<a href="https://kyzylorda-news.kz/">Kyzylorda-news.kz</a> Көне аспапты кәсіби тұрғыда дамытып, халыққа оралтқан бір адам болса, онда ол – облыстық филармонияда «Қорқыт сазы» қобызшылар ансамблінің әртісі, әрі «Қазанғап» атындағы Қызылорда музыкалық колледжінде мұғалім, халықаралық, республикалық конкурстардың лауреаты Гүлдана Берікқызы. Не сиқыры бар екен десеңші?! Көнеден жеткен жетігеннен төгілген әуеннің тыңдаушысын арбап, жансарайына бойлап, шаршаған жүйкені дамыл таптыратын бір құдіреті бар. Біздің кейіпкеріміз Гүлдананың осынау аспапқа қызыққаны сонша, сәбиін жетіген тартып отырып, әлдилеп, бесігіне бөлеп, тербеткен. Көз алдыңызға елестетіп көріңізші, әдемі көрініс емес пе? Қазақтың нәзік аруы жетігенді үйреніп, осы кезде көрермен көзайымына айналып жүр. Жетіген жайлы жұрт әлі толық біле бермейді. Бірақ бұл аспаптың да шығу тарихына үңілсек, ел аузында аңыз бар. Кейіпкерімізден бұрын әңгімемізді осыдан бастасақ...Жетіген – жеті ішекті дыбысты көне шертпелі аспап. Ұзынша келген жәшік тектес болады. Беті жұқа тақтайшамен жабылып, үн беретін ойықтар салынады. Бұрын 7 ішекті болған және оларға тиек ретінде 7 асық тағылған. Ішектер аттың қылынан тартылып, әуен ырғағын қалпына келтіру үшін асықтар қойылған екен. Мамандардың айтуынша, бұл аспаптың қазіргі заманда шыққан жаңа түрінде ішектер саны 25-тен асады. Дыбыс көлемі 2-2,5 октаваға дейін жетеді. Барлық ішектеріне құлақ күйін келтіретін арнайы үлкен тиектер тағылады. Тыңдаушыларға жағымды әсер сыйлайтын жетігенді ертеде көк пен жерді байланыстыратын ғажайып қасиетке бай аспап деп, оны тек хан сарайларында, шағын топ алдында ғана ойнаған. Жетіген аспабы түркі тілдес халықтарында кездеседі. Татар халқы «етиган», тыва халқы «жадықан», хақастар «шатқан» деп әр ұлт өз тілінде атаған. Аңызға келсек, бағзы заманда бір қарттың жеті ұлы болған екен. Ел ішінде бір жылдары қатты жұт болып, көпшілік қауым ашаршылыққа тап болады. Аштықтан жеті ұлы қайтыс болады. Қания есімді үлкен ұлы қайтыс болған кезде кепкен ағаш бөлігін ойын алып, ішек тартып, тиек тағады. Қайтқан тұңғыш ұлына арнап, «Қарағым» күйін шығарады. Қаниядан соң екінші ұлы Төралым қайтқан кезде екінші ішекті тартып, «Қанат сынар» күйін орындайды. Үшінші ұлы Жайкелді өмірден өткенде «Құмарым», төртінші ұлы Бекенге арнап «От сөнер», бесінші ұлы Хауасқа «Бақыт көшті», алтыншы ұлы Жүлзарға «Күн тұтылуы» күйлерін шығарады. Ең кіші ұлы Қияс қайтыс болғанда ақсақал жетінші шекті тартып, «Жеті баламнан айырылып құса болдым» атты күй шығарады. Қайғыдан құса болғана қарт әр күйді орындау барысында әр баласының бейнесін әуен арқылы көрсетеді. Бұл күйлер кеңінен таралып, әрі қарай дамып, «Жетігеннің жеті күйі» не «Жетігеннің жетеуі» деп танылады. Аспап атауы жеті және ән сөздерінен құралып, «жетіген» деп аталған екен. Ал осы күні көнеден жеткен аспапты Гүлдана Берікқызы насихаттап жүр.&nbsp;– Негізі мен басында ұлттық аспаптардың ішінде қобызды үйренген едім. Бесінші сыныптан бастап Павлодар қаласындағы дарынды балаларға арналған музыкалық колледждің мектеп-интернатында білім алдым. Оны бітірген соң Қазанғап атындағы Қызылорда музыкалық колледжіне оқуға түсіп, әрмен қарай жалғастырдым. Содан кейін Құрманғазы атындағы қазақ ұлттық консерваториясында білімімді одан әрі шыңдай түстім. Студент кезімізде біз қобызды тартып жүрген сәтте басқа топтың ұл-қыздары жетіген аспабында ойнап жүрді. Әрине, сол кездері жетігенді қолыма алып, сәл-пәл үйренгендей болдым. Бірақ жетігенді меңгеріп кетемін деп ойламадым. Себебі қолымнан қобызым түспейтін, – деп күлімдеп жауап берді Гүлдана.Кейіннен кейіпкеріміз тұрмысқа шығып, ана бақытын сезініп, сәбилі болады. Міне, жетігенге ғашықтық сезім осы сәтте туады.&nbsp;&nbsp;– Сәбиімді әлдимен ұйықтатқанды жақсы көремін. Сөйтіп, осы әуенді тыңдасам, бәрі жетігенмен айтылады екен. Сол кезде қызығушылық одан сайын оянып, сәбиіме әлдиді жетіген тартумен жеткізгім келді. Сенесіз бе, сол арманым орындалды. Негізі адам баласы алдына бір мақсат қойып, шын қаласа орындалады екен. Содан бері қолымнан қобызбен бірге жетіген түспейді. Осы кезде жетігенді меңгеріп, тартып жүргеніме үш жылдай уақыт болды. Екі аспап та өзіме қатты ұнайды. Сондай тартымды, екеуін үйреніп, қоса алып жүру оңай емес. Дей тұрғанмен үйренемін деген ниет болса, алып кетеді. Жетігенді үйрену қиын емес. Оған тек музыкалық нотаны меңгеруі қажет. Ал қобызды үйрену үшін адамға музыкалық қабілет керек. Музыкалық қабілет болмаса әрмен қарай алып кете алмайды. Бірақ өзіме қазір қиын емес, қобызды бала кезден қолыма алсам, жетігенді кейіннен үйрендім, – деді кейіпкеріміз.&nbsp;Музыканттар тырнақ өсірмейді Әңгіме барысында бір байқағанымыз, Гүлдананың тырнақтарының түбі қарайғанын көрдік. Қобыз тартқаннан сондай із қалады екен. Тағы бір қызығы, мұндай аспапта ойнайтындар тырнақ өсірмейді, боямайды. Табиғи қалпында сақтайды.&nbsp;– Иә, бізге тырнақ бояуға болмайды. Себебі тырнақтағы бояудың өзі қобыздың үнін өзгертіп жібереді. Оған қоса тырнақ өсірмейміз. Өйткені ұзын тырнақпен аспап ойнай алмаймыз, – деді Гүлдана.&nbsp;Жетігенді таңдағандар да, тартатындар да санаулы Кейіпкеріміздің бір күндік кестесі өте тығыз. Себебі ол бір жағынан өнер орталығында дайындықта жүрсе, екінші жағынан қолледжде студенттерге қобыз және жетіген класынан дәріс береді.– Білесіз бе, жетігенді қала бойынша тартатындар санаулы ғана. Тіпті мен дәріс беретін колледждің өзінде 4 жыл бойы бір ғана студент жетіген сыныбында оқиды. Негізі жетіген аспабын жұрт енді түсініп келе жатқан секілді. Өйткені осы кезде концерттерге жетігенмен шығуға қызығушылық артып келеді. Айта кету керек, домбырамен жетігенді бірге тартқанда әдемі үйлесім табады. Жеке басым жетігенмен тойға шыққан емеспін. Бірақ қобызбен шықтым. Кей той иелерінің қалауы бойынша тойды қобызбен, домбырамен ашқысы келетіндері бар, – дейді Гүлдана Берікқызы.&nbsp;

