<a href="https://kyzylorda-news.kz/">Kyzylorda-news.kz</a> 25 қазан – Республика күні сотталғандар арасында спорттан турнир өтті. Турнир Қызылорда облыстық Прокуратурасы, Қылмыстық-атқару жүйесі департаменті мен «Жігер» Қызылорда облысы мүгедектерінің қоғамдық бірлестігінің ұйымдастыруымен №60 мекеменің спорттық алаңында өтті.Қызылорда облыстық прокуратурасының үкімдердің орындалуын қадағалау басқармасының бастығы Азамат Баянбайұлы шараның алғы сөзін сөйлеп, жарысқа қатысушыларға спартакиаданы ашып берді. &nbsp;Сотталғандар гір көтеру, қол күрес (армрестлинг), шахмат және шағын футбол спорт түрлері бойынша сайысты.Спорт – денсаулық кепілі. Қазіргі заманда спорттың қай түрі болмасын маңызды. Команда болып жарысу тек жеңіске қол жеткізу ғана емес, достық пен өзара түсіністікті қалыптастыратын тәсіл. Тартысты ойын өтіп, &nbsp;шағын футболдан №5 жасақтан құрылған «Алға» командасы топ жарса, №3 жасақтан «Қыран» командасы ІІ-орын, №6 жасақтан «Жастар» командасы ІІІ-орынға жайғасты. Өз командасын жеңілістен қорғаған «Үздік қақпашы», «Үздік ойыншы», «Үздік қорғаушы»-да анықталды.Білек күшімен бақ сынап, ұшқыр оймен сайысқандар арасынан да жүйріктер табылды. &nbsp;Сайыс соңында жеңімпаздарға кубоктар мен медальдар табысталып, Қызылорда облыстық спорт және туризм басқармасы мен «Жігер» Қоғамдық бірлестігінің атынан арнайы дипломдармен, бағалы сыйлықмен марапатталды.

Сотталғандар арасында спорттан турнир өтті

<a href="https://kyzylorda-news.kz/">Kyzylorda-news.kz</a> Бүгін Арал ауданы әкімдігінің мәжіліс залында аудан әкімі Аманжол Оңғарбаевтың төрағалығымен мәжіліс өтіп, күн тәртібіндегі бірқатар мәселелер қаралды.Аудан әкімі алдымен ауданда соңғы күндері өткен түрлі бағыттағы шаралардың лайықты деңгейде ұйымдастырылғанын атап өтіп, бірқатар жетістіктерге тоқталды.<blockquote>– Өздеріңізге белгілі, «Алтын күз – 2025» ауыл шаруашылығы өнімдерінің жәрмеңкесі Қызылорда қаласында жоғары деңгейде өтті. Облыс орталығында өткен мерекелік шара барысында Арал ауданы «Балық шаруашылығы саласы бойынша озат аудан» номинациясымен марапатталды. Жерлестеріміздің еселі еңбегі бұл шарада ескеріліп, ел мерейін тасытар молшылық маусымында аудан озаттары да түрлі марапат төрінен көрінді. Бұл – тынымсыз атқарылған еңбектің нәтижесі, – деді аудан әкімі А.Оңғарбаев.</blockquote>Бұдан бөлек, алда атқарылатын бірқатар жұмыстарға тоқталған Аманжол Сақыпұлы жыл соңына дейін бірнеше ауылға ауыз су беріліп, бірқатар әлеуметтік нысандардың құрылысы аяқталатынын жеткізді.Сонымен қатар, аудан әкімі электр энергетикасы саласын дамыту мен цифрландыру мәселелеріне кеңінен тоқталып, бірқатар жауапты тұлғаларға нақты тапсырмалар жүктеді.<blockquote>– Өздеріңіз білесіздер, мемлекет тарапынан электр энергетикасы саласын дамытуға ерекше көңіл бөлінуде. Тұрғындарды тұрақты және сапалы электр энергиясымен қамту – біздің басты міндеттеріміздің бірі. Қазіргі таңда аудан аумағындағы электр желілері мен қосалқы станциялардың тозу деңгейі жоғары екені белгілі. Сондықтан тиісті жобаларды іске асырып, ауылдық жерлердегі инфрақұрылымды жақсартуымыз қажет, – деді аудан әкімі.</blockquote>Жиын барысында аудан аумағында атқарылып жатқан өзге де жұмыстардың жай-күйіне назар аударған Аманжол Сақыпұлы облыс пен аудан бюджеті есебінен жасалып жатқан жобалардың сапасына ерекше мән беруді тапсырды. Сондай-ақ, құрылысы баяу жүріп жатқан нысандардағы жұмысты жандандыру қажеттігін атап өтті.Фото: Аудан әкімінің баспасөз қызметі

