<a href="https://kyzylorda-news.kz/">Kyzylorda-news.kz</a>&nbsp; «Әннің де естісі бар, есері бар, тыңдаушының құлағын кесері бар».&nbsp;Осы есті әндердің қатарына ең алдымен классикалық әуендерді жатқызсақ, ешкім дауласпасы анық. Өйткені, медицина сан ғасырдан бері нотасы өзгермеген классикалық туындылардың тыңдарманға ерекше көңіл-күй, жан дүниеге тыныштық сыйлайтынын дәлелдеген. Классикалық музыка әлемінде, әсіресе, скрипкашының шоқтығы биік.Облыстық филармония жанындағы камералық оркестрдің көркемдік жетекшісі, Мәдениет саласының үздігі Анар Жаңбырбаеваның шәкірті Ұлпан Шаншархан Дубайда өткен халықаралық скрипка байқауында жүзден жүйрік шығып, жүлделі ІІ орынды иеленді. 19 жасар скрипкашы арудың айтуынша, байқау 16-19 жас арасындағы жас скрипкашылар арасында өткізілген.<blockquote>– Дубайдағы халықаралық музыканттар байқауына 24 адам қатысты. Конкурстан бөлек мұнда қатысушылардың барлығы шеберлік сағатынан өтіп, ансамбль концерттеріне қатысты. Екі аптаның ішінде сан түрлі елден келген музыканттармен өзара тәжірибе алмасып, қабілетімізді ұштай түсуге, әрі қарай да үздіксіз ізденуге жігерленіп қайттық.Өзім скрипка аспабын 7 жасымнан бастап тартып келемін. Ата-анамның өнерге қатысы жоқ. Отбасымызда мен ғана музыкантпын. Анам ұстаз болса, әкем құрылысшы. Музыка саласын таңдауыма себепкер болған ұстазым Анар Асанқызына айтар алғысым шексіз! – дейді скрипкашы.</blockquote>Өз кезегінде ұстаз да шәкіртімен мақтанатынын айтып өтті.<blockquote>– Ұстаз үшін шәкірт өз баласымен тең. Сондықтан қай байқауда бақ сынамасын, шәкіртіміз сахнаға шықса, тақымымызды қысып отырамыз. Ұстазға шәкіртінің жеңісінен артық не керек?! Ерекше қуаныштымын.Классикалық музыка – ешқашан мәнін және тыңдарманын жоғалтпайтын өнер саласы. Оны теледидардан, плейерден тыңдасаңыз, түсінбеуіңіз мүмкін. Арнайы залға келіп тыңдасаңыз, жан рахатына бөленесіз. Өйткені классика ешқашан ескірмейді.Классикалық музыканың тұрақты тыңдарманына айналу үшін оның маманы болу, арнайы білім алу міндетті емес. Бастысы, орындалып жатқан шығарманың қысқаша тарихымен танысып алуыңыз керек. Қалғаны музыканттың шеберлігіне байланысты дер едім, – дейді Анар Асанқызы.</blockquote>&nbsp;

Классика жанға шуақ, көңілге қуат сыйлайды

&nbsp;<a href="https://kyzylorda-news.kz/">Kyzylorda-news.kz</a> &nbsp;Бүгін «Мәдениет және ұлттық салт-дәстүр» күнінде С.Айтбаев атындағы көркемсурет галереясында Қазақстан Суретшілер одағының мүшесі, креатив-суретші Даулетбек Тойшыбаевтың “Kilem Аrt” атты заманауи өнер көрмесінің ашылуы өтті.Шарада басқарма басшысы Мира Қазбекова және Қазақстан Суретшілер одағының мүшесі, Қазақстан Суретшілер одағының Қызылорда облыстық филиалы төрағасы Темірбек Сағымбаев сөз сөйлеп, өнер иесін құттықтады.Көрмеде қазақтың белгілі аналары мен арулары бейнеленген 12 кілем-картинасы көпшілік назарына ұсынылды.Айта кетейік, көрме 31 наурызға дейін жалғасады.

“KilemАrt” заманауи өнер көрмесі ашылды

&nbsp;<a href="https://kyzylorda-news.kz/">Kyzylorda-news.kz</a> &nbsp; Ұлыстың Ұлы күні Наурыз мейрамын тойлаудың жаңа форматы Наурызнама онкүндігі жалғасын табуда. Осыған орай, бүгін «Мәдениет және ұлттық салт-дәстүр күні» аясында Шиелі ауданындағы Ә.Шорабаев орталық базарында «Мәдениет және руханият – ұлт мәйегі» атты мерекелік концерт өтті.Шара барысында аудан тұрғындарына әсем әндер шырқалып, спорттық ойындар ойнатылып, сыйлықтар табысталды.

