<a href="https://kyzylorda-news.kz/">Kyzylorda-news.kz</a> Осыдан 2 жыл бұрын халыққа Жолдауында Мемлекет басшысы Қасым-Жомарт Тоқаев «Жайлы мектеп» пилоттық жобасын әзірлеу керектігі туралы айтқан еді. Бұл жоба апатты мектептерді жою, үш ауысымды мектептер мен оқушы орындарының тапшылығы мәселесін шешу және білім саласындағы бірқатар мәселелерді шешу мақсатында қолға алынған еді. Бұл бағытта 2023-2025 жылдар аралығында елімізде 369 орта білім беру нысанын салу жоспарланған.&nbsp;Нәтижесінде жоба екі ауысымда 740 мың жаңа оқушы орнын құруға мүмкіндік береді. «Жайлы мектептің» құрылысы екі кезең бойынша жүзеге асады. Бірінші кезең бойынша 2023-2024 жыл аралығында 208 жайлы мектеп салынуы қажет. Ал екінші кезеңде 151 жаңа білім ошағы ел игілігіне беріледі деп жоспарлануда. Осылайша, елімізде 2025 жылға дейін 300-ден астам заманауи үлгідегі жайлы білім ошағы бой көтереді.Аты да заты да бөлек бұл мектептің жобасы, сапалы салынуы, қаржыландыруы «Samruk-Kazyna Construction» АҚ жауапкершілігінде. Республика бюджеті мен Ұлттық қордан ұлттық жобаны жүзеге асыруға 2,38 триллион теңге қаржы бөлінген. Оның ішінде 2023 жылға 499,9 миллиард теңге бөлінсе, биылға 976,7 миллиард теңге, келер жылға – 909,4 миллиард теңге қарастырылған. Сондай-ақ жоспарланған 369 мектептің 206-сы қалада, 163-і ауылдық жерде салынбақ.Ұлттық жобаның уақытылы әрі сапалы жүзеге асуы жоғарыда аталған компанияның бақылауында. Жалпы «Жайлы мектеп» ұлттық жобасының тағы бір мақсаты – отандық өнімді қолдау. Осы орайда нысанды салушы құрылыс мекемелері қажетті жабдықтар мен жиһаздарды отандық тауар өндірушілерден алуы тиіс. Бұл тек сөз жүзінде қалмай, іс жүзінде қадағаланады. Себебі мердігерлерге ай сайын Қазақстанда өндірілген материалдар мен тауарларын пайдалану бойынша есеп беріп отыру міндеттелген. Бұдан бөлек жобаны іске асырудың ашықтығын қамтамасыз ету мақсатында бірыңғай кросс-платформа әзірленген. Жайлы мектептердің мердігерлері апта сайын құрылыстың барысы туралы электрондық форматта есеп дайындап порталға жүктеуге міндеттелген. Осылайша бақылау бір уақытта бірнеше деңгейде жүзеге аспақ. Бұл мектептерді жобалау және салу процесін бақылауға, жобаны әзірлеу кесте бойынша жүріп жатқанына көз жеткізуге мүмкіндік береді.&nbsp;Егер мердігер қандай да бір жұмыс түрлері бойынша үлгермесе немесе артта қалса, порталда ашық көрсетіп тұрады. Сондай-ақ порталда барлық төлем құжаттары мен орындалған жұмыс актілері болады. Осылайша мердігердің қанша ақша алғаны және атқарған жұмысы көрінеді. Сонымен қатар құрылыс нысандарында фото және бейнебақылау орнатылған. Бұл арқылы әрбір мектептің құрылысын техникалық қадағалау сарапшылары бақылай алады. Нәтижесінде сапалы жұмыс болады.Қазіргі таңда «Жайлы мектеп» ұлттық жобасы Қазақстанның барлық өңірлерінде, ауыл-аймақтарында жүзеге асырылуда. Дегенмен мектептерде оқушы орындарының тапшылығы бар аймақтарға басымдық берілген. Бұл қатарда Алматы, Астана, Шымкент сынды ірі қалалар мен Түркістан, Қызылорда облысы да бар. &nbsp;Мемлекет басшысының бастамасымен қолға алынған жобаның игілігін көруді жұртшылық асыға күтуде. Бұл білім ошағында тәлім алғысы келетін оқушылардың қарасы қалың.Ал жұртшылық тағатсыз күткен жайлы білім ордасы қандай артықшылығы бар? Пилоттық жобаны жүзеге асыру аясында jaily-mektep.kz арнайы сайты іске қосылған. Аталған ақпарат порталында «Жайлы мектептің» несімен ерекшеленетіні жазылған. Ондағы ақпарат көзіне сүйенсек, аталған білім ордасының ауданы, сынып бөлмесі басқа мектептерге қарағанда 15-20 процентке кең болмақ. Сонымен бірге техникалық жабдықталуы 4 есе жоғары болады. Теория мен тәжірибеге арналған құрал-жабдықтар толық қамтамасыз етіледі. Заманауи компьютерлер мен интерактивті тақталар орнатылып, қауіпсіздік шарасын сақтауда бейнекамералар, кіріп-шығуды қадағалау жүйесі орнатылады. Сондай-ақ оқушылар мен мұғалімдерге арналған демалыс және нетворкинг аймақтары жабдықталады. Бұдан бөлек 3-4 спорт залы, мектеп аумағында спортпен шұғылдануға және басқа да іс-шараларға арналған алаңдар жасалады. Ерекше балалар үшін кедергісіз орта қамтамасыз етіліп, пандус, лифт, арнайы дәретханалар және инклюзивті білім беру кабинеті жұмыс істемек. Техникалық бағыттағы кабинеттер қажетті құрылғылармен қамтамасыз етіліп, оқушылардың теорияны тәжірибемен ұштастыруына мүмкіндік жасалады. Робототехниканы игеруге басымдық беріледі. Сонымен қатар жоғары сынып пен бастауыш сынып ғимараттары бөлек орналасады.