<a href="https://kyzylorda-news.kz/">Kyzylorda-news.kz</a> &nbsp;Өзбекстан Республикасының Нүкіс қаласында Бердақ атындағы Қарақалпақ мемлекеттік университетінің ұйымдастыруымен өткен «Қазіргі қарақалпақ филологиясының маңызды мәселелері» атты халықаралық ғылыми-теориялық конференцияға Қорқыт ата атындағы Қызылорда университетінің атынан философия докторы (PhD), Қазақ тілі мен әдебиеті және журналистика білім беру бағдарламасының жетекшісі Серікхан Жүзеев қатысты.Қарақалпақ тілі мен әдебиеті мамандығының 90 жылдық мерейтойына арналған бұл халықаралық шараға Орталық Азия елдері мен шетелдік беделді жоғары оқу орындарының жетекші ғалымдары, тілтану және әдебиеттану саласының мамандары жиналып, аймақтық тіл ғылымының өзекті мәселелерін талқылады. Конференция барысында филология ғылымдарының қазіргі даму бағыттары, түркологиядағы жаңа ғылыми әдіснамалар, әдеби мұраларды заманауи тұрғыдан зерделеу, тіл мен мәдениеттің жаһандану үдерістеріндегі орны сияқты маңызды ғылыми тақырыптар бойынша мазмұнды баяндамалар ұсынылды.Серікхан Әлханұлы ғылыми конференция барысында мазмұнды баяндама жасап, әртүрлі елдердің ғалымдарымен тәжірибе алмасып, зерттеулер бағытында университетаралық әріптестікті кеңейтуге бағытталған тығыз ғылыми байланыстар орнату мәселелерін көтерді.

Университет ғалымы Қарақалпақстанда өткен халықаралық конференцияға қатысты

<a href="https://kyzylorda-news.kz/">Kyzylorda-news.kz</a>&nbsp; Қорқыт ата атындағы Қызылорда университетінің «Экономика және құқық» институтында «Аманат» партиясының Қызылорда қалалық филиалының Атқарушы хатшысы, облыстық мәслихат депутаты Гүлшат Мусаеваның қатысуымен «Әлеуметтік жұмыс» және «Мемлекеттік және жергілікті басқару» білім беру бағдарламасының студенттеріне арналған «Адал азамат – Әділетті Қазақстан» тақырыбында дәріс өткізілді.Дәріс барысында әділетті қоғам құрудың маңызы, адал азаматтың қоғамдық дамуға ықпалы, ұлы тұлғалардың өнегелі пікірлері жайлы мәліметтер берілді. Сонымен қатар Президент Жолдауында атап көрсетілген негізгі бағыттар — әділетті Қазақстан қалыптастыру, тең мүмкіндіктер жасау, ашық қоғам құру, азаматтардың өмір сапасын арттыру мәселелері талқыланды. Адал азаматты тәрбиелеуде отбасының, мектеп пен жоғары оқу орындарының, қоғамдық ортаның және жеке дамудың рөліне назар аударылды.Шарада Әбу Насыр Әл-Фарабидің «Қайырымды қала тұрғындарының көзқарастары» еңбегіндегі адамзаттың өзара көмекке негізделген қоғам құру туралы тұжырымдары мысалға келтіріліп, оның әділетті мемлекет жайлы ойлары қазіргі реформалардың идеясымен үндес екені атап өтілді. Сондай-ақ Мемлекет басшысы Қасым-Жомарт Тоқаевтың «Жаңа Қазақстан – әділетті Қазақстан» қағидатының маңызы да сөз болды. Студенттер дәріс мазмұны бойынша белсенді пікір алмасып, өз көзқарастарын ортаға салды.

«Адал азамат – Әділетті Қазақстан» тақырыбында дәріс өтті

<a href="https://kyzylorda-news.kz/">Kyzylorda-news.kz</a>&nbsp; 25-26 қараша күндері Өзбекстанның Ташкент қаласында жоғары білім саласындағы маңызды халықаралық іс-шара – QS Eurasia Forum 2025 өтті. Биылғы форум «Broadening horizons: Building global bridges in higher education» тақырыбымен ұйымдастырылып, аймақ университеттерінің өзара байланысын нығайту мен халықаралық білім кеңістігіндегі серіктестікті арттыруды мақсат етті.Форумға Қазақстан, Әзірбайжан, Қырғызстан және Өзбекстан елдерінің жоғары оқу орындары, аймақтық және халықаралық сарапшылар, сондай-ақ жоғары білім саласындағы беделді тұлғалар қатысты. Ауқымды іс-шараның қатысушылары қатарында Қазақстан Республикасының Ғылым және жоғары білім министрі Саясат Нұрбек, Әзірбайжан Республикасының Ғылым және білім министрі Эмин Амруллаев, Түркия Жоғары білім кеңесінің төрағасы профессор Эрол Озвар, сондай-ақ QS Quacquarelli Symonds компаниясының президенті және басқарма төрағасы Нунцио Куакуарелли болды.<img src="https://knadmin.beoblood.kz/uploads/Whats_App_Image_2025_11_26_at_09_53_30_693ec1b9a1.jpeg" alt="WhatsApp Image 2025-11-26 at 09.53.30.jpeg">Форум барысында жоғары білім беру саласының өзекті мәселелері, аймақтық даму бағыттары, заманауи трендтер мен сын-қатерлер кеңінен талқыланды. Негізгі спикер ретінде сөз сөйлеген ҚР Ғылым және жоғары білім министрі Саясат Нұрбек Еуразияның жаһандық білім беру экожүйесіндегі рөліне тоқталды. Ол академиялық ұтқырлықты арттырудың, трансұлттық білім беру бағдарламаларын дамытудың және кадр даярлауда инновацияларды енгізудің маңыздылығын атап өтті. Сондай-ақ, министр жоғары білімнің өңірдің әлеуметтік-экономикалық дамуына тигізетін оң әсерін және халықаралық серіктестікті кеңейтудің өзектілігін &nbsp;айтты.Форум жұмысына Қазақстаннан 15 жоғары оқу орны қатысып, өздерінің білім беру бағдарламалары мен ғылыми бастамаларын, халықаралық ынтымақтастықтағы тәжірибелерін таныстырды.Іс-шара аясында жоғары білім саласындағы маңызды бағыттарды қамтыған бес негізгі пленарлық сессия өтті. Онда QS Stars жүйесінің мүмкіндіктері, әйелдердің жоғары білім кеңістігін қалыптастырудағы рөлі, университеттердің жаһандық өзара әрекеттесу стратегиялары, QS әлемдік рейтингтеріне дайындық тәсілдері және халықаралық студенттік ағымдардың жаңа үрдістері талқыланды.<img src="https://knadmin.beoblood.kz/uploads/Whats_App_Image_2025_11_26_at_09_53_29_1_fdd5d57ec6.jpeg" alt="WhatsApp Image 2025-11-26 at 09.53.29 (1).jpeg">Форумда Қорқыт ата атындағы Қызылорда университетіне “QS Stars” сертификаты табысталды. Бұл — университеттің халықаралық деңгейдегі жетістіктерінің және сапалы білім берудегі нәтижелі еңбегінің айғағы.Айта кету керек, Қорқыт ата университеті “QS Asia University Rankings 2026” нәтижесінде 593-орынды иеленді.QS Eurasia Forum 2025 — Қорқыт ата университеті үшін халықаралық білім беру кеңістігіндегі беделін арттырып, жаңа серіктестік бағыттарын айқындаған маңызды алаң болды.

