<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Басқарма төрағасы – Ректоры Наурызбай Байқадамов Инженерлік-технологиялық институты және Жасанды интеллект институтының оқытушыларымен кездесті. Жиында институттардың білім беру процесі мен даму перспективалары талқыланып, &nbsp;оқытушылардың ұсыныс-пікірлері тыңдалды.&nbsp;Кездесу барысында Инженерлік-технологиялық институтының директоры Бақытбек Абжалелов институттың кадрлық әлеуетіне тоқталып, профессор-оқытушылар құрамының сапалық көрсеткіштері, ғылыми дәрежесі бар мамандар үлесі, жас ғалымдарды қолдау бағытындағы жұмыстар туралы кеңінен баяндады. Сонымен қатар институт құрылымы, жүзеге асырылып жатқан білім беру бағдарламалары, білім алушылар контингенті және түлектердің жұмысқа орналасу деңгейі жөнінде нақты мәліметтер ұсынылды.Ғылыми гранттық қаржыландыру мәселесі де назардан тыс қалмады. Институт базасында жүзеге асып жатқан жобалар, республикалық және халықаралық гранттар аясындағы зерттеулер, өндіріс орындарымен байланыс және коммерцияландыру мүмкіндіктері сөз болды. Бұл бағыттағы көрсеткіштерді арттыру, ғылыми жарияланымдардың сапасын көтеру және халықаралық рейтингтік базалардағы мақалалар санын көбейту қажеттігі айтылды. Сондай-ақ дуальды оқыту элементтерін кеңейту, өңірлік сұранысқа бейімделген мамандар даярлау мәселелері көтерілді. Университет Ректоры докторанттардың диссертациялық жұмыстарын уақытылы қорғау, ғылыми жетекшілік сапасын арттыру, ғылыми әлеуеттің пайыздық көрсеткішін өсіру бағытында нақты тапсырмалар берді. Сонымен қатар қызметтік нұсқаулықтарды қайта қарау, оқу үдерісін оңтайландыру мақсатында сабақ кестесін әзірлеуде жасанды интеллект мүмкіндіктерін қолдану жөніндегі ұсыныстарға қолдау білдірді.Институттардың алдағы даму бағыттарын айқындауға және ұжымның ортақ мақсатқа жұмылуына серпін берген кездесуде Ректор конституциялық реформа мен республикалық референдум жайлы да сөз қозғады. Профессор-оқытушылар құрамы Ата заңның жаңа жобасындағы негізгі өзгерістер талқылап, конституциялық реформаның қоғам дамуына ықпалы, құқықтық мәдениетті нығайтудағы маңызы туралы пікір алмасты.

Ректор ИТИ және ЖИИ оқытушыларымен кездесті

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде АҚШ елшілігі өкілдерімен екіжақты ынтымақтастықты кеңейту және тереңдетуге бағытталған кездесу өтті. Биыл өзара түсіністік туралы Меморандумға (MOU) қол қойылғанына 10 жыл толып отыр. Университеттің Басқарма төрағасы-Ректоры Наурызбай Байқадамов мәртебелі меймандарға Сыр өңірінің басты білім беру ордасының әлеуетін таныстырды. Елшілік өкілдері университет ұжымына белсенді әріптестік, мамандардың кәсібилігі және бірлескен білім беру бастамаларын жүзеге асыруға қолайлы жағдай жасағаны үшін алғыс білдірді.Кездесу барысында студенттердің ағылшын тілін меңгеру деңгейін арттыруға бағытталған «New Access Program» бағдарламасы таныстырылды. Сонымен қатар, тілдік емес мамандықтарда, оның ішінде STEM бағыттарында білім алып жатқан студенттерге арналған «English Access Program» бағдарламасын жүзеге асыру мәселесі талқыланды. Жоба аясында кәсіби терминологияны меңгеруге және академиялық ағылшын тілін дамытуға ерекше көңіл бөлінеді. Қорқыт ата университеті Қазақстан бойынша пилоттық жобаға таңдалған алғашқы жоғары оқу орны.&nbsp;Кездесуде жұмыс берушілермен ынтымақтастық орнату және студенттерді нақты компаниялардың талаптарына сай даярлау мәселесі де қозғалды. 2–3 курс студенттері бос жұмыс орындары жәрмеңкелеріне (Job Fair) қатысып, еңбек нарығындағы бәсекеге қабілеттілігін арттыра алады.Бағдарлама аясында жастардың азаматтық құндылықтарын қалыптастыру мақсатында волонтерлік бастамаларды дамыту көзделген. Бағдарлама түлектеріне Alumni сертификаттары табысталады.

