<a href="https://kyzylorda-news.kz/">Kyzylorda-news.kz</a> «Қызылорда облысы бойынша әйелдер күштері Альянсы» қоғамдық бірлестігі мен М.Мәметова атындағы Қызылорда педагогикалық жоғары колледжі ынтымақтастықты нығайту мақсатында әріптестік меморандумға қол қойды.Шараға «Қызылорда облысының әйелдер күштері Альянсының» төрайымы Ахметова Рахима Қаржаубайқызы, «Қызылорда облысының әйелдер күштері Альянсының» саяси көшбасшылық мектебінің басшысы Бихожа Сәрсенкүл Байдешқызы, қалалық маслихат депутаты Мусабаева Айгүл Нажмадинқызы, Сырдария аудандық мәслиханың депутаты Ибадуллаева Динара Дүйсенбекқызы, оқу орны басшысы Тоғанова Жақсыгүл Қоханқызы, колледж оқытушылары және «Көшбасшы мектебі» клубының қыздары қатысты.&nbsp;<blockquote>«Көшбасшы мектебі» клубының мақсаты – қыз балалар бойындағы көшбасшылық қасиетті дамыту, зияткерлік және тұлғалық даму, интеллектуалдық деңгейін арттыру. Жиында аймақтық Аналар кеңесі төрайымы Рахима Ахметова бүгінгі қыздар ертеңгі әйел-аналардың қоғамдағы рөлі, қыз балалардың бойындағы көшбасшылық қасиеттің маңызы туралы кеңірек айтып өтті.</blockquote>Білім ордасының бірлескен әлеуметтік жобасы болып табылатын «Көшбасшы мектебі» қыздар клубы 2 жылдан бері жұмыс жасап келеді. Сондай-ақ, «Көшбасшы мектебі» ұйымына білім ордасындағы 30 студентіміз мүше. Оқу орнымыздың қазақтың батыр қызы – Мәншүк есімінде болуы да біздер үшін мақтаныш, әрі үлкен жауапкершілік. Рахима Қаржаубайқызы бастаған облыстық Аналар кеңесі осы жұмысымызды бір жүйеге келтіріп, ауқымын кеңейтіп оны насихаттауға үлкен қолдау жасап келеді. Осы орайда «Көшбасшы мектебі» клубының мүшелері де клубтың ашылғанына ризашылықтарын білдіріп, өздерінің ұсыныстары мен алдағы жоспарларымен бөлісті.&nbsp;Тағылымы мол шарада колледж басшысы Жақсыгүл Қоханқызы ұлттық құндылықтар дәріптеле түсетін аталмыш шараның маңыздылығын атап өтіп, қонақтарымызға колледж тарихы, ұлағатты ұстаздардың еңбек жолы жайлы «Білім шамшырағы» және «Ерлік шамшырағы» атты кітаптарын тарту етті.&nbsp;Танымдық кеште колледждің «Өнер» бөлімінің оқытушылары қонақтарымыздың құрметіне әннен шашу шашты. Кеш қонақтары әлеуметтік әріптестік үшін колледж басшысы Жақсыгүл Қоханқызы мен колледж ұжымына жылы лебізі мен ризашылықтарын білдірді.&nbsp;Заман талабына сай қиындығы мен қызығы қатар жүретін отбасы және қызмет жолдарын шебер үйлестіре жолатын апаларымен кездесу - қызғалдақтай құлпырған қыздарымызға ұмытылмас өнегелі сәт болары анық.

Меморандумға қол қойды

<a href="https://kyzylorda-news.kz/">Kyzylorda-news.kz</a> М.Мәметова атындағы Қызылорда педагогикалық жоғары колледжінде “Бастауыш білім берудің педагогикасы мен әдістемесі” бөлімінің ұйымдастыруымен “Тиімді қарым-қатынас - адамгершілік негізі” тақырыбындағы шеберлік сағаты өтті.&nbsp;Шараға директордың тәрбие ісі жөніндегі орынбасары Гүлдана Исаева және педагогтер қатысты. Ал шеберлік сағатын “Бастауыш білім берудің педагогикасы мен әдістемесі” бөлімінің оқытушысы Айнұр Жетілгенова өткізді.<blockquote>"Тәрбиесіз берілген білім адамзаттың қас жауы" деп әлемге әйгілі ойшыл, ғалым әл-Фараби айтқандай, педагогтың білімімен қатар мінезінің жақсы болуы, ойы мағыналы, сөзі әдепті болуы өте маңызды. Білім алушылармен дұрыс қарым-қатынас орнату арқылы студенттерді жаңа бастамаларға қызықтырып, бұрын білмеген қабілетін, шығармашылық бейімділігін ашуға мүмкіндік алады. Қарым-қатынас – адам іс-әрекетінің ауқымды саласы, ол өмір сүрудің, тыныс-тіршіліктің негізгі арқауы болып табылады. Адам тек сөйлеу арқылы ғана қарым-қатынас жасамайды. Ол айналасындағылармен түрлі ым-ишара, белгі, таңба арқылы да бір-біріне мағлұмат бере алады. Әртүрлі ақпарат пен жаңа әдіс-тәсілдерге толы шеберлік сағатының да маңызы жоғары болды.</blockquote>Аталған тәжірибе алаңында оқытушы өзінің жеке тәжірибесінен түрлі техникалар мен жаттығулар көрсетіп, қатысушыларға жаңа білім берді.Отызға жуық ұстаз біріккен жиында ұжымдық қарым-қатынасты нығайтып, топпен жұмыс жасай алу қабілеттерін шыңдайтын “Шаңырақ көтеру” жаттығуы, топ ішіндегі ауызбіршілікті нығайту мақсатындағы “Шатыр” әдісі, бала бойындағы ашу, ыза, ренішті ішке сақтамай, эмоциясын еркін шығаруға үндейтін “Ашулы шар” тренингі және жасөспірімдер арасындағы келемеж, жеке басқа қолсұғушылық, мазақтау сынды жағдайлардың алдын алу үшін “Буллингке жол жоқ” тренингі мен көңіл күйді көтеру, жақсы дүниелер айтып, айналаға позитивті көңіл күй сыйлауды арттыратын “Сиқырлы қобдиша” жаттығуы жасалды. Қатысушы ұстаздар барлық ойын-жаттығуларына белсене атсалысып, шара соңында Айнұр Жетілгеноваға зор алғыстарын білдірді.