Шиеліде мәдениет және ұлттық салт-дәстүр күні тойланды

<a href="https://kyzylorda-news.kz/">Kyzylorda-news.kz</a> &nbsp; Наурызнама онкүндігінің үшінші күні - Мәдениет және ұлттық салт-дәстүр күні. Соған сәйкес бүгін Қазалы қаласында “Салт-дәстүрім - байлығым” атты шара ұйымдастырылып, қолөнер бұйымдарының көрмесі өтті.Шараны Қазалы қаласының әкімі Қайрақбай Орынбасаров ашып, көпшілікті көктемнің шуақты күндерінде кеңінен насихатталып жатқан мерекемен құттықтап, лебізін білдірді.Мұнан соң қолөнер бұйымдарының көрмесін тамашалап, көрмеге қойылған бұйымдарға оң бағасын берді.Кеште ерекше қойылымдар сахналанып, әжелер ансамблі әуеле ән салды.

Қазалыда қолөнер бұйымдарының көрмесі өтті

<a href="https://kyzylorda-news.kz/">Kyzylorda-news.kz</a> &nbsp; &nbsp;«Көне дәстүр күмбезі» ұлттық салт-дәстүрлер фестивалін Жалағаш ауданы Бұқарбай батыр ауылдық мәдениет үйі мен М. Шәменов ауылдық мәдениет үйі жалғады. Бұқарбайлық өнерпаздар Дәуімбай елді мекеніндегі рәміздер аллеясында «Құттық» дәстүрін қойылымдарына арқау етсе, Шәменов ауылынан келген өнерпаздар орталық алаңда «Танабау» ұлттық салт-дәстүрін сахналады.«Құттық» – келін түсірген үй құда-құдағиларын аттандырған соң орындалатын дәстүр. Бұл дәстүр бойынша ауылдың оң жақта отырған бойжеткендері келіп, «құтты болсын» айтып, арнайы дәм әкеліп, сый жасайды. Тиісінше қыздар өздеріне лайықты әшекей немесе ыдыс-аяқтан сый сұрайды. Түсінгеніміздей, бұл дәстүр «құтты болсын», «құт әкелсін» деген ниеттен, ізгі ойдан туған.«Танабау» – танабау тағуды бала ержетіп, тірлікке жарап, үлкен көмек бере бастаған сәттен бастайды. Яғни, ұл бала алғаш рет әкесіне, қыз бала анасына ілесіп, түрлі жұмысқа қолғабыс етіп жүргенін көрген жақындары, туған-туыстары мен көрші-қолаңдары «Ұл-қыздарың қолғабыс етуге жарапты, шаруа атқаруды сеніп тапсыра берсең болады екен» деп балаға түйме-тана, білезік тағы жібереді. Кейде оны көпшіліктің атынан немесе туыстарының атынан бір кісі арнайы барып тағады.Салт бойынша «танабау» тағылған баланың ата-анасы да өз кәдесін жасауы тиіс.«Бұқарбай батыр ауылдық мәдениет үйі», «Шәменов ауылдық мәдениет үйі» желісі үзіліп бара жатқан осы салт-дәстүрлерді қайта жаңғыртып, ыстық ықыласқа бөленді.&nbsp;

Жалағашта көне дәстүр қайта жаңғырды

&nbsp;<a href="https://kyzylorda-news.kz/">Kyzylorda-news.kz</a> &nbsp; Облыс әкімі Нұрлыбек Нәлібаев Корея Республикасы Чоллабук-до провинциясы Халықаралық ынтымақтастық агенттігінің президенті Ким Дэ Сик бастаған делегациямен кездесті.Аймақ басшысы екі ел арасында жоғары деңгейдегі тұрақты байланыстар мен ерекше достық қарым-қатынас орнағанын атап өтіп, делегация сапарының жемісті әрі нәтижелі болуына тілектестік білдірді.<blockquote>«Чоллабук-до провинциясы Кореяның басты ауыл шаруашылық аймағы ретінде бізге аса қызықты. Егін шаруашылығына озық технологияларды енгізу, «ақылды ферма» және замануи жылыжайлар салу, ауыл шаруашылығы өнімдерін терең өңдеу саласында тәжірибе алмасып, бірлескен жаңа жобаларды жүзеге асыруды ұсынамыз. Біздің өңірлеріміздің экономикалық бағыты ұқсас. Қызылорда облысы еліміздегі күріш пен ас тұзының 90%-дан астамын өндіреді, сондай-ақ балық пен мал шаруашылығы да дамыған. Осы ретте, салаға инновациялық әдістерді енгізу үшін кореялық тәжірибені зерттегіміз келеді. Жаһандық климаттың өзгеруі салдарынан су тапшылығы орын алуда. Құрғақшылыққа төзімді және тиімділігі жоғары, аймақтың климатына сай, өсу мерзімі қысқа күріштің жаңа сорттарын шығару мақсатында корей ғалымдарымен бірлесіп жұмыс жасауға ниеттіміз», – деді Нұрлыбек Машбекұлы.</blockquote>Мұнан бөлек, облыс әкімі аймақта тәулігіне 102 тонна тыңайтқыш өндіретін кәсіпорын жұмыс жасайтынын атап өтіп, осы бағытта әріптестік орнатуды ұсынды. Мекеменің тыңайтқышты экспорттауға мүмкіндігі жоғары және дайын.Ким Дэ Сик облыс әкіміне ризашылығын білдіріп, өзара тиімді әріптестікті әрі қарай нығайтуға ниетті екенін жеткізді.Айта кетейік, Сыр өңіріне жұмыс сапары барысында Корея Республикасының делегациясы қайта жаңғыртудан өткен Хон Бом До мемориалдық кешенімен танысып, Қорқыт ата атындағы Қызылорда университетінің ректорымен кездеседі және өңірдегі бірлесіп жүзеге асыратын жобалармен танысады деп жоспарлануда.Еске салсақ, Нұрлыбек Нәлібаев өткен жылдың мамыр айында облыс делегациясымен бірге Сеул, Тэджон және Чонджу қалаларында іссапармен болып, сапар нәтижесі бойынша бірқатар бастамалар қолға алынды. Сол жолы Тэджон қаласы және Чоллабук-до провинциясының басшыларымен, әлемдік деңгейдегі университет президенттерімен кездесулер өткізіліп, бірқатар келісімдерге қол жеткізілді.Бірлескен жұмыстардың нәтижесінде өткен жылдың қараша айында Қорқыт ата университетінің базасында СеулТех университетінің жасанды интеллект және информатика жоғары мектебі ашылды.Одан бөлек, Чоллабук-до провинциясының Халықаралық ынтымақтастық агенттігі мен Қызылорда облыстық ауыл шаруашылығы басқармасы арасында өзара ынтымақтастық туралы меморандумға қол қойылды.Фото: Қызылорда облысы әкімінің баспасөз қызметі

