстүр» аудандық дәстүрлі әншілер байқауында үздік өнер көрсетіп, бас жүлдені жеңіп алды. Астана қаласының – 20, Қызылорда қаласының – 200 жылдығына орай өткен «Менің қолымнан бәрі келеді» өнер фестивалінде сазды аспапты шығарма орындағаны үшін екінші, аудандық «Сыңғырла сазды сырнайым» атты баянмен ән орындаушылар байқауында бас жүлдеге қол жеткізді. «Әлемнің жылуын жүрегіммен сеземін» ән байқауында бірінші орын алып, «Орда» зағиптар қоғамдық бірлестігі төрағасының «Дипломымен» марапатталған. Жуырда, ғана Қызылорда қаласында өткен облыстық дәстүрлі «Жүрек жылуы» мүмкіндігі шектеулі жандар арасындағы байқаудан екінші орынмен оралды. Байқау кезінде әнші Табылды Досымовтың «Жалған дүние» әнін орындап, көрермендердің көзайымына айналды.&nbsp;Өнерлі жігіт ауыл әкімінің, «Қазақ соқырлар қоғамы» қоғамдық бірлестігінің 80 жылдығына орай «Алғыс хат» иеленді. Ауылда әнші жігітке қолдау көрсететіндер жетерлік. Мәселен, Өмірсерік деген ауыл тұрғыны Серікке баян алып берген.&nbsp;Серіктің осындай байқаулардан қалыс қалмауында жұбайы Орынайдың еңбегі ерекше. Әркез жарының жанында жүретін Орынай үйде де, түзде де жағдайын жасайды. Отау құрғанына он жылға жуықтаған ерлі-зайыптылар ең алғаш құрдастар арасындағы мерекелік отырыстардың бірінде танысады. Сол кезден бастап, жақын араласқан екі жас жүрек қалауымен шаңырақ көтереді. Қазір, Серік пен Орынайдың шаттыққа толы шаңырағында Нұрасыл, Ұлпанай, Айзере, Кемеңгер атты төрт бүлдіршін өсіп келеді. Олардың алды мектепте оқиды. Кез келген аспапта еркін ойнайтын жігіт ауылдық клубта жұмыс істейді.&nbsp;Мүмкіндігім шектеулі деп қол қусырып отырғысы келмеген жігіттің талабы мен талпынысы талайды тәнті етеді.&nbsp;– Қазір, Дидар есімді ініммен жиын-тойларда ән саламыз. Мен баянда, Дидар гитарада ойнайды. Өнерімізге деген құрметі болар тойға шақырушылар қатары сиреген емес. Біз де қызмет қылуға әрқашан әзірміз, – дейді Серік Ерболатов.&nbsp;