Жетігенді жаны сүйген өнерпаз

<a href="https://kyzylorda-news.kz/">Kyzylorda-news.kz</a> &nbsp;Сыр өңіріне белгілі Қонысбек Қазантаев, Нұрқасым Бердіқұлов, Сейілбек Шаухаманов, Елеу Көшербаев, Елтай Тыныштықбаев, Жұмабай Бәкішов, Абдолла Дәулетов секілді тау тұлғалармен иық тіресе еңбек етіп, қайраткерлердің тәлімі мен тағылымын бойға сіңіріп, өзі де ғибратты ғұмыр иесі атанған Жақай Бодықбаев 85 жасқа толып, адал еңбегімен абыройға бөленген ардагер ретінде қуанышқа кенелу үстінде. Бітім-болмысы тәртіппен, тазалықпен, парасаттылықпен үндесіп жатқан Жақай Серікұлын жақсылар мен жайсаңдардың жалғасы десек, еш уақытта қателеспейміз.Ардагерлік кезеңге кім жетпей жатыр, 85 жасқа кім толмай жатыр? Дегенмен, кімнің қалай жеткені, зейнеткерлік жасқа қандай жетістікпен келгені маңыз болып табылады. Бұл ретте Жақай Серікұлының еңсесі өзгелерден бір саты биік, көші де бір қадам ілгері екені айдан-анық. Себебі абыройлы азамат қай қырынан алсақ та үлгілі, өнегелі екені даусыз. Еңбегі ерен, кеудесі кенен қайраткер-тұлғамен пікірлесудің, сапарлас болудың өзі бір ғанибет. Сондықтан былайғы жұрт ақсақалды әркез төрге оздырып, қадірлеп, құрмет тұтады.Журналисттік қызметтің жауапкершілігімен қаламымызға қаншама тағдыр иесінің өмірі мен еңбек жолын арқау еттік. Кейде көпшілік мақтаған кейбір кейіпкерлеріміз туралы бірлі-жарым адам теріс пікір айтып қалып жатады. Мұндайда бәріне ұнау, бәрінің көңілін табу, елдің түгел мақтауына ие болу мүмкін емес шығар деп ой түйеміз. Ал Жақай Бодықбаев ақсақал туралы кімнен пікір сұрасаңыз да, қай ортада әңгіме қозғасаңыз да бәрі түгел мақтайды, ерен еңбегін зор тебіреніспен айтажы. Тіпті қоғамдық-саяси қызметтің белді де белсенді өкілі ретінде бір емес бірнеше буын үлгі тұтатыны сөзсіз. Мұндайда ауданымыздың тәуелсіздік жылдарындағы тұңғыш әкімі Алмагүл Божанқызын әңгімеге тарттық.– Қарапайымдылығы, еңбеккештігі, асқан жауапкершілігі, іскерлігі Жақайды өзгелерден ерекшелеп тұратынын мақтанышпен айта аламын. Адамдармен қарым-қатынасы, жайлы мінезі, достыққа адалдығы, әділдігі, тазалығы бәрімізге үлгі. Біз білетін Жақаң жалынды жастық шағынан бастап негізгі жұмысымен қоса қоғамдық жұмыспен де айналысатын, – деген Алмагүл Божанова кейіпкеріміздің қызметтің барлық сатысынан өткенін және әркез абыройлы болғанын айтып өтті. Иә расында да комбайнер-механизатор, техникалық хатшыдан басталған еңбек жолында қайраткер азамат аудан әкімі қызметін де атқарды.Халқымызда «Ұстазы жақсының ұстанымы жақсы» деген даналық сөз бар. Жастайынан жақсыларға жанасып, игі іске үлес қосуды өмірлік мақсат тұтқан Жақай Бодықбаев өмірде ұстаздан жолы болған адам &nbsp;екенінде көз көргендер жарыса айтады. Қонысбек Қазантаев, Нұрқасым Бердіқұлов, Сейілбек Шаухаманов, Елеу Көшербаев, Елтай Тыныштықбаев, Жұмабай Бәкішов, Абдолла Дәулетовтердің тәлімін де, тағылымын да көрген, көңілге түйген азаматты оқуы мен тоқуы ұштасқан тұлға деп айтуға толық негіз бар. «Өмір үйрене жүріп, үйретуге жол ашады» демекші өзі де бүгінде ұстазға айналғаны мәлім. Бүгінде ел басқару ісіне араласып жүрген азаматтардың бір топ шоғыры Жақай Серікұлын ұстаз тұтатыны жасырын емес. Ақыл-кеңесін кәдеге жаратуға бейім азаматтардың қатарында өңіріміздегі іргелі аудандарды абыроймен басқарған айтулы басшылар да бар.Сырдария мен Қармақшы ауданының Құрметті азаматтары қатарынан ойып тұрып орын алған ардагер Тереңөзекке келген сайын орайын тауып, аудандық газет редакциясына соғады. Атқарып жатқан жұмысымызбен танысып, басылым беделін биіктету бағытындағы жоспарларымызды жүйелеуге қуатты да шуақты сөзімен қолдау білдіреді. Сонау 1965-1969 жылдардағы аудандық партия комитетінде нұсқаушы, шаруашылықта бас агроном болған жылдары туралы әңгімелейді. 1973-1975 жылдары облыстық ауыл шаруашылығы басқарма бастығының орынбасары, 1983-1990 жылдары облыстық халықтық бақылау комитетінің төраға орынбасары қызметінде атқарған жұмыстарынан мысал келтіргенде ардагердің ерекше ерік-жігері мен күш-қайратына тәнті боламыз. Ал 1990-1992 жылдары облыстық агроөнеркәсіп бірлестігі төрағасының бірінші орынбасары, 1992-1996 жылдары Қармақшы ауданының әкімі ретінде қолға алған бастамалары мен жүзеге асырған жобаларын ел-жұрт жоғары бағалайды. Әсіресе 1975-1981 жылдары С.Сейфуллин атындағы совхоздың, 1996-1999 жылдары Ақжарма шаруашылығының директоры болғаны аудан тарихында алтын әріппен жазған болатын. Мақаламен бірге жарияланып отырған сурет Ж.Бодықбаевпен редакцияда өткен жақсы бір кездесуіміздің көрінісі десек болады.Ұқыпты, тиянақты, ізденімпаз ақсақал жұбайы Шарбан анамен 2 қыз, 1 ұл тәрбиелеп өсірді. Шаңырақтың ұйытқысы болған Шарбан ана ұлағатты ұстаз болатын. Бүгінде дүниеден өтсе де артында өшпес із пен іс қалды. Ал Жақай ақсақал қазір ұл-қыздарынан тараған ұрпақтың ортасында бақытты ғұмыр кешуде.&nbsp;

Сырдың зор құрметке ие азаматы

<a href="https://kyzylorda-news.kz/">Kyzylorda-news.kz</a>&nbsp;Домбыра – қазақ халқының қастерлі ұлттық музыкалық аспабы. Бабаларымыздан мирас болып қалған домбыраның тарихи тамыры ғасырларға ұласады. Домбыра – баға жетпес&nbsp;жәдігер, қазақ халқының бойтұмары.&nbsp;Бүгін сағат 12:00-де еліміздің барлық білім беру ұйымдарында «Күй күмбірі» республикалық челленджін&nbsp; бір мезетте орындады.&nbsp; Оның ішінде Қызылорда қаласының мектептерінде де оқушылар бір мезетте&nbsp; &nbsp;«Тепең көк», «Адай», «Балбырауын», «Келіншек» күйлерін орындап, көрерменге жолдады.«Домбырашылар» челленджі – балалар мен жастардың, ұстаздар мен ата-аналардың музыкалық өнер саласындағы шығармашылық жетістіктерін көрсету және домбыраны насихаттауды мақсат етеді. Сондай-ақ Наурыз мейрамына арналған республикалық челлендж өскелең ұрпақтың бойында рухани-адамгершілік құндылықтары мен патриоттық сезімдерді қалыптастыруға, елдің мәдени мұрасын жалғастыруға, балалар арасында домбырада ойнауды насихаттауға бағытталған.Домбырашылар челленджі бұл – 2023 жылдан бері Оқу-ағарту министрлігінің бастамасымен жүзеге асырылып келе жатқан Наурыз қарсаңындағы ауқымды республикалық акция. Челленджге бір миллионнан астам жас домбырашы қатысып, көптік істі қазалылық шәкірттер де қолдады. Айта кетейік, барлық мектеп оқушылары челлендж арқылы әз-Наурыз мерекесінің ажарын арттыра түсті.<figure class="media"><div data-oembed-url="https://youtu.be/5oz4mXAy3xY"><div style="position: relative; padding-bottom: 100%; height: 0; padding-bottom: 56.2493%;"><iframe src="https://www.youtube.com/embed/5oz4mXAy3xY" style="position: absolute; width: 100%; height: 100%; top: 0; left: 0;" frameborder="0" allow="autoplay; encrypted-media" allowfullscreen=""></iframe></div></div></figure>

