<a href="https://kyzylorda-news.kz/">Kyzylorda-news.kz</a> Мессенджерлерде күннің ерте батуына байланысты сабақ уақыты қысқаратыны туралы ақпарат тарады. <a href="https://massaget.kz/news/kunnn-erte-batuyina-baylanyistyi-sabak-uakyityi-120854/">Massaget.kz </a>тілшісі бұған қатысты Оқу-ағарту министрлігіне сауал жолдады. Ведомство бұл ақпаратты жоққа шығарды.<blockquote>"2-ауысым оқушылары сабақтан тарағанда күн өте қараңғы болуына байланысты сабақ ұзақтығы уақытша 40 минутқа ауыстырылды", - делінген тараған ақпаратта.</blockquote>Оқу-ағарту министрлігі Massaget.kz тілшісіне бұл ақпаратқа қатысты пікір білдірді.<blockquote>"Сабақ уақыттарын заң бойынша жергілікті орган шешеді. Себебі аяз немесе түрлі іс-шара секілді түрлі жағдай болады", - делінген жауапта.</blockquote>Оқу-ағарту министрлігінің өкілдері күннің ерте батуына байланысты сабақ уақытын қысқарту жоспарда жоғын айтты.Бұл хабарлама Астанадағы ата-аналар чатында тараған. Редакция Астана білім басқармасына сауал жолдады. &nbsp;<blockquote>"Астана қаласының Білім басқармасы қысқы уақытта сабақтардың ұзақтығын қысқарту туралы бұйрық шығармады. Сол себепті, сабақ уақытын қысқарту мәселесі қарастырылып жатқан жоқ", - деп жауап берді ведомстводағылар.&nbsp;</blockquote>

Күннің ерте батуына байланысты сабақ уақыты қысқаратыны рас па?

<a href="https://kyzylorda-news.kz/">Kyzylorda-news.kz</a> Премьер-министр Олжас Бектеновтің төрағалығымен өткен Үкімет отырысында "Әлеуметтік әмиян" жобасын іске асыру, мектепке дейінгі ұйымдардағы дербестендірілген ваучерлік қаржыландыру, дәрілік заттарды таңбалау және қадағалау, медициналық көмектегі төлемнің бірыңғай жүйесі, бюджетті жоспарлау мен қаржыландырудың кешенді автоматтандырылған жүйесіне қатысты мәселелер қаралды. Жиынға жауапты министрліктер қатысып, өңір әкімдіктері онлайн байланыс арқылы қосылды.Үкімет отырысынан кейін аймақ басшысы Нұрлыбек Нәлібаевтың төрағалығымен өткен арнайы жиында талқыланған мәселелер бойынша тапсырмалар берілді.<blockquote>«Мемлекет басшысы бастауыш сынып оқушылары мен аз қамтылған отбасы балаларына мемлекет есебінен тегін ыстық тамақ беруді, мектеп асханаларындағы тамақ сапасын қадағалауды міндеттеді. Осы ретте санитарлық-эпидемиологиялық нормалардың сақталуын қатаң бақылау, оқушыларды сапасы күмәнді, арзан азық-түлікпен тамақтандырмау, тағамдардың бала ағзасын барлық қажетті дәруменмен қамтамасыз етуін назарда ұстау керек. Бұл өскелең ұрпақтың денсаулығына тікелей әсер ететіні айтпаса да түсінікті. Сондықтан мектепте берілетін ыстық тамақтың сапасын тұрақты бақылауды тапсырамын.«Әлеуметтік әмиян» жобасы бойынша тиісті шараларды қабылдап, мектептердің қосылуын қамтамасыз етіңіздер. Ата-аналар мен кәсіпкерлер арасында кеңінен түсіндірме жұмыстарын жүргізіңіздер.Меншік нысанына қарамастан, медициналық ұйымдарда әлеуметтік- медициналық сақтандыру қоры арқылы қаржыландырылатын дәрілік заттар таңбалануы тиіс. Дәрілік заттардың дұрыс және уақытылы таңбалануын қадағалаңыздар. Емдеу ұйымдарында дәрі-дәрмекке берілетін сұранысты уақытылы қаржыландырыңыздар», - деді Н.Нәлібаев.</blockquote>Айта кетейік, өңірде "Әлеуметтік әмиян" жобасын енгізуге арналған арнайы жол картасы бекітілді. Биыл облыстағы оқушы мен қызметкер саны 700-ден асатын және аудан, қала орталықтарында орналасқан 87 мектепке аппараттық- бағдарламалық кешен орнатуға 119,2 млн. теңге бөлініп, «Транстелеком» мекемесі жүзеге асыруда. Облыстың 298 мектебінде балаларға ыстық тамақ ұйымдастырылған. Тегін тамақпен қамтылған бала саны - 89 572, ол жалпы бала санының 52,2 пайызын құрайды.Бастауыш сыныптар 100 пайыз қамтылған.Тегін дәрі-дәрмекті босатуда мемлекеттік және жеке емханалар таңбалау штрих-код сканері, деректерді жинақтау терминалы және планшет құралдарымен қамтылған. Қазіргі таңда, 27 медициналық ұйымда «Әлеуметтік әмиян» жобасы аясында жалпы саны 25 530 рецепт жазылып босатылған.<img src="https://knadmin.beoblood.kz/uploads/O_ushylardy_ysty_tama_pen_amtu_m_selesi_araldy_1_324abf2051.jpg" alt="Оқушыларды ыстық тамақпен қамту мәселесі қаралды 1.jpg"><img src="https://knadmin.beoblood.kz/uploads/O_ushylardy_ysty_tama_pen_amtu_m_selesi_araldy_2_ff54dae8fe.jpg" alt="Оқушыларды ыстық тамақпен қамту мәселесі қаралды 2.jpg">