Аймақта ұлттық жоба аясында 2025 жылға дейін 12300 орынға арналған 21 мектеп бой көтеруі керек. Оның ішінде облыс орталығынан бастап барлық аудан және ауылдар қамтылған. Атап айтқанда, Арал ауданында және Сексеуіл, Жақсықылыш ауылында – 300 орындық, Жалағаш ауданында – 300, Қазалы ауданына қарасты Жанқожа батыр ауылында – 300, Әйтеке би кентінде – 600, Жаңақорған ауданында – 600, оған қарасты Жаңарық ауылдық округінде – 300, Қармақшы ауданының ІІІ интернационал ауылында – 300, Жосалы, Тереңөзек кентінде – 300, Шиеліде – 900 орындық білім ошағы бой көтереді. Ал Қызылорда қаласы бойынша 6 жайлы мектеп салынады. Оның ішінде сол жағалауда – 900, СПМК-70 – 1500, Арайда – 1500, КБИ-де – 600, Ж.Махамбетов және Қызылжарма ауылдық округінде – 600 орындық мектеп бой көтереді деп жоспарланған. Бұл ретте аймақ басшысы Нұрлыбек Нәлібаев жаз бойы құрылыс алаңдарын аралап, нысанның сапалы салынуын қадағалады.Бұл туралы облыс әкімдігінің «facebook» парақшасында биыл 6900 орындық 10 мектеп, алдағы жылы 5400 орындық 11 мектеп пайдалануға берілетіні айтылған. Облыс әкімдігі оларға инфрақұрылым жеткізуге жергілікті бюджеттен 118,4 миллион теңге бөліп, жоба-сметалық құжаттары әзірленді, сараптаманың оң қорытындысы алынды. Инфрақұрылым жүргізуге жергілікті бюджеттен 1,7 миллиард теңге бөлініп, қазір 10 мектептегі құрылыс-монтаж жұмыстары толық аяқталды. Биыл құрылысы басталатын 11 мектептің жер телімдері белгіленіп, «Самұрық-Қазына Констракшн» акционерлік қоғамына берілген.Ұлттық жоба туралы ақпарат беретін «Jaily-mektep.kz» сайтында көрсетілген ақпаратқа сүйенсек, биыл Қызылорда қаласына қарасты Ж.Махамбетов ауылынан басқа аумақтардағы білім ошағы пайдалануға берілуі тиіс.Ал аймақтағы алғашқы 900 орындық «Жайлы мектеп» сол жағалаудан қала күні қарсаңында оқушылар игілігіне берілді. Білім ғимаратының ашылу салтанатына облыс әкімі Нұрлыбек Нәлібаев арнайы қатысты. Шара барысында аймақ басшысы қала тұрғындарын жаңа мектептің ашылуымен құттықтап, жиналған жұртшылыққа ізгі тілегін айтты.<blockquote>– Жас ұрпақтың білімі мен оқу-ағарту ісіне барынша көңіл бөлу – мемлекетіміздің ең маңызды міндеті. Биыл өңірдің білім саласына бөлінген қаржы 262 миллиард 100 миллион теңгеге жетіп, облыс бюджетінің 35,2 пайызын құрады. Мемлекет басшысының бастамасымен «Жайлы мектеп» ұлттық жобасы еліміздің барлық аймағында жүзеге асырылуда. Ұлттық жоба аясында 740 мың оқушыға арналған 369 мектеп салынады. Осы жобамен өңірімізде 12 300 орынға лайықталған 21 мектеп салу жоспарланған, оның 10-ның құрылысы жүргізілуде. «Жайлы мектеп» жобасын іске асыру арқылы аймағымыздағы 4 апатты және 3 бейімделген мектептің мәселесі түбегейлі шешімін табады. Бүгін республикалық бюджеттің тікелей қаржыландыруымен, «Самұрық-Қазына» акционерлік қоғамының үйлестіруімен, 6 миллиард 851 миллион теңгеге салынған облыстағы алғашқы 900 орындық «Жайлы мектеп» ел игілігіне берілуде. Бұл ғимарат Қызылорда қаласының сол жағалауы тұрғындарының мемлекеттік мектепке деген сұранысына толық жауап береді. Білім ордасында шәкірттердің барлық пәнді оқып үйренуіне, ұстаздардың шығармашылықпен еңбек етуіне толық мүмкіндік жасалған. Өскелең ұрпақтың игілігі үшін Жаңақорған, Шиелі аудандарында 200 орындық оқушылар үйі мен 50 орындық өнер мектебі, «СаутсОйл» компаниясының демеушілігімен музыкалық колледждің жаңа ғимараты, Шығармашылық-инновациялық орталық, «Білімді қолдау қоры» есебінен физика-математика мектеп-интернаты салынуда. Мектеп-интернат екінші тоқсанда пайдалануға беріледі.</blockquote>Жаңа мектеп салу, апатты мектептер мен үш ауысымдық оқытуды жою – білім саласындағы басым бағыттың ең маңыздысы. Осы білім ошағында ұстаз бен шәкірт, мектеп пен ата-ана байланысы артып, алдыңғы буынның ізгі жолын жалғаған білімді де талантты, санасы сергек, ойы ұшқыр, бәсекеге қабілетті жас ұрпақ тәрбиеленіп шығарына сеніміміз мол. Жаңа оқу жылында биік табыстарға қол жеткізіп, алға қойған мақсаттарыңыз орындалсын! Ел мүддесі жолындағы игі істерді бірге атқарайық, жетістікке бірге жетейік! Егемен еліміздің ертеңі еңселі, тәуелсіздігіміз тұғырлы болғай!», – деді облыс әкімі Нұрлыбек Нәлібаев ашылу рәсімінде.«Жайлы мектептің» ашылу жиынына сонымен бірге «Самұрық-Қазына Констракшн» акционерлік қоғамының басқарма төрағасы Мәулен Айманбетовте болды. Ол қала тұрғындарын жаңа мектептің ашылуымен құттықтап, қатысушыларға игі тілегін жеткізді.Жоспар бойынша жыл соңына дейін 12 жаңа мектеп және 4 мектеп жанындағы қосымша құрылыс аяқталып, пайдалануға беріледі деп күтілуде. Өткен жылы облыс орталығындағы 4 мектепке 1850 оқушыға арналған қосымша ғимарат салынған еді. Осылайша артық шығындалмай, бюджетке салмақ салмай үш ауысымды оқытуға көшуі мүмкін мектептер мәселесі шешімін тапқан еді. Бұл бағытта былтыр 1170 орындық төрт мектеп, осы жылдың басында 550 орындық екі мектеп пайдалануға берілді. Сонымен қатар биылғы жаңа оқу жылында шиелілік өрендер «Білім беру инфрақұрылымын қолдау» қорының қаржыландыруымен 100 орындық мектепте, ал жаңақорғандық оқушылар жергілікті бюджет есебінен 150 орындық мектепте білім білім шырағын жағуға мүмкіндік алды.А.ӘЛІМ