Арал: Бірқатар міндеттер пысықталды

<a href="https://kyzylorda-news.kz/">Kyzylorda-news.kz</a> Қызылорда қаласындағы Жәлел Қизатов атындағы №23 мектеп-лицейінде «Мемлекеттік тіл – этносаралық қатынас тілі» республикалық жобасы аясында «Тіл – тұғырым» атты интеллектуалдық сайыс өтті. Шараны Қызылорда облыстық Қазақстан халқы Ассамблеясы мен №23 мектеп-лицейі бірлесе ұйымдастырды.Интеллектуалдық додаға қаладағы 7 мектеп-лицейден қазақ тілін жетік меңгерген дарынды оқушылар қатысып, өз білімдерін ортаға салды.<img src="https://knadmin.beoblood.kz/uploads/Til_t_yrym_intellektualdy_sajysy_tti_2dcf4107db.jpg" alt="«Тіл – тұғырым» интеллектуалдық сайысы өтті.jpg">Шараның ашылуында облыстық қоғамдық даму басқармасының «Қоғамдық келісім» КММ бөлім басшысы Шахизат Абдраманова мен №23 мектеп-лицейінің директоры Жанат Камитбекова қатысушыларға сәттілік тілеп, мемлекеттік тілдің қоғамдағы рөлін арттыру мен жастар бойында отансүйгіштік сезім қалыптастырудың маңызына тоқталды.Сайыс төрт кезеңнен тұрды:• «Білімді мыңды жығар» кезеңінде оқушылар жылдам ой мен нақты жауап арқылы білімін көрсетті;• «Сөз болаты – мақал» бөлімінде қатысушылар мнемосуреттер арқылы мақал-мәтелдердің толық нұсқасын тапты;• «Ойлан, тап!» кезеңінде тұрақты сөз тіркестерінің мағынасын ашу арқылы қазақ тілінің байлығын дәлелдеді;• «Эрудит кезеңінде» оқушылар QR-код арқылы жасырылған тақырыптарды таңдап, өз ойларын еркін жеткізді.Сайысқа төрелік еткен қазылар алқасы құрамында облыстық «Қоғамдық келісім» КММ аға сарапшысы Гүлзира Сәрсенбек, аға сарапшы Нұргүл Ақсақалова және Студенттік Ассамблея жетекшісі Исмаил Махадинов болды.<img src="https://knadmin.beoblood.kz/uploads/1_Til_t_yrym_intellektualdy_sajysy_tti_28c0bbaa30.jpg" alt="1 «Тіл – тұғырым» интеллектуалдық сайысы өтті.jpg">Шара соңында әділқазылар оқушылардың дайындығына жоғары баға беріп, үздік нәтиже көрсеткен қатысушыларды марапаттады.

Қызылордада «Тіл – тұғырым» интеллектуалдық сайысы өтті

<a href="https://kyzylorda-news.kz/">Kyzylorda-news.kz</a> Ұлттық мереке – Республика күніне орай Қызылорда қаласының астана болғанына 100 жыл толуы және «Қала күні» мерекесіне арналған «Чемпионмен бірге жүгір» атты жеңіл атлетикалық кіші марафоны өтті.<img src="https://knadmin.beoblood.kz/uploads/Legkoatleticheskij_mini_marafon_Begi_s_chempionom_2_24445f5e94.jpg" alt="Легкоатлетический мини-марафон «Беги с чемпионом»2.jpg">Марафонға қатысушыларды қала әкімінің орынбасары Ділмұхамед Абизов айтулы мерекемен құттықтап, сәттілік тіледі.Марафонды бокстан Əлем чемпионатының күміс жүлдегері Қамшыбек Қоңқабаев пен қола жүлдегер Тұрсынбай Құлахмет бастап, іс-шараға ерекше серпін берді.<img src="https://knadmin.beoblood.kz/uploads/Legkoatleticheskij_mini_marafon_Begi_s_chempionom_3_955880293a.jpg" alt="Легкоатлетический мини-марафон «Беги с чемпионом» 3.jpg">«Эдельвейс» жағажайынан «Болашақ» университеті ғимаратына дейінгі аралықты қамтыған жеңіл атлетикалық кіші марафонына 100-ге жуық марафоншы қатысып, 5 шақырымдық қашықтықты бағындырды.<img src="https://knadmin.beoblood.kz/uploads/Legkoatleticheskij_mini_marafon_Begi_s_chempionom_4_19c0511306.jpg" alt="Легкоатлетический мини-марафон «Беги с чемпионом»4.jpg">Барлық қатысушыларға арнайы әзірленген медальдар табысталды. Айта кету керек, марафонға қатысушылардың ең үлкені - 50+ жас болса, ал ең кішісі 15 жаста.