Қызылордада барлық білім беру ұйымдарында ұлттық күй бір мезетте  ойнады

<a href="https://kyzylorda-news.kz/">Kyzylorda-news.kz</a>&nbsp; Нартай Бекежанов атындағы драма театрында Open Hearts Kzo» қоғамдық қорының ұйымдастыруымен Атамекен балалар ауылының тәрбиеленушілерінің «7 Муза: жұлдыздар жарқырайды» benefit атты концерті өтті.&nbsp;&nbsp; Концерке ҚР Еңбек сіңірген әртісі, «Құрмет», «Парасат» ордендерінің иегері Майра Ілиясова, ҚР Еңбек сіңірген әртісі Жеңіс Ысқақова, эстраданың жас жұлдызы, әнші-композитор Еркеш Хасен тәрбиеленушілерімізбен дуэт болып ән шырқады. Ал жыршы, Құрмет Орденінің иегері Бимбетова Шолпан дәстүрлі өнерге бейім өрендерімізбен бірге жыр-терме орындады.Сондай-ақ ақын Назгүл Бердіқожа мен Ақжол Түменбай балалармен &nbsp;бірге поэзиялық кіші қойылым ұсынса, домбыраға әуес дарындарынды балалар&nbsp; танымал күйші Алдияр Шағдатовпен күй ойнады.Сонымен қатар өнерлі балалар «Атамекен» би тобының ұжымы мен есімі елге мәлім «Томирис» би ансамблі би қойылымын көрсетсе, классикалық өнерге икемі бар жас әншілеріміз әнші-педагог, Халықаралық классикалық орындаушылар конкурстарының жеңімпазы Сымбат Тасбергеновамен қосылып ән шырқады. Одан бөлек, мәдениет саласының үздігі Әзиза Іздіқұловамен дуэт болып, көрерменнің ыстық ықыласына бөленді.Концертті жерлесіміз, талантты журналист, «Қазақстан» ТРК беделді жүргізушісі Гүлмира Нәлібай жүргізді.Одан бөлек балалар өздерінің жасаған қолөнер бұйымдары мен аспаздық өнімдерінің жәрмеңкесі мен «Art studio», «Жас сәулетшілер», «Робототехника», «Needle work», «Hand made»&nbsp;Облыстық білім басқармасы басшысының орынбасары Бектұр Асанханұлы «7 муза. Жұлдыздар жарқырайды» Benefit концертін өткізуге үлес қосқан кеш қонақтары мен ұйымдастырушыларға үйірме жұмыстарының көрмесімен таныстырды.облыс әкімінің Алғыс хатымен марапаттап, бірге өнер көрсеткен балалар өз қолдарымен дайындаған «Біздің Муза» статуэткасын табыстады.&nbsp;

Жұлдыздар жарқырайды

<a href="https://kyzylorda-news.kz/">Kyzylorda-news.kz</a>&nbsp;Бүгін облыс әкімі Нұрлыбек Нәлібаевтың қатысуымен Сырдария ауданы, Бесарық ауылында «Әз-Наурыз – игіліктер бастауы» атты мерекелік шара өтті. Жиынға ауыл тұрғындары, аймақ ардагерлері қатысты. Аймақ басшысы жиналған қауымды, ауыл тұрғындарын Наурыз мерекесімен құттықтап, атқарылған жұмыстарға тоқталды. «Баршаңызды ырыс пен ынтымақтың, бірлік пен берекенің, жақсы істердің бастауы - Ұлыстың ұлы күнімен шын жүректен құттықтаймын! Биылғы Наурызға Сыр елі Мемлекет басшысының ерекше қамқорлығының, қолдауының арқасында айтулы жетістіктер, толайым табыстармен жетті. Мерейлі мейрам аясында төтенше жағдайлар қызметіне өрт сөндіру автокөліктері, тұрғындарға жаңа баспаналардың кілті табысталып, бірқатар елді мекендер "көгілдір отынға" қосылды. Бүгін, міне, "Үстел теннисі орталығының" іргетасы қалануда. Өздеріңізбен бірге атқарған ортақ ісіміз өңірдің өсіп-өркендеуіне бағытталады. Бұл – сіздердің адал еңбектеріңіздің, тынымсыз тірліктеріңіздің жемісі. Облыстың биылғы бюджеті 650 млрд теңге болып бекітілді. Бұл қаражат өзекті мәселелерді шешуге, тұрғындардың өмір сүру сапасын арттыруға бағытталды. Халықтың қуанышын еселейтін мақсатты бастамаларымызға жеке инвесторлар да қолдау көрсетті. Инвесторлар қолдауымен 37 млрд. 600 млн. теңгенің жобалары іске асуда. Сырдария ауданы да серпінді өзгерістердің ордасына айналды. Биылғы аудан бюджеті 11 млрд. теңгеден асты. Елдігімізді нығайтып, тұрмысқа тың серпін беретін байыпты бастамаларымыз бен жобаларымыз жалғасын табады. Ұлыстың ұлы күнінде тілеген игі тілектеріңіз қабыл болып, істеріңіз жемісті, еліміз тыныш, Тәуелсіздігіміз мәңгі болғай!», - деді Нұрлыбек Нәлібаев.&nbsp; Мерекелік жиында Сырдария ауданының дамуына үлес қосқан белсенді азаматтар облыс әкімінің Алғыс хатымен марапатталып, Сырдария және Қармақшы аудандарының Құрметті азаматы, еңбек ардагері Жақай Бодықбаев сөз сөйледі. Сонымен қатар, қазақтың дәстүріне сай «Ат қою», «Тұсаукесер», «Селтеткізер» рәсімдері өткізіліп, мерекелік концерт ұйымдастырылды. Айта кетейік, биыл Сырдарияда 1,7 млрд. теңгеге жолдар жөнделіп, жаңа шағын аудандарға инфрақұрылым жеткізілуде. «Қуатты өңірлер – ел дамуының драйвері», «Ауыл – ел бесігі» бағдарламалары аясында Қоғалыкөл, Шаған ауылдарында су құбырлары жаңартылса, Тереңөзек кентінде құрылыс жұмыстары қарқын алды. Сондай-ақ, Аманкелді елді мекенінің су құбырларын жаңғырту басталады. Өткен жылы Қалжан ахун ауылы табиғи газға қосылды. «Жайлы мектеп» ұлттық жобасымен Тереңөзек кентінде 1 мектептің құрылысы басталады. «Ауылдық денсаулық сақтауды жаңғырту» ұлттық жобасы шеңберінде Аманкелді ауылындағы дәрігерлік амбулатория 103 млн. теңгеге күрделі жөндеуден өткізілуде. Биыл Бесарық ауылында спорт кешені пайдалануға беріледі. С.Сейфуллин, А.Тоқмағамбетов елді мекендеріне газ құбыры тартылуда. Бұл жұмыс жыл соңына дейін аяқталып, Шаған ауылын газдандыру басталмақ. Фото: Қызылорда облысы әкімінің баспасөз қызметі