Оқушыларды ыстық тамақпен қамту мәселесі қаралды

<a href="https://kyzylorda-news.kz/">Kyzylorda-news.kz</a> Білім саласында жетістіктер аз емес. Өйткені жетістіктер алаңы болып саналатын жетекші мектептер баршылық. Алайда сол жетекші мектептердің ауыл өмірінде емес, тек қалаларда негізі қаланып, білім сапасы бойынша қаланың ауылдан көшілгері тұрғаны жасырын емес. Өйткені ауыл мектебі, оның ішіндегі білім алатын сыныбы және ондағы атмосфера, пәндік кабинеттер мен ондағы заманауи құрылғылар да үлкен рөл ойнайды. Бәрі заманауи болса, әрине оқушының да ынтасы ерекше артатыны белгілі.Жалағаш ауданына келген қонақтардың Дәуімбай елді мекеніндегі мектеп ғимаратына көзі түсіп, қызыға қарайтынын естіп жүрміз. «Бұл қандай зәулім мектеп, осындай жаңа ғимаратта ауыл балалары білім ала ма?» деген сөздер әрине, көңіл қуантады. Сырт келбетін күнде көріп жүрген бізге де аталған зәулім ғимарат кеше ғана бой көтергендей көрінеді. Шыны керек, ғимараттың кіреберісіне аяқ басқаннан-ақ «біз оқушы болғанда мұндай мектеп болмады» деген ой пайда болады. Кіреберістегі үлкен залда ғұлама Әбу-Наср әл-Фарабидің, А.Құнанбаевтың, қазақтың тұңғыш ағар¬тушылары Ы.Алтынсарин мен А.Байтұрсыновтың, Алаш зиялыларының нақыл сөздері жазылған көрнекті жазбалар, мектеп тарихымен танысуға арналған арнайы бұрыш, бәрі-бәрі жайлы білім алуға бағытталған.Мақаламызға арқау болған Зейнолла Жарқынбаев атындағы №202 орта мектеп 2009 жылы ел игілігіне берілген. Дәл осы жылы мектеп ұжымы жаңа нысандағы жұмысын 490 оқушымен бастайды. Ал ғимарат 1100 орынға негізделген. Мектеп ғима¬раты «100 мектеп, 100 аурухана» бағдарламасы бойынша типтік жобада салынған.&nbsp;Биыл жаңа оқу жылын білім ордасы 734 оқушымен бастады. Гүлнар Бекмолдаева басқаратын ұжымда қазіргі таңда 113 мұғалім еңбек етеді. Қуантарлығы, соңғы жылдары мектепте оқушы саны айтарлықтай артқан. Мұны Дәуімбай елді мекеніндегі халық санының артуымен, үйлердің көптеп салынуымен байланыстырады. Бұрын сол маңдағы ата-аналар балаларын кент орталығындағы мектептерге оқытатын болса керек. Ал біз мұны алтын ұядағы ұстаздар берген білімнің сапасымен ұштастырдық.Былтыр Зейнолла Жарқынбаев атындағы мектеп оқу жылын үлкен жетістікпен қорытындылады. Айта кетейік, білім ордасы ауыл мектептерінің жарқын үлгісі ретінде «PISA Халықаралық оқушы қабілетін бағалау» бағдарламасы аясында рейтингке ілінген. Жалпы былтырғы оқу жылында мектепті 31 түлек бітірген. Оның ішінде 1 оқушы «Алтын белгі», ал 2 оқушы «Үздік аттестат» иегері атанған. Қуантарлығы, түлектердің барлығы қалаған оқу орындарына түсіп, студент атанған.<blockquote>– Әсіресе ауылдағы мектептердің білім сапасын, деңгейін көтеру өте маңызды. Мемлекет басшысының өзі ауыл оқушыларының білім деңгейін көтеруге ерекше көңіл бөліп, оны дамыту, заманауи құрал-жабдықтармен жабдықтау, ауыл мұғалімдерінің құзыреттілігін арттыру бағытында жұмыс істеуді тапсырып келеді. Демек, ауыл мектебінің жағдайын түземей, білім көшін оңалта алмаймыз. Мәселен, лингафонды және мультимедиялық кабинет, интерактивті тақта, ал модификацияланған кабинеттерді біздің мектептен таба аласыз. Біз балаларға мейлінше сапалы білім беруіміз керек. Басты мақсатымыз да сол. Нәтиже жоқ емес. ҰБТ бойынша нәтижеміз жоғары, – дейді мектеп директорының оқу-ісі жөніндегі орынбасары Жазира Тұрымбетова.</blockquote>Мектеп дәлізінде үзілісте керемет көрініске тап болдық. Оқушылар үзілісте уақытын бос жоғалпай, әрі-бері шапқылап жүгірудің орнына шахмат, дойбы, тоғызқұмалақ ойнап жатыр. Дене шынықтыру пәнінің мұғалімі Орныққан Сапанов оқушыларға аталған ойындардың тиімді әдістерін үйретумен әлек. Дәліз қабырғасының бір жағына әдемі табиғаттың суреті бейнеленіпті. Оқушылардың айтуынша, қабырғадағы суретті мектептегі сурет үйірмесінің жетекшісі Ермек Бүркітбай мен шәкірті Ақбота Рахымбек салыпты.&nbsp;Айтпақшы, бұл мектеп өңірге спорт саласында топ жарған өрендерімен де етене таныс. Ұзақ жылдар білім саласында қажырлы еңбек еткен Орныққан Сапанов шәкірттерінің алды аймаққа белгілі аяқдоп шеберлеріне айналған. Дене шынықтыру пәнінің мұғалімі бүгінде мектеп қабырғасында білім алып жатқан бірқатар шәкіртіне үлкен сенім артатынын айтады.<blockquote>– Мектепте «Ән», «Би», «Домбыра», «Сурет» және спорттың екі түрі бойынша тағы қос үйірме жұмыс жасайды. Ғимаратта бір емес, үш спорт зал жабдықталған. Нәтиже де жоқ емес. Қазіргі таңда аталған үйірмелердің қатысушылары түрлі дең-гейдегі жарыстардың бас бәйгесін бермей келеді. Мәселен, мектебіміздің жас спортшы өрендері «Ұлттық мектеп лигасының» аудандық, облыстық кезеңінде табысты өнер көрсетті. Ұлттық мектеп лигасының облыстық кезеңінде гандболдан мектебіміздің 5-6 сынып оқушылары II орын иеленді. Сондай-ақ 11 сынып оқушысы Балнура Қалнияз жеңіл атлетикадан ҚР чемпионатында күміс жүлдегер атанып, Азия чемпионатында қола жүлдені жеңіп алды. Гір спортынан мектептің 11 сынып оқушысы Нұрислам Орынбасар ел біріншілігінде және Азия чемпионатында қола жүлдегер атанды. Бір сөзбен айтқанда, оқушылар біліммен қатар спортты да қатар алып жүруге талпынады, – дейді дене шынықтыру пәнінің мұғалімі.</blockquote>Қазіргі таңда ауыл мектептері болашақ ұлт мектебінің негізін қалаушы болып саналады. Нақты айтқанда, ұлттық білім саясатын жүзеге асыратын мекемелер екені аян. Осы орайда мектепте руханият, өнер бағыты бойынша&nbsp; бірқатар үйірме жұмыс жасайды. Мәселен, «Шапағат» вокалды тобы «Жеті өнер» республикалық байқауында бас жүлде иеленіп, халықаралық кезеңде өнер көрсеткен. Мектеп оқушыларынан құралған «Дәуімбай» командасы жайдарман сайысында аудандық лиганың чемпионы атанып, облыстық жарыста I орын алған. Сондай-ақ «Ақмоншақ» би тобы «Bala fest» республикалық өнер байқауында І орын иеленген.&nbsp;Оқушылар арасында бір ғылыми бағытта немесе бір пән бойынша ерекше дарындылардың болатыны белгілі. Олардың табиғат берген ерекше қабілеті мен дарынын тани отырып, одан әрі дамуына жағдай жасап, бағыт-бағдар беру – өте жауапты іс. Әр баланың жеке қабілетін анықтай отырып, оны сол бағытта жетелеп дамыту – қоғам мен мектептің, одан соң ұстаздардың парызы. Оқушыны заманына қарай икемдеп, заманының озық өнегесін санасына сіңіріп, оларды заманауи бағытта оқыту – бүгінгі күннің басты талабы. Осы ретте аталған білім ордасы соңғы жылдары жоғары сынып оқушыларын техникалық мамандықтарға дайындап, жаратылыстану бағытында тереңдетіп оқытуды қолға алған. Себебі бүгінде жоғары сынып оқушыларының басым бөлігі жаратылыстану бағытында терең білім алғанды құп көреді екен. Атап айтқанда, физика, химия, география және биология секілді пәндерді түсініп оқуға тырасады. Сөзіме дәйек болсын деп мектептегі арнайы жабдықталған химия пәні кәбинетінде өтіп жатқан сабаққа қатыстым. Онда түлектер химия пәні мұғалімі Ақерке Қасымовамен лабораториялық зерттеу жүргізуде. Оқушылардың ең қиын пәнге деген қызығушылығы бізді таңқалдырды.&nbsp;Балалар мен жасөспірімдерді дұрыс тамақтандыру олардың денсаулығын нығайтып, дене және ой қабілетінің дамуына мүмкіндік береді, сабаққа үлгеру қабілетін арттыратыны тағы бар. Оқушыларды сапалы тамақтандыру мақсатында мектеп ас ішу блоктарын заман талабына сай құрал-жабдықтармен жабдықтаған. Жалпы білім ордасында 493 оқушы ыстық тамақпен 100 пайыз қамтылған.Зейнолла Жарқынбаев атындағы №202 мектептің бүгінгі тынысы осындай. Ғылымның қарыштап дамыған дәуірінде оқушылардың заманға сай сапалы білім алуына бар жағдай жасауды басты миссия еткен мектеп ұжымы тек ілгері қадам жасап, жоғары нәтижеге қол жеткізуді мақсат еткен. Бір сөзбен айтқанда, білім беру сапасында мін жоқ.<img src="https://knadmin.beoblood.kz/uploads/Zhala_ash_Ozy_lgidegi_bilim_ordasy_2_26548ebe6b.jpg" alt="Жалағаш Озық үлгідегі білім ордасы 2.jpg">Жандос ЖАЗКЕН