Педагогтер шеберлік сағатына қатысты

<a href="https://kyzylorda-news.kz/">Kyzylorda-news.kz</a> Астана қаласындағы EXPO Конгресс-орталығында 25-26 сәуір күндері ENACTUS KAZAKHSTAN NATIONAL EXPO 2024 мектеп оқушылары мен студенттік кәсіпкерлік ұлттық кубогы өтеді. Қазақстанның барлық өңіріндегі мектеп оқушылары, колледждер және ЖОО студенттері, сондай-ақ бизнес және білім беру саласындағы көшбасшылары бас қосатын байқауда Қорқыт ата атындағы Қызылорда университетінің студенттері де бақ сынамақ. Жалпы көрмеге 200-ден астам команда қатысады деп жоспарлануда.Былтыр чемпионатқа 100-ден астам команда қатысқан болатын. Бұл командалар оқу жылы бойы әлеуметтік-кәсіпкерлік, экологиялық және инновациялық жобаларды әзірледі.&nbsp;Білім сайысының нәтижесінде Қарағандыдан келген ENACTUS BUKETOV UNIVERSITY кубок иегері атанды. Команда ұлттық чемпионы атағымен қоса Нидерландының Утрехт қаласында өтетін&nbsp; ENACTUS World Cup 2023 кубогында өнер көрсетуге жолдама алды.&nbsp;<blockquote>«ENACTUS – лидерлік, кәсіпкерлік және&nbsp; дербестік мектебі. 15 жыл ішінде біз талантты және мақсаты биік балаларға студенттік жылдардан бастап табысты мансап пен бизнес құруға мүмкіндік беретін тұтас әлеуметтік институтты құра алдық», – деді бағдарлама жетекшісі, &amp; CEO ENACTUS KAZAKHSTAN президенті Альбина Ержанова.</blockquote>Былтыр «Enactus Korkyt Ata university» командасы экологиялық табиғи таза өнім әзірледі. Олар «Active seat» көрпешесін күріш қауызынан жасап шығарды.<blockquote>«Қазіргі уақытта адамдар уақытының көбін отырып жұмыс істеумен өткізеді. Бұл денсаулыққа үлкен зиян келтіріп, көптеген аурудың пайда болуына себепші болады. Осы орайда, біз ыңғайлы әрі денсаулыққа пайдалы «Active Seat» көрпешесін шығаруды қолға алдық. Өнімнің басты компоненттерінің бірі &nbsp;– күріш қауызы. Өңірімізде жыл сайын 100 тоннадан астам күріш қалдықтары полигондарда өртеледі. Бұл процесс табиғатқа да, адам денсаулығына да айтарлықтай кері әсерін беруде. Жобамыз – аймағымыз үшін де, тұрғындар үшінде пайдалы», – &nbsp;деді «Enactus Korkyt Ata university» командасының капитаны Темірлан Абжанов.</blockquote>Сондай-ақ, Enactus Korkyt ata ұйымы өткен жылы 5-8 сынып оқушыларына тегін қаржылық сауаттылық курсын жүргізді. Бұл сабақтар KMF&amp;KMF-Демеу Корпоративтік қорының «FINBOSS» қаржылық сауаттылық негіздері» аясында өтті.Ал биыл жаңа идеялар мен стартаптардың басы-қасында жүретін студенттер жаңа инновациялық жобаға қызу дайындық үстінде.ENACTUS KAZAKHSTAN NATIONAL EXPO 2024 - Қазақстандағы ENACTUS халықаралық бағдарламасының қатысушыларының жоба бойынша нәтижелерінің жыл сайынғы көрмесі. Іс-шараға демеуші компаниялардың көрмесі, бос орындар жәрмеңкесі, іскерлік кездесулер, питчинг және қатысушыларға арналған арнайы байқаулар кіреді.Басты оқиға студенттік кәсіпкерліктің ұлттық кубогының финалы болып табылады, оның нәтижелері бойынша жеңімпаз команда ENACTUS WORLD CUP 2024 әлем чемпионатында Қазақстанның намысын қорғау құқығын алады.ENACTUS тарихында әлемдік кубоктар Лондон, Париж, Йоханнесбург, Пекин, Вашингтон сияқты қалаларда өтті, биыл Дүниежүзілік біріншілікті өткізу құқығын біздің еліміз жеңіп алды. Бірінші рет ТМД-да, атап айтқанда, Қазақстанның елордасы Астана қаласында үздік студенттік бизнес - жобалардың Әлемдік кубогы өтеді.Ауқымды сайыстың ұйымдастырушысы – ENACTUS Kazakhstan қоры. Ал ресми демеушілер – Olzha Agro, KMF&amp;KMF-Демеу, TURAN табиғи суы, Eurasian Resources Group, Raimbek Group, KT Cloud Lab, White&amp;Case, Caravan Resources, Kazakhstan Mining, TSSP, KazAgroFeed, ABS Строй, Leader Еngineering group, NES Kazakhstan. Ресми серіктестер – "Kazakh Tourism" Ұлттық компаниясы" АҚ, "Атамекен" ҰКП, ҚР жоғары білім және ғылым министрлігі.Бағдарлама бойынша World Cup League: ENACTUS Ұлттық кубогы, ENACTUS World Cup 2024 әлемдік кубогына жолдама үшін басты байқау алаңы, Early Stage League: ерте кезеңдегі жобалар байқау алаңы, ENACTUS #NextGenLeaders Мектеп кәсіпкерлігінің V Республикалық чемпионаты, Колледж студенттері арасындағы ENACTUS Kazakhstan кубогы өткізілмек.&nbsp;ENACTUS KAZAKHSTAN Ұлттық кубогында жас көшбасшылар 17 ТДМ-ға қол жеткізуге бағытталған әлеуметтік-кәсіпкерлік, экологиялық және инновациялық жобаларды көрсетеді.