Бесарық ауылында «Әз-наурыз – игіліктер бастауы» атты мерекелік іс-шара өтті

&nbsp;<a href="https://kyzylorda-news.kz/">Kyzylorda-news.kz</a> &nbsp;Соңғы уақытта Сыр өңірінен қазақ эстрадасына өзіндік ерекшелігімен қосылған өнерпаздар жетерлік. Олардың бірі – қазалылық, Жарасхан Төлебай. Ел арасында шығарған әндерінің 35-тен астамы хит болған. Әсіресе жұртшылыққа танымалы «Мен қазақпын», «Алғыс», «Жақсы адамдарым» сынды әндері. Бүгінде қазақ өнеріне өз үлесін қосып жүрген жас композитормен сұхбаттасудың сәті түсті.– Қасиетті Қазалының ұланы екеніңізді білеміз, алайда, қандай ортада, қандай отбасыдан шыққаныңызды көпшілік біле бермейді. Сол туралы айтып берсеңіз. Әңгімемізді осыдан бастасақ...– Қазалы ауданының Лақалы деген ауылында туып өстім. Ауылым сондай киелі, өнерпаздардың ауылы десем де болады. Өзім мектеп қабырғасында бастауыш сыныптан бастап түрлі сайыстарға қатыстым. «Бозторғай» сынды байқауларда бақ сынап, сахнаға шыға бастадым. Әкем мектепте техникалық қызметкер, анам талай жыл ауыл мектебінде от жағушы болды. Еңбекке төселген, ауыл тәрбиесін көрген қазақтың бір ұлымын. Әулетімізде барлығы дерлік өнерге біртабан жақын, ішінде кәсіби білім алған мамандар да бар.– Жалпы, өнер жолына қалай келдіңіз?– 2012 жылы дәстүрлі музыкалық өнер мамандығы бойынша Қорқыт ата университетіне түстім. Университет қабырғасында да көптеген шарада белсенділік таныттым. Оқуды бітірер кезде жыр-термені насихаттап жүріп, ән жазатын қырым пайда болды. Алғашында әндерімді көрсетуге ыңғайсызданып жүрдім. Әдепкі уақытта ұялшақтық ол қалыпты жағдай деп ойлаймын. Әндерімді ешкімге көрсетпей сақтап жүріп, кейіннен Қуандық Рахым деген жігітпен танысып, бір-екі әнімді ұсындым. Ол бірден ұнатты. Онда әндерім елге де, ұнауы мүмкін ғой деп таң қалдым. Жарыққа шықса, қандай тамаша болар еді деген ой келді. Осы жағдай шабытыма қозғау болды. Сөйтіп, әндер біріне-бірі жалғаса берді. Содан бері Қуандыққа 40-50 шақты ән жазып бердім. Егер мен термеге келмесем, тек, орындаушы болып қана жүруім мүмкін еді. Жалпы, айтқым келгені ән жазу – бабалардан қалған дәстүрлі әндер мен жыр-термелерге қызығушылығым арқылы келе-келе пайда болған дарын деп есептеймін. Сол себептен ұлттық құндылықтарды бала бойына сіңіріп өсіру маңызды.– «Мен қазақпын» әні әрбір қазақтың көкірегінде патриоттық сезімді оятады. Тіпті, аты төрткүл дүниеге танымал қазақстандық спортшылар да шаршы алаңға осы әнмен шығуда. Рухты оятқан әннің жазылу тарихына тоқталсаңыз...– Ән 2017 жылы жазылды. Бірінші сөзі шықты. Семейлік Нұржан Өмірбаев деген аламан айтысқа қатысқан айтыскер ақын жазып, маған жіберді. Осы өлеңіне ән жаздыру үшін көп сазгерлерге барған екен. Маған сөздері қатты ұнады. Жалпы, сазгер шабыты ашылу үшін сөз көңілінен шығу керек. Осы өлеңді оқығанда патриорттық сезімім оянып, осындай жақсы дүние жарыққа шықты. Кейбіреулер ән жазуға қанша уақыт керек деп сұрап жатады. Шабытқа ешқандай тұсау жоқ. Мысалға, осы ән 10-15 минуттың ішінде шықты. Ән шыға салысымен ойланбастан Қуандыққа табыстадық. Ол қуана-қуана алды. Уақыт өте келе Тәуелсіздік мерекесінде 3000 сарбаз тікесінен тік тұрып, әнді орындағанда ерекше әсерде болдық. Кішкентай баладан, үлкен қарияға дейін орындайтын деңгейге жетті. Бұл да бір қуаныш, әрі мақтаныш.– Бүгінде барша қазалылықтардың жүрегіне жеткен «Қазалы ұраны» әні қалай жазылды?– Ақтан батыр ауылынан Ақжол Түменбай есімді ақын жерлесіміз бар. Мен 2016-2017 жылдары ән жазып бастаған кезде, Ақжол өлең жазатын, мүшайраларға қатысып жүрді. Екеуміздің бұрыннан бірге ән жазсақ деген арманымыз болған. Солай реті келмей жүргенде осы «Қазалы ұраны» деген әнді шығардық. Жалпы, Қазалыға арналған әндер көп емес. Бірінші, Ақжол өлеңін жазды, сосын мен әнін жаздым. Ол әннің жазылғанына бес жылдай болды. Бірақ, жарыққа шықпай жатты. Себебі, әні мен сөзін жазғанымызбен, ешқандай жөндеу жасалынбаған еді. Бұл әнді өзім орындаймын деп басынан айттым, бірақ, бірден жарыққа шығаруға мүмкіншілігім болмады. Өзім орындағым келді. Өнердің арқасында күн көріп жүргеннен кейін, ол әнге музыкалық өңдеу жасауға қаржылай жағынан қиындықтар болып, бұл ән шықпай қалды. Қазалылық бір-екі ағаымызға да ұсынып көрдік. Алайда, ешкімнен қолдау болмады. Уақыт өте келе, былтыр ауданның 95 жылдығы қарсаңында туған жеріме деген тартуым болсын дедім. Әннің тұсауы туған жерде кесілді.– «Жігітке жеті өнер де аз» деген. Жарасханның біз білмейтін тағы қандай қырлары бар?– Менің кез-келген саланы үйреніп, ары қарай алып кете алатын қасиетім бар деп айтсам артық болмас. Қазіргі мобилография саласы дейін, анығында сурет, бейнелер түсіруден де хабарым бар. Кейде өзіме керек дүниелерге бейнелер түсіріп, оны өңдеп кішігірім жұмыстар жасай беремін. Егер, мен әнші болмасам, фотограф, мобилограф болуым мүмкін еді. Жалпы, ән жазған соң, оған да белгілі бір уақыт, тыныштық керек болады. Сол үшін де болар басқа кәсіптерді ойлауға кішкене мүмкіншілігім болмай тұр. Мен қазір ешқандай жерде жұмыс жасамаймын. Бірақ, бір-екі кәсіпті қолға алып жатырмын.– Жалпы әндеріңіз қалай жазылады? Бірінші ән жазып, соған лайықты өлең іздеп, ақындарға ұсынасыз ба?– Көңіл-күйге байланысты бірінші ән жазып қоямын. Сөзін де, әлімнің жеткенінше жазамын. Кейін ақындарға дұрыстатамын. Бірінші, ақынның сөзіне жазылатын кездер де болады. Сөзі ұнаса, соған сай ән жазамын. Қазіргі уақытта тығыз байланыста жұмыс жасайтын ақындар бар. Бір-бірімізбен үнемі байланыстамыз.– Қай туындыңыз өз әншісін тапты деп есептейсіз?– Менің ойымша, Қуандықтың орындауындағы әндерімнің барлығы дерлік өз орындаушысын тапты деп ойлаймын. Қарақат Әбілдина «Жақсы адамдарым», «Алғыс» әндерін өз деңгейінде алып шықты. Тіпті, ойымдағыдан да артық шықты. Жақсы деңгейде орындалғаны үшін, халықтың көңілінен шығып жатыр.– Сіз кімдердің әнін тыңдайсыз?– Мен шектеліп қалмаймын. Жыр-термені де, дәстүрлі де, эстарада болсын, әр тілді де туындыларды тыңдай беремін. Адам әр бағыттағы әндерді тыңдаған сайын музыкалық көкжиегі кеңейе береді. Барлығын тыңдап, салыстырып, жаңа туындыларымды да, шығарып жатамын.– Қоржыныңызда қанша ән бар? Дүниеге келіп, бірақ, әлі де, көпшілік назарына ұсынылмағаны бар ма?– Осы уақытқа дейін жазған әндерімнің санын білмеймін. Үш жүздей бар шығар. Жарыққа шыққаны бір жүздің шамасында. Диктафонымда үш мыңға жуық «жазбам» бар. Шыққаны бар, шықпағаны бар. Әрқайсысына өзінің уақыты келеді.– Қазақта «Армансыз адам, қанатсыз құспен тең» деген жақсы тәмсіл бар. Осы орайда, өзіңіздің алға қойған жоспарыңызбен бөліссеңіз...– Өте дұрыс айтасыз. Осы уақытқа дейін қаншама әндерім жазылды. Шығармашылық кеш өткізсем деген ойым бар. Туған жерге, Қызылорда қаласына, аудандарда да өз концертімді бердім. Енді үлкен басқа да қалаларда жеке шығармашылық кешімді өткізсем деймін. Өзім де, әнші болған соң, жеке репертуарымдағы әндерімді көбейткім келіп, жұмыс жасаудамын. Өзімнің орындауыма да, әншілерге де, әндер жазамын деген ниетім бар. Алдағы уақытта елге танымал эстрада жұлдыздарының орындауларында әндерімді тыңдап қаларсыздар.– Әсем әндеріңіз көп болсын!