Жалағаш: Озық үлгідегі білім ордасы

<a href="https://kyzylorda-news.kz/">Kyzylorda-news.kz</a> Әдеттегідей тілшілік тіршілікпен апта басында Жалағаш кентінен шалғайда орналасқан Аққыр ауылындағы №188 орта мектепке аялдадық. Мектеп директорының міндетін атқарушы Гүлмира Әлімовамен білім ордасының тынысымен танысып жүріп, бастауыш сыныпта оқитын балғын бүлдіршіннің «Апай, мен өскенде сіз секілді ұстаз болып, туған жеріме қызмет еткім келеді» деген алғаусыз арманын естіп, мұндағы ұлағатты ұстаздардың шәкірттеріне қандай үлгілі жан екенін аңғардық.&nbsp;Иә, алтын ұядағы ұлағатты ұстаздардың тынымсыз еңбегі оларды жыл сайын үлкен жетістіктерге жеткізіп келеді. Гүлмира Әбдіразаққызының айтуынша, аядай ауылдағы алтын ұяда соңғы 6 жылда білім алған әр жылғы түлектердің барлығы ҰБТ-ға қатысып, 100 пайыз мемлекеттік грант иегері атанған.&nbsp;<blockquote>– Ауыл мектебі аудан орталығынан алыс демесеңіз, оқуышыларға білім алу үшін мұнда ешқандай кедергі жоқ. Биыл жаңа оқу жылын 157 оқушымен бастадық. Оның 15-і мектепалды даярлық тобына келсе, 21-і 1 сыныпқа қабылданды. Сондай-ақ биыл 10 оқушымыз алтын ұя мектебімен қоштасады, – дейді Г.Әлімова.&nbsp;</blockquote>Гүлмира Әбдіразаққызының сөзінше, мектеп ұжымы оқушыларды ҰБТ-ға тыңғылықты дайындайды. Мәселен, былтыр мектептен түлеген 9 оқушы түгел ҰБТ-ға қатысқан. Қуантарлығы, барлығы да еліміздегі маңдайалды жоғары оқу орындарында білім алуға мемлекеттік грант жеңіп алған. Сондай-ақ 2 түлек «Үздік аттестат» иегері атанған.&nbsp;Биыл түлектердің де аяқ алысы жаман емес. Олардың барлығы ҰБТ-ға қатысуға ниетті. Жаңа оқу жылы басталысымен мектепішілік сынама тесттерден жақсы нәтижеге қол жеткізіп үлгерген түлектердің 3-еуі – «Үздік аттестатқа» үміткер. Дайындықты одан әрі күшейтіп, ауылдағы алтын ұяның абыройын асқақтатуды мақсат еткен түлектердің басым бөлігі ұстаздарының жолын жалғамақ.&nbsp;Айта кетейік, мектепте 31 ұстаз жұмыс істейді. Оның 4-еуі – педагог-зерттеуші, 10-ы – педагог-сарапшы, 13-і – педагог-модератор.&nbsp;Жаңа оқу жылы басталысымен мектеп мақтанышына айналған Мұқағали Сейсенбай «Ұлы өнертапқыштыққа алғашқы қадам» атты аудандық сайыстың «Авиация саласындағы модельдер» бағыты бойынша І орын алып, облыстан арнайы алғыс хат иеленген.&nbsp;<blockquote>– Бала күнімнен робот құрастыруға, әртүрлі заттардан машина, ұшақ жасауға қызығамын. Жетекшіммен бірге ізденіп, бұл байқауға бір ай дайындалдық. Бірлесіп пенопластан пилотсыз ұшатын аппарат, яғни ұшақ жасап, оған дрон орнатып, жоғары көтерілуге бағыттадық. Алдағы уақытта жобамызды әлде де жетілдіріп, бірнеше қызмет түрін бір мезетте жасай алуын қамтамасыз етеміз деген жоспарымыз бар, – дейді жас өнертапқыш.&nbsp;</blockquote>Сондай-ақ мектепте арнайы «Жасыл мектеп» бұрышы жасақталған. Мұнда оқушылар гүлдер мен жеміс-жидектер, көкөністер егеді. Қазіргі таңда фиикус, шефлера, кактус, геран, роза, әйел бақыты, алоэ, бархат, шырмауық сынды 20-дан аса гүл түрі бар. Мұнан бөлек қияр, қызанақ, ащы бұрыш, салат шөптерін егіп, балаларды ерте еңбекке баулуға, ауыл дақылдарын егіп, оны баптауға үйретеді.&nbsp;Мектепте қазіргі таңда «Темірбек Жүргенов» апталығы өтуде. Мақсат – оқушыларды қоғам қайраткерінің өмірі мен қолжазбаларымен таныстырып, жас ұр-пақты отансүйгіштікке, өз елінің әдебиетіне құрметпен қарауға тәрбиелеу. Апталық аясында мектептегі кітапханада да бірқатар шара мен көрмелер ұйымдастырылған. Кітапханашы Алма Әбдіреваның айтуынша, жаңа оқу жылы басталысымен алғаш мектеп табалдырығын аттаған бүлдіршіндерге «Кел досым, кітапханаға» атты шара өткен. Басты мақсат – оқушыларды кітапханамен, ертегі кітаптармен таныстырып, оқуға деген құштарлығын арттыру. Сондай-ақ оқушылардың шығармашылықпен айналысуына септігін тигізетін ордада түрлі танымдық шаралар мен мәнерлеп оқу жа¬рыстары жыл сайын өткізіліп келеді. Қазіргі таңда кітапханада 11 676 кітап болса, оның&nbsp;9196-сы – оқулық. 493-і – көркем әдеби кітап.&nbsp;Мұнан бөлек оқушылардың бос уақытын тиімді пайдаланып, оларды спортқа беймідеу де бір жолға қойылған. Ауылдағы алтын ұяның оқушылары баскетбол, волейбол, шахмат, футбол, тоғызқұмалақ сынды үйірмелерге үзбей қатысуда.&nbsp;Мектеп ұжымы оқушылардың жазғы тынығуын тиімді өткізу мақсатында былтыр міндетті оқу қоры есебінен Жалағаш кентіндегі «Ақтерек» тынығу лагеріне 12 оқушыны, «Қазақстан халқына» қоғамдық қорының «QH Жаздық жолдама» қайырымдылық жобасы аясында «Қуаныш» тынығу лагеріне 1 оқушы, Алматы қаласындағы «Тау жанашыры» лагеріне ауылдағы жеке кәсіпкерлер есебінен 2 оқушы жіберілген. Сондай-ақ «Мектепке жол» акциясы аясында түлектер мен бірқатар кәсіпкер 25 оқушыға киім-кешек, оқу-құралдарымен толық қамтамасыз еткен.&nbsp;«Бала қауіпсіздігі бәрінен маңызды, ас мәзіріндегі тамақтардың дәмді әрі құнарлы болуы өзімнің тікелей қатаң бақылауымда» деген Гүлмира Әбдіразаққызы мұнда биыл 105 бала ыстық тамақпен қамтамасыз етілгенін айтты. Оның 62-сі бастауыш сынып оқушылары болса, 19-ы – аз қамтылған отбасылар баласы.&nbsp;«Білекті бірді жығар, білімді мыңды жығар» демекші, аядай ғана ауылда 11 жыл бойы алған білімін сын сағатта сынайтын сәтке оқушыларды үлкен жауапкершілікпен дайындайтын алтын ұяның ұстаздары әрбір шәкірттің білім нәрімен сусындап, бәсекеге қабілетті жас болып қалыптасуына одан әрі аянбай күш жұмсай бермек. Шалғай ауылдағы алтын ұяның бүгінгі тынысымен танысқанда түйген ойымыз осы.&nbsp;Ақтоты БҮРКІТБАЙ

 Жалағаш: Озат оқушы – мектеп мерейі

<a href="https://kyzylorda-news.kz/">Kyzylorda-news.kz</a> Жаңа оқу жылының басталғанына көп болмады. Әйтсе де Жалағаш ауданына қарасты ақсу ауылындағы оқушылар биылғы оқу жылын жетістікпен бастап үлгерген. Апта басында өскелең ұрпақты оқытып, тәрбиелеуде ерен еңбек етіп келе жатқан ауылдағы №116 орта мектеп ұжымының жұмысымен танысып қайттық.&nbsp;<blockquote>– Мектепте бүгінде 308 оқушы білім алуда. Оның 32-сі – бітіруші түлек. Қазіргі таңда 29-ы ҰБТ-ға қатысуға ниетті. Дайындық өзімнің қатаң бақылауымда. Былтырғы оқу жылында 30 түлек алтын ұя мектебімен қоштасып, ұлттық бірыңғай тестілеуге 23 оқушы қатысуға ниет білдірген. Оның 15-і жоғары оқу орнына, 8-і колледжге грантқа түссе, 7-еуі ақылы оқуға түсті. Сондай-ақ 3 оқушы «Алтын белгі» иегері атанды, – дейді мектеп директоры Дархан Әбдиев.&nbsp;</blockquote>300-ден аса оқушы білім алатын мектепте 61 ұстаз білім беріп, еліміздің келешегін қалыптастыру жолында тынымсыз еңбек етіп келеді. Оның ішінде 15-і педагог-зерттеуші, 11-і педагог-сарапшы, 22-сі педагог-модератор мәртебесін иеленген.&nbsp;Иә, білім мен тәрбиенің алғашқы баспалдағы – бастауыш сынып. Мектеп директорының айтуынша, биыл бірінші сыныпқа 20 бала қабылданған. Бала қауіпсіздігін басты назарда ұстайтын ұжымда 159 бала ыстық тамақпен қамтамасыз етілген. Оның 33-і әлеуметтік аз қамтылған отбасының балалары болса, 126-сы бас-тауыш сынып оқушысы.&nbsp;Мектеп қазіргі заман талабына сай материалдық-техникалық базамен, заманауи кабинеттермен қамтамасыз етіліп, әр кабинет техникалық құралдар мен компьютерлер, интерактивті тақталармен, сондай-ақ әр пәнді терең үйретуге мүмкіндік беретін оқу бөлмелерімен жабдықталған. Атап айтар болсақ, заман талабына сай химия, физика, биология, информатика, IT кабинеті бар.Мұнан бөлек мектепте арнайы дефектолог кабинеті қарастырылған. Мұнда дефектолог Нұртуған Темірхан ерекше қолдауды қажет ететін балалармен жұмыс жасап, оң нәтижеге қол жеткізіп келеді.&nbsp;Сондай-ақ 2022 жылдан бері «Жасыл мектеп» кабинеті бар. Оған жауапты биология пәнінің лаборанты Жанар Боранқұлованың айтуынша, мұнда 6,7,8 сынып оқушылары еккен гүлдер мен түрлі жеміс-жидектер, көкөністер бар.&nbsp;<blockquote>– Кабинетте 25 түрлі гүл бар. Көктемге дейін гүл өсірумен айналысамыз. Яғни фиикус, шефлера, кактус, геран, роза, әйел бақыты, алоэ, шырмауық, бархат, лимон талы және тағы басқалары бар. Сондай-ақ қияр, қызанақ, ащы бұрыш, тұщы бұрыш, салат шөптері, жүгері, бидай, пияз бар, сәбізді&nbsp; қазан айының басында егіп, қаңтар айында жинаймыз, – дейді Жанар Боранқұлова.&nbsp;</blockquote>Оның айтуынша, оқушылар мұнда сабақтан тыс уақытта да келіп, әр өсімдікті өз қолдарымен баптап, ол өнім бергенше күтімін жасайды. Сол арқылы олар ауыл шаруашылығы дақылдарын егіп, оны баптауға машықтанады.&nbsp;Мектеп кітапханасындағы кітап қоры – 21 544. Кітапханашы Ғалия Жүнісова рухани орда үнемі жаңа еңбектермен толығып тұратынын айтады. Қоғамның дамуына қарай ақпаратты жан-жақты алуға, яғни аудио, видео, интернет желісі арқылы алуға мүмкіндік болғанымен оқушылар кітапханада отырып әдеби кітаптарды оқығанды жөн көреді екен.&nbsp;Мектепте жазғы демалыс уақытын бос өткізбей тиімді пайдаланған озат оқушылардың бірі – Дархан Мырзабек. Ол – оқу жылы басталысымен жетістікке қол жеткізген үлгілі оқушы.&nbsp;Өткен аптада жалпы білім беретін мектеп оқушылары арасында өткен «Ұлы өнертапқыштыққа алғашқы қадам» инновациялық идеялар байқауының аудандық кезеңінде «Автокөліктің қолданыстағы модельдерін әзірлеу саласындағы техникалық құрастыру» бағыты бойынша ІІ орын иеленген.&nbsp;<blockquote>– Мен бұл байқауға жетекшім Қарлығаш Байғазиевамен бірге 1 ай дайындалып, жарақат алған адамдарды жылдам жеткізу мақсатында әскери жедел жәрдем көлігін құрастырып жасадым. Көліктің арнайы тіркемесі бар. Ол арқылы дәрігерлер науқастарды жол бойы емдей алады. Сондай-ақ қажет болған жағдайда оқ-дәрі тасымалына көмегі бар. Көлік тоқпен алға, артқа және оң мен солға жүреді, – дейді Дархан Айдосұлы.&nbsp;</blockquote>Білімге құштар Дархан – бүгінде мектеп мақтанышы. Ол бүгінге дейін бірнеше мәрте білім бәйгесінде топ жарған. Тек бір ғана пәнмен шектелмей, география, әдебиет сынды сабақтардан да үздік атанған. Спортты да жанына серік еткен ол бүгінде баскетболдан мектеп құрамасында өнер көрсетеді. Сондай-ақ былтыр тоғызқұмалақтан оқушылар арасында облыс көлемінде өткен жарыстан жүлделі орын алып, республикада тартысты ойын өрнегін көрсеткен.Мектеп ұжымы оқушылардың жазғы тынығуын тиімді ұйымдастыру мақсатында былтыр міндетті оқу қоры есебінен Жалағаш кентіндегі «Ақтерек» сауықтыру лагеріне 22 оқушыны, «Қазақстан халқына» қоғамдық қорының «QH Жаздық жолдама» қайырымдылық жобасы аясында «Қуаныш» тынығу лагеріне 3 оқушыны, Алматы қаласындағы «Тау жанашыры» лагеріне ауылдағы ірі шаруа қожалықтың бірі «Сәрке батыр» ЖШС демеушілігімен 1 оқушыны тынығу лагеріне жіберген. Сондай-ақ жылда дәстүрге айналған «Мектепке жол» акциясына да биыл ауылдың белді кәсіпкерлері мен мектеп ұжымы белсенді қатысып, 31 оқушыны киім-кешек, оқу-құралдарымен толық қамтамасыз еткен. Мұнан бөлек оқушыларды жан-жақты дамыту жұмысы бір жолға қойылған. Оқушылар сабақтан тыс жас химик, жас физик, робототехника, домбыра, қолөнер, тоғызқұмалақ, волейбол, баскетбол, футбол, шахмат сынды үйірмелерге қатысады.Тәрбие мен білімнің қазыналы ордасына айналған мектеп оқушылары бүгінде аудандық, облыстық, республикалық білім бәйгелерінде жыл сайын топ жарып жүр. Қазіргі таңда аталған мектеп оқушылары ауыл мектептерінің оқушыларына арналған жалпы білім беретін пәндер бойынша өткізілетін республикалық олимпиадаға дайындық үстінде. Мектеп директорының айтуынша, олимпиадаға 23 оқушы қатысады.Ел ертеңі болған жастарды тұлға етіп қалыптастыруда сапалы білім беріп қана қоймай, ұрпақ тәрбиесіне басымдық берген ұжымның бүгінде жұмысы жүйелі, оған мектеп тынысымен танысып жүріп-ақ толық көз жеткіздік. Жалпы білім сапасын арт-тырып, оқушылардың тәрбиесіне басымдық берген алтын ұяның мақсаты айқын. Ал алдына мұндай мақсат қойған ұжымның шәкірттері қашанда бәсекеге қабілетті болары сөзсіз.&nbsp; &nbsp;&nbsp;Ақтоты БҮРКІТБАЙ