Жайлы мектеп сапалы білім кепілі

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы, Қазалы ауданында балалардың зейінін ашып қана қоймай, балғындарды бақытқа бөлеген – «Алпамыс» бөбекжай-балабақшасы бар. Заманауи ілім менен білім берер, аудандағы бәсі биік балабақшаның алған асуы, бағындырған белесі де ауызтолтырып айтарлықтай. Жақында аталған орынға барып, меңгерушісі Жанат Көлановамен жолығып, бала бағбандарының бүгіні мен болашағын саралап, көріп қайтқан едік.Әйтеке би кентінің 5-ші квартал аталып кеткен аймағында орналасқан №21 «Алпамыс» бөбекжай-балабақшасы» «Балапан» мемлекеттік бағдарламасы аясында салынып, 2014 жылы қазан айының алтыншы жұлдызынан бастап пайдалануға берілді. Балабақшаның материалдық-техникалық базасы заман талабына сай жабдықталып, педагог мамандар заманауи технологиялар бойынша білім жетілдіру курстарынан өтіп, ұлт болашағы – бүлдіршіндерді заман талабына сай тәрбиелеуде елеулі үлес қосып келеді. Балабақшада 12 топ бар. Бұнда баланы қабылдау, ойын, жатын, ыдыс-аяққа және қол жууға арналған бөлме, меңгеруші, әдіскер кабинеті, логопед, дефектолог, есепші, педагог-психолог, шаруашылық меңгерушісі кабинеті, музыка, денешынықтыру залы, медициналық кабинет және оқшаулау бөлмесімен қамтамасыз етілген. Сонымен қатар бүлдіршіндерге патриоттық, эстетикалық, адамгершілік тәрбие беру, өз ой-пікірін білдіре алатын, салауатты өмір салтына сай, болашақтың тірегі болатын дені сау, жан-жақты азамат етіп тәрбиелеуде балабақшада дене шынықтыру нұсқаушысы, педагог ұйымдастырушы, педагог-психолог, логопед, дефектолог мамандары, музыка жетекшісі, би жетекшісі жұмыс істейді.<blockquote>– Мектепке дейінгі тәрбие мен оқытудың үлгілік оқу бағдарламасын басшылыққа алып, әр баланың қызығушылығын, ерекшеліктері мен қажеттіліктерін ескере отырып, жалпы адами және ұлттық құндылықтар негізінде оларды толыққанды дамыту мен әлеуетін ашу мақсатында жұмыс жүргізіп келеді. Рухани адамгершілік құндылықтың негізі – халық педагогикасынан бастау алады. Оның бірнеше ғасырлық тәжірибесіне сүйене отырып, рухани құндылықты сақтай отырып, болашақ ұрпақты еңбекке, қоғамдық ортаға дайындау, имандылық қасиеттерін бала бойына сіңіру әрбір педагогке жүктелген. Сондықтан да заман талабынан кеш қалмай жаңашылдыққа, инновациялық өзгерістерді күнделікті тәрбиелеу – білім беру процестерінде ұйымдастыру балабақша педагогтеріне қойылатын басты талаптардың бірі, – дейді балабақша меңгерушісі Жанат Көланова.</blockquote>Балабақшаның материалдық-техникалық базасы заман талабына сай жабдықталып, педагог мамандар заманауи технологиялар бойынша білім жетілдіру курстарынан өтіп, ұлт болашағы – бүлдіршіндерді заман талабына сай тәрбиелеуде елеулі үлес қосып келеді. Балабақша педагогтерінің озық тәжірибелерін аудан, аймақ, облыс көлемінде тарату мақсатында аудандық білім бөлімінің ұйымдастыруымен «Мектепке дейінгі ұйымда тәрбиелеу мен оқыту үшін баланың жас ерек¬шеліктеріне сәйкес біліктері мен дағдыларын әрекет түрлерінде ойын ар¬қылы қалыптастыру» тақырыбында аудандық семинар өткізілді. Семинарға аудандағы мектепке дейінгі ұйымдардан екі жүзге жуық педагог қатысты. Сонымен бірге педагогтердің шығармашылық шеберлігін шыңдау, педагогикалық тәжірибелерін көпшілікке тарату, мектепке дейінгі балалардың заманауи ақпараттық-технологияларды пайлану арқылы білім, білік дағдыларын меңгерту мақсатында 2024 жылы 22 мамыр күні Қызылорда облыстық оқу орталығының ұйымдастырумен «Тәрбиеленушілердің дене, зияткерлік және жеке тұлғалық дамуын қамтамасыз етудегі жаңашыл бағыттар, ортақ ізденіс, тиімді нәтиже» тақырыбындағы облыстық вебинар өткізілді. Вебинарға облыстық оқу орталығы директорының орынбасары Г.Б.Дихамбаева, облыстық оқу орталығы мектепке дейінгі бөлімінің меңгерушісі Ж.С.Хожбанова және облыс көлемінде 100-ге жуық педагог қатысып, тәжірибе алмасып, оң пікірлерін айтты. Аталған семинарларда мектепке дейінгі мекемедегі білім берудің 5 дағдысы бойынша заманауи, ақпараттық технологияларды пайдаланып, өз тәжірибесін бөлісіп, шығармашылықпен жұмыс жасаған Г.Жұбаныш, М.Танирбергенова, А.Бауыржан, А.Утеген, Н.Нұрылла, С.Тұрғанбай, М.Шапихова, А.Жолмырзаева, Т.Казмамбетова, М.Мейрамбек, А.Нұрдәулет, Б.Көзімай, Г.Жолмырзаева, Г.Уразымбетова, Б.Сержанова, Р.Алгазиевалардың ашық ұйымдастырылған іс-әрекеттері ұсынылды.<blockquote>– 2024 жылдың қаңтар айынан бастап балабақшамызда «IT балабақша заман талабы» жоба аясында, мектепке дейінгі білім беруде ақпараттық технологияларды кеңінен пайдалану мақсатында STEAM кабинет ашылды. Бұл кабинеттің мақсаты – цифрлық білім беру ресурстарын пайдалану арқылы мектепке дейінгі білім беру сапасын арттыру, мектепке дейінгі ұйымда өзгерістерді енгізу үшін қажеттіліктерді анықтау, заман талабына сай инновациялық технологияларды енгізу үшін IT-жобасын іске асыру, «Тірек білім беру ұйымы» базасында ақпараттық технологияларды пайдалану тәжірибесін облыстың басқа білім беру ұйымдарына тарату, жаңартылған білім беру мазмұнына көшуді ескеріп, цифрлық технологияларға негізделген оқу бағдарламаларын әзірлеу, мектепке дейінгі ұйымда өзгерістерді енгізе отырып, заманауи тұлға қалыптастыру және бала, ата-ана, педагог бірлесіп, мақсатты нәтиженің жоғары көрсеткішіне ие болу, – дейді балабақша кабинеттерімен таныстырған Жанат Қуанышқызы.</blockquote>Ұйымдастырылған тәрбиелеу – білім беру жұмыстарының нәтижесінде балабақша бірнеше рет аудандық білім бөлімі, облыстық білім басқармасы, Қызылорда облыстық оқу орталығының және республикалық балаларды ерте дамыту институтының Алғыс хаттарымен марапатталды. Ұлболсын ТАЛАПБАЕВА