Серік Ерболатов кез келген аспапта еркін ойнайды

<a href="https://kyzylorda-news.kz/">Kyzylorda-news.kz</a> Жаңақорған ауданында театр мәдениетін мен іргетасын қалаған тұлға - ақын, әнші, термеші, режиссердраматург Әмір Мәжитовтің шығармашылығына арналған «Театр – ғұмыр» атты рухани танымдық шара өтті.Манап Көкенов атындағы мәдениет үйінің көрермен залында адам қарасы көп. Туған жердің өнерін өрге сүйреген талантты тұлғаға деген құрмет еді бұл. Көңіл көкжиегінде жарық жұлдызға айналған Әмір Мәжитовтің шығармасын сағына күткен ел сахна шымылдығы түрілгенін күтіп, тау тұлғаның адамгершілік асыл қасиетін сөз етті.Рухани кеш Әмір Мәжитовтің өмірі мен еңбек жолын сөз ететін бейнебаянмен басталды. Осы көріністе өнер майталманының өнерге деген адал махаббаты, өңір театрының жандануына қосқан еңбегі, киелі сахнаға тума таланттардың танылуына қосқан үлесі, ақын һәм драматург қабілеті жайында жанды тербетер сырлар айтылды.Мәдени шараны аудан әкімінің орынбасары Бектас Нуридинов ашып, рухани-танымдық кештің маңыздылығына тоқталып өтті.<blockquote>– Қаратау топырағында талай тау тұлғалар өмірге келіп, руханияттың биік шыңын бағындырып, өзінің өшпес мұрасын мәңгілік қалдырды. Соның бірегейі театр тарланы, драматург, ақын, әртіс Әмір Мәжитовтің қазақ өнерінде орны ерек. Бүгін біз айтулы азаматтың құрметіне үлкен ісшара өткізудегі мақсатымыз өскелең ұрпақтың жүрегінде ұлттық мұрамызды қалдырып, асыл азаматтарымыздың бейнесін есте сақтауға күш салмақпыз. Қазақ өнері мен мәдениетіне сүбелі үлес қосқан тұлғаның шығармасын дәріптеп, ізін сөндірмей келе жатқан ұрпақтарына алғыс айтамын, – деді.</blockquote>Рухани-мәдени шараға ҚР Еңбек сіңірген әртісі, «Құрмет» орденінің иегері Бақытбек Алпысбаев, ҚР Мәдениет қайраткері Бақтияр Қожа Абдуллаұлы, ҚР Мәдениет қайраткері, ақын, режиссер Оңталап Нұрмаханов, ҚР Мәдениет қайраткері Камила Әбжанова, ҚР Мәдениет қайраткері, сазгер Сауран Елеуов, еңбек ардагері Ибрагим Абибуллаев, кәсіпкер Нұрпейіс Мәжитов және т.б. өнер майталмандары қатысып, есті естеліктерімен бөлісті. Бақытбек Алпысбаев:<blockquote>– Ағамыздың әлемдік деңгейдегі жазылған «Қорқыт Ата» реквиемі бала көңілімде қалыпты. Сонау Қорқыт бабамыздан бастап, Алаш арыстарына дейін, тіпті көзі тірі тұлғалардың мұңын жеткізетін тамаша реквим шығарып, оны өзі үзіліссіз 40-50 минут бойы орындағанда әнші үнінің құдыретіне тыңдарман еріксіз бас иетін. Міне, осындай құнды дүниесінің қолжазбасы кімнің қолында кеткені белгісіздеу болып тұр. Әмірдің батылдығы сонда 1987 жылы коммунистік партияның қылышынан қаны тамып тұрған кезде қазақ халқын қырғынға ұшыратқан ашаршылық туралы республикада тұңғыш «Бір үзім нан» спектаклін М.Әуезов театрында қойып, республика бойынша бірінші орын алғанда Асанәлі Әшімов: «Мұндай талантпен ауылдың деңгейінде қалып қоюға болмас, қалаға келсең қалай болады?» деп қолқалайды. Осындай үлкен ұсынысқа қарамастан, туған жерінің өнері мен мәдениетін көтеруді мақсұт етті. Әрі өркениет өрісі тек қалада ғана емес, ауылаймақта да дамитынын, жарық жұлдыз қай жерде тұрса да жарқырай беретінін іспен көрсетті, –деді ол.