«Чемпионмен бірге жүгір» марафоны өтті 

<a href="https://kyzylorda-news.kz/">Kyzylorda-news.kz</a>&nbsp; Өткен аптада Республика күніне орай ҚАЖ департаментіне қарасты №68 мекемесінде шаруашылық бөліміне қалдырылған сотталған азаматтар арасында спорттық сайыс өтті.Түрлі спорттан сынға түскен олар қарсыласты қапыда қалдыратындай мықтылығын көрсетуге қамданды. Яғни, гір тасын төзімділікпен көтеріп, турникке тартылуда топ жаруға тырысқаны талпыныстан. Білек күші бәсекеге түскен қол күрес пен волейболда да есепті еселетуге барын салғаны байқалды. Осылайша, сайыс қорытындысы бойынша жеңімпаздар анықталып, арнайы диплом мен Алғыс хаттар табысталды.– Айтулы мереке аясында ұйымдастырылған спорттық сайыстың басты мақсаты – жазасын өтеушілердің бойында салауатты өмір салтын қалыптастыру, ерік-жігерін шыңдау еді. Өйткені, спорттың адамды рухани тұрғыдан түлетіп, қоғамға бейімделуіне оң әсер ететініне талас жоқ. Бұл сайыста қатысушылар жеңіске деген талпыныс пен табандылық танытты. Біз үшін олардың осындай жігері мен алға ұмтылысы – ең үлкен жетістік, - деді АКАӘПТЖББ-нің жасақ бастығы әділет аға лейтенанты Рамазан Әлмахан.Мекеме ұжымы алдағы уақытта да мәні мен мақсаты айқын іс-шаралар өткізуді тоқтатпақ емес.