Қорқыт ата университетінің Ректоры Қазақстандағы АҚШ елшілігі өкілдерімен кездесті

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Басқарма төрағасы – Ректоры Наурызбай Байқадамов Гуманитарлық-педагогикалық институты ұжымымен кездесті.Кездесу барысында институт директоры Сағат Тайман оқу ордасының жалпы әлеуеті, кадрлық және білім беру бағыттарындағы көрсеткіштер, сондай-ақ алдағы міндеттер мен өзекті мәселелер туралы баяндама жасады.Бүгінде Гуманитарлық-педагогикалық институтында 2246 студент білім алуда. Оның ішінде 2102 студент бакалавриат, 135 магистратура, ал 9 докторантура бағдарламасы бойынша оқиды. Сонымен қатар, институтта 125 шетелдік білім алушы бар.Институттың профессор-оқытушылар құрамының ғылыми дәрежесі мен атақтары бар өкілдерінің орташа жасы – 55 жас. Білім беру бағдарламаларының жалпы саны – 20: оның 11-і бакалавриат, 6-ы магистратура, 3-і докторантура бойынша білім алады. Академиялық ұтқырлық бағдарламасы аясында шетелдік жоғары оқу орындарында 32 студент білім алып жатыр. Ал Гуманитарлық-педагогикалық институтына 25 шетелдік студент келіп, білім нәрімен сусындауда.Жиын барысында ректор оқытушылардың ұсыныстарын тыңдап, білім сапасын арттыру, ғылыми зерттеу жұмыстарын жандандыру және халықаралық байланыстарды кеңейту бағытында бірқатар нақты міндеттер қойды. Сондай-ақ, оқу үдерісін жетілдіру мен студенттердің кәсіби дамуына бағытталған жаңа бастамаларды қолдаудың маңыздылығына тоқталды. Сондай-ақ Наурызбай Сейтқалиұлы археологиялық зертхананы жаңғырту, тарихи көне жәдігерлерді сақтау қоймасын салу және ғылыми әлеуетті көтеру бойынша оқытушылар ұсынысы қолдау табатынын жеткізді.Кездесу соңында ректор 1-оқу ғимаратының материалдық-техникалық базасы және кітапхана жұмысымен танысты.

Ректор Гуманитарлық-педагогикалық институт ұжымымен кездесті

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университеті студенттері академиялық ұтқырлық бағдарламасы аясында шетелдік жоғары оқу орындарында білім алуға мүмкіндік алды. Білім алушыларымыз Грузия, Польша және Корея елдеріне бір семестрлік оқу кезеңіне аттанып, халықаралық тәжірибе жинамақ.Осыған орай университеттің Ғылыми жұмыстар және халықаралық байланыстар жөніндегі проректоры Майнура Бурибаева студенттермен арнайы кездесу өткізді. Жиында бағдарлама талаптары, оқу процесінің ерекшеліктері, құжаттандыру және бейімделу мәселелері жан-жақты талқыланды.Проректор студенттерге үлкен сенім артылып отырғанын атап өтті.<blockquote>«Сіздер тек Қорқыт ата университетінің ғана емес, Қазақстанның атынан барасыздар. Сондықтан өз мәдениетімізді, тәрбиемізді, білім деңгейімізді жоғары дәрежеде көрсетіңіздер», – деді Майнура Бурибаева.</blockquote>Кездесу барысында шетелде білім алу тек академиялық жетістікке ғана емес, жеке тұлғалық дамуға да ықпал ететіні айтылды. Сонымен қатар, білім алушыларға қауіпсіздік талаптарын сақтау, жергілікті заңнаманы құрметтеу және оқу орнының ішкі тәртібін қатаң ұстану қажеттігі ескертілді. Академиялық ұтқырлық бағдарламасы – студенттердің кәсіби көкжиегін кеңейтіп, халықаралық серіктестікті нығайтатын маңызды бастама. Бұл тәжірибе олардың болашақта бәсекеге қабілетті маман болып қалыптасуына берік негіз қалайды.