Қорқыт ата университеті QS Eurasia Forum 2025 халықаралық форумына қатысты

<a href="https://kyzylorda-news.kz/">Kyzylorda-news.kz</a> &nbsp;Қорқыт ата атындағы Қызылорда университетінде Болат Өтемұратов қорымен Арал теңізінің құрғаған табанын қалпына келтіруге бағытталған ірі экологиялық жоба барысын талқылауға арналған жиын өтті.&nbsp;Бұл бастамаға серіктес ретінде Қорқыт ата атындағы Қызылорда университеті, Болат Өтемұратов қоры, Берклидегі Калифорния университеті, және Қазақстандағы Халықаралық Аралды құтқару қоры қатысуда.Жиынды Ғылыми жұмыстар және халықаралық байланыстар жөніндегі проректор Майнура Бурибаева ашып, жобаның экологиялық маңызы мен университеттің ғылыми әлеуетін атап өтті.<img src="https://knadmin.beoblood.kz/uploads/IMGL_8402_b8f0e9eb91.jpg" alt="IMGL8402.jpg">Ал Болат Өтемұратов қорының зерттеу, даму және интернационалдандыру жөніндегі директоры Темірлан Ербосынов:<blockquote>«Біздің пилоттық жоба экожүйені қалпына келтірудің жаңа тәсіліне негізделген. Берклидегі Калифорния университетінің E-seed атты инновациялық технологиясы алғаш рет Қазақстанда сынақтан өтуде. Арнайы биологиялық материалмен қапталған тұқымдар дрондар арқылы себіледі. Бұл әдіс үлкен аумақтарды аз шығынмен көгалдандыруға мүмкіндік береді. Жоба аясында Қорқыт ата университетімен бірлесе нақты жұмыстар атқарылады», – деді.</blockquote>Арал теңізі – ғаламшардағы ең ірі экологиялық апат аймақтарының бірі. Бір кездері 90 пайызға дейін тартылып кеткен теңіз түбі бүгінде тұз бен шаңның көзіне айналып, миллиондаған гектар жердің жарамсыз болуына әкелді. Бұл шаң тіпті Арктика мен Гималайға дейін жетіп, жаһандық экологиялық тепе-теңдікке қауіп төндіріп отыр.<img src="https://knadmin.beoblood.kz/uploads/IMGL_8492_85bcb79952.jpg" alt="IMGL8492.jpg">Пилоттық кезеңде 2026 жылға дейін 1 гектар аумаққа тұқым отырғызу жоспарланған. Егер сынақ сәтті өтсе, 2027 жылы 50 гектар жерге тұқым себіледі. Жоба құны шамамен 600 мың АҚШ долларын құрайды.2028–2029 жылдары аймақтың биологиялық алуандығы артып, ұсақ жануарлар мен құстардың көбеюі, ауаның ылғалдылығының жоғарылауы күтілуде. Ұзақ мерзімді мақсат – 2040 жылға дейін экожүйені тұрақтандыру, ауа температурасын төмендету және микроклиматты жақсарту. Қорқыт ата атындағы Қызылорда университетінің профессоры Рахат Құрманбаев өз сөзінде:<blockquote>«Жоба Арал өңірінің экологиялық ахуалын түбегейлі жақсартуға бағытталған. Жоба барысында біздің зерттеу тобымыз биологтардан, экологтардан, агрономдардан, су шаруашылығы, химия және IT саласының мамандарынан тұрады. Сондай-ақ жобаға магистранттар мен докторанттар да тартылады», – деді.</blockquote>Университет ғалымдарына «Тестілік кезеңін дайындау», «Қазақстанда 3000 E-seed контейнерін өндіру», «1 гектар тәжірибелік учаскеде тестілеу», «Мониторинг және бақылау» бағыттарындағы жұмыстар жүктеліп отыр.2024–2026 жылдары жобаны іске асыру барысында Қазақстан Республикасы Президенті Қасым-Жомарт Тоқаевтың қолдауымен және Халықаралық Аралды құтқару қорының қатысуымен нақты нәтижелерге қол жеткізу жоспарланған.Айта кетейік, 29 қазан күні Астана қаласында Болат Өтемұратов қоры, Берклидегі Калифорния университеті, Қазақстандағы Халықаралық Аралды құтқару қорының атқарушы дирекциясы және Қорқыт ата атындағы Қызылорда университеті арасында төртжақты меморандумға қол қойылған болатын.

Қорқыт ата университеті экожүйені қалпына келтіру бастамасына атсалысуда

<a href="https://kyzylorda-news.kz/">Kyzylorda-news.kz</a>&nbsp;Қызылорда қаласындағы NIS-тің оқушысы Александр Ли халықаралық ғылыми-практикалық «Логос 2025» конференциясында І дәрежелі дипломмен марапатталды. Дәстүрлі шараға Қазақстан, Ресей және Беларусь елдерінің жас зерттеушілері қатысып, гуманитарлық және әлеуметтік ғылымдар бағытындағы ауқымды зерттеу жұмыстарын ұсынды.Қатысушылар тарих, әдебиет, экономика, заманауи технологиялар, сондай-ақ жасанды интеллекттің білім беру және әлеуметтік үдерістерге әсері тақырыптарында еңбектерін қорғады.Александр жетекшісі Гүлмира Бекеновамен бірге «ЖИ негізіндегі саяхатқа арналған қосымшалар әртүрлі жастағы пайдаланушылардың саяхаттау тәжірибесін қалай жақсарта алады?» тақырыбын зерттеді. Ол жасанды интеллект алгоритмдерінің жас ерекшеліктері мен пайдаланушылардың цифрлық сауаттылық деңгейін ескере отырып, туристік сервистерді неғұрлым ыңғайлы ете алатынын көрсетті. Сондай-ақ, әртүрлі жас санаттарына бейімделетін екі режимді интерфейс тұжырымдамасын жасап шығарды.