ENACTUS KAZAKHSTAN NATIONAL EXPO 2024: Ауқымды байқауда қызылордалық студенттер бақ сынайды

Биылдан бастап балаларды бірінші сыныпқа қабылдау тәртібіне өзгеріс енгізілді.Тиісінше, Egov.kz «Электрондық үкіметтің» веб-порталы арқылы шағын мөлтектегі білім беру ұйымдарын автоматты түрде таңдау қарастырылған. Осы арқылы сынып жинағы да автоматты түрде жинақталады. Сондай-ақ, «электронды үкімет» порталы арқылы білім беру ұйымымен келісім шарт электрондық форматта жасалатын болады. Жалпы, облыста бірінші сыныпқа құжат қабылдау 1 сәуір мен 31 тамыз аралығында жүргізіледі. Бұл жөнінде Өңірлік коммуникациялар қызметінің ақпарат алаңында облыстық білім басқармасы басшысының орынбасары Бағдат Бердаулетов хабарлады.<blockquote>-Осы жылы бірінші сыныпқа құжаттарды қабылдау мерзімі 31 тамызға дейін ұзартылды. Қазіргі таңда балаларды бірінші сыныпқа қабылдау тәртібіне енгізілген өзгеріске байланысты ата-аналарға тиісті түсіндірме жұмыстары жүргізілуде. Ал білім беру ұйымдарында арнайы E-gov өзіне-өзі қызмет көрсету бұрыштары жасақталған. Биыл облыс бойынша 2024-2025 оқу жылына 17 448 бала бірінші сыныптың табалдырығын аттайды деп жоспарлануда. Оның ішінде қазақ тілінде оқитын оқушылар саны – 16 345 бала болса, орыс тілінде білім алатын балалар саны – 1 103 құрайды. Дегенмен, балалардың мектепке дайындығы да аса маңызды. Осы ретте, балабақша немесе білім беру ұйымдарының даярлық тобында тәрбиеленбеген балалар үшін тамыз айында өңіріміздегі барлық мектептерде дайындық сыныптары жұмыс істейтін болады. Бұл өз кезегінде оқушылардың қыркүйек айынан бастап сабақ процесіне кедергісіз енуіне мүмкіндік жасамақ, - деді Бағдат Қамбозұлы.</blockquote>Қызылорда қаласында үш тілде оқытатын дарынды балаларға арналған мамандандырылған сыныптары бар білім беру ұйымдарында үш ауысымды оқытудың алдын алу үшін қажетті шаралар қабылданды. Мәселен, аталған білім беру ұйымдарына қосымша құрылыс нысандары салынып, балалардың санына орай сынып кабинеттері жасақталды. Сондай-ақ, бірінші сыныпқа қабылдау реттілігі 9,11 сынып бітірушілердің санына қарай сынып жинақтау тапсырылды.Фото: Нұрболат Нұржаубай