Балғындарды бақытқа бөлеген балабақша

&nbsp;&nbsp;<a href="https://kyzylorda-news.kz/">Kyzylorda-news.kz</a> 35 жылдық тарихы бар А.Байтұрсынов атындағы №211 орта мектебі білім беру ісінде жаңа бастамаларды жүзеге асырып,&nbsp;білімді, білікті, бәсекеге қабілетті ұрпақ тәрбиелеуді мақсат еткен білім ордасы. Алаш қайраткерінің есімі берілген білім ошағы ұлт ұстазының атына лайық білім беруді басты мақсат санайды.Заман талабына сай ғылымды игеру – бүгінгі күннің басты талабы. Бұл ретте бар жауапкершілік білім беру орындарына артылатыны сөзсіз. Қазіргі таңда елімізде білім беруде уақыт талабына сай инновациялық технологияларды қолдану міндеттелген.&nbsp;Жаңа инновациялық тәсілдер негізінде мектептерге жағдай жасау – білім саласын дамытудың, білім мен ғылымды игеретін ұрпақ тәрбиелеудің негізі болмақ.Мыңнан астам шәкірт тәрбиелеп отырған оқу ордасының ғимараты биыл күрделі жөндеуден өткен. Жаңа ғимарат іші жарық, жылы, жайлы. Оқушының білім алуына қажетті құрал-жабдықтармен қамтамасыз етілген. Оқу кабинеттері, зертханалар заманауи технологиямен жабдықталып, баланың тек теория тұрғысында емес, тәжірибе жасап көруіне де қолайлы жағдай жасалған. «Білім берудегі өзгерістің 1000 көшбасшысы» жобасы аясында тағайындалған мектеп басшысы Айжан Әлімова білім ошағының жұмысын жандандырып, сапалы білім беруді арттыруда жас та болса іскерлігін көрсетіп, қолдан келер мүмкіндікті қалт жібермей жүйелі жүргізіп келеді. &nbsp;Ол алда үлкен жобаларды жүзеге асыруды көздеп отырғанын айтады.Бүгінде орта мектепте қазақ тілінің қолдану аясын кеңейту, оқушылардың қазақ тілінде ойлау және сөйлеу дағдысын жетілдіру мақсатында республикалық «Тілге бойлау» жобасы қолға алынуда. Бұл аймақта алғаш рет пилоттық жоба ретінде жүзеге асырылмақ. Оны жүзеге асыруда А.Байтұрсынов атындағы №211 орта мектебі таңдалған.<blockquote>– Оқу-ағарту министрлігі Ы.Алтынсарин атындағы ұлттық білім академиясы «Тілге бойлау» жобасының концепциясын іске асыру мақсатында мемлекеттік қазақ мектептерде білім алушылардың тілдік дағдыларын жетілдіруді қолға алуда. Жоба аясында 6 ғылыми зерттеу зертханасы мен ҚазТест орталығы жұмыс істейді. Бүгінде Қорқыт ата атындағы Қызылорда университеті ғалымдарымен шығармашылық байланыс орнатылып, екі жақты меморандумға қол қойылды. Сонымен бірге Алматы қаласындағы мемлекетті тілді дамыту институты, Қызылорда облысының тілдерді оқыту орталығы, облыстық әдістемелік орталықпен тығыз байланыс орнатылған, – дейді мектеп директоры.</blockquote>Білімді&nbsp;ұрпақтың мектеп қабырғасынан жан-жақты дамуы, ізденісте болуы керек-ақ. Ал мектеп қабырғасында жүзеге асатын жобалар оқушының қабілетін ашуға, дағды қалыптастыруға таптырмас құрал.«Тілге бойлау» жобасының да оқушыларға берері мол. Соның нәтижесінде оқушылардың қазақ тілін терең меңгеруіне, таза, анық сөйлеуіне, &nbsp;сөз саптауына, тіпті шығарма, мәтінді сауатты жазуды игеруіне де сеп болмақ. Білім ордасының басшысы Айжан Шорабекқызының айтуынша, жоба аясында оқушылар әр пән бойынша термин сөздерді қолданбай қазақша атауымен айтуға дағдыланады.<blockquote>– Жоба бойынша 6 зерттеу бағыты қамтылған. Оның ішінде «Тыңдалым» ғылыми-зерттеу зертханасында оқушының бойына ұлттық құндылықты сіңіру, әлемді қазақ тілі арқылы таныту, рухани, ұлттық дүниетанымын кеңейту міндеттелсе, «Айтылым әрекеті» зертханасында ауызша сөйлеудегі әдеп, мәнерлі сөйлеу шеберлігін үйретеді. Сол сияқты «Академиялық жазылым» зертханасында әлеуметтік-мәдени, ғылыми, ресми, іскерлік бағытта мәтін жазуды игереді. Яғни мәтінге, ғылыми жобаға жоспар құру, шығарма, эссе, мазмұндама жазуда ойын көркем жеткізуді әрі орфографиялық, пунктуациялық қатесіз жазуды үйренеді. Бұдан бөлек «Оқу сауаттылығы» зертханасы бар. Мұнда оқушылардың функционалдық сауаттылығын, академиялық білімі мен дағдысын, оқу сауаттылығының сапасын арттыруға басымдық беріледі. Ал «Грамматикалық өнер» зертханасында &nbsp; &nbsp; оқушылардың коммуникативтік дағдысы қалыптастырылады. Қазақ тілі білімінің мета тілін меңгеру арқылы түрлі деңгейдегі пәндік олимпиадаларда, ғылыми жобаларда өз мүмкіндіктерін көрсететін болады. Жобаның соңғы бағыты «Ахметтану» ғылыми-зерттеу зертханасы деп аталады. Мұнда гуманитарлық және жаратылыстану пәндері бойынша ғылыми-зерттеу жұмысы ұйымдастырылады, – дейді Айжан Шорабекқызы.</blockquote>Мектепте тілді меңгеру жұмысы мұнымен шектелмейді. &nbsp;Қазақ тілін меңгеру деңгейін бағалау бойынша Қазтест орталығының базасы қалыптаспақ. Қазіргі таңда орталық базасы қажетті техникалық жабдықтармен қамтамасыз етілген.<blockquote>– Ұлттық тестілеу орталығымен алдағы уақытта біліктілік тестін, сондай-ақ магистратура, докторантураға түсуде дайындық тесттерінен өтуге мүмкіндік жасалуда. Сонымен бірге 4-9 сыныптарға арналған сынамалы тест топтамасы әзірленді. ПИЗА, ПИРЛС, ТИМСС, АЙСИЛС-ке типтес тапсырмалар құрастырылды, – дейді білім ордасының басшысы.</blockquote>Қазақ тілі білімін дамытуда қажырлы еңбек еткен Алаш қайраткері Ахмет Байтұрсынов атындағы мектеп ұжымы атына заты сай білім ошағы болуды мақсат еткен. Сол мақсатқа жету үшін «Тілге бойлау» пилоттық жобасын сәтті жүзеге асыруды көздейді.&nbsp; Еліміздің білім саласын әлемдік талапқа сай ету, білім сапасын арттыру, сол арқылы оқушылардың 3 тілді жетік меңгеруі, ақпарат пен технология заманында заманауи технологиямен жұмыс істей білуін, креативті ойлап, талдау жүргізе алуын, олардың жеке, жұппен, топпен бірге жұмыс істей алуын қалыптастыру ұстаздарға қойылар басты талап. Бұл ретте мектеп ұжымы оқушыларға сапалы білім беріп, саналы ұрпақ, тұлға ретінде өсуіне күш салуда.&nbsp; &nbsp;Ұлағаттты жандардың шәкірт тәрбиелеудегі еңбегі еш кеткен емес. Білім беруде ұстаз үмітін ақтаған оқушылар жетерлік. Олар мектеп абыройын асырып, білім сапасының артуына да өз үлесін қосуда. Қалалық, облыстық, республикалық сайыстарында үздік шығып, білім додасында оза шапқан шәкірттер мектеп мақтанышы. Былтырғы оқу жылының қорытындысы бойынша межелі мақсатқа жеткен білім ордасын тәмамдаған 40 түлектің 26-сы білім грантын иеленді. Білімді де тәрбиелі шәкірт тәрбиелеу ісінде мектепте 80-ге жуық мұғалім жұмыс істеуде. Оның 30-ы педагог-зерттеуші болса, 14-і педагог-сарапшы, 20 педагог-модератор бар. Сонымен қатар мектепте инклюзивті білім беру кабинеті жасақталып, ерекше балалардың қоғамға бейімделуіне жағдай жасалуда. Бұдан бөлек оқушының рухани толысуына, шығармашылығын дамытуына Coworking орталығының да септігі мол. Одан басқа 32573 кітап қоры бар кітапхана қызметін кітапқұмар оқушылар игілігіне пайдалануда.Білім ордасында тек білім беру ісі емес, шәкірттерді өнерге баулу, қабілетін ашу, спортқа бейімдеу шаралары да қолға алынған. Қыз баласының өнерді игеріп, қазақы дәстүрді меңгергені, ұлттық құндылықты дәріптей алғаны жақсы емес пе? Осы орайда білім ордасында «Іскер ана» жобасы қолға алынған. Мұндағы мақсат – халқымыздың салт-дәстүрін қыз балалардың бойына сіңіру, тұрмыстық бұйымдар жасауды үйрету, қолөнер шеберлігіне баулу. Сол үшін арнайы кабинет жабдықталып, оны оқушылардың жасаған бұйымдарымен толықтырған. Кабинет тоқу құралдары, тігін машиналары сынды өзге де қажетті құрал-жабдықтармен жабдықталған. Ал оқушылардың қолынан шыққан қолөнер туындылары бөлмеге ерекше сән беріп тұр.Баланы өнерге баулуда қолөнер үйірмесінен бөлек «Сарыжайлау» домбыра үйірмесі де жұмыс істейді.Ұлттық құндылықты бала бойына сіңіруде мектеп ұжымы басымдық берген тағы бір дүние тоғызқұмалақ ойынының тың әдісінің енгізілуі. Мұндағы ерекшелік тоғызқұмалақтың жаңа түрінде оқушылар ойынды асық арқылы және топпен ойнайды. Оның өзіндік ережесі мен тәртібі бар. «Бұл баланың ақыл ойын дамытып қана қоймай, қимыл-қозғалысының ширақ болуына да әсер етеді» дейді ұстаздар қауымы. Сондай-ақ шахмат, каратэ-до үйірмесі де оқушылар үшін жұмыс істеуде. Тоғызқұмалақ үйірмесіне 70 оқушы барса, 50 оқушы шахмат, 40 оқушы каратэ-до спортын үйренуде.Қазіргі таңда оқушы қауіпсіздігі – басты назарда. Бұл ретте білім ошағы күзет қызметі, өрт, дыбыстық ескерту мен бейнебақылау жүйесімен қамтамасыз етілген.Оқушыға сапалы білім, саналы тәрбие беріп, өнерге үйретіп, спортқа баулып жан-жақты дамуы үшін қолайлы жағдай жасаған білім ұясынан келешек мықты азаматтардың шығары сөзсіз. Мұндай заманауи мектепте білім алған бала да арман жоқ.&nbsp;Айдана Сейіл