</blockquote><blockquote> Әмір Мәжитовке туыстық қарым-қатынасым болғанымен ол кісі мен үшін ұлағатты ұстаз, тәжірибелі тәлімгер болды. Алғашқы еңбек жолымда Жаңақорғанның мәдениет үйінде басталып, автоклуб меңгерушісі болдым. Сол сәттерімді еске алғанда кеудемді сағыныш кернейді. Халық ақыны Манап Көкенов, Бибажар Маханбетовамен бірге қызмет етіп, шалғай ауылдарды аралап, концерт бердік. «Беу, қыздар-ай» спектакльін қойып, қойшы қауымның көңілін сергітеміз. Манап көкеміз бен Бибажар апамыз бастаған термешілер жырын төгіп, соңы жастарға арналған биге жалғасатын. Осы істердің басы-қасында Әмір Мәжитов жүрді. Бізді көпшілік қызметке баулып, талай әңгімесін тыңдап, тағылым жинадым. Осындай тау тұлғалардан үлгі алып, көпшіл болуға, шығармашылық тұрғыда дамуға ұмтылып, өнер ортақ мұра екенін жүрегіммен сезіндім. Бұл қарашаңырақ рухани азық алған мектебім болды. Алғашқы еңбек жолым осындай тұлғалардың тәжірибесін бойыма жинауға себеп болып, Алматыға үлкен сахнада жұлдызым жануына есік ашты. Міне, сондықтан киелі табылдырыққа тәу ете келіп, Әмір Мәжитовтің рухына тағзым қып, халқымның батасын алуды мақсат еттім, – дедіБақтияр Қожа.</blockquote>Кеш барысында мәдениет үйі өнерпаздары дайындаған театрландырылған қойылым көпшілік назарына ұсынылып, Ә.Мәжитовтің «Бір үзім нан» спектаклі сахналанды. Сондай-ақ, көрермендер «Қазақстан-Қызылорда» телеарнасы арқылы түсірілген «Дала дарыны» атты деректі фильмді тамашалады.Жиналғандар бейнебаян арқылы есепші маманы бола тұра, өнерді сүйген жүрекпен өлшейтін шығарма тудырып, есінде қалған елдің еңбек жолымен жанжақты таныс болды. Орта мектепті тәмамдаған соң, Қазалы ауыл шаруашылығы техникумын бухгалтерия мамандығы бойынша бітіріп, кейінгі жылдары Ташкент ауыл шаруашылығы институтын тәмамдайды. Еңбек жолын шаруашылықта есепші, экономист болып бастайды. Жастайынан бойына дарыған ерек қабілетімен әрі актер, әрі режиссер болып, көрерменнің қошеметіне бөленді. Әмір Мәжитов аудан өнерпаздарымен бірге М.Әуезовтің «Еңлік-Кебек», Ғабит Мүсіреповтің «Қозы Көрпеш – Баян сұлу», Қ.Мұхамеджановтың «Құдағи келіпті», «Өзіме де сол керек», «Бөлтірік бөрік астында», «Әке тағдыры», С.Жүнісовтың «Ажар мен ажал», О.Бодықовтың «Қанжар мен домбыра», «Қарақұм трагедиясы» т.б. қойылымдарды сахналады. Жаңақорған және Бірлік театр ұжымының халықтың атағын алуына қосқан үлесі зор.Нәубет жылдарындағы ауыл өмірін көрсететін «Бір үзім нан» пъесасы кейін Алматы, Орынбор қалаларында өткен халық театрларының Бүкілодақтық конкурсфестивальдерінде қойылып, жүлделі орындарға ие болды. Бұл оның көрермен көңілінен шыққан шоқтығы биік туындысы еді. Ол Қызыл Отау меңгерушілері, Халық ақыны Манап Көкенов пен Есіркеп Қоңқабаев, әнші-сазгерлер Бексұлтан Байкенжеев, Сауран Елеуов, Жақсыгүл Бегманова, театр режиссері Мәриям Раишевалармен бірге өнер көрсетті. Өзі таңдаған өнер жолын жете меңгеріп, киелі сахнаның саңлағына айналды.Мақаламызды белгілі театр сыншысы Әшірбек Сығайдың сөзімен түйіндесек: «Өнер аудандық, облыстық, республикалық деп бөлінбейді. Өнер – біреу. Әмір сияқты елдің арасынан шыққан, сөйте тұра, халықтың зор махаббатына бөленген, өнерді жанымен сүйген азаматтардың арқасында ғана біздің қазақ мәдениеті, ұлт өнері өзінің тұғырында мығым тұр. Сондықтан өнерге деген іңкәр ілтипатымен сол саладан алыстамай, бүкіл ғұмырын ұлт мәдениетіне арнаған Әмір Мәжитовке тағзым етер едім» деген екен ол.Кешке жиналған көрермендерге өзінің алғаусыз рахметін жеткізген Әмірұлы Нүрпейіс ағамыз ата-ана алдындағы перзенттік борыштың бір өтеуіндей әкесінің соңында қалған рухани мұраларды насихаттауға тікелей өзі демеуші болып жатқанын айтты.Көп балалы отбасында күнкөріс қажетінен артылмайтын айлық жалақымен құлашты кеңге соза алмаған шығармашылық адамының «Шіркін-ай, пышақтың қырындай болса да кітабым шықса екен» деген әке арманын іске асырған ұлы Нұрпейіс Әмір Мажитовтің шығармашылығы топтастырылған екі бірдей кітабын шығарып, оқырмандар игілігіне ұсынды.Түйіндей келе айтарымыз, сан түрлі өнерді бір бойына түйістірген Әмір ағамыз атамекеннен алысқа ұзап шықпайақ асқақ өнерімен атақтыларға өзін мойындатқан екен. Өнер құдіреті дегеніміз осы.