Бірінші сыныпқа құжат қабылдау тәртібі өзгерді

<a href="https://kyzylorda-news.kz/">Kyzylorda-news.kz</a> &nbsp; Ғылым - дамуды, шыңдауды талап етеді. Ал оған құмартқан әрбір жан өз саласының өзегіне ұмтылып, ізденісін арттырып, биікке бой ұрса әр сала өзінше даму жолына түседі. Бүгінде өңірімізде ілім мен білімді ұштастырып, ілкімді істер атқарып, шәкірт тәрбиелеу жолында жүйелі жұмыстардың басында жүрген ғалымдар да аз емес. Солардың бірі Қорқыт ата атындағы Қызылорда университетінің оқытушылары Гүлзира Оралова мен Анғысын Сейтмұратов. Айтулы мереке қарсаңында мәртебелі мамандық иелері өз саласындағы жұмыстарды баяндап, ойлы әңгіме өрбітті.<blockquote>– Елдің өсіп жетілуі ғылымнан, оқу-білімнен. Ғылымға Президентіміз Қасым-Жомарт Кемелұлы көп көңіл аударып, үлкен қаржылар бөлініп жатыр. Бүгінде Қорқыт ата университеті Кореядағы Сеул қаласымен байланыс орнатып, Физика информатика бағытында жемісті жұмыстар жүргізіліп жатыр.</blockquote>Қызылорда қаласында физика мектебі ашылып жатыр. Қызылордада ашылып жатқаны біздер үшін үлкен мәртебе. Өз кезегімізде біз де жас буынға білгенімізді үйретіп, ғылымға баулудамыз. Университеттің әлеуеті жақсы. Жастардың да білімге қызығушылығы көңіл қуантады,&nbsp;– деді Анғысын Жасаралұлы.– Бүгінгі мерейлі күні жүздесіп отырғаныма қуаныштымын.<blockquote>Біз қазақ әдебиеті, ұлт әдебиетінің құрамдас бөлігі болып саналатын Сыр әдебиетіне бағыт түзеп, жұмыс атқарып келеміз. Өңірімізге қатысты әдеби мұраларды зерделеу жұмыстарын жүргіземіз. Біздің мақсат - Сыр өңіріндегі киелі жерлерді анықтау, ұлттық құндылық тұрғысында бағалау. Өзіміз зерттеу жұмыстарын жүргізген дүниелерге түрлі талдау жасап, шетел басылымдарына ұсындық. Бүгінде жас зерттеушілердің де қатары көбеюде. Бұл әрине өз кезегінде атқарылған жұмыстың жемісі деп білемін. Ғылымға ұмтылып, салаға бой ұрған барша ғылым қызметкерлерін айтулы мерекемен құттықтаймын,- деді Гүлзира Сапарқызы.</blockquote>Фото: Қызылорда облысының Өңірлік коммуникациялар қызметі

Бүгін - Ғылым қызметкерлері күні

&nbsp; <a href="https://kyzylorda-news.kz/">Kyzylorda-news.kz</a>&nbsp; &nbsp;Педагог болу – жауапты іс, әсіресе педагог – дефектологтың еңбегі ауыр, себебі, ол өз дамуында қалыптан ауытқыған, кемтар балаларды оқытып, тәрбиелейді. Мұндай мамандықтың ауырлығына қарамастан С.Сейфуллин атындағы №165 орта мектепте бес жылдан бері мол тәжірибе жинаған дефектолог маман Айым Төремұратқызы балалармен тығыз қарым-қатынас құрып келеді.&nbsp;Қазіргі таңда керемет білім ордасында балаларға жәрдем беріп қана қоймай, ол ерекше білім беруді қажет ететін оқушылармен, психикалық дамуы тежелген, оқу мен жазу &nbsp;және сөйлеу тілінде бұзылыстары бар оқушылармен түзете-дамыту жұмыстарын жүргізеді. Оның айтуынша, С.Сейфуллин атындағы №165 орта мектепте ерекше білім беруді қажет ететін оқушылар саны – 21 оқушы, оның ішінде – 6 оқушы үйден оқиды.<blockquote>&nbsp; &nbsp; &nbsp; &nbsp;&nbsp;– Білімге ұмтылған жас баланың қолынан ұстап, қоршаған ортаға бейімдеу, қоғамның толыққанды мүшесі ету, өз мүмкіндігінің шексіз екендігіне сендіру, маған ерекше көңіл-күй сыйлайды. "Менің еңбегім – менің жемісім" деген ұстанымдамын. Өзімді дамыту үшін көптеген сайыстарға қатысуға тырысамын, – дейді Айым Қалмырза.</blockquote>Жалпы, дефектолог дегеніміз не? Медицина мен педагогиканы біріктіретін мамандық бар. Бұл дефектология. Дефектология саласындағы маман ерекше балалар мен олардың ата-аналары үшін ең жақсы дос және кеңесшіге айналуы керек. Дефектолог – бұл физикалық немесе ақыл-ой дамуында артта қалған балаларды оқытуға мамандандырылған мұғалім.Дефектолог қандай қасиеттерге ие болуы керек? Дефектолог мұғалім балалардағы бар ауытқуларды диагностикалап, олардың орнын толтыру жолдарын іздестіруге, сонымен қатар проблемалы баланың дамуына бағытталған белгілі бір сабақ курсын өткізуге қабілетті болуы керек. Бала мен маман арасында жас ерекшеліктері болмауы керек. Соңғысы, жас ұрпаққа деген сенімділікке ие болып, балаға дос бола білуі керек.Бұл педагогикалық жұмыста кемтарлықтың бетін қайтарып, жеңуді, баланың жеке басының қалыптасуына көмектесуді, оның жалпы дамуын алға жылжытуды, оны белгілер білімдер жиынтығынан хабардар етуді, онда өмірлік маңызы бар білік, дағдыларды қалыптастыруды, сондай-ақ, оның сәтті әлеуметтік бейімделуін іске асыруды көздейтіндей етіп, ұйымдастыруды қажет етеді. Мұғалімнің педагогикалық шеберлігі, білімдарлығы, ойлампаздығы, іске адал көзқарасы баланың табысқа жетуіне белгілі дәрежеде көмектеседі.Педагог – дефектологтар кемтар балалармен ғана жұмыс істеп қоймайды. Оның қызмет өрісіне басына түскен бақытсыздыққа қатты күйзелетін, қиын жағдайларда өздерін түрліше ұстайтын ата-аналар да кіреді. Ата-аналардың бір тобы балаларының болашағы үшін күресуге іштей дайын емес, өзін күресуге дәрменсіз, шарасыз сезінеді, күресудің пайдасы да жоқ деп есептейді. Енді, бірі белсене кірісіп, білместіктен баласына пайдадан гөрі зиянын тигізеді. Кейбір ата-аналар баласын тәрбиелеуге құлшына кірісіп, нәтиже тез байқала қоймаған соң әрекетсіздікке көшеді.Осыншама жүктемені атқарып жүрген жас маманның еңбегі аз уақытта ескеріліп, түрлі алғысқа бөленген. Атап айтқанда, Қазалы аудандық білім бөлімінің әдістемелік кабинетінің ұйымдастыруымен педагог-дефектологтардың бірлестік отырысында кәсіби іскерлігін танытып, іс-тәжірибесімен бөліскені үшін Қазалы аудандық білім бөлімінің Алғыс хатымен, Қызылорда облыстық оқу орталығы әдістемелік кабинеттің ұйымдастыруымен «Білім беру ұйымдарында ЕББҚ балаларды қолдау: Арнайы маманның қызметі» атты облыстық семинарда «Ерекше білім беруді қажет ететін оқушыларды түзете-дамыту жұмысында заманауи технологияларды тиімді пайдалану» тақырыбындағы шарада Облыстық оқу орталығының &nbsp;Сертификатымен, Қазалы ауданының әкімінің Алғыс хатымен, Қызылорда облыстық білім басқармасының Алғыс хатымен марапатталған. Сонымен бірге, Қызылорда аудандық білім бөлімінің ұйымдастыруымен «Инклюзивті білім беруді цифрландыру жағдайында заманауи әдістер арқылы дамыту» тақырыбында өткізілген аймақтық әдістемелік семинар-практикумда іс-тәжірибесімен бөліскендігіне Қазалы аудандық білім бөлімінің Алғыс хаты табысталған. Сондай-ақ, аудандық, облыстық «Үздік дефектолог – 2023» байқауында &nbsp;жүлделі бірінші орынды жеңіп алған.<blockquote>&nbsp; &nbsp; &nbsp; – Оқушыларымның түрлі қабілеттерін шыңдау мақсатында балаларды сайыстарға қатыстырып келемін. Жеткен жетістіктеріміз – білім беру ұйымдарындағы ерекше білім беруге қажеттілігі бар балалардың танымдық қызығушылықтарын, шығармашылық әлеуетін дамыту мақсатында «Менің қолымнан бәрі де келеді» атты олимпиадасында аудандық кезеңде А.Елубай екінші орын, ПМПК мекемесінің ұйымдастыруымен «Күз кереметі» қолөнер байқауында М.Ысқақ Алғыс хатпен, Ерекше білім беруге&nbsp;қажеттілігі бар &nbsp;оқушылар арасында өткізілген «Шексіз шығармашылық» республикалық байқауында «Қазақстан – менің алтын бесігім» номинациясы бойынша А.Илияс II дәрежелі дипломмен марапатталды. Ерекше білім беруге &nbsp;қажеттілігі бар &nbsp;оқушылар арасында мақсатында «Менің қолымнан бәрі де келеді» облыстық олимпиадасында А.Елубай бірінші орын иеленді, – дейді С.Сейфуллин атындағы №165 орта мектеп дефектолог маманы Айым Қалмырза.</blockquote>