 Облыс әкімі Чоллабук-до провинциясының өкілдерімен кездесті

<a href="https://kyzylorda-news.kz/">Kyzylorda-news.kz</a> &nbsp;Жазушы, журналист, документалист, ҚР Мәдениет саласының үздігі, ҚР Ақпарат саласының үздігі, Қазақстан Жазушылар одағының мүшесі Қанат Тілеуханның “Кешірші…” драмасы алғаш рет Сыр сахнасында сахналанды.Спектакльдің негізгі мазмұны Ғазиз бен Айзат есімді отбасылық жұптың бала сүйе алмай, бірнеше жыл сәби аңсап сол аралықта берілген сынаққа бірде сынбай күрессе, бірде қолдан кеткен қателікке өкінсе де, өкірсе де, өтінсе де өзгермейтіндей көрінеді.. Төрт қабырға ішіндегі құбылыс сырттағыларға байқалмайды да. Тек екеуге аян.&nbsp; Ер мен әйелдің ойлауы да, болмысы да бір арнаға тоғыспайды.&nbsp; Бұл - заңдылық! Әйел жанын ұғып, сезімімен санасып, керексіз кикілжіңдерді көбейтпей, көңілдің кілтін тапсақ, ажырасудың алдын алмақпыз! Кешірімге….кеш емес…Спектакльдің режиссері театрымыздың талантты артисі Қанат Архабаев. Қанат осы уақыт аралығында театр репертуарындағы Қ.Жүнісовтің “Love is…” комедиясын, А.Кашьяптың «Кім?» мистикалық триллерін, И.Сапарбайдың “Ауылдан келген ару” қойылымын қойып, шыңдалып жүрген талант иесі. Қанат Архабаев өзі режиссер әрі басты рөлдігі Ғазизды сомадаса ал, &nbsp;жарының рөлінде өмірдегі әрі өнердегі жары, актриса Бибідана Мақсұт. Диана рөлінде Жаухар Еркінова.19.00 және 21.00-де қойылған қойылымға келген көрермен спектакльді ерекше ықыласпен қабылдап, көздеріне жас алып өмірдің нақ өзін спектакль арқылы жеткізген өнер иелеріне зор қошемет білдірді.