Александр Лидің зерттеу жұмысы халықаралық конференцияда жоғары бағаланды

<a href="https://kyzylorda-news.kz/">Kyzylorda-news.kz</a> Бүгін – Сыр өңіріндегі ғана емес, ел өміріндегі айтулы күн! Өйткені экономиканың күретамыры саналатын отандық жол инфрақұрылымын жетілдіру тарихының жаңа парағы ашылды! Халық көптен күткен, көлік жүргізушілері мен жолаушылардың арманына айналған «Қызылорда-Жезқазған» жолы пайдалануға берілді.Салтанатты рәсімге облыс әкімі Нұрлыбек Нәлібаев, «Қазавтожол» ҰК» АҚ басқарма төрағасы Дархан Иманашев, құқық қорғау органдарының бірінші басшылары, облыстық мәслихат хатшысы Мұрат Тілеумбетов, депутаттар және ардагерлер қатысты.Аймақ басшысы бұл жолдың өңір экономикасына, өндірістің өркендеуіне, тұрғындардың әл-ауқатының артуына тигізетін оң ықпалы мен ерекше маңызын атап өтті.<blockquote>«Бүгін – аймағымыз үшін тарихи күн! «Қызылорда-Жезқазған» автомобиль жолының ашылу рәсімінде бас қостық. Халқымыз ұзақ жылдан бері армандап келген автожолды салуға қолдау көрсеткен Мемлекет басшымыз Қасым-Жомарт Кемелұлына барша Сыр жұртшылығының атынан зор ризашылығымызды, шынайы алғысымызды білдіреміз.Республикалық маңызы бар автомобиль жолы туралы мәселе Тәуелсіздік алған кезеңнен бері бірнеше мәрте көтерілді. Ауа райының қолайсыздығына қарамастан, тұрғындарымыз қара жолмен Елордаға, Ұлытау, Қарағанды облыстарына қатынады. Астанаға 2 мың шақырымнан астам жол жүріп, Балқаш арқылы да барды.Енді міне, Президентіміздің ерекше қолдауының арқасында қанша жылдан бері халқымыз көтерген өзекті мәселе өз шешімін тапты. Облыс аумағындағы 216 шақырым жол толық қайта жаңғыртудан өтіп, тиісті жұмыстар аяқталды. Жобаны жүзеге асыруға 84 млрд. теңге бөлінді.Бұрынғы өткен бабалардан қалған «Бақ, қайда барасың, ынтымағы жарасқан елге барамын», – деген жақсы сөз бар. Әрдайым бірлігіміз бекем, ынтымағымыз ырысты болсын! Жүргізушілер мен жолаушыларға әрдайым ақ жол, сәт сапар тілейміз! Жаңа жол берекенің бастауы болғай», – деді Нұрлыбек Машбекұлы.</blockquote>Рәсімде ауқымды жобаның жүзеге асуына үлес қосқан құрылысшылар мен инженерлерге, жол саласының мамандарына облыс әкімінің Алғыс хаты табысталды. «Қазавтожол» ҰК» АҚ басқарма төрағасы Дархан Иманашев, облыстық ардагерлер кеңесінің төрағасы Серік Дүйсенбаев құттықтау сөз сөйледі.Негізі «Қызылорда-Жезқазған» жолының ашылуы келесі жылға жоспарланған болатын. Халықтың сұранысы ескеріліп, мерзімінен бұрын пайдалануға берілді.<img src="https://knadmin.beoblood.kz/uploads/588310925_2461691284226369_5897200104540059547_n_16d35524f7.jpg" alt="588310925_2461691284226369_5897200104540059547_n.jpg"><img src="https://knadmin.beoblood.kz/uploads/590425837_2461691577559673_2693692616413657905_n_d4c9225201.jpg" alt="590425837_2461691577559673_2693692616413657905_n.jpg">Бұрын сапарға шыққандар екі аралықта 20 сағат жол жүретін. Енді жаңа жолға түскен жолаушылар 16 сағатта діттеген жеріне барады. Жол тегіс, сапасы жоғары, қауіпсіздік, жайлылық ескерілген.Ұлытау облысының аумағында басталған құрылыс жұмыстары аяқталып, жаңа жол пайдалануға берілгенде Астанаға бағыт алған көлік 12 сағатта жететін болады.Бүгінде «Қызылорда-Жезқазған» жолын «Батыс Еуропа-Батыс Қытай» автодәлізіне қосатын 25 шақырымдық айналма жол салатын мердігер мекеме анықталуда. Жақын күндері құрылысы басталады. Жоба құны – 46 млрд. 3 млн. теңге.<img src="https://knadmin.beoblood.kz/uploads/586964906_2461691604226337_7306959996438302161_n_ccf1f94fb7.jpg" alt="586964906_2461691604226337_7306959996438302161_n.jpg">Республикалық маңызы бар жол көлік қатынасын едәуір жеңілдетіп, жүк тасымалының тиімділігін арттырады. Жол бойында заманауи сервистік қызмет көрсететін пункттер бой көтеріп, шағын және орта бизнес жанданады. Аймақтар арасындағы әлеуметтік-экономикалық интеграция нығая түседі.Фото: Қызылорда облысы әкімінің баспасөз қызметі

«Қызылорда- Жезқазған» жолы пайдалануға берілді

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен Үкімет отырысы өтті. Күн тәртібінде өңдеу өнеркәсібін дамыту және цифрландыру, Үкімет қаулыларының жобалары қаралды. Оған облыс әкімінің бірінші орынбасары Данияр Жаналинов селекторлық режим арқылы қатысты.Үкімет отырысынан кейін облыс әкімінің бірінші орынбасарының төрағалығымен өткен мәжілісте осы және өзге де мәселелер жан-жақты талқыланып, жауапты басшыларға тапсырма берілді.<blockquote>«Өңдеу өнеркәсібінің көлемін барынша арттырып, жыл қорытындысымен оң динамикаға жету үшін нақты әрі жедел шаралар қабылдауды тапсырамын. Өңірдегі ірі өнеркәсіптік кәсіпорындардың өндірістік жоспарын нақтылау керек. Туындаған мәселелерін жедел шешіп, қосымша өсім көздерін анықтаңыздар.Теміржол вокзалдарының сыртқы келбеті ғана емес, жолаушыларға қызмет көрсету деңгейі де жоғары болуы тиіс. «Қазақстан Темір Жолы» компаниясының облыстық филиалы, көрсетілетін қызмет сапасын қадағалаңыздар. Вокзалдар аумағының абаттандырылуын, көгалдандырылуын, санитарлық тазалығын тұрақты бақылау қажет.Қала, аудан әкімдері, тек теміржол вокзалдарының аумағы ғана емес, автовокзалдардың, жолдар мен көпірлердің, жол бойындағы май құю бекеттері мен сервистік кешендердің күтіп ұсталуы назарда болуы керек», – деді Данияр Еренғалиұлы.</blockquote>Биылғы 10 айда аймақта 328 млрд теңгенің өнімі өндіріліп, өңдеу өнеркәсібінде 10,7% өсім тіркелді. Экономиканы әртараптандыру аясында жоспарланған 20 жобаның 13-і іске қосылды, қалған 7-уі жыл соңына дейін пайдалануға беріледі. Соңғы бес жылда өңдеу өнеркәсібінің жалпы өнеркәсіптегі үлесі 12,9% өсіп, өнім көлемі 2,6 есе артты.Өңір кәсіпорындары цифрлық және автоматтандырылған технологияларды кеңінен қолдануда. Шыны зауыты өнім жинау мен тасымалдауда жапон роботтарын, ал шыны кесуде италиялық автоматты пайдаланады.Тампонажды цемент зауытының өндірісіне Siemens басқару жүйесі мен интеллектуалды логистика енгізілген. «Мағжан и К» күріш зауыты кореялық толық автоматтандырылған жүйемен жұмыс істейді.Фото: Қызылорда облысы әкімінің баспасөз қызметі