Университет жастары халықаралық білім кеңістігінде

<a href="https://kyzylorda-news.kz/">Kyzylorda-news.kz</a> Қорқыт ата университетінің «Су шаруашылығы және жерге орналастыру» білім беру бағдарламасының профессорлық-оқытушылық құрамы мен серіктес ұйым өкілдері Қазақстан Республикасы Ғылым және жоғары білім министрлігі ұйымдастыруымен «Жоғары білім және ғылым: цифрландыру және жасанды интеллект жылы» атты кеңейтілген алқа отырысына қатысты.&nbsp;Ауқымды іс-шара Қ.И. Сәтбаев атындағы Қазақ ұлттық зерттеу техникалық университеті базасында өткізілді.Алқа отырысына еліміздің жоғары оқу орындарының ғалымдары мен сарапшылары қатысып, жоғары білім мен ғылым саласын цифрландыру, жасанды интеллектіні дамыту және ғылыми нәтижелерді өндіріске енгізу мәселелері талқыланды. Іс-шара аясында республикалық деңгейдегі ғылыми жобалар көрмесі ұйымдастырылып, еліміздің үздік ғылыми әзірлемелері таныстырылды. Қызылорда облысынан барған ғалымдар BR21882415 бағдарламалық-нысаналық қаржыландыру жобасы бойынша жүргізілген зерттеу нәтижелерін ұсынды.<img src="https://knadmin.beoblood.kz/uploads/Whats_App_Image_2026_02_16_at_17_14_43_2_7ba59d8c9e.jpeg" alt="WhatsApp Image 2026-02-16 at 17.14.43 (2).jpeg">Жобаның тақырыбы – «Қызылорда облысында су тапшылығы жағдайында мал азықтық дақылдары мен ағаш екпелерін суару үшін ағынды суларды қауіпсіз утилизациялау технологиясын әзірлеу». Зерттеу жұмысы өңірдегі су тапшылығы мәселесін шешуге бағытталған және ауыл шаруашылығы саласында суды тиімді әрі экологиялық қауіпсіз пайдаланудың ғылыми негізделген тетіктерін ұсынады.Жоба нәтижелері қатысушылар тарапынан жоғары бағаланып, су ресурстары шектеулі аймақтар үшін тиімді, экологиялық тұрғыдан қауіпсіз әрі экономикалық жағынан негізделген шешім ретінде танылды. Бұл бастама өңірдегі аграрлық сектордың тұрақты дамуына және су ресурстарын ұтымды басқаруға өз үлесін қосады.Бүгінде университет ғалымдары су ресурстарын тиімді пайдалану, цифрлық технологияларды енгізу және ғылыми жаңалықтарды өндіріске трансферттеу бағытындағы жұмыстарды жүйелі түрде жалғастыруда. Алқа отырысында көтерілген бастамалар ғылым мен білімнің интеграциясын күшейтіп, отандық ғылыми әлеуеттің жаңа деңгейге көтерілуіне серпін берері сөзсіз.

ҚР Ғылым министрлігінде өткен жиында Қызылордалық ғалымдардың дамуы жоғары бағаланды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университеті студенттері халықаралық білім беру кеңістігінде тағы бір маңызды жетістікке қол жеткізді. Университеттің «Шетел тілі: екі шетел тілі (ағылшын, корей тілдері)» білім беру бағдарламасының 1-курс студенттері Korea Foundation ұйымының «Global e-School» халықаралық жобасы аясындағы оқу курсын сәтті аяқтады.Аталған бағдарлама шеңберінде студенттер «Корея қоғамы және халықаралық қатынастар / Korean Society and International Relations» пәнін меңгерді. Дәрістерді онлайн Кеймен университетінің профессоры Чагри Эрдем жүргізді. Үш кредиттік толық курс барысында білім алушылар Корея қоғамының даму ерекшеліктері, саяси жүйесі және халықаралық қатынастардағы рөлі туралы терең мағлұмат алды.Курс соңында студенттер қорытынды тест тапсырып, өз білім деңгейлерін дәлелдеді. Нәтижесінде Кореядан арнайы жіберілген халықаралық сертификаттар салтанатты түрде табысталды. Бұл сертификаттар – студенттердің жаһандық білім беру талаптарына сай дайындықтан өткенін айқындайтын маңызды құжат.Жобаның табысты жүзеге асуына университеттің Халықаралық жобалар мен стипендиялар тобының жетекшісі Темірболат Кеншінбай мен Шетел тілдері және аударма білім бағдарламасы тобының аға оқытушысы Ұлжан Бекназарова зор үлес қосты.Аталған бастама – университеттің халықаралық серіктестікті нығайту, білім сапасын арттыру және студенттердің академиялық ұтқырлығын дамыту бағытындағы жүйелі жұмысының нақты көрінісі. Осындай жобалар арқылы болашақ мамандар шетелдік тәжірибе жинақтап, көпмәдениетті ортада кәсіби бәсекеге қабілеттілігін арттыра түседі.