Жаңақорғанда «Театр–ғұмыр» атты кеш өтті

<a href="https://kyzylorda-news.kz/">Kyzylorda-news.kz.</a> Арман Қырықбаев Президент әкімшілігінің коммуникациялар бөлімінің меңгерушісі болып тағайындалды. Бұл туралы Ақордаға сілтеме жасай отырып El.kz ақпарат агенттігі хабарлайды.<blockquote>Мемлекет басшысының өкімімен Арман Оразбайұлы Қырықбаев Қазақстан Республикасы Президенті әкімшілігінің коммуникациялар бөлімінің меңгерушісі лауазымына тағайындалды, - делінген мәліметте.</blockquote>Фото: gov.kz

Президент әкімшілігінің коммуникациялар бөлімінің меңгерушісі тағайындалды

&nbsp;<a href="https://kyzylorda-news.kz/">Kyzylorda-news.kz</a>&nbsp; Кез келген мемлекеттің тарихында архив қоры өте мұқият сақталады. Қаншама жыл өтсе де, шаң басқан құжаттың құндылығы мен маңыздылығы өміршеңдігін жоймайды. Негізінен, елімізде архив саласының қызметі жан-жақты жолға қойылған. Өткен ғасырдан сақталған құжаттар өз иесін тауып жатады. Қызылорда облысының мемлекеттік архиві КММ-ге қарасты Сырдария аудандық архиві филиалының мамандары өткен жылы біршама жұмыс атқарған. Өз кезегінде аталған салада жүзеге асырылған жұмыстарды саралау мақсатында филиал басшысы Жәнібек Сейловпен сұхбаттасқан болатынбыз.&nbsp; &nbsp; &nbsp;– Жәнібек Әлиасқарұлы, өзіңіз жетекшілік ететін ауданның архив саласында өткен жылы қандай жұмыстар атқарылды?&nbsp; &nbsp; &nbsp;– Негізінен, Қызылорда облысының мемлекеттік архиві КММ-ге қарасты Сырдария аудандық архиві филиалында 7 адам жұмыс жасайды. Жалпы, архив ісі жүйесін жетілдіруге, Ұлттық архив қорының сақталуын қамтамасыз етуге байланысты ҚР «Ұлттық архив қоры және архивтер туралы» Заңын, ҚР Үкіметінің және сол кездегі Мәдениет және спорт министрінің нормативтік құқықтық актілерін басшылыққа ала отырып, өткен жылдың 12 айында жоспар бойынша межелі міндеттер орындалды. Анығын айтқанда, Қазақстан Республикасының мемлекеттік архивтерінің жинақтау мен әлеуетті жинақтау дереккөздері болып табылатын мекемелер нормативтік құқықтық актілермен қамтамасыз етілді. Сонымен қатар жекелеген істердің талапқа сай қалыптасуына әдістемелік және тәжірибелік көмек көрсетілді. Өз кезегінде олардың байқау істерімен жұмыс жан-жақты жасалуда. «Құжаттардың бірыңғай электрондық архиві» ақпараттық жүйесіне аудандық архив филиалының істер номенклатурасы, жинақтау дереккөздері болып табылатын мекемелер тізімі, 139 қорлар тізімі, №1 қордан №139 қорға дейінгі тұрақты сақталатын және жеке құрам бойынша істер тізімдемесі, жинақтау дереккөздері бойынша 58 мекеменің байқау ісіндегі 116 парағы енгізілді. Бұның барлығы аудан өміріне тікелей қатысы бар маңызды құжаттар болып табылады. Біз қашанда құжаттардың жылдар бойы сақталуын қамтамасыз етеміз. Расында, 1988 жылдан бастап жұмыс жасап келе жатқан ауданның архив саласында 38168 құжат қоры сақталған.&nbsp; &nbsp; &nbsp;– ҚР Ұлттық архив қоры құжаттарының мемлекеттік есебін жүргізу, сақталуын қамтамасыз ету бағытындағы қызмет көрсету сапасы артып келе ме?&nbsp; &nbsp; &nbsp;– Бұл бағытта сала мамандары тиісті іс-шараларды жыл көлемінде жүзеге асырды. Мәселен, ҚР Ұлттық архив қоры құжаттарын мемлекеттік есепке алу және сақталуын қамтамасыз ету бағытында қор сақтау қоймаларында күнделікті жинақтау, құжаттар мен сөрелерді шаң-тозаңнан тазарту, ылғалдылық-температуралық күн тәртібін бақылауды үнемі іске асыра білдік. Құжаттардың физикалық жай-күйін жақсартуға қатысты 9 қордан 800 істің 6000 парағына қайта жөңдеу (реставрация) жұмысы жүргізілді. Оның ішінде, аталған қорлардың 500 істің мұқабасы қайта түптеліп, 800 іске шифровка басылды. Жазба қағаздары (ярлык) 315 болып орындалды. Р-44,47,54 қордан мәтіні өшуге айналған 35 парақ қайта қалпына келтірілді. Ал Р-32,33,34,34,35,36,37,38,39,40,41,42,43,44,45,46,47 қордың 1962 байламы, яғни 10225 іс-құжаты шаң-тозаңнан тазартылды. Есепті мерзімде архив қызметкерлеріне қор сақтау қоймасынан 6755 құжат қолға беріліп, қайта орнына қойылды.&nbsp; &nbsp; &nbsp;– Өткен жылы архив қорын толықтыру мен салалық жұмыстарды жетілдіру мақсатында маңызды іс-шаралар өткізілгені жөнінде кеңінен ақпарат берсеңіз?&nbsp; &nbsp; &nbsp;– Әрине, архив саласына қатысты тың жаңалықтар мен жобаларды көпшілікке таныстыру – тікелей міндетіміз. Өткен жылы аудан көлемінде архивтік анықтамалар, архивтік құжаттардың көшірмелерін немесе архивтік үзінділер беру» мемлекеттік қызметін көрсетуге қатысты Қағида талаптарын түсіндіру мақсатында 10 семинар ұйымдастырылды. Сонымен тақырыптық семинарлар тұрақты түрде өткізіліп тұрады. Әр ай сайын Заң аясында қолданылатын негізгі Қағидалар көпшіліке түсіндіріледі. Өз кезегінде аудан өмірінде өзіндік орны бар Ұлы Отан соғысының ардагерлері, еңбек адамдары, мәдениет және спорт майталмандарының құжаттары архив қорына қабылданады. Олардың тағылымды өмірі мен қызметтік жолына арналған тақырыптық кеш пен сан түрлі басқосу барысында жиналған жұртшылыққа кеңінен мағлұмат беріледі.&nbsp; &nbsp; &nbsp;– Архив қызметіндегі цифрландыру жүйесі қаншалықты тиімді екенін айта кетсеңіз...&nbsp; &nbsp; &nbsp;– Елімізде барлық сала кезең-кезеңімен электрондық жүйеге көшуде. Негізінен, «Цифрлық Қазақстан» мемлекеттік бағдарламасы аясында осыдан 11 жыл бұрын аудандық архив филиалы қорында сақтаулы тұрған құжаттарды сканерлеу арқылы электронды жүйеге көшіру жұмысы басталған. 2013-2023 жылдары аралығындағы архив құжаттарынан 24 049 сақтау бірлігі, яғни, 1 130 939 парақ сандық форматқа көшірілді. Осыдан 4 жыл бұрын «Электронды құжаттардың бірыңғай архиві» ақпараттық жүйесі іске қосылып, осы кезге дейін 3 540 істің 192 529 парағы ақпараттық жүйеге енгізілді. Сырдария ауданы бойынша «Е-Архив» ақпараттық жүйесіне аудан әкімдігі мен кент әкімдігі, мәслихат аппараты мен аудан әкімдігіне қарасты 8 бөлім, 13 ауылдық округ қосылған. 2023 жылы «Электронды архив» бағдарламасы арқылы архивтік құжаттарды цифрлық форматқа енгізу бойынша Р-41,42,43,44,45,46,47,48,54 қордағы 1965 істің 142344 парағы PDF форматына сканерленді және «Құжаттардың бірыңғай электрондық архиві» ақпараттық жүйесіне Р-32,33,34,41,42,43,44,45,46,47 қордағы 1008 істің 60678 парағы енгізіл­ді. Салалық министрліктің «Архивтік анықтамалар, архивтік құжаттардың көшірмелерін немесе архивтік үзінділер беру» мемлекеттік қызметті көрсету қағидаларын басшылыққа алып, жеке және заңды тұлғалардың әлеуметтік-құқықтық сипаттағы өтініштерін мерзімінде орындау мақсатында 2023 жылы аудандық архив филиалына барлығы 1164 өтініш түсті. Оның 754-не мерзіміне сәйкес қанағаттанарлық, 320-не қанағаттанарлықсыз, 90-і басқа архивтерге қайта жолданды.&nbsp;