Айым Төремұратқызы: Инклюзивті білім беруде педагог- психологтің рөлі

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp; Бүгінгі ғылым саласы қызметкерлері күнінде аудан әкімі Берік Сәрменбаев халықаралық және республикалық ғылыми жобалар мен білім бәсекелері байқауларының жеңімпаздарын жетекші ұстаздарымен бірге қабылдады. Қабылдауға ардагер ұстаздар, білім қызметкерлері және оқушылар қатысты.Аудан басшысы елімізде ғылымды дамыту – басым бағыттардың бірі екеніне тоқталды.<blockquote>– 12 сәуір – елімізде ғылым саласы қызметкерлері күні. Бұл саланың ауқымы кең. Осы арқылы егемен елдің әлеуметтік-экономикалық дамуына серпін жасалады. Мемлекет басшысы Қасым-Жомарт Кемелұлы Тоқаев Президент жанындағы Ғылым және технологиялар жөніндегі ұлттық кеңестің отырысында «Біз өркениетті ел боламыз десек, ғылымды дамытуымыз қажет» деп, салаға жан-жақты қолдау көрсетіліп келе жатқанын атап өтті. Сондықтан қазіргі кезде елімізде ғылым саласын дамытуда ауқымды жұмыстар атқарылуда. Міне, осындай қолдаулардың нәтижесінде ғылым жолында жүрген білімді жастар ауданның атын республикаға және халықаралық дәрежеде танытып жүр. Білімге құштар оқушыларға және ата-аналары мен жетекшілеріне шынайы алғысымды білдіремін. Біз дарынды жастарға әркез қолдау көрсетеміз, – деді Берік Әбдіғаппарұлы.</blockquote>Іс-шарада жетістікке жеткен оқушылар мен ғылымға бағыт-бағдар беріп жүрген жетекшілеріне аудан әкімінің «Алғыс хаты» табыс етіліп, сый-құрмет көрсетілді.Қабылдауда ардагер ұстаздар Ұлмекен Жанәлиева, Сұлупан Шамшадинова және Анар Ізбасарова жетістікке жеткен оқушыларға тілектестіктерін білдірді.Айта кетейік, қабылдауда марапатталған Айдарлы ауылындағы №139 орта мектептің 11 сынып оқушысы Гүлім Амантайқызы Ө.Жолдасбеков атындағы халықаралық ғылыми жобалар байқауында консентрацияға байланысты есептерді шешудің ең оңтайлы жолын қарастырып, І дәрежелі дипломмен марапатталды.Ал Тереңөзек кентіндегі №35 И.Тоқтыбаев атындағы мектеп-лицейдің 11 сынып оқушылары Ақнұр Оразбай мен Үміт Қойшыбаева қазіргі қоғамдағы өзекті мәселе – жастардың тез әзірленетін тағамдардың орнына жемістер мен көкеністерден денсаулыққа пайдалы әрі экологиялық таза кептірілген жеміс чипстері өнімдерін жасап шығарды.№35 И.Тоқтыбаев атындағы мектеп-лицейдің 11 сынып оқушысы Бектасқызы Асылай болса, Қостанай қаласында жалпы білім беретін пәндер бойынша өткізілген республикалық пәндік олимпиадада қазақ тілі мен әдебиетінен жеңімпаз атанып, Х.Досмұхамедов атындағы Атырау университетінің грантын жеңіп алды.