Жарасхан Төлебай: Еңбекке төселген, ауыл тәрбиесін көрген қазақтың ұлымын 

<a href="https://kyzylorda-news.kz/">Kyzylorda-news.kz</a> &nbsp;Қызылордада Наурыз мейрамы қарсаңында облыс әкімі Нұрлыбек Нәлібаевтың қатысуымен Жаппасбай батыр көшесіндегі көпқабатты үйден 80 отбасыға пәтер кілтін табыстау рәсімі өтті. Аймақ басшысы жиналған жұртшылықты алдағы Ұлыстың ұлы күнімен құттықтады.<blockquote>«Мемлекет басшысы Қасым-Жомарт Кемелұлы «Халықтың басым көпшілігі үшін тұрғын үй – ең өзекті мәселе. Мемлекет шын мұқтаж адамдарға ғана жәрдем береді», – деп атап өткен болатын. Халықты баспанамен қамту еліміздегі негізгі басымдықтың бірі десек, өңірде бұл бағытта тындырымды тірлік атқарылуда. Өткен жылы 4 108 пәтерлік 300 тұрғын үй салынды, 2400-ге жуық пәтер табысталып, 11 мыңнан астам тұрғынның баспана мәселесі шешімін тапты. Халықтың тұрмыс жағдайының жақсаруы, жайлы өмірінің кепілі болып саналатын баспанамен қамту жұмыстары биыл да қарқынды жүруде. Бюджет қаражаты есебінен 14,3 млрд. теңгеге 1890 пәтерлік 70 тұрғын үй салынады. Оның 16-сы жеті қабатты болады. Жыл басынан бері Тасбөгет кентінде 172 отбасы баспаналы болса, бүгін міне, өздеріңіздің қатысуларыңызбен 80 отбасы қоныс тойын тойлайды. Алдағы аптада «Сыр жастары» жеңілдетілген ипотекалық несие бағдарламасымен тағы да 60 отбасына үй кілті табысталады. Бұл - тұрғындар әл-ауқатын арттыру бағытындағы мемлекет қолдауының нақты көрінісі», – деді аймақ басшысы.</blockquote>Рәсімде Арайлым Тілеубай қоныстой иелері атынан қуанышын жеткізіп, мемлекет және қоғам қайраткері Бақберген Досмамбетов ақ батасын берді. Өңірдің әлеуметтік-экономикалық дамуына үлес қосқан кент тұрғындары мен құрылысты сапалы салуға атсалысқан мердігер мекеме қызметкерлері марапатталды.Айта кетейік, бүгін сол жағалауда үстел теннисі орталығының іргетасы қаланды.&nbsp;<blockquote>Қазір Қызылорда қаласы мен елді мекендердің келбетіне көрік қосатын әлеуметтік нысандар құрылысы қарқын алған.&nbsp;Сол жағалаудан 300 орындық жатақханасы бар 400 орындық физика-математика мектеп-интернаты бой көтеруде. Мемлекет басшысының бастамасымен қолға алынған «Жайлы мектеп» ұлттық жобасы аясында биыл 10 мектеп ел игілігіне табысталады, тағы 11-нің құрылысы басталады. Балалар мен жасөспірімдер шығармашылығын шыңдау мақсатында «Шығармашылық академиясы», Жаңақорған, Шиелі аудандарында Оқушылар үйі мен Өнер мектептері салынады. Өткен жылы «Отбасы орталығы» және «Анаға тағзым» орталығы өз қызметін бастады. Жақында 1000 орындық «Өнер орталығы» салтанатты түрде ашылса, сол жағалаудан жаңа өлкетану музейі бой көтереді.</blockquote>Қызылорда қаласында 36 млрд. 400 млн. теңгеге бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы басталды. Жаңа «Қан орталығы» Медицина қызметкерлері күні қарсаңында пайдалануға берілмек.Мемлекет басшысының бастамасымен қолға алынған «Ауылдық денсаулық сақтауды жаңғырту» ұлттық жобасы аясында 11 млрд. теңгеге 27 нысан салу көзделген. Өткен жылы елді мекендерде 15 дәрігерлік амбулатория, 1 медициналық бекет ел игілігіне табысталып, қазір 30 мыңнан астам халыққа қалтқысыз қызмет көрсетуде.Облыс орталығында халықаралық стандарттарға сәйкес келетін орталық стадион (20,9 млрд теңге) және жабық бассейні бар көпсалалы дене шынықтыру-сауықтыру кешені (6,8 млрд теңге) ел игілігіне табысталады. Жақын күндері заманауи үлгідегі автовокзал ғимараты пайдалануға беріледі.Инвесторлар қолдауымен 37 млрд. 600 млн. теңгенің жобалары іске асуда. Қорқыт ата әуежайының жаңа терминалы салынуда. Жоба құны – 20 млрд теңге, жаңа терминал осы жылы пайдалануға беріледі. «ҚазГерМұнай» компаниясының демеушілігімен 350 орындық заманауи үлгідегі Оқушылар сарайының құрылысы қарқын алды. «Саутс Ойл» компаниясы 650 орындық музыкалық колледж ғимаратының құрылысын бастады.Биыл 7 ауданда неке қию залы, кітапхана, музей, архив, жастар сарайы, ардагерлер мен аналар үйін біріктіретін, құны 11,5 млрд. теңгені құрайтын «Руханият» орталықтары салынуда.Фото:&nbsp;Қызылорда облысы әкімінің баспасөз қызметі

Қызылордада 80 отбасы баспаналы болды

<a href="https://kyzylorda-news.kz/">Kyzylorda-news.kz</a> &nbsp; Ә.Мүсілімұлы &nbsp;атындағы №101 мектеп-лицейінде бастауыш бірлестігінің ұйыстастыруымен 4-сынып оқушылары арасында «Өнерлі қыз, өнегелі жеңге» атты сайыс өтті.Сайыстың мақсаты – халқымыздың бойына ғасырлап сіңген ұлттық мінез, ұлттық тәрбие, жақсы дәстүрімізді &nbsp;жаңғыртып, ұлағатты қасиеттерді сіңіріп, үлгі-өнеге алуға, шыншылдыққа баулып, ар тазалығын жоғары ұстайтын қылықты &nbsp; &nbsp;қыз тәрбиелеу және жеңге мен қайынсіңлі арасындағы қарым-қатынасты нығайту.Халықтың мәдени мұрасын, салт-дәстүрін, халық өнегесін насихаттап, отбасы мәртебесін нығайтуды мақсат еткен сайыс 5 бөлімнен тұрды. Бірінші бөлімде қатысушылар өз-өздерін таныстырып, әділ қазылардың жоғары бағасына ие болды.Келесі бөлім «Зерделінің ойы озық» деп аталды. Мұнда қазақтың салт-дәстүріне байланысты берілген сұрақтарға жауап берді.Сайыстың үшінші бөлімі «Ата дәстүр – асыл қазынам» деп аталды. Онда қатысушылар өздері қалаған салт-дәстүрге байланысты қойылым қойып, көрерменнің ыстық ықыласына бөленді. Ал төртінші бөлімде жеңгелер мен қайын сіңлілері үйден дайындап алып келген түрлі тағамдармен таңғалдырды. Әділ қазылар тәттілерден дәм татып, өз бағасын берді. Соңғы бөлім «Жеңешем өрген бұрымым» деп аталды. Аталған бөлімде жеңгелер қайын сіңлілерінің шашын өріп, өнерлерін ортаға салды.Халыққа деген құрмет оның салт-дәстүрін қастерлеумен бағаланады. Ал, салт-дәстүр қатысушы арулар мен жеңгелерінің бойында қаншалықты деңгейде сақталғаны сайыс барысында көрінді. Дәстүрге сай киіну үлгісі, әдеп-ғұрыптар мен салт-сананы танып білуі жан-жақты бағаланды. Қатысушы арулар қазіргі кезде ұмыт бола бастаған «Байғазы», «Босаға майлау» секілді салт-дәстүрлерді қайта жаңғыртқандай әсер қалдырды. Маңызы зор тағылымды іс-шарада мектеп-лицей ұстаздары қазылық етіп, сайыс ережесіне сай лайықты бағаларын берді.Сайыс соңында салт-дәстүрді сақтап, дәріптеуге атсалысқан қатысушылар арнайы номинацияларға иеленіп, Алғыс хатпен марапатталды. Сондай-ақ, ұйымдастырушылардың сый-сыяпатына ие болды. &nbsp;

Мектеп оқушылары қазақтың салт-дәстүрін ұлықтады

<a href="https://kyzylorda-news.kz/">Kyzylorda-news.kz</a>&nbsp; Өнердің ұлты мен тілі жоқ.&nbsp;Сан түрлі тарихи жағдайларға халықтың көзқарасын анық көрсете алатын құрал да – өнер. Н.Бекежанов атындағы облыстық академиялық- музыкалық драма театрының жаңа жылдағы алғашқы қойылымының премьерасы құндылығы жағынан кеше мен бүгінді таразыға салғандай. Мадина Омарованың «Шанель №5» деректі драмасы Ақмола лагерінің тұтқындары, яғни, «халық жауларының», «Отанын сатқандардың» әйелдері кешкен күйді, сәт сайын сезінген азапты жеткізе білді. Өткен ғасырдың басында саяси элитаға жала жабылды, атылды, түрмеге қамалды, ал жары мен балалары арнайы лагерьлерге жіберіліп, олар да озбыр қоғамнан жазықсыз жапа шекті.«АЛЖИР» (Отанын сатқандар әйелдерінің Ақмола лагері) Қарлагтың дербес бөлімшесі болып құрылған. Жаппай қуғын-сүргін науқаны әбден өршіген шақта мұндағы әйелдердің саны 12 мыңнан асып түскен деген дерек бар.Қойылым барысында қиянат пен қорлық көрсе де жігері жасымаған, болашаққа деген сенімін жоғалтпаған К.Майлина, Д.Ермекова, Ж.Шанина, Н.Сац, Р.Мессерер-Плицеская, С.Колчак, К.Андронникова, А.Тимирева, Г.Платайс сынды азаматтарына адал аяулы арулар небір нәубетті, қуғын-сүргінді бастан өткереді. Спектакльде «АЛЖИР» арулары өздерінің шынайы естеліктерін, өміріндегі сәулелі сәттерін, шұғылалы шақтарын бөліседі. Қазақ зиялыларының аяулы жарларын басқа қырынан тани түсеміз.Қойылымда әр кейіпкердің қилы тағдырын орыс жазушысы Б.Пельняктың жұбайы Кира Андронникованың рөліндегі Аида Тасымбетова баяндай отырып, пластикалық шешіммен шебер орындады. Бейімбет Майлиннің жұбайы Күнжамал Майлинаны театр актрисасы Зәуре Көздібаева да әсерлі орындап шықты. Сондай-ақ Дәмеш Ермекованы Зарина Кенжеәлі, Наталья Сацты Қарлығаш Айтжанова, София Колчакты Ақтолқын Төлеуова, Гетруда Платайсты Мирамкүл Пұшпақова, Жанбикені Бибідана Мақсұт, монахиняны Гүлназ Дәужігітова, Александраны Жауһар Еркінова, атаманшаны Баян Қали, Настяны Гүлмира Берікбай, француз қызды Ақбота Есмұхамбетова сомдап, өз кейіпкерлерінің ішкі жан дүниесін, күйзелісін, жан азабын, күйреуін нанымды жеткізе білді. Тергеуші жігітті ойнаған Нұрдәулет Баймаханов, надзиратель Мишинді ойнаған Қанат Архабаев, Юрий Узипенко рөліндегі Арай Көшімбаевтың да тың ізденістері байқалады.Айзат Ақылбек есімді көрермен: «Қазақ зиялыларының отбасылық өмірі мен олардың жарлары кешкен сан түрлі сұмдықты нәзік сезімдерімен бірге жеткізе білген шығармашылық ұжымға шабыт тілеймін. Көзіме қайта-қайта жас алдым. Әңгіме тек эмоцияда емес. Театрсүйер қауым бір сәтке өткен ғасырдың бас кезіне оралғандай күй кешті. Қазіргі сәтті, тынымсыз тіршілікті, жұмысты, мәселелерін ұмытып кеткендей болды. Санамызды сілкіп, рухымызды оята алды. Бір көріп ұмытып кететін емес, естен кетпестей спектакль» дейді.Айта кетейік, спектакльді көруге пьеса авторы, драматург Мадина Омарова, өнертану ғылымдарының кандидаты, профессор Анар Еркебай, жазушы, драматург Сұлтанәлі Балғабаев, кино және театр актері Ғани Құлжанов арнайы келіп, ізгі тілектерін білдірді.«АЛЖИР-ге» сталиндік қуғын-сүргінге ұшырағандардың әйелдері мен туған-туыстары қамалғанын атап өттік. Олардың «халық жауы» атанған күйеулері мен туыстарынан бас тартпағаны ерлігі мен тәуекел етуінің бір көрінісі еді. Жер бетіндегі тозақтың бірі саналған лагерь кейіннен өз алдына ауыл шаруашылық өндірісі, шеберханасы мен тігін фабрикасы бар сан салалы шаруашылыққа айналды. 1953 жылы жабылғаннан соң тұтқындар кенті «Малиновка» деп аталды.