Архив қызметіндегі жүйелі жұмыс

<a href="https://kyzylorda-news.kz/">Kyzylorda-news.kz.</a> 6 наурызда Испанияның Planeta de Agostini атты беделді баспасы Димаш Құдайбергеннің туындысынан алған шабытының нәтижесінде "Ғарыш дауыстары" атты жаңа мангасын басып шығарды, деп хабарлайды <a href="https://kaz.zakon.kz/madeniet-shou-biznes/6039541-ispaniyada-dimashty-shyarmashylyynan-shabyt-alan-suretsh-zhaa-mangasyn-basyp-shyardy.html">Zakon.kz.</a>"Voices of space" ("Ғарыш дауыстары") – 25 беттен тұратын фантастика жанрында жазылған туынды. Бұл – туабітті таңғажайып қабілеті – бірегей даусымен ғаламды өзіне еліктіріп, айналасына бақыт пен қуаныш сыйлайтын ерекше өнерлі адамдарға арналған туынды. Бұл туралы әншінің сайты хабарлады.Сурет: dimashnews.com

Испанияда Димаштың шығармашылығынан шабыт алған суретші жаңа мангасын басып шығарды

<a href="https://kyzylorda-news.kz/">Kyzylorda-news.kz.</a> Көктем айының шуаққа толы мерекесі – 8 наурыз Халықаралық әйелдер күніненде аудан әкімі Аманжол Оңғарбаев аудан ардагерлерімен бірге бірқатар асыл жанды арулардың отбасыларына барып, мерекемен құттықтады.Аудан басшысы алдымен 39 жастағы мүгедектігі бар бала күтуші Гүлмира Байменованың шаңырағын ат басын бұрды. Өз кезегінде аяулы ана құрмет көрсеткен аудан басшысына шынайы ризашылығын білдірді.Одан әрі, 82 жастағы жалғызбасты қарт әже Назду Керімованы төл мерекемен құттықтады. Аудан әкімі А.Оңғарбаев өз сөзінде «Қарттарымыз қазынамыз. Біз әрдайым сіздердің еткен еңбектеріңіз бен ел үшін жасаған қызметтеріңізді жадымыздан шығармаймыз. Бүгінгі өздеріңіз арқылы барша ауданның ақжаулықты аналары мен қыз-келіншектерді мерекемен құттықтаудамыз»,- деді. Арнайы құттықтай келген азаматтарға ризашылығын білдірген ардагер ана елдің амандығын тілеп, ақ батасын берді.Мұнан соң, І топ мүгедектігі бар Несіпбике Жақсыбаеваның үйіне барған аудан басшысы ардақты жанға ыстық ықыласы мен жылы лебізін білдірді.Фото: Арал ауданының әкімдігі

Арал ауданының әкімі аналарды төл мерекемен құттықтады

<a href="https://kyzylorda-news.kz/">Kyzylorda-news.kz.</a> 8 наурыз – Халықаралық әйелдер күні мерекесінде аудан әкімі Аманжол Оңғарбаев аудандық мәдениет үйінде өткен салтанатты шарада Арал өңірінің нәзік жандыларын мерекемен құттықтады.Алдымен мерекелік кештің шымылдығы әйел-ананың қадір-қасиетін ұлықтайтын сахналық қойылыммен түрілді.Мұнан соң, аудан басшысы сөз алып, барша әйелдер қауымына ақжарма лебізін арнады.<blockquote>«Шын мәнінде адамзат баласы үшін анадан құдіретті, анадан ардақты, анадан аяулы ешкім жоқ. Сондықтан әлемдегі ең жоғары мадақ та, құрмет те ару-аналарға арналады. Бүгінде ауданымызда 2 мыңнан аса алтын құрсақты аналарымыз болса, оның 113-і батыр ана. Ал 640-і Алтын алқа, 1226-і Күміс алқа иегерлері. «Әйел – бір қолымен бесікті, екінші қолымен әлемді тербейді» деген тәмсілдің астарында әйел адамның кез келген ауқымды істерге араласып, үлкен нәтижеге қол жеткізе алатынын дәлелдейтін терең мағына жатыр. Қазақ әйелі – елдіктің, қазақ әйелі – биіктіктің, қазақ әйелі – мәңгіліктің өлшемі. Әйел – өмір тірегі ғана емес, әйел – өмірдің өзі. Ауданымыздағы мемлекеттік қызмет саласындағы 36 пайызын, білім беру саласындағы 65 пайызын, медицина саласының 83 пайызын, мәдениет саласындағы 80 пайызын, өңірдегі кәсіпкерлердің 47 пайызын әйел азаматшалар құрап отыр. Сонымен қатар Аралдың ақ алтыны атанған ас тұзы мен су маржаны балық өндірісінде, темір жол мен ауылшаруашылығы, құқық қорғау саласында және бұқаралық ақпарат құралдарында еңбек етіп жүрген асыл апа-қарындастарымыз аз емес. Аяулы асыл жандар! Сіздер арқылы Арал халқының барша аруларын әсем мерекемен құттықтап, ыстық ықыласым мен ақжарма лебізімді білдіргім келеді. Сіздер барда сәбилеріміздің жүзінен күлкі кетпей, ер-азаматтарымыз еңсесін тік көтеріп жүре бермек!» – деді, аудан басшысы.</blockquote>Салтанатты кеште түрлі салада елеулі қызмет етіп, белсенділігімен ерекшеленіп, үздік деп танылған бірқатар аяулы аруларға Облыс және аудан әкімінің құттықтауы табысталды.Мерекелік шара көрерменге шат-шадыман көңіл-күй сыйлайтын концертпен жалғасты. Жергілікті аудан өнерпаздары мен мерекелік кешке арнайы келген эстрада жұлдызы Алмасхан Насыров әсем ән шырқады. Мың бұралған бишілердің өнері де көктем мерекесінің ажарын аша түсті.Фото: Арал ауданының әкімдігі