Берік Әбдіғаппарұлы: Біз дарынды жастарға әркез қолдау көрсетеміз

<a href="https://kyzylorda-news.kz/">Kyzylorda-news.kz</a> Қазақстанның су тасып, төтенше жағдай жарияланған өңірлерінің оқушылары білімін жазда "Жазғы мектепте" жалғастырады. Бұл жайлы&nbsp;<a href="https://ulysmedia.kz/">Ulysmedia.kz</a>&nbsp;тілшісіне оқу-ағарту вице-министрі Еділ Оспан айтып берді.Қай мектептер екені белгіліБатыс өңірлерде эвакуацияланған халықтың бір бөлігін мектептерге көшіріп жатыр.<blockquote>– Осы жағдай сол өңірлердің білім сапасына қаншалықты теріс әсер етеді? Сол өңірлердің мектептеріндегі балалардың, оқушылардың мәселесін қалай реттедіңіздер? –&nbsp;деп Еділ Оспанға сұрақ қойылған.</blockquote>Сұраққа жауап берген вице-министр оқушылар жатақханасы бар мектептер мен колледж, университеттерге орналастырылып жатқанын айтты.<blockquote>– Еліміздің көп өңірінде су тасқыны жүріп жатыр. Табиғи сипаттағы апат. Білім сапасын айтар болсақ, 190-ға жуық мектеп қашықтан оқытуға ауыстырылды. Ол мектептердің оқушылары қазір қашықтан оқытылып жатыр. Біз көптеген оқушыларды Білім инновация, Назарбаев мектептерінің, колледжер мен жоғарғы оқу орындарының жатақханасына ауыстырып, уақытша білім алуын қамтамасыз етіп жатырмыз. Оқушылардың оқуға қажетті құрал-жабдықтарының болуын да қадағалап отырмыз, – дейді вице-министр.</blockquote>Еділ Оспанның айтуынша, эвакуациялық пункттерде орналасқан балалар мүмкіндігінше, жыл бойы жұмыс істейтін лагерьлерге орналастырылып жатыр. Лагерьлерде де оқу процесі ұйымдастырылған.&nbsp;<blockquote>– Бұдан бөлек, бұл өңірлердегі балалардың білім сапасын арттыру үшін жаз мезгілінде дәл сол мектептерге арналған жазғы мектеп ұйымдастырылады. Қай мектептер мен қай оқушылар екені белгілі ғой –&nbsp;жазғы мектепті соларға өткіземіз. Ол бұрын болмаған, бірақ пандемия кезінде сондай тәжірибе қолданылды, – дейді ол.</blockquote>Қазақстандағы су тасқыныЕске сала кетейік, елде бірнеше күннен бері бірнеше өңірде су тасып, ондаған ауданда төтенше жағдай жарияланды. Су тасқыны ең үлкен қауіп туғызып отырған өңірлер қатарында Атырау, Батыс Қазақстан, Солтүстік Қазақстан, Қостанай облыстары бар. Ресейдің Ор қаласында дамбының жарылуы қосымша қиындық туғызған. Құлсары қаласында ең күрделі жағдай тіркеліп, адам шығыны тіркелді.Коллаж ulysmedia.kz.

Су тасыған өңірлердің оқушылары білімін жазда жалғастыратын болды

&nbsp;<a href="https://kyzylorda-news.kz/">Kyzylorda-news.kz</a>&nbsp; 2024 жылдың 12 сәуірінде ҚР Білім министрлігі (БМ) мектеп оқулықтарын цифрлық форматқа көшіру туралы айтты, деп хабарлайды <a href="https://kaz.zakon.kz/kogam-tynysy/6041012-azastanda-mektep-oulytaryny-100-tsifrly-formata-kshrld.html">Zakon.kz</a>.Бүгінде мектеп оқулықтарының цифрлық форматқа көшірілу көрсеткіші 100%-ды құрайды. Оқулықтар мемлекеттік сараптамадан өтіп, оқу-әдістемелік кешендер тізіміне енгізілді. Цифрлық оқулықтар елімізде 13 баспаның 11 платформасында әзірленуде.<blockquote>«Пәндерді оқытуда инновациялық әдіс-тәсілдерді енгізу мақсатында педагогтердің қолдануы үшін әдістемелік ұсыныстар әзірленді. Мұғалімдер сабақтарды заманауи цифрлық технологияларды, онлайн коммуникацияларды, саралау мен даралауды пайдалана отырып өткізеді, сондай-ақ онлайн ресурстарды қолдану бойынша білімдерін жетілдіреді», – деп атап өтті ҚР ОАМ Білім саласында сапаны қамтамасыз ету комитеті төрағасының орынбасары Майра Мелдебекова.</blockquote>Бұдан басқа, робототехника, STEM, химия, физика, биология пәндері бойынша 1345 заманауи кабинет ашу жұмыстары жүргізілуде. Жыл соңына дейін 20 өңірдегі 1072 мектеп заманауи кабинеттермен жабдықталды.&nbsp;Фото: Оқу-ағарту министрлігінің баспасөз қызметі