Қорқыт ата университетінің студенттері Корея қорының халықаралық сертификатын алды

<a href="https://kyzylorda-news.kz/">Kyzylorda-news.kz</a>&nbsp; «Бүгінгі жастар кітап оқымайды деу»– жаңсақ пікір. Иә, заман ағымы өзгерді, уақыттың басым бөлігі ғаламтор мен әлеуметтік желіге кететіні рас. Бірақ соған қарамастан, кітапты өмірінің бір бөлігіне айналдырған жастар аз емес. Қазір жастар тек бір бағытпен шектелмейді. Бірі классиканы оқыса, бірі психологиялық немесе тарихи кітаптарға қызығады. Ең бастысы&nbsp;–&nbsp;олардың ізденіс үстінде болуы.Бүгінде кітап клубтарының көбеюі де жастардың әдеби ортаға бет бұра бастағанын көрсетеді. Осындай ортаның бірі&nbsp;– «Kitap Qurttary» кітап клубы. Бұл клубтың бүгінде көп жастың кітапқа деген қызығушылығын оятты.«Kitap Qurttary» кітап клубының негізін қалаушы Талғат Меңдібаевтың&nbsp;айтуынша, клубқа өздері іздеп, арнайы келетіндер қатары көп.<img src="https://knadmin.beoblood.kz/uploads/Tal_at_Me_dibaev_84a6163e31.webp" alt="Талғат Меңдібаев.webp"><blockquote>«Біздің кітап клубында нақты тұрақты қатысушылар саны жоқ, жастар әртүрлі уақытта келіп-кетіп жатады. Көбіне классикалық шығармаларды оқимыз. Нақты бір бағыттағы немесе бір ғана кітапты тұрақты түрде талқылаймыз деп айта алмаймын. Дегенмен, біз мотивациялық және психологиялық әдебиеттерден гөрі әлемдік классикаға, қазақ әдебиетіне, сондай-ақ Алаш зиялылары мен тарихи тұлғалар туралы еңбектерге көбірек көңіл бөлеміз. Қазіргі таңда тұлғалық даму мен тарихи танымға қатысты кітаптар да жиі оқылады.Орта есеппен алғанда, бір ай ішінде 4 кітап оқуға болады деп есептеймін. Негізгі норма&nbsp;– аптасына 1 кітап оқу. Егер кітап шағын болса, кейбір адамдар айына 5-6 кітапқа дейін оқып үлгереді. Ал өз басым айына кем дегенде 1 кітап, мүмкіндігінше 2 кітап оқуға тырысамын.Оқуға ұсынар кітаптарыма келсек, ең алдымен «Қазақтың шешендік сөздер жинағын» міндетті түрде оқуға кеңес бермін. Одан кейін Әбдіжәміл Нұрпейісовтің «Қан мен тер» және «Соңғы парыз» романдарын ұсынар едім. Сондай-ақ Джон Стейнбектің «Гроздья гнева», «О мышах и людях», Теодор Драйзердің «Американская трагедия» шығармаларын оқуға болады. Детектив жанрын ұнататындарға Ю Несбё мен Ли Чайлдтың кітаптарын, ал отбасылық құндылықтарды, адамның жарық әлемнен қараңғылыққа қарай бет алуын терең суреттейтін шығарма ретінде Марио Пьюзоның «Өкіл әке» романын ұсынар едім», – дейді&nbsp;Талғат Меңдібаев бізбен әңгімесінде.</blockquote>Талғат Меңдібаевтың пікірінен байқағанымыздай, қазіргі жастар жеңіл-желпі мотивациялық кітаптардан гөрі терең мазмұнды, классикалық және тарихи шығармаларға көбірек ден қояды. Бұл&nbsp;– жастардың рухани ізденісінің белгісі.Кітапқа қызығушылық көбіне отбасынан басталады. Бұған «Ақмешіт жастар» газетінің тілшісі Аружан Оралбайдың пікірі дәлел бола алады.«Ақмешіт жастар» газетінің тілшісі Аружан Оралбай көп кітап оқитын жастардың бірі. Оның ерекшелігі ол өзіңе ұнаған кітапты тапсырыс беріп сатып алады. Бүгінде Аружанның өз кітап қоры бар.