Жігерді жаныған мерекелік сайыс

<a href="https://kyzylorda-news.kz/">Kyzylorda-news.kz</a> Мемлекет басшысы Қазақстанға бірінші рет ресми сапармен келген Финляндия Президенті Александр Стуббқа сый-құрмет көрсетті.Жоғары деңгейдегі келіссөздерге дейін Ақорда резиденциясында Финляндия Президентін салтанатты қарсы алу рәсімі өтті. Протокол тәртібіне сәйкес, Қасым-Жомарт Тоқаев пен Александр Стубб бір-біріне ресми делегация мүшелерін таныстырды. Құрмет қарауылының бастығы мемлекеттер басшыларына рапорт берді. Екі елдің әнұрандары орындалғаннан кейін президенттер шағын құрамда кездесу өткізді.<blockquote>– Сіздің сапарыңыз – екіжақты ынтымақтастықты дамытуға тың серпін беру тұрғысынан өте маңызды. Қазақстан мен Финляндия арасында достыққа әрі өзара түсіністікке негізделген ықпалдастық орнаған. Екі елдің ортасында шешімін таппаған мәселе жоқ. Дегенмен инвестиция және сауда салаларында бірқатар мүмкіндік бар. Сіздің бастамаңызбен өтіп жатқан бизнес-форумның орны ерекше. Бүгін аталған жиынға қатысамын. Бұл кәсіпкерлеріміздің іскерлік байланыстарды өрістетуіне зор септігін тигізеді деп ойлаймын. Бұдан бөлек, гуманитарлық ынтымақтастыққа айрықша мән береміз. Қазақстандықтар Финляндияны, сіздердің салт-дәстүрлеріңіз бен мәдениеттеріңізді құрметтейді. Көптеген отандасымыз Сіздің елге турист ретінде жиі барады. Сапарыңыз мемлекеттер арасындағы серіктестікті нығайту үшін жаңа мүмкіндіктерге жол ашатынына сенімдімін, – деді Мемлекет басшысы.</blockquote><img src="https://knadmin.beoblood.kz/uploads/1761644271_3_1_2de4162e72.jpg" alt="1761644271_3,1.jpg">Өз кезегінде Александр Стубб қонақжайлық танытқаны үшін Қасым-Жомарт Тоқаевқа ризашылығын білдірдіп, бұл сапарды асыға күткенін айтты.<blockquote>– Бұл менің Қазақстанға үшінші мәрте келуім. Алғаш рет 2008 жылы мен Сыртқы істер министрі, ал сіз Сенат спикері лауазымын атқарған кезде жүздескен едік. Бұл жолы екі бағытқа баса назар аударамыз деп ойлаймын. Бірінші – өзара қарым-қатынас және іскерлік байланыстар. Бүгін Финляндиядан үлкен делегация келді. Оның құрамында 20-дан астам ірі компанияның өкілдері бар. Астана көшелерінен Isku және Honkarakenne сияқты танымал фин брендтерін көрдім. Бұл бізді қуантады. Келіссөздің екінші бағыты – сыртқы саясат және қауіпсіздік. Біршама мәселе бойынша ұстанымдарымыз ортақ, күрделі халықаралық жағдайлардың шешімін табуға бірлесе ұмтыламыз, – деді Финляндия Президенті.</blockquote>Бұдан кейін Қазақстан мен Финляндия президенттерінің келіссөзі екі ел делегацияларының қатысуымен одан әрі жалғасты.Президенттің айтуынша, Финляндия Қазақстанның Солтүстік Еуропа мен Еуропа Одағындағы басты сауда серіктесі саналады.Мемлекет басшысы Финляндияның таза энергетика, технология, цифрлық инновация, экологиялық жауапкершілік, басқару, білім беру және адам капиталы бағыттарындағы жоғары стандарттары әлемдік деңгейде мойындалғанын атап өтті.<img src="https://knadmin.beoblood.kz/uploads/df753781_b130_4960_ba3a_85c2571cf4b6_d3bec014c3.jpg" alt="df753781-b130-4960-ba3a-85c2571cf4b6.jpg">Аталған салалардағы Финляндияның жетістіктері көптеген елге, соның ішінде Қазақстанға да үлгі.<blockquote>– Сіздің басшылығыңызбен Финляндия Еуропада, сондай-ақ әлемде сындарлы рөл атқарады. Мемлекеттік ұстанымыңыз бен құндылықтарға беріктігіңіз Финляндияны дүние жүзіне үлгілі ел ретінде танытып отыр. Біз мұны жоғары бағалаймыз. Қазақстан Финляндиямен достық қарым-қатынасқа баса мән береді. Бұған дейін қол жеткізілген уағдаластықтарды іске асыруға, ынтымақтастықтың жаңа бағыттарын дамытуға әзірміз, – деді Қасым-Жомарт Тоқаев.</blockquote>Мемлекет басшысының пікірінше, сауда-экономикалық ынтымақтастықты одан әрі дамытуға мол мүмкіндік бар. Бұл ретте Үкіметаралық комиссиясының жұмысы маңызды рөл атқарады.Президент фин делегациясының құрамында бизнес өкілдерінің болуы Хельсинкидің өзара серіктестікті тереңдетуге шынайы мүдделі екенін көрсетеді деп санайды.Еліміз Финляндия компанияларымен бірлескен жобалардың жүзеге асырылуына жан-жақты қолдау көрсетуге дайын. Қасым-Жомарт Тоқаев фин бизнесмендерін Орталық Азияның кең нарығына шығу үшін Қазақстанда шетел инвесторларына жасалатын қолайлы жағдайды пайдалануға шақырды.Александр Стубб фин компаниялары Қазақстан нарығындағы қызметін кеңейтуге мүдделі екенін жеткізді<blockquote>– Бүгінгі кездесулерге дайындық барысында делегациядағы кәсіпкерлердің бірі «Қазақстандағы өзгерістің бәрі жедел жүріп жатқанын түсіну керек. Сондықтан баяу қимылдап, бюрократияға жол беруге болмайды» деді. Бұл дамудың даңғылына түскен елдеріміз үшін қуанарлық жағдай, – деді Финляндия Президенті.</blockquote>Сондай-ақ тараптар өңірлік және халықаралық күн тәртібінің өзекті мәселелері жөнінде пікір алмасты.