Қазақстанда мектеп оқулықтарының 100% цифрлық форматқа көшірілді

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университетінде Еуропалық Одаққа мүше 17 мемлекеттің Қазақстандағы елшілерімен кездесу өтті.Жиында сөз алған Қазақстан Республикасы Сыртқы істер министрінің орынбасары Роман Василенко «Қорқыт Ата атындағы Қызылорда университеті - 85 жылдық тарихы бар оқу орны. Ол студенттерге 66 бакалавриаттық 66 білім беру бағдарламасын ұсынады. 34 магистратура бағдарламасын орындап отыр. 30 елде 125 халықаралық серіктестері бар. Университет халықаралық стандарттарға сәйкес дамуын жалғастыруда. Ал бүгінгі жиын білім ордасының білім беру саласындағы Еуропалық Одаққа мүше мемлекеттермен ынтымақтастығын арттырады деп сенім білдіремін» деп атап өтті.Мұнан соң Еуропалық Одақтың Қазақстандағы Елшісі Янкаускас Кестутис, Швейцарияның Қазақстандағы Елшісі Салмон Бал сөз алып, білім ордасымен ынтымақтастықты арттыру, студенттер мен оқытушылардың білімін жетілдіру іс-шараларын қолдайтынын айтты.Қорқыт ата атындағы Қызылорда университеті Еуропалық Одаққа мүше мемлекеттермен білім ордасының болашақ дамуын, зияткерлік капиталды ұлғайту, инвестициялық әлеуетті арттыру, Қызылорда облысының аграрлық технологияларын, экология, агроөнеркәсіптік кешен, су ресурстары және басқа да салаларда кадрлар даярлауда бірлесіп жұмыс істеуді мақсат етіп отыр.

Қорқыт ата атындағы Қызылорда университеті Еуропалық Одаққа мүше елдермен ынтымақтастықты арттырады

&nbsp;<a href="https://kyzylorda-news.kz/">Kyzylorda-news.kz</a>&nbsp; ҚР Премьер-министрінің тапсырмасы бойынша, су тасқыны жағдайы күрделі өңірлерде оқушылар алдағы сынақтардан босатылды. Бұл туралы Оқу-ағарту министрлігінің ресми өкілі Мереке Амангелдіқызы мәлімдеді, деп хабарлайды&nbsp;<a href="https://egemen.kz/article/362049-qarghyn-su-basqan-onhirlerdinh-oqushylary-synaqtardan-bosatyldy-ministrlik">Egemen.kz.</a>&nbsp;<blockquote>«Атап айтқанда, Атырау және Ақтөбе облыстарының оқушылары үшін БЖБ (өткен материалды бөлу үшін жиынтық бағалау) және ТЖБ (тоқсан бойы жиынтық бағалау) болмайды. Атырау (18), Ақтөбе (6), Қостанай (2) және Батыс Қазақстан (2) облыстарының 28 мектебінде оқушылардың білім жетістіктеріне жасалатын мониторинг жойылды», деп нақтылады Мереке Амангелдіқызы.</blockquote>Оның айтуынша, елдің алты өңірінде ББЖМ (Министрліктің деректері бойынша оқу бағдарламаларының тиімділігін бағалауға, оқу процесінің күшті және әлсіз жақтарын анықтауға мүмкіндік беретін ұлттық зерттеу) өткізу 15 сәуірден 22 сәуірге (Ақмола, Атырау, Ақтөбе, Қостанай облыстары, СҚО және БҚО) ауыстырылады.«Қалған өңірлерде сабақтар штаттық режимде өтеді», деп қосты Мереке Амангелдіқызы.фото: Нұрболат Нұржаубай