Сапалы білім – жарқын болашақ кепілі

<a href="https://kyzylorda-news.kz/ru">Kyzylorda-news.kz</a> &nbsp;Бұл туралы Орталық коммуникациялар қызметінің брифингінде Қызылорда облысының әкімі Нұрлыбек Нәлібаев айтты.«Өткен жылдан бері облыста 1 мың 720 орындық 6 мектеп,1 мың 850 орындық 4 мектепте қосымша ғимарат салынып, ел игілігіне табысталды. 2024 жылы жаңадан 3 мектеп, 5 мектепке қосымша құрылыс салынып, пайдалануға берілді.«Жайлы мектеп» ұлттық жобасы аясында салынған мектептердің алғашқылардың бірі болып 900 оқушыға арналған білім ордасы облыс орталығындағы жаңа шағын ауданнан ашылды» - деді Н.Нәлібаев.Айта кетейік, Қызылорда қаласындағы сол жағалауда «Жайлы мектеп» ұлттық жобасымен бой көтерген 21 мектептің алғашқысы шәкірттерді қабылдады. Қазіргі таңда 6000 орындық 9 мектептің құрылысы қарқынды жүруде. «Білім беру инфрақұрылымын қолдау» қоры арқылы құны 8 млрд. 400 млн. теңге болатын дарынды балаларға арналған 400 орындық физика-математика мектеп-интернаты салынуда. Сонымен қатар, облыстық бюджет есебінен инновациялық шығармашылық орталығының құрылысы жүргізілуде.Мұнан бөлек, биыл «Қазгермұнай» компаниясының демеушілігімен Қызылорда қаласында 2,5 млрд. теңгеге заманауи үлгідегі 350 орындық «Оқушылар сарайы» пайдалануға берілді. «Саутс Ойл» компаниясының демеушілігімен 4,8 млрд. теңгеге музыкалық колледждің жаңа ғимараты салынуда. Нысан 2025 жылы аяқталады.<img src="https://knadmin.beoblood.kz/uploads/zhajly_mektep_2_1a226859e3.jpg" alt="жайлы мектеп 2.jpg"><img src="https://knadmin.beoblood.kz/uploads/mektep_1_6ede30c8df.jpg" alt="мектеп 1.jpg">

Қызылорда облысында алғашқы «Жайлы мектеп» ашылды

<a href="https://kyzylorda-news.kz/">Kyzylorda-news.kz</a> Қазалыда өз ансамблі бар балабақша бар. «Тәрбиешілерді дайындаса, өнерлі ұжым шықпай ма?» деуіңіз мүмкін. Алайда бұл құраманың орын бөлек. Олар тәрбиешілер емес, балапан тәрбиеленушілер. Сөйлеу мен тамақтану дағдысын дұрыс қалыптастырып үлгермеген балақайларды өнерге баулу қиынның-қиыны. Солай бола тұра, балалақша атымен аталатын ансамбльдің жеткен жетістігі жеткілікті.Әйтеке би кентіндегі «Гауһар Тас-2» балабақшасының ашылғанына көп болмаса да, тәлім алған тәрбиеленушілері түрлі өнер жарыстарында топ жарып келеді. Шығармашыл мұғалім, музыка жетекшісі Нағима Қарымсақованы сөзге тарттық.«Ұзақ жылдардан бері оқушылар үйінде жұмыс істеймін. Онда жеке вокальистерге дауыс қойып, дайындайтынмын. Бір жолы орта мектептен біздің мекемеге қосымша ұсыныс түсіп, ол жерден хор ұжымын шығардық. Кейіннен аудандағы бір балабақшаға қосымша жұмысқа шақырды. «Мектепте бастаған бастамамды неге осында жалғастырмасқа» деген ой келді. Оңайға соққан жоқ. Еңбегім ақталып, жарыстарда жүлде алды», – деп бастады әңгімесін.Ал «Гауһар-тас-2» тобы тәжірибелі маманның екінші балабақшадағы жобасы. Күнделікті музыкаға балаларды бейімдеуде түрлі аспаптарды дәрісінде пайдаланып жүрген ұстаздың тәжірибесі кішкентайлардың көңілінен шығады. Тіпті әлі сөйлей білмейтін балалардың өзі апайы жасаған әрекетті қайталауға қызығушылық танытады. Осындай зерделі бүлдіршіндерден топ жасақтау туралы ұсынысын алғаш балабақша меңгершісіне айтқаныда, ол қолдайтындықтарын жеткізеді.Алдымен музыка сағаттарында ырғаққа ілесіп үйренген ұл-қыздар көп өтпей толық шығарманы орындай алатын жағдайға жетеді. Нағима Көптілеуқызы балалар жасына лайықты аспаптарға тапсырыс беріп, алдырады. Тәрбие ошағында өтетін түрлі шараларда өнер көрсеткен өрендер аудандық ауқымды шаралараға қатыса бастайды. Ел арасынан балауса өнер иелерін іріктейтін жарыс өтетіні туралы ұсыныс келгенінде, жетекші тәуекелге бел буып, ең кішкентай жобасын қатыстыруды мақсат тұтады. Ата-аналар мен тәрбиешілер, барлық ұжым қолдап, кішкентайларды қанаттандырып, ұйымдастырушылықтың ұтымды үлгісін көрсетеді.Осы жылдың 24-25 ақпан аралығында «Жеті Өнер» шығармашылық орталығының ұйымдастыруымен өткізілген «Шабыт қанатында» IV Республикалық шығармашылық конкурсында құрам алғаш үлкен сахнаға имене шығады. Бұрын-соңды бұндай қадамға барамаған бүлдіршіндердің қалай бақ сынары жетекшіге де, жанкүйерлерге де белгісіз. Демдерін іштей тартып, тек тілеулес болып отырған жақындарын үміткерлер қуантады. Көпшілік ішінен топ жарып, бас жүлде иемденіп, Алматы қаласында жолдама алады.Ару қаладағы айтулы жарысқа құрам үлкен дайындықпен барды. Орындаушылық шеберлік шыңдалып, репертуар таңдау, киім кию, сахна мәдениеті – бәріне жіті назар аударылады. Қазақстанның барлық облыстары мен қалаларының мықтылары іріктелген ортада орындаушылар Республикалық іріктеу кезеңінен финалға сүрінбей өтіп, «Жеті Өнер» жарысының VIII Халықаралық байқауына жолдама алады.Таланттылар мен талаптылар тайтасақан сын «Жеті Өнер-Ташкент» Халықаралық өнер фестиваль-конкурсы 3 мемлекеттен жиналған 45 қатысушы топтарды қамтиды. Бұған дейін бірнеше белесті бағындырған, кәсіби мамандар шыңдаған шеберлер қатарында қазалылықтар да өнер көрсетеді.Халықаралық деңгейде талантымен танылған кіл мықтылар төрелік еткен байқаудың қорытындысын шығару ұзаған сайын, бүлдірішіндерге тілектестерде дегбір қалмаған сәт туралы толқынысшы балалар тәрбиешісі Гауһар Қолдасбаева тілшілерге бьаяндап берді. Алайда, абырой ақталып, «Аспапта орындаушылық өнерімен» көзге түскен, «Гауһар Тас-2» бүлдіршіндер ансамблі бас жүлде иеленеді. Жүлдегерлерге «АZIA ÜZDIGI-2024» арнайы жүлдесі табысталады. Талаптыларды шыңдаған Нағима Қарымсақова «Үздік дарынды балалар жетекшісі» бағамына лайық деп танылады.Ансамбль құрамында болған Аяла Бақтыбек, Әмір Мұхит, Айғаным Махсатқызы, Нұрмұхаммед Нұрқұлан, Зейнеп Сексенбай, Айбибі Зейнулла, Анель Серікбай, Әмір Асқат, Анель Бегайдар, Қанат Қасқырбай, Дидар Ізбасар, Нұрбақыт Байекеш, ағайынды Аянат, Расул Балғабайлардың барлығы ертеңінен үміт күтетін жан-жақты балалар, ата-аналарының көзқуаншы.«Баласы атқа мінсе, үйде тақымын қысатын» ата-аналарды да сөзге тарттық.– Немерелеріміз аспапта ойнайды дегенді естігенде, таң қалғанымыз бар. Бірте-бірте видеолары келіп, қуанышымызды еселететі. Ата-анаға баласының талабының ұшалғанын көруден артық бақыт бар ма? Балаларды осындай дәрежеге жеткізу оңай іс емес. Сезініп те, көріп те жүрміз. Оларды балаға санамай, бітіріп кетеді деп бейжай қарамай, сана саңлауындағы сәулені нұрландырған Ешмағамбет Тұрсынай бастаған Нағима Қарымсақова, Гауһар, Ізмағамбетқызы, Алтынай Закирова, Таңшолпан Еркін, Әмина Жұмаева сынды апайлардың барлығына аналық алығысымды білдірігім келеді, –дейді Баян Айгелді. Алтын МЕЙІРХАНОВА