Мемлекет басшысы Финляндия Президенті Александр Стуббпен келіссөз жүргізді

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен Үкімет отырысы өтті. Күн тәртібінде электр энергетикасы саласын дамыту және цифрландыру мәселесі қаралды. Оған облыс әкімі Нұрлыбек Нәлібаев селекторлық режим арқылы қатысты.Облыста энергетикалық инфрақұрылым нысандары жыл сайын жаңғыртылуда. Әртүрлі кернеудегі 10 мың шақырымнан асатын электр желілері, 2 мыңға жуық қосалқы станция бар. Биыл 6 млрд. 100 млн. теңгеге280 шақырым электр желісі, 87 қосалқы станция қайта жаңғыртылып, тозу деңгейі 62 пайыздан 60 пайызға төмендеді.Президент тапсырмасына сәйкес, оңтүстік өңірлерде электр энергиясының тапшылығын болдырмау, жаңа энергетикалық қуатты іске қосу мақсатында Қызылорда қаласында 240 мегаватт электр энергиясы мен 277 гигакалория жылу энергиясын өндіретін жаңа жылу-электр орталығының құрылысы аяқталды.Бүгінде инвестор «Акса Энерджи» түрік компаниясы негізгі, қосалқы қондырғыларды 100 пайыз жеткізген. Станцияның бірінші іске қосу кешені дайын.Аталған жоба өңірді электр энергиясымен толық қамтамасыз етіп, өндірісті дамытуға серпін бермек. Ал орталық толық қосылғанда өзге өңірлерге электр энергиясын сатуға мүмкіндік туады.«Самұрық-Қазына» акционерлік қоғамы 800 млрд. теңгеге қуаттылығы 1100 мегаваттық жаңа бу-газ қондырғыларын салуды жоспарлаған. Оған 280 гектар жер бөлініп, қазіргі таңда техника-экономикалық негіздемесі әзірленуде. Станция 2029 жылы толығымен іске қосылады.Фото: Қызылорда облысы әкімінің баспасөз қызметі