<img src="https://knadmin.beoblood.kz/uploads/Aruzhan_Oralbaj_3842cf59a9.jpg" alt="Аружан Оралбай.jpg"><blockquote>«Дәл қазір жеке кітапханамда 150-ге жуық кітап бар. Ең алғаш бастауыш сыныпта Оспанхан Әубәкіровтың “Жабақ туралы әңгімелер” кітабын оқығаным есімде. Кітапқа деген қызығушылығым анамның жеке кітапханасынан бастау алған болуы керек. Анам мұғалім, студенттік шағынан жинаған кітаптары бір қабырғаны толтырып тұратын. Бертін келе бұл әдет менде де қалыптасты. Тіпті, кітапханадан алған кітабым ұнап қалса, оны сатылымнан іздеп, жеке кітапханама қосқым келіп тұрады.Әркімнің талғамы әртүрлі. Сондықтан ұсынысқа сүйеніп кітап таңдаған кезім өте сирек. Дегенмен, Төлен Әбдіктің “Парасат майданы” шығармасын ерекше атап өткім келеді. Сондай-ақ “Оң қол”, “Тұғыр мен ғұмыр”, “Тозақ оттары жымыңдайды”, “Әке”, “Ақиқат” туындыларының философиялық астары терең. Дулат Исабековтің “Бекет”, “Қарғын”, “Қар қызы” шығармаларын да ұсынар едім. Қазіргі қазақ қаламгерлерінен Қанат Әбілқайырдың “Ағыраптағы аты жоқ адам”, Мақсат Мәліктің “Абыл мен Қабыл”, Қанат Тілеуханның “Шатырдағы әйел” романдарын оқуға кеңес беремін. Әйелдер прозасынан Сәуле Досжаның "Үлкен үйдегі үрей", "Қасірет пен тағдыр", Лира Қоныстың "Шаһарбанудың сыңсуы", "Құлпынай қосылған балмұздақ", "Мәңгілік сағыныш", Аягүл Мантайдың "Уақыттың көз жасы" атты кітаптарын ұсынар едім. Бұл қаламгерлердің шығармашылығында мистика да, махаббат та, Құдай жайлы толғаныс, қыз тағдыры мен әйел ғұмыры да қозғалады. Психологиялық, философиялық аспектілер де бар. Айта берсем көп... Өзің оқыған дүниені өзгеге ұсыну, талдау, талқылау&nbsp;– тіпті қызық», – деді Аружан.</blockquote>Аружанның сөзінен қазіргі жастар арасында заманауи қазақ әдебиетіне, философиялық және психологиялық тереңдігі бар шығармаларға қызығушылық жоғары екенін көруге болады.Жастардың кітап оқу мәдениеті туралы айтқанда, студенттердің пікірі де маңызды. Себебі студенттік кезең&nbsp;– тұлғалық қалыптасудың ең белсенді шағы. Сондықтан да болар студенттермен дидарласып олардың да пікіріне сүйенуді жөн көрдік. 4-курс студенті &nbsp;Нұрай Арманқызы бос уақытында кітап оқығанды ұнатады.<ul><li><img src="https://knadmin.beoblood.kz/uploads/99d38cd6_19bd_4eca_a3e5_52d1e66f273a_28aed1bf13.jpg" alt="99d38cd6-19bd-4eca-a3e5-52d1e66f273a.jpg"></li></ul><blockquote>«Соңғы уақытта Мұхтар Әуезовтің “Қараш-Қараш оқиғасы” повесін оқыдым. Бұл кітаптың маған ұнаған ерекшелігі&nbsp;– әділетсіздік пен адам тағдырын өте терең, шынайы көрсетуі. Бақтығұлдың ішкі күйзелісі, қоғамдағы теңсіздік, адамның ашу-ыза мен намыс арасында қалуы қатты ойландырды. Әуезовтің тілі көркем, оқыған сайын оқиғаға еніп кетесің, кейіпкерлер тірі адамдай сезіледі. Сол үшін бұл шығарма ерекше әсер қалдырды.Кітап оқуға күніне орта есеппен 30-40 минут уақыт бөлуге болады деп ойлаймын. Студент болған соң сабақ, тапсырма көп, бірақ күн сайын аз-аздан оқып отырсаң, әрі пайдалы, әрі әдетке айналады. Кейде демалыс күндері 1 сағаттай оқуға тырысамын. Жалпы, қазақша кітаптары тек әдебиет емес, тәрбие мен өмірлік ой береді, сондықтан студент кезден бастап оқыған өте маңызды деп есептеймін», – дейді ол.</blockquote>Бүгінгі жастар әртүрлі жанрдағы кітаптарды оқиды. Классика, заманауи проза, тарихи еңбектер, детектив пен философиялық шығармалар&nbsp;– барлығы да сұранысқа ие. Кітап&nbsp;– тек білім көзі ғана емес, рухани тәрбие құралы. Оқитын ұрпақ&nbsp;– ойлы ұрпақ.Аяжан МахамбетәліҚорқыт ата атындағыҚызылорда университетінің 4 курс студентіФото: freepik.com