Өңдеу өнеркәсібін дамыту және цифрландыру мәселелері қаралды

<a href="https://kyzylorda-news.kz/">Kyzylorda-news.kz</a> Қазақстан экономикасы соңғы жылдардағы ең тұрақты әрі сенімді өсім қарқынын көрсетуде. 2025 жылдың он айының қорытындысы бойынша елдің жалпы ішкі өнімі 6,4%-ға артты, бұл көптеген аналитиктер мен халықаралық сараптамалық институттардың болжамдарынан айтарлықтай жоғары. Мұндай өсім ішкі сұраныстың кеңеюі, инвестициялық белсенділіктің күшеюі және негізгі салалардың қалпына келуі нәтижесінде қалыптасып отыр.Айта кету керек, оң серпін экономика салаларының басым бөлігінде байқалады — қызмет көрсету мен саудадан бастап өнеркәсіп пен агроөнеркәсіп кешеніне дейін. Әсіресе нақты сектордың нығаюы анық көрінеді: өндіріс көлемі артып, қуаттар жаңартылып, инвестициялық белсенділік күшеюде.ЖІӨ өсіміне ең үлкен үлес өнеркәсіп саласына тиесілі — плюс 7,3%. Бұл жалпы өсімнің 30%-дан астамын қамтамасыз етті. Сауда және көлік салаларымен бірге өнеркәсіп ЖІӨ өсімінің 70%-дан астамын құрады.Экономиканың жекелеген секторларының өсімге қосқан үлесі төмендегідей:<ol><li style="text-align:justify;">&nbsp;көлік және қоймалау — *+20,7%*;</li><li style="text-align:justify;">&nbsp;құрылыс — *+15,1%*;</li><li style="text-align:justify;">&nbsp;өнеркәсіп — *+7,3%*;</li><li style="text-align:justify;">&nbsp;сауда — *+9%*;</li><li style="text-align:justify;">&nbsp;ауыл шаруашылығы — *+5,4%*;</li><li style="text-align:justify;">байланыс — *+4%*.</li></ol>Өнеркәсіптің өз ішінде тау-кен өндіру секторы 9,6%-ға, өңдеу саласы 5,8%-ға өсті. Өңдеуші өнеркәсіптегі өсім келесі бағыттардағы өндірістің артуымен байланысты:<ol><li style="text-align:justify;">&nbsp;машина жасау — *+11,5%, оның ішінде автомобиль жасау — *+13,3%**;</li><li style="text-align:justify;">&nbsp;химия өнеркәсібі — *+10,9%*;</li><li style="text-align:justify;">&nbsp;тамақ өнімдері өндірісі — *+9,1%*;</li><li style="text-align:justify;">&nbsp;мұнай өңдеу — *+6,3%*;</li><li style="text-align:justify;">&nbsp;металл бұйымдары өндірісі — *+14,1%*;</li><li style="text-align:justify;">&nbsp;құрылыс материалдары — *+5,3%*.</li></ol>Бұл жан-жақты өсім Қазақстан экономикасының бірнеше тәуелсіз драйверлерге сүйеніп, неғұрлым тұрақты әрі әртараптандырылған модельге бет алғанын дәлелдейді. Сонымен қатар, Қазақстан ЖІӨ өсімінің қазіргі қарқыны әлемдік орташа көрсеткіштен әлдеқайда жоғары: ЭЫДҰ болжамынша, биыл жаһандық ЖІӨ небәрі 3,2%-ға өседі.Экономиканың тұрақты өсуіндегі «Самұрық-Қазына» қорының рөліҚазақстан экономикасының ұзақ мерзімді тұрақты дамуы негізгі салаларды жаңғырту және стратегиялық жобаларды қолдау сияқты мақсатты шараларсыз мүмкін емес. Осы міндеттерді іске асырудың басты құралдарының бірі — «Самұрық-Қазына» Ұлттық әл-ауқат қоры.Ұлттық компанияларды жаңғыртуға, жаңа технологияларды енгізуге және инфрақұрылымдық жобаларды дамытуға бағытталған инвестициялар өндірістік қуаттардың артуына және экспорттық әлеуеттің нығаюына елеулі әсер етуде. 2025 жылы қор тобының инвестициялық портфеліне жалпы құны 50 трлн теңгеден асатын шамамен 130 жоба кіреді. Оның ішінде 46 жоба — мұнай-газ, мұнай-химия, энергетика, көлік-логистика, құрылыс және басқа да салалардағы жаңа ірі бастамалар. Олардың жалпы инвестиция көлемі – 33,3 трлн теңге.Жаңа жобалар қатарында:<ol><li style="text-align:justify;">&nbsp;«Комфортты мектептер» пилоттық ұлттық жобасы — 1,4 трлн тг;</li><li style="text-align:justify;">&nbsp;энергетика нысандарын салу, қайта жаңарту және жаңғырту бағытындағы 18 жоба — 10,3 трлн тг;</li><li style="text-align:justify;">&nbsp;Қазақстан бойынша 5G желісін салу — 536,9 млрд тг;</li><li style="text-align:justify;">«НИНТ» АЭА (Қарабатан учаскесі) инфрақұрылымын салу — 619 млрд тг;</li><li style="text-align:justify;">&nbsp;«Мойынты — Қызылжар» теміржол желісі (320 км) — 566 млрд тг;</li><li style="text-align:justify;">басқа да бастамалар.</li></ol>Қордың қаржылық нәтижелері2024 жылдың қорытындысы бойынша «Самұрық-Қазына» тобының активтері 41,1 трлн теңгеге жетті — бұл өткен жылмен салыстырғанда 11,3% көп және соңғы тоғыз жылдағы ең жоғары өсім. Негізгі көрсеткіштердің барлығында оң динамика байқалады:<ol><li style="text-align:justify;">түсім — *+6,5%* (16,4 трлн тг);</li><li style="text-align:justify;">&nbsp;меншікті капитал — *+17,7%* (25,6 трлн тг);</li><li style="text-align:justify;">&nbsp;таза пайда — *+38,6%* (2,4 трлн тг).</li></ol>Қор барлық бағыттар бойынша оң тренд көрсетуде:<ol><li style="text-align:justify;">&nbsp;шикі мұнай сату — *+1,2%*;</li><li style="text-align:justify;">жүк теміржол тасымалы — *+11,4%*;</li><li style="text-align:justify;">уран өнімдері сату — *+23,3%*;</li><li style="text-align:justify;">аффинирленген алтын өткізу — *+55%*;</li><li style="text-align:justify;">&nbsp;телекоммуникациялық қызметтер — *+9,4%*.</li></ol>Қор табыстарын экономиканы жаңғыртуға және әртараптандыруға қайта бағыттайды. Бұл мемлекет басымдықтарымен де, қордың қаржылық тұрақтылығымен де үйлеседі.Корпоративтік басқару және тиімділікІшкі басқару процестерінің жетілдірілуі — қор жұмысының маңызды бөлігі. Тәуелсіз директорлардың қатысуы, ашықтықтың артуы және халықаралық тәжірибеге бейімделу операциялық тәртіпті нығайтады. Қордың негізгі мақсаты — ұлттық компаниялар арасында синергия құрып, олардың бірлескен тиімділігін арттыру.Сонымен бірге қор стратегиялық мемлекеттік міндеттерді де, нарықтық тиімділік қағидаттарын да үйлестіре отырып, аралас басқару моделін қолданады. Әлеуметтік маңызы жоғары салаларда — теміржол тарифтері, өңірлік инфрақұрылым — әлеуметтік тұрақтылық басым. Ал бәсекелі секторларда — мұнай-газда — инвестициялық тиімділікке басымдық беріледі.2024 жылы қордың елдің тұрақты дамуына қосқан үлесі шамамен 11 трлн теңгеге бағаланды.Әлеуметтік ықпалы2024 жылы қордың әлеуметтік ықпалы 916 млрд теңгені құрады. Бұл:<ol><li style="text-align:justify;">&nbsp;«Қазақстан халқына» қорына аударымдар,</li><li style="text-align:justify;">&nbsp;Samruk-Kazyna Trust жобалары,</li><li style="text-align:justify;">&nbsp;қызметкерлерді әлеуметтік қолдау,</li><li style="text-align:justify;">өңірлерге көмек,</li><li style="text-align:justify;">&nbsp;өндірістік қауіпсіздік шаралары.</li></ol>Қор компаниялары 256 мыңнан астам адамды жұмыспен қамтып отыр.Экономикалық ықпалыЭкономикаға қосқан үлес — 8 256 млрд теңге:<ol><li style="text-align:justify;">&nbsp;салықтар — 2 086 млрд тг;</li><li style="text-align:justify;">дивидендтер — 737 млрд тг;</li><li style="text-align:justify;">инфрақұрылымға инвестициялар — 1 928 млрд тг;</li><li style="text-align:justify;">қазақстандық өндірушілерден сатып алулар — 3 505 млрд тг.</li></ol>Экологиялық ықпалЭкологиялық шығындар мен жобаларға бағытталған сома — 543 млрд тг. Бұған:<ol><li style="text-align:justify;">&nbsp;экологиялық төлемдер,</li><li style="text-align:justify;">ластануды азайту технологиялары,</li><li style="text-align:justify;">&nbsp;энергия тиімділігі,</li><li style="text-align:justify;">зерттеулер,</li><li style="text-align:justify;">өндіріс орындарын қалпына келтіру және экологиялық зардаптарды өтеу шығындары кіреді.</li></ol>Экономиканы субсидиялау2024 жылы қор соңғы тұтынушыларға түсетін жүктемені азайту үшін 1,3 трлн теңге көлемінде айқаспалы субсидиялау жүргізді:<ol><li style="text-align:justify;">&nbsp;теміржол тасымалдары — 358 млрд тг (транзит есебінен);</li><li style="text-align:justify;">ішкі нарықтағы мұнай өнімдері — 277 млрд тг («ҚазМұнайГаз» экспорттық кірістері есебінен);</li><li style="text-align:justify;">&nbsp;газ — 178 млрд тг (транзит және экспорт есебінен).</li></ol>Халықаралық тәжірибеСуверендік қорлар — әлемде кең таралған тәжірибе. Олар ұлттық байлықты жинақтау және экономиканы тұрақтандырудың тиімді құралдары.Өзбекстан 2024 жылы UzNIF — Ұлттық инвестициялық қор құрылды. Портфелі — 1,7 млрд доллар, энергетика, көлік, телеком, қаржы және өнеркәсіп секторларын қамтиды.Әзербайжан Екі негізгі құрылым бар:<ul><li style="text-align:justify;">&nbsp;AIH — 20–22 млрд долл актив;</li><li style="text-align:justify;">&nbsp;SOFAZ — 50–60 млрд долл актив, елдің басты суверендік қоры.</li></ul>Еуропа елдері (Ұлыбритания, Германия) Соңғы жылдары инфрақұрылым, энергетика және зейнетақы жүйелерін қолдау үшін жаңа қорлар құру бастамалары күшейді.2025 жылы әлемде 121 суверендік қор бар (бір жыл бұрын — 104).Өңірлік бөлініс:<ul><li style="text-align:justify;">Солтүстік Америка — 16;</li><li style="text-align:justify;">&nbsp;Латын Америкасы — 10;</li><li style="text-align:justify;">Еуропа — 19;</li><li style="text-align:justify;">Таяу Шығыс — 22;</li><li style="text-align:justify;">&nbsp;Африка — 17;</li><li style="text-align:justify;">&nbsp;Азия — 27;</li><li style="text-align:justify;">Австралия және Тынық мұхиты — 10.</li></ul>Әлемдік тәжірибе көрсеткендей, «Самұрық-Қазына» сияқты ірі ұлттық қорлар — экономикалық қауіпсіздікті нығайтатын, дамуға инвестиция салатын және елдің ұзақ мерзімді тұрақтылығын қамтамасыз ететін стратегиялық институттар.