Электр энергетикасы саласын дамыту және цифрландыру мәселесі талқыланды

<a href="https://kyzylorda-news.kz/">Kyzylorda-news.kz</a> Алғаш рет ауылдық тірек мектептердің мұғалімдері 10–12 қараша аралығында Жапонияның Хиросима қаласында өтетін World Association of Lesson Studies (WALS) халықаралық конференциясына қатысады.Қазақстаннан ауқымды жиынға Түркістан, Қызылорда, Шығыс Қазақстан және Абай облыстарындағы ауылдық мектептердің 14 мұғалімі барады. Олар өз мектептерінде Lesson Study тәсілін енгізу мен дамыту бойынша зерттеу абстрактілерін ұсынады.Тірек мектептердің мұғалімдері «Назарбаев Зияткерлік мектептері» ДББҰ Педагогикалық шеберлік орталығының жүйелі әдістемелік қолдауының арқасында халықаралық деңгейдегі жобаға қатысу мүмкіндігіне ие болды. Аталған орталық ел атынан Lesson Study зерттеуінің дүниежүзілік қауымдастығында өкілдік етеді.&nbsp;Конференция Lesson Study әдісін тәжірибеде қолданатын әлемнің түкпір-түкпірінен келген педагогтер мен зерттеушілерді біріктіреді. Бұл – оқу үдерісін бірлесе талдау және жетілдіру арқылы жүзеге асатын кәсіби дамудың тиімді әдісі, ол бүгінде көптеген елдер мен білім беру жүйелерінде кеңінен қолданылады.WALS 2025 аясында NIS Педагогикалық шеберлік орталығының командасы ауылдық мектептерде Lesson Study тәсілін енгізу мен дамыту бойынша өз зерттеулерінің нәтижелерін ұсынады. Орталық тренерлері жүргізген 10-нан астам зерттеу жұмысы халықаралық деңгейде таныстырылмақ.NIS Педагогикалық шеберлік орталығы Lesson Study тәсілін қазақстандық мектептер тәжірибесіне жүйелі түрде енгізіп келеді. Орталық зерттеулер жүргізіп, жыл сайын мұғалімдерді, зерттеушілерді және білім беру ұйымдарының басшыларын біріктіретін өңірлік және ұлттық конференциялар ұйымдастырады. Бұл кәсіби алаңдар тәжірибе алмасуға, зерттеу сабақтарын талқылауға және оқытуды жетілдірудің тиімді жолдарын іздеуге мүмкіндік береді.&nbsp;Айта кетейік, WALS 2025 конференциясының бағдарламасына қазақстандық педагогтердің 249 баяндамасы енгізілді. Бұл – қатысушы елдердің арасындағы ең ауқымды көрсеткіштердің бірі. Салыстырмалы түрде алғанда, өткен жылы конференцияға Қазақстаннан 225 баяндама ұсынылған еді. Аталған дерек еліміздің педагог-зерттеушілерінің кәсіби және ғылыми әлеуетінің қарқынды өсіп келе жатқанын дәлелдейді.Қазақстанның конференцияға белсенді қатысуы елдің әлемдік педагогикалық қауымдастықтағы беделін одан әрі нығайтады. Қазіргі таңда Қазақстан Lesson Study тәсілін енгізу ауқымы бойынша Жапониядан кейінгі екінші орында тұр. Дәл осы Жапонияда пайда болған бұл әдіс бүгінде жаһандық білім беру кеңістігінде кеңінен мойындалған.Еске салcақ, өткен жылы WALS конференциясы алғаш рет Қазақстанда өтті. Халықаралық деңгейдегі шараны NIS Педагогикалық шеберлік орталығы ұйымдастырды. Конференция 30 елден келген 500-ден астам педагог пен сарапшыны бір алаңға тоғыстырды.<img src="https://knadmin.beoblood.kz/uploads/NI_Sh2_49698c0632.jpg" alt="НИШ2.jpg">

Ауыл мектептерінің ұстаздары Жапонияда өтетін WALS-2025 халықаралық конференциясында Қазақстанды таныстырады

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы көлемінде 29 қазан – «Күзет ұйымдарының қызметкерлері күні» кәсіби мерекесіне орай жеке күзет ұйымдары қызметкерлерінің арасында шағын футболдан турнир өтті.Іс-шараны Қызылорда облысы Полиция департаментінің Күзет қызметін бақылау бөлімі мен «Динамо» ДШСҚ облыстық филиалы бірлесіп өткізді. Турнирге полиция қызметкерлерімен бірге еліміздің қауіпсіздігін қамтамасыз етіп жүрген жеке күзет ұйымдарының, олардың филиалдары мен өкілдіктерінің қызметкерлері қатысты.Мақсат – күзет саласы қызметкерлері арасындағы өзара ынтымақтастықты арттыру, әріптестік пен достықты нығайту, ұйымшылдық пен саламатты өмір салтын насихаттау және кәсіби мерекені атап өту болды.Турнирдің ашылу салтанатында департамент бастығының орынбасары, полиция полковнигі Абдраманов Ермахан Әділханұлы құттықтау сөз сөйлеп, қатысушыларға сәттілік тіледі.Сонымен қатар, қызметтік міндеттерін адал атқарып, қылмыс пен құқық бұзушылықтың алдын алуда белсенділік танытқан жеке күзет ұйымдарының қызметкерлері мерекелік «Төсбелгімен», сондай-ақ Қызылорда облысы және қала әкімдерінің, Полиция департаментінің, Ішкі істер органдары мен Ұлттық ұлан ардагерлер кеңесінің, Халықаралық полиция ассоциациясы Қазақстан секциясы президентінің және «Динамо» спорт қоғамы облыстық филиалының Алғыс хаттарымен марапатталды.Қазақтың қастерлі дәстүрі – үлкенге құрмет көрсету мақсатында, ішкі істер органдарының ардагерлеріне шапан жабылып, ерекше ілтипат көрсетілді.Тартысты өткен футбол турнирі достық пен ұйымшылдықтың жарқын үлгісін көрсетті. Жарыс қорытындысы бойынша жеңімпаз командалар бағалы сыйлықтармен, медальдармен және бас жүлде – ауыспалы кубокпен марапатталды.Іс-шара соңында қатысушылар мен қонақтар үшін мерекелік дастархан жайылып, басқосу ардагерлердің ақ батасымен түйінделді.