«Шанель №5» драмасы әйелдер сезінген азапты жеткізе білді

<a href="https://kyzylorda-news.kz/">Kyzylorda-news.kz</a> &nbsp;«Наурызнама» онкүндігі бойынша бүгін – «Мәдениет және ұлттық салт-дәстүр» күні. Яғни, халқымыздың мәдениеті, өнері, төл құндылықтары, ұмыт болған әдет-ғұрыптары қайта жаңғыртылып, кеңінен насихатталады.Мән-маңызы айрықша мерекеде «Анаға тағзым» орталығында бүгінде көпшілік біле бермейтін бірқатар салт-дәстүріміз көрсетілді. Абылай хан атындағы №140 қазақ орта мектебі және А.Тоқмағамбетов ауылының ақ жаулықты аналарымен бірлескен шарада түпкі мағынасы терең, тағылым мен тәрбиеге толы «Босаға майлау», «Қамшы ілу», «Құрсақ шашу», «Құлақ тесу», «Шашбау тағу», «Шаңырақ тілеулесі» сынды дәстүрлеріміз дәріптелді.&nbsp;Сырдария ауданы, Асқар Тоқмағамбетов ауылынан арнайы келген асыл әжелер «Орталық берекелі-мерекелі, майдай жұғымды, көптің үйі болсын» деген ізгі тілекпен жаңа ғимаратымыздың босағасына май жақты. Содан соң, көпшілікке «Қамшы ілу», «Құрсақ шашу» дәстүрлерін көрсетті.Ал, Абылай хан атындағы №140 қазақ орта мектебінің ұжымы «Құлақ тесу», «Шашбау тағу», «Шаңырақ тілеулесі» дәстүрлерінен қойылым қойды. Халық ұғымында қыздың құлағын тесу ұлды сүндеттеумен пара-пар рәсім саналған. Сондықтан, балиғат жасына толған қыздың құлағын тесу үшін анасы, жеңгелері, апалары жиналып, қыздырылған инемен немесе қарапайым тарымен құлағын тескен. Тәрбиелік мәні зор дәстүр бойынша, үлкендер «сен енді сырғалы қыз болдың», «сырға таққан соң, қыз санатына қосылдың, енді саған қуыршақ ойнау жараспайды» деп, оның құлағына жайлап сіңіре берген. Мұның мәні – қыз бала қуыршақтың орнына қолына кесте алып, анасына көмекші болсын деген ниет.&nbsp;&nbsp;«Шаңырақ тілеулесі» де – бүгінгінің адамдары біле бермейтін мағынасы терең дәстүріміздің бірі. Елден жырақ кеткен ерлерді дәм-тұз туған жеріне тартып тұрсын деп, нанның бір үзімінен дәм татырған. Ал, бір бөлігін шаңыраққа тілеулес болсын деп алып қалған. Ізгі ниетпен ырымдалған дәстүрді Абылай хан атындағы №140 қазақ орта мектебінің ұжымы қойылым ретінде көпшілікке ұсынып, ұмыт болған ғұрыпты дәріптеді.&nbsp;Осылайша, «Мәдениет пен ұлттық салт-дәстүр» күнінде төл құндылықтарымыз ұлықталып, танымды әрі тағылымды, тәрбиелік мәні зор ғұрыптарымыз жаңғырды.