“Кешірші…” драмасы алғаш рет Сыр сахнасында сахналанды

<a href="https://kyzylorda-news.kz/">Kyzylorda-news.kz</a> Шиеліде "Көрісу күні" кең көлемде атап өтілді. Табиғат жаңарып, көктем шуағы жер бетін мейірімге бөлеген шақта тойланатын бұл күн – қытымыр қыстан аман шыққан халықтың бір-біріне жақсылық тілеп, ақ ниетпен қол алысып, төс қағысатын мерекесі. Наурыз тойының кіріспесі саналатын Амал мерекесінде адамдар барлық өкпе-ренішін ұмытып, жаңа жылды жаңа көңілмен бастауға тырысады. Көрісу – қазақ халқымен бірге жасап, ұмытылмай келе жатқан дәстүрлердің бірі. Бүгінде бұл мереке еліміздің түкпір-түкпірінде кең көлемде атап өтіледі. Әр үй дастарханын дәмді асқа толтырып, өзара құттықтасып, думандатады. Ендеше, көктемнің мерейлі күні берекесімен келсін. «Амалға» аман жетуіңізбен!Шежірелі Шиелі өлкесі де Көрісу күнін тойлауды бастап кетті. Жүздеріне күлкі үйіріліп, қазақы нақышта қамзол киіп, оюлы шапан жамылған аудан жұртшылығы бейсенбі күні аудандық мәдениет үйінде ұйымдастырылған&nbsp;«Бірлігі мен тірлігі үйлескен Амал күні» атты мерекелік іс-шарада бас қосты. Ерекше салтанатпен, ұлттық үлгіде безендірілген киіз үйдің астында бір-бірімен қос қолдасып, төс қағыстырып, игі тілектерін жаудырып жатты. Төр жақта молшылықтың белгісін көрсетіп, түрлі дәмнен ақ дастархан жайылса, бір бұрышта ақ жаулықты әжелер қолмен күбі пісіп тұр. Ал қазақилықтың иісін сездіріп, жанарына жылу жинаған қалың жұрт татулық пен тұтастықтың бейнесі іспетті. Сонымен, көненің ізін жалғаған көнермес салт-дәстүрдің көрінісі дәл осы жерде қайта жаңғырды.Амал мерекесі айнала гүлденіп, көгалдана түссін деген ниетте жерге ағаш отырғызудан басталды. Табиғат-Анадан нәр алған жас шыбық Мәдениет үйінің алдында бой көтерді. Ал бір топ өнерпаздың қазақтың қара домбырасымен шырқаған жарапазаны бар назарды жаулаған думанды тойдың шымылдығы болды.Мерекелік жиынның алғы сөзін аудан әкімі Нұржан Ахатов алып, қонақтарды Көрісу күнімен құттықтады.– Көрісу күні – қыс мезгілінен аман шыққан халықтың жаңа жыл алдында тойлайтын үлкен мерекесі. Бұл күні адамдар бір-біріне деген реніш пен араздықтың бәрін ұмытады. Сондықтан бүгінгі мереке – ағайын арасындағы бірлікті берік қылып, сүйіспеншілікке бөлейтін тамаша дәстүр.Өзімізге белгілі, биылдан бастап Мемлекет басшысының ұсынымымен еліміздің барлық өңірлерінде Наурыз мейрамы «Наурызнама» онкүндігі негізінде тойланады. Қасиетті Рамазан айымен тұспа-тұс келіп жатқан бұл шаралардың барлығы осы мерекенің маңызын екі есе арттыратыны анық. Халық бірлігіне шақыратын бұл күн аудан тұрғындарына шаттық пен қуаныш әкелсін. Әрбір отбасында молшылық болсын. Он екі айдың сұлтаны болған Рамазан айы жақсылығымен келсін. Наурызға ақ көңілмен, таза пейілмен қадам басайық. Мереке құтты болсын! – деді Нұржан Сәбитұлы.Сондай-ақ&nbsp;аудандық ардагерлер кеңесінің төрағасы Өркен Исмаил бұл күннің маңызын баяндап, аудан халқына жүрекжарды лебізін білдірді.–&nbsp;Қадірлі ағайын! Әуелі, Рамазан айы құтты, ұстаған оразаларыңыз қабыл болсын. Мемлекет басшысының ұсынысы қазақы салт-дәстүрлердің жаңғыруына үлкен жол ашты. Аталған он күнде&nbsp;біздің бірлігіміз бен ынтымағымыз арта түсуге тиіс. Бір-бірімізді құрметтеп, реніштерді ұмытып, еліміз әрі қарай өркендей берсін деген тілек білдіргім келеді.Наурыз тойының алғашқы мерекесі – бүгінгі Амал күні. Адамдар бір-біріне рақмет айтып, төс қағысатын күн. Төле би&nbsp;айтқандай, «Өмірдің ең тәттісі – сыйластық». Арамызда сыйластық болса, бәрі де болады. Сондықтан аудан үшін, ел үшін еңбек етуден шаршамай, бірімізді біріміз бауырдай көріп жүре берейік, – деп, қонақтарға ақ батасын жолдады. Қазыналы қарияның берекелі батасына бөленген жандар ардақты ардагерге құрмет білдіріп, дәстүрге сай иығына шапан жапты.Шара барысы мерекелік концертке ұласты. Дара дауысты әншілер әдемі әнін әуелетіп, мың бұралған бишілер қазақтың «Қара жорғасын» билеп шықты. Осынау ұлық мерекенің қонақтары наурыздың әзіл айтысына, әжелер ансамблінің әдемі әніне қанығып, қазақы салт-дәстүрлердің үлгісіне куә болды. Сондай-ақ халық арасында әлі күнге дейін желісін үзбей келе жатқан қол күрес, арқан тартыс сынды спорттық ойындар дүбірлі думанның көркін одан әрі қыздыра түсті. Бұның бәрі де Наурыз тойының бастауы – Көрісу мерекесінің жылы лебін алыстан сездіріп тұрды. Көктем күнін ежелден жаңару мен жасампаздыққа, ырыс пен берекеге балаған шиеліліктер үшін Наурыз тойы дәл осылай басталды.Айта кетейік, биылдан бастап Мемлекет басшысының ұсынымы бойынша еліміздің барлық өңірлерінде Наурыз мейрамы жаңа форматта 14-23 наурыз аралығында «Наурызнама» онкүндігі негізінде тойланады.&nbsp;Бұл онкүндік төл мерекемізді тойлаудың жаңа дәстүрлерін қалыптастыруға, ең жақсы адами қасиеттерді – ашықтықты, шынайылықты, жауаптылықты, қайырымдылықты ашуға бағытталған.Мереке күні ұйымдастырылатын іс-шаралар легі төмендегідей. &nbsp;&nbsp;14 наурыз&nbsp;– Көрісу күні – Амал мерекесі.15 наурыз&nbsp;– Қайырымдылық күні.&nbsp;16 наурыз – Мәдениет&nbsp;және ұлттық салт-дәстүр күні.17 наурыз&nbsp;–&nbsp;«Шаңырақ күні».&nbsp;18 наурыз – Ұлттық киімдер күні.19 наурыз – Жаңару күні.20 наурыз – Ұлттық спорт күні.21 наурыз – Ынтымақ күні.22 наурыз – Жыл басы.23 наурыз – Тазару күні.