Қызылордада күзет қызметкерлері арасында шағын футболдан турнир өтті

<a href="https://kyzylorda-news.kz/">Kyzylorda-news.kz</a> &nbsp;Қызылорда облысында полицейлер адасып кеткен үш жасар баланы әкесімен қауыштырды, деп хабарлайды <a href="https://kaz.nur.kz/society/2301942-qyzylorda-turgyny-kolikte-zhalgyz-qaldyrgan-ush-zhasar-balasynan-koz-zhazyp-qaldy/">KAZ.NUR.KZ </a>Iшкі істер министрлігінің <a href="https://polisia.kz/qyzylorda-oblysynda-politsejler-adasyp-ketken-3-zhasar-balany-izdep-tapty/">Polisia.kz</a> порталына сілтеме жасап.Басылым тілшісінің хабарлауынша, Жаңақорған аудандық полиция бөлімінің учаскелік полиция инспекторы Керимхан Аппазов пен ювеналды полиция тобының инспекторы Бекзатхан Тоханов қоғамдық тәртіпті сақтау кезінде ата-анасының қарауынсыз жүрген үш жасар баланы байқаған.Полицейлер баланың ата-анасын жедел іздестіре бастаған. Көп ұзамай баласын жоғалтқан әкені тауып, баламен аман-есен қауыштырды.<blockquote>"Тексеру барысында белгілі болғандай, баланың әкесі жақын маңдағы ғимаратқа кіріп кеткен сәтте бала көліктен түсіп кеткен. Әкесінің көлігінен алыстап кеткен балақай адасып қалған",- делінген ақпаратта.</blockquote>Қырағылық пен жедел әрекет еткен полиция қызметкерлеріне баланың ата-анасы алғыс білдірді.Фото: freepik.com

Қызылордалық тұрғын үш жасар баласынан көз жазып қалды

<a href="https://kyzylorda-news.kz/">Kyzylorda-news.kz</a> Футболдан Қазақстан ұлттық құрамасының бас бапкер міндетін атқарушы Талғат Байсуфинов қараша айында өтетін ойындарға шақыртылған футболшылардың тізімін жариялады. Бұл туралы&nbsp;Stan.kz&nbsp;ақпарат агенттігі хабарлайды.Бұл жолы құрамаға 38 ойыншы шақырту алған. Кеңейтілген тізімде әлеуметтік желіде сынға ұшыраған блогер Мерей Әбілованың күйеуі, “Жетісу” клубының шабуылшысы Димаш Қашкеннің аты жоқ.Айта кетейік, бұған дейін Қашкеннің ұлттық құрамаға шақырту алғаны әлеуметтік желілерде қызу талқыға түскен еді. Көптеген жанкүйерлер оның құрамда ойнауына қарсы пікір білдірген. Себебі ҚПЛ аясында өткен “Қайрат” пен “Жетісу” арасындағы матчта&nbsp;оның ойыны көпшіліктің көңілінен шықпаған.Қазақстан құрамасы қараша айында екі матч өткізеді:&nbsp; • &nbsp; &nbsp;15 қараша – 2026 жылғы әлем чемпионатына іріктеу кезеңі аясында Бельгияға қарсы үйде өтетін ойын; &nbsp; • &nbsp; &nbsp;18 қараша – Фарер аралдарына қарсы жолдастық кездесу, матч Хорватияда өтеді.Ұлттық құраманың оқу-жаттығу жиыны 3 қарашада Астанада басталады.Байсуфинов жариялаған кеңейтілген тізімҚақпашылар:Темірлан Анарбеков ("Қайрат"), Мұхамеджан Сейсен ("Астана"), Бекхан Шайзада ("Ордабасы"), Қажымұқан Төлепберген ("Оқжетпес").Қорғаушылар:Сергей Малый, Сағадат Тұрсынбай, Сұлтанбек Астанов (бәрі – "Ордабасы"), Әлібек Қасым, Бақыт Қайыров, Талғат Құсайыпов (бәрі – "Ақтөбе"), Ян Вороговский ("Астана"), Нұралы Әліп ("Зенит", Ресей), Наурызбек Жағоров ("Тобыл"), Еркін Тапалов ("Қайрат"), Әділбек Жұмаханов ("Елімай"), Арсен Аширбек ("Оқжетпес").Жартылай қорғаушылар:Бақтиер Зайнутдинов ("Динамо Мәскеу", Ресей), Ерсұлтан Қалдыбеков ("Қайсар"), Серікжан Мужиков, Даурен Жұмат (екеуі де – "Оқжетпес"), Исламбек Қуат, Дінмұхамед Караман (екеуі де – "Женіс"), Рамазан Оразов, Жан-Әлі Пайруз, Алмас Төлеубай, Ғалымжан Кенжебек (бәрі – "Елімай"), Ислам Чесноков ("Тобыл"), Муроджон Халматов, Эльхан Астанов (екеуі де – "Ордабасы"), Дамир Қасабулат ("Қайрат"), Георгий Жуков ("Ақтөбе").Шабуылшылар:Оралхан Өміртаев, Артур Шушеначев (екеуі де – "Ақтөбе"), Максим Самородов ("Ахмат", Ресей), Айбар Жақсылықов ("Қайсар"), Дастан Сәтпаев ("Қайрат"), Иван Свиридов ("Елімай"), Рамазан Каримов ("Астана").