Аралдық арулар марапатталды

<a href="https://kyzylorda-news.kz/">Kyzylorda-news.kz.</a>&nbsp;&nbsp; &nbsp;Жуырда Тасбөгет кентінің әкімі Айдын Тыныштықбай БАҚ өкілдеріне берген брифингте жыл бойы атқарылған жұмыс барысы мен алдағы атқарылатын жұмыстарға тоқталды.Кент әкімінің айтуынша, өткен жылы инфрақұрылымды дамыту бойынша мемлекеттік бюджет, демеуші және инвестиция есебінен ауқымды жұмыстар атқарылған. Нақтырақ айтсақ, ұзындығы 82 шақырымды құрайтын 52 көшенің 41 көшесі жөндеуден өткен. Оның ішінде Сабалақ саяжайындағы 18 көше мен кенттегі 21 көшенің белгіленген бөліктеріне қиыршық тас төселіп, 2 көшеге асфальт төселген. Ал 7 көшеге жарық бағаналары орнатылса, «Еңбек» және «Өркендеу» саяжайындағы 3 көшеге демеушілер өз есебінен жарық бағаналарын орнатқан. Сонымен қатар аймақ басшысының қолдауымен кент аумағында құны 542,1 млн. теңгені құрайтын дене шынықтыру-сауықтыру кешені пайдалануға берілді.&nbsp;<blockquote>– Соңғы жылдары кентте кәсіпкерлікті дамыту бағытындағы мемлекеттік бағдарламаларға қатысу қарқыны артып келеді. Сондықтан биылғы жылы да тұрғындарға мемлекеттік бағдарламаны пайдалана отырып, кәсіп ашуға, кеңейтуге кеңес берілді. Нәтижесінде он екі айдың ішінде алпыс жеті тұрғын өз жобасын қорғап, 400,9 млн теңге көлемінде қаражат иеленді. Бүгінде кентте 1644 кәсіпкер бар. Олар өздерінің &nbsp;қызметін табысты жүзеге асыруда, – деді Тасбөгет кентінің әкімі Айдын Маратұлы.</blockquote>Мұнан соң кент әкімі биыл атқарылатын жұмыстарға тоқталды.– Өздеріңіз білетіндей, кентке қарасты Сабалақ саяжайын «көгілдір отынмен» қамтамасыз ету мәселесі де басты назарда. Қазіргі таңда «Досстройпроект» ЖШС мекемесінің демеушілігімен Сабалақ саяжайына «көгілдір отын» тарту жұмыстарының жоба-сметалық құжаттары әзірленді. Нәтижесін күтіп отырмыз, – деді Тасбөгет кентінің әкімі.Биыл Тасбөгент кентінің бюджеті 345,9 млн теңге болып бекітілген. Алдағы уақытта Е. Ертуғанов көшесінің Сапарбаев пен Баймағанбетов көшелері &nbsp;аралығына абаттандыру жұмыстары жүргізілсе, Исмайлов көшесіндегі жарық бағанасының орнатылмай қалған бөліктеріне жарықшамдар қойылмақ. Ал халықтың сұранысы бойынша кенттегі&nbsp; ұзындығы 12,7 шақырымды құрайтын 6 көшеге жарық бағаналарын орнату бойынша жоба сметалық құжаттары әзірленген.&nbsp; Сондай-ақ &nbsp;Ғ.Мұратбаев (Сапарбаев қиылысы) және Ә. Молдағұлова (Сейтпенбетов қиылысы) көшелеріне 4 аялдама мен Сабалақ саяжайының орталық көшесіне екі аялдама орнатылады. Одан бөлек кенттегі әлеуметтік нысандар орналасқан алты көшеге жаяу жүргіншілер жолын салуға және Сабалақ пен Еңбек саяжайындағы көшелерге жарық бағаналарын орнату мақсатында тиісті құжаттар әзірленуде.