Шиелідегі көрісу күні

&nbsp; <a href="https://kyzylorda-news.kz/">Kyzylorda-news.kz</a> «AMANAT» партиясы Қазалы аудандық филиалының қолдауымен Қазалы аудандық Қорқыт Ата атындағы өнер мектебінде күйшілер байқауы өтті.«Ұлттық мұра» партиялық жобасы аясында ұйымдастырылған шара оқушылар арасында дәстүрлі домбыра өнерін насихаттап, ұлттық мәдени құндылықтар мен мұраларды одан әрі дамытуды мақсат еткен.Іс шараны ашқан аудандық Қорқыт Ата атындағы өнер мектебінің директоры Сәукен Әліш сайыстың маңыздылығына тоқталып, жас өнерпаздарға сәттілік тіледі.Жас ерекшелік бойынша сынға түскен 31 қатысушы еркін тақырыпта өздерінің қалаған күйлерін орындады. Орындалған күйлер қатарында «Адай», «Қос алқа», «Ерке сылқым», «Мерке», «Қара жорға», «Төремұрат» және тағы басқа да күйлер болды.Күйші-домбырашылардың өнерін бағалауға партия филиалының атқарушы хатшысы Нұрғиса Жалғасбаев, аудандық өнер мектебі директорының орынбасары Ақыл Қосуақов пен бөлім меңгерушісі Мирамкүл Байдәулетова төрелік жасады.Әділ-қазылар алқасы орындаушының орындау шеберлігіне баса мән беріп, сахналық бейнесіне қарап бағалау жүргізді. Қорытындыға сәйкес жас ерекшелік бойынша 9 қатысушы жүлделі орындарға ие болды.Атап айтқанда, 6-10 жас аралығындағы балалар арасынан Махмұдбек Байқоңыр, 11-13 жас аралығы бойынша Алтынбек Керімбек, 14-16 жас аралығындағы Сақан Ақсезім жеңіс тұғырынан көрінді. Кемелбай Әлихан (6-10 жас аралығы), Алпамыс Мереке (11-13 жас аралығы), Дәулетбеков Нұржан (14-16 жас аралығы) екінші орынды иемденді. Ал, Бекарыс Кәусар (6-10 жас аралығы), Нұрлыбай Ержігіт (11-13 жас аралығы), Жаңабекұлы Талғат (14-16 жас аралығы) үшінші орынды қанағат тұтты.Жеңімпаздарды партия филиалының атқарушы хатшысы Нұрғиса Жалғасбаев құттықтап, арнайы дипломдар және сыйлықтармен марапаттады. Сонымен қатар, өзге де, қатысушы үміткерлерге үздік өнер көресткендері үшін дипломдар табысталды.