Жастардың кітап оқуға деген көзқарасы қандай? 

<a href="https://kyzylorda-news.kz/">Kyzylorda-news.kz</a> Әр адамның өмір жолында ерекше орын алатын жанның бірі – ұстаздар. Ұстаз тек білім беруші ғана емес, ол – тәрбиеші, бағыт беруші, болашаққа жол ашатын тұлға. Сондықтан ұстаз мамандығы қашанда құрметке лайық.Адам әріп танып, білімнің алғашқы баспалдағына дәл ұстаздың көмегімен қадам басады. Мұғалім оқушыға тек пән үйретіп қана қоймай, адамгершілікке, тәртіпке, еңбекқорлыққа баулиды. Ұстаздың берген білімі өмір бойы адаммен бірге жүреді.Қазіргі қоғамда мұғалімнің рөлі өте маңызды. Себебі елдің болашағы – білімді ұрпақтың қолында, ал сол ұрпақты тәрбиелейтін – ұстаз. Егер ұстаз өз ісіне жауапкершілікпен қараса, елдің болашағы да жарқын болады.Ұстаз туралы терең ой айтқан ағартушылардың бірі – Ахмет Байтұрсынұлы. Ол: «Мұғалім қандай болса, мектеп те сондай болмақ» деген. Бұл сөз ұстаздың қоғамдағы орнын анық көрсетеді.Ұстаз болу – үлкен шыдамдылық пен жауапкершілікті талап етеді. Әр оқушының мінезі әртүрлі болғандықтан, мұғалім олардың барлығына дұрыс бағыт бере білуі керек. Бұл – оңай жұмыс емес.Оқушылар да ұстаз еңбегін бағалай білуі тиіс. Сабаққа жауапкершілікпен қатысып, мұғалімге құрмет көрсету – әр оқушының міндеті.Ұстаз – ең қадірлі мамандықтардың бірі. Ұстазды құрметтеу – білімді құрметтеу. Сондықтан мұғалім еңбегін әрқашан жоғары бағалауымыз керек.Назым Әбілхай,Қорқыт ата атындағы Қызылорда университетінің 4-курс студентіФото: Pixabay.com