Қазақстанның ЖІӨ өсімі әлемдік көрсеткіштен екі еседен асады

<a href="https://kyzylorda-news.kz/">Kyzylorda-news.kz</a> Қазан айындағы оң нәтижелер ел экономикасының өсуі бір реттік серпіндерге емес, құрылымдық өзгерістерге негізделгенін көрсетті. Өңдеу саласының кеңеюі, өңірлердің дамуы, экспорт пен өндіріс базасының әртараптанудың барлығы ұзақмерзімді тұрақтылықтың негізін қалайды.Ұлттық статистика бюросының деректеріне сәйкес, 2025 жылғы 10 айда елдің ішкі жалпы өнімі 6,4% өсім көрсетті. Бұл тоғыз айдағы көрсеткіштен 0,1 пайызға жоғары.Өсімнің басты драйверлері қатарында құрылыс, сауда, өнеркәсіп және ауыл шаруашылығы бар. Олардың барлығында дерлік өңірлік деңгейде оң динамика сақталуда.Маңыздысы нарықта қызып кету белгілері байқалмады. Өсу сапамен және өндіріс құрылымының жақсаруы­мен қатар жүруде. Бұл макроэкономикалық тепе-теңдіктің сақталғанын көрсетеді.

Қазақстан экономикасы жай өсу сатысынан сапалы даму рельсіне ауысты

<a href="https://kyzylorda-news.kz/">Kyzylorda-news.kz</a> “QazaqGaz” ұлттық компаниясының басшысы Әлібек Жамауов “Самұрық-Қазына”&nbsp;қорының Қоғамдық кеңесі отырысында Қазақстанда газдың көтерме бағасын арттыру қажет екенін&nbsp;мәлімдеді.&nbsp;Бұл туралы&nbsp;Stan.kz&nbsp;ақпарат агенттігі хабарлайды.Әлібек Жамауовтың айтуынша, тауарлық газдың көтерме бағасы кезең-кезеңімен өсіп&nbsp;жатқанына қарамастан, Қазақстан әлі де халық үшін көгілдір отынның тарифі ең төмен елдердің бірі болып отыр.“33% көлеміндегі соңғы түзетуді ескергеннің өзінде, ішкі нарықтағы “QazaqGaz” компаниясының жыл сайынғы субсидия көлемі 200 миллиард теңге деңгейінде қалып отыр. Сонымен қатар соңғы жылдары газ бағасының өсуі әлеуметтік маңызы бар тауарлардың көпшілігіне қарағанда әлдеқайда төмен болды. Бұдан бөлек, соңғы он жылдықта қазақстандықтардың коммуналдық шығындарындағы газдың үлесі 6,4%-дан 5,2%-ға дейін азайды”, — деді ол.Оның сөзінше, газдың тұрақты жеткізілуін қамтамасыз ету, инвестициялық жобаларды іске асыру және инфрақұрылымды дамыту үшін көтерме бағаны біртіндеп өзіндік құн деңгейіне дейін жеткізу қажет. Әлібек Жамауов бұл елдің энергия қауіпсіздігін нығайтып, Қазақстанның барлық өңірлерін сенімді түрде газбен қамтамасыз етуге мүмкіндік береді деп санайды.Фото: Ru.freepik.com