Оқушылар «Мәдениет және ұлттық салт-дәстүр» күнін атап өтті

<a href="https://kyzylorda-news.kz/">Kyzylorda-news.kz</a> Өткен жыл «Академик С.Жиенқұлов атындағы Байқоңыр жоғары колледжі» білім беру мекемесі үшін жағымды жаңалықтарға толы болды деп айтуға болады. Ең маңыздысы – жаңа бағыттағы өзгерістер. Алғашқысы – білім беру саласын цифрландыру аясында колледжіміздің бітіруші түлектеріне тапсырылатын дипломдар бланкі де QR кодпен беріле бастады. Студенттердің шәкіртақысының 50 пайызға көтерілуі де осы жылдың жағымды жаңалықтарының бірі болып отыр.<blockquote>– Колледжіміздің «Ғимараттар мен құрылыстарды салу және пайдалану» мамандығының ІІІ курс студенті Еркебұлан Жарылқапов «WorldSkills Kazakhstan – 2023» республикалық кәсіби шеберлік конкурсына «Кескіндеме және сәндік жұмыстар» құзыреттілігі бойынша қатысып, бақ сынады. Бәсекеге қабілеттілікті арттыратын сайыстардың нәтижесінде колледждің бірқатар ұстазы біліктілік арттыру курстарынан өтіп, биік белестерден көрінді. Әріптесіміз Шынаргүл Назарова «WorldSkills Kazakhstan – 2023» республикалық байқауының сертификатына ие болды. Қызылорда қаласында техникалық және кәсіптік білім беру ұйымдарының білім алушылары арасында әскериқолданбалы спорт түрінен «Отан қорғаушы – 2023» облыстық сайысына АӘД пәнінің оқытушысы Айбек Райымбаев студенттер қатыстырып, жүлделі орындар алды. ТМ-122 оқу тобы студенті Сәли Битөре АК-74 оқу қаруын толық емес бөлшектеу мен жинақтаудан І орын, Ғ-221 оқу тобының студенті Дамир Шынтемірұлы капитандар сайысынан ІІІ орын, А-120 оқу тобының студенті Нұрбол Оралбеков белтемір көтеруден ІІІ орын иеленді. Білім саласының ардагері Сәду Калимахановты еске алуға арналған президенттік тест сынама түрлерінен өткізілген облыстық жарыста 100 метрге жүгіру бойынша МС-123 оқу тобының студенті (жетекшісі Ғабит Қалыбаев) жүлделі ІІІ орын иегері атанды. Халықаралық деңгейде өткізілген «Біздің біліміміз – біздің қауіпсіздігіміз» атты ІХ ашық чемпионатта колледж командасы жүлделі ІІІ орынды жеңіп алды. «WorldSkills Kazakhstan – 2023» байқауының облыстық кезеңінен колледж студенті Али Маханбет (жетекшісі Сәкен Есеналиев) «Жеңіл автомобильдерді жөндеу және қызмет көрсету» құзіреттілігі бойынша ІІІ орынды иемденді. «Ұлағатты ұрпақ тәрбиесі бүгіннен басталады» атты облыстық конференцияға колледж оқытушысы Сәкен Есеналиев қатысып, ІІІ дәрежелі дипломмен марапатталды. Қызылорда қалалық «Жастар ресурстық орталығы» КММ мен И.Әбдікәрімов атындағы Қызылорда аграрлық-техникалық жоғары колледжі ұйымдастырған «Кәсіпкерлік – тұрақтылық және табыс» атты облыстық байқаудан студентіміз Еркебұлан Жарылқапов (жетекшісі Гүлжазира Байтерекова) ІІ дәрежелі диплом алды. Алдағы жылдың еншісінде жаңа мамандықтар ашу жоспарымызда тұр, – деді Шолпан Дәуленбаева, &nbsp;академик С.Жиенқұлов атындағы Байқоңыр жоғары колледжі директорының оқу ісі жөніндегі орынбасары.&nbsp;</blockquote>Оқу жылының &nbsp;басында мамандықтар бойынша оқу жұмыс жоспарлары, оқытушылардың жылдық жүктемелері, топтардың &nbsp;сабақ кестесі, &nbsp;өзара сабаққа кіру кестесі, факультативтік сабақ кестесі, ашық сабақ және апталық кестелері, үйірме жұмысының жоспарлары, сонымен қатар &nbsp;«Жас маман» мектебінің жұмыс жоспарлары бекітілген. Оқу жылынан бастап &nbsp;колледжде барлығы 35 педогог оқытушы қызметкерлер жұмыс істеп келеді. Колледж оқытушыларының сандық сапалық құрамы бойынша жоғары, бірінші санатты &nbsp;және педогог-зертеуші, педогог-сарапшы, магистр оқытушыларыды есептегенде – 31,4% құрайды.2023-2024 оқу жылында &nbsp;мемлекеттік бюджет (грант) негізінде оқитын – &nbsp;20 топ, ақылы негізінде 1 топ білім алуда. Барлық оқу тобының саны – 21. Биылғы оқу жылында сабақ уақытысы 80 минут, 1 апталық сабақ күндері 36 сағатты құрайды. Жұма және сенбі күндері факультативтік сабақ &nbsp;кестесі бойынша әр топқа 4 сағаттан, &nbsp;яғни аптасына 2 &nbsp;рет &nbsp;сабақ жүргізілді.2022-2023 оқу жылында «Академик С.Жиенқұлов атындағы Байқоңыр жоғары колледжі» білім беру мекемесінің &nbsp;25 инженер педагогтері ақылы негізде «TALAP» акционерлік емес қоғамымен жүргізілген біліктілік арттыру курсынан өтті. Ақылы негізде колледж директоры, 3 директордың орынбасары, «Дене тәрбиесі» пәнінің 2 оқытушысы біліктілік арттыру курсынан өтті. Республикалық бюджеттен бөлінген қаражат есебінен 2 оқытушы біліктілікті арттыру курсынан өтті. Сонымен қоса 2023-2024 оқу жылында 2 жалпы пән оқытушылары республикалық бюджеттен бөлінген қаражат есебінен біліктілік арттыру курсынан өтті.Колледжде «Сыбайлас жемқорлыққа» байланысты Байқоңыр қалалық прокуаторасымен 2 жақты, «Діни экстремизмге» байланысты, «Жастар мен жасөспірім қыздар арасындағы &nbsp;ерте &nbsp;жүктіліктің &nbsp;алдын алу» бойынша, «Кәмелетке толмағандардың &nbsp;жыныстық &nbsp;тиіспеушілік &nbsp;сипатындағы зорлық-зомбылық &nbsp;қылмыстары, &nbsp;кәмелетке толмағандар мен қылмыстар, &nbsp;суицидтің алдын &nbsp;алу» &nbsp;жөнінде, «Есірткі және нашақорлықтың &nbsp;алдын алу» &nbsp;профилактикалық &nbsp;шараларының &nbsp;2023-2024 оқу &nbsp;жылдарына арналған бірлескен іс-шаралар жоспарын &nbsp; &nbsp;Байқоңыр қаласының көпбейінді ауруханасы, ҚР ІІМ Байқоңыр &nbsp;қаласындағы &nbsp;Өкілділігімен 3 жақты жұмыс жоспарлары &nbsp;құрылып, &nbsp;жоспар бойынша жұмыстар &nbsp;атқарылып &nbsp;жатыр, – деді колледж директорының оқу ісі жөніндегі орынбасары.&nbsp;Білім &nbsp;беру &nbsp;мекемесінде &nbsp;қоғамдық &nbsp;жастар &nbsp;арасында &nbsp;белең &nbsp;алып бара &nbsp;жатырған &nbsp;өзекті &nbsp;мәселелер &nbsp;«Құқық бұзушылық және қылмыс, интернет қауіпсіздігі мен кибербуллинг, лудомания, нашақорлықтың алдын алу, зорлық-зомбылық, суицид және ерте жүкітіліктің алдын алу» &nbsp;тақырыбы &nbsp;аясында &nbsp;сала мамандарымен кездесу өткізілді. &nbsp;Шараның мақсаты – жастардың адам тәрбиесі мен қоғам тәрбиесіне байланысты көзқарастарын дұрыс қалыптастыра отырып, болашақта ұрпақ қамын, ұлт тағдырын ойлайтын қоғамның мүшесі болуларына жағдай жасау. Шараға &nbsp;Қазақстан Республикасы Ішкі ітер министрлігі &nbsp;Байқоңыр қаласындағы Өкілдігінің бастығы, полиция полковнигі Алтынбек Ахметов, &nbsp;Полиция бастығының қоғамдық тәртіпті сақтау жөніндегі орынбасары, полиция подполковнигі Илья Шкрум, &nbsp;Әкімшілік &nbsp;полиция &nbsp;бөлімінің &nbsp;бастығы, &nbsp;полиция &nbsp;подполковнигі &nbsp;Жандос Кулманов, Қазақстан Республикасы Ішкі ітер министрлігі &nbsp;Байқоңыр қаласындағы Өкілдігінің кәмелетке толмағандар істері жөніндегі учаскелік полиция инспекторы Ерлан Баймаганбетов Ресей Федерациясы Iшкі істер министрлігі Байқоңыр қаласындағы кәмелетке толмаған жөніндегі инспекторы, &nbsp;полиция аға лейтенанты Гулсезим Зуева &nbsp;қатысты.Сонымен қатар есірткі қылмысына қарсы іс-қимыл шараларын жүзеге асыру аясында Байқоңыр қалалық прокуратурасы пракурорының &nbsp;көмекшісі Бөлекбай Еркін, ҚР ІІМ Байқоңыр қаласындағы Өкілдігінің кәмелетке толмағандар істері жөніндегі учаскелік полиция инспекторы полиция аға лейтенанты Мурзагалиева Мерейдің қатысуымен &nbsp;жастардың арасында синтетикалық есірткінің зияны мен нашақорлықтың зардаптары туралы "Есірткі және жасөспірім" тақырыбында құқықтық түсіндірме жұмыстары жүргізілді. &nbsp;Шара барысында синтетикалық есірткінің, есірткі сатумен айланысатын адамдардың арбауына түспеу жолдары қарастырылды. &nbsp;Есірткі қабылдаған 10 адамның тек біреуі, өте ұзақ емделу арқылы ғана сауығатыны айтылды, оңай ақша табамын деп есірткі сатушылардың жалған уәдесіне сенудің қажеті жоқ екені ескертілді.Бүгінде бір елді ғана емес, әлемді жайлаған есірткі мәселесі өршіп тұр. Оған қарсы күрес жүргізу үшін дүниежүзі мемлекеттері аянып қалып жатқан жоқ. Соның ішінде Қазақстан да есірткіге қарсы күресте мемлекеттік саясат жүргізіп, нашақорлыққа және есірткі бизнесіне қарсы күрестің бағдарламасын іске асыруда.Адамзат өміріне қауіп төндіріп отырған есірткінің зиянын түсіндіре отырып, саналы, салауатты өмір салтын ұстануға шақыру мақсатында сала мамандарымен бірлесе отырып «Есірткіге жол жоқ» &nbsp;тақырыбында академик С.А.Джиенкулов Атындағы Байқоңыр жоғары колледжінде 1-курс студенттеріне түсіндірме жұмыстары жүргізілді.Шараға Байқоңыр қаласының көпбейінді &nbsp;ауруханасының &nbsp;дәрігер психологы Серікова Мөлдір, &nbsp;ҚР ІІМ Байқоңыр қаласындағы өкілдігінің әкімшілік полиция бөлімінің кәмелет жасқа толмаған жасөспірім істері жөніндегі учаскелік полиция инспекторы М.Мурзагалиева, колледж директорының тәрбие ісі жөніндегі орынбасары Сыргаш Айбосынова, колледж медбикесі Молдир Пошанова &nbsp;қатысып, тақырып аясында өзекті ақпараттармен бөлісті. Шара соңында студенттер сала мамандарына сұрақтар қойып еркін пікір алмасты. Қызылорда облыстық білім басқармасының және Қызылорда облыстық оқу орталығының (әдістемелік кабинет) жұмыс жоспары негізінде &nbsp;«Кескіндеме және сәндік жұмыстар», &nbsp;«Сән технологиясы», &nbsp;«Жеңіл автомобильдерді жөндеу және қызмет көрсету», &nbsp; құзыреттіліктері бойынша колледжішілік «WORLDSKILLS» республикалық кәсіби шеберлік конкурсына жүлделі жеңістерімен танылып жүрген студенттің бірі – Жарылқапов Еркебұлан да қатысып, &nbsp;І дәрежелі дипломға ие болып, облыстық кезеңге жолдама алды. Мұнан бөлек «Өрлеу» біліктілікті арттыру ұлттық орталығы ұйымдастырған «Педагогикалық жобалау – техникалық және кәсіптік білім берудегі оқу процесін құру мен ұйымдастырудағы инновациялық стратегиясы» тақырыбында 80 сағаттық біліктілікті арттыру курсын аяқтағаны үшін колледжіміздің 25 оқытушысына сертификат &nbsp;тапсырылды. Сонымен қатар Қызылорда &nbsp;облыстық оқу орталығы мен М.Саламатов атындағы Қызылорда қызмет көрсету және сервис колледжі ұйымдастырған техникалық және кәсіптік білім беру ұйымдарының білім алушыларының арасында «Үздік техник-2024» атты облыстық байқауға &nbsp;ТМ-122 оқу тобының студенті Максутов Елмұрат (жетекшісі Ажар Арықбаева) қатысып, жүлделі ІІІ орынды қанжығасына байлады.Оқу орнындағы биылғы жылдың басты жаңалығы – заман талабына сай мамандар даярлауда өзіндік тәжірибесі бар білім ордамыздың құрылғанына 20 жыл толып отыр. Бұл айтулы датаға орай көптеген іс-шаралар жоспарлануда. Сәуір айында «Жас өнертапқыш – 2024» тақырыбында халықаралық байқау өткізілетін болады.Наурыз мерекесі қарсаңында «Академик С.А. Джиенкулов атындағы Байқоңыр жоғары колледжі» білім беру мекемесінде “ҚОШ КЕЛДІҢ, ҚҰТТЫ НАУРЫЗЫМ" такырыбында мерекелік кеш болып өтті. Мерекелік іс-шарамыздың қадірлі мейманы болып "AMANAT" партиясы Байқоңыр филиалының төрағасы Е.О.Рзалиев, «АСАРПЛЮС» ЖШС директоры С.Б. Жумадиярав, ата-аналар комитетінің мүшесі Р.Артыкбаева, "AMANAT" партиясы Байқоңыр филиалының есепке алу және статистика секторының меңгерушісі К.А.Муханова қонақта болды.&nbsp;Шара барысында салт-дәстүріміздегі әдет-ғұрыптарды дәріптеу мақсатында колледждің студенттерімен ұстаздарынан құралған әр топ ауыл-ауылға бөлініп, атап айтсақ «Жиенқұлов» ауылы құда күту, «Бәйтерек» ауылы сырға салу, «Үйрек» ауылы келін түсіру, «Абай ауылы» бесікке салу, Жамбыл ауылы тұсаукесер көріністерін көрсетті. Сонымен қатар келген қонақтарды шашу шашып қарсы алып, Наурыз көжеден ауыз тигізді. Домбырамен тартылып, әндер шырқалды. Қаймағы бұзылмаған қазақы салт-дәстүріміз қайта қанат жайып, ұлттық спорттық ойындар ойнатылды.