Ұстаз – ұлы мамандық иесі

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың төрағалығымен актив отырысы өтті. Оған Парламент Мәжілісінің депутаты Мұрат Ергешбаев, Ғылым және жоғары білім вице-министрі Гүлзат Көбенова, зиялы қауым өкілдері, құқық қорғау органдарының бірінші басшылары, басқармалар мен аумақтық департамент басшылары, онлайн байланыс арқылы Қызылорда қаласы мен барлық ауданның активтері, Қорқыт ата университетінің ғылыми кеңес мүшелері мен профессор-оқытушылары қатысты.Жиында Қорқыт ата атындағы Қызылорда университетінің Басқарма төрағасы-ректоры лауазымына тағайындалған Наурызбай Байқадамов таныстырылды.<blockquote>«Мемлекет басшымыз Қасым-Жомарт Кемелұлы «Қазақстан – академиялық білім аймағы» стратегиялық серіктестер форумында «Қазір адамзат түбегейлі өзгерістер дәуіріне қадам басқан кезде білім ордалары заман талабына сай озық болуға тиіс. Онсыз ешқандай даму да, өркендеу де болмайтыны анық», – деп атап өтті.Осыған байланысты 2 ақпандағы Үкімет отырысында еліміздегі ғылым мен жоғары білім мәселесі қаралды. Үкімет басшысы облыс әкімдеріне өңірлік ғылыми-технологиялық кеңестерге жеке басшылық жасап, жұмысын ұйымдастыруды тапсырды.Ұлттық ғылым академиясымен бірлесіп, өңірлік мамандану және форсайттық зерттеулердің нәтижелеріне сәйкес, ғылыми-техникалық тапсырмаларды бекіту қажеттігін атап өтті. Аталған міндеттерді үйлестіруге Қорқыт Ата атындағы Қызылорда университеті белсенді атсалысуы тиіс деп санаймын. Себебі, осы жұмыстарды ұйымдастыруда университеттің әлеуеті жеткілікті.Оқу орнының ғалымдары мен түлектері аймағымыздағы ғылыми-инновациялық дамуды басқаруда айрықша рөл атқаруы қажет. Бұл ретте, әкімдік тарапынан жан-жақты қолдау көрсетілетінін мәлімдеймін. Баршаңызды осы іске жоғары жауапкершілікпен белсенді атсалысуға шақырамын!», – деді аймақ басшысы.</blockquote>Басқосуда Мұрат Ергешбаев, Гүлзат Көбенова, мемлекет және қоғам қайраткерлері Бақберген Досманбетов, Мұрат Бақтиярұлы, ғылыми кеңес мүшелері Серікбай Қошқаров, Ұлжан Жанбершиева сөз сөйледі.Наурызбай Байқадамов 1991 жылы Қорқыт ата атындағы Қызылорда университетінің «Тарих және француз тілі» мамандығын тәмамдаған. Еңбек жолын ауыл мектебінде мұғалім болып бастап, 1994 жылы өзі білім алған оқу орнына оқытушы ретінде қайта оралды. Университетте түрлі басшылық қызметтерді, атап айтқанда, 2008-2013 жылдары тәрбие жұмыстары жөніндегі проректор қызметін атқарды. Жоғары оқу орнында 20 жылға жуық еңбек етіп, университеттің көпсалалы аймақтық білім ордасы ретінде қалыптасуы мен дамуына елеулі үлес қосты.<img src="https://knadmin.beoblood.kz/uploads/or_yt_Ata_universitetini_zha_a_rektory_tanystyryldy1_2aa264cd8f.jpg" alt="Қорқыт Ата университетінің жаңа ректоры таныстырылды1.jpg">Наурызбай Сейтқалиұлы – тарих ғылымдарының кандидаты, белгілі қоғамтанушы, 150-ге жуық ғылыми және оқу-әдістемелік еңбектің, бірнеше кітаптың авторы.2013 жылы мемлекеттік қызметке шақырылып, облыстық білім басқармасының басшысы, облыс әкімінің орынбасары, облыстық мәслихат хатшысы және төрағасы қызметтерін абыроймен атқарды. Өңірдің әлеуметтік-экономикалық және рухани-мәдени дамуына сүбелі үлес қосты.Сондай-ақ, «Нұр Отан» партиясы облыстық филиалы төрағасының орынбасары, бірінші орынбасары, Amanat партиясы облыстық филиалының төрағасы ретінде қоғамдық-саяси салада да нәтижелі еңбек етті.2024 жылғы сәуірден 2026 жылғы 11 ақпанға дейін Қазақстан Республикасы Парламенті Сенатының депутаты, Конституциялық заңнама, сот жүйесі және құқық қорғау органдары комитетінің мүшесі болды. Заң шығару қызметіне белсенді қатысып, өңірдің өзекті мәселелерін көтеріп, республикалық бюджеттен қажетті қаржы бөлінуіне ықпал етті.Фото: Қызылорда облысы әкімінің баспасөз қызметі