Білім бәсекесінде бәсі биік мектеп

<a href="https://kyzylorda-news.kz/">Kyzylorda-news.kz</a> Ұлттық құндылығымыз бен болмысымыздың түп тамыры ең алдымен ауылдан бастау алады. Ауылдың рухани ошағына айналған ауыл мәдениеті бүгінде кеңге қанат жайып келеді. Мәдениет ошақтарының бүгінгі күні атқарып жатқан ілкімді істерінің нәтижесінде ұлттық мәдениетіміздің мәртебесі өсуде. Ауыл мәдениетінің өсіп-өркендеуіне өз үлесін қосып жүрген талантты өнерпаздар ең алдымен үйірмеден қанат қағатыны белгілі. Сырдария ауданына қарасты Іңкәрдария ауылдық клуб үйі жанынан ашылған «Сұлу-ай» шығармашылық өнер орталығындағы Айгерім Жұмабекова жетекшілік ететін «Көркем оқу» үйірмесінде ауыл балалары қазақ халқының атақты ақын-жазушыларының шығармаларын нақышына келтіріп, мәнерлеп оқу дағдысын қалыптастыруда.&nbsp;Бірнеше жылдан бері жергілікті халықтың баласын өнерге баулуға ықпал жасаған «Сұлу-ай» шығармашылық өнер орталығының өрендері көптеген белесті бағындырып келеді. Қызылқұм топырағынан түлеп ұшқан әрбір шәкірт өнер мен білімде өздерін қатар шыңдауда. Расында, бала қабілетін ашуда сан түрлі әдіс-тәсілге иек артатын сала мамандары қазақ халқының тағылымды сөздерін оларға жаттатуға тырысады.<blockquote>– Іңкәрдария ауылдық клуб үйінің жанынан құрылған «Көркем оқу» үйірмесіне үлкен және кіші топтан құралған барлығы 20 оқушы қатысады. Көркем оқу үйірмесі аптасына екі мәрте өткізіледі. Жалпы үйірменің басты мақсаты оқушылардың бос уақытын тиімді өткізу, шығармашылығын шыңдау, поэзияға, әдебиетке, өнерге жақын оқушыларды көркемсөз оқу шеберлігіне, мәнерлеп оқытуға үйрету, қызығушылығын арттыру болып табылады. Бүгінде үйірме аясында танымал ақындардың шығармашылығына байланысты кездесулер, еске алу және шығармашылық кештер, концерттер, түрлі байқаулар ұйымдастырылып отырады. Жетекші ретінде үйірмеге қатысатын әр оқушы өзінің өнерін көрсетіп, үнемі белсенділік танытуын басты назарда ұстаймын. Бүгінгі таңда үйірмеге қатысатын шәкірттерімнің жеткен жетістіктері де аз емес. Ауыз толтырып айтатындай біршама жетістіктері мен марапаттары бар. Атап айтқанда, Алматы қаласында ұйымдастырылған «Балбұлақ» атты халықаралық балалар байқауына шәкіртім Асылым Сұлтанова қатысып, «көркем сөз» номинациясы бойынша бірінші орынды иеленген болатын. Сонымен қатар Алматы қаласында өткізілген «Жеті өнер» шығармашылық орталығының ұйымдастыруымен «Наурыз айы туғанда» атты халықаралық өнер байқауына шәкірттерім «көркем сөз» номинациясы бойынша қатысып Нұрай Мұратбек, Зейнеп Нұрланқызы, Асылым Сұлтанова, Ақбота Ермаханова, Халиалла Жумабеков бас жүлде иеленсе, Кәусар Мұратбек, Аяулым Алпысбай, Мәншүк Бисенбай, Ақнұр Бишенбекова бірінші орынды қанжығаларына байлап, іргелі ауылымыздың мәртебесін биіктеткен болатын, – дейді Айгерім Жұмабекова.</blockquote>Бала күнінен шығармашылыққа, өнерге жақын Айгерім Жұмабекова сөздің, тілдің тазалығына өте қатты мән береді. Түрлі жанрдағы кітапты көп оқитын ол шығарма жазуға бейім. Білікті маманның әріптестерінің айтуынша Айгерім өте еңбекқор, ізденімпаз, жұмыс талғамайтын көрінеді. Өз ісінің білікті маманы әдіскерлік жұмысымен қатар көркем оқу және би үйірмесі жұмыстарын қатар алып жүреді. Шәкірттері түрлі сайыс пен байқауларға үнемі белсене қатысып келеді. Мәселен, биылғы жылдың 24 маусым күні Шымкент қаласында өткен байқауда көркем оқу үйірмесінің белсенді мүшесі Ақбота Ермаханова көрнекті ақын Мұқағали Мақатаевтың «Мен сені сағынғанда» өлеңін оқып, бірінші орынды иеленіп Түркия еліне халықаралық байқауға жолдама алды. Сонымен қатар Шымкент қаласында сәуір айында өткен республикалық байқауға Жанерке Нұрланқызы жеке би жанры бойынша қатысып, бірінші орынды қанжығасына байлап қана қоймай, Ташкент қаласына жолдама ұтып алды. Шәкірттерінің жеткен әр жетістігі Айгерімнің еңбегінің жемісі, нәтижесі екені сөзсіз.<blockquote>– «Сұлу-ай» шығармашылық өнер орталығы тарапынан өнерпаздарға қолдау көрсетіліп тұрады. Өскелең ұрпақты өнерге барынша баулу маңыздылығын жоймайды. Шын мәнінде, «Көркем оқу» үйірмесі баланы қазақылыққа, төл мәдениетін сақтауға, ой-өрісін дамытуға зор мүмкіндік туғызады. Тынымсыз еңбектің нәтижесінде киелі сахнада оқушыларым тарихи, әдеби шығармаларды нақышына келтіріп орындауда. Қашанда бала сауатын аша отырып, табиғатына сай келетін шығарма таңдауға тырысамын. Мұндайда кәсіби біліктілікті шыңдай отырып, әрбір сабаққа дайындықпен келемін. Ең алдымен, бала өзінің мәнерлеп оқитын шығармасының шығу тарихына тереңнен қаныққаны дұрыс. Бұның барлығы – үйірме сабақтары барысында бала санасына сіңіріледі. Біз баламен жұмыс жасау арқылы өнерден өзіндік орнын табуға жағдай жасаймыз, – дейді Айгерім Жұмабекова.</blockquote>Көркем оқу үйірмесіне қатысып, жақсы жетістіктерге жетіп жүрген балалар алдағы уақытта ауданның өнер, мәдениет, білім саласын дамытуға үлес қосады деп сенеміз. Өнерлінің өрісін кеңейткен сала мамандарының жұмысына сәттілік тілейміз.А.ЖҮНІСОВА

Ауыл балаларының үйірмеден үйренері көп

<a href="https://kyzylorda-news.kz/">Kyzylorda-news.kz</a> Бастауыш сынып мұғалімі мамандығы – барлық мамандықтардың іргетасы болып табылатын ең ізгілікті, сұранысқа ие және байыпты мамандық. Педагог мемлекеттің болашағы қолында болатын жастардың дүниетанымын қалыптастырумен айналысады. Бұл мамандықты өмір салты деп атауға болады. Өйткені мұғалім барлық оқушыларының мінез-құлқын қалыптастыруға жауапты. Бірінші мұғалім түсініксіз мәселелерді шешеді және күн сайын балалардың санасында үздіксіз туындайтын көптеген сұраққа жауап береді. Әрбір шешім немесе жауап сауатты және стратегиялық тұрғыдан дұрыс болуы керек. Себебі бастауыш мектепте алған білімді адам саналы өмір бойы пайдаланады.Бақыткүл Жақсыбайқызы кішкентай балақайлармен тығыз жұмыс істегеніне де 36 жыл болды. Бала кезден армандаған кәсібіне қол жеткізіп, қаншама белестерді бағындырды. Педагогикалық еңбек өтілінде көптеген жетістіктерімен әріптестеріне үлгі болып келеді.<blockquote>– Бастауыш сынып мұғалімі мамандығының бірегейлігі бірден бірнеше әлеуметтік мәртебелерді біріктіруде жатыр. Мұғалім үшін ең үлкен қуаныш – балалар, олардың жетістіктері, олардың көпшілігімен мақтанамын да. Маған балалармен жұмыс істеу қызықты. Жасым келді деп, қол қусырып отырмаймын. Жастармен қатар заман талабына сай біліктілікті арттырып отырамын. Компьютерленген уақыт болғандықтан ба, қазіргі балалардың ойы ұшқыр. Қойылған сұраққа ойланбастан тез жауап береді. Бастауыш сатыдан бастап баланың тілін, ой-өрісін, қиялы мен шығармашылығын дамыту арқылы заман талабына сай жан-жақты дамыған жеке тұлғаны қалыптастыру оңай шаруа емес. Қаншама ізденіс пен еңбекті талап етеді. Шәкірттеріммен бірге оқу-тәрбие процесін жаңаша ұйымдастыруға, олардың шығармашылық таным-қабілеттерін дамыта отырып, жеке ерекшеліктерін де таныта білуге күш-қуатымды жұмсаудан жалыққан емеспін. Еліміз дамыған алдыңғы қатарлы мемлекеттердің қатарынан көрінуді мақсат етуде. Бұл мақсатқа жету үшін әрбір азаматты мектеп қабырғасынан кәсіби біліктілікке баулу қажет, – дейді Бақыткүл Әлжан.</blockquote>Бүгінде Бақытгүл Жақсыбайқызы – С.Сей­фуллин атындағы №165 орта мектепте бастауыш сынып мұғалімі. Биыл төртінші сыныпқа дәріс береді.«Ел боламын десең, бесігіңді түзе» деген бар. Мектептегі білім мен тәрбие беру негізі бастауыш сыныптардан басталады. Бастауыш сынып мұғалімі – пән оқытушы ғана емес, ол – бағбан, баланың болашағына бағыт беруші, бала бойындағы қабілетінің көзін ашушы, қорғанышы деуге болады. Барлық білімнің негізі бастауышта қаланатын болса, балаға дәл осы кезде білім беріп қалудың маңызы зор. Баланы оқуға үйрету мен тәрбиелеу, оның тұлға ретінде өзін-өзі ашуға, жалпы дамуының қалыптасуына жағдай жасайтын негізгі саты. Жалпы адамның мектептегі білім алу кезеңі және тұтас педагогикалық үрдіс сапалы нәтижеге жету үшін бастауыш сыныптардағы оқу-тәрбие үрдісі қазіргі заман талаптарына сай құрылуы шарт. Сондықтан бастауыш мұғаліміне қойылар талап пен жауапкершілік те салмақты.«Қазіргі таңдағы мұғалім оқушы үшін «дайын» білім көзі ғана болмай, керісінше кіші мектеп оқушыларының танымдық іс-әрекеттерінің ұйымдастырушысы және үйлестірушісі бола білу қажет. Ол үшін мұғалім өз бетімен білімін жетілдіре алатын, шығармашылық, сыни ойлауы қалыптасқан, қалыптан тыс кәсіби міндеттерін шешуде жаңаша жол табуға дағдыланған маман болуы қажет. Бас­тауыш сынып оқушыларының тәрбиесі, оқуы мен дамуы жайлы теория мен тәрбие таным мәселесінде қиылысады. Қазіргі балалардың таным белсенділігі мен қызығушылығын қалыптастыруға септігін тигізетін оқытудың инновациялық әдіс-тәсілдерін білім беруде орынды пайдалансақ, ол өзінің сипатын береді, яғни оқушының жаттығу жұмысы нәтижесінде деңгейлері көтеріліп, пәнге деген қызығушылығы артады. Оқушының білім сапасы жоғарылап, логикалық ойлау мен шығармашылық іс-әрекетке қабілеті артады деген тұжырымда Бақыткүл Әлжан.&nbsp;Айнұр ҚАЗМАҒАМБЕТОВА