Айдын Тыныштықбай: Көгілдір отынмен қамтамасыз ету басты назарда

&nbsp;<a href="https://kyzylorda-news.kz/">Kyzylorda-news.kz</a> Сырдың елі – өнердің киелі ордасына айналған қасиетті өлке саналатыны күллі жұртқа мәлім. Өткен ғасырдан жыр-дастан мен әуелеген әннің алтын ұясы саналатын бұл мекен өнерден кенде болған еместігін жақсы білеміз. Талантымен талайды таңқалдырған мәдениет майталмандары қазақ өнерінің көсегесін көгертуге барын салып келеді. Өз кезегінде жарты ғасырлық тарихы бар «Ритм» халықтық вокалды-аспапты ансамблінің аудан өмірінде қалыптасқан ізгілікті жолы бар екеніне әбден көз жеткізгенбіз. Ең алғаш ансамбль құрамында өнер көрсетіп, зор жетістікке жетуіне айрықша ықпал еткен Серік Байдәулетовпен шығармашылық ұжымның жұмысы жөнінде сұхбаттасудың сәті түсті.&nbsp;– Серік Ибадуллаұлы, 50 жылдан аса уақыт бойы жергілікті халықтың ыстық ықыласына бөленіп келе жатқан «Ритм» халықтық вокалды-аспапты ансамблі ең алғаш қалай құрылды? Құрамында кімдер болды?– «Ритм» халықтық вокалды-аспапты­ ансамблінде жастайымнан өнер көрсетіп келе жатырмын. Осыдан 52 жыл бұрын ауданымызда жергілікті сазгер Рамазан Тайманов, Оспан Қожақов, Мәлік Серікбаев сынды ағаларымыз Тереңөзек кентіндегі бұрынғы клубта аспаппен өнер көрсетуді бастағаны сол кездегі жұртшылыққа жақсы таныс. Сол уақыттан бастап халықтың жүрегінен орын алған аспаптар ансамблінің негізі қаланған болатын. Кейіннен, Рамазан Тайманов ағамыз Отан алдындағы борышын өтеуге әскерге аттанған уақытта ансамбль жұмысын жолға қою маған жүктелгендігін абыроймен айта аламын. Облыс аумағында халықтық вокалды-аспапты ансамбльдер құрыла бастаған мезетте біз де өнерімізді көпшілікке таныта бастаған болатынбыз. Әлі есімде 1975 жылы «1 маусым – Халықаралық балаларды қорғау күні» мерекесінде репертуарымызды толықтырып, тыңдарман қауым алдында өнер көрсетіп, көпшіліктың ыстық-ықыласына бөлендік. Әр жылдары ансамбль құрамында талантты, өнерлі аға буын өкілдері мен жастар өнер көрсетіп отырды. Мәселен, Бекет Алданазаров, Мұхан Қаушов, Кюри Каримов, Марат Олжабаев, Әлтай Әбдіреев, Ғалым Бакиров, Бауыржан Якудаев, Бақыт Абдураймов, Ораз Ерғалиев, Володя Тен, Марат Шамшиев сынды азаматтар аспапта ойнау өнерімен дараланды. Әрқашан қабілеті зор, музыкалық білімі бар азаматтар құрамның жаңарып отыруына қиындық соқтырмаған еді.– Ансамбль атауының қойылу тарихын бір сәтке еске түсірсек…– Өз кезегінде халықтық вокалды-аспапты ансамбль мүшелері жанды дауыста ән шырқап, әнсүйер қауымның назарын аударта бастаған тұста өзінің атауын бекіте алдық. Бір күні Әлтай Әбдіреев екеуміз ұзақ ойлана келіп, «Ритм» деген атауға тоқталған болатынбыз. Негізінен, ритм музыканың ырғағы саналады. Шығармаға жан бітіріп, барлық құрылымын сақтап тұратын ритмді ансамбліміздің ресми атауына айналдыра алғанымызға қуаныштымыз.– Өнер ұжымының репертуары жөнінде кеңінен тарқатып айтып бересіз бе?– Біздің әндеріміз тыңдарманның жүрегінен жол тауып, өміршеңдігімен ерекшеленіп келе жатқанына ел куә. Жалпы, ескі әндерді жаңғыртып, қазақ сазгерлерінің құнды туындыларын жарыққа шығарумен айналысаыз. 2006 жылы «Естен кетпес сол әндер» тақырыбындағы концерттік бағдарламамызда өткен ғасырдың 70-80 жылдары кеңінен халыққа танылған шығармаларды орындаған едік. Қазіргі уақытта 20-дан аса ән бар қоржанымызда. Оның ішінде, ансамбль мүшелері өзімнің авторлық 6-7 әнімді шырқап жүр. Сонымен қатар шетел әндерін айтамыз. 2009 жылы Ресей елінде өткізілген халықаралық байқауға қатысып, «Гран при» жеңіп алған болатынбыз. 42 ансамбль ішінен үздік шыққан кезімізде «Шыңдалу» атты рок балладасын орындаған едік.– «Ритм» халықтық вокалды-аспапты ансамбліне ұзақ жыл бойы жетекшілік еттіңіз. Ұжымды ұстап тұру қиын болды ма?– 42 жыл ансамбль жұмысын үйлестіруге табандылық таныта білдім десем, қателеспеймін. Соңғы 6 жылда жас әнші Дастан Палмахов аға буын бастаған жұмысты жалғастырса, қазіргі уақытта жергілікті сазгер Марат Қошықов ансамбльге жетекшілік етіп келеді. Әрине, тоқырау жылдары өнер ұжымын ұстап тұруға едәуір ауыртпалық еткені. Жыл сайын республикалық облыстық, аудандық байқауларға қатысып, жүлделі болуға ұмтылып келеміз. Халықтық атақты осыдан 11 жыл бұрын алған мезетте қуанышымызда шек болмады. Негізінен, ансамбль мүшелерінің сапалы әрі сәтті өнер көрсетуі – аспаптарға байланысты. Аспаптың күйін келтіріп, кәсіби тұрғыдан ойнап шығудың өзіндік қиындығы бар. Қай кезде де, аспаптың дауысына, ойналу ырғағына аса мән береміз. 1985 жылы, яғни, аумалы-төкпелі кезеңде мәдениет саласына басшылық жасаған Алма Бақтиярова апамыз Германия елінен «Вермона» музыкалық аппаратын алдыртып берді. Кейіннен, «Оңаша» ойын-сауық отауымен бірге елді мекендерді аралап, ауыл шаруашылығы құрылымдарының мамандарына концерттік бағдарлама ұсынған едік.– «Ритм» халықтық вокалды-аспапты ансамблінің қазіргі уақытта атқарып жатқан жұмысына тоқталып өтсеңіз.– Осы күні ансамбль құрамында Махмұд Сақтапов, Жәнібек Әбдіреев, Дархан Разақов сынды азаматтар бар. Жақында аудандық мәдениет үйінде «Сазға толы сырлы әндер» тақырыбында шығармашылық кешімізді өткізген едік. Сонымен қатар өткен жылы «Ритм» халықтық вокалды аспапты ансамблінің құрылғанына және шығармашылығына 50 жыл толуына орай «Сыр әуендері» атты облыстық вокалды аспапты ансамбльдер байқауы ұйымдастырылды. Біз қашанда өнерді жоғары бағалап, шығармашылығымызды дамыта береміз деп сеніммен айта аламын.– Сұхбатыңызға рақмет!