Қазалы: Балалары өнерлі балабақша

Қазалы: біліктілер бас қосқан білім ордасы

<a href="https://kyzylorda-news.kz/">Kyzylorda-news.kz</a>&nbsp;Бүгінгі жас ұрпақтың заман талабына сай білім мен ғылымды қатар игеру үшін мектептерде барлық жағдай жасалуда. Қазір мектептердің бағытын айқындау, соған сәйкес сынып кабинеттерін жабдықтау, қажетті құра-жабдықтармен қамтамасыз ету жолға қойылған. Бұл білім аламын деген оқушыға жасалған үлкен қолдау десек артық болмас.&nbsp; &nbsp;Осындай мүмкіндігі бар білім ошағының бірі қаладағы С.Сейфуллин атындағы №4 ІТ мектеп-лицейі. Білім беруде жаратылыстану бағытына басымдық берген білім ордасында қазіргі таңда 600-ден аса бала тәлім алады. Іргесі 1964 жылы қаланған мектепке биыл 60 жыл толды. Жарты ғасырдан астам тарихы бар білім ордасы жақында атаулы күнді кең көлемде атап өтті. Білім ордасы ашылғанда алғаш басшылық еткен Қасымбек Ибраев сол кезден-ақ ұрпақтың сапалы білім алуына басымдық берді. Білікті басшы, тәжірибелі мұғалімдердің еңбегінің нәтижесінде аталған мектеп республика бойынша белгілі білім ошағына айналған. Сол кезеңдегі барлық &nbsp;педагогикалық ұжым мектеп өміріне жаңашыл, тың &nbsp;идеялар мен бастамаларды енгізді. Іскер басшы &nbsp;өзге мектептермен тығыз байланыс орната отырып &nbsp;мектеп мұғалімдерінің іс-тәжірибесін, еңбегін республика, одақ көлемінде таныта білді. Осындай еңбектің нәтижесінде 1968 жылы Қазақ КСР оқу-ағарту &nbsp;министрлігінің шешімімен, №4 орта мектеп &nbsp;ұжымының &nbsp;төрт жылдық жұмысының нәтижесі Мәскеу қаласындағы бүкілодақтық халық шаруашылығы көрмесіне жіберіліп, І дәрежелі «Алтын медаль» иеленеді. С.Сейфуллин атындағы №4 орта мектебі 2000 жылға дейін орыс-қазақ аралас мектебі болса, 2000-2001 оқу жылынан бастап қазақ мектебі болып бекітілді. Білім көкжиегіндегі 60 жыл ішінде оқу ордасы талай дарынды жастарды тәрбиелеп, қоғамда айшықты орны бар тұлғаларды түлетті.&nbsp; &nbsp;С.Сейфуллин атындағы №4 ІТ мектеп-лицейінде тәлім алатын 900-ден астам оқушыға 100-ден аса мұғалім сабақ берсе, оның 44-і – педагог-зерттеуші, 21-і – педагог-сарапшы, 29-ы – педагог-модератор, 19-ы мұғалім екен. &nbsp; &nbsp; &nbsp; Осынша уақыт ішінде қоғамға белгілі талай тұлғаларды түлеткен мектеп беделі қашанда жоғары болмақ. Мектеп ұжымы мемлекет және қоғам қайраткері Г. Әбдіқалықова, Қазақстанның еңбек сіңірген қайраткері, ғалым Қ.Бисенов, танымал әнші М.Сәдуақасова, белгілі күйші Е.Мұстафаев, өңірге танымал тұлғалар Б.Сәрменбаев, Қ.Сақтағанов сынды шәкірттерімен мақтанады. Ал 2019 жылдан бастап С.Сейфуллин атындағы орта мектеп – «Ақпараттық технология мектеп-лицейі» болды. Ғылым мен технологияның дамыған заманында соған сай жабдықталған білім ордасының ұстазы білікті, оқушысы білімді болуы керек-ақ. Бұл ретте мектеп ұстаздары үнемі ізденуден жалыққан емес. Оның үстіне ІТ бағытындағы мектеп болғандықтан бүгінгі күннің талабына сай үлкен жауапкершілік артылған. Оқушылардың сапалы білім алуына мұнда бар мүмкіндік қарастырылған. 2020 жылы мектеп ұжымы Жапон елшілігінің «Шөп тамыры» бағдарламасы бойынша 30 миллион теңге грант иеленіп, аталған қаржыға мектеп ғимаратының есік-терезелері толық ауыстырылған. Сонымен қатар биыл мектептің 60 жылдық мерейтойына орай облыс әкімі Нұрлыбек Машбекұлының қолдауымен құны 958 миллион теңге болатын қосымша 300 орындық оқу корпусы мен 100 орындық асхана салынып, пайдалануға берілген. Бұған дейін акт залы, спорт залы, кітапхана мен қосалқы кабинеттері бар қосымша білім ғимараты салынған еді. Ал жақында мектеп түлегі, «Асар» ЖШС директоры Қанағат Сақтағановтың демеушілігімен мектептің 60 жылдық мерейтойына тарту ретінде 10 миллион теңге қаржыға құрайтын мектеп ғимаратының ескі шатырын ауыстыру жұмысы жүргізілген.Десе де алпыс жылдан бері күрделі жөндеу көрмеген білім ғимараты ескірген. Бұл ретте мектеп басшысы Алмат Бақытбекұлы келер жылы білім ошағына күрделі жөндеу жұмыстарын жүргізу жоспарланғанын айтады.<blockquote>– Техника ғылымдарының докторы, профессор Қылышбай Алдабергенұлы Бисеновтың қолдауымен мектепте математика кабинеті толық жабдықталып, оқушылар игілігіне берілді. Ол кісі – мектеп түлегі. Сондай-ақ &nbsp; «Интегрострой» ЖШС-нің директоры Бақдәулет Ысқақовтың демеушілігімен мектептің ескі ғимараты сыртына күрделі жөндеу жүргізіліп, мектеп ауласы абаттандырылды. Мектеп түлектерінің қаржылай қолдауымен мектептің материалдық-техникалық базасы жаңғыртылып, мектепте қоғамдық негіздегі мұражай ашылды. Онда мектептің кешегі мен бүгінгі сәттерінен сыр шертетін құжаттар мен суреттер жинақталған. Мектепте «Кәсіпкерлік және бизнес негіздері» деген қосымша сабақ жүргізіледі. Алдағы уақытта мектеп түлегі, кәсіпкер Ибрагим Әбубәкіровтің қызы Аида Ибрагимқызы оқушыларды кәсіпкерлікке баулуда қажетті құрал-жабдықтармен қамтылған арнайы кабинетті, алғашқы директоры болған Қ.Ибраевтың ұрпақтары тарих кабинетін жабдықтап, оқушыларға сый жасамақ. Мектеп қабырғасынан бүгінгі күнге дейін 5000-ға жуық шәкірт білім алып, үлкен өмірге қанат қаққан. Бұл – ұстаздардың ерен еңбегінің жемісі, – дейді мектеп директоры Алмат Рахметов.</blockquote>&nbsp; &nbsp;Білім ошағында бала тәрбиесінде тек білім беруді емес, оқушылардың рухани дамуына да жағдай жасаған. Бұл ретте 40 мыңнан астам кітап қоры бар кітапхана жұмысын айта кеткен жөн. Жиырма жылдан бері мектеп кітапханашысы болған Сәуле Оспанованың балаларды кітап оқуға ынталандыруда еңбегі зор. Айтуынша, балаларды мектеп табалдырығын аттаған алғашқы күннен бастап кітапханамен таныстырып, кітап оқудың маңызын түсіндіретін көрінеді. &nbsp;Кітапханада 40671 кітап қоры бар. Оның 9767-сі көркем әдебиеттер. Оқушылардың кітапқа қызығушылығы көңіл қуантады дейді кітапханашы.<blockquote>– Сабақтан тыс уақытта кітапханаға келетін тұрақты оқырмандар бар. Балалардың сұранысы жас ерекшелігіне сай болады. Бастауыш сыныптағылар ертегілерді көп оқиды. Басым көпшілігі энциклопедияға қызығады. Шетел әдебиетінен «Гарри Потердің» кітабын қызыға оқиды. Сонымен бірге ақындар шығармашылығына сұраныс бар. Ал жоғары сынып оқушылары көбіне «Абай жолы», М.Әуезовтің әңгімелерін сұрайды. Оқушыларды кітап оқуға тартуда түрлі көрмелер, іс-шаралар ұйымдастырылады. Жалпы балалардың кітапты онлайн оқуына да, қолға алып оқуына да мүмкіндік бар. Алайда кітапты қолға ұстап оқығанның қаншалықты маңызды, пайдалы екенін ұғындыруға тырысамын, – &nbsp;дейді ол бізбен әңгімесінде.</blockquote>&nbsp; Алаш қайраткері атындағы мектеп білім беру ІТ бағытына басымдық бергендіктен мұнда «ДағдыLan» цифрлық дағдыларды дамыту жобасы қолға алынған. Жоба бойынша оқу-тәрбие процесін басқаруды автоматтандыру, нейротехнология, биофизика және жасанды интеллект, киберskills бағыттары қамтылған. Оқушылар осы бағытта білім алып, тәжірибе жасап ғылыми жобаларда үздіктер қатарынан көрінуде. Оның ішінде А.Серікбай, Л.Мұхтар, Д.Жұмаділ, І.Мейрамбекұлы, А.Манатбек, А.Әбдінәби, И.Олжабай аталған бағытта жобаларын қорғап, мектеп абыройын асырып келеді. Білім мен тәрбиені ұштастырып, оқу ісінде үздіктер қатарынан көрінген мектеп ұжымы сапалы білім, саналы ұрпақ қағидатын берік ұстанған. Сол жолда әлі талай түлектерді қияға қанат қақтырып, елім дейтін азаматтарды тәрбиелейтініне сенім мол.<img src="https://knadmin.beoblood.kz/uploads/53803234_a29a_47de_a0f1_9bcf358f883e_f866052f49.jpg" alt="53803234-a29a-47de-a0f1-9bcf358f883e.jpg"><img src="https://knadmin.beoblood.kz/uploads/f1f3ecfc_a581_4498_97f9_e2cca968dc9f_ca8f41c10f.jpg" alt="f1f3ecfc-a581-4498-97f9-e2cca968dc9f.jpg">А.СЕЙІЛ