Қазалыдағы  Қорқыт Ата атындағы өнер мектебінде күйшілер байқауы өтті

&nbsp; <a href="https://kyzylorda-news.kz/">Kyzylorda-news.kz</a> Қай уақытта болмасын мәдениет пен өнер – халықтың рухани болмысының айнасы, бағдарлы болашағының бастауы. "Мәдениеттің өсуі – елдің өсуі, ұлттың өсуі" деген дана халқымыз – рухани бай дүниесінің өлшемі мен өресін де осы мәдениетпен ұштастырған. Қазалы ауданының арман-мақсаты бір осынау өнер саласының жампоздары тоғысқан орта – аудандық мәдениет орталығы. Жақында орталық директоры Ғани Дармағамбетпен сұхбаттасудың сәті түскен еді.&nbsp;– Ғани Хайруллаұлы, жыл басында су жаңа мәдениет үйіне орналастыңыздар. Қонысы құтты болсын! Жаңа ғимараттың құрылымы, мүмкіндігі, жайлы һәм жайсыздығы жайлы айта отырсаңыз...&nbsp;– Мәдениетіміз биік болса, мәртебеміз биік. Мәдениетті дамыту арқылы біз келешегімізді бағдарлай аламыз. Рухани бай дүниенің өлшемі мен өресі де осы мәдениет пен өнер шоқтығында жатыр. Қай елдің мәдениеті мықты дамыса, сол елдің еңсесі де биік болады. Қазалы ауданы үшін 2024 жыл жақсы жаңалықпен басталды. Қаңтар айының 11 күні жаңадан салынған 600 орынды Роза Бағланова атындағы аудандық мәдениет орталығының жаңа ғимаратының ашылу салтанаты облыс әкімі Нәлібаев Нұрлыбек Машбекұлы және Қазақстан Республикасы Парламенті Мәжілісінің депутаттары Әбенов Мұрат Абдуламитұлы, Жайымбетов Мархабат Жайымбетұлы, Ергешбаев Мұрат Нәлқожаұлы қатысуымен өтті. Жаңа мәдениет орталығының биік еңсесі алыстан көз тартады. Заманауи талаптарға сай бой көтерген ғимаратта 600 орындық концерт залы, конференция залы, кітапхана, сонымен қатар 231 мүшесі бар әртүрлі 15 үйірме бөлмелері және аудан тұрғындарының мәдени демалысына қажетті мүмкіндіктер қарастырылған.&nbsp;– Жалпы мәдениет үйіне тәжірибелі, жас мамандар тарту жағы қалай жүріп жатыр?&nbsp;– Қазалы – өнер қонған өлке. Тәжірибелі маман мәдениетке деген жаңаша көзқарас керек дегенді айтады. Көпшіліктің көз алдына "Мәдениет" десе ән айту мен күй тарту келері сөзсіз. Негізгі мағынасы өте кең. Жалпы ауданымызда мәдениет пен өнерді дамыту саласында атқарылып жатқан игі істер көп. Осы игі істерді ұйымдастыруда басы-қасында жүрген, талай тәжірибелі, өнерлі жастарымыздың еңбегі де бар. Жастарды мәдениетке тарту жағы жоғары. Жыл сайын тәжірибелі жас мамандармен жұмыс жасап келеміз.&nbsp;– Құбылған заманда құбыладан жаңылмас үшін құндылықтар қажет екені белгілі. Аудан жастарын мәдени ортаға бейімдеп, руханиятымызды сіңіруде қандай жұмыстар жүргізіліп жатыр?&nbsp;– Қазалы топырағынан атағы жер жүзіне мәлім болған батырлар мен ақын-жазушылар, мемлекет, қоғам қайраткерлері, өнер шеберлері де шықты. Қазақстан мен Орта Азия жастарының жалынды жетекшісі – Ғани Мұратбаев, Қазалының қызы, қазақ елінің бұлбұлы, «Халық Қаһарманы» – Роза Бағланова, Мәдина Ералиева және тағы басқа мақтауға да, мақтануға да тұрарлық дарабоздар, қаламы қарымды ақын-жазушылар Қазалы топырағының даңқын асырды. Кезінде Қорқыт бабамыз күңіренте тартқан&nbsp; күй сазы заман ағысымен бірге бүгінгі ұрпақтардың да жүрегіне жыр болып құйылған. Осы өнер турасында сөз болғанда ойымызға алдымен әншілер түсетіні ақиқат. Қазалы топырағы ән өнерінің тума таланттарын Роза апамыздың ізін жалғастырушы жастарымыз жетерлік. Ауданда соңғы жылдары жұлдыздай жарқырап шыққан, дәстүрлі&nbsp; әндерді шырқап, ел жүрегінен орын алған Өмірзақ Жанболат, Елмұра Мәдиқызы. Халықаралық байқаулардың лауреаты Сәкен Қуантқанұлы, Гүлдана Мұратбай, Айнұр Қарлыбай, Ұлбосын Кемал, Серік Мадияр, Аман Мәдина&nbsp; және тағы басқа да өнерлі жастарды мақтанышпен айта аламыз.&nbsp;Қазіргі таңда аудандағы мәдениет саласының және өнерпаздардың шығармашылығын дамыту мақсатында түрлі аудандық, облыстық, республикалық байқаулар жаңа «Бізбен бірге» жобалар өткізіп жатырмыз. Жүйелі түрде атқарылып жатқан жұмыстарымыздың ең бастыларына тоқталар болсақ, аудандық әншілер, бишілер, қолөнер, қылқалам шеберлері арасында конкурстар өткізілуде. Ұмыт болған салт дәстүрлерімізді ғұрыптық жанрда дәріптеу мақсатында республикалық халықтық отбасылық ансамбльдер байқауы, «Жайлаудағы ауыл келіні» ауыл келіндерімен байқау, әжелер байқауы, ақындар айтысы өткен болатын. Ал біз мәдениет саласындағыларға халықтың қошеметі, еткен еңбегіміздің жемісі деп білеміз. Сонымен қатар жас жеткіншектердің де өнерін шыңдау назарымыздан тыс қалған емес. Жастармен тығыз байланыста жұмыс жасау барысында «Жайдарман» ойыны аудан жастары арасында ұйымдастырылып өткізілді.&nbsp;– "Қазалы" дегенде сырттағы жұрттың көзіне найзасына жауын түйреген Жанқожа батыр мен Жанкентте туған қобыздың атасы Қорқыт елестейтіні сөзсіз. Қос тұлғаның есімін ұлықтап, келер ұрпақ жадында жаңғырту үшін жыл сайын түрлі жобалар ұйымдастырылып, шаралар өтетінін білеміз. Биыл қандай жоспар бар?