Қорқыт ата университетінің жаңа ректоры таныстырылды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде Қырғыз Республикасындағы Жүсіп Баласағұн атындағы Қырғыз Ұлттық университеттен келген 4 докторант ғылыми тағылымдамадан өтуде.Тағылымдама барысында докторанттар университетте дәріс оқып жүрген Оңтүстік Кореялық профессордың Python бағдарламалау тілі бойынша заманауи, практикалық бағыттағы сабақтарына қатысып, IT саласындағы озық халықаралық тәжірибемен танысуда.&nbsp; Сонымен қатар, қырғызстандық жас ғалымдар университеттің профессор-оқытушылар құрамымен ғылыми пікір алмасып, зерттеу бағыттарын талқылап, болашақ бірлескен жобалардың негізін қалады. Академиялық ортадағы ашық диалог пен кәсіби ынтымақтастық халықаралық ғылым интеграциясының нақты көрінісіне айналды.&nbsp;Қонақтар университеттің ғылыми әлеуетіне, заманауи инфрақұрылымына және білім беру сапасына жоғары баға беріп, осындай тәжірибе алмасулар Орталық Азия мен халықаралық академиялық кеңістікті байланыстыратын маңызды көпір екенін атап өтті.

Қорқыт ата университетінде Қырғызстандық докторанттар ғылыми тағылымдамадан өтуде

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Жасанды интеллект институтында корей халқының дәстүрлі Жаңа жылы – Соллаль мерекесіне арналған мазмұнды әрі тағылымды іс-шара ұйымдастырылды. Шара мәдениетаралық ынтымақтастықты нығайтуға және ұлттық құндылықтарды дәріптеуге бағытталды.Мерекелік бағдарлама барысында қатысушылар корей халқының салт-дәстүрлері мен әдет-ғұрыптары туралы кеңінен ақпарат алып, ұлттық ойындарға белсенді қатысты. Дәстүрлі ойындар мен мерекелік рәсімдердің таныстырылымы жиналған қауымның ерекше қызығушылығын тудырды. Сондай-ақ, студенттер корей халқының ұлттық киімдерін таныстырды. Бұл көрініс шараның мазмұнын байытып, қатысушыларға ұлттық мәдениетті тереңірек түсінуге мүмкіндік жасады.Соллаль – корей халқы үшін айрықша мәнге ие мереке. Бұл күні отбасы мүшелері бас қосып, үлкендерге құрмет көрсетіп, ізгі тілектер айтылады. Мейрам татулықты, сыйластықты және ұрпақтар сабақтастығын дәріптейді. Институт қабырғасында өткен шара да осы құндылықтарды насихаттауға арналды.Аталған іс-шара Қазақстан мен Оңтүстік Корея арасындағы мәдени-гуманитарлық байланыстардың нығайып келе жатқанын айқындай түсті. Мұндай бастамалар халықаралық әріптестікті тереңдетіп, студенттердің мәдениетаралық түсінігін кеңейтуге ықпал етеді.

Университет қабырғасында корей Жаңа жылы тойланды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің профессоры, Қазақстанның еңбек сіңірген қайраткері, «Құрмет» және «Парасат» ордендерінің иегері, филология ғылымдарының докторы Бағдат Кәрібозұлы білім алушылармен кездесіп, тағылымы мол дәріс оқыды.&nbsp;Дәріс барысында ғалым өз саласындағы терең ғылыми тұжырымдары мен тәжірибелік бағыттарын ортаға салып, студенттерге кәсіби дамуға бағытталған құнды кеңестер берді. Сондай-ақ, жастардың қызығушылығын арттырып, ғылыми ізденіске ынталандыратын мазмұнды ойларымен бөлісті.Кездесу еркін форматта өтті. Студенттер көкейлеріндегі сұрақтарын қойып, ғылыми тақырыптар төңірегінде пікір алмасты. Бұл тағылымды жүздесу жас мамандар үшін мотивация болды. &nbsp; Профессор Бағдат Кәрібозұлы өзінің жеке кітапханасындағы 200-ге жуық құнды еңбектерін университет кітапханасының қорына сыйға тартты. Бұл кітаптар оқу үдерісін жетілдіріп, зерттеу жұмыстарын дамытуға елеулі үлес қосатыны анық. &nbsp;Университет ұжымы профессор Бағдат Кәрібозұлына білім мен ғылымды дамыту жолындағы еңбегі және жастар тәрбиесіне қосқан үлесі үшін алғыс білдіріп, шығармашылық табыс тілейді.

Қазақстан және Қызылорда облысының жаңалықтары: Білім