Білім көкжиегіндегі 60 жыл

<a href="https://kyzylorda-news.kz/">Kyzylorda-news.kz</a>&nbsp;Біздің ойлау жүйемізді дамытып, шешім қабылдау қабілетімізді жетілдіретін математика пәні ғылымы – тек сандар мен есептерден құралмайды. Бұл пәннің маңыздылығы соншалық, ол біздің күнделікті өмірімізде де, ғылыми зерттеулерде де, технологиялық инновацияларда да кездеседі. Математика пәнін оқыту арқылы оқушылар логикалық және сыни тұрғыдан ойлау және проблемаларды шешу дағдыларын дамыта алады. Қалалық білім бөліміне қарасты Мұстафа Шоқай атындағы №187 ақпараттық технология мектеп-лицейінің математика пәнінің мұғалімі Ақжан Ахатай – математиканы IT саласымен біріктіріп оқытып жүрген новатор ұстаз, педагогика ғылымдарының магистрі. Ерекше тәсілмен оқытудың арқасында оқушылар қиын есептерді оңай түсініп қана қоймай, байрақты бәсекелерде еліміздің атын халықаралық додаларда танытып жүр. Кейіпкеріміз еліміздегі мектептерде ІТ саласын дамытуға көп мүмкіндік берілгенін айтады.<blockquote>– Соңғы он жылдықта ІТ саласы қарқынды дамып келеді.&nbsp;Мүмкіндіктер шексіз дер едім. Себебі қазір ең нашар деген мектептердің өзі толыққанды компьютерлер, электронды тақталар және интернетпен қамтамасыз етілген. Ендігі кезекте информатика пәні мұғалімдері ғана емес барлық педагогтар ақпараттық технологияларды, бағдарламаларды меңгере түсуі қажет. Бүгінгі күні инновациялық әдістер мен ақпараттық технологияларды қолдану арқылы оқушының ойлау қабілетін арттырып, ізденуін дамытып, қызығушылығын ояту, белсенділігін арттыру – ең негізгі мақсат. Осы орайда мен қызмет ететін Мұстафа Шоқай атындағы №187 ақпараттық технология мектеп-лицейінде «ІТ математика» пилоттық жобасы бастау алды. 2023 жылы мектебімізге жоба аясында атқарылып жатқан шаралармен танысу мақсатында Қазақстан Ұлттық Ғылым академиясының академигі, математик, профессор, физика-математика ғылымдарының докторы Жұмаділдаев Асқар Серікұлұлы келіп, батасын беріп кеткен еді. Одан бөлек «Цифрлы Қазақстан» бағдарламасын іске асыру мақсатында мектебімізде «Bala QR» жобасы жүзеге асуда және Қызылорда облыстық «Ақпараттық технологиялар орталығы» қолдауымен «Grand Master бағдарламалау мектебі» арасында ақпараттық технология бағытындағы жұмысты жетілдіруде бірлескен жұмыс жүруде. ІТ мектеп-лицей ұстаздарын ақпараттық технологияның мүмкіндіктерін оқу-тәрбие үдерісінде тиімді пайдалану үшін тәжірибелерін тарату мақсатында дайындалған авторлық бағдарламалары «Толықтырылған шындық» AR мобильді қосымшасы арқылы «Әділетті Қазақстан: сапалы білім, адал ұрпақ, табысты ұлт» тақырыбында өткен педагогтардің облыстық тамыз кеңесінің шығармашылық көрме алаңында таныстырылады. Мектеп оқушылары «Smartlab» бағдарламалау үйірмесінде IT программалау тілдерін меңгеру арқылы заманауи веб парақшалар дайындап, видео контенттер жасап, «Робототехника» үйірмесінде оқушылар лего конструктормен жұмыс істей отырып, 3D үйірмелерінде 3 өлшемді графиканы, анимацияның 3D графикасында көрсетілуі және виртуалды әлем бойынша тур жасау әдістерін үйренуде, – дейді білімді жас маман.</blockquote>&nbsp; &nbsp; &nbsp; &nbsp; &nbsp;Қайсыбір ұстаздың білігі шәкірт білімімен сараланады емес пе? Кейіпкеріміз қазіргі таңда оқушылардың математикаға қызығушылығы басым екенін ерекше атап өтті. Әсіресе, заманның жаңа саласы ІТ мамандығын игеруді көздейтіндер мамандықтың математика, информатика сынды пәндермен тығыз байланысты екенін ұққан.<blockquote>– Негізі, оқушыларды байқауларға қатыстырып олардың бойына сенімділік ұялата білу – басты мақсатым.&nbsp;Тек математика деп тоқтап қалмай, кез келген саладағы байқауларға қатыстырамын. Олардың жемістері де аз емес, өзіме ыстық болған алғашқы жетістіктеріме тоқталсам, 2023 жылы жалпы білім беретін пәндер бойынша республикалық олимпиаданың ІІ кезеңінде математика пәні бойынша Ханшайым Қалыбек алғыс хат, Қорқыт Ата атындағы Қызылорда университетінің «Физика және математика» кафедрасының ұйымдастыруымен Қорқыт Ата атындағы Қызылорда университетінің 85 жылдығына орай облыстық ғылыми зерттеу жобалары байқауында «Жас зерттеуші» номинациясымен Бекарыс Шамшатдинов І дәрежелі дипломмен марапатталды. Сондай-ақ «Дарын» РҒПО ұйымдастыруымен өтетін ғылыми жобалар, пәндік олимпиадалар және басқа да «Ұлы өнертапқыштыққа алғашқы қадам» және тағы басқа додалардың қалалық, облыстық, тіпті республикалық кезеңдерінен жүлделі орындар иелендік. Мектеп тарихында үлкен жетістіктердің бірі – оқушым Ерболат Сәкен «Ұлы өнертапқыштыққа алғашқы қадам» инновациялық идеялардың республикалық байқауында «Компьютерлік графика және 3D модельдеу» номинациясының жеңімпазы атанып, Қазақстан Республикасы Оқу-ағарту министрлігі республикалық қосымша білім беру оқу-әдістемелік орталығының ІІ дәрежелі дипломымен марапатталды. Өзім үшін жетістіктің бірі – «Қазақстанда STEAM білім беруді дамытудың жол картасы шеңберінде» «Jana Talap» атты сертификатталған STEM тренерлерді даярлаудың халықаралық Қазақстан-Тайланд оқыту бағдарламасы бойынша 4-деңгейлі «Республикалық STEM тренер» мәртебесі бойынша оқуды сәтті аяқтап, сертификатталған тренер ретінде өз тәжірибеммен бөлісіп «Сабақта STEM оқыту әдістерін тиімді қолдану арқылы оқушылардың функционалдық сауаттылығын арттыру» мақсатында облыс көлемінде мұғалімдермен семинар-тренингтер өткіземін, – деді оқушыларының жетістігімен бөліскен ұстаз.</blockquote>Новатор ұстаздың айтуынша, биылғы оқу жылының басты жаңалығы – мұғалімдердің ЖИ (жасанды интеллект) қолдануы екен. Олар оқушыларды сабаққа қызықтыра білумен қатар оқу материалдарын түсіну оңай болу үшін ұстаздар қауымы жан-жақты заманауи технологияларды қолдануға тырысады.<blockquote>–&nbsp;Мен көбінесе STEAM технологиясын қолданамын. Ол жаратылыстану пәндерінің интеграциясы, яғни бір математика сабағының өзінде информатика, химия, физика сынды пәндердің ұғымдарын қолдана отырып, есептер шығарамыз. Біздің мектеп былтырғы оқу жылында Қазақстанда STEAM-білім беру бағытын дамыту жол картасының аясында «STEAM Mektep Advancement» атты мектептерді сертификаттау бағдарламасынан өткені үшін «Сaravan of Knowledge» КҚ және ҚР Оқу-ағарту вице-министрінің республика бойынша арнайы дипломы табысталған 19 мектептің қатарында болды, – дейді ол бізбен әңгімесінде.</blockquote>Білім алу жолында әуелі баланы сол пәнге қызықтыру маңызды. Қызығушылығы бар балаға оны терең меңгеруге, зерттеуге тырысады. &nbsp;Бұл ретте жас маманнан баланы қызықтыру әдісін сұрадық.<blockquote>– Бұл – әріптестерімізбен ең көп талқылайтын мәселелеріміздің бірі.&nbsp;Математика пәніне қызықтыра білу екі есе күшті талап ететіндіктен, әр сабақты бір-біріне ұқсамайтындай өтуге тырысамын. Көбіне оқушыларды топқа бөліп, математикалық платформаларды, ЖИ қолданып тапсырмалар беремін. Жекелей де, жұп болып та деңгейлік тапcырмаларды орындайды. Кейде үй тапсырмасына қосымша тақырыпқа сай фильмдерді көруге ұсынғанымда балалардың қуанғанын сөзбен жеткізе алмаймын. Оқушылардан жаттанды білімі бар құлтемір емес, өз сыни пікірі бар шығармашыл тұлға шығару – басты мақсат.&nbsp;Сол үшін, мектепте сабақ жоспарлауда шығармашылық тапсырмалар қосудан бөлек сабақтан тыс іс шаралар ұйымдастырып тұрамыз. Мысалы, математикалық квест, үздік ІТ жобалар конкурсы, өнертапқыштар конкурсы және мектепішілік олимпиадалар сынды түрлі бағыттағы сыныптан тыс жұмыстарды жиі өткізіп тұрамыз. Математика пәнін оқытуда қосымша материалдар мен ресурстар қолдану оқушылардың пәнге деген қызығушылығын арттырып, материалды жақсырақ игеруіне көмектеседі. Мектебімізде математика, информатика және физика бірлестігінде ай сайын Қорқыт Ата атындағы Қызылорда университетінің «Физика және математика» кафедрасының оқытушы профессорларымен бірлескен әдістемелік жиындар өтіп отырады. Жоғарғы оқу орнында да пайдаланатын оқыту ресурстарын сол жерде талқылаймыз. Ал мен үшін пайдалы қосымша ресурстар көп. Мысалы, «Desmos» – интерактивті графиктер құруға арналған онлайн құрал. Ол оқушыларға графикалық есептерді визуализациялауға көмектеседі. «GeoGebra» – геометрия, алгебра, статистика және математикалық модельдеуді үйрету үшін интерактивті құралдар ұсынатын бағдарлама. «Prodigy Math Game» – бастауыш және орта мектеп оқушыларына арналған математикаға негізделген ойын, ол тапсырмаларды ойын арқылы орындауға мүмкіндік береді. Одан бөлек, цифрлық өлшеуіш құралдар, цифрлық транспортир, электронды сызғыш, инженерлік калькулятор, сөйлейтін шахмат пен геометриялық ойын карталарын да сабақ тақырыптарына сай бөліп қолдана береміз. Кейде роботымызды да қасыма көмекші етіп қоямын.Бұл материалдар мен ресурстар оқушылардың математикалық ойлауын дамытуға және олардың пәнді тереңірек меңгеруіне көмектеседі, – дейді ол.</blockquote>Математика пәнін үйретуде Ақжан Ахатайдың өзіндік тәсілдері де бар көрінеді. Бұл жайында ол былай деп түсіндірді.<blockquote>– Математика пәнін оқытуда ең маңызды аспектілер бірнеше негізгі бағыттарға бөлінеді.&nbsp;Солардың тек мен үшін маңызды үш озық тәсіліне тоқталып өтейін. Алғашқысы қолдану және практика. Теорияны тәжірибеде қолдану – математиканың тиімді меңгерудің кілті. Оқушылар әр түрлі есептерді шешу арқылы, математикалық заңдылықтарды нақты өмірде қалай пайдалануға болатынын көреді. Бұл тәсіл олардың білімдерін бекітіп, нақтылай түседі. Мәселені шешу. Математиканың басты мақсаты – күрделі мәселені жүйелі түрде шешуді үйрету. Оқушыларды өздігінен ойлануға, дұрыс шешім қабылдауға және түрлі шешу тәсілдерін іздеуге ынталандыру маңызды. Интерактивті оқыту және технологияларды пайдалану. Қазіргі уақытта интерактивті құралдар мен технологиялар математиканы оқытуда маңызды рөл атқарады. Виртуалды құралдар, интерактивті тақталар мен математикалық бағдарламалар оқушылардың қызығушылығын арттырып, материалды игеруді жеңілдетеді. Осы тәсілдер арқылы математика пәніне тиімді және қызықты етуге болады, – дейді.</blockquote>«Математиканы барлық пәннің атасы деп алсақ, информатиканы жас ғылыми пән екенін бәріміз білеміз» деген Ақжан қазіргі цифрлық технологиялар заманында екеуінің қажеттілігі бірдей деңгейде деп ойлайтынын айтады.<blockquote>– Болашақта жастар математика және информатика пәндерін тіпті тереңдетіп оқиды деп ойлаймын. Өйткені ғылым мен технология дамыған сайын олардың қажеттілігі де арта түседі емес пе?!, – дейді Ақжан Ахатай.</blockquote>Қалай десек те, дәл қазіргі сәтте ІТ саланы меңгеру заман талабы. Бұл ретте мектеп ұстаздарына да, сала мамандарына да жастарды заманауи салаға бағыттау, қызығушылығыын арттыру жауапкершілігі тұр. Ал Ақжан Ахатай сынды білімді жас мамандар бұл сенімнің үдесінен шығарына сенім мол.