&nbsp;– Ұлтымыздың әдет-ғұрпын, туған ел, туған жеріміздің тарихын насихаттау біздің&nbsp; мақсатымыз. Өткен жылы Қазалы ауданының 95 жылдығы аясында өткізілген «Туған өңір, тұнған өнер» атты көркемөнерпаздар фестивалі жалғасын табуда. Осы өңірде туылып, алты алашқа өнерімен, батырлығымен, ақындығымен, әншілігімен, жыршылығымен танылған Ұлы тұлғаларға биыл мерей той. Атап айтар болсақ, қазақтың аса көрнекті мемлекет қайраткері, атақты шешен, би Әйтеке Бәйбекұлына – 380 жыл, Ұлы қолбасшысы, батыр Жанқожа Нұрмұхаммедұлына – 250 жыл, Жырау Әмитжан Бөріқұлақовқа – 100 жыл, Қоғам қайраткері Елеу Көшербаевқа – 95 жыл, Көрнекті қаламгер, публицист жазушы&nbsp; Әлмәмбет Әлішке- 85 жыл, Режиссер, сахнагер, қылқалам шебері Жәдігер Тұрсыновқа – 85 жыл, Драматург, ақын&nbsp; Рүстем Ідірұлы Жанайға – 80 жыл, Қазақтың Ақбаяны атанған, күміс көмей әнші Мәдина Ералиеваға – 70 жыл, Жергілікті сазгер Батырхан Нұрымбетовке – 60 жылдығына орай «Туған өңір, тұнған өнер» атты аудандық өнер фестивалі екінші рет өткізілуде. Фестивальдің мақсаты – отанымыздың төл мәдениетін дәріптеу арқылы ұлылардын ұлы ісін ұлықтау.&nbsp;Қазіргі уақытта азаматтарды жан-жақты дамыту, күнделікті үдеріске және өзгеріске бейімдеу барысында мәдени құндылықтарымыз бен ұлттық салт-дәстүрімізді насихаттау мақсатында «Адал адам» мәдени-тәрбие орталықтарын құру облыс басшысының тапсырмасымен жаңа жобасы іске асырылуда. Осы жоба аясында «Кино-time», «Креативті орталық», «Сұхбат тайм», Еріктілер тобы, «АРТ уақыт» бағдарламалары арқылы көпшілік мәдени шаралар атқарылады деп жоспарлап отырмыз.&nbsp;– Аудандық мәдениет орталығының тындырымды жұмыстарын көз көріп жүр. Жалпы мәдениет, өнер саласының мамандарына мемлекет тарапынан қаншалықты көңіл бөлінген?&nbsp;– Мәдениет мамандарына мемлекет тарапынан көптеп көмек берілуде. Атап айтар болсақ, соңғы бес жыл бойына мәдениет қызметкерлерінің еңбекақысы көтерілуде. Сонымен қатар мәдениет қызметкерлері, әсіресе жас мамандар жеңілдікпен тұрғын үй бағдарламалары арқылы баспаналы болып жатыр. Әріптестерімізге қосымша бизнес ашуға рұқсат етілген. Жыл сайын сала қызметкерлерінің кәсіби мерекесі тойланады. Бұл да мемлекет тарапынан мәдениетке қолдау деп білемін.&nbsp;– Ескі жыл аудан мәдениеті үшін қандай жағымды жаңалықтар мен жетістіктер әкелді?&nbsp;– Қызу мәдениет саласында сапырылысқан жұмыс еш уақытта толастамайды, бірін болдың дегенде екіншісі кезекте тұрады. Соның бәріне баға беру көп адамның қолынан келе бермейді. Ал әрбір мәдени шараның ұлтымыздың руханиятына қызмет жасайтыны, таным көгін таразылайтыны айқын. Өзім Роза Бағланова атындағы аудандық мәдениет орталығында үш жылға жуық жұмыс жасап келемін. Мен келгелі халықаралық, республикалық, облыстық конкурстар, мерейтойлар аясында ауқымда шаралар атқарылуда. Атап айтар босақ, 2022 жылы Роза Бағланованың 100 жылдығы аясында үлкен республикалық көлемінде көпшілік мәдени шаралар өткізілсе, 2023 жылы Қазалы ауданының 95 жылдығына орай түрлі ауқымда шаралар ұйымдастырып, "Қазалы – қара шаңырағым" атты мағынаға толы дүбірлі мерекелік той өтті. Бұл шараның өткізудегі басты мақсаты – ауданымыздың мерейтойы аясында ұлттық құндылықтарымызды ұлықтап, төл тарихымызды таразылап, дәстүрлі мәдениетімізді, бабаларымыздың рухты жігерлерін жас ұрпақтарға насихаттау болатын. Қазалының өнерлі өлке екенін паш ету.&nbsp;Осы мақсатта Роза Бағланова атындағы аудандық мәдениет орталығының ұйымдастыруымен Қазалы ауданының тарихынан сыр шертетін театрландырылған қойылым ұсынылды. Қойылым барысында – ежелгі Жанкентте өмір сүрген Оғыз қыпшақтарының көсемі Қорқытты, Жанкент шаһарының сұлулықпен пәктіктің үлгісі болған, аңыз ана – Бегім ананы, Орта Азия мен қазақ халқына ортақ батыр болған- Жалаңтөс баһадүрді, жау -жүрек – Жанқожа батырды, қазақ халқының үш арысының бірі, айыр тілді шешен- Әйтеке би, Қазақстан мен Орта Азия жастарының жалынды жетекшісі – Ғани Мұратбаев, Шығыстың бұлбұлы, қаһарман қыз – Роза Бағланова, күміс көмей әнші, қазақ елінің бұлбұлы – Мәдина Ералиеваны, жергілікті композитор – Кеңес Дүйсекеевтер туралы сахналанды. 100 домбырашы «Балбырауын» күйін орындаса, 100 биші Қазалы ауданының 95 жылдығын бейнелеп қойылым биін халыққа ұсынды. Түрлі көрмелер ұйымдастырылып көсрсетілді.&nbsp;Әрине, осы аталған&nbsp; мәдени шараларды аудан әкімінің қолдауымен өткізіп келеміз. Осындай үлкен қолдауларды сезінген біз секілді мәдениет қызметкерлері алдағы уақытта да халыққа сапалы қызмет ұсына береді.&nbsp;– Сұхбатыңыз үшін рахмет.&nbsp;