Сырдариялық ансамбль ескі әндерді жаңғыртқан

<a href="https://kyzylorda-news.kz/">Kyzylorda-news.kz</a> &nbsp;Соңғы мәліметтерге сәйкес Сырдария ауданы бойынша 14-35 жас аралығындағы барлығы 11727 жас бар екен.&nbsp;Бұл шамамен аудан халқының 30 пайызын құрайды. Есепті мерзімде 794 жас жұмыс сұрап, жұмыссыздыққа тіркелсе, оның 207-сі тұрақты жұмысқа, ал 8-і әлеуметтік жұмысқа орналасқан. Сонымен қоса 141 жас жастар тәжірибесіне және 116 жас қоғамдық жұмысқа жолдама алған. Сондай-ақ&nbsp;сәйкесінше ауданда 675 жас кәсіпкер тіркелген.&nbsp; &nbsp; &nbsp;Жалпы ауданда жастар саясаты мәселесімен тікелей аудандық қоғамдық даму бөлімі айналысады. Бөлімге қарасты аудандық жастар ресурстық орталығы да тиісті жұмыстарды сәйкесінше ұйымдастырып, үйлестіреді. 2017 жылдан бастап жұмыс істеп келе жатқан орталықтың негізгі басты мақсаты –&nbsp;жастар ұйымдарын қолдау мен дамыту, жастарға қызмет көрсету болып табылады. Бүгінгі күні аталған орталықта директорымен қоса есептегенде 7 қызметкер жұмыс істейді.&nbsp; &nbsp; &nbsp;Аудандық жастар ресурстық орталығы мекемесінің жұмысын үйлестіруге жергілікті бюджеттен 21 599,0 мың теңге қаржы бөлінген. Бұдан бөлек қоғамдық даму бөлімінің «Жастарға патриоттық тәрбие беру және жастар арасында ұлттық құндылықтарды насихаттау әлеуметтік қызметін ұйымдастыру» мемлекеттік әлеуметтік тапсырысы аясында да қаржы қарастырылған. Бұл бағытта бөлінген қаржы көлемі 3 445,0 мың теңге болса, келісім шарттағы сомасы 2 741,3 мың теңгені құрайды. Әлеуметтік жоба аясында жыл басынан бері 9 іс-шара ұйымдастырылған. Атап айтқанда, форум, фестиваль, спорттық сайыс, кездесу, жайдарман ойыны секілді жастардың қызығушылығын арттыратын іс-шаралар бар.<blockquote>&nbsp; &nbsp; &nbsp;– Аудан әкімі жыл сайын мемлекеттік жастар саясатын жүзеге асыру бойынша ұйымдастырылатын іс-шаралар жоспарын бекітеді. Жоспар былтыр да бекітілген. Соның аясында сол уақыттан бері 82 іс-шара ұйымдастырылып, оған 4274 жас қатыстырылды. Сонымен қатар жастар арасындағы жұмыссыздық деңгейін төмендету, кәсіпкерлікті дамыту мақсатында кеңес беру жұмысы қолға алынып, «Мүмкіндіктер алаңы» кеңес беру жобасы аясында 14 рет кездесу, «Tulga bol» жылжымалы жәрмеңкесі 14 рет ұйымдастырылды. Сондай-ақ саламатты өмір салтын қалыптастыру мақсатында «Сырдария барысы», көкпар, «Жеңімпаз бол» денсаулық фестивалі өткізілді, – дейді аудандық жастар ресурстық орталығының директоры А.Ахметова.</blockquote>&nbsp; &nbsp; &nbsp;Жастар саясаты саласында жетістіктермен қатар мәселелер де бар екені жасырын емес. Мәселен жастар арасындағы құқықбұзушылық күн тәртібінен ешқашан түспейді. Бұл бағытта аудандық полиция бөлімімен бірлесе кешенді профилактикалық іс-шаралар тұрақты түрде ұйымдастырылуда. Әсіресе жастардың түнемелік жүруі өзекті. Сондықтан сала мамандары ата-аналарға кәмелеттік жасқа толмаған балаларын бақылауда ұстауды сұрайды. Негізі жасөспірімдердің қызығушылығын ерте анықтап, түрлі үйірмелерге қатыстырудың, еңбекке баулудың маңызы зор. Осы ретте еңбексүйгіш жастардан құрылған еңбек бригадаларының жұмысын көпке үлгі етуге болады. Қазір ауданның Айдарлы, Аманкелді, Бесарық, Жетікөл, Шіркейлі, А.Тоқмағанбетов ауылдарында жастардың еңбек бригадасы құрылып, 150-ге жуық жас еңбек етіп жатыр. Олар егін науқанында бау-бақша өнімдерін егіп, өз нәпақасын тауып жүр.&nbsp; &nbsp; &nbsp;Ауданда ерікті жастардың да саны артып келеді. Ерікті жастардың бастамасымен қайырымдылық акциялары көптеп өткізілуде. Жалғызбасты, көпбалалы аналар мен қарттардың үй-жайларына ерікті жастардың қатысуымен тазалық жұмыстары жүргізілуде. Ал «Жасыл ел» еңбек жасағына биыл аудан бойынша 220 жас тартылып, олар ауданды абаттандыру жұмыстарына атсалысты. Нәтижесінде Сырдария ауданының «Жасыл ел» еңбек жасағы үздік деп танылып, облыс бойынша І орынды иеленді. Фото: freepik

Қазақстан және Қызылорда облысының жаңалықтары: Мәдениет