Бақыткүл Жақсыбайқызы: "Мұғалім үшін ең үлкен қуаныш – балалар, олардың жетістіктері"

Білім мен тәжірибе ұштасқан оқу ордасы

<a href="https://kyzylorda-news.kz/">Kyzylorda-news.kz</a> Қашанда сапалы білімнің іргетасы бастауыш сыныпта қалыптасады. Сондықтан мектеп табалдырығын аттаған әрбір балаға бағыт-бағдар беретін алғашқы ұстаздың ұлылығын барлық адам мойындайды. Мамандыққа деген адалдықты шәкіртке деген сүйіспеншілікпен ұштастырған алғашқы ұстаз бала жанының бағбаны екені сөзсіз.&nbsp; Кенжегүл Раманқұлова – 35 жылға жуық абыройлы қызмет атқарып, терең білім мен тәлімді тәрбиені шәкірттеріне сіңіріп, адамға тән асыл қасиеттерді бойына жинаған саналы ғұмырын ұстаздыққа арнаған ұлағат иесі. Білікті ұстаз талай жыл бойы ауыл балаларына білім мен тәрбиені қатар беріп, қажырлы еңбек етіп келеді.Ұлағатты ұстаз Кенжегүл Жорабекқызы 35 жылға жуық уақыт Сырдария ауданына қарасты Асқар Тоқмағамбетов ауылындағы №135 орта мектепте қызмет етіп келеді. Орта мектепті ойдағыдай аяқтаған соң 1987-1990 жылдары М.Мәметова атындағы педагогикалық училищені жалпы білім беретін мектептің бастауыш кластарында оқыту мамандығы бойынша үздік дипломмен бітіріп, 1991-1994 жылдары Қорқыт ата атындағы Қызылорда педагогикалық институтында бастауыш оқытудың педагогикасы мен әдістемесі маман­дығын игеріп шығады. Бала кезінен білімге құштар болған білікті маман алғашқы еңбек жолын 1990 жылы №135 А.Тоқмағамбетов атындағы орта мектепте бастауыш сынып мұғалімі болып бастаған. Саналы ғұмырында талай шәкіртін білім нәрі­мен сусындатып, тәлімді тәрбие беріп жүрген ардақты ұстаз мектеп директорының тәрбие ісі жөніндегі орынбасары, бағдарлы оқыту ісі жөнін­дегі орынбасар, оқу ісінің орынбасары қызметтерін атқарған. Аяу­лы жан ұстаздық қызметімен қоса отбасын қатар алып жүрген үлкен шаңырақтың шамшырағы, ұйытқысы. Өмірлік серігі қажырлы еңбек етіп жүрген шаруа адамы. Білікті ұстаз жолдасымен бірге 4 бала тәрбиелеп, бүгінде бақытты ата-әже атанып отыр.<blockquote>– «Ел боламын десең, бесігіңді түзе» дейді халық даналығында. Мекте­тегі білім мен тәрбиенің алғашқы баспалдағы және негізі бастауыш сыныптардан басталатыны белгілі. Бастауыш мұғалімі ол тек оқытуышы ғана емес, ол – бағбан, баланың жарқын болашағына жол көрсетуші, бағыт-бағдар беруші, сонымен қоса баланың бойындағы қабілет көзін ашушы. Бастауыш мұғаліміне қойылар талап пен жауапкершілік басқалардан екі есе жоғары деуге болады. Осы тұста ұстаз ретінде баланы сол қалпында жақсы көру маңызды екенін айтқым келеді. Тентек пен тілалғышты, ұғымтал мен ойлау қабілеті төмен, ұқыпты мен жалқау оқушыларды бөліп-жармай, барлығын да бірдей жақсы көру керек. Балаларға деген мейірімділік пен сүйіспеншілік бар жерде қатыгездік болмайды, намысына тиетін сөздер айтылмайды, олардың әрбір жетістіктеріне қуанып отырасың. Оларды түсіне білу, яғни солардың көзқарастарымен санасу, оларды ересектерше қабылдау, қамқорлық танытқанына қуану, ақыл­дасып отыру маңызды. Олардың танытқан қамқорлықтары мен әрбір ісіне кешіріммен емес, үлкен құрметпен қарау керек. Балаларды түсіну дегеніміз – оларды билігі­ бағындыру емес, керісінше олар­дың бүгінгі өмірі­не сүйене отырып, бола­шақ өміріне алғашқы дәндерін себу. Бала жүрегінің тебіренісі мен жан дүние­сінің қозғалысын түсіне білген педагог оқушысының тәрбиесі­мен тереңдей айналыса алады. Мұғалімнің бойынан адамға тән жақсы қасиеттердің барлығы – күлімсіреу, қаталдық, ұстамдылық, салмақтылық, сезімталдық, шынайылық, зияткерлік, тіл табысушылық, өмірге деген махаббат болуы керек, – дейді білікті ұстаз.</blockquote>Кенжегүл Раманқұлова өзінің ұстаздық еткен жолында «Бастауыш сыныптағы математика пәнінің үздік мұғалімі – 2021» аудандық байқауына қатысып, ІІ орын иегері атанды. Ұлағат­ты ұстаз әр сабағында қазіргі заман талабына сай дамыта оқытудың жаңа технологияларын пайдалана отырып, әртүрлі әдіс-тәсілдерді кеңінен қолданып, оқушылардың сабаққа деген қызығушылығын арттырып, құштарлығын оятып, жан-жақты ізденуге ұмтылдырады. Тәжірибелі маманның сыныптан тыс жұмыс­тары, тәрбие сағаттары, мере­келік іс-шаралары үнемі жоғары деңгейде өтеді. Білікті ұстаздың талай жылғы еңбегі ақталып, сол еңбектің нәтижесінде бүгінде алған марапаттары мен жетісіктері жетерлік. Атап айтқанда, 2018 жылы «Сырдария ауданының 90 жылдығы» мерекелік медалімен марапатталса, 2019 жылы ҚР бастауыш сынып оқушы­лары арасындағы олимпиадада оқушы жетістігі үшін «Алғыс хат» алған. Одан бөлек Қызылорда облыстық білім және ғылым қызмет­керлері кәсіподағының Құр­мет грамотасымен марапатталған. Абырой биігіндегі ұстаз шәкірттері де шетінен өнерлі, дарынды және соның нәтижесінде жеткен жетістіктері де аз емес. Мәселен, Мұхамедияр Абзалұлы «Бояулар құпиясы» атты республикалық сурет байқауында ІІ орын иеленсе, Балнұр Болатбекова І орын иегері атанған. Республикалық пәндік олимпиададан Батырбек Ақылбекұлы мен Айнамкөз Уалиханқызы халықаралық «Ақбота» сайысында жүлделі І орынды қанжы­ғаларына байлады.<blockquote>– Кенжегүл Жорабекқызы әр сабағын жоғары ізденушілікпен, заманауи технологияларды пайдаланып, жан-жақты шығармашылықта өткізетін ұстаз ретінде ұжым арасында сыйлы. Өз пәнін жетік меңгерген маманның бойында адамгершілік қасиеттері мол. Әрбір іске аса жауапкершілікпен қарайды, ұжымда беделді. 2019-2024 жылдары мектептің бастауыш кәсіподақ ұйымының төрағасы болған. Саналы ғұмырында балаларға тәлім-тәрбие беріп, қажырлы еңбек етіп жүрген білікті ұстаздың мектебіміздің өсіп-өнуіне, дамуына, бүгінгідей дәрежеге жетуіне қосқан үлесі мен еңбегі орасан зор, – дейді мектеп директоры.</blockquote>Алтынай ЖҮНІСОВА