"Тарифі ең төмен елдердің біріміз": Қазақстанда газдың бағасын өсіру ұсынылды

<a href="https://kyzylorda-news.kz/">Kyzylorda-news.kz</a> Вице-премьер Қанат Бозымбаев су ресурстары және ирригация министрі Нұржан Нұржігітов, ауыл шаруашылығы министрі Айдарбек Сапаровпен бірге Қызылорда облысына жұмыс сапарымен барып, фермерлермен алдағы вегетациялық кезеңге дайындық, ауыл шаруашылығы дақылдарының егіс алаңдарын әртараптандыру және су үнемдеу технологияларын енгізу мәселелерін талқылады.Кездесуде Сырдария өзені бассейніндегі судың аздығы туралы қалыптасып отырған ахуал талқыланды. Нарын–Сырдария каскадына келіп түсетін су көлемі айтарлықтай төмендеген. Бұл келесі жылғы вегетациялық кезеңде су тапшылығы қаупін тудырады.Оның салдарын барынша азайту мақсатында Су ресурстары министрлігі су қоймаларының жұмыс режимдеріне қатысты бірнеше болжамдық нұсқа әзірледі. Су тым аз келген жағдайда ресурстарды қайта бөлу және лимиттерді түзету қажет болатын сценарийлер пысықталды.Су ресурстары шектеулі болған жағдайда ауыл шаруашылығы өндірісінің өнімділігін арттыру және азық-түлік қауіпсіздігін қамтамасыз ету мақсатында Ауыл шаруашылығы министрлігі ылғалды көп қажет ететін дақылдар алқаптарын қысқарту және құрғақшылыққа төзімді, аз су қажет ететін дақылдарды енгізу арқылы егіс алқаптарын әртараптандыру жұмыстарын жалғастырып келеді.Барлық су тұтынушылар судан тапшылық көрмеуі үшін және Сырдария өзенінің төменгі ағысында төтенше жағдай туындауына жол бермеу мақсатында Қызылорда облысында 2026 жылы күріш егістіктерінің алаңы 70 мың гектардан аспауға тиіс.Бір айта кететіні, егіс алқаптары жыл сайын оңтайландырылып жатқанына қарамастан, орташа өнімділік өсіп келеді (2024 жылы 85 мың га алқапта гектарынан 58 центнер, 2025 жылы 80 мың га алқапта гектарынан 58,1 центнер алынды). Бұған жаңа күріш сұрыптарын енгізу және заманауи техниканы пайдалану септік етіп отыр.Сондай-ақ өңірде су үнемдеу технологияларын қолданатын егістік көлемі артып келеді. Егін алқаптарында судың ысырап болуының алдын алу үшін лазерлік тегістеу жұмыстары жүргізілуде. Бұл әдіс суды 20%-ға дейін үнемдеп, өнімділікті арттыруға мүмкіндік береді. Биыл 60 мың гектар күріш алқабы тегістелді.Заманауи су үнемдеу технологияларын енгізу тәуекелдерді азайтып, АӨК-тің орнықты дамуын қамтамасыз етеді. Бүгінде бұл технологиялар республика бойынша 500 мың гектардан астам жерде қолданылуда, ал 2030 жылға қарай бұл көрсеткішті 1,3 млн гектарға дейін (суармалы жерлердің шамамен 70%-ы) жеткізу жоспарлануда. Аталған мақсаттарға жету үшін Үкімет кешенді шаралар қабылдауда, соның ішінде субсидиялау мәселелері де шешілуде.2026–2028 жылдарға арналған республикалық бюджеттің шеңберінде инвестициялық шығындарды өтеуге бағытталған жалпы трансферттер көзделген, ал қаржыландыру көлемі 215 млрд теңгеге дейін ұлғайды.<img src="https://knadmin.beoblood.kz/uploads/Vicze_premer_2_f4fc575151.jpg" alt="Вице-премьер 2.jpg"><blockquote>«Алдағы вегетациялық маусымда жоғарыдан келетін су көлемі айтарлықтай азаюы мүмкін. Ондай жағдайда су үнемдейтін технологиялар тыңайтқыштар мен өсімдікті қорғау құралдарымен қатар өсімдік шаруашылығы жүйесінің міндетті элементі болуы тиіс. Қызылорда облысының әкімдігі Су ресурстары және ирригация министрлігі, Ауыл шаруашылығы министрлігі және ғылыми ұйымдармен бірлесіп, инновациялық препараттарды қолдану үшін кемінде 100 гектар жер телімін анықтап, оларды жергілікті бюджет қаражаты есебінен қаржылық қолдауды қамтамасыз етуі қажет», — деді Қанат Бозымбаев.</blockquote>Кездесуде фермерлерге суды пайдалану ашықтығын қамтамасыз ету және су ресурстарын есепке алуды одан әрі цифрландыру үшін енгізіліп жатқан биллинг жүйесі туралы да айтылды. Бұл — фермерлерді сумен қамтудың толық циклін біріктіретін бірыңғай цифрлық платформа. Оның ішінде өтінім беру және келісімшарт жасасудан бастап, нақты тұтынуды есепке алу және төлем жасауға дейінгі функциялардың барлығы бар. Жүйе процестерді оңтайландырады, суды бөлу мен есеп айырысудың ашықтығын қамтамасыз етеді, сондай-ақ нақты көлемдерді дәл есепке алуға мүмкіндік береді.&nbsp;Вегетациялық кезең басталғанға дейін Қызылорда облысының әкімдігіне диқандар арасында тиісті түсіндіру жұмыстарын жүргізу тапсырылды. «Қазсушар» РМК-ға ылғалды көп қажет ететін дақылдарға бекітілген лимиттерге қатаң сәйкес келетін су беру шарттарын жасасу, сондай-ақ құқық қорғау органдарымен бірлесіп, алдағы вегетациялық кезеңде «қара су нарығымен» күресті күшейту тапсырылды.Су шаруашылығындағы ахуал өзгерген жағдайда Су ресурстары және ирригация министрлігіне 2026 жылғы вегетациялық кезеңге арналған өңірлер бойынша су тұтыну лимиттерін 2026 жылдың 1 ақпанына дейін Ауыл шаруашылығы министрлігіне жолдау жүктелді. Ал Ауыл шаруашылығы министрлігіне 2026 жылдың 1 наурызына дейін ылғалды көп қажет ететін дақылдардың егістік құрылымын нақты қолжетімді суару суының көлеміне сәйкес түзету тапсырылды.<img src="https://knadmin.beoblood.kz/uploads/Vicze_premer_4_f95cd03343.jpg" alt="Вице-премьер 4.jpg">