Хейттің астында қалған Димаш Қашкен ұлттық құрамаға шақырту алмады

<a href="https://kyzylorda-news.kz/">Kyzylorda-news.kz</a> «AMANAT» партиясының «Ұлттық мұра» жобасы аясында Сырдария ауданында Ұлы Отан соғысының ардагері, майдангер ұстаз Шарапат Жансымақовты еске алуға арналған аудандық жыр мүшәйрасы өтті.&nbsp;Сайыстың ұйымдастырылуына партияның аудандық филиалы мен «Білім», «Қалжан ахун» бастауыш партия ұйымы және майдангердің ұрпақтары қолдау білдірді.Жыр мүшәйрасының ашылуында партия ардагерлері сөз сөйлеп, жеңісті жақындатуға үлес қосқан батыр майдангердің өмірі мен еңбек жолы туралы кеңінен айтып өтті.&nbsp;Мүшәйраға аудан мектептерінен 15 мұғалім қатысып, бірінші кезеңде майдангер ұстазға арнау өлең оқыса, екінші кезеңде еркін тақырыптағы жырларын ұсынды.<img class="image_resized" style="width:93.73%;" src="https://knadmin.beoblood.kz/uploads/Zhyr_m_sh_rasy_f5dc07dcd9.jpg" alt="Жыр мүшәрасы.jpg">Мәдени іс-шарада Қазақстан Жазушылар одағының Қызылорда облыстық филиалының төрайымы, халықаралық «Алаш» әдеби сыйлығының иегері, Сырдария, Шиелі аудандарының Құрметті азаматы Қаршыға Есімсейітова, «AMANAT» партиясы Сырдария аудандық филиалының Атқарушы хатшысы, фракция жетекшісі, ақын Ақтөре Ибрагимұлы, аудандық «Тіршілік тынысы» газеті бас редакторының орынбасары, Қазақстан Журналистер одағының мүшесі Балтабай Аябекұлы қазылық жасап, ақындардың шығармашылығын бағалады.Нәтижесінде жүлделі І орынды Айдарлы ауылындағы №139 орта мектебінің мұғалімі Салтанат Торғаева иеленді. ІІ орынды Қоғалыкөл ауылындағы №44 орта мектебінің мұғалімі Алмат Доспенбетов жеңіп алса, ІІІ орынды С.Сейфуллин ауылындағы №137 орта мектебінің мұғалімі Гүлсім Жоламановаға бұйырды. Қалжан ахун ауыындағы №126 орта мектебінің мұғалімі Мұхамеджан Мансұров пен Шіркейлідегі №129 Ә.Жәмішев атындағы мектеп-лицейінің мұғалімі Биболат Опабеков арнайы жүлде еншіледі. Қалған ақындарға ынталандыру сыйлықтары берілді. Жеңімпаздар мен жүлдегерлерге қаржылай сыйлықтар, дипломдар табысталды.

Архив