Білім негізі – бастауыш сынып

<a href="https://kyzylorda-news.kz/">Kyzylorda-news.kz</a> &nbsp;«AMANAT» партиясы, Қазақстан Республикасының Оқу-ағарту министрлігі және «Тең мүмкіндіктер әлемі» қоғамдық қорымен бірлесіп 1-6 желтоқсан аралығында Астана қаласында «Тең мүмкіндіктер» балалар инклюзивті спорт фестивалін өткізуді жоспарлап отыр.Осы бағытта Партияның Орталық аппараты жанындағы Саяси менеджмент мектебімен жиын өтіп, дайындық жұмыстары пысықталды.Жалпы партияның «Халықпен бірге!» деп аталатын Сайлауалды бағдарламасында ерекше қажеттіліктері бар азаматтарға қолдау көрсету, олардың өмір сүру жағдайларын жақсартуға айрықша көңіл бөлінген. «Кедергісіз келешек» жобасы аясында ұйымдастырылатын фестивальдің мақсаты: ерекше білім беру қажеттіліктері бар балалар мен олардың дені сау құрдастары арасындағы достық байланыстарын нығайту, олардың әлеуметтік белсенділігін, сенімі мен өзара сыйластықтарын арттыру.Жиыннан соң партияның облыстық филиалының Атқарушы хатшысы Ләйлә Төрешова білім, спорт, денсаулық сақтау секілді жауапты басқарма өкілдерімен бірге фестивальге қатысатын командалардың жол жүру, тұру, тамақтану, балалардың қауіпсіздігі секілді мәселелерді талқылап, шешу жолдарын нақтылады.&nbsp;

Балалар инклюзивті спорт фестивалін өткізу мәселесі пысықталды

<a href="https://kyzylorda-news.kz/">Kyzylorda-news.kz</a> Сырдария ауданының орталығы Тереңөзектен шалғайда жатқан Іңкәрдария ауылы өзінің 60 жылдығын тойлады. Ауылдағы білімнің қарашаңырағы саналатын №191 орта мектебі де 1964 жылы құрылған. Ауыл тарихымен бірге жасап келе жатқан мектепті &nbsp;осы жылдар ішінде жүздеген түлектер бітіріп, еліміздің түкпір-түкпірінде қызмет атқаруда. Қызылқұмдағы ауылдан шыққан азаматтардың қатарында профессорлар, ғылым кандидаттары, мұғалімдер, дәрігерлер, журналистер, экономистер, ауылшаруашылығында жұмыс істейтін мамандар да бар.&nbsp;Ауылдағы білім ошағы 1990 жылы 624 орындық қос қабатты ғимарат болып қайта салынғанда ел-жұрттың қуанышында шек болмады. Жаңа типті оқу орнының талабы мен сұранысына сай білім ордасында оқу-тәрбие үрдісін ізгілендіру жолында игі жұмыстар атқарылып келеді.<blockquote>– Мектеп – ғылым ғимараты. Сондықтан мектептегі тәртіп мүлтіксіз орындалуы тиіс. Мектептегі басты принциптердің бірі – балаларды оқуға қызықтыра отырып білім беру.&nbsp;Мектеп те – мешіт секілді қасиетті орын. 2023-2024 оқу жылын 185 оқушы аяқтады. 50 оқушы оқу озаты, 48 оқушы оқу екпіндісі болды. Бұл оқушылардың білім сапасының 67 пайызын көрсетті. Мектепте 16 кабинет жұмыс жасайды. 42 компьютер бар, 2 компьютер интернет желісіне қосылған. Оқушыларға 38 мұғалім дәріс береді. Оның 35-і жоғары білімді, 3-і арнаулы орта білімді. Бірқатар пән электронды оқулықпен оқытылады.Жыл сайынғы оқушылардың білімін сарапқа салатын Ұлттық бірыңғай тестілеу Қазақстан Республикасында қолданылатын мектеп бітірушілердің білімін сынау жүйесі. ҰБТ-ның нәтижесі жалпы және орта білім ұйымдары бойынша мемлекеттік аттестацияның қорытындысы ретінде есептеледі. Жыл сайын ҰБТ-ға қатысқан оқушының барлығы да грант иегері атанып жүр.2023-2024 оқу жылында орта мектепті 8 оқушы аяқтады. Осы оқу жылында 11 сынып оқушылары Әйгерім Дайрабайқызы «Алтын белгі», Әсемай Бекет «Үздік аттестат» иеленсе, негізгі мектепті бітіруші Шұғыла Әбдіразақ, Жайна Кәдірқызы, Айтолқын Темірбай, Аяулым Іңкәрбекқызы «Үздік аттестат» иегерлері атанды. Республикалық «Дарын», «Зерде» ғылыми жобалар сайыстарына оқушыларымыз белсене атсалысып келеді. Биылғы оқу жылында 10 оқушымыз қатысып, оның үшеуі аудандық кезеңде жүлделі орындармен марапатталды. Оқушыларды іскер­лікке, еңбекке, төзімділікке үй­ре­ту мақсатында қолөнер, шахмат, волейбол, футбол, ән-хор, домбыра үйірмелері жұмыс жасайды, – дейді мектеп директорының&nbsp;орынбасары Елена Сейдахметова.</blockquote>Елена Сейдахметованың айтуынша, қазіргі жаңа технологияға байланысты жаңартылған білім мазмұны бойынша 33 педагог, яғни 84,6% білімдерін жетілдірген. Деңгейлік курстан барлығы 6 педагог білім жетілдірсе, олардың 2-еуі І (ілгері) деңгей, 4-еуі ІІІ (базалық) деңгей бойынша бітірді. Тілдік курстан 1 педагог өткен. Химия және биология пәнінің мұғалімі Әйгерім Жәлімбетова В2, С1 деңгейі бойынша аяқтаған. Қысқа мерзімді түрлі тақырыптағы жаңа технологияға байланысты, критериалды бағалау, инклюзивті білім беру, жекелеген пән бойынша да кезекпен жылда 20-25 педагог білім жетілдіріп отырады. Мектепте 4 жас маман бар. 2-еуі жоғары, 2-еуі арнаулы орта білімді.Өткен оқу жылы бойынша «Жаңа жыл – жаңа қадам, жаңа бағыт» акциясы өтіп, әлеуметтік қолдауды қажет ететін көмекке мұқтаж және мектеп оқушыларына жаңа жылдық сыйлық беру мақсатында «Ақ­жарма және К» ЖШС төрағасы Қайрат Нұрсейітов, «Думан» сауда үйінің директоры Мей­рамбек Қонақбаев, «Ақжарма 1» ЖШС төрағасы Марат Бисенов, «Биали спорт» компаниясының директоры Асхат Шаукенбаев, ауыл кәсіпкерлері Салтанат Несіпбаева, Ақгүл Сәрсенбаева оқу құралдарымен қамтамасыз еткен.<blockquote>– Мектептің 4 оқушысы үйден оқы­тылады. Оларға мектеп мұғалім­дері үйлеріне барып білім береді. «Қара­қасқа» елді мекенінен, №42 бекеттен 10 оқушы тасымалданады.Мектеп жанынан 2009 жылы «Еркетай» шағын орталығы ашылған бола­тын. Онда 2 топта 40 бала тәрбие­ленуде. Ел ертеңі – жас ұрпақты саналы тәрбие, сапалы білім берген мектеп ұжымы тағы бір оқу жылын табысты аяқтап, жаңа оқу жылына дайындықты бастап кетті, – дейді Елена Сейдахметова.</blockquote>Соңғы оқу жылдарында мектеп оқушылары саламатты өмір салтын ұстану мақсатында спорттық үйірме­лерге қатысып, түрлі сайыста жүлделі орын иеленуде.Мәселен, «Бесасық» ұлттық ойын түрінен мектеп командасы ауданның алды болып, облыстық сайысқа қатысып, жақсы нәтижеге жетті. Шағын футболдан аудандық, облыс­тық жарыста бірінші орын иеленіп, республикалық сайысқа қатысты. Сонымен қатар волейболдан мектеп спортшылары ауданда үздік шығып, облыстық сайысқа жолдама алды. Жас спортшылардың арасында қол күрестен ауданда жоғары нәтижеге жеткен шәкірттер мектеп, ауыл мақтаныштары. Үйірме жетекшісі – Іңкәрбек Аяпов, Саят Байманов, Медет Төкенов оқушыларды спортқа баулып, жетістіктерге жетуде.«Мектеп театры» жобасымен «Шам­шырақ» мектеп театрының мүше­­­лері сахна қойылымын шебер орындауға үйренуде. Үйір­ме мүше­лері түрлі сахналық қойы­лым­дармен бай­қау­ларға қатысып, жүлделі орындарды жеңіп алды. Театр жұмы­сының жандануына ата-ана­лар тарапынан қолдау көрсетілуі де үлкен жетістік екенін айту керек.Бибісара ЖАНӘЛІ<img src="https://knadmin.beoblood.kz/uploads/Syrdariya_9247f2c1c4.jpg" alt="Сырдария.jpg">Фото: baq.kz