Ауыл шаруашылығы саласына қатысты бірқатар мәселелер қаралды

<a href="https://kyzylorda-news.kz/">Kyzylorda-news.kz</a>&nbsp; Өнер орталығында ұлы ойшыл, ақын, философ Абай Құнанбайұлының 180 жылдығына орай «Абай» операсының премьерасы өтті. Премьераны облыс әкімінің бірінші орынбасары Данияр Жаналинов, облыс әкімінің орынбасары Мейрамбек Шермағанбет, мәслихат депутаттары, зиялы қауым өкілдері, қоғамдық кеңес мүшелері, қала тұрғындары тамашалады. «Абай» трагедиясы - еліміздің мәдени өмірін дүр сілкіндірген қайталанбас кесек туынды. ХХ ғасырдың 30-40 жылдары қолға алынып, М.Әуезов шығармашылығының маңызды бағыты болған Абайдай ғұламаның тақырыбы, қайталанбас келбеті оқырмандарынан бұрын сахнада сомдалған бейнесі арқылы халқының жүрегінен орын алды. Мұхтар Әуезовтің либреттосына жазылған Ахмет Жұбанов пен Латиф Хамидидің айтулы операсы тек жақсы мен жаманның айқасын бейнелеген қойылым ғана емес, қазақ халқының жан дүниесінің алуандығы мен тереңдігін көрсететін айна, көшпелі өмірдің бірегей салты мен философиясын паш ететін тағылымды туынды.Кейіпкердің ой тереңдігін, сөзінің өткірлігін, тіл шеберлігін, азамат ретіндегі беделін филармония әртістері негізгі қалпын сақтап, асқан шеберлікпен көрермен қауымға жеткізді.<img src="https://knadmin.beoblood.kz/uploads/yzylordada_Abaj_operasyny_premerasy_tti_b2af196923.jpg" alt="Қызылордада Абай операсының премьерасы өтті.jpg">Ерекше классика кешін халықаралық және республикалық конкурстардың лауреаты Рустам Рысмағамбетовтің дирижерлік етуімен облыстық симфония оркестрі сүйемелдеді. Оркестрдің көркемдік жетекшісі және бас дирижері – Қазақстанның еңбек сіңірген қайраткері, профессор Мүсілім Әмзе. Тұтас сахналанған операға аралас хор ұжымы (көркемдік жетекшісі – А.Қуаныш), «Томирис» би ансамблі (көркемдік жетекшісі – халықаралық және республикалық конкурстардың лауреаты М. Тойбазарова), «Ai-Aru» заманауи би ансамблі (көркемдік жетекшісі – халықаралық және республикалық конкурстардың лауреаты З.Стықбаева), «Әдемі» балалар музыкалық театр-студиясы, (көркемдік жетекшісі – Қ. Боранбаев) және филармония солистері қатысып, көрерменге маңызы терең, философияға толы мәдени демалыс сыйлады.<img src="https://knadmin.beoblood.kz/uploads/yzylordada_Abaj_operasyny_premerasy_tti_1_4e69dd39ae.jpg" alt="Қызылордада Абай операсының премьерасы өтті 1.jpg">Операның қоюшы режиссері – Мәдениет саласының үздігі, «Ерен еңбегі үшін» медалінің иегері Әзиза Іздіқұлова.Абайдың жеке өмірі, шығармашылығы мен оны тұлға ретінде айшықтауға арналған бұл туынды ұлттық рухты оятатын, қоғамды бірлікке бастайтын зор қозғаушы күшке ие. Абай шығармашылығын, оның ғұмырнамалық, мәдени-рухани мұраларын сан-алуан үлгіде насихаттау қазіргі қазақ руханияты үшін аса қажет.Фото: Қызылорда облысы әкімінің баспасөз қызметі

Қызылордада "Абай" операсының премьерасы өтті

<a href="https://kyzylorda-news.kz/">Kyzylorda-news.kz</a> &nbsp;Бүгін Қызылордада «Бірлігі бекем Сыр елі» атты облыстық Қазақстан халқы Ассамблеясының республикалық форумы өтті.Оған облыс әкімінің орынбасары Мейрамбек Шермағанбет, Қазақстан халқы Ассамблеясының мүшесі, «Адал азамат» жобасының жетекшісі – амбасадоры, Қарағанды облыстық ақсақалдар кеңесінің төрағасы Бекзат Алтынбеков және Жамбыл облыстық «Қоғамдық келісім» мекемесінің директоры Мүбарак Жинақбаева арнайы қатысты.Аймақ басшысының орынбасары атаулы жылда атқарылған жұмыстарға тоқталып, форумға қатысушыларға сәттілік тіледі.«Мемлекет басшысы Қазақстан халқы Ассамблеясының отыз төртінші сессиясында сөйлеген сөзінде: «Былтыр еліміздің рухани және тарихи-мәдени ордасы Түркістанда жаңа Достық үйі ашылды. Достық үйлері тағы бірнеше қала мен аудан орталығында ашылады деп жоспарлануда. Мен бұл бастаманы қолдаймын. Біз қоғамдық келісім инфрақұрылымын біртіндеп кеңейте беруіміз керек» – деген болатын.<blockquote>Биылғы Ассамблеяның 30 жылдығы аясында баршамыз үшін қуанышты жаңалық – Қызылорда қаласында жаңадан «Достық үйі» салынды. Бұл – аймағымыздың бірлігі мен ынтымағын нығайтуға атсалысып келе жатқан этномәдени бірлестіктер мен барша Ассамблея белсенділерінің қажеттіліктерін қамтамасыз ететін замануи ғимарат болады», – деді Мейрамбек Зинабдинұлы.</blockquote>Форумда Бекзат Қомарұлы, Мүбәрәк Қасымқызы, Қазақстан халқы Ассамблеясы төрағасының қоғамдық негіздегі орынбасары Дильфура Бакишқызы сөз сөйлеп, пікір білдірді.Аймақта Қазақстан халқы Ассамблеясының 30 жылдығы мен 1 наурыз – Алғыс айту күніне арналған мерекелік іс-шарадан бастау алған мерейлі жыл аясында ауқымды жұмыс атқарылды. Сәуір айында еліміздің барлық өңірінен келген Ассамблея жастарының басын қосқан «Сыр елі – достық мекені» форумы ұйымдастырылып, қатысушылар Байқоңыр ғарыш айлағына барды. Онда Ассамблея жастарының Туы ғарыш кемесінің бортына табысталып, қонақтар зымыран ұшырылымын тамашалады.Мемлекет басшысының Жарлығына сәйкес Қазақстан халқы Ассамблеясының 30 жылдығына арналған мерекелік медальдар өңірдегі белсенді Ассамблея мүшелеріне салтанатты түрде табысталды.Сонымен қатар, облыстағы этномәдени бірлестіктердің онкүндіктері өткізіліп, аудан орталықтарына «Достық» көш-керуені жол тартты. Бұл шаралар мерейлі жылдың мазмұнын байытып, мәнін айшықтай түсті.Фото: Қызылорда облысы әкімінің баспасөз қызметі

Қызылорда облыстық Қазақстан халқы Ассамблеясының республикалық форумы өтті

<a href="https://kyzylorda-news.kz/">Kyzylorda-news.kz</a> Қала жастарының белсенділігін арттыру және волонтерлық қызметті насихаттау мақсатында «ЖАСТАР. ЖАУАПКЕРШІЛІК. ЖАНАШЫРЛЫҚ» тақырыбымен волонтерлар күніне арналған марапаттау шарасы ұйымдастырылды.Оған шаһардағы волонтерлық ұйымдар мен түрлі бағытта қызмет етіп жүрген белсенді жастар қатысты.Іс-шараға арнайы қала әкімінің орынбасары Ділмұхамед Абизов қатысып, жастардың ұсыныстарын тыңдап, еркін пікір алмасты. Ділмұхамед Мінуәрбекұлы волонтерлық қызметтің қоғамдағы маңыздылығын атап өтіп, белсенді жастарға алғысын білдірді.