Байқоңырлық білім алушылар Наурыз мерекесін тойлады

<a href="https://kyzylorda-news.kz/">Kyzylorda-news.kz</a> Тарихта Наурызды тойлау сегіз-тоғыз күнге жалғасса, биыл елімізде қазақтың жаңа жылы – Наурыз мерекесі жаңа форматта жаңғырып «Наурызнама» деген атпен он күн қатарынан тойлануда. Он күн ішінде «Қайырымдылық», «Шаңырақ», «Ұлттық киім», тағы басқа секілді тақырыпта іс-шаралар ұйымдастырылып, дәстүріміз қайта жаңаруда.Татулығымен көпшілікке таныс Қармақшы ауданындағы ІІІ Интернационал ауылы 19 наурыз – Жаңару күнінде мерекені ерекше атап өтті. Ұлты бөлек болғанымен тілегі бір ағайын бұл күні таңнан ауылдағы мәдениет үйінің алдына жиналды. Мерекенің көрінісі ретінде ауылдың жасы мен кәрісі бір-бірімен құшақ жая амандасып, төс қағысты. Мұнан соң наурызда жасалу керек игі істердің, ізгі дәстүрдің бірі – ағаш отырғызу рәсімі басталды. «Атадан мал қалғанша тал қалсын» деген тәмсілмен Жаңару күнінде қолына көшет ағашын ұстаған ауыл ақсақалдары қыстан кейін босаған қара жерге күрек басын қадап, «Бісміллә» деп қазып, қаз-қатар тал отырғызып, суғарды. Үлкендердің тәлімді ісін жастар да жалғастырып, ауылдың көгеруіне өз үлестерін қосты. Осылайша ауылда мерекенің алғашқы қадамы басталып, әрі қарай ұлан-асыр тойға ұласты.Орталық алаңның бір бұрышында ауылдың ұл-қыздары алтыбақанды айнала қоршап мәз-мейрам болып кезекпен тебісіп, наурыздың сәнін кіргізді. Алаңнан әрі жігіттер жылқыны ерттеп, даланы дүбірлетіп ат шапты. Қамшыланған жылқылар жердің шаңын шығара ойқастауда. Мерекеде ұлттық спорт түрлері де жаңғырды. Боз кілемде жас палуандар күресіп, өзара мықтылығын көрсетті. Ауылдың спорт сүйер жанкүйерлері жан-жақтан «Қане батыр, жерге көтеріп жық» деп айқайласып, спортшыларды рухтандырды. Оған жігерленген палуандар бірін жерге жығып, жеңіске жетті. Одан әрі ауылдың шуласқан балалары асық атып жарысты. Сақасы салмақтылар тізілген асықты алыстан көздеп-ақ, бір шерткеннен жайратып салды. Осыған қарап, ұлттық ойынымыздың жұрнағы жастардың бойында әлі де өшпегенін сезіндік. Тоғызқұмалақ, арқан тартыс, гір тасы мен қой көтеруде ойыннан қалыс қалмады. Қармақшы аудандық тарихи-өлкетану музейі ауыл тұрғындарына бес қару, ат әбзелдері, ер тоқым, зергерлік бұйымдар, ұлттық әуез аспаптарынан көрме көрсетті. Бүгінде мұражайдан ғана көрініс табатын қазақтың байырғы қаруына ауылдың үлкендері қызыға қарап, қолға ұстап көрді.Мәдениет үйінің алаңына қаз-қатар тігілген ақшаңқан киіз үйлер шараның шырайын келтірді. «Береке», «Татулық», «Достық» атауымен аталған ақ отаулардың алдында салт-дәстүр көрініс тауып, ұлттық құндылықтар дәріптелді. Бірінші ауыл салт бойынша қыз ұзатса, келесі ауыл бесікке салу рәсімін өткізді. Ал үшінші ауыл келін түсіріп, беташар жасады. Шаңыраққа түскен жас келін үлкендерге сәлем салып, батасын алды. Сондай-ақ іс-шараға Қармақшы ауданы әкімінің орынбасары Самат Смағұлов, аудандық дене тәрбиесі, спорт және туризм бөлімі басшысының міндетін атқарушы Нұрбол Мырзабаев қатысып, бүлдіршіндердің тұсауын кесті.Жаңару күніндегі мерекелік іс-шара ауыл өнерпаздарының Қыдыр ата туралы қойылымымен жалғасты. Ауылда достықтары туыстыққа ұласқан қазақ, түрік, корей, орыс, украин, татар, әзірбайжан, ұлтының өкілдері бір-бірімен төс қағыстырып, ізгі тілектерін жеткізді. Аудан әкімінің орынбасары Самат Қыдырбекұлы бірлігі жарасқан ауыл тұрғындарын Ұлыстың Ұлы күнімен құттықтады.<blockquote>– Наурыз – күн мен түннің теңеліп, табиғаттың жаңаратын, бәріміз үшін берекенің бастауы болған мейрам. Тамыры тереңге кеткен мереке – халқымыздың болмысы, ырысы мен бірлігі, өнері мен мәдениеті. Ұлыстың Ұлы күні әз Наурыз – барлық ұлт пен ұлыстың басын қосқан, ел бірлігіне үндеген бүкіл халықтық мерекеге айналды. Биыл Мемлекет басшысы Қасым-Жомарт Тоқаевтың бастамасымен жаңа жылымыз он күн бойы тойланып, аймағымызда жақсы іс-шаралар өтуде. Ауданымыздың көркеюі, өсіп-өркендеуі өздеріңізбен бірге атқарған адал еңбектің, тынымсыз тірліктің жемісі. Баршаңызды Рамазан айымен қатар келген Наурыз мерекесімен шын жүректен құттықтаймын, – деді аудан әкімінің орынбасары.</blockquote>Ауылдың «Қазына» әжелер ансамблі ескінің есті ендерін шырқап, шараның шырайын кіргізді. Сонымен қатар қазақтың ұмыт болып бара жатқан ұлттық тағам түрлері әзірленіп, келушілерге ұсынылды. Думанды мерекені ауыл өнерпаздары концерттік бағдарламамен түйіндеп, тұрғындар естен кетпес жақсы көңіл күймен тарқасты.

Қазақстан және Қызылорда облысының жаңалықтары: Мәдениет