Алпыстың белесіндегі Іңкәрдария мектебі

<a href="https://kyzylorda-news.kz/">Kyzylorda-news.kz</a> Оқыту – тек білім беру ғана емес, сонымен қатар баланың бойындағы жақсы қасиеттерді дамытуды көздейді. Яки, шығармашылық қабілеттерін ашып, жүрегіне жол табу өнері. Әрбір бала – өзіндік қажеттіліктерімен ерекшеленетін кішкентай әлем. Сондықтан мұғалімнің міндеті – осы кішкентай әлемдердің кілтін табу және олармен тиімді қарым-қатынас орнату.<blockquote>– Баланың жүрегіне жол табудың маңыздылығы өте зор. Білімге деген жаңа қадамды бастаған оның жүрегіне жол табу – оқыту процесінің негізі болып табылады. Егер бала мұғалімге сенім артса, оның сабақтарына қызығушылық танытса, онда ол жаңа ілімдерді оңай меңгереді және өзін-өзі дамытуға ұмтылады. Баланың жүрегіне жол табу арқылы мұғалім оның өзіне деген сенімін арттырады. Шығармашылық қабілеттерін дамытады. Оқуға деген қызығушылығын ұлғайтады. Жаңа білімдерді оңай меңгеруіне көмектеседі. Өзгелермен қарым-қатынас жасау дағдыларын қалыптастырады. Баланың жүрегіне жол табудың бірнеше жолы бар. Ол үшін мұғалім түрлі әдісті қолдана алады. Олармен жылы лебізбен сөйлесу, олардың ойын тыңдау, мақтау және қолдау көрсету маңызды, – дейді С.Сейфуллин атындағы №165 орта мектептің бастауыш сынып мұғалімі Мөлдір Рамбердиева.</blockquote>«Сабақ беру үйреншікті жай ғана нәрсе емес, ол жаңадан жаңаны табатын өнер» деген тәмсілді ұстанатын мұғалима киелі орданың табалдырығын аттағанына тура 20 жыл болды. Әр адам өмірге келгенде оның пешенесіне қандай да бір бақыттан үлесі болатыны жазылады демей ме? Міне, Мөлдір Маратқызы да қиыны мен қызығы қатар жүретін ұстаздық мамандықты жүрек қалауымен таңдаған.<blockquote>– Менің бақытым ұстаздық жолдан бұйырғандай сезіледі. Мектеп өмірінде үлгілі оқушы болып, алдыңғы сапта жүретін мен үшін балалық шағымнан өзімді ұстаздық жолға бағыттағандаймын. Өмірге көзқарас қалыптастыруда мектеп өміріндегі тамаша кезеңде кереметтей ұстаздардан тәлім алуымның үлкен әсері болды деп ойлаймын. Жүректегі арманым жетелеп, Ақтөбе гуманитарлық колледжі мен Ақтөбе мемлекеттік педагогикалық институтын бастауыш сыныптар мұғалімі мамандығы бойынша тәмамдадым. 2004 жылдан бері №165 С.Сейфуллин атындағы орта мектепте бастауыш сынып мұғалімі болып қызмет етіп келемін, – дейді Мөлдір Маратқызы.</blockquote>Ұстаздық – ұлы қасиет. Әр оқушыға білім беріп, оған өмірлік бағыт сілтеуші сөзсіз – мұғалім. Заман ағымына сай ұдайы біліммен қаруланып, ой-өрісі үздіксіз ізденісте, жан-жақты дамытып, қалыптастырып отыратын Мөлдір жаңартылған білім мазмұнына сай біліктілігін жетілдіру жолында түрлі курстардан өтті. Маман ретінде атқарған еңбегі елеусіз қалмай, әрқилы дәрежедегі жетістіктерге қол жеткізді. Үздік педагогтар қатарынан көрінген ол Алтын белгі иелерін де көптеп тәрбиеледі. Мектеп басшысынан бастап, ұжымдастары мен ата-аналардың оған деген пікірі бір бөлек.<blockquote>– Биыл бірінші сыныпқа барған қызымның апайы Мөлдір алғашқы сабақтан-ақ тынымсыз ізденіп, оқытудың жаңа формасы мен әдіс-тәсілдерін тиімді пайдаланады. Үйге түрлі тапсырма береді. Біз барынша баланы қадағалауға тырысамыз. Бірге ертеңгі сабаққа дайындаламыз. Оңай емес, әрине. Дегенмен сынып жетекшісіне алғысымыз шексіз. Ол жаңашыл жас ұрпаққа сапалы білім мен саналы тәрбие беруде шеберліктің шыңына өрлей беретініне сенімдіміз. Ал ұстаздық жолындағы әр қадамы сәтті болғай, – дейді ата-ана Меруерт Шапихова.</blockquote>Бастауыш сынып мұғалімі Мөлдір Рамбердиева сабақ барысында әрбір баланың ерекшеліктерін ескереді. Балалардың белсенділігін арттыруға барын салады. Шығармашылық қабілетін ояту бағытында оқушылардың өз ойларын еркін жеткізуіне мүмкіндік береді. Қазіргі кезде жаңашыл мұғалім ретінде даму – уақыт талабы. Сондықтан да XXI ғасыр ұстазы бүгінгі күн талабына сай жан-жақты дамыған, терең біліммен қаруланған оқушы тұлғасын сомдау үшін өзі де шеберліктің шыңынан көрінуі тиіс. Осылайша «Жаңашыл ұстаз» ретінде Мөлдір Маратқызы өрелі ой мен саналы сезімін әрқашан білімге жетелейтініне сенім мол. &nbsp;Фото: freepik

"Баланың жүрегіне жол табудың маңыздылығы өте зор" – бастауыш сынып мұғалімі

Қызылордалық жастардың ІТ сектордағы белсенділігі артып келеді

&nbsp;<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаев дәстүрлі Жолдауында қала мен ауыл мектептерінің білім сапасын теңестіруді қолға алу қажет екенін жеткізді. Осы &nbsp;түйткілдің негізгі түйіні ретінде “Ауыл” партиясы Қызылорда облыстық филилалының бастамасымен, облыстық білім басқармасының қолдауымен Қызылорда қаласындағы үздік білім ордасы “Mansap” &nbsp;мектебі мен Жалағаш ауданы, Мәдениет ауылындағы №32 І.Қабылов атындағы орта мектебі білім сапасын дамыту бойынша екі жақты келісімге келді.Меморандумда Президент Жолдауынан туындайтын білім берудегі оң өзгерістер бойынша “Mansap” мектебінің білікті кадрлары ауылдық аймақтағы оқушыларға дәріс беріп, Олимпиада және ҰБТ-ға жоғары көрсеткіш жинақтауға атсалысады. Әсіресе оқушылар ағылшын және алгебра пәндері бойынша білімін одан әрі жетілдіре алады. Сонымен қатар Мәдениет ауылындағы ұстаздар “Mansap” мектебіне барып, ұжыммен біліктілікті арттыру мақсатында тәжірибе алмасуға мүмкіндік болады.

Қазақстан және Қызылорда облысының жаңалықтары: Білім