Волонтерлар күніне орай қала жастарын марапаттау шарасы өтті

<a href="https://kyzylorda-news.kz/">Kyzylorda-news.kz</a> Облыстық мәслихат төрағасы Мұрат Тлеумбетов, облыс әкімінің орынбасары Ардақ Зебешевтің қатысуымен Шиелі ауданындағы №21 бекет және Жансейіт елді мекендеріне газ қосу рәсімі өтті. Оған жауапты сала басшылары, зиялы қауым өкілдері мен ауыл тұрғындары қатысты.&nbsp;Мәслихат төрағасы тұрғындарды көптен күткен игіліктің іске асуымен құттықтады.<img src="https://knadmin.beoblood.kz/uploads/Shieli_gaz_3_76127fbcd2.jpg" alt="Шиелі газ 3.jpg"><blockquote>«Мемлекет басшысы Қасым-Жомарт Кемелұлы ауылдарды дамытудың маңызын атап өтіп, тұрғындардың өмір сүру сапасын арттыруға қатысты бірқатар тапсырма берді. Бүгінде облыс тұрғындарының жартысынан астамы ауылдарда тұрады. Кейінгі жылдары облыс орталығымен қатар, ауылдарға да сапалы инфрақұрылым жеткізу ісі &nbsp;қарқын алды. Өңіріміздің негізгі макроэкономикалық көрсеткіштерінің өсімі қамтамасыз етілді. Биыл аймаққа 720 млрд. теңгеден астам инвестиция тартылса, алдағы жылдары 2 трлн. теңгеден астам қаржыға 90 инвестициялық жоба жүзеге асырылады. &nbsp;Бүгін мемлекеттің қолдауымен көгілдір отынға қол жеткізген ауылдағы әр үй қуаныш пен жылуға кенелуде. Баршаңыздың дендеріңізге саулық, отбасыларыңызға амандық тілеймін!», –деді Мұрат Жолкелдіұлы.</blockquote>Рәсімде ауданның әлеуметтік-экономикалық дамуына үлес қосқан алдыңғы буын ағалар мен мердігер мекеме қызметкерлері облыс әкімінің Алғыс хатымен марапатталды. Еңбек ардагері Насырбек Мырзабеков құттықтау сөз сөйледі.Соңғы жылдары Шиелі ауданындағы әлеуметтік инфрақұрылымды дамытуда ауқымды жұмыс атқарылды. Кентте 30 төсектік жұқпалы аурулар бөлімінің жаңа ғимараты, аудандық аурухана жанынан қосымша ғимарат, «Руханият орталығы», «Оқушылар үйі» мен «Өнер мектебі» пайдалануға берілді. Бестам ауылдық округінде 150 орындық ауылдық клуб, аудан орталығында дене шынықтыру-сауықтыру кешенінің құрылысы аяқталып, ел игілігіне айналды.Заманауи талаптарға сай жабдықталған бұл нысандар тұрғындарға сапалы қызмет көрсетуде.&nbsp;<img src="https://knadmin.beoblood.kz/uploads/Shieli_gaz_49427eb6ff.jpg" alt="Шиелі газ.jpg">

Шиелі: Қос елді мекенге табиғи газ қосылды

<a href="https://kyzylorda-news.kz/">Kyzylorda-news.kz</a>&nbsp; “AMANAT” партия алаңында ҚР Еңбек және халықты әлеуметтік қорғау министрлігі Мемлекеттік инспекциясы комитетінің Қызылорда облысы бойынша департаментінің басшысы Жұмағұлов Бектемір Ұлыбекұлы кесте бойынша қоғамдық қабылдауын өткізді.Қабылдауға келушілер еңбек шарттары, экологиялық төлемдер және зиянды жұмыс орындары бойынша үстемақы алу талаптары жайында кеңестер сұрап, еңбек қатынастарын жетілдіру аясында ұсыныстарын білдірді.Департамент басшысы тұрғындарға құзыреттілік шегінде заң нормаларын түсіндіріп, ҚР Еңбек Кодексінің талаптарын жеткізді.&nbsp;Еңбек қатынастары, жұмыс беруші мен жұмысшының міндеттері мен құқықтары айтылып, экологиялық және өзге де үстемақылар алу бойынша кеңес берілді.&nbsp;Еңбек қатынастарын жетілдіру бойынша айтылған ұсыныстар қаралып, қолданыстағы заңнамаға енгізу жолдары талқыланды.&nbsp;Қабылдау барысында аталған тақырыптар бойынша жазбаша өтініш білдірсе департамент тарапынан зерделеу нәтижесі бойынша жауап берілетіні хабарланды.

Еңбек қатынастары бойынша мәселелер қаралды

<a href="https://kyzylorda-news.kz/">Kyzylorda-news.kz</a> Ғылым және жоғары білім министрлігі жалған дипломға байланысты мәлімдеме жасады, деп хабарлайды ведомствоға сілтеме жасаған<a href="https://kaz.nur.kz/society/2316776-zangmen-qatang-zhazalanatynyn-eskertemiz-ministrlik-zhalgan-diplomga-bailanysty-malimdeme-zhasady/"> KAZ.NUR.KZ.</a>Министрліктің мәліметінше, қазіргі таңда интернет кеңістігінде жалған дипломдар туралы түрлі ақпарат кеңінен таралып жатыр.Құжаттардың заңсыз айналымының алдын алу мақсатында 1991 жылдан бері берілген дипломдардың деректер базасы құрылған.<blockquote>"Министрлік білім беру туралы құжаттардың өзіндік үлгісінің мазмұнына қойылатын негізгі талаптарды, сондай-ақ жоғары оқу орындары түлектеріне арналған осындай құжаттардың серияларын бекітті. Дипломдар арнайы модуль арқылы бірегей нөмірлер мен QR-кодтар беру жолымен қалыптастырылады. Жүйеге қол жеткізу құқығы осы модульде тіркелген, ресми түрде жауапты университет қызметкерлеріне ғана беріледі", - делінген хабарламада.</blockquote>Дипломдарды генерациялау "Жоғары білім берудің бірыңғай платформасы" (ЖББП) ақпараттық жүйесіндегі білім алушылар туралы деректер негізінде жүзеге асырылады. Егер білім алушы туралы ақпарат ЖББП-да болмаса, диплом нөмірін қалыптастыру мүмкін емес.Өзіндік үлгідегі білім туралы құжаттарда генерацияланған бірегей нөмір мен QR-код болмаған жағдайда мұндай құжаттар жарамсыз деп танылады.Министрлік сонымен қатар Мәдениет және ақпарат, Ішкі істер министрліктері жалған дипломдарды дайындау және сату фактілерін тұрақты түрде бақылап, тоқтатып отыратынын еске салды.<blockquote>"ҚР Қылмыстық кодексінің 385-бабына сәйкес жалған құжаттарды жасау немесе қолдану айыппұл салуға, түзеу жұмыстарына немесе екі жылға дейін бас бостандығын шектеу не айыруға әкеп соғады. Бүгінгі таңда 46 жалған диплом және оларды заңсыз дайындаумен айналысқан 20 интернет-ресурс анықталды. Материалдар ІІМ мен МАМ-ға жолданды. Жалған дипломдарды жасау немесе пайдалану заңмен қатаң жазаланатынын ескертеміз", - делінген хабарламада.</blockquote>Министрлік өкілдері жоғары оқу орындары деректерді цифрландыру жұмысын жалғастыратынын, ал жұмыс берушілер дипломның түпнұсқалығын арнайы сервис арқылы тексере алатынын айтты.Дипломның электрондық нұсқасы электрондық үкіметтің мобильді қосымшасында да қолжетімді.Фото: gov.kz

Бас тақырыптар