Ғани Дармағамбет: «Мәдениеттің өсуі – елдің өсуі, ұлттың өсуі» 

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz</a> &nbsp;Ұлыстың Ұлы күні Наурыз мейрамын тойлаудың жаңа форматына сәйкес, «Наурызнама» онкүндігі жарияланған болатын.Осыған сәйкес, 16 наурыз - «Мәдениет және ұлттық салт-дәстүр күні» болып белгіленді. Бұл күн ұлттық құндылықтарымызды ұлықтайтын, салт-дәстүрімізді дәріптейтін, қазақы болмысымызды айшықтайтын ерекше күн.Сәйкесінше, дәл осы күні Сыр өңіріндегі мәдениет ұйымдарында мерекелік марафондар мен халық арасында кең тараған салт-дәстүрлер: тұсаукесер, бесікке салу, беташар және тағы да басқа да 40-қа жуық рәсімдер кең көлемде ұйымдастырылады.Сондай-ақ, танымал суретшілердің, мүсіншілердің ерекше туындылары халық назарына ұсынылып, арнайы көрме өтеді. Қазақстан Суретшілер одағының мүшесі, креатив суретші Дәулет Тойшыбаевтың «Кілем art» атты заманауи кілем бетіне сурет салу өнер көрмесі ұйымдастырылады.Бұдан бөлек, «Ұлы даланың ұлық мерекесі» атты мерекелік шара және «Салт дәстүр – ұлттың айнасы» кітап көрмесі, Қ.Бегмановтың «Ер төстік» балалар қойылымы сомдалады.Сонымен қатар, «Адал адам» мәдени-тәрбие орталықтарында ұлттық кино апталығы өтеді.

16 наурыз -  Мәдениет және ұлттық салт-дәстүр күні

Бұл жайында медициналық мекеме Facebook парақшасында жариялады.ҚР Денсаулық сақтау министрі Ақмарал Алназарова «Ұлттық балаларды оңалту орталығы» КЕАҚ ұжымына жаңа басшы – Ажар Ғиниятты таныстырды, деп хабарлайды <a href="https://sn.kz/sn-akparat-agyny/110914-eks-ministr-azhar-giniiat-zhana-kyzmetke-tagaiyndaldy">Skifnews.kz</a> ақпарат порталы.Бұл жайында медициналық мекеме Facebook парақшасында жариялады.Ажар Ғиният Ақтөбе мемлекеттік медицина институтын «Педиатрия» мамандығы бойынша, Ш.Есенов атындағы Ақтау мемлекеттік университетін «Мемлекеттік және жергілікті басқару менеджері» мамандығы бойынша және Алматы Менеджмент университеті «МВА іскерлік әкімшілендіру магистрі» мамандығы бойынша тәмамдаған.Еңбек жолын 1993 жылы Атырау қаласының №2 қалалық емханасында учаскелік педиатр болып бастаған.1994 - 1999 жылдары - Ақтау қаласының №1 Медициналық санитарлық бөлімінің меңгерушісі.1999-2001 жылдары - Маңғыстау жұқпалы аурулар ауруханасының бас дәрігерінің емдеу ісі жөніндегі орынбасары.2001-2005 жылдары - Маңғыстау облысының Денсаулық сақтау басқармасы басшысының орынбасары.2005-2006 жылдары - Маңғыстау облысы денсаулық сақтау департаментінің директоры.2008-2017 жылдары - ҚР Денсаулық сақтау министрлігінің басқарма басшысы, департамент директоры.2017-2020 жылдары - ҚР Президенті Іс Басқармасының Медициналық орталығы басшысының орынбасары2020-2022 жылдары-ҚР Денсаулық сақтау вице-министрі.2022-2024 жылдары-ҚР Денсаулық сақтау министрі қызметін атқарды.2024 жылғы 15 наурыздан бастап ҚР Денсаулық сақтау министрінің бұйрығымен «Ұлттық балаларды оңалту орталығы» КЕАҚ Басқарма Төрағасы болып тағайындалды.ҚР Денсаулық сақтауды дамыту саласындағы жетістіктері үшін «Денсаулық сақтауды дамытуға қосқан үлесі үшін», «Денсаулық сақтау үздігі» төсбелгілерімен, «Құрмет» орденімен марапатталған.Фото: Ұлттық балаларды оңалту орталығы

Қазақстан және Қызылорда облысының жаңалықтары: Мәдениет