Қарғын су басқан өңірлердің оқушылары сынақтардан босатылды - министрлік

<a href="https://kyzylorda-news.kz/">Kyzylorda-news.kz</a>&nbsp;«Болашақ» Ғылыми-зерттеу институты Қызылорда «Болашақ» университеті кафедраларынан қоғамдық-гуманитарлық ғылымдар бойынша іргелі және қолданбалы ғылыми зерттеулер жүргізу үшін құралған 4 орталықты біріктіріп отыр. Қазақстандағы ғылым қызметкерлерінің күні қарсаңында аталмыш ғылыми-зерттеу институтының жетістіктерімен таныстыруды жөн санап отырмыз.Қазіргі таңда ҒЗИ орталықтары Ұлттық мемлекеттік ғылыми-техникалық сараптама орталығында тіркелген 7 ынталы жоба бойынша белсенді түрде жұмыстар жүргізуде: «Ұлттық рухани жаңғыру: қоғамдық сана мен тарихи сананы жаңғырту», «Құқықтық мәдениетті арттыру және мемлекеттіліктің негіз қалаушы құндылықтарын құрметтеуді қалыптастыру», «ЖОО-дағы білім беру және тәрбие жұмыстарының психологиялық мәселелері», «Бастауыш сынып оқушыларының шығармашылық қабілеттерін дамыту», «Сыр бойының рухани мұрасы», «Мектепке дейінгі білім беру жүйесіндегі педагогикалық білім беру трендтері», «Зияты зақымдалған балаларға білім беру және сөйлеу тілін түзету жолдары».Ынталы жобалар бағыттары жан-жақты. Мәселен, бір жоба ұлттық рухани дамудың ауқымды мақсаттарына қол жеткізуге ықпал ететін қоғамдық сана мен тарихи сананы жаңғырту жолдарын зерттеуге арналған. Мемлекеттіліктің негіз қалаушы құндылықтарын ынталандыруға бағытталған жобада азаматтық тәрбие, құқықтар мен міндеттер бойынша хабардарлықты дамыту міндеті қойылған. Педагогикалық психология саласына терең үңілген жобада университет жағдайында білім беру және тәрбие тәжірибесінде туындайтын мәселелер анықталады және шешіледі. Бастауыш сынып оқушылары арасында шығармашылық пен инновацияны дамытуға бағытталған жоба оқушылардың шығармашылық әлеуетін ынталандырудың тиімді стратегиялары мен шараларын әзірлеуге ұмтылады. Сыр бойының бай рухани мұрасы зерттеліп отырған жобаға аймаққа ғана тән мәдени дәстүрлер, тарихи ескерткіштер мен материалдық емес мұраларды сақтау және насихаттау міндеті қойылған. Мектепке дейінгі білім беру жүйесіндегі педагогикалық тәсілдердің үрдістері мен инновацияларды зерттейтін жобада балаларды дамыту үшін білім беру саясаты мен тәжірибесін зерттеуге бағытталады. Инклюзивті білім беруге назар аударған жобамызда зияткерлік мүмкіндіктері шектеулі балалардың қажеттіліктері ескеріліп, олардың сапалы білім алуға және коммуникативтік дағдыларды дамытуға қол жеткізуін қамтамасыз ететін оқытудың және түзетудің тиімді әдістемелерін әзірлеу жұмыстары жүріп жатыр. Осы ынталы жобалар арқылы «Болашақ» Ғылыми-зерттеу институты білімді дамытуға, әлеуметтік-саяси мәселелерді шешуге ынталылығын көрсетеді. Бұл жұмыстар институттың өңірдегі ғылыми зерттеулерге, инновацияларға және әлеуметтік прогреске ықпалындағы шешуші рөлін танытады.Аталмыш жобалар шеңберінде жоба орындаушылары соңғы 4 жылда 197 жарияланымға қол жеткізді. Оның ішінде, «Скопус» базасында индекстелетін журналдарда 7 мақала, Қазақстан Республикасы Ғылым және жоғары білім министрлігінің Ғылым және жоғары білім саласындағы сапаны қамтамасыз ету комитеті Тізіміндегі журналдарда 20 мақала жарияланды. Сонымен қатар, 4 монография, 1 оқулық және 4 оқу құралы жарық көрді, 5 авторлық куәлік алынды.Ғылыми-зерттеу институтының 10 жылдық ынтымақтастығы шеңберінде Ресейдің «Социосфера» Ғылыми-баспа орталығымен бірлесе отырып жыл сайын 8 Халықаралық ғылыми-тәжірибелік конференция ұйымдастырылып келеді: Қоғамды ақпараттандыру: әлеуметтік-экономикалық, әлеуметтік-мәдени және халықаралық аспектілер; «Еуразия халықтары: тарихы, мәдениеті және әрекеттестік мәселелері»; «Ақпараттық-коммуникациялық кеңістік және адам»; «Мәдениет, өркениет, қоғам: зерттеу парадигмалары және әрекеттестік үрдістері»; «Қазіргі шарттардағы тәрбиенің мақсаттары, міндеттері мен құндылықтары»; «Тұлға, қоғам, мемлекет, құқық: өзара қатынас және әрекеттестік мәселелері»; «Бәсекеге қабілетті маман даярлау заманауи білім берудің мақсаты ретінде»; «Экономика мен басқаруды дамытудың мәселелері мен перспективалары». Сондай-ақ, институт ресейлік «Молодой ученый» журналының арнайы шығарылымдарын дайындайды. Осы уақытқа дейін институт журналдың 43 арнайы нөмірін жарыққа шығарды. Ғылыми-зерттеу институты тұрақты түрде өткізіп отыратын «Заманауи ғылым және инновациялар» Халықаралық конференциясының нөмірлерін университет құрылтайшысы қаржыландырып отырады.Қорыта айтқанда, «Болашақ» Ғылыми-зерттеу институты орталықтары жүзеге асырып жатқан ынталы ғылыми жобалары қоғамда бар проблемаларға жауап іздеп қана қоймай, нәтижелерін оқу процесіне үздіксіз енгізіп жатыр. Бұл тәсіл пайда болатын үдерістер мен мәселелерді алдын алу үшін маңызды. Зерттеу қорытындыларына негізделген ғылыми шараларды ұйымдастыру институттың нәтижелерді таратуға және қоғаммен өзара әрекеттесуге ұмтылысын көрсетіп отыр.

Қазақстан және Қызылорда облысының жаңалықтары: Білім