Бала логикасын дамытуда математиканың маңызы зор

&nbsp;<a href="https://kyzylorda-news.kz/">Kyzylorda-news.kz</a> Ә.Тыныбаев атындағы №11 мектеп-лицейінің информатика пәнінің мұғалімі Камила Иманғалиева өзін әркез жаңашыл қырынан танытып жүреді. Бұл әрбір ұстазға керек қасиет. Кәсіби біліктілігімен танылған шебер ұстаз шығармашылыққа жаны құмарлығымен, ізденімпаздығымен ерекшеленіп жүр.&nbsp;Ол өзінің 31 жылдық еңбек өтілінде мектептегі қоғамдық жұмыстарға белсене араласып, информатика кабинеті жетекшілігін, информатика пән бірлестігінің жетекшілігін жауапкершілікпен атқарып, құрметке бөленуде.&nbsp; Өз ісіне берілген, жауапкершілікті жіті сезіне білетін кейіпкеріміз әріптестері арасында абыройлы. Мектеп мақтанышы десе де болады. Мектеп директоры Гүлмира Сүлейменова да оның жай мұғалім емес, ұстаз атына ие болған қадірлі жан екенін айтады.<blockquote>– Камила Дүйсенбайқызы Тасбөгет кентіндегі алғашқы информатика пәні мұғалімі, педагог-зерттеуші, шығармашыл ұстаз ретінде көпшілікке танымал. Оның шығармашылық тұрғыдағы зерттеу жұмыстары халықаралық, республикалық ғылыми-практикалық конференцияларда таратылып, баспа беттерінде жарияланып, облыстық байқауларда жүлделі орын алып жүр. Алғашқылардың бірі болып электронды оқулық жасап, ІІ облыстық «Білім беруді ақпараттандыру» атты форумының жеңімпазы атанғаны үшін облыстық білім басқармасының және облыс әкімінің Құрмет грамоталарымен марапатталды. Халықаралық ақпараттандыру форумына қатысты. Облыстық «Ең үздік бейнесабақ» атты дәстүрлі емес инновациялық сабақтар байқауында жүлделі ІІ орынды иеленсе, ІІ облыстық «Білім беруді ақпараттандыру» атты форумының жеңімпазы, видеофильмдердің облыстық байқауының І орын иегері деңгейіне жетті. «Ең үздік әдістемелік-дидактикалық құрал – 2022» қалалық байқауының І орын жеңімпазы. Мектеп мәртебесін көтеріп жүрген әріптесімізге құрметіміз ерекше, – дейді мектеп директоры.</blockquote>Қашанда ізденісте жүретін ұстаз бүгінде бірнеше оқу құралдарының авторы. Озат тәжірибе ретінде облыс ұстаздарының арасында кең таратылған «Педагогикалық-психологиялық коррекция және кеңес беру» электронды оқулығының, «3d Max studio көмегімен объектілерді модельдеу» және «Проективті психология» атты оқу құралдарын жарыққа шығарған. Тәжірибелі ұстаз өз білімін үнемі жетілдіріп, шыңдап отырады. Оқушыларға робототехника үйрету барысында жүргізіліп жатқан жұмыстардың жемісі шәкірттері үнемі қалалық, облыстық роботехника сайыстарында жүлделі орын алып, ұстазының абыройын асқақтатып жүр.<blockquote>– Мен сонау 1993 жылы алғашқы компьютермен жұмыс істедім. Алғашқы шәкірттер сол кезде бітірді. Ескі компьютермен тек есеп шығардық. 1999 жылы жаңа бағдарламаға негізделген компьютер берілді. Ол кезде&nbsp;бұл бағытта кәсіби білім беріле қоймаған еді. Өзім көп ізденіп, тыңнан түрең салғандай жаңа саланы меңгере бастадым. Жаңа фукцияны іздеп, оның ерекшелігін меңгерем дегенше де біршама уақыт өтті. «Өрлеу» оқу орталығына да барып, кейбір білмейтін жерімді үйрендім. Балалардың үйренуге қызыққаны сондай мені мектептің терезесінен аңдып отыратын. Балалармен түнгі 12-ге дейін отырған күндеріміз болды. «Жас қазақ» деген мектепішілік газет те шығардық. Күндіз балалар материал жинайды. Түнімен газет жасап, азанда дайын болатын. Оны тиынға сатамыз да, шыққан ақшаға қағаз аламыз. Ол кезде «Сырдария» типографиясында газет басылады. Мен ол кісілерге компьютер үйреттім. Олар орнына газет жасайтын қағаз берді. Қазір жастар компьютерді жақсы біледі де, бағдарлама жасаудан ақсап жатады. Электрондық оқулық жазып, форумға қатысып, 1-орын алдым. Әрі қарай қызығушылығым артты. Тіпті компьютер бұзылып қалса, өзім бағдарламасын енгізіп, жөндеп алатын деңгейге жеттім. Осылайша алған білімімді айналама үйреттім. Ең бастысы ынта, төзім, еңбек керек. Еткен еңбегімнің, төгілген маңдай терімнің өтемі шәкірттерім жұлдыздары жарқырап, мені үнемі марқайтып, шексіз қуанышқа бөлейді, – дейді ұстаз.</blockquote>Қай кезде де ұстаз еңбегі шәкіртінің жетістігіміен, шыққан шыңымен өлшенеді емес пе? Сол сияқты Камила Дүйсенбайқызының шәкірттері Елнұр Рахманберген, Арман Сүгірәлі, Арлан Ағаділов, Айбек Матжанов, Ернұр Жанболат, Аян Әбілбек, Ұлан Күнтуған, Әлібек Шаңбай қала мектептері оқушыларының арасында жалпы білім беретін пәндер бойынша өткізілген республикалық олимпиададан әр жылдары жүлделі орынға қол жеткізіп, биіктен көрінді. Сонымен қатар, қалалық «Ақпараттандыру әлеміне саяхат» атты мультимедиялық фестивальде шәкірттері үзбей жүлделі орын иеленіп келеді.Қай кезде де шәкірт бойындағы білімге деген қызығушылықты оятып, бағыт-бағдар беріп, мамандыққа адал болуды үйретіп, бойына іскерлік пен ұзақ жылғы тәжірибені жиған озат ұстаз бүгінде тек аймаққа емес, республикаға да танымал.&nbsp;Г.Асқар

Ізденімпаз ұстаз Камила

<a href="https://kyzylorda-news.kz/">Kyzylorda-news.kz</a> &nbsp;Бар ғұмырын шәкірт тәрбелеу, үлкен өмірге жол сілтеп, оны биікке жетелу, қанаттандыру, жаны мен тәнін, болмысы мен барын беру тек ұстаздың ғана қолынан келеді. Қазақтың аса көрнекті ағартушы-педагогы Ыбырай Алтынсарин «Мен үшін жақсы мұғалім бәрінен де артық, өйткені мұғалім – мектептің жүрегі» деп бекер айтпаса керек-ті. Әрқашан еліміздің келешегі кемел, болашағы жарқын болып, дамыған мемлекетке айналуы үшін ұлағатты ұстаздар қауымы аянбай еңбек етіп келеді.«Ұстаздық еткен жалықпас, үйретуден балаға» демекші, ұлағатты ұлы есімді ұлық¬тап жүрген ұстаз Салтанат Кенебаева Сырдария ауданына қарасты үлгілі Н.Ілиясов ауылындағы Т.Айтбаев атындағы №132 орта мектептің қазақ тілі мен әдебиеті пәнінің мұғалімі. Бүгінде бала жанының бағбаны өскелең ұрпаққа тәрбие мен білім беруде білімімен қоса біліктілігінің арқасында жан-жақты қырымен оза шап-қан үлгі тұтар ұстаздың бірі. Салтанат Арыстанбекқызы – Қызылорда облысына қарасты Абай ауылының тумасы. Мектеп кезінен білімді, талантты оқушы оқу бітірген соң М.Мәметова атындағы педагогикалық училищенің қазақ тілі мен әдебиеті мамандығы бойынша оқуға түседі. Оқуын тәмамдаған соң өзінің ауылындағы мектепте ең алғашқы еңбек жолын тәлімгер болып бастайды. Екі жыл көлемінде жұмыс істеген тәлімгер Н.Ілиясов ауылына қоныс аударып, осындағы білім ордасында тәлімгерлік қызметін жалғастырады. Жаңа орта, жаңа мектепте қызметін бастаған жас ұстаз ұжымдастарымен жақсы қарым-қатынас орнатып, оқушылармен көптеген қызықты іс-шаралар өткізіп, саналы ұрпақ дайындауда өз үлесін қоса біледі. Тәлімгерліктен бастап, мектеп директорының хатшысы, кадр бөлімінде, шағын орталық тәрбиешісі болып түрлі қызметте өзін сан қырынан көрсете білді. Осындай жауапты қызметті атқара жүріп, мектептің қоғамдық жұмыстарына да белсене араласты. Сондай-ақ білімін жетілдіру мақсатында «Болашақ» университетіне қазақ тілі мен әдебиеті мамандығы бойынша оқуға түседі. Ең бастысы, «өз пәніммен және сыныппен жұмыс жасау мен үшін үлкен бақыт» дейді саналы ғұмырын ұлы қызмет жолына арнап, қызмет етіп келе жатқан білікті ұстаз.<blockquote>– Өзімді дамытудан, ізденуден ешқашан жалыққан емеспін. Себебі біздің қолымызда келер ұрпақтың болашағы тұр. «Ұстазы жақсының ұстамы жақсы» дегендей, жан-жақты, білімді ұстазды көрген жас ұрпақ өздерінің бойына ұстаздағы жақсы қасиетті алып, ұстазына ұқсауға тырысатыны айтпаса да түсінікті. Бала – біздің болашағымыз. Олардың жұлдызын жағып, мемлекетіміздің саналы, білімді, тәрбиелі ұрпағы болып қалыптасуына біздің қосатын үлесіміз өте көп екенін сезінемін. Балалармен жұмыс жасаудың қиындығы мен қызықшылығын түсіне білдім. Ұстаздық жолымды жетістіктер мен жақсы, сәтті күндерге толтыруға тырысамын. Өсіп келе жатқан ұрпақтың жүрегінде еліне, жеріне деген сүйіспеншілік пен патриоттық сезімін дамыту үшін әлі де күш-жігерімді саламын. Барша ұстаздарды төл мерекемен құттықтаймын! Қиындығы мен қызығы қатар жүретін қызметтік жолдарына толағай табыс тілеймін, – дейді шәкірт тәрбиелеу мен адал қызмет етуді өмірлік ұстанымына айналдыра білген Салтанат Кенебаева.</blockquote>Өзінің 20 жылдық тәжірибесі арқылы жан-жақты дами білген ізденімпаз ұстаздың жеткен жетістігі бір төбе. Әрқашан оқушыларын өз пәніне қызықтырып қана қоймай, әр сабағын жаңа әдіс-тәсілмен өткізетін жаңашыл ұстаз Қызылорда облысы білім басқармасының дипломы, Білім және ғылым қызметкерлері кәсіподағы облыстық комитетінің Құрмет грамотасы, аудандық білім бөлімінің Алғыс хатымен марапатталды. Мұнан бөлек, спорт пен өнерді қатар алып жүр¬ген ұстаз Қазақстан Республикасының білім саласындағы кәсіподақ ұйымының 100 жылдығына орай мұғалімдер арасында ұйымдастырылған 6 шақырым қашықтыққа жүгіруден жүлделі 1-орын иеленді.Шәкіртінің жетістігі – ұстаздың еңбегінің жемісі екені сөзсіз. Бүгінде республикалық, облыстық, аудандық байқауларда, пәндік олимпиада, мектеп театрында да өнер көрсететін шәкірттері жетістікке жетіп келеді. Атап айтар болсақ, «Театрдың ғажайып әлемі» республикалық фестивалінде ІІІ орын, «Темірбек Жүргенов – тарихи тұлға, ұлт жанашыры» тақырыбында театрланған көрінісінде ІІІ орыннан көрінді. Сондай-ақ биыл «Театрдың ғажайып әлемі» республикалық фестивалінде ІІ орын және де «Үздік жас актер» номинациясын шәкірті Айтөре Жалғасбай жеңіп алды. Бұл ұстаздың жеткен жетістігінің бір бөлігі ғана.Қазіргі таңда қызметімен қатар отбасын да қатар алып жүрген асыл жар, аяулы ана. Жолдасы нағилық Нұржан Телеуовпен 4 бала тәрбиелеп отыр. Үлкен қызы анасының жолын қуып, Абай атындағы педагогикалық университетінің 3-курс студенті. «Отбасында көрген-білгенін әрі қарай дамыту, шыңдау мақсатында балаларымның ұстаздық жолды таңдауына қарсы емеспін» дейді ұстаздық сара жолды өнеге етіп көрсете білген ұстаз-ана.Саналы ғұмырын шәкіртінің өмірде тұлға болып қалыптасуына өз үлесін қосып жүрген ұстаздың еңбегі қашан да бағалы.Таңшолпан Шанжарханова

Қазақстан және Қызылорда облысының